<a href="https://kyzylorda-news.kz/">Kyzylorda-news.kz.</a> &nbsp;Ақыл таразысына салып, байыптап қарасаңыз, кәсіп істеймін деген адамға мемлекет тарапынан көрсетіліп жатқан көмек аз емес. Бұл орайда тіпті өкпелеудің жөні жоқ. Бір ұтымдысы, өз алдына кәсібін енді бастаймын дегендер қайтарымсыз грантқа ие болса, бұл орайда аз-кем тәжірибе жинақтаған, енді ісін ұлғайтуды көздегендерге шағын несие түрінде қолдау көрсетілуде.Қолыңыздан іс келіп, барды ұқсатамын десеңіз мүмкіндік көп. Кәсіп ашамын деген жанға Мемлекеттік қолдаулар қарастырылған. Тек жоспарыңыз нық болса болғаны. Бүгінде елдің дамуына үлес қосып, кәсібін дөңгелетіп отырғандар ауданымызда көбейіп келеді. Соның бірі – дүр оңғарлық Ерсін Өтепов ауылдан шағын цех ашып, шаруашылыққа қажетті әрі сұранысқа ие құрылыс материалын шығаруда.«Бастау бизнес» жобасы бойынша кәсіпкерлікті оқып, «Қызылорда өңірлік инвестициялық орталық» арқылы жас кәсіпкер 5 млн теңге несие алған. Істі бастау үшін қаражатқа Қытайдан өзі өндіріске қажетті құрал-жабдықтарын сатып алып, әрі сол жақтан құрылғының тілін үйреніп келген. Ерсіннің арғы аталары елге танымал белгілі ұста болыпты. Өзі де сол өнерден алыс емес. Қанмен келген қасиеттің арқасында кәсіпті тез игеріп, жұмысын бастап кеткен.<blockquote>«Жасымнан темір құралдарға жақын өстім. Сым, темірден бұйым жасап, ойыма келгенді ұйқастырып шығаратынмын. Кейін осы өнер кәсіп бастауыма себепші болды. Біз көбіне сырттан келетін дайын өнімге үйреніп қалғанбыз. Байқасаңыз елімізде өндіріс саласы аз. Осыдан кейін неге өзімізден цех ашып, қажетті құрылыс құралдарын шығармасқа деген ой келді. Сөйтіп осы саланы жан-жақты зерттеп, қоршауға арналған тор мен тікен сым және шеге шығаратын өндірісті қолға алдым. Өйткені ауылдағы шаруашылыққа мұндай материалдар керек-ақ. Одан бөлек ауласын белгілеп, айналасын қоршаймын дегендерге таптырмас құрал. Ал шегенің қажеті қашанда жоғары», – дейді жас кәсіпкер.</blockquote>Бүгінде Ерсіннің қолға алған ісінің аяқалысы жаман емес. Қондырғысы бір сағатта тікен сымның 70-80 метрін шығарса, тор қоршаудан 60-70 метр тоқып, дайындап береді. Бастапқыда өндіріске қажетті шикізатты Қытай мен Ресейден алдыртуға тырысыпты. Алайда қазіргі саяси ахуалға байланысты қажетті сымды Алматыдан алдыртып отыр. Кәсіпкердің цехынан шыққан өнімге тұтынушылар оң бағасын беріп те қойған. Өзге аудандардан жиі тапсырыс түсіп, істің тоқтап қалмай әрі қарай дамуына сеп болуда.

Дүроңғарлық жігіт ерекше кәсіпті игеріп отыр

<a href="https://kyzylorda-news.kz/">Kyzylorda-news.kz.</a> Қызылорда қаласы бойынша білім бөлімінің ұйымдастыруымен «Абай» атындағы үш тілде оқытатын дарынды балаларға арналған мамандандырылған сыныптары бар мектеп базасында ағылшын тілі пәні мұғалімдердің қатысуымен «Continuing professional development of teachers will change lives» («Мұғалімдердің үздіксіз кәсіби дамуы өмірді өзгертеді») тақырыбында облыстық семинар өтті.Семинарға қалалық білім бөлімінің әдіскері Ғалия Ермағанбетқызы және ағылшын тілі пәні мұғалімдері қатысты.&nbsp;Шараның мақсаты &nbsp;білім беру ұйымдарының арасындағы әріптестік қатынастарды дамыта отырып, тәжірибе алмасуда жаңашылдықты қалыптастыру, педагогтердің кәсіби құзыреттілігін дамыту, кәсіби тәжірибені жаңарту, жаңалықтарды қабылдау мен меңгерту.&nbsp;Семинар барысында спикерлер кезекпен ортаға шығып, өз тәжірибелерімен бөлісті.Ең алдымен «Үздік педагог бағдарламасымен» Ә.Мүслимов атындағы №101 мектеп-лицейінің ағылшын тілі пәні мұғалімі Д.Садырбаева “My way of making my dream come true” тақырыбында семинар өтті.Одан әрі С.Толыбаев атындағы атындағы №3 мектеп-лицейінің ағылшын тілі пәні мұғалімдері М.Ердібек пен Б.Мнажев «Болашақ» бағдарламасы турасында айтты.&nbsp;Сонымен қатар «Fulbright tea» бағдарламасы бойынша Т.Есетов атындағы №264 мектеп-лицейінің ағылшын тілі пәні мұғалімі А.Амангелді өз ойын ортаға салды.Сондай-ақ «Ағылшын тілін оңай үйрену лайфхактары» тақырыбында №144 мектептің &nbsp;ағылшын тілі пәні мұғалімі Ұ.Рысмағамбет өз тәжірибесімен бөлісті.Облыстық семинар барысында «IELTS» тест орталығының ашылу салтанатымен жалғасын тапты, тест орталығының жұмыс барысы таныстырылды. Семинар соңында мұғалімдер семинардан алған әсерлерімен бөлісті.&nbsp;Облыстық оқу орталығының әдіскері Сәуле Асылбекқызы және қалалық білім бөлімінің әдіскері Ғалия Ермағанбетқызы сөз алып, семинарды жоғары дәрежеде бағалады. Жас мұғалімдерге сәттілік тілеп, озық ұстаздардың жұмыстарын дәріптеп, бүгінгі семинарда іс-тәжірибелерімен бөліскен мұғалімдерді сертификаттармен марапаттап өтті.

Қызылордада «IELTS» тест орталығы ашылды

<a href="https://kyzylorda-news.kz/">Kyzylorda-news.kz.</a> Бүгін Қызылорда облыстық білім басқармасының басшысы Мейрамбек Шермағанбет жалпы білім беретін пәндер бойынша республикалық олимпиаданың қоғамдық-гуманитарлық бағыты бойынша IV кезеңінің өткізілу барысымен танысты. Бұл туралы облыстық білім басқармасының баспасөз қызметі хабарлады. &nbsp;«Дарын» орталығының базасында өтіп жатқан білім бәйгесіне Қызылорда облысынан 7 пән бойынша 29 оқушы қатысып, бақ сынауда.Басқарма басшысы тестілеу жұмысымен танысып, оқушыларға сәттілік тіледі.<blockquote>«Тестілеудің өткізілуі мен адалдықты қамтамасыз ету, бақылау мақсатында бүгін ҚР ОАМ Балалардың құқықтарын қорғау комитетінен, республикалық «Дарын» орталығынан, білім саласындағы сапаны бақылау департаментінен және ата-аналар комитетінің өкілдері қатысуда. Облыстық кезеңнен оқ бойы оза шауып, республикада аймақ абыройын қорғап жатқан оқушыларымыз жеңімпаз атанады деген сенімдемін. Баршаңызға сәттілік тілеймін», - деді Мейрамбек Зинабдинұлы.</blockquote>Айта кетейік, білім бәсекесі 13-18 ақпан күндері аралығында өтеді. Олимпиаданың өткізілу барысын төмендегі сілтеме арқылы көре аласыздар.1. <a href="https://youtube.com/live/d798NeyJruo?feature=share&amp;fbclid=IwAR0aIubYIAfdsQt6hwZRcPDzN559WctJXMOe7h8_4WZxXcA2EyNSXmSs1r8">https://youtube.com/live/d798NeyJruo?feature=share</a>2. <a href="https://l.facebook.com/l.php?u=https%3A%2F%2Fyoutube.com%2Flive%2F9kc0mpxXtwQ%3Ffeature%3Dshare%26fbclid%3DIwAR20pDYpD9470MvAbV2lLY79oZrO6it2bOQUQGd2WyJnPiQO46S5dq_kli8&amp;h=AT0gpx2X2b4acTMtkeGTF1AIW5QtHK3wVeJi31MRM98NaTB_1jciCCHfpBbep2Z9nlBJKo12eC0QWpKGKTlkTxkk-Sl6OTNwSFTbTmXHlUljTnMoMCsGE_gQlkoy9WTQsIRO&amp;__tn__=-UK-R&amp;c[0]=AT0PXZ5moKegNxHZ1DcKGx9G7U4rvGPWaNonC9Wo3Iq1eH8DXO08hcahQGaSXHeD5eitQoSr3pIl6B_45f6l87jXUWvcYY1s8Tf6WLg-NdPFunxNpxDw4DDpQMOiOpWhjlrh8by0NWCH8uWSMP_ueXWjiwSxM4B1aRlW9pizxq1Lck_zisMUZw3Veg">https://youtube.com/live/9kc0mpxXtwQ?feature=share</a>3. <a href="https://youtube.com/live/Js5AmPSCr9M?feature=share">https://youtube.com/live/Js5AmPSCr9M?feature=share</a><figure class="image"><img src="https://knadmin.beoblood.kz/uploads/337557792_3558508581097899_4583804090864186230_n_8beb66addd.jpg" alt="337557792_3558508581097899_4583804090864186230_n.jpg"></figure>

Басқарма басшысы республикалық олимпиадаға қатысушыларға сәттілік тіледі

<a href="https://kyzylorda-news.kz/">Kyzylorda-news.kz.</a>&nbsp; Арал ауданның оң имиджін қалыптастыруға айтарлықтай үлес қосып жүрген салалардың бірі Арал аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі. Аталған мекеменің &nbsp;басшысы Ғалия Тоғысқызымен сұхбаттасып, мекеменің жұмысынан жан-жақты мағлұмат алған едік.&nbsp;–Әр жылдың өз салмағы, жемісі, міндеті бар.Ендеше, үстіміздегі жылы, яғни, 2023 жылы халықты жұмыспен қамту барысын атап өтсеңіз…–2023 жылдың 1 сәуіріне жұмыспен қамту орталығына жұмыс іздеуші ретінде хабарласқандар саны – 2222 адам. Тұрақты және уақытша жұмысқа орналасқандар саны – 239 адам. Жылбасынанқоғамдықжұмыстарға 710 адам тартылды. 248 жаңа тұрақты жұмыс орны ашылды. Жыл басынан хабарласқан мүгедектігі бар адамдар саны – 123. Олардан тұрақты жұмысқа орналасқандары – 12 адам, қоғамдық жұмысқа жіберілгені – 28, жастар практикасына – 2 адам. Бастау бизнеске 42 адам оқуда. Есепті кезеңнің аяғына жұмыссыздар саны – 111 адам. Жыл басынан 3 рет бос жұмыс орындарының жәрмеңкесі өткізілді. 16 мекемеден 69 бос жұмыс орны ұсынылды. Өткізілген жәрмеңкеге барлығы 341 адам қатысты. Оның ішінде 38 адам тұрақты жұмысқа, 17 адам қоғамдық жұмыстарға жолданды. 2023 жылдың наурыз айына тіркелгенжұмыссыздықдеңгейі 5,0 пайыздықұрады.–2021-2025 жылдарға арналған кәсіпкерлікті дамыту жөніндегі ұлттық жобасының биылғы өзгерістеріне байланысты сөз сабақтай кетсеңіз…– 2022 жылы «Күміс жас» жобасы бойынша жұмыссыздарды зейнетке шығуға дейін жұмыспен қамту ұзақтығы: 12 айдан артық емес, ай сайынғы субсидия мөлшері жалақы мөлшерінің 50%-ын құрайды, бірақ 30 (отыз) АЕК-тен аспайтын болса, 2023 жылға өзгеріске сәйкес, 50 жастан асқан жұмыссыз адамдар «Күміс жас» жобасына қатысушылары болып табылады. Ұзақтығы – 36 ай. Жалақы: ай сайынғы жалақысының субсидия мөлшері: қатысудың бірінші 12 айында 70 %-ын құрайды, бірақ 30 (отыз) АЕК-тен (103 500 тг. ) аспайды.Қатысудың 13 айынан бастап 24 айына дейін 65%-ын құрайды, бірақ 30 (отыз) АЕК-тен аспайды. Қатысудың 25 айынан бастап 36 айына дейін 60 %-ын құрайды, бірақ 30 (отыз) АЕК-тен аспайды.–Аты айтып тұрғандай, өзіңіз жетекшілік ететін сала бұқарамен тікелей байланысты.Содан да шығар, әлеуметтік төлемдер сіздің қызметкерлеріңіз арқылы жүргізіледі. Олай болса, биылғы жылғы ерекшеліктерді жеткізсеңіз…– 2023 жылдың І тоқсанында Мемлекеттік атаулы әлеуметтік көмекке 234 отбасына (1397 отбасы мүшелеріне) 34749,9 мың теңге тағайындалып, төленді.Атаулы әлеуметтік көмек алушылардың 1-6 жасқа дейінгі балаларына 2022 жылы азық-түлік, гигиеналық құралдар берілетін болса, ағымдағы жылдың қаңтар айынан 1,5 айлық есептік көрсеткіш мөлшерінде қаржылай төленетін болды. Яғни 1 (бір) балаға 5 175 теңгеден. Атаулы әлеуметтік көмек алушылардың ішіндегі жұмысқа жарамды мүшелерін белсенді шараларға тарту барысында 6 адам тұрақты жұмысқа, 23 адам ақылы қоғамдық жұмысқа және 1 адам әлеуметтік жұмысқа жолданды. Сондай-ақ 9 мамыр – Жеңіс күні және 16 желтоқсан – Тәуелсіздік күні мерекелері қарсаңында төленетін біржолғы әлеуметтік көмектер 40 айлық есептік көрсеткішке (1 адамға 138 000 теңге) көбейту үшін қолданыстағы аудандық мәслихаттың шешіміне өзгерістер енгізіліп, келісім алу үшін Қызылорда облыстық Әділет департаментіне жолданды. Осы аталған шешімге өзгеріс енген жағдайда, қосымша бюджеттен қаржы сұратылып, төленетін болады.–Мүгедектігі бар адамдардың оңалту бағдарламасы бойынша қандай жұмыстар жалғасты немесе нендей істер қолға алынды? Осы туралы білсек…–2023 жылдың І тоқсанында 255 жүріп-тұруы қиын І топ мүгедектігі бар адамдарға 255 жеке көмекші қызмет жасады, жеке көмекшілердің қызметіне 64679,9 мың теңге төленді. 29 тіл-құлақ кемістігі бар мүгедектігі бар адамдарға 5 ымдау тілі маманы қызмет көрсетті, ымдау тілі мамандарына 2155,8 мың теңге төленді.Гигиеналыққұралдарғабүгінгітаңға 325 мүгедектігі бар адамдардың гигиеналық құралдарға әлеуметтік қызметтер порталы арқылы берілген тапсырыстары бойынша 53754,0 мың теңгесі төленіп, гигиеналық құралдары үйлеріне жеткізілді.Мүгедектігі бар адамдардың оңалту бағдарламасына сәйкес: протездік-ортопедиялық көмек– 59 адамға;тифлотехникалыққұралдар– 96 адамға; сурдотехникалық құралдар – 7 адамға; жүріп-тұру құралдары – 21 адамға; санаторлы-курорттық ем 3 адамға Қызылорда қаласында орналасқан «Талсуат-мүгедектерді оңалту орталығына» ем алуға 17 мүгедектігі бар адам, 1 қарт жолданды.Мемлекеттік әлеуметтік тапсырыспен «Арал ауданы мүгедектер ұйымы қоғамдық бірлестігі» 18 жасқа дейінгімүмкіндігі шектеулі 25 балағакүндіз болу бөлімшесі бойынша жартылай стационар жағдайында қызмет көрсетеді. Қызылорда қаласында орналасқан №2 арнаулы әлеуметтік қызметтер көрсету орталығына мүгедектігі бар 6 адам, №1 Қызылорда арнаулы әлеуметтік қызметтер көрсету орталығына 1 жалғызбасты қарт жолданды. Сонымен қатар мүгедектерді тасымалдау (инватакси) қызметін ұйымдастыруға 2000,0 мың теңгесі төленді. Мемлекеттік әлеуметтік тапсырыс арқылы «Арал қаласы бойынша мүмкіндіктері шектеулі мүгедектерді қорғау және қолдау» қоғамдық бірлестігімен келісім шарт жасалып, олардан 3 автокөлікпен 28 мүгедектігі бар адамдарды тасымалдады. Үйден әлеуметтік қызмет көрсету бойынша аудан бойынша 109 мүгедектігі бар балаларға 32 әлеуметтік қызметкер, 92 жалғызілікті қарттар мен мүгедектігі бар адамдарға 18 әлеуметтік қызметкер қызмет көрсетеді.–Қазіргі таңда мемлекет мүгедек жандарға барынша қолдау көрсетіп келе жатқанын білеміз. Қуанамыз, жақсылыққа балаймыз. Өйткені, Ата Заңымызда тайға таңба басқандай адам басты байлығымыз саналады. Олай болса, тағдыр тауқыметін тартып, мүгедектік статусты алған жанға берілетін жәрдемақыдағы өзгерістерді баяндай кетсеңіз…– Алдағы уақытта мүгедектігі бар адамға қызмет көрсеткен отбасы мүшесіне жалақы төленетін болады. Бұл ретте отбасы мүшесі жеке көмекші немесе әлеуметтік қызметкер ретінде ресімделеді. Бұл жұмысқа еңбекақы төленеді және әлеуметтік төлемдер, зейнетақы жарналары аударылады. Осылайша, отбасының еңбек жасындағы жұмыссыз мүшелері қызметке орналасады. Сөйтіп, әлеуметтік тәуекел туындаған жағдайда әлеуметтік қамсыздандыру шараларымен толық қамтылады.–Әлеуметтік саладағы оң өзгерістің бірқатарынан құлағдар болып, көңіл көншітерлік істердің бастау алғанына қуанып отырғанымды жасыра алмаймын. Бұл мемлекеттің халыққа жасаған ұдайы қамқорлығының жемісі. Енді сізден сұрарымалдағы бағыттарыңыз бен жоспарларыңыз жайында ой бөліссеңіз…– Мүгедектігі бар адамдарға әзірленген оңалтудың жеке бағдарламаларын 100 пайыз орындау; 2023 жылға аудан бойынша мүгедектігі бар адамдар үшін 32 инфрақұрылым объектісінің бейімдеу жұмыстарын жыл аяғына дейін толық аяқтау; аудан әкімінің қолдауымен бөлімге қарасты Арал аудандық отбасын қолдау орталығына жұмыстарын жүргізілуде. Бұл орталықтың негізігі атқаратын қызметтері: қолайсыз, өмірлік қиын жағдайда немесе оның туындау қатері аймағында жүрген адамдарды анықтау және оларға әлеуметтік-тұрмыстық, әлеуметтік-медициналық, әлеуметтік-психологиялық көмек алуға жәрдем көрсету;балалар мен балалы отбасыларды өмірлік қиын жағдайда әлеуметтік оңалту мен бейімдеудің жеке бағдарламаларын әзірлеуге және оны іске асыруға қатысады;өз құзыреті шегінде тұрмыстық зорлық-зомбылық профилактикасы бойынша жұмыстарға қатысады; мүгедектігі бар адамдарға және олардың отбасы мүшелеріне, осал топтағы азаматтардың жеке қабілеттері, дағдылары ескеріліп, жұмыс іздеулері мен жұмысқа орналасуларына ықпал ету Мемлекеттік қызметтер және басқа қызметтер түрлерін алу үшін құжаттарын рәсімдеу бойынша көмектер беру болып табылады.&nbsp;

Аралдағы әлеуметтік салада серпімді жұмыс бар

<a href="https://kyzylorda-news.kz/">Kyzylorda-news.kz.</a> &nbsp;Маңызы бар әрі үлкен жауапкершілікті қажет ететін саланың бірі әлеуметтік сала. Өйткені әлеуметтік сала тікелей халықпен жұмыс істейді. Сондықтан да әлеуметтің әлеуетінің деңгейі аталған саланың жұмысына көрсетілетін баға болмақ. Кез келген мемлекеттің дамуы, қаншалықты өркениетке қадам басқаны да халқының тұрмысымен өлшенеді. Халқы кедей бола тұра, жұмыссыз бола тұра ешқандай елдің экономикасы да, әлеуметтік жағдайы да алға жылжымайды. Иә, елдегі басты мәселелердің бірі жұмыссыздық деңгейін төмендету.&nbsp;Бүгінгі күні Жалағаш ауданы бойынша экономикалық белсенді халық саны 14 947 болса, өткен жылы оның жұмыспен қамтылғаны 14 192-ні көрсетті. &nbsp;Оның ішінде жалдамалы қызметкерлер 9 372, өз бетінше жұмыспен қамтылған халық 4 820, жұмыссыздар саны 755-ті құрады. Дегенмен саланың жұмысын жоққа шығара алмаймыз, былтырғы жылы әжептәуір жаңа жұмыс орындары ашылып, тұрғындардың тұрақты жұмысқа орналасуына септігін тигізді. Мәселен, өткен жылы екі жарым мыңға жуық жаңа жұмыс орны ашылып, мың үш жүзден аса тұрақты орын, мыңнан аса уақытша орын ұсынылған. Орталыққа хабарласып, екі қолға бір күрек сұраған үш жарым мыңға жуық жанның тең жартысы бағдарламаға қатысушылар тізіміне енген.&nbsp;Әсіресе жастар арасындағы жұмыссыздықты бір жолға қою күн тәртібінде тұр. Әрине бұл тұста мемлекет қол қусырып отыр дей алмаймыз. Халық арасындағы жұмыссыздықты азайту, қазақстандықтардың әл-ауқатын арттыру, әлеуметтік жағдайды реттеу бағытында түрлі бағдарламалар жұмыс істеп тұр. Қайтарымсыз грант, төмен пайыздағы несиелер шағын және орта кәсіппен айналысамын деушілерге қолдау болса, мемлекеттік мекемелерден өтетін жастар тәжірибесі, алғашқы жұмыс орны сынды жобалар жастардың сағын сындырмай тұр.&nbsp;Былтыр желтоқсан айына дейін жастар арасында жұмыссыздықты төмендету мақсатында бірқатар жұмыс атқарылған. Мәселен, жыл басынан бері халықты жұмыспен қамту орталығына 1 500-ден аса жас жұмыс іздеуші ретінде тіркелсе, оның 905-і жұмыспен қамтудың белсенді шараларымен қамтылды. Әлеуметтік жұмыс орындарына 38, жастар практикасымен 201, қоғамдық жұмысқа 200-ден аса, ұрпақтар келісімімен 5, алғашқы жұмыс орнымен 18 жас жіберілген. Жаңа бизнес-идеяларды іске асыруға арналған мемлекеттік грантты 300 адамға беру жоспарланса, жоспар жүз пайызға орындалып, 300 адам мемлекеттік грантқа қол жеткізді. Ал қысқа мерзімді оқумен 29 адам қамтылса, мемлекеттік қолдау шараларынсыз 800-дей адам жұмысқа орналасса, оның 290-ы тұрақты жұмысқа тартылған жас мамандар болып табылады. NEET санатындағы жұмыссыз жастардың санын азайту мақсатында да жастар практикасына биылдан бастап қатысушылардың жалақысы 76 575 теңгеден 91 890 теңгеге дейін ұлғайса, бұл шараға шектеулі жасқа толмаған, соңғы 3 жылда жоғары және арнаулы орта оқу орындарын бітірген және еңбек өтілі жоқ түлектер қатыса алады.&nbsp;Сонымен бірге ақылы қоғамдық жұмыс орындарына былтырғы жылы 980 адам жолданып, жоспар 181,5 пайызға орындалған екен. Оның ішінде 126 адам тұрақты жұмысқа орналасыпты. Алғашқы жұмыс орындарына жоспар 12 адам болса, іс жүзінде 18 адам жолданып, бұл жоба бойынша да жоспар артығымен орындалған.«Ұрпақтар келісім-шарты» жобасына да 2 жыл ішінде оқуын аяқтаған және шекті жасқа толмаған білім беру ұйымдары түлектері қатыса алады екен. Аталған жоба шеңберінде жұмысқа орналасқан адамға зейнеткерлік жасқа жетуге кемінде 6 ай қалған тәлімгер тағайындалады. Жалақы көлемі 61 260 теңгеден 91 890 теңгеге дейін артқан, қатысу мерзімі де тиісінше 6 айға дейін. Жұмыс беруші жобаға қатысу мерзімі аяқталғаннан кейін жұмыссызды Еңбек кодексінің 38 бабына сәйкес, тәлімгердің бос жұмыс орнына немесе басқа бос орынға ауыстыруға міндетті. Жоғарыда аталған субсидияланатын жұмыс орындар уақытша сипатта болады және бұл орындарға орналасқан адамның еңбек қызметінің кезеңі оның еңбек өтіліне есептеледі. Орталықтың мәліметінше, өткен жылы аталған жобамен ауданда 5 адам жолданып, жоспар 100 пайызға орындалған.Айта кетейік, 2018 жылдан бастап &nbsp;жұмыс берушілерге Электрондық еңбек биржасы арқылы жұмыссыздарды таңдау құқығы берілді. Ауданда бос жұмыс орындары туралы мәліметтер электронды еңбек биржасы ақпараттық жүйесі арқылы қолжетімді түрде ұсынылады. Ал болжанатын жұмыс орындары туралы мәліметтер «Жұмыс орындарын құрудың интеграциялық картасы» ақпараттық жүйесі арқылы қалыптастырылады.

Жалағаш: Бір жылда 905 жас жұмыспен қамтылды

<a href="https://kyzylorda-news.kz/">Kyzylorda-news.kz.</a> Жалағаш ауданындағы 124 орта мектептің мұғалімі Зухра Тоқшылықованың білім саласында 25 жылға жуық тәжірибесі бар. Ол – бүгінде аудандағы білікті педагогтарының бірі де бірегейі. Ұзақ жыл ұстаздық қызмет атқарған ол ауыл мектебінде еңбек жолын бастап, бүгінде әлі де сол білім ошағында бәсекеге қабілетті ұрпақ қалыптастыруға үлкен үлес қосуда. Нәтижесін һәм жетістігін тарқатсақ, жазатын дүние көп. Бастысы, шәкірт тәрбиелеп, бәсекеге қабілетті ұрпақ қалыптастыруда еткен еңбегі еш кетпеген.Жиырма үш жылда білікті педагог екі сыныпқа жетекшілік еткен. Сынып жетекшісінің айтқан ақылы мен берген тәлімінің жемісі болса керек, қазіргі таңда Зухра апай жетекшілік еткен оқушылардың басым бөлігі түрлі салада қажырлы еңбек етсе, бірқатары әлі де жоғары оқу орындарында мемлекеттік грантпен білім алып жатыр екен.&nbsp;«Шәкірттеріміз қандай жетістікке жетсе де, біз еңбегіміздің еш кетпегенін біліп марқаямыз» деген Зухра Досымқызының әрбір оқушының тәлім-тәрбиесіне өзінің баласындай қарайтынын айқын аңғардық. Мектеп директорымен сұхбаттасқанымызда озат 3 оқушының шәкіртақы алатынын айтқан. Соның екеуі бүгінде Зухра апай жетекшілік ететін сыныпта оқиды екен.&nbsp;– Баламен тек мұғалім болып жұмыс жасайтын уақыт артта қалды. Кейде олардың ата-анасындай сөйлесіп, пікіріне құлақ асуға тура келеді. Кез келген баланың шамшырағын жағуға болады. Оқымайтын бала болмайды. Ондай балалар қадағалаудың, еркін пікір алмасудың кемдігінен қалыптасады. Осыған дейін қаншама балаға білім беріп, еңбек өтілімізде біраз тәжірибе жинадық. Соның барлығын енді оқушыларымыздың болашағына жұмсап жатырмыз. «Бала жаман болса, ата-анасын түйе үстінен ит қабады» деген сөз бар. Мен үшін бұл тек ата-анаға қаратып айтылған сөз емес. Біз де оқушы тәрбиелеп отырғаннан кейін олардың болашағына ата-анасындай қараймыз. Сондықтан оларға жаман сөз келмеуі үшін мейлінше біліммен қатар тәлім-тәрбие де береміз, – дейді мектеп мұғалімі.Зухра Досымқызы – бүгінде Есет батыр ауылындағы мектепте 6 сыныптың жетекшісі. Қазақ тілі мен әдебиет пәнінен сабақ береді. Мақалдатып, сөзді орнымен қолданатынына қарап, оның қай пәннің мұғалімі екенін аңғару қиын емес. Барлық баладан озат оқушы қалыптастыруды дәстүрге айналдырған ұлағатты ұстаздың өз мамандығына, жұмысына адалдығы көрініп-ақ тұр.Зухра Досымқызының 23 жылдық еңбек өтілінде ауылдағы алтын ұядан түлеген 11 оқушы қазақ тілі мен әдебиеті пәнінің мұғалімі болуға талап қылыпты. Олардың да ұлағатты ұстаздан алған білімі еш кеткен жоқ. Қазіргі таңда олардың басым бөлігі мемлекеттің дамуына қажырлы еңбек етуде. Былтыр Аламесектегі №124 орта мектептің 2 түлегі тағы да қазақ тілі мен әдебиеті пәнін таңдаған. Қазіргі таңда олардың мектеп қабырғасында жүріп-ақ түрлі деңгейдегі олимпиадалық жарыстарда жеткен жетістігін айтып тауыса алмайсыз. Тіпті бір оқушысы 4 жыл қатарынан олимпиадаға қатысып, барлығында жүлделі орындардан бой көрсетіпті. Сондай-ақ ол былтыр Түркістан облысындағы Қожа Ахмет атындағы халықаралық қазақ-түрік университетінің ішкі грантын жеңіп алған. Алайда мектеп оқушысы Қарақат Аманкелді оған тоқмейілсімей, ҰБТ-ға қатысуға бел буған. Ұлттық бірыңғай тестілеудің қорытындысымен Қарағандыдағы мемлекеттік университетке мемлекеттік грантпен оқуға түсіпті. Бір емес, екі грантты қатар жеңіп алатын шәкіртті кез келген мұғалім дайындай алмайтыны тағы да анық. Осы ретте оның біліктілігіне, жаңа жоғарыда айтқандай, барлық оқушыға өз баласындай қарайтынына күмәнмен келтіре алмайсыз.&nbsp;– Барлық оқушымның болашағынан үлкен үміт күтемін. Жаңа айтып кеткен шәкіртім Қарақат Аманкелдінің өзі мектеп қабырғасында жүріп, қаншама жетістікке жетті. Қазіргі таңда мемлекеттік университетте грантпен білім алып жатқан қызымыз бір жағынан сондағы кітпханалардың бірінде жұмыс жасап жатыр. Жұмыспен оқуды қатар алып жүргенін мен оның үлкен ізденісімен байланыстырамын. Тағы бір шәкіртім Көкшетау қаласындағы мемлекеттік университетте былтыр грантпен оқуға түсті. Оның да жетістігі көп. Осындай балаларымызға қарап, қуанамыз, еткен еңбегіміздің ақталғанына марқаямыз, бірақ тоқмейілсу – өзіме жат әдет, – дейді Зухра Досымқызы.Зухра Тоқшылықованың тоқмейілсімейтініне біз де толық көз жеткіздік. «Қайтсем, шәкірттерім қалаған мамандығын игеріп, мына қоғамға, мемлекеттің дамуына өз үлесін қосады?» деген сауалды ол өзіне күн сайын қояды. Ал жауабын еңбекпен табатынына, әр жылдары мектеп бітірген, білім ошағындағы шәкірттерінің жетістігінен шабыт алатынын тағы байқадық. Кейіпкеріміздің &nbsp;расында бір салада тапжылмай 23 жыл еткен еңбегі еш кетпеген. Мәртебелі мұғалімнің осыған дейінгі қажырлы еңбегі мемлекет тарапынан да лайықты бағаланды. Қазір оның алған алғыс хаттарын, дипломдарын да айтар болсақ, тағы да жазатын дүние көп. Бастысы, білікті мұғалімнің оның барлығына лайық екеніне күмәніміз жоқ.

Оқушылары озат ұлағатты ұстаз

<a href="https://kyzylorda-news.kz/">Kyzylorda-news.kz.</a> &nbsp; Сырдария ауданында жол саласының жұмыстарына аудандық тұрғын үй-коммуналдық шаруашылық, жолаушылар көлігі және автомобиль жолдары бөлімі жауапты болып табылады. Жыл сайын аудан көлемінде халыққа жақсы жағдай жасау үшін жол жөндеу жұмыстары жоспарлы жүргізіліп келеді.Жуырда аудан әкімі Берік Сәрменбаевпен бірге аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Нұржан Бисембаев Тереңөзек кентінде атқарылып жатқан жұмыстарды көрген болатын. Бүгінгі таңда аудан орталығында Д.Қонаев көшесі бойында жөндеу жұмысы жасалуда. Бұл жұмыстарды «Айзон» мердігер мекемесі атқаруда. Жоба бойынша аталған көшенің А.Әлиакбаров көшесінен Н.Ілиясов көшесіне дейінгі аралық, яғни 1,32 шақырым автомобиль жолына асфальт қабаттары төселетіндігін айта кетейін.Аудан басшысы қазіргі кездегі көше жолының екі жиегіне жол жиек тастарын орнату жұмыстарын көріп, мердігер мекеме өкілімен тілдесті. Мердігер мекеме басшысына атқарылып жатқан жұмыстардың сапалы әрі уақытылы жүргізілу керектігін жеткізді. Сондай-ақ бөлім мамандарына жұмыстардың сапалы атқарылуын тұрақты бақылауда ұстау керектігін назарға салды.Көше жұмыстары барасында бөлім басшысы Н.Бисембаев аудан әкіміне жол жөндеу саласында биыл атқарылатын жұмыстарды атап көрсеткен болатын.<blockquote>2023 жылдың 1 қаңтарына аудандық маңызы бар автомобиль жолдарының жақсы және қанағаттанарлық жағдайы 98 пайызды құрады. Биыл «Қызылорда-Қоғалыкөл-Шіркейлі» автожолының 5 шақырымына орташа жөндеу жұмыстары жүргізілетін болады. Жоба іске асқан жағдайда аудандық маңызы бар автомобиль жолдарының жақсы және қанағаттанарлық жағдайы 99 пайызды құрамақ. Биыл аудан бойынша жол саласына 29 жобаға 1 млрд теңге қаржы бөлінді. Соған орай 29,8 шақырым автомобиль жолдары жөнделеді. Оның қатарында Тереңөзек кенті және елді мекендер бойынша 24 шақырым, аудандық маңызы бар автомобиль жолдары бойынша 5,8 шақырым жол жөндеуден өтетіндігін ескертейік. Биыл Тереңөзек кентінде 12 көшеге орташа жөндеу жұмыстарын жүргізу жоспарланды. Атап айтқанда, Қ.Бөдеев, Ә.Тоқмағамбетов, Ә.Тәжібаев, А.Әлиакбаров, Айтбай арық, Д.Қонаев, Б.Момышұлы 1,2,3,4,5,6 көшесін жөндеуге мердігер мекемелер анықталып, тиісті жұмыстар жасалуда. Ал А.Тоқмағамбетов 2,4,5,6, Б.Өтепов, С.Усабаев, Ә.Найзабаев, Т.Қозыбаев көшелері бойынша мемлекеттік сатып алу жұмыстары жүргізілуде, – деді Н.Бисембаев.</blockquote>Айта кетейік, ауданға қарасты елді мекендерде жалпы ұзындығы 234,31 шақырымды құрайтын 223 көше бар. Асфальтты жол 170,80, қиыршық тасты жол 34,18, топырақты жол 29,33 шақырымды құрайды. Елді мекендер көшелері бойынша автомобиль жолдарының жақсы және қанағаттанарлық жағдайы – 66,5 пайызды құрайды.<blockquote>Негізінен, аудан әлеуетін арттыру мақсатында тың жобалар жүзеге асырылып жатқандығын көзімізбен көріп жүрміз. Тереңөзек кентінің көшелері жөндеуден өткізілсе дән риазамыз. Жолымыз тақтайдай тегіс болғаны жолдағы қозғалысты реттейтіні жасырын емес. Бұрыннан келе жатқан, тозығы жеткен жолдар жөнделсе, кент көшелерінің келбеті келісті болмақ. Біз сырттан келген ағайын-туысымызға ауданның көркейту-көгалдандыру жұмыстары жасалатындығын, тұрақты түрде жолдар жөнделетінің жарыса айтамыз, – дейді кент тұрғыны Аябек Сардарбеков.&nbsp; &nbsp;</blockquote>

Сырдарияда жол жөндеу жұмыстары қарқын алуда

<a href="https://kyzylorda-news.kz/">Kyzylorda-news.kz.</a> Қазақ әдебиетінің көрнекті өкілі, халқымыздың руханиятын жаңа сапалы биікке көтеруге мол үлес қосып, артына елеулі қазына қалдырған қаламгер, жазушы, ақын, аудармашы Қалмақан Әбдіқадыровтың туғанына биыл 120 жыл толды.Тумысынан тұлғасы бөлек, өлең жырға деген құштарлығы ерекше әдебиеттің асқары іспеттес тұлғаның өмірі де, өзі де дара, дана. Алғашқы еңбек жолын «Еңбекші қазақ» газеті редакциясынан бастаған ақын тұңғыш өлеңін 1925 жылы осы газет бетіне жариялайды. Жүрек түбіндегі жырға деген іңкәрліктің оянуына да аталмыш газет редакциясы сеп болады. Жалынды жырларын жиып, тұңғыш өлеңдер жинағын «Жалшы» деген атаумен 1928 жылы басып шығарады.Сонымен қатар, 1935-1951 жылдар аралығында жазылған «Май», «Батыр», «Сәтбаев», «Еділ-Дон», «Келес қызы» поэмалары нақты өмір шындығынан алынып, ерлік пен өнегелі істерін бейнелеген нағыз туынды. Ал, қазақ тарихындағы тұңғыш кәсіпқой балуан Қажымұқан Мұңайтпасұлы жайындағы «Қажымұқан» повесі 1954, 1956, 1959 жылдары қайта басылса, 1970 жылы орыс тілінде жарық көреді. Поэзия әлемінен бөлек, балалар әдебиетін дамытуға да айтарлықтай үлес қосқан Қ.Әбдіқадыров «Алатаудың бауыры», «Амантай», «Тапқыш», «Тәтті қауын» кітаптарын жазып шығады. Ел жадында сақталған Ұлы Отан соғысы жылдарында қан майданның ортасында жүріп жазған өлеңдері «Серт» атты жинаққа енеді. Төрт томдық «Мың бір түнді» тікелей парсы тілінен тәржімалаған да біздің жерлесіміз Қ.Әбдіқадыров болатын. Оның аудармасы әлемдік әдебиеттің алтын қазынасына жататын ең үздік нұсқалардың бірі болып табылды.Қаламынан құнды дүниелер туып, әлем әдебиетін тәржімалаған жазушы жауынгерлік «Қызыл жұлдыз» орденімен марапатталған. Бүгінде Қарғалы ауылдық округі, Бұланбайбауы ауылындағы орта мектеп Қалмақан Әбдіқадыровтың есімімен аталады. Жуырда осы &nbsp;аталған мектеп ұжымы ақынның мерейтойын аудандық деңгейде атап өтті. Оған аудандық білім бөлімінің әдіскері Ә.Тәжиева, оқушылар үйі директорының оқу-тәрбие ісі жөніндегі орынбасары Р.Жолтаев, №241 мектептің директоры Д.Ахбенбетов және ақынның көзін көрген қарияларымен туыстары &nbsp;қатысты.Шара барысында &nbsp;жергілікті жерден шыққан қазақ әдебиетінің көрнекті өкілі, жазушы, ақын, аудармашы &nbsp;Қалмақан Әбдіқадыров жайлы &nbsp;кейінгі ұрпаққа насихаттай отырып, оның &nbsp;өмір жолын, еңбегі мен шығармашылығын халыққа кеңінен таныстыру мақсатында «Сырдың сырбаз саңлағы» атты аудандық ғылыми-практикалық конференция мен жазба ақындар мүшәйрасы ұйымдастырылды.Жыр додасына ауданның онға жуық білім ордасынан ұстаздар қауымы қатысып, нәтижесінде бас жүлдені №241мектептің мұғалімі Б.Доситяров, І орынды №150 мектептің мұғалімі Ф.Алтынбекқызы, ІІ орынды №127 мектептің мұғалімі &nbsp;К.Абилкайрова мен №156 мектептің мұғалімі М.Ермекбаева ІІІ орынды №84 негізгі мектептің мұғалімі Г.Калтаева мен &nbsp;№157 мектептің мұғалімі П.Ержігітовалар иеленді. Ал ғылыми-практикалық конференцияға қатысқан ұстаздарға алғыс хаттармен бағалы сыйлықтар табысталды.Кеш соңында Р.Жолтаев «Қалмақан атамызға» арнаған арнау жырын домбырамен әнге қосса, мектеп оқушысы Г.Болатова өзі жазған өлеңін оқып, көрермендерді тәнті етті.

Қаламгер Қалқаман Әбдіқадыровтың туғанына - 120 жыл

<a href="https://kyzylorda-news.kz/">Kyzylorda-news.kz.</a> Бұл – Жалағаш ауданы Аламесек ауылдық округіндегі №124 орта мектеп, Шалғай ауылдағы мектепте білім сапасын арттыру мақсатында бірқатар жоба қолға алынған. Қуантарлығы, бүгінде олардың барлығы жемісін беріп, ауылдағы атын ұяда озат оқушылар қатары артқан. &nbsp;Иә, біз білім саласына бұған дейін де қалам тербедік, мемлекет келешегі бәсекеге қабілетті жастардың болашағына тікелей байланысты болғандықтан әр жылдары салада атқарылған жұмыстар ұдайы сарапталуы тиіс. Қазір мектеп директорларын ротациямен орындарын ауыстыру басталып кетті. Мақсат айтпаса да түсінікті, яғни тәжірибе алмасу арқылы білім берудегі олқылықтарға жол бермей, керісінше қалыптасқан серпінді одан әрі ілгерілету. Алайда бұл жоба өз жемісін беріп жатыр ма? Ротациямен жаңа мектепке барған директорлар білім жүйесіне нендей жаңалықтар енгізуде және оның жемісі қалай? Осы және өзге де сауалдардың түйінін тарқату үшін тілшілер тобы ауылдық елді мекендердегі мектеп тысыеымен танысып, жұмысын сараптауда. Бүгін жолымыз Жалағаш ауданына қарасты Есет батыр ауылына түсіп, орталықта орналасқан №124 орта мектепке табан тіредік.&nbsp;Шынар Халелқызының мұнда директор болып келгеніне көп болмаған. Яғни биыл ауыл мектебі жаңа оқу жылын жаңа директормен бастапты. Есет батырдағы білім ошағында бүгінде 354 оқушы білім алуда. Оның ішінде 42 оқушы алғаш мектеп табалдырығын аттаса, ауылдағы алтын ұяда 68 мұғалім бар. Бәсекеге қабілетті жастарды қалыптастыру жұмыстары біріші мектепте басталатындықтан оларға сапалы білім беру ұлағатты ұстаздардың ұдайы назарында. Шынар Халелқызы бұл бағытта жүйелі жұмыс жасап жатқан әріптестерімнің еңбегін жоғары бағалайды.&nbsp;– Қазір заман ағымына қарай кез келген жұмыс жүйесіне жаңалық қажет, оны өздеріңіз де білесіздер. Маған дейінгі мектеп директорының кемшілігін байқамадым. Бұған дейін де ауыл мектебінде білім сапасына серпін беруде тиісті жұмыс атқарылған. Бұл ротацияның мақсатын тек кемшіліктің орнын толтыру деп түсінбеуіміз керек, бұған дейін де Жалағаш ауданында ерекше қарқынмен дамыған бір сала болса, ол – &nbsp;білім. Біз енді осы қарқында қалып қоймай, керісінше әлі де ілгерілеу үшін жаңа бастамалармен жұмыс жасауымыз керек, салаға мұндай өзгерісті сол үшін енгізді деп есептеймін. Былтыр 32 түлек мектеп бітірген, оның 26-сы ҰБТ-ға қатысқан. Орташа балл – 75. Түлектердің 23-і мемлекеттік грантпен жоғары оқу орындарында білім алуға қол жеткізді. Ал қалғаны ақылы негізде оқуға қабылданған. Бір сөзбен айтқанда, былтыр мектеп бітірген оқушылар 100 пайыз жоғары және арнаулы оқу орындарында білім алуға қол жеткізген, – дейді мектеп директоры.&nbsp; Айта кетейік, биыл Жалағаш ауданындағы №124 орта мектепте 354 оқушының 22-сі 11 сыныпты тәмамдайды. Бұйыртса, барлығы да 100 пайыз ҰБТ-ға қатысуға ниетті. Олардың Ұлттық бірыңғай тестілеуге қатысу-қатыспауы өз еркінде. Ұстаздар мен түлектер дайындықты қыркүйек айында бастапты. Балалардың қарқыны жаман емес. «Үйрек балапанын күзде санайды» дегендей, директор нәтижесін алдағы уақыттың еншісіне қалдырды.&nbsp;– Меже барлық баланың мемлекеттік грант иегері болуына жұмыс жасау ғой. Алдағы уақытта сол межеге жұмыс жасауға тырысамыз. Мектеп түлектерін негізінен қандай пәндер, қандай мамандықтар қызықтырады, біз алдымен осы жағын зерттеп аламыз. &nbsp;Балаларымыздың басым бөлігі жараты¬лыстану бағытындағы пәндерді таңдап отыр. Көбісі химия, биология, физика пәндерін таң¬дауда. Оларға «Сен мына мамандыққа қарағанда басқасын таңда» дей алмаймыз. Бала қай пәнді, қай мамандықты таңдаса, сол салада оның үлкен жетістікке жетуіне әріптестеріммен шама-шарқымша жұмыс жасаймын. Себебі мақсатымыз да сол, мейлінше олардың қалаған мамандық иегері болып, мемлекеттің, қоғамның дамуына сүбелі үлес қосатын бәсекеге қабілетті болуына жұмыс жасау, – дейді Шынар Халелқызы.&nbsp;Мектептегі оқушылардың түрлі деңгейдегі олимпиадаларға, жарыстарға қатысу қарқыны да жоғары, нәтиже де жоқ емес. Жалпы, білім ошағында озат оқушылар санында өсім бар. Олардың қатарын көбейтуде бірқатар жоба да қолға алынған.&nbsp;– Балалардың олимпиада, байқау секілді түрлі деңгейдегі жарыстарға қатысу қарқыны жоғары. Нәтиже де жаман емес. Аудандық, облыстық деңгейдегі жарыстарда топ жарып жүрген оқушыларымыз да жетерлік. Мұның барлығы осындағы ұстаздардың еңбегі мен шәкірттер ізденісінің арқасы деп білемін. Мектепте 3 озат оқушымыз болған, енді олардың санында өсім қалыптастыруымыз керек болатын. Бұл бағытта жергілікті кәсіпкерлермен, шаруашылық төрағаларымен ақылдасып, демеушілер есебінен оларға шәкіртақы тағайындауды қолға алғанбыз. Бұл жобаға ауылдағы «Көктөбе» шаруашылығының негізін қалаған Әбдірасулла Әбдәлиев ағамыз қаржылай қолдау көрсететінін айтты. Сондай-ақ білім саласында ұзақ жылдар қажырлы еңбек еткен осы ауылдың тумасы Гүлбану Орынбаева да әкесінің атынан шәкіртақы тағайындауды жөн деп тапты. Оларға алғыстан басқа айтарымыз жоқ. Білімге, жас ұрпақтың келешегіне, мемлекеттің болашағына алаңдайтын жағдайы бар азаматтар осындай-ақ болсын. Қазір сол кісілердің арқасында мектептегі 3 озат оқушымыз қаңтардан бастап айына 5 мың теңге көлемінде шәкіртақы алып отыр, – деді мектеп директоры.Иә, бұл – жақсы бастама, оған дау жоқ. Мұның озат оқушылар санында өсім қалыптастыруға сеп болары сөзсіз. &nbsp;Оның білім саласына айтарлықтай көмегі тигенін мектеп директоры да жоққа шығармады.&nbsp;– Біз ол қаржыны тек озат оқушының өзіне жай бере салмаймыз. Барлық оқушылардың басын қосып, озаттарды үлгі етеміз. Оның да нәтижесі бар. Мәселен, қаңтар айында озат оқушылар үшеу болса, бір тоқсанда олардың санында өсім қалыптасып отыр. «Олар да алдағы уақытта мұндай шәкіртақы ала ма?» деген заңды сауал туындайтыны сөзсіз. Немесе ертең «жай сөз екен, ізденіп не істейміз» деген кейбір балаларда таяз түсінік қалыптасуы да мүмкін ғой. Қазірдің өзінде «біз де шәкіртақы тағайындасақ» деген кәсіпкерлерден, жеке азаматтардан ұсыныс түсіп жатыр. Сондықтан алдағы уақытта оларға да шәкіртақы тағайындауға жол ашылады деп ойлаймын.&nbsp;Мәселен, қазірдің өзінде ауылдағы Сыздықовтар отбасы «бір озат оқушы болса, шәкіртақысын өзіміз берейік» деп ұсыныс айтып отыр. Ауыл әкімі Дәулет Тәжібаев та 2-3 оқушыға шәкіртақы тағайындауға дайын екенін айтып жатыр. Қазір озат оқушылар санында өсім бар. Енді оларға шәкіртақы төлейтін кезде демеуші азаматтармен жұмыс жасап, бұл жобаны қолға алсақ дейміз, – деді білім ошағының басшысы.Қазір ресми ақпараттардан, әлеуметтік желілерден жасөспірімдер арасында орын алған қылмыстың жиілегенін байқау қиын емес. Оның алдын алуда ауыл мектебінде бірқатар жұмыс жүруде. Жалпы, баланың болашағына тек ұстаздар ғана жауапты емес, бұл мәселеге ата-ана да, учаскелік полиция инспекторы да алаңдауы тиіс. Бірақ мектеп ұжымы олардың арасында қылмыстың алдын алуда шама-шарқынша жұмыс жасап жатыр.&nbsp;Ауылда жасөспірімдер арасында ахуал тұрақты. Күнделікті мұғалімдермен кезекшілік ұдайы ұйымдастырылып тұрады. Әрқайсысының өзіне берілген көше бар, жасөспірімдердің ата-анасыз қоғамдық орында тек белгіленген уақытта ғана жүруіне рұқсат бар. Бұл дұрыс деп есептеймін. Бұл талап ауылда қатаң сақталған.&nbsp;– Менің ойымша жастарда бос уақыт болмауы керек. Олар да ұдайы ізденіс үстінде жүрсе дейміз. Бәсекеге қабілетті ұрпақ осындай жастардан қалыптасады. Ал баланың олай өсуіне жоғарыда айтқанымдай, бәріміз жұмыла жұмыс жасауымыз керек. Баланың болашағына бейжай қарауға болмайды. Ал мұндай түсініктегі ата-ана оған жол бермейді деп ойлаймын.&nbsp;Мұнан бөлек ата-аналар жиналысы да ұдайы ұйымдастырылып тұрады. сондай-ақ балалардың өзімен де жиі бас қосып ұлдармен, қыздармен жеке-жеке пікірлесеміз. Сонда байқайтыным, балалар жиналыстың мақсатын кейде өздері де біліп тұрады. Олардың әлеуметтік желіден қоғамдағы жағдайлардан хабардар екенін аңғару қиын емес. Біз үшін әр баланың түзу жолмен жүруі, бәсекеге қабілетті, мақсатты болуы маңызды. Сондықтан олардың тәртібі де біздің күн тәртібімізден түскен емес, түспейді де, – деді Шынар Халелқызы.&nbsp;Мектепте 1-4 сынып аралығында 133 бала бар. Олар 100 пайыз ыстық тамақпен қамтамасыз етіледі. Директордың өзі бұл бағыттағы жұмыс барысын қадағалап отырады. Ата-аналардың немесе оқушылар тарапынан әзірге ешқандай арыз-шағым түспеген. Оған алдағы уақытта да жол бер-мейтін сияқты. Керісінше ата-аналардан баласының оған көңілі толатынын-толмайтынын ұстаздар сұрап отырады екен.&nbsp;– Аламесектегі білім ошағы 2 корпустан тұрады, оның бір бөлігі жаңадан салынған. Ал бір бөлігі – бұрынғы нысан. Оның сапасына қатысты мәселе бұған дейін болған. Бірақ мемлекет тарапынан қолдау болып, аталған нысан күрделі жөндеуден өткен. Қазір ғимарат сапасына қатысты ешқандай мәселе жоқ.

Жалағашта озат оқушылар шәкіртақы алатын орта мектеп бар

<a href="https://kyzylorda-news.kz/">Kyzylorda-news.kz.</a> Синоптиктер 18-20 сәуірге арналған ауа райы болжамын ұсынды.Қазгидромет мәліметінше, Қазақстанның басым бөлігінде атмосфералық фронтальды учаскелердің өтуіне байланысты ауа райының тұрақсыз сипаты сақталады. 18 сәуірде шығыста - қалың қар, 18-19 сәуірде оңтүстік-шығыста кей уақытта қатты жауын-шашын (жаңбыр, қар) жауады.<blockquote>«18-20 сәуірде солтүстік-батыс антициклонның әсерінен Республиканың солтүстігінде, орталығында, шығысында ауа температурасы 7-15 градус аязға дейін төмендейді. Батыста, оңтүстік-батыста, оңтүстікте, оңтүстік-шығыста түнде аяз болып, тәуліктік температура біртіндеп көтеріледі», - делінген хабарламада.</blockquote>Барлық облыста жел күшейіп, тұман болады. Оңтүстікте шаңды дауыл соғып, найзағай ойнайды, солтүстікте, солтүстік-батыста, орталықта, шығыста көктайғақ болып, қар жауады. &nbsp;

Алдағы күндері ауа райы қандай болады?

<a href="https://kyzylorda-news.kz/">Kyzylorda-news.kz.</a> Жылжымайтын мүлік желісі бойынша мемлекеттік қызметтер қазақстандықтар үшін 2023 жылғы 26 сәуірден бастап 9 мамырға дейін қолжетімді болмайды.«Жылжымайтын мүліктің бірыңғай мемлекеттік кадастры» жаңа ақпарат жүйесіне көшуіне байланысты жылжымайтын мүлік желісі бойынша қызметтер көрсетуге өтінімді қабылдау уақытша тоқтатылады.Мемлекеттік корпорация 2023 жылғы 26 сәуір мен 9 мамыр аралығында еліміздің ХҚКО-ларында жылжымайтын мүлікке құқықтарды (ауыртпалықтарды) мемлекеттік тіркеу, міндетті тіркеуге жатпайтын жылжымалы мүлікті тіркеу және жылжымайтын мүлік объектілерін техникалық тексеру саласында қызметтердің барлық түрлерін көрсетпейтінін хабарлайды. Қағаз жеткізгіштерде қызметтің орындалуы, әрі құжаттарды жеткізу мерізімінің ұзақтығына байланысты ХҚКО-ларда көрсетілетін қызметтерді қабылдау eGov.kz-тен бұрын тоқтатылады. Айта кетейік, қызметке 26 сәуірге дейін тапсырыс берген азаматтар нәтижені көрсетілген мерзімде ала алады. &nbsp;Сонымен қатар, биыл 2-9 мамыр аралығында eGov.kz порталы арқылы жылжымайтын мүлікті ресімдеуге әрі техникалық тексеруге құжаттарды онлайн қабылдау, нотариустар, салық жүйелері арқылы, екінші деңгейдегі банктер және ҚР Әділет министрлігінің атқарушы органдарының жүйелері бойынша қабылдау тоқтатылатынын атап өтеміз. Одан бөлек, көрсетілген кезеңде азаматтар тұрғын үй бағдарламаларына байланысты қызметтерді пайдалана алмайды.&nbsp;<blockquote>«Жаңа жүйеге көшу мереке күндері ұйымдастырылады. Айта кетейік, ЖМБМК-ға көшу кезінде жер учаскелерін ресімдеуге байланысты барлық өмірлік жағдай кезең-кезеңімен цифрланады. Одан бөлек, мемлекеттік қызметтердің барлық спектрін көрсету, оның ішінде жаңа және қолданыстағы учаскелер бойынша түзету енгізу мүмкіндігі көзделген. Сондай-ақ, сыбайлас жемқорлық қаупіне жол бермеу мақсатында жер учаскелері мен жылжымайтын мүлікті ресімдеуі заңнама тұрғыда қарастырылатын болады», - деді, Мемлекеттік корпорацияның басқарма төрағасы Сүйеніш Әбділдин.</blockquote>Еске сала кетейік, 2023 жылдың 5 сәуірінде «Қазақстан Республикасының кейбір заңнамалық актілеріне жер қатынастарын дамыту мәселелері бойынша өзгерістер мен толықтырулар енгізу туралы» заңға қол қойылды. Мемлекеттік корпорация жер қатынастары саласында мемлекеттік қызметті көрсетуді автоматтандыру мақсатында «жылжымайтын мүліктің бірыңғай мемлекеттік кадастры» ақпарат жүйесін іске қосу жүріп жатыр. Ақпарат жүйесі екі дерекқордан алынған мәліметтерді қамтиды. Олар: &nbsp;«жылжымайтын мүлік тіркелімі» мемлекеттік дерекқоры және мемлекеттік жер кадастрының автоматтандырылған ақпараттық жүйесі. Деректер базасынан барлық ақпаратты көшіру аяқталғаннан кейін олар жойылады.

Қазақстандықтарға жылжымайтын мүлік желісі бойынша мемлекеттік қызметтер уақытша тоқтатылады

<a href="https://kyzylorda-news.kz/">Kyzylorda-news.kz.</a> Қармақшы аудандық мемлекеттік кірістер басқармасының басшысы Даниияр Қосбергенов – білікті басшы, өз ісінің маманы. Ол ел болашағы үшін саналы өмірін арнап, жерлестерінің құрметіне бөленіп жүрген жан. &nbsp;Ол 1977 жылы Жосалы кенті тұрғындары, қаржы саласының маманы Жамбыл Сүйінтайұлы мен ұзақ жыл медицина саласында елеулі еңбек еткен Патима Шайхысламқызының отбасында дүние дидарын ашқан. Замандастары сияқты орта мектепте білім алып, жүрек қалауымен Алматы қаласындағы Қазақ мемлекеттік ауыл шаруашылығы институтының «Агроөндірістік кешеніндегі экономика және менеджмент» бөлімінде жоғары білім алса, кейіннен әл-Фараби атындағы Қазақ ұлттық университетінде «Құқықтану» мамандығы бойынша білімін жетілдіреді.Еңбек жолын Қармақшы ауданы бойынша салық комитетінде салық жинаушы болып бастаған ол жылдар өте аудит бөлімінің жетекші маманы, бөлім бастығы, басқарма басшысының орынбасары қызметтерінде үлгілі ісімен танылып, салалық басшылық міндеттеген тапсырмаларды абыроймен атқарады.«Көп еңбек еткен адамға бақыт басын иеді» дегендей, жас та болса өзіне жүктелген функционалдық міндерттерді жауапкершілікпен атқарған жас маман кейін келе облыстық салалық басшылықтың ұйғарымымен Жалағаш ауданындағы мемлекеттік Кірістер басқармасына басшы болып тағайындалады. Жауапкершілік, ізденімпаздық, талапшылдық деген ұстанымды өміріне серік еткен Данияр Жамбылұлы Жалағаш ауданында қызмет еткен жылдарда да өзіне жүктелген міндетті абыроймен атқара білді. Салық базасын арттыруда сала бойынша жинаған тәжірибесімен ауданның аймақта алдыңғы қатарға шығуына сүбелі үлесін қосты.«Адал еңбекпен мал іздемек – ол арлы адамның ісі», – дегендей, ұлылық тәмсілін санасына сіңіріп өскен білікті басшы қай лауазымдық қызметте жүрсе де өзінің туған жерге деген адал қызметі, жауапкершілігі мен талапшылдығының арқасында басшылық тарапынан қолдау тауып, 2019 жылы туған жерге оралады. Нақты айтқанда, аудандық мемлекеттік Кірістер басқармасына басшы болып келеді. Салада кәсіби маманның аудан экономикасының нығаюына, өңірдің дамуына қосқан ерекше үлесін де айта кету біздің міндетіміз.Ол екі рет Қазақстан Республикасы Қаржы министрлігі Салық Комитетінің Құрмет грамотасымен, Қазақстан Республикасы Қаржы министрлігінің «Мемлекеттік Кірістер органдарының үздігі» төсбелгісімен, Қазақстан Республикасы Президентінің «Қазақстан Конституциясына – 25 жыл» мерекелік медалімен, «Қазақстан Республикасының Қаржы министрлігіне – 10 жыл» төсбелгісімен наградталды. Сондай-ақ, облыс, аудан әкімдерінің Алғыс хатына ие болса, өткен жылы аудан бойынша «Қаржы саласының үздігі» номинациясының иесі атанып, абырой биігінен көрінді.<blockquote>«Әке өнегесі ұрпаққа аманат» деп даналарымыз айтқандай, бала кезімде қаржыгер болып еңбек еткен әкемнің жұмысына қызығып өстім. Өсе келе әке жолын өзіме аманат ретінде таңдадым. Еңбек жолымда салықшы деген құрметті мамандықтың қыр-сырын терең меңгеруге атсалысқан, саланы ұзақ жылдар басқарған ұстазым Қалдыбек Сүлейменовтің &nbsp;орны бір бөлек. Осы мамандықпен туған халқыма қызмет етіп келе жатқаныма 25 жылға жуық уақыт болыпты. Талғат Ильясов, Мейрамбек Сатлабаев, Айтбай Бұғыбаев, Зере Метерова сынды білікті де білімді аға-әпкелерімнен тәжірибе жинадым. Ал, бүгінгі күні өздерінің Қайрат Сәден, Ләззат Қыпшақбаева, Дәуіржан Мусилимов, Нұрсұлтан Бектұрғанов, Гүлзана Қожамұратова, Оразбек Құлқатов сынды өз ісінің шеберлерімен бірге ауданның экономикалық даму көрсеткішінің бірі – салық және бюджетке төленетін басқа да міндетті төлемдердің толық және уақытылы түсуін қамтамасыз етуде еңбек етіп жатқан жайымыз бар. Басқарма қызметкерлерінің тындырымды жұмыстарының арқасында биылғы жылдың І тоқсанының қорытындысымен жалпы мемлекеттік бюджет жоспары 608 млн 383 мың теңге болса, оның түсімі 717 млн 378 мың теңгені құрап, 108 млн 995 теңгеге артық немесе 117,9 пайызға орындалуы қамтамасыз етілді. Сонымен қатар, басқарма қызметкерлері көлеңкелі экономикамен күресу мақсатында салық базасын ұлғайту бағытында атқарылған жұмыстар қорытындысымен аудан қоржынына осы тоқсанда қосымша 76 млн 398 мың теңгенің қосымша салығының түсуі қамтамасыз етілді. Сондай-ақ, қазіргі таңда басқармада жас мамандар тобы өздеріне міндеттелген функционалдық қызметтерін абыроймен атқарып, ауданымыздың әлеуметтік экономикалық дамуына тың серпіліс беруде», – деді ол.</blockquote>Қазір Данияр Жамбылұлы басшылық етіп отырған бөлім жақсы нәтижелерге қол жеткізіп, атқарылып жатқан жұмыс сапасы мен көрсеткіштері жоғары деңгейге жетіп отыр. Әрине, бұл — көреген басшының оңтайлы әдістері мен мол тәжірибесінің жемісі. Адамның жеке басының қалыптасуы отбасынан басталады. Оның өсіп-жетілуі, өн бойындағы адамгершілік қасиеттерде осы отбасында қалыптасады. Отбасы – табиғат сыйлаған кереметтердің бірі. Ата-ана тәрбиесін алып, осындай қасиетті ұғымды санасына сіңіріп өскен Данияр Қосбергенов өмірлік жары, аудандық экономика және қаржы бөлімінде бас &nbsp;маман болып қызмет ететін Майра Рысбекқызымен бірге көтерген бақытты шаңырағында тәрбиеленген &nbsp;Нұрай және Айдана есімді қыздары Астана қаласындағы медицина университетінің «Жалпы медицина» факультетінің грант иегері атанса, Дінмұхаммед, Данаби, Дінислам есімді ұлдары Т.Көмекбаев атындағы №250 мектеп-лицейінің &nbsp;озат оқушылары.

Қазақстан және Қызылорда облысының жаңалықтары