<a href="https://kyzylorda-news.kz/">Kyzylorda-news.kz.</a> Егемен елімізді дамыту бағытындағы міндеттер қатарында көлік инфрақұрылымын дамыту мәселесі назардан тыс қалған емес. Өйткені, жол да, көлік тасымалы да экономиканың өзегі іспеттес. Расында да көлік – ел экономикасының инфрақұрылымын қалыптастыратын салалардың бірі әрі бірегейі. Нақты әрі үздіксіз жұмыс істейтін көліктік кешен болмайынша мемлекеттің экономикасы ойдағыдай дами алмайды. Бұл ең алдымен, теміржол көлігіне қатысты, сол арқылы халықаралық және аймақаралық жүктер мен жолаушылар тасымалының негізгі бөлігі жүзеге асырылады.Сондықтан да «Теміржол – ел экономикасының күретамыры» деп бекер айтылмаса керек. Қармақшы ауданы, Жосалы кентіндегі Жосалы стансасының жүйелі жұмыс жасап келе жатқанына бір ғасырдан асқан. Теміржолшылардың атқарып жатқан қызметтерін көрмекке Жосалы стансасына арнайы барып, жұмыс барысын көзбен көрдік.Жұмысы үзілмейтін, қателесуге болмайтын мекемеде күндіз де, түнде де қайнаған тірлік. Ондағы мамандар да өздерінің жауапкершілігі мол жұмысты алып жүргенін жақсы түсінеді. Бұл мекемеге бүгінде Бауыржан Сағатұлы басшылық етеді. Әңгімеміздің төркінін стансаның тарихынан бастадық.<blockquote>«Жосалы стансасы 1904 жылдан бері жұмыс істейді. Ол уақытта станса Орынбор-Ташкент теміржолына қараған. Бастапқыда Жосалы осы Орынбор теміржолының шекарасы болған. Ал Анакөлден бастап Ташкент теміржолының құрамына кірген. Кейіннен заманның ағымына қарай түрлі өзгерістер орын алған. Бір жылдары «Батыс темір жолына» бағынсақ, кейіннен «Түркістан темір жолына» қараған. Одан соң «Қызылорда жол бөлімшесі» болып құрылды. Ал қазір «Қызылорда қосалқы бөлімшесі – Батыс» деген бөлімге қараймыз. Батыс бөліктегі бес облыстың теміржолшылары осында біріктірілген»,- деді станса басшысы Бауыржан Баянов.</blockquote>Бұл мекемеге он жылдан астам уақыт басшылық етіп келе жатқан Бауыржан Сағатұлы 1966 жылы Ақтөбе ауылында дүниеге келген. Кейіннен Жосалы кентіне қоныс аударып, осындағы №105 мектепті тәмамдаған. Еңбек жолын Жосалы механикалық зауытында токарь болып бастаған. Германия жерінде әскерде болып, азаматтық борышын өтеген. Әскерден оралған соң 1986-1987 жылы қайтадан зауытта еңбек етеді. Алматыдағы қазақ политехникалық университетіне «инженер-механик» мамандығына оқуға түседі. 1991 жылдан бастап теміржол саласында түрлі қызмет атқарып, станса кезекшісі, 1993 жылы станса басшысының орынбасары, 2011 жылдан бері станса басшысы болып еңбек етуде. Теміржолда қызмет ете жүріп «Пойыз қозғалысын ұйымдастыру» мамандығы бойынша білімін жетілдірген.<blockquote>«Біздің басты міндетіміз – пойыз қозғалысын ұйымдастыру, басқару. Оның қозғалыстағы қауіпсіздігін қамтамасыз ету. Мекемеде қырықтан аса адам жұмыс істейді. Оның ішінде &nbsp;станса кезекшілері бар. Олар 4 ауысыммен кезектесіп, жұмысқа шығады. Ауысымдағы басқа қызметкерлер станса кезекшісіне бағынады. Одан өзге де оператор, тасымал құжаттарын өңдеу операторы, парк кезекшісі, тауар кассирі деген мамандар бар», – деген станса басшысы жұмыс барысымен таныстырды.</blockquote>Байқасақ, бұл жұмыстың жауапкершілігі үлкен. Барлық жүріп жатқан жүк пойызы, жолаушы пойыздарының қозғалысын ұйымдастыру оңай шаруа емес. Уақытылы пойыздарды қабылдау, оны уақытылы жіберу, уақытылы маневрлік жұмыстарды атқару, уақытылы вагондарды беру, жүкті түсіру, тиеткізу, алып шығу. Қарап отырсақ, бәрі уақытпен тікелей байланысты. Ал кешігіп қалуға әсте болмайды. Бір пойыздың кестесі бұзылып кешігер болса, ол осы стансаға бет алған өзге де пойыздардың кестесін бұзады.Мақаланы жазу барысында теміржолдың жүрегі атанған «Пост ЭЦ»-мен де таныстық. Толықтай автоматтандырылған арнайы жұмыс кабинеті. Қаптаған түймешені бағындырған мамандар қызу жұмыс үстінде. Теміржолдағы әрбір жолақ олардың көз алдында. Қай жолға қандай пойыз келетінін де осындағы мамандар үйлестіреді.<blockquote>«Қазір ГидУрал деген арнайы бағдарлама бар. Ол пойыздардың келген, кеткен уақытын, пойыз туралы барлық ақпаратты көрсетіп отырады. Бұл бағдарлама біршама теміржолшының жұмысын жеңілдетті. Қазіргі теміржол саласы заман ағымына қарай дамып келеді. Тепловоздар ауысып, жұмысшылардың жұмысы шамалы да болса азайды. Бір тетікті түртіп қалсаң болғаны. Дегенмен де, қай кәсіптің болмасын жеңілі жоқ. Мәселен бұрын тоқтаған пойыздың дөңгелегін тексеріп, тықылдатып ұрып жүретін теміржолшыларды жиі көретін едіңіздер. Олардың орнын техника басты. Қазір Анакөл және Ордазымен екі ортада «Понаб» деген аппарат бар. Ол үстінен пойыз өткен кезде дөңгелектің қызған-қызбағанын анықтап, станса кезекшісіне автоматты түрде қандай пойыз, қай вагон, қайсы дөңгелек екенін хабарлап тұрады. Осы арқылы пойыз тоқтаған уақытта мамандар аппарат көрсеткен дөңгелекті лезде тауып, жөндеу жұмыстарын жасап, қалпына келтіреді. Бұрын мұндай ақауды анықтау үшін пойыздағы барлық вагонның дөңгелегін ұрып, дауысын тыңдап шығу қажет болатын. Бұл да жаңа заманның жетістігі. Қай стансада болмасын, жұмыс орындары толықтай компьютерлендірілген. Бұрынғыға қарағанда алға қарай ілгерілеу бар. Теміржолшылар – бұл бір үлкен тату отбасы. Ондағы әр маман, станса кезекшісі, жолсерік, қозғалыс жылдамдығын реттеуші, бағыттаушы бір-бірін толықтырып тұрады. Жалпы, теміржол – бұл шексіз қозғалыс. Ал қозғалыс бар жерде өмір бар», – деп сөзін қорытты станса басшысы Бауыржан Сағатұлы.</blockquote>&nbsp;

Жосалы стансасының жұмысы жүйелі

<a href="https://kyzylorda-news.kz/">Kyzylorda-news.kz.</a>&nbsp; Жүйе іске қосылған 2017 жылдың 1 шілдесінен 2023 жылдың 1 сәуірі дейінгі аралықта Қызылорда облысының тұрғындары Әлеуметтік медициналық сақтандыру қорына 49,7 млрд. теңге аударды, оның 30,8 млрд. теңгесі жұмыс берушілердің аударымдары болса, қалған 18,9 млрд. теңге - жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі, - деп хабарлады «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.&nbsp;&nbsp;Егер тағы да басқа сұрақтар туындап жатса, сіз өз емханаңыздағы «Пациенттерді қолдау қызметіне» жүгіне аласыз. Ал ол жерден мардымды жауап ала алмасаңыз, Әлеуметтік медициналық сақтандыру қорының келесідей байланыс арналары арқылы өтініш жібере аласыз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot.Осы құралдар арқылы сақтандыру мәртебесін тексеруге болады. Сондай-ақ медициналық сақтандыру жүйесіндегі өз мәртебеңізді тексеріп, жүргізілген төлемдер туралы ҚР электрондық үкіметінің сайтындағы (egov.kz) «Денсаулық сақтау» бөлімінде «Медициналық қызметтер туралы және МӘМС-ға аударылған сомалар туралы ақпарат» мемлекеттік қызметі арқылы білуге болады.&nbsp;

Қызылордалықтар Әлеуметтік медициналық сақтандыру қорына 49,7 млрд теңге аударды

 Сырдария ауданының жер көлемі қанша?

<a href="https://kyzylorda-news.kz/">Kyzylorda-news.kz.</a>&nbsp; Үкімет мұнай өнімдерінің бағасын қайта қарау кезінде мемлекетке төленетін салықты арттыру жөнінде қосымша шаралар қабылдауы тиіс. Бұл туралы елдің әлеуметтік-экономикалық мәселелері жөніндегі кеңейтілген кеңесте Мемлекет басшысы Қасым-Жомарт Тоқаев айтты, деп хабарлайды ҚазАқпарат.<blockquote>«Жұрт коммуналдық қызмет үшін төлеген ақшасы қайда кетіп жатқанын көріп отыруға тиіс. Қазіргі заманғы ақпараттық технология бұған толық мүмкіндік береді. Жанар-жағармайдың бағасын көтеру мәселесіне де дәл осылай қараған жөн. Түскен қаржыны делдалдар, яғни алыпсатарлар иемденіп кетпеуі қажет. Оны жаңа мұнай-газ жобаларын жүзеге асыруға және мұнай өңдеу зауыттарын жаңғыртуға жұмсау керек», - деді Қасым-Жомарт Тоқаев.</blockquote>Осы орайда Президент Үкімет мұнай өнімдерінің бағасын қайта қарау кезінде мемлекетке төленетін салықты арттыру жөнінде қосымша шаралар қабылдауы тиіс екенін айтты<blockquote>«Жалпы, тариф саясаты бойынша Үкіметке тауарлар мен қызметтерді реттейтін «тұтынудың әлеуметтік нормасын» енгізу мәселесін пысықтауды тапсырамын. Бұл – халықаралық тәжірибе», - деді Мемлекет басшысы.</blockquote>

Жанармай саласын делдалдар иемденіп кетпеуі қажет – Мемлекет басшысы

<a href="https://kyzylorda-news.kz/">Kyzylorda-news.kz.</a> Ол – жастар жанашыры. Ол – шығармашылық үшін жаралған. Оның пайымдауынша, Аралда қолға алынбаған мәселе көп. Ол бар жақсылықты туған жеріне тарту еткісі келеді. Жастарды қолдау, олардың көкірек көзін ашу үшін бар уақыты мен қаражатын сарп етуге бар. Өйткені ол осы жұмысынан рахат алатын жан. Жайдарманшы, жас кәсіпкер, Төребек Дәрмағамбетовпен еркін әңгіме өрбіттік.&nbsp;– Төребек, ең алдымен әңгімені танысудан бастасақ? Өзіңіз жайлы айтып өтсеңіз...&nbsp;– Мен 1987 жылы 11 қыркүйекте Арал қаласында өмірге келдім. Отбасында 3 баланың кенжесімін. Білімім жоғары. Қазіргі таңда Арал қаласындағы оқушылар үйінде жұмыс жасаймын. Жұбайым – Жұлдыз, екі қыз тәрбиелеп отырмыз.&nbsp;–Шыны керек, көпшілік Төребекті қазақша КВН арқылы таниды. Жайдарманға жаңа толқын болып келген «Арал-АС» тобы жайлы толық айтып беріңізші?&nbsp;– Негізінде, мен ең алдымен Ақтөбе қаласының құрама командасында ойнап жүрдім. 2007 жылы сол кездегі қазақша жайдарман ойындарын көрсететін жалғыз арна– «Еуразия» бірінші арнасында біздің ойынымыз эфирге шықты. Осы кезден бастап Аралда да осындай команда болса деген жан-жақтан ұсыныстар келіп түсе бастады. Сөйтіп, ең алғаш Ғалым екеуміз жолықтық. Онда да бұрыннан бері осындай топ құру ойында жүрген екен. Команданың атын «Арал-АС» деп Ғалым қойды. Осылайша ауылдан өнерлі балалар іздей бастадық. Бас-аяғы 7-8 айдың ішінде құралдық. Басында 10-11 бала болды. Арасында азайды, көбейді. Ақырында 2 жылда ғана команда мүшелері тұрақталды. Сонымен 2008 жылы Ақтөбе қаласына алғаш рет республикалық батыс лигаға қатыстық. Мұнан соң, 2009 жылы Қызылорда қаласындағы Сыр елі орталық лигасы біздің бағымызды ашты. Бұл ойын телеэкраннан көрсетіліп, осы жылы біз чемпион болдық. Осыдан кейін бірден Астана қаласына кеттік. Өзіңіз білетіндей, мұнда «Жайдарман», КТА ойындарының чемпионы атандық.&nbsp;– Әзілдеріңіз өткір. Қоғамдағы маңызды мәселелердің қиюын келістіріп көрерменге ұсынғанда халық талай рет күлкіге көмілді. Сценарийді кім жазады?&nbsp;– Басында бізде автор болған жоқ. Біз көбіне ауылда көргенімізді, жүрген жеріміздегі болған оқиғаны әзілге айналдырып қойып жүрдік. Біздің қойылым кейіпкерлерінің 50 пайызы өмірде бар. Ал көрінісіміздің 30-40 пайызы болған оқиғалар. Ол кезде біз жан-жақта жүрдік. Басымыз тек пойызда бірігетін. Сол сәтте ғана біз дайындықты бастап, барлығымыз өз идеямызды ортаға салып, жинақтап бір жүйеге келтіріп, сосын барып қойылым етіп жасайтынбыз. Соңғы 3 жылдықта ғана автормен жұмыс жасай бастадық.&nbsp;– «Арал-АС»-тың алғашқы қадамына кімдер қолдау көрсетті?&nbsp;– Бізді бастапқыда әкем қолдады. Бірінші жылдықта санаулы ғана кәсіпкер қаржылық жағынан көмек көрсетті. Жетпеген қаражатты концерт қойып, түскен ақшаға билет алатынбыз. Бізге сол сәтте пойызға отырсақ болды еді. Әрі қарай қайда қонам, не ішіп, не жейміз? – деген сұрақтарға бас қатырған жоқпыз. Ең бастысы, біз үшін ойынға үлгеріп бару болды. Тіпті кейде несие де алатынбыз. Үстеме ақша да алдық. Әйтеуір шақырған ойыннан қалмай барып жүрдік.&nbsp;– «Арал-АС» өз көздеген биігін бағындырды ма?– Орындады деуге болады. Бастысы, чемпион болу еді. Оны алдық. Негізінде, осындай команда құрып жатырмыз дегенде, сенімсіздік танытқандар көп болды. Түрлі әңгімелер естігенімізді жасыра алмаймыз. Сол әңгімелер шыны керек ашуға тиді. Бізді сахнаның бір бұрышында ғана елеусіз қалады деп ойлады. Бірақ уақыт өте келе, соны айтқан жігіттер келіп қолымыздан алды. Мойындату деген осы шығар...&nbsp;– Расымен де, бүгін біз сіздермен мақтанамыз. «Арал-АС»-тың жігіттері теледидар арқылы қазақстандықтарға танылып үлгерді. Бүгінде түрлі бағдарламаларда, отандық кинода төбе көрсетіп жүр. Ал сіз әлі Аралдасыз. Болашақта Төребек те астаналық болуы мүмкін бе?– Ондай әзірге ой жоқ. Әрине ең алғашқыда ондай арман болды. Уақыт өте келе есейдік. Ел көрдік, жер көрдік. Біртіндеп ойымыз өзгере бастады. Бәлкім, ақыл тоқтаттық па? Қазір әке-шешемнің жанында қара шаңырақта отырмын. Ұсыныс жоқ емес, бар. Бірақ мен үшін қала – әрі кетсе бір апта қыдырып демалып жүретін жер. Ал ауылда ашылмаған нәрсе көп. Мүмкіндік мол. Мен тіпті көршілерімнің өзін қимаймын. Аралда халықтың 70 пайызы – танысың. Тойтомалақ, ойын-сауық, жұмыс бәріне үлгеріп жүресің. Қалада олай емес. Ешқашан уақыт жетпейді. Маған ондай өмір ұнамайды. Мен еркіндікті жақсы көремін. Ауылда жүріп те жұлдыз болуға, бағдарламаға түсуге, жұмыс жасауға болады. Қаладағыдай көп мүмкіндік болмаса да. Десе де, бұл менің қалауым.&nbsp;– Жастарға көп қолдау көрсетесіз. Бұрынғы жастар мен қазіргі өскелең ұрпақтың арасында қандай айырмашылық бар? Бүгінгі жастар өздерінің мүмкіндігін пайдаланып жатыр ма?&nbsp;– Әр адамның жолы әр түрлі. Олар біз жеткеннен де асып түсуі мүмкін. Бізден өзгеше жасауы мүмкін. Десе де, мектеп оқушылары ерте есеюге асығады. Тез ренжігіш. Тез ашуланғыш. Сосын оларға әлеуметтік желілерден басқа ештеңе қызық емес. Тіпті олар қоғамда не болып жатқанын да білмейді. Теледидар да көрмейді. Кітап жайлы сөз қозғаудың өзі артық. Сосын мынадай нәрсе бар, бір бала жақсы танылып, өзінің өнерін көрсетер болса, оған қасындағылар кері әсер етеді. Мазақ қылатындар бар. Содан барып жаңағы бала бәрін тастай салады. Яғни, ортаның кері әсері тиеді. Әйтпесе, бізде мықты әнші де, биші де, суретші де бар.&nbsp;– Өзіңіз айтып отырған осындай жастармен қалай жұмыс жасауға болады?– Бізді құртатыны болмайды деген нәрсе. Жастарға тәрбиелік мәні бар нәрсе жасаймыз дейміз, бірақ оған қызығушылық танытатын жандар аз. Мен өткен жылы заманауи би жарысын ұйымдастырып бастадым. Сол кезде көбі «бұл не береді, керек дүние емес» деп қарсылық танытты. Сенесіз бе, сол кезде жастар ағылып келді. Билеті қымбат болса да, күні бұрын өтіп кететін. Қатысуға ниеттілер де көбейді. Біз болмайды деген нәрседен арылып, жастарға не керек деген сұраққа жауап іздеуіміз керек сияқты. Біз қорқақпыз. Нәтижеге емес, тыныштыққа жұмыс жасаймыз. Тәуекел жасап үйрену керек.&nbsp;– «Арал-АС» шығармашылық орталығының жұмысы қалай жүріп жатыр?&nbsp;– Қазір біздің 2 тобымыз бар. Үлкен және кіші топтан тұрады. Мұнда ерікті жастар жұмыс жасайды. Оларға мен ешқандай айлық төлемеймін. Бірақ атаулы мереке күндері үлкен етіп дастарқан жайып, бір орта қалыптастыруға тырысамын. Түрлі кештер ұйымдастырамыз. Сол кезде олардың әрқайсысының жасайтын жұмысы бар. Олар осы арқылы жауапкершілікті сезініп үйренеді.&nbsp;– Әңгіменің арнасын футболға бұрсақ. Сіздің жетекшілігіңізбен құрылған «Порт» футбол командасының қазіргі деңгейі қалай? Жігіттер сенімнен шыға ала ма?&nbsp;– 5 жыл бұрын өзіммен құрдас жігіттер футбол командасын құрайық деп ұсыныс жасады. Мен қолдай кеттім. Атауын өзім қойдым. Бұл атау Аралға жақын болғандықтан өзімнің ойымда жүрген еді. Солай толығымен жігіттердің формасын алдық. Содан бері аудан көлеміндегі ала доп додаларына қатысып келеді. Олар кубок алмаса да, үлкенді-кішілі жеткен жетістіктері баршылық. Мен өзім де футболдан көп нәрсе түсініп қалдым. Қазір бұл жігіттерді де түрлі жарыстарға апарып жүрмін. Өткен жылы Қызылордаға барып қайттық. Жақында Қазалыға барып, жолдастық кездесу өткіздік. Жоспар көп. Енді Байқоңыр, Тараз, Астана қалаларына барсақ па деп отырмыз. Бірақ мен оларға аса бір үлкен көлемде демеушілік жасап жатқан жоқпын. Олар өздері ұсыныс жасап келеді. Мен беттерін қақпаймын.&nbsp;– Алда &nbsp;қандай жоспарларыңыз бар?&nbsp;– Биыл «Арал-АС» шығармашылық орталығын заңдастырсам деймін. Ойда жүрген жоба көп. Заңдастырған соң, осы шараларды біртіндеп ұйымдастыруға жол ашылмақ. Бірінші кезекте әншілер сайысы, мектептегі жас мамандар арасында өтетін сайыстар бар. Әзірге осылар алдыңғы қатарда тұр. Қалғандары біртіндеп бола береді. – Ауылдағы жастар назардан тыс қалып жатқан жоқ па? – Дұрыс айтасыз. Ауылда да ашылмай жатқан таланттар жетерлік. Оларды табу үшін біз алдымен сол ауылдардан бір адамды өзіміздің жанымызға жақын етуіміз керек. Касымызда алып жүріп, барлық нәрсені үйрету керек. Сосын ол өзінің достарын алып келеді. Солай-солай ауылда жастар командасы пайда болады. Бұл жастар да өздерін көрсетуге мүмкіндік алады. Маған бір жас келер болса, мен оларды қуана қарсы алар едім. Керек болса жарыстарға да алып барам. Бірақ бәрі бірден бола бермейді.– Сізді не толғандырады? Не қызықтырады?&nbsp;– Мені жастардың мәдениетінің төмендігі ойландырады. Бізде әлі концерт көру мәдениеті жоқ деп айтуға болады. Қазір жастар ондай кештерге танысуға, өздерін көрсетуге барады. Ал қызықтыратын нәрсе өте көп. Мейрамханадағы даяшының жұмысынан бастап, өзім отырған жердің безендірілуі– бәріне қызығушылық танытам. Үлкен қалаға барғанда міндетті түрде қонақ үйге барып, бір күн қонамын. Себебі мұндағы тұсқағаздар мен ішіндегі жиһаздың орналасуы, бәрін қалай үйлестіргендігін, қызметшілердің қонақпен сөйлесу мәдениетін өз көзіммен көргім келеді. Осындай талғампаз дүниелерден үлгі алып, бізге де алып келгім келеді.&nbsp;– Әңгімеңізге көп рақмет!&nbsp;

Төребек Дәрмағамбетов: Аралдың жастарын көтеру басты мақсатым

<a href="https://kyzylorda-news.kz/">Kyzylorda-news.kz.</a> Қасиетті де, киелі Қазалы жерінде небір кәсіпкерлер өз табысын еселеп, халықтың қазынасын толтыруда. Мұнда сегіз мыңға жуық кәсіпкер түрлі саланы қолға алған. Соның ішінде, ең берекелі саналатын балық шаруашылығын иіріп отырғандар аз емес. Сондықтан да Қазалы мен Аралдың балықшылары ұстаған су маржанына елдің түкпір-түкпірінде әрдайым сұраныс жоғары. «Өзен жағалағанның өзегі талмайды» деген бар.Сыр өңіріндегі Қазалы, Арал ауданы ертеден балықшылар мекені саналады. Ал, балықшылар үшін су маржанын аулап ұстауда аудың атқарар рөлі зор болған. Мәселен, зерттеушілер Қазалының атауын «қаза» дейтін аумен байланыстырады. Сондықтан, оқырмандардың назарына балықшылардың негізгі құралы жөнінде ел аузындағы бірнеше ақпаратты ұсынуды жөн көрдік.Шайтан ау деген не?Су маржанын аулап ұстау үшін аудың атқарар рөлі зор, дейді кәнігі балықшылар. Оны ертеде балықшылар жібек жіптен, түйе жүні мен аттың қылынан тоқыған. Халық тілінде, аудың үлкен түрін – жылым деп атау дағдыға айналған. Жылым атауының төркіні, судың қатпай жатқан ау салатын бөлігінің атауымен байланыстырылады. Екінші болжамда – қазақ жеріне қоныс аударған шығыс славяндары мен Дунай бойы балықшыларының тіліндегі ау атауының қазақыланған нұсқасы. Өзен жағалап, су маржанын сүзіп алуды сүйікті кәсібіне айналдырған балықшылар әркезде аулардың алуан түрлерін тұрмысқа ыңғайлап ойлап тауып отырған. Солардың арасындағы атауымен елітіп, таңдандырып, ойға шомдыратын ең еркшесі – шайтан ау деп аталған. Ел аузында жүрген әңгімеге сенсек, жиырмасыншы ғасырдың басында Ұлы Отан соғысының алдында пайда болған. Жоқшылық пен таршылық дендеген шақта шағындап тоқып пайдаланылған ауға балықшылар өзара «шайтан ау» деген атау қойған.Әйтеке би кентінің тұрғыны Әмірбек Нұрымбаев, бұлай аталудың сыры – оның көлемінде болар деген болжамымен бөлісті. Әңгімеге тартқан кейіпкеріміздің айтуынша, қазіргі аулардың ұзындығы 30-40 метр болса, ол небары 5-6 метр ғана болған екен. Ағысқа қарсы құратын арқалығы мен табандығы бар құрма ау саналған. Әдепкі уақытта балықшылар, оны жәй жіптен тоқыса, кейін орнына капрон жіппен ауыстырып тоқыған. Ірі балықтар аулау мақсатында «шайтан ау» торларын кең қылса, кішкентай балық ұстау үшін тор көзін кішірек көлеммен дайындаған. Азығы үшін қолданған шағын ауды балықшылар өзі ойлап тапқан. Ол кезде 4-5 балық ұстап, бір руды асырай алатын жағдайда болған деседі. Тез салып, жылдам суырып алатындықтан «шайтан ау» деп аталған-мыс. Қазіргі күні мұндай ауды ешкім қолданбағандықтан. Сұраныста жоқ.Қазалы «қаза» атауымен байланысты ма?Қ.Пірімов ауылының тұрғыны Рамазан Қонысбай жұмыстан қолы қалт еткенде, жақын маңдағы өзен-көлдерге барып, отбасына балық аулап келуді әдетке айналдырған. Рамазан Қонысбайдың деректеріне сүйенсек, кезінде балықшылар «гөңкі» ауды кеңінен қолданған. Ол үш қабатты, екі жағы керегенің көзіндей үлкен, ортасы кішірек болады екен. Ірі балықтарды аулау үшін капрон жіптен тоқып, жасаған.Ал, талдан иіп дайындалатын «қабадан ау» өзен-көлдің тайыз жерлеріне құру мақсатында ойлап табылған құрылғы саналады. Оның ерекшелігі – ауға кірген су маржаны қайта шыға алмайды. Сонымен бірге, ел аузында жүрген «ақанай ау» көпті тамсандырған. Ауды тоқыған адамның құрметіне солай аталған көрінеді. «Ақанаймен» тек ғана, үлкен жайындар ауланған екен.<blockquote>«Енді бір әңгімелерде ауыл ақсақалдары Сырдарияны жағалаған балықшылар «қаза» ауын құрғандықтан ауданның «Қазалы» деп аталуы мүмкін деген тұжырым келтіреді. Олардың дерегінше, «қаза» майланғанда балық судың бетіне шығып тұрады. Кейін аулардың жаңа түрлері пайдалануға енгеннен кейін «қаза» қолданыстан шығып қалған. Қазаны қамыстан, жыңғылдың шыбығынан жерге қазық қағып, соны айналдыра тоқитын болған. Ұзына бойына 10 метрге дейін тоқып, астыңғы жағынан балық кіретін орын қалдырған. Ішіне су маржаны толғанда бетінен шолпымен сүзіп алып отырған», – дейді Құмжиек ауылының тұрғыны Рамазан Қонысбай.</blockquote>Тоқылған тордың түрі көпАудың самала, қода, құрма, шөміш, тағы басқа да, бір-бірінен өзіндік құрылымдық айырмашылығы бар көптеген түрлері қолданылғаны туралы тілдік және этнографиялық мәліметтер тарихи құжаттарда кездеседі. Әр жердің өзіндік ерекшеліктеріне қарай шеберлер ертеректе балық аулайтын құрылғыларды ағаш, шілік немесе қамыстан тоқып жасаған. Мұндай құралдардың тор көздерінің мөлшері аулайтын балықтың айқұлағынан ілінетіндей және балықтың басы өтпейтіндей мөлшерде жасалған. Соның бір түрі – қода деседі. Ау түрлерін пішіні, құрылымы, көлемі және қолданыстық ерекшелегіне қарай негізінен үш топқа бөліп қарастыруға болады.<blockquote>«Сүзгі ay – үлкен сулардан балық аулауға құрылатын ортасы сүйретілген, ұзынша етіп тор көзінен үлкен балықтар өтіп кете алмайтындай етіп тоқылған жабдық. Сүзгі төрт бұрышына тағылған арқан арқылы ауға түскен балық сүзіліп алынады. Сүзгі аудың ақап ау, аламан ay, майшабақ ay тәрізді түрлері кездеседі», – дейді қазалылық ақсақал Әбдіреш Баймұратов.</blockquote>Сонымен қатар, ел аузындағы құрма ау – жалпақ тоқылып суға кесе көлденең керілетін ау түрі. Тоқылуы сүзгі ауымен ұқсас. Мұны қыста мұз астында, жазда суға екі жағына екі қада орнатып, астыңғы жағының әр жеріне тас байлап, құрып қояды. Одан өтпек болған балық желбезегінен тор көздеріне кептеліп, оралып қалады.Көпті көрген ақсақалдың мәлімдеуінше, шөміш ау – көлемі шағын, тордың түп жағы қанар тәрізді ұзынша болып келген ау түрі. Тоқылуы сүзгі ау мен құрма ауға ұқсайды. Алдымен ұзын сырыққа ағаштан иіп, сап орнатады да, оның басына тоқылған ауды жіппен жіпселейді. Көбінесе түнге қарай құрылатын шөміш аудың түрлері көп. Олар қол қауға, тоспай, қара ау, бөгеу ау деп те аталады. Бөгеу ау құрылған жерінде ұзақтау, яғни, бір-екі ай тұрады.Ағынды суларда әрқайысысы 15-20 құлаш болатын бірнеше ауды бір-біріне жымдастыра жалғап, өзенге көлденеңнен құратын «ығызбай» ауы қолданылады. Оның үстіңгі арқалығына қалтқы, астыңғы табандығына салдауыр байлайды да, арқалықтың екінші ұшын қайықтағы балықшы ұстап отырады. Аудың мөлшері әртүрлі, ұзындығы бір жарымнан 8-20 құлашқа дейін барады. Басқа халықтардан сауда-саттық жолымен келген ау көзінің мөлшерін қазақ балықшылары үш, төрт, алты елі деген немесе төртінші, бесінші, алтыншы сияқты миллиметрлік өлшеммен атау қалыптасқан. Осыған байланысты, аудың қандай балықты ұстауға қолайлы екендігі балықшылар тілінде – «алты елі ауға табан балық, үш елі ауға торта түседі» деген тұрақты сөз орамында сақталған.

Қазалы мен Арал ежелден балықшылар мекені

<a href="https://kyzylorda-news.kz/">Kyzylorda-news.kz.</a> Бүгін Өңірлік коммуникациялар қызметінің ақпараттық алаңында өткен брифингте солтүстік өңірлердегі бос жұмыс орындары, қоныс аударушыларға мемлекеттен көрсетілетін қолдау шаралары туралы Қызылорда облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева баяндап өтті.Сондай-ақ &nbsp;брифингке &nbsp;оңтүстік өңірінің тұрғындарын солтүстікке қоныстандыру мәселелерімен Қостанай, Павлодар және Ұлытау, Абай облыстарының жұмыспен қамту басқармасының мамандары да қатысты.&nbsp;Мамандардың айтуынша, солтүстік өңірлерден 3000-ға жуық экономиканың әртүрлі салалары бойынша бос жұмыс орындары бар. Атап айтқанда, ауыл шаруашылығы, білім, денсаулық, зоотехник, механизатор, техника қауіпсіздігінің инженері, инженер-механик, көмір және цемент зауытының машинисті, электргазбен дәнекерлеуші, орау машинасының операторы, ағаш және жиһаз өндірісінің шебері оқытушы, құрылыс және монтаждау жұмыстарының шебері, кең профилді станокшы, техник, аспазшы, жүргізуші, автоэлектрик, дәнекерлеуші, іс жүргізуші, аудармашы, бухгалтер, еден жуушы, ветеринарлық санитары және т. б.&nbsp;<blockquote>«Облыстан солтүстік өңірге 2014 жылдан бері 2000-ға жуық отбасы қоныс аударды. Мәселен, өткен жылы 187 отбасы қоныс аудару квотасына енгізілді. Сондай-ақ қоныс аударғандардың 221-і тұрақты жұмыспен қамтылды. Алты адам жеке кәсібін ашса, екі адам ақылы қоғамдық жұмысқа жолданды. 9 адам мемлекеттік грант алса, 1 адам қысқа мерзімді оқудан өтті. Ал биыл 19-21 сәуір аралығында Қызылорда облысына Солтүстік өңірлерден жұмыс берушілердің қатысуымен «Солтүстік өңірлердің жәрмеңкесі» атты кездесулер өткізуді бастады. Сонымен қатар, &nbsp;Ұлттық жобамен ұсынылатын мемлекеттік қолдау шаралары жіті жүргізілуде. Сәйкесінше, қоныс аударушыға және оның әрбір отбасы мүшелеріне бір рет 70 АЕК мөлшерінде көшуге материалдық көмек беріледі. Мұнан өзге, экономикалық ұтқырлық сертификаты тұрғын-үйді сатып алуға, салуға немесе алғашқы жарна ретінде пайдалануға тұрғын-үй құнының 50 пайызын 4 млн. теңгеден аспайтын сомада ұсынылады. Қоныс аударушының отбасына, оның ішінде жалғызбастыларға он екі ай бойы ай сайын тұрғын үйді және коммуналдық қызметтерге ақы төлеу бойынша шығыстарды өтеуге материалдық көмек беріледі», - деді Жанар Жұмабекқызы.&nbsp;</blockquote>Бұған қоса, қоныс аударушыларды қажет болған кезде техникалық және кәсіптік білім беру ұйымына және қысқа мерзімді кәсіптік курстарға жібереді.Қазіргі таңда өңтүстіктен солтүстікке қоныс аударушылардың саны артқан. Оған себеп қоныс аударушыларға берілетін субсидяи көлемінің артуы.&nbsp;Айта кетейік, Президент Қасым-Жомарт Тоқаевтың тапсырмасы бойынша оңтүстіктен солтүстікке қоныс аударушылардың көшуіне берілетін субсидия мөлшері 35 АЕК-тен 70 АЕК-ке артады

Қызылордадан солтүстікке 2000-ға жуық отбасы қоныс аударды

<a href="https://kyzylorda-news.kz/">Kyzylorda-news.kz.</a>&nbsp; Қармақшы ауданында профилактикалық түсіндірме жұмыстары жалғасын тауып жатыр.Бүгінгі таңда қоғамның алдында тұрған басты міндеттердің бірі – балалар мен жасөспірімдер арасындағы құқық бұзушылықтың алдын алу,кәмелетке толмағандар арасындағы қылмыстың өсуіне жол бермеу. Бұл мәселе қазіргі таңда көкейтесті мәселелердің біріне айналып отыр. Осыған орай Қармақшы ауданының әкімі Жандос Еркінбекұлының бастамасымен жасөспірімдер арасында топтық төбелестің, құқықбұзушылықтың, әлімжеттіктің, буллингтің алдын алу мақсатында аудан ардагерлері мен аудандық мәслихат депутаттарынан арнайы топ жасақталып, аудан орталығындағы С.Есқараев атындағы № 27 орта мектебінің білім алушыларының ата-аналары мен құқық органы қызметкерлерінің қатысуымен профилактикалық түсіндірме жұмысын жүргізу барысы одан әрі жалғасын тапты.Арнайы бас қосуда жасөспірімдердің қылмыс жасауының себептері қарастырылып, оған кейбір ата-аналардың бала тағдырына алаңдамауынан, оларды өз беттерінше қалдырып, мектептен тыс бос уақыттарында немен шұғылданып жүргендерін қадағаламауынан орын алатындығы айтылды.<blockquote>«Ел болам десең - бесігіңді түзе» деп дана халқымыз айтқандай, әрбір ата-ана өз баласының тәртібі мен тәрбиесіне аса мән беріп, бос уақытта немен айналысатынына қатаң бақылау жасаса, жасөспірімдер арасында құқықбұзушылық пен қылмыстың төмендеуіне көп септігін тигізер еді» дейді мамандар.</blockquote>&nbsp;

Қармақшылықтар бала мәселесіне бей-жай емес

<a href="https://kyzylorda-news.kz/">Kyzylorda-news.kz.</a>&nbsp;Ұлттық руханият пен мәдениеттің өркендеу жолында өзіндік орны бар дүниелердің бірі – тарихи-мәдени ескерткіштер. Олар қашанда өткеніміз бен мәдениетіміздің құнды жәдігерлері ретінде күні бүгінге дейін өз маңызын жойған емес. Себебі, Тарихи мұралар елдің өткенінен сыр шертер халықтың ұлттық құндылығы ғана емес, кешегісі мен бүгінін саралауға мүмкіндік береді. Ескерткіш мұралары – көне тарихтың куәсі деуіміз де сондықтан. Оның келешек ұрпаққа тәлім тәрбие беруде де маңызы зор.Қазіргі таңда Шиелі ауданы бойынша 49 тарихи-мәдени ескерткіш мемлекет қорғауына алынған. Оның 3-еуі республикалық маңызға ие. Ал жергілікті маңыздағы ескерткіштер қатарына 28-і кіреді. Қалған 20 тарихи-мәдени мұра объектілері алдын ала есепте тұр. Аудан көлеміндегі 8 ескерткішке қорғау тақталары орнатылып, төлқұжаттары рәсімделген.&nbsp;Қазіргі таңда «Қызылорда облысының тарихи және мәдени ескерткіштеріне QR-код орнату» жобасы аясында Шиелі ауданы бойынша мобильді қолжетімді жерлердегі 16 тарихи және мәдени ескерткіштерге QR-код тақтайшалары орнатылған. Сол арқылы тарихи-мәдени ескерткіштер туралы мәліметті алуға болады.&nbsp;Сонымен қатар, қасиетті жерлерді сандық форматқа көшіру және олар туралы әлеуметтік желі қолданушыларына қолжетімділікті қамтамасыз ету мақсатында облыстық бюджет есебінен жергілікті маңызы бар киелі жерлердің 3D форматтағы интерактивті картасы дайындалып, облыстық жергілікті атқарушы органдардың сайттарына орнатылды. &nbsp; Әрбір ескерткіш орналасқан аумағына қарай сол жердің өткен тарихынан хабардар ететін ұлт байлығының &nbsp;рухани қазынасы екені баршамызға мәлім.Тарихи-мәдениет ескерткіштерді түпнұсқа қалпында &nbsp;яғни қираудан, бүлінуден сақтау мыңызды мәселенің бірі. Мәдени құндылықтардың тоналуы, олардың зақымдануы кез келген елдің, халықтың тарихын, мәдениетінің күйреуіне, жойылуына алып келеді.&nbsp;Сондықтан тарихи-мәдени мұралар көне тарихтың куәсі, өткенімізден сыр шертіп, бүгінгі күнге дейін сақталып, жетіп отырған ескерткіштерді қорғау мен сақтау, оларды насихаттау әрбір азаматтың еліне, туған жеріне деген жанашырлығы, қамқорлығы болмақ.

 Шиелі ауданында 49 тарихи-мәдени ескерткіш мемлекет қорғауына алынған

Қалалық кітапхана: Әрбір шара тағылымға толы

<a href="https://kyzylorda-news.kz/">Kyzylorda-news.kz.</a> Өткен апта соңында жұмыс сапарымен келген ҚР Премьер-министрінің орынбасары Алтай Көлгінов Шиелі ауданына қарасты ауылдарға табан тіреп, мектептер мен ауданаралық ауруханаға бас сұқты. Жалпы ауданда 6 апатты мектеп бар. Биыл соның үшеуі шешімін таппақ.Үкімет басшысы орынбасарының іс-сапары «Иіркөл» ауылдық округіне қарасты Жансейіт ауылындағы мектептен басталды. Іргетасы 1979 жылдары қаланған бұл ғимарат шын мәнінде апатты жағдайда тұр. Пайдалануға берілгеніне 44 жылдан асқан. Ескіні жамай бергенше, жаңа мектеп салынғаны абзал. Ауыл тұрғындарының да тілегі сол. Бүгінде бұл ауылда 80 түтін бар. 423 адам тұрады. Білім ошағында 6 сынып бөлмесі, мұғалімдер бөлмесі мен медициналық кабинет бар. Ал асхана мен акт зал, спорт зал атымен жоқ. Мектеп оқушылары 2 ауысымда оқиды. Бүгінгі таңда 90 оқушы білім алуда. Елді мекенде 6 жасқа дейінгі 70 бала бар. Демек, алдағы уақытта оқушылар саны артпақ. Сол үшін мұнда жаңа білім ұясын салу қажеттілігі басым.Алтай Сейдірұлы жұмыс сапарын «Жаңатұрмыс» ауылдық округі, Байсын ауылында жалғастырды. 250 орындық №207 мектеп құрылысын көрді. Екі қабаттан тұратын мектеп ғимаратын бас мердігер – «Авангард ПГС» ЖШС салуда. Құрылыстың жалпы құны – 942,5 млн теңге. Бүгінде жұмыстың 60 проценті біткен. Бірақ қаржының жетіспеушілігіне байланысты жұмыстың тұралап қалу қаупі жоқ емес. Бұл мәселеге орай тиісті шаралар қаралатын болды. Айта кетейік, қазіргі таңда бұл елді мекенде 185 үй мен 1068 адам тұрады.Жоғарыда ауданда алты апатты мектеп барын айттық. Солардың қатарында №45 Ақ Орда мектеп-гимназиясы бар. Мекеме 1922 жылы ашылып, 1958 жылы бейімделген жобадағы мектеп ғимаратына көшіріліпті. Сыйымдылығы 640 орынды құрайтын білім ошағында 777 оқушы білім алуда.Президент Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Жолдауында Үкіметке «Жайлы мектеп» ұлттық жобасын жолға қоюды тапсырды. Яғни, «Біз 2025 жылға дейін 800 мың баланың заманауи мектепте оқуына жағдай жасаймыз. Осылайша, апатты жағдайдағы және үш ауысыммен оқитын мектеп мәселесін толық шешеміз. Бұл ауыл және қала мектептерінің айырмашылығын едәуір азайтады», – деген болатын. Бұл мәселеге қатысты үкімет басшысының орынбасары А.Көлгінов «Жайлы мектеп» ұлттық жобасы аясында апатты мектептер шешімін табатынын жеткізді. Сондай-ақ биыл «Білім беруді қолдау қоры» есебінен Қызылорда облысында 5 мектеп салынатыны мәлім болды. Оның ішінде дарынды балаларға арналған физика-математика мектеп-интернаты да бар.ҚР Премьер-министрінің орынбасары ауданға сапар кезінде Шиелі орталық көпбейінді аудандық ауруханасының жайымен танысты. Қызмет тарихы бір ғасырдан асатын аталған мекеме 1974 жылы «Бәйгеқұм» ауылынан көшіріліп, Шиелі аудандық ауруханасы болып қайта құрылады. Білікті де білімді дәрігер Нұрлан Әмір басқаратын аурухана жаңадан 2019 жылы пайдалануға берілген. Қазіргі таңда 271 қызметкер жұмыс істейді. Оның ішінде 41 дәрігер, 127 медбике, 63 техникалық және тағы басқа қызметкерлер бар.&nbsp;Іс-сапар соңында Алтай Сейдірұлы «Ауылда денсаулық сақтауды жаңғырту» ұлттық жобасы аясында 2023-2024 жылдары облыста 27 денсаулық сақтау нысаны бой көтеретінін жеткізді. Бүгінде Қызылорда қаласында бір ауысымда 100 келушіге арналған емхана және онкологиялық көпбейінді аурухананың құрылысы басталған. Жобаны жалпы құны – 36,4 млрд теңгені құрайды.

Шиелі ауданының тынысы – Үкімет назарында

<a href="https://kyzylorda-news.kz/">Kyzylorda-news.kz.</a> Ерекше қажеттіліктері бар адамдарды әлеуметтік қолдау және олардың өмір сүру сапасын арттыру – мемлекеттік саясаттың басты бағыттарына жатады. Сонымен қатар, ҚР Еңбек және халықты әлеуметтік қорғау министрлігінің бірінші кезектегі міндеттері болып саналады.Мүгедектігі бар адамдарды әлеуметтік қорғау саласындағы мемлекеттік саясат олардың қоғамға толыққанды кірігуіне және халықтың осы санаты басқалармен теңдей өмір сүруіне жағдай жасайды. Сондай-ақ, жұмыс істеп, білім алуы, қоғам өміріне еркін қатысуы, белгілі бір шешімдер қабылдауы және тағы басқа үшін кедергілерді еңсеруге және жоюға бағытталған. Ресми мәліметтерге сүйенсек, Қазалы ауданы бойынша осы жылдың сәуір айына мүгедектігі бойынша мемлекеттік әлеуметтік жәрдемақы алушы мүгедектер саны 3251 құрап отыр. Оның ішінде – I-топтағы – 285, II-топтағы мүгедектер – 1197, III-топтағы – 1313 адам бар. Бұған қоса, 7 жасқа дейінгі мүгедек балалардан – 130-ы тіркеуге алынған. Ал, 7-18 жас аралығындағы балалар 1-топтағы – 45-сі, II-топтағы – 49-ы, III-топтағы – 232-сі тізімге ілінген.<blockquote>«Аудан көлеміндегі мүгедектігі бар 3251 азамат 2150 адам мүгедектігіне байланысты оңалтудың жеке бағдарламасымен қамтылған. «Мүгедектерді жеке оңалту» бағдарламасына байланысты әлеуметтік қорғау, әлеуметтік көмек көрсету, медициналық, әлеуметтік және кәсіптік оңалту, білім беру және олардың қоғам өміріне басқа азаматтармен бірдей белсене қатысуына мүмкіндіктер жасауға арналған жұмыстар атқарылды», – дейді Қазалы аудандық жұмыспен қамту әлеуметтік бағдарламалар және хал-актілерін тіркеу бөлімінің мүгедектермен жұмыс секторының бас маманы Жадыра Сырымова.</blockquote>Бас маманның айтуынша, 2023 жылдың 3 айында Қызылорда қаласының «Талсуат» елді мекенінде орналасқан «Мүгедектерге арналған оңалту орталығы» мемлекеттік мекемесіне жеке оңалту парағы бойынша жолдамамен 17 мүмкіндігі шектеулі жан оңалтуға жіберілді.<blockquote>«Мүгедектердің жеке оңалту бағдарламасына байланысты санаторий-курортқа емделуге 68 мүгедектігі бар адам құжат тапсырды. Әлеуметтік порталы арқылы санаторий-курорттық қызмет көрсетуші мекемені өздерінің электрондық цифрлық қолтаңбалары арқылы ем алатын уақыттарын өздері таңдайды. Солардың ішінен 15 көңілі қаяу адам дем алуға жіберілді», – дейді Жадыра Ұлтайқызы.</blockquote>Мүгедектердің жеке оңалту бағдарламасына сәйкес міндетті гигиеналық құралдарға – жөргек, нәжіс және несіп қабылдағыштарға қажетті сома берілді. Сонымен бірге, қосымша техникалық көмекші құрал-жабдықтарға бюджеттен биыл барлығы 74919,0 мың теңге бөлінген. Соның ішінде, 510 мүгедектігі бар адам гигиеналық құралдарға құжат тапсырған. Енді 33687,1 мың теңгеге 415 адамға жеткізіп берушілермен (поставщиктерге) төлем жасалып, аудандық пошта байланыс торабы арқылы үйлеріне жеткізіліп берілді.Мүгедектердің жеке оңалту бағдарламасына сәйкес, протезді-ортопедиялық құрылғы – 107, тифлотехникалық құрылғы – 98, арнаулы жүріп-тұру құралы – 32, сурдотехникалық құрал – 12 адамға жеткізіп берушілермен төлем жасалды. Қазалы аудандық пошта байланыс торабы арқылы үйлеріне апарылып табысталды.Әңгіме барысында Жадыра Ұлтайқызы мемлекеттік әлеуметтік тапсырыс бойынша жұмыс жүйелі атқарылатындығын жеткізді. Атап айтқанда, «Инватакси» қызметіне ағымдағы жылы бюджеттен 8350 мың теңге аударылды. Соған орай, 10 инватакси көлігімен тұрақты түрде мүгедектігі бар адамдардан 1188 тапсырыс қабылданып, 1893,1 мың теңгеге қызмет көрсетілді.&nbsp;<blockquote>«Шапағат» мүгедектігі бар балаларға күндізгі жартылай стационарлық жағдайдағы оңалту орталығында арнайы қызмет көрсету бойынша бюджеттен 25251,0 мың теңге қаржы қаралған. Есептік кезеңде 18 балаға 2971,0 мың теңгеге қызмет көрсетілді. Жүріп-тұруы қиын І-топтағы мүгедектер үшін жеке көмекшінің қызметіне биыл бюджеттен бөлінген 227016,0 мың теңгеден есептік кезеңде жүріп-тұруы қиын І-топтағы 170 мүгедектігі бар адамдарға 170 жеке көмекшінің қызметіне – 32739,0 мың теңге төленді. Ымдау тілі маманының қызметіне бюджеттен бөлінген қаржыдан 12 естуі бойынша мүгедектерге 1 ымдау тілі маманының қызметіне тиісті сомасы төленді деген мәліметті алға тартты Қазалы аудандық жұмыспен қамту әлеуметтік бағдарламалар және хал-актілерін тіркеу бөлімінің мүгедектермен жұмыс секторының бас маманы Жадыра Сырымова.</blockquote>Мүгедектігі бар адамдардың құқықтары мен заңды мүдделерін қамтамасыз ету үшін ауданда әлеуметтік жәрдемақылар мен төлемдер түріндегі мемлекеттік көмек пен қолдауды, әлеуметтік оңалту шеңберінде ағзаның жоғалтқан функцияларының орнын толтыруды және арнаулы әлеуметтік қызметтер көрсетуді қамтитын көп деңгейлі әлеуметтік қорғау жүйесі осылай жұмыс істейді.

Қазақстан және Қызылорда облысының жаңалықтары