<a href="https://kyzylorda-news.kz/">Kyzylorda-news.kz.</a> Жаңақорған аудандық мешітінің қолдауымен, «Жаңарған Жаңақорған жастары» қоғамдық қорының ұйымдастыруымен қарилар арасында Құранның 30-шы парасы мен Азан шақырудан аудандық жарыс өтті. Ерікті жастардың ізгі бастамасымен бастау алған имандылық жарысы дәстүрлі түрде жылда өткізіліп келеді. ҚМДБ-ның Қызылорда облысы бойынша өкілдігі мен Жаңақорған ауданы имамдары қазылар алқасының құрамынан табылды.&nbsp;Ақылдаса келе, аудандық &nbsp;Құран жарыс өткен сенбіге сәйкес келді. Кенттегі «Қум сахаба» мешіті мен «Хисамиддин Сығанақи» мешітіне ауыл-аймақтан &nbsp;жарысқа 60-тан астам шәкірт қатысты. Пандемияға байланысты барлық карантин талаптарын сақтай отырып, Құран мен Азан жарысы екі мешітте бөліп өткізілді. &nbsp;Оның ішінде, Құранды мәнерлеп оқу сайысына 23, ал &nbsp;қасиетті Құранның соңғы 30-шы парасын жатқа оқуға 10, Азан сайысына 26 шәкірт қатысты.Қатысушыларға сәттілік тілеген ауданның бас имамы Әбдіхалық қажы Махмұтүлы рухани шара ел Ал қазылар алқасының төрағасы облыстық «Ақмешіт-Сырдария» мешітінің наиб имамы Шыңғыс қари Садуов және облыстық «Ақмешіт-Сырдария» мешітінің наиб имамы Мағжан Өмірбеков және Шалқия кентінің имамы Дәуітбек Әлімбеков болды. Қазылар баға беру барысында үміткердің барлық қырына: оқу мәнерінен бастап, дыбыстарды шығаруы мен тәжуид ережелерін сақтауына баса мән берді.Түс ауа аяқталған сайыстың қорытындысын білуге барлық қатысушы асыққаны анық. Өйткені, бас жүлде иегері қасиетті Мекке қаласына кіші қажылық сапарға тегін жолдамаға ие болады. Қазылар алқасының шешімін тағатсыздана күткен үміткерлер ішінен үздігінің атын атауға һәм марапаттауға Шыңғыс қари, Мағжан қари, ауданның бас имамы Әбдіхалық қажы Махмұтұлы, «Жаңарған Жаңақорған жастары» қоғамдық қорының төрағасы Еркінбек Айнақожаев, «Қум сахаба» мешітінің имамы Ержан Сейтжаппаров, «Хиса-миддин Сығанақи» мешітінің имамы Жеңіс Ашимов &nbsp;ортаға шықты. Қазылар алқасының шешімімен Құранның 30-шы парасын жатқа айту жарысының бас жүлдесі яғни, умра қажылыққа жолдама Сүттіқұдық ауылынан келген шәкірт Жаңабай Жапековке бұйырды. Қасиетті мекенге жолдаманың сертификатына демеушілік жасаған «Заңғар» сауда үйінің басшысы Нұржан Палманов табыстады.Ендігі кезекте, жалпы аудандық жарыстың қорытындысын таныстырсақ. Құранның соңғы 30-шы парасын жатқа оқудан 1-орын Ернар Алғабас (120 000тг), 2-орын Сунатулла Исмаилов (100 000тг), 3-орын Ерасыл Ақжігіт (70 000тг), ал Құранды мәнерлеп оқудан 1-орын Данат Әбен (100 000тг), 2-орын Ержан Зәйдин (70 000тг), 3-орын Мұхамеджан Сұлтан (50 000тг), Азан шақыру сайысында 1-орын Қожахмет Талғатұлы (70 000тг), 2-орын Болат Нұрсұлтан (50 000тг), 3-орын Айжігіт Әділбек (30 000тг) алды. Айта кету керек, дәстүрлі түрде аудандық деңгейде ұйымдастырылған Құран жарысына жаңақорғандық жомарт жандар мен мешіт жамағаты қаржылай демеушілік жасады. Сондай-ақ ауылдардан ең көп шәкірт жарысқа қатыстырған Бесарық, Сүттіқұдық ауылының имамдарына Қоғамдық қор тарапынан арнайы бағалы сыйлықтар табысталды. Иә, қорыта айтқанда, имандылық – ұрпақ тәрбиесінің ең басты қайнар бұлағы. Бүгінгідей жаһандану заманында қоғамдағы кейбір жеткіншектердің әдепсіз әдеттері, мұсылманға жат қылыққа бой алдыруы, ата-анасын тыңдамауы, ертелі-кеш телефонға телміруі, сөз жоқ осы имандылық дәнінің бойға дұрыс дарымағанынан. Атам заманнан қазақ үшін бала қымбат болса, оның тәрбиесі одан да қымбат. Бұл тұрғыда «Жаңарған Жаңақорған жастары» еріктілер тобының ұйытқы болуымен өткен рухани шараның өскелең ұрпаққа берер тәрбиесі мол деп білеміз.

Жаңақорған ауданында Құран оқу жарысы өтті

<a href="https://kyzylorda-news.kz/">Kyzylorda-news.kz.</a> Жаңақорған ауданы тұмса табиғаты, тарихи орындары, көне жәдігерлері мен жауһазан жерлері бола тұра туризм көшінен әлдеқайда қалып келеді. Басқасын айтпағанда өндірісі мен өнері, спорты мен сан саласы, әлеуметі мен экономикасы өрлеу жолында келе жатқан Жаңақорған ауданында осы туризм саласы әлі де еңсе көтере алмай келеді. Осы бағытта келелі істі қолға алуды аудан әкімі тиісті мамандарға жүктеді.Ауданның туристік әлеуеті туралы сөз қозғамақпыз.Тау мен тасы, өзені мен көлі, жазық даласы, орманды алқабы бар киелі өлкенің қойын-қонышы тұнып тұрған тарих һәм шежіре. Ыстық суы мен шипалы батпағын да қосыңыз. Бізде баратын жер көп, бірақ насихаты кемшін. Жарнамасы жеткіліксіз. Сосын сол келетін туристерге қолайлы жағдай жасау маңызды. Жүйкені жұқартатын жол азабы, дамымаған инфрақұрылым, интернеттің жоқтығы – отандық туризмнің ортақ мәселесі осы.Әлем туризмінің артықшылығы неде?Біз жоғарыда атап өткендей дамыған елдердегі туризмнің басты жетістігі ол инфрақұрылымы мен жарнамасы. Мәселен, қазақтар көп баратын Түркия экономикасына туризм саласы жыл сайын 35-40 млрд АҚШ долларын алып келетін ең маңызды салалардың бірі. Туристер саны бойынша Түркия әлемдегі 6-7 орында тұрған ел. 2022 жылы Түркия50 млн-ға жуық турист қабылдаған, ең көп турист Германия, Ресей және Ұлыбританиядан.Туристтердің негізгі бөлігі Стамбул мен Анталья қалаларына барса да, ақпан айының басында орын алған жер сілкінісі, әрине, туризм саласына кері әсерін тигізетін болады. Осыған қарамай түрік Үкіметі туризмді қайта қалпына келтіруді көздеп отыр.Сол секілді ислам елдері ішінде араб мемлекеттеріне саяхаттаушылардың санында есеп жоқ. Дубай, Египет жне өзге де өзіндік өрнегі бар керемет мегаполистерге кім-кімнің болсын барғысы келетіні анық. Италия болса көне шаһарларымен, Франция зәулім ғимараттарымен, Германия болса әдемі табиғатымен мақтана алады. Ал, бізде осылардың барлығы бар. Жер асты және жер үсті байлығының барлығы бізде тұнып тұр.“Travellers' Choice Awards” халықаралық премиясының 2023 жылғы нәтижесі бойынша демалуға арналған үздік ел – Куба деп танылды.Рейтингтің екінші және үшінші орындарын Вьетнам мен Маврикий аралы өзара бөлісті. Олардың артынан Камбоджа мен Таиланд үздік бестікке енді. Кайман аралдары, Марокко, Әзербайжан және Непал да саяхаттаудың ең тамаша орындары ретінде танылған. Ең көп сұранысқа ие туристік бағыттардың үздік ондығын Польша жапты.Қазақстанның бүгіні қалай?Бұл салаға Мемлекет басшысы арнайы пәрмен беріп, нақты міндеттер жүктеді. Жыл соңына дейін елге келетін туристер саны артуын, көркем жерлердің келбетін қайта келтіруін шегелеп берді.<blockquote>«Әлемде орын алған пандемия салдарынан Қазақстанның ішкі туризм саласы да бәсеңдеп қалған еді. Бірақ қазір 2019 жылмен салыстырғанда туристердің саны өсіп келеді. Соңғы 9 айда ішкі туризм статистикасы 6,5 миллион болса, жыл қорытындысы бойынша бұл көрсеткіш 8 миллионға жетуі мүмкін. Ал шетелден келген туристер саны 610 мыңнан 1 миллионға дейін жетеді. Халықаралық туризм кеңесінің болжамы бойынша 2024 жылы әлемдік туризм саласы қалпына келуі керек. Ал Қазақстанда бұл болжам 2022 жылы орындалды деуге болады», деді туризм индустриясы комитетінің төрағасы Дастан Рыспеков.</blockquote>Мысалы, 2021 жылы Қазақстан өз позициясын жақсартып, 117 ел арасында 66-орынға ие болды, 2019 жылы – 140 ел ішінде 80-орында еді. Қазақстанның біз білетін Көкшетауы, Алматының әсем жерлері, тарихи өңірлері мен тауларынан тұратын облыстары саяхатшыларды қызықтырмай қоймасы анық. Ол да уақыттың еншісіндегі меже.Туризм жобаларын субсидиялау<blockquote>«Туризмдегі инвестициялық әлеуетті дамытуға баса мән беріледі. Біздің министрлік «Қазақтуризм» компаниясымен бірлесіп, инвестициялық жобалар пулын қалыптастырды. Өткен жылдың қорытындысы бойынша 40 млрд теңгеге 138 жоба іске асырылды. Биыл 288 млрд теңгеге 115 жобаны іске асыру жоспарланып отыр», – деді мәдениет және спорт вице-министрі. Қазіргі жеңілдетілген несиелеу механизмі белгіленген мерзімде шығынды ақтауға мүмкіндік бермейді. Орта есеппен қонақ үй құны 10 жылда өтеледі.«Осыған байланысты туризм жобаларын субсидиялау мерзімдерін 5 жылдан 10 жылға дейін ұзарту, сондай-ақ қаржыландыру лимиттерін 5 млрд теңгеге дейін ұлғайту қажет. Тиісті ұсынысты Ұлттық экономика министрлігіне жібердік», – деді вице-министр.</blockquote>Аудандағы ахуал қалай?Жаңақорған ауданында туризм саласы бойынша 15 субьекті тіркелген. 4 шипажай, 2 балалар лагері, 6 қонақ үй, 3 демалыс орны. Сонымен қатар бүгінгі күнге дейін «Батыс Қытай – Батыс Еуропа» көлік дәлізі бойында жалпы құны 2 млрд 556 млнтеңгені құрайтын 6 жол бойы қызмет көрсету кешендері, В санатындағы – 4, С санатындағы –2 жол бойы қызмет көрсету кешендері жұмыс жасап келеді.«Батыс Қытай – Батыс Еуропа» көлік дәлізі бойында салынған жол бойы сервистік қызмет көрсету нысандарын дамыту тұрақты түрде жалғасуда. Мәселен, «Рахат» жол бойы қызмет көрсету кешеніндегі санитарлы-гигиеналық торап ҚР Мәдениет және спорт министрініңбұйрығымен бекітілген «Кәсіпкерлік субьектілерінің СГТ – ды күтіп ұстауға арналған шығындарының бір бөлігін субсидиялау» қағидаларының талаптарына сәйкестендірілді.Бүгінгі таңда жол бойы қызмет көрсету кешендерінің сапалы қызмет көрсетілуі, ыңғайлылығы, тазалығы, оның ішінде дәретханалары, олардың күтіп-бапталуы, терминалдар мен интернет желілерінің орнатылуы арнайы бақылауда дейді жауапты сала мамандары.Жалпы Жаңақорғанның брендіне айналған шипалы батпағы шипажайлардың жиі ашылуына мүмкіндік беруде. Қазірдің өзінде аудан орталығында 4 шипажай жұмыс істеп тұр. «Жаңақорған» шипажайы АҚ, «Шипажай Жаңақорған», «Ақ-Шуақ» және«Орда-Сығанақ» ЖШС.2022 жылы «Жан-Арай» ЖШС жол бойы қызмет көрсету кешенінің жанынан салынып жатқан тағы бір 100 орындықты шипажай құрылысы осы жылдың1 жартыжылдығында аяқталады деп күтілуде. Жоба құны 1,2 млрд теңге. Республикадағы қайсыбір шипажайды алмаңыз, сыртқы және ішкі ағзаларды бірдей емдейтін батпағы, тұзды және минералды суы бар емдеу орындары бізде ғана. Ем алумен қатар емделушілерге би кештері, концерт, киелі мекендерге әр аптаның жексенбісінде Арыстан баб, Түркістан, Сауран, өзіміздегі киелі жерлер Қорасан ата, Төлегетай-Қылышты ата кесенелеріне саяхат жасау ұйымдастырылған.Сондықтан келушілер саны да жылдан-жылға артып отырады. Әрине, келушілер емдік бағытта болмаса, туристік түсінікпен келмейді.Одан бөлек, Апанғақ, көне шаһарлар да бар бізде. Көркем жерлерді жеке кәсіпке айналдырып, табыс тауып отырған аймақта аудандар да жоқ емес. Мәселен, Шиелі ауданындағы “Бәгеқұм” демалыс орны маусымдық кезеңде әжептеуір қазынаны толтырады. Бізде де бай-бағландар жетеді, бірақ оны кім ойласын. Тау бөктерінен зәулім ғимарттар салып, керемет демалыс орнына айналдыруға болады. Бұл жөнінде әкімдікте талай талқылау болуда, бірақ қалталы азаматтар үйреншікті төрт түлікті көбейтіп, мемлекеттен тегін субсидияны алуға дағдыланып алған. Ол да шешілер. Жалпы туризмге қатысты шешімін таппай отырған мәселелер біздің ауданда аз емес. Бұл жайында аудандық кәсіпкерлік және туризм бөлімнің бас маманы Бекзат Омарова нақты жауап берді.– Жаңақорған ауданында белгіленген туристік маршруттар бойынша бүгінгі күні шешімін таппай келе жатқан мәселелер жетерлік.Соның бірі Ақүйік ауылдық округінің оңтүстік шығысында 25 шақырым қашықтықта орналасқан «Қатын қамал» үңгірі. 2021 жылы «Қатын қамал» үңгірін туристік орынға айналдыру мақсатында 25 шақырым жолды салу жоспарланып, облыстық жолаушылар көлігі және автомобиль жолдары басқармасынахатпен қажетті қаржы көрсетілген бюджеттік өтініммен ұсыныс хат жолданды. Алайда, бұл мәселе бүгінгі күнге әлі шешімін тапқан жоқ. Сонымен қатар, ортағасырлық тарихы бар Сығанақ қалашығын қайта жаңғырту, зерттеу жұмыстары баяу жалғасуда. Жыл сайын республикадан, облыстан қаралған мардымсыз қаржылар көне қаланың архитектуралық келбетін толық айқындауға жеткіліксіз деп ойлаймын, – деді бас маман.Қаратау сілемдеріндегі ежелгі таңбалы тастар,Бесарық өзенінің шатқалындағы ежелгі адамдардың жазған петроглифтері. Таңбалы тасқа Жаманбай батыр ауылдық округінен ары қарай 20 шақырым жол салынып, қолжетімді болып жатса ауданымызда туризмнің дамуына өз үлесін қосары сөзсіз. Бұл ретте, Жаманбай батыр ауылдық округінің басшылығы сол тау етегінде кәсіптерін жүргізіп жатқан кәсіпкерлердің кәсібін жандандыру мақсатында төменгі пайызбен несие алуларына сүйемелдеу жұмыстарын жүргіссе дейді Бекзат апайымыз.– Киелі жерлеріміз тарихи қасиетті нысандар тізіміндегі Қорасан ата кесенесі, Төлегетай-Қылышты ата кесенелерін ұрпақтары өз бақылауларына алып отыр. Бюджеттің есебінен асфальт жолдары салынған. Сонымен қатар, Қорасан ата кесенесі, Ақтас мешіті басынан зиярат етіп барушылар үшін 15 орындықты, заманауи талаптарына сай қонақ үйлер салынған. Түйінін айтқанда, ежелгі «Қатын қамал» үңгіріне, «Таңбалы тасқа» қарай баратын жолдар салу және Сығанақ қалашығын қайта қалпына келтіріп, аспан астындағы мұражайға айналдыру мақсатында бюджеттен қомақты қаражаттың қаралуы тиіс, – деді бас маман.

Жаңақорғанда туризм дамитын болады

<a href="https://kyzylorda-news.kz/">Kyzylorda-news.kz.</a> Жақында Сыр еліне Албанияда сүйінші хабар жетті. Қасиетті Қармақшы топырағының толағайы Ерасыл Сәулебеков зілтемір көтеруден жасөспірімдер арасында өткізілген әлем біріншілігінде 73 келі салмақ дәрежесі бойынша чемпион атанды. Қармақшылық жас зілтемірші Ерасыл аз ғана уақыт ішінде көк туымызды Әлем көгінде екінші рет желбіретіп, еліміздің мерейін тағы бір мәрте асқақтатты. Алғашында Мексикада топ жарса, бұл жолы Албания мемлекетінде жасөспірімдер арасында өткен әлем чемпионатында жұлдызы жарқырап, алтын медальды қанжығасына байлады. Өз салмағында жұлқа көтеруден 137 келі, серпе көтеруден 168 келі, жалпы қоссайыс бойынша 305 келі зілтемірді көтеріп, жасөспірімдер арасында Әлем біріншілігінің шыңына көтерілді. Ол олимпиадалық резервтің мамандандырылған аудандық №15 балалар мен жасөспірімдер мектебінің ауыр атлетика бөлімінің жаттықтырушысы Айдар Ерәлиевтың шәкірті. &nbsp;Жақында ол туған жерге табан тіреп, аудан жұртшылығымен кездескен еді. Одан соң арнайылап «Қармақшы таңы» газеті редакциясына да бас сұқты. Мүмкіндікті жіберіп алмай, біз де жас чемпионмен әңгімелескен едік.&nbsp;– Күні кеше ғана өзге елде Қазақстанның көк байрағын бір сатыға жоғары қойып, Әнұранын шырқатып «Әлем чемпионы» атанып келдіңіз. Сол сәттегі алғашқы әсеріңізбен бөліссеңіз?– Ол әсерді тіптен сөзбен жеткізе алмаймын. Әрине, кеудені қуаныш кереген сәт болды. «Төбең көкке бір елі жетпей тұр» деген тіркес дәл осы тұста айтылатын секілді. Елімнің Әнұраны ойнағанда жанарыма еріксіз жас үйірілді. Бұны қуаныштың, талай уақыттағы еселі еңбектің жемісі деп білемін. Кей адамдар осы сәтті дұрыс түсіне бермеуі мүмкін. Сондықтан бұл сезімді көзбен көріп, сезіну керек секілді. Осыған дейін Қазақстанды әлемге танытып жүрген аға-інілер мұны жақсы біледі деп ойлаймын. Әнұранды өзге елде шырқату ерекше сезім.&nbsp;– Неге таңдауыңыз осы спорт түріне түсті? Жалпы ауыр атлетикаға қалай келдіңіз?– Бала күнімнен спортқа бейім болдым. Кішкентай күнімнен үлкен ағама «Мені күреске, боксқа апаршы» деп қолқа салатынмын. Солай 6 жастан бастап Айдар ағайымның ықпалымен спортқа келдім. Спорттағы қызығушылығым ауыр атлетикаға алып келді. Түрлі спорттық сайыстарға қатыстым, жарыстарда топ жара бастадым. Бұл одан әрі шыңдала түсуіме сеп болды. Алға қарай ұмтыла бастадым. Осылайша 10 жылдық нәтижеде екі дүркін Әлем чемпионы атандық. Аллаға шүкір, төккен теріміз еңбегіміз текке кетпеді. Негізі адам алға қандай да бір мақсат қойып, сол жолға барын салса, алын¬байтын қамал жоқ екен. Соған тағы бір мәрте көзіміз жетті.– Дайындық қалай өтеді? Болашаққа қойған жоспарыңыз қандай?– Дайындық әр адамның өзіне байланысты. Кейде шаршау мен жалқаулық та болып тұрады. Мұны жасырмаймын. «Бап шаба ма, бақ шаба ма?» деп жатады ғой. Ол рас нәрсе. Кейде бағым бірінші шауып жатады. Бірақ бабымды да жоғалтпауға тырысамын. Спортта еңбек еш кетпейді. Түбі бір ақталады, жемісі көрінеді. Төккен әрбір тердің өтемі жеңіс болып қайтатынын көз көріп жүр. Біз бұл жеңіспен тоқтап қалмаймыз. Алда түрлі жарыстарға қатысуды жоспарлап отырмыз. Арманым – олимпиада чемпионы болу.– Ең мықты қарсылас кім болды?– Мықты қарсыластардың қатарында әзірбайжандық ауыр атлетші &nbsp;мен кәріс спортшысы болды. Олардың да дайындығы осал болған жоқ. Біз де қалыс қалмай чемпиондық атақты қанжығамызға байладық.&nbsp;– Әлем чемпионы ретінде &nbsp;өзіңізден кейінгі жас спортшыларға қандай ақыл-кеңес бересіз?– Қандай жағдай болмасын бапкердің ақылына құлақ асу керек. Спортта көп дүние үздіксіз жаттығумен, шынығумен келеді. Жалқаулыққа бой алдырмай дайындықты қалдырмау қажет. Сонымен қатар, зиянды іс-әрекеттен ада болған дұрыс. Мұның бәрі айналып келгенде денсаулыққа кері әсерін беріп жатады. Спортшы үшін деннің саулығы басты орында тұрады емес пе?! «Еңбек бәрін жеңбек» дейді ғой дана халқымыз. Дәл солай еңбектің жемісін көретін шақ келеді. Әрине, кейде сүрініп, құлау да болады. Тек алға қарай ұмтылу керек. Бұл шыңдалудың жолы. Берер ақыл-кеңесім – осы.&nbsp;– Спортшының жеткен жетістігі бапкерге де байланысты ғой. Бапкеріңіз туралы да айта отырсаңыз.– &nbsp;Мықты спортшының жетістігі тынымсыз еңбек пен талапшыл жаттық¬тырушыға байланысты. Әлбетте менің бапкерім Айдар Ералиев ағайымның еңбегі зор. Мектепте мұғалім оқушыны білімге қалай баулыса, спортта бапкер солай жол көрсетеді. Спорттың күшімен Қазақстанды әлем елдеріне танытуға болады. Жаттықтырушы жақсы болса, спортшының да алар асуы көп болады. Мұның барлығы сайып келгенде сол бапкердің арқасы. Ал менің бұл тұста жолым болды деп айта аламын.&nbsp;– Сіз үшін өмірдің құндылығы неде, жеңіске жету үшін не істеу керек?– Жеңіске жету үшін талпыныс пен еңбек, арман мен мақсат керек. Спортшының жетістігі тынымсыз жаттығу мен білікті бапкерден бөлек ата-анасына, жанкүйерлеріне де байланысты екенін айтқым келеді. Әрине, бұл жандардың қолдауы мен үшін ерекше.&nbsp;– Әңгімеңізге үлкен рақмет! Жеңісті күндеріңіз көп болсын!

Қармақшылық зілтемірші: Төккен әрбір тердің өтемі жеңіс болып қайтады

Kyzylorda-news.kz. &nbsp;Қызылорда облысында ауа райының қолайсыз болуына байланысты бірқатар аумақта электр желілері ажыратылған. Қазалы ауданында жылу мекемесінің мұржасы ұшып кетті, деп хабарлайды ҚазАқпарат.&nbsp;Қатты желдің әсерінен Қызылорда қаласында бірқатар тұрғын үй мен мекемелердің шатыры ұшып кеткен. Оған қоса облыстың кей бөлігі электр жарығынсыз қалды. Бағаналар мен көше бойындағы ағаштар құлап, қолайсыздық туғызуда. Бірнеше жерлерде электр жарығы сөнген.<blockquote>«Осыған орай, КРЭК АҚ қоғамы зақым келген электр желілерін қалпына келтіру үшін барлық ауданға 160 адамнан тұратын 39 бригада жұмылдырды. Бүгінде 36 техника мен 10 арнайы техника жұмыс істеп жатыр», - деп мәлім етті өңірлік коммуникациялар қызметінен.</blockquote>«Қолайсыз жағдайдан адам шығыны мен зардап шеккендер жоқ. Осыған байланысты аудан әкімдігінде төтенше жағдайлардың алдын алу және оларды жою жөніндегі комиссия отырысы өтті. Онда жағдайды қалыпқа келтіру бойынша тиісті шараларды қолға алып, жедел әрекет ету міндеттелді. Оған арнайы техникалар жұмылдырылды», - деп жазылған аудан әкімдігі таратқан хабарламада.

Қызылордада қатты жел шатырларды ұшырып, тұрғын үйлер электр жарығынсыз қалды

<a href="https://kyzylorda-news.kz/">Kyzylorda-news.kz.</a> &nbsp;Бұл өмірде ешкім мұқтаждықты, зәру болуды қаламайтыны белгілі. Әйтсе де қоғамда түрлі тағдыр бар. Өзгеге қол ұшын созып көмектесу қанымызда бар қасиет. Қиналғанды демеп, жақыны болмаса да жанашырлыққа асыққан жастардың күн сайын қатары артып келе жатқанына, әрине қуаныштымыз. 2020 жылды Мемлекет басшысы Еріктілер жылы деп жариялады. Сол тұста ауданның ерікті жастарының басын қосатын «Демеу» тобы құрылды. Жетекшісі – аудандық емхананың медбикесі Әсем Мерекова. Қоғамдық жұмыстардың бел ортасында жүретін қайсар қыз жұрт үйден шығуға қорқып, екінің бірі ауруға шалдығып, кеселмен күрескен уақытта үй-үйді аралап, тегін дәрі екті. Қаншама адамның бата мен са¬уабын алды. Сондай жаны жайсаң жанмен жақында тілдескен едік.– Еріктілер жылында «Демеу» еріктілер тобын құрдыңыз. Бұған не түрткі болды? Идея қайдан келді?– 2020 жылы еліміздің Президенті Қасым-Жомарт Тоқаев «Еріктілер» жылы деп жариялады. Сол жылмен жаһанды жайлаған пандемия да тұспа-тұс келді. Әлі күнге дейін есімде. Бір өзім күніне 28-30 үйге дейін барып тегін екпе салып жүрдім. Мұғалімдер арасында сондай көмек қолын созды. Жалпы қай саланың жастары болмасын әр жерде өз қолынан келгенінше жақсылықтарын жасап жүрді. Содан аудандық Жастар ресурстық орталығы жанынан аудандағы белсенді жандар кездесіп, топтың атын құрып «Демеу» деп қойдық. Сол уақыттан бері жығылған жанға демеу болып, түрлі іс-шараларды ұйымдастырып, аудан тұрғындарын жақсылық жасауға шақырып жүрген жайымыз бар.– Пандемия көп нәрсенің көзін ашты. Құндылықтар ауысты. Көпшіліктің де волонтерлыққа деген көзқарасы өзгерген шығар. Қалай ойлайсыз?– Қазақ өзі ертеден жетімін жылатпаған, жесірін қаңғытпаған халық қой. Біз бір үзім нанның өзін жанындағысына бөліп берген, жақсы мен жаманды бірге көріп келген халықпыз. Бұл асыл қасиетімізді бүгінгі күнде жоғалтқан емеспіз. Жанашырлық шуағын жан-жаққа таратуға мүмкіндігінше ат салысып келеміз. Расымен, қазір әлеуметтік желінің қайсысын ашып қарасаңыз да жанашыр жандардың игі ісіне толы жазбаға тұнып тұр. Ол біздің асылдығымыз бен жанашырлығымыздың дәлелі. Барлығымыздың бір-ақ мақсатымыз бар. Ол – адам болып өмірге келген соң, сауапты іспен айналысу. Міне, осы мақсатта ауданның белсенді жастары талай жан игі істің қасынан табылуда. Жастар игі іс жасауға қашанда дайын. Міне, бұл көзқарастың өзгергенінің айқын көрінісі емес пе?!– Еріктінің бір күні екіншісіне ұқсамайды. Түрлі адамдарға жолығып жатасыздар. Солардың қатарында жадыңызда ерекше сақталғандары бар ма?– Әрине, түрлі жағдай болды. Барлығын көзбен көрдік. Әсіресе пандемия кезінде жағдайы жақсы тұратын үйден тұрмысы төмен үйлерге «Витамин С» ұрлап салғаным бар. Сол жағдай есіме түссе әлі күнге дейін күлемін. Қазір еске алып, күліп жатырмыз ғой. Ол кезде тек адамдарға қайтсем көмектесемін деген ой ғана болды ғой. Сонымен қатар, жалғызбасты ата-әжелерге барып ыстық тамақ беріп, үйін жинауға барамыз. Олар балаша қуанып қалады. Сондай сәтті көргенде өзімді бақытты сезінетінмін. Себебі адамға қуаныш сыйлаудан артық бақыт жоқ секілді.– «Еріктілер өзгелерге көмектесуден гөрі көзбояушылықпен айналысады» деп сөгіп жататындар да кездеседі. Ондай пікір айтатындарға қалай жауап берер едіңіз?– Иә, түрлі әңгіме айтатындар кездеседі. Бастапқы жылдары жылап қалатынмын. Жұмысымда да түрлі кедергілер болды. Содан кейін «өзіңе сен, ісіңді Алла көріп тұр» деп өзімді жұбатып қоятын болдым. Көпшілігі жасаған жақсылығын бірден әлеуметтік желіге салады деп сөгіп жатады. Ол мақтаныш үшін емес, басқалардың мейірімін ояту және демеушілерге есеп ретінде саламын. Өйткені ол жерде мен қалтамнан шығармаймын, жәй ғана ұйымдастыру қызметін атқарамын.– Еріктілік – өз уақытыңды, күшіңді сарп етіп, өзгеге көмек қолын созу. Мұндай әрекетке кез келген адам бара бермейді. Дегенмен, соңғы жылдары елімізде бұл қозғалыстың дамып, еріктілердің саны артып келе жатқандығы байқалады. Волонтерлікпен айналысуды ниет етіп жүрген жастарға не айтар едіңіз?– Рас, әдепкіде ерікккендер, жұмыстары жоқ деп түрлі әңгімелер ерді. Бірақ соның бәріне мойымай, «адамдарға қайтсем көмек қолын соза аламын» деп шын ниетпен көмектесу қажет. &nbsp;– Мұнан өзге «Demeu Travel» туристік компания құрғанызды білеміз. Қазіргі жұмыстар қалай жүріп жатыр?– Қазір қасиетті Рамазан айы болған соң бұл жұмысымыз сәл тоқтап тұр. Дегенмен алдағы уақытқа жоспарымызды бастап кеттік. Түрлі саяхаттарды да ұйымдастыратын боламыз. Тур агенттік негізінде облыс және аудан тұрғындары Қазақстанның көрікті жерлеріне саяхатқа шығып жүр. Сол арқылы адамдар қайырымдылыққа өз үлестерін қоса алады. Халықтан не кәсіпкерлерден сұрай бермей, осы саяхаттан түскен қаражаттың 10 процентін көпбалалы немесе жағдайы төмен отбасыға және ерекше балаларға жұмсауды басты мақсат етіп қойдық. Осылайша бәр жағынан адамдарға қызықты саяхат жасаумен қатар екінші жақтан мұқтаж жандарға да қуаныш сыйлауды жөн көрдік.– Әңгімеңізге көп рақмет! Жұмысыңызға тек сәттілік тілейміз.

Қармақшылық жастар игі істің қасында жүр

<a href="https://kyzylorda-news.kz/">Kyzylorda-news.kz.</a> Мемлекет басшысының Жолдауларында берілген нақты тапсырмаларға сәйкес көптеген іргелі істер атқаруда. Тіпті мемлекеттік бағдарламалар арқылы азаматтарды, оның ішінде жастардың пайдалы іспен айналысуына қолдау көрсетілуде. өш ілгерілегелі өңірімізде кәсіпкерлік саласы кеңеюде. Шағын және орта бизнесті дамыту үшін мемлекеттен көрсетілетін қолдау көп. Жеңілдетілген несиелер алып, кәсібін жандандырып жүргендер жетерлік.&nbsp;Мемлекеттен қайтарымсыз несие алып, ауыл тұрғындарын нан өнімдерімен қамтамасыз етіп отырған жас кәсіпкердің бірі – Айшолпан Дүйсенбекова. Ол қазіргі таңда Тәйімбет Көмекбав атындағы ауылда наубайхана ашып, кәсібін дөңгелентіп отыр. Айшолпан өткен жылы «Наубайхана ісі» бойынша мемлекеттік қайтарымсыз несиеге ие болып, бүгінде ауыл тұрғындарын сұраныстары бойынша нан өнімдерімен қамтамасыз етіп отыр.Кәсіпкер өзінің сүйікті ісімен көптен бері айналысып келе жатқанын айтады. Және өткен жылы кәсібін кеңейту мақсатында мемлекет тарапынан жұмыссыз жастарды өздері қалаған істері арқылы нәсібін табуына қолдау бойынша қайтарымсыз грант арқылы арнайы құрылғылар сатып алып, нан пісіру ісімен айналысуда. Бұл кәсіп те ауылдастары арасында қолдау тапқан. Айшолпан дайындаған нан және нан өнімдері қашанда тұрғындар тарапынан үлкен сұраныста болуда.<blockquote>«Мен мақсаттаған арманыма қол жеткіздім. Мемлекет басшысы жастар саясатын қолдауда, олардың білі алып, қалаған мамандықтары бойынша жұмыспен қамтуда көптеген іргелі істер істеуде. Президентіміз бен Үкіметіміздің осындай қолдауларына ие болғандардың бірімін. Мемлекеттің үлкен қолдауымен жетістікке қол жеткізген, ерінбей еткен еңбектің арқасында мен сияқты жастар бүгінде кәсібінен нәсіп тауып отырған жайы бар. Алла қаласа алдағы уақытта кәсібімді кеңейтіп, ауыл тұрғындарына сапалы қызмет көрсетсем деген де ойым бар. Кәсіп қылған адам қашанда жетістікке қол жеткізіп, мақсаттарына жетеді. Оны көзімізбен көріп, құлағамызбен естеп келеміз. Мен де қалаған мақсатты жоспарымны шыңына шықсам деген арман да жоқ емес. Мақсаттар орындалады дейді дана халық. Бұл заман жастардың қоғамнан өз орнын сайлап, алып, болашақ қазақ елінің өсіп-өркендеуіне жұмыс жасайтын заман. Сондықтан замандастарыма ерінбей еңбек етіп, өздері &nbsp;іске асырып жүрген &nbsp;кәсіптерімен ел дамуына қолдау көрсетсе екен деген тілектемін. Биыл Мемлекет басшысы ауылдарды дамытуға Үкіметке тапсырмалар берді. Ал, өз кезегінде Үкімет ауылдың дамуына байланысты көптеген іргелі істерді өміршең етуде мемлекеттік бағдарламаларды өндіріске ендіруде. Солардың бірі &nbsp;– &nbsp;«Ауыл аманаты» бағдарламасы. Бұл бағдарламаның мақсаты &nbsp;2,5 пайыздық несие беру арқылы ауылдарда кәсіпкерлікті дамыту болып табылады. Осы ретте, мен де осы бағдарлама арқылы несие алып, кәсібімді кеңейткім келеді», – дейді Айшолпан.</blockquote>

Мемлекеттік бағдарламаның игілігін көруде

<a href="https://kyzylorda-news.kz/">Kyzylorda-news.kz.</a> Көктем басталса дала жұмысымен қатар қызатын тағы бір науқан бар. Иә, бұл көктемгі әскерге шақыру науқаны. Қолына бір жапырақ ақ қағазын ұстаған әскери саланың өкілі үй-үйді аралап, кәмелет жасқа толған ер балаларға шақыру қағазын тапсырады. Онда сіздің қр-ның әскери міндеттілік және қызмет туралы заңының негізінде әскери комиссиядан өтуіңіз жөнінде бұйрығы тұрады. Отан алдындағы борышын сезінген әрбір азамат осылайша әскерге аттанады.Қазір еліміз бойынша көктемгі әскерге шақыру науқаны қызу жүріп жатыр. Наурызда басталған Отан қорғаушыларды есепке алу жұмыстары шілдеге дейін жалғаспақ. Осы аралықта толықтай тексеруден өтіп, сарбаз қызметіне жарамды жастар әскери борышын өтеуге алынады. Биыл әскерге шақырылғандардың қатарын 1996-2004 жылдары туған бозбалалар құрап отыр.Жалпы, ер-азаматтың Отан алдындағы борышын өтеуі абыройлы іс. «Армия – өмір мектебі» деген қағида қай кезде де күшін жоймайтыны анық. Алайда жастар арасында өз қалауымен әскерге сұранып барушылар қатары соңғы уақытта сиреп кеткені шындық. Бірі ондағы тәртіпті жатсынса, енді бірі уақытын зая санайды. Тіпті «Қазіргі кезде әскердің қажеті жоқ» деп лажы болса бармай қалудың амалын іздеп жүргендер көп. Бұл жағдай әсіресе жоғары және арнаулы оқу орындарын бітірген жастардың, сонымен қатар әлеуметтік желі арқылы оқыс оқиғаларды көріп зәресі ұшқан жастардың арасында белең алып тұр. Рас, қазақ әскеріндегі әлімжеттік туралы ақпараттың жиі жариялануы жастардың әскери борышын өтеуге деген ынтасы мен сеніміне селкеу түсіруде. Десе де, қазақ армиясы мұндай олқылықты жою мақсатында жаңа мүмкіндіктерді қарастыруда.Қармақшы ауданында әскерге шақырылушы азаматтардың белсенділігін білу мақсатында аудан орталығындағы Қорғаныс істер бөліміне бас сұқтық. Бүгінде мерзімді әскер қатарына аудан бойынша биыл көктемгі әскери қызметке 300-ге жуық 18-27 жас аралығындағы азаматтарды заңға сәйкес шақыру көзделген. Оның ішінде медициналық тексеруден өтіп, іріктелгені әскерге алынады.<blockquote>«Қазіргі таңда наурыз айынан бастап әскерге жөнелтулер жүргізілуде. Ауданнан алғашқы лек бойынша шекара қызметі қатарына – 8 азаматты жіберсек, осы айда қарулы күштер қатарына – 16, одан кейін ұлттық ұланға – 17 азаматты жөнелтуге дайындап отырмыз. Ауданға қарасты әр ауылдық округте әскери есеп жүргізетін мамандарымыз жұмыс жасауда. Жастарды әскерге тарту, қызықтыру мәселесі бойынша еліміздегі қырық оқу орнымен меморандум жүргізілуде. Бұл дегеніміз – әскери борышын өтеген азаматтарға білім алуға жеңілдіктер береді. Мәселен, қызмет аяқталғаннан кейін ҰБТ-ны ескерместен екі жыл ішінде ақылы негізде жоғары оқу орнына түсуге мүмкіндігі бар. Яғни әскерден келген соң, олар оқуға түсе алады. Ал бұрынғы әскери қызметшілер жоғары оқу орындарының әскери кафедрасында тегін оқи алады. Қазір жастардың көбі осыған бет бұруда. Осы жөнінде барған жерімізде үгітнасихат жұмыстарын жүргізіп жатырмыз. Одан бөлек әскери борышын өтеп келген азаматтарды мамандығы бойынша жұмысқа шақырып жатырмыз. Ол үш жылға келісім-шартқа отыру арқылы жүзеге асырылады. Сондай-ақ, жиырма төрт жасқа толғандарға қырық күндік ақылы оқуымыз бар. Оны азаматтар өз аймағымызда оқи алады», деді аудандағы Қорғаныс істер жөніндегі бөлімінің жасақтау тобының бастығы Тимур Найманбеков.</blockquote>Әскерге шықырылып, алайда төлейтін несием бар десеңіз, оған да жеңілдік қарастырылған. Сіз бір жыл әскерден борышыңызды өтеп келгенше несие төлеу мерзіміңіз 12 айға тоқтатыла тұрады. Одан бөлек тағы жұмысқа орналасуыңызға қосымша 1 ай беріледі.

Қармақшыда әскерге шақыру науқаны басталды

<a href="https://kyzylorda-news.kz/">Kyzylorda-news.kz.</a> Қазақ халқының нағыз азаматын тәрбиелеп өсіру негіздерін қалыптастыратын тұңғыш мектеп – ол балабақша. Балабақша келер ұрпақты еңбекке, өнер-білімге, елінің ар-намысын қорғауға және ізгі адамгершілік ниеттерге баулиды. Балабақша – келешек ел басқарар, жер суына иелік етер, ел халқын гүлдентер, мерейін өсіріп, мәртебесін биіктетер жасампаз жандарды шыңдап өмірдің ең басты сатысын қалайтын киелі ұя. Жақында кент орталығында білімнің алғашқы баспалдағы саналатын жаңа балабақшаның лентасы қиылды.Тәжірибелі педагог Шәрбану Шүкірованың жетекшілігімен ашылған «Ай-Ару-2» балабақша 45 бүлдіршінге арналған. Былтыр ғана балдырғандарға &nbsp;есігін айқара ашқан балабақша заманауи үлгіде жабдықталған. Бөлмелері кең, жылы әрі жарық. 2 топқа арналған ойын, жатын бөлмелері бар. Білікті педагогтар балғындарға тағылымды тәліммен қатар, білімге баулиды.– Балалардың құқықтары мен заңды мүдделерiн қорғау – елiмiздiң әлеуметтік құқықтық саясатының басым бағыттарының бiрi. 2022 жылды Мемлекет басшысы Қасым-Жомарт Тоқаев «Балалар жылы» деп жариялады. Осыған орай биыл балаларды қорғауға, сапалы бiлiммен қамтуға, мүмкіндігі шектеулі балалардың денсаулығын нығайтуға, инфрақұрылымды дамытуға ерекше көңiл бөлiнiп отыр. Президент өскелең ұрпақтың болашағына мән беріп, жастарға зор үміт артатынын, сондықтан да өскелең ұрпаққа жол ашу үшiн барлық жағдайды жасау керегiн нақтылады. Мiне балғындарды шаттыққа бөлеу мақсатында осы бастаманы қолға алып отырмын, – дейді балабақша меңгерушісі.Бұл балабақшаның басты ерекшелігі – бал тілді балғындарды қазақы салт-дәстүр, әдет-ғұрыпқа баулу, ұлттық құндылықтарымызды ұлықтау көзделуде. Мұнда кішкентайлардың денсаулығы – басты назарда. Дәрігерлер бөбектерді күн сайын тексеріп отырады. Ал, ата-аналар бұл бөбекжайда білімдар әрі саналы ұрпақ өсіп шығатынына сенімді. Нысанның ресми ашылу салтанатына аудандық білім бөлімінің білім беруді дамыту секторының бас маманы Гүлзира Исламханова &nbsp;арнайы келіп, жаңа нысанның ұжымына сәттілік тіледі.– Балабақша – барлық тәрбие мен білімнің ең алғашқы баспалдағы іспеттес. Мұндағы тәрбие мен білім балалардың табиғи мінезін, қабілетін ерте жастан дамытады. Бала – болашағымыз, бала – қуанышымыз. Ендеше мектепке дейінгі үздіксіз тәрбиемен, біліммен қамту өзімнің басты мақсаттарымның бірі екенін қуана айта аламын. «Ағаш түзу өсу үшін оған көшет кезінде көмектесуге болады, ал үлкен ағаш болғанда оны түзете алмайсың» деп бекер айтылмаған. Сондықтан, алдымызға келген әрбір бүлдіршінге балабақшадан бастап тәлім-тәрбие беріп, ұлтжандылыққа, қазақылыққа тәрбиелеуді қолға алудамын, – дейді Шәрбану Кеңесбекқызы.Бүгінде балабақшада 10 қызметкер бар. Оларға қойылар талап та жоғары. Ұлттық құндылықты ұлықтауды мақсат еткен бұл мекеменің арқалар жүгі ауыр.– Бала – біздің болашағымыз. Сондықтан, тәуелсіздіктің тұтқасын берік ұстап, ел ертеңін ойлайтын саналы, отансүйгіш азамат тәрбиелеу бағытында аянбай еңбек етуге әзірміз, – дейді балабақша тәрбиешілері.Ал ата-аналар қазақы дәстүрді үйреткісі келетін балабақшаға ерекше қызығушылық танытып отыр.– Балабақшаның ішін өзім аралап, танысып шықтым. Барлығы стандартқа сай. Үйге жақын болғандықтан әрі жұмыс істеу бағыты ұнағандықтан осы балабақшаны таңдап отырмыз, – дейді немересін балабақшаға берген әжей.Балабақша табалдырығын аттаған бүлдіршіндер биік белестерді бағындырар азамат боларына сенім мол. Ел игілігіне ашылған балабақша жақсы жаңалығымен қуанта берсін.

Жұмысы жүйелі балабақша

Kyzylorda-news.kz. «Қазгидромет» РМК-сы еліміздің бірнеше облысында күн райына байланысты ескерту жасады.&nbsp;«Қазгидромет» <a href="https://www.kazhydromet.kz/storm">болжамына</a> қарағанда, 2-4 сәуір аралығында Жамбыл облысының оңтүстігінде, таулы аудандарында тұман түседі. 2-3 сәуірде түнде 1-6 градус, 4 сәуірде 2 градус үсік жүреді.Тараз қаласынжа 2-4 сәуірде кей уақытта тұман түседі. 2-3 сәуірде солтүстік-шығыстан жел соғады, екпіні 15-20, кей уақытта 23 м/с. 2-3 сәуірде түнде 1-3 градус үсік жұреді.2 сәуірде Ақмола облысының батысында, оңтүстігінде шығыстан, оңтүстік-шығыстан жел соғады, екпіні 15-20 м/с.2 сәуірде Алматы облысында солтүстік-батыстан соғатын жел солтүстік-шығысқа ауысады, облыстың солтүстігінде, шығысында, таулы аудандарында жылдамдығы секундына 15-20 м/с, екпіні 25 м/с болады. Түнде 1-6 градус үсік жүреді.Алматыда 2 сәуірде түнде 1-3 градус үсік жүреді. Қонаевта 2 сәуірде түнде 3-5 градус үсік жүреді.2 сәуірде Атырау облысының солтүстігінде, шығысында, оңтүстігінде солтүстіктен, солтүстік-шығыстан жел соғады,жылдамдығы 15-20 м/с.2 сәуірде Қызылорда облысының орталығында шаңды дауыл тұрады. Жел шығыстан соғады, күші 15-20, облыстың орталығында 23-28 м/с.Қызылордада 2 сәуірде шаңды дауыл тұрады. Жел шығыстан соғады, күші 15-20, екпіні 25 м/с.&nbsp;

Қазгидромет жел күшейетінін ескертті

<a href="https://kyzylorda-news.kz/">Kyzylorda-news.kz.</a>&nbsp; Жуырда ғана Президент Қасым-Жомарт Тоқаев халықа арнаған Жолдауында жастарға ұдайы қолдау көрсетілетіндігін ерекше атап өтті. Соның ішінде жастар арасындағы ең өзекті мәселе &nbsp;– жұмыссыздық. Бұл да мемлекет назарынан тыс қалған емес. Ал мақалаға тірліктің көзін тапқан жандар арқау болмақ.&nbsp;Айдар Төребаев 1996 жылы Арал ауданы, &nbsp;Жақсықылыш кентінде туған. Мамандығы – технолог. Отбасылы. Қазіргі таңда Жақсықылыш кентінде тұрады. Мамандығы бойынша жұмыс жасамаған. Ютубер, YouTubе платформасындағы 3 каналы арқылы тәуір табыс тауып отыр.&nbsp;<blockquote>«Ең алғаш студент кезімде YouTube-тан «Ақиқат» деген канал аштым. Ол канал діни бағытта болды. Дінтанушылардың, имамдардың айтқан уағыздарын насихаттап жүрдім. Бұл кезде табыс табу мақсатында емес, қызығушылықтан туындаған сүйікті ісім болды. Кейіннен сан тірлікпен мұны назардан тыс қалдырғанмын. Араға 3 жылдай уақыт салып "неге қайта айналыспасқа" деген ой келді. Бұл жолғы мақсатым табыс табу болатын. Өйткені ол кезде диплом алып, ауылдан мамандығым бойынша жұмыс таппай, әр тірліктің бір басын шалып жүрген кезім еді. Осылайша «Ақиқат» каналын қайта дамыта бастадым. Менің каналымды қарайтындар, пікір білдіріп отыратындар көбейді. Қазір әлеуметтік желінің дамыған заманы ғой. Желі арқылы каналымды насихаттап отырдым. Бір жағынан жастарға тәрбиелік мәні бар тәуір дүние болды. Бір күні поштаға YouTube компаниясынан хат келді. Ол менің табысқа шыққандығымды анықтайтын арнайы құпия сөздер болатын. Солай менің алғашқы 300 мыңым есепшотыма түсті. Бұл маған таптырмас табыс көзі болды. Жанымды қинамай, қалаған уақытымда үйден шықпай табыс таба бастадым. Мұнан соң «Киношоу» каналын аштым. Бұл каналда қызықты киноларға шолу жасап, сюжетін түсіндіріп беріп отырамын. Мұның қаралымы бәрінен жоғары. Табысы да тәуір. Жақында «Шипагер» каналын аштым. Түрлі аурулардан емделудің жолдарын түсіндіріп беремін.&nbsp;</blockquote>Жалпы айтқанда, манитезациядан өткен каналдарым ай сайын 500 мыңнын жобасында табыс әкеледі. Бір ескеретіні, мұнда табыс тұрақты емес. Және компания тарапынан авторлық құқыққа байланысты кез келген уақытта каналды бұғаттап тастауы мүмкін. Сондықтан мұның да өзіне тән қиыншылығы бар.&nbsp;Марат Темірбайұлы 1998 жылы Арал ауданы, Шижаға елді мекенінде туған. Мамандығы – өрт қауіпсіздігін сақтау. Қазіргі таңда туған ауылында ата-анасымен тұрады. Мамандығы бойынша жұмыс жасамаған. Бірақ бос жатпайтын еңбекқор жігіт. Мал сойып, жіліктейтін қасапшылық қабілеті бар.&nbsp;<blockquote>&nbsp;Бала болып ес білгелі төр түлік малдың сырына қанық болып өстік. Әкем Темірбайдың жеке шаруа қожалығы бар. Кішкентайымыздан әкемізге қолғабыс бола жүріп үйренгеніміз көп болды. Бала болсақ та әкеміз бізбен ойласып, малдың жайын ақылдасып отыратын. Есейген соң тіпті бір жағында шаруасын ширатып жүретін болдық. Мектеп бітіріп, оқуға кеттік. Бірақ мені қаланың қызыл-жасыл өмірі қызықтырған жоқ. Ауылға асығатынмын. Диплом алдық. Тәуір мамандық бар. Дегенмен ол бойынша жұмыс жасау бұйырмады. Қабілетсіздіктен немесе қаламағаннан емес, әкеме қолғабыс болғым келді. Мал ауылдан мал әкеліп, аудандағы кафелерге сатамын. Оны жіліктеп сойып беремін. Мұндай іс қазір көптің қолынан келе бермейді. Тіпті ауылдың өзінде үлкендер жағы болмаса, жастардың жілікті ажырата білуі былай тұрсын, мал сойып, терісін сыпыруға да қабілеттісі сирек-ау. Сондықтан бұл менің кәсібіме айналып отыр. Табысым да тәп-тәуір. Дәстүрлі отбасылық шаралар мен мерекелерде тіпті телефоныма дамыл болмай кетеді. &nbsp;Мен ойлаймын, қаным қазақ деген әрбір ер бала ұлттық ұғымдарды санасына сіңірумен қатар ердің атқаруы тиіс тірлігін білуі керек. Ұлттық құндылықтар жойылмас үшін ұрпақтар сабақтастығы орнауы тиіс. Қазақ еріне «сегіз қырлы, бір сырлы» деген теңеуді бекер айтпаса керек-ті.</blockquote>Айбек Ізәтов &nbsp;1991 жылы Арал қаласында туған. Мамандығы – механик. Төрт бала тәрбиелеп отырған көпбалалы отбасы. Дипломды мамандығынан бөлек &nbsp;сан кәсіпті меңгерген.&nbsp;<blockquote>&nbsp;Әкем Аманкелді – ауданға белгілі механик. Бала кезімізден көлік құралдарын жөндеген әкеміздің жанында қолғабыс болып өстік. Содан болар, бұл іс біздің бойымызға әбден сіңіп кетті. Ақырында мектеп қабырғасында жүргенде-ақ машинаның тілі жақсы білетін болдым. Мектеп бітірген соң Қызылорда қаласындағы политехникалық колледжге механик мамандығына оқуға түсіп, диплом алдым. 2019 жылы кәсіпкерлерді даярлау курсынан өтіп, мемлекеттен 555 мың 600 теңгенің грантын жеңіп алдым. Солай кәсіпкер болып көлік құралдарын жөндеумен айналысып келемін. Кейін гаражымды кеңітіп, кәсібімді ұлғайттым. Бұдан бөлек қаладағы «Спорт клубында» күзетші болып жұмыс істеймін. Алла берген төрт балам бар. Қазіргі заманда бір жұмысқа қарап өмір сүру мүмкін емес. Балаларды өмірге әкелген соң жетілдіріп, жеткізу ата-ананың міндеті. Сондықтан екі жұмысты қатар алып жүрген жайым бар. Менің кәсібім көлік құралдарын жөндеу болса, негізгі жұмысым – күзетшілік. Осылай уақытты бос өткізбей тіршілік етіп жатырмыз.&nbsp;</blockquote>Жаңагүл Саматқызы 1993 жылы Ақтөбе қаласында өмірге келген. Қазіргі таңда Арал қаласында тұрады. Мамандығы – эколог. Бірақ өзінің той ұйымдастыру орталығы арқылы танымал. Блогерлік қабілеті де бар. Қолынан біраз іс келетін еңбекқор жан.&nbsp;<blockquote>&nbsp;Арал қаласы менің бақыт мекенім деп айтсам да болады. 2020 жылы Аралға келіп «Той думан» той ұйымдастыру орталығын аштым. Алғаш болып бастаған кәсібім көп өтпей-ақ дөңгелеп алға басты. Қазақ деген қай кезде де тойшыл халық ғой. Ерекше сән-салтанатпен өткенін қалайды. Сондайда біздің орталық барлық қызметті көрсетуге арналған. Тойда өнер көрсететін қызметкерлердің ұлттық нақыштағы киімдерді өзім тігемін. Кейде тойға арналған кәде-сыйларды қолдан жасаймын. Ал блогерлік қызығушылықтан туған. Өзім өткізген тойларды, көрген қызықтарды видеоға түсіріп, инстаграмм желісінде достарыммен бөлісіп отырамын. Жалпы, менің өмірімдегі хоббиім болған нәрсе маған нан болды. Ал дипломды мамандығым шеттеп қала берді. Кім біледі, бір күні ол да кәдеге асар. Бәрі уақыт еншісінде.&nbsp;</blockquote>Қарап отырсам, бүгінгі тақырыпқа арқау болған жандардың бәрі жұмыс жоқ деп қол қусырып отырмай, өздерінше нәпақа тауып жүрген жандар. Олар бір ғана істі емес, бірнеше шаруаны ширатып, өзі қалаған әдемі өмірін сүріп, балаларын да өзгеден кем қылмай өсіруде. Осындайда ұлы Абайдың: «Еңбек етсең ерінбей, тояды қарның тіленбей» деген мақалы еріксіз еске түседі. Шынымен де қазір еңбек еткен адамға жұмыс көп, ал еріншекке жұмыс жоқ. Сондықтан жақсы өмір сүру үшін жұмыс талғамай, жастық жігерді жақсылыққа жұмсайық.<figure class="image"><img src="https://knadmin.beoblood.kz/uploads/492a8cba_4b20_4b95_8857_21bc5d40b918_0ac1129d28.jpg" alt="492a8cba-4b20-4b95-8857-21bc5d40b918.jpg"></figure>&nbsp;<figure class="image"><img src="https://knadmin.beoblood.kz/uploads/1ce9f80c_04f5_408c_8b2e_eb10a5993f85_6dd8bafaeb.jpg" alt="1ce9f80c-04f5-408c-8b2e-eb10a5993f85.jpg"></figure>

Еңбекқор жастар елдің ертеңі

<a href="https://kyzylorda-news.kz/">Kyzylorda-news.kz.</a> Қазір барлық салада бәсеке қызып тұр. Нарықта жеміс-жидекке, оның көшеттеріне және өңделген өнімдеріне сұраныс жоғары. Ауыл мен қала тұрғындары бағбандықпен айналысып, жеміс ағашын баптап, өсіріп, өнімін жинаса, пайдаға шығар еді. Әсіресе, еш кәсібі жоқ, жұмыссыз отырған отбасылар үшін ынта білдіретін шаруа бұл. Себебі, қазір тал шыбықтың түйіріне дейін теңге. Бізге бұл жайында Жаңақорғанға барған сапарымызда жергілікті бағбан Амантай Сарбасов егжей-тегжейлі баяндап берді. Аудан орталығы тұсындағы «Батыс Еуропа – Батыс Қытай» тас жолының бойында егілген жеміс ағаштары көрген адамға ерекше көңіл-күй сыйлары анық. Мұнда жеміс-жидек көшеттерін өсіру питомнигі орналасқан. Ағаш өсіруді әбден меңгерген Амантай Сарбасов басшылық жасайтын «7 KZ Сыр табиғаты» ЖШС тұқымбақты гүлдендіріп отыр.<blockquote>Жыл жылжып, уақыт өткен сайын табиғаты тозып, жері шөлейттеніп бара жатқан Қазақстан жағдайында жерімізді көгалдандыруға, ағаш егуге, орман-тоғай өсіруге ерекше көңіл бөлмесе болмайды. Жасыл желек көбейсе, көп мәселе өзінен өзі шешіледі – жерасты сулары қайта оралады, жердің құнарлы қабаты пайда болады, құм басу тоқтайды, ауа райы өзгереді. Халқымыз осыны түсінуі тиіс, экологиялық мәдениет көтерілуі керек, – дейді Амантай Сарбасов.</blockquote>Расымен де, ХХІ ғасырда адамзаттың алдында үлкен екі мәселені шешу міндеті тұр. Біріншісі – ауызсуды мейлінше мақсатты пайдалану, екіншісі – экологиялық тазалыққа мән беру. Екіншісін шешуде орманды алқаптарды көбейтіп, тұрғындардың тазалық мәдениетін арттыру керек. Бізде бұған талпыныс жоқ емес. Бірақ көгалдандыру жұмыстарында жас өскінді күтіп-баптаудың маңызына, көшеттердің көктеп кетуіне мән бермей келеміз.Осынша мәселені ескерген бағбан тұрғындарға көшет өсіру мәдениетін үйреткісі келеді. Ең бастысы, ол сұрағанға ақылын айтудан, білгенін үйретуден жалыққан емес. Тіпті, біз барған сәтте де баққа жер-жерден келіп түнеп, үйреніп жүрген жандарды көріп бір таңырқап қалғанымыз бар. Бағбан жұмысын, жеміс-жидек тұқымбағын осыдан алты жыл бұрын, яғни, 2017 жылы бастаған екен. Содан бері Амантай Сарбасовтың тұқымбағында алма, өрік, алхоры, жүзімнің бірнеше түрі, миндаль, фундук, грек жаңғағы, анар, айва, алмұрт сынды жеміс көшеттері және бамбук, тұт, терек, шырша, тағы да басқа ағаштар өсіп тұр.Байқағанымыз, мұнда алманың көшеті көп екен. Бұл жемістің осында 12 сорты бар. Амантай ағаның айтуынша, алма ағашына ерекше күтім керек. Ағашты кесіп тұрған жөн. Ал кесілмген алма жабайы түрде шығып кетеді. Қаралып, күтілген, кесілген ағаштан ірі, сапалы өнім алуға болады.Мұнан бөлек, бақтағы су мәселесі де маңызды. Бұл жерде 12 метр тереңдіктен су шығады, яғни оған дейін су жоқ деген сөз. Бақтың көлемі – негізі 50 гектар жер. Бағбан қазіргі таңда 25 гектар жерді игеріп, пайдаланып отыр. Осынша жерге су жеткізу, ылғалды ұстап қалу аса ұқыптылықты қажет етеді. Осы жерден бұрғылап, су шығарған. Қазір бұл алқапты суландыруға толығымен жетіп, күре жолға қарай егілген талдарға да су барып тұр.Амантай Сарбасовтың көзқарасында, тұқымбақ ұстау – өте тиянақты тірлікті талап ететін жұмыс. Мысалы, қазір жеміс ағашын дәннен шығаратындар аз. Негізі осы әдіспен өскен ағаш ұзақ жыл жеміс береді. Ал көшеттеп егілген талдың ғұмыры 18-20 жылдан аспайды. Оның үстіне сырттан келіп жатқан көшеттің көбі ауру. Сондықтан да бағбан жеміс ағаштарын қаламша арқылы будандастырып жатқанын тілге тиек етті.<blockquote>Біздің өңірге түрлі химикатқа толы жеміс-жидек сырт мемлекеттерден онсыз да ағылып келіп жатыр. Біздің бар мақсатымыз – жұртқа таза өнім жегізу болу керек. Сондықтан да мен осы жердің өзін малдың қиы, тауықтың көңі арқылы өңдеймін.</blockquote>Базарда тұрған көшеттің көбі –өзбектердікі. Олар желтоқсан айында кіргізіп қояды. Бір көшетті өсіріп, жетілдіріп, сатуға шығару үшін үш жыл керек. Шет елден келген көшеттің көшін тоқтатып, өзіміздікін нарыққа қосу үшін халыққа сапалы өнімнің сырын түсіндіруіміз қажет. Ел сатылымда тұрған нәрсені таңдамай ала береді. Не алу керек екенін де білмейді. Жеміс түрін де таңдай алмайды. Көшеттің тірі екенін білу үшін оның тамырын тырнақпен жырып көрген жөн. Тамыр қарайыңқырап, қоңырқай түс тартып тұрса ол – өлген. Ал ақшыл түсті болса, оны өсіріп шығаруға болады. Бізге көшеттің көптігі емес, көктегені керек, – дейді бағбан.Еңбек сатылмаса да, бағаланады. Шығын шықпай кіріс болмайтынын да жақсы ұғынамыз. Маңдай тердің құнын тап басып айту мүмкін болмаса да, бақты көркейту үшін қаржы ауадай қажет. Тіпті науқандық жұмысқа адам таппай, Түркістан облысынан жұмысшы алдырғаны да бар. Бел үзіліп, білек талатындай да тірлік аз мұнда. Күніне 5 мың теңге төленетін сол жұмысқа жергілікті жігіттерді шақырып та жұмыс беріп жүр. Оған қоса, тұқымбаққа да электр желісін өзі тартты. Алмабақтың жанынан құдық қаздыруда да бар шығын қалтасынан шықты. Бірақ бақтың бабын тапқан бағбан Амантай Сарбасовтың жеміс көшеттері сортына қарай 600-800 теңгеден сатылымға шығып жатыр. Мұның өзі берекенің бастауы болып, бақтың жұмысына бақ қонады деп сенеміз.<blockquote>Жеміс ағаштары мен тропикалық өсімдіктерді өсірудегі мақсаттың бірі қазір ел арасындағы «Сырдың жеріне ештеңе өспейді» деген сөздің негізсіздігін дәлелдеу еді. Облыспен шектес Ақтөбе мен Түркістанға өскен тал-дарақ біздің жерге шықпайды деу адам сенетін әңгіме емес қой. Осы бір қасаң қағиданы бұзып-жарып шыққым келді.</blockquote>Тұқымбақ жұмысын жолға қоя алатын маманның жоқтығы да – үлкен мәселе. Әсіресе осы жұмысқа икемі бар жастарды тәрбиелеу керек. Мен бұл мәселені әкімдік өкілдерімен кездесуде сан мәрте көтердім. Университеттерде, колледждерде, маман даярлау жайлы ұсыныстар айттым.Мысалы, мен аргентиналық сорт деп жұрт сырттан тасып жатқан алмұрттың қаламшасын осы тұқымбақта өсірдім. Кентауда өскен грек жаңғағының дәнін Түркістаннан тауып және Шымкентке барғанымда бір түп анар әкеліп, оны да жерсіндірдім. Бой тіктеген 6 жылда біраз жұмыс істеліп, тұқымбағым жеміс бере бастады. Алдағы жоспар одан да көп, – дейді А.Сарбасов.Иә, сөзінің жаны бар. Сыр өңірі негізінен шөлейтті аймақ екені белгілі. Шыбық тіксең шыға бермейтіні тағы бар. Әрбір тал-терекке ерекше күтім керек. Осындай аймақта бәрімізге таңсық ағаш бамбук өсіп тұрғанын көріп тіптен тәнті болдық. «Болмайды» деген сөзді айтуға болмайтынына тағы бір мәрте көз жетті. Көзін тапсаңыз, Сырдың бойына бамбукті де жайқалтып қоюға болады екен. Енді осы жайына толығырақ тоқталып өтсек.Амантай Сарбасов алғашқыда бамбук жайында нақты деректер жинақтаған. Жаһандық желіні шарлай отырып көптеген құнды мәліметтерге кезікті. Оны алу жолдарын қарастырды. Таныстары бамбук ағашының көшетін жеткізіп бергенде әуелі қалай болар екен деп ойланып қалғаны рас. Қашанда тәуекел іске білек сыбана кірісетін дағдысымен тағы да мақсатына жетті.<blockquote>Алғашқыда өсіп кетуіне күмәнім болды. Оның себебі де жоқ емес. Негізінен ол тропиктік аймақтарда өседі. «Біздің өңірдің климаты, ауа райы, топырағы оған сай келе ме?» деген уайымым болғаны рас. Күмәнім бекер болып шықты. Бамбук күннен күнге бойын тіктеп, жасыл желегін жайқалта түсті. Қазір бойының ұзындығы 3 метрге жетті. Суда көбірек тұруы керек. Ол жағы қамысқа ұқсас. Ұзақ жылдан бері бағбандықпен айналысқандықтан, сан алуан өсімдіктерге тәжірибе жасағанды жаным қалайды, – дейді бағбан.</blockquote>Сөздің орайы келгенде айта кетейік, бамбук – астық тұқымдасына жататын ағаш сабақты өсімдік. Оның 47 туысы, 200-ден астам түрі бар екен. Австралия, Азия және Америка құрлықтарында кеңінен таралған. Енді бұл өсімдік бізде де бар.<blockquote>Оған ерекше күтім жасаған жоқпын. Өзі бірден-ақ бойын тіктеп кетті. Рас, біздің жеріміздің ауа райы қатал, топырағының да құнары төмен. Кейбір дақылдар мен өсімдіктерге арнайы жағдай жасалуы тиіс. «Бабын тапсаң, жер жомарт» дейді ғой халқымыз. Менің бақшалығымда грек жаңғағы да өсіп тұр. Өріктің 4-5 сорты бар, ал гүлдің 12 түрі жайқала өскенде өзіңе ерекше сезім сыйлайды. Таңертең баққа бас сұққанда сондай күйге бөленемін, – деді А.Сарбасов.</blockquote>Қазақта «Атадан мал қалғанша, тал қалсын» деген даналық бар. Асыл дінімізде де көшеттер мен жеміс ағаштарын егу – сауапты амал. Біздің кейіпкердің егін егудегі басты ұстанымы да – осы.&nbsp;

Жаңақорғандық бағбан 25 гектар жерді игеріп, ағаш өсіруде

<a href="https://kyzylorda-news.kz/">Kyzylorda-news.kz.</a>&nbsp; Қай кезде де, төрт түлікпен айналысатын шаруаның табысы ортайған емес. Мәселен, Сырдария ауданына қарасты Айдарлы ауылында ірі қараның ішіндегі төресі саналатын түйені өсіруге ден қойған Руслан Шайхсламов деген жас кәсіпкер тұрады. Түйекеш &nbsp;жігіт мемлекеттік грант арқылы 2 боталы түйе алып, ауылдағы ағайынды шұбатпен қамтамасыз етіп отыр.Айдарлылық жас кәсіпкер өткен жылы &nbsp;«2021-2025 жылдарға арналған кәсіпкерлікті дамыту жөніндегі ұлттық жоба шеңберінде грантқа қол жеткізген. Жалпы, жобасын мал шаруашылығына арнаған белсенді жас осыған дейін төрт түлікті бағумен айналысқан. Руслан Шайхсламов 4 ағайынды. Түйе бағу ісін ілгерілетуге оның бауырлары қолғабыс етеді. Күніне 2 рет сауылатын түйе сүті – дертке шипа. Осы күні біршама ауыл тұрғынының сұранысын қанағаттандыру мақсатында жас кәсіпкер төл басын көбейтуге барын салуда. Бұл ретте жеке кәсіпкер тұтынушыға түйе сүтін нарық бағамы бойынша 1000 теңгеден &nbsp;сатуда.<blockquote>Осы кезге дейін сан түрлі жұмыс істеген болатынмын. Вахталық жұмыспен күнкөріс деңгейін жақсартуға тырысқаным рас. Бос уақытымда ірі қара мен уақ малды бағумен айналысқан едім. Жалпы, мал шаруашылығы – отбасының берекесін келтіріп, табысты еселеуге таптырмас мүмкіндік. «2021-2025 жылдарға арналған кәсіпкерлікті дамыту жөніндегі ұлттық жоба» аясында 1 225 200 теңге грант иегері атанып, түйе бағудың қыр-сырына қанықтым. Айрықша күтімді қажет етпейтін ойсылқараның төлі Айдарлы ауылының &nbsp;ауа райына төзімді болып келеді. Осы уақытта түйені бураға түсіру қолға алынуда. Алдағы уақытта кәсібімді &nbsp;барынша кеңейту ойда бар, – дейді жас кәсіпкер.</blockquote>Жастайынан еңбекпен есейген Руслан Шайхсламов – көпбалалы әке. Зайыбы Жәмила Сейдіуәлиева екеуі осыдан 8 жыл бұрын шаңырақ көтерген. Қазіргі таңда ерлі-зайыпты 4 перзентті тәрбиелеп отыр. Үнемі үй шаруасын дөңгелетіп әкететін Жәмила Құдай қосқан қосағына тілеулестік білдіріп отырады. Қара жұмыстан қашпайтын жас кәсіпкер жүздеген ірі қараны бағатын түйекешке айналғысы келеді. Ол &nbsp;үшін аянбай еңбек ететін Рекең кәсібін кеңейте беруді мақсат етіп қойғандығын жақсы білеміз.&nbsp;Негізінен, әуелден қолға үйретілген қазақ түйесі шөлге төзімді болады. Бота анасын 18 ай еміп, жетіледі. Түйенің өмір сүру ұзақтығы 30-35 жасты құрайды. Елімізде қолға үйретілген айыр өркешті түйе жиі кездеседі. Түйе сүтінің майлылығы сиыр сүтінен едәуір жоғары болады екен. Түйенің шудасы өте қымбатқа бағаланған. Бұл ретте түйе бағуды қолға алған жас кәсіпкер оның пайдасын барлық жағынан көрмек. Мәселен, мамық жүнін тоқыма өндірушіге, еті мен сүтін халыққа ұсынуға болады. Түйе жүнінің 85 пайызы бағалы әрі таза болып табылады. &nbsp;<blockquote>Айдарлы ауылында 1627 тұрғын бар. Ынтымағы жарасқан ауылда жұртшылық мал шаруашылығымен тұрақты түрде шұғылданады. Біз кәсіпкерлік саласын өркендетуге күш салып келеміз. Бүгінде ауылымызда 118 жеке кәсіпкер бар. Өткен жылы 13 адам «2021-2025 жылдарға арналған кәсіпкерлікті дамыту жөніндегі ұлттық жоба» бойынша грант ұтып алды. Руслан секілді жастар кәсіп ашуға ниеттенсе, әрқашан қолдауға дайынбыз. Бірнеше ай көлемінде түйе баққан жас кәсіпкердің еңбегі жемісті болсын, – дейді Айдарлы ауылының әкімі Айбол Ержанов. &nbsp;</blockquote>

Қазақстан және Қызылорда облысының жаңалықтары