<a href="https://kyzylorda-news.kz/">Kyzylorda-news.kz</a> &nbsp;Қызылорда облыстық төтенше жағдайлар саласының мамандары қазір Қостанай және Ақтөбе облыстарында тасқын суға қарсы күрес жұмыстарын <a href="https://kaz.inform.kz/news/kizilordalik-kutkarushilar-aktobe-men-kostanay-oblisina-attandi-e63f4e/">жүргізіп келеді</a>.Бүгінде Қостанай және Ақтөбе облыстарында қызылордалық 66 құтқарушы қызметін атқарып жүр. Олардың еншісінде 9 арнайы техника, 4 қайық, 20 мотопомпа бар.<blockquote>«Ал еріктілер барлық аудан мен Қызылорда қаласынан 112 тонна гуманитарлық көмекті Ақтөбе қаласы мен Қобда ауданына 25 жүк көлігімен жөнелтті. Оның ішінде ақтөбелік тұрғындарға қажетті азық-түлік, көрпе-төсек, гигиеналық құралдар, дәрі-дәрмек, құрылыс заттары бар. Оған қоса Ақтөбе облысында ашылған есепшоттарға көмек ретінде қомақты қаржы аударылды. Тасқыннан зардап шеккен басқа өңірлерге де гуманитарлық көмек көрсету үшін «Жастар орталықтары» жанынан, сауда үйлері мен базарлардан пункттер ашылған. Бұл бастаманы Сыр өңірінің жанашыр азаматтары мен еріктілер қолдап, өз үлестерін қосуда», – деп мәлім етті Қызылорда облысы әкімдігінен.</blockquote>Фото: Қызылорда облыстық ТЖД

Қызылордалық құтқарушылар Ақтөбе мен Қостанай облысына аттанды

<a href="https://kyzylorda-news.kz/">Kyzylorda-news.kz</a> Қызылорда облысында 177 жер учаскесі мемлекет меншігіне қайтарылды. Олардың біррқатары мақсатты пайдаланылмаған болса, қалғанында тиісті заңнаманың бұзылғаны анықталып, тіркелген, деп хабарлады <a href="https://kaz.inform.kz/news/kizilorda-oblisinda-177-zher-uchaskes-memleket-menshgne-kaytarildi-eee2b4/">Қазақпарат</a>.Облыс көлемінде былтыр мақсатты пайдаланылмаған немесе оған қатысты заңнаманы бұзылуы тіркелген 177 жер учаскесі мемлекет меншігіне қайтарылды. Олардың жалпы аумағы 225,4 мың гектар. Оның ішінде егістігі 1,4 мың гектарды шамаласа, жайылымы – 223,9 мың гектар.<blockquote>«Былтыр ауыл шаруашылығы айналымына 76,1 мың гектар енгізілді. Биыл 70 мың гектар пайдаланылмай жатқан ауыл шаруашылығы мақсатындағы жерлерді мемлекетке қайтару көзделіп отыр. Жыл басынан бері көлемі 11 237 гектар 23 жер учаскесі мемлекет меншігіне қайтарылды. Ауыл шаруашылығы айналымына 36,9 мың га көлемде енгізілді», – деп мәлім етті Қызылорда облыстық Ауыл шаруашылығы және жер қатынастары басқармасы.</blockquote>Ведомство мәліметінше, облыс бойынша өзіндік қосалқы шаруашылықтардағы 1538 мың бас шартты мал басына 1966,5 мың гектар жайылым алқабы қажет. Өңірдегі 146 ауылдық округтің 97 округі жайылыммен толық қамтамасыз етілген.Фото: Виктор Федюнин/Kazinform

Қызылорда облысында 177 жер учаскесі мемлекет меншігіне қайтарылды

<a href="https://kyzylorda-news.kz/">Kyzylorda-news.kz</a> Біздің ел «Қайырымдылық жасасаң, қайырын өзің көресің» деген тәмсілді ұстанады. Иә, жоқ-жітікке қарасу, жылағанды жұбату, сүрінгенді сүйеу, мұқтаждардың талған өзегіне талғажау табу – халқымыздың бойында ежелден қалыптасқан. Адам бар жерде тұрмыстық түйткілдердің тумауы мүмкін емес. Ата-бабамыз осындай қысқа жіп күрмеуге келмейтін қысылтаяң шақтарда ауызбіршілікті, адалдықты, ынтымақты ту етіп көтерген. Әсіресе, көптің мәселесін қара бастың қамынан жоғары қойған.&nbsp;Наурыздың соңғы күндерінен бері елді әбігерге салып, сай саланы қамтыған судан зардап шеккендерге де еліміз көмек қолын ұсынуда. Тасқын сумен алысып, бар жиған-тергенінен бір-ақ сәтте айырылып қалу оңай емес. Әлеуметтік желіде желдей ескен бейнекөріністерді жүрек сыздамай көру мүмкін емес. Қарғын судың кесірінен көмекке мұқтаж болған жерлестеріміз үшін Қазақстан халқы жұдырықтай жұмыла іске кірісті. Жер-жерден гуманитарлық көмектер ұйымдастырылып, межелі жерге жеткізілуде.&nbsp;Мұндай қайырымды істен аудан халқы да қалыс қалмады. Ең бірінші аудан мен қаланы жақындатып, қолжетімді бағада қызмет көрсетіп жүрген қармақшылық ерікті жігіттер 3 көлікпен Ақтөбеге аудан халқының жылуын жеткізді. Одан кейін де кент, ауылдық округтерден, аудан кәсіпкерлерінен бірнеше рет көмек жіберілуде. Сауапты істен құр қалмауға тырысқан әрбір жан қолында барын айтпай келетін апаттан зардап шеккендерге ұсынуда.&nbsp; Осыған қарап, қайырымдылықты ту еткен халқымыздың қасиеті қанымызға сіңгендігін, оның әрі қарай жалғасып келе жатқанын аңғарамыз. Бұл ретте қайырымдылық ұғымын терең зерттеген ғұлама әл-Фараби: «Адамдары бақытқа жету мақсатымен бір-біріне көмектесіп отыратын қоғам – қайырымды қоғам. Барлық қалалары бақытқа жету мақсатымен бір-біріне көмектесіп отыратын халық – қайырымды халық. Егер халықтар бақытқа жету мақсатымен бір-біріне көмектесіп отырса, бүкіл ғалам қайырымды болмақ» деген. Осы ретте қайырлы іске үлес қосқан жомарт жандардың көптігі қуантады. Оларға Алла мол сауаптан жазсын дейміз. Өзгеге ізгі ниетпен берілген көмек – жақылықтың бастауы, несібенің қайнар көзі. Кең жүректі, мейірімді жандар көп болса, ізгіліктің шырағы өшпесі анық.&nbsp;

Қармақшының қайырымды жандары Ақтөбеге көмек жіберді

<a href="https://kyzylorda-news.kz/">Kyzylorda-news.kz</a> Қадір түнінің қарсаңында Қызылорда облысының әкімі Нұрлыбек Нәлібаевтың бастамасымен Шиелі ауданы әкімі Нұржан Ахатовтың ұйымдастыруымен Шиелідегі орталық мешіт асханасында қасиетті айда ауыз бекіткен жамағатқа дастарқан жайылды. Ауызашарға ауданның құрметті азаматтары, барлық ауыл ардагерлері, ақжаулықты аналар, теміржол, білім, мәдениет бөлімдері сияқты түрлі сала қызметкерлері және мешіт жамағаты қонақ болды.Берекелі Рамазан айының қасиетті түні – Қадір түні. Құран Кәрім түсе бастаған мүбәрак түннің мұсылман қауымы үшін орны ерекше. Мейірім мен ізгілікке шақырып бұл ай адам баласын Жаратқанға жақындата түсіп, ағайын-туыс арасында бірліктің артып, берекенің молаюына себепші болады. &nbsp; Осынау қайырлы түннің қарсаңында Шиелі ауданында өткен жылы жүздесу көпшіліктің көңілін толтырғаны анық. Себебі қасиетті айдың кезекті күнінде өңір тұрғындарының басын қосып, адамдардың бір-біріне пейілін арттырған бұл шараның сауапты іске мол болған күн болары анық.&nbsp;Жайылған дастарқан басында Шиелі ауданының әкімі Нұржан Сәбитұлы көпшілік сағына күткен, мейірімге толы қасиетті Рамазан айының берекелі өтуін тілеп: Біздің әрбір елеулі еңбектеріміз ел халықтың игілігі үшін, Қасиетті айда ұстаған оразаларыңыз, жасаған дұға-тілектеріңіз, құлшылық-ғибадаттарыңыз қабыл болғай. Жаратушымыз елімізді табиғи апаттардан сақтасын. Отбасымызға амандық, жұмысымызға береке-бірлік нәсіп етсін. Келесі Рамазан айына төрт көзіміз түгел күйде аман жетейік, – деп жылы лебізін білдірді.&nbsp;Сонымен қатар Шиелі аудандық орталық мешітінің бас имамы Бақыт Бахрамұлы көптен күткен құлшылықтар қабыл болатын рақым жауған Қадір түнінің ұлықтығы мен артықшылығы жайында сөз қозғап, мүбәрак түнді қалай өткізу керектігімен бөлісті.&nbsp;Өз кезегінде сөз алған Шиелі аудандық ардагерлер кеңесінің төрағасы Өркен Исмаил: «Сыр еліне еңбегі сіңген белгілі мемлекет және қоғам қайреткері Бердібек Сапарбаев 70 жасында дүние салды. Қазақта «Ел басқарар жігіттің етек-жеңі кең болар» деген аталы сөз бар. Ондағысы оның атымтай жомарттығы немесе кең қолтық дархандығы ғана емес, алдымен мінез-құлқы, ақылы, білімі, адамдарға, қоғамға тигізген пайдасы, іскерлігі мен қайраткерлігі ескерілсе керек.&nbsp;Бердібек Машбекұлының атқарған қызметтерін тізбелесек, атан түйеге жүк боларлықтай. Ол Тәуелсіз мемлекетімізде Премьер-министрдің орынбасары, Үкімет кеңсесі бастығы, Еңбек министрі, Кеден комитеті төрағасы қызметтерін айтпағанда, соңғы жиырма жылда Қызылорда, Оңтүстік Қазақстан, Шығыс Қазақстан, Ақтөбе, Жамбыл облысының әкімі қызметін абыроймен атқарды. Қасиетті айда осындай тұлғалардың есім-сойын айтып, еске алу бүгінгі бізге парыз. Ел үшін еңбек еткен ерлердің есімі ұмытылмайды», – деді.&nbsp;Одан әрі Шиелі ауданының «Құрметті азаматы» Әшім Оразбекұлы жиылған жамағатқа Рамазан айында жақсылық тілеп, берекелі ауызашардың жүзеге асуына мұрындық болған облыс және Шиелі аудан әкіміне алғысын білдірді. Сондай-ақ ауызашар қонақтары – ақ жаулықты аналар қайырлы басқосудың барысында игі жүздесуге деген ризашылықтарын білдірді.&nbsp;Ауызашар барысында ата-бабадан жалғасып келе жатқан салт-дәстүрімізге сай діни жоралғылар көрініс тауып, бас имам ауызашар дұғасын жасап, ата-баба рухына құран бағыштады. Шиелі ауданының «Құрметті азаматы», ардагер ұстаз Рахым Мауяев барша жиылған жамағатқа ақ батасын берді. Бір дастарқан басынан дәм татқан жамағат бір-біріне ізгі тілектерін айтып, қасиетті айдың тағы бір күнін ауызбіршілікте өткізіп, тарқасты.

Шиелілік жамағатқа ауызашар берілді

<a href="https://kyzylorda-news.kz/">Kyzylorda-news.kz</a>&nbsp; Тасқын су салдарынан баспанасыз қалған педагогтер биыл аттестациядан өтпейді.<blockquote>"Төтенше жағдай жарияланған өңірдің педагогтері аттестаттаудан Оқу-ағарту министрлігі белгілеген жекелеген мерзімдерде өтеді. Тасқын су салдарынан баспанасыз қалған педагогтер үшін аттестаттаудан өту келесі жылға ауыстырылады", - делінген Оқу-ағарту министрлігінің хабарламасында.</blockquote>Бұған дейін Премьер-министр Олжас Бектенов Астана қаласының әкімі Жеңіс Қасымбек, Ақмола облысының әкімі Марат Ахметжановпен бірге су тасқыны жағдайын тексергенін <a href="https://massaget.kz/basty-zhaalytar-438/104825/">жазған едік.&nbsp;</a>Фото: Нұрболат Нұржаубай

Су тасқыны: Биыл баспанасыз қалған мұғалімдер аттестациядан өтпейді

<a href="https://kyzylorda-news.kz/">Kyzylorda-news.kz</a> Дәрігер деген кең ұғым, қастерлі мамандық. Бұл мамандық иелерінің жауапкершілігі де мол, атқаратын жұмыстары да ауқымды. Қызығы мен шыжығы қатар жүретін осынау маңызды салаға бүкіл өмірін арнап келе жатқан абзал жандар қаншама. Солардың бірі – Шиелі аудандық емхананың УДЗ бөлім дәрігері Нұргүл ­Әбітбаева.&nbsp;Нұргүл Оралқызы 10 жылдан аса көлемінде медицина саласында өнімді еңбек етіп, шексіз құрметке бөленген, «Алтын дәрігер» медалінің иегері. Ол жуырда Ұлыбритания елінен шақырту алды. Әлемдік эксперттердің қатысуымен өткен «Фетальды медицинадағы жетістіктер» курсына қатысып, арнайы сертификатпен марапатталды. Жерлесіміздің мұндай жетістіктері толастамасын.Нұргүл дәрігер қазіргі таңда сұранысқа ие маманның бірі. Айта кетейік, Шиелі ауданы медицинасының дамуына бір кісідей үлес қосып жүрген жан өткен жылы «УльтраНұр» УДЗ жеке кабинетін ашты. Соңғы үлгідегі заманауи Оңтүстік Корея елінен алынған «Samsung» HS30 скайнер жасайтын аппаратымен аудан тұрғындарына өз қызметін көрсетуге дайын.<blockquote>– Бұл көп біліктілікті қажет ететін қызықты жұмыс. Жас мамандарға көп жылдан бері жинаған тәжірибемді үйретіп келемін. Науқастармен сөйлесіп медициналық қызметтің олқы тұстарын анықтаймын. Заман талабына сай медициналық көмек көрсетудің сапасын арттыруға барынша үлесімді қосуға тырысамын, – дейді ол.&nbsp;</blockquote>Әрине, осындай берері көп нағыз білікті маманның келешек шәкірттері де осал болмасы анық.

Шиелілік дәрігер Ұлыбританияда

<a href="https://kyzylorda-news.kz/">Kyzylorda-news.kz</a> Соңғы жылдары өңірде өндіріс саласы әжептәуір дамып келеді. Түрлі шикізат, тұрмысқа қажетті дүние­лерді жасау бойынша аймақтағы бірнеше кәсіпкер өз өнімін өзге қала тұрмақ, сырт мемлекеттерге де жіберіп жатыр. Өңдеу өнеркәсібін жақында бастаған жандардың қата­рында Бауыржан Қамзаев та бар. Ол – Қызылорда бойынша жасанды мәрмәр тастан раковина жасап, сатылымға шығарып жүрген жалғыз кәсіпкер. Бауыржан «2021-2025 жылдарға арналған кәсіпкерлікті дамыту жөніндегі ұлттық жоба» шеңберінде 5 млн теңге грант алып, осы жұмыс­ты жандандырып келеді. «NOMAD» брендімен тұрмысқа қажет раковина жасап жүрген кәсіпкер осы кәсіпті алғашында Шымкент қаласындағы цехтардың&nbsp; бірінен&nbsp; үйреніп&nbsp; келіпті.<blockquote>– Шымкент қаласында раковиналар жасайтын үлкен цех бар. Сонда туысым жұмыс істейді. Ең алғаш сол арқылы біліп, осы бизнесті бастасам деген ойда жүрдім. Өткен жылдың қазан айында істеп жүрген жұмысымнан шығып, Шымкентке бардым. Осылай 2,5 млн теңгеге осы кәсіп түрін оқып, машықтандым. Оның ішінде тек раковина жасауды ғана емес, оны құятын қалып жасауды да меңгеріп шықтым. Осылай өңірге келіп, бизнес жоспар дайындап, желтоқсан айында 5 млн теңге грант жеңіп алдым. Қазір Құдайға шүкір, 5 айдың жүзі болды, осы жұмысты дөңгелетіп жүрмін, – деді&nbsp; кәсіпкер.</blockquote>Кез келген ісі бастау үшін адамның алдында мақсат тұрады. Кәсіп иесінен бұл бизнесті бастауға не түрткі болғанын сұрағанымызда, тұңғышының мектеп бітіретін уақытының жақындағаны әрі оқуының жайы алаңдатқанын айтты. Солай, «көзді жұмып», осы салаға келіпті. Ата-анасы мен жұбайы, жақындары бірден&nbsp; қолдаған&nbsp; екен.Жалпы, жұмыстың оңайы жоқ. Бұл кәсіптің де қиындығы жетерлік. Негізінен, раковина жасауға қажет қоспалардың кейбірі өңірден де табылады. Оған Арал ауданы Шөміш ауылы маңынан шығатын кварц құмы, сондай-ақ кальцит, сұйық шайыр (смола), мәрмәр ұнтағы, гелькоат және түрлі түс беретін пигменттер кіреді. Осыларды өз заңдылығымен араластыра отырып, түрлі формадағы қалыпқа құяды. Нәтижесінде өзіміздің күнделікті тұрмыста қолданып жүрген раковиналар&nbsp; дайын.Айтылғанда 1 өнімді жасауға 10-15 минут ғана кететін секілді көрінге­німен, бір күнде 8-10 раковина дайын болады. Кәсіп иесінен осы дүниелердің қалай жасалатынын сұрап көрген едік, машақаты көп тірліктің жасалуы үшін қалыпты керекті түстермен лактеп қою керектігін айтты. 2 сағат кебу процесінен өткен қалыпқа жоғарыда айтылған қоспалардан жасалған сұйықтықты (растворды) құяды. Оның өзі кемінде 2 сағат қалыпта кебуі керек. Одан шыққан соң, тағы бір аппарат арқылы раковинаның жиек-жиегін тегістеп, тазартып, ыстық сумен бір жуып алу керек. Сосын арнайы тап­сырыспен жасалған қорапқа орна­ластыру жұмысы ғана қалады. Кәсіпкер қаптаманың сыртына «Қазақ­станда жасалған» белгішесі мен Қызылорда қаласынан өндіріліп жатқан өнім екенін көрсеткен. Әрі әлеуметтік желідегі парақшаларына сілтеме де орналастырған. Тікелей зауыттан жасалған қораптың өзіне 1 алғанда 1 млн теңгедей қаражат кетіпті. Әрбір қоспаны сырттан алдыру да оңай дүние емес. Тонналап есептелген дүние блған соң, миллион­дап ақша жұмсалады. Істің ебін табу деген қиын болса, оны ары қарай&nbsp; жүргізіп кету – одан да қиын дүние.Айтпақшы, раковиналардың ба­ғасы&nbsp;&nbsp; 21&nbsp; мың&nbsp;&nbsp; теңгеден&nbsp;&nbsp; басталып,&nbsp; 44-45 мың теңгеге дейін барады. Ол көлеміне қарай. Дәл қазіргі уақытта барлық дүниеге жеңілдік науқаны жүріп жатыр. Яғни, әрбір өнімді тікелей өндіріс орнынан 10-15 пайыз­ға де­йін төмен, қолжетімді бағада ала аласыз. Ал дәл осы дүние­лерді тұрмыстық дүкеннен 30 пайыз­ға қымбат кө­р­уіңіз мүмкін. Сол үшін Бауыржан Қамзаев алдағы уақытта раковиналарды үйінің алдынан шағын қойма ашып, тұрғындарға қолжетімді бағада сатқысы келеді. Бұдан басқа, шағын цехты да үйінің жанына көшіру жоспарда бар екенін жеткізді.<blockquote>– Дәл қазір цех жұмысын жалға алынған екі бөлмелі үйде жүргізіп жатырмын. Алдағы уақытта тағы да түрлі бағдарламаға қатысып, бизнес­ті ұлғайту бойынша өндіріс орнын кеңей­тіп, үйімнің жанындағы бос орынға үлкен қоршау көтеріп, ендігіде сол жақта жалғастыру ойда бар. Осы дүниелерге үкіметтен қолдау болса екен деймін. Негізі, мемлекет жастарға жағдай жасамай жатыр емес, жасап жатыр. Тек оны бағалай білу керек. Тірліктің түбіне түсемін дейтіндер аз, бірақ, жұмыс істеймін десең, біздің елде мол мүмкіндік қарас­тырылған. Өзім оған куәмін, – деді Бауыр­жан&nbsp; Жаңбыршыұлы.</blockquote>Қазірде Бауыржан тапсырыспен ғана жұмыс істеп жатыр. Қала ішінде 6-7 тұрмыстық техника мен жиһаздар сататын дүкен бүгінде осы раковиналарды алып, сатылымға шығаруда. Бұған дейін өзге қаладан 200 өнімге тапсырыс түсіпті. Бірақ, кәсіпкер одан бас тартқан. Өйткені, осынша раковинаны жасау үшін алынатын заттардың шығыны түсетін табыс­тан сәл-ақ кем. Бүгінде бәсекелес­тің жоқтығы қымбатшылықты баса алмай тұр. Сондықтан, осы салада басқа да өнім өндірушілердің болғаны жақсы. Біріншіден, сапаны дұрыс­тауға көмек болса, екіншіден, баға&nbsp; тұрақталады.Егер,&nbsp; өндіріс&nbsp;&nbsp; орнын&nbsp;&nbsp; кеңейтуге&nbsp; қолдау жасалса, кәсіпкер алдағы уақытта тек раковиналар ғана емес, көлікке қажетті құралдар, ванналар, үлкен көлемдегі себезгілер жасауды қолға алады. Ол кезде ішкі&nbsp; өнімді қанағаттан­дыру­мен қатар, сыртқы мемлекеттерге де экспорттауға мүмкіндік бар. Ойда тұрғанды іске асыруға тек қаражат қажет. Дана халқымыздың «боламын деген баланың бетін қақпа, белін бу» деген бір ауыз сөзі біздің айтқымыз келген дүниені бірден ұғындырады. Сол үшін қаражатты қажетті дүниелерге пайдаланғанымыз абзал.«Кәсіпкерлік қолдағанда көркейеді» демекші, демеу жасау арқылы өз сапамызды тұрақтап, өнімдердің санын арттырамыз. Импорттық тауарларды өзге мемлекеттерден тасымалдау деңгейі азаяды. Әрі жиынтық ішкі өнімнің де көлемі көңіл қуантарлық қатарға көтеріледі. Бұл кезде мемлекеттік кіріс те, кәсіпкердің сатылымы да ешкімді алаңдатпайды.

Болашағы бар кәсіптің түрі Қызылордада дамуда

<a href="https://kyzylorda-news.kz/">Kyzylorda-news.kz</a>&nbsp; Қарағанды облысындағы қос сәбидің өліміне қатысты жаңа деректер белгілі болды. Жантүршігерлік оқиға&nbsp;Теміртау қаласынан 15 минуттық жерде орналасқан Гагаринское елді мекенінде болған. Екі және төрт жастағы қос бүлдіршінді аналары тамақ сұрағаны үшін тұншықтырып тастаған.&nbsp;Бұл туралы&nbsp;Stan.kz&nbsp;ақпарат агенттігі “Патриот” арнасына сілтеме жасап&nbsp;хабарлайды.4 сәуірде түскі уақытта 2 жастағы Мия мен&nbsp;4 жастағы Карина қарны ашып, анасынын тамақ сұрай берген соң әйел екі қызын буындырып өлтірген. Ал 6 айлық қызына тиіспеген. Сөйтіп&nbsp;кешке дейін өзімен бірге тұратын азаматының келгенін күткен. Ер адам келгенде әйел кереуетте жатқан балалардың мәйіттерін нұсқап, қыздардың еш себепсіз көз жұмғанын айтқан. Әйелдің айтқанына сенген азамат полиция қызметкерлерін шақырған.Күдікті көршілерге өзін Вероника (Вера) деп таныстырған. Бірақ әйелдің шын есімі Ирина болып шықты.&nbsp;Ол полицияны&nbsp;алдап, балалардың белгісіз заттан уланғанын айтқан. Әйелдің мәлімдемесінен кейін полиция ас бөлмені тексермек болады. Алайда олар ас үйден тіске басар ештеңе таппаған.“Мен картоп бермек болдым. Олардың аш екенін білгенде бүкіл ауыл болып көмектесер едік. Ол полицияға қыздардың бөлмесіне&nbsp;кіргенде балалардың ұйықтап жатқанын көріп, шығып кеткенін айтқан. Ол өтірік айтыпты. Мен де қыздардың бір нәрсе жеп, уланып қалған екен деп ойладым”, –&nbsp;дейді көршісі Александр.Оқиғаның мән-жайы анықталған соң полиция манекен әкеліп, әйел қыздарын қалай өлтіргенін көрсетті. Өз анасының қолынан қаза тапқан екі қыздың сыртқа шыққанын ешкім көрмеген. Анасы оларды серуендеуге жібермеген.“Күдіктімен бірге тұратын азамат қыздардың қазасы туралы білгенде жылап жіберді. Полиция қызметкерлері оқиға орнында жұмыс істеп жатқан үздіксіз шылым шекті”, –&nbsp;дейді Александр.Қарағанды облысы полиция басқармасы жантүршігерлік оқиғаға байланысты пікір білдірді.“Сотқа дейінгі тергеу басталды. Қыздарын өлтірді&nbsp;күдікпен олардың анасы ұсталды. Әйел&nbsp;уақытша ұстау изоляторына қамалды. Сараптама тағайындалды. Іс Қарағанды ​​облысының полиция департаменті бастығының бақылауында”, –&nbsp;делінген хабарламада.Еске салайық, бұған дейін Қарағандыда әйел екі баласын өлтірді деген күдікке ілінгені туралы хабарлаған едік. Кейін Гагаринское ауылының әкімі әйелдің психиатриялық ауруханада есепте тұрғанын айтты.&nbsp; &nbsp;Фото:&nbsp;pixabay.com

Қарағандыдағы қос сәбидің өлімі: Анасы тамақ сұрағаны үшін балаларын тұншықтырып тастаған

Арал ауданың бюджеті күн санап артып келеді

<a href="https://kyzylorda-news.kz/">Kyzylorda-news.kz</a>&nbsp; Елімізде шағын және орта кәсіпті дамыту, бизнеске кедергілерді болдырмау мемлекеттің басты бағыттарының бірі болып отыр. Сондықтан кәсіп жасаймын деген адамға кедергі жоқ. Әсіресе қазіргі таңда шағын және орта бизнес өкілдеріне мемлекет тарапынан беріліп жатқан көп мүмкіндіктің арқасында кәсібіңізді кез келген жерде дөңгелете аласыз. Бұл орайда бағыт – бағдары айқын мемлекеттік бағдарламалар халық игілігі үшін жұмыс жасауда. Осындай берері мол бағдарламаның бірі – «Ауыл аманаты» жобасы.Аталған жоба аясында «Таң» ауылында қап шығаратын зауыт іске қосылды. Жергілікті кәсіпкер Дәурен Құдабай бауыры Рүстем екеуі бірлесіп шығаруда.<blockquote>Өзім негізі мұғаліммін. Кәсіпке келмес бұрын Қызылорда қаласында мектепте ұстаздық еттім. Мамандығым тарихшы. Әкемнің зейнетке шығуына байланысты ауылға келіп, әкем негізін қалаған &nbsp;«Нұр» шаруа қожалығының шаруасын дөңгелетіп келемін. &nbsp;Қожалықта күріш егумен айналысамыз. Күріш ақтау шағын цехымызда бар. Қап шығару кәсібіне өзіміздің қажеттіліктерімізді өтеу үшін келдім. Оның үстіне қаптың барлығы Қытайдан келеді, әрі бағасы мен сапасы сын көтермейді. Сондықтан өзіміз шығарып халыққа да сапалы дүние ұсынайық деп шештік, − дейді кәсіпкер.</blockquote>Бүгінде қап шығаратын зауыттың өніміне сұраныс жоғары. Отандық өнімнің әлеуетін арттырғысы келетін кәсіп иелерінің басты мақсаты – сырттан келетін тауарларды ығыстырып, өнімнің қолданыс аясын кеңейту.&nbsp;<blockquote>Зауытты ашу үшін «Құдабай» ауыл шаруашылығы өндірістік кооперативін құрып, «Ауыл аманаты» жобасы бойынша өндіріс саласымен жеңілдетілген 2,5 пайызбен 14 млн теңге несие алдық. Технологияны Қытайдан әкелсек, шикізатты Өзбекстаннан алып отырмыз. Қап шығарудағы мақсатымыз пайда табу емес. Керісінше халыққа сапалы өнім ұсыну, − дейді ол.</blockquote>Кәсіпкердің айтуынша зауыт негізгі ауыл шаруашылығы өндірушілердің сұранысына сәйкес әр түрлі көлемде қаптар дайындауда. Өндіріс ошағы күніне 10 мың қап тоқиды. Сондай-ақ қыркүйек айынан бастап, яғни егіннің кезінде қапқа деген сұраныс артатын көрінеді. Қазіргі таңда зауыт 4 адамды тұрақты жұмыспен қамтуда. Әңгімелесу барысында кәсіпкер мемлекеттік бағдарламалардың қолдауының көп пайдасы барын да тілге тиек етті.<blockquote>&nbsp;Кәсіпкерлікте оның ішінде &nbsp;шағын және орта бизнесті дамытуға бағытталған бағдарламалар өте тиімді. Мемлекетіміз төмен пайыздық несие, қайтарымсыз гранттар дейсіз бе барлығын ұсынып отыр. Ал оның игілігін көру – әркімнің &nbsp;өз ынта-ықыласына байланысты. Кәсібің – нәсібің, &nbsp; сондықтан ерінбей еңбек ету керек. Мүмкіндікті барынша пайдалан дұрыс, − дейді.</blockquote>Кәсіпкердің алға қойған жоспары да ауқымды. Жуырда өңірге тағы бір өндіріс орны – аяқ-киім тігу цехын ашуды жоспарлап отыр.&nbsp;<blockquote>Цехтың барлық технологиясы дайын. Іске қосылғанда қазақы нақыштағы етіктерді тігетін &nbsp;боламыз. Қазір баламды оқытып, технологияны меңгеру жолдарын үйреніп жатыр. Мұның барлығы өзімнің қаржыммен жүзеге аспақ, − дейді Дәурен.&nbsp;</blockquote>Ағайындылардың бір емес бірнеше кәсіпті дөңгелентіп отырғандығы елді сүйсінтеді. Осы ретте еңбекқор кәсіпкердің жаңа бастамасына тек табыс тілейміз.<img src="https://knadmin.beoblood.kz/uploads/qap_1_337b396225.jpg" alt="qap (1).jpg">

Мемлекеттік бағдарламалар халық игілігі үшін 

<a href="https://kyzylorda-news.kz/">Kyzylorda-news.kz</a> 2019 жылдан бері ҚР Үкіметінің қаулысымен&nbsp;«Бизнестің жол картасы – 2025» мемлекеттік бағдарламасы бекітілген еді. Содан бері қаншама кәсіпкерге шағын және орта кәсіпті дөңгелетіп алып кетуге мұрындық болып келеді. Бағдарламаның басты мақсаты – аймақтық кәсіпкерлікті дамыту және тұрақты жұмыс орындарын құру. Бұл мақсатқа жету үшін көптеген жаңа және тісқаққан кәсіпкерлерге қолдау білдірілді. Бағдарлама аясында қаржылай және қаржылай емес те қолдау қарастырылған. Мемлекеттік инфрақұрылымды жақсартуға бағытталған бұл жоба өзінің нәтижесін береді&nbsp; деп&nbsp;күтілуде.Бұл мемлекеттік бағдарламамен 2021 жылы грант алған бірсыпыра кәсіпкердің нәтижесімен бөлісетін боламыз. Барлығы өз қарым-қабілетін жіті талдап, өз деңгейінде жұмысын атқаруда. Ең алдымен, бағдарламаның толық мүмкіндігіне шолу жасайық. Аталмыш бағдарламаның қаржылық операторлары – «Даму» кәсіпкерлікті&nbsp; дамыту&nbsp; қоры мен «Бәйтерек» ұлттық басқарушы холдингі. 2019 жылы қолға алынып, жүйелі жұмыстың нәтижесінде 2025 жылы бұл бағдарлама табысты болатынына сенім артылған. Бағдарламаның негізгі төрт бағыты бар. Атап айтсақ, шағын қала және ауыл кәсіпкерлерінің бизнес бастамаларын қолдау, экономика және өңдеу өнеркәсібі саласындағы кәсіпкерлікті қолдау, валюталық тәуекелдерді төмендету, сондай-ақ қаржылық емес шаралар қарастырылған. «Бағдарламаға кім қатыса алады?» деген сауал туындаса, жауап берелік. Шағын кәсіп иесі, әйел азаматтар, мүмкіндігі шектеулі жандар һәм 50 жастан асқан азаматтар қатысуға толық мүмкіндігі бар. Көбі атауын білсе де, бағдарламаның жай-жапсарын білмейтін жандарға сәлде болса&nbsp; ақпарат бердік деген ойдамыз.&nbsp;Лаура Шынжырбаева есімді жеке кәсіпкер балаларға білім және өнер орталығын, тіпті күту қызметін де ұсынады. Ол 2021 жылы «Бизнестің жол картасы – 2025» мемле­кеттік бағдарлама аясында грант арқылы 3,8 млн теңге алған. Қазір 5 адамды жұмыспен қамтып отыр. 3 сағат көлемінде ораторлық, қобызда ойнау, қолөнер сынды түрлі қазақылықтың иісі шығып тұрған өнерді үйретеді. Сондай-ақ, ҰБТ-ға физика-математика пәндері бойынша жоғарғы сыныптағы 3 талапкерді дайындауда. Бұған қоса, 3 мүмкіндігі шектеулі баланы демеушілердің қолдауымен ата-анасы жұмыста болған кезде&nbsp; қарайды.<blockquote>– Бұл – менің екінші грантты жеңуім. Бірінші рет 2019 жылы алдым. Одан кейін осы бағдарлама аясын­да алған қомақты қаражатқа смарт-теледидар, ноутбук, үстел, кілем, кір жуғыш машина, газ, бала­лардың демалыс орынын жабдық­тадық. Кейбір заттарымыз сапасыз келуіне байланысты қайтарып жіберуге тура келді. Ата-аналардың сұранысына сай, әртүрлі бағытта қызмет көрсетеміз, – деді&nbsp; жеке&nbsp;кәсіпкер.</blockquote>Ал 2017 жылдан бері тігін әлеміне машықтанған Индира Мамбетжанова аталмыш бағдарламаның көмегімен 5 млн теңге грант жеңіп алған. Жұмысының негізгі бағыты – қыз жасауы мен құрақ көрпе. Перде тігуді де жақында қолға алыпты. Сондай-ақ, шеберлік шыңдау сынды бір айлық курсы бар. Республика бойынша тапсырыс алып қана қоймай, Шымкент қаласындағы азаматшаға кәсіп ашуына септігін тигізіпті. Кәсіпкер&nbsp; шәкірттерімен&nbsp; жиі фидбэк болып тұратынын жасырмады. Химия ғылымы бойынша магистратураны Испания елінің алдыңғы шептегі университетінде білім алған ол қолөнер Еуропада жақсы дамығанын айтты. Қолөнер – адам жанының айнасы, көнеден қалған көзді заманауи қылып, алайда қазақы сарында беріп жүр екен. Халықаралық көрмелерге қатысып, ұлттық өнерді де дәріптейді.Аталмыш бағдарлама бойынша&nbsp; 5 млн теңге көлемінде қомақты қаражат&nbsp; алған жеке кәсіпкер Асан Дархан кондитерлік цех ашыпты. Тәтті құмарлардың&nbsp; сүйіп&nbsp;жейтін&nbsp; отандық өнімі «Қазақстан» шоколадының аналогы ретінде «Қызылорда» деген атаумен шоколад шы­ғаруда. Жалпы, шоколадтың төрт түрі жасала­ды. Әзірге тек облыс бо­йынша сатылымда ғана бар. Кәсіпкер&nbsp; 4 адамды жұмыспен қамтып, тұрақты жалақысын&nbsp; беріп&nbsp; отыр.<blockquote>– Ақырындап халық бізді танып жатыр. Төрт тойды да өткізіп үлгердік. Әсіресе жәрмеңке жәрдемін беруде. Жаңадан бастап жатқан соң бағаның көтерілгеніне қарамастан шоколадтың бағасын 100 теңгеден артық көтермедік. Алдағы уақытта тәттінің түрін көбейтіп, республика бойынша өніміміз сұранысқа ие болады деген сенімдеміз, – деді кәсіпкердің анасы.</blockquote>Ал 5 млн теңге көлемінде қолдау алған Алтын Ойнарова есімді кәсіпкер еріткіш плоттер арқылы жұмыс істеуде. Оның сөзінше, қандайда бір зат эко-өнім болғаны дұрыс. Сол себеп­ті осы кәсіпті бастаған екен. Ол фото обои, 3d-обои, баннер, наклеи­ки, стикер, визитка, т.б. қызметтер көрсетеді. «Қаңтар оқиғасы» кәсібіне біраз қиындық әкеліпті. Дегенмен қазіргі таңда біршама кафе, дүкен­дерден ұсыныс түсуде. Бұл кәсіп арқылы 2 адамды жұмыспен қамтып отыр. Аталмыш бағдарлама бойынша алған қаражатқа тек еріткіш плоттер алған екен. Ал басқа құрылғыларды өз қаражаты есебінен алыпты. Сонымен қатар орталыққа білікті дизайнер&nbsp; қажет&nbsp; екенін&nbsp;жеткізді.Кәсіп ашуға мемлекет тарапынан түрлі қолдау көрсетілген. Дей тұрғанымен, жүрексініп отырғаныңыз­да өзгелер табыстың көзін табуда. Біреудің қолынан келген іс, сізден де келетіні анық. Тәуекел етіп, еңбек ету маңызды. Бірақ еліктеп, көзге көрінген кәсіптің жетегінде кетпеңіз. Өзіңізді іздеп барып, бағдарламаға жүгінген жөн. Әр нәрсеге асық болғанша, бір&nbsp; нәрсеге машық бол деп бекер&nbsp; айтылмаған. Бүгін «Бизнестің жол картасы – 2025» мемлекеттік бағ­дарламасының механизмін түсіндірдік. Мақсаты осымен тектес өзге де бағдарлама жетерлік. Шынайы еңбек ете білген адам ғана, өз шыңын бағындырып, масылдықтан құтылады.

Шынайы еңбек қана масылдықтан құтқарады

<a href="https://kyzylorda-news.kz/">Kyzylorda-news.kz</a> Мұсылман қауымы үшін жылдың ең қасиеттісі әрі берекелісі болған Рамазан айының да бір күн қалды. Алланың мейірімі төгіліп, жұмақ есіктері айқара ашылып, сауаптар еселеніп жазылатын шарапаты мен шапағаты мол бұл уақыттың маңызы мүлде бөлек. Рамазан – тәрбие мен рухани өзгерістердің айы. Бұл – пейілдердің кеңейіп, мейірімнің көбейетін, иманның жаңарып, ізгіліктің таралатын қасиетті уақыты.Айлардың сұлтаны деп Рамазанды танысақ, түндердің ең қасиеттісі – Қадір түні. Қадір түнін – тағдыр түні деп бекер айтпайды. Қасиетті Құран аяттары түскен бұл түннің маңызын ислам ғұламалары Алла Тағала адамдардың келер жылғы тағдырын, яғни ризығы мен несібесін жазатындығымен байланыстырады. Сондықтан бұл уақытты құлшылыққа арнап, жақсы амалдарды көбейтудің маңызы зор. Осы тақырып төңірегінде, сондай-ақ жан мен тәннің рухани тазартушысы болған Рамазан айының қадір-қасиеті жөнінде тереңірек ақпарат алу үшін Шиелі ауданының бас имамы Бақыт Ұлжаевпен сұхбат жүргіздік. Ол қасиетті айда жасалатын құлшылық турасында кеңестермен бөлісіп, бір ай көлемінде ауданда атқарылған игі шаралармен таныстырды.– Бақыт Бахрамұлы, қасиетті Рамазан айы да санаулы күндерден соң аяқталмақ. Уақытын құлшылыққа арнап, Алладан әр ісінің қайырын сұрап, үздіксіз дұғада болған мұсылман қауымы Қадір түнін қарсы алды. Бұл түннің дінімізде маңызы қандай?– Ассаламуалейкум! Қасиетті Рамазан айында ұстаған оразаларымыз, жасаған құлшылықтарымыз қабыл болсын! Пайғамбарымыз (с.ғ.с.) Рамазан айында бір түн барын, бұл уақытта жасаған әрбір игі амалдар жеті жүз есеге дейін көбейетінін айтқан болатын. Бұл түн – Қадір түні. Қадір түнінің басқа түндерден қайырлы, қасиетті болу себебі, бұл айда Пайғамбарымызға (с.ғ.с.) Құран Кәрімнің алғашқы үзінділері түсірілген. Сондықтан Рамазанды айлардың сұлтаны деп білеміз. Биылғы Қадір түнінің уақыты көпшілік ғалымдардың мақұлдауымен Рамазан айының 27-түніне, яғни 5 сәуірден 6 сәуірге қараған түнге бекітілді.Құран Кәрімде «Қадір» сүресі бар. Бұнда: «Біз оны (Құранды) Қадір түнінде түсірдік. Қадір түнінің не екенін білесің бе? Қадір түні мың айдан қайырлы. Ол түні періштелер және Жәбірейіл (а.с.) Раббыларыңның рұқсатымен барлық іс үшін түседі. Ол түн таң бозарып атқанға дейін мейірім мен есендік түні болмақ» делінген. Осының өзі бұл түннің аса маңызға ие екенін көрсетеді. Мың айдан да қайырлы болған бұл уақыт Рамазан айына сәйкес келеді. Бұған байланысты көптеген хадистер келген. Сол себепті Пайғамбарымыздың (с.ғ.с.) сүннеті арқылы мұсылмандарға қасиетті айдың соңғы он түнінде Қадір түнін күтуді, оның сауабын іздеп, уақытын құлшылықпен өткізуді насихат еткен.– Бұл түнде қандай амалдар жасаған абзал? Қадір түнін мешітте өткізу қаншалықты дұрыс?– Қадір түнін ізгі амалдарды еселеп, құлшылықпен өткізген дұрыс. Түнді құлшылықпен өткізген пенденің Жаратушысы алдында дәрежесі артады, тілеген дұғасы қабыл болады. Кейбір жастар Қадір түнінде ұйықтамау керек деп, уақытын қажетсіз нәрселерге жұмсайды. Бұл түннің маңызы, керісінше, барынша көп құлшылықғибадат етіп, жақсы амал жасауға асығуда жатыр.Қадір түнінде жасалатын құлшылықтарды мешітте өтеу міндет емес. Дегенмен, түнін осында өткізіп, Хатым дұғасына қатысып, жамағатпен нәпіл намаздарын оқимын десе, адамның өз еркі. Бұл түні Шиелі аудандық орталық мешітінде қарилар медресесінде білім алған қарилар Құранды толық аяқтап, Хатым дұғасын жасайды. Сондай-ақ жамағат арасында викториналық сұрақтар қойылып, қасиетті түннің қарсаңында әртүрлі сый-сияпаттар таратылады. Мешітте Тарауих, Тасбих намаздары оқылады. Құлшылығын жамағатпен бірге орындаймын деушілер мешітке келуіне болады. Сондай-ақ жас балалардың үлкен кісілерсіз жалғыз мешітке келмеуін ескертудеміз.– Қасиетті айдың аясында Шиелі ауданы көлемінде атқарылып жатқан игілікті істерге куәміз. Мешітте ұйымдастырылып, жүзеге асырылған сондай шаралар жөнінде толығырақ баяндап берсеңіз.– Рамазан айында аудан бойынша бірқатар игі шаралар атқарылды. Өңірде орын тепкен мешіттердің алдына баннерлер ілініп, сауабы мол қайырлы айдың қасиетін айшықтайтын уағызнасихаттар жүргізілді. Мешіттерде келушілерге арнап күнделікті ауызашар дастарқаны жайылып, аудан тұрғындарына қызмет етіп жатыр. Ауылдық жерлерде де мешіттерде, үйлерде ауызашарлар берілуде. Ауылдық мешіттің имамдары халықпен тығыз байланыста қызмет атқарып келеді. Биылғы Рамазан айы Наурыз мерекесіне сәйкес келгендіктен, Наурыз жиындарын кешкісін ауызашарлар ретінде беру ұсынылған болатын.Бұдан бөлек мұқтаж отбасыларға мешіт атынан азық-түлікпен көмек көрсетілді. Аз айлықты қанағат тұтып, қызмет етіп жатқан аудандағы барлық көше тазалықшыларына арнайы қайырымдылық жасалды.Сонымен қатар орталық және ауылдық мешіттерде әр Тарауық намазының алдында «Отыз күнге отыз насихат» атты уағызнасихаттар ұйымдастырылды. Сол сияқты «Оразаны дұрыс ұстап жүрміз бе?» тақырыбында насихат жұмыстары жүргізілді.«Ислам және отбасы» тақырыбында әйелдер арасында отбасы құндылықтары шарасы өтті. Сондай-ақ берекелі айдың аясында әйелдерге арналған дәрісхана ашылып, қолданысқа берілді.Бұл ай Құран түсірілген ай болғандықтан, мешітке келіп, дәріс алушы шәкірттер арасында Құран жарысы өткізілді. Оның марапаты Алла нәсіп етсе, Қадір түнінде табысталатын болады.Рамазан айында балалар да қуансын деген ниетте орталық мешіттің ұйымдастыруымен 200 балаға «Рамазан тәттісі» таратылды. Оның ішінде осында Құран үйреніп, ілім алып жатқан мешіт шәкірттері бар.– Бұл Рамазан бұған дейінгілерден несімен есте қалды?– Бұл Рамазанның бұған дейінгі Рамазан айларынан ерекшелігі біз жыл сайын мешіттерде Құран Хатым өткізетін, намазда тұрып, толық Құранды аяқтайтын қариларды басқа өңірлерден шақыртатынбыз. Былтырдан бастап Шиелі ауданының ҚМДБ-ға қарасты қарилар медресесінде, яғни өзіміздің медреседе білім алып, Құран жаттаған шәкірттеріміз Құран Хатым өткізіп жатыр. Олар тек кенттік мешіттерде ғана емес, ауылдық мешіттерде де Құран Хатым өткізуде.Рамазан айы кезінде өткізілген облыстық Құран сайысында аталған аудандық қарилар медресесінің шәкірттері бір парадан 3-орын, үш парадан 2-орынға ие болды. Бүгінде алған білімінің нәтижесінде жоғары жетістіктерге жетіп жүр.– Өткен реніштер кешіріліп, болашаққа жоспар құрылатын мүбәрак түннің қасиетін оқырман жақсы түсінді деп ойлаймын. Осынау ізгілік жайлап, құлшылық қабыл болатын берекелі айдың ерекше болу себебі неде?– Рамазан айы – берекелі, қайырлы, жақсылыққа толы ай. Пайғамбарымыз Мұхаммед (с.ғ.с.) өзінің хадисінде: «Рамазан айы келгенде, жұмақтың есіктері айқара ашылып, тозақтың есіктері тарс жабылады және шайтандар кісенделеді», – дейді. Бұл айда адамдар көп жақсылық жасайды. Таң сәріден кешке дейін ораза ұстаған адам өзін күнәдан аулақ ұстайды. Бұл айда ауыз бекіткен адам мұқтаж адамдардың жағдайын түсініп, жүректерінде соларға деген жылулық оянады.Рамазан айында ауызашар дастарқаны жайылып, шамасы келген кісілер зекет беріп, мұқтаж адамдарды қуантады. Бұл айда адамдар өздерінің пенде екенін түсініп, ағайын-туысты шақырып, бірге ауыз ашып, бір-бірінің амандығын біліп, қарым-қатынасын күшейтіп, қасиетті айдың келуімен құттықтайды. Рамазан айын ерекше берекеге толы деуіміздің себебі осында жатыр. Сондықтан үнемі жақсы тілекте, дұғада болған дұрыс.– Сұхбатыңызға рақмет!

Қазақстан және Қызылорда облысының жаңалықтары