<a href="https://kyzylorda-news.kz/">Kyzylorda-news.kz.</a> Президент Қасым-Жомарт Тоқаев «Жалпы ұлт мәдениеті – халық өмірінің айнасы, оның болмысы. Еліміздің рухани дамуы ұлттық рухқа тікелей байланысты. Сол себепті азаматтарымыздың рухы әрқашан биік болуы үшін мәдениетімізге, яғни руханиятымызға баса мән бергеніміз жөн. Қазіргі таңда зиялы қауымның қоғамдағы рөлі аса маңызды. Мәдениет қайраткерлері халыққа, ең алдымен, өз туындыларымен танымал болуы керек, қоғамға, әсіресе, жастарға жол көрсетіп, үлгі-өнеге болуы қажет. Жұртымыз зиялы қауымнан сабырлықты, парасаттылықты күтеді» деген болатын.Осыны ескерген облыс әкімі Нұрлыбек Нәлібаев мәдениет және өнер қызметкерлері мерекесіне орай руханияттың бір топ өкіліне «Тұран» сыйлығын табыстады. Олардың қатарында аймақтың мәдениет саласының дамуына өзіндік үлес қосқан жерлестеріміз, Бұдабай Қабылұлы атындағы аудандық мәдени-шығармашылық орталығы жанындағы «Ноғайбаевтар» халықтық отбасылық ансамблінің жетекшісі Әлмырза Ноғайбаев пен Қазақстан Жазушылар және Журналистер одағының мүшесі, белгілі сатирик, бірнеше жинақтардың авторы Нұрмахан Елтай да бар. Өңірдегі өнер мен әдебиет өкілдерінің шығармашылығын шыңдау мақсатында табысталған сыйлықтың жүлде қоры – 500 мың теңгені құрайды.<blockquote>“Бүгін өздеріңізге ақжолтай жаңалықпен келдік. «Сырдың елі – жырдың елі» атанған қасиетті мекеннің абыройын асырып, бақ-беделін сақтауға үлес қосушы мәдениет және өнер, әдебиет өкілдерінің сан жылдан бергі тілегі – облыс әкімінің мәдениет және әдебиет өкілдеріне арналған «Тұран» сыйлығын табыстайтын боламыз. Жүлде қоры 500 мың теңгені құрайтын облыс әкімінің сыйлығы әдебиет пен өнер өкілдерінің шығармашылығын шыңдауға септігін тигізетініне сенімдімін. Он жылдан астам уақыттан соң арасы үзіліп қалған дәстүрді қайта жалғадық. Талай дарын мен талант түлеген Сыр өңірінде мұндай сыйлық пен марапаттың болуы – заңдылық”, – деді облыс әкімі.</blockquote>Мұнан бөлек, аймақтың бірқатар мәдениет саласының қызметкері Қызылорда облысының Құрмет грамотасымен, облыс әкімінің Алғыс хатымен марапатталды. Аймақтың мәдениет ұйымдарындағы 8 өнер ұжымына 40 домбыра тарту етілді. Іс-шара соңы жергілікті өнерпаздардың қатысуымен концерттік бағдарламаға ұласты.Айта кетейік, биыл Сыр өңірінің мәдениет және өнер саласында көптеген жағымды жаңалық бар.&nbsp;Жыл соңында Қызылорда қаласындағы 1000 орындық көпфункционалды «Өнер орталығы», ал тамыз айында «Анаға тағзым» орталығы іске қосылмақ. Оған қоса өнер әлеміне қанат қаққан мүмкіндігі шектеулі өнерпаздардың шығармашылығын шыңдауға арналған Инклюзивті театр жобасы мақұлданды. Таяу арада Қызылорда қаласының әкімдігі мен облыстық мәдениет және спорт басқармасы бұған дейін үйірме ретінде жұмыс жасап келген «Жастар театрын» өз алдына кәсіби ұжым етіп құру бойынша нақты шаралар қабылдайды.Мұнан бөлек, биыл өнердің қарашаңырағы – Н.Бекежанов атындағы қазақ академиялық музыкалық драма театры 18 жылдан соң апталық бағдарламамен Алматы қаласына гастрольдік сапарға шығады. Үш дүркін «Алтын домбыра» иегері, жерлесіміз Мұхтар Ниязовтың жаңа ізбасарларын дайындау мақсатында өңірде тұңғыш рет «Айтыс олимпиадасы» атты облыстық жасөспірімдер айтысы өткізілмек.Қызылорда облысының құрылғанына 85 жыл және Қызылорда қаласының 205 жылдығына орай мерейтойлық салтанат аясында бірінші рет бюджет тапсырысымен 12 бөлімді имидждік телесериал түсіру жобасы қолға алынды. Қазіргі заманауи трендке айналған телесериал арқылы аймақтың жағымды бет-бейнесін жасап қана қоймай, инвестициялық тартымдылығы мен туристік мүмкіндіктері республикалық, халықаралық деңгейде насихатталмақ.

Қос шиелілікке «Тұран» сыйлығы табысталды

<a href="https://kyzylorda-news.kz/">Kyzylorda-news.kz.</a> Жаз мезгілі келісімен, суға түсу науқаны басталады. Суға кеткен азаматтардың жартысына жуығы ережені дұрыс сақтамағандар, үштен бір бөлігі алкоголь ішімдіктерін ішкендер болса, ал қалған бөлігі – балалар. Осыған байланысты адам өміріне төнетін қауіптердің алдын-алу, келеңсіз жағдайлары болдырмау мақсатында мамыр айының 22-і күні аудан әкімдігінде комиссия отырысы өтті.Төтенше жағдайлардың алдын алу мақсатында жүргізілген комиссия отырысына ауылдық округ әкімдері және бөлім басшылары қатысты. Жиынды ¬аудан әкімінің орынбасары Е.Әпетов жүргізді. Комиссия отырысында бұдан бөлек қатты желдің әсерінен шатырлардың құлау жағдайлары және азаматтық қорғаныс пен төтенше жағдайлар уақытында халықты хабардар етуге арналған құлақтандыру жүйелері туралы айтылды. Басқосудың негізгі мақсаты – төтенше жағдайлардың алдын алу және жою болды.&nbsp; Ауа райына байланысты мекемелердің, тұрғын үйлердің шатырының ұшып кетуі жөнінде аудандық құрылыс, сәулет және қала құрылысы бөлімінің сектор меңгерушісі Ғалымжан Шалбаев баяндама жасап, сұрақтарға ¬жауап берді. Табиғат құбылысының әсерінен шатыр құрылыстарының материалдары ұшып, қарапайым тұрғындар зардап шегеді. Оның үстіне қатты жел бола қалса, электр жүйелері үзіліп, күнделікті тіршілік көзіне зиян келетіні де жасырын емес. Биыл қатты желдің салдарынан аудан бойынша 12 нысанның шатыры ұшып кеткен. Олардың арасында Еңбекші ауылдық округі, Оразов көшесінде орналасқан аудандық полиция бөлімінің учаскелік полиция пунктінің көлік тұрағы және сарайы, Шиелі индустриалды-аграрлы колледжі және бірнеше мектептер бар.&nbsp;Сонымен қатар Яссауи көшесінің бойындағы аркада орналасқан жылдамдықты өлшейтін, радар камерасына да қатты желдің кесірі тиген. Әрине, мұның барлығын табиғи құбылыс деп айта салуға да болады. Бірақ баяндамашы Ғ.Шалбаев өз сөзінде аталған ғимараттардың жобалық-сметалық құжаттарының сапасы әлі де төмен екенін тілге тиек етті. Сонымен қатар Ғ.Шалбаев «Көрсетілген мән-жайлар ғимараттар мен құрылыстарды жобалау, салу кезінде де бақылауды күшейту және уәкілетті органдар тарапынан тиісті назар аудару қажеттілігін көрсетеді. Шатыр құрылымдарының сенімділігін арттыру үшін тиісті жобалаумен қатар құрылыс-монтаждау жұмыстарын білікті мамандардың орындауы және құрылыс сапасына тиісті бақылауды қамтамасыз етуді сұраймын. Шатыр конструкцияларының сенімділігін арттыру үшін тиісті жобалаумен қатар құрылыс-монтаждау жұмыстарын білікті мамандардың яғни, аккредиттелген техникалық қадағалаушылардың құрылыс сапасына тиісті бақылауды қамтамасыз ету қажет» деп өз ұсынысын ортаға тастады.&nbsp;Күн тәртібіндегі екінші мәселе бойынша төтенше жағдайлар бөлімі басшысының міндетін атқарушы Бағлан Әбсаттаров өз жұмысы жөнінде баяндама жасады. &nbsp;Су тіршілік көзі &nbsp;болғанымен, қауіпсіздік шараларын сақтамаса тілсіз жауға айналуы мүмкін. Осының салдарынан жыл сайын ауданда қайғылы оқиға орын алып жатады. Тиісті мамандар ескерту жасап, қауіпсіздік шараларын қатаң ескертсе де, ескертуге құлақ аспай қаза болып кететіндер де жетерлік. Мәселен, өткен 2022 жылы оның бірі 1981 жылы туған болса, екіншісі 1963 жылы дүниеге келген ер адам. Екеуі де ішімдік ішіп, суға шомылуға барғанның салдарынан о дүниелік болған. Осындай өкінішті жағдайды болдырмау үшін төтенше жағдайлар бөлімі мамыр айынан бастап суға түсу маусымына дайындықты ¬бастап кетті. Әдеттегідей, ескерту шараларын күшейтіп, қарапайым тұрғындардың қауіпсіздігін бақылауда. Бұл жөнінде Б.Әбсаттаров аудан әкімінің орынбасары Ерсұлтан Амантайұлына «2023 жыл жазғы суға түсу маусымында елді мекендерде көпшіліктің суға шомылуға арналған жерлерін анықтап, талаптарға сай коммуналдық жағажайларды ашу жұмыстарын ұйымдастырып, оларды суда құтқару құралдарымен (қайық, құтқару шеңберлері мен белдемшелері) жабдықтау. Жұмыспен қамту орталығы есебінен жергілікті тұрғындар арасынан Бәйгеқұм ауылының, Ханқожа көлінде құрылған құтқару бекетіне Қызылорда облысы Төтенше жағдайлар департаменті «Өрт сөндіру және авариялық құтқару жұмыстары қызметі» мемлекеттік мекемесінің жедел құтқару жасағынан дайындықтан өткен азаматтардан суға шомылатын жерлерде қоғамдық құтқарушыларды жасақтау арқылы жазғы маусымда жұмысқа тартуды ұйымдастыруды. Шиелі кенті және ауылдық округтерде жазғы суға түсу маусымында суға түсуге қауіпті жерлерде кент, ауылдық округ әкімдігі, аудандық Полиция бөлімінің жергілікті полиция қызметінің учаскелік полиция инспекторларымен бірлесіп рейдтер, кезекшіліктер ұйымдастыруды ұсынамын» деп өз ойын білдірді.&nbsp;Комиссия отырысында бұдан бөлек төтенше жағдайларға шолу жасалып, тұрғындарды барынша құлақтандыру керек екені айтылды. «Сақтансаң – сақтаймын» дегендей, әр адам өз өмірі үшін жауап беруі және мұқият болуы тиіс. Себебі апаттың алдын алу үшін еліміздің арнайы мамандары түрлі шараларды атқарып, әртүрлі жолын қарастыруда. Ең бастысы төтенше жағдай туындамас үшін әр тұрғын қауіпсіздік ережесіне мұқият қарауы керек.

Шиеліде төтенше жағдай туындамас үшін комиссия отырысы өтті

<a href="https://kyzylorda-news.kz/">Kyzylorda-news.kz.</a> Қалада құрылыс қыза түсті. Әр жерден дүрілдеген техниканың үні мен &nbsp;күн өткен сайын көкке ұмтылған зәулім ғимараттар алыстан менмұндалайды. Таңмен таласа тұрып, күн ұясына батқанша бір тынбайтын құрылысшылар қала салуға үлес қосып жатыр. Қала тарихымен сабақтаса өрілетін қаншама ғимараттар мен үйлерде олардың қолтаңбасы қалады. Сонысымен де бұл мамандық қасиетті. Дәл қазір қызу жұмыстан бел жазбайтын құрылысшы мұны ойламауы мүмкін. Оның бар ойы – жұмысы сапалы болып, белгіленген мерзімде аяқтауда ғана.Бүгінде құрылыс саласында өзіндік орны бар, тәжірибелі құрылыс компаниясының бірі – «Промстройсервис-Е» қала құрылысын жандандыруға үлес қосуда. Құрылыс саласында аты озған белді компания Сыр елінің бас шаһарының шырайын келтіріп, сәні мен сәулеті келіскен құрылыс салуда аянбай еңбек етіп келеді. Атап айтар болсақ, сол жағалаудағы «Ақмешіт» тарихи мұражайын салған да осы мекеме. Мұнан бөлек, көпқабатты үйлер тұрғызып, сапалы құрылыс салғаны үшін халықтың алғысын арқалап келеді. Бұл жолы да «Промстройсервис-Е» құрылыс компаниясы тарихи нысандардың құрылысын салуға бел буды. Мәселен, Қызылорда қаласында 5 қабатты үйден артық салуға болмайды деген қасаң түсінікті бұзып, биыл сол жағалауда 7 қабатты үй құрылысы басталса, бір үйдің құрылысын аталған компанияға бастап кетті.<blockquote>«Қазір сол жағалауда 7 қабатты 6 үйдің құрылысы басталды. Соның 4-ін жергілікті, 2-ін алматылық құрылыс компаниялары салуда. Бір үйді біздің компания салады. Қазір құрылыс алаңында жұмыс басталып кетті», – дейді «Промстройсервис-Е» ЖШС директоры Манарбек Еспенбетов.</blockquote>ҚР Сыртқы істер министрлігі мен ҚР Корея Республикасындағы Елшілігінен облыс делегациясының Кореяға сапарын қолдайтыны туралы хаттар, биыл Корея Республикасы Тэчжон қаласының мэрінің және Чоллабук-до про-винциясы губернаторының шақыру хаттары келіп түскен еді.Осыған орай, облыс әкімі Нұрлыбек Нәлібаев бастаған делегация 22 мамырда Корея Республикасының Сеул қаласына іссапармен барды. Делегация құрамында Қызылорда облысының әкімі Нұрлыбек Нәлібаев, Қазақстан Республикасының Кореядағы Төтенше және Өкілетті Елшісі Б.Дүйсенбаев, облыстық мәслихат төрағасы Н.Байқадамов, Қорқыт ата атындағы Қызылорда университетінің ректоры Б.Кәрімова бар», – деп жазады.Жеті қабатты үй дегенде көп көкейінде сұрақ туатыны жасырын емес. «Жылу, су көтерілу жайы қалай болар екен?» деген сұрақты компания басшысына қойдық.<blockquote>«Соңғы уақытта салынып жатқан жаңа үйлердің қайсысына барсаңыз да жылу, су және басқа да коммуналдық мәселе жоқ. Үйдің өжіресіне жылуды, су қысымын реттейтін арнайы насос қондырғылары қойылады. Нешінші қабат болса да су сарылдап ағып тұрады», – дейді Манарбек Нағымұлы.</blockquote>Құрылыс саласын бес саусағындай білетін басшымен әңгімелесудің сәті түскенде көкейдегі сұрақты іркіп қалмадық. Кейінгі кезде жаңа үйлердің құрылыс сапасына қатысты сын естіп жатамыз. «Сапасыз үйлер көбейді» деген пікір де жоқ емес. Бұл пікірмен құрылыс компаниясының басшысы келіспеді.<blockquote>«Кезінде «Тұрғын үй – 1991» деген бағдарлама болды. Жас отбасы ретінде сол бағдарламамен пәтерге қолым жетті. Әйелім екеуміз жұмыстан кейін жаңа қонысымызды көруге жүгірдік. Сондағы пәтер не сыланбаған, не электр сымы жүргізілмеген, ортада құрылыс қалдықтары үйіліп жатыр. Жоғары қарасаң төбеңдегі пәтер көрінеді. Әйтеуір төрт қабырға бар. Сол кезде біз ренжімедік, пәтерден-пәтерге көшіп жүру бейнетінен құтылып, өзіміздің үйіміз бар деп қатты қуандық. Әйелім қуанғаннан ағыл-тегіл жылап жүр. Ал қазір ше? Үйді пайдалануға бергенде әрбір пәтерді сақадай-сай, тіпті көшіп келіп отыра қалатындай етіп береміз. Шынын айтқанда, үй құрылысының сметалық құжатында пәтер ішін әрлеу (левкас) деген атымен жоқ. Алайда құрылысшылардың қай-қайсысы да пәтер ішін әрлемей бере салып жатқан жоқ. Есік-терезесі бүтін, линолеум төселіп, әрлеп, тап-тұйнақтай етіп өткіземіз. Алайда адамның бәрі бірдей емес. Кейбір тұрғындар алғыс айтып жатса, кейбіреулер үстіңнен арыз-шағым айтып жатады. Мұндайда сол пәтерге арнайы барамыз. Мұндай шақыртуларда түрлі жағдайға куә болдық. Бір тұрғын «терезем қирап қалайын деп тұр» деп шағымданыпты. Бұл қалай болғаны деп мамандармен бірге өзім де бардым. Сөйтсек, әлгі үйдің иесі терезе алдына тамақ пісіретін тоқ плита қойыпты. Плита қызып, іштен ыстық, сырттан салқын соғып, терезе сапасына сызат түскен. Жалпы терезе алдына тоққа қосылатын плита қоюдың өзі миға сыймайтын нәрсе ғой. Тағы бір тұрғын жаңа пәтерінде жарты жыл тұрған соң «унитаз сарғайып кетті» деп шағымданған. Әжетхананың су жинайтын қорабынан күн сайын сыздықтап су аға берген соң, унитазда сызат пайда болған. Жарты жылдан кейін әжетхана бұзылса, өзі жөндеп алуға болады ғой. Тіпті айтуға ұят. Ал кейбір тұрғындар ұялмайды, осындай майда-шүйдені желеу етіп, құрылыс сапасыз салынған деп аттандайды. Мұндай мысалдарды тізбектей берсең, көп. Кейде тұрғындардың өз үйіне жаны ашымайтыны, біреу келіп жасап берсін деген көзқарастан арыла алмай келе жатқаны қынжылтады. Тағы бір мысал. Қазір жергілікті құрылыс компаниялары қаладағы ескі тұрғын үйлердің қасбетін желге, ыстыққа төзімді панельмен өз есебімізбен қаптап жатырмыз. Туған қаламыздың көркеюіне қосқан үлесіміз деп, ескі үйлердің сырты жаңарғанын көріп, нәтижелі жұмысымызға қуанып жүрміз. Алайда бұдан да сын іздейтіндер бар. Өткенде бір тұрғын сыртқа шығып: «сыртын әдемілей бергенше, пәтеріміздің ішін жөндеп бермейсіңдер ме?» деп ренішін білдірді. Бұл қалай? Өзі үйінде қол қусырып отыр. Жекеменшік пәтерін біреу жөндеп берсе дейді. Меніңше, әлеуметтік желіде түймедейді түйедей етіп, арыз жазу үшін пайдаланатын масылдық көзқарастан арылу керек. Қаланың әрбір тұрғыны, әрбір азамат туған жеріміздің көркеюіне үлес қосса деймін», – дейді құрылысшы Манарбек Нағымұлы.</blockquote>Шынында, құрылыс компанияларының өз қаласын түлетуге қосқан үлесі аз емес. Қаладағы жаңарған үйлер, ойын алаңдарының көптеп салынуы осы құрылыс компанияларының ел дамуына үлес қоссам деген ниеті. Құрылыс компанияларының демеушілігімен жасалып жатқан дүниелер аз емес. Бұл орайда «Промстройсервис-Е» компаниясының да қала сәулетінің артуына қосқан үлесі айтарлықтай. Бүгінгі күнге дейін қаладағы бірнеше үйдің қасбетін заман талабына сай жаңартып, ойын алаңдарын тегін салып берген. Құрылыс саласында 20 жыл тәжірибесі бар компания әлі де талай құрылысты салуға атсалысып, талай игі істің ұйытқысы болатыны сөзсіз. Айтпақшы, сол жағалауда 60 пәтерлік 5 қабатты үй құрылысын да жүргізіп жатқан компания физика-математика мектебінің құрылысын салу жауапкершілігін алып отыр. Бұл да компанияның құрылыс саласында салмағын айқындай түспек.<blockquote>«Құрылыс салу – өте жауапкершілікті жұмыс. Талап та, тәртіп те қатаң. Бұл жауапкершілікті жандүниемізбен сезінеміз. Қолтаңбамыз қалған құрылыс нысанына сын айтылмас үшін сапа басты орында», – дейді Манарбек Еспенбетов.</blockquote>Бүгінде құрылыс саласында өзіндік орны бар, тәжірибелі, білікті мамандары да қалыптасқан компаниялар қатары аз емес. Соның бірегейі саналатын «Промстройсервис-Е» мекемесі де жергілікті мамандарды жұмыспен қамтып отыр. Дегенмен маман туралы сөз болғанда мәселе барын аңғардық.<blockquote>«Қазір маман тапшы. Тіпті жоқтың қасы деуге болады. Бұрын еңбек нарығын Өзбекстаннан келген гастербайтерлер толтыратын еді. Қазір жергілікті мамандарды жұмыспен қамтып отырмыз. Бұған қуанамыз, әрине, Алайда қара жұмыс істейтін адамды майшаммен іздеп таппаймыз десек, артық айтқандық емес. Қазір дәнекерлеуші, электрик деген мамандар қасқалдақтың қанындай тапшы болып отыр. Әрлеуші, бетон құюшы, ағаш ұстасы деген де жоқ. Қаламызда қаншама кәсіптік-техникалық колледж, жоғары оқу орны бар, бірақ маман жоқ. Бұл – өте өзекті мәселе. Жұмысшы маман тапшылығын жою үшін бір жүйелілік жасамаса, ертеңгі күні аға буын құрылысшының ізін басар жас маман жоқ. Қазір компанияда орташа жас – 60 жас. 60-70-ке келгендер құрылыс алаңында жұмыс істеп жүр. Олар жұмыстан кетсе, орнына маман жоқ. Жастарды жұмысқа тартып, тәжірибелі мамандардан үйренсін дейін десек, маман таппай отырмыз. Осы компания 2000 жылы ашылса, сол уақыттан бері жоғары оқу орнын бітірген 3-ақ маман келді. Жағдайдың қандай екенін содан-ақ бағамдай беріңіз. Қазір сол мамандарды алақанымызға салып отырмыз. Біреуі учаске бастығы, екеуі құрылыс шебері болып жұмыс істейді, сатылап өсіп келе жатқан жас мамандарымыз осы ғана. Қазір тепсе темір үзетін жігіттер құрылыс алаңында жұмыс істегеннен гөрі, есік күзеткенді тәуір көреді. Қай мекемеге барсаң да жап-жас жігіттер күзетші болып отырады. Бұл еңбек нарығындағы үлкен мәселе», – дейді құрылыс компаниясының басшысы.</blockquote>Құрылыс саласындағы бір жетістік – жергілікті өнімдердің пайдаланылуы. Бұл да құрылысқа бейімделген өңір өндірісінің нәтижелі жұмысы.<blockquote>«Қазір қандай құрылысқа болсын, жергілікті жердің кірпішін аламыз. Одан артық сапалы кірпіш жоқ. Қазір темірбетон, кірпіш, цемент, шегеқұм өзімізді қамтамасыз етуде. Өзге өңірлерде шегеқұм да қат. Сондықтан сырбойылық құрылысшылар үшін бұл да тиімді. Жалпы жергілікті өнімдердің сапасына ешқандай шағым жоқ, керісінше құрылыс саласында бірлесе жұмыс істеп келеміз», – дейді Манарбек Нағымұлы.</blockquote>Емен-жарқын әңгімеден соң құрылыс алаңына бардық. Сол жағалаудағы құрылыс қыза түскен. Тынымсыз гүрілдеген техника үні, қызу жұмысқа кіріскен құрылысшылар көз аштырмас шаңды да, ыстықты да елейтін емес. Учаске бастығы Жаңабек Әуезовпен қайнаған құрылыс басында аз-кем тілдестік.<blockquote>«Жеті қабатты үйдің 5-інші үйін бізге салу бұйырды. Қазір жұмыс басталып кетті», – дейді ол.</blockquote>«Ертең бұл жерді танымай қаласыздар, айнала зәулім үйлер салынып жатыр» деген құрылысшылардың жүзінен мақтаныш сезімі байқалады. Арман-мақсаты да зәулім үйлердей асқақ құрылысшылар қарбалас тірлікке еніп кетті. Қала тарихында орны бөлек құрылыс нысандарына біз де қызыға қарадық.Құрылысы қарқын алған қызу тірліктен түйгеніміз, жергілікті құрылыс компанияларының бәсекеге қабілетті екендігі. Яғни өз құрылысымызды өзгелер емес, өзіміз салатын деңгейге жеттік.

Қызылорда құрылысына қан жүгірткен мекеме

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Шаттық» балабақшасында «Жазғы іс-шараларды ұйымдастырудағы ойын түрлерінің рөлі» тақырыбында семинар өтті. Оған қалалық білім бөлімі бастауыш кәсіподақ төрайымы &nbsp;Орынша Алимбетова, білім бөлімінің әдіскері Ақерке Мұратбаева семинар жұмысын ашып берді.Семинар ойын арқылы балалардың логикалық ойлауын, танымдық, шығармашылық, еңбек әрекетін дене және қимыл белсенділігін ұлттық ойындарға қызығушылықтарын арттыруды мақсат тұтады.<blockquote>Бүгінгі іс-шара барысында «Солнышко» «Сказка про дружбу» тақырыбында ертегі жазып ерекше күтімдегі балалар ертегіні рөльдерге бөліп ойнады. Ересек «Достық» тобында ұлттық ойындарымызды жаңғырту жас ұрпақтың бойына сіңіру мақсатында «Бестемше ойыны» түрлі нұсқада ұсынылды семинарға келген қатысушыларымыз да қызыға ойнады. Ортаңғы «Қуаныш» тобында «МАРБЛС» тастары арқылы баланың танымын дамыту ойындары ойнатылды. «МАРБЛС» тастарының ерекше күтімді қажет ететін балаларға емдік қасиеті өте зор. Педагог психолог және дефектолог мамандары «Ғажайып аралға саяхат» жасап балаларға қызықты ойындар ойнатты. Ортаңғы «Бақыт» тобында «Гүлдер әлемі» тақырыбында ата-анамен мальбертке және дәстүрден тыс сурет салу жұмыстары ұсынылды. Дефектолог, тифлопедагог мамандары «Бізді қоршаған әлем» тақырыбында балаларды педагогикалық психологиялық қолдау арқылы бейімдеу жұмыстарын көрсетті. Ересектер «Радуга» тобында «Летние спортивние состязания» спорттық сайыс түрлері өткізілді», - дейді балабақша меңгерушісі.&nbsp;</blockquote><figure class="image"><img src="https://knadmin.beoblood.kz/uploads/349316570_270963278663142_6770473094605385472_n_efa2042e16.jpg" alt="349316570_270963278663142_6770473094605385472_n.jpg"></figure>&nbsp;<figure class="image"><img src="https://knadmin.beoblood.kz/uploads/349564645_290522613301447_7384259311933993456_n_55ddf8f2da.jpg" alt="349564645_290522613301447_7384259311933993456_n.jpg"></figure>&nbsp;<figure class="image"><img src="https://knadmin.beoblood.kz/uploads/349610407_227840663366603_4340879311388936740_n_b37676936b.jpg" alt="349610407_227840663366603_4340879311388936740_n.jpg"></figure>&nbsp;<figure class="image"><img src="https://knadmin.beoblood.kz/uploads/349143637_709552737601858_5898092459762196806_n_6f9b98f045.jpg" alt="349143637_709552737601858_5898092459762196806_n.jpg"></figure>

«Жазғы іс-шараларды ұйымдастырудағы ойын түрлерінің рөлі» тақырыбында семинар өтті

<a href="https://kyzylorda-news.kz/">Kyzylorda-news.kz.</a> Терезеден құлау әсіресе қалалардағы балалардың жарақаттануы мен өлімнің негізгі себептерінің бірі болып табылады. Балалар ашық терезенің алдында өте осал.Баланың терезеден құлауына байланысты жазатайым оқиғаны болдырмау үшін келесі ережелерді ұстану қажет:- Пәтерде терезелерді ашқан және бөлмені желдетқен кезде баланың қараусыз қалмағанына көз жеткізіңіз. Желдету кезінде фрамугалар мен форточкаларды ашыңыз; - Балаларға балконға ересектердің еріп жүруінсіз шығуға рұқсат бермеңіз; - Ешқашан ұйқыдағы баланы пәтерде жалғыз қалдырмаңыз. Бала оянып ашық терезеге келуі мүмкін; - Барлық жиhазды, соның ішінде кереуіттерді терезеден алыс орнатыңыз. Бұл баланың терезеден кездейсоқ құлауын алдын алады. - Терезенің ашылғанын балаға көрсетпеңіз. Кейін ол терезені өз бетімен ашуға үйренген сайын, оның пәтерде жалғыз қалуы қауіпті болады; - Баланың терезеге мінуі үшін немесе балконнан көшеге қарау үшін аяқ астына орындықты немесе өзге де құралдарды қоюға үйретпеңіз.Есіңізде болсын! Балалар үшін терезелердің қауіпсіздігін қамтамасыз етудің түрлі құралдары бар. Олардың кейбірінің құны әркімге қол жетімді. Балалардың өмірінен қымбат ешнарсе жоқ. &nbsp;<figure class="image"><img src="https://knadmin.beoblood.kz/uploads/85532a14_cd6a_4701_bba0_1a052ea68bd2_960948257a.jpg" alt="85532a14-cd6a-4701-bba0-1a052ea68bd2.jpg"></figure>

Балалардың терезеден құлау қауіп-қатерінің алдын алайық

<a href="https://kyzylorda-news.kz/">Kyzylorda-news.kz.</a> Қызылорда қаласы аумағындағы құқық бұзушылықтар мен орын алған қылмыстардың алдын алу және шұғыл әрекет ету мақсатында азаматтарға арналған сервис «102» арнасы мен «102» мобильді қосымшасы жұмыс жасайды.&nbsp;Бұдан бөлек, қазіргі таңда облыс орталығындағы азаматтар көп шоғырланатын орындарда&nbsp;«102»&nbsp;«SOS» дабыл батырмасының 15 құрылғысы орнатылып, Қызылорда қалалық Полиция басқармасы заманауи техникамен толығуда.&nbsp;«SOS» түймесін басу арқылы тәулік бойы Жедел басқару орталығына видео арқылы қоңыраулар келіп түседі. Құрылғылардың орналасуы бейнебақылаумен жабдықталған, қиын жағдайда бұл кезекші бөлімнің қызметкеріне жағдайды өз бетінше бағалауға мүмкіндік береді. Құрылғы жерден бір метр биіктікте орналасқан. Оларды тіпті балалар да қолдана алады.&nbsp;«SOS» дабыл батырмасы мына мекенжайлар бойынша орнатылған, атап айтқанда Орталық алаңда, «Студенттер сарайы», «Универсам» сауда үйі, Мұратбаев пен Бұқарбай батыр көшелері қиылысындағы ескерткіштің жаны, Қорқыт Ата мен Өсербаев көшелерінің қиылысында, Сол жағалаудағы «Жастар орталығы», «Теміржол вокзалы», «Aray City Mall» ойын – сауық сауда орталығы, Журба көшесі бойында орналасқан «Сырдария» сауда үйі, «Тағзым алаңы», «Жаңа базар», Хон Бен До көшесінің бойындағы «Океан» және «Рүстем» сауда орталықтары, Қорқыт ата көшесі №55 үйдің жаны.Құрметті облыс тұрғындары! Егер өзіңіздің немесе өзгенің қауіпсіздігіне немесе өміріне қауіп төніп тұр деп ойласаңыз, мас адамның рөлге отырғанын көрсеңіз, басқа да құқық бұзушылық пен қылмыстың куәсі болсаңыз, күдікті адамды байқасаңыз, полицияға дереу хабар беріңіз.

Қызылордада 15 «SOS» дабыл батырмасы іске қосылды

<a href="https://kyzylorda-news.kz/">Kyzylorda-news.kz.</a> Қазалы қаласында Ғани Мұратбаев атымен аталатын мектеп бар. Сонау 1939 жылы ашылған білім ордасы бүгінде білікті ұстаздар мен білімді шәкірттердің құтты шаңырағына айналған. Қашанда мектептер арасында алғашқылардың бірі болып жаңашылдығымен көзге түсетін ұжым мүшелерінің ауызбіршілігі мен жұмысқа деген жауапкершілігі аса жоғары. Уақыт көшімен қатар лесіп, заманауи жаңалықтар мен тың идеяларды өмірге әкеліп жүрген білім ордасының басшысы Эльмира Сматуллаеваның еңбегі ерекше. Күн-түн демей, ұжымды алға сүйреп, білім берумен қатар шәкірттердің тәлімді тәрбиені бойына сіңіруіне атсалысып жүрген мектеп директорының бастамасымен жұма күні тәрбие мектебі жобасы аясында «Ұлттық құндылық – ұлттық иммунитет» тақырыбында аудандық семинар өтті. Шараға мектеп директорлары, тәрбие ісі жөніндегі орынбасарлары және өзге де қонақтар шақырылды.&nbsp;Бұл күні таңның атысымен мектеп ауласында ерекше көңіл-күй сезілді. Әуезді ән ойнап, шуақты күннің шұғыласына бөленген шәкірттер шуылы әдеттегіден ерекше есітілді. Өйткені олар үлкен шараға дайындық үстінде еді. Бірі ән салып, енді бірі домбыра шертіп, өздеріне жүктелген міндетті жоғары деңгейде алып шығуға талпынып жатқан-ды. Қаз-қатар тізілген көрмелер мен жайма базар спеттес сауда орындары келушілердің назарын ерекше аударды. Бірнеше бөлімнен тұратын семинар қонақтарды күтіп алумен басталды. Алдымен «Ғанибай үйінің архитектуралық ерекшеліктері» жобасын 10 сынып оқушысы Диас Ильяс танысытырып өтті. Өз жұмысында «Ғанибай үйінің» қыр-сырын толық баяндап, тарихи деректерді тізбектеген жас өреннің жан-жақтылығына жиналғандар тәнті болды. «Көне тарих сыр шертеді» атты көрме аясында XIX ғасырдың екінші жартысындағы көрініс көпшілік назарына ұсынылды. Келушілер сауда-саттық алаңында жібек тауарлардың саудасын қыздырды. Жәрмеңкеде қап-қап арпа, бидай, тары, жүгері сатылып, тіпті қозылы қойда саудаға түсті. Қос жанында жүн сабап отырған кимешекті әже жәрмеңкеге жан бітіріп, қонақтардың қызығушылығын одан әрі арттырды.Қазақы ауылда жырдан жаһұт, әннен шашу шашылды. Өткен ғасырға шегініс жасалып, Ғанибай көпестің мәрттігі мен кеңдігін ата-аналар комитетінің төрағасы Еркін Әбдіраманов ерекше сомдап шықты. Осы орайда ауқымды шараға ұстаздардан бөлек ата-аналарда айрықша атсалысқандығын атап өткен жөн. Бұдан кейін күмбірлеген күй тартылып, мектеп оқушыларының қолынан шыққан көркем туындылардан жасақталған көрме таныстырылды. Ою ойып, кесте тігіп отырған өнерлі өрендердің ісіне көпшілік сүйсіне қарады. Ардагер ұстаз, ата-ана Қазыбай Саниязов жанына жиналған балаларға өнегеге толы өсиет сөздерін айтты. Қазақтың «Ат қою» салтына тоқталып, би-шешендерден қалған аталы сөздің астарын түсіндірді.&nbsp;«Ұлы дала жәдігерлері» құндылықтар жәрмеңкесінде «Ұлттық фармокология» үйірмесінің жұмыстары қойылды. Онда ұстаздардың жетекшілігімен дайындалған оқушылардың ғылыми жобалары таныстырылды. «Қамыс өсімдігінен жасалатын сұраныстағы бұйымдар», «ЕБҚ оқушыларының интеллектісін дамыту», «Ұлттық бренд – қазақы тақия», «Қазақ дүниетанымындағы физика», «Биологиялық активті заттардың фармокологиялық әсері», «Өңірдегі қара тұз кенінің қасиеті», «Ұлттық ойындар» үйірмесі, «Ұлттық киім – ұлт ажары», «Ата-аналар акдемиясы – ұлттық тәрбиенің қайнар көзі», «Қолөнер бұйымдарының көрмесін» көрушілер шығармашыл шәкірттер мен ізденімпаз ұстаздардың еңбегін ерекше бағалады. Бірінен-бірі өткен жобалардың қай-қайсысы болмасын өзіндік құндылығымен қадірлі.&nbsp;Бұл күні ерекше көзге түскен дүние – мектеп ауласындағы су бұрқақ болды. Бұны түлектер тарту еткен екен. Ол жасыл желегі жайқалған ауланың одан әрі ажарын аша түскен. Ауладағы керемет көріністерден кейін мектеп директоры Эльмира Сматуллаева қонақтарды білім ордасына бастап барды. Білім ордасының қабырғаларында ұлтымызға тән ою-өрнектер, қазақи нақыштағы картиналар, мектеп мақтаныштары, жетістікке жеткен мұғалімдер суреті ілінген. Әр кабинет ұлттық бұйымдармен жабдықталған. Бұнда алдымен «Ұлы дала биосферасы – әдіс-тәсілдер қоржыны» атты педагогикалық шеберхана жұмысы көрсетілді. Көрнекіліктер көрмесі, «Асық GAME» жобасы, үйірмелер үлгісі, таңдау курстарының топтамасы, ҚМЖ жинақтары, дидактикалық материалдар, 1-11 сынып тәрбие бағдарламалары қойылған. Келесі кезекте этно ойындар өрнегі келушілер назарына ұсынылды. Шәкірттердің классикалық квест, ұлттық квест ойыны, «Алтын қақпа» және «Алтын сақа зияткерлік ойындары тамашаланды. Осы орайда оқушылардың ұлттық салт-дәстүрлер мен әдет-ғұрыптар жөніндегі білімдері жоғары екендігі байқалды.&nbsp;«Тәрбие атмосферасындағы құндылық» атты бөлімде «Меірімділк жүректен ...» тәрбие сағаты, «Ұлттық тәрбие негізі – Tik Tokтрендінде», «Қазақ хандығы» ойыны, қазақтың жазылмаған психологиясы (ұлттық ойындардың психолгоиялық мәні), «Шам түбіндегі ертегі» жобасы, BANI әлеміндегі альфа ұрпақ, «Ұлттық қоржын» «MEGA study» жобасы, ұлттық құндылықтар деректер қоры арнайы сайты семинарға қатысушылардың таным көкжиегіне ерекше әсер қалдырды. Шара барысында қонақтарға қазақшы нақышта ою-өрнектермен безендірілген кәдесыйлар таратылып, ұлттық тағамдар құрт, ірімшік, жаппай нан, бауырсақ пен айран ұсынылды.&nbsp;Семинар соңында қонақтар алған әсерімен бөлісіп, мектеп басшысы мен ұжым мүшелерінің іскерлігіне, дүниетанымдарының кеңдігіне, жұдырықтай жұмыла білген бірліктеріне ризашылық білдірді. Аудандық білім және ғылым қызметкерлері кәсіподағы комитетінің төрағасы Әбілқасым Роман, әдістемелік кабинет меңгерушісі Лаура Ізбасарова, №93 мектеп директоры Серікбол Сансызбаев сөз алып, семинардың көпшілікке ерекше шабыт сыйлағанын тілге тиек етті. Әрбір педагогтың санасында тың идеялардың туындауына себепші болған бастаманы жоғары бағалады. Ал «арқамнан ауыр жүк түскендей болды» деген мектеп басшысы Э.Сматуллева бізбен әңгіме барысында өз әсерін былай баяндады.&nbsp;<blockquote>«Бұл жобаны қолға алғанымызға да екі жылдың жүзі болды. Мақсат – ұлттық құндылыққа негізделген тәрбие мектебінің нобайын ұсынып, құндылық жобаларымен таныстыру. Ал міндетіміз білім алушылардың тұлғалық мәдениетін қалыптастыру және оқушыларды ұлттық тәрбиенің құнарымен ізгілендіру болатын. Бүгін мақсатымыз орындалып, міндетіміздің іргетасы қаланды дей аламын. Себебі, бұл міндет бұнымен тоқтап қалмауы тиіс. Әрбір оқушы ұлттымыздың ерекшеліктерін естіп-біліп, көріп өсуі тиіс. Елдің ертеңі – бүгінгі шәкірт. Осындай дүниелерді әрі қарай жандандыратында осылар. Семинардың өз деңгейінде өтуіне үлес қосқан демеушілер Мырзахмет Толыбаев, Жарқынбек Қабақбаев, Нұртай Аманов, Кенжебек Толыбаев, Нұргүл Қайназарова, Медеу Есқожаев, Ардақ Кәдіров секілді жомарт жандар мен әр жылы мектеп бітірген түлектерімізге алғыс білдіреміз. «Бір жеңнен қол, бір жағадан бас шығара білген» ұжым мүшелеріне ризамын. Бұл шарада әрқайсысының еңбегі ерекше. Ешқайсысықалыс қалды дей алмаймын. Ауызбіршіліктің жарқын үлгісін көрсете білді», –деді риза кейіппен.</blockquote><img src="https://knadmin.beoblood.kz/uploads/Whats_App_Image_2023_05_26_at_15_17_58_3681368b9f.jpeg" alt="WhatsApp Image 2023-05-26 at 15.17.58.jpeg"><img src="https://knadmin.beoblood.kz/uploads/Whats_App_Image_2023_05_26_at_15_18_43_1f12a820cb.jpeg" alt="WhatsApp Image 2023-05-26 at 15.18.43.jpeg"><img src="https://knadmin.beoblood.kz/uploads/Whats_App_Image_2023_05_26_at_15_20_15_bb75fb85c8.jpeg" alt="WhatsApp Image 2023-05-26 at 15.20.15.jpeg">

Мектеп ұжымы ұлттық құндылықтарды ұлықтады

<a href="https://kyzylorda-news.kz/">Kyzylorda-news.kz.</a> Жаңадария ауылы ауданнан шалғай орналасқанымен, шаруасы ширақ елді мекендердің бірі. Бұл ауылда тұратын тұрғындар бақша дақылдарын егуде көпке үлгі қыларлықтай. Аталған ауылдағы «агрико» шаруа қожалығы да 2016 жылдан бері ауылда табысты еңбек етуде. Шаруасы шираған шаруашылықтың тындырымды тірлігімен танысу үшін аудан әкімі еңбек адамдарымен кездесті.Биыл серіктестік 15 гектар алқапқа жүгерінің «Пионер» сұрпын сепккен. Америкалық дақылдың пісіп-жетілу уақыты – 3 ай. Мұнан бөлек 12 гектар алқапқа қарбыздың франциялық «Кримсон Свит» сұрпын егіп жатыр. Бұл өнімнің пісіп-жетілу уақыты жергілікті қарбыздармен шамалас, яғни 80-85 күннен кейін нарыққа шығаруға болады.Арман Қайратұлы бұл дақылдардың суды әлдеқайда аз қажет ететінін айтады. Мәселен, күріштің әр гектарына шамамен 36 мың текше метр су кетсе, аталған бақша дақылдарының гектарына 3-3,5 мың текше метр су жеткілікті екен. Оның үстіне өнімділік жағынан да жүгері мен қарбыз еккен тиімді екенін жасырмайды.&nbsp;<blockquote>«Күріш жерге себілгеннен жинап алғанға дейін суда тұрады, сон-дықтан ол суды көп қажет етеді. Ал бақша дақылдарының барлығы да суды аз қажет етеді. Оның ішінде біз биыл қолға алған жүгері, қарбыз, жоңышқа өнімдері мүлде суды аз қажет етеді. Бір жағынан өнімділік жағынан да ұтарымыз көп. Сондықтан егінді әртараптандырып, бақша дақылдарына басымдық берген дұрыс. Себебі жылдан-жылға аяқ судың тапшылығын өздеріңіз де көріп жүрсіздер. Бақша дақылдарын еккен адамда шығын аз, керісінше кірісі көп болады. Жүгеріні осыған дейін де егіп көргенбіз. Екі жыл бұрын жинап алған өніміміз егіс басынан сатылып кетті. Бұдан жүгеріге сұраныстың көп екенін аңғару қиын емес. Биыл да өнімнің бұл түріне басымдық бергеніміз сондықтан», – дейді серіктестік құрылтайшысы.</blockquote>Еңбек ұжымы әлі егу жұмыстарын жүргізіп жатыр, осы кездің өзінде мұндағы өнімдерге сұраныс көптеп түсіп жатыр екен. Сондықтан шаруашылық басшысы ала жаздай күтіп-баптаған өнімді нарыққа шығару жағына бас қатырмайтыны анық. Бастысы, дақыл өнімді болса жеткілікті.<blockquote>«Қазірдің өзінде шаруашылықта ондаған адам жұмыс жасайды, мұнан бөлек уақытында бізге еңбек өнімділігін арттыру үшін тағы көмек қажет болады. Сол тұста тағы да ауылдың бірнеше азаматын маусымдық жұмысқа аламыз. Осыған дейін қауын егіп, оны Ресейге экспортқа шығардық. Мұндағы өнім сапасы жоғары болса керек, әлі күнге дейін ресейлік тұтынушыларымыздан тапсырыс түсіп тұрады. Биыл жүгері мен қарбыз егіп жатырмыз. Алдағы уақытта қауын егуді және оны шет елдерге экспорттауды қайта қолға аламыз», – дейді серіктестік құрылтайшысы Арман Иса.&nbsp;</blockquote>Шаруашылықта техникадан мәселе жоқ, себебі серіктестік басшысы техника базасын жаңарту жұмыстарын жыл сайын жүргізеді екен. Биылдың өзінде олар бірнеше озық техника сатып алған. Оның ішінде жерді сүдігерлейтін, алқап тегістігін қамтамасыз ететін бірнеше озық техника бар. Тіпті шаруашылық ұжымы дақылдарды егу жұмыстарын да техникамен жүргізеді.&nbsp;Айта кетейік, 2016 жылдан бері аталған серіктестік өнімдері Ресей нарығында сатылымға шыққан. Дәмі тіл үйірер қауындар Мәскеудегі ірі сауда дүкендерінің сөрелерінен орын алған болатын. «Мырзашөл» тұқымдасына жататын «Жиенбай» қауыны ешқандай химиялық қоспасыз күтіп бапталған. Ауылдың теріскейіндегі «Атжайған» алқабын осыған дейін тек мал жайылым ретінде пайдаланғандықтан шөбі шүйгін, жері құнарлы. Сондықтан табиғи таза өнімге Ресей нарығында сұраныс жоғары болды.2016 жылы шаруа қожалық Ресейге 453 тонна 260 келі қауын, Қыр-ғызстанға 20 тонна қауын, 2017 жылы Ресейге 554 тонна 550 келі қауын, 191 тонна 600 келі тәтті бұрыш экспорттаған. Ал 2018 жылы жеке тұрғындармен бірлесіп, Жаңадария ауылдық округінен 30 гектарға қауын, 4 гектар қарбыз, 1 гектар қызанақ, 1 гектар қияр орналастырған болатын. Дәл осы жылы Ресейге 159 тонна 100 келі қауын, 16 тонна 400 келі тәтті бұрыш экспорттады. Шалғайдағы ауылда осындай тындырымды тірліктің болуы аймағымыз үшін үлкен мақтаныш, әрине.&nbsp;<blockquote>«Қауыннан пайда көп, сондықтан алдағы жылдары бұл кәсіпті қайта қолға аламыз. Келер жылы да қауын егіп қалуымыз ғажап емес. Ол кезде тағы да шетелге өнім экспорттауға тура келеді. Ресей, Қырғызстан және басқа да мемлекеттерден тапсырыс мол түседі. Сондықтан алдағы уақытта бұл мүмкіндікті құр жібермеуіміз керек. Бастысы, бақша дақылдарын күтіп-баптауда, оны нарыққа шығаруда тәжірибе бар. Алдағы жылдары қауыннан бөлек басқа да бақша дақылдарына басымдық береміз. Қазірдің өзінде жүгеріге тапсырыс көптеп түсуде. Алдыңғы жылы тұтынушыларымыздың көбісін жүгерімен қамтамасыз ете алмадық. Барлығын бір азамат сатып алып кетті. Алдағы уақытта егіс алқабы ұлғайса, сұраныстың барлығын қамтамасыз етуге жол ашылады деп ойлаймын», – дейді Арман Иса.</blockquote>Айта кетейік, қазіргі таңда «Агрико» шаруа қожалығының Жаңа-дарияда 300 гектардай жері бар. Бастысы, еңбек ұжымы оның барлығын тиімді пайдаланып отыр. Негізінен ауылда осындай шаруашылықтардың көптеп құрылғаны дұрыс, себебі бір жағынан шалғай ауылдың тұрғындарына да жұмыс табылады. Екіншіден, елді мекеннің кірісі артып, шаруасы ширайды. Мұнан бөлек аудан әкімінің сапары басқа да бақша дақылдары орналасқан егіс алқаптарында жалғасты. Қазіргі таңда Жаңадария ауылдық округіндегі «Игенбай», «Атжайған» жер учаскелерінде 30 отбасы 45 гектар жерге картоп және басқа да бақша дақылдарын орналастырған. Бұндай ілкімді істер Таң ауылдық округінде де жалғасын тапқан, бүгінде Таңда 25 гектар жерге 55 отбасы бақша дақылдарын орналастырған.&nbsp;«Жалқаулықты жеңіп, адал еңбек жолына түскен ауыл тұрғындарының жаз бойы жасаған еңбегінің жемісі тек бір отбасын ғана емес, баға тұрақтылығын сақтай отырып, аудан халқының жергілікті табиғи өнімді тұтынуына мүміндік береді. Мен келгенде айтқанмын, еңбек етемін деген адамды қашанда қолдауға дайынмын. Бүгінгі сапарымда дала жұмыстарымен танысып, еңбек адамдарының шаруасының ширағанын көріп, көңіл сүйсінді. Қазір заман жалқаулықты көтермейді. Міне, осы ретте бақша салып жатқан ауыл азаматтарының жұмысы бәрімізге үлгі болуы тиіс, – деді Асқарбек Темірбекұлы. Расында соңғы жылдары ауданда бақша дақылдарына басымдық берілуде. Мұны біз еңбек етемін деген азаматтарды қолдау шараларымен және жергілікті халықтың еңбексүйгіштігімен байланыстырдық. Бұл сөзімізге дәлел де жоқ емес. Мәселен, жыл басында шалғайдағы Жаңадарияның халқы бақша салуда бірнеше мәселе барын Асқарбек Темірбекұлының назарына салған. Қазіргі таңда оның барлығы шешімін тапты. Болмаса бүгінгідей ауыл халқының шаруасы ширамас еді.&nbsp;Биыл ауданда картоп және басқа да бақша дақылдарын орналастыруға 500 гектар жаңадан жер дайындалды. Бұл жерлер бақша салуға ниетті отбасыларға үлестіріледі. Бүгінге дейін ауданнан 610 отбасы картоп, көкөніс және басқа да бақша дақылдарын орналастыруға ниет білдірген. Жаңадан жер ашу жұмыстары шаруашылықтардың демеушілігімен жүргізілуде. Бұл ретте жер толық дайындалады, оған аяқ су жеткізіледі, сондай-ақ қоршауын да жергілікті әкімдіктің бастамасымен жүргізілуде. Тек тұрғындар еккен өнімінің күтіміне ғана жауапты. Олардан жерді дайындауға, қоршауға, аяқ су жеткізуге ешқандай қаражат болмаса көмек сұралмайды. Бұл бір жағынан өңірде бақша өнімдері бағасының тұрақталуына, тұрғындардың өз-өзін өніммен қамтамасыз етуге үлкен қолғабыс болып отыр. Былтыр да осындай жұмыстар қолға алынған, биыл да игі бастама жалғасын табуда.&nbsp;Қазіргі таңда 295 гектар жер дайындалып, 346 отбасыға берілген. Бүгінгі күнге дейін 71 гектар жерге 85 отбасы картоп, бақша дақылдарын орналастырған. Картоп, бақша дақылдарын орналастыруда Жаңадария, Аққұм ауылдық округтері тұрғындарының белсенділігі жоғары.Айта кетейік, бұған дейін аталған серіктестік шалғай ауылда шаруасын ширатып, өз өнімдерін шетелге экспорттаған болатын. Қазіргі таңда «Агрико» ШҚ 30 гектар алқапқа жоңышқа, 12 гектарға қарбыз және 15 гектар алқапқа жүгері егуді бастап кетті. Бүгінде 30 гектар жоңышқа толықтай күтімге алынған. Қазіргі таңда шаруашылық еңбеккерлері жүгері мен қарбыз егу жұмыстарына қарқынмен кіріскен. Серіктестік бүгінде ауылдың ондаған азаматын жұмыспен қамтып отыр.

Жаңадарияның шаруасы ширақ

<a href="https://kyzylorda-news.kz/">Kyzylorda-news.kz.</a> Тіл – ұлттың жаны. Ұлттың ұлт болып қалуының басты тірегі де оның ана тілінің қолданысымен тығыз байланысты екені даусыз. Қазақ поэзиясының ерекше құбылысына айналған Қадір Мырза Әлі «Ана тілің арың бұл, Ұятың боп тұр бетте. Өзге тілдің бәрін біл, Өз тіліңді құрметте», деп тілді құрметтеудің қажеттігін көрсетті. Иә, ана тілін құрмейтін тіл жанашырларының жадында ақынның жыр шумағы жүруі қажет-ақ. &nbsp;Жақында «Қазақ тілі» қоғамы аудандық филиалының ұйымдастыруымен аудандық емханада тіл жанашырларымен кездесу болып өтті. Оған аудандық аурухананың бас дәрігері Бақытжан Нысанбаев, Халықаралық «Қазақ тілі» қоғамы аудандық филиалының төрағасы Гүлжауһар Раева және тіл белсенділері қатысты.Қазақ тілі қоғамы өз жұмысында халқымыздың мәдениетін, қазақ тілін, әдебиетін, тарихын, әдет-ғұрпы мен тұрмыс-салтын сақтай отырып, оны одан әрі дамытуда филиалдың бастауыш ұйымдарымен тығыз байланыста бірлесе жұмыс жүргізіп келеді. Соның бірі аудандағы филиалдың ірі бастауыш ұйымы – аудандық ауруханасы. Ұйым мүшелерінің белсенділігі, туған тілге деген көзқарасы, азаматтық ұстанымы ерекше. Оның бір дәлелі – аудандық филиалдың ұйымдастыруымен Отбасы күніне орай өткен «Келіні жақсы үйдің керегесі алтын» атты байқауда аурухана ұжымынан қатысқан дәрігер Гүлдана Қалмаханова сайыстың бас жүлдесін жеңіп алды. Сондай-ақ, тілдің мәртебесін көтеру мен мекемедегі белсенділіктің артуына мекеменің бас дәрігері қай кезде де атсалысады.Кездесуде бастауыш ұйым ұсынысымен тұрғындарға медициналық көмек көрсетуде дертке шипалы сөздерімен жан жылуын сыйлап, ел құрметіне бөленіп жүрген бір топ тіл жанашырлары марапатталды. Ұлттық құндылықты насихаттауда қоғамның белсенді мүшесі ретінде атсалысқан мейіргерлерге Гүлжауһар Төлегенқызы шынайы алғысын білдірді. Жиын соңында аудандық аурухананың бас дәрігері Бақытжан Сағилатұлы мемлекеттік мәртебесі жоғары қазақ тіліне қашан да құрметі шексіз екенін айтып, мекемеде барлық құжаттар қазақ тілінде жүргізілетінін жеткізді.

Қармақшыда тілге жанашыр медбикелер марапатталды

<a href="https://kyzylorda-news.kz/">Kyzylorda-news.kz.</a> Төретам кенті және Ақай ауылдық округі бойынша кәмелетке толмағандардың істері және олардың құқықтарын қорғау жөніндегі кенттік комиссия отырысы өтті.2023 жылдың 23 мамыры күні Төретам кенті және Ақай ауылдық округі бойынша кәмелетке толмағандардың істері және олардың құқықтарын қорғау жөніндегі кенттік комиссия отырысы өтті. Комиссия отырысын комиссия төрағасы, Төретам кентінің әкімі Ғалымжан Тажмағамбетұлы жүргізді. Жиналысқа комиссия мүшелері, Байқоңыр қаласының прокуратурасының прокуроры Н.Тілекбай және құқық қорғау органдарының қызметкерлері, Төретам және Ақай а/о мектептерінің тәрбие ісі жөніндегі орынбасарлары, ата-аналар, мектеп психологы қатысты. Күн тәртібінде 4 мәселе қаралды.&nbsp;Бірінші мәселе бойынша балалардың жол көлігі жарақаттарының алдын алу жөнінде қабылданған шаралар мен кәмелетке толмағандарды жол қауіпсіздігі ережелерін сақтауға қалыптастыру туралы сөз болды. Екінші кезекте мектеп педагог-психологының тәрбиелік әрекетін әдістемелік қамтамасыз ету туралы атқарылған жұмыстар баяндалды. Сонымен қатар ”Жаз – 2023” балалар мен жасөспірімдердің жазғы демалыс сауықтыруын және жұмысқа тартылуын ұйымдастыру туралы мәселелер қаралды.Қазақстан Республикасы ІІМ Байқоңыр қаласындағы Өкілдігінің кәмелетке толмағандардың ісі жөніндегі инспекторы М.Мурзагалиеваның, білім бөлімінің білім беруді дамыту секторының меңгерушісі Ж.Алданованың, Ақай ауылдық округінің №279 мектебінің психологы П.Жугинисованың баяндамалары тыңдалды. Отырыс барысында жасөспірімдердің сабақ үлгерімі, тәртібі, жазғы лагерь, демалыс уақытындағы жұмысқа тартылу шаралары талқыланды.

Төретамда кәмелетке толмағандардың ісі талқыланды

<a href="https://kyzylorda-news.kz/">Kyzylorda-news.kz.</a> Ұрпақ тәрбиесі – қоғамның болашағы. «Балаңды өз тәрбиеңмен тәрбиелеме, өз ұлтыңның тәрбиесімен тәрбиеле» деп халық даналығы айтқандай, бала тәрбиесінің дұрыс жолға түсуі, сөз жоқ, қоршаған ортаға, әсіресе ата-аналар мен ұстаздар қауымының парасаттылығына байланысты. Ендеше ұрпақ тәрбиесіне аса зор жауапкершілікпен қарау – әрбір саналы азаматтың борышы.&nbsp;Халқымыздың бойына сіңген атадан балаға жалғасып келе жатқан ұлттық тәрбиесі өзге ұлттардан ерекшеленіп, өздеріне тән қасиеттерді көрсетіп тұратындығын жоққа шығара алмаймыз. Ұлттық тәрбиеміздің халықтың сан ғасырлар тарихымен тығыз байланыста болып, осы уақытқа дейін дәстүрлі тәрбие құндылықтарын жоғалтпай жалғастырып келеді. Халқымыздың ұлттық тәрбиесі негізінен жүйелі болған. Өйткені, тәрбие әке-шеше, отбасынан бастап, ағайын-туыс, көрші-қолаңның бәрі араласып, бәрі де халықтың баласына ортақ қамқорлық жасаған. «Балаңа басқұр қалдырғанша, тозбас дәстүр қалдыр» деген қазақ халқы озық жұрттардың санатында болашақ қамын қатты ойластырған. Сол себепті ұлтымыз «Балаң өзіңе тартса – жұбан, қоғамға тартса – қуан» деп бекер айтпаған. &nbsp;Тәрбиенiң бiртұтастығы, осы біртұтастықты сақтап, &nbsp;ұрпақ тәрбиесі мен ұлт тағдыры әр азаматтың қолында екенін ұмытпайық. Ауданда тәрбие жұмысын ұйымдастыруда 42 мектеп директорының тәрбие жөніндегі орынбасары, 29 педагог-психолог, 29 әлеуметтік педагог, 29 тәлімгер, &nbsp;797 сынып жетекші жұмыс істейді. &nbsp;Тәрбие жұмысын ұйымдастыру кезінде басым бағыт Абайдың «Толық адам» рухани &nbsp;адамның ұлттық бейнесін ашу, баланың жеке басына &nbsp;тілектестік қарым-қатынас, құрмет пен сенім, балалардың құқықтары мен заңды мүдделерін қамтамасыз ету &nbsp;болып табылады. Барлық білім беру ұйымдарында «Оқуға құштар мектеп», «Дебат қозғалысы», «Балалар және театр», «Мектеп парламенті», «Жылыжай» жобалары жоспарлы жүзеге асырылып, &nbsp;жүзден астам іс-шара өткізілуде.Жоба жұмыстары, оқушылардың көшбасшылық қабілетін дамытып, ата-ана мен мектеп арасындағы байланыстарды одан әрі нығайтуда. Қазіргі таңда жоба жұмыстарына 8000-нан астам бала қамтылған.«Оқуға құштар мектеп» жобасы аясында оқушылардың &nbsp;кітап оқуға қызығушылығын ояту үшін 29 мектептің кітапханаларында «COWORKING» &nbsp; &nbsp;орталықталығы &nbsp; ашылды. Мектеп кітапханаларында 87497 дана көркем әдебиет &nbsp; қорлары бар. Білім беру мекемелеріне демеушілер, еріктілер, мектебін ұлықтаушы шәкірттер арқасында мектеп кітапханаларына 792 дана көркем әдебиетпен толықтырылды.Барлық білім беру ұйымдарында «Оқуға құштар мектеп» жобасына жауапты маман бекітіліп, арнайы бұйрық шығарылған. Барлық білім беру ұйымдарында &nbsp;іс-шара жоспары бекітіліп, жұмыстар жүргізілуде. Атап айтар болсақ, балалардың &nbsp;оқу мәдениетін &nbsp;дамыту мақсатында «Кітапқа құмар құрдастар» тақырыбында кітапқұмарлар акциясы, &nbsp;балаларда кітап оқу дағдысын қалыптастыру, &nbsp;отбасы құндылықтарын дәріптеу мақсатында «Үздік оқырман отбасы» байқауы өткізіліп, оған аудан бойынша 138 &nbsp;отбасы қатысты. Барлық білім беру ұйымдарында мектепішілік жергілікті танымал тұлғалармен кездесу кештері ұйымдастырылды. №29 орта мектепте аудандық «Ақын – елдің ардағы» тақырыбы бойынша жергілікті қаламгер, &nbsp;ақын, ардагер-ұстаз Зарипа Тасымовамен өткен сыр-сұқбат жас ұрпақ бойына &nbsp;жоғары азаматтық және рухани-адамгершілік құндылықтарды қалыптастыратын мазмұнды кеш болды.Аудан мектептерінде дебаттық клуб жұмыстарына 450 оқушы тартылған. Биылғы оқу жылында Дебат клубы жұмысы үздік нәтиже көрсетіп отыр. Облыстық кезеңге 3 команда қатыстырылды. &nbsp;№277 орта мектептің &nbsp;«Mind cell» (миндсел) клубы облыстық кезеңде І орын иеленіп, республикаға жолдама алды. Облыстық кезеңде №277, №250, №121 мектеп оқушылары ІІІ орынмен марапатталды. Осы жылы «Жеке тұлғаны қалыптастырудағы өнер мен дебаттың маңызы» атты облыстық &nbsp;дебат ойыны мен семинар жұмысы №250 мектеп-лицейінде ұйымдастырылып, оң нәтижесін беруде. Мектеп-лицей базасында жалпы білім беру ұйымдарының мектеп директорлары арасында «Ұшқыр ой алаңы» аудандық дебат турнирі, &nbsp;№26 мектепте оқушылар арасында «Қазақстан – бақытты балалар мекені» республикалық турнирінің аудандық кезеңі, №250 мектеп-лицейінде мектеп директорларының тәрбие ісі жөніндегі орынбасарлары арасында &nbsp;облыстық дебат турнирінің аудандық кезеңі өткізілді.Жүйелі жұмыстар нәтижесінде &nbsp;Білім және ғылым министрінің кеңесшісі Раиса Шер ауданның дебат жұмысын насихаттап, фейсбук парақшасына жариялады.Тәрбие жұмысында &nbsp;әрбір оқушының өзін-өзі басқаруы, патриот болып ержетуі, Отанды танудан бастап, айналаға деген және азаматтық тұлғалық ұстанымын &nbsp;қалыптастыруда мектептерде оқушыларды кітап оқып тарту, бос уақыттарын тиімді ұйымдастыруда &nbsp; түрлі шараларға қатыстыру басты назарда ұсталады.Мектеп парламенті жобасы бойынша өзін-өзі басқару органы &nbsp;29 мектепте толық құрылып, сайлау өткізілді. 8 фракция бойынша мектептерде құрамдары жасақталып, 2891 оқушы қамтылуда. Парламент мүшелері мектеп өміріне белсенді араласып, &nbsp;өзін-өзі басқару ұйымы арқылы жұмыстарды іске асырып, өздерінің коммуникативті &nbsp;ұйымдастыру шеберліктерін көрсетуде. Атап айтсақ, &nbsp; &nbsp;«Әке – шаңырақтың негізгі тірегі» тақырыбындағы &nbsp;әкелер кеңесі мектептің парламент &nbsp;мүшелерінің ұйымдастыруымен №26 мектепте өтіп, тәлім-тәрбие алатын тағылымды шара болды.&nbsp;«Мектеп театр» жобасына &nbsp;435 оқушы қамтылған. &nbsp;Ұрпақты &nbsp;театр өнеріне тарту, адамгершілік, эстетикалық &nbsp;тәрбие беру, сөздің көріктілігіне, ойдың жүйріктігіне тәрбиелеу, адамды өзгерту және әлемді тану, білім алушыларға ізгілік жолын, имандылық жолын көрсету мақсатындағы театр жобасы жоспарға сәйкес жұмыс жүргізуде. Облыстан &nbsp;«Театрдың ғажайып әлемі» тақырыбындағы байқаудан &nbsp;№80 мектеп-гимназия ІІІ орынмен, №99 мектеп шығармашылық пен шеберлік көрсеткені үшін алғыс хатпен марапатталды. Қаңтарда «Т.Жүргенов – қазақ мәдениетінің алып нары» тақырыбында аудандық театрландырылған қойылым байқауы, ақпанда аудандық мәдениет үйінде «Театр – тәрбие мен мәдениет ошағы» тақырыбында тәжірибе алаңы өтті. Ақпанда Т.Жүргеновтің 125 жылдығына арналған №80 мектеп-гимназиясында «Т.Жүргенов – тарихи тұлға ұлт жанашыры» тақырыбында облыстық театр байқауы өткізілді. &nbsp; Наурызда &nbsp; N275 орта мектепте «Театр – өнер мен тәрбие ордасы» тақырыбында облыстық семинар өтті. Ерекшелігі – оқушыларға сан түрлі өнердің ішінде театр өнерінің алатын орнының ерекшелігін, тәрбие ошағына айналған мектеп театрының жұмысымен таныстыру. Мәдени өсуге ықпал ететін театрландырылған қойылымдар арқылы жас ұрпақты өнерді құрметтеуге баулу, театр қойылымдарына қызығушылығын арттыру.Аудандық Т.Салқынбайұлы атындағы өнер мектебінде облыстық «Дәстүрлі әндерді заманауи нақышта орындаудың тиімділігі мен әдістері» тақырыбында тәжірибе алаңы болып өтсе, аудан бойынша білім бөліміне қарасты оқушылар үйінде «Қосымша білім берудегі инновациялар: идеядан іске асыруға дейін» тақырыбында облыстық семинар-практикумы ұйымдастырылды. Мектептерде рухани-адамгершілік тәрбие беру, адамзаттық құндылықтарды дамытуда «Ата-аналар комитеті», «Әкелер, аналар кеңесі» &nbsp;жұмыстарын жүргізуде. Мектеп, отбасы және қоғамдастық арасындағы өзара түсіністік, әртүрлі проблемаларды шешуге бірлесе ұмтылу, тәрбие жүйесінде тұлғаның өсуі мен өзін-өзі &nbsp;жетілуіне қол жеткізеді. Өскелең ұрпақтың дамуы мен тәрбиелеудегі жетістігі және әрбір баланың тұлға болып қалыптасуы көбіне отбасындағы ата-ана мен мектептің бірлескен іс-әрекетіне, шешіміне тікелей байланысты.Отбасылық құндылықтарды дәріптеу және оны сақтаудың маңыздылығына назар аудару мақсатында білім беру ұйымдарында тоқсан сайын әртүрлі тәрбиелік іс-шаралар сынып сағаттары, бейнероликтер, конкурстар, флешмобтар, акциялар, семинар-тренингтер, шеберлік сабақтары іске асырылады.Жаңа Қазақстан үшін қазақ өркениетін дамыту, салт-дәстүрін, әдет-ғұрпын, тілін тағы басқа ұлттық құндылықтар аясын кеңейту – өзекті мәселенің бірі. Сондықтан алдымызда тұрған – ұлттық мұра құндылықтарын қазіргі таңның мәдени жетістіктерімен үйлестіру. Жас ұрпақ тәрбиесінде үйлесімділік заңы салтанат құруы шарт. Яғни ол өзінің өсу, есею кезінде ақ сүт беріп асыраған ата-анасымен де, көкірек көзін ашқан ұстаздарымен де үйлесім таба білуі тиіс. Сонда ғана тұлға бойында ұлттық рухани қасиеттер бірте-бірте қалыптасары сөзсіз. Тұлға бойындағы рухани құндылықтарды қалыптастырудың көзі отбасы, әулет, әлеуметтік орта, мемлекет болса, ұлтық құндылық, ұлттық салт-сана, ұлт алдындағы міндет, парыз, намыс, рух, ұлттық салт-дәстүр тұлға бойындағы ұлттық құндылықтың ең жоғары көрсеткіші.&nbsp;Қорыта айтқанда, отбасылық құндылықтар мен ұлттық тәрбие мәселелері орта білім беру ұйымдарының тәрбие жұмысының ажырамас бір бөлігі болуы тиіс.

Қармақшыда 8000-нан астам бала жоба жұмыстарына қатысады

<a href="https://kyzylorda-news.kz/">Kyzylorda-news.kz.</a> 26 мамыр күні республика көлемінде бейнеконференциялық байланыс режимінде «Нашақорлыққа және есірткі бизнесіне қарсы іс-қимылға бағытталған қызметті үйлестіру жөніндегі ведомствоаралық комиссия» отырысы өткізілді.&nbsp;Отырыстың негізгі мақсаты - «Халықаралық нашақорлыққа қарсы күрес күніне» орай республика көлемінде профилактикалық іс-шаралар айлығының &nbsp;салтанатты ашылуы.&nbsp;Аталған жиынға республикамыздың барлық өңірлерінен мүдделі мемлекеттік органдар мен үкіметтік емес ұйым өкілдері, қоғам белсенділері, журналистер, блогерлер, еріктілер және жанашыр тұрғындар қатысты.&nbsp;Конференция барысында нашақорлықтың алдын алу және есірткінің заңсыз айналымымен күрес бағытындағы атқарылған жұмыстар, алдағы уақыттағы басым міндеттер мен жоспарланған іс-шаралар туралы сөз қозғалды.&nbsp;Өткізілетін айлық шеңберінде Қызылорда облысы көлемінде көптеген іс-шаралар жоспарланып, іске асырылатын болады.«26 маусым – Халықаралық нашақорлыққа қарсы күрес күніне» орай өткізілетін айлық, 26 мамыр – 26 маусым аралығында жалғасатын болады.

Қазақстан және Қызылорда облысының жаңалықтары