<a href="https://kyzylorda-news.kz/">Kyzylorda-news.kz.</a> Барша мұсылмандар үшін қасиетті саналатын Құрбан айт мерекесі 28-30 маусым аралығында өткізіледі. Осы ретте, жергілікті атқарушы органдардың ұйымдастыруымен облыстағы аз қамтылған және әлеуметтік жағдайы төмен отбасылардың тізімі әзірленіп, мұқтаж жандарға қайырымдылық шаралары көрсетілетін болады. Бұл туралы Өңірлік коммуникациялар қызметінің ақпарат алаңында өткен брифингте облыстық дін істері басқармасының басшысы Бауыржан Қамзаев хабарлады.<blockquote>«Құрбан айт мерекесі – күллі мұсылмандар үшін ізгілікке арқау болатын қасиетті мейрам. Бұл күндері құрбандық шалуға ниетті жандар үшін оффлайн және онлайн формат ұсынылатын болады. Яғни, онлайн құрбан шалу үшін тұрғындар www.qurban2023.kz сайтына жүгіне отырып, өтініш бере алады. Сонымен қатар қасиетті мерекеде қайырымдылық шараларын кең көлемде жүргізу үшін демеушілермен бірлесіп, арнайы іс-шаралар ұйымдастырылады. Өздеріңіз білетіндей, Құрбан айт мерекесі қарсаңында төрт-түлікке сұраныс артады. Осыған байланысты мал бағасын ретсіз көтермеуге ұсыныстар берілуде. Бұдан бөлек, құрбан шалу орындарында санитарлық талаптарды сақтау бойынша арнайы ережелер бекітілді», - деді басқарма басшысы Бауыржан Қамзаев.&nbsp;</blockquote>Брифинг барысында ҚМДБ-ның Қызылорда облысы бойынша өкілі, «Ақмешіт-Сырдария» орталық мешітінің Бас имамы Болатбек Абуов Құрбан айтта шалынатын мал түрлері мен негізгі жасалатын амалдарды баяндап берді.&nbsp;<blockquote>«Өңірімізде Айт намазын оқу уақыты таңғы 06:00 болып бекітілді. Дәстүр бойынша Қызылорда қаласында өтетін діни рәсімдер мешіттерде емес, арнайы жасақталған «Нұрболат» және «КЗО ЕТ» қасапханаларында жүзеге асырылады. Құрбан еттері арнайы даярланған тізім бойынша мешіт еріктілерінің көмегімен мұқтаж отбасыларына үлестіріліп беріледі. Аудан орталықтарында да арнайы мал сою орындары дайындалуда. Ұлық мейрамның құрметіне орай, облыстық, қалалық, аудандық мешіттер жанынан киіз үйлер тігіліп, ұлттық дәстүрімізге сай думанды шаралар мен ұлттық ойындар, қайырымдылық акцияларын өткізу жоспарланып отыр. Жалпы құрбандыққа шалынатын мал түрлері бойынша айтатын болсам, түйе – 5 жастан, сиыр – 2 жастан, қой және ешкі – 1 жастан асу керек. Баршаңызды Қасиетті Құрбан айт мерекесімен құттықтаймын», - деді Болатбек Ұласқанұлы.&nbsp;</blockquote>

Қасиетті Құрбан айт мерекесі 28 маусымда басталады

<a href="https://kyzylorda-news.kz/">Kyzylorda-news.kz.</a> Бала би ауылында ардагер ұстаз, 27 жыл бойы ауыл мектебін басқарған арда азамат Асанбек Бәкірұлының 90 жылдығына орай «Ізің қалды мәңгілік жадымызда» атты еске алу іс-шара өтті.Есімі аймаққа тараған, КСРО халық ағарту және Қазақ ССР халық ағарту ісінің озаты, «Еңбек Қызыл Ту» орденінің иегері болған Асанбек Бәкірұлын еске алуға арналған &nbsp;кешке, аудандық ардагерлер кеңесінің төрағасы Ө.Исмаил, аудандық әйелдер кеңесінің төрайымы Н.Палымбетова, аудандық білім бөлімінің басшысы Ж.Баймұратова, ауыл әкімі Х.Тәжиев, мектеп директоры А.Болатбекова қатысты.Шара ардагер ұстазға арналған «Құрмет қабырғасының» таныстырылымымен басталып, мұнан соң қатысушыларға Асанбек Бәкірұлы атына берілген химия кабинеті таныстырылды. Таныстыру барысында қонақтарға мектеп оқушылары ойлап тапқан бор, желім, иіс сабын, майлы сабын, сұйық сабын, адыраспан, емдік тұнбалар сынды өнімдері көрсетілді.Содан соң іс-шара әдеби-сазды еске алу кешіне ұласып, әдеби кештің шымылдығы Талғат Күзембаевтың арнауымен ашылды. Кеш барысында ел ағалары Асанбек ұстаздың жүріп өткен жолы жайлы тебірене еске алды. Ол кісінің кішкентай болса да жүрегінің кеңдігі, қарапайымдылығы, әділдігі мен қызметіне адалдығы да сөз болды.Ардагер ұстазды еске алуға арналған шаралар мұнымен шектеліп қалмады. Әдеби-сазды кеш волейбол спортынан ауылішілік турнирге ұласып, ала доп бәсекесіне бес бірдей команда қатысты. Нәтижесінде тартысты өткен турнирде I орынды «Бала би жастары» командасы жеңіп алса, II орынды «Мектеп мұғалімдері» командасы еншіледі. Мұнан бөлек, үздік ойыншы, үздік қорғаушы, үздік шабуылшы атанған ойыншыларға да ақшалай сыйлықтар берілді.Жалпы ардагер ұстаз Асанбек Бәкірұлын еске алуға арналған іс-шаралар осылай қорытындыланды. Бұл шаралардың көмегімен ұстаздың ел үшін жасаған еңбегі халық жадында жаңғырып, болашақ ұрпақ арда азаматтың жасаған істерін ұғынады деген сенімдеміз.

Шиеліде ұстаз есімі ұлықталды

<a href="https://kyzylorda-news.kz/">Kyzylorda-news.kz.</a> Жуырда аудандық ардагерлер үйінде қоғамдық кеңестің кезекті отырысы өтті. Жиынға аудандық қоғамдық кеңес төрағасы Қ.Бекішев, кеңес мүшелері мен аудандық кәсіпкерлік, өнеркәсіп және туризм бөлімінің басшысы Б.Әбсадық, аудандық тұрғын үй коммуналдық шаруашылық жолаушылар көлігі және автомобиль жолдары бөлімінің басшысы Ғ.Аманжолов, Бәйтерек ауылдық округінің әкімі Ж.Ақбергенов, сондай-ақ Бестам ауылдық округі жергілікті қауымдастығының төрағасы К.Қыпшақбайұлы мен бірқатар сала мамандары қатысты.Шиеліде ауқымды мәселелер жоқ емес. Ал сондай түйіткілді түртіп алып, саланың жұмысын саралап, кем-кетігін назарға алып, атқарылған істің бағасын беретін аудандық қоғамдық кеңес жыл сайынғы үрдісінен жаңылған емес. Бұл жолғы отырыс бұрынғыдан өзгерек. Себебі кезекті келелі жиында Бестам -ауылында шешімін таппай жүрген өзекті мәселелер мен алдағы уақытта іске асатын жұмыстардың барысы сөз болды.Ауыл халқының көкейінде жүрген мәнді де мағыналы сұрақтарды, сонымен қатар шешімін таппаған мәселелерді анықтап, оны шешу мақсатында ұйымдастырылған шарада қауымдастық тарапынан бірнеше сауалдар жолданды. Яғни бірқатар өткір де өзекті мәселелер таразыға түсіп, пікір білдіріліп, кейбір мәселелер бойынша ұсыныстар да айтылды. Ал жиынға келген баяндамашылар өз кезектері бойынша күн тәртібінде тұрған мәселелер бойынша кеңес мүшелеріне ақпарат беріп, баяндама жасады. Нақтырақ айтар болсақ, олар ауылдық округте атқарылып жатқан жұмыстардың легін толықтай тарқатты. Бұдан бөлек аудандағы бөлшек салығының арнаулы салық режимін қолдану кезінде салық мөлшерлемесінің мөлшерін төмендету, сондай-ақ тұрғын-үй коммуналдық шаруашылық жолаушылар көлігі және автомобиль жолдары бөлімінде көрсетілген мемлекеттік қызметтердің бірқатар мәселесін шешу, Бидайкөл ауылындағы жаңа кварталдарға соғыс және еңбек ардагерлерінің есімдерін беру жайлы ұсыныстарын айтып, баяндама оқыды.Жиынды мұнан әрі Бестам ауылдық округі жергілікті қауымдастығының төрағасы К.Қыпшақбайұлы өз баяндамасымен жалғастырды. Ол ең бірінші Бестам ауылында дәл қазіргі уақытта 345 отбасы, 2056 тұрғынның есепте тұратынын айтты. Ауыл бойынша 1 дәрігерлік емхана. 300 орындықтан тұратын бір орта мектеп, сондай-ақ ауылдық клуб үйі, 9781 кітап қоры бар кітапхана, 242 сандық телефон жүйесі, сонымен қатар 10 шаруа қожалығы, 10 сауда орны мен 4 газель көлігінің ауыл игілігі үшін жұмыс істеп тұрғанын тілге тиек етті. Оған қоса қоғамдық жұмыстарды атқару үшін ауыл тұрғындары арасынан 14 адамнан құралған мүшелері сайланғанын жеткізді. К.Қыпшақбайұлының айтуы бойынша өткен жыл мен ағымдағы жылдағы бес айда ауылдық округтің әлеуметтік-экономикалық жағдайын жақсарту мақсатында ауыл әкімі мен қоғамдық ұйымдар бірлесіп бірқатар жұмыстар жүргізілген. Нақтырақ айтқанда, 4 рет санитарлық, тазалық, көркейту көгалдандыру жұмыстары жүргізілген. Сондай-ақ 1,5 км жер қазылып, тазаланған. Ауылдың шеткі көшелеріне аяқ су апару мақсатында ауылды айналдыра 2,5 км жерге су алатын кең арық қазылған. «Ауыл – ел бесігі» бағдарламасы бойынша ауыл тұрғындарының игілігі үшін 109 млн 200 мың теңге қаржыға Әбілаш Әбуов, Мұхтар Әуезов, Ыбырай Алтынсарин, Абай Құнанбаев, Сайыпназар Төлебаев, Абай тұйығы және де Тәуелсіздік көшелеріне қауымдастық орташа жөндеу жұмыстары жүргізген. Ең бастысы – ауыл тұрғындарының сұрауымен барлық көшелерге жарық шамдары орнатылған. Апатты жағдайда тұрған клуб үйінің жоба сметалық құжаты әзірленіп, облыстық құрылыс басқармасына толықтай өткізілген. Жуырда аталған жұмыс жоспары толықтай қолға алынып, 150 орындық су жаңа клуб үйінің құрылыс жұмыстары басталмақ.Иә, жоғарыда тек Бестам ауылында жүргізілген жұмыстың барысы мен атқарылған ауқымды істер ғана айтылды. Дегенмен, бұл – ауылда ешқандай мәселенің жоқтығын білдірмейді. Қоғамдық кеңес отырысында бірқатар өзекті тақырыптар да сөз болды. Солардың бірі – Бестам ауылындағы электр энергиясы сапасының төмендігі. Ауыл халқы трансформаторлардың және электр желілерінің тозығы жеткендігіне наразы. Олар тез арада елді мекенге трансформатор орнатып, электр желілерін ауыстыру керек дейді. Бестамдағы бірқатар мәселелер мұнымен аяқталса жақсы. Аяқ судың тапшылығы да бүгінде шаруаның ширауына тұсау болып отырған көрінеді. Ал ауыл жұрты су тапшылығын болдырмау мақсатында арнайы айдау насостарының қажет екенін де жасырмады. Мұнымен қоса жаңа дәрігерлік амбулаторияның салыну керектігі де жиында айтылды. Ал бұл сауалға сала мамандары жауап беріп, құрылыс ғимаратының орны белгіленгені, сондай-ақ құжаттарының рәсімделіп жатқанын айтып, қуанышты жаңалықты хабарлады. Оған қоса ауылда аялдамалардың жоқтығы да – өзекті мәселенің біріне айналып отырған көрінеді. Дегенмен дәл қазіргі уақытта елді мекенде 4 аялдама орнату, мектепке дейінгі 900 метр жерге жаяу жүргіншілер жолын салу және де ауылдың кіре берісі мен шыға беріс жерлеріне бейнебақылау камераларын орнатуға жоба-сметалық құжаттары әзірленіп, тиісті мекемеге жолданғандығында жиын барысында білдік.

Шиеліде қоғамдық кеңес отырысы өтті

<a href="https://kyzylorda-news.kz/">Kyzylorda-news.kz.</a> Кейінгі жылдары Шиелі ауданы айтарлықтай дамып, алға басты. Бұл дер кезінде дұрыс шешім қабылдап, оңтайлы өзгерістерге айтарлықтай жол ашқандықтың белгісі. Өңір аграрлық шаруашылыққа бейіл болғандықтан көптеген іс-шараларды заман талабына сай қайта құрып, аса зор жауапкершілікпен атқаруда. Осы тұста сан салаға басшылық етіп, ауданның әлеуметтік-экономикалық дамуына сүбелі үлес қосып, аянбай тер төгіп жүрген аудан әкімінің орынбасары Ерсұлтан Амантайұлымен сұхбатты назарларыңызға ұсынамыз.– Ерсұлтан Амантайұлы, қыстай сайманын дайындап шыққан диқан қауымы көктемгі дала жұмыстарын қарқынды түрде жүргізді. Ендігі шаруа қожалықтар күрішті қанша процентке толықтай суға бастырып үлгерді? Алдағы уақытта қаншалықты су тапшылығының орын алу қаупі бар ма? Әзірлік қалай?– Иә, аудан бойынша егін егу науқаны да аяқталды. Биыл жоспарға сәйкес 30 мыңның үстінде егін орналастырылды. Атап айтсақ, күздік бидай 1 650, жаздық бидай 447, тары 240, дән жүгері 173, мақсары 1 288, соя 10, жаңа жоңышқа 3 410, ескі жоңышқа 5 578, мал жемдік асқабақ 194, жемдік жүгері 95 гектарға сондай-ақ, картоп 1 200, көкөнiс 1 805 және 2 400 гектарға бақша дақылдары егіліп, негізгі дақыл күріштің үлесі – 13 189 гектарды құрады. Бүгінгі таңда толық суға бастырылды. Су тапшылығын болдырмау мақсатында, «Шиелісушар» өндірістік учаскесі теңгерімдегі, «0-2» шаруашылық аралық каналының 2 шақырымына, «Р-8» каналының 3,6 шақырымына, «Ескі сол жаға» каналының сағасына және «Жаңа Бестам» каналының 3 шақырымына және «Жаңа Сұлутөбе» каналының 5 шақырымына «Қазсушар» ШЖҚ РМК-ның Қызылорда филиалының тарапынан механикалық тазалау жұмыстары жүргізілді. Аталған каналдардың қайыр басқан жерлері толықтай тазаланып үлгерді.Сонымен қатар, Еңбекші ауылдық округі, Қосүйеңкі елді мекенін аяқ сумен қамтамасыз ету мақсатында 2022 жылы 2-2-2 каналына жоба-сметалық құжаттамалары әзірленіп, Қызылорда облысының табиғи ресурстар және табиғат пайдалануды реттеу басқармасының шаруашылық жүргізу құқығындағы «Табиғат» мекемесі тарапынан 92 млн теңге қаржы бөлініп, 23 шақырымына механикалық тазалау жұмыстары жүргізілді. Сонымен бірге шаруашылықтар су үнемдеу мақсатында қашыртқы сулары қайта пайдаланылуда. Қазіргі таңда ауданның 3 ауылдық округтердегі су жетіспеушілігі орын алған күріш алқаптарына шаруашылық құрылымдары 4 дана су насостарын қашыртқыларға орналастырған.&nbsp;Сондай-ақ, ауданда 43 дана насос қондырғылары бар, оның 21 данасы облыстық табиғи ресурстар және табиғат пайдалануды реттеу басқармасы арқылы, 10 данасы «Қазсушар» РМК филиалы арқылы алынса, қалған 12 данасы шаруашылақтардың өз есебіндегі насостар.– «Газеттің өткен санында су шаруашылығына қатысты мақала жазған болатынбыз. «Шиелісушар» мекемесі қызметкерлерінің болжамы бойынша маусым айының онкүндігі мен шілде айының онкүндігі аралығында су тапшылығы орын алуы мүмкін деген болжам айтты. Осыған не дейсіз?– Жоғарыда айтып өткендей, су тапшылығы кезеңінде шаруашылық құрылымдары ауыл әкімшілігі, су шаруашылығы мекемесі және өз тараптарынан алынған насос қондырғыларын орнатқан. Су тапшылығы сезілетін жерлердің барлығы қазіргі таңда насос қондырғылары арқылы суарылып жатыр. Сондай-ақ, шаруалар аз суды ысырапсыз пайдаланып, үнемдеу мақсатында қаршыртқы суларын қайта пайдалануда. Каналдардағы суды кезекке қоя отырып, су тапшылығынан шығамыз деп болжап отырмыз.Сырдария өзенінің төменгі ағысынан қазірде 550 текше метр су өтуде. Су мамандарының болжамы бойынша осы онкүндікте алынатын 58,5 текше метр су толығымен алынып, шаруашылық құрылымдарына шаруашылықаралық 0-2, Р-12, Р-7 және Қамыстықақ каналдары арқылы тиісті су бөлініп берілуде.– Биыл мемлекет тарапынан арзандатылған жағар-жанармайдың литірлік бағасы – 212 теңге болып бекітілді. Мемлекет тарапынан бөлінген жанар-жағармай егін жинап алғанша жетеді ме?– Шиелі ауданы бойынша көктемгі егінге мемлекет тарапынан 1696,2 тонна арзандатылған дизель отыны бөлінген болатын. 1 литр дизель отынының бағасы 212 теңгеден босатылды. Ауданның 126 шаруа қожалығы «РК-Мұнай» ЖШС-нен өз өтініштері аясында алынған дизель отыны көктемгі егін науқанына толықтай жетіп, күзгі егін жинау жұмыстарына өздеріне қажеттісін электронды түрде «Гос агро» порталы арқылы өз өтініштерін жолдады. Бұл жұмыстар күнделікті бақылауда және дизель отыны жетіспеушілігі байқалған жағдайда алдын ала хабарланып, қосымша дизель отынымен қамтамасыз етілуі бағытында шаралар қабылданатын болады.– Алдағы жұмысыңызға сәттіліктер тілейміз!

Ерсұлтан Әпетов: Салада серпін бар

<a href="https://kyzylorda-news.kz/">Kyzylorda-news.kz.</a> Шиелі тек дарындыларды туады десек, артық айтпағанымыз болар. Оған дәлел – жыл сайын аудан өнерпаздарының өңірлік, облыстық, тіпті республикалық байқаулардан бәйге алып, алдыңғы қатардан көрініп жүргені. Ал ауданда кез келген сайыста сыннан сүрінбей, мықтылығын дәлелдеп мүдірмей келе жатқан жасөспірімдер жетерлік. Солардың бірі – «Қазақстан дауысы. Балалар» мегажобасына қатысып, финалға одан әрі «Жекпе-жек» кезеңіне өткен талантты өнерпаз Айқын Ерболатұлы. Жуырда ғана Айқынды аудан әкімі Нұржан Ахатовтың өзі жеке қабылдап, кішкентай өнерпазға сәттілік тіледі.Өткен аптаның жұмасында жас жұлдыз өңір басшысы Нұржан Сәбитұлының қабылдауында болды. Ең әуелі аудан әкімі жобаның ақтық кезеңіне өткен бүлдіршінге сәттілік тілеп, байқауда барынша мықты болуға күш берді. Сонымен қатар «Нартай өнер мектебінің» мақтаулы оқушысы атанған Айқынның ұстаздары мен оның ата-анасына алғыс білдіріп, аудан әкімдігі әрдайым жас өнерпазға жан-жақты қолдау беруге дайын екенін жеткізді. Аудан басшысы барша халықты көмейіне жыр тұнған, жеңіске ұмтылған халықтың ұлына алдағы тікелей эфирде дауыс беріп, барынша қолдауға шақырды.Иә, күллі Қазақстан көз тіккен еліміздегі дарынды жастардың басын қосқан ауқымды жобаға тек мықтылардың ғана қатыса алатыны мәлім. Ал өнерге жақын болғанымен, бәсекелестеріне тойтарыс бере алмағандар іріктеу кезеңінен өте алмайды. Бұл – шындық. Өйткені бұл жобада тәртіп те, талап та қатал. Алайда, «Бақ шаба ма, бап шаба ма» деген тәмсілді негізге алсақ, бақтың да шауып, жүзден жүйрік атануың да әбден мүмкін екенін ұғынамыз. Десек те, шын мықтыға қашан да қажырлы еңбектің қажет екенін түсінген жөн.Ұзақ уақытқа созылған мегажобаның да аяқталар кезі таяу. Бұл ауқымды сайыстың іріктеу кезеңнен өткендер – шынында кіл мықтылар. Кім көрінгеннің мұндай ірі байқауда бәйге алмасы анық емес пе? Әсіресе, күміс көмейін ешкім де жасандылыққа салып керемет ете алмайды. Көмейге бұлбұл ұялаған әнші болу үшін әуелі Алланың берген қабілеті керек-ақ.&nbsp;Содан кейін алтын құрсақты ананың жатырынан дарынды болып туылу қажет. Одан арғысы дүниенің дидарына келген соң әркімнің өзіне байланысты. Бойдағы қабілетті тұншықтырмай, ерінбей еңбек етіп ел алдына шыққандар ғана жарқыраған жұлдыз бола алады. Міне, Айқынның тұла бойында жоғарыда тілге тиек еткен тіркестердің бәрі бар.Айқын – бүгінде «Нартай өнер мектебінің» кішкентай ғана оқушысы әрі ауданның мақтанышы. Қазіргі таңда оған артылған жауапкершіліктің жүгі басым. Өзі кішкентай болса да ол жан-жақтылықты жақсы көреді. Әншіліктен бөлек Айқынның спортқа да жақындығы бар. Оның ішінде баскетбол мен футболды жаны сүйеді. Әрі мектепте де озат оқушылардың қатарында болып, көпке үлгі болып жүрген жайы бар. Бүгінде оның жетістікке жетіп, ел алдына жүргеніне әкесі Ерболат Байқоңыратов себепкер. Алдағы уақытта Айқын жайлы әлі талай қалам тербеп, мақала жазатынымыз анық. Бірақ дәл қазіргі уақытта сізбен біз үшін кішкентай дарынды жеткіншектің ақтық кезеңде де сүрінбей өтіп, Сыр өңірінің намысын қорғап шығуы аса маңызды.Алты мыңнан астам бала қатысқан «Қазақстан дауысы. Балалар» мегажобасына барып, ең әуелі көрмей таңдау кезеңінен өтіп, содан соң екінші кезең – «Жекпе-жектен» де сүрінбеген ауданның мақтанышы алдағы уақытта яғни, бірінші шілде күні ақтық мәреде, тікелей эфирде ел алдында бақ сынайды. Бұл жолы жеңімпазды тәлімгерлер емес, көрерменнің өзі таңдайды. Байқаудағы басты талап – тікелей эфирде өзің қалаған өнерпазға дауыс беру. Сондықтан баршамыз 1 шілде күні мақсаты айқын, өзі өнерлі, жан-жақты жігітке жұмыла дауыс берейік. Өйткені Айқын жеңіске жетсе, әлемді мойындататыны анық! Ендеше, баршамыз ауданның мақтанышына айналған Айқын Ерболатұлын қолдайық, қымбатты оқырман!

Шиелі: Аудан абыройын асқақтатқан Айқын

<a href="https://kyzylorda-news.kz/">Kyzylorda-news.kz.</a> 2009 жылдың шілде айында талантты журналист Руслан Бөлебай жол апатынан көз жұмды деген ақпарат елді дүр сілкіндірді. Небәрі 24 жасында елге танылып, халықтың сүйіктісіне айналған журналистің қазасын қазақ жұрты ауыр қабылдады. Ұлттық арнадағы «Таңшолпан» бағдарламасын жүргізген жас журналист көптің көңіліне жол таба білді. Ол тілшілік тіршіліктен бөлек, әншілікті де қатар алып жүрді. «Кең дала», «Сен болмасаң», «Жанарым», «Елес», «Мөлдір моншақтар», «Кешікпей келем деп ең», «Махаббатпен ойнама сен», «Іңкәрім-ай» әндерін мәнеріне келтіре орындап, көрермен ықыласына бөленді.26 маусым күні Шиелі ауданының 95 жылдығына орай «Арман» мәдениет үйінде журналист Р.Бөлебайды еске алуға байланысты «Өлең болып өрілген өмір» атты аудандық жас жазба ақындар арасында мүшәйра өтті. Дүбірлі додаға барлық ауылдан қолына қалам ұстап, сөз өнерін серік еткен жазба ақындар қатысты. Қатысушыларға ақын, ҚР мәдениет қайраткері, қазылар алқасының төрағасы Кенжебай Жүсіп, республикалық ақындар айтысы мен жыр мүшәйларының жеңімпазы Бекжан Ержігіт, «Арман» мәдениет үйінің директоры Нұргүл Шәлекеева қазылық етті. Мүшәйра екі кезеңнен өтті. Бірінші бөлім бойынша ақындар Руслан Бөлебайға арнау өлеңдерін оқыса, екінші кезеңде Шиелі ауданына арнаған жыр шумақтарымен бөлісті. Жыр бәйгесінде «Арман» мәдениет үйінің өнерпаздары ән шырқап, көрермен қошеметіне бөленді.&nbsp;Жарыс нәтижесі бойынша Досбол би ауылының қатысушысы Мақсат Қалиев бас жүлдені қанжығасына байлады. Ал жүлделі І орын Жиделі ауылынан келген Гүлназ Ержігітоваға бұйырды. Шиелі кентінен қатысқан Олжас Базарханова, Бала би ауылынан Нұрсәуле Тұрмағамбетова ІІ орын иеленді. Ал ІІІ орын алғабастық Еламан Кенжеш мен 1 мамыр ауылының тұрғыны Дамир Нұртай, Гүлім Болатова, Гүлайна Мерекеге бұйырды. &nbsp;Руслан Бөлебайдың жарқын да жайсаң бейнесі тек жақындарының ғана емес әрбір қазақтың жүрегінен орын алғаны анық. Екі мүшел ғана өмір сүрсе де әр сәтін мәнді де мағыналы өткізген, артына өшпестей із қалдырған танымал журналистің есімі ел есінде. Адам өмірі ұзақтығымен емес, мазмұндылығымен өлшенеді. Отты жанарымен талайлардың жүрегінен жол тапқан талантты ұлының есімін күллі қазақ елі мәңгі асқақтата бермек.

Шиеліде Руслан Бөлебайға арналған жас жазба ақындар сайысы өтті

<a href="https://kyzylorda-news.kz/">Kyzylorda-news.kz.</a> Отыз жылға таяу ғұмыр жасын қоғамдық тәртіп сақшылығына арнаған полиция подполковнигі Нағашыбай Нарымбетұлының есімі бұл саладағы қызметтестерінің есінде деуге толық негіз бар. Нағашыбайды мен елу бес жылдан бері жақсы танимын. Екеуміз 1968 жылдары Қазалы ауданындағы №34 кәсіптік-техникалық училищесінде екі жылдық курсында бірге оқыдық. Одан кейін ішкі істер қызметінде бірге жұмыс жасап достығымыз ныяғая түсті.Нарымбетұлы Нағашыбай 1952 жылдың 23-ші қарашасында Бозкөл ауылында қарапайым отбасында дүниеге келген. 1961 жылы сол ауылдағы мектептің 1-ші сыныбына оқуға барып, 4-ші сыныпты бітірген соң &nbsp;Жанқожа батыр ауылындағы мектепте оқуын жалғастырып орта мектепті тамамдаған.1971-1973 жыл аралығында кеңес армиясы қатарында болып борышын өтеп келіп жаңадан құрылған Өркендеу кеңшарына барып трактор рөліне отырады.Ол кезде Өркендеу кеңшары негізінен күріш егумен айналысатын шаруашылықтың бірі болатын. Күз айларында егін жинаудың қызған шағында ауылдағы қырман басының нағыз еңбек адамдарымен қатар техникалар тынымсыз күндіз түні уақытпен санаспай жұмыс істейтін. Қырманда ауданнан барған өкілдер де, кеңшар басшылары да, құқық қорғау қызметкерлері де жиі болатын.Аудандық ішкі істер бөлімінен сол ауылға өкіл болып барған милиция аға сержанты Әшірбек Қалмұратов өз ісіне тиянақты, дене бітімі де ержігітке сай, мінезі ұстамды, сабырлы Нағашыбайға көзі түсіп:<blockquote>«Сен бала нағыз милиция қызметіне лайық жігіт екенсің. Өзің жассың, әрі тиісті жұмысыңды беріліп атқарады екенсің. Әскери борышыңды да жақсы тәртіпшілікпен өтеп келгеніңді де қатарластарыңнан сұрастырып білдім. Қарапайым отбасында тәрбиеленген екенсің. Менімен бірге егін жинау науқаны аяқталған соң аудан орталығына жүр.Басшыларыма таныстырып сені әуелі қатардағы милиция қызметіне орналасуыңа көмектесейін. Кейін сырттай оқып қызмет сатысына өсемін десең, тіпті жақсы»,– дейді сақа сержант.</blockquote>«Әр нәрсенің сәті болады» дегендей, қысқасы Нағашыбай 1976 жылы қатардағы милиция қызметіне орналасады. Қызметтік форманы киімін енді киемін деп, әрі үш айлық білім жетілдіру курсына бармақшы болып жүргенде, яғни 1975 жылдың тамыз айының 13-мен 14-не қараған күні сол кездегі аудан орталығындағы Большевик көшесінің батыс жағындағы үлкен азық-түлік дүкенінің ағаш қоршауының ішінде бір адамның әйнек қиятын құралмен терезесінің әйнегін қиып жатқанын қоршаудың саңылауынан көшеде патрулде жүрген Нағашыбай байқап қалады. Көшенің қараңғы жағынан сығалап қараса, түсі суық шашы дудыраған қолына резина қолғап, үстіне спорт киімін киген жігіттің әлсін-әлсін тың-тыңдап алып, әйнекті өте сақтықпен қиып жатқанын анық көреді. Нағашыбай дүкенге жақын жердегі хоздвордағы қарауылдың будкісінен тездетіп кезекші милицияға жағдайды хабарлайды. Жеделдетіп жеткен үш милиция қызметкері мен Нағашыбай өзінің қиған терезесінен енді сыртқа &nbsp;шығып келе жатқан жерінен қылмыскерді &nbsp;дүкеннен алып шыққан. 970 сом ақшасымен ұстағанының көзі тірі куәсінің бірімін. Бұл оқиға қызметінде кездесетін жағдайлардың бірі ғана, әлі талай бұл сияқты жағдайға кездесуіңе тура келеді, бетпе-бет кездесесің деп Нағашыбайға басшылары ескерте отырып алғысын білдіреді.&nbsp;1976 жылдың күзінде Қостанай қаласындағы милицияның арнаулы үш айлық курсында оқып, қайтадан Қазалыдағы қызметіне кіріседі. Тағы бір қызықты қарасаңшы. Оқудан келіп түнгі патрульдік қызметін аяқтап түн &nbsp;ортасы ауа кенттің батыс жағындағы үйіне қайтып бара жатады. Үйіне жақын ПМК-ның асханасы болатын көшеде &nbsp;ешқандай адам да, автокөлік қозғалысы да жоқ. Асхананың қапталынан өтіп бара жатып, ішінде біреудің &nbsp;жүргенін көзі шалады. «Беймезгіл уақытта жүрген бұл кім?» деп тасада тұрып, бақылау жасайды. Милиция &nbsp;бөліміне хабарлауға жақын маңда байланыста жоқ. Өзінің бір-екі жігітке әлі жететініне әрі үстіндегі формасына сенген тәжірибесі әлі толыса қоймаған албырт жігіт емін-еркін бір кісі сиятын терезеден асхана ішіне секіріп түседі. Бұны күтпеген ұры да иығындағы қос ауызды аңшы мылтығымен бұны атады. Құдай оңдап оғы бетон қабырғаға тиіп бытыралар жан-жаққа шашырайды. Екінші рет атпақшы болған қылмыскердің &nbsp;қолына жармасқан Нағашыбайды &nbsp;атқан оғы төбедегі бетонға тиеді. Бірақ жан екпінмен барын салып мылтық ұстаған қолын қатты қайырғандықтан қылмыскердің қолы иығынан шығады. &nbsp;Қанатынан қайырылған құстай болып қолға түскен қылмыскер тиісті жазасын алды.&nbsp;1975 жылы Өркендеу ауылының сүйкімді &nbsp;сұлуы Гүлбарам Кішкенеқызымен бас қосты. Тағдыр Нағашыбай сынды баласының, келіндері мен немерелерінің қызығын көруді әкесі Нарымбетпен анасы Зағипаға жазбапты.&nbsp;1974 жылы әкесі, 1975 жылы анасы о дүниелік болып кете барды. 1978 жылы Қызылорданың іргесіндегі Тасбөгет кентіндегі бөлімшеге қызметін &nbsp;ауыстырды. Әрі сол жылы Алматы қаласындағы милицияның арнаулы мектебіне сырттай оқуға түсті. Өте асқан тәртіптілікпен, ізденімпаздықпен, көркем де сыпайы мінезбен жас сарбаздың атқарған еңбегі зая кетпеді. Жеті жыл қатарынан облыстық басқарманың (УВД-ның) озаттар тақтасында суреті ілулі тұрды. Өсті, өнді. Сырттай да болса оқуын бітіріп, офицерлік дәрежеге жетті.&nbsp;Қайтадан туған жері Қазалыға келіп қызметін жалғастырды. К.Маркс, Майдакөл, Ү.Түктібаев, Жаңақұрылыс төрт бірдей кеңшарға учаскелік уәкіл болып қызметін адал атқарды. Талай рет ауылдық жерлердегі мал ұрлықтарын әшкереледі. 1977 жылдан бастап Қармақшы аудандық ішкі істер бөлімінің тергеу саласы бойынша бастықтың орынбасары болып іскерлігімен көрініп облыстық басшылардың назарына ілікті.&nbsp;1999 жылдан бастап Қазалыға келіп тергеу бөлімінің бастығы лауазымына көтерілді. Екінің бірінің қолы жете бермейтін подполковник шенін алды. Министрдің қолынан «Еңбегі сіңген аймақтық уәкіл» марапатын да алды, «Мінсіз қызметі үшін» ІІІ-ІІ-І дәрежелі медалымен қатар «ҚР полициясының үздігі» төсбелгісімен де марапатталды. Облыстық, аудандық әкімдермен, арнаулы бөлім басшыларының мақтау қағаздары да жеткілікті.&nbsp;Бұл қызметтің әрқашанда қиыншылығы мен қызығы қатар жүретіні белгілі ғой. Өміріңе қауіп төнетін кездері көптеп кездеседі. Соның бірін Нағашыбай әлі күнге дейін айтып мені бір Алла сақтады ғой деп отырады.&nbsp;1980 жылдың жаз айында түн ортасы ауа Тасбөгет кентіндегі ресторанның көше жақ бетімен үйіне келе жатады. Ресторан ішінде терезеден біреудің жүргенін байқайды. Әуелі &nbsp;ресторанның қызметкерлері не күзетшілері ма деп терезеден қарағанда ол адам қапталдағы терезеден секіріп түседі де &nbsp;қараңғыға қарай қашады. Бірақ оның қолында ет шабатын шағын балта барын да қырағы сақшы байқап үлгіреді. Көшеде оны қуып келе жатып бір қуысқа қарай бұрылып қашқанын көреді. Бұл да қуысқа ізінен кірейін десе балтасымен ұрады ма деп қауіптенеді. &nbsp;Әрі-бері шыдамаған Нағашыбай қуыстың тұсынан өте бергенде зу етіп лақтырылған өткір балта желке тұсымнан өте шықты дейді. Қаша жөнелген қылмыскерді қуа бердім, не дегенмен аяғым ұзын, әрі жаспын, әрі оның балтасының лақтырған жерінде қалғанын білген соң барымды салдым. Бір көшенің тасасында &nbsp;«Москвич» машинасы тұр екен. &nbsp;Машинасына жетіп есігін аша бергенде мен де жетіп қолын артына қайырып белімдегі &nbsp;белдігіммен байладым. «Қайда жүрсем де асхана мен дүкенге түскендердің үстінен түсумен болдым ғой», – деп Нағашыбай &nbsp;өткен күндерін еске алып айтып отырады.&nbsp;Нағашыбай 2003 жылы абыроймен зейнеткерлікке полполковник шенімен шықты. Таза 27 жыл қызмет еткенде еңбек кітапшасында ешқандай жазаланғаны жазылмаған. Марапаттары ғана тізілген. Осыншама демалысы аз, міндеті көп қиыншылығы жетіп артылатын қызметте жүріп, бұл әріптесіміз ұрпақ тәрбиесінде &nbsp;дұрыс &nbsp;жолға қоя білген. 8 бірдей ұл, қыздың әкесі. 14 немере мен 5 шөберенің атасы. Ұл қыздары өсіп жетіліп әке тәрбиесінен нәр алып тәртіптіліктерімен ерекшеленгендердің қатарында. Көбісі Алматы қаласының тұрғындары. Бір қызы &nbsp;мед академияны бітірген Астанада дәрігер. Нұрсұлтан есімді баласы Қонаев атындағы заң академиясын бітіріп, әкесінің ізін қумақшы. Ең кенже баласы Қожахмет Алматыдағы Қазақ-Британ техникалық университетінің үшінші курс студенті. Ал қалған ұл-қыздары да өмірден өз орындарын таба білгендер қатарында.Нағашыбай қазір медиация &nbsp;саласында 2018 жылдан бері медиатор. Әрі аудандық полиция бөлімі жанындағы ардагерлер кеңесінің төрағасы. Бұл салада да атқарған істері жетерлік. Кеңес құрамында 96 ардагер есепте тұрып жатыр. Пагонды қариялардың төрағасы Нағашыбай Нарымбет ұлы осындай тәртіп сақшыларының суарылған семсері деуге лайықты азамат.

Еңбегімен еленген ер

<a href="https://kyzylorda-news.kz/">Kyzylorda-news.kz.</a> Қазалы аудандық полиция бөлімінің Жергілікті полиция қызметі бөлімшесінің учаскелік полиция инспекторы полиция подполковнигі Бердібай Ұлықбек Өмірбекұлы 1974 жылдың 23 тамызында Қызылорда облысы, Қазалы ауданында дүниеге келген.Ішкі істер органдарында жиырма бес жылға жуық қызмет атқарып келеді. Ол қызмет барысында өзін үлгілі, жауапты қызметкер ретінде көрсете білді. Ұжымда сыйлы, әріптестері арасында беделді қызметкердің ізін жалғап, ұлы да құқық қорғау саласында еңбек етуді таңдаған.&nbsp;<blockquote>«Әке көрген оқ жонар, ат тұяғын тай басар» деген қазақтың нақыл сөзіндей полиция подполковнигі Бердібай Ұлықбектің баласы полиция лейтенанты Ұлықбекұлы Бекжан қазіргі таңда Қазалы ауданы полиция бөлімінде Жергілікті полиция қызметі бөлімшесінің әйелдерді зорлық-зомбылықтан қорғау тобының инспекторы лауазымында қызмет атқаруда.</blockquote>«Мен өз жұмысыммен мақтанамын. Осы салаға келуімді әкеммен байланыстыра аламын. Бала күнімнен әкемнің формасына қарап, қызығушы едім. Мектеп бітірген соң көп ойланбастан бала арманымды жүзеге асыруға бел будым. Орлық-зомбылықсыз қоғамды қалыптастыру әрбіріміз үшін парыз. Сондықтан барша адамзатты мейірімділікке, адамгершілікке шақырамын, – дейді жас маман Бекжан Ұлықбекұлы.Бөлім қызметкерлерң Полиция династиясы отбасына 23 маусым – Қазақстан Полициясы күні мерекесімен құттықтай отырып, отбасыларына аманшылық, бақ пен дәулет, құт-береке тілейді.

Аудандағы полицейлер династиясы

<a href="https://kyzylorda-news.kz/">Kyzylorda-news.kz.</a> Бүгін облыс әкімі Нұрлыбек Нәлібаевтың төрағалығымен өткен терроризмге қарсы облыстық комиссия отырысында терроризм мен экстремизмнің алдын алу мәселелері талқыланды.Жиында облыстық дін істері басқармасының басшысы Бауыржан Қамзаев осал нысаналы топтарда, оның ішінде, NEET санатындағы және жұмыссыз жастар арасында терроризм мен экстремизмнің алдын алуды жетілдіру, мәселелер мен оларды шешу жолдарын баяндады.Мәжілісте Қызылорда қаласы және Шиелі, Жаңақорған аудандарының әкімдері аудандық терроризмге қарсы комиссиялар мен Қызылорда қалалық жұмыс тобының қызметі туралы баяндама жасады. Сонымен бірге республикалық Терроризмге қарсы орталық пен облыстық терроризмге қарсы комиссияның хаттамалық шешімдерінің облыс аумағында жүзеге асырылуын таныстырды.<figure class="image"><img src="https://knadmin.beoblood.kz/uploads/347271272_567062852281630_7568760208762501510_n_c37849c1c8.jpg" alt="347271272_567062852281630_7568760208762501510_n.jpg"></figure>

Терроризмге қарсы облыстық комиссияның отырысы өтті

<a href="https://kyzylorda-news.kz/">Kyzylorda-news.kz.</a> Қазалы аудандық Орталық «Жанқожа батыр» мешітінің «Әйелдер-қыздар» секторы, Әжелер мектебінің ұйымдастыруымен «Ананың ақыл-кеңесі» атты рухани шара өтті.Шара барысында аналар өмір тәжірибесі мен отбасылық, салт-дәстүр құндылықтарын ұштастыра сөз қозғады. Аналық ақ лебіздерімен қатар мейірімді де өнегелі, ғибратты ақыл-кеңестері айтылды. Ана қай жерде де Ана, Ол – Әже, Жар, отбасының бірлігін ойлайтын, құлшылығы мен тіршілігін бірге алып жүретін, жан-жағына шуақ шашатын мейірімді жан екенін көрсете білді. Сұхбат кезінде әрбір ана өзінің өмірлік тәжірбиесі, ене мен келін арасындағы сыйластықты, ер адамға көрсетілетін құрмет туралы өзекті мәселелерді ортаға салды.&nbsp;<blockquote>«Көпті көрген аналарымыз аман болғай. Дәстүрге сай үлгілі сөздері, жастарға айтқан өсиеттері ұрпақтарға жалғассын деген ізгі ниетпен бас қосу жиыны қорытыланды. Алла Тағала елімізге амандық, жанұямызға бақыт, бірлік бергей. Ел іргесі аман болғай. Бүгінгі тағылымды кештен мол рухани байлық алдым. Өмір жолы өнегег толы осындай қайсар аналардың жолын кейінгі толқынға берсін. Біраз кеңеске қанығып, ақыл тыңдадық. Бала үшін қай уақытта да жанын шүберекке түйіп, тақым қысып отырар аяулы жандардың қабағын кір, жүзін мұң шалмасын», – деген тіле тілеп тарқасты кешке жиналған қауым.</blockquote>

Қазалыда «Ананың ақыл-кеңесі» атты рухани кеш өтті

<a href="https://kyzylorda-news.kz/">Kyzylorda-news.kz.</a> 25 маусымда өткен Жаңақорған ауданының Сүттіқұдық және Қаратөбе ауылдық округі әкімдерінің сайлауы заң талаптарына сай ұйымдастырылып, қорытындыланды.Құрылған сайлау округтері бойынша сайлаушылар тізіміне барлығы 2155 адам енгізілген, оның ішінде Сүттіқұдық сайлау округінде 1185 адам, Қаратөбе сайлау округінде 970 адам.Дауыс беруге қатысқан сайлаушылар саны 1560 адам, оның ішінде Cүттіқұдық сайлау округінде 831 адам, Қаратөбе сайлау округінде 730 адам.Есептен шығару куәліктері бойынша дауыс бергендер жоқ, дауыс беру жайынан тыс жерде дауыс бергендер – 31 адам, оның ішінде Сүттіқұдық сайлау округінде - 24, Қаратөбе сайлау округінде – 7.Ауылдық округ әкімінің кандидаттығына 7 адам ұсынылып, 1-і талапқа сәйкес еместігі бойынша, 1-і өз өтініші негізінде кандидаттықтан алынды, 5-і сайлау бюллетеньдеріне енгізілді, оның ішінде Сүттіқұдық сайлау округі бойынша – 2, Қаратөбе сайлау округі бойынша – 3.Дауыс беру қорытындысымен Сүттіқұдық ауылдық округінің әкімі болып Абуов Икрам Азизович сайланды.1983 жылы туған, ұлты қазақ, Жаңақорған ауданы, Жайылма ауылдық округі аппаратының бас маманы, Сүттіқұдық ауылдық округінде тұрады. Өзі-өзін ұсынған.- Қаратөбе сайлау округінде дауыс беру қорытындысымен ауылдық округ әкімі болып Манамбаев Женис Абаевич сайланды.1980 жылы туған, ұлты қазақ, Жаңақорған ауданы, Қаратөбе ауылдық округіндегі №229 мектеп директоры. Қаратөбе ауылдық округінде тұрады. Өзі-өзін ұсынған.

Жаңақорған ауданы: Қос ауылдың әкімі сайланды 

<a href="https://kyzylorda-news.kz/">Kyzylorda-news.kz.</a>&nbsp; Түрлі салада еңбек етіп, ардагер атанған азаматтардың ішінде редакция ардагерлерінің орны бөлек. Ұзақ жылдар бойы жергілікті газетте жемісті еңбек етіп, ардагерлік кезеңге абы-роймен жеткен олардың еңбегі, атқарған қызметі, жетістігі бүгінде тарих қойнауына еніп, кейінгі буынға үлгі-өнеге болып сақталып қалды. Мұның бәрі біз үшін, біздің аудандық газеттің тағылымды тарихы үшін қай кезде де маңызды.Кәсіби мерекемізге орай Сырдария аудандық "Тіршілік тынысы" газетінің бас редакторы Ақтөре Ибрагимұлының ұсынысымен қолға қалам алып, редакция жанындағы бастауыш ардагер ұйымының төрағасы ретінде өткен-кеткенді ой елегінен өткізуді жөн санадым. Бұл өте жауапты жұмыс екенін білемін. Өйткені, шағын ғана мақалада бәрін түгел қамту мүмкін емес. Бірақ, менің мақаламда аты аталса да, аталмаса да алдыңғы буын ардагерлердің өлшеусіз еңбегіне біз әркез бас иеміз. Құрметпен қарап, қадір тұтамыз. Қолымыздан келсе, ардагерлердің есімі мен еңбегін төрге оздырып, биікке жетелейміз. Ең бастысы, ардагерлерде деген біздің көңіліміз, пейіліміз таза және құрметіміз де шексіз болар еді.Екі жыл бұрын «Сыр журналистикасының тарихы» атты бес томдық кітап жарыққа шықты. Сол кітапта бәрі кеңінен жазылып, өңір журналистикасымен қатар аудандағы бұқаралық ақпарат құралының тарихы да қайта зерделенді. Осы ретте, аудандық газеттің ең алғашқы атауы «Сталин жолы» болғанын және оның сонау 1939 жылдың 26 наурызынан бастап 1956 жылға дейін осы атаумен оқырманға таратылғанын айта кетейін. Одан кейін 1956-1963 жылдары газет «Еңбек майданы» болса, екі ауданның бірігуіне байланысты 1963-1967 жылдары «Сырдария» деп аталған. 1967 жылы аудандар екіге бөлініп, басылым атауы «Еңбек туы» болып өзгертілді. Төл газетіміз 1990 жылдың 2 қарашасында Қазақ ССР Министрлер Кеңесінің Қазақ ССР Баспасөз жөніндегі мемлекеттік комитетінде тіркелді. Еліміз Тәуелсіздік алғаннан кейін 1992 жылы 30 шілдесінде басылым атауы «Тереңөзек тынысы» деген атпен ҚР Бұқаралық ақпарат министрлігінде тіркелді. Ал 1997 жылдан бері «Тіршілік тынысы» атауымен шығып келетіні жасырын емес.Мен бүгінгі мақаламда газет редакторларының есімін атап өтуді дұрыс деп санаймын. Олардың қатарында ең алғашқы редактор Серғазы Абдуллаевтан бастап Баймахан Уызбаев, Әбілда Құрманаев, Смайыл Ақжігітов, Шілдебай Оңғалбаев, Айтбай Қойшыбаев, Жұмағали Елеуов, Б.Өтепов, Болатбек Аманбаев, Смағұл Маханбетов, Ізхан Досмағамбетов, Абызбай Маханбетов, Қуаныш Татанов, Тынышбек Дайрабай, Келдібай Уәйісов, Тұрғанбай Болғанбаев, Асқар Кіребаев, Нұрлыбек Ғизатов пен Сәуле Ерімбеттің есімін ерекше атауға болады. Ал 2019 жылдан бастап редакторлық қызметті атқарып келе жатқан Ақтөре Ибрагимұлы аудандық газеттің жиырмасыншы бас редакторы екен. 84 жылдық тарихында жиырма редактор басшылық қызмет атқарған газетте адал еңбекті ту еткен талай азаматтар да нәтижелі еңбек етті. Олардың ішінде 1939-1946 жылдары Т.Аралбаев, С.Қожаниязов, С.Дәрібаев, М.Нұрманов, Б.Әденов, Сайлығараев, Қ.Оспанов, Үмбетов, Н.Төртбаев, Е.Дәуітбаев, Қ.Қоянбаев, Д.Жұқабаев есімді тұрақты авторлардың есімі құрметпен аталады. Одан бөлек әрі ақын, әрі журналист болған М.Сақтаповтың еңбегі ерекше. Ол кісі біздің ортақ ұстазымыз болып, журналистика саласында өзіндік дара қолтаңбасын қалдырды. Сол еңбегі еленіп «Сырдария ауданының Құрметті азаматы» атанды. 2020 жылы Қазақстанның құрметті журналисі атағын иеленді. Соғыс жылдарынан кейін газет жұмысының ілгері басуына Қ.Ысмайылов, Б.Шертаев, А.Салыбаев, Е.Жүсіповтер де атсалысқан. Әсіресе Сейтмұрат Ембергеновтің рухани-танымдық еңбектері оқыр¬ман қауым тарапынан жоғары бағаланды.Газет журналистерімен қатар бас¬пахана директорлары да мерзімді басылымның халыққа тез жетуіне айрықша үлес қосты. Біз бүгінде аудандағы редакция мен баспахана тарихын бөлек қарастыра алмаймыз. Қос мекеме тоңның ішкі бауындай бірлесе, бір мүдде жолында еңбек етті. Аудандық баспахана директоры болған В.Те, У.Аманбаев, Б.Жұмсабековтердің еңбегі зор. Әсіресе Сергей Тоқсанбаевтың есімі ерекше аталады. Сергей ағамыз нағыз тәртіптің адамы ретінде есте қалды және әлі күнге сол тәртіп пен тазалық ол кісінің басты ұстанымы. Ол кісі газет бір минутқа да кешікпеуі керек деген ұстанымды ұстанды. Бәрінен соны талап етіп, жұмысқа ерекше жауапкершілікпен қарады. Сол жауапкершілік, жаңашылдық оны биікке шығарды. Ал баспахана қызметкерлерінің ішінде Қ.Төлегенов, Б.Әбдіхалықов, Ш.Әбдіхалықова, Ә.Әбдірахманова, Ш.Беркінбаева, Қ.Балшықбаева, Ж.Тасымбаева, Б.Бай-жүнісова, Қ.Асықбаева, Ж.Қожағұлова, Қ.Жаншыбаева, Г.Ысқақова, А.Манасова, Р.Досмағанбетова, Р.Есмағанбетова, К.Жұмабаева, Л.Өскенбаева, А.Болғанбаева, О.Күзембаева мен А.Ысқақовалар, Б.Таңатаров, С.Еркінбаева, А.Алданова, М.Өтепбергенова, Э.Баймұханова, Б.Қорғанбекқызылар ұзақ жылдар ортақ абырой жолында тер төкті. Бұл кісілердің көбі бүгінде дүниеден озса, қалғандары ардагерлік кезеңге абыроймен жетіп, кейбірі түрлі салада еңбек етіп, ұрпақтарының қызығын көруде.Айта кету керек, тырнақалды туындылары, ең алғашқы материалдары аудандық газетте жарияланған есімі елге белгілі қаламгерлер көп. Олардың көшін Қалтай Мұхамеджанов, Асқар Тоқмағамбетов, Әбілмәжін Жұмабаев, Әбіраш Жәмішов, Төлепберген Тобағабылов, Сейфолла Оспанов, Нұрхан Жанаев, Қанапия Дәрібаев, Қалмахан Нұрғалиев, Қайырбек Асанов, Жадыра Дәрібаева, Бексейіт Шайлановтар бастайды. Олардың бәрі аудандық газетті «Шыңдалу мектебі» деп атаған. Сонымен қатар 1970-1980 жылдары Алтынбай Дәуренбеков, Сәуле Ерімбет, Мейрамбек Шілдебаев, Дәметкүл Құмақбайлардың есімі мен еңбегі баспасөз арқылы халыққа танылды. Олардың әрбір туындысын халық асыға күтті, сүйсіне оқыды. Газет абыройы мен беделін көтеру жолында тынымсыз еңбек еткен Шолпан Оразәулеті мен Серік Әлімбетовтің жылт еткен жаңалықты қалт жібермейтін мақала-лары да көп оқылымға ие болды. Радиохабарын ұйымдастырушы Кеңес Әбуов пен корректор, әдеби қызметкер болған Мұса Келдібаевтар да осы жылдары еңбек етті. Жалпы газеттің түлектері ауданда, облыста жоғары қызметтерді атқарды. Бүгінде Мұсекең аудандық ардагерлер кеңесін басқаруда. Біздің газеттен түлеп-ұшқан азаматтар ауданда бөлім, мекеме басқарып жүр. Олар – біздің ортақ мақтанышымыз.Газетте еңбек еткен фототілшілердің өзі бір төбе. Оларға деген құрмет ешқашан толастамайды. Әсіресе Владимир Ягуниннің есімі сырдариялық жұртшылықтың жадында деп ойлаймын. Фототілші Ибадулла Пірімбетовтің де суреттері газет мазмұнын байытты. Ерғали Әбдіхалықовтың түсірген суреттері де редакцияның алтын қорында сақтаулы. Ол суреттер аудан туралы жазылған кітаптарға да енді. Бірер жыл бұрын Ерекеңнің ұрпақтары үйдегі суреттерін, фотоаппаратын редакцияға өткізді. Құнды жәдігерлер қазір редакциядағы ардагерлер бөлмесінде сақтаулы тұр. Келген қонақтарға көрсетіп, таныстырып, суреттер шежіресін үлгі етеміз.2015 жылы А.Тоқмағамбетовтің ғасырлық мерейтойына орай газет форматы ауысып, бірінші рет А2 форматымен жарыққа шықты. Бұл үлкен жаңалық болды. Кейін бұл үрдіс 2012 жылы сол кездегі аудан әкімі Ғ.Әбілтайдың қолдауымен қолға алынып, газет біржолата А2 форматымен таратылатын болды. Алғашында газеттің бетін мақалалармен толтыру оңайға соқпады. Бірақ бұл жаңалыққа тілшілер тез төселіп, жұмысты бір жолға қойды. Қазіргі таңда «Сыр медиа» серіктестігіне қарайтын басылым аптасына екі рет таратылып келеді. Тағы бір жаңалық газетке Арал мен Жаңақорған аралығындағы барлық ауданның тұрғындары жазыла алады. Биылдан бастап ақпараттық агенттік ретінде де жұмыс істеуде. Яғни, газеттің өз сайты бар, ол сайт тәулік бойы ақпарат таратуда.Соңғы жылдары газеттен зейнет демалысына шыққан қаламгерлердің ішінде Шаһарбек Нұрсейітов екеуміз ардагерлер қатарын толықтырдық. Мен редакция жанындағы бастауыш ардагерлер ұйымының төрағасы ретінде өзім ұзақ жылдар еңбек еткен ұжыммен тығыз байланыстамын. Редакцияда жеке жұмыс бөлмем бар. Ал, Шаһарбек – халықаралық «Қазақ тілі» қоғамының аудандық филиалының төрағасы. Екеуміз де кейінгі буын жастарға жанашыр болып, бағыт-бағдар беріп, қолдап келеміз. Мерекелік даталарда редактормен бірге редакция ардагерлерінің үйіне барып, сый-сыяпатымызды табыстаймыз. Бұл – біздің ортақ міндетіміз.Мен кәсіби мереке қарсаңында ардагерлер мен әріптестерімнің есімін жаңғыртып мақала жаздым. Біраздан бері қолға қалам алған соң өткен күндер көңілімде, жүрегімде жаңғырды. Бізге бәрі де ыстық, бәрі де аяулы. Ардагерлерге құрметіміз қай кезде де ерекше. Мерекеде редакцияның, баспахананың ардагерлеріне зор денсаулық, абырой-амандық тілеймін. Ал өмірден өтіп кеткен әріптестеріміздің жатқан жері жайлы, топырағы торқа болғай!&nbsp;

Қазақстан және Қызылорда облысының жаңалықтары