<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Асылбек Шәменов құқық қорғау саласының басшыларымен бірге тұрғындарға жеке қабылдау өткізді. БАҚ-да және әлеуметтік желілерде алдын ала берілген хабарландыруды естіп келген азаматтар өз мәселелерін ашық түрде қоюға мүмкіндік алды.«AMANAT» партиясының қалалық филиалы ғимаратында өткен жеке қабылдауға қала прокурорының орынбасары мен қалалық полиция басқармасы бастығының орынбасары қатысты.«Халық үніне құлақ асатын мемлекет» қағидасына негізделген қабылдауда барлығы 82 азаматтың өтініші қаралды. Қала әкіміне 70-ке жуық тұрғын келді. Көпбалалы аналар мен мүгедектігі бар жандар және жұмыссыз жүрген азаматтар өз мәселесін жеткізді. Басым бөлігі – тұрғын үй алу жолдарын сұрап, денсаулық жағдайына байланысты медициналық көмекке мұқтаж екенін айтып, сауалдарын жолдады.Қала әкімі Асылбек Шаменов мәселесін айтып келген тұрғындарға нақты жауап беріп, жауапты сала басшыларына тапсырма берді. Ал, құқық қорғау органдарының басшылары қабылдауға келген азаматтарға заң аясында түсіндірме жасады. Бүгінгі Қызылорда қаласы әкімі Асылбек Шәменовтың қабылдауына келген адамдардың қарасы қалың. Олардың басым көпшілігі жеке шаруасымен келген.

Қызылорда қаласының әкімі жеке қабылдау өткізді

<a href="https://kyzylorda-news.kz/">Kyzylorda-news.kz.</a> Бүгінде емханаға бара қалсаңыз баласын құшақтап жүрген ата-ананы жиі кездестіріп жатамыз. Дәрігердің кезегінде тұрған аналардың да қарасы қалың. &nbsp;Көбісі жаңа туған сәбиін көрсетуге алып келеді. Ауырмай баланың өспейтінін белгілі ғой. Дегенмен бұл сіз бен біз жақсы білетін суық тию не болмаса іш қату деген аурулар емес. Аты да, заты да басқа аурудың түрі.«Балама 1 ай. Дәрігер «дисплазия» деп диагноз қойды. Массажға ерте бастан апарып, ем-дом қабылдасаңдар кетеді дейді. Бала – бар байлығымыз. Сондықтан біз ата-анасы ретінде бар жағдайды жасауға тиіспіз. Бұйырса массаж алуға баламды алып барамын», дейді жас ананың бірі.Иә, қазірде жаңа туған сәбилерге осы секілді түрлі диагноз қояды. Біріне – гипоксия, енді біріне – рахит, келесісіне дисплазия сынды ауруларды айтады. Балалар арасында мұндай аурудың жиі ұшырасуын экологиядан, ананың жүктілік кезінде дұрыс тамақтанбауынан, күтінбеуінен дейді мамандар. Осы орайда дәрігерлер баланы массажға апаруға кеңес береді. Себебі жаңа туған сәбидің 1 жасқа дейін қалыптасуы өте маңызды. Сондықтан әрбір жаңа туған нәрестеге сауықтыру жаттығуларын істеп, аурудың алдын алуға мүмкіндік бар. Дегенмен Қармақшы ауданында білікті массаж мамандар аз. Сол себепті мұндағылар қала асып, сонда барып ем қабылдауға мәжбүр.Сәуле Байбуланова – аудандағы массаж істейтін жас маманның бірі. Негізгі білімі – формацепт. Әйтсе де бұл салада жұмыс тәжірибесі болмаған соң массаж үйренуді қолға алып, Алматы қаласындағы «Алтын алақан» балалар массаж орталығында Гүлмира Бекболқызынан білім алған. Білікті маманның 30 жылға жуық тәжірибесіне қызығып одан дәріс алу үшін Алматы қаласына барып оқып-үйреніп, сертификат алып шығады. Сөз арасында тәжірибелі маманнан дәріс алып, массаж түрлерін меңгергеніне қуанатынын да жасырмады. Арнайы білім алып шыққан соң ол осы массажды кәсібіне айналдыруда. 2019 жылдан бастап жеке кәсіпкер ретінде тіркеліп, бүгінде сәбилерге сауықтыру массажын жасап келеді. Сонымен қатар ол бір орында тұралап қалмай, үнемі білімін шыңдап отырғанды дұрыс көреді. Түрлі курс пен сабақтардан қалыс қалмайды. &nbsp;Қазірде қоғамда массаж маманы керек-ақ. Рас, бүгінде балалар аурушаң. Нәрестелердің дені, яғни 70-80 проценті дисплазия немесе гидроцефалия (бас сүйек куысында ми-жұлын сұйықтығы көлемінің көбеюі) дертімен бірге туылуда. Ал бұл аурулардың бірден-бір емі – массаж. Бұл үшін тек сауатты әрі тыңғылықты жасалатын массаж ғана көмектесе алады.Сәуле Әкімбекқызы балаларды сауықтыру үшін жасалатын массаж түрлерін жақсы біледі. Қазіргі таңда балаларға дисплазия диагнозы бойынша ұршығына арналаған электрофарез емін кең қолдану үстінде. Сондай-ақ балалардың қақырығын шығаруға арналған дренажды массаж бен нүктелі массаж түрлерін де толық меңгерген. Осы орайда маманға алдын ала жазылып келушілердің қатары күн санап көбейіп келеді.<blockquote>«Жаңа туған баланың жамбас сүйегі мен аяқ сүйегінің орны дұрыс болмаса онда дисплазия диагноз қойылады. Жаңа туған 10 қыздың 7-еуінде дисплазия диагнозы анықталады. Ал бұл көрсеткіш ұл балаларда азырақ. 4-6 айға дейін дисплазия диагнозы қойылып, осы кезден бастап массаж қабылдаса 2-3 курстан соң кетеді. Сол себепті балаға дер кезінде массаж қабылдауға кеңес беремін. Массажды ауыртып, қатты қол батырып жасаса, солай дұрысырақ деп ойлайтындар да бар. Ол қате пікір. Алғашында бұлшықеттердің ауырсынуы орынды, әрине, бірақ массаж бір-екі күннен кейін жағымды әсер беруі тиіс. Егер массаж жасалған жері көгерген немесе қатты қанталаған болса, демек массаж дұрыс жасалмаған», дейді кәсіпкер.</blockquote>Балалар массажы бұл жаңа туған 1 жасқа дейінгі сәбиге де, жалпы балалар үшін өте қажет. Жағымды көңіл-күй, тыныштандыру мен балаларда жиі кездесетін іш кебуді басатын массаждар бөбегіңізге қуаныш сыйлайды. Баланы жайлап сылап-сыйпау психологиялық тұрғыдан тыныштандыра отырып, белсенділігін де арттыра түседі.Адамдар массаж алсақ барлық аурудан құтыламыз деп ойлайды. Шын мәнінде массаж ауруды жеңілдетіп, сауығып кетуіне күш береді. Ал қалған 80 проценті адамның өзіне байланысты. Сондықтан балаңыздың да, өзіңіздің де денсаулығыңызды күткеніңіз абзалырақ.

Қармақшылық жас кәсіпкер көкжиегін кеңейтіп отыр

<a href="https://kyzylorda-news.kz/">Kyzylorda-news.kz.</a> Биыл жыл соңына дейін 982 пәтерлік 23 тұрғын үй халық игіліне табысталады. Бұл туралы VІІІ шақырылымдағы облыстық мәслихаттың бірінші сессиясында облыс әкімі Нұрлыбек Нәлібаев хабарлады.Аймақ басшысы жаңадан сайланған мәслихат депутаттарына осы уақытқа дейін атқарылған жұмыстарды баяндап, алдағы уақытта қолға алынатын жобаларды таныстырды.<blockquote>«Биыл жыл соңына дейін 982 пәтерлік 23 тұрғын үй халық игіліне табысталмақ. Бұдан бөлек, республикалық бюджеттен 9,6 млрд. теңге, облыстық бюджеттен 800 млн. теңге бөлініп, 1000 пәтер сатып алынады. Бұл пәтерлер халықтың әлеуметтік осал топтарына табысталады. Алғаш рет 130-дан астам жас отбасыға арнайы қабылданған «Сыр жастары» бағдарламасымен жеңілдетілген ипотекалық несие беріледі. Ол үшін жергілікті бюджеттен 1,2 млрд. теңге, «Отбасы» банкінен 500 млн.теңге, барлығы 1,7 млрд. теңге қаражат бөлінді. Бұл – жас отбасылардың баспаналы болуына айтарлықтай қолдау», – деді облыс әкімі.&nbsp;</blockquote>Коммуналдық инфрақұрылымды дамытуда да оң өзгерістер жетерлік. Облыс халқының 97,8 пайызы орталықтандырылған су жүйесіне қосылған. Бұл көрсеткішті 100 пайызға жеткізу бойынша жұмыстар жасалуда.Өткен жылы 6 елді мекен көгілдір отынға қосылып, халықты газдандыру деңгейі 70 пайызға жетті. Биыл 12 ауылды газдандыру арқылы газбен қамту деңгейін 72 пайызға жеткізу жоспарлануда.<figure class="image"><img src="https://knadmin.beoblood.kz/uploads/338393791_6474732949217661_6617564370498509451_n_a4264f1c7d.jpg" alt="338393791_6474732949217661_6617564370498509451_n.jpg"></figure><figure class="image"><img src="https://knadmin.beoblood.kz/uploads/339104298_745570110255177_5750363338384617355_n_6355231f43.jpg" alt="339104298_745570110255177_5750363338384617355_n.jpg"></figure>

Биыл Сыр өңірінде мыңға жуық отбасы қоныс тойын тойламақ

​<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Асылбек Шаменов Титов, Гагарин, Әл-Фараби, Бәйтерек, Арай және Саяхат шағын аудандарының тұрғындарымен кездесті. Жүздесу барысында шаһар басшысы алдағы уақытта атқарылатын жұмыстарға тоқталып, халық жолдаған сауалдарға жауап берді.​Биыл қала аумағында абаттандыру жұмыстары қарқынды жүргізілуде. Аяқ су жетпеген жерлердің арықтары аршылып, жер асты су ұңғымалары арқылы аяқ су жіберілуде.​Тұрғындар жиі сынға алатын қоғамдық көлік мәселесі де оң шешімін тапты. Облыс әкімінің тікелей қолдауымен заманауи үлгідегі жаңа 150 дана автобус алынып, маршруттық бағыттарға қосылды. Алдағы күндері тағы 150 дана жаңа автобустар әкелінеді. Ол үшін облыстық бюджеттен 1 млрд 434 млн теңге бөлінді.​«Жайлы мектеп» Ұлттық жобасы аясында қалада заманауи үлгідегі 8 мектеп салынады. Оның бесеуінің құрылысы биылғы жылы басталады.​Тұрғындардың талаптарына сәйкес, «Бәйтерек» тұрғын ауданына «Қызылжарма» каналы арқылы өтетін автомобиль көпірінің құрылысын жүргізу үшін республикалық және облыстық бюджеттен 384,7 млн. теңге бөлініп, құрылыс-монтаж жұмыстары жүргізілуде. ​Бұдан бөлек, Ғ.Мұратбаев және Яссауи көшелерінің қиылысындағы темір жол арқылы өтетін жаяу жүргіншілерге арналған көпір құрылысына республикалық және облыстық бюджеттен 320,5 млн. теңге бөлініп, бүгінде көпірдің металл бөлшектері әзірленуде.​Қаланың басты көшелерінің бірі саналатын С.Бейбарыс көшесін қайта жаңғырту жұмыстарын жүргізуге республикалық және облыстық бюджеттен 2 млрд. 349 млн. теңге бөлініп, оның қазірде 4,2 шақырымы жаңғыртылуда.​Бюджеттің барлық түрлері мен мемлекеттік бағдарламалар арқылы жалпы құны 12 млрд. теңгеге қала мен оған қарасты кент және ауылдық округтердегі 238 көше жөнделеді. Жалпы биылғы жылы басымдық қаланың шет аймақтарындағы көшелерге берілді. ​Биылғы жылы жылу желілерін қайта жаңғыртуға 8 жоба әзірленді. Оған республикалық бюджеттен 8,2 млрд теңге бөлінді. Оның ішінде Сұлтан Бейбарыс көшесінің бойындағы жылу құбырларын жер астымен жүргізуге &nbsp;5,2 млрд теңгесі қаралды. Жұмыстар жақын күндері басталады. ​19 көшеге жаяу жүргіншілер жолын салу үшін облыстық бюджеттен 690 млн. теңге бөлінді.​Жергілікті бюджеттен бөлінген 1 млрд. 791,4 млн. теңгеге &nbsp;санитарлық тазалық және көркейту-көгалдандыру жұмыстары жүргізіледі. Қазіргі күні сквер-аллеяларға гүлдер мен газондар егу және арық жүйелерін тазалау, жасыл екпелерді суаруға арналған насостарды орнату жұмыстары басталды. ​Ең ірі жоба – «Бәйтерек» тұрғын ауданындағы тұрғын сектордың инженерлік-коммуникациялық инфрақұрылымына былтырғы жылы республикалық бюджеттен бөлінген 1 млрд. теңгеге 7 дана ұңғыма, 3 дана резервуардың құрылысы аяқталу үстінде Резервуарлар сәуір айында іске қосылады. Бұл арқылы «Бәйтерек» және Шанхай, КБИ тұрғын аудандарында орналасқан жеке тұрғын үйлер тұрақты қысымды сапалы ауыз сумен қамтамасыз етіледі.​Кездесуде тұрғындар берілген уәденің, айтылған сөздің орындалып жатқанына ризашылықтарын білдіріп, қала әкіміне бірқатар ұсыныстарын жеткізді. Шаһар басшысы талап-тілек ескерусіз қалмайтындығын айтып, мәселелерге байланысты жауапты сала жетекшілеріне тапсырмалар жүктеді.<figure class="image"><img src="https://knadmin.beoblood.kz/uploads/338486609_662288179037789_1495794790272630016_n_0ef6eb5fed.jpg" alt="338486609_662288179037789_1495794790272630016_n.jpg"></figure><figure class="image"><img src="https://knadmin.beoblood.kz/uploads/338499724_176346925242791_237540386637303905_n_1379c4b950.jpg" alt="338499724_176346925242791_237540386637303905_n.jpg"></figure><figure class="image"><img src="https://knadmin.beoblood.kz/uploads/338484646_531829022399350_2604925561383773356_n_dfc581cc5a.jpg" alt="338484646_531829022399350_2604925561383773356_n.jpg"></figure>

Қызылорда қаласының әкімі шет аймақ тұрғындарымен кездесті

<a href="https://kyzylorda-news.kz/">Kyzylorda-news.kz.</a> Корей халқының батыры, жауынгер - интернационалист, Хон Бом Доға арналған кітап жарық көрді. Бұл кітапта батырдың өмірбаяны толықтай жазылған. «Біздің халқымыздың генералы Хон Бом До» атауымен шыққан құнды дүниенің авторы Корея Йоннам университетінің докторы, құрметті профессор Ли Донсун.Бүгін Достық үйінде қонақта болған Кореяның халықаралық білім беру бағдарламаларының жетекшісі, филология ғылымдарының докторы, профессор Ким Фил Янг аталмыш кітапты Қызылорда облыстық Корей этномәдени бірлестігінің жетекшісі Елена Кимге табыстады.Мәртебелі меймандардың бұл сыйлығына үлкен ризашылығын білдірген бірлестік жетекшісі Корей халқының қаһарманы туралы кітап Хон Бом До атындағы музейдің төрінде тұратын болады деді. &nbsp;Сондай-ақ, екі ел арасындағы тарихи, салт-дәстүр, мәдениет және тілдік ұқсастықтарға ерекше тоқталып өтті. Тіл жанашыры, «Абай қазынасына саяхат» және «Мәміле» клубының жетекшісі Елена Пак туралы, оның қазақ тілі арқылы жеткен биік жетістіктерін алға тартты. Тарихқа, ел батырларына құрмет көрсеткен Корей елінен келген делегация мүшелеріне алғысын жаудырды.Кездесу аясында Қызылорда ашық университетінің ректоры, техника ғылымдарының докторы, профессор Қылышбай Бисенов екі ел арасындағы білім саласы бағытында жеткен көптеген жетістіктерге, алдағы бірлескен жобаларға тоқталды. Әсіресе профессор Ким Фил Янгтың қазақ тілі мен корей тілдік құрылымдылық жүйелерін сaлыстырa отырып зерттеу жүргізіп жүргендігін атап өтті. Сонымен бірге, өзі басқарып отырған оқу ордасында корей тілінің оқытатын бөлім ашылатындығын назарға салды.&nbsp;<figure class="image"><img src="https://knadmin.beoblood.kz/uploads/338126499_2494164150734487_396708183861707375_n_604c333f49.jpg" alt="338126499_2494164150734487_396708183861707375_n.jpg"></figure>

Корей батыры Хон Бом Доға арналған кітап жарық көрді

<a href="https://kyzylorda-news.kz/">Kyzylorda-news.kz.</a> Қазалы ауданында велоспорт бөлімшесі ашылды. Ашылу салтанатына аудан әкімінің орынбасары Дәурен Тілеумбетов қатысып, велоспорт бөлімшесінің ашылуымен құттықтады.<blockquote>«Халыққа арналған» физикалық белсенді әрі қолжетімді спорт түрі велоспорт ауданымызда өте жақсы дамыған. Өзіндік ерекшеліктері мол спорттың осы бір қиын түрімен айналысып жүрген ынталы да талапты жастарымыз жетерлік. Жыл сайын жастардың осы спорт түріне қызығушылығы артып, әуесқойлар арасында веложарыстар дәстүрлі түрде ұйымдастырылып келеді», - деді Дәурен Оңғарбайұлы.&nbsp;</blockquote>Велоспорттан Әлем чемпионы, КСРО-ға еңбек сіңірген спорт шебері Марат Сатыбалдиев өз кезегінде бөлімшенің ашылуымен құттықтап, сәттілік тіледі.&nbsp;Сонымен қатар, шараға Алматы облысы федерациясының президенті, халықаралық дәрежедегі спорт шебері Сергей Третьяков, ҚР төрешілер алқасы төрағасының велосипед спорты жөніндегі орынбасары Сергей Бредихин, &nbsp;Қызылорда облысы мәдениет және спорт басқармасының бұқаралық спорт бөлімінің басшысы Ғалым Сихымов, велосипед спорты түрлері бойынша кәсіпқой &nbsp;спорт клубының директоры, ҚР еңбек сіңірген жаттықтырушысы Жетес Сүлейменов арнайы қатысты.&nbsp;Айта кетейік, бөлімше облыс орталығындағы велосипед спорт түрлері бойынша кәсіпқой спорт клубы жанынан ашылып отыр. Мұнда 9-13 жас аралығындағы жасөспірімдер велосипедтермен және арнайы спорт киімдерімен қамтамасыз етілген.<figure class="image"><img src="https://knadmin.beoblood.kz/uploads/336672869_2884072628394843_5806260070935111031_n_bbb6e5d22a.jpg" alt="336672869_2884072628394843_5806260070935111031_n.jpg"></figure><figure class="image"><img src="https://knadmin.beoblood.kz/uploads/336374811_541334718135687_7040135066531190453_n_cf1df2bf62.jpg" alt="336374811_541334718135687_7040135066531190453_n.jpg"></figure>

Қазалы ауданында велоспорт бөлімшесі ашылды

<a href="https://kyzylorda-news.kz/">Kyzylorda-news.kz.</a> Өңірімізге қарасты 14 ауылды аралап, халықпен кездескен аудан басшысы халық алдындағы есеп беру сапарын кент орталығында қорытындылады. Руханият орталығында жалағаштықтармен кездескен Асқарбек Темірбекұлы алдымен кент ішінде атқарылып жатқан жұмыстармен және алдағы жобалармен егжей-тегжейлі таныстырды. Кентте кемшіліктерден жетістіктер жетерлік. Өйткені атқарылған жүйелі жұмыстар халықтың көз алдында. Қаншама нысан пайдалануға берілсе, сол жобалар қазір халық үшін қызмет етуде. Аудан тарихында болмаған қаржы тартылып, аудан бюджетінің басым бөлігі осы аудан орталығын көркейту-көгалдандыру жұмыстарына арналды.Мәселен, 2023 жылы Жалағаш кентінде жалпы құны 643,6 млн теңгеге М.Шәменов, І.Нұркенов, И.Панфилов, Мысық би, А.Бектібаев көшелеріне күрделі жөндеу өткізіліп, ПМК-09 көшесіне ағымдағы жөндеу жұмыстары жүргізіледі. Қосымша 7 көшені күрделі жөндеуге жоба сметалық құжаттар дайындалды.Жаңадан ашылған «Ақтерек» учаскесінде инженерлік инфрақұрылымның сумен жабдықтау жүйесі құрылысына республикалық бюджеттен 73,2 млн теңге бөлінсе, газбен жабдықтау жүйесінің құрылысына 618,6 млн теңге бөлінді. Жаңа учаскенің су ұңғымалары және су жинау-тарату кешенінің құрылысы жобалары да назардан тыс қалмай 21,4 млн теңгеге қоса қаржыландырылды. Қазіргі таңда «Ақтерек» учаскесіннің инженерлік-коммуникациялық инфрақұрылымының жұмыс жобасына және электрмен жабдықтаудың 2 кезеңіне ЖСҚ жасалды.&nbsp;Бүгінде аудан орталығының тұрғындары көгілдір отынның шапағатын көріп отырғанына 2 жылдан асты. Ендігі жерде әлеуметтік маңызы бар ғимараттарға газ тарту жұмыстары жүріп жатыр. Осы орайда «Наркескен» спорт клубы мен аудандық кітапхананың жылу қазандығын газ отынына ауыстыруға 2023 жылы республикалық бюджеттен 35,4 млн теңге қаржы қаралған. Сонымен қатар аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі мен Жалағаш кенті әкімі аппаратының ғимаратын газ отынына ауыстыруға ЖСҚ әзірленді.Тұрғындарды, әсіресе жас отбасыларды қолайлы тұрғын үймен қамтамасыз ету мәселесі қазіргі таңда өзекті екені рас. Осыған орай Жалағаш кентінің Дәуімбай учаскесінде салынатын бір пәтерлі 3 бөлмелі арендалық 20 тұрғын үйдің құрылысын салуға жоба сметалық құжаттар дайындалды.Сонымен қатар көпқабатты тұрғын үйлерге күрделі жөндеу жұмыстарын жасау мақсатында Үркімбаев №1, №2 мекен-жайындағы көпқабатты үйлерге жоба сметалық құжаттар жасалып, қаржы қаралуда.Дәуімбай елді мекенінен 200-ден аса жасөспірім кент орталығына түрлі үйірмелерге, спорттық секцияларға қатынап оқиды екен. Әрине балалардың қауіпсіздігі бірінші орында екенін жақсы түсінген аудан басшысы осы мәлесені дереу шешуді қолға алыпты. Осыған орай Дәуімбай учаскесі мен Жалағаш кенті аралығындағы темір жол өткелі мәселесі оң шешімін тапты. Жалпы құны 184,9 млн теңгеге 2023 жылы сәуір айында жаяу жүргіншілерге арналған аспалы көпір құрылысы басталады.Кездесуге жиналғандар арасында өздерін толғандырған сауалдарын қойғандар да аз болған жоқ. Тұрғындар сауал жолдау барысында кент ішіндегі санитарлық тазалық жұмыстарының жүргізілу барысы, абаттандыру жұмыстарын күшейту, аяқ су мәселесін шешу туралы ұсыныстарын жеткізді.Осы ретте аудан әкімі Асқарбек Темірбекұлы кент орталығын аяқ сумен қамтамасыз ету мақсатында 2023 жылы 6 насос алынғанын, абаттандыру жұмыстары барысында адам өмірінің қауіпсіздігін сақтауды негізге ала отырып, көлік қозғалысы көп көше қиылыстарына 4 бағдаршам орнатылатынын және барлық білім беру ұйымдарының алдына жасанды жол кедергілері қойылатынын айтты.Асқарбек Есжанов ауданды басқарған 11 айдың ішінде аудан орталығында бірнеше ауқымды жобалар жүзеге асып, зәулім ғимараттар бой көтеріп, кент көркі көріктене түсті. Әрине көзге көрінген жұмысты, еткен еңбекті кент тұрғындары жоғары бағалап, аудан әкімінің жұмысына қанағаттанатынын жеткізді. Өңіріміздің әлеуметтік-экономикалық дамуы жолында аянбай еңбек ететін басшылық құрамның жүйелі жұмыстарына тілекші болды.Жиын соңында еңбек ардагері Қайыпназар Қосжанов елдің бірлігін сақтау бәрінен маңызды екенін түсіндіріп, қызметтегі азаматтарға батасын берді.<blockquote>«Бүгінде шүкір, бар қиындықтар артта қалып, еліміз қарыштап дамып келеді. Ауданымыздың өзінде бұрынғы жылдармен салыстырғанда біршама өзгеріс болды. Облыс орталығына қатынайтын тасжол жөндеуден өтіп, аудан орталығында көптеген ғимарат бой көтерді. Түрлі сауда орындары ашылды. Жуырда ғана көгілдір отын кіріп, халық қуанышқа бөленді. Осы жетістіктердің барлығы бірліктің, ауызбіршіліктің арқасында деп айта аламын. Өйткені бірлік – мәңгілік және бөлінбейтін, ынтымағы мен берекесін бірге ұстаған еліміздегі ең биік ұғым, сан ғасырлар бойғы дана халқымыздың бойына сіңген асыл қасиеті. Бабаларымыз ынтымақ пен татулықты, ауызбіршілік пен сыйластықты мүдделі түрде еліміздің біртұтастығын сақтауда әрдайым биік мақсат етіп қойған. Шүкір, қазір ел басқаруға жастарымызда көптеп араласып, белсенділік танытуда. Мұның өзі бізді қатты қуантады. Сол себепті өңіріміздің бірлігін сақтап, әрі қарай келешекке нық қадам басу жалағаштықтардың нақты мақсаты мен міндеті бола бермек», – деді аудан ақсақалы.</blockquote>

Жалағаш кенті алдағы екі жылда құрылыс алаңына айналмақ

<a href="https://kyzylorda-news.kz/">Kyzylorda-news.kz.</a> Шиелі аудандық мәслихаттың VІІІ шақырылымының алғашқы сессиясында, депутаттар мандат алып, қызметіне кірісті.&nbsp;Сессияға аудан әкімі Нұржан Ахатов, құқық қорғау органдары басшылары, мекеме басшылары, ардагерлер кеңесінің төрағасы, ауыл әкімдері мен бөлім басшылары қатысты.&nbsp;Жиында аудандық сайлау комиссиясының төрағасы Молдабай Дулатов кезектен тыс сайлау қорытындысын жариялап, сайлау арқылы сайланған депутаттарға куәлік пен төсбелгі табыс етті.&nbsp;Еске салсақ, ҚР Парламенті Мәжілісінің және мәслихат депутаттарының сайлауында өңірдегі 48 мың 762 сайлаушының 87,3% дауыс берген болатын. Ауданымызда мәслихат депутаттарына 15 мандат берілсе, оның 13 мандатын «AMANAT» партиясы, 2 мандатын «Ауыл» партиясы иеленді.&nbsp;Сессияда депутаттардың бірауыздан дауыс беру нәтижесімен мәслихат төрағасы болып Айтбай Жандарбеков сайланды.&nbsp; Аудан әкімі бұған дейін аудан әкімінің орынбасары қызметін атқарып келген Айтбай Жандарбековтың білікті маман екендігін айтып, ұтымды ұйымдастырушы ретінде ауданымыздың әлеуметтік-экономикалық дамуына зор үлес қосатынына сенім білдірді.&nbsp;Мұнан соң, Нұржан Сәбитұлы VII шақырылымдағы аудандық мәслихат депутаттарына алғысын білдіріп, жаңадан сайланған VIII шақырылымдағы депутаттардың алдағы жұмыстарына сәттілік тіледі.&nbsp;<blockquote>«Ерекше атап өтуіміз қажет, жетінші шақырылым депутаттарымен бірлескен жұмыстардың нәтижесінде 2023 жылға аудан бюджеті 10 млрд 764 млн теңге көлемінде бекітілді. Барша әріптестерімнің атынан осындай ауқымды жұмыстар атқарған жетінші шақырылым депутаттарына алғысымды білдіремін. Алдағы уақытта жаңадан сайланған депутаттармен бірге мұнан да үлкен жетістіктерге жетеміз деп ойлаймын. Бұл үшін әрине мызғымыз бірлік пен тынымсыз еңбек қажет. Төртеу түгел болса, төбедегі келеді» деп ата-бабамыз айтпақшы Сіздерге артылар сенім мен міндет ауқымды. Себебі, араларыңызда ауданымыздың білікті су мамандары, мәдениет саласының майталмандары, мекеме басшылары, ірі өндіріс орындарының директорлары мен шаруа қожалық төрағалары, дәрігерлер, заңгерлер, қоғамдық ойдың көшбасшылары бар. Ендеше, 8 шақырылым депутаттарын тағы бір мәрте аудандық мәслихат депутаты атануларыңызбен шын жүректен құттықтай отырып, алдағы уақытта да ауданымыздың өсіп-өркендеуі жолында бірлесіп, ел мүддесі үшін жұмыс жасауға шақырамын», – деді Нұржан Сәбитұлы.</blockquote><figure class="image"><img src="https://knadmin.beoblood.kz/uploads/338709707_236071115467141_3316977457751321319_n_523cd63f7e.jpg" alt="338709707_236071115467141_3316977457751321319_n.jpg"></figure>

Шиеліде депутаттарға куәлік пен төсбелгі табыс етілді

<a href="https://kyzylorda-news.kz/">Kyzylorda-news.kz.</a> Балалық шақтың бейқам әлемінен ересек өмірге көшу жастар үшін әрдайым ауыртпалықсыз бола бермейді, әсіресе қаржы жағынан. Жастарға тән максимализм, барлығына бірден қол жеткізуге деген ұмтылыс көбінесе бірдей қаржылық қателіктерге әкеледі. Оларды Fingramota.kz-мен бірге қарастырып көрейік.&nbsp;№ 1 қателік. Бюджетті тиімсіз жоспарлау&nbsp;Ұрпақ неғұрлым жас болса, соғұрлым олар ақшаны үнемдеу немесе кейінге қалдыру туралы аз ойлайды. Жастар шәкіртақыны немесе жалақысын бірнеше күнде жұмсап тастап, қалған күндер айдың соңына дейін өлместің күнін көруі мүмкін. Бұл көбінесе бюджетті тиімсіз жоспарлаудың салдары. Сондықтан, жас буын өкілдеріне, әсіресе студенттерге ең алдымен өз шығыстарын бақылауды үйрену керек.Кеңес:&nbsp;Өз кірісіңізді (шәкіртақы, ата-ана бөлетін қаражат, жалақы және т.б.) міндетті және қосымша шығындарға бөліңіз. Міндетті шығындардан кейін өзіңізде қанша ақша қалатынын есептеңіз, оларға азық-түлік, коммуналдық қызметтер, интернет және мобильдік байланыс, көлік шығыстары жатады. Қалған қаражатты&nbsp;күнделікті&nbsp;шығыстарға&nbsp;бөліңіз.&nbsp;Жеке қаражатыңызды бақылау – тиімді жинақтауға, ұтымды жұмсауға және жақсы өмір сүруге жасалған алғашқы қадам.№ 2 қателік. Табысынан артық жұмсау&nbsp;&nbsp;Заманауи жастар&nbsp;тауарлар мен қызметтерді белсенді тұтынушылар болып табылады. Өктем жарнама, әр түрлі маркетингтік амалдар, әлеуметтік желілердегі әдемі өмір насихаты – осының бәрі жастарды «трендте болуға» және соңғы үлгідегі гаджеттер, бренд заттар сатып алуға, танымал мекемелерде уақыт өткізуге итермелейді. Ақша жетіспегендіктен жастар көбінесе тұтынушылық кредиттер ресімдеу арқылы «қарызға өмір сүреді».Алайда, табысты болу немесе табысты болып көріну бір нәрсе емес. Табыс елесі соңында кез келген адамды «кредит шырмауына» түсіреді.Кеңес:&nbsp;Қарапайым бір шындықты естен шығармаған жөн: кредит –&nbsp;болашақ есебінен өмір сүру!&nbsp;Қарыз ресімдемес бұрын сізге бұл шынымен қажет пе, өзіңізге жауапты қаржылық міндеттеме жүктеуге дайынсыз ба, соны ойланыңыз. Жеке бюджетке қосымша ауыртпалық түсірмеуге тырысыңыз. Еліктіретін жарнамаға ермеңіз. Ешбір жағдайда «ескіні» өтеу үшін жаңа кредит алудың қажеті жоқ, оның үстіне талаптары айтарлықтай жақсы болмаса.&nbsp;№ 3 қателік. «Резервтік қордың» болмауы&nbsp;Жастар бүкіл өмірлері алда деп санайды және қаржылық қауіпсіздік жастықшасы туралы ойлағылары да келмейді. Алайда жеке резервтік қорды қалыптастыруды жастайынан бастаса, онда болашақта өзін күтпеген қаржылық қиындықтардан қорғауға болады. Жеке резервтік қор – бұл белгілі бір ақша қаражатының сомасы, ол кем дегенде 6 айлық шығындардан құралуы тиіс, бір жылдық бюджеттен тұрса тіпті жақсы.Кеңес:&nbsp;Жинақтаудың ең тиімді әдістерінің бірі – бұл банктік салым ашу. Егер сіз 20 жасыңызда, мысалы, ай сайынғы жалпы кірісіңіздің кемінде 10%-ын жинай бастасаңыз, онда белгілі бір кезеңге дейін қауіпсіздік жастықшасын құра аласыз.&nbsp;№ 4 қателік. Нақты мақсаттардың болмауыЖастар көп жағдайда саяхаттауды немесе өз бизнесін ашуды армандайды. Алайда, армандар жүзеге асуы үшін қаржылық жоспар құрып, оны орындау керек. Қағазға немесе гаджеттегі қосымшаға өз мақсатыңызды әрі оған қол жеткізу тәсілдерін жазыңыз да, нақты мерзімдерін көрсетуді ұмытпаңыз. Бәлкім, бастапқы кезеңдерде өзіңізді межеленген жолмен жүргізу қиынға соғуы мүмкін. Алайда тәртіптік тәсіл қолдансаңыз, сіз өз арманыңызға бір қадам жақын боласыз.Кеңес:&nbsp;Өз мақсатыңызды іске асыруға қатысты егжей-тегжейлі жоспар құрып, оған қол жеткізу үшін ай сайын жинайтын соманы көрсетіңіз. Өз қаржылық мүмкіндіктеріңізді ескеруді ұмытпаңыз. Қаражат жинау барысында жаппай үнемдеу режимінен аулақ болыңыз. «Көрпеңе қарай көсілу» қағидатын естен шығармағаныңыз дұрыс. Алайда, кейде өзіңізді қуантып, марапаттап отыруды да ұмытпаған жөн. Ойын-сауыққа, мысалы, киноға немесе кафеге жұмсайтын қаражатыңызды бюджетіңіздің шеңберінен асырмай, алдын ала жоспарлап қойыңыз.№ 5 қателік.&nbsp;Бір мезеттік табысқа сенуҚазіргі жастар технологиялық прогрестен қалмай, ІТ-саласында әбден шыңдалған болса да, олар өз сенгіштігінен және мұқияттылық танытпауынан алаяқтардың арбауына жиі түсіп қалып жатады әрі оларды қаржылық пирамидаларға тарту да оңайырақ. Алаяқтар жастарды өз қаржылық қулықтарына делдал ретінде тартуы мүмкін немесе олармен сенімгерлік қатынас орнатып, ортақ кәсіп ашуды немесе кірісі жоғары инвестициялық жобаға қатысуды ұсынуы мүмкін.Кеңес:&nbsp;Делдалдық, кірісі шамадан тыс онлайн-жобалар арқылы табысы жоғары ұсыныстарға немесе барынша көп адам тарту арқылы ақша төленеді деп уәде беретін немесе инвестициялардың қайтарылатынына кепілдік беретін компанияларға сенбеңіз. Мұндай уәделерді беретін тек – алаяқтар. Кез келген ақпаратты үнемі тексеріп, барынша қырағылық танытыңыз!Жас кезіңізде жасайтын таңдауыңыз сіздің болашақтағы қаржылық әл-ауқатыңызға үлкен әсер етуі мүмкін. Егер сіз жиырма жасыңызда ақшаны ойланбай жұмсап, кредит карталарын пайдаланып, төлемдердің мерзімін кешіктіріп, кредиттік тарихыңызды бүлдіріп алсаңыз, онда орта жасқа келгенде қарыздарыңыз «тау» болып жиналып қалады.Бірақ егер сіз бюджетіңізді ұтымды жоспарлап, кірістеріңіз бен шығыстарыңыздың арасындағы тепе-теңдікті сақтап, инвестицияға салып, алаяқтардың арбауын тануды үйренсеңіз, онда болашағыңыз үшін алаңдап, уайымдамасаңыз да болады.Егер сіз қаржылық сауаттылық жөніндегі оқыту іс-шараларына тыңдарман ретінде қатысқыңыз келсе, онда ҚР Қаржы нарығын реттеу және дамыту агенттігіне «1459» нөмірі бойынша call-орталық арқылы немесе «Fingramota Online» мобильді қосымшасы арқылы жүгінуіңізге болады. Агенттіктің оқыту іс-шаралары тегін өткізіледі.

Жастар жиі жіберетін 5 қаржылық қателік

<a href="https://kyzylorda-news.kz/">Kyzylorda-news.kz.</a> VІІІ шақырылымдағы Қазалы аудандық мәслихатының бірінші сессиясы өтті.&nbsp;Жиында аудандық сайлау комиссиясының төрағасы Нұрлан Аманбай кезектен тыс сайлау қорытындысын жариялап, саяси науқан қорытындысымен депутат болған 15 халық қалаулысына куәлік пен төсбелгі табыстады.&nbsp;Алғашқы сессияда алдымен аудандық мәслихат хатшысын сайлауды халық қалаулылары ортаға салды. Бұл ретте депутат Арғын Орынбаев аудандық мәслихат төрағасы лауазымына Ғазиз Әліштің кандидатурасын ұсынып, дауыс беру нәтижесімен қолдау тапты. Өз кезегінде мәслихат төрағасы Ғазиз Әліш артылған сенімге жұмыс жасайтынын жеткізіп, бірауыздан қолдаған әріптестеріне алғысын білдірді.Одан кейін тұрақты комиссиялардың төрағаларын бекіту дауысқа салынды. Нәтижесінде экономика, қаржы, бюджет, кәсіпкерлік жөніндегі тұрақты комиссия төрағасы болып Әділбек Сарабеков, әлеуметтік, мәдени, құқық қорғау және жастар саясаты жөніндегі тұрақты комиссия төрағасы Күншығар Әбілов және өндіріс салалары, ауыл шаруашылығы, экология, табиғат ресурстарын пайдалану жөніндегі тұрақты комиссия төрағасы Арғын Орынбаев ұсынылды.Мұнан соң сессия отырысында аудан әкімі Мұхтар Оразбаев жаңадан сайланған депутаттарды құттықтап, ел ертеңін еңселі ету жолында аянбай еңбек етуге шақырды.<blockquote>«Мемлекет басшысы Қасым-Жомарт Тоқаев халық қалаулылары азаматтық қоғамды дамытуға және елдегі өзекті мәселелерді шешуге атсалысуы қажет екенін атап өтті. &nbsp;Еңбектеріңіз ел бірлігін нығайтуға бағытталып, сайлаушылар сенімін ақтауға бар күш-жігеріңізді салатыныңызға сенімдімін», – деді аудан басшысы Мұхтар Әуесұлы.</blockquote>Айта кетейік, ҚР Парламенті Мәжілісінің және мәслихат депутаттарының сайлауында аудан бойынша дауыс берушілердің 81,06 пайызы қатысып, тұрғындардың белсенділігі жоғары болды.<figure class="image"><img src="https://knadmin.beoblood.kz/uploads/336166890_2426367694205944_3882746942509024495_n_acf691b8db.jpg" alt="336166890_2426367694205944_3882746942509024495_n.jpg"></figure>

Қазалы аудандық мәслихатының жаңа құрамы жұмысын бастады

<a href="https://kyzylorda-news.kz/">Kyzylorda-news.kz.</a> Жалағаш ауданындағы Мөрәлі Шәменов ауылына да жеттік. Кіреберіс көшедегі қаз-қатар бағандарда ілінген шамдар кеш қарайса, ауыл ажарын тіпті айшықтай түсетіндей. Ауыл тұрғындары әдеттегідей жол бойын қоқыстан тазартып, көшет отырғызып жатыр. Бір сөзбен айтқанда, таза ауылды одан да бетер тазартып жатыр.Иә, өңір басшысы Асқарбек Есжановтың халық алдындағы есеп беру кездесуі М.Шәменов ауылында жалғасты. Аталған ауыл аудан бойынша Сыр салысын өндіруде зор үлес қосып отырғанын өңір халқы жақсы біледі. Сондай-ақ мал шаруашылығы да кең қанат жайып, ауыл шаруашылығымен айналысатын кәсіпкерлер қатары артқан.&nbsp;Аудан басшысы бастаған топ әдеттегідей ауыл халқының алдында тікесінен тік тұрып, тұрғындардың мұң-мұқтажын, ұсыныс-пікірлерін тыңдады. Сондай-ақ тұрмыс түйткілдеріне қатысты қойылған сауалдары мен шешімін таппай жүрген мәселелері бойынша жауап берді.&nbsp;Өңірде ауылдық округтердің ішкі жол мәселесі жыл санап оңтайланып, толықтай жаңартылып келеді. Мәселен, 2022 жылы М.Шәменов ауылында 8 көше күрделі жөндеуден өтсе, 2023 жылы ауылдың кіреберісінде орналасқан Бұқарбай батыр көшесін жөндеуге 66,5 млн теңге бөлінді. Қазіргі таңда 2 көшені күрделі жөндеуге, қосымша 2 көшенің және Ә.Тәшімбетов көшесінің құрылысына, ауылды газдандыруға ЖСҚ әзірленген.Ең бастысы, ауылда халықтың маңызды өмір сүру қажеттіліктері толықтай бір жүйеге келтірілген. Мәселен, елді мекенде ауыз су толықтай үйді-үйге жүргізілген. Ауыл руханияттың орталығы екенін аудан басшысы кездесулерде айтып келеді. Тек айтып қана қоймай, ауылдарда мәдениет, спорт кешендерін жаңарту, қайта салу жұмыстарына баса мән беруде. Осы орайда бүгінде ауылда мәдениет үйі мен білім ошағы жаңаланған. Сонымен қатар елді мекендегі көшелерді көркейтіп-абаттандыру бойынша «Өңірлерді дамыту» бағдарламасы аясында ауыл іргесіндегі тұрмыстық қатты қалдықтарды тастайтын полигонды қоршауға 1,5 млн теңге де қарастырылыпты.&nbsp;Бір сөзбен айтқанда, ауылдың бүгінгі тынымсыз тірлігі тек бірлігімен келгенін айтпай-ақ аңғартып тұрғандай. Аудан әкімі Асқарбек Есжанов қай ауылға барса да алдымен тұрғындардың тірлігін емес, бірлігін көргісі келетінін баса айтты.&nbsp;<blockquote>«Аудан басшылығы сіздердің ұсыныстарыңыздың негізінде бюджетке байланысты мәселелердің барлығын өз ретімен, кезеңімен шешуге мүдделі. Мейлі қандай мәселе болса да ол үшін барлық мүмкіндіктерді қарастырамыз. Алайда ауылдағы ағайынның арасында өзара ынтымағы, ауызбіршілігі болмаса, бәрі де бекер. Мен, ауыл әкімі бар және осы жердегі ақсақалдар мен ел ағаларының ұйытқы болуымен ең алдымен елдің бірлігін бекемдеп алуымыз керек. Сонда ғана ойға алған мақсат-міндеттеріміз ретімен орындалып, тірлігіміз өз-өзінен алға басатыны анық. Мен сіздерден осы мәселені ескерулеріңізді сұраймын, сіздердің басты міндеттеріңіз – ауыл ауызбіршілігін ұстап, бірлігін бекемдеу», – деді өңір әкімі Асқарбек Темірбекұлы.</blockquote>Аудан әкімі тиісті бөлім, мекеме басшыларымен бірге сұрақтарға жауап беріп, орын¬далуы тиіс мәселелерді бақылауына алып, жұмыс жүргізу үшін бөлімдерге тапсырма берді.

Жалағаш: Ауылда жол мәселесі шешімін тапқан

<a href="https://kyzylorda-news.kz/">Kyzylorda-news.kz.</a> Жалағаш ауданының әкімі Асқарбек Есжановтың ауылдық елді мекендерге жұмыс сапары кент іргесіндегі Ақсу ауылында қорытындылады. 2022 жылы атқарылған жұмыстарды баяндап, алдағы жоспарланған жобаларды тарқатып, ел алдында тік тұрып есеп берген Асқарбек Темірбекұлы кездесуге жиналған халықтың ұсыныс-пікірлері мен мұң-мұқтажын жеке-жеке тыңдап, тұшымды жауап та берді. Десе де бұл аталған ауылда айтарлықтай күрделі мәселе көтерілген жоқ.&nbsp;Ауыл ақсақалдары байыппен кезекпен-кезек сөз алып, елдің бірлігін сақтаудан маңызды ештеңе жоқ екенін айтты. Расында Ақсуда қазір сол бірліктен туындаған берекелі тірлік бар. Бірнеше жылға созылған жер дауы да шешімін тапқан. Биыл шаруашылықтардың демеушілігімен Ақсу ауылына кіреберіс басты жол жарықтандырылыпты.&nbsp;Тұрғындар үшін маңызды Ақсу ауылына кіреберіс автомобиль жолын жөндеуге 76,6 млн теңге бөлініп, ауқымды жоба жүзеге аспақ. Сондай-ақ ақсулықтардың ұсынысына сәйкес 3 ішкі көшенің жөндеу жұмыстары үшін жоба сметалық құжаттар дайындалуда. Мұнан бөлек осы жылы ауылда жалпы құны 184,7 млн теңгені құрайтын электр желілері толық жаңартылатын болса, «Өңірлерді дамыту» бағдарламасы аясында ауылдағы тұрмыстық қатты қалдықтарды тастайтын полигонды қоршауға 3,5 млн теңге бөлінеді. Ауыл халқы үшін ең қуанышты, көптен күткен жаңалықтың бірі Ақсуға биыл көгілдір отын жүргізіледі. Алдыңғы жылдары аудан орталығымен ауылды байланыстыратын жол жөндеуден өтіп, қазір сол жол халыққа сапалы қызмет етіп жатыр. Ендігі жерде сол жолдың бойына светофор қойылатын болды. Ол да ақсулықтардың талап-тілегі болатын. Міне, халық не сұраса, аудан басшылығы дереу орындауға жұмыс жасауға ниетті. Сондай қамқорлық пен еңбекті көріп отырған ақсулықтар аудан әкімшілігіне өз алғыстары мен тілектерін жаудырды.<blockquote>«Соңғы жылдары ауылымызда көп жұмыс істелді. Асфальт төселді, көшеге жарық берді, көптеген үйлерде су бар. Аудан азаматтары мәселеге бейжай қарамайды, қолдан кел¬генше істеп жатыр. Қазір жағдайымыз жақсы, жұмыс жасаймын деген адамға барлық мүмкіндік жасалған. Ең бастысы, бейбітшілік, бірлік-береке бар. Ауыл сонысымен құнды. Аудан басшылығына Ақсудың аналар тілегін жеткізіп отырмын, сіздерге сәттілік тілейміз», – деді ауыл тұрғыны Мәриямкүл Ержанова.</blockquote>Өткен жылы аудан бойынша 250 гектар бақшалық жер халыққа үлестіріліп, бірнеше аудан азаматы қыстық азығын жинап алған болатын. Сол үрдіс биыл да жалғасын табады. Енді 250 гектар емес, берілетін жер көлемі 2 есеге, яғни 500 гектарға ұлғайған. Мұны естіген ауыл халқы дән риза болды. Әрине ақсулықтар бау-бақша егуден қашанда өңірде осы кезге дейін алдыңғы қатарда болып келді.Ел іші болған соң мәселе болмайды емес, болады. Ақсу ауылында да егістік, жайылымдық жерлерге және аяқ су бойынша біршама мәселелер айтылды. Бірақ аудан әкімі ол бойынша өзі жауап беріп, алдағы күндері шешімін табатынын жеткізді және Ақсу ауылдық округі әкімі Марат Шілдебаевқа ел ішіндегі ірілі-ұсақты кез келген мәселені назарға алуды тапсырды.

Қазақстан және Қызылорда облысының жаңалықтары