<a href="https://kyzylorda-news.kz/">Kyzylorda-news.kz</a> &nbsp; Қызылорда облысы бойынша экономикалық тергеп-тексеру департаментінің мәліметінше, осы жылдың І тоқсанында 27 іс өндірісте болып, оның 11-і аяқталды. Сондай-ақ, департамент қарауындағы 6 іс сотқа жолданып, 5 іс аяқталмайтын негізде тоқтатылды. Бұдан бөлек, аталған департамент қолға алған «Бизнесті қорғау» жобасы өз ісін жауапкершілікпен жүргізіп отырған кәсіпкерлердің құқықтарын қорғауға бағытталған. Осы жобаның нәтижесінде жыл басынан бері кәсіпкерлердің конституциялық құқығын бұзу дерегі анықталмады.&nbsp; –Жалпы облысымызда құқық бұзушылық деректерінің тіркелуі өткен жылдарға қарағанда төмендегені байқалады. Бірақ бұл – қылмыс тоқтады деген сөз емес. Қазір біз саннан гөрі сапаға көңіл бөлу ұстанымымен жұмыс істеудеміз. Бүгінде біздің департамент қылмыстық істерді 100 пайыз электронды форматта тіркейді және аяқтайды. Қоғамның алаңдаушылығын тудырып отырған тағы бір мәселе – қаржы пирамидасы мен интернет алаяқтықтың қарқын алуы. Осыған байланысты өңірде қаржы пирамидасын ұйымдастырған ағайын екі азамат 5 жыл мерзімге сотталып, шығын көлемі салымшы азаматтарға толық қайтарылып берілді. Жүргізілген профилактикалық жұмыстардың нәтижесінде жыл басынан «Кибернадзор» жүйесі арқылы 185 сілтеме бұғатталып, 5 аккаунт жойылды. Сондай-ақ, әлеуметтік желілерде заңсыз ойын ұйымдастырушылар қатары артып барады. Тиісінше, осы жылы заңсыз ойын бизнесіне қатысы бар 2 қылмыстық іс тіркелді. Қазіргі таңда тергеу жұмыстары жүргізілуде. Айта кету керек, соңғы 2 жылда департамент өндірісінде заңсыз ойын бизнесіне қатысты 23 қылмыстық іс анықталып, 22 ойынхана жабылды. Алдағы уақытта бұл бағыттағы жұмыстар жалғасатын болады және өңірдегі қылмыстарды азайту мақсатындағы жобалар сәтті жүзеге асады деп ойлаймыз, - деді Қызылорда облысы бойынша экономикалық тергеп тексеру департамент басшысының міндетін атқарушы Арман Джанадилов. &nbsp;Фото: Қызылорда облысының Өңірлік коммуникациялар қызметі

Облыста құқық бұзушылық деректерінің тіркелуі төмендеген

<a href="https://kyzylorda-news.kz/">Kyzylorda-news.kz</a> Би өнерін ұлықтаған талай жас киелі сахнаның көркін келтіріп, байқаулардан бақтары жанып жүр. Олардың қатарында қармақшыда Айнагүл Орынбекова жетекшілік ететін "Самғау" би тобы да бар. &nbsp;Жақында мың бұралған қыздардан құралған би тобы Қызылордада "Бала дарын" шығармашылық орталығының ұйымдастыруымен өткен "Көктем FEST – 2024" республикалық жас өнерпаздар байқауына қатысып, І орынды жеңіп алды. Шәкірті қуанса, ұстазы одан бетер шаттанады емес пе?! Қанжығаларына жеңіс жүлдесін байлаған топ жетекшісін сөзге тартқан едік.&nbsp;<blockquote>– Шәкірттерімнің болашағынан үлкен үміт күтемін. Жосалы кентіндегі "ДК Баймаханова" атындағы "Баян" өнер орталығының хореография жанрынан Иіркөл ауылында балалар мен жасөспірімдерді биге дайындап жүрмін. Байқауға жастар биі саналатын "Кешкі серуен" биін апардық. Бидің қойылымы қанша мықты болғанымен, киімдеріміз оған сай келмесе, еңбек ақталмауы да мүмкін. Сол үшін де хореограф ретінде би мен оның киім үлгісінің үйлесімділігіне терең мән беремін. &nbsp;Топ заманауи биді билегенімен, ұлттық бояуды қосуды да естен шығармадық. Сахналық костюмдерімізге қазақы ою-өрнекті матаны пайдалануды жөн деп таптық. Нәтижесінде стиліміз көңілден шығып, көрермендерімізге де ұнаған сықылды. Қазылар алқасының жоғары бағасын алғанымызға өте қуаныштымыз. Бұл жас бишілерімізді одан сайын би өнеріне шабыттандырады деп сенемін, – дейді топ жетекшісі жақсы жаңалығымен бөлісіп.&nbsp; &nbsp;</blockquote>

Қармақшылық биші қыздар топ жарды

<a href="https://kyzylorda-news.kz/">Kyzylorda-news.kz</a> &nbsp;Мамандық таңдау – өте маңызды әрі жауапкершілікті істің бірі. Әр адам өзінің өмірінде ең маңызды шешім қабылдап, екі нәрседен қателеспеу қажет дейді. Бірі өмірлік жар таңдау болса, екіншісі мамандық таңдау. Оқу жылының аяқталуына да аз ғана уақыт қалыпты. Ал 11 сыныпты аяқтағалы отырған жас түлектеріміз үлкен өмірге қадам &nbsp;басып, өмірдегі ең жауапты кезеңдердің бірі – мамандық таңдап, маңызды қадам жасағалы отыр. &nbsp;Ал мамандық таңдау әр адамның өмір жолын анықтайтын шешуші сәт белгілі. «Мамандық таңдау – өміріңнің бір кірпішін дұрыс қалау» демекші, кейінгі өмірде еш өкінбейтіндей, бойындағы қабілетіне, бейімділігі мен қалауына қарай кәсіп түрін таңдау қажет.Мамандық таңдауда нені ескеру қажет?&nbsp; &nbsp; Мамандық таңдау ісі – адам өміріндегі ең маңыздылығы жоғары әрі өзекті мәселенің бірі. Тек қазір ғана емес, бұрындары да қоғамдағы аса басым мәселе болағын белгілі. Иә, кез келген еңбекті мамандық деп айталмайтынымыз белгілі. Еңбектің мамандық деп аталуы үшін де өзінің шарттары бар. Бірі қолыңызда белгілі бір мамандық бойынша диплом &nbsp;болу керек болса, екіншісі сол мамандық бойынша өз ісінің маманы атану. Өз ісінің маманы атану кез келген адамға бұйыра бермейтін бақ. Ал ол үшін ең алдымен таңдаған мамандығыңызға деген үлкен махаббат керек. Махаббатпен жасалынған жұмыс нәтижелі болатыны анық. Бір сөзбен айтқанда мамандығыңыз сүйікті ісіңізге айналуы қажет. Осы жағдайда ғана адам жұмысына жауапкершілікпен қарап, құлшыныспен кірісіп, өз жұмысынан ерекше әсер алады. &nbsp;Сол себепті мамандық таңдауды мектеп бітірер сәтте ғана емес, жылдар бойы саралап, ойланып таңдауы қажет. Мамандық таңдау бір қарағанда жәй нәрсе болуы мүмкін, алайда ол – бүкіл саналы ғұмырымыздың айнасы, тағдыры десек болады. Мамандық таңдау – тек қолға диплом алу ғана емес, бұл өз болашағыңды таңдау.&nbsp;Бұндай маңызды шешім қабылдауда жас түлекке дұрыс бағыт-бағдар беретін ата-ана мен ұстаздың қолдауы өте маңызды.Тегін оқу үшін басқа мамандық таңдауға мәжбүр&nbsp; &nbsp; Жоғары білім берудің барлық деңгейлері бойынша 2024 2025 оқу жылына 78219 грант бөлу көзделген екен. Оның ішінде көш бастап тұрған педагогикалық ғылымдар&nbsp;бойынша 13735 грант бөлінген. Ал машина жасау, өңдеу және құрылыс өнеркәсібі – 19 344, жаратылыстану, математика және статистика – 8288, ауыл шаруашылығы және биоресурстар – 2673, өнер және гуманитарлық ғылымдар – 1765, әлеуметтік ғылымдар, журналистика және ақпарат – 1185, бизнес, менеджмент және құқық – 1323 грант бөлінген. Жоғары оқу орнын бітірген түлектердің 60%-ы өз мамандығы бойынша жұмыс істемейді. Оқыған мамандығымен емес, мүлдем бөлек салада жұмыс істеп жататындары қаншама. Оның басты себебінің бірі – мектеп бітіруші түлектер көп жағдайда тегін оқу үшін өзіне сай емес мамандық таңдап, сол бойынша білім алуға мәжбүр болып жатады. Мамандардың айтуынша сұранысқа ие мамандық бойынша грант саны көбейген сайын дипломы бар жұмыссыз жастар саны көбеюде екен. Сондықтан болашақта белгілі бір мамандықтарға мемлекеттік грант бөлерде, сол мамандық бойынша еңбек нарығында жұмыс бола ма, жоқ па соны жоспарлай отыра грант саны бөлінбек. Жастардың саналы түрде өз мамандығын таңдап, дұрыс шешім қабылдау &nbsp;үшін міндетті түрде кәсіби бағдар беру қажет. Көп жағдайда жастар мамандықты беделі немесе жалақысы үшін, және диплом алу ғана мақсатында таңдап, нәтижесінде кәсіби білім сапасының деңгейі төмен болуына әкеп соқтырады.Жиі таңдалатын мамандықтар&nbsp; &nbsp; Білім және ғылым министрінің айтуынша, мамандық таңдаудың алдыңғы қатарында дәрігер мамандығы тұр екен. Сонымен қоса соңғы уақытта педагог мамандығына да қызығушылық артқаны анықталды. – Бұл – біздің мұғалім мәртебесін көтеруге бағытталған жұмысымыздың нәтижесі, – деді министр. Иә расында дәрігер мен мұғалім мамандығын таңдаушылар жыл сайын көбейе түсуде. Бұл әрине қуантарлық жағдай. Мемлекет басшысы Қасым-Жомарт Тоқаевтың бастамасы бойынша қабылданған «Педагог мәртебесі» туралы заң шеңбері аясында мұғалімдердің жалақысы артқаны да осы мамандықты таңдауға деген сұраныстың артуына септігін тигізді. Мамандардың зерттеу нәтижесінде топ-10 жиі таңдалатын мамандықтар тізімін анықтады: дәрігерлер, педагогтар, стоматологтар, тауарлар мен киім дизайнерлері, ,ғимарат, құрылыс сәулетшілері, спорт жаттықтырушылары, нұсқаушылары, спорт саласындағы мамандықтар, психологтар косметология; жарнама, маркетинг саласындағы мамандықтар, графикалық және мультимедиа дизайнерлері.Мамандық таңдаудағы қателік&nbsp; &nbsp; Әлеуметтік сарапшы мамандарының айтуы бойынша қазіргі кезде мектеп бітіруші жас түлектер кім болам? деген сұраққа нақты жауап бере алмайды дейді. Оның басты себебі – жастайынан баланың бойындағы бейімділігі мен қабілетіне қарай бағыт-бағдар берілмеген. Ал мектеп баласының көп жағдайда қандай маман иесі боламын емес, ҰБТ-дан қанша балл аламын деген сұрақ мазалайтыны өтірік емес. Себебі мектепте бағыт-бағдар беруден гөрі, ҰБТ-ны жақсы тапсырып, жақсы балл алуына көп көңіл бөлінеді. Мектеп түлектерінің мамандықты кездейсоқ таңдайтындары да &nbsp;осы себептен. Мамандық таңдаудағы тағы бір қателік – бала өзінің емес, ата-анасының қалауындағы мамандықты таңдауға мәжбүр болады. Кейбір ата-аналар өзінің жүзеге аспаған арманын жүзеге асыру мақсатында баласының қарым-қабілетіне қарамай өздерінің қалауларын таңдауға мәжбүрлеп жатады. Мектеп бітірушілерден «ата-анамның қалауы бойынша таңдадым», «грант үшін осы мамандықты таңдауға мәжбүр болдым» дегендерін жиі естиміз. Бұл әрине өте дұрыс емес. Өзінің қалауы және бейімділігі болмағандықтан, болашақта сол мамандық бойынша білікті әрі сұранысқа ие&nbsp;маман иесі болмайтындығы айдан анық. Осы тұста біраз ата-аналар балаға еркіндік бермеуінің салдарынан баласының болашағына балта шауып, өте қатты қателеседі. Сондықтан бір сәт балаға еркіндік беріп, жүрек қалауы бойынша шешім қабылдау тізгінін өзіне қалдыру қажет.Кәсіптік бағыт-бағдар беру маңызы&nbsp; &nbsp; Кәсіптік бағдар беру – мамандық таңдаудың бір жолы. Қазіргі таңда замануи білім беру кеңістігінде өскелең ұрпақты кәсіби бағдарлау мәселесі өте өзекті болып отыр. Мектепте кәсіптік бағыт-бағдар берудің басты мақсаты – өзін өзі анықтау және кәсіби қызмет саласын таңдау бойынша оқушыларға кәсіби бағдар беру болып табылады. Кәсіби бағдар беру &nbsp;мектеп бітіруші түлектің еңбекке деген оң көзқарасын қалыптастыру, қызығушылықтары мен бейімділігін анықтау, қызметтің мазмұнын түсінуге үйрету, өз мүмкіндіктері мен қабілеттерін талдауға үйрету бойынша қызмет атқарады. &nbsp;Кәсіптік бағдарлау білікті маман болуға жол ашады. Жыл сайын елімізде 70 мыңнан аса жас түлек жұмысқа орналаса алмайды. Осындай олқылықтың орнын толтыру үшін қазіргі кезде сапалы кәсіптік бағдарлауға барынша көңіл бөліне бастады. Мектептегі кәсіби бағдар – бұл студенттердің кәсіптердің әлеуметтік-экономикалық және психофизикалық сипаттамалары туралы қажетті білім көлемін игеруге бағытталған оқу-тәрбие жұмысының негізгі жүйесі. Қоғамның әл-ауқаты үшін мектептің әр түлегі өзінің мүмкіндіктеріне, бейімділіктеріне неғұрлым толық қолдануды табуы, уақытты, күш-жігерді, құралдарды ысырап етпеуі, қоғамда өз орнын іздеуі қажет. Бұл оның жұмысына деген &nbsp;үлкен көмегін тигізеді. Мектеп қабырғасында &nbsp;кәсіптік бағдар беру жұмысын мектеп әкімшілігі, сынып жетекшілері және пән мұғалімдері жүргізеді. Кәсіби кеңес &nbsp;оқушының жеке басын зерттеу мен жеке сипаттама арқылы жүргізіледі. Кәсіби бағдар бойынша сынып жетекшісі оқушылардың іс-әрекеті мен дамуын бақылау, олардың оқу және сабақтан тыс жұмыстарының нәтижелерін зерттеу, сауалнама жүргізу, оқушылардың психологиялық-педагогикалық сипаттамаларын құрастыру сияқты жұмыс әдістерін қолдана алады. Оқушыларды түрлі пәндік олимпиадаларға, конкурстарға, іс шараларға қатыстыру осы кәсіптік бағдар беру мақсатында ұйымдастырылады. Қазіргі еңбек нарығында бәсекеге қабілетсіз мамандардың көбеюі мәселесі белең алып тұр. Сол себепті болашақ мамандардың дұрыс мамандық таңдау үшін мектеп табалдырығынан бастап өзінің қабілеті мен қай салаға бейімділігін анықтау маңызды болып табылады.ҰБТ деп мамандық таңдаудан қателеспе жас түлек&nbsp; Қазіргі&nbsp;таңда мектеп бітіруші түлектер ұлтық бірыңғай тестілеуге қызу дайындық үстінде. Барлығы да таңдау пәнін ой елегінен өткізіп, таңдап та үлгерген кезге жетті. Алдарында үлкен өмір жолы. Осы жолға шықпай тұрып оларды үлкен таңдаудың бірі – мамандық таңдау күтіп тұр. Барлығы іштей қобалжып, өте алмай қалам ба деген үлкен қорқыныш сезімі билейтіні белгілі. Тестілеу аяқталғаннан кейін жоғарғы оқу орындарына құжат тапсырып, сонымен қоса мамандық таңдау маусымы басталады. Бұл сәтте таңдаған мамандығына балы жетпей қалуы да әдбен мүмкін. Жеткен күннің өзінде бірнеше мамандыққа тапсыруға мүмкіндік болады. Көбінесе мектеп бітіруші түлектер мен ата аналар тапсыратын оқу орындарына аса мән беріп, мамандықты екінші орынға қойып жатады. Алайда жүрек қалауымен таңдамаған түлекке ауыр соғары анық. Сол себепті ең бірінші мамандық содан кейін ғана жоғарғы оқу орнына мән беру қажет.Түйін. Ел болашағы – білімді ұрпақ дейтін болсақ, жастарымыздың болашақ мамандығын таңдауда үлкен жауапкершілікпен қараса дейміз. Бұл әр адамның өміріндегі ең маңызды сәт және оны жіберіп алмай таңдауға байыптылықпен қарау қажет. Кемел келешектің жарқын кепілі – дұрыс таңдалған мамандық. Ұлы Абай атамыз айтқандай «қолын мезгілінен кеш сермеп» қалмау үшін ертерек іске көшкен абзал. Себебі өмір табалдырығынан аттаған жастың жүрегіне жақын мамандыққа ер салуы, ертеңгі күнге сеніммен нық қадам басуына да алғышарт болары анық деп айта аламыз. Заманың түлкі болса, тазы боп шалар уақытта өз ойын ашық жеткізе алатын тұлға болып қалыптасуды қазірден бастаған жөн.Алтынай ҚайратқызыСурет: freepik

Мамандық таңдауда нені ескеру керек?

<a href="https://kyzylorda-news.kz/">Kyzylorda-news.kz</a> Қызылорда қаласының жол-көлік инфрақұрылымын дамыту үшін барлығы 6 106,8 миллион теңге бөлінді. Жалпы жоба құны 428,3 миллион теңгені құрайды. Атап айтқанда, «Тәуелсіздікке 25 жыл» даңғылының бойында «Қызылжарма» каналы арқылы өтетін автожол көпір құрылысын салу үшін республикалық және облыстық бюджеттерден 192,8 миллион теңге бөлініп мемлекеттік сатып алу конкурсы нәтижесінде мердігер мекеме «Сервис НС» ЖШС-мен келісім шарт жасалған. Алдағы уақытта, құрылыс-монтаж жұмыстары бастау алады. Сонымен қатар Нұрсұлтан Назарбаев даңғылынан («Сыр самалы» мейрамханасы) Тәуелсіздікке 25 жыл даңғылына дейін жол құрылысын салуға 200 миллион теңге бөлініп, құрылыс жұмыстары жүргізілуде. Жоба құны 570,7 миллион теңге. Ал құрылысқа жауапты «Қыран» ЖШС мердігер мекемесі. Биыл қайта жаңғырту жұмыстары жүргізілетін көшенің бірі – Қожа Ахмет Яссауи көшесі. Аталған көшенің Ә. Бөкейхан көшесінен Әйтеке би көшесіне дейінгі аралығына қайта жаңғырту жұмыстарын жүргізуге 951,4 миллион теңге қаржы бөлінген. Құны 3 миллиард теңге болатын жобаны «Қыран» ЖШС мердігер мекемесі жүзеге асырады. Сондай-ақ, Елеу Көшербаев көшесін (С.Бейбарыс көшесінен бастап Ә.Бөкейхан көшесіне дейін) қайта жаңғырту жобасына 133 миллион теңге қаралып, құрылыс-монтаж жұмыстары қарқынды жүргізілуде. Жоба құны 434,4 миллион теңгені құрайды. Ал құрылысқа жауапты мердігер «УАД» ЖШС мекемесі. Бұдан бөлек, биыл қала аумағындағы ұзындығы 46,1 шақырымды құрайтын жалпы сомасы 4 384,0 миллион теңгеге 35 көшеге орташа жол жөндеу жұмыстары жүргізілетін болады. Оның облыстық бюджеттен бөлінген 137,4 миллион теңгесіне жалпы ұзындығы 3,9 шақырым болатын 15 көшеге қиыршық тас жол құрылысы салынуда. Құрылыс жұмыстарына жауапты &nbsp;«Ақнұр Авто» ЖШС &nbsp;мердігер мекемесі ағымдағы жылдың мамыр айында аяқталады деп жоспарлауда. Биыл сонымен қатар қала көшелеріндегі бұзылған асфальт қабатын қайта қалпына келтіру үшін қалалық бюджеттен 108,2 миллион теңге бөлініп, мердігер мекеме «Құрылыс Бизнес и К» ЖШС-мен шарт жасалған. Қазіргі таңда мердігер мекеме тарапынан ағымдағы жол жөндеу жұмыстары жүргізілуде.

Қызылордада көшелер қайта жаңғыртылмақ

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласы бойынша білім бөлімінің ұйымдастыруымен №176 &nbsp;орта мектепте&nbsp;«Біртұтас тәрбие: Құндылық. Ұлттық тәрбие. Жас ұрпақ» &nbsp;тақырыбында қалалық &nbsp;семинар өтті.Семинарға Қызылорда қаласы бойынша білім бөлімінің бас маманы Самат Күнқожаев пен білім бөлімінің әдіскері Газиз Убаев, қала мектептерінің тәрбие ісі-жөніндегі орынбасарлары қатысты.Семинардың мақсаты – біртұтас тәрбие бағдарламасы негізінде білім алушылардың бойында жалпыадамзаттық және ұлттық құндылықтарды қалыптастыру. Шара барысында «Ұлттық мектеп лигасы» жобасы аясында мектептегі «Асык ату», «Тоғызқұмалақ», «Бес асық» үйірме жұмыстары насихатталып, «Алтын домбыра» үйірмесі домбырашыларының күй күмбірледі.Мұнан соң ұлттық құндылықтарға бағытталған қолөнер, ұлттық тағамдар мен ұлттық, бұйымдардан жасалған көрме таныстырылды. Сонымен қатар, ата-аналарды педагогикалық қолдау орталығының&nbsp;жұмыстары бағытында "Даналық мектеп" &nbsp;жобасы аясында әжелер, әкелер, ата -аналармен шеберлік сағаты, әке мен бала уақыты, ата-аналармен ағартушылық жұмыстар жүргізілді. Қатысушы қонақтар семинар барысы мен ұйымдастырылған іс-шараларға оң бағасын беріп, пікір алмасты.

Қызылорда қаласында ұлттық тәрбие насихатталған семинар өтті

<a href="https://kyzylorda-news.kz/">Kyzylorda-news.kz</a>Жол құрылысында өңірдің тасы өрге домалап тұр. Әсіресе Қызылорда қаласында қызу жұмыс.Соның бірі Елеу Көшербаев атындағы көшеде жөндеу жұмыстары қарқынды жүруде. Оның Бейбарыс Сұлтан көшесінен Ә.Бөкейхан көшесіне дейінгі 2 шақырымы жөнделеді.<blockquote>– Құны 434 миллион теңге болатын құрылыс аясында көше жөнделіп қана қоймайды. Жоба бойынша жаяу жүргіншілер жолын салу, аяқсу арығын қазу және жарық шамдарын орнату қарастырылған. Мердігер мекеме – «УАД» ЖШС, – дейді қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Жеңісбек Файзуллаев.</blockquote>Сондай-ақ «Тәуелсіздікке 25 жыл» даңғылының бойындағы «Қызылжарма» каналы арқылы өтетін автожол көпірі құрылысына республикалық және облыстық бюджеттерден қаржы бөлінген. Алдағы уақытта құрылыс-монтаж жұмыстары басталады. Бұдан бөлек, Нұрсұлтан Назарбаев даңғылынан Тәуелсіздікке 25 жыл даңғылына дейін жол құрылысы, Қожа Ахмет Яссауи көшесін қайта жаңғырту жүргізілуде.<blockquote>– Облыс орталығының жол-көлік инфрақұрылымын дамыту үшін 6 106,8 млн теңге бөлінді. Қалада 46,1 шақырым болатын 35 көшеге орташа жөндеу жүргізілетін болады. Сондай-ақ облыстық бюджеттен бөлінген 137,4 млн теңгеге 15 көшеге қиыршық тас төселеді, – деді бөлім басшысы.</blockquote>&nbsp;

Қала көшелері жөндеуден өтуде

<a href="https://kyzylorda-news.kz/">Kyzylorda-news.kz&nbsp;</a> Қорқыт Ата атындағы Қызылорда университетінде «Іnfogo club» IT ұйымы ашылды. Ұйымның мақсаты – IT саласына қызығушылығы бар жастарды бір алаңға жинау. Жай ғана оқыту емес, теориямен қатар практиканы қолданып, қоғамға маңызы бар жаңа жобаларды іске асыру.Студенттерден құралған командамен таныссақ.Ғұбайдулла Орынбеков – «infogo club» ұйымының төрағасы. Ұйымның барлық бөлімшелері мен мүшелерінің жұмысын үйлестіреді. Клубтың даму стратегиялары мен іс-шаралар жоспарын әзірлейді. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті. Исатай Есмамбетов – «infogo club» ұйымының әзірлеу бөлімнің жетекшісі. Жобаларды сапалы әзірлеу және қоғамға ыңғайлы өнім жасайды. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті.Арман Қуанышбек – "infogo club" ұйымының пиар бөлімнің жетекшісі. Әлеуметтік желілер мен бұқаралық ақпарат құралдарында ұйымның болуында қолдайды. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті.Қайсар Жарылқасын – «infogo club» ұйымының дизайн бөлімінің жетекшісі. Клубтың іс-шараларына және жобаларға дизайн материалдарын жасайды. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті. Даниал Айжарық – «infogo club» ұйымының музыка бөлімнің жетекшісі. Жобаларға авторлық саундтрек жазады, авторлық музыка шығарады. Қорқыт ата атындағы Қызылорда университеті, «Дене шынықтыру және спорт» мамандығының 1-курс студенті.Айта кетейік, студенттердің ұлттық рухты бойына сіңірген, шығармашылық қабілеттері шыңдалған, мақсаты айқын тұлға болып қалыптасуы үшін университетте 24 жастар ұйымы жұмыс істейді. Жалпы университет бойынша 2022-2023 оқу жылында 892 іс-шара ұйымдастырылды. Биылғы оқу жылында да қарқынды жалғасуда.Жоғары оқу орнында түрлі бағытта республикалық, облыстық ауқымды шаралар ұйымдастырылуда. Атап айтсақ, биыл дәстүрлі түрде «Студенттік көктем – 2023» студенттер фестивалі, «Университет аруы – 2023» байқауы, «Маусымашар-2023» жайдарман фестивалі, дебаттық ойындар, айтыс, кездесулер, спартакиадалар, поззия кештері, «Жауқазын» жастар театрының «Қош, махаббат» атты алғашқы &nbsp;қойылымы өтті. Университетте Әлем чемпионатының - 9, Азия чемпионатының – 23, Қазақстан чемпионатының - 125 жеңімпазы мен жүлдегерлері бар.&nbsp;2023 жылғы ЖОО арасындағы жазғы универсиадаға &nbsp;спорттың 16 түрінен 120 білім алушы қатысты. Жалпыкомандалық есепте университет спортшылары 9 орынды иеленіп, 37 медаль (алтын-7, күміс–8, қола-22) қоржынға салды. Қатысушылар университеттің арнайы спорттық киімдерімен толықтай қамтамасыз етілді. Белсенді жастардың шығармашылық ортасын қалыптастыру және олардың бастамасына мемлекеттік қолдау көрсету мақсатында ұйымдастырылған «Тәуелсіздік ұрпақтары» байқауында Қорқыт ата атындағы Қызылорда университетінің студенттері Әділхан Досым мен Тұрсынбай Елдос 600 мың теңге грант жеңіп алды. «Ақиқат» саяси пікірсайыс клубының мүшелері Түркістан қаласында өткен республикалық турнирде жеңімпаз атанды. Республикалық Алматы Ашық лигасының жартылай финалдық сайысында &nbsp;Қорқыт ата атындағы Қызылорда университетінің «Q құрамасы» финалдық ойында үздік өнер көрсетті.&nbsp;

«Іnfogo club» IT ұйымы ашылды

<a href="https://kyzylorda-news.kz/">Kyzylorda-news.kz.</a> Қазақ халқы ықылым заманнан мал шаруашылығының үш түрімен айналысқан. Жылдың төрт мезгілінде көшіп-қонып, табиғаттың икемділігіне қарай бағытталып, қыста қыстауды, жазда жайлауды, күзде күзеуді, көктемде көктеуді мекен еткен. Осылайша кең байтақ дала төсін төрт түлікке толтырып, күнкөріс қамын жасаған. Мал шаруашылығын басты несібем деп санаған қазақтың бұл кәсібі әлі күнге дейін өз маңызын жойған емес.Олай болса «мал жаның аман ба?» дейтін халық жыл сайын төрт түлігін түгендеп, өсім бар-жоғын бағамдаған емес пе? Осы тұста Шиелі ауданындағы мал шаруашылығының жай-күйін зерттедік. Елімізде 180 миллион гектардан астам жайылымдық жерлер барын ескерсек, отандық мал шаруашылығын дамыту да, арзан ет өндіру де өз қолымызда екендігіне көз жеткіземіз. Елімізде өткен жылы ірі қара мал саны – 4,2%, қой – 4,8%, жылқы – 10,5%, түйе – 6,5%, құс – 4% көбейген. Сонымен қатар асыл тұқымды ірі қара малдың үлесі ірі қара мал басына шаққанда 7%-дан 13,5%-ға дейін өскен. Сондай-ақ, селекциялық және асыл тұқымдық жұмыс процесіне және тұқымдық түрлендіруге тартылған фермерлік шаруашылықтардың саны 2022 жылы 6 мың болса, қоян жылында 22 мыңға дейін артқан.&nbsp;Жыл өткен сайын кәсіпкерлердің қарасы көбейіп келеді. Басым бөлігі ауыл шаруашылығы саласында байқалып отыр. 2022 жылы Шиелі ауданында мүйізді ірі қара саны – 89 509 бас, уақ мал саны – 136 320 бас, жылқы – 23 778 бас, түйе – 1 656 бас, құс саны 31 918 бас болса, өткен жылғы жарты жылдық көрсеткішке тоқталар болсақ, мүйізді ірі қара – 93161 мың бас, қой мен ешкі – 145967 бас, түйе – 1705, жылқы – 25465, құс – 30079 басты құраған. Ал ет өнімі – 102,0 пайызға, сүт – 102,3 пайызға артқан.&nbsp;Мал шаруашылығы саласында көрсеткіш жоғары. Үкімет тарапынан қолдау тапқан тиімді бағдарламалар халықтың ата-кәсіппен айналысып күн көруіне, адал еңбекпен нәпақасын табуына үлкен мүмкіндікке жол ашуда. Шежірелі өлкеде ет, сүт бағытында жұмыс істеп жатқан кәсіпкерлер қатары жетерлік. «Ару Ана» шұбат цехы шұбатпен қатар сиыр сүтінен құрт, айран, қаймақ сынды өзіміздің өнімдермен аудан тұрғындарын қамтамасыз етіп отыр. «Ару Ана» шұбат цехы жылына 245 тонна өнім өндірсе, дәл осы бағыттағы «Асылхан» шаруа қожалығының сүт фермасы 200 тоннаны құрап отыр.Шиелі аудандық ауыл шаруашылығы бөлімінің басшысы Мұрат Әшірбеков егін шаруашылығы мен мал шаруашылығында айтарлықтай өсім барын алға тартып:&nbsp;<blockquote>– Төрт түліктің аймаққа етене жақын түрі мүйізді ірі қара мен қой малын өсірушілерге мемлекеттік қолдау кеңейіп, селекциялық асылдандыру жұмысын жүргізуге, ет өндіруге байланысты мемлекеттік субсидия беріліп, мал өсіруге қызығушылық танытқан жандардың қатары жетерлік. Аудан көлемінде мал өсірумен айналысатын шаруашылық құрылымдарының саны да артқан. Бүгінде ірілі ұсақты қожалықтардың саны 700-ге жуықтаған. Қазіргі таңда мал шаруашылығын асылдандыру бағытында бірқатар жұмыстар жүзеге асырылып, асыл тұқымды мүйізді ірі қараның саны 2020 жылы 980 бас болса, үш жылда 1691 басқа, асыл тұқымды қой малының саны – 19 405 бастан үш жылда – 32 516 басқа артып, асыл тұқымды түйе – 330 басқа, асыл тұқымды жылқы – 165 басқа жеткен. Қысқы төрт түлік мал басына қажетті мал азығының жеткілікті қорын дайындау мақсатында 158,4 мың тонна шөп, 32,7 мың тонна сабан, 36,4 мың тонна жем дайындау жоспарланса, бүгінгі күні 148,3 мың тонна шөп, 22,8 мың тонна жем дайындалған. Өткен жылы мал азықтық дақылдарын өндіру бағыты бойынша 1650 гектар күздік бидай, 447 гектар жаздық бидай, 268 гектар жүгері, 3410 гектар жаңа жоңышқа егіліп, 5578 гектар ескі жоңышқа шөбі, 194 гектар мал жемдік асқабақ өсірілуде, – деді.&nbsp;</blockquote>Шынында, "Мал баққанға бітеді" деп бекер айтпаса керек-ті. Төрт түлігін төлдетіп, мал баққанның несібесі зор болмақ. Ата кәсіптің жолын жалғап, ізін басқан жандардың бұл күнде асығы алшысынан түсуде. Қазіргі таңда мемлекет тарапынан жасалып жатқан қолдаулар мен жеңілдетілген несиелердің нәтижесінде кәсіпкерлердің мал шаруашылығына қарқынды бетбұрысы жыл өткен сайын өрісі малға толып келеді. Міне, еңбектенген адамның қашан да ырысы мен берекесі мол екені сөзсіз.

Шиелідегі қожалықтар саны 700-ге жуық

<a href="https://kyzylorda-news.kz/">Kyzylorda-news.kz&nbsp;</a> Музыка саласын жанына серік еткен адам көп. Оны игергісі келетін жанда аз емес. Осы орайда Қазанғап атындағы музыкалық жоғары колледжінің оқытушысы, музыкант, композитор Ғалымжан Сәбитұлы&nbsp;саксофонды үйренгісі келетін өнерсүйер қауым үшін кітап шығаруды жоспарлап отырғанын мәлім етті.&nbsp;Ғалымжан Сәбитұлы обылыстық филармония жанынан құрылған «Сыр самалы» вокалды-аспапты ансамблінің артисі, сондай-ақ көптеген шәкіртке тәлімгерлік етіп отырған білікті мамандардың бірі. «Нағыз музыкант кез келген музыка саласының аспектілерін, жанрын жете білуге міндетті. Ал нағыз дарын иесі кез келген тыңдарманды музыканың құдыретімен жылата да, күлдіре де алады», – деп есептейтейтін ол саксофоннан бөлек өзге де бірнеше аспаптарды ойнай алады. Атап айтсақ, фортепиано, флейта, блокфлейта, кларнет, барабанда, дауылпаз және т.б. аспаптар.&nbsp;Саксофоншы сахнада дуэт болып өнер көрсеткенді ұнатады екен. Оның ойынша бұл өте қызық тәжірибе.<blockquote>– Дуэт жасау өзіндік симфониялық ерекшелікке ие. Туындыны өзге аспаппен көркемдейсің, бұл бір арнаға тоғысқан бірнеше сезімдердің легі ғой. Әріптестеріңмен музыкалық та, достық та қарым-қатынас құрасың. Ия, менің музыкалық серігім бар. Ол өте дарынды скрпикашы Анастасия Мусинова. Одан бөлек басқа да әріптестеріммен дуэт жасап, талай сахнада өнер көрсеттім. Жалпы, дуэт жасау өзіндік симфониялық ерекшелікке ие. Туындыны өзге аспаппен көркемдейсің, бұл бір арнаға тоғысқан бірнеше сезімдердің легі ғой. Әріптестеріңмен музыкалық та, достық та қарым-қатынас құрасың. Сол арқылы жаңа тәжірибе жинақтайсыз. Өзіңе беймәлім жанрды игеруге ұмтыласың, – дейді ол.&nbsp;</blockquote>Әрбір музыкант өнер саласында із қалдырсам деп армандайды. Ғалымжан Серікұлы да өнердегі Батырхан Шөкеновты үлгі тұтып, ел есінде есімінің қалғанын қалайды.&nbsp;<blockquote>– Авторлық туындыларым бар. Кейбірінңің әлі «сиясы» кеппеген. Оларды әлі біраз әрлеп, толық пысықтап болған соң, аймақтағы саксофоншыларға орындатуды осы жылғы жоспарыма енгізіп отырмын. Алла қаласа, саксофон аспабын тез үйренуге көмектесетін кітап жазып, музыка сүйер қауым назарына ұсынуды қалаймын. Бұлда әлі нүктесі қойылмаған мақсаттарымның бірі, – дейді өнер иесі. &nbsp;</blockquote>&nbsp;Нұршат НЫШАНОВА

Қызылордалық саксофоншының кітабы жарыққа шықпақ

<a href="https://kyzylorda-news.kz/">Kyzylorda-news.kz</a> Сыр өңірі Конго-Қырым геморрагиялық қызбасының табиғи ошағында орналасқан. Жыл сайын облыс аумағында спорадикалық жағдайлар тіркеліп отырады. Былтыр &nbsp; Қазалы, Жалағаштан басқа аудандардың барлығында &nbsp;тіркеліп, аймақта эпидемиологиялық ахуал қолайсыз болды. Облыста 48 күдікті науқас тіркеліп, оның 13-нің диагнозы расталған. Мамандардың айтуынша, тұрғындар үшін кенеден келетін қауіп тек көктем-жаз айларында ғана емес, жыл көлемінде сақталуда. &nbsp;Себебі былтыр Конго-Қырым геморрагиялық қызбасына шалдығу жағдайы желтоқсан айында да тіркелген. Бұған ауа райының қолайлы болуы, аурудың табиғатта таратушы көзі – кенелердің белсенділігінің жоғарылығы әсер етті.<blockquote>– Конго-Қырым геморрагиялық қызбасының туындауы осы &nbsp;аурудың табиғаттағы сақтаушы көзі әрі оны таратушы иксод кенелерінің өсіп-жетілу циклына тікелей байланысты. Ауру осы кенелер жаппай табиғатқа шыққан уақыттан тіркеле бастайды. Табиғатта ауру қоздырғышы дала тышқандары, кірпі, торғайлар арқылы сақталады. Олар вирустарды қансорғыш кенелерге, ал кенелер басқа жануарларға немесе адамдарға жұқтырады. Бір ерекшелігі, адам кененің шаққанын сезбейді, себебі кене шаққан кезде қадалған жерін жансыздандыратын сұйықтық бөліп шығарады. Тек 1-3 күннен кейін ғана &nbsp;жабысқан жері қызарып, ауыра бастайды. Сондықтан табиғат аясында немесе егіндікте жүргенде денеде кененің бар-жоғын арагідік тексеріп тұрған жөн. &nbsp;Ең қауіптісі, Конго-Қырым қанды қызбасы ауруы әбден асқынған жағдайда адам организмінде қанның ұю қасиеті төмендеп, денеде бөртпелер, көгерулер пайда болады. Науқастың іш құрылысынан қан кетіп, ауру асқынып, өлім көрсеткіші 30 пайызға дейін, кейде одан жоғары болуы мүмкін. Осыған орай халық арасында бұл ауруды «көкала» деп те атайды, – дейді облыстық санитариялық-эпидемиологиялық бақылау департаменті басшысының орынбасары Әлия Әбдіқайымова. &nbsp; &nbsp;</blockquote>Мамандар табиғатқа шыққанда, малға, үй жануарларына күтім жасағанда, сиыр сауғанда мейлінше ақшыл түсті жабық киім киіп, шалбардың балағын етік немесе шұлық ішіне салып, жеңді түймелеп, кене кірмеу жағдайын жасауды ескертеді. Сонымен қатар мал қырқымы кезінде оған қатысушылар қорғаныш киімдерін киіп жұмыс жасағаны жөн, яғни, ұзын резеңке қолғап, кененің қаны киімге жұқпас үшін алдына резеңке алжапқыш және ұзын қоныш етік кигені дұрыс. Ең дұрысы кене жабыспас үшін арнайы жақпа майлар, аэрозольдер түріндегі үркіткіш заттарды (репелленттер) пайдалану қажеттігін айтады.Ғылыми зерттеулерге сүйенсек, кене адамға жабысуы үшін 2 сағаттай уақыт кетеді. Ол адамның кез келген жеріне жабыспайды, &nbsp;терісі жұқа, қан тамырлары жоғары орналасқан дененің жұмсақ жерлеріне, яғни адамның бас терісі (балалар арасында 68-70 пайызға дейін бас терісіне жабысады), құлақтың арты, қолтық, шап, дененің басқа да бүгілетін орындары (шынтақ, тізенің асты, саусақтың арасы). Адамның іші – кененің көп жабысатын орны. Сондықтан кененің бар-жоғын тексерген уақытта осыны ескеріп, далалық жұмыстан кейін киімді қағып-сілкіп, міндетті түрде ауыстыру қажет.<blockquote>– Кене шаққан жағдайда оны алып тастау үшін пинцетпен мүмкіндігінше тұмсығына жақын &nbsp;жайлап қысып, тартып алу керек. Пинцет болмаған жағдайда &nbsp;тігін тігетін жіптен тұзақ жасап, жайлап ырғап алуға болады. &nbsp;Шаққан орнын 70 пайыздық спирт ерітіндісі немесе йодтың 5 пайызды спиртті ерітіндісімен залалсыздандырады. Шаққан жағдайда міндетті түрде жергілікті медициналық мекемеге қаралып, 14 күнге диспансерлік бақылауға алынады. Жергілікті медицина қызметкері кене шаққан адамның таңертең және кешке дене қызуын өлшеп, жағдайын бақылайды. Дене қызуы көтерілсе немесе басқа да белгілер анықталса, дәрігер-инфекционисттің кеңесін алуға жолданады. Осы арқылы ауруды ерте анықтап, дер кезінде көмек көрсетуге, өлімнің алдын алуға болады. Осы ретте айта кету керек, көктемде, күзде алдымен мал қораларды көңнен, қоқыстардан тазартып, кенеге қарсы өңдеу жұмыстарын содан кейін жүргізу қажет. Себебі, көп жылдан бері қи, көң жиналған орындар, күл-қоқыс &nbsp;аналық кенелер үшін жұмыртқа тастауға өте қолайлы. Бір аналық кене 800-ден 10 мыңға дейін жұмыртқа тастайды және ауру қоздырғышы вирусты тікелей жұмыртқа арқылы 100 пайыз өз ұрпағына &nbsp;береді. Сол себепті жұмыртқадан жаңадан өрген кенелер түгелдей осы ауруды денесінде сақтаушы әрі тасымалдаушы, яғни жаңадан аурудың табиғи ошағы пайда болады. Сондықтан залалсыздандыру жұмыстары қоражайлар тазартылғанан кейін жүргізілсе, тиімділігі арта түседі, – дейді Әлия Мүтәліпқызы.</blockquote>Биыл облыс бойынша 115 елді мекен қолайсыз деп есепке алынды. Қолайсыз &nbsp;аумақтарда залалсыздандыру жұмыстарының көктемгі кезеңі сәуір айында басталады деп жоспарланған. Өңдеу жұмыстары облыстың оңтүстік аймақтарынан бастап жүргізіледі. Осыған орай сала мамандары тұрғындарға мал қораларға механикалық тазалау жұмыстарын жүргізуді сұрайды.Жалпы аса қауіпті аурудың эпидемиологиялық ахуалы күрделенбес үшін жұмыс жүйелі жүргізіледі. Мәселен, ақпан айында Конго-Қырым геморрагиялық қызбасының алдын алудың санитариялық-профилактикалық іс-шараларын ұйымдастыру бойынша облыс әкімінің қаулысы қабылданды. Соған сәйкес кенеге қарсы жұмыстардың сапасы мен тиімділігін бақылайтын арнайы жұмыс топтары құрылып, 115 қолайсыз елді мекен тізбесі бекітілді. Аралда 11, Қазалы мен Қармақшыда 16-дан, Жалағаш пен Сырдарияда 11-ден, Жаңақорғанда 18, Шиеліде 20, Қызылорда қаласында &nbsp;12 елді мекен есепке алынған.Конго-Қырым геморрагиялық қызбасына қарсы күрес шараларының бірі – жоғарыда айтып өткендей, кенеге қарсы залалсыздандыру жұмыстары. Жыл сайын барлық қолайсыз елді мекендерде кенеге қарсы өңдеу шаралары екі кезеңмен жүзеге асырылады.Кененің белсенділігі көктем келісімен басталады. Сондықтан тұрғындар арасында, әсіресе, далалық аймақта жұмыс істейтін, мал және егін шаруашылығымен айналысатын адамдар үшін қауіп арта түседі. Жыл басынан бері 7 адам &nbsp;кене шағу жағдайымен медициналық көмекке жүгінген. Бүгінгі күні облыста аса қауіпті ауруға қарсы күрес жұмыстарына қорғаныс құрал-жабдықтар қоры жеткілікті.Облыстық санитариялық-эпидемиологиялық бақылау департаменті тұрғындардан мал және ауыл шаруашылығымен айналысқанда арнайы киімдермен, қолғаппен жұмыс жасауды, табиғат аясына демалысқа шыққанда кенеден қорғайтын арнайы репеллентерді пайдалануды, ақ түсті киім киіп, сақтық шараларын жауапкершілікпен орындауды сұрайды. Сондай-ақ ауру белгілері анықталған бойда жедел медициналық көмекке жүгінуге кеңес береді. Ем-шараны дер кезінде қабылдаған жағдайда аса қауіпті аурудан толық сауығып шығуға болады. &nbsp;Фото: freepik

Конго-Қырым геморрагиялық қызбасына қатысты түсіндірме жұмыстары жүргізілуде

<a href="https://kyzylorda-news.kz/">Kyzylorda-news.kz</a> Тасқын суға төтеп беру үшін адам күші бірінші кезекте керек. &nbsp;Қазір еліміздің барлық өңірінен құтқарушылар су басқан аймақтарға жұмылдырылуда. Төтенше жағдай болған күні Сырдың сарбаздары алғашқылардың бірі болып аттанды.Наурыздың 26-сы күні авариялық-құтқару жұмыстарын жүргізуге қосалқы күш ретінде Қостанай облысына Қызылорда облысы ТЖД күш-құралдары жіберілді, 31 адамнан тұратын құтқару жасағын Қызылорда облыстық ТЖД төтенше жағдайларды жою басқармасының бастығы, азаматтық қорғау подполковнигі Жандос Досымов бастап барды. Олар өздерімен бірге 6 техника, 10 мотопомпа, 2 қайықты алып Қостанайға жол тартты. 27 наурызда олар Қостанай облысындағы Аманкелді ауданына жетті. Міне, сол сәттен бері ағысқа тосқауыл болып, тоқтаусыз жұмыс істеп жатқанына бүгін 23-күн. Осынша уақыт отбасынан жырақ жүріп, қиын шақта көмек берген төтеншеліктердің еңбегі расымен, ерлікпен тең.<blockquote>– 27 наурыздан 31 наурызға дейін құтқарушылар Қостанай облысы Аманкелді ауданы Аманкелді ауылы Абай, Таңатхан палуан, Боданов және Дүйсенбин көшесінде орналасқан тұрғын үйлердің ауласынан су тартып, су деңгейі 25-30 см-ге төмен түсті. Ауыл маңында орналасқан фазендалардан жедел құтқару жасағы құтқарушыларының күшімен моторлы қайықпен 26 адам, оның ішінде 2 бала қауіпсіз жерге шығарылды. «Дәулет» шаруа қожалығынан 110 бас асылтұқымды бұзау қауіпсіз жерге көшірілді. Жалдама өзеніндегі су деңгейінің көтерілуіне байланысты «Кемер-2» ауылын су басу қаупі төнгендіктен, өзеннің жиегін нығайтуға 500 қап топырақ қапталып, тасымалданды. Сонымен қатар, электр жүйесінің қызметкерлерімен бірге су тасқынынан зақымдалған және құлаған бағаналарды қалпына келтіру жұмыстары жүргізілді, – деді Ж.Досымов.</blockquote>Сәуірдің 1-де Қостанай облысы Аманкелді ауданы Байғабыл ауылдық округі Алтыбас учаскесіндегі «Мирас» және «Нар тәуекел» шаруа қожалығына азық-түлік, дәрі-дәрмек жеткізілді. «Бекболат» шаруа қожалығынан 2 адам эвакуацияланды. Осы ауданның төтенше жағдайлар бөлімі және Қызылорда облыстық ТЖД жедел құтқару жасағының &nbsp;қызметкерлері бірлесіп жұмыс жасады. Сол күні Айтбай ауылы Талқанбай учаскесінде қызылордалық құтқарушылар &nbsp;тасқынмен тынбастан арпалысты, 2 адамды қауіпсіз жерге көшірді. Сол жерде қалған 1 адамға гуманитарлық көмек көрсетіп, азық-түлік пен дәрі-дәрмек жеткізілді. «Сәт-2» ауылынан «Бес тарау» шаруа қожалығына да азық-түлік пен дәрі-дәрмек апарды.&nbsp;Бүгінге дейін Қостанайдың Аманкелді, Қарасу аудандарынан 57 адам, оның ішінде 18 &nbsp;бала қауіпсіз жерге көшірілді. 1400 қап құмнан дамбы жасалып, су тартылды.Сәуірдің 2-сі күні Қызылорда облысы ТЖД Төтенше жағдайлардың алдын алу бөлімінің бастығы Бейбітхан Спанов екінші топты бастап Ақтөбе облысына көмекке барды. &nbsp;Олар Әйтеке би ауданы Әйке елді мекеніндегі Тереңсай плотинасынан аққан судан қорғау үшін ауыл тұрғындарын көшіру жұмыстарын бастап кетті. Ауылда төсек тартып жатқан науқасты зембілмен көтеріп, қайықпен құрғақ аумаққа жеткізіп, медициналық жедел жәрдем мамандарына тапсырды. Халықты эвакуациялау кезінде 83-ке келген науқас кісіні, &nbsp;101-ге келген кейуананы немерелерімен бірге құтқарды. Ғасыр жасаған әже ақ батасын берді.Күні бүгінге дейін Ақтөбе облысындағы қызылордалық құтқарушылар 388 адам, оның ішінде 73 баланы эвакуациялады. Сонымен бірге 1057 адам, оның ішінде 167 бала тасымалданды. Қайықпен 750 адам, оның ішінде 75 бала, «КамАЗбен» 301 адам, оның ішінде 72 бала құтқарылды. Батпаққа батқан 3 техника шығарылып, 10 тонна гуманитарлық зат тасымалданды. Ақтөбеге аттанған екінші топ 7 сәуірде Қостанайға жол тартты.&nbsp;Құтқарушылар жасағынан құралған үшінші топты төтенше жағдайларды жою басқармасының бас маманы, азаматтық қорғау капитаны Қадыржан Базарбек бастап Батыс Қазақстан облысына жолға шықты. Әскери бөлімдер қызметкерлерімен бірге Курени ауданындағы Жайық жағасында қорғаныш бөгетін бекітті, 2500 қапқа құм толтырылып, бөгет жасалды. Сондай-ақ Орал қаласындағы «Коминтерн» учаскесінде қорғаныш бөгетін жасау үшін &nbsp;8000 дана қапқа құм толтырды.Қызылордалық құтқарушылардың екі тобы аталған учаскеден қорғаныш бөгетін нықтады. Ақсай көшесінің тұрғыны Надежда Молоткова оларға алғыс білдірді.Техника жеткізілді«Жұмыла көтерген жүк жеңіл» демекші, қол көмектен бөлек Сыр өңірі арнайы техникамен де жәрдемдесті. Су тасқыны болған аймақтарға көмекке 135 техника жіберілді. Сондай-ақ Батыс Қазақстан облысына көмекке 106 арнайы техника жолға шықты.Шиелі ауданындағы «КАР Logistics» ЖШС-ның «Шиелі-Сұңқар» филиалы, «РУ-6», «ТТК-Шиелі» «Волковгеология ГРЭ-23», «Уранэнерго» мекемелерінің ұжымы еліміздің зардап шеккен өңірлеріне қаржылай және техникамен көмек көрсету жұмыстарын ұйымдастырды. Қызылорда ТЖД құтқарушыларымен бірге Апаттар медицинасы орталығы облыстық филиалының 3 &nbsp;қызметкері Орал &nbsp;қаласына аттанды. Дәрігер Қалтай Әбсадықовтың айтуынша, олар осы күнге дейін &nbsp;эвакуацияланған жергілікті тұрғындарға алғашқы медициналық көмек көрсетіп, дәрі-дәрмекпен қамтамасыз етуде. Дәрігерлер жергілікті тұрғындардың денсаулығын қадағалап отыр.Гуманитарлық көмек жалғасудаҚызылордалықтар су тасқыны болған аймақтарға жәрдемдесуге жаппай жұмылуда. «Күшіміз – бірлікте» акциясына облыстың жанашыр азаматтары мен волонтерлер өз үлесін қосты.Сондай-ақ аймақтағы ірі мұнай компанияларының бірі – «Торғай Петролеум» акционерлік қоғамы Атырау, Ақтөбе, Қостанай, Батыс және Солтүстік Қазақстан облыстарына 50 млн теңгенің 120 тонна қайырымдылық көмегін жіберді. Жиырма тонналық 10 жүк көлігіне азық-түлік, газ плиталары, қайықтар мен құрал-саймандар, төсек жабдықтар, ыдыс-аяқ, гигиеналық заттар мен дәрі-дәрмек тиелді.Тасқын судан зардап шеккендерге көмек көрсетуден жергілікті компаниялар да қалыс қалған жоқ. Қайырымдылық керуенін және еріктілерді айтыскер ақын, Н.Бекежанов атындағы қазақ музыкалық академиялық драма театрының директоры Мұхтар Ниязов бастап барды. Оның бастамасымен өнер адамдары, мәслихат депутаттары 3 млн теңге қаржы жинап, көмек берді.Ақтөбе қаласы мен аталған облыстың Қобда ауданына 25 жүк көлігімен 83 млн теңгенің 112 тонна азық-түлік, көрпе-төсек, гигиеналық құралдар, дәрі-дәрмек, құрылыс заттары, 50 млн теңгенің 20 тонна жем-шөбі жеткізілді. &nbsp;Ақтөбе облысында ашылған есепшоттарға 2,5 млн теңге қаржы аударылды. Тасқыннан зардап шеккен басқа өңірлерге де гуманитарлық көмек көрсету үшін «Жастар орталықтары», сауда үйлері мен базарларда ашылған пункттерде әлі де гуманитарлық көмек жиналуда.Оралдық оқушылар орналастырылдыАрал аудандық білім бөлімі Қазалыдағы теміржол бекетінен Батыс Қазақстан облысындағы су тасқынынан зардап шеккен 103 баланы қарсы алып, (5-9 сынып оқушылары) &nbsp;«Қамбаш» балаларды сауықтыру орталығына орналастырды.Оралдық балалар 10 күн бойы аталған орталықта білім мен тәрбие ғана алып қоймай, түрлі мәдени-сауықтыру шараларына қатысады. Сондай-ақ ауданның тарихи-мәдени орындарына &nbsp;экскурсия жасайды.Мекемеде балаларға барлық қажетті жағдайлар жасалып, офлайн оқу процесі, сонымен қатар балалардың бос уақытын тиімді пайдалану мақсатында түрлі спорттық, шығармашылық іс-шаралар ұйымдастырылмақ. &nbsp;

Қазақстан және Қызылорда облысының жаңалықтары