&nbsp;&nbsp; <a href="https://kyzylorda-news.kz/">Kyzylorda-news.kz</a> &nbsp;&nbsp;Бүгін Қазақстан Премьер-Министрі Олжас Бектенов 15 наурызда өткен «Адал адам – Адал еңбек – Адал табыс» атты Ұлттық құрылтайдың үшінші отырысында Мемлекет басшысы Қасым-Жомарт Тоқаевтың елімізде тұрмыс сапасын жақсарту жөніндегі тапсырмаларын орындау бойынша кеңес өткізді. &nbsp;Құрылтайда Президент тұрғын үй коммуналдық шаруашылығы инфрақұрылымын жөндеу және жаңғырту мәселесі бойынша қолданыстағы 55 жылу көзін жөндеуді және кемінде 6,5 мың шақырым инженерлік желілерді жаңғыртуды тапсырды.&nbsp; Үкімет басшысының ресми сайтындағы ақпаратқа сүйенсек, бұл мақсаттарға 650 млрд теңге инвестиция тартылатын болады.Азаматтардың баспаналы болуын қамтамасыз ету бойынша қойылған міндеттерді шешу үшін Үкімет кезекте тұрғандар, оның ішінде халықтың әлеуметтік осал санаттары үшін сатып алу құқығымен жалға берілетін тұрғын үй көлемін 4 есе ұлғайтуды жоспарлап отыр. Ол үшін қосымша 272 млрд теңге бөлінеді. Мемлекет басшысының тапсырмасы бойынша Отбасы банк 300 млрд теңге сомасына ипотекалық қарыздар беретін жаңа бағдарламаны іске қосады. Жаңа бағдарламаға жұмыс істейтін жастар, жас отбасылар, тұрғын үй төлемдерін алушылар, банк салымшылары, моноқалалардың, аудан орталықтары мен ауылдық елді мекендердің тұрғындары, оның ішінде ақша жинау бойынша міндеттемесі жоқ тұрғын үй кезегінде тұрғандар қатыса алады. Бірінші жылы жаңа бағдарлама есебінен қосымша 12 мың баспанаға мұқтаж отбасын үймен қамтамасыз ету жоспарланып отыр. Жалпы биыл рекордтық 18 млн шаршы метр тұрғын үй салынады, бұл бұрынғы жоспарланған жылдық көрсеткіштен 2,5 млн шаршы метрге артық.Еліміздің жол желісін дамыту бойынша Президент айтқан 12 мың шақырым автомобиль жолдарын реттеу үшін Үкімет ағымдағы жұмыстардан бөлек, қосымша 2,5 мың шақырым жолды жөндеу жұмыстарын жоспарлап отыр. Бұл мақсаттарды іске асыру үшін шамамен 1 трлн теңге инвестиция бағытталатын болады. Бұл жай-күйі жақсы және қанағаттанарлық республикалық жолдардың үлесін 93%-ға дейін арттыруға, сондай-ақ қосымша 24 мың жұмыс орнын құруға мүмкіндік береді.Елді мекендерді газдандыру деңгейін арттыру мақсатында Мемлекет басшысы кемінде 1,7 мың шақырым желіні жаңғырту міндетін қойды. Бұл 300 мыңнан астам азаматқа көгілдір отынды қолжетімді етеді. Осыған байланысты Үкімет биыл жоспарланған 46 елді мекеннің орнына 87 елді мекенді газдандырмақ. Осылайша, 63 мыңнан астам адам жеделдетілген шаралармен газбен қамтамасыз етілетін болады, яғни қамту іс жүзінде 2 есеге ұлғайтылды. Бұл мақсаттарға 195 млрд теңге бөлінетін болады.Үкімет басшысы биыл 1 сәуірге дейінгі мерзімде жобаларды қаржыландыру кестесін уақтылы ұсынуды тапсырды. Кесте сондай-ақ жобалардың әрі қарай іске асырылуын күнделікті бақылауды да көздейтін болады.<blockquote>«Біз Президенттің ауқымды инфрақұрылымдық бастамаларының уақтылы іске асырылуын қамтамасыз етуге тиіспіз. Әрбір министрге және әкімге, ұлттық компаниялардың басшылығына жұмысты күнделікті бақылауға алуды тапсырамын. Тұрғындар нақты өзгерістерді көруі қажет. Толық қайтарыммен жұмыс істеу және жоғары нәтиже тиімділіктің көрсеткіші болмақ», — деді Олжас Бектенов.</blockquote>Сонымен қатар кеңесте өңдеу өнеркәсібін, транзиттік дәліздерді, кәсіпкерлікті және IT-технологияларды одан әрі дамыту жөніндегі шаралар қаралды. Негізгі міндет – жаңа жұмыс орындары, озық технологиялар мен құзыреттер трансферті, ірі өндірістерді локализациялау, жоғары деңгейде өңделген өнім шығаратын кластер құру және т.б. түріндегі мультипликативтік әсер беретін жаңа инвестициялық жобалар.Биыл жоспарланған кемінде 70 жоба пайдалануға берілмек. Өңдеу өнеркәсібін дамыту мақсатында отандық кәсіпорындардың жүктемесін орта есеппен 65%-ға дейін арттыру бойынша қосымша шаралар әзірленетін болады.Транзиттік дәліздерді дамыту және көліктің барлық түрімен жүк тасымалдау көлемін ұлғайту үшін жаңа теміржолдардың, логистикалық орталықтар мен қоймалардың құрылысы жалғасатын болады. Мәселен, жүктерді теміржол көлігімен тасымалдау көлемін 450 млн тоннаға дейін, автомобиль көлігімен тасымалдау көлемін 316 млн тоннаға дейін, сондай-ақ транзиттік тасымалдарды 30 млн тоннаға дейін, оның ішінде Транскаспий халықаралық көлік бағыты бойынша жүктерді тасымалдау көлемін 4,2 млн тоннаға жеткізу жоспарланып отыр.Үкімет отандық бизнесті қолдауды жалғастырады. АӨК дамытуға қосымша 240 млрд теңге бағытталатын болады. ШОБ жобаларын субсидиялауға 320 млрд теңгеге дейін бағытталады. Инвесторлар тарту мақсатында 12 арнайы экономикалық және индустриялық аймақ қажетті инфрақұрылыммен қамту жоспарланған. Бұл мақсаттарға 160 млрд теңге бағытталады. Сондай-ақ «өнеркәсіптік ипотека» тетігі бойынша жалпы сомасы 30 млрд теңгеге 8 жаңа шағын өнеркәсіптік аймақты құру жұмыстары жеделдетілетін болады.Ақпарат және байланыс қызметтері саласында кемінде 10% деңгейінен кем емес өсім күтіледі және ол IT-қызметтер экспортын $600 млн-ға дейін ұлғайту есебінен қамтамасыз етілетін болады.<img src="https://knadmin.beoblood.kz/uploads/431946545_711559477831966_8921167722667785961_n_1_2cb5b52d3f.jpg" alt="431946545_711559477831966_8921167722667785961_n (1).jpg"><img src="https://knadmin.beoblood.kz/uploads/431946545_711559477831966_8921167722667785961_n_3358aeb34a.jpg" alt="431946545_711559477831966_8921167722667785961_n.jpg"><img src="https://knadmin.beoblood.kz/uploads/432061644_711559467831967_8504778995800992143_n_dac00fa7e9.jpg" alt="432061644_711559467831967_8504778995800992143_n.jpg"><img src="https://knadmin.beoblood.kz/uploads/432744269_711559457831968_120207497931527229_n_71ad283710.jpg" alt="432744269_711559457831968_120207497931527229_n.jpg">Фото: primeminister.kz

Үкімет Президент бастамаларын орындауға кірісті

&nbsp;<a href="https://kyzylorda-news.kz/">Kyzylorda-news.kz</a> &nbsp;Құрылысшылардың еңбек ізі мыңдаған тұрғын үй мен қызмет көрсету ғимаратында, мектеп пен балабақша, аурухана-емханада, мыңдаған шақырым жол жүйесінде сайрап жатыр. Ел қуанышына айналған түрлі сан салалы кешен мен көрікті үйлер бір күнде біте қоймайды. Оған құрыш қолды құрылысшылар жаздың аптабы мен қыстың суығына қарамай, тер төгіп келеді. &nbsp;Бұл елдің әлеуметтік-экономикалық деңгейінің өсу белгісін білдіреді.Былтыр облыстың 85 жылдық мерейтойында Сыр құрылысшылары көтеріңкі көрсеткіш тарту етті. Мерейлі мереке қарсаңында Қызылорда облысы экономикалық өсу қарқыны бойынша республикада үздік үштікке шықты. Үкімет отырысында Ұлттық экономиканың экс-министрі Әлібек Қуантыров &nbsp;аймақтың абыройын асқақтатып атап айтты. «Жыл басынан бері облыс тұрғын үйді пайдалануға беру бойынша 3-орында, өңдеу өнеркәсібінің өсу қарқыны бойынша 4, ал құрылыс секторындағы жоғары өсімді қамтамасыз еткен өңірлер арасында 5-орында. Барлық экономикалық даму көрсеткішін есепке алғанда, Сыр өңірі алғашқы үштікте» деп тоқталған болатын.Облыстың 85 жылдық тарихында құрылыс саласы құр алақан емес, олардың озық ісі облыс шежіресінде ойып орын алады.Тағылымды тарихОблыстың алғашқы құрылыс мекемесі ҚазССР Халық комиссарлары кеңесінің 1944 жылғы 10 мамырдағы қаулысына сәйкес Еңбекшілер депутаттарының Қызылорда облыстық советі атқару комитетінің арнайы шешімімен құрылды. Алдымен Архитектура істері жөніндегі облыстық бөлім, онда 3 штаттық бірлік болды. Мекемеге облысқа қарасты бір қаланың, ауданға бағынатын екі қаланың, төрт аудан орталығының және алты қала типтес қыстақтың құрылыстарына басшылық және бақылау жасау жұмыстары жүктелді.Бұл мекеме бірнеше рет қайта құрылымдаудан өтті. Функциясы мен міндеттеріне қарай &nbsp;қызмет ету ауқымы бірте-бірте кеңейіп, заман талабына сай жаңартылып отырды. Жаңа үлгідегі құрылымдық өзгерістер жасалды. Өзіне бағынысты құрылыс нысандарына техникалық қадағалау жасайтын мемлекеттік мекеме де жұмыс жасады.Облыстық құрылыс басқармасының негізі 1996 жылы қаланды. Ол кезде облыстық сәулет, құрылыс және тұрғын үй-коммуналдық шаруашылық басқармасы деп аталды. Ал 2005 жылы сәулет, қала құрылысы және құрылыс басқармасы, бір жылдан кейін құрылыс департаменті, 2008 жылдың ақпан айынан облыстық құрылыс басқармасы болды.2015 жылдың басында «Қызылорда облысының құрылыс, сәулет және қала құрылысы басқармасы» мемлекеттік мекемесі болып қайта құрылғаны белгілі. Алдағы жылы осы мекеменің құрылғанына 80 жыл толғалы отыр.Мекемеге 1996-2023 жылдар аралығында көптеген білікті азамат басшылық жасады. Қазіргі күні іргелі мекеме өңірдегі құрылыс индустриясының дамуына жетекшілік етіп, сәулетті құрылыс нысандарының салынуына ықпал етіп келеді.Мемлекет басшысы Қызылорда облысына жұмыс сапарында темірбетон бұйымдары зауыты өніміне жоғары баға берген болатын. Бұл жергілікті кәсіпкерліктің кең өрісін көрсетті. «Құрылыс-көлік компаниясы» ЖШС биыл құны 2,6 миллиард теңге болатын жобаны іске қосты. Комбинат күніне 200 текше метр темірбетон бұйымдарын өндіреді.2023 - жетістікке толы жылҚұрылыс индустриясы – экономиканың негізгі іргетасы. Кез келген елдің экономикалық күш-қуаты мен әлеуметтік тұрақтылығы осы саланың дамуына тікелей байланысты. Бүгінде өңірде құрылыс индустриясы қарқынды дамып, ел экономикасының, оның ішінде тұрғындардың әлеуметтік әлеуетінің артуына айрықша ықпал етіп келеді.Ауқымды саланы алға жылжытуда құрылысшылар қауымының еңбегі ерен. Миллиардтаған теңгенің ірі жобалары құрылысшылардың табандылығының арқасында жүзеге асырылуда.2022 жылы аймақ басшысының бастамасымен әлеуметтік нысандар құрылысына мемлекеттік бюджеттен 5,2 млрд теңге бөлінді. Бұл қаражатқа 25 әлеуметтік нысан құрылысын жүргізу жоспарланып, жыл соңына дейін 12 нысан пайдалануға берілді.Қаржыландырудың барлық көзі есебінен 683,2 мың шаршы метр тұрғын үйге иелері қоныстанды. Облыс бойынша жалпы ауданы 124,9 мың шаршы метрді құрайтын 1764 пәтерлік 41 тұрғын үй салынды.Былтыр инженерлік желі бойынша 38 жобаның құрылысы жүргізілді. Оған 4,9 млрд теңге қаржы бөлінді. 8 жобаның құрылысы аяқталып, 53,8 шақырым инженерлік желі пайдалануға берілді. Оның ішінде жеке тұрғын үй құрылысы бойынша 886 жер учаскесі 44,1 шақырым электр желісімен қамтамасыз етілді. Облыстық басқарма арқылы 53 құрылыс нысанының жоба-сметалық құжаты әзірленіп, сараптаманың оң қорытындысы алынды. Жобалардың жалпы құны 71,9 млрд теңгені құрап отыр.Демеушілердің қолдауымен 189,2 млн теңгеге 8 құрылыс нысанының – 5 мектеп, 1 өнер мектебі, 1 мемлекеттік орган ғимаратының және сыртқы инженерлік желінің жоба-сметалық құжаттамалары әзірленді. Бұл нысандардың жалпы сметалық құны 9,4 млрд теңгені құрайды.Құрылыстағы толымды істер&nbsp;Облыс құрылыс саласында өткен жылдың 9 айының өзі нәтижелі жетістікке толы болды. Әлеумeттік нысандар құрылысына мемлекеттік бюджеттен 20,3 млрд теңге бөлінді. Бұл қаражатқа 40 әлеуметтік нысанның құрылысы жүргізілуде. «Жайлы мектеп» ұлттық жобасы шеңберінде 10 білім беру объектісін салуға республикалық бюджеттен 19,6 млрд теңге бөлініп, құрылысы басталды.«Қуатты өңірлер – ел дамуының драйвері» ұлттық жобасы аясында тұрғын үй құрылысын қаржыландырудың барлық көзі есебінен 692,3 мың шаршы метр тұрғын үй пайдалануға беру жоспарлануда. Оның ішінде, мемлекет қаражаты есебінен 37,4 мың шаршы метр және жекелеген қаржы есебінен 654,9 мың шаршы метр. Мемлекеттік бюджеттен жалпы ауданы 37,4 мың шаршы метр құрайтын 592 пәтерлік 15 тұрғын үйдің құрылысын жыл соңына дейін аяқтап, пайдалануға берілетін болады. Халықтың әлеуметтік жағынан осал топтары үшін сатып алынатын тұрғын үйлер бойынша 1000 пәтер сатып алу жоспарлануда.Сонымен бірге, облыстық бюджет қаржысы есебінен 79 пәтер сатып алынады. Оның ішінде жалғыз тұрғынжайы Қазақстан Республикасының заңнамасында айқындалған тәртіппен апаттық жағдайда деп танылған азаматтарға 34 пәтер, аз қамтылған көпбалалы отбасыларға 45 пәтер. Жыл соңына дейін кезекте тұрған 1671 отбасына тұрғын үй беріліп, кезек біршама азаяды.Өткен жылдың 8 айда қаржыландырудың барлық көзі есебінен 546,9 мың шаршы метр тұрғын үй пайдалануға беріліп, жоспар 119,8% орындалды. Осы аталған индикаторлық көрсеткішке қол жеткізу бойынша жыл басында аудандар бөлінісіндегі жоспар бекітіліп берілді. Сонымен қатар, басқарма арқылы аудан әкімдіктеріне жоспарланған көрсеткіштерге 100% қол жеткізу бойынша түсіндірме жұмыстары үнемі жүргізілуде.Мемлекет өз азаматтарының баспанамен қамтылуына мүдделі. Тұрғын үй құрылысы – тек мақсат ғана емес, ел экономикасының өрлеуіне серпін беретін зор күш. Тұрғын үй құрылысы бойынша облыс көлемінде жалпы алаңы 546 872 шаршы метрді құрайтын 2 634 тұрғын үй пайдалануға берілді. Бұл – өткен жылдың тиісті кезеңімен салыстырғанда 119,8 пайызға жоғары көрсеткіш.Ауқымды жобалар жүзеге асырылудаОблыстың шежірелі тарихы бүгінде өз жалғасын табуда. Аймақтың құрылыс саласында 126,4 пайыз өсім бар. Өңір қазір қарқынды құрылыс алаңына айналды. Жаңа жобалар жүзеге асырылып, ауқымды инвестициялар тартылып, экономиканың негізгі секторында серпінді қадамдар жасалуда.Аймақ басшысы әлеуметтік маңызы бар бастамаларға жергілікті меценаттарды көптеп тартып, ауқымды жобаларды жүзеге асыруға қаржы бөлінді. Жыл соңына дейін құны 3,7 миллиард теңге болатын 1000 орындық «Өнер орталығын» пайдалануға беру жоспарлануда. Емханасы мен онкологиялық бөлімшесі бар 300 орындық көпбейінді аурухананың құрылысы жүргізіліп жатыр. «Ауылдық денсаулық сақтауды жаңғырту» ұлттық жобасы аясында елді мекендерде 27 медициналық-амбулаториялық нысан салынуда.Өңірде бірқатар спорт және әлеуметтік-мәдени нысан бой көтереді. Атап айтқанда, жуырда 7 мың орындық Орталық стадионның, жабық бассейні бар көпсалалы денешынықтыру-сауықтыру кешенінің құрылысы басталады. Аудандарда 11 денешынықтыру кешенін салу үшін жергілікті бюджеттен 2,6 миллиард теңге бөлінген.Құны 1,6 миллиард теңгені құрайтын заманауи үлгідегі «Отбасы орталығы» да есігін айқара ашты. Белгілі кәсіпкер, меценат Марат Дүйсенбаевтың демеушілігімен құны 1,7 миллиард теңгені құрайтын «Анаға тағзым» орталығы жұмысын бастады. Аудандар мен шағын ауылдарда да жаңа нысандардың құрылысы тұрақты жүргізілуде. Бүгінгі таңда 200 орындық «Оқушылар үйі» мен 50 орындық «Өнер мектебі», «Балықшылар ескерткіші» мен аллея пайдалануға берілді. Заманауи үлгідегі демалыс саябағы ел игілігіне ұсынылды. Сонымен қатар, «Еңбекшілер аллеясы» бой көтерді.Облыс орталығында сметалық құны 20 млрд теңгені құрайтын «Қорқыт ата» әуежайының жаңа терминалының құрылысы басталды. Терминал құрылысын Болат Өтемұратовтың қоры қаржыландырған. «ҚазГерМұнай» бірлескен кәсіпорнымен жасалған келісімнің нәтижесінде облыс орталығында заманауи үлгідегі «Оқушылар сарайы» бой көтермек.2022 жылы тамыз айында құны 2 млрд 700 млн теңгені құрайтын «Қан орталығының» іргетасы қаланды. Нысан жылына 5000-10000 адамға қызмет көрсетеді. Орталықтың салынуы – аймақтың денсаулық сақтау саласы үшін маңызды әрі ұтымды шешім, тұрғындардың денсаулығын сақтау және қорғау бағытындағы нақты іс-шараның бірі. Ол 2024 жылдың басында пайдалануға берілмек. Сондай-ақ, 300 орындық жатақханасы бар 400 орындық физика-математика бағытындағы мектеп-интернат құрылысы да қарқынды жүргізілуде. Жалпы 8 млрд теңгеге салынатын жаңа мектеп оқушыларға сапалы білім беруге қажетті заманауи жабдықтармен қамтамасыз етіледі.Тоқсан ауыз сөздің тобықтай түйіні, облыстың 85 жылдық мерейтойына сала толымды жетістіктермен жетіп отыр. Бүгінде Сыр өңірі құрылыс саласында табысты өңірлердің біріне айналып отыр. Облыс басшылығы осы мақсатта ірі компаниялар, шетелдердегі шағын және орта бизнес өкілдерімен келіссөздер жүргізуде. Бұл орайда да ойластырылып отырған жарқын жобалар аз емес. Демек, өңірдің сәулетін арттыруға бағытталған жұмыстар алдағы уақытта да жалғасын таба бермек.&nbsp;

Құрылысы қарқынды – Қызылорда 

<a href="https://kyzylorda-news.kz/">Kyzylorda-news.kz</a>&nbsp; Өткен жылы облыс бойынша «Ауыл аманаты» бағдарламасына 3 миллиард теңге қаржы қаралған. Ауыл тұрғындары жоба аясында жеңілдетілген несие алып, кәсіптерін кеңейтетіндеріне ерекше қуанып отыр.«Ауыл аманаты» жобасы – ауылды дамытудың кепілі. Бұл жергілікті жұртшылықтың ауылда еңбек етіп, тұрақталуына бағытталған. Бұл жобаға тек ауыл тұрғындары, оның ішінде жұмыссыз азаматтар, өз-өзін жұмыспен қамтушылар, кәсібін енді бастағандар мен кәсіп иелері қатыса алады. Негізгі талаптар – осы. Несие берілген соң арнайы каникул да қарастырылған. Бұл бизнесті – дамытып алуға берілген жақсы мүмкіндік.<blockquote>&nbsp;Жалпы бағдарлама 5 бағыт бойынша қаржыландырылады. Атап айтқанда, өңдеу, егін шаруашылығы, кооперативтерді дамыту, мал және басқа да бағыттағы бизнес жобалар қамтылған. Оның ішінде 600 жобаға несие беру жоспарланып, 636 жаңа жұмыс орнын ашу көзделуде. Сенім білдірген өкіл ретінде мемлекеттік сатып алу заңына сәйкес «Байқоңыр» ӘКК» АҚ анықталып, «Ауыл аманаты» жобасы бойынша микрокредиттер алуға құжат қабылдау 20 шілдеде басталды. Бүгінгі таңда әкімдіктерден қаржыландыруға 2,8 млрд теңгені құрайтын 316 жобаның құжаты тапсырылып, несие комитеті 1026,5 млн теңгеге 130 жобаны мақұлдады, &nbsp;24 жоба бойынша 153,9 млн теңге несие берілді. Жалпы барлық аудандар және Қызылорда қаласы бойынша ауылдарды қамту мақсатында қаралған қаржы халық санына қарай тең бөлініп, әр ауданға өз лимиті қарастырылды. «Ауыл аманаты» жобасын өңірдің ерекшелігіне қарай тиімді және сапалы іске асыру мақсатында басымдық өндірістік жобаларға берілуде. Бұл ретте, жеке қосалқы шаруашылықтардың ынтасы өңдеуге, оның ішінде шағын цехтар, жылыжай өндірісін, омарта, балық және құс шаруашылығын дамытуға бағытталуда, – дейді облыстық ауыл шаруашылығы және жер қатынастары басқармасының бөлім басшысы Гүлмира Исабергенова.</blockquote>Ауылдағы ағайын банктен несие алуда көп кедергіге тап болатын. Себебі кепілге қоятын мүлкі жоқ не талапқа сай емес. Ал «Ауыл аманатының» басқалардан ерекшелігі әр қатысушының жағдайы, қаржылық мүмкіндігі жеке қаралады.Жоба Мемлекет басшысы Қасым-Жомарт Тоқаевтың 2023-2027 жылдарға арналған тұжырымдамасы негізінде бастау алды. Жаңа бағдарламаны ауыл тұрғындары арасында жан-жақты насихаттап, түсіндіру жұмыстары кеңінен жүргізілді. «Amanat» партиясы жанынан арнайы мобильді топ құрылып, еліміздің барлық өңірлерін аралап шықты. Оның ішінде ең шалғай ауыл тұрғындары да қамтылды. Бүгінгі күні кәсіп ашуға бел буған &nbsp;ауыл тұрғындары қажетті құрал-жабдықтарын алуда.&nbsp;«Ауыл аманаты» жобасы аясында кәсіп бастауға ниет еткен азаматтардың несие өтінімдерін қарау мақсатында бүгінгі күні өңірде «amanat» партиясы облыстық филиалы, «Байқоңыр» ӘКК» АҚ және түрлі сала мамандарынан арнайы комиссия құрылып, жұмыс жасауда.<blockquote>&nbsp;Комиссия отырыстарына 120-дан астам жоба ұсынылып, қаржыландырудың оң шешімі қабылданғаннан кейін тексерілетін болады. Сондай-ақ тәуелсіз бағалау туралы есептері сұратылып, мүліктері кепілге тіркелген соң, қаржыландыру жұмыстары жасалады. Ерекше айта кететін жайт, бағдарлама басталған сәттен алаяқтыққа жол берген бірқатар азамат кездесті. Осы орайда, бағдарламаға қатысушылардың тек ресми ақпаратқа жүгінуін сұраймыз, сонымен қатар бізге немесе «amanat» партияcының өңірдегі филиалдарына барып, нақты ақпарат пен кеңес алуына болады, – дейді «Байқоңыр» ӘКК» АҚ басқарушы директоры Мадали Әлішерұлы.</blockquote>Бағдарлама ең әуелі халық табысын арттыруға бағытталып отыр. Ауыл тұрғындары бұл бастамаға барынша мүдделілік танытуда. Олар өз кәсібін бастауға немесе шағын кәсіптерін кеңейтіп, талапқа сай дамыта алатынына сенімді.Фото: &nbsp;Нұрболат Нұржаубай

«Ауыл аманаты» - ауыл игілігі үшін

&nbsp;<a href="https://kyzylorda-news.kz/">Kyzylorda-news.kz</a> &nbsp;Бүгін облыс әкімі Нұрлыбек Нәлібаев «Қазпошта» АҚ Басқарма төрағасы Әсел Жанасовамен кездесіп, пошта-қаржы саласын дамыту жөніндегі меморандумға қол қойды.Меморандум аясында тараптар Қызылорда облысында пошта-қаржы саласын дамыту бойынша өзара ынтымақтастық туралы келісімге қол жеткізді.Құжатта «Қазпошта» АҚ-ның инвестициялау және дамыту жөніндегі мемлекеттік, салалық және өңірлік бағдарламаларға қатысу мүмкіндіктері қарастырылған. Қызылорда облысында электронды сауданы дамытудың іс-шаралар жоспарын іске асыру, зейнеткерлер мен жеңілдік санаттарын алушылар, орта мектеп оқушылары арасында «Қазақстан азаматының әлеуметтік картасы» жобасын дамыту қамтылған. Мұнан бөлек, кәсіпкерлер мен халықтың «Қазпошта» қызметін кеңінен пайдалануын қамтамасыз ету үшін қолма-қол ақшасыз төлемдерді енгізу және одан әрі дамыту көзделген. Оның ішінде төлемдерді Pos Mobile қосымшасы арқылы қабылдау, қашықтан есеп айырысу-кассалық қызмет көрсету де бар.Президенттің «Халық үніне құлақ асатын мемлекет» тұжырымдамасына сәйкес, шалғай елді мекендердің әрбір тұрғынына «Қазпошта» арқылы мемлекеттік және әлеуметтік қызметтерді қолжетімді ету, яғни «Е-өтініш» жобасын іске асыру мақсатында азаматтардың мемлекеттік органдармен өзара іс-қимылына мүмкіндік берудің маңызы зор. Бұл арқылы ауыл тұрғындарының мемлекеттік көрсетілетін қызметтерге қолжетімділігі, цифрлық сауаттылығы артады. Сондай-ақ, әлеуметтік осал топтағы азаматтардың қызметтерге қол жеткізуі жеңілдейді. Аймақтағы ғимараттар мен құрылыстарда QR-коды бар жаңа пошталық әріптік-цифрлық индекстің аншлагтарын орналастыруда да өзара іс-қимыл жасалмақ.Айта кетейік, бүгін - елімізде Наурызнама онкүндігінің аясында Ұлттық киім күні. Атаулы күннің ізімен жер-жерде ұлттық киім мен оның заманауи, жаңарған үлгілері кеңінен насихатталуда. Аймақ басшысы бүкілхалықтық іс-шараға өз үлесін қосты.Сыр өңіріне жұмыс сапары барысында Әсел Жанасова «Қазпошта» АҚ Қызылорда облыстық филиалының ұжымымен кездесіп, теміржол вокзалындағы почта сұрыптау және жеткізу учаскесінің жұмысымен танысады.Фото: Қызылорда облысы әкімінің баспасөз қызметі

«Қазпошта» АҚ-мен меморандумға қол қойылды

&nbsp;<a href="https://kyzylorda-news.kz/">Kyzylorda-news.kz</a> Қазақстанның Еңбек Ері Абзал Ерәлиев есімі Сыр елі үшін қадірлі. Экономика әлсіреп, қоғамдық қатынастар қалт-құлт етіп қалған кешегі қиын кезеңде күшін сарқып, күріш шаруашылығының дамуы үшін ерен іс тындырған азамат. Жердің берген байлығын туған жеріне төккен жомарт. Ел Президенті Қасым-Жомарт Тоқаев былтыр Қызылорда облысына келген сапарын &nbsp;Сырдария ауданының Н.Ілиясов ауылынан бастаған болатын. Осы бір сәт туралы жақынырақ білгіміз келген біз Абзал Жұмашұлына жолығып, бір-екі ауыз әңгімелескен едік.– Президентті ауылдың аузынан өзіңіз қарсы алдыңыз. Алғашқы сөз неден басталды?– Президент біздің ауылға өте жоғары көңіл-күйде келді. Облыс әкімімен бірге ауыл келбетімен танысып, еңбекшілермен жүздесті. Аман-саулықтан соң жанымдағылар мені шаруашылық құрылтайшысы деп таныстырған. «Абзалды білеміз, Еңбек Ері, Мәжілісте депутат болды» деді Президент жылы сөйлеп. Осы сөздің әсері болар, өзімді еркін ұстадым. Сосын шаруашылықтың тарихынан қысқаша мәлімет бердім. Бұл ауыл совхоз есебінде 1966 жылы тегіс жерден басталып салынған. Бірінші басшысы Кеңес Одағының батыры Нағи Ілиясов болса, одан кейін Социалистік Еңбек Ері Алдаберген Бисенов басшылық жасаған. Осы деректерді келтірдім.&nbsp; Ауылдың орталық саябағын аралап келеміз. Гүлмен көмкерілген субұрқақ, сол қанаттағы Биг-бен сағаты, мәдениет үйі, мектеп, Тағзым алаңы, музей, мешіт, мен осылардың жай-күйін таныстырып жатырмын. Ауылды абаттандыруға, ағаштарды күтіп баптауға, аяқсуға, т.б. жұмыстарға жылына 200 млн теңге көлемінде қаражат жұмсалады. Ауыл көшелеріне 35 мың түп ағаш егіп шығардық. Әдетте ағаш көшеттері ешқашан толық шықпайды, жүздің елу-алпысы бой алып кетпейді. Көп адам сол шығынды қалыпты деп есептейді. Олай емес, бір шыбықты да қисайтпай, қанша ексең, сонша шығаруға болады, тек еңбек керек. Негізі бұл шаруашылықты 2005 жылдан бастап толық басқаруға алдық. Бұрынғы инвесторлар қарызға батып, банкрот болған. Біз осы кезде «Мағжан» серіктестігін құрып, шаруашылықты сол қиыншылықтан алып шыққан едік. Қазір ауылда 480 отбасы тұрады. Шаруашылық 5 мың гектар жерге күріш егеді. Ауылдың 470 адамы егін саласында жұмыс істейді. Тағзым алаңының тұсына келген Президент әдеттегіден ұзағырақ аялдап қалды. Бұл ауылдан 195 азамат Отан соғысына аттанып, 132-сі қайта оралмаған. Осы Тағзым алаңына 48 млн теңге жұмсалған. Отан үшін отқа түскендердің есімі жазылған белгіден батырлардың рухы сезіліп тұрғандай болды ма, осы тұстан ешкім де бей-жай өтіп кетпейді. Мұнан соң Президентті ауыл стадионына бастап бардық. Бұл жерде спорттың жеті түрінен 144 бала жаттығады. Осы кезде балалар өз жаттығуларын жүргізіп жатқан. Президент үстел теннисіне аялдады. Мен – облыстық үстел теннисі федерациясының президентімін. Қасым-Жомарт Кемелұлы қолына ракетканы ұстап тұрып, балаларға аталық тілегін айтты. Стадионның үлкен алаңына шығып, жас спортшылармен суретке түсті. Стадионнан шыға бере қабырға экранынан Нағи ауылының дрон арқылы төбесінен түсірілген түнгі көрінісі көрсетілді. «Керемет екен!» деді Президент. Сол сәтте барлық көзі көрген нәрсеге бір-ақ баға бергендей болды. Мұнан соң «Еңбек аллеясына» бардық. Ол жерде шиелілік Гүлсім Дәрібаева, шағандық Айбек Уәлиев сөз сөйлеп, мемлекет тарапынан еңбек адамдарына көрсетіліп отырған қамқорлықтар үшін Президентке алғыс білдірді. «Қазіргі ең басты құндылық – еліміздің, халқымыздың татулығы» &nbsp;деді Президент. Ауыл келбетімен таныстыру сәтінде Президент мешітке қарап тұрып: «Жақсы салыныпты» деді. Сол кезде ескі мешітті бұзбай, музей етіп қойғанымызды айтып өткенмін. «Жөн болған, дұрыс» деп Президент сөзімді қоштады.– Президент нақты не деді?– Ол кісі көбіне тыңдады. Сөзді бөлген жоқ. Біздің айтқанымызды ықылас қойып тыңдауының өзі ризашылығын танытып тұрды. «Осындай ауылдарды көбейтуіміз керек. Бұл ауыл – басқа ауылдарға жақсы үлгі» деп баға берді. Қоштасар сәтте: «Жақсы, Абзал, табыс тілеймін» деді. *** Еңбек Ерінің сөзінен біз халық үшін жасалып жатқан қыруар жұмыстың лебін сездік. «Уа, нағилық халық, батыр бейнең алып, от жүректен – ода. Бәсің, биік бағаң, сөз таппаса саған, ақындығым ада. Жыр боп ескен елге, гүл боп өскен жерге, төккен маңдай терің. Бейнең нұрлы ақ таң, «Алтын Жұлдыз» таққан, Абзал деген ерің» деп өлең жазған едік, бір кезде.Ел Президенті сол батыр халықтың еңбегін бағалап, қасиетті мекеннен аса ризалықпен аттаныпты. Біз тарихи сәттің осы үйлесімін көпке жеткізгіміз келді.&nbsp;

Өрісі кеңге жайылған – Нағи ауылы

&nbsp;<a href="https://kyzylorda-news.kz/">Kyzylorda-news.kz</a>&nbsp; Қызылорда облысының Полиция департаментінің Есірткі қылмысына қарсы іс-қимыл басқармасы, Қызылорда қаласы бойынша білім бөлімі, «Қызылорда еріктілері» қоғамдық қоры, «Жастардың спорттық туризм және туристік көпсайыс федарациясы» Жастар қоғамдық бірлестіктерін тарта отырып Қызылорда қаласының жоғары сынып оқушылары арасында қол күрестен жарыс ұйымдастырды. Жалпықалалық жарысқа 40 мектептен 120 спортшы қатысып, үш салмақ дәрежесі бойынша сынға түсті. Жарыс қорытындысы бойынша келесі спортшылар жеңіс тұғырының ең биік сатысына көтерілді: №187 мектеп-лицейінің оқушысы А.Болат (55 кг), №176 орта мектептің оқушысы Д.Қайырбаев (60 кг) , №23 мектеп-лицейінің оқушысы Е.Жаппарбек (60 кг). Есірткі қылмысына қарсы іс-қимыл басқармасының өкілдері жеңімпаз атанған 15 спортшы мен командаларды дипломдармен және бағалы сыйлықтармен марапаттады. Сондай-ақ байқауға белсенді қатысқаны үшін алғыс хат табысталды.

Оқушылар арасында қол күрестен жарыс өтті

&nbsp;<a href="https://kyzylorda-news.kz/">Kyzylorda-news.kz</a>&nbsp; &nbsp;Сырдария ауданына қарасты Ақжарма аулының тұрғыны Айжан Сүлейменова дәмі тіл үйіретін торттарды пісіре бастағанына 3-4 жыл болды. Бастапқы да&nbsp;қызығушылықпен үйінен самса, пицца, кондитер өнімдерін пісіріп бастаған келіншек аз уақыт ішінде оны кәсіп көзіне айналдырды. Қолынан келетін іспен айналысып, ауыл тұрғындарының сұранысына сай түрлі тәттілерді дайындайтын кейіпкеріміз көз жауын алатын торттарды пісіреді.Замандасымыз Айжан жас кәсіпкер ретінде кәсіпкерлерді қолдау бағдарламасына бірнеше рет қатысқанымен, қорғаған жобасы комиссиядан өтпей қалған. Сонда да сағы сынбаған келіншек өткен жылы «Бастау Бизнес» курсын оқып, сертификат алып, жобасын бұл жолы сәтті қорғап шығады. Қайтарымсыз грантқа қол жеткізген кондитер кәсіпкер атанып, кондитер өнімін дайындауға кіріседі. Жас кәсіпкердің бастамасы осы күні өз табысын бере бастады. Күн сайын тапсырыс саны да артып, оны уақытылы пісіріп үлгеру үшін есік алдынан шағын кондитер цехын да ашып алады. Негізгі мамандығы бастауыш сынып мұғалімі болғанымен мамандығы бойынша жұмыс табылмайды. Ауыл мектебінде орын болмағандықтан қаладағы мектепте жұмыс істеп, еңбек жолын бастайды. Тұрмыс құрғаннан кейін кішкентайлары дүниеге келіп, декреттік демалыстан соң қалаға қатынап жұмыс істеуді біржолата қояды.<blockquote>– Әрбір декреттік демалыста отырған келіншекке жақсы таныс жағдай деп ойлаймын. Үйде баламен отырғандықтан бос уақытымда сүйікті ісіммен айналыса бастадым. Пісірген кондитер өнімдеріме тапсырыс түсе бастады. Өзімді дамыту мақсатында түрлі шеберлік сыныптарға қатыстым. Үйрене келе дәмді торттың бірнеше түрін пісіре бастадым. Пісірген тәттілерім өзіме ұнады, алғашқы тапсырыс берушілерім де дән риза болды. Қазір «Айжан» жеке кәсіпкер ретінде тіркеліп, кәсібіммен толық айналысуыма мүмкіндік алдым, – дейді бесаспап шебер.</blockquote>Жаңа бизнес идеяларды іске асыру үшін қайтарымсыз 1 380 000 теңге грант алған Айжан қаражатқа цехына қажетті құрал-жабдықтарды сатып алған. Арнайы үлкен пештен бастап, түрлі қалыптар мен асхана жабдығын, дайын өнім қоятын үстел т.б. кәсіпкерге алаңсыз жұмыс істеуіне әрі табыс табуына үлкен көмек болды. Яғни грант қаражаты ісін жаңа бастаған кәсіпкер ретінде өзінің бизнес-әлеуетін ашуына, өндірісті жолға қоюына және дамытуға, сол арқылы өзін тұрақты табыспен қамтамасыз етуге мүмкіндік берді.Ауыл тұрғындарын табиғи өнімдерден жасалатын торттардың сан алуан түрімен қуантып отырған Айжан күн сайын білімін де жетілдіріп отыруды мақсат етеді. Облыс орталығында өтетін кондитерлердің шеберлік сыныптарына қатысып, жаңашылдықты үйренуден жалықпайды. Тұрақты тұтынушыларын да қалыптастырып үлгерген кондитердің шеберлігіне ризашылығын білдіргендердің қарасы қалың. Бұл оның жұмысына серпін береді.– Қазір дәмді торт алу үшін қалаға бармаймыз. Өзіміздің ауылдан қолы шебер Айжанға тапсырыс береміз. Түрлі отбасылық мерекелік кештерге тортты керемет етіп дайындап береді. Торттан басқа қолынан келетін түрлі бәліш, самса, пиццаны да әзірлейді. Айжанның ізденімпаздығына, еңбексүйгіштігіне риза боламыз. Кәсібін де дөңгелетіп, бала-шағасының да қамын жасап, үлгеріп отыр, – дейді тұрақты тұтынушысы Шара Сейтмаханова. Мұндай пікірді ауылдастары Ханым Нұрпейісқызы, Алма Балабайқызы да қуаттай түсті. Ауылдастары ауылдан шағын цехтың ашылғанына қуанышты. Олар кез келген уақытта тапсырыс береді және торттың керемет болып шығатынына тәнті екенін де жасырмайды.<blockquote>– Барлық қыз-келіншектің қолынан келетін іс деп ойлаймын. Торт жасаудың ешқандай сыры жоқ. Үйренемін деушілерге бәрі әлеуметтік желіде дайын тұр. Ең бастысы ынта болу керек. Бастаған ісіңді шынайы көңілмен, ерекше махаббатпен жасасаң, одан асқан сұлулық болмайды. Тұтынушыларымды қуантып, ойларынан шығу үшін барымды салып пісірген тортқа қаншама адам қуанса, еңбегімнің қайтқаны. Ал бағасы онша қымбат емес, кез келген адамның қалтасы көтеретіндей етіп сатамын. Негізінен тортты сәндеу үшін көп уақыт кетеді. Әрі оған пайдаланатын заттарды да сырттан әкелемін, – дейді торт пісіруші Айжан Асылханқызы.</blockquote>Ауыл кондитері дайындаған торттың сан алуан түрін көріп, шын мәнінде таңданысымызды жасыра алмадық. Үлкен қалада дүкенде көретін торттың барлық түрін Айжан өз қолымен пісіріп дайындайды. Мұндай жетістікке жету көп уақытты, шыдамдылықты талап етеді әрі отбасының қолдауы аса қажет. Айжанға қолдау білдіріп, кәсібіне демеу болып отырған жұбайы Тимур мен 3 перзенті әрдайым жанынан табылады. Қара жұмыста шыңдалып, ауыл шаруашылығы саласында өзіндік орнын қалыптастырған жұбайы «Ақжарма және К» шаруа қожалығында механизатор болып еңбек етеді. Жас отбасыға шаруашылық басшысы 2019 жылы үй берген. Бүгінде Тимур мен Айжан өз жайларында өсіп-өніп, берекелі кәсіппен айналысып отырған жайы бар.Ауылда отырып ғажайып торттар дайындайтын жас кәсіпкер алдағы уақытта кәсібін кеңейтіп, қасына көмекшілер алуды жоспарлап отыр. Ал Айжанға көмекші болуды, өздері де үйреніп, табыс табуды қалайтын қыз-келіншектер Ақжарма ауылында жеткілікті.

Айжан Сүлейменова: Өзімді дамыту мақсатында түрлі шеберлік сыныптарға қатыстым 

&nbsp;<a href="https://kyzylorda-news.kz/">Kyzylorda-news.kz</a>&nbsp; «Өнегелі отбасы – ел келешегі» демекші, өнегелі де өнерлі шаңырақтың ұйытқысы болып отырған жарасымды жұп Нұрбол мен Әлия өнерде де, өмірде де бірге. Құстың қос қанатындай өнерде де, өмірде де жұптарын жазбай жүретін жандар қазіргі кезде кемде-кем. Өнер айдынында қол ұстасып, қанат жайып келе жатқан ерлі-зайыпты сахнада жұбы жарасқан, көпке үлгі болардай өнерлі отбасы. Қос өнер иесін табыстырған – киелі өнер. Нұрболдай өнерлі ер азамат пен Әлиядай талантты, шығармашыл жанның өмірлік жолы бір арнаға тоғысқаны бекер емес.Қос ғашық Сырдария аудандық мәдениет үйінде жұмыс жасап жүрген кездерінде танысқан. Алғашында дос болып араласып, кейіннен махаббатқа ұласып, бүгінде сүп-сүйкімді Айқаракөз және Зере есімді екі қыз тәрбиелеп, бар мейірімі мен махаббатын төгіп отыр. Өмірін өнерімен өрнектеген Нұрбол мен Әлия ауданның мәдениет саласының дамуына айтулы үлесін қосып келеді. Өнер әлемінде өзіндік орнын қалыптастырды десек қателеспейміз. Нұрбол – Түркістан облысы, Кентау елді мекенінің тумасы. Ол осы ауданның тумасы болмаса да, бойына туа біткен талантымен, кісілік қасиетімен, ерекше дарынымен, адамгершілігімен біршама жетістіктерге жетіп, ауданның мәдениет саласына тез сіңісіп, еңбегімен елге сыйлы болып жүрген азамат. Өмірлік серігі Әлия өнерлі де өнегелі, көпке үлгі талантты отбасыдан шыққан өнерпаз. Негізгі мамандығы – күйші. Қиын да қызық өнер жолында абыроймен еңбек етіп келе жатқан қос өнер иесінің бір салада қызмет етудегі қызықшылықтары мен артықшылықтары және отбасылық өмірі туралы өздерінен сұрадық.– Мен 2013 жылдан бастап аудандық мәдениет үйінде жұмыс істедім. Ал Әлия 2015 жылы оқуын аяқтап, жас маман болып бізге жұмысқа тұрды. Әлия келген уақытта Астана күніне орай іс-шара болып жатқан еді. Сол кезде екеумізді бірден дуэт қылып бірге ән айтқызды. Талай концерттерде бірге жиі ән айтатынбыз. Осылайша біздің таныстық бірге ән айтудан басталды. Уақыт өте келе достығымыз махаббатқа ұласып, 2020 жылы шаңырақ көтердік. Қазіргі таңда Нағи Ілиясов ауылдық мәдениет үйінің директоры қызметін атқарамын. Бөлек кеткенімізбен, бірақ саламыз бір. Мерекелік іс-шара болсын, концерт болсын әрдайым бірге жүреміз, – дейді Нұрбол Тұранов.Қай кезде де мәдениеттің мәйегі – мәдениет үйі екені хақ. Мәдениет – өмір айнасы, өнер қоймасы. Нұрбол мен Әлияның мәдениет саласындағы еңбектері аудан жұртшылығына етене таныс. Қиын да қызық салада өнері мен өмірін бір арнаға тоғыстырып жүру оңай шаруа емес.– Басқа отбасыларға қарағанда біздің отбасының артықшылығы – екеуміз де өнер адамы болған соң бір-бірімізді жақсы түсінеміз. Оның артықшылығынан бөлек қиын тұстары да болатыны өтірік емес. Бұл саланың қиыншылығы мен артықшылығы бізге жақсы таныс болғандықтан, бір-бірімізге түсіністікпен, сыйластықпен қараймыз. Мен гастрольдерге, концерттерге, тойларға жиі кетемін. Әлия қай кезде де түсіністік танытады, – дейді Нұрбол Мұхтарұлы.Әйел қашанда отбасының берекесі. Әрқашан ерінің тілеуін тілеп, отбасының ұйытқысы болып жүретін әйел қауымы әркез құрметке лайық. «Ерін сыйлаған әйелді ел сыйлайды» демекші, Әлияның өмірлік жарына деген ыстық махаббаты, сыйластығы және отбасы құндылығы туралы айтқан ерекше лебізіне тәнті болдық.– Ең бірінші ұстанатын қағидам – жарыма деген адалдығым, сенім мен сезімнің тазалығы. Осы қасиетімді Нұрекем әлі күнге дейін бағалайды. Мені әрдайым еркелетіп, мені қолдап, алақанына салып отырады. Өзі сондай сабырлы жан, жолдасыма қарап көп нәрсені үйрендім. Ата-анамның берген қазақы тәрбиесі менің бақытты өмір сүруіме септігін тигізуде. Жарымның алдында таза, адал болуға баулыды. Өнер адамдары үшін бұл қасиет өте қажет дер едім. Әйел адам төзімді, сабырлы бола білуі керек. «Әйел еркелесе – жеңеді, ашуланса – жеңіледі» деген сөз бар. Осы қағиданы ұстаса, отбасы берекеге толы болады. Нұрекем екеуміз махаббаттарын мәңгілік сақтап, бала-шағасын бірге тәрбиелеп өсіре білетін керемет үлгілі отбасы болуды армандадық. Нағыз бақыт − өсіріп отырған қыздарымыз, Алла берсе, ұлдарымыз. Бастысы, қандай қиындық болса да қол ұстасып, шешімін бірге табуға тырысамыз. Біз бір-бірімізді көзімізбен ұғамыз. Махаббатымыздың өзгелерге үлгі болатыны қуантады. Мен Нұрболсыз, Нұрбол менсіз өмір сүре алмайды. Біз құдды бір-біріміз үшін жаралғандаймыз, – дейді Әлия Алматқызы.&nbsp;

Өнерде де, өмірде де жүрген жарасымды жұп

&nbsp;<a href="https://kyzylorda-news.kz/">Kyzylorda-news.kz</a> Заман күн санап жаңарып, түрлі техника мен технологиялар қолданысқа еніп жатқаны рас. Бірақ осынау техникалық жетістіктің бірі де электр энергиясы болмаса қауқарсыз қалатынын ойладыңыз ба?! Шындығына келсек, бір сәт жарық қуаты өшсе, жұмысымыз да кейінге қалып, қолымыз жіпсіз байланып қалады. Себебі ғаламды таң қылған небір техниканың өзі электр энергиясының қуатымен ғана жұмыс істей алады.Демек энергетик мамандардың қоғамдағы орны орасан. Тәуліктің мезгілімен, табиғаттың тосын мінезімен санаспай жұмыс істейтін мамандардың қызметі қауырт әрі қауіпті. Кез келген адамның бұл саланы таңдауға батылы жете бермейтіні анық. Біздің кейіпкеріміз Алмат Тұрғанбаев – қызығынан қиындығы мол саланың білікті маманы.– 2012 жылдан бастап электр маманы болып жұмыс істеймін. Теорияны тәжірибемен жалғастыра білу өте&nbsp;маңызды. Алған білімімізді жұмыс барысында қолданып келеміз. Үйренгеніміз көп, үйренеріміз қаншама?! Жас мамандармен қолдан келгенше білгенімізбен бөлісуге де, үйретуге де дайынбыз. Әрине аталған саланың қауіптілігі басым. Неге десеңіз, электр энергиясы көзге көрінбейді, иісі сезілмейді. Бей-жай қарауды және қателік жіберуді кешірмейді. Бір ғана қателік адам тағдырын шешуі мүмкін. Десе де мен өз мамандығымды мақтан тұтамын. Нағыз ер азаматқа тән сала деп ауыз толтырып айта аламын. Әрі күнделікті сұранысқа ие, – дейді кейіпкеріміз өз мамандығы турасында.Кейіпкеріміз &nbsp;Алмат Тұрғанбаев – Қызылорда электр тарату тораптары компаниясының электр маманы. Сырдария ауданының электр жарығымен қамтамасыз етілу барысына жауапты. Өз ісінің маманы жұмыстың қауырт екенін айтады. Әдетте күндіз болсын, түн болсын уақытпен санаспай жұмыс істейтін маман халықтың сұранысын қанағаттандыру үшін дауыл мен жаңбырда, ми қуырар ыстықта да қарап қалмайтындықтарын айтады. Әсіресе, қыстың қытымыр аязы мен дауылды күндері ақаудың көп орын алатыны белгілі. Сондайда қай жерден ақау кеткенін анықтап, дер кезінде жөндеу – сала мамандарының негізгі міндеті.– Заман талабына сәйкес электр жабдықтарының да жаңаша түрлері нарықта қолданысқа шығуда. Олардың өз кезегінде тиімді тұсымен қатар қауіпті жақтары да болады. Жұмыс барысында қауіппен бетпе бет келетін кезеңдер болатыны жасырын емес. Бастысы, қауіпсіздік талаптарын қатаң сақтау қажет және жұмысымыз қырағылықты талап етеді. Бізге жұмыс уақытында кез келген жағдайға дайын отыру керек. Бей-жай қарауға, шатасуға болмайды. Бір ғана қателік бүкіл жүйеге, адамға зақым келтіруі мүмкін. Халықтың ризалығы мен алғысы үшін, жайлы өмір сүруі үшін күндіз-түні жұмыс жасауға дайынмын. Себебі мен өз мамандығыммен мақтанамын, – дейді тәжірибелі маман.«Энергетика секторын дамытпай, Қазақстанның экономикасын қарқынды өсіру мүмкін емес» дейді мамандар. Осы ретте маңыздылығы жөнінен алдыңғы қатарда тұратын энергетика саласын жандандыру маңызды. Бұл туралы Мемлекет басшысы да айтып өткен еді. Нәтижесінде ауданымызда тозығы жеткен электр бағандарын жөндеу жұмыстары да жүргізілуде.&nbsp;Бұл ретте энергетика саласы мамандарының маңызы зор екені талас тудырмайды. Қай кезде де халық игілігі үшін аянбай еңбек ететін мамандық иелері үлкен сұранысқа ие.&nbsp;

Алмат Тұрғанбаев: Бір ғана қателік адам тағдырын шешуі мүмкін 

<a href="https://kyzylorda-news.kz/">Kyzylorda-news.kz</a> 25 сәуірде Қызылордада &nbsp;Қазақстан Республикасы Парламенті Сенаты депутаттығына сайлау өтеді.&nbsp;Орталық сайлау комиссиясы сайлауды дайындау және өткізу жөніндегі негізгі іс-шаралардың күнтізбелік жоспарын бекіткен.&nbsp; Бұл ретте аумақтық сайлау комиссиясы көзделген процестерді жүзеге асырады.Кандидаттарды ұсыну мәслихаттардың сессияларында, сондай-ақ өзін-өзі ұсыну тәртібімен жүзеге асырылады. Өз өкілдері арқылы мәслихаттарда кандидаттарды саяси партиялар мен қоғамдық бірлестіктер ұсынуға мүмкіндігі бар.Айта кетейік, Конституцияға және заңнамаға сәйкес жоғары білімі және кемінде бес жыл жұмыс өтілі бар, сондай-ақ біздің еліміздің аумағында соңғы он жыл және өзі өкілі болып табылатын өңірде (яғни Қызылорда облысында) кемінде үш жыл тұрақты тұратын, 30 жастан асқан Қазақстан азаматы Парламент Сенатының депутаты бола алады.Парламент Сенатының депутаттығына кандидат ретінде тіркелу үшін үміткер облыстың барлық мәслихаттары депутаттарының жалпы санының кемінде он пайызының қолдауын алуы қажет. Бұл қолдау мәслихаттар депутаттарының тиісті қолдары санының жиналуымен куәландырылады.Сенат депутаттығына кандидат тіркелгенге дейін және оның Конституцияда және Сайлау туралы заңда қойылатын талаптарға сәйкестігі тексергеннен кейін, сондай-ақ оны қолдап жиналған қолдар тексерілгеннен кейін сайлау жарнасын енгізеді. Биыл ол 1 275 000 теңгені құрайды.Қызылорда облысынан Парламент Сенатының депутаттығына кандидаттарды ұсыну ағымдағы жылғы 7 наурызда басталып, 26 наурызда сағат 18.00-ге дейін жалғасады. Кандидаттарды тіркеу 4 сәуірде сағат 18.00-ге дейін өтеді, ал сайлау алдындағы үгіт 2024 жылғы 4 сәуірде жергілікті уақыт бойынша сағат 18-ден кейін басталып, 24 сәуірде нөл сағатта аяқталады.Сайлау заңнамасына сәйкес Сенат депутаттары жасырын дауыс беру арқылы жанама сайлау құқығы негізінде сайланады. Жанама сайлау құқығы Парламент Сенатының депутатын сайлауға дауыс беруге тек сайлаушылар – мәслихат депутаттары ғана қатысатынын білдіреді.Фото: pexels&nbsp;

Қызылордада Парламент Сенаты депутаттығына сайлау өтеді 

&nbsp;<a href="https://kyzylorda-news.kz/">Kyzylorda-news.kz</a> &nbsp;Текемет басып, алаша тоқитындар қатары аз. Қазалылық Сұлупан апа төріне текеметті құнды дүние ретінде сақтап қойған. Көздің жауын алатын алашаны көріп, таңдандық. Әсемдігі мен әдемілігі қазіргі клемдерден артық болмаса, кем түспейді.&nbsp;Жанқожа батыр ауылының тумасы Сұлупан апа алаша тоқуды 3 сыныпта оқып жүргенінде үйренген. Әжесі Орын он саусағынан өнер тамған тігінші болған. Алғашында киіз үй жабдықтары – құр мен басқұр тігіп бастаған Сұлупан бертін келе, текемет, киіз басудың да қыр-сырына қаныққан. Қолөнер шеберімен жолығып, әңгімелескен сәтте:– Әкем Сағындық сиыршы, анам Күлпан сауыншы болды. Азды-көпті төрт түлігіміз бар. Әжем Орын қойдың жүнін өзі қырқып, тазалап, жуып, кептіретін. Оларды бояп, иіреді. Дайын жіптен алаша тоқиды. Мен үйдегі алты баланың үлкенімін. Жастайымыздан тігіншілікке бейім қылып өсірді. Жаз мезгілінде киіз үйде отыратынбыз. Оның ішін әрлеу, түрлі ою-өрнекті төсенішпен безендіруде әжеме қолғабыс ететінбіз, – деді.&nbsp;Ауылдағы сегізжылдық мектептен соң, Қазалы қаласындағы 17 мектепте екі жыл оқуын жалғастырған кейіпкеріміз мұғалім болуды мұрат етіп, Алматы қаласына оқуға тапсырды. Алайда, сәті түспей, туған жерге оралды. Өзі қатарлас құрбыларымен сауыншы болып еңбек етті. Келер жылы Қызылорда қаласындағы тігіншілер даярлайтын училищеде білім алды.– Әлі де, мұғалім боламын деген ойдан арылмай, оқуға құжат тапсыруды көздедім. Алайда, біздің құжаттар Қазалыға жіберіліпті. Осында кірпіш зауыты болды, сондағы тігін цехына жолдамамен жұмысқа орналастым. 1974 жылдан бастап, зауыт жабылғанша, 25 жылға жуық жұмыс істедім. Еңбек ете жүріп, бірге жұмыс істейтін Қуаныш есімді азаматқа тұрмысқа шықтым, – дейді Сұлупан апа.&nbsp;Алты баланы өмірге әкеліп, жолдасы екеуі оларға тәлімді тәрбие берді. Бес қызым бір төбе, жалғыз ұлым бір төбе деген ана қыздарын қияға қондырған. Ұлы Қайырбекпен бір шаңырақта тұрады. Ғ.Мұратбаев атындағы 17 мектепте Қайырбек мектеп директорының орынбасары болса, келіні Ақерке Сыдық физика пәнінің мұғалімі. Ұлының тұңғышы алты жасар Айша әжесінің қызы. Санжар мен Хадиша да шаңырақтың шаттығын еселеп отырған кішкентай жандар.&nbsp;– Қыздарым отбасылы. Өз мамандықтарымен еңбек етуде. Немерелерім бар. Алла маған шөбере сүюді де нәсіп етті. Жиен немерем – Нұрай Әділхан, Айдархан, Әлихан есімді үшемнің анасы. Ағаларының ізінен Хансұлтан атты батыр ерді, – деді кейіпкеріміз Сұлупан Сағындыққызы жүзі нұрланып.&nbsp;Қыздың үлкені Сәуле Қазалы қаласында тұрады. Төрт немеренің әжесі. Екінші қыз Зәуре Алматы қаласында, отбасылы. Шымкенттің қазақ-араб университетін бітірген. Қыздар медресесінде сабақ береді. Үшінші қыз Гүлжан Шымкентте М.Әуезовтың өнер факультетін бітіріп, қазіргі таңда Жамал Омарова атындағы музыкалық мектепте домбырадан сабақ береді. Ал, Айжан С.Асфендияров университетін бітіріп, Алматы қаласында Индиялық компанияда фармацевт болып жұмыс жасайды. Отбасының кенжесі Жадыра Алматы қаласындағы ҚазҰУ университетін биотехнология мамандығы бойынша бітіріп, Алматы қаласында Мұнайда саласында технолог болып жұмыс жасауда.&nbsp;Еңбекке араласқан күннен-ақ ептілігімен көзге түскен Сұлупан Сағындыққызы уақытында тігінші қыздар бригадасының жетекшілігіне сайланды. Істің қиындығын қажырлылықпен жеңе білді. Қарамағындағы қыз-келіншектермен тіл табысып, жұдырықтай жұмылды. Еңбекке енді араласқан жас тігіншілерге бар білгенін үйретіп, алға жетеледі.– Жұмыс қауырт еді. Толассыз тапсырыстар түседі. Бәрін уақытылы, әрі сапалы дайындауға күш салатынбыз. Жауапкершілік жүгінің ауырлығын жетекші болғанда жете түсіндім. Қыз-келіншектердің қолынан бәрі келетін. Қай істі де, ұршықша үйіріп әкетеді. 1997 жылы зауыт жабылды. Әркім өз бетімен еңбек етті. Сол кезде бала күнімнен қолөнерге баулыған әжемнің: «Үйренгенің өзіңе жақсы, істегенің маған жақсы» деген сөзі ойыма оралды. Үйде отырып алаша тоқуды бастадым. Алаша тоқуға тек, қойдың жүні пайдаланылады. Ешкі жүні арқаулығына жақсы, – деп Сұлупан апа тоқу өнерінің қыр-сырымен бөлісті.&nbsp;Сұлупан апаның бұл өнерін естіген көрші-қолаң, ағайын-туыс иірілген жіптерін ала келіп, өтініш айтады. Сол кезеңдерде қыз жасауының қатарынан әдемі өрнектермен өрілген алаша міндетті түрде орын алатын. Бертін келе қаланың арғы басы, бергі басы демей тапсырыспен келетіндер көбейеді. Жұмысы қанша қиын болса да, ақкөңіл жан ешбірінің көңілін қалдырмауға тырысады. Мынадай теңге деп те арнайы ақы қоймайтын.&nbsp;– Ата-анам төсек орныммен бірге қол машина әкеліп берді. Әлі күнге сонымен жұмыс істеймін. Құрақ та құраймын, тігін де тігемін. Бірақ, тек, туыстардың өтініштерін ғана орындаймын. Үлкен қыздарыма жасау бергенде киіз, текемет, алаша қосқанмын. Үйде де, бірнеше алаша мен текемет сақталған, – деп бізге көрсетті.&nbsp;Қанша жыл өтсе де түрін, не түсін бермеген алашалар көзге ерекше көрінді. Салмағы да, едәуір ауыр. Бір байқағанымыз, әр төсенішке ұл-қыздарының, өзінің есімі жазылған. Уақыт өткен сайын тарих қойнауына еніп бара жатқан қолөнерді үйренем деушілер болса, Сұлупан апа білгенімді бөлісуден қашпаймын деген ниетін білдірді.

Сұлупан Сағындыққызы: Ауыл көркейсе – ел өркендейді

&nbsp;<a href="https://kyzylorda-news.kz/">Kyzylorda-news.kz</a> Ата-бабаларымыздың сан жылдардан бері ұстанып келе жатырған дін мен дәстүрі, қазіргі ұрпақ өкілдері үшін ешқашанда ұмытылмақ емес. Дін адамға екі дүниеде дұрыс өмір сүрудің, Хақтың разылығына бастайтын ереже-қағидаларды қамтыған. Шәһи бұйрықтармен тыйымдар жиынтығын құрайды. Дәстүр менталитет пен әдет-ғұрып, тұрмыс-тіршіліктің ерекшеліктері, белгілі бір қоғамдастыққа тән, нақтылы тарихи-мәдени ортада қалыптасқан мінез-құлықпен іс әрекеттердің біркелкі сипатын білдіреді. Бүгінгі күні дін жанашырларының алдында тұрған міндет&nbsp;–&nbsp;дін мен дәстүр екеуінің біріккен тұсын таба біліп, халыққа діннің де, дәстүрдің де, ортақ тіл табысатын игіліктерін ашып көрсету болып отыр. Сондықтан, биылғы жылды Қазақстан мұсылмандары діни басқармасы Дін мен дәстүр жылы деп жариялаған болатын. Халқымызда: «Уықты басқұр сақтайды, халықты дәстүр сақтайды» деген аталы сөз бар. Шариғатымыз халық ұстанған дұрыс әдет-ғұрыптарға ешқашан тыйым салмаған.&nbsp;«Жанқожа батыр» мешітіндегі әйел-қыздар секторының бастамасымен Дін мен Дәстүр бұрышы және қол өнер мектебі құрылып, өз жұмыстарын жасап та жатыр. Дәстүрлі құндылықтарды сақтап қалудың маңызды мәселе екенін кеңінен түсінген мешіттен діни дәріс алып жүрген әйелдер секторының мүшелері бұл ғұрыптарды сөз жүзінде емес, іс жүзінде өте асқан шеберлікпен көрсеткендерінің куәсі болдық. Мешіттегі кең бөлмеге барлық сән салтанатымен безендірілген киіз үйдің ішіне түрлі ұлттық киімдер ілінген, қолдан жасалынған терме алаша, текемет, кілем, көрпе, жастықтар көздің жауын аларлықтай етіп төселіп, орналастырылған. Үйдің бір жағына үш бірдей қол тігін машиналары мен дін әдебіне сай киінген қыз келіншектер түрлі қазақы бұйымдар тігіп жатыр. Үй ортасында жүн түтіп, ұршық иіріп, кесте тігіп отырған әйелдер ісмер ерекшеліктерімен назар аудартады. Іс-шараның кіріспесін аудан бас имамы Нұрдаулет Асқарұлы ашып,&nbsp; бабалардан қалған әдет-ғұрыптардың өте әдемі жалғасын табуға негізделген іс шараны өткізуге ұйытқы болған, ақ жаулықтыларға алғысын білдіріп, қасиетті құраннан, хадистен мысалдар келтіріп, салтымызды сақтап, дәстүрімізді құрметтеудің ерекшеліктері жайлы айтып берді. Діни медресенің жоғарғы білімді ұстазы Исмайл қаридың аяғын енді ғана апыл-тапыл басып жүрген баласы Мұхаммед Әлидің тұсауын кесу рәсімі өте әсерлі өтті. Ұзын төсеніш төселіп, ол жерге қасиетті құран кітабы, нан, үйдің кілті және ақша қойылды да, үш метрдей қашықтықтан Бас имам Нұрдаулет сәбидің тұсауын кесіп еркіне жіберді. Әрі бір жасқа да тола қоймаған сүйкімді сәби Мұхаммед Әли бірден барып қасиетті құранды құшақтап, беттерін ашып сипалай бастағанын көріп ырымшыл халықтың ұрпағымыз ғой, әкесі сияқты бұл балада келешек Құранды бастан аяқ жатқа оқитын қари болар деп көңілденіп қалдық. Толқыдық, кеуліміз де босады. Бұл өмірден өтетініміз, мәңгілік өмірдегі азығымыз – қасиетті құран аяттары екенін сезініп көздерімізге жас келді.&nbsp;Іс шараны ұйымдастырып, оған басшылық жасап жүрген мешіт ұстазы Өтеген қызы Зәуре бауырымыздың еңбегінің ерекшелігімен сауаттылығына, жан-жақтылығына сүйсіндік. Жасау-жабдықтармен киіз үйдің ерекше безендірілуіне еңбек еткен Айжігітова Гүлсанаға тігін машиналарының әкелініп орналастырылуына көмегін берген Айділдаева Жанатқа, Дін мен Дәстүр бұрышы мен қол өнер мектебінің ашылып, бабалар ұстанған сара жолды жалғастыруға діни де қазақи тұрғыда құндылықтарымызды кеңінен насихаттауға сауатты да, сауапты амалдар жасап жүрген ақ жаулықты діндарларымыз Өтегенқызы Зәуре бастаған Сариева Роза, Алиева Орынкүл, Айымбетова Күлан, Қазанғапова Нағима, Махашова Күлаш, Махамбетәлиқызы Гүлнәр, Абыт Оразкүл, Жалғасбай Сұлу, Есімбетова Камила, Айымқұлова Гүлжан, Абдуваханова Асмаларға дінге адал, дәстүрге беріктіктері жиылғандарды тамсандырды.&nbsp;

Қазақстан және Қызылорда облысының жаңалықтары