&nbsp;<a href="https://kyzylorda-news.kz/">Kyzylorda-news.kz</a>. 8 наурыз – Халықаралық әйелдер күні қарсаңында «AMANAT» партиясы Әйелдер қанатының жиналысы өтті. Іс-шараға Парламент депутаттары, қоғам қайраткерлері сонымен қатар бейне байланыс арқылы партияның облыстық филиалының Атқарушы хатшысы Ләйлә Төрешова мен аймақтық әйелдер қанатының мүшелері қатысты.Жиында әйелдердің қоғамдық және саяси өмірдегі рөлін нығайту мақсатында қабылданып жатқан шаралар мен олардың құқығын қорғауға бағытталған заңнама мәселелері талқыланды.Сөз басында партияның Атқарушы хатшысы Дәулет Кәрібек Әйелдер қанатының бастамасымен көтерілген барлық мәселе назарға алынып жүргенін ескеріп, Мемлекет басшысының жүргізген реформалары аясында гендерлік квоталар кеңейтілгенін атап өтті.<blockquote>«Партиямыз отбасы институтының беделін көтеруге күш салады. Ана мен балаға жан-жақты қамқорлық көрсету – жанұя әл-ауқатының маңызды шарты деп есептейміз. «AMANAT»-тың саяси тұғырнамасында жазылған нақты міндеттің бірі – осы. Себебі Отанды сүю, елге адал қызмет ету, қоғамның белсенді де жауапты мүшесі болу, тұлғалық қалыптасу – тәрбие мен тағылымның жемісі. Әйелдер қауымының отбасындағы, қоғам өміріндегі және мемлекетті жан-жақты дамыту ісіндегі рөлі зор екенін Президент үнемі айтады. Жақында Мемлекет басшысы Қасым-Жомарт Тоқаев Президенттік жастар кадр резервінің форумында «Әйелдерді қызметке тарту керек. Біріншіден, ер адамдар ренжімесін, әйелдер жұмысқа өте мұқият, тиянақты қарайды» деп орынды атап өтті. Осы тұста «AMANAT» партиясы мүшелерінің басым бөлігі, яғни 60 пайыздан астамы әйелдер екенін біз мақтанышпен айтамыз», – деді Дәулет Кәрібек.</blockquote>Жиын барысында Мәжіліс депутаты, «AMANAT» партиясы фракциясының мүшесі Жұлдыз Сүлейменова жуырда ғана Парламенттің төменгі палатасы қабылдаған әйел мен бала құқықтарын қорғауға негізделген Заң жобасына тоқталды.<blockquote>&nbsp;«Заңда денсаулыққа қасақана жеңіл зиян келтіру, ұрып соғу, суицидті насихаттау, суицидке итермелеу, 16 жасқа толмаған адамдарға жыныстық қорлап тиісу және басқа да әрекеттер криминализацияланды. Тұрмыстық зорлық-зомбылық көрген белгілері бар адамдарға уақытша тұруға мүмкіндік беретін отбасын қолдау орталықтарының құзыреттіліктері нақтыланды. Денсаулыққа қасақана жеңіл зиян келтіргені үшін және ұрып соққаны үшін қылмыстық құқық бұзушылық жасаған адамдарды ұстаудың тәртібі реттелді», - деді Жұлдыз Сүлейменова.</blockquote>Жиынды барысында «AMANAT» партиясының Хатшысы Шолпан Каринова еліміздегі әйелдер қауымының беделі жылдан жылға артып келе жатқанын айтып, осы бағытта Әйелдер қанатының нәтижелі жұмысы әлі де жалғасын табатынын атап өтті.

Әйелдер қанаты: Қыз-келіншектерді толғандырған мәселе – «AMANAT» партиясының назарында

Жыл басынан бері облыста 6 өнімнің бағасы жоғарылаған

<a href="https://kyzylorda-news.kz/">Kyzylorda-news.kz.</a> Кәсіп бастағанның өрісі кеңейеді. Өйткені мемлекет тарапынан шағын және орта бизнеске қолайлы жағдай жасалуда. Бұл сөзімізге «Белкөл» кентінің тұрғыны Майра Ізбасқанованың жұмысы дәлел.Жеке кәсіпкер «Өңірлік инвестиция орталығы» арқылы 4 млн теңге қаражатқа қол жеткізіп, жұмысты сәтті жүзеге асыруда.Өнім «Белкөл» сауда белгісімен сатылымға шықты. Бағасы – 120-160 теңге. Шығыны да айтарлықтай аз. Өйткені кір сабын жасау үшін тоң май мен сода пайдаланады. Негізгі тұтынушылары – Сырдария, Жалағаш ауданының тұрғындары. Сұраныс артып жатса, өзге өңірлерге да жібермек ниетте. Осылайша өндіріс орнын үлкейтіп, қосымша жұмыс көзін арттырмақ.<blockquote>&nbsp;Кәсіпті 2022 жылы қолға алып, бизнес жоспарымды сәтті қорғап шықтым. Қаражатыма қажетті станок пен шикізат сатып алдым. Қазір сабынның екі түрін шығарып жатырмыз. Кір сабын шығаратын құрылғыны Алматыдан алдырдым. Аппарат сағатына 500 дана сабын шығаруға қауқарлы. Сапасы жақсы. Өндіріске қажетті шикізатты Тараз, Шымкент қалаларынан әкелеміз. Алдағы уақытта өндіріс орнын ұлғайтсақ деген жоспар бар, – дейді кәсіпкер.</blockquote>Көтерме бағамен сатып алушылар табылып жатса, кәсіпкер бағасын түсіруге әзір. Өндіріс орнында бұдан бөлек сусабын, ыдыс жуатын сұйықтықтар шығарылуда.

Майра Ізбасқанова: Өндіріс орнын ұлғайтқым келеді

<a href="https://kyzylorda-news.kz/">Kyzylorda-news.kz.</a> Талап қылған жанға мүмкіндік көп. Талпынсаң алдыңнан жол ашылады. Бұған уақыт дәлел, жылдар куә болып отыр. Әсіресе қазіргі уақытта мемлекеттің ынталы жанға жігер сыйлап, ілгері ұмтылуға арналған бағдарламалары өте көп. Солардың бірі кәсіпкерлікке бет бұрып, ойлағанын жүзеге асырамын деген жандарға жасалған жағдай. Бұл бағыттағы жұмыстар еліміз тәуелсіздік алғалы бері жалғасын тауып келеді. Десе де соңғы жылдары халықтың көзқарасы, талпынысы ерекше.Жалпы кәсіпкерлікке қадам басу уақыттың жаңалығы емес екенін жақсы білеміз. Білімді, білікті жандар қай уақытта болса да жоспар құрып, сол жоспары арқылы алға жылжудың жолын таба білген. Бұл сөзімізіге Шығыстың ойшылы Ахмед Иүгінекидің «Білікті білім жинап, кәсіп етер, Білімнің дәмін татып, өсіп өнер» деген сөзі анық дәлел.Расында білім өсіп-өркендеудің, өрге қарай жылжудың бірден бір адастырмас жолы десек артық айтқандық емес. Санасы аппақ парақтай тап-таза бүлдіршіндерге дұрыс бағыт, тура жол сілтейтін ұстаздардың да құрметке бөленуі сондықтан. Біздің бүгінгі кейіпкеріміз де ұлағатты жолды таңдап, сол бағытта білім алып, алған білімін өзінің кәсібіне айналдырып отырған жас кәсіпкер Әдемі Қуандықова.1997 жылы Арал қаласы, Құланды ауылында туған Әдемі Ерқосайқызы мектеп қабырғасында жүріп өзіне білім берген ұстаздарына деген қызығушылықпен осы мамандықты таңдайды. Алдымен Қарағанды қаласында «Болашақ» колледжін қазақ тілі мен әбедиеті пәні мұғалімі мамандығы бойынша оқып бітірген ол кейіннен Арқалықтағы «Ыбырай Алтынсарин атындағы педагогикалық институтында» бастауыш сынып оқушыларына білім беру мамандығын оқып шықты.Бірақ мектеп қабырғасындағы шәкірттерге дәріс беру мүмкіндігі болмады. Дегенмен қос дипломмен қарап отыру бүгінгі қоғамда қамсыздықтың бейнесі екенін түсінген Әдемі өз білімін жаңа бағытта жүзеге асырып, қолдан келер жұмысты кәсіпке айналдыруды ұйғарды. Осылайша былтыр «Zeyin» оқу орталығын ашып, осы жерде бастауыш сынып оқушыларына білім беруді қолға алды.Бүгінгі таңда қай салада болмасын оқу бітіріп, бірақ жұмыссыз жүрген жастар көп. Бұл тәуекел етпеуден деп білемін. Байқап қарасақ қыз балалар әдетте оқу бітірген соң тұрмыс құрады. Одан кейін әрбір қыз ана бақытын сезінуі қажет. Осылайша жұмысқа орналасуға мүмкіндік болмай жатады. Бірақ талап қылсаң, көздеген мақсатыңа жетуді ойласаң қазірде мемлекетімізде жан-жақты жағдай жасалған. Мен де қазір үш баланың анасымын. Баламен үйде отырып, олардың сабағына қараймын. Бұл маған өз мамандығым бойынша алған білімімді тәжірибе жүзінде жүзеге асыруға, оны ары қарай дамытуға үлкен көмек болды. Мұнан бөлек өзге де оқу орталықтарында дәріс беріп, балалармен жұмыс істеуге машықтығымды ары қарай дамыта түстім. Бірде жолдасыммен ақылдаса отырып, кәсіпке бет бұруды шештік, – дейді Әдемі Қуандықова.Расында қазіргі қоғамның сұранысындағы кәсіпті жаңылмай тауып, заман талабына сай жұмыс істеуді көздеген кәсіпкер мұнан бөлек:&nbsp;Баланың санасы біліммен, оқумен жетіледі. Білімнің тұрақтылығы оның жиі қайталап, еске салып отырғандығында. «Қайталау – білімнің анасы» деген сөз мұғалімдердің қашаннан ұранына айналған. Оқушының мектепте алған білімі санасында жатталып қалуы үшін тұрақты түрде қадағалап, оны жиі қайталатып отырған абзал. Әлбетте бұл жұмыс ата-ананың үйдегі басты міндеттерінің бірі. Бірақ заманның қазіргі талабы, ағыны бөлек. Ата-аналар балалары бақытты өмір сүруі үшін, олардың тоқ жүруі үшін бірінші кезекте жұмыс жасап, еңбек етеді. Ал баланың сабағын қадағалау көп уақытта мүмкін бола бермейді. Міне «Zeyin» оқу орталығында алдымен соны назарда ұстаймын. Сонымен қатар ата-аналармен, балалардың мұғалімдерімен байланыса отырып, әр оқушының осал тұсы, балаға қиындық тудырып жүрген тақырыптар, пәндер бойынша жұмыс істеп келемін. Бұл ретте жеке оқытуға да сұраныстар көп. Ал осы жүргізілген жұмыстардың нәтижесін орталықтан білім алып жүрген шәкірттердің жетістігінен анық байқай аласыздар. Жақында Қазақстандық интеллектуалды олимпиадалар сайтының ұйымастыруымен 1 сынып оқушыларының білімін тексеру мақсатында математика пәні бойынша орталықтан білім алып жүрген Шерхан Райханов І дәрежелі дипломға ие болды, – деді.Әңгімелесу кезінде жас кәсіпкер алдағы жоспарларымен де бөлісті. Ата-аналар мен балалардың алғысына бөленіп келе жатқан Әдемі «әрбір білім алушым «апай, мен бүгін мектептен бес алдым» деп қуанып келгенде менен бақытты адам болмайды дейді. Расында қазақтан шыққан математик Асқар Жұмаділдаев «Өзіңе ұнаған кәсібіңмен шұғылдансаң, өз ұлтыңның туын көкке көтере алсаң – бақыт деген осы!» деген екен. Баланың бақыты, болашағы үшін еңбек етіп келе жатқан кәсіпкерге біз де сәттілік тіледік.Фото: Нұрболат Нұржаубай

Жас кәсіпкер қосымша білім беру орталығын ашты

<a href="https://kyzylorda-news.kz/">Kyzylorda-news.kz.</a> Әр мамандықтың өзіне тән қиындығы, қызығы, жауапкершілігі бар. Біреулер өзі таңдаған мамандыққа саналы түрде келсе, енді бірі кездейсоқ, өмірдің қақпақылымен, адамдардың нұсқауымен де бет бұрып жатады. Десе де, өнер саласына кез келген адам жүрек қалауымен келетіні ақиқат.Ол алғашында ұстаздық жолды таңдады. Сөйтті де Тараз қаласындағы политехникалық колледжге «программист» мамандығына түсті. Тәмамдаған соң, кездейсоқ таңдаған мамандығын тастап, жүрек қалауымен өнер саласына келді. Ол Алғабас ауылдық мәдениет үйінде өнімді еңбек етіп жатқан Айнұр Ысқақова. Талай-талай бейнені сомдап, көрерменін тәнті еткен мінезді актриса. Тәкәппар жанға, аңыраған анаға, сылқым келіншекке айналу, образға ену кәнігі актриса үшін қиындық тудырмаса да, сахнаға шығарда алғаш рет көрермен алдына шыққан жас актрисадай қобалжитыны да анық. Өнер әлемі, сахна оны шыңдады. Өмірдің тезінен өткізді. Сан қилы жағдайлардан абыроймен шығуға үйретті.<blockquote>– Өнер жолы қиын да күрделі. Оған сарқылмас жігер, қайтпас талап, айнымас мақсат керек. Біздің концерттік бағдарламалармен жүретін, басқа аудан, қалаларға шығатын кездеріміз көп болады. Осындай сәттерде отбасыңның қолдауы өте маңызды. Әсіресе, құдай қосқан қосағыңның. Аллаға шүкір, мен екі жолда да жаңылдым деп айта алмаймын. Өмірлік жан жарым мен мамандығым өзіме ұнайды. Сондай-ақ мен жұмыс істейтін Кенжебай Жүсіптің бастамасымен Алғабас ауылдық мәдениет үйінің жанынан құрылған «Қытық» әзіл-сықақ ұйымы бар. 2006 жылдан бастап мен сол ұйымның мүшесімін. Мен әншілікпен қатар, интермедия ойнап, монолог оқуға қатысамын. Талабы қатты көшбасшымыздың арқасында талай аудандық, облыстық жүлделерді иелендік. Бір сөзбен айтқанда, сахна дейтін бір сиқыр. Оның берері де, үйретері де мол екен. Әрбір бейнелі образ мейірімге, қайырымға, жақынның жанын ұғуға, алысты жақындата білуге үйретті, – дейді өнер иесі.</blockquote>13 жыл сахнада өткен еңбек жолы еленбей қалмады. Мақтау қағазын, алғыс хаттарын алған сәттері өте көп. Әр мереке, театр күндері азды-көпті еңбегі еленіп басшылық тарапынан жақсы сөз, жылы лебіз естіді. Сол марапаттардың ішінде биыл Ақтөбе қаласында өткен Т.Ахтановтың 100 жылдығына орай өткен «Театр – өнердің ұлы көші» атты республикалық байқаудан І орынмен, «Мінекей, Мейірманның ізбасарлары» республикалық әзіл-сықақ байқауынан бас жүлдені иеленді. Ерекше қуанған сәті де сол. Театр сахнасында көз майын тауысып түндер бойы жаттайтын кейіпкердің диалогтары, мінезді ашу үшін, айтар сөзі мен ойнар ойынын шынайы жеткізу үшін күн-түн демей дайындалатын сәттер мен спектакльден кейін көрерменнің тік тұрып көрсетер құрметінің, дуылдай соғылған алақандарының дауысы актриса үшін ерекше қымбат.Айнұр Ысқақовамен тілдескенімізде өнерге деген шексіз махаббаты аңқып тұрды. Тіпті көзінен әлі өнердің шыңына шығамын деген мақсатты байқадық. Айта кетейік, ол кейіннен Шымкент қаласында мәдениет саласы бойынша жоғары білім алып, жетілдірді.&nbsp;

Айнұр Ысқақова: Сахна дейтін бір сиқыр

<a href="https://kyzylorda-news.kz/">Kyzylorda-news.kz.</a> Ауылдағы ағайынның басты табыс көзі – төрт түлік пен егін шаруашылығы. Мемлекет басшысы Қасым-Жомарт Тоқаевтың елді мекендердің еңсесін көтерудегі бұл бастамасы ауылдағы ағайынға әл беретіні ақиқат. Президент тапсырмасынан кейін көп істің көші түзеліп, шалғайдағы ағайынның шаруасы оңалады деген ойдамыз. Өйткені қысы-жазы төрт түлігінің қоңын қамдап, басын көбейтуді мақсат тұтқан шаруа қожалықтарына, егін егетін шаруаларға «Ауыл аманаты» жобасы жақсы мүмкіндік беруде. Бірақ аудан көлемінде бұл жоба саны бір, екіден аспай тұр. Неге?2023 жылы 25 желтоқсанда ҚР Премьер-Министрінің орынбасары Тамара Дүйсенованың төрағалығымен Ақтөбе, Батыс Қазақстан, Түркістан облыстарында «Ауыл аманаты» бағдарламасын іске асыру қорытындылары және келер жылға арналған жоспарлар талқыланыпты. Мұны біз үкімет сайтынан көрдік. Ол жерде Тамара Дүйсенова:<blockquote>– Қаражатты бөлу кезінде әр ауданның ерекшелігін ескерген жөн. Біздің басты мақсатымыз – азаматтарға өз кәсібін ашуға мүмкіндік беру немесе жаңа жұмыс орындарын құру арқылы ауыл тұрғындарының табысын арттыру. Сондықтан әкімдіктер осыған баса мән беруі керек, – деген.</blockquote>Осы жоба бойынша ауданның дерегін ұсынбай тұрып, өзге аймақтарға шолу жасап шығайықшы. Мәселен, Ақтөбе облысында мал шаруашылығы бойынша 2,5 мыңнан аса, өсімдік шаруашылығы бойынша 264, құс шаруашылығы бойынша 285 жоба ұсынылып отыр. Ал Батыс Қазақстан облысы өз тұрғындарын азық-түлік өнімдерімен қамтамасыз етуге ниетті. Өңір басшысының орынбасары Қалияр Айтмұхамбетовтың сөзінше, қазірде өңір өзін әлеуметтік маңызы бар азық-түлік тауарларының сегіз түрімен толық қамтып отыр екен. Енді «Ауыл аманаты» бағдарламасының көмегімен азық-түліктің тағы жеті түрі бойынша көрсеткіштерді жақсартуды мақсат тұтқан. Жоба аясында бастапқыда қаржы көбіне шикізат базасын құруға бағытталмақ болған, енді аймақ қайта өңдеуге басымдық бермек. Келер жылға облыс сомасы 8 млрд теңге болатын 1 345 жоба жоспарлап отыр. Оның басым бөлігін мал мен құс шаруашылығына бағыттау көзделіп отыр.Екі дүние есігі болған Түркістан облысының жоспары сәл өзгеше. Өткен жылы «Ауыл аманаты» жобасына 64 ауылдық округ қатысқан. Аралық нәтижелерге сәйкес 3,5 мыңнан аса жұмыс орны құрылып, атаулы әлеуметтік көмек алушылар санатынан 340 адам шықты. Ауыл шаруашылығы өнімдерін өңдейтін 19 жаңа нысан ашылып, 328 жылыжай құрылысы қаржыландырылды. Азаматтардың өз кәсібін ашуына 120-дан аса жоба мақұлданды. Енді осы тұста облысқа ойыссақ. Дәл осы жобаны жүзеге асыру үшін облысқа 3 млрд теңге бөлінген. Өздеріңіз көріп отқандай, өзге облыстар миллиардтап игеріп жатыр.Тиісінше, Шиелідегі көрсеткіш көңіл қуантпайды. Ауданда өткен жылы 22 ауылдық округ пен кенттен 75 жоба мақұлданған. Кенттен 34 жоба мақұлданса, Бидайкөл мен Қоғалы, Тұраннан 3, ал Ы.Жақаев ауылынан 5, Бәйгеқұмнан 4 жоба ғана өткен. Қалған елді мекендерден тек 1-2 жоба өтіпті. Сонда мемлекеттен беріліп отырған жеңілдетілген несиені біздің аймақтың алуға және оны игеруге қауқары жетпей ме?Кімнің ағаттығы екендігі де беймәлім. Әрине, таяқтың екі ұшы барын білеміз. Алайда қаржы тартудың тиімді тетіктерін таба алмаған ауыл әкімдерінің осалдығы ма дерсің? Ауылға әл беретін жобаға салғырттық танытып жүрген жауапты сала мамандарының немқұрайлылығынан ба деген ой да келеді. Бір айта кетерлігі, ауылдық аумақтарды дамыту тұжырымдамасына сәйкес 2025 жылы спутникті ауылдарды қаржыландыру тоқтауы бек мүмкін.Осы тұста ақын Төлеген Айбергеновтың «Ақын болу оңай деймісің, қарағым, Аузында болу бұл өзі сыздаған барлық жараның...» деген жыр-шумақтарының алғашқы тармағын сәл бұрып, мақалаға тұздық етіп алдық. Мұны әбестік санай көрмеңіз. Жасыратын несі бар, ауылда шешімін таппай, бітеу жара сияқты сыздап жатқан мәселенің, көптен бітпей тұрған көп шаруаның бір ұшы әкімге келіп тиері сөзсіз. Ауылды түлетуге, көркейтуге құлшынысы артып тұрған тұрғынға ауыл әкімі өз тарапынан қолдау беріп, демеп, заң талаптарына сәйкес әр есікті кәсіпкермен қатар жүріп ашып, қажетті құжаттарын әзірлеуге септігін тигізу керек-ақ.

"Ауыл аманаты" жобасы: Шиелідегі ахуал қалай?

<a href="https://kyzylorda-news.kz/">Kyzylorda-news.kz.</a> Қай халықтың да болмысын аша түсетін, елдігін танытатын әлбетте сол елдің ұлттық киімі. Оның құндылығы қашанда өзгелерден биік тұрған. Бірақ бір кездері қазақылығымызды танытатын қастерлі дүниенің кенжелеп қалуы, күнделікті тұрмыстан шеттеуі байқалды. Оған да себеп бар. Себебі егемендікке енді ғана қол жеткізіп, қайтадан аяққа тік тұру жолында көптеген қиындықтардан өттік. Тіпті киім түгілі, ішер асты табу да қиындап, халық өте ауыр күндерді көрді. Бірақ бүгінде жоғымыз табылып, кеткеніміз қайта оралды. Дәл осы уақытта өзгелерді әлемдік брендтермен таңғалдыра алмаймыз десек те артық емес шығар. Есесіне, сол әлемдік брендтердің орнын басатын ұлттық нақыштағы киімдерге сұраныс өте жоғары.&nbsp;Ұлттық киімдерге көнеден келе жатқан тек киім деп қарауға болмайды. Мұнда қазақтың тіршілігі мен танымы, терең тәрбиесі мен нағыз шеберлікті қажет ететін айшықты өнері жатыр. Расында ата-бабамыз киім тігу барысына аса қатты көңіл бөлген. Әр киімді киюдің өзіндік әдебі қалыптасқан. Тіпті киімге салынатын ою-өрнекке дейін жіті қадағалап, мағынасына терең үңілген. Ұлттық киімнің түрлерін дайындауда көшпелі қазақ халқы төрт түлiк малдың жүнi мен терiсiн пайдаланған. Жүндi иiрiп, мал терісін илеп, күнделікті киетін киімдерін дайындаған.Бірақ қазіргі таңда қолжетімділік артып, шикізатты тек жүннен емес, өзге де тауар түрлерінен тұтынушылардың талғамына сай, сұранысына бейімдеп әзірлеуге мүмкіндік мол.&nbsp;Осы мүмкіндіктерді пайдаланып, бүгінде ұлттық киімдерге жаңаша сән беріп отырған тігінші Тұрсын Жәнібекова. Жас кәсіпкер жаңа үлгідегі ұлттық киімдерді әзірлеудің тілін терең меңгерген. Осы салада жүргеніне 2 жыл ғана уақыт өтсе де, шебердің қолынан шыққан дүниелерге сұраныс өте жоғары.«Балапан ұяда не көрсе, өскенде соны алады» демейді ме?! Тәлімі мол тәмсіл Тұрсынның да осы салаға келуіне қозғаушы болған. Бала күнінен әжесі мен анасының жанында отырып, көрпе, құрақ құрауды, көйлек тігуді үйреніп өсті. Кейіннен мектеп қабырғасында жүріп моншақпен жұмыс істеуге машықтанған ол бала күнгі қызығушылығын кәсіпке айналдыруды ойлады.Арманның ақиқатқа айналуын ойлаған тігінші аудандық кәсіпкерлер палатасының кеңесімен өз жұмысын бастады. Мемлекеттің қолдауынан жігерленген Тұрсын жай ғана тігін тігумен емес, ұлттық нақыштағы дүниелер жасауды мақсат етті. Осылайша ұлттық киімдерге ден қойды. Ал былтыр «Бастау Бизнес» жобасы аясында LUNEVIL кестесі негізінде ұлттық киім тігу бағыты бойынша 1 225 200 теңге грантты жеңіп алған кәсіпкер «Бұл жастарға берілген үлкен мүмкіндік. Әркім өз кәсібін бастауға ниетті. Ал сол кәсіпті бастап, кейіннен түрлі қиындықтарға байланысты жарты жолдан тастап кетіп жатқандары қаншама. Оларды естіп, көріп жүрміз. Бірақ жас кәсіпкерлерге берілген қайтарымсыз грант осы қиындықтың нақты шешімі дер едім. Өйткені өз жұмысымды одан әрі дамытуды ойлап жүрген маған үлкен көмек болды. Қажетті техникаларды алдым. Олар маған бұрынғыдан да көп мүмкіндіктер сыйлады» дейді. Мәселен, ұлттығымызды танытатын киімдерді атай қалсақ, алдымен қазақтың түрлі ою-өрнегі мен кестелері еске түсе кетеді. Бірақ оның киімге қондыру үшін көптеген функциялар жасалуы қажет. Ал арнайы техникалар мен машиналар осы функцияларды орындауды жеңілдетіп, тапсырыстың барынша тез дайындалуына жағдай тудырады.Сондай-ақ өз сөзінде Тұрсын Сарқұлқызы:&nbsp;Негізінен ұлттық нақыштағы киімдердің салтанат құратын жері тойда екені жасырын емес қой. Талай қиындықтардан өтсек те, еліміз халықтың қазынасы саналған тойда қазақ деген ұлттың қандай боларын анық көрсетіп келді. Әлі күнге дейін солай. Қыз ұзатуға арналған ұлттық киімдерге өте көп тапсырыс түседі. Сонымен қатар тұсаукесер тойларына да тапсырыс беретіндер аз емес. Бірақ біздің ұлттық киімдеріміз тек осындай жерлерде қолданылады деп ойлауға да болмайды. Өйткені ұлттық нақыштағы заманауи киімдерді күнделікті тұтынғысы келетіндер бар. Әсіресе қыз балалар осы бағыттағы тапсырыстарды жиі береді. Қазіргі заманауи киімдерде ұлттық болмысымыздың көрініс табуы нағыз бақыт деп білемін, – деді.Жас кәсіпкердің алға қойған мақсаты да айқын. Алдағы уақытта «Сырғалым» брендімен көшшіліктің сұранысын орындағысы келеді. Қазақтың әрбір сырғалысы осы брендтің өнімін пайдаланып жатса, ауданның абыройы, кейіпкеріміздің бақыты емес пе?!"Шебердің инесі де, күймесі де – алтын" демекші, тапсырыс берушінің талғамына сай келетін ұлттық киімнің қалай дайындалатынын өте жақсы білетін Тұрсыннан алдағы уақытта тек жақсы жаңалықтар күтеміз.

Қайтарымсыз қаржатпен ұлттық киімді насихаттаған жас кәсіпкер табысын молайтты

<a href="https://kyzylorda-news.kz/">Kyzylorda-news.kz.</a> Қазақстандықтарға коронавирус инфекциясы мен қызылшаның алдын алу мақсатында тағы да маска тағу ұсынылды. Бас мемлекеттік санитарлық дәрігер Айжан Есмағамбетова ауа-тамшы жолымен берілетін жұқпалы аурулардың алдын алу шараларын күшейту туралы тиісті қаулыға қол қойды.Қаулыда облыстардың, Алматы, Астана, Шымкент қалаларының денсаулық сақтау басқармаларының, санитариялық-эпидемиологиялық бақылау комитетінің аумақтық департаменттерінің басшыларына медициналық ұйымдарда персонал мен келушілердің медициналық маскаларды қолдануы, антисептиктердің болуы, COVID-19 коронавирус инфекциясының, тұмаудың және ЖРВИ алдын алу шаралары туралы халық арасында ақпараттық-түсіндіру жұмыстарын жүргізу тапсырылды.Сондай-ақ бас санитар облыстар мен Алматы, Астана, Шымкент қалаларындағы халық көп жиналатын жерлерде: әуежайлар, теміржол вокзалдары, автовокзалдар, базарлар, сауда-ойын-сауық орталықтары, сауда үйлері, театрлар, кинотеатрлар, ХҚКО, банктер т.б. және көліктің барлық түрлерінде, атап айтқанда,&nbsp; қоғамдық көлік, әуе, теміржол қатынастарында медициналық немесе матадан тігілген маска пайдалануды ұсынды.Ал біздің аймақта эпидахуал қалай?Облыстық санитариялық-эпидемиологиялық бақылау департаментінің мәліметтеріне сүйенсек,&nbsp; облыста коронавирус инфекциясы бойынша эпидемиологиялық ахуал тұрақты деп бағаланады. Былтыр&nbsp; коронавирус инфекциясын жұқтырудың 118 дерегі анықталған. Оның ішінде 14 жасқа дейінгі балалар үлесі 47 деректі құрады. Ал биыл жыл басынан бері коронавирус инфекциясының 37 жағдайы тіркелген. Оның 27-сі қаңтар айында анықталса, ақпанда 10 жағдай орын алған. Басым көпшілігінде ауру симптомдарымен.<blockquote>Еліміздің бірқатар өңірде КВИ бойынша аурушаңдық көрсеткіштерінің артуы байқалады. Сондықтан ауа тамшылары арқылы жұғатын инфекция болғандықтан, өзге аймақтарға таралу қаупі бар екендігі жоққа шығарылмайды. Бұдан бөлек, күз, қыс, көктем мезгілдері тұмау, жіті респираторлы-вирусты инфекциялардың эпидемиологиялық маусымы саналады. Биыл қаңтар айында облыс көлемінде жіті респираторлы-вирусты инфекцияның 16514 дерегі тіркелсе, тұмаудың 78 жағдайы анықталды. Тұмаудың эпидахуалын тұрақтандыру және ауру деңгейін төмендету мақсатында жыл сайын жергілікті бюджеттен тұмауға қарсы вакцина сатып алынады.&nbsp; Биылғы эпидмаусымға 84430 доза вакцина алынып, Үкімет қаулысымен бекітілген тиісті контингенттерге жүргізілді. Олар – медицина қызметкерлері, медициналық ұйымда диспансерлік есепте тұрған және балалар үйлерінің, сәбилер үйлерінің балалары, қарттар үйінің контингенті. Сондай-ақ эпидемиологиялық көрсетілімдері бойынша жүргізіледі. 83168 адам&nbsp; тұмауға қарсы екпе алып, ағзаның қорғаныс қабілетін күшейтіп алды, – деді облыстық санитариялық-эпидемиологиялық бақылау департаментінің басшысы Динара Жаңабергенова.</blockquote>Қалай дегенде де, жұқпалы аурудан қорғану қажет. Өткеннің сабағы естен шықпағаны абзал.Фото: Нұрболат Нұржаубай

Аймақтың эпидахуалы қалай?

<a href="https://kyzylorda-news.kz/">Kyzylorda-news.kz</a>.&nbsp; Биыл Солтүстік Кавказ халықтарының Қазақстанға депортацияланғанына 80 жыл толды. Осыған орай Қызылордада Достық үйінде республикалық ғылыми-тәжірибелік конференция өтті. Тағылымды іс-шараға ғалымдар, саясаттанушылар, қоғам қайраткерлері, саяси қуғын-сүргін көрген жандар мен олардың ұрпақтары келіп, зұлмат жылдардың оқиғаларына байланысты түрлі тақырыптарда әңгіме өрбітті. Сондай-ақ, Қызылорда облыстық ҚХА мүшелері, этномәдени бірлестіктер, облыстық ҚХА жанындағы құрылымның төрағалары мен мүшелері, БАҚ өкілдері қатысты.Конференция басталмас бұрын Достық үйінің фойесінде келген қонақтарға қазақтың бойтұмары туралы пролог &nbsp;көрсетіліп, жастарға құлақ үлестіріп, облыстық ҚХА жанындағы Ақсақалдар кеңесінің мүшесі Серік Ыдырысов ақ батасын берді. Қазақтың құты - құрттан дәм татып, облыстық мұрағат көрмесі және облыстық этномәдени бірлестіктерінің көрмесін тамашалады.Айта кететіні, конференция аясында 1 наурыз – Алғыс айту күніне орай ел бірлігін нығайту бағытында өңірімізде қайырымдылық «Қоржын» акциясы бастау алып, 5 отбасыға 20000 теңге көлемінде сертфикат табысталды. Бұл акцияға «Әкелер одағы» ҚБ облыстағы филиалының төрағасы Ержан Ескендір, өңірлік ҚХА құрылымдарының өкілдері және этномәдени бірлестіктер атсалысты.Конференция модераторы, облыстық қоғамдық даму басқармасының басшысы Алмасбек Есмаханов алғы сөз сөйлеп, конференция маңыздылығын айтып өтті.<blockquote>&nbsp;Ұлы Отан соғысы басталысымен халықтарды депортациялаудың жаңа кезеңі басталды. 1944 жылдың ақпан-наурыз айларында Солтүстік Кавказ халықтарын күшпен қоныс аудару басталып, Қазақстанға және Қырғызстанға барлығы 602193 адам көшірілді. Оның ішінде шешендер мен ингуштер 496460 адам, қарашайлар 68327, балқарлар 37406 адам. 1944 жылдың қарашасында Месхетияның 220 елді мекенінен 110 мыңнан астам түріктер Орта Азия республикалары мен Қазақстанға көшірілді. Депортациялаудың ауыр зұлматы Солтүстік Кавказ халықтарын қиын жағдайға душар етті. Содан соң қалмақтар мен қырым татарлары көшірілді. Соғыс жылдарындағы республика халқының ұлттық құрамында орын алған өзгерістер, Қазақстан халқының көпұлтты сипатының қалыптасуында шешуші рөл атқарды,− деді А. Әбілқасымұлы. &nbsp;</blockquote>Мұнан соң республикалық «Күштеп қоныс аударылған азаматтар Қазақстанда өздерінің екінші Отанын тапты» тақырыбында Мұхаммед Хайдар Дулати атындағы Тараз университетінің Дулатитану және Өңір тарихы ғылыми-зерттеу орталығының басшысы т.ғ.к. профессор Сейдехан Бахторазов, «Вайнах» шешен-ингуш этномәдени бірлестігінің тең төрағасы Ахмет Мурадов онлайн байланыс арқылы, республикалық «Ахыска» түрік этномәдени орталығы қоғамдық бірлестігінің төрағасы Аскер Пириев, «Шешендердің Қызылорда облысына қоныстану тарихы» тақырыбында Қорқыт Ата атындағы Қызылорда университеті «Тарих» кафедрасының профессоры, тарих &nbsp;ғылымдарының кандидаты ҚХА жанындағы ғылыми-сарапшылық тобының жетекшісі Айтжан Оразбақов, "Қызылорда облыстық мемлекеттік архиві" КММ директорының орынбасары Жанат Алтынбаева ғылыми баяндамалар жасады.Баяндамашылар Қазақстанға 1943-1944 жылдары Солтүстік Кавказ халықтарының депортациялау мәселелерін талдап, жер аударылған халықтардың тарихын зерделеудегі жаңа тәсілдер қарастырылып, зерттеушілер оның көптеген саяси, әлеуметтік, экономикалық, құқықтық, философиялық, адамгершілік аспектілерін қарастыруға мүмкіндік алды.&nbsp;

Солтүстік Кавказ халықтарының Қазақстанға депортацияланғанына 80 жыл

 Жаңақорғанның  жоспары мен межесі қандай?

<a href="https://kyzylorda-news.kz/">Kyzylorda-news.kz</a>. Наурыз айының 10-11 күндері алғаш рет ҚР ҰҚК Шекара қызметі басшысының кубогына арналған қазақ күресінен республикалық турнир өтеді. Екі күнге жалғасатын сайысқа еліміздің әр өңірінен жасақталған 20 команда мен 150-ден астам шекара қызметшілері қатыспақ. Бұл жөнінде Өңірлік коммуникациялар қызметінің ақпарат алаңында ҚР ҰҚК Шекара қызметі Қызылорда облысы бойынша департаменті бастығының орынбасары, полковник Серік Абусұлтанов хабарлады<blockquote>– Қазіргі таңда шекарашылар арасындағы республикалық сайысқа тыңғылықты дайындық жүргізудеміз. Жалпы жоспар бойынша еліміздің әр өңірінен келген қатысушыларды 8 наурызда қарсы алатын боламыз. Ал, 9 наурыздан бастап «Евразия» спорт кешенінде әскери қызметшілермен практикалық семинарлар, арнайы жаттығулар, салмақ өлшеу, жеребе тастау, жарысты ұйымдастыру тәртібін нақтылау сынды бірқатар шаралар ұйымдастырылады. 10 наурыз күні республикалық жарыстың негізгі бөлімі басталып, 11 наурызда жарыс қатысушылары финалда бақ сынайды. Сайыста топ жарып, жеңімпаз атанған шекарашылар дәл сол күні марапатталатын болады. Республикалық турнирге қатысушыларға сәттілік тілейміз, - деді Серік Есенжолұлы.</blockquote>Екі күнге жалғасатын сайысқа еліміздің әр өңірінен жасақталған 20 команда мен 150-ден астам шекара қызметшілері қатыспақ.&nbsp;<blockquote>– ҚР ҰҚК Шекара қызметі спорттық сайыстарға көп көңіл бөледі. Әскери қызметшілердің аталмыш бағыттағы жарыстарда белсенді болуын және қатысуын қамтамасыз етуге тырысамыз. Жыл сайын дәстүрлі түрде шекарашылар арасында республикалық турнирлер өткізіліп тұрады. Биыл да осы дәстүрді жалғастырып, мереке қарсаңында әскери қызметшілер өзара бақ сынамақ, - деді ҚР ҰҚК Шекара қызметі Қызылорда облысы бойынша департаментінің аға офицері Әкімжан Төлебай.</blockquote>Фото: Өңірлік коммуникациялар қызметі&nbsp;

Қызылордада "Шекара барысы" республикалық турнирі өтеді

<a href="https://kyzylorda-news.kz/">Kyzylorda-news.kz.</a>&nbsp; Ел тәуелсіздік алғалы солтүстік өңірлердегі көштің ағыны тоқтаған емес. Әріге бет түзегендер мен нәсіп тартып ірі қалаларға қарай үдере көшкендердің есебі қисапсыз. Содан-ақ, біздегі жұмыс күшінің тапшылығы сезіледі. Жасыратыны жоқ, оңтүстік пен батыс өңірлердегі біршама отандасымыз екі қолға бір күрек таппай жүр. Аймақтардың еңбек ресурстары арасындағы осы мәселені жою үшін арнаулы мемлекеттік бағдарлама түзіліп, жүзеге асты. Олардың ішінде, біздің ауданнан солтүстікке көшкендердің де саны аз емес. Соның бірі – Рабиға Бердімұратова.&nbsp;Ә дегеннен әңгімесін әріден бастаған ол Қазалы қаласында 16 Максим Горький атындағы мектепте оқыған. Білімі жоғары, орыс тілі әдебиеті пәнінен мұғалім және Бастауыш білім беру, Балабақша тәрбиешісі және де аспаздық қысқа мерзімді курсын тәмамдаған. Екі ұлдың анасы.&nbsp;– Мен, 2014 жылы оңтүстіктен солтүстікке көш бағдарламасын білгеннен бастап, солтүстікті зерттеп келдім, аралап көріп, дегендей оның ішінде. Қостанай, Петропавл, Павлодар қалаларын барып, аралап көрдім. Барған күнде немен айналысады, күнкөріс деңгейі қалай, табиғаты, жол қатынасы қалай деген ішкі сұрақтарыма жауап таптым. Соның ішінде, ең жақсы ұнағаны Павлодар облысы болды. Ескі әдемі, табиғаты керемет қала. Оның үстіне бас қала. Астанаға жақын екен. Қазалы мен Қызылорда қаласы секілді. Мен өзім табиғатты жақсы көргендіктен қалаға жақын Ертіс өзенімен Омск трассасының бойындағы ауылға көшіп келдім. Келген бойда, мектеп жанындағы шағын орталыққа тәрбиеші болып орналастым. Бәрі жақсы әрі заңды. Бағдарлама бойынша жан басына бөлінетін квотамызды алдық. Керегімізге жараттық. Көлік жалдап барлық мүлкімізбен көшіп келдік. Екі студент баламмен, жағдайымыз жақсы. Барлық жағдайы жасалған. Жаңа үйге қоныстандық. Есік алдында үлкен егістік алқаптар бар. Қалаға дейін көкөністі егіс алқаптары. Демалыс күндері жұмысқа шығып, көкөніс теріп, қосымша ақша да табамыз. Жазғы демалыста оқушылар да егістікке жұмысқа шығып ақша табады. Адал еңбекпен таңғы 8-ден кешкі 5-ке дейін бос жүрген адам көрмейсіз, – дейді ол.&nbsp;Жерлесімізден туған жерге қайта ораласыз ба деп сұрағанымызда оның нақты шешім қабылдап, сол жаққа сіңіскенін аңғардық.&nbsp;– Қазалыға қайтамын деп емес, осында өсіп-өнемін деп келдім. Ал, болашақта балалар туған жерде тұрамын десе қарсы емеспін. Мұнда, жұмыс бабында өсуге еш кедергі жоқ. Қолыңнан келсе, құжатың сәйкес болса, қалаған жұмысыңа таныс-тамырсыз орналаса аласыз.&nbsp;Қазақстанның 85 процент жерін аралап көрген адам ретінде айтсам, бұл жақта заң бар. Мысалы, қоғамдық көліктерде 15 жасқа дейін оқушылар, көп балалы аналар, мүгедек жандар тегін жүрсе, зейнеткерлер 50 процент жеңілдікпен жүре алады. Ауылдық жерге баратын қоғамдық көліктерге студенттерге жарты билет төлейді. Сосын аурухана, емханаларында мүгедектік анықтамасы барлар кезектен тыс босатылады. Қала таза әдемі халқы өте мәдениетті.&nbsp;Көшуге ниет білдіруші қазалылық жерлестеріме қорықпаңыздар, келіңіздер дегім келеді. Үкіметтен қолдау барда көшіп келіп солтүстікті бірге дамытып, өсіп-өнуге бірге Қызылорда секілді қазақы қала қылуға шақырамын. Солтүстік те біздің жеріміз, өз еліміз. Келем деушілер болса үкіметтен бөлінген тегін жатақхана бар. 10 күнге дейін жатып, аралап ұнаған жеріңізді таңдауыңызға, қалаған жұмысыңызға орналасуға болады. Айтқандай, бұл жақта да қызылордалықтар жетерлік. Шымкент пен Түркістаннан келгендер де өте көп. Одан қалды шет елдегі қандастарымыз да бар. "Ебін тапқан екі асайды" дегендей үкіметтен берілетін көмекті алы, осындай керемет жерге келіп, кәсіп бастап кетсеңіз болады, – дейді Рабиға Серікқызы.&nbsp;Қазалылықтар жалғыз Павлодар облысында ғана емес, Қостанай, Петропавл сынды аймақтарда да бар. Сонымен қатар кейіпкеріміздің ықпал етуімен Қызылорда, Шымкент, Түркістан, Ақтау, Өзбекстан, Түрікменстаннан бірнеше отбасы көшіп келген.

Қазақстан және Қызылорда облысының жаңалықтары