<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев дәстүрлі Жолдауында «Тегін техникалық және кәсіби білім беру» жобасы жалғасатынын жеткізді. «Бүгін таңда NEET санатындағы 237 мың жас оқу да оқымайды, жұмыс та істемейді. Жыл сайын мектеп бітірген 50 мың түлек оқуға ақылы негізде түседі. Олардың 85 пайызы – тұрмысы төмен отбасының балалары. Бұл жағдайды түзету қажет. Сұранысқа ие барлық мамандық бойынша техникалық және кәсіби білім жүз пайыз тегін берілуі керек» деген болатын.Жасырып қайтеміз, жастардың жұмыссыздығы күн тәртібінен түспей тұр. Қоғамда оны «Neet санатындағы жастар» деп атап кеткен. Шетелде әлдеқашан қолданысқа енген бұл термин елімізде бірнеше жыл бедерінде ғана айтылып келеді. Қазақша нұсқасында «жұмыс істемейтін, оқымайтын, өзге де пайдалы іспен шұғылданбайтын, бос жүрген адам» дегенді білдіреді. Ал үкімет бұл санаттағы жастардың қатарын азайту үшін жүйелі жұмыс істеп, Президент пәрменін орындауда.Ауданда жастардың саны – 25 442. Жалпы халықтың 30,2 проценті. Neet санатындағы жастардың саны – 968. Бұл аудандық жастар ресурстық орталығы мамандары ұсынған дерек. Бұған қарап соңғы бес жылда аталған көрсеткіштің едәуір жақсарғанын байқаймыз. Ендігі міндет – алдағы уақытта осы жұмысқа құлықсыз жастардың қатарын тағы да азайту.«Еңбек – адамның екінші анасы» деген тағылымды тәмсіл бар. Тәрбиелік мәні терең бұл сөздің мағынасын «Адамды адам еткен – еңбек» деген тағы бір дана сөз аша түседі. Иә, адамды өсіретін де, өшіретін де еңбек. Өмірден өз орнын тауып, тұлға болып қалыптасуына да еңбек әсер етеді. Өкініштісі, қазіргі таңда осынау құндылықты құнттамайтын, еңбек етуге, ізденуге құлықсыз, ынта-жігері жоқ жастар да арамызда жүр. Жоғары оқу орнын немесе колледжді бітірген жастар дипломын қолына ала салып, жұмысқа орналасуды қалайды. Дереу әкім не прокурор болып, лауазымды орында отырғысы келетіндер де бар. Мойындау керек, үш дипломмен келсең де, есігін айқара ашып, жайлы орын дайындай салатын мекеме жоқ қазір. Сол үшін статусы биік қызметке жету үшін маңдай тер, еселі еңбек керек. Бір жағынан кейбір мекемелер ұсынған жалақы жастардың көңілін көншітпей жатады. Екі қолға бір күрек таппаған соң олар жұмыссыз жастардың санын көбейтуде.Осындай пробелманың алдын алу үшін мемлекет жас мамандарға «Дипломмен ауылға», «Жастар тәжірибесі», «Серпін» секілді бірнеше бағдарлама мен жоба ұсынып отыр. Мәселен, өткен жылы «Бастау Бизнес» кәсіпкерлік негіздерін оқыту курстарынан 1587 азамат онлайн түрде оқып, сертификат алған. Сондай-ақ 2022 жылы аудандық жұмыспен қамту орталығына 723 азамат жұмыс іздеуші ретінде тіркеліп, оның 689-ы тұрақты жұмыспен және жұмыспен қамтудың мемлекттік қолдау шараларымен қамтылған. Осыған қарап мемлекет тарапынан жұмыссыз жастардың мәселесін шешуге арналған көптеген жұмыс атқарылып жатқанына көз жетті. Жастар өз кезегінде бұл қамқорлықты бағалап, тиімді пайдалануда. «Болашақ – жастардың қолында» екенін ескерсек, мемлекет те, жастар да бойкүйездік һәм масылдықпен күресті тоқтатпауы керек. Сонда жастар Neet санатынан – серт санатына ауысары хақ.

Шиелі: Neet санатындағы жастар саны – 968 

&nbsp;<a href="https://kyzylorda-news.kz/">Kyzylorda-news.kz</a>. Әйел - нәзік жаратылыс иесі. Десе де, оның бітім-болмысы кез келген ердің ауыр жүгін көтеруге қауқарлы. Қазақта ерте жасынан еңбекке араласып, ерлермен бірге иық тіресе қызмет еткен әйелдер аз емес. Болмысынан мықты, қажырлы, бесаспап жанның бірі - Қазына Өзденбаева да бір бойына бірнеше талант жиған асыл жан. Жастайынан ауыр техникаларды тізгіндеген ол кейіннен қолына қалам алып, жұртшылықты керемет туындыларымен тебірентті. Ақындар айтысында да талай мықтыны аузына қаратып, елдің қошеметіне бөленді. Бүгінде 70-тің төріне шыққан еңбек ардагері немере сүйіп, бар білген қазынасын үйретіп отыр. &nbsp;Өңірлік коммуникациялар қызметінің ақпарат алаңына ҚР Журналистер одағының мүшесі, ақын, сатирик-журналист, еңбек ардагері Қазына Мералықызы қонақта болып, өзінің өмір жолын баяндап берді.<blockquote>– Өзім Жалағаш ауданының тумасымын. Біз бой жете бастаған шақта қыздардың барлығы дерлік техника тізгіндеді. Ол кезде облыста 85-ке жуық қыз-келіншек ерлермен бірге рөлге отырдық. Мектеп бітірген бойда көлік жүргізу мектебіп оқып, жүргізуші куәлігін алдым. Осылайша “Газ 51” деген көлікті жүргіздім. Арада 1-2 жыл уақыт өткен соң “Зил-130” маркалы ауыр жүк көлігін айдай бастадым. Алайда, бұл машинаға ауысу үшін өзімді өзгелерге дәлелдеу керек болды. Есімде, тыңның 20 жылдығына орай еліміздің түкпір-түкпірінен 2 700-ге жуық азамат Қостанай қаласына жиналдық. Сол жиналған 2 700 ер азаматтың арасында мен ғана жалғыз қыз болып бардым. Бұл менің көзсіз ерлігім еді. 19 жасымда осынша ер азаматпен үш ай бірге бидай тасып, талай жерді, орман мен көлді аралау екінің бірі бара бермейтін ерлік еді. Сөйтіп, аман-есен туған жеріме оралып, еліме қызмет етуді жалғастырдым. Сонау бір жетпісінші жылдары Жезқазған трассасында, Арал мен Ырғыз арасындағы жол құрылысына қатыстым. Тіпті, таңғы сегізден кешкі сегізге дейін сегіз тісі бар соқамен 15 гектар жерді жыртып, “комбайн” мен “касемсоттан” түспейтін күндерді де басымнан өткердім. Ал жасым отызға таяған шақта домбыра үйреніп, кейін “Жас жыраулар” мектебінде айтыскер ақындарды тәрбиелейтін жетекші ұстаз болдым. Әр жылдары “Ақмешіт ақшамы”, “Ақмешіт апталығы” газеттерінде сатира бетін жүргіздім. Поэзияны бала кезден серік етсем де, сатира өнеріне аяқ асты келдім. Десе де, бұл менің бағымды ашқан өнер болды. Бүгінде 3 ұл мен 1 қыздың аяулы анасы, немерелерімнің сүйікті әжемісін. Бүгінгі күнді пайдалана отырып, барша нәзік жанды аруларды келе жатқан мерекесімен құттықтаймын! Қазақтың батыр қыздары көбейе берсін, – деді Қазына Мералықызы.Фото: Қызылорда облысының Өңірлік коммуникациялар қызметі</blockquote>

Қазына Өзденбаева: “Комбайн” мен “касемсоттан” түспейтін күндерді де басымнан өткердім

<a href="https://kyzylorda-news.kz/">Kyzylorda-news.kz</a>.&nbsp; Әдетте, әскери қызметкер десе көз алдымызға ер азаматтардың бейнесі келеді. Алайда, ақ найзаның ұшымен, ақ білектің күшімен келген қасиетті жерді қорғауда қазақтың арулары да өз қажыр-қайратын аз жұмсаған жоқ. Шекарасы бекіген қазіргі Тәуелсіз еліміздің тыныштығын сақтауда нәзік жандылардың зор үлесі бар. Солардың бірі – ҚР ҰҚК Шекара қызметі Қызылорда облысы бойынша департаментінің әскери қызметші Толқынай Ізімбетова еліне адал қызмет етіп, шекара қорғауда қайсарлық танытып жүрген жанның бірі. Бүгін Өңірлік коммуникациялар қызметінің ақпарат алаңында Толқынай Ізімбетова өз саласына тоқталды.<blockquote>– Мен Қызылорда облысының шекара қызметі департаментінде 2007 жылдан бері қызмет атқарамын. Бұл қызмет мен үшін үлкен абырой, зор мақтаныш. Менің бұл салаға келуіме өз ұстазым себеп болды. Сол жылы “Сыр сұңқары” деп аталатын әскери оркестрдің мүшесі болдым. Оркестрмен бірге Қазақстанның түкпір-түкпірін аралап, түрлі сайыстарда ән шырқадым. 2013 жылы қарулы күштер арасында өткен сұлулық сайысына қатысып, жеңімпаз болдым. Одан кейін Ресейде өткен халықаралық байқауға еліміздің атынан жалғыз өзім қатысып, лауреат атандым. Бұл менің еңбек жолымдағы ең үлкен жетістігім деп білемін. Бүгінде ата-бабамыздан мұра боп қалған кең байтақ жеріміздің шекарасын ерлермен бірге иық тіресіп, бір сапта күзетіп келемін. Мамандығыммен мақтанамын. Сөзімді қорытындылай келе, барлық қыз-келіншектерді 8 наурыз - Халықаралық әйелдер күнімен шын жүректен құттықтаймын! Елімізге амандық, жұртымызға тыныштық тілеймін, – деді Толқынай Маратқызы.Фото: Қызылорда облысының Өңірлік коммуникациялар қызметі</blockquote>

Толқынай Ізімбетова: Мамандығыммен мақтанамын

<a href="https://kyzylorda-news.kz/">Kyzylorda-news.kz.</a> Дүйсенбі. Басылымның сейсенбідегі бір беті менің мойнымда. Газеттің бұл жолғы санын тұтастай мәдинет саласына һәм сол салада жүрген майталман мамандарға арнауды жөн көрдік. Себебі бұл шежірелі өлкеден өнер десе, ішкен асын жерге қоятын талай таланттылар қанат қаққан.Сондықтан тек бізге берілген мағлұматтарға сүйене алмай, мәдениет саласының қыр-сырын көрмекке аудан орталығының қақ төрінен орын тепкен өнер орталығына қарай беттедік. Көп ұзамай діттеген жерге де табан тіредік. Бұл жерде нағыз өнерпаздардың қара шаңырағы деседі. Елдің айтуындай-ақ бар екен. Есіктен ентелей сала құлағымызға бірден әуен естілді. Құдды бір симфония дерсің. Алдыға бес-алты қадам басқан соң, әлгі әдемі үнге сүйріктей саусақтарын қозғап, мың бұралып, талдырмаш мүсінімен таңқалдыра билеп биші екенін байқадық. Ол есіктен тілшінің келіп тұрғанын аңғарса да, музыканың ырғағына тербеліп, билеуді әрі қарай жалғастыра берді. Біз де ішімізден бидің бекзат өнер екеніне тағы да көз жеткізіп, сүйсініп тұра бердік.Сәлден соң нәзік қимыл, әдемі әрекетті, сұлу қозғалысты суреттеген жан бізге қарай жақындады. Дереу келген жөнімізді айтып, би өнері жайлы мағлұматқа қанықтық. Кейіпкеріміз «Би – ол өмір сүру символы» деп сөзін бастады. Әрмен қарай «Түсіне білген адамға әр қимылдың астарында мән мен маңыз, тарих пен аңыз бар. Осы бір әсем өнердің әр қимылын сұлулықпен үйлестіре білетін жүрген бишілеріміз өз шеберліктерін күн сайын шыңдап отырады» деп сөзін жалғай түсті.Бұл М.Әуезов атындағы Оңтүстік Қазақстан университетінде «хореография» мамандығын тәмамдаған – Нұршат Қанатқызы. Қазіргі таңда Б.Қабылұлы атындағы мәдени-шығармашылық орталығы жанындағы «Жас дәурен» халықтық ән-би ансамблінің балетмейстері болып жұмыс істейді. «Жас дәурен» би үйірмесінде 40-қа жуық оқушы бар. 6-14 жас аралығында кіші топ, одан әрі жоғары топ шәкірттерін дайындауда. Аудан бишілерінің алған асуы көп. Алайда шығар биігі әлі алда. Мәселен, І-республикалық «KERUEN» байқауынан бірінші орынды қанжығалады. Сондай-ақ биыл «Таланттар топ жарған күн» облыстық заманауи өнер байқауынан ІІІ орыннан қара көрсетсе, «BELES» республикалық байқауынан І орын иеленді. Республикалық «NOMAD» байқауынан би тобы бас жүлдені қанжығасына байлады. Атап айта берер болсақ жетістіктерінің соңы көріне қоймасы анық. Ал кәсіби биші дайындау жолында қажырлы еңбегімен көрініп жүрген Нұршат Қанатқызы «Үздік ұстаз» алғыс хатын алған.

Нұршат Қанатқызы: Би – өмір сүру символы

<a href="https://kyzylorda-news.kz/">Kyzylorda-news.kz</a>.Әлеуметтік желіде байқаудың марапаттау рәсімі ақылы түрде өтетіні, құны 25 мың теңге тұратыны туралы хабар тарап, ата-аналардың наразылығын тудырды, деп жазады <a href="https://egemen.kz/">Egemen.kz</a>.Желіде тараған ақпаратқа сәйкес, олимпиадада жеңіске жеткен оқушылар 25 мың теңгеден өткізуі керек. Бұл ақшаға жеңімпаздың дипломы, төсбелгісі, оған қоса оқушыны дайындаған мұғалімге, ата-анасына алғыс хат жіберілетіні жазылған. Демек, марапаттың бәрін оқушы «сатып алуы қажет».Оқу-ағарту министрлігінің баспасөз қызметі бұл ақпаратқа байланысты пікір білдірді.&nbsp;Ведомство өкілдері ұсынған деректерге қарағанда, Қазақстанда ресми түрде ауыл оқушыларына арналған келесі олимпиадалар бар:<ul><li>ауыл мектептерінің 9-11(12) сынып оқушыларына арналған жалпы білім беретін пәндер бойынша республикалық олимпиада;&nbsp;</li><li>ауыл мектептеріне арналған «Мың бала» ұлттық зияткерлік олимпиадасы және&nbsp;IQanat Олимпиадасы.</li></ul>Министрлік тізімде көрсетілген байқаулар тегін өткізілетінін алға тартты. Айта кетсек, желіде дау тудырған «Дарынды 1000 бала» атты республикалық байқау тізімнен көрінбеді.<img class="image_resized" style="width:1057.3px;" src="https://inbusiness.kz/uploads/2024-3/Grtrcu33.jpg" alt="">Фото: Kozachkov Telegram-арнасы<blockquote>«Ауыл оқушылары арасындағы «Дарынды 1000 бала» олимпиадасы № 514 бұйрыққа енбеген және ресми іс-шара емес екенін хабарлаймыз. Облыстық білім басқармаларына мұғалімдер мен ата-аналарға түсіндіру жұмысын жүргізу тапсырылды», ведомство хабарламасында.</blockquote>

«Марапатты сатып алу қажет»: оқушылар олимпиадасы әділ өтпей ме?

<a href="https://kyzylorda-news.kz/">Kyzylorda-news.kz</a>.Қазгидромет Қазақстан аймақтарында 2024 жылғы 7 наурызда болатын қауіпті метеорологиялық құбылыстарға болжау консультациясын жариялады.&nbsp;Антициклон жотасы еліміздің батысы, шығысы мен орталығында өз әсерін сақтайды, осыған орай жауын-шашынсыз ауа-райы күтіледі. Ал ҚР басқа территориясында атмосфералық фронталды бөліктердің өтуімен қар, жаяу бұрқасын, еліміздің оңтүстігінде жаңбыр, оңтүстік-шығысында – жаңбыр мен қар түріндегі жауын-шашын жауады.ҚР бойынша тұман, желдің күшеюі күтіледі.Фото: Нұрболат Нұржаубай

7 наурызға жасалған күн райы болжамы

<a href="https://kyzylorda-news.kz/">Kyzylorda-news.kz</a>. Ректорлардың университет басшылығында болу мерзіміне шектеу қойылуы мүмкін. Бұл туралы Ғылым және жоғары білім министрі Саясат Нұрбек Мәжіліс кулуарында айтты, деп хабарлайды<a href="http://inbusiness.kz/"> inbusiness.kz</a> сайты.Тілші спикерден "Еуразия ұлттық университетінің ректоры Ерлан Сыдықовтың ректор болғанына биыл 13 жыл толады екен. Бұл тым ұзақ уақыт емес пе?" деп сұрады.<blockquote>"Жалпы бізде ұлттық университеттердің ректорларының мерзімі базалық келісімшарт бойынша 3 жылға деп көрсетілген. Президент әкімшілігімен келісіп, бұл мерзімді ұзартуға немесе тоқтатуға шешім қабылданады. Шын мәнінде де, 13 жыл ұзақ мерзім. Сондықтан біз ректорларды тағайындау қағидаттары мен ережелерін пысықтап жатырмыз. 14-15 наурызда арнайы республикалық комиссияның отырысы болады. Сонда жаңа ережелер қабылданады. Енді кез келген ректорларды екі мерзіммен шектейміз", - деді министр.</blockquote>Сөзінше, министрлік соңғы он жылда арнайы академиялық автономия принципіне көшіп жатыр.&nbsp;<blockquote>"Бұрынғыдай министр тікелей ректорды тағайындап, оны ұсынып, бақылап отырмайды. Біз бұл принциптерден бас тарттық. Ақырындап шетелдік форматқа көшіп жатырмыз. Көбінесе ректорлармен директорлар немесе қамқоршылар кеңесі арқылы жұмыс істейміз. Оларда үш жылдық стратегиялары бар, бір жылдық арнайы жоспарлары бар. Сол жоспарын бізде бекітеді. Бұрынғыдай министрдің қасында кез келген жағдайда ректор жанында отыруы керек деген жоқ. Мұндай ұстанымдардан бас тартып отырмыз", - деп түсіндірді Ғылым және жоғары білім министрі.</blockquote>Саясат Нұрбек республикалық комиссия мақұлдаған жағдайда заңнамалық өзгерістер енгізілетінін айтты.<blockquote>"Қазір кім қалады не қалмайды деп айта алмаймын. Бәрі заңды тұрғыда болады. Өздеріңіз айтқандай, шектеуіміз қажет. Мерзімсіз отыру дұрыс емес", - деді ведомство басшысы.</blockquote>Фото: Нұрболат Нұржаубай

"Мерзімсіз отыру дұрыс емес": Ректорлардың университетті ұзақ уақыт басқаруына шектеу қойылады

<a href="https://kyzylorda-news.kz/">Kyzylorda-news.kz</a>. Мұны ҚР Мемлекеттік техникалық қызметі 5 наурыз күні анықтаған, деп хабарлайды El.kz&nbsp;ақпарат агенттігі.Олардың барлығы zaimer микроқаржылық ұйымының клиенттері екен.Robo finance платформасында микроқаржылық ұйымдардың 36 миллионнан астам клиентінің мәліметтері анықталған. Олардың ішінде Ресейден – 23,6 млн; Филиппиннен – 5 млн; Вьетнамнан – 2 млн.Цифрландыру министрлігі жеке басының мәліметтері желіге тараған қазақстандықтардың барлығына хабарлама жібереді.Фото: Нұрболат Нұржаубай

2 млн астам қазақстандықтың жеке мәліметтері тарап кетті

<a href="https://kyzylorda-news.kz/ru">Kyzylorda-news.kz</a>&nbsp; Кейінгі ұрпақ кимешекті әжелер ғана киеді деп ұғынады. Өйткені олар киелі кимешекті музей сөресі мен қазақтың салтдәстүрі жайлы кітаптардан ғана оқып-біліп жүр. Оған біз оларды кінәлай да алмайтын секілдіміз. Кимешек кию әдебі қолданыстан 1970 жылдары шығып қалған. Күйіп тұрған қызыл кезеңде де мұсылманшылығын ұстанған ана-әжелеріміз кимешекпен жүріп, оны қастерлей білгені көрінеді. Біз сөз еткелі отырған ардагер-ұстаз, Қармақшы аудандық «әжелер ансамблінің» көркемдік жетекшісі Талмаш Жұмабаева асыл аналардың киелі киімін қастер тұтып, коллекция жинап жүрген жан.Апамыздың айтуы бойынша, басында коллекция жинау ойында болмаған. Ауданда «Әжелер ансамблі» құрылғаннан бастап жинауды қолға алыпты. Коллекцияның ерекше түрі біздерді де қызықтырды.<blockquote>– 1973 жылы енемнің анасы қайтыс болды. Сол кісі басынан тастамай кимешек киетін. Қазақта кимешек киелі саналатынын бұрыннан білемін. Кимесек те, әжеміздің көзі деп жуып, тазалап, сандықта сақтап ұстадым. 1986 жылы Мұртазинаның кезінде сахнаға әртүрлі қойылымдар қоя бастадық. Сонда кимешекті бірер мәрте кигенім бар. Ол кезде ансамбль құрылмаған. 1988 жылы «Әжелер ансамблі» құрылды. Құрамында бармын. Ансамбльге киім тігу керек болды. Үйдегі кимешекті үлгі болсын деп ательеге алып бардым. Соған қарап алғашқы кимешегімізді тіктірдік. Содан кейін сахнаға шыққанда әртүрлі кимешек керек болды. Ізденуге тура келді. Кітапханаға барып зерттей түстік. «Ұлттық киімдер», «Қазақтың салт-дәстүрлері» атты кітаптарды ақтарып қарап, кимешектің неше түрін зерделедік. Сөйтіп, әжелердің әндеріне түрлі кимешек тіктірдік. Бір киімімізді Сәбира Майханованың бәйбішелер, ел билеген аналардың, әжелердің образын көрсетіп тұрған суретін көріп, соның эскизіне салып, арқалығын салалы ұзын қылып тіктіргенбіз, – дейді ардагер ана өткенді есіне түсіріп.</blockquote>«Әжелер ансамблі» өзінің бай репертуарымен облыс, республикаға кеңінен танымал болып келеді. Әнші әжелердің де сахналық киімдері көздің жауын алып, кереметтей көңілге бөлейді. 35 жылдан бері үзбей өнер көрсетіп келе жатқан әжелеріміздің киім үлгілері де әдемілігімен, жоғары талғаммен ерекшеленеді. Киім таңдау ісінде де аналарымыздың көп ізденгені байқалады.<blockquote>– Кейін киім тіктіргенде үлгісін энциклопедиядан қарадық. 1920-жылдары кимешек кию үрдіске айналған. Соған қарап отырып, кимешек жасқа қарай 3 топқа бөлінетінін білдік. Осы жайттарды ескере келе басқа да кимешектер дайындаттық. Біз секілді әжелер бет пішінін ойған ойынтының айналасын ақ түспен көмкерсе, белорта жастағылар сары, жас келіншектер қызыл түспен жиектетіп, өңірлігіне қызыл-жасыл жіппен кестелеп оюлар тігетін болған. Біз жас кезден өтіп кеткендіктен бір рет айналасын сарымен көмкеруге тапсырыс бердік. Кейін әже болғанда оны ақ түс еттік. Кимешектің сыртында қарқара және күндік деген болады. Оның екеуі де – ақжаулық. Кимешектің сыртынан ақтықтан енжарым қылып қарқара дайындайды. Күндіктің маңдайшасы болады, артқы жағы ұзынша болып төгіліп тұрады. Тарихымызда ақжаулықтың атқаратын рөлі күшті болған. Көшпенді қазағымыз түйенің қомында, аттың жалында көшіп-қонып өмір сүрген ғой. Сондай сәтте қарқараның бір ұшын жыртып алып, түйенің қомында босанып қалған әйелдің нәрестесін орайтын жаялық қылған. Шетінеп кеткенде жерлеу рәсімінде кебін ретінде пайдаланған. Жаугершілікте екі жақ бітісе алмағанда ел билеген аналар басындағы қарқарасын шешіп, жерге ақжаулық тастау арқылы келісімге, қан төкпеуге шақырған. Қазіргі «Ақ орамал» акциясының астары сонау ғасырдан тін тартады деуге толық негіз бар, – дейді анамыз.</blockquote>Ардагердің отбасында бүгінде кимешектің 5-6 түрі жинақталған. Оның ішінде әсіресе құндысы және қадірлісі болып тұрған жәдігер 1973 жылы енесінің анасы тұтынған ескі кимешек. Бір қызығы, апамыздың сол кимешекті сары майдай сақтап келе жатқанының өзіне 50 жылдан асыпты. Оның алдында қанша жыл пайдаланғанынан бейхабар. Бәлки, 60 жыл, бәлки одан көп. Қалған кимешектер «Әжелер ансамблінің» құрамында өнер көрсеткен кездерінен әдемі естеліктер. «Мұнымен тоқтап қалмаймын, әлі де жинай бермекпін» дейді ол коллекцияларымен таныстыру барысында.

Қармақшылық қария кимешектен коллекция жинап жүр 

&nbsp;<a href="https://kyzylorda-news.kz/">Kyzylorda-news.kz</a>. Бүгін бүкіл әлем анаға иілгендей, мың жүректен мейірім нұры төгіліп тұрды. Облыс орталығындағы А.Тоқмағамбетов атындағы мәдениет үйіне жиылған жұрттың шат көңілінен мерекелік мезіреттің ыстық табы айқын аңғарылды. Халықаралық әйелдер күніне арналған «Ару көктем, ана жыр, әйел ғұмыр» атты шара әдеттегіден де әсерлі ұйымдастырылды. Сахнаның сәні, тақырыптық мәні ерекше лепті сезіндіріп, нәзік сыйластық пен суымайтын сүйіспеншілікке ие Сырдың сұлулары гүл шоғына көмкерілді.Жабыққанда сағынышымыз, тарыққанда ақылшымыз болатын аналарымызға деген құрмет елдік дәстүрдің айнымас жолы. Сол дәстүрдің дәреметі баянды бірлік пен байсалды тірліктің жарқын бетін ашқандай болды.Алдымен қазіргі қазақ әйелінің болмысынан сыр шертетін монолог оқылды. Оны ырғақты «Ару ғұмыр» әні жалғады. ЛЭД экранда ару, әйел, ана туралы бейнебаян жүріп, сәтті сабақтасқан сюжет пен сырлы саз тұтастай тамсандырды. Керемет көрініс пен көтеріңкі көңіл-күй үйлесім тауып, сахналық қойылым тың туындының таныстырылымдай ықыласты оятты.Салтанатты кешті қала әкімі Серік Қожаниязов құттықтау сөзімен ашты. Ол нәзік жандылардың қоғамдағы роліне, өңір дамуындағы әйелдердің белсенділігіне ерекше тоқталды.<blockquote>«Аналарымыздың рухынан күш, ұлағатынан тәлім түйген аруларымыз бүгін барлық салада табысты еңбек етіп келеді.Облыс орталығында әлеуметтік саланы дамытуға, ана мен баланың қорғалуына айрықша мән беріліп, нәтижесінде демографиялық өсім қалыптасты, қала халқының саны 357000 адамға жетті. Оның 51 пайызын әйелдер құраса, көпбалалы аналардың саны 18000-ға жуықтады. Олардың ішінде 1261-сы Алтын алқа, 2558-і Күміс алқа иегері.Қаламыздың дамуында әйелдер қауымы барлық салада ер-азаматтармен иық тіресе жемісті еңбек етіп келеді. Мысалыға қалалық мәслихаттың мінберінде билік пен халық арасында дәнекер 6 әйел депутатымыз бар. Онан бөлек нарық талабына сай 1913 азаматша кәсіпкерлікті дамытса, 500-ден астам қыз-келіншек бизнес жобасын бастауға мемлекеттен қайтарымсыз грант алды. Ал, ұлт тәрбиесі мен денсаулығы жолында аянбай еңбек етіп жүрген ұстаздарымыз бен дәрігерлердің әркез шоқтығы биік. Спорттағы жетістігімен абыройымызды асқақтатқан қарындастарымыз бен қыздарымыздың орындары тіпті бөлек. Сондықтан біз сіздерді мақтан етеміз» деп, барлық ана мен қыз-келіншектерге ыстық ықыласын жеткізді.</blockquote>Өз кезегінде шаһар басшысы Серік Салауатұлы бір топ батыр анаға Алтын және күміс алқа табыстады. Ел мұраты, жұрт амандығы жолында аянбай еңбек етіп, белсене атсалысқан аруларға облыс, қала әкімінің Алғыс хатын берді.Шырайы мен шаттығы мол шынайы шара ел есінде ұмытылмастай өтті.Біріншіден, «Анасын ардақтаған ел азбайды» деген тәмсілді терең түсіндірді. Екіншіден, қыз-келіншекке қоғамның құрметі өрістей түскенін танытты. Үшіншіден, бір мереке аясында емес, аруларды азаматтар алақанға салып, аялай беретіні жыл бойы жалғасатындығын білдірді. Басты ерекшелік те осында еді.<img src="https://knadmin.beoblood.kz/uploads/428708727_3556154337984632_6835270472600899058_n_f827965fb4.jpg" alt="428708727_3556154337984632_6835270472600899058_n.jpg"><img src="https://knadmin.beoblood.kz/uploads/428705852_3556154387984627_5458594893167411080_n_798b4ab12a.jpg" alt="428705852_3556154387984627_5458594893167411080_n.jpg"><img src="https://knadmin.beoblood.kz/uploads/428706637_3556154331317966_2642035853801404031_n_d34c89b42e.jpg" alt="428706637_3556154331317966_2642035853801404031_n.jpg"><img src="https://knadmin.beoblood.kz/uploads/428706216_3556154467984619_6515296386905156579_n_637b9c2277.jpg" alt="428706216_3556154467984619_6515296386905156579_n.jpg">

Шаһар басшысы қызылордалық аруларды мерекемен құттықтады

&nbsp;<a href="https://kyzylorda-news.kz/">Kyzylorda-news.kz</a>. 8 наурыз – Халықаралық әйелдер күні қарсаңында «AMANAT» партиясы Әйелдер қанатының жиналысы өтті. Іс-шараға Парламент депутаттары, қоғам қайраткерлері сонымен қатар бейне байланыс арқылы партияның облыстық филиалының Атқарушы хатшысы Ләйлә Төрешова мен аймақтық әйелдер қанатының мүшелері қатысты.Жиында әйелдердің қоғамдық және саяси өмірдегі рөлін нығайту мақсатында қабылданып жатқан шаралар мен олардың құқығын қорғауға бағытталған заңнама мәселелері талқыланды.Сөз басында партияның Атқарушы хатшысы Дәулет Кәрібек Әйелдер қанатының бастамасымен көтерілген барлық мәселе назарға алынып жүргенін ескеріп, Мемлекет басшысының жүргізген реформалары аясында гендерлік квоталар кеңейтілгенін атап өтті.<blockquote>«Партиямыз отбасы институтының беделін көтеруге күш салады. Ана мен балаға жан-жақты қамқорлық көрсету – жанұя әл-ауқатының маңызды шарты деп есептейміз. «AMANAT»-тың саяси тұғырнамасында жазылған нақты міндеттің бірі – осы. Себебі Отанды сүю, елге адал қызмет ету, қоғамның белсенді де жауапты мүшесі болу, тұлғалық қалыптасу – тәрбие мен тағылымның жемісі. Әйелдер қауымының отбасындағы, қоғам өміріндегі және мемлекетті жан-жақты дамыту ісіндегі рөлі зор екенін Президент үнемі айтады. Жақында Мемлекет басшысы Қасым-Жомарт Тоқаев Президенттік жастар кадр резервінің форумында «Әйелдерді қызметке тарту керек. Біріншіден, ер адамдар ренжімесін, әйелдер жұмысқа өте мұқият, тиянақты қарайды» деп орынды атап өтті. Осы тұста «AMANAT» партиясы мүшелерінің басым бөлігі, яғни 60 пайыздан астамы әйелдер екенін біз мақтанышпен айтамыз», – деді Дәулет Кәрібек.</blockquote>Жиын барысында Мәжіліс депутаты, «AMANAT» партиясы фракциясының мүшесі Жұлдыз Сүлейменова жуырда ғана Парламенттің төменгі палатасы қабылдаған әйел мен бала құқықтарын қорғауға негізделген Заң жобасына тоқталды.<blockquote>&nbsp;«Заңда денсаулыққа қасақана жеңіл зиян келтіру, ұрып соғу, суицидті насихаттау, суицидке итермелеу, 16 жасқа толмаған адамдарға жыныстық қорлап тиісу және басқа да әрекеттер криминализацияланды. Тұрмыстық зорлық-зомбылық көрген белгілері бар адамдарға уақытша тұруға мүмкіндік беретін отбасын қолдау орталықтарының құзыреттіліктері нақтыланды. Денсаулыққа қасақана жеңіл зиян келтіргені үшін және ұрып соққаны үшін қылмыстық құқық бұзушылық жасаған адамдарды ұстаудың тәртібі реттелді», - деді Жұлдыз Сүлейменова.</blockquote>Жиынды барысында «AMANAT» партиясының Хатшысы Шолпан Каринова еліміздегі әйелдер қауымының беделі жылдан жылға артып келе жатқанын айтып, осы бағытта Әйелдер қанатының нәтижелі жұмысы әлі де жалғасын табатынын атап өтті.

Қазақстан және Қызылорда облысының жаңалықтары