<a href="https://kyzylorda-news.kz/">Kyzylorda-news.kz</a>. Бүгін Мәжілістегі «AMANAT» партиясы фракциясының кеңейтілген жиынында депутаттар «Ауыл аманаты» жобасын жүзеге асыру жөніндегі Үкіметтің 2023 жылғы есебін тыңдады. Жоба өз тиімділігін көрсетуде. Бүгінде шамамен 80 млрд теңге сомасына жылдық мөлшерлемесі 2,5%-ды құрайтын 12,7 мың шағын несие берілді.Сөз басында Мәжіліс Спикері, «AMANAT» Төрағасы Ерлан Қошанов ауылды дамыту мәселесі Мемлекет басшысының ерекше бақылауында екенін атап өтті. Осы орайда, партия қоғамда кең қолдау тапқан «Ауыл аманаты» және «Жер аманаты» сынды екі жоба әзірледі. «Ауыл аманаты» жобасы – ауылды дамытудың жаңа драйвері. Жалпы алғанда, 2029 жылға қарай жоба аясында 1 млн ауыл тұрғынын қамтып, 350 мың жаңа жұмыс орнын ашу жоспарлануда. Алғаш рет ел тарихында аталған мақсатқа 1 триллион теңге көлемінде қомақты қаражат бөлінді.<blockquote>«Ауыл аманаты» – Президенттің сайлауалды бағдарламасына енгізілген бірегей жоба. Онда ауыл тұрғындарының тұрмысын жақсартудың нақты әрі түсінікті тетіктері қарастырылған. Ең бастысы, қаражаты толық шешілген. Бір жылдың ішінде жобаның тиімділігін көріп отырмыз. Барлық мемлекеттік органдар мен әкімдіктер «Ауыл аманаты» жобасын сапалы жүзеге асыруға тиіс. Негізгі міндет те осы болуы керек», – деді ол.</blockquote><img class="image_resized" style="width:99.32%;" src="https://knadmin.beoblood.kz/uploads/5_1e3c36ae6e.jpg" alt="5.jpg">Өз кезегінде, Премьер-Министрдің орынбасары Тамара Дүйсенова «Ауыл аманаты» жобасы аясында жұмыспен қамтылған азаматтар санын арттыруға арналған нақты жоспармен бөлісті. Ал Ауыл шаруашылығы министрі Айдарбек Сапаров фракция мүшелерін жобаның негізгі көрсеткіштері туралы хабардар етті. Отырыс барысында бейне конференция режимінде бірқатар өңірдің өкілдері сөз алып, жобаны жергілікті жерде жүзеге асыру мәселесіне қатысты пікір білдірді.Талқылау барысында Мәжіліс Спикері өңірлер арасындағы қаржылық теңгерімсіздікке назар аударды. Былтыр жалпы несие сомасының 43,9 млрд теңгесі Жамбыл және Түркістан облыстарына берілді. Алайда небәрі 1 миллиард теңге алған аймақтар да бар. Сондай-ақ, Ерлан Қошанов Үкімет ірі ауыл шаруашылығы кооперативтерін құруға тиісті көңіл бөлмейтінін атап өтті. Сондай-ақ, ол «AMANAT» партиясы жанындағы жобалық кеңсе былтыр ауыл шаруашылығындағы жекелеген салалардың экономикалық бағдары мен даму әлеуетін анықтау үшін 166 ауданда, 16 шағын қала мен 2 260 ауылдық округте скрининг жүргізгенін еске салды. &nbsp;<blockquote>«Болашақта барлық кем-кетікті ескеру қажет. Жоспарланған көрсеткіштерге қол жеткізу үшін алдағы кезеңде кемінде жыл сайын 50 мың жұмыс орнын ашып отыруға тиіспіз. Қағаз бетіндегі әдемі цифрлардың қажеті жоқ деп санаймын. Бастысы – жұмыссыз ауыл тұрғындарын тұрақты еңбекпен қамту», – деді Ерлан Қошанов.</blockquote>Жиынды қорытындылай келе, «AMANAT» Төрағасы жоба аясында несие беруді цифрландыру процесін жеделдетуді, мал сатып алу және техникамен қамтамасыз ету мәселелерін пысықтауды, статистика деректерін бірыңғай стандартқа келтіруді, сондай-ақ ауқымды түсіндіру жұмысын жүргізуді тапсырды. «Ауыл аманаты» жобасын жүзеге асыру барысы партия фракциясының ерекше бақылауында болады.Іс-шара аясында фойеде Ауыл шаруашылығы министрлігі әзірлеген «Ауыл аманаты» ақпараттық жүйесі таныстырылды. Платформа «Ауыл аманаты» бағдарламасына онлайн режимде өтініш беруге және ол өтініштің жай-күйін бақылауға мүмкіндік береді. Бүгінде платформа қанатқақты режимде жұмыс істейді. Биыл шілдеде платформа толық іске қосылады. Сондай-ақ, фракция мүшелері «Ауыл аманаты» жобасы аясында өндірілген ауыл шаруашылығы өнімдерімен танысты.<img src="https://knadmin.beoblood.kz/uploads/2_1_847b86fcb6.jpg" alt="2 (1).jpg"> Фото: Жаслан Жұмабеков, Әли Ғалым &nbsp;

«AMANAT»: «Ауыл аманаты» жобасы өз тиімділігін көрсетуде

Өткен жылы Аралда 6 &nbsp;балалар ойын алаңы ашылған. &nbsp;Бұған қоса түрлі спорттық алаңдар пайдалануға берілді. Ал биыл балаларға шаттық сыйлайтын тағы бір орталық өз жұмысын бастады. Жеке кәсіпкер Бексұлтан Мусаев жеке қаражаты есебінен «Играй-ка» ойын-сауық орталығын ашып, балаларға шаттық сыйлады.&nbsp;«Көптен бері балалар ойын-сауық орталығын ашуды жоспарлап жүрдік. Жан-жақты зерттеп, мұқият сүзгіден өткізген соң ғана қолға алдық. Себебі мұнда кішкентай балақайлар келеді. Оларға жайлы жағдай мен қауіпсіздік шаралары бірінші кезекте сақталуы керек. Біздің ойын-сауық орталығы көлемі жағынан кең. Балаларға емін-еркін ойнауға жағдай жасалған. Бір мезетте 50 баланы қабылдауға мүмкіндік қарастырп отырмыз», – дейді кәсіпкер.&nbsp;«Играй-ка» балаларға арналған ойын-сауық орталығында балалардың уақытын қызықты да көңілді өткізуіне арналған батутты аймақ, лабиринттер, ойын комплекстері мен әткеншектер, сырғанақ, өрмелеуіш сынды заманауи үлгідегі барлық ойын құрылғыларымен жабдықталған. Мұнда келушілер балаларды ойнатып қана қоймай, жылдам тамақ түрлерін де тұтына алады.&nbsp;«Келушілерге барлық жағынан жайлы жағдай жасағымыз келді. Көбіне балалар қызық қуып ойнап жүргенде үлкендер жағы шаршайды. Сондықтан олардың отырып демалып, тамақтануы үшін асхана жұмысы да іске қосылды. Асханада фаст-фуд тағамдар ұсынылады. Және түрлі сусындар да бар», &nbsp;– деді Бексұлтан.&nbsp;Мұндағы түрлі тербелмелі әткеншектерде ойнау үшін бір балаға екі сағаттық ойынға 1000 теңге төлем жасайсыз. Ал мүмкіндігі шектеулі балалар мұнда тегін ойнап, өз уақытын қызықты өткізе алады. Жұма күні күндізгі сағат 11.00 мен 18.00 аралығында 50 пайыздық жеңілдік те қарастырылған. &nbsp;&nbsp;Балалардың қауіпсіздігіне жауап беретін арнайы 4 қызметкер бар. Олар қызық қуып жүрген бүлдіршіндердің тосын жағдайға тап болмасы үшін жауапты.&nbsp;«Алдағы уақытта тағы да әткеншектер мен түрлі ойнауға арналған құрылғыларды алдыруды жоспарлап отырмыз. Қазір күн жылып келеді. Ойын орталығының іші ғана емес, сыртында да ойнайтын құрылғылар, батут келетін болады. Және барлықғы қауіпсіздік үшін арнайы қоршалады», – деген Бексұлтан өз жоспарларын да ортаға салды.Орталықта ақыл-ойды дамытатын ойын түрлері де бар. Барлығы жас ерекшеліктеріне қарай қарастырылған. Балаларға жайлы жағдай жасау елдің келешегінің кемелділігін айқындай түссе керек. Бүгін өзіне керектіні қоғамнан ала алған балақай, ертең барын елге беретін азамат болып өсеріне сенеміз. Осы тұрғыда балаларға арнап ойын орталығын іске қосып, бүлдіршіндерді қуантып отырған кәсіпкер Бексұлтан Мусаетың алдағы жұмысының нәтижелі болғалы тұр.

Аралда жас кәсіпкер ойын алаңын ашып тәуір табысқа кенеліп отыр

<a href="https://kyzylorda-news.kz/">Kyzylorda-news.kz</a>. 1 наурыздан бастап Қазақстанның он бес өңірі бірыңғай уақыт белдеуіне ауысады. Осылайша бүкіл республикада уақыт теңеседі. Бірыңғай уақытқа кімдер көшеді және ол үшін не істеу керек? Бұл туралы &nbsp;<a href="https://sputnik.kz/?_ga=2.173710886.425154089.1580271483-1869376011.1580271483">Sputnik Қазақстан</a> хабарлады.<h3 style="margin-left:0px;">Қазақстан неліктен бірыңғай уақыт белдеуіне көшкелі отыр</h3>Қазір елімізде UTC+5 және UTC+6 екі уақыт белдеуі қолданылады. Республиканың батысын қоспағанда, елдің көп бөлігі UTC+6 аймағында орналасқан. Ғалымдардың сөзіне сенсек, UTC+6 уақыт белдеуі табиғи күн уақытына сәйкес келмейді. Адам денсаулығы үшін күн сәулесіне, яғни табиғи уақытқа барынша жақын тұрақты уақыт белдеуін қолданған дұрыс.Денсаулық сақтау министрлігі де осы ұстанымды ұстанып отыр. Өйткені уақыттың табиғи тәртібінен озуы шаршаңқылыққа, күйзеліс пен ұйқысыздыққа, созылмалы аурулардың пайда болуына себеп екен.Адам денсаулығына оң әсерінен бөлек, бірыңғай уақыт белдеуі экономикалық шығындарды да азайтпақ.Қазақстандағы уақытты есептеу мәселелері бойынша ведомствоаралық жұмыс тобы бір жыл бойы бірыңғай уақыт белдеуін зерттеп-зерделеп, осындай қорытындыға келген. Сөйтіп елді бір сағатқа – UTC+5 белдеуіне ауыстыруды ұсынған.<h3 style="margin-left:0px;">Сағат тілі артқа жылжиды</h3>Сағат тілі 2024 жылы 29 ақпаннан 1 наурызға қараған түні 00.00-де ауысады.Мына өңірлер жергілікті уақытты 1 сағатқа артқа шегереді:1.Астана2.Алматы3.Шымкент қалалары.АбайАқмолаАлматыЖамбылЖетісуҚарағандыҚостанайПавлодарСолтүстік ҚазақстанТүркістанҰлытауШығыс Қазақстан облыстары.Уақыт өзгермейтін облыстар:1.Атырау2.Ақтөбе3.Маңғыстау4.Батыс Қазақстан5.Қызылорда.Осылайша көктемнің алғашқы күнінен бастап бүкіл Қазақстан UTC+5 уақыт белдеуіне ауысады.<h3 style="margin-left:0px;">Телефонда уақыт қалай ауысады</h3>Азаматтарға түнгі он екіде смартфондағы сағатты өз бетінше 60 минутқа артқа жылжытудың қажеті жоқ. Гаджетте автоматты жаңарту қосулы тұрса және интернет болса уақыт автоматты түрде өзгереді. Құрылғының сағатын бірыңғай уақыт белдеуімен сәйкестендіру үшін операциялық жүйені соңғы нұсқасына дейін жаңарту жеткілікті.Сағат автоматты түрде ауыспаған жағдайда не істеу керектігін толығырақ цифрлық даму министрлігінің <a href="https://www.gov.kz/memleket/entities/mdai/press/news/details/713412?lang=ru">сайтынан </a>оқыңыз.<h3 style="margin-left:0px;">Пойыздар мен ұшақтардың уақыты</h3>Бірыңғай уақытқа ауысуға байланысты ұшаққа немесе пойызға билет алған жолаушылар рейстеріне кешігіп қалмаймыз ба деп алаңдайды.Осыған байланысты Қазақстанның авиация әкімшілігі 29 ақпан мен 2 наурыз аралығында "қауырт желіні" іске қосты. Жолаушылар +7 7172 798214, +77172 798213 нөмірлері арқылы рейстің ұшу уақытын біле алады.Сондай-ақ отандық әуе компанияларына да хабарласуға болады:"Air Astana" + 7727244 44 77, +7 7172 58 44 77, +7 702 702 44 77;"FlyArystan" +7 727 331 1010 (WhatsApp +7 702 702 0227);"SCAT" +7 7252 99 88 80;"Qazaq Air" + 7 727 356 14 14.Ал пойыз жолаушылары анықтамалық ақпаратты 1433 нөмірі бойынша немесе @KTZH_PP_BOT Telegram боты арқылы ала алады.<h3 style="margin-left:0px;">Ұялы байланыс</h3>Жаңа уақыт белдеуіне ауысқан сәтте техникалық жұмыстарға байланысты уақытша байланыс үзіліп, <a href="https://sputnik.kz/20240223/qazaqstanda-biryngay-uaqyt-beldeui-engiziledi-ne-isteu-kerek-42472790.html">мобильді қызметтердің бір бөлігінде шектеулер болуы мүмкін.</a> Осыған байланысты операторлар тариф бойынша төлемді күні бұрын төлеп қоюға кеңес берді.<h3 style="margin-left:0px;">Электронды үкімет уақытша жұмыс істемейді</h3>Бірыңғай уақыт белдеуіне көшуге байланысты "Ұлттық ақпараттық технологиялар" АҚ қызмет көрсететін бірқатар сайт уақытша істен шығады.29 ақпан сағат 22:00-ден 1 наурыз 02:00-ге дейін мына порталдар жұмыс істемейді:eGov.kz порталы және оның құрамдас бөліктері;egov mobile мобильді қосымшасы;"Е-нотариат" бірыңғай нотариаттық ақпарат жүйесі;"Техникалық бақылау" бірыңғай ақпарат жүйесі;"e-Otinish" электрондық өтініштер қызметі және тағы басқалары.<h3 style="margin-left:0px;">Сабақ нешеде басталады</h3>1 наурыздан мектептерде сабақтың басталу уақыты өзгеруі мүмкін. Бұл жайлы журналистерге оқу-ағарту министрі Ғани Бейсембаев мәлімдеген еді."Біз жергілікті атқарушы органдарға, қажет болса, сабақтың басталу уақытын қайта қарауға мүмкіндік береміз. Бұған ешқандай кедергі көріп тұрған жоқпын. Мысалы, таңғы 08.00-ден оқитын мектептер 08.30-да бастай алады. Әрине, мүмкіндік бар", - дейді ведомство басшысы.<h3 style="margin-left:0px;">Намаз уақыты өзгереді</h3>Қазақстан мұсылмандары діни басқармасы еліміз UTC +5 уақытына ауысқаннан кейін намаз уақыты да автоматты түрде өзгеретінін мәлімдеді.Тиісті елді мекендегі намаз уақыты жайлы мүфтият сайтындағы намаз кестесінен білуге болады. Ал жұма намазының жаңа кестесі төменде көрсетілген.<img class="image_resized" style="width:auto;" src="https://sputnik.kz/img/07e8/02/1b/42533795_0:0:1320:1600_1920x0_80_0_0_2f8523e368fdcf91a8e85c61009ff7e5.jpg.webp" alt="Жаңа жұма намаз кестесі - Sputnik Қазақстан, 1920, 28.02.2024" srcset="https://sputnik.kz/img/07e8/02/1b/42533795_0:0:1320:1600_640x0_80_0_0_46384b7cb65ccfe39cb0afe0fef52bc7.jpg.webp 640w,https://sputnik.kz/img/07e8/02/1b/42533795_0:0:1320:1600_1280x0_80_0_0_814cbfc39c34f788316194f54c8ccd29.jpg.webp 1280w,https://sputnik.kz/img/07e8/02/1b/42533795_0:0:1320:1600_1920x0_80_0_0_2f8523e368fdcf91a8e85c61009ff7e5.jpg.webp 1920w" sizes="100vw" width="1920">Жаңа жұма намаз кестесі© <a href="https://www.muftyat.kz/kk/news/qmdb/2024-02-27/43971-namaz-uaqytynyn-ozgeruine-bailanysty-qmdb-habarlamasy/">Мұсылмандар діни басқармасы</a><h3 style="margin-left:0px;">Кәсіпкерлердің кассалық аппараттары</h3>Аппараттық-бағдарламалық кешен саналатын бақылау-кассалық машиналарда 1 наурыз сағат 00:00-де өндірушілер серверінде уақыт автоматты режимде жүргізіледі.Ал "темір" бақылау-кассалық машиналарда уақытты 29 ақпаннан кейін өз бетінше реттеуге тура келеді.Қандай да бір сұрақтар туындаған жағдайда БКМ сүйемелдеу шарттары аясында Техникалық қызмет көрсету орталықтарынан, Мемлекеттік кірістер басқармаларынан немесе байланыс-орталығынан 1414 телефон нөмірі (3) бойынша тегін кеңес алуға болады.Фото:freepik.com

Бүгін түнде сағат тілі ауысады: қазақстандықтар не істеуі керек?

<a href="https://kyzylorda-news.kz/">Kyzylorda-news.kz</a>. Ауғанстандағы Куш-Тепа каналы құрылысының Қазақстанға ерекше әсері жоқ, деп мәлімдеді су ресурстары және ирригация бірінші вице-министрі Болат Бекнияз. Бұл туралы Sputnik сайтында жарияланды.<blockquote>"Қазақстан аумағы арқылы Әмудария ағып жатқан жоқ, бірақ ол Арал теңізіне құяды. Алайда, өкінішке орай, 2009 жылдан бастап Әмудария Арал теңізіне құймайды", - деді ол.</blockquote>&nbsp;Бекниязовтың айтуынша, қазір Арал республика аумағы арқылы өтетін Сырдария суымен ғана қоректенеді.<blockquote>"Сондықтан егер Әмудария бойынша Ауғанстан тарапынан су іріктеу жүргізілсе, біз үшін, Қазақстан үшін ерекше әсері болмайды", - деді вице-министр сенаттағы брифингте.</blockquote>Соған қарамастан, егер Арал теңізі бассейнінен су алынып жатса, Ауғанстан Орталық Азиядағы трансшекаралық өзендер бойынша келісу және келісімге келу бойынша қандай да бір іс-шаралар жүргізуге тиіс, деп есептейді Бекнияз.<blockquote>"Оларды су жөніндегі халықаралық ынтымақтастыққа тарту керек. Негізі Әмударияның Қазақстанның суармалы алқаптарының жай-күйіне тікелей физикалық әсері жоқ", - деп жалғастырды ол.</blockquote>Естеріңізге сала кетейік, Ауғанстанда Әмудариядан су бұратын Куш-Тепа каналы салынып жатыр. Құрылыс аяқталғаннан кейін Түркіменстан мен Өзбекстанның сумен қамтамасыз етілу көрсеткіші 80%-тен 65%-ке дейін азаяды.Тиісінше, көршілес Өзбекстан Аралды қоректендіретін жалғыз су артериясы - Сырдариядан ауыл шаруашылығы үшін су алуды ұлғайтады, бұл тек теңіздің жандануына ғана емес, сонымен қатар оңтүстік өңірлердегі суармалы жерлердің жай-күйіне де әсер етеді.2023 жылдың қыркүйегінде Қасым-Жомарт Тоқаев Халықаралық Аралды құтқару қорының президенті болып сайланды және төрағалық үш жылға Қазақстанға өтті.* Қозғалыс лаңкестік әрекеті үшін БҰҰ санкциясына іліккен.

Ауғанстанда канал салынса Арал теңізіне қалай әсер етеді?

<a href="https://kyzylorda-news.kz/">Kyzylorda-news.kz.</a>&nbsp;&nbsp; Шындығына келгенде, сәулет өнері заман талабына сай әркез өзгеріп отыратыны рас. Нарықтық кезеңде адамдар үй салудың өзіндік үлгісін қалыптастырғаны баршаға мәлім. Қазіргі таңда еуропалық бағытты ұстанатын көпшілік заман ағымына сай заманауи тұрғын үй салуды жөн деп санайды. Осы тұста, құрылыс материалдарын өндірушілер де тұтынушылардың талғамына сай өнім шығаруда. Мысалы, шіркейлілік кәсіпкер Пазылбек Әбішов аудан бойынша жаңа кәсіп түрін ашқан. Ол кез келген ғимараттың сыртқы қабатын қаптауға арналған панельдер шығаратын цех жұмысын іске қосқан.&nbsp; &nbsp; Былтыр жергілікті кәсіпкер Пазылбек Әбішов «Іскер» мемлекеттік бағдарламасына сәйкес 6 пайызбен 4 миллион теңге несие алған. «Бизнес бастау» жобасы аясында арнайы курстан өтіп, сертификат алған шіркейлілік азамат тың кәсіп ашуды жөн деп есептейді. Осы кәсіп жөнінде мәліметті қызығушылықпен іздеген Пазылбек Тынысбекұлы ғимараттың сыртқы қабатын қаптайтын панель шығару технологиясын Алматы қаласындағы цех мамандарынан меңгерген. Құрылыс материалын дайындауға қажетті аппарат құралын Алатау бөктерінен арнайы тапсырыспен алдыртады. Осы кезге &nbsp;дейін жүк көлігімен тауар тасымалдаған тың кәсіп иесі тұрғындар арасында сұраныс артып келе жатқандығын айтып өтті.<blockquote>&nbsp; &nbsp; – Біраз жылдан бері жаңа тың кәсіп ашуды мақсат етіп, ойлап жүрген &nbsp;едім. Бүгінгі күні тұрмыста қолданылатын қарапайым құрылыс заттарын пайдалана отырып, заманауи үлгідегі ғимараттың сыртқы қасбетін қаптауға арналған панельдер шығарудамыз. Алдағы уақыттарда тапсырыс көлемін үлкен көлемде арттырып, аудан аумағында халыққа сапалы қызмет көрсете бермекпіз. Негізі үйдің қасбетіне арналған панельдер тапсырыс берушінің талғамы бойынша түрлі түсті бояумен көмкеруге болады. Панельдің бағасы өлшеміне байланысты өзгеріп отырады. Расында, сапалы өнім шығару үшін төзімділігі берік құрылыс материалдары пайдаланылады. Жалпы, есеппен алғанда 12х12 өлшемді үйге тапсырыс беруші 300 мың теңге көлемінде қаражат жаратады. Үй сыртына жабыстыратын панельдің жарамдылық мерзімі 20-25 жылды құрайды. Ал бояуын 8 жылда бір рет өзгертіп отыруға болады, – дейді кәсіпкер.</blockquote>&nbsp; &nbsp; Цех иесі әзірше бір адамды жұмыспен қамтып отыр. Алдағы уақытта панельдерді орналастыратын бірнеше ұста дайындап, қолға алуды жоспарлап отыр. Өндіріс көлемін көбейтіп, мол табысқа қол жеткізуді де жоспарда. Ол үшін мемлекеттік қолдау шараларына қатысуды жөн деп есептейді. Кәсіпкердің еңбегін жоғары бағалайтындардың саны өте көп. Мәселен, ауыл әкімі Т.Құламқадіров соңғы жылдары елді мекенде кәсіпкерлік саласы жақсы дамып келе жатқанын айтады.<blockquote>&nbsp; &nbsp; – Шіркейлілік кәсіпкер Пазылбек Әбішов «Іскер» мемлекеттік бағдарламасының игілігін көріп, өз кәсібін дөңгелетіп отыр. Әрине, кәсіптің көзін тапқан жанның табысы еселене түсетіні баршаға мәлім. Жалпы, Шіркейлі ауылында «Микробизнес-Қызылорда бағдарламасы бойынша 2 ауыл тұрғынының жобасы құны 14,5 млн теңгеге қаржыландырылған болатын. «Ұлттық жоба» аясында жаңа бизнес идеялар конкурсы арқылы 1 азамат құны 1 млн 380 мың теңге ұтып алды. Ал «Кең дала» бағдарламасы аясында 2 адам құны 26 млн теңге алды. Жастарға арналған 2,2 пайыз несие бойынша 5 азамат құны 20 млн теңгеге құжаттарын тапсырып қаржысын күтуде. Сонымен қоса «Ауыл аманаты» бағдарламасы бойынша 15 жоба ұсынылып, олардың жалпы құны 43 млн теңгені құрап отыр. «Іскер» аграрлық несие корпорациясы бойынша 8 азамат құны 27 млн теңге көлемінде қаржы алды. Бұдан бөлек «Бизнес бастау» жобасы арқылы 34 азамат жеңімпаз болып, 41 млн 656 мың 800 теңге алды. Алдағы уақыттарда ауыл азаматтарының жеке кәсіп ашуына жағдай жасалып, нақты қолдаулар көрсетіле береді, – дейді Шіркейлі ауылының әкімі Талғат Құламқадіров.</blockquote>

Тың кәсіп көзін ашқан Шіркейлілік кәсіпкер

<a href="https://kyzylorda-news.kz/">Kyzylorda-news.kz.</a> Тереңөзектік Орынкүл Жаппарбергенованың есімі көпшілікке жақсы таныс. Жеке кәсіпкер сауда-саттық саласында 20 жылдан аса уақыт еңбек етіп келе жатыр. Бір жылдары ол – Аманкелді Иманов көшесінің бойынан «Мәлика» азық-түлік дүкенін ашып, тұрғылықты халыққа қызмет көрсеткен болатын. Осы күні ардақты ана жаңа кәсіптің түрін игерген. Отбасылық бизнесті жандандыра білетін Орынкүл Тұрарқызы төрт түліктің асылы саналатын жылқы бағып, тұтынушыларын саумалмен қамтамасыз етіп отыр.Расында, халық алғысын иелене білген Орынкүл апайдың еңбекқорлығы ерекше атап өтсек болады. Осыдан 7 жыл бұрын жолдасы Маратбек Келдібековтің қолдауымен жылқы сауа бастайды. Сол кезден бастап, көшеде бір-бірімен дидарласқан, яғни жүздескен жергілікті халық Орынкүл апайдың саумалын әңгіме етіп, мақтаумен болды. Күніне 7 мезгіл жылқы сауатын оның қызметін дертіне ем іздеген әрбір адам жоғары бағалайды. Себебі, жаңа сауылған саумалды жылы күйінде тұтынушысына ұсынатын Орынкүл Тұрарқызы бір сәтке дамыл таппайды.<blockquote>– Ең алғашқы жылы қораға 3 жылқы байлаған болатынбыз. Күніне 17-18 адам кезекпен саумал ішетін. Таңғы 4:00-ден қораға кіріп, қасқарая дамылдаймыз. 7 мәрте жылқы тұратын қораны тазалап, жем-шөбін дайындаймыз. Әрине, жылқы малына аса күтім қажет. Және де оның бабын табу оңай емес. Мал бағудың қиындықтарын бірте-бірте үйреніп, ел қатарлы еңбек етіп келеміз. Жолдасым екеуміз «Мәлика» азық-түлік дүкенін ашқанда күні-түні халықтың игілігі үшін жұмыс жасадық. Кәсіпті игеру мен сауданы жүргізудің өзіндік қиыншылықтары бар. 2019 жылы дүкенді жауып, жылқы бағудың қыр-сырына қаныққан едік. Айта кетейік, саумалды тұтынушыға ұсыну бір бөлек, жылқының жем-шөбін жеткізу мүлдем бөлек нәрсе. Биыл мал азығының тапшылығы едәуір байқалуда. Жоңышқа мен жемді уақытылы табуға тырысамыз. Бидайды да бөктіріп берген кезіміз болады. Ең бірінші, жылқы малы тоқ болса, мол саумал береді. Сондықтан да халықтың сұранысына сай қызмет етуге мүдделіміз. Саумалдан бөлек, қымыз ашытып сатамын. Көпшілікке 250 грамм саумалды 300 теңгеге, жарты литр саумалды 600 теңгеге беремін, – дейді Орынкүл Тұрарқызы.</blockquote>Негізінен, Орынкүл Жаппарбергенова ауданға белгілі сынықшы Тұрар ақсақалдың қызы. Ал Маратбек аға кәсіпкерлік саласында өзіндік орны бар Ордабаевтар әулетінің перзенті. «Алма ағашынан алыс түспейді» деген тәмсіл бар. Ардақты жандардың немерелері сауда-саттық саласын қайта қолға алуды үнемі ұсыныс ретінде айтып келеді екен. Орынкүл апа дүкен ашу зейнетке шыққаннан кейін ойда жүргенін тілге тиек етті. Біз Орынкүл Тұрарқызымен әңгімелесуге барғанымызда жылқы сауатын уақыт таяған екен. Қолына шелегін ұстаған әзиз ана жылқыларымен тілдесіп, еркелетіп қояды. Бүгінде қос жылқы сауып, 13 адамның сауабын алып отырған «қолы алтын» жанның кәсібіне береке берсін демекпіз.

Сырдариялық кәсіпкер өз бизнесін жандандыруда 

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp; Кез келген елдің экономикасын дамытатын сол елдің төл өнімі екені белгілі. Бірақ алдымен өндірілген өнім сол шығарған елдің талабын қанағаттандырып, толық қамтамасыз етіп қана қоймай, өзге елдерге шығарылып пайда әкелсе ғана өндірісті дамытады. Мемлекет басшысы былтырғы Жолдауында осы мәселені көтеріп, елде өндіріс саласы кенжелеп тұрғанын айтқан-ды. Соңғы жылдары аймағымызда үлкен кәсіпорындар ашылып, елдің дамуына оң өзгерістер енуде. Ауданда карьер қазу қызметімен айналысатын «АНК Дәулет» ЖШС бүгінде өңдеу саласына жаңа бетбұрыс жасап отыр. Бұл туралы серіктестіктің директоры Дәулет Қанатбайұлымен сұқбаттасқан едік.&nbsp;– Алдымен әңгімеміздің тінін «АНК Дәулет» жауапкершілігі шектеулі серіктестіктің жұмысы жайында елге қысқаша таныстырып тарқатсақ.– Серіктік ең бірінші әкем Қанатбай Нұрмаханұлының бастамасымен акционерлік қоғамы болып ашылды. Кейін жауапкершілігі шектеулі серіктестік болып құрылып, жұмысын кеңейтті. Мұнда алпысқа жуық жұмысшы бар. Мекеме ауданнан он екі шақырым қашықтықта орналасқан Ордазы деген жерде карьер қазумен айналысады. Ол жердегі топырақ, қиыршық тастарды өзіміздің өнеркәсіптік базамызға тасымалдап, арнайы жабдықтармен үш-төрт түрге бөлшектейміз. Бұл құмдар құрылысқа арналғандықтан көрші аудандарға сұраныс бойынша вагондармен жіберіп отырамыз. Мәселен, Арал, Қазалы аудандарындағы темір бетон зауытына осы бөлшектелген топырақтар жеткізілуде. Одан бөлек облыс, тағы да басқа аймақтарға тапсырыс бойынша жіберудеміз.– Енді өзіңіз әке жолын жалғастырып жатырсыз. Қаншалықты қиыншылығы бар?– Жалпы АНК Дәулеттің жұмысы маған бала кезден таныс. Әкемнің қасында көп жүріп, жұмыстың қыр-сырын үйрендім. Кейін қалаға оқуға түсіп, «Заңгер» мамандығын меңгеріп, еңбек жолымды осы мекемеден бастадым. Қазіргі таңда серіктестіктің директорлық қызметіндемін. Қиыншылық кез келген жұмыста болып тұрады. Бірақ оған төзімділікпен, сабырлықпен қарау керек. Әкемнен алған тәжірибемнің арқасында мекеменің жұмысын тоқтатпай жүргізіп келеміз. Шүкір, жылдан-жылға ілгерілеушілік бар. Елдегі басқа қалалармен тығыз байланыстамыз. Түркістан облысы, Созақ ауданына бөлшектелген құмдарымызды арнайы бір тонналық қаппен жеткізіп отырмыз.&nbsp;– Енді жақсы жаңалыққа көшсек. Бұйырса кәсіпорын биыл жаңа жобаны іске асыруды жоспарлап отыр. Нақтысын айтқанда ауданда газоблок шығаратын өндіріс ашылмақ. Осыны кеңінен тарқатсаңыз.– Қазір елімізде көптеген оң өзгерістер орын алуда. Әсіресе өндіріс ошақтары салынып, экономикамыз өркендеп жатыр. Біз де шикізаттан өнім шығару бағыты бойынша бөлшектелген құрылыс құмнан ауданда газоблок шығаратын шағын зауыт ашуды жоспарлап отырмыз. Бұйырса биыл іске қосылады. Он адамды жұмыспен қамтитын боламыз. Жобаның жалпы құны 200 млн теңге. Оның ішінде «Микробизнес-Қызылорда» бағдарламасы шеңберінде 60 млн теңгеге несиелендірілді. Газоблок өнімі кез келген құрылысқа жарайды, яғни үй, құрылыс нысандарын, цех салуға бірден-бір таптырмас құрал. Жобамыз іске асып, өнім шығып жатса бірінші жергілікті тұрғындарға қол жетімді бағада сатылатын болады. Өйткені құм өзімізден шығып жатыр, оған қосылатын қоспаларды соның ішінде цементті Шиеліден алдыратын боламыз. Жалпы байқасаңыз, Қармақшының топырағы ерекше әрі сапалы. Сонымен қатар мемлекеттік стандартқа сәйкес. Карьерден қазылған құмдарды түріне қарай пайдалануға болады. Мәселен, асфальт жолдың астына жаюға, бетон құюға, тағы басқа да құрылыс жұмыстарына пайдалануға жарайды. Зауыттағы құрылғыларды Ресейден алдырттық. Арнайы маманы келіп құрастыруда. Бұйырса бәрі автоматтандырылған, технологиялық процес бойынша өнім өндірілетін болды.– Не себепті кәсіптің бұл түрін таңдадыңыз?– Көп жағдайда бізге құрылыс заттары сырттан келеді. Мәселен, батыс аймақтан құрылысқа қажетті ракушка тасы аймағымызға жеткізілуде. Біріншіден, ол теңіз астынан өндіріледі, сол себепті ылғалды бойына жинайды. Екіншіден, оның келуі, жеткізілуі үлкен қаражатты қажет етеді. Ал енді газоблок ол өз жерімізден шығады. Шикі заты дайын. Одан үй салған жағдайда жылуды бойынан өткізбейді. Сонымен қатар көлемді әрі өнімді келеді. Артық шығынды да қажет етпейді. Жалпы ауданды дамыту ісінде алға қойған жоспар көп. Өндіріс бар жерде өріс кеңейетіні сөзсіз ғой, бұйырса кезең кезеңімен жүзеге асатын болады.– Мекеме бұған дейін де өнім шығарумен айналысты. Қандай өнім түрлерін елге ұсындыңыздар?– Елдегі шикі затты пайдалана отырып брусчатка, көшеге қойылатын жиек тастарды өндірдік. Одан бөлек сплитерлік блоктар шығардық. Ол қазіргі таңда құрылыста сұранысқа қажет дүниенің бірі болғандықтан қолға алдық. Бұл өнімнің барлығы жеріміздегі құмдардың зерттеліп, сапа жағынан жоғары баға алуымен жүзеге асырылып жатыр. Алдағы уақытта газоблок өндірісі де жергілікті өнім ретінде «Қармақшыда жасалған» деген брэнтпен шығатын болады.– Сіз қазіргі таңда аудандық мәслихат депутатысыз. Былтыр жыл қорытындысында «Үздік депутат» атандыңыз. Осы ел мүддесін ойлаудағы жұмысты қатар алып жүру қиындық тудырмайма?– Жалпы бұл депутаттық жолды бекер таңдап келгенім жоқ. Елге кішкене де болса пайдам тисін деген мақсатпен сайландым. Сайлауалды бағдарламамның ішінде жұмыссыздық мәселесін азайту туралы қамтылған. Сол бойынша жұмыссыз жүрген жастарды ертеңгі іске қосылар зауытымызға тартудамыз. Аудан тұрғындарымен кездескенде де олардың пікірін, ойын тыңдаймыз. Мәселен, №250 мектеп-лицейі жанындағы саябаққа балалар ойын алаңын салып беру туралы тұрғындардан ұсыныс түскен болатын. Соны қолға алып, өз қаражатымнан ойын алаңын салып бердім. Депутат болғаннан кейін ел ісіне араласу міндетіміз. Әр сессия сайын ауданға қатысты мәселелерді талқылап, оң бағытқа қарай жұмыс істеудеміз.– Уақыт бөліп сұқбаттасқаныңызға рақмет.

Дәулет Қанатбайұлы: Кәсіпке бала күннен бейім болдым 

Kyzylorda-news.kz. &nbsp;Қазіргі таңда жастардың дені кәсіпке бет бұрды. Мемлекет тарапынан берілетін қолдауды пайдаланып, өз ісің дөңгелетіп жатқаны қуантады. Өзгеше кәсіпті қолға алған кәсіпкер 24 жаста.&nbsp;Өңірде есігін айқара ашқан шағын зауыттың негізгі құрылтайшысы – қызылордалық 24 жастағы кәсіпкер Айдос Амангелдиев. &nbsp;Жаңа зауыттың өндірістік қуаты жылына 5 мың тоннадан асады, алда 10-ға жуық жаңа жұмыс орындары ашылады деп күтілуде. &nbsp;Бұл туралы Қызылорда облысының кәсіпкерлік және өнеркәсіп басқармасы хабарлады.Аталған зауытта құрылысқа қажетті су-эмульсиялы, лак-бояу өнімдері шығарылатын болады. Өндіріс технологиясын және зауыттың халықаралық сапа стандартын ескере отырып, өнімге қажетті шикізат Алматыдан сатып алынады.<blockquote>– Бұл жобаны мемлекеттік бағдарлама аясында жүзеге асырдым. «2021-2025 жылдарға арналған кәсіпкерлікті дамыту жөніндегі Ұлттық жобасы» арқылы 5 млн теңге көлемінде қайтарымсыз грант ұтып алдым. Алматы қаласынан арнайы қондырғы мен жабдығын алып, ғимарат жалдау арқылы шағын цех аштық. Эмульсияға қажетті шикізат пен түрлі қоспаны да Алматыдан алдырамыз. Әзірге эмульсияның 3 түрін дайындаймыз, – дейді жеке кәсіпкер.&nbsp;</blockquote>&nbsp;

Қызылордада су-эмульсиялы бояу өндірісі іске қосылды   

<a href="https://kyzylorda-news.kz/">Kyzylorda-news.kz.</a> Кәсіпкерлік саласы мен ауыл шаруашылығы саласы етене жақын. Қазіргі күні ауыл шаруашылығын дамыту бағытындағы кәсіп түрлеріне деген халықтың қызығушылығы жоғары. Ондай кәсіп түрлері мемлекет тарапына да қолдауға ие. Ауданда жылыжай шаруашылығы дамып келеді. Саралап қарасақ, бұл шаруашылық өміршең кәсіп түрі ретінде айы оңынан туып тұр. Ал біздің өңір тұрғындарының жылыжай шаруашылығын дамытуы көңілге қуаныш ұялатады. Біз тап осы жылыжай туралы бекер сөз қозғап отырған жоқпыз. Себебі Сексеуіл кентінің тұрғыны Ахметжан Боханов кенттен жылыжай құрылысын бастады.&nbsp;Ауыл шаруашылығы өнімдерін өндіру өз кезегінде азық-түлік бағасының тұрақтауына әкеліп соғады. Бұл импортқа тәуелділікті азайтады. Облыс әкімі Н.Нәлібаев та &nbsp;азық-түлікпен өз-өзімізді қамтамасыз етуіміз керектігін айтып, саланы дамытуды әркез назарға алып отырады. &nbsp;Осы ретте Сексеуіл кентінің тұрғыны, жеке кәсіпкер Ахметжан Боханов 240 шаршы метрді құрайтын жылыжайдың құрылыс жұмыстарын бастап кетті.&nbsp;Жылыжай салуды бұрыннан жоспарлап жүрдім. Оны жан-жақты зерттеп көрдім. Ақырында таптырмас табыс көзі екендігіне көзім жетті. Сосын өзімнің кәсібіме неге айналдырмасқа деген ой келді. «Атамекен» кәсіпкерлер палатасында оқу курсынан өтіп, сертификат алдым. Бизнес жоспар дайындадым. Осылай биылғы жылдың басында қайтарымсыз гранттық қаражат алуға өз жобамды ұсындым. Сәтін салып жылыжай саламын деген арманымды жүзеге асыру үшін маған мүмкіндік туып, грант жеңіп алдым, – дейді кәсіпкер. &nbsp;Қазіргі таңда өз ауласынан жылыжай құрылысын салып біткен. Енді өнім өсіруге дайындық жұмыстары басталып кеткендігін айтқан кәсіпкер негізінен жылыжайдың негізгі бағыты – көкөніс өсіру екендігін айтты. Соның ішінде голландиялық қияр тұқымының Авелла F1, Лоджейн F1, Северин және Туми F1 сорттарын егу.Бұл – біздің ең алғашқы бастамамыз. Егер сәтін салып оң нәтижеге қол жеткізіп жатсам, тағы да басқа өнім түрлерін өсіріп көрмекпін. Жылыжай құрылысын аса ыждағаттылықпен жасадық. Барынша қателік жібермеуге тырыстық. Біздің өңірдің табиғаты бау-бақшаға қолайсыз болса да жылыжай жер талғамайтын кәсіп түрі болған соң мұнда қыс, жаз демей өнім алуға мүмкіндік бар, – дейді Ахметжан.Кәсіпкерлікке ден қойып, жылыжай ісін қолға алған кәсіпкер жары Қарлығаш екеуі көпбалалы отбасы. Жылыжай жұмысының тасы өрге домалап, өнім молайса, бес баланың ырзық-несібесі арта түспек.&nbsp;Бұған дейін отбасын бағу үшін әртүрлі жұмыстар істеп, нәпақа тауып жүрдік. Ал енді қазір өзім кәсіпкерге айналдым. Бір түсінгенім, қазір еңбек етемін деген адамға қай жерде де несібе бұйырады екен. Мемлекеттің осындай қолдауы болғаны үшін қуаныштымын,– дейді ол.&nbsp;Расында қазір аудан халқының көбі кәсіпкерлікке ден қойып, өз қызығушылықтарынан туған дүниелерді кәсібіне айналдыруда. Сол арқылы халық қажетін өтеп, өздері де тәуір табыс тауып отыр. Ахметжан Бохановтың да жылыжайы жемісті болса қияр сортын сырттан тасымай, Сексеуілдің қиярын тұтынатын боламыз.Фото: Pixabay com

Сексеуілде көпбалалы отбасы жылыжай ісін қолға алды

<a href="https://kyzylorda-news.kz/">Kyzylorda-news.kz.</a> Шыдамдылық, қайсарлық, өжеттілік, еңбекқорлық пен сабырлылық. Әсілінде кәсіп бастаған адамға керек қасиет. Кәсіп демекші, біз қазір нағыз кәсіпкер мен алыпсатардың ара-жігін ажыратпай, бәріне бірдей қоғамнан кәсіпкер деген ат бергенбіз. Ал шынтуайтына келгенде, өз өнімін шығарып, оны табыс көзіне айналдырып отырған адам ғана кәсіпкер деген мәртебелі атқа лайықты емес пе?! Біз бүгінгі мақалаға арқау ететін кейіпкер де сан кәсіптің шашауын шығармай бір арнаға тоғыстырып жүрген нағыз іскер азамат. Кейіпкеріміз Жансерік Нысанбаев қарапайым құрылысшы болудан бастап, өнеркәсіп иесіне дейінгі кәсіпкерлік жолын бізге былайша баяндап берді.Нысанбаев Жансерік Темірбайұлы 1982 жылы Арал қаласында қарапайым отбасында өмірге келген. Әкесі Темірбай Нысанбаев ағаш ұстасы болған. Ал анасы Ләмпасия Қаныбетова 33 жыл табан аудармай аудандық аурухананың тері аурулары бөлімшесінде тазалықшы қызметін атқарып, бүгінде зейнетке шыққан. Жансерік отбасындағы 3 баланың тұңғышы. Сондықтан да болар, ол ата-анаға қолғабыс жасап, еңбекке ерте араласты. Тұрмыстағы тауқыметті түйсініп өсті.<blockquote>– 1989 жылы қаладағы №62 мектептің алғаш табалдырығын аттап, 1999 жылы бітіріп шықтым. Енді менің алдымда жоғары оқу орнын оқып, бір мамандықты игеру керек деген мақсат тұрды. Негізі құрылыс, дизайн саласына қатты қызығатынмын. Мектеп қабырғасында оқып жүргенде ол кезде қабырға газеті деген болады. Сондай жұмыстарды асқан құлшыныспен жасайтынмын. Бірақ өкіншіке орай, мен құжат қабылдаудан кеш қалып, ол мамандыққа түсе алмадым. Сонан соң Қызылорда қаласындағы Заң колледжіне оқуға түстім. Оқуды бітірген соң мамандығым бойынша жұмысқа орналасу қиын болды. Әрі жоғары оқу орнын оқу қажеттігі туды. Осылайша Ақтөбе қаласындағы Қ.Жұбанов атындағы университеттің сырттай бөліміне мамандығым бойынша оқуға түстім. Бұл шақта мен Ақтөбеге барып тұрақтап, сонда әр түрлі жұмыстар істедім. Сырттай бөлімде оқйтын болған соң оқу ақысын ата-анама салмақ салмай, өзім табайын деген ой болды. Ең бірінші қаладағы жиһаз сататын дүкенге жиһаз құрастырушы болып жұмысқа орналастым, – деп бастады Жансерік әңгімесін.</blockquote>Осында жүріп ол жиһаздардың құрастырылу технологиясын толық меңгеріп алады. Енді "неге осы дүниені шетелден тасымай, өзіміз жасап көрмеске" деген ой түйеді. Ол үшін ұсталық таныс дүние, әкесі Темірбай да, атасы Нысанбай да ұста кісі болған. Нағашылар жағы да бұл өнерден кенде емес. Қанында бар қасиет. Осылайша, ол Ақтөбеде жүрген аралдық жігіттердің басын біріктіріп, шағын жиһаз цехын ашады. Бұл 2003 жылдар болатын. Өз өнімдерін дүкендерге сатып, бұл тәуір табыс әкеле бастайды. Сол шақтарда қазір біздің тұрмысымызға сіңіп кеткен «еврожөндеудің» енді басталып келе жатқан шағы болатын. Жансерік бұл істі де толық зерттеп жүріп меңгеріп алады. Еңбекққор жан енді жиһаз жасаумен қатар, үйлерге құрылыс жұмыстарын жүргізіп, заманауи өң беретін құрылысшыға айналады.<blockquote>– Аралдық таныс жігіттердің басын біріктіріп, тәуекелге бел буып құрылысшылықты қолға алдық. Бұл шақ нағыз құрылысшының түкірігі жерге түспей тұрған кез еді. Біз білмейтін түрлі құрылыс материалдары шығып жатты. Бұл жұмыстардың бәрінде жұмыс берушімен келісім жасап, құрылысқа қажетті материалдарды есептеу – барлық жұмыстар менің мойнымда болды. Осылай Ақтөбе қаласы менің өмірімдегі тәжірибе алаңы болды. Көп нәрсені көрдім, үйрендім, білдім. 2007 жылы отбасылық жағдайыма байланысты Аралға қайта қоныс аудардым. Бұл кезде қос дипломым болса да жұмыстың реті болмады. Бірақ құр қарап жатуға тағы болмайды. Сонан соң үй ауласында шағын жаздық сарайымыз бар еді. Соның ішінде отырып ағаштан түрлі тұрмысқа қажетті заттар жасай бастадым. Орындық, үстел, гүл, теледидар қоюға арналған бұйымдар жасадым. Оларды ағайындарыма, көршілеріме сыйға бердім. Біз, қазақ өзі төрінен қонақ үзілмейтін халықпыз ғой. Олардың үйіне келген адамдар қызығушылық танытып, қайдан келген дүние екенін сұрайды ғой. Олар мені нұсқайды. Осылай біртіндеп тапсырыстар келе бастады. Ақыр аяғы тапсырыс молайып, қасыма көмекші жігіттер алдым. Ол шақта менде ағашты кесуге арналған құралдар болған жоқ. Ақтөбеден кестіріп алып келетінмін. Табысымды жиыстырып ең бірінші станок алдым. Енді кішкентай сарай тарлық етті. 2009 жылы ресми түрде кәсіпкер ретінде тіркеліп, орталықтан жалға ғимарат алып, өз кәсібімді дамыта бастадым. Тұрғындардан, мекемеден жиһаздарға тапсырыс та түсе бастады. Бұл жеке ғимараттың болуы керектігінен хабар берді. Осыдан соң кәсіпкерлік мақсатта жер алып, 2012 жылы өзімнің «Арал жиһаз» деп аталатын цехымды аштым, – деген Жансерік туған жердегі алғашқы табысты жылдары туралы айтты.</blockquote>Ол қай кезде де бір іспен тоқтап қалған жан емес. Жаңа дүниеге әркез құштар. Ілімін алып, ізін қуып меңгергенше тыным таппайды. Жиһаз жасаумен қатар құрылысшылық қызметін де ұмытпай қатар ала жүреді. Мұның аралығында да түрлі кәсіпте өзін сынақтан өткізген. Бірақ тағы бір жаңа дүние жасау керек. Осы оймен ол ұзақ жүрді. Ең алдымен өзіне "аралдықтардың басты тіршілік көзі не?" деген сауалды қойды. Әрине, балықшылық. Ал балықшыға керегі – қауіпсіз қайық.<blockquote>– Сол жылдары балықшылар арасында қайғылы жағдай көп болды. Жас жігіттер суға кетіп жатты. Сосын ойлана келе жайлы, жақсы, қауіпсіз моторлы қайық жасау керек деген ой түйдім. Ол кезде астымда джип маркалы соңғы үлгідегі темір тұлпарым болды. Соны сатып, шетелден қайық жасауға қажетті материалдарды алдырдым. Қазір ақпараттық заман ғой. Ғаламтордан қарап, жасалу техникасын үйрендім. Бірінші жасаған қайық сынақтан өтпеді. Сынбадым. Тағы жасап көрдім. Ол да жарамсыз деп танылды. Мұнан соң да тәуекелге бел будым. Енді тыңғылықты зерттеп, тағы құрастырып шықтық. Ер кезегі үшке дейін деген рас екен. Бұл сәтті шыққан дүние болды. Бұған дейін бір көліктің ақшасын желге ұшқандай жоқ қылсам да, ақырында діттеген мақсатыма жеткеніме қуандым, – дейді ол.</blockquote>Жансерік ең бірінші сапаға мән беретін жан. Ал қайықтардың бағасы нарықтағы өзге өнеркәсіптегі қайықтар бағасынан әлдеқайда төмен. Сондықтан қазірде тапсырысы көп. Ол жасаған қайықтар Каспий теңізі мен Балхаш, Алакөлде жүзіп жүр.<blockquote>– Айына 5-6 қайық шығарып отырмыз. Бәрі тапсырыспен жасалады. Одан артыққа үлгермейміз. Көбіне тапсырыстар сырт қалалардағы балықшы қауымнан түсіп жатады. Тапсырыстың дұрыс жетуіне де жауаптымыз. Менің бір түсінгенім, өндіріс өлтірмейді. Қазақ өзі "тәуекел түбі жел қайық, өтесің де кетесің" демей ме? Біз жаңаны меңгеруге дағдылануымыз керек. Аралда жиһаз жасауды кәсібіне айналдырып отырған жігіттер бар. Оларға көмек керек болса, әркез қолдан келген көмегімді аямаймын. Ал қайық жасауды әлі ешкім қолға алған жоқ. Тіпті Қазақстанның өзінде саусақпен санарлық өндіріс орындары бар. Сондықтан болар, бәсекелестік аз ортада тез табысқа кенелуге де мүмкіншілік жоғары, – дейді кәсіпкер.</blockquote>Қазір өндіріс толық қуаттылықпен жұмыс жасап тұр. Кәсіпкердің басты мақсаты – бағаны тұрақтандыру. Ол бір айда бір қайық жасап, оны қымбат бағаға саудалағаннан гөрі арзан бағада ай ішінде алты қайықты саудаға салып, қарқынды жұмыс жасағанды жөн деп санайды. 8 адамды тұрақты жұмыспен қамтып отыр. Айлық жалақылары атқаратын қызметіне қарай 150 мың мен 200 мыңның аралығында.<blockquote>– Алла сәтін салса, биыл құрылыс материалдарын шығаратын цехты іске қосқалы отырмын. Бүгінде кәсіп ашам деген жанға мемлекеттен қолдау көп қой. «Атамекен» кәсіпкерлер палатасы арқылы «Даму» қорынан алты пайыздық мөлшерлемемен несие алып, аталған цехты бастауға қажетті құрылғыларға тапсырыс беріп қойдым. Енді Аралдан құрылыс материалдары шығатын күннің де ауылы алыс емес, – деді Жансерік Темірбайұлы.</blockquote>Еңбек түбі – береке. Ол қазір қоғамда кәсіптен береке тапқан, жаңа істі қолға алып, табысқа жеткен азамат болумен қатар зайыбы Жанармен берекелі отбасылық бақытқа кенеліп, төрт баланы тәрбиелеп отырған үлгілі әке.<blockquote>– Балаларымды адал еңбекке баулудамын. Кісі ақысын жемей, табанды еңбек етуді біз әкемізден үйрендік. Анамыздың ақ сүтімен бойға сіңірдік. Солардан көрген үлгі-өнегемізді өз балаларымызға да сіңіріп жүрміз. "Ағаш жапырағымен, адам ұрпағымен көрікті" дейді. Біздің істеген әрбір ісіміз сол балаларға үлгі болса екен, – деген кәсіпкер Жансерік Темірбайұлы отбасылық құндылықты да жоғары қастерлейтіндігін тілге тиек етті.</blockquote>Ол бала кезден еңбекқор болып ержетіп, жиһаз жасауды, құрылыс жұмыстарын істеуді меңгерді. Ал қазір қайық жасаудың шеберіне айналды. Енді құрылыс материалдарын шығаратын цехты іске қоспақ. Бұл төрт адамның ойынан табылатын ерекше қабілеттің бәрі бір ғана жанның бойына дарыған. Бір кездегі заңгерлік мамандығы да тасада қалып жатқан жоқ. Өнеркәсіптің заңгерлік құжатнамасын жүргізуде де өзінің алған білімі пайдасын беруде. Жансерік еңбектен нәпақа табумен қатар, халық қажетін өтеп отыр.

Аралдық жас кәсіпкер жасаған қайыққа сұраныс жоғары

<a href="https://kyzylorda-news.kz/">Kyzylorda-news.kz.</a>&nbsp; &nbsp;Қазақта «Еңбегіне қарай өнбегі» деген тәмсіл бары сөзсіз. Қазіргі уақытта жерден ризық-несібесін терген шаруалар еңселі еңбек етумен дараланып келеді. Бұл ретте, аудан жастары бастап егін егуге ерекше машықтанған. Ерте көктемде бақшалық&nbsp; жерді дайындап, алажаздай егін еккен жастар диқаншылық кәсіптің қыр-сырына қаныққан. Сырдария ауданының көлемінде бірнеше жастар бригадасы құрылып, жұмыс жасап келе жатыр.Шын мәнінде, ауданымызда жастар арасындағы жұмыссыздық деңгейін төмендету мақсатында және оларды жұмыспен қамту бағытында өткен жылы аудандық жастар ресурстық орталығының бастамасымен ауданға қарасты бірнеше ауылдан жастар бригадасы ашылған болатын. Былтыр Шіркейлі, Айдарлы, Асқар Тоқмағамбетов, Аманкелді, Бесарық, Жетікөл ауылының жастары егін егіп, бақша өнімдерін күтіп, баптаған еді. Аталған жастар бригадаларына 200-ге жуық жас тартылған еді. Оларға 60 гектар жер беріліп, картоп пен бақша дақылдары орналастырылған екен.<blockquote>– &nbsp;Елімізде жұмыссыздық деңгейі жастар арасында өзекті мәселеге айналып жатқаны сөзсіз. Ауданымыздың еңбек нарығында жастарды еңбекке тарту, жастардың жұмыссыздық деңгейін төмендету мақсатында түрлі бағытта жұмыстар жүргізіліп келеді. Соның бір дәлелі – ауданымызда жастар бригадасының құрылуы болып табылады. Ауыл жастарының егін егуге деген құлшынысы жоғары. Маусым соңында мол өнім алуға үмітті. Бір жағынан NЕЕТ санатындағы және пробация есебінде тұратын жастардың жұмыспен қамтылуы – маңызды рөл ойнайды. Өткен жылы ҚР Парламенті Сенатының депутаты Руслан Рүстемов және ҚР Парламент Мәжілісінің депутаттары Мархабат Жайымбетов, Мұрат Ергешбаев, аудан әкімі Берік Сәрменбаев жастар бригадасының егін егу барысымен танысып, жоғары бағаларын берді, – деді Айдарлы ауылдық округі әкімі аппаратының жастар ісі жөніндегі маманы Өмірзақ Есболатов.</blockquote>Айта кетейік жастар бригадасы елдегі ағайынның ризық-несібесін теріп келеді. Өз кезегінде Айдарлық белсенді жас аталған бастамаға байланысты өз пікірін білдірді.&nbsp; &nbsp;<blockquote>– Ауыл жастарының басын бір арнаға тоғыстырған бригаданың қызметі өз алдына үйлестіріп келеміз. Елді мекендегі әрбір жастың егін егуге, еңбек етуге өз мүмкіндігі бар. Ата-бабамыздан келе жатқан бақша егу кәсібін жандыру – күн тәртібінен түспейді. Алдағы уақытта әлеуметтік маңызы бар азық-түлік өнімдерін халыққа ұсынуға дайынбыз. Маусым соңында егінді бітік жинап, аудан қамбасын астыққа толтыру ойда бар. Әрине, жасалған істің еш кетпегені жақсы, – деді Дархан Әзімханов.</blockquote>

Айдарлылық жастар «Жастар бригадасына» серпін беруде

<a href="https://kyzylorda-news.kz/">Kyzylorda-news.kz</a>. Қызылорда облысының жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев жұмыс сапарымен Қазалы ауданына барды.Қазалы ауданының әкімі Мейрамбек Шермағанбеттің төрағалығымен аудандағы жұмыспен қамту және әлеуметтік қорғау саласындағы мәселелер бойынша мәжіліс өтті.Мәжілісте Ғабит Жаңабаев халықтың жұмыспен, әлеуметтік көмекпен қамтылуы, мүгедектігі бар адамдарды әлеуметтік қолдау бойынша көрсеткіштердің орындалу барысына тоқталды.Мейрамбек Зинабдинұлы жиын барасында бірқатар ауылдық округтердің «Алғашқы жұмыс орны» жобасы, жастарға берілетін 2,5 пайыздық несие, түрлі жобалар үшін мемлекет тарапынан берілетін грант мүмкіндіктерін пайдаланбай, белгіленген көрсеткіштерді мүлде орындамаған округ әкімдеріне қатаң ескерту берді. Сонымен қатар аудандық «Мансап» орталығының директоры Болатбек Баймахановқа кент, қала және ауыл әкімдерімен бірлесе отыра жастардың өз кәсіптерін бастау үшін 2,5 пайызбен жеңілдетілген шағын несие туралы түсіндірме жұмыстарын жүргізуді тапсырды.Жиын соңында аудан әкімі 2024 жылға арналған индикаторларының бекітілген жоспарын өз деңгейінде орындап, мемлекет тарапынан берілген қолдауды тиімді пайдаланып, тұрғындарды, әсіресе, жастарды жұмыспен қамту мәселесін басты назарда ұстау қажеттігін ескертті.Облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев ауданға жасаған жұмыс сапары барысында Мейрамбек Зинабдинұлымен бірге аудандық жұмыспен қамту және әлеуметтік бағдарламалар бөлімі мен аудандық «Мансап» орталығының жұмысымен танысты.<img src="https://knadmin.beoblood.kz/uploads/430657516_717499320569296_6311649156762942849_n_55fecc0ef9.jpg" alt="430657516_717499320569296_6311649156762942849_n.jpg">

Қазақстан және Қызылорда облысының жаңалықтары