<a href="https://kyzylorda-news.kz/ru/">Kyzylorda-news.kz</a>. Бүгін облыс әкімі Нұрлыбек Нәлібаев Жаңақорған ауданына іссапары аясында Түркістан облысымен шекаралас аумаққа көрік берген кіреберіс қақпаны арнайы барып көріп, ауыл тұрғындарын құттықтады.<blockquote>«Қазіргі таңда Сыр өңірі серпінді құрылыс алаңына айналды. Сәулетті құрылыс – өркениет нышаны, жаңару мен жаңғырудың жаршысы. Жаңа, еңселі қақпаны жерлесіміз, «СМП-Қызылорда» құрылыс компаниясының басшысы Әлімқұлов Темірхан Мәлікұлы өз демеушілігімен салды. Құрылысқа жеке қаражаты есебінен 200 млн. теңгеден астам қаражат жұмсады. Туған жерге жанашыр азаматтың еңбегінен өзгелер үлгі алады деген сенімдемін.Ел Президенті мен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Ерекше атап өтуіміз қажет, 2023 жылға облыс бюджеті 520,7 млрд. теңге көлемінде бекітілген болатын. Күні кеше нақтылаумен оның көлемі 592,8 млрд. теңгеге жетті. Бұл 2022 жылғы бюджет көлемімен салыстырғанда бұл 205,5 млрд. теңгеге немесе 1,5 есеге артық», – деп атап өтті аймақ басшысы.</blockquote>Жиналған қауымды қоғам қайраткері Мұрат Бахтиярұлы құттықтап, еңбек ардагері Жарылқасын Шәріпов құттықтап, бата берді. Іс-шара соңында қақпа маңында автокөліктер шеруі ұйымдастырылып, салтанатты рәсімнің сәнін келтірді.Айта кетейік, жаңадан салынған қақпаның ені 43, биіктігі 17 метр, сыртқы қасбеті ұлттық нақышта безендірілген.Еске салсақ, Мемлекет басшысы Қасым-Жомарт Кемелұлы туған жеріне жанашырлықпен қарайтын кәсіпкерлерді патриотизм мен әлеуметтік жауапкершіліктің үлгісін көрсетіп, ел экономикасын дамытуға үлес қосуға шақырған болатын. Бұған жергілікті кәсіпкерлер, меценаттар белсенді атсалысып, қайырымдылық шараларына, туған жерін түлетіп, көркейтуге күш-жігерін салуда.Мәселен, белгілі кәсіпкер Марат Дүйсенбаевтың демеушілігімен құны 1,5 млрд. теңгені құрайтын «Анаға тағзым» орталығының құрылысы жүргізілуде. Шілде айында пайдалануға беріледі. «Балалар жылында» демеушілер жалпы құны 1,6 млрд. теңгеге 80 спорт-ойын алаңын салып, балдырғандарымызға тарту етті. Бұл бастаманың жалғасы әрі бизнестің әлеуметтік жауапкершілігі аясында қазір қаладағы көпқабатты тұрғын үйлердің ауласын абаттандыру, ескі көпқабатты тұрғын үйлердің қасбеттерін жаңарту басталды.Мұнан бөлек, демеушілер есебінен Жаңақорған ауданында құны 790 млн. теңге болатын заманауи демалыс паркі ашылды. Сырдария ауданы Нағи Ілиясов ауылында құны 450 млн. теңгені құрайтын «Еңбекшілер паркі» бой көтерді. Арал ауданы Тоқабай ауылындағы апатты деп танылған мектеп жеке инвестор есебінен 500 млн.теңгеге қайта салынуда. Нысанды алдағы тамыз айында пайдалануға беру жоспарланған. Өткен айда Болат Өтемұратов Қорының қолдауымен құны 31 млн. АҚШ долларын құрайтын «Қорқыт ата» әуежайының жаңа терминалының іргетасы қаланды. Нысан 2024 жылы пайдалануға берілмек. Бұған қоса «ҚазГерМұнай» ұлттық компаниясы басшылығымен келісім нәтижесінде Қызылорда қаласында заманауи үлгідегі «Оқушылар сарайының» жобасы басталады.<figure class="image"><img src="https://knadmin.beoblood.kz/uploads/343123758_189512677257112_8005812818292611607_n_ce8363d539.jpg" alt="343123758_189512677257112_8005812818292611607_n.jpg"></figure>&nbsp;<figure class="image"><img src="https://knadmin.beoblood.kz/uploads/343390439_1768202713577669_1450935893851142237_n_38a45838f6.jpg" alt="343390439_1768202713577669_1450935893851142237_n.jpg"></figure>

Қызылорда облысына кіре берісте жаңа қақпа салынды 

<a href="https://kyzylorda-news.kz/">Kyzylorda-news.kz.</a> Қызылорда қаласындағы Қосшыңырау ауылдық округіне қарасты Абай және Досан елді мекендерін қоса есептегенде халық саны - 3643адамды құрайды. Белсенді халық саны – 1900. Өзін-өзі жұмыспен қамтылғандар саны -586 адам. Жұмыссыздар саны - 15 адам.&nbsp;Ауылдық округтегі жұмыссыздық деңгейі 0,6 пайыз. Халық саны былтырғы жылмен салыстырғанда 9,4 пайызға өскен. 2022 жылы ауылдық округі тұрғындарына «2021-2025 жылдарға арналған кәсіпкерлікті дамыту жөніндегі ұлттық жобасы» аясында халықты жұмыспен қамтуға жәрдемдесу шаралары арқылы 3 адам жастар практикасымен, 36 адам- ақылы қоғамдық жұмысқа, 1 адам қысқа мерзімді кәсіптік оқуға тартылған. «Еңбек» бағдарламасы аясында мемлекеттік грантқа 42 адам құжаттарын тапсырып, екінші кезең нәтижесімен ауылдық округтің 9 азаматы жалпы құны &nbsp;11 миллион 26 мың теңгені құрайтын грантқа ие болды.&nbsp;Ауылдық округтің 2022 жылы жыл басынан бекітілген бюджет шығындары бойынша 108,5 миллион теңгені құраса, жыл ішінде қалалық мәслихат шешімдерімен бұл қаражат 156,7 миллион теңгеге нақтыланып, 0,6 есеге артты. &nbsp;Округ бойынша 2022 жылдың &nbsp;салық түсімдерінің жоспары 7 миллион 333 мың теңгеге жоспарланып, жыл ішінде 500,0 мың теңге секвестрге ұсынылып, салық түсімдерінің жоспары 6 миллион 833 мың теңгеге нақтыланған. Жыл соңында нақты түсім 7 миллион 349 мың теңгені құрап, жоспар 107,5 пайызға орындалған.Өткен жылдың басында &nbsp;аз қамтылған &nbsp;69 отбасы, яғни 407 адамға 14 миллион &nbsp;320 &nbsp;мың теңге көлемінде атаулы әлеуметтік көмек &nbsp;тағайындалған. Ауылдық округі тұрғындарын міндетті әлеуметтік медициналық сақтандыру шеңберінде Абай елді мекеніндегі медициналық &nbsp;амбулатория алғашқы көмек беру, дәрі-дәрмектермен қамтамасыз етілуде. Жыл басынан бері «Жүрек жылуы» қайырымдылық акциялары аясында демеушілер тарапынан 35 тұрмысы төмен отбасыға 420 мың теңге көлемінде азық-түліктей қолдау шаралары ұйымдастырылған.Ауылдық округ бойынша жалпы білім беретін 2 орта мектепте 2 аусымда барлығы 902 оқушы білім алуда. Мектептер толықтай бейнебақылау камераларымен жабдықталған. Мектепке дейінгі білім беруге байланысты –Абай ауылында «Ата Мұра Орда» 100 орындық жеке балабақшасында 85 бала тәрбиеленуде.&nbsp;Абай мәдениет үйінің жанынан құрылған «Ақниет» әжелер ансамблі, «Шабыт» көркемсөз оқу, «Дарын» домбыра, «Ән шырқайық», «Бисер», «Сурет», «Заманауи» және «Спорт» би үйірмелері жұмыс жасап келеді. Үйірмеге 250 оқушы қамтылған. 2022 жылы Абай мәдениет Үйінде жыл көлемінде 45 мәдени іс-шара өткізу жоспарланып, 47 мәдени іс-шара өткізілген.&nbsp;Айта кетерлік жайт, ауылдық округте 2 ойын алаңы және тұрғындарға арналған 1 жаттығу орны бар. 2022 жылы Қосшыңырау ауылдық округінде барлығы 1381 гектар аумаққа күріш егіліп, одан басқа 476 гектарға жаңа жоңышқа, 82 гектарға бидай егілді. Нәтижесінде 1381 гектар аумаққа егілген күріштен 56,2 центнерден 7758,2 тонна өнім алынған. Жалпы Қосшыңырау ауылдық округінің жалпы жер аумағы – 40 322,3 гектарды құрайды. Оның ішінде ауыл шаруашылығы мақсатында табысталған жер учаскесінің көлемі – 18315,5 гектар.Ауылдық округте егін шаруашылығымен айналысатын 29 шаруа қожалығы бар. Ал тіркелген мал басы саны бойынша МІҚ - &nbsp;5222, жылқы – 3188, уақ мал – 4499, Түйе – 397. Осылайша ауылдық округтегі жылдық өсім 17 пайызды құрап отыр.&nbsp; Сонымен қатар, Досан ауылын аяқ сумен қамтамасыз ету мақсатында 2 дана ұңғыма қазу жұмыстары жүргізіліп халыққа пайдалануға берілген. 2022 жылы ШЖҚ«Табиғат» МКК кәсіпорны арқылы &nbsp;ауылға келетін үш каналға тазарту қазу жұмыстары жүргізілген. Атап айтқанда Р-2,2 каналының 8,1 шақырымы тазартылып - 25,9 миллион теңге &nbsp;игерілсе,. Ешпан каналының 3,9 шақырымы тазартылып 18,6 миллион.теңге игерілген. Алтынбай каналы бойынша 10,5 шақырымға тазарту жұмыстары жүргізіліп, 20,5 миллион теңге игерілген.Шағын және орта кәсіпкерлікті дамыту- ел экономикасын ілгерілетудің ең негізгі тетіктерінің бірі. Мемлекет тарапынан жаппай кәсіпкерлікті дамыту мақсатында тиімді мемлекеттік бағдарламалар қабылданып, өңірімізде де жүзеге асырылуда. Ауылдық округте &nbsp;2023 жылдың 1 қантарындағы есеп бойынша 213кәсіпкерлік субъект тіркеліп, оның ішінде жұмыс жасап тұрған 207бірлік анықталған.&nbsp;207 кәсіпкерлік субъектінің 8-і ЖШС, 135-і жеке кәсіпкер, ал 62-і шаруа қожалығы және 2 ауылшаруашылық өндірістік кооперативі.2022 жылы «Микробизнес-Қызылорда» өңірлік инвестициялық орталығы» микро қаржылық ұйымы тарапынан ауылдық елді мекендердегі кәсіпкерлерге берілетін шағын несиелендіру бағдарламасы аясында 5,0 миллион теңгені құрайтын 1 жоба, «Аграрлық несие корпорациясы» АҚ-ы тарапынан «Агробизнес» бағдарламасы аясында 17 пайыздық несиелендірумен 26 миллион теңгені құрайтын 1 жоба және «Аграрлық несие корпорациясы» арқылы Іскер реинвест бағдарламасы аясында 4,8 миллион теңгені құрайтын 1 жоба, Іскер бағдарламасы бойынша құны 17,9 миллион теңгені құрайтын 3 жоба қаржыландырылған. Одан бөлек Сырдария 1 несие серіктестігі арқылы 26,4 миллионтеңгені құрайтын 3 жоба, «Атамекен Қызылорда» несие серіктестігі арқылы 3 миллион теңгелік 1 жоба қолдау тапқан.2022 жылы «2021 – 2025 жылдарға арналған кәсіпкерлікті дамыту жөніндегі ұлттық жоба» бағдарламасы аясында Жаңа бизнес идеяларды іске асыруға арналған мемлекеттік грант бойынша 11 миллион 26 мың теңгені құрайтын 9 жоба қаржыландырылды. «Бизнес-Бастау» оқу курсы аясында Қосшыңырау ауылдық округінен 40 адам арнайы курстан өтіп, сертификаттарын алған. Алдағы уақытта өз кәсіптерін ашып, жаңа жұмыс орындарын ұсынуды жоспарлап отыр. Абай ауылының жалпы ауыз су құбырының ұзындығы - 9 шақырымды құрайды. «Ақбұлақ» бағдарламасы аясында Абай ауылы 100 пайыз таза ауыз сумен қамтылған. Ауылдың шет аймақтарына жаңадан тұрғын үй құрылысына берілген жерлерге шашыраңқы &nbsp;ұрғын үй құрылыстары түсуде. Сол үйлерге ауыз су құбырын тарту мақсатында қазіргі таңда қалалық құрылыс бөлімі арқылы жоба сметалық құжаттары әзірленуде.Досан ауылы тұрғындары 100 пайыз таза ауыз сумен қамтамасыз етілген. Досан ауылының тұрғындары өз келісімдерімен табиғи газды ауылға кіргізуге «Каз Энерго Проект Строй» ЖШС-мен келісімге отырып, қазіргі таңда елді мекен орталықтандырылған ілеспе газ құбырларына қосылып, игілігіне пайдалануда.Өткен жылы «Ауыл-ел бесігі» мемлекеттік бағдарламасы аясында округте 5 көше жөндеуден өткізілді. Жыл басында өңірлерді дамыту бағдарламасы бойынша «Сиыр фермасына» жарық бағандарын орнату үшін 3590,0 мың теңге бөлініп, ашық конкурс жарияланып «МК-Сервис Ltd» &nbsp;ЖШС жеңімпаз болып табылып, жұмыстар аяқталған.Сонымен қатар, 2022 жылы қалыптасқан 2666,8 мың теңге бос қалдықтың 2130,4 мың теңгесін ағымдағы шығындарға, яғни Досан ауылындағы №17-көшеге жарық бағандарын орнатуға қайта бағыттап, жұмыстар жүргізілді. «Елді мекендерде көшелерді жарықтандыру» бағдарламасынан үнемделген қаржыдан 5224,0 мың теңге «Сиыр фермасы» мен Махамбетов көшелерінің қиылысына жарық бағаналарын орнату жұмыстарына ашық конкурс жарияланып, жұмыстар жүргізілуде.&nbsp; Досан ауылын толықтай талапқа сай электр қуатымен қамтамасыз ету мақсатында, өткен жылдың соңында қала әкімінің қолдауымен қалалық бюджеттен 10 миллион теңге бөлініп, бүгінгі таңда жоба-сметалық құжаттары мемлекеттік сараптамасымен дайын.&nbsp;Сондай-ақ, ауылдың жолдарын да жөндеу мақсатында 8,0 миллион теңге қаржыға жоба-сметалық құжаттары әзірленіп, мемлекеттік сараптама алынған.&nbsp;Абай ауылындағы Сиыр фермасы учаскесіне жол құрылыс жұмыстарына және ауыз сумен қамтамасыз ету жұмыстарына жоба сметалық құжаттары да дайын.Ал Досан ауылындағы көшелерге жарық бағандарын орнату үшін жоба сметалық құжаттары және Абай ауылына балалар ойын алаңын салу үшін ЖСҚ-сы дайындалып, сараптама қорытындысымен әзірленген. Досан ауылына медициналық бекет салу үшін облыстық құрылыс басқармасы тарапынан жоба-сметалық құжаттары дайындалып, мемлекеттік сараптама қорытындысын алуға ұсынылды.Аталған жобалар дайын болған уақытта құрылыс жұмыстарына қажетті қаржыны бөлу жөнінде құзырлы органдарға бюджеттік өтінім ұсынылмақ.Ауылдық округте қоғамдық-саяси және діни ахуал тұрақты сипатта. 2022 жылдың 12 айында 5 қылмыс орын алып, оның 4-і ашылған, Екі елді мекеннің 183 азаматына әр түрлі баптармен әкімшілік хаттама толтырылған. Қылмыстың және мал ұрлығының алдын алу бағытында ауылдық учаскелік полиция қызметкерімен бірлесе ауыл азаматтарынан төрт бағытта құралған түнгі кезекшілік қызмет етуде.Бүгінгі таңда ауылдық округті газбен қамтамасыз ету мақсатында әзірленген жоба-сметалық құжаттары толық дайын болып, құрылыс жұмыстарына 663,0 миллион теңге. қажетті қаржы республикадан бөлініп, алдағы уақытта &nbsp;аталған жұмыстар атқарылатын болады.&nbsp;2023 жылы өңірлерді дамыту бағдарламасы бойынша Досан ауылындағы №1 көшеге жарық бағаналарын орнату үшін 3895,0 мың теңге бөлінген. Сонымен қатар, Досан ауылындағы №4а, 9а, 15, 17,20 көшелерге орташа жол жөндеу жұмыстарын жүргізу үшін асфальт төсеуге облыстық бюджеттен «Ауыл - ел бесігі» бағдарламасы аясында 56523,0 мың теңге бөлінген. Қалалық бюджеттен Абай ауылындағы саябаққа ағымдағы жөндеу жұмыстарын жүргізу үшін 5 миллион теңге қаржы бөлінді.Қазіргі уақытта ауылымыздағы «Дарбас», «Арғын» бейіттерін қоршау жұмыстарына жоба сметалық құжаттары дайын. Абай ауылындағы Махамбетов және Шоқатай көшелеріне және Досан ауылындағы Д. Елеусінов көшесіне жаяу жүргіншілер жолын салу үшін Абай ауылына кіре-беріс жол мен Досан ауылындағы №2, №2а, №3, №5, №7, №8, №10, №11, №12, №13, №14, №19, №21 көшелеріне жарық бағандарын орнату үшін ЖСҚ экспертиза қорытындысымен әзірленіп «Қалалық тұрғын үй-коммуналдық шаруашылығы, жолаушылар көлігі, автомобиль жолдары» КММ-сі арқылы республикалық бюджеттен қаржы сұратылып бюджеттік жобаға ұсынылған.

Қосшыңырау ауылында бірқатар жұмыстар жүзеге асырылуда

<a href="https://kyzylorda-news.kz/">Kyzylorda-news.kz.</a>&nbsp; «Aray city mall» сауда орталығында «Cыбайлас жемқорлықтың алдын алуға бағытталған ақпараттық түсіндірме шараларын және адам саудасының алдын алуға бағытталған шараларды ұйымдастыру» әлеуметтік жобасы аясында заңгер Нұрсұлтан Байменов халыққа тегін құқықтық кеңес берді. Іс-шараны қалалық қоғамдық даму бөлімінің тапсырысы аясында «Қызылорда облысының жастар Одақтары» қоғамдық бірлестігі ұйымдастырды.&nbsp;Кездесу барысында сыбайлас жемқорлыққа қарсы құқық бұзушылықтарға моральдық «иммунитетті» қалыптастыру және осының негізінде сыбайлас жемқорлықты еңсеру бойынша құзыреттерді дамыту, &nbsp;құқықтық жаппай оқу арқылы құқықтық білім мен тәрбиені қамтамасыз ету бағытында түсіндірме жұмыстары жүргізілді.&nbsp;<blockquote>«Кеңес алу кезінде әсіресе егде жастағы қариялар өзінің кейінгі ұрпақтарына алаңдайтынын және осындай шаралардың көп болу керек екіндігін атап өтті. Еліміздің сыбайлас жемқорлыққа қарсы іс-қимыл бағдарламасында: «Отбасы және білім беру саласы бұл үдеріске мүдделілік таныта отырып қатысуы керек. Бұл жұмысты мектепке дейінгі бала тәрбиесінен бастаған абзал» делінген. Расында Сыбайлас жемқорлықсыз қоғамды құруда отбасынан алынатын тәрбиенің маңызы зор. Сыбайлас жемқорлыққа қарсы мәдениетті насихаттау қоғамның түрлі салаларын қамтиды, оның ішінде, әсіресе, білім беру мекемелеріне жүктелетін жауапкершілік аса жоғары», - дейді заңгер Н.Байменов.&nbsp;</blockquote>Тұрғындар түрлі салада сұрақтарын қойып, нақты жауаптарын алды.<figure class="image"><img src="https://knadmin.beoblood.kz/uploads/629d3377_c5e9_4a65_9745_e64ccee7534a_91cd86a1c0.jpg" alt="629d3377-c5e9-4a65-9745-e64ccee7534a.jpg"></figure>

Сыбайлас жемқорлық: Сауда орталығында халыққа тегін құқықтық кеңес берілді

<a href="https://kyzylorda-news.kz/">Kyzylorda-news.kz.</a> Қызылорда қалалық мәслихаттың әлеуметтік сала және қоғамдық қауіпсіздік мәселелері жөніндегі тұрақты комиссиясының отырысы өтті.&nbsp;Комиссия отырысында «Қала аумағындағы кәсіпкерлік және басқа да нысандарда, сыртқы (көрнекі) жарнама объектілерінде мемлекеттік тілдің сақталу барысы және латын тілінің қолданылуы мәселесі» қаралды.&nbsp;Комиссия отырысына мәслихат төрағасы И.Құттықожаев, депутаттар Р.Ысқақова, Б.Кәрімова, Т.Мақашов, М.Бисенова, Б.Еркебаев, Б.Төлеген, қала әкімінің орынбасары Ж.Сейілов, қоғам қайраткері, халықаралық «Қазақ тілі» қоғамы облыстық филиалының төрағасы, «Тіл сақшысы» газетінің бас редакторы С.Аңсат, тиісті қалалық бөлім басшылары, БАҚ өкілдері қатысты.&nbsp;Күн тәртібіндегі мәселеге қатысты, қалалық мәдениет және спорт бөлімінің басшысы Ж.Тажмаханов, қаладағы билбордтардың жағдайы туралы қалалық сәулет және қала құрылысы бөлімі басшысының міндетін атқарушы Н.Баймырзаев, қалалық қоғамдық даму бөлімінің басшысы П.Жаңабергенов хабарлама жасады.&nbsp;Комиссия барысында сыртқы жарнамаларға рұқсат беру тәртібін жүйелендіру, тілдік нормалардың сақталуына бағытталған аралау шараларын күшейту, қала ішілік қоғамдық көлік қызметкерлерінің аялдама атауларын қазақ тілінде атауы, латын тілін қолданудың ережелері бекітілмегеніне қарамастан, қолдану аясы кеңейіп бара жатырғандығы және басқа да мәселелер көтерілді.&nbsp;Қалалық мәслихат төрағасы Ибадулла Құттықожаев қалада тиісті талаптарға сәйкес келмейтін жарнамалық тұғырнамалардың рұқсатсыз іліну жағдайлары бар екендігін, оларды талапқа сәйкестендіру шараларын күшейтуді ұсынды.&nbsp; Қоғам қайраткері, халықаралық «Қазақ тілі» қоғамы облыстық филиалының төрағасы, «Тіл сақшысы» газетінің бас редакторы Аңсат Сәдуақас сөз алып, 2022 жылы 21 қыркүйекте облыс әкімі Н.Нәлібаевпен «Мемлекеттік тілдің қолданыс аясын кеңейту және «Қазақстан Республикасындағы тіл туралы» Заң талаптарының сақталуын қамтасыз етудің облыстық іс-шаралар жоспары» қабылданғандығын, қазіргі таңда осы жоспардың жүзеге асырылуын күшейту қажеттігін баса айтты және басқа да ұсыныстарын білдірді.&nbsp;Қалалық мәслихат депутаты, Қорқыт ата атындағы Қызылорда университетінің ректоры, филология ғылымдарының кандидаты Кәрімова Бейбіткүл «Қазақ тіліндегі біршама сөздер мен сөз тіркестерінің жазылу ережелері» тақырыбында хабарлама жасап, тілдегі қазіргі жаңашылдықтарға тоқталып өтті. Мәселен, қоғамдық, әлеуметтік өмірдегі жаңа зат, құбылыс, уақиғаны атау қажеттілігінен: құзырхат, ашықхат, ғаламтор, айқұлақ, хатқалта, экоорталық, әуесерік, дәрумен секілді сөздердің пайда болып отырғандығын жеткізді. Қазақ тілінен сырттан енген сөздерді қазақ тілінің орфографиялық сөздігіне сәйкес, жазылуын насихаттау қажет екендігін айтты. Яғни, бұл мәселе тілде босаң норма деп аталады. Шекара сөзі-шегара, Аманкелді-Амангелді, қыркүйек-қыркүйег деп жазылуы қажет, осы сөздер уақыт өте келе халықтың тілдік нормасына сіңгеннен кейін бірінші нұсқа өздігінен қалады деп тұжырымдады.&nbsp;Сонымен қатар, қаламызда «Көрнекі» жобасы жүзеге асырылмақ. Жоба аясында арнайы дайындықтан өткен еріктілер жылына 30 көшедегі кәсіпкерлік нысандардағы қазақ тіліне қатысты қате мен заң бұзу фактілерін анықтап, түзетілуі талап етеді және қажет жағдайда мәтіні ақысыз түрде түзетіліп, құқықтық жағынан ақпарат береді. Отырысқа комиссия төрағасы А.Мұсабаева төрағалық етті.

Мемлекеттік тіл мәселесі қалалық мәслихат депутаттарының назарында

<a href="https://kyzylorda-news.kz/">Kyzylorda-news.kz.</a> №13 сайлау округінен сайланған Қызылорда қалалық мәслихат депутаты Басықараев Ибраким Асқарұлы бекітілген жоспарға сәйкес жеке қабылдау өткізіп, тұрғындарды қабылдады.Қабылдау барысында №6 мектеп директоры А.Сейілханов мектеп ауласындағы спорт алаңшасын асфальттауға ықпал жасауды сұрады. Ал Қорқыт ата көшесінің тұрғыны Г.Айдарова депутатқа Қасиетті Рамазан айында берген көмегіне рахметін жеткізе отырып, тұрғын үй кезектілігі мәселесін көтерсе, Титов қыстағының тұрғыны А.Байекеева тұрақты жұмысқа тұруға көмек сұрады.&nbsp;Сонымен қатар, Жанқожа батыр көшесінің тұрғыны К.Қанатбаева, Қорқыт ата көшесі тұрғыны И.Байбулова, Мұратбаев көшесінің тұрғыны зейнеткер Р.Ешпаева, Қорқыт ата көшесінің тұрғыны Г.Шаймбетова қаржылай көмек сұрады. Қалалық мәслихат депутаты өз тарапынан шешу жолдарын қарастыру мақсатында құзырлы органдармен жұмыс жасалатынын жеткізді.№15 сайлау округінен сайланған қалалық мәслихат депутаты Айгүл Нәжмадинқызы Мұсабаева бекітілген жоспарға сәйкес жеке қабылдау өткізіп, тұрғындарды қабылдады. Қабылдау барысында Жанқожа батыр көшесінің тұрғыны К.Қанатбаева, Қызылжарма ауылдық округ тұрғыны Ж.Пірманшаева қаржылай көмек сұрады. Байтерек мөлтек ауданы тұрғыны Р.Қобланова тұрғын үй кезегі мәселесін көтерді.№16 сайлау округінен сайланған қалалық мәслихат депутаты Маржан Қылышбайқызы Бисенова бекітілген жоспарға сәйкес жеке қабылдау өткізіп, Қабылдау барысында Жанқожа батыр көшесінің тұрғыны К.Қанатбаева, Қизатов көшесінің тұрғыны Л.Ильясова және Тайманов көшесінің тұрғыны Г.Урумова қаржылай көмек сұрады.

Қызылорда қалалық мәслихат депутаттарының жеке қабылдаулары жалғасуда

<a href="https://kyzylorda-news.kz/">Kyzylorda-news.kz.</a> Қызылорда облысы бойынша Қылмыстық-атқару жүйесі департаментіне қарасты №60 мекемесінде бас бостандығынан айырылған 10 адам шартты түрде мерзімінен бұрын босатылды.Бұл мүмкіндік «қақпа алдындағы кездесу» әлеуметтік жобасы аясында жүзеге асты. Босап шыққандардың дені бөтеннің мүлкін жымқырып, темір торға тоғытылғандар. Сот үкімімен олар 6 және 8 жыл аралығында басбостандығынан айырылған.<blockquote>– ҚК 72 – 73 бабына сәйкес жазаның жеңіл түріне ауыстыру және шартты түрде мерзімінен бұрын босату бойынша 10 сотталған мемлекетке қылмыспен келтірілген шығынын өтеп, заңнамада көрсетілген жеңілдікке ие болды, – деді &nbsp;мекеме бастығының тәрбие ісі жөніндегі орынбасары әділет подполковнигі Алтынбек Тұрарбекұлы.</blockquote>Сотты болғандар еркін өмірге қадам басу үшін тағайындалған жазаның жарты бөлігін өтеп, үлгілі тәртібімен көзге түсіп, қоғамға бейімделу үшін барын салды. Бостандыққа шыққан бойда олар пробациялық бақылауға алынады.<blockquote>– Мекеме әкімшілігіне қоғамға бейімдеу үшін жасаған шаралары мен тәрбие жұмыстары үшін өз алғысымды айтамын. Түзеу жолына өзімді нық тұрдым деп есептеймін. Енді қателікке жол бермеуге уәде беремін, – деді босап шыққан азамат.</blockquote>

Қызылордада 10 адам бостандыққа шықты

&nbsp;<a href="https://kyzylorda-news.kz/">Kyzylorda-news.kz.</a>&nbsp; Сырдария ауданының орталығы Тереңөзек кентінде кәсіпкерлік саласы түрлі бағытта өркендеп келеді. Жаңа идеяларға иек артқан бизнес иелері жергілікті халыққа тиімді кәсіп ашуға дағдыланған. Қазіргі уақытта аудан орталығында сауда үйлері, асханалар желісі, фасфуд орталықтары, тігін шеберханалары, шағын базарлар, құрылыс заттарын сататын дүкендер, дәріханалар, автокөлік жуу мен жөндеу жұмысын жандандыру тұрақты жүргізілуде.Өткен жылы жеке кәсіпкер Нұрсұлтан Мамықовтың бастамасымен «Ыстық нан» наубайханасы өз жұмысын бастады. Бүгінде наубайхананың ыстық нанына тұрғындар тарапынан сұраныс жоғары болып отыр.«Аянат» ЖШС-нің директоры Нұрсұлтан Мамықовтың жеке кәсіппен айналаса бастағанына 8 жыл болған. Бұған дейін Қызылорда қаласынан наубайхана ашқан ол жеке бизнесін кеңейту үстінде екен. Тереңөзек кентіндегі Аманкелді Иманов көшесі бойынан пайдалануға берілген «Ыстық нан» наубайханасының ғимаратын жөндеуге 3 млн теңге қаражат кеткен. Оның ішіне нан пісіруге арналған пеш орнатылып, жұмысшыларға барлық жағдай жасалған.<blockquote>– Осы күні «Ыстық нан» наубайханасында бірнеше адам жұмыспен қамтылған. Күніне 500-ге жуық нан өнімдері өндіріледі. Сонымен бірге тұрғындарға тандыр, қатпарлы самса ұсынылып келеді. Жергілікті халық наубайхананың ыстық нанына үйренді. Мүмкіндігінше көпшілікті нанмен қамтамасыз ету жоспарда бар. Шын мәнінде шағын бизнесті дамытуға мемлекет тарапынан зор қолдау көрсетіліп келеді. Табыс табудың негізгі жолы – жергілікті тұрғындардың сұранысын қанағаттандыру екені мәлім. Қазіргі уақытта нан бағасы 140 теңге ретінде бекітілді. Алдағы уақатта тоқаш, бәліш өнімдерін сатылымға шығару жоспарымызда бар. Нан өнімдерінің бағасында өзгеріс болуы ықтимал. Бұған ұнның нарықтағы бағасының көтерілуі себеп, – дейді жас кәсіпкер Нұрсұлтан Серікұлы.</blockquote>Кент тұрғындары ыстық нанның сапасын жоғары бағалауда. Тәжірибелі мамандардың қолынан шыққан тандыр нан мен самсаны жұртшылық тапсырыспен алдыртып жататындығын көзіміз көріп жүр. Осыған байланысты кәсіпкер дүкендер мен жеке тұрғын үйлерге ыстық нанды дер кезінде жеткізу үшін тасымал қызметін қолданысқа енгізуді де жоспарлап отырған жайы бар. &nbsp;

Тереңөзек кентінде кәсіпкерлік саласы түрлі бағытта өркендеп келеді

<a href="https://kyzylorda-news.kz/">Kyzylorda-news.kz.</a>&nbsp; Бүгін Жаңақорған ауданының «Бірлік» және «Қыраш» елді мекендеріне газ құбырын қосу рәсімі өтті. Алдағы уақытта тағы да 5 ауылға «көгілдір отын» кіргізу жоспарда бар.Іс-шараға облыс әкімі Нұрлыбек Нәлібаев қатысып, ауыл тұрғындарын құттықтады.<blockquote>«Мемлекет басшысы Қасым-Жомарт Кемелұлы: «Аса маңызды мәселелердің бірі – ауылды кешенді түрде дамыту. Ауылдарға нақты қолдау көрсетіп, заманауи инфрақұрылымды дамытуымыз керек» деген болатын. Президентіміз бен Үкіметтің Сыр өңірін ерекше қолдауының арқасында аймағымызда ауқымды жобалар жүзеге асуда. Өткен жылы 14 газдандыру жобасын жүзеге асыруға 8,7 млрд.теңге бөлініп, игерілді. Нәтижесінде 6 ауылды газға қостық. Осылайша өңірдің газдандыру деңгейі 70 пайызға жетті. Бұл – 26 елді мекен, 583 мыңға жуық тұрғын табиғи газбен қамтылды деген сөз. Биылға республикалық бюджеттен 7,4 млрд. теңге бөлініп, 2022 жылы басталған 7 жоба жалғасты және 12 жаңа жобаның құрылысы басталады. Оның ішінде, Жаңақорған ауданынының «Жайылма», «Шалқия», «Құттықожа», «Төменарық», «Кейден» ауылдарына «көгілдір отын» кіргізу жұмыстары басталады. Бұдан бөлек, өткен жылы құны 3,4 млрд. теңгені құрайтын Жаңақорған кентіндегі 10/0,4 кВ электржелілік жүйені жаңғырту жұмыстары қолға алынған. Соның арқасында кенттегі 70 шақырымға жуық электр желісі жаңарып, қосымша жаңадан 23 трансформатор орнатылады», – деді аймақ басшысы.</blockquote>Ауыл тұрғындарын қоғам қайраткері Бекмырза Еламанов құттықтады, «Ақүйік» ауылдық округінің ардагерлер кеңесінің төрағасы Сәулебек Бейсенбаев алғыс білдіріп, бата берді.Айта кетейік, «Ақүйік» ауылдық округіндегі «Бірлік» ауылына газ құбырын «Gas Energy Construction» ЖШС жүргізді. Жоба республикалық және облыстық бюджеттен қаржыландырылды, оны іске асыру нәтижесінде 440 тұрғын үй мен 5 әлеуметтік нысан газдандырылды.Мұнан әрі облыс әкімі «Қыраш» ауылын газға қосу рәсіміне қатысты. Бұл елді мекенде 124 тұрғын үй мен 6 әлеуметтік нысан «көгілдір отынға» қосылды.Салтанатты іс-шарада аймақ басшысы ауыл тұрғындарын құттықтады. Қоғам қайраткері Ибрагим Әбибуллаев сөз сөйлеп, ауылдық округтің қоғамдық кеңес төрағасы Сұлтанхан Ақылбеков бата берді. Әрі қарай Нұрлыбек Машбекұлы «Қыраш» ауылының имамы Әбдімәлік Шахановтың үйіне барып, газ тұтынған тұрғындардың қуанышына куә болды.Еске салсақ, биыл Мемлекет басшысының қолдауымен ауылдық жерлерде әлеуметтік нысандардың құрылысы қарқынды жүруде. Атап айтқанда, «Жайлы мектеп» ұлттық жобасы аясында алдағы 3 жылда облыста 15 100 орынға арналған құны 100 млрд. теңгеден асатын 21 мектептің құрылысы жүргізіледі. Биыл 10 мектептің құрылысы басталады. Оның 2-уі Жаңақорған ауданы орталығынан салынады.«Ауылда денсаулық сақтауды жаңғырту» ұлттық жобасы аясында 2023-2024 жылдары облыста 27 денсаулық сақтау нысаны салынады. Биыл дәрігерлік амбулаторияның құрылысы «Қаратөбе» ауылында, келесі жылы «Талап», Әбдіғаппар ауылдарында басталады. Ал, 2025 жылға қарай Жаңақорған ауданаралық ауруханасын «көпбейінді аурухана» деңгейіне жеткізу жұмыстары жүргізілуде.Мұнан бөлек, «Жайылма», «Өзгент» ауылдарында 150 орындық клуб, «Ақжол» ауылында денешынықтыру-сауықтыру кешенінің құрылысы жүргізілуде. Нысандар биыл шілде айында пайдалануға берілмек.<figure class="image"><img src="https://knadmin.beoblood.kz/uploads/343080553_612315317585852_2371794560092636744_n_59bb441df3.jpg" alt="343080553_612315317585852_2371794560092636744_n.jpg"></figure>&nbsp;<figure class="image"><img src="https://knadmin.beoblood.kz/uploads/343209360_205516472227596_1657189067818441419_n_3000ccd516.jpg" alt="343209360_205516472227596_1657189067818441419_n.jpg"></figure>

Жаңақорған ауданында 2 ауыл табиғи газға қосылды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облыстық сайлау комиссиясының төрағасы Әділбек Ерсұлтанов қалалық және аудандық сайлау комиссияларының төрағалары мен хатшыларына арналған кеңейтілген жиын өткізді.Басқосуда 19 наурызда өткен Парламент Мәжілісі және мәслихат депутаттарының сайлауында комиссиялардың жұмысына талдау жасалып, науқанды өткізу мәселелері қорытындыланды.Әділбек Ерсұлтанов жыл басынан бері облыстық сайлау комиссиясының кәсіби құрамы жаңа тәжірибелі мамандармен толығып, тұрақты негізде жұмыс істеуге көшкенін тілге тиек етіп, қала және барлық аудандардағы тұрғындардың сайлауға қатысу белсенділігі бойынша қорытынды жасады.Комиссия төрағасының орынбасары Болат Накипов электоралды оқыту нәтижелері мен жаңадан учаскелер құру туралы баяндаса, хатшы Аягөз Сырлыбаева сайлау процесінде хаттамалық мәселелер, байқаушылардың науқан барысында айтқан ұсыныс-пікірлерін саралап берді.Сондай-ақ, жиында қала және аудандық сайлау комиссияларының БАҚ-пен және саяси партиялармен жұмыс жүргізуі, қаржылық аударымдарды уақытылы орындау мәселелері қаралып, сұрақтарға жауап берілді.Комиссия төрағасы Әділбек Ерсұлтанов алдағы уақытта жоспарланған барлық деңгейдегі сайлаулар, оның ішінде аудан әкімдерінің тікелей сайлауын өткізу заң шеңберінде және ашықтық қағидатына сай өткізілуі керек екендігін алға тартты. Сондай-ақ, комиссия мүшелерінің кәсіби біліктілігін арттыруға ерекше басымдық берілетінін тілге тиек етті.Жиын соңында еңбегімен көзге түскен төрағалар мен хатшылар алғыс хаттармен марапатталды.<figure class="image"><img src="https://knadmin.beoblood.kz/uploads/343309666_750958433104642_6012251484262727831_n_7bc34e43d7.jpg" alt="343309666_750958433104642_6012251484262727831_n.jpg"></figure>

Қызылордадағы сайлау комиссияларының жұмысына талдау жасалды

<a href="https://kyzylorda-news.kz/">Kyzylorda-news.kz.</a> Бүгінгі бейбіт күнде Отан алдындағы парызын өтеуге ­жастар аса асыға қоймайды. Мұны жасыруға келмес. Бұрын екі немесе үш жыл әскерде болған әке, ағаларымыз, тіпті, шекара асып кеткен. Бүгінде әскери борыш мерзімі бір-ақ жыл. Оған қоса жат жердің топырағын баспайды да. Қазақстан аумағында қалады. Баяғыдай хат жазып, қиналатын да кез емес.Осы тұста әскерге барудан жалтарып жүрген жастарға жағымды жаңалығымыз бар. Яғни, биылдан бастап азаматтық борышын өтеп келген жастарға жеңілдетілген көмектің бірнеше түрі бар. Жас сарбаз, егерде сен әскерге баратын болсаң, жоғары оқу орнына тегін, анығында ҰБТ тапсырмай-ақ түсуге мүмкіндігің бар. Екінші, әскери борышыңды өтеп келсең, әскери кафедра немесе әскери институттарға түсу тегін. Ал үшіншісі, көпті толғандырған несие мәселесі. Яғни, жас азаматтың несиесін 1 жылға шегеру мүмкіндігі де қарастырылып отыр.Жуырда 19 жасар азамат Досхан Нұрланұлы әскерге барып, Отан алдындағы борышын өтеп келді. Кейіпкерімізге былтыр әскерге шақырту қағазы келеді. Ол сол сәтте, яғни 2022 жылы 20 сәуірде еш ойланбастан азаматтық борышын өтеуге Таразға аттанады. Алдымен оңтүстік өңірлік қолбасшылығы 5-ші Механикаландырылған бригадасының, Меркі аудандық 11971 әскери бөлімінде курсант болып бастайды. Кейін мамыр айының 26-нан бастап Тараз қаласы 85395 әскери бөлімі Артиллериялық дивизионына (қатардағы жауынгер) болып қабылданады. Әскердегі жақсы мінезі мен атқарған жауынгерлік-қызметтік міндетін орындауда жоғары көрсеткіштерге қол жеткізіп, үздіктер қатарынан көрінген Досхан Нұрланұлы аға-маман, аға-көздеуші лауазымына және Ефрейтор атағына қол жеткізеді.Алғашында қиындау болғанын тілге тиек қылған Досхан, әскердегі бір күндік өмірін де баяндап берді.<blockquote>– Таңертең сағат 6:30-да тұрамыз. 20 минут таңғы жаттығу болады. 7:00-ге дейін 10 минут арасында жуынып, орнымызды жинау керек. Одан соң 20 минут таңғы жаңалықтарды тыңдаймыз. Таңғы астан кейін командаға бөлініп, тапсырылған міндеттерді атқарамыз. Бастапқы айларда сапта жүруді үйреніп, ант қабылдауға дайындалдық. Дәрістер алдық. Бір сөзбен айтқанда, темірдей тәртіпке бейімделдік, – дейді ол.</blockquote>Бригада командирі подполковник Ж.Құранбеков Досханның ата-анасына жылы лебізін жолдай отырып, ұлдарын қысқы демалысқа да жіберген.&nbsp;<blockquote>– Өтпейтіндей көрінген бір жылың осылай өте шығады екен. Сонау ХХ ғасырда әскери борышты өтеу мерзімі – 2, тіпті 2,5 жыл болыпты. Оны үлкен әке-ағаларымыздан естіп отыратынбыз. «Сол уақыттың жастары әскерден келісімен отау құрып, шаңырақ болып жеке шығып кететін. Әскерден келген жігіт – абыройлы еді», – деп әкесінің сөзін еске алды жас сарбаз.</blockquote>Жастардың әскер туралы түсінігі әр қилы. Бірі міндетті, енді бірі міндетті емес дейді. Уақытың босқа кетеді дейтіндер де бар. Қару ұстап, жауға шап деп қысап жатқан ешкім жоқ. Ал алда-жалда мұндай жағдай болмасына кім кепіл? Қазақтың түсінігінде жеті қазынаның бірі – ер жігіт, екіншісі – берен мылтық дейді. Ендеше, осы екеуі бірігіп, ел шебін күзетуі керектігі айтпаса да ұғынықты.

Әскери борыш – әркімге парыз

<a href="https://kyzylorda-news.kz/">Kyzylorda-news.kz.</a> Егер жас болсаңыз, кешкілік басқосулар мен тойларға барар алдында айнаға бір қарайтыныңыз анық қой. Әсіресе қыздар қауымы. Тіпті сағаттап сәнденіп, тотыдай таранып отыратын сұлу бикештер үшін сұлулық салондары таңсық дүние емес. Оған сенімдімін. Ауданымызда ондай салондар көп емес. Бүгінде солардың қатарына қосылған «Самал» сұлулық салоны да ашылғанына көп болмағанмен, тұтынушылар талабынан шығып келеді. Самал, Мәншүк, Гүлмира және Жандос есімді қыз-жігіттердің өзара бірлесуі арқасында ашылған бұл салонда шаш қиюдан тырнақ сәндеуге дейінгі жұмыстардың барлығы қамтылған.Халқымызда «Жас келсе – іске» деген қағида бар. Бұл сөздің астарын өзіңіз де бағамдап отырған боларсыз. Бұған дейін әртүрлі салонда еңбек етіп, жылдап тәжірибе жинақтаған жас мамандардың өзара бірігуінің арқасында біз әңгімемізге арқау еткен сұлулық салоны ашылған. Енді сол бірлестік мүшесінің әрбіріне тоқтала кетсек.Самал Жұмағазиева үш жылдан бері осы салада еңбек етіп келеді. Қазіргі таңда сұлулық салонының аты осы Самалдың есімімен аталады. Бүгінде оның қызметі қас жұлу, шаш қию, бет әрлеу сынды жұмыстар. Өзі Ақтөбе қаласындағы «Эпит» салонында оқи жүріп, тәжірибе жинақтаған. Бүгінде өз ісінің маманы деуге болады. Келген әрбір тұтынушыға ерекше ықыласпен қарап, тез тіл табысып кетеді. Бәлкім, өзінің осындай болмысымен басқалардан дараланатын шығар.<blockquote>Біздің бұл салонды ашудағы мақсатымыз – халыққа сапалы қызмет көрсету. Қазір өзіңіз білесіз қызметтің бұл түріне сұраныс ерекше. Қоғамда бәсекелестік орта қалыптасқандықтан, сапалы қызметтің бәсі басқалардан жоғары болу шарт. Сондықтан біз сол талаптан шығуға тырысып келеміз. Әзірге бізге деген тұтынушылардың пікірі жақсы. Соған қарағанда сапалы қызметті ұсынып келе жатырмыз деген ойдамыз. Мүмкіндік болса, алдағы уақытта бұл жұмысымызды бірлесіп кеңейте түсеміз деген ойдамыз, – дейді заңды түрдегі кәсіп иесі Самал Жұмағазиева.</blockquote>Мәншүк Бердіңқұлқызының бұл салада еңбек еткеніне үш жыл. Ол да Ақтөбе қаласындағы «Марофен» оқу орталығында осы салон жұмыстары бойынша дәріс алған. Бүгінде аталған салонда бет әрлеу, шаш қию, қас жұлу сынды жұмыстармен айналысады. Ол да тынымсыз жандар қатарынан. Жұмыста санасу деген түсінікті саналарынан сылып тастаған. Кімнің қолы бос, сол өздеріне тиесілі жұмыстарын мүлтіксіз атқара береді. Қазіргі таңда Мәншүк те өз ісінің маманы. Содан шығар, оны әдейілеп іздеп келушілер де, арнайы шақыртумен үйіне алдыратын тұтынушылары да жоқ емес.Біз жұмыс барысымен аталған салонға кіргенімізде, әлдебір келушінің қолының тырнағын әрлеп жатқан қызметкерді бірден көзіміз шалды. Ішке еніп, салон жөнінде мәлімет сұрай бастағанымызда, жанымыздан тырнақ әрлеуші қызметкер де табылды. Ол өз қызметін әп-сәтте тиянақты орындағанға ұқсайды. Есімі – Гүлмира Бисенова. Бұл іштегі бесаспап мамандардың бірі. Тырнақ әрлеу, шаш қию сынды жұмыстарды мінсіз жасайды. Арнайы білімі де бар. Осы салада қызмет жасап келе жатқанына екі-ақ жыл болса да, көптің алғысын алған. Астана қаласындағы «Алтын әлем» оқу орталығында арнайы білім алып, өзін әр қырынан көрсетіп келеді. Бүгінде үлескер қатарында еңбек етіп, аталған салонның игілігі жолында тер төгуде.Сұлулық салонында тынбай еңбек ететіндердің бірі – Жандос Бимағанбетов. Ұлдардың да, қыздардың шашын қиып, әрлеуде кәнігі маманға айналған Жандос осы салада 10 жылдан бері еңбек етіп келеді. Кімге қандай шаш үлгісі жараса кететінін айтпай-ақ ұғына білетін ол сөздің емес, істің адамы екенін өзінің тынымсыз жұмысымен-ақ байқатты.Тынымсыз еңбек табысқа бөлейтінін әлдеқашан ұғынған мұндағы әріптестер әзірге бұл жолда жемісті жұмыс жасауда. Үнемі көңілді жүретін олар жауапкершілігі мол кәсіпкерлік салада сынала жүріп шыңдалуға бейімделуде. Әрине халықпен жұмыс жасау оңай емес қой. Сонда да әр істің қиюын тауып, жұмысын жандандыруда алда келе жатқан әріптестердің алға қойған мақсаттары айқын. Ол – көкжиегі кеңейген кәсіпкерлік саласында өзіндік орнын айшықтап, сән әлеміне лайықты қолтаңбасын қалдыру.

Кәсіптен берекелі тұрмыс кешкен жандар  

<a href="https://kyzylorda-news.kz/">Kyzylorda-news.kz.</a> Қызылорда облысы полиция департаменті бастығының орынбасары полиция полковнигі &nbsp;Өтегенов Әміржан Сермаханұлы жұмыс сапарымен Сырдария және Жалағаш аудандарында болды.Іссапар кезінде Әміржан Сермаханұлы аудандық полиция бөлімдерінің жеке құрамымен кездесті.Әміржан Сермаханұлының бастамасымен өткізілген жиында бөлім басшылары 2023 жылдың 3 айында атқарылған жұмыстар &nbsp;жөнінде есеп берді. &nbsp;Жалпы, облысымыздың бұл екі ауданында қылмыстық ахуал тұрақты. Жасөспірімдер қылмыстылығының профилактикасы ерекше бақылауда. Кәмелетке толмағандар тарапынан және оларға қатысты заңсыз әрекеттерді болдырмау және оларды ескерту бағытындағы жұмыстар тұрақты түрде жүргізілуде.Кездесу барысында жыл басынан атқарылған жұмыс нәтижесі және жеке құрам арасындағы тәртіп пен заңдылықтың сақталу мәселелері талқыланды.Сонымен қатар, аталмыш кездесу барысында полиция қызметкерлерін әлеуметтік қолдау мәселесі де қозғалды. Облыс әкімінің қолдауымен биылғы жылы полиция қызметкерлерінің жалақысы артты. Жалақысы көтеріліп, жағдайы түзелген қызметкердің жемқорлыққа бармайтыны анық. Кадрлық мәселелер, оның ішінде кезекті еңбек демалысы, шендерді иелену сынды сұрақтардың барлығы электронды форматта қаралатындығы да айтылды. Мұның барлығы полиция қатарында сыбайлас жемқорлық көріністеріне мүлдем төзбеушілік деңгейіне көтерілуге әсер етпек.Бұдан бөлек, аудандардағы жанар-жағармай материалдарының электронды карточкалық жүйеге көшіп, оны дұрыс пайдалану мәселесі де қозғалды. &nbsp;Тұрғын үйге мұқтаж қызметкерлерді қамтамасыз ету мәселесі әрдайым өзекті. Бұл ретте департамент бастығының орынбасары полиция полковнигі &nbsp;Утегенов Амиржан Сермаханұлы мұндай қызметкерлердің тұрғын үй жалдауға арналған төлемдермен қамтамасыз етіліп отырғандығын айтып өтті. Сондай-ақ, полиция қызметкерлерімен Қазақстан Республикасы Еңбек кодексі талаптарының қатаң сақталу қажеттігі де айтылды.&nbsp;Әміржан Сермаханұлы қызметкерлердің ата-аналарымен және жұбайларымен тұрақты кездесулер өткізуі, ардагерлердің тәлімгерлігі полиция қатарында қандай да бір олқылықтардың алдын алатындығын да &nbsp;баса айтты.&nbsp;<blockquote>«Жаңа Қазақстан – жаңа бағыт, жаңа міндет. Оған қол жеткізу үшін әрбір азамат өз саласында сапалы еңбек етуге тиіс. Мәселен, «полиция – халыққа жақын болу қажет» деген қағида күн тәртібінен түспейді. Өзімізге жүктелген үлкен жауапкершілік пен &nbsp;тапсырмаларды жүзеге асыру жолында жоспарлы жұмыстар жүргізудеміз. Осы бағытта полиция қызметкерлері мен қарапайым халықтың арасындағы қарым-қатынасты нығайта беру басты міндеттеріміздің бірі. Полиция үшін ең маңыздысы – ел сенімі. Ішкі істер органдарындағы жаңару жолдары өз жемісін беретіндігіне сеніміміз мол», - деді Әміржан Сермаханұлы.</blockquote>

Қазақстан және Қызылорда облысының жаңалықтары