<a href="https://kyzylorda-news.kz/">Kyzylorda-news.kz.</a> Бір кісінің еңбек кітапшамда екіауыз ғана сөз бар: «Бірі – жұмысқа кірді деген болса, бірі – зейнетке шықты» дегені бар-ды. &nbsp;Сонда іштей таңданып қалғанымыз бар. Бұрынғының кісілері «Дарақ бір жерден көктейді» деп, әр жұмыс орнына ұшып-қонбай бір жерде тұрақты жұмыс істеуді – мәртебе санайтын. Оның үлгісін де талай рет көрсетті. Біздің қалам тербеуімізге себепкер болып отырған жан да сол кісілердің сарқытынан. Бір ауылда, бір салада 40 жылға жуық еңбек етіп келеді.&nbsp;Ол – медицина саласының білікті маманы, саналы жылдарын өзі болмысымен қалаған ісіне арнаған Қалдыгүл Тоқсанбаева. Ол Тәйімбет Көмекбаев ауылында дүниеге келген. Тұрмағамбет ауылындағы №29 мектептің түлегі. Оған медицина қызметкерлерінің әрбір іс-қимылы, жұмыс формасы – шатырдай аппақ халаты қатты әсер етіпті. Әсіресе, тазалық пен тәртіпке деген олардың қағидасы жас қыздың ойын дөп басқандай еді. Өзі де тазайым, үйдегі тәрбие де соған бейімдей түсті. Адам жанына араша болу, пендесіне мейірім төгу, ізгілікке бастамашы болу – оның болашақ мамандық таңдауына айқын жол көрсетіп бергендей болды.&nbsp;Қалдыгүл бала кезден қанына біткен батылдығына басып, сүйікті мамандығы санаған медбикелік оқуына құжат тапсырады. Мамандық таңдау қашан да жауапты іс. Қателесуге болмайды. Жас қыз барлық емтиханды ойындағыдай тапсырып, Қызылорда медициналық училищесінің студенті атанып шыға келді. Студенттік жастық шағында да оқу орны оқытушыларының көзіне түсіп, алғырлығымен, белсенділігімен ерекшелене білді. Осылайша бойжеткен «Балаларды емдеу және аурудың алдын алу» мамандығы бойынша қолға диплом алып шығады.&nbsp;<blockquote>– 1984 жылы оқуымды сәтті аяқтадым. Сол жылы болашақ жарымды кездестірдім. Ақжар ауылына келін болып босаға аттадым. Жан жарым Кәжіғали Таубаевпен бірге шаңырағымызда 4 бала тәрбиелеп өсірдік. Өмірдің ыстық-суығын бірге жеңе білдік. Қазір балаларымыздан 7 немере сүйіп отырған жайымыз бар, – дейді бақытты ана әңгімесінде.</blockquote>Бір қызығы, Қалдыгүл Тоқсанбаева оқу орнын бітірген жылдан бастап Қармақшы ауданы, Ақжар ауылдық ауруханасына медбике болып жұмысқа орналасса, 2005 жылдан бүгінгі күнге дейін ауылдағы №28 орта мектептің медбикелік қызметін абыроймен атқарып жүр. Ол өз сөзінде бала денсаулығын сақтауда орта мектепте атқарып жатқан міндетіміз көп дейді.&nbsp;<blockquote>– Мектепте жұмыс істегесін бірінші кезекте алдымызда балалардың денсаулығы тұрады. Оны күнделікті қадағалап отыру – басты қызметіміз. Түрлі жұқпалы аурудың алдын алуда екпе жұмыстары жүргізіледі. Мектепішілік тазалық, балаларға берілетін ыстық тамақ сапасы және оның талап-тәртібімен берілуі қатаң қадағаланады. Сондай-ақ санитарлық-эпидемиологиялық қадағалау жұмысы жүргізіліп отырылады. Одан басқа құжаттармен де жұмыс жасаймыз. Аудандық ауруханасы мен білім бөлімі тарапынан берілетін жауапты жұмыс, тапсырмалар болады. Саламатты өмір салтын қалыптастыруда оқушыларға профилактикалық іс-шаралар, түсіндірмелер жүргіземіз. Оның ішінде жаман әдеттерден бойды аулақ ұстау, тазалық пен тәртіпті үнемі серік ету, әлдеқандай жағдай болғанда алғашқы медициналық көмекті қалай көрсетуге болады &nbsp;сынды шаралар да міндетіміздің бірі саналады, – дей келе әріптестерін алда келе жатқан мерекелерімен құттықтауды да жөн санады.&nbsp;</blockquote>– Барша әріптестерімді кәсіби мерекелерімен құттықтаймын. Еңбектеріне табыс, қызметтеріне абырой биігін, отбасыларына бақ-береке тілеймін, – деді ол мерекелік көңіл-күймен жадырай күліп. &nbsp;&nbsp;Білікті маманның еңбегі ескерусіз емес. Ол әр жылдарда облыстық денсаулық сақтау басқармасының құрмет грамотасымен, аудан және ауыл әкімдерінің, аудандық аурухананың &nbsp;алғыс хаттарымен марапатталған. &nbsp;

Қалдыгүл Тоқсанбаева: Бала денсаулығын қадағалау – басты қызметіміз

<a href="https://kyzylorda-news.kz/">Kyzylorda-news.kz</a> Сырдария аудандық кіші футболдан әуесқойлар лигасының жастар арасындағы аудан біріншілігінің жабылу салтанаты өтті. Дүбірлі додаға 2 лигаға бөлініп, 18 команда 400-ден аса аудан және көршілес аудан жастары қатысты. Бес айға созылған 18 команда бақ сынасқан тартысты чемпионат жүзеге асты.Салтанатты іс-шараға №11 олимпиадалық резервтің мамандандырылған балалар жасөспірімдер мектебінің директоры Бауыржан Есмағанбетов Олжабайұлы, Сырдария аудандық дене тәрбиесі, спорт және туризм бөлімінің бас маманы Мешітбаева Айгерім Нұрланқызы және Сырдардия аудандық спорт клубының директоры Әлжанов Диас Жасұланұлы спортшыларды құттықттап, (А) және (Б) лигасының жеңімпаздарын марапаттады. (А) лигасының нәтижесі бойынша жүлделі І орынды «Регион 11» командасы, &nbsp;ІІ орынды «Қызылдихан» командасы, ІІІ орынды «АБ Агро» командасы жеңіп алды. (А) лигасының номинациялар бойынша «Үздік төреші» номинациясымен Нұрлан Абуталипов, «Үздік қақпашы» номинациясымен«Эверест» командасынан Бекболат Серікбайұлы, «Үздік қорғаушы» номинациясымен «АГ Агро» командасынан Нұржан Мұсахан, &nbsp;«Үздік шабуылшы» номинациясымен &nbsp;«Достар» командасынан Нұрлан Каримов, &nbsp;«Үздік сұрмерген» номинациясымен «Регион 11» командасынан Мұрат Ешпанов, &nbsp;«Үздік ойыншы» номинациясымен «Қызылдихан» командасынан Мұстафа Мырзағұл, «Үздік жас ойыншы» номинациясымен «Хансұлтан» Ұлан Кейкиев, «Үздік ардагер ойыншы» номинациясымен «Регион 11» командасынан Нұржан Әкімжанов марапатталды.Өз кезегінде «Б» лигасының аяқдопшылары жеңіс тұғырынан көрінді. Аталған лига бойынша І орынды Н.Ильясов командасы, ІІ орынды С.Сейфуллин командасы, ІІІ орынды Қызылдихан 2 командасы ұтқан болатын. Бұл ретте, (Б) лигасының «Үздік төреші» номинациясымен Мейржан Хайруллаев, &nbsp;«Үздік қақпашы» номинациясымен «Хансұлтан 2» командасынан &nbsp;Темірлан Құрманғазин, &nbsp;«Үздік қорғаушы» номинациясымен «Суши Лайф» командасынан Мади Ғалымжанұлы, &nbsp;«Үздік шабуылшы» &nbsp;номинациясымен «Қызылдихан 2» командасынан Елдос Төлегенов, «Үздік сұрмерген» номинациясымен «Интер Маями» командасынан Абылайхан Сейтенов, С.Сейфуллин командасынан Бекзат Серіков, «Үздік ойыншы» номинациясымен Н.Ильясов командасынан Мақсат Мұхаммедқалиев, «Үздік жас ойыншы» номинациясымен «Айсері» командасынан Балтас Бағдаулет, «Үздік ардагер ойыншы» номинациясымен «Жолбарыс» командасынан Жасұлан Қаусов, &nbsp;«Үздік жетекші» номинациясымен «Айсері» командасынан Олжас Әуезханмарапатталды. Сонымен қатар &nbsp;Сырдария аудандық әуесқой футбол лигасына үлес қосқаны үшін Жасұлан Бақторазов, Нұржан Сейтжан, Ербол Бекмағанбетов, Нариман Тәжікбай ұйымдастырушылар тарапынан ерекше құрметке бөлінді.

Сырдарияда кіші футболдан әуесқойлар лигасы қорытындаланды

<a href="https://kyzylorda-news.kz/">Kyzylorda-news.kz.</a> Аудан медицинасында табанды еңбегімен танылып, Астана қаласында өткізілген дүниежүзілік «Мейірбикелер» конференциясының қатысушысы атанған жан бар. Ол – тәжірибелі медбике Сәуле Арғынбаева. 38 жылдан бері «Терапия» бөлімшесінде қызмет етіп келе жатқан Сәуле Арғынбаева бір жылдары республика аумағынан жиналған өзі секілді медбикелермен тәжірибе алмасуға мүмкіндік алған.Осы уақытқа дейін көптеген науқасты емдеп-жазуға үлес қосқан білікті маман байыпты, биязы мінезімен өз ортасында даралана алды. Жас буын медбикелермен қатар жүріп, жүрек қалауымен таңдаған мамандығына адалдық танытты. Өмірін денсаулық сақтау саласына арнап келе жатқан Сәуле Арғынбаева әрептестерін кәсіби мерекесімен құттықтады.– Сан салаға бөлінген аудандық аурухананың әрбір медбикесі өз жұмысына жауапты екенін білеміз. Күнделікті науқастың жа й-күйін бақылап, түндегі ұйқысының тыныштығын күзетіміз. «Терапия» бөлімшесінде жүрек пен қан тамырлары дертіне шалдыққан жандар жиі ем қабылдайды. Жылына жоспарлы түрде бірнеше мәрте ем алатын аудан тұрғындары бар. Олар қашанда шынайы алғысын жеткізіп жатады. Бұл ретте, әріптестірімді кәсіби мерекемен құттықтаймын, – деді сала маманы.

13870 күнді бір бөлімшеде өткізген маман

<a href="https://kyzylorda-news.kz/">Kyzylorda-news.kz</a> Синоптиктер Қазақстан бойынша 12 мамырға арналған ауа райы болжамын жариялады. Бұл туралы <a href="https://stan.kz/nayzaga-oynap-byrshak-pen-zhanbir-zhauadi-sinoptikter-1-400027/">Stan.kz </a>ақпарат агенттігі хабарлайды.&nbsp;Қазгидромет мамандарының айтуынша, түнде Қарағанды, Балқаш, Теміртау және Атырау қалаларының тұрғындары мен қонақтарын қолайсыз метеорологиялық жағдай күтіп тұр.Болжамға сәйкес, еліміздің басым бөлігінде ауа райының тұрақсыз сипаты сақталады."Еліміздің басым бөлігінде&nbsp;найзағай ойнап, жаңбыр жауады, батыс, оңтүстік-шығыс өңірде қатты жаңбыр жауады.&nbsp;Алматы облысының таулы аудандарында – қатты жауын-шашын (жаңбыр, қар) болады. Республикамыздың солтүстігінде, орталығында антициклон әсерінен жауын-шашынсыз ауа райы сипат береді. Қазақстан&nbsp;бойынша батыс, оңтүстік-шығыс өңірлерде қатты жел соғып, бұршақ жауады. Батыста,&nbsp;оңтүстік-батыста шаңды дауыл тұрады. Түнде және таңертең шығыста, орталық өңірлерде тұман болады", –&nbsp;делінген синоптиктер хабарламасында.Түнде Қарағанды облысының солтүстігінде, шығысында, Ақмола облысының шығысында, батысында, Павлодар облысының солтүстігінде топырақ беті қатып, сынап бағаны 1,3 градус суықты көрсетеді.&nbsp;“Қарағанды облысының батысында, оңтүстігінде, Ұлытау қаласының орталығында, Ақтөбе және Абай облыстарының оңтүстігінде, Батыс Қазақстан облысының орталығында, Атырау облысының батысында, Қостанай облысының оңтүстігінде, Қызылорда облысының батысында өрт қаупі жоғары. Түркістан облысының шөлейтті аудандарында өрт қаупі сақталады, Қызылорда облысы Қазалы ауданында төтенше өрт қаупі жоғары болады”, –&nbsp;делінген хабарламада.Фото: pixabay

"Найзағай ойнап, бұршақ пен жаңбыр жауады": Синоптиктер 12 мамырға арналған ауа райы болжамын ұсынды

<a href="https://kyzylorda-news.kz/">Kyzylorda-news.kz</a> Ақтау тұрғыны жұбайының зорлық-зомбылық жасап, қудалауына байланысты Қазақстанның құқық қорғау органдарынан көмек сұрады. Бұл туралы <a href="https://stan.kz/tozakta-omir-surdim-kazakstan-oz-otbasindagi-zorlik-zom-400024/">Stan.kz </a>ақпарат агенттігі хабарлайды.&nbsp;Арайлым есімді әйел&nbsp;өз оқиғасын&nbsp;БАҚ-қа айтып, видео жариялады. Онда&nbsp;ол барлық құқық қорғау органдарынан күйеуінен қалай қорғануды білмейтінін айтып, көмек&nbsp;сұрайды.&nbsp;Айтуынша, ол жұбайымен 13 жыл бірге тұрған.&nbsp;"Білесіздер&nbsp;бе, мен Бишімбаевқа қатысты сот процесін көріп, таңғалдым. Оның не айтатынын&nbsp;алдын-ала білген сияқтымын. Даусы, сөйлеу мәнері. Мұндай&nbsp;адамдар бірдей өмір салтын ұстанып, бірдей ойлау қабілетіне ие бола ма? Өз басым тозақта өмір сүрдім. Одан 2023 жылы кеткім келді, бірақ үш кішкентай балам бар еді.&nbsp;Ол мені ата-ана құқығынан айырамын деп қорқытты, аңғал және жас болдым. Қорыққанымнан&nbsp;қайтып келдім. Ақырында одан таяқ деп ауруханаға&nbsp;түстім", - дейді Ақтау тұрғыны.Жұбайымен ақырғы кездесуінің соңы Арайлым үшін ауруханаға түсумен аяқталған. Наурызда ер адамға әйеліне жақындауға тыйым салатын қорғау нұсқамасы туралы үкім шыққан. Алайда бұл оны тоқтатпапты.&nbsp;"9 наурызда күйеуім Ақтау әуежайынан келе жатқанымда ізімнен түсіп апатты жағдай туғызды. Соның салдарынан мен тоқтауға мәжбүр болдым. Ол көлігіме жақындап келіп, есікті ашуымды&nbsp;талап етті. Қоқан-лоққы көрсетіп, бейәдеп сөздерін айтты. Мен есіктерді жауып алдым. Ол көп ойланбастан жүргізуші жақтағы әйнекті бір ұрып, сындырды", - дейді әйел.Айтуынша, жанында құрбысы отырған. Ол болған жағдайдың бәрін видеоға түсіріп отырған.&nbsp;Оқиға орнына полиция келгенде, Арайлым орнынан қозғала алмаған. Жүргізуші орындығында&nbsp;есін жия алмай, біраз уақыт жылап отырып қалған.&nbsp;Осы кезде құрбысы полицейлерден жедел жәрдем шақыруларын&nbsp;өтінген, бірақ олар асықпаған.&nbsp;"Полиция қызметкерлері менің жағдайымды көре тұра, асықпай, шамамен 10 минуттан кейін ғана қоңырау шалды. Онымен (күйеуі – авт) сыпайы түрде сөйлесті. Ол мені тіпті полиция тұрса да қорқытудан жасқанбады. Құрбым жағдайға араласып еді "жеке отбасылық өмірге араласпауын және арандатушылық тудырмауын" сұрады. Ал маған орнымнан тұрып, көліктеріне барып, арыз жазуым керек деді. Мен стресс пен суықтан дірілдей бастадым, бүкіл денем құрысып қалды. Бұл қорқынышты түс секілді. Жедел жәрдем келгенде ғана есім жиылғандай болды”, - деді Арайлым.Әйелдің айтуынша, кейінірек ол ауруханада жатқан кезде полицейлер келіп, қорғау нұсқамасының&nbsp;бар екенін білмейтіндерін мәлімдеген. Алайда оның бар екені&nbsp;видеода бірнеше рет айтылған.Арайлым өзін қорғау туралы&nbsp;туралы өтініш пен&nbsp;хаттарды барлық инстанцияларға, тұрмыстық зорлық-зомбылыққа қарсы қорларға және ел президентіне жіберген. Ол өзінің видео үндеуінде&nbsp;соққыға жығылған&nbsp;суреттерін&nbsp;жариялады.Фото: Нұрболат Нұржаубай

"Тозақта өмір сүрдім": Қазақстандық әйел күйеуінен көрген зорлық-зомбылықты Бишімбаев ісімен салыстырды

<a href="https://kyzylorda-news.kz/">Kyzylorda-news.kz</a>&nbsp; Жеңіс күні&nbsp; мереке болғанымен, оның&nbsp; өтеуі тым қымбатқа түскенін аға ұрпақ жақсы біледі. Жерін жаудан азат ету жолында майдан даласында жан алысып, жан беріскендердің бірі – Зәкір Таңбаев.Ол алғаш&nbsp; Югославия еліндегі ұрысқа қатысып, жаумен ашық шайқасқа шығады. Бірақ зеңбіректен жауған оқтың астында қалады. Қатты жарылыстың салдарынан жарақат алады. Бұл туралы өзінің естелігінде де айтылған.<blockquote>&nbsp;«Айнала тынышталып қалған. Мен орнымнан тұрайын десем, қозғалатын түрім жоқ. Аяғыма зеңбірек оғының жарықшағы тиген екен. Жан-жағыма қарасам, Молодовский досым жарақат алса керек, екі қолымен басын қысып «мама» деп жатыр екен. Сәлден соң дәрігерлер келіп, зембілге салып алып кетті. Жарақатымыздың ауыр екенін көріп, Ленинградтағы госпитальға жіберді. Мұнда бір күн жатып, орын болмаған соң елге, Ақтөбе қаласындағы госпитальға жөнелтті. Осы уақытта маған орыс досымның қайтыс болғаны туралы хабар келді» - дейді ол.</blockquote>Майдангердің жарақатының ауыр болғаны соншалықты, емі ұзақ уақытқа созылады.&nbsp; Жамбасының ұршық сүйегіне тиген оқтың орны көпке дейін оның тік тұруына кедергі болады.&nbsp; Жарақаты жазылып, денсаулығы қалыпқа келген соң оған қайтадан майданға барасың деген хабар тиеді. Осылайша Зәкір Таңбаев майданға қайта аттанып, бұл жолы Берлинге дейін барды. Жолда бір стансаға тоқтағанда жеңіс туралы хабар алады. Сөйтіп 1946 жылы елге оралды.1947 жылы теміржолға жұмысқа орналасып, осы салада 32 жыл қызмет істейді. Өз ортасында сыйлы, абыройлы болды. Әрдайым құрмет төрінен көрінді. Майдан даласындағы ерлігі де, елге оралған соң атқарған еңбегі де еш кетпеді.&nbsp; «1941-1945 жылдарда Германияны жеңгені үшін», «50 лет Вооруженных сил СССР», «Жеңістің 30 жылдығы» медальдарын иеленді. Онан бөлек теміржол саласына сіңірген еңбегі үшін Орынбор теміржол басқармасының марапаттарын алды.Майдангер жары Рахима Шайымқызы екеуі сегіз бала тәрбиеледі. Одан тараған ұрпақ бүгінде өсіп-өнген, абыройлы азаматтар. Олар да әкесі салған даңғыл жолмен жүріп, елге адал қызмет етуде.Майдангердің 1954 жылдан бері тұрған үйі Жосалы кенті орталығындағы Қазантаев тұйығында орналасқан. Бүгінде артында қалған ұрпақтарының осы көше соғыс және еңбек ардагері Зәкір Таңбаевтың атына берілсе деген тілегі бар.Мейрамгүл ДАУЫЛБАЙҚЫЗЫ

Елдің даңқын асырған жауынгер

<a href="https://kyzylorda-news.kz/">Kyzylorda-news.kz</a> Сырдария ауданына қарасты Жастар ресурстық орталығында &nbsp;"ЕркеZHAN" қыздар клубының ұйымдастыруымен&nbsp;"Қыз &nbsp;тәрбиесі – ұлт байлығы " тақырыбында жоғары сынып қыздарымен дөңгелек үстел өткізілді.&nbsp;Дөңгелек үстелді клуб жетекшісі Жансая Байтәжиева жүргізді.Қыз тәрбиелегенің&nbsp;– ұлтты тәрбиелегенің. Рас, бүгінгі бойжеткен – ертеңгі ана. Ұрпақ жалғастығын бәрінен жоғары қою әлемнің өзге елдерінде сақтала бермейтін дәстүр. Жасыратыны жоқ, қазірде қызды тәрбиелеуде ұлттық тәрбие негізінен алшақтап барамыз.Дөңгелек үстелде &nbsp;қыз бала тәрбиесі, клубтың негізгі мақсаты жайлы айтып өтті. Қыз тәрбиесі жайлы баяндамалар оқылып, қыздар өз ойларымен бөлісті. Пікір алмасу өте тартымды,&nbsp;қызықты өтті. Қыздарымыздың ақылды,&nbsp;үлгілі,&nbsp;мейірімді,&nbsp;инабатты болуы алдымен ата-анасынан,&nbsp;екіншіден білім ордасынан басталады. Қыз балалар осындай қасиеттерді меңгеруге талпынуы керек. Арамызда ару да әсем,сұлу да көрікті,әдемі де ажарлы қыздар көп болсын.&nbsp;Сондықтан да қыздарды аялай білейік.Ертеңгі ұрпақты тәрбиелейтін – қыз. «Қызың өссе, қызы жақсымен ауылдас бол», «Келіні жақсы үйдің керегесі алтын» деп көңілі мен жүрегі таза, әдемілікке, нәзіктікке құмар, өзінің емес, өзгенің өресін көтермелейтін қыз бала келешекте іргелі үйдің шаңырағын жоғары көтереді емес пе?! Ақыл да анадан дариды, дана да әйелден туады. Қыз бала тәрбиесін ұрпақ тәрбиесі деп қарау қажет. Бүгінгі қазақ бойжеткендері ертеңгі еріне адал жар, болашақ ұрпақтың анасы екенін ұмытпайық.

"Қыз  тәрбиесі – ұлт байлығы " атты дөңгелек үстел өтті

<a href="https://kyzylorda-news.kz/">Kyzylorda-news.kz</a> Қызылорда қаласында каратэден жасөспірімдер арасында «Zhaniya school» қосымша білім беру орталығының жүлдесіне арналған қалалық ашық біріншілік өтті. Аталған жарыста сырдариялықтар жүлделі орыннан көрінді.Жарыс нәтижесі бойынша жерлестеріміз сайыпқырын спортшылар қатарынан табылды.Мәселен, ұлдар арасында 25 кг салмақ дәрежесінде Мадияр Ибрай І орын, &nbsp;30 кг салмақ дәрежесінде Асылжан Қазыбек ІІ орын,-30 кг салмақ дәрежесінде Аңсар Ғалымжан ІІІ орын еншіледі. &nbsp;35 кг салмақ дәрежесінде Ибраһим Сейткамалұлы І орын,+35 кг салмақ дәрежесінде Нұрасыл Бақытбекұлы І орын&nbsp;және Жанболат Ибрагим 2 орын еншіледі.Ал 30 кг салмақ дәрежесінде Алихан Талғатұлы ІІ орын,-35 кг салмақ дәрежесінде Әділет Нұрлыбекұлы мен Дінмұхаммед Нұрбекұлы ІІІ орын, -40 кг салмақ дәрежесінде Ерасыл Бексейтов 1 орын &nbsp;-50 кг салмақ дәрежесінде Ернар Уалиханов ІІ орын иемденді.Сонымен қатар қыздар арасында -30 кг салмақ дәрежесінде Асылым Мәлікқызы ІІ орын &nbsp;-35 кг салмақ дәрежесінде Кәусар Мақсатқызы ІІ орынды&nbsp;жеңіп алды. Айта кетейік, спортшылардың жаттықтырушысы – Салтанат Мырзабекова. Шын мәнінде, сырдариялық спортшылар әрбір жарыста жеңіс тұғырынан көрінуде. Алдағы уақытта мұндай жарыстар жалғасатын табатын болады.

Сырдариялық спортшылар каратэден жеңімпаз атанды

<a href="https://kyzylorda-news.kz/">Kyzylorda-news.kz</a> &nbsp;Сырдария аудандық ауруханасында «12 мамыр – Халықаралық медбикелер күні» аясында салтанатты іс-шара өткізілген болатын. Аталған іс-шараға «AMANAT» партиясының аудандық филиалының атқарушы хатшысы Еркебұлан Жақып, Сырдария аудандық ауруханасының бас дәрігері Жалғасбек Үсенов, сала мамандары қатысты.Еңбегімен халық алғысына бөленген медбикелердің құрметіне арналған іс-шараны ашқан Сырдария аудандық ауруханасының бас дәрігері Жалғасбек Үсенов әріптестерін мерекемен құттықтады.<blockquote>– Бүгін керемет іс-шарада бас қосып отырмыз. Тынымсыз еңбегімен көпке танылған медбикелердің кәсіби мерекесімен шын жүректен құттықтаймын! Біз сала мамандарын қашанда мақтан етеміз. Аудандандық ауруханаға қарасты емдеу мекемелерінде медбикелердің алатын орны ерекше. Науқасқа ем-шара жасап, жұмысқа тиянақтылық танататын Сіздерге құрметіміз ерекше. Әрқашан аудан медицинасының абыройын асқақтата береңіздер, – деді бас дәрігер.</blockquote>Өз кезегінде «AMANAT» партиясының аудандық филиалының атқарушы хатшысы Еркебұлан Жақып сала мамандарына ақжарма тілегін жеткізді.<blockquote>– Мамыр айынан алғашқы күндерінен бастау мерекелер желісі «12 мамыр – Халықаралық медбикелер күнімен» жалғасын тауып отыр. Әрине, сала мамандарының жұмысы көзге көрінбейтін, асқан қиыншылықпен келетін күрделі мамандық саналады. Осындайда біз Сіздердің қызметтеріңізді жоғары бағалаймыз. Әрбір отбасында қуаныш, береке орнап, жұмыста табысты бола беріңіздер, – деді Еркебұлан Жақып.</blockquote>Бұл ретте, салтанатты іс-шарада талай жыл қажыр-қайратымен даралана білген, жұмыста абырой биігінен көрінген «Жалпы тәжірибелік» бөлімшесінің тіркеу мейіргері Маралкүл Қожақты, Аманкелді ауылдық дәрігерлік амбулотриясының мейіргері Лаура Әлімбетованы, «Перзентхана» бөлімшесінің кіші буын қызметкері Ақылай Шәденованы, Шаған ауылдық амбулотриясының кіші буын қызметкері Жұмабике Шандыбаеваны зейнеткерлік демалысқа шығарып салу рәсімі өтті. Табан аудармастан аудан медицинасында еңбек еткен сала мамандарына ерекше құрмет көрсетіліп, сый-сияпат ұсынылды.Медицина мамандары Қызылорда облыстық денсаулық сақтау басқармасы басшысы Олжас Искаковтың, аудан әкімі Берік Сәрменбаевтың, «SЕNIM» денсаулық сақтау жүйесі жұмыскерінің салалық кәсіподағының, «AMANAT» партиясының аудандық филиалының, Халықаралық «Қазақ тілі қоғамы» қоғамдық бірлестігінің аудандық филиалының, Қызылорда облысы бойынша мейіргер ісі мамандарының ассоциасы қоғамдық бірлестігінің, кәсіподақ ұйымының «Алғыс хаттарына» ие болды. Сонымен қатар облыстық денсаулық сақтау басқармасы тарапынан ұйымдастырылған жарыста үздіктер қатарынан көрінген сала мамандарына ерекше ілтипат жасалды.Айта кетейік, салтанатты іс-шара кезінде аудандық мәдениет үйінің өнерпаздары өнер көрсетті.

Сала мамандары құрмет төрінде

<a href="https://kyzylorda-news.kz/">Kyzylorda-news.kz</a>&nbsp; Домбыра – қазақ халқының ежелгі әуездік аспаптарының бірі. Сол арқылы даңқты күйшілер: Құрманғазы, Дәулеткерей, Тәттімбет, Дина, Сүгір, Қазанғап, Төлеген, Қаршыға, Секен, Айгүл тағы басқалары ұлттық өнеріміздің өркенін өрістетіп, айдай әлемге паш етті. Бармағынан бал тамған майталман домбырашылар қалың көрерменді құдіретті күйдің сиқырлы сарынымен баурап, жүректерге рухани ләззат сыйлады.&nbsp; Қатпарлы тарихымыздың көзіндей көрінген түрлі ескерткіштерге, сонымен бірге этнографтардан жеткен дерек көздеріне сүйенсек, домбыра мен туысқан халықтардың осыған ұқсас аспаптарының шығу тегі тереңде жатыр. Оның сонау орта ғасырдан бастау алып, бүгінгі күнге жеткені белгілі болып отыр. Кейде еліміздің кейбір аймақтарындағы халқымыздың осы бір аса қасиетті қос ішекті, көп пернелі музыкалық құралын жасаумен айналысатын шебер қолды ісімерлер туралы естігенде елең етіп, кеудемізде ризашылық сезімі бой көтеріп қалатын. Ел іші – өнер кеніші. Сөйтсек, бойында осындай қабілет-қарымы жеткілікті, талантты жандар Қазалы жерінде де бар екен. Ол Әйтеке би кентінің бесіншіші квартал аумағындағы жыр алыбы Жамбыл көшесінің тұрғыны Ерболат Яхияұлы Қанатбай. Оған арнайы жолығып, өмір жолы, кез келгеннің қолына түсе бермейтін кәсіпті таңдау сыры төңірегінде сұхбаттасудың сәтін келтірдік. &nbsp; С.Сейфуллин атындағы №165 мектебінен түлеп ұшқан Ерболат 1990-1992 жылдары Өзбекстанның астанасы – Ташкент қаласында әскер қатарындағы азаматтық борышын өтеді. Туған жерге оралысымен теміржолды сумен жабдықтау мекемесінде ағаш ұстасы болып еңбек ететін әкесі Яхияның қасына жұмысқа орналасады. Оқушылық шағында-ақ үй ішінің ұсақ-түйек шаруаларын ұсынақты атқарып, машықтанған жігіт ағаштан түйін түюдің құпия қырларын терең меңгеруге ден қойды. Аз уақыт бедерінде тапсырылған істі тиянақты да сапалы орындайтын дәрежеге жетті. Алайда тоқырау жылдарындағы нарықтық реформаның қатаң талабына сәйкес, бір топ ұжымдастарымен бірге қысқару қыспағына ұшырап, тым тәуір үйренісіп қалған мамандығымен қош айтысты. Аяқ-асты кездескен жайсыз жағдайға жабырқап, көңілін құлазытуға жол бермеуді ойлаған Ерболат үйден тапсырыс қабылдауға белбуды. Соның арқасында есік-терезе, үстел, қол жуғыш сияқты күнделікті тұрмысқа қажетті көптеген бұйымдар істеді. Бұл қарекеті отбасының шайлығын айыруға біршама көмегін тигізді.&nbsp; Бірде Ерболаттың жанына келген әкесі мұның маңдай терін төге жасаған заттарын көрді. Қуанышты пейілін жасырмай, еңбегінің жемісін ұзағынан көре беруіне тілектестігін арнады. Сосын үйдің көлеңкесіндегі сыпырғышты домбыра қылып, ойнап отырған кішкентай Айдосты көз қиығымен нұсқады. Балдырғанның аңғал қылығына сүйсінген әкесі: «Шырағым, мына жиеніңнің талабы таудай екен. Бұған енді ағаштан домбыра жасап бергенің жөн болар», – деп ұлына салмақ сала тіл қатты. Үлкен кісінің айтқан тілегін жерде қалдырмауға бекінген Ерболат қарындасы Динаның бір жасар сәбиі – Айдосқа аталған аспапты жасап, тапсыруға ынта қойды. Арада бірнеше күн өткенде домбыраның шағын түрі – шіңкілдек дайын болды.&nbsp; Кездейсоқ сәттілік дегенді қойсаңшы! Бұл оқиғадан кейін Ерболаттың бойында домбыра соғуға деген ерекше қызығушылық пайда болды. Алға қойған құштарлығы мен талпынысын мұның бірге оқыған сыныптас досы Мұхтар да қолдап, көмегін көрсетті. Ол Ерболатқа үйінен уақытында ауданның белгілі өнерпазы атанған әкесі Әбен Жолтаевтың домбырасын әкеліп береді. Соған қарап перне, сағақ, шанақтың жасалуын көріп, өлшемі мен орналастыруын үйренді. Талмай іздене жүріп, 19 пернеден тұратын домбыраны дүниеге әкелді. Көш жүре түзеледі. Алғашқысының біршама кемшін тұстары кездессе, бертін келе кеткен олқылықтарды ойға түйіп, ұқыптап жөндеуден жалықпады. Кейде қолынан шыққан аспабын тыңдармандарға танылған жергілікті домбырашылар Орақ Баубеков, Ерпазыл Жүсіпов, Мұрат Жебеевтерге көрсеіп, ақыл-кеңестерін алуды ұмытпады. Соның арқасында шеберлігі шыңдалып, тәжірибесі толыса түсті. Бұл күндері Ерболаттың домбыраларын интернет жарнамалары арқылы құлақтанған Астана, Алматы, Ақтөбе, Қызылорда, Орал, Ақтау, Байқоңыр және басқа да қалалардың тұрғындары алдырып, көптеп тұтынуда. Іскер жан домбырамен бірге бірнеше қобыз да соғып шығарыпты. Қазірде Ерболат аудандық мәдениет бөлімі, музыка мектебі, оқушылар үйі ұжымдарымен байланысын үзген емес. Өйткені олардығың ескі аспаптарын жаңғыртып, өтініш болып жатса, жаңадан жасап та береді.&nbsp; Бізбен әңгіме барысында Ерболат Яхияұлы:&nbsp; – Домбыра жасауға қарағай, қайың, терек ағашы қолайлы. Қарағай мен қайыңнан соғылғаны күй мен термеге, теректен істелгені ән айтуға жақсы келеді. Айналысып &nbsp;жүрген кәсібімнің машақаты жетіп артылады. Шанақты ыстық суға салып иіп, көлеңкеде кептіремін. Қатты ағашты тұз тұнбасына салып, икемге келтіремін.&nbsp; Дайындалған аспапты түссіз лакпен бояған дұрыс. Өте қалың етпей, жұқалап жақса беріктігін сақтауға көмектеседі. Шанақтың бетіне лакты барынша бірқалыпты, тегіс етіп, пайдалануға мән берген жөн, –деп өз кәсібінің кейбір көпке беймәлім жақтарын ақтарыла жеткізді. Дәл осы тұста жанымызда отырған Ерболаттың шешесі, Батыр ана Үрімхан сөзге араласып: Талаптыға нұр жауар» деген. Шүкір, баламның қолының месекері бар. Құдайым тіл көзден сақтап, бақыты мен бағы өрлей берсін!», – деді.&nbsp; Иә, асыл ананың шуақты көңілінен шыққан ақжарма тілегіне бізде қосыламыз.

Домбыра жасаудың шебері

<a href="https://kyzylorda-news.kz/">Kyzylorda-news.kz</a> “Таза Қазақстан” экологиялық акциясының “Мөлдір бұлақ” апталығы аясында &nbsp;«Байкен-U» ЖШС-нің ұжымы Сырдария өзенінің бойын қоқыстан тазарту жұмыстарын жүргізді.

"Мөлдір бұлақ": «Байкен-U» ЖШС ұжымы акцияға үлестерін қосты

<a href="https://kyzylorda-news.kz/">Kyzylorda-news.kz</a> Бүгін Қазалыда еліміз бойынша өткізіліп жатқан «Таза Қазақстан» экологиялық тазалық акциясының «Мөлдір бұлақ» апталығы аясында жаппай сенбілік жұмыстары өткізілді.Жүргізілген сенбілік жұмыстары барысында Әйтеке би кентінің орталық көшелері мен шет аймақтары, өндірістік аймақтар, қазақ - орыс қорымдарының аумағы, «Водокачкаға» барар жол, аудан аумағындағы каналдар мен өзендердің, бұлақтардың, аяқ су арықтарының айналасы шашылған күл-қоқыстардан тазартылды.Тазалық жұмыстарына мекеме, кәсіпорын қызметкерлерінен бөлек аудан тұрғындары да белсене атсалысып, өздерінің аулалары мен көшелерін тазалады.Аудан бойынша жалпы сенбілікке 136 мекеме, 2266 адам, 33 техника жұмылдырылды. Сондай-ақ 29.7 тонна тұрмыстық қатты қалдықтар арнайы орынға шығарылды.Еске сала кетсек, «Таза Қазақстан» экологиялық акциясы аясында облыс әкімі Нұрлыбек Нәлібаевтың экологиялық науқанға аймақ жұртшылығын белсене қатысуға шақырған үндеуі жарияланып, облыс көлемінде санитарлық тазарту, көркейту және көгалдандыру бойынша сенбіліктер ұйымдастырылып жатыр. Оған барлық аудандарда атсалысуда.

Қазақстан және Қызылорда облысының жаңалықтары