<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің студенті Дильназ Ержігітова «Қазақ ұлттық қыздар педагогикалық университетінің» ұйымдастыруымен өткен «Білімді қыздар – ұлттың ұйытқысы» атты республикалық студенттер айтысында Бас жүлдені жеңіп алды.Суырып салма ақындық өнерімен көзге түсіп жүрген Дильназ үшін бұл – университет қабырғасында жүріп қатысқан екінші айтыс. Бұған дейін ол Алматы қаласында өткен Абай атындағы Қазақ ұлттық педагогикалық университетінің дәстүрлі VIII халықаралық «Менің пірім – Сүйінбай» атты жас ақындар айтысында жүлделі ІІ орын иеленген болатын.Айтыс – халқымыздың рухани мұрасын ұрпақ санасына сіңіретін өнер. Дильназ осы өнерді ұлықтап, суырып салма қабілетімен дараланып келеді.Университет ұжымы жас ақынға алдағы шығармашылық жолында сәттілік пен шабыт тілейді.

Дильназ Асқарқызы республикалық айтыста Бас жүлдені жеңіп алды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Қызылорда облысының прокуроры Ризабек Ожаров білім алушылармен кездесу өткізді.Шараның негізгі мақсаты – қоғамдағы құқықтық мәдениетті арттыру, жастардың заңға деген көзқарасын қалыптастыру және құқықтық сауаттылықты жетілдіру.Кездесуді университеттің Басқарма Төрағасы – Ректор Бейбіткүл Каримова ашып, оның маңыздылығына тоқталды. Ол өз сөзінде құқық қорғау органдары мен университет арасындағы тығыз байланыстың маңызын атап өтті. Сонымен қатар, жастардың құқықтық білімін арттыруда мұндай кездесулердің тиімді екенін айтып, университет тарапынан білім алушылардың құқық саласындағы кәсіби дамуына бағытталған бастамалар әрдайым қолдау табатынын жеткізді.Жиынға университеттің студенттері мен «Экономика және құқық» институтының оқытушылары қатысты. Бүгінде аталған институттың «Құқықтану» білім беру бағдарламасында 414 студент білім алуда. Олар азаматтық, әкімшілік және қылмыстық құқық салалары бойынша білім алып, «Студенттік заң клиникасы» мен «Жас заңгерлер» ғылыми-шығармашылық үйірмесі аясында теориялық білімдерін тәжірибемен ұштастырып келеді.Кездесу барысында Ризабек Кәрімұлы студенттермен өзінің қызметтік жолындағы тәжірибесімен бөлісіп, құқық қорғау саласының ерекшеліктері мен талаптары жайлы кеңінен әңгімеледі. Сондай-ақ, жастарға заң алдындағы жауапкершілікті сезініп, әділетті қоғам құруда белсенді болуға шақырды.Кездесу соңында&nbsp;оқытушылар мен студенттер өздерін толғандырған түрлі мәселелер бойынша сұрақтар қойып, прокурормен еркін форматта пікір алмасты.<img src="https://knadmin.beoblood.kz/uploads/Studenttermen_kezdesu_1_1ae8178536.jpg" alt="Студенттермен кездесу 1.jpg">

 Қызылорда облысының прокуроры студенттермен кездесті

<a href="https://kyzylorda-news.kz/">Kyzylorda-news.kz</a> &nbsp;Елордада «Назарбаев Зияткерлік мектептері» дербес білім беру ұйымының халықаралық XIV NIS Conference 2025 конференциясы өтеді. Биылғы жиынның тақырыбы – «Цифрлық дәуірдегі мектеп білімі: басты трендтер мен талаптар».Конференция педагогтер, зерттеушілер мен білім беру саласының жетекші мамандарын біріктіретін ірі кәсіби алаңға айналады. АҚШ, Ұлыбритания, Нидерланды, Финляндия, Аустралия, Гонконг сияқты елдердің сарапшылары, сондай-ақ қазақстандық мектептер, жоғары оқу орындары мен ғылыми-зерттеу орталықтарының өкілдері мектептегі білім беру үдерісіне цифрлық технологиялардың әсерін жан-жақты талқылайды.Басқосу барысында оқытудың жаңа әдістемелері, оқушылардың цифрлық сауаттылығы, PISA 2025 аясында білім мен дағдыларды бағалау тәсілдері қарастырылады. Сонымен қатар жасанды интеллекттің (ЖИ) білім беру жүйесіндегі мүмкіндіктері мен қауіп-қатері талқыланады. Қатысушылар цифрлық трансформация жағдайында мұғалімнің рөлін бағамдап, әлемдік үздік тәжірибелермен танысады.Конференция аясында EdTech көрмесі ұйымдастырылады. Мұнда заманауи цифрлық шешімдер, оқу ресурстары, білім беру платформалары мен мектептік білім беру саласындағы инновациялық әзірлемелер ұсынылады. Қатысушылар жаңа технологиялармен танысып, әзірлеушілермен тәжірибе алмасып, мектеп тәжірибесіне енгізуге болатын нақты құралдарды таба алады.NIS халықаралық конференциясы дәстүрлі түрде білім, тәжірибе және инновациялар алмасудың бірегей алаңы саналады. Бұл шара әрбір педагогке әлемдік сарапшылардың пікірін тыңдап қана қоймай, мектептегі білім берудің болашағына ықпал ететін жаһандық кәсіби қауымдастықтың бір бөлшегі болуға жол ашады.XIV NIS Conference 2025 Астана қаласында 30–31 қазанда өтеді. Толығырақ ақпарат пен тіркеу сілтемесі: <a href="https://beyim.edu.kz/conference">https://beyim.edu.kz/conference</a>

Білім беру саласының көшбасшылары Астанада бас қосады

<a href="https://kyzylorda-news.kz/">Kyzylorda-news.kz</a> &nbsp;Бүгін Қызылорда қаласындағы «Мұз айдыны» спорт кешенінде тоғызқұмалақтан ерлер және әйелдер арасындағы Х Қазақстан Республикасының командалық чемпионаты басталды. Аталмыш чемпионаттың басты мақсаты – тоғызқұмалақты дамыту, жастар арасында танымал ету және еліміздің зияткерлік әлеуетін арттыру.Зияткерлік спорт түрінен өтетін айтулы додаға еліміздің түкпір-түкпірінен келген 30-дан астам үздік спортшы қатысуда.Салтанатты ашылу рәсіміне Қызылорда облысының дене шынықтыру, спорт және туризм басқармасы басшысының орынбасары Жігер Оңдасынұлы, ҚР Тоғызқұмалақ спорт федерациясы заңды тұлғалар бірлестігінің президенті Әкім Хазіретәліұлы, ҚР Еңбек сіңірген жаттықтырушысы, Мемлекеттік жаттықтырушы Дәулет Ұзаққалиұлы және тоғызқұмалақтан ҚР бас жаттықтырушысы, ҚР Еңбек сіңірген жаттықтырушысы Айнұр Әбсадыққызы қатысты.Шарада алғашқы құттықтау сөз алған Жігер Оңдасынұлы қатысушыларға сәттілік тілеп, ұлттық ойынды дәріптеудің маңыздылығын атап өтті. Ол өз сөзінде тоғызқұмалақ тек спорттық жарыс емес, сонымен қатар халқымыздың тарихи-мәдени құндылығын айшықтайтың маңызды сайыс екенін ерекше атап өтті.<blockquote>- Бүгінде біздің облыста тоғызқұмалақпен 10 мыңға жуық спортшы тұрақты айналысады. Жыл сайын өтетін түрлі жарыстарда да біздің үздік спортшылар жүлделі орындарға ие болып, жоғары нәтиже көрсетуде. Осының арқасында жыл сайын тоғызқұмалақ спортына қызығушылық танытушылар айтарлықтай көбейіп келеді. Бүгінгі ой сайысы да жоғары деңгейде өтіп, шын мықтылар жеңіске жетсін деген тілек білдіремін, - деді басқарма басшысының орынбасары.</blockquote>Сондай-ақ, ҚР Тоғызқұмалақ спорт федерациясы заңды тұлғалар бірлестігінің президенті Әкім Хазіретәліұлы сөз алып, барша қатысушыларға сәттілік тіледі.Аталмыш жарыс 23 мамырға дейін жалғасып, командалар өзара мықтыны анықтамақ.<img src="https://knadmin.beoblood.kz/uploads/yzylordada_to_yz_mala_tan_R_komandaly_chempionaty_bastaldy_1_fb4f1fae30.jpg" alt="Қызылордада тоғызқұмалақтан ҚР командалық чемпионаты басталды 1.jpg">Фото: Қызылорда облысының дене шынықтыру, спорт және туризм басқармасы

Қызылордада тоғызқұмалақтан ҚР командалық чемпионаты басталды

<a href="https://kyzylorda-news.kz/">Kyzylorda-news.kz</a> &nbsp; Бүгін Қызылордада облыс әкімі Нұрлыбек Нәлібаевтың қатысуымен «Қазақстан Республикасында тәуелсіз мейіргерлік қызметтің озық тәжірибелерін енгізу» тақырыбында халықаралық ғылыми-тәжірибелік конференция өтті. Оған Денсаулық сақтау министрі Ақмарал Әлназарова, Дүниежүзілік денсаулық сақтау ұйымының Қазақстандағы сақтандыру кеңсесі басшысы Скендер Сыла, онлайн режимде Дүниежүзілік денсаулық сақтау ұйымы Еуропалық аймақтық бюросының директоры Ханс Клюге, Германия, Қырғызстан, Латвия, Өзбекстан, Ресей, Түркия, Финляндия мемлекеттерінің өкілдері, ғалымдар, барлық өңірдің денсаулық сақтау басқармасының басшылары, дәрігерлер, мейіргерлер, медициналық оқу орындары мен клиника басшылары қатысты.Конференцияда аймақ басшысы денсаулық сақтау саласының қызметкерлеріне арналып 100 пәтерлік жаңа тұрғын үй салынатынын айтты.<blockquote>«Өңірде медицина қызметкерлерін шетелде оқыту үрдісі 5 жылдан соң қайта жаңғыртылып, қолға алынды. Саланы білікті кадрлармен қамтамасыз ету де басты назарымызда. Былтыр жергілікті бюджет қаражаты есебінен мамандар біліктілігін арттыруға 144 млн теңге бөлінді. Облыстың медициналық ұйымдарының 30 дәрігері хирургия, эндоскопия, неврология, кардиохирургия, неанаталды хирургия, балалар ортопедиясы бойынша Түркия, Ресей, Беларусь Республикаларының жетекші клиникалық-академиялық базаларында білім жетілдірді. Колледж оқытушыларының өзге елдерде тағылымдамадан өтіп, жастардың да тәжірибе алмасуы ертеңгі күні өз жемісін береді. Аймақта медицина мамандарын даярлауға, біліктілігін арттыруға әркез қолдау көрсете береміз. Бүгінгі жас маман – ертең адам өмірі мен денсаулығының сақшысы.Өңірге аса қажетті медицина мамандықтары бойынша 176 резидент облыс әкімінің грантымен білім алуда. «Жалпы тәжірибелі дәрігер» мамандығы бойынша маман даярлауға облыс әкімінің 177 білім беру гранты бөлінді. Халықаралық байланыстың артуы болашақ тәжірибелі мамандар даярлауға зор үлес қосуда.Жалпы әлеуметтік сала қызметкерлерінің тұрмысына баса назар аударып, материалдық қолдауды тұрақты көрсетіп келеміз. Өткен жылы мәдениет саласының қызметкерлеріне алғаш рет көпқабатты тұрғын үй салынып, 40 жаңа қызметтік пәтер табысталды. Бүгінгі халықаралық маңызды шарада денсаулық сақтау саласының қызметкерлеріне де 100 пәтерлік жаңа тұрғын үй салу жөнінде шешім қабылдадық. Жақын арада құрылысы басталып, жыл соңына дейін табысталады», – деді Н.Нәлібаев.</blockquote>Айта кетейік, соңғы екі жылда облыстың барлық елді мекеніндегі денсаулық сақтау мекемелеріне 225 жаңа санитарлық автокөлік табысталды. Халық сұранысына сәйкес 45 жедел жәрдем көлігі алынып, облыстық медициналық жедел жәрдем стансасы 100 пайыз қамтамасыз етілді. Осылайша санитарлық автокөлікпен қамту мәселесі толық шешімін тапты.<img src="https://knadmin.beoblood.kz/uploads/Densauly_sa_tau_salasyny_yzmetkerlerine_100_p_terlik_zha_a_t_r_yn_j_2_d3781385df.jpg" alt="Денсаулық сақтау саласының қызметкерлеріне 100 пәтерлік жаңа тұрғын үй 2.jpg">Аймақтың медицина саласын өркендетуге бюджеттен тыс ресурстар да тартылуда. «Қазақстан халқына» қоғамдық қоры соңғы екі жылда өңірдің денсаулық сақтау саласына 4 млрд. теңге қаржы бағыттады. Бұл қаржыға облыстық балалар ауруханасы базасында «Қамқорлық» орталығы ашылып, қажетті дәрі-дәрмек алынды. Қор облыстық онкология орталығын құны 1 млрд. 100 млн. теңге тұратын скрининг жүргізуге арналған жылжымалы медициналық кешенмен қамтамасыз етті. Мұндай кешен республиканың 3 өңірінде ғана бар. Қазір шалғай елді мекендердегі тұрғындарға тұрақты қызмет етуде.<img src="https://knadmin.beoblood.kz/uploads/Densauly_sa_tau_salasyny_yzmetkerlerine_100_p_terlik_zha_a_t_r_yn_j_1_fbc21f9bdc.jpg" alt="Денсаулық сақтау саласының қызметкерлеріне 100 пәтерлік жаңа тұрғын үй 1.jpg">Атқарылған жұмыстар нәтижесіз емес, өмір сүрудің орташа ұзақтығы облысымызда 74,5-тен 75,2 жасқа артты.Фото: Қызылорда облысы әкімінің баспасөз қызметі

Облыс әкімі: «Денсаулық сақтау саласының қызметкерлеріне 100 пәтерлік жаңа тұрғын үй салу жөнінде шешім қабылдадық»

<a href="https://kyzylorda-news.kz/">Kyzylorda-news.kz</a> &nbsp;Қазақстанның барлық өңірінен келген 350 өндіруші өз өнімін Астанадағы «Ulttyq ónim» VIII отандық өндірушілер көрмесінде ұсынды.EXPO халықаралық көрме орталығында басталған сегізінші жылсайынғы көрмеде қазақстандық өндірушілер тамақ, жеңіл, химия өнеркәсібі, машина жасау, жабдықтар, зергерлік бұйым мен басқа да мыңдаған тауар түрін ұсынды. Экспозицияға қатысқан барлық кәсіпорынға еліміздегі шағын және орта бизнеске қолдау жасайтын негізгі қаржы институты «Даму» қоры қаржылай және басқа да көмек көрсетті.<blockquote>«Ulttyq ónim сегізінші көрмесі – отандық кәсіпкерлікті дамытудың ең жақсы дәлелі мен көрінісі. Өндірушілер еліміздің ішкі нарығындағы ұстанымын нығайтып, экспортқа шығуда. Шетелде танымал брендке айналып жатыр. Ал шағын және орта бизнесті мемлекеттің қолдауы тек күшейе бермек. Биыл экономиканың нақты секторын жедел дамытуға бет бұрдық. Мемлекет ақпараттық технология, логистика, туризмге, тамақ өнімін, құрылыс материалын өндіруге, машина жасау, жеңіл және химия өнеркәсібі сияқты басым салалардағы ШОБ инвестициялық жобаларына ашық тапсырыс жариялады. Бұл бағытта жан-жақты қолдау көрсетіледі», — деп атап өтті көрменің ашылуында Премьер-министрдің орынбасары – ұлттық экономика министрі Серік Жұманғарин.</blockquote>Көрмеде ас үй плиталары, желдеткіш, медициналық жабдықтар, трансформаторлар, құрама жем, чемодандар, тоқыма бұйымдары, құрылыс материалдары, антисептиктер, киім, аяқ киім және басқа да сұранысқа ие тауарлар ұсынылған. Қатысушылардың бірі зарарсыздандыру және жуу құралын өндіруші «Аврора» өндірістік кешені» ЖШС нарықта 15 жылдан бері жұмыс істеп келеді. Мұнда косметикалық өнімнің 40, тұрмыстық химияның 55, зарарсыздандыру құралының 80-нен астам түрі бар.<blockquote>«Біз өнім өндіруде тиімділікке, қауіпсіздік пен тауардың тым қымбат болмауына баса назар аударамыз. Бізден ыдыс жууға арналған сабын, сұйық сабын, әйнек жууға, ас үйге, кір жууға арналған тұрмыстық химияны сатып алуға кеңес береміз. Біз желіні үнемі жаңартып отырамыз. Жаңа өнімдердің арасында үй мен кеңсеге арналған хош иісті диффузорлар бар. Booboo брендімен балаларға арналған өнімдердің сан алуан түрін шығарудамыз. Өнімдеріміз Қазақстандағы сауда желілерінде, маркетплейстерде және таяу шет елдерде кеңінен ұсынылған», — деді «Аврора» өндірістік кешені» ЖШС өңірлік директоры Ермек Еркінов.</blockquote>2024 жылы «Бәйтерек» холдингінің субсидиялау және кепілдік беру құралдары арқылы Үкімет бизнесті қолдау бағдарламаларын іске асыруға 336 млрд теңге бөлді. 2,7 мың жобаға 254 млрд теңге жеңілдетілген несие берілсе, жалпы 29,5 мың жоба 1,7 трлн теңгеге мемлекеттің қолдауына ие болды. Бұл шаралар 9,7 мың жұмыс орнын ашуға, 25,4 трлн теңгенің өнімін шығаруға, 1,7 трлн теңге салық түсіміне мүмкіндік берді. Нәтижесінде 2024 жылы ШОБ секторында жұмыспен қамтылғандар үлесі халықтың 48%-на тиесілі болса, ЖІӨ-ге қосылған үлес шамамен 40%-ды құрайды.

Серік Жұманғарин Ulttyq ónim – 2025 атты отандық өндірушілер көрмесін ашты

<a href="https://kyzylorda-news.kz/">Kyzylorda-news.kz</a> Бүгін Мемлекеттік қызмет істері агенттігінің төрағасы Дархан Жазықбай Президенттік жастар кадр резервіне кезекті іріктеудің ерекшеліктері мен кезеңдері туралы айтты.Агенттік төрағасы, Президенттік жастар кадр резерві – дарынды, бастамашыл, кәсіби білікті жастарды мемлекеттік басқару жүйесіне тартуға бағытталған маңызды жоба екендігіне назар аударды. Мемлекет басшысы Президенттік жастар кадр резервінің форумында атап өткендей, «еліміздегі бизнес, ауыл шаруашылығы, қаржы, медицина, білім және басқа да секторларда табысты еңбек етіп жүрген адамдар жеткілікті. Нақты нәтижеге ұмтылып, тұтынушының қажеттілігін өтеу үшін жұмыс істейтін осындай мамандардың әлеуетін жұмылдыру керек».Бұған дейін 2019, 2021 және 2023 жылдары өткен іріктеулерге қатысуға жалпы 60 мыңнан астам қазақстандықтар қызығушылық танытты. Іріктеулер қорытындысы бойынша резервке 400 адам қабылданды. Бүгінде олардың 318-і жауапты қызметтерге тағайындалып, экономиканың түрлі салаларында еліміздің дамуына өз үлестерін қосуда.Атап айтқанда, 167 – орталық мемлекеттік органдарда, 37 -жергілікті атқарушы органдарда, 62 – ұлттық компанияларда, 52 – өзге ұйымдарда қызмет атқаруда. Сондай-ақ 39 резервші саяси лауазымдарда, 3 – «А» корпусының лауазымдарында, 2 – Мәжіліс депутаты, 1 – мәслихат депутаты болып қызмет етуде.Дархан Жазықбайдың айтуынша, биылғы іріктеудің басты ерекшелігі – әр бағыт бойынша кандидаттардың біркелкі санын қамтамасыз ету мақсатында әрбір кезеңде пропорционалды іріктеу өткізу. Резервтің әр салалық бағыты бойынша квоталар қарастырылып, іріктеу сол салалық бағыт бойынша ғана жүргізілетін болады. Бұл әдіс салалар арасындағы теңгерімді қамтамасыз етіп, нақты бағыттар бойынша үміткерлерді іріктеуді қамтамасыз етеді.Іріктеу мемлекеттік аппараттың салалық кадрларға қажеттілігін ескере отырып, инфрақұрылым, өнеркәсіп және сауда саясаты, агроөнеркәсіптік кешен және қоршаған орта, сыртқы саясат және инвестициялар; экономикалық және қаржылық саясат, цифрландыру, әлеуметтік саясат және азаматтық қоғам сынды 6 негізгі сала бойынша жүргізіледі. Кандидат тіркелу кезінде көрсетілген салалық бағыттардың бірін таңдауы қажет.Үміткерлерге қойылатын талаптар өзгеріссіз қалады: іріктеуге жасы 35-тен аспаған, жоғары білімі және 5 жыл жалпы жұмыс тәжірибесі бар, мемлекеттік тілді В1 деңгейінен төмен емес меңгерген Қазақстан Республикасының азаматы қатыса алады.Президенттік жастар кадр резервінің мүшесі болу үшін үміткерлер 6 кезеңнен тұратын кешенді іріктеуден өтуі тиіс.Құжаттарды қабылдау – 1-30 маусым аралығында pkrezerv.gov.kz ресми платформасында онлайн режимде жүзеге асырылады. Іріктеудің объективтілігін қамтамасыз ету үшін кандидаттардың деректері жеке нөмір беру арқылы жасырылады. Бағалаушылар үшін үміткердің кім екендігі беймәлім болады.Мәтіндік және сандық ақпаратпен жұмыс істеу қабілетін бағалау – тестілеу прокторинг жүйесімен, аудио және бейнефиксациямен өтеді, әділдік пен ашықтық қамтамасыз етіледі. Талаптарға сәйкес келетін барлық кандидаттар мәтіндік ақпаратпен жұмыс істеу қабілетін бағалаудан өтеді. Бұл ретте сандық тестілеуге әр салалық бағыт бойынша ең көп балл жинаған кандидаттардың 50%-ы жіберіледі.Ситуациялық тапсырмаларды шешу кезеңі – кандидаттардың таңдаған салалық бағыттарына байланысты нақты проблемаларды шешу бойынша ұсыныстарын бағалауға бағытталған. Бұл кезең онлайн-режимде эссе жазу форматында өтеді.Ассессмент-орталығы мен құзыреттер бойынша сұхбат – офлайн форматта, Президент жанындағы мемлекеттік басқару академиясында өтетін бұл кезеңде үміткерлер мінез-құлық индикаторлары және кәсіби құзыреттер бойынша топтық және жеке тапсырмалардан өтеді. Онлайн форматтағы жеке сұхбат кәсіби HR-менеджерлермен өткізіледі.Сарапшылық комиссиямен әңгімелесу – арнайы комиссиямен сұхбаттасу түрінде жүзеге асырылады. Оның қорытындысы бойынша Ұлттық комиссия отырысына 100-ден аспайтын кандидаттар тізімі ұсынылады.Ұлттық комиссияның отырысының қорытындысымен үздік 50 кандидат Президенттік жастар кадр резервіне қабылданады.Іріктеудің ашықтығы мен әділдігін қамтамасыз ету мақсатында кандидаттарды бағалау нәтижелері олардың жеке кабинетінде және кезең қорытындысы бойынша ақпарат ресми сайтта жарияланады.Агенттік төрағасы ел мүддесіне қызмет етемін деген белсенді жас азаматтарды Президенттік жастар кадр резервіне қатысуға шақырды.<blockquote>«Білімді, еңбекқор, отанға қызмет етуді парыз санайтын жастар – еліміздің тұрақты дамуының басты қозғаушы күші. Жастардың білімін, әлеуеті мен күш-жігерін ел игілігі үшін тиімді пайдалану, қоғамдық мүдделерге негізделген кәсіби мемлекеттік қызметшілердің жаңа буынын қалыптастыру – Агенттік жұмысының басты бағыттарының бірі», – деді Дархан Жазықбай.</blockquote>

1 маусымда Президенттік жастар кадр резервіне кезекті іріктеу басталады

<a href="https://kyzylorda-news.kz/">Kyzylorda-news.kz</a> &nbsp; Бүгін Қызылордада облыс әкімі Нұрлыбек Нәлібаевтың қатысуымен «Қазақстан Республикасында тәуелсіз мейіргерлік қызметтің озық тәжірибелерін енгізу» тақырыбында халықаралық ғылыми-тәжірибелік конференция өтті.Оған Денсаулық сақтау министрі Ақмарал Әлназарова, Дүниежүзілік денсаулық сақтау ұйымының Қазақстандағы Елдік кеңсесінің басшысы Скендер Сыла, онлайн режимде Дүниежүзілік денсаулық сақтау ұйымы Еуропалық аймақтық бюросының директоры Ханс Клюге, Германия, Қырғызстан, Латвия, Өзбекстан, Ресей, Түркия, Финляндия мемлекеттерінің өкілдері, ғалымдар, барлық өңірдің денсаулық сақтау басқармасының басшылары, дәрігерлер, мейіргерлер, медициналық оқу орындары мен клиника басшылары қатысты.Конференцияның мақсаты – халықаралық тәжірибені ескеріп, тәуелсіз мейіргерлік қызметті дамыту, орта медициналық қызметкерлердің денсаулық сақтау жүйесіндегі рөлін арттыру, олардың басқарушылық, сараптамалық, клиникалық құзыреттілігін нығайту.Облыс әкімі Мемлекет басшысының тапсырмаларын жүзеге асыру барысына, Сыр медицинасындағы жаңашылдықтарға тоқталды.<img src="https://knadmin.beoblood.kz/uploads/aza_stan_Respublikasynda_t_uelsiz_mejirgerlik_yzmetti_1_ecba3462dc.webp" alt="«Қазақстан Республикасында тәуелсіз мейіргерлік қызметтің 1.webp"><blockquote>«Президентіміз Қасым-Жомарт Кемелұлы 2025 жылды «Жұмысшы мамандықтар жылы» деп жариялап, «Біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз. Бұл «Адал азамат – Адал еңбек – Адал табыс» қағидатына толық сай келеді», – деген болатын.Өңіріміздің медицина мекемелерінде 12 мыңға жуық мейіргер еңбек етеді. Олардың халық денсаулығын жақсартуға қосқан үлесі өлшеусіз деп айтуға болады. Дені сау ұрпақ – Әділетті Қазақстанның келешегі. Ұлт саулығын нығайтып, сапалы медициналық қызмет көрсету – мемлекеттің басты міндеттерінің бірі.Өткен жылы аймақтың денсаулық сақтау саласының бюджеті 146 млрд. 200 млн. теңгені құрады. «Ауылда денсаулық сақтауды жаңғырту» ұлттық жобасы аясында барлық ауданда 28 медициналық нысан салынды. Жылына 10 мың адамға дейін қызмет көрсетуге мүмкіндігі бар жаңа Қан орталығы ашылып, ел игілігіне қызмет етуде. Ана мен бала өмірін қорғауда көпбейінді облыстық аурухана базасында жаңа МРТ аппараты іске қосылып, 70 орындық перинаталдық бөлім ашылды. Облыс орталығында емханасы мен онкологиялық бөлімшесі бар 300 орындық көпбейінді аурухана құрылысы жүруде. Бұдан бөлек, ұлттық жоба аясында 4 көпбейінді аудандық орталық аурухана жанынан қосымша құрылыс салынуда. Өткен жылы 8 медициналық нысанға күрделі жөндеу жұмыстары жүргізілсе, енді 6 нысанның жылу жүйесі газға ауыстырылады. Қажетті медициналық құрал-жабдықтар сатып алынып, жабдықталу деңгейі 87,1 пайызға артты. Медицина саласын білікті кадрлармен қамтамасыз ету де басты назарымызда. Былтыр жергілікті бюджет қаражаты есебінен мамандар біліктілігін арттыруға 144 млн теңге бөлінді.Халықаралық ғылыми-практикалық конференцияда жасалған баяндамалар, айтылған ой-пікірлер, ұсыныстар сарапталып, оң нәтиже береді деп сенеміз», – деді Н. Нәлібаев.</blockquote>Конференцияда Ақмарал Әлназарова, Ханс Клюге, Скендер Сыла сөз сөйлеп, медицина саласындағы жетістіктерге тоқталды. Денсаулық сақтау министрлігі С.Қайырбекова атындағы денсаулық сақтауды дамытудың Ұлттық ғылыми орталығының басқарма төрағасы, медицина ғылымдарының кандидаты Гүлнар Құлқаева, Қызылорда жоғары медициналық колледжінің директоры, медицина ғылымдарының кандидаты Жанар Қалмақова баяндама жасады.<img src="https://knadmin.beoblood.kz/uploads/aza_stan_Respublikasynda_t_uelsiz_mejirgerlik_yzmetti_2_4980c00575.webp" alt="«Қазақстан Республикасында тәуелсіз мейіргерлік қызметтің 2.webp">Басқосуда Қызылорда облысының денсаулық сақтау саласының дамуына қосқан үлесі үшін мамандар «Еңбек ардагері» медалімен, «Денсаулық сақтау ісіне қосқан үлесі үшін», «Денсаулық сақтау ісінің үздігі» төсбелгісімен, облыс әкімінің Алғыс хатымен марапатталды. Сондай-ақ, Дүниежүзілік денсаулық сақтау ұйымының Алғыс хаты, медициналық колледж cтуденттеріне шетелдік оқу орындарына жолдамалар табысталды.Іссапар аясында Денсаулық сақтау министрлігінің делегациясы, республикалық медициналық ұйымдар мен өңірлердің денсаулық сақтау басқармасы басшылары облыс орталығы мен аудандардағы медицина ұйымдарының жұмысымен танысып, тәжірибе алмасуда.Фото: Қызылорда облысы әкімінің баспасөз қызметі

«Қазақстан Республикасында тәуелсіз мейіргерлік қызметтің озық тәжірибелерін енгізу» тақырыбында халықаралық ғылыми-тәжірибелік конференция өтті

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласындағы NIS-тің 7-сынып оқушысы Нұрдәуіт Мұхтар «Science. Technology. Algorithmization. Programming» халықаралық ғылыми-тәжірибелік конференциясында «Автономды жұлдыз іздеуші» жобасын ұсынып, STEM номинациясы бойынша 375 қатысушының арасынан ІІ орынға ие болды.Жоба – телескопты автоматты түрде жұлдызға бағыттайтын Arduino платформасында жасалған құрылғы. Бұл жоба STEM білім беру бағытына, яғни ғылым (физика мен астрономия), технология, инженерия және математикаға негізделген.<blockquote>«Қазылар алқасы жобаның техникалық мүмкіндіктерін, идеясының өзіндік ерекшелігін және практикалық маңызын жоғары бағалады. Нұрдәуіттің өнертабысы қазіргі мектеп оқушыларының ғылым мен технологиядан шабыттанып, нақты инженерлік шешімдер жасай алатынын көрсетеді», – дейді жоба жетекшісі Айнұр Құрақбаева.</blockquote><img src="https://knadmin.beoblood.kz/uploads/N_Ish_607228a276.jpg" alt="НИш.jpg">

Автономды жұлдыз іздеуші: Нұрдәуіттің инженерлік жобасы

<a href="https://kyzylorda-news.kz/">Kyzylorda-news.kz</a> &nbsp; Арал ауданының әкімі Аманжол Оңғарбаев кезекті сапары барысында Қаратерең ауылында болып, елдегі ағайынның талап-тілегіне құлақ түрді.Ауыл халқымен өткен кездесуде аудан басшысы Аманжол Сақыпұлы жыл басынан бері ауданда атқарылған жұмыстарды баяндап, жүзеге асырылып жатқан ірі жобалар жөнінде тоқталып өтті. Сондай-ақ ауылға ортақ кейбір мәселелерден хабардар екенін жеткізіп, оларды алдағы уақытта шешу жолында жұмыстар жүргізілетіндігін жеткізді.Ауылдағы қатынас құралына айналған жол мәселесі кезең-кезеңімен шешімін тауып келеді. Сәтін салса осы жылы ауылдағы үш көше асфальттанып, электр желісіне байланысты қолға алынған жобалар да қолдау табады деген үміт бар.Кездесу барысында аудан әкімі ел тұрғындарының ұсыныс-пікірлеріне құлақ түріп, көтерілген мәселелердің барлығын назарға алды. Ауыл тұрғындары жол мен жайылымдық жер және елдің ырысына баланған көлдер жүйесіндегі кейбір мәселелерге алаңдаушылық білдірді.Аудан басшысы кейбір сұрақтарға заңдылығына сай жауап беріп, мүмкіндікке қарай тиісті жұмыстар жүргізілетінін жеткізді.Кездесуден соң аудан әкімі жеке қабылдау өткізді. Ауыл тұрғыны, көп балалы ананы жұмыс мәселесімен қабылдап, өтінішіне құлақ түрді. Қабылдауда айтылған өтінішті оңтайлы шешілуін қадағалау үшін жауапты тұлғаларға заң аясында түсіндірме беріп, шешу жолдарын қарастыруды тапсырды.Фото: Арал ауданы әкімдігі

Қаратереңде өзекті мәселелер шешімін тауып келеді

<a href="https://kyzylorda-news.kz/">Kyzylorda-news.kz</a> &nbsp;2025 жылғы 1 мамырдағы жағдай бойынша жұмыспен қамтуға жәрдемдесудің белсенді шараларымен 157,8 мың адам қамтылды, 143,2 мың қазақстандық жұмысқа орналастырылды.Субсидияланатын жұмыс орындарына мансап орталықтары арқылы 106,3 мың адам жіберілді, оның ішінде: әлеуметтік жұмыс орындарында 9,6 мың адам, жастар практикасында 6,6 мың адам, қоғамдық жұмыстарда 78,3 мың адам, «Күміс жас» жобасы аясында 11,1 мың адам, «Алғашқы жұмыс орны» жобасы бойынша 680 адам, «Ұрпақтар келісімшарты» жобасы шеңберінде 33 адам жұмыспен қамтылды.Еңбек нарығындағы сұранысқа ие дағдылар бойынша онлайн оқытумен 36,6 мың жұмыссыз қамтылды, оның ішінде 34,5 мыңы оқуды аяқтады.«Бастау Бизнес» жобасы бойынша кәсіпкерлік негіздеріне оқытумен 14,1 мың адам қамтылды, оның ішінде 7,3 мың адам оқуды аяқтап, сертификаттар алды.Жұмыс берушілердің өтініші бойынша кәсіптік оқытуға 802 адам жіберілді, оның ішінде 51 адам оқуды аяқтады.Бұдан басқа, қызмет саласын таңдау мақсатында кәсіптік орталықтарда 140,7 мың адам әлеуметтік кәсіптік бағдарлаудан өтіп, кеңес беру қызметтерін алды.Азаматтарды жұмысқа орналастыру бірнеше бағыт бойынша жүзеге асырылатынын және шын мәнінде жұмысқа орналасқандығы олар үшін міндетті зейнетақы жарналарының аударылуымен расталатынын атап өткен жөн.Мәселен, 2025 жылғы 1 мамырда 143,2 мың адам жұмысқа орналастырылды, оның ішінде: халықты жұмыспен қамтуға жәрдемдесудің белсенді шаралары шеңберінде – 87,8 мың адам; Электрондық еңбек биржасында жұмыс берушілер орналастырған бос бос орындарға – 31,7 мың адам; Мемлекет басшысының «10 мың тұрғынға 100 жұмыс орны» бастамасы шеңберінде – 23,6 мың адам. орталық мемлекеттік органдар іске асыратын жобалар шеңберінде – 42 адам.Сонымен қатар, жаңа бизнес-бастамаларды іске асыру үшін 2025 жылы халықтың әлеуметтік осал санаттарына жаңа бизнес-бастамаларды іске асыру үшін 400 АЕК (1 572 800 теңге) дейінгі мөлшерде 9 мың грант беру көзделген. Грант алуға үміткерлерден өтінімдерді қабылдаудың бірінші легі 2025 жылғы 21 мамыр мен 3 маусым аралығында өтеді.Фото: freepik.com

Жыл басынан бері 158 мыңға жуық адам жұмыспен қамтуға жәрдемдесудің белсенді шараларымен қамтылды

<a href="https://kyzylorda-news.kz/">Kyzylorda-news.kz</a> &nbsp;Қызылорда облысындағы Көкарал бөгетінде Су ресурстары және ирригация министрі Нұржан Нұржігітов Дүниежүзілік банктің Еуропа және Орталық Азия бойынша аймақтық директоры Самех Вахбамен кездесті.Кездесуде тараптар Солтүстік Арал теңізін сақтауға арналған жобаның екінші кезеңін іске асыру мәселесін талқылады.Қазіргі уақытта Су ресурстары және ирригация министрлігі жобаның екінші кезеңіне қатысты техникалық-экономикалық негіздемені (ТЭН) әзірлеу жұмыстарын аяқтауға жақын. Онда Көкарал бөгетін қайта жаңғырту және Балтық жүйесі бойынша теңіз деңгейін 44 метрге дейін көтеру, сондай-ақ Қызылорда облысы Арал ауданындағы Ақшатау және Қамыстыбас көлдер жүйелеріндегі су ресурстарын тұрақтандыру үшін Аманөткел ауылы маңында гидроторап салу қарастырылған.Нәтижесінде Солтүстік Аралдың су айдынының ауданы 3913 шаршы шақырымға дейін ұлғайып, су көлемі 34 текше шақырымға жетеді. Теңіздің бұл деңгейге дейін толуы үшін 4-5 жыл қажет.Теңізді сақтаудың бұл нұсқасы 1913 жылдан 2019 жылға дейінгі Сырдария өзені бассейніндегі судың орташа көпжылдық ағынын талдау мен бағалау нәтижелері, сондай-ақ су қоймаларының физикалық сипаттамалары негізінде таңдалған. Көкарал бөгетін көтеру және нығайту жөнінде Мелиорация және су шаруашылығының бұрынғы министрі Нариман Қыпшақбаев та ұсыныс жасағанын еске сала кетейік.<blockquote>«Жобаны іске асырудың бірнеше нұсқасын қарадық. Ең тиімді шешімді табу үшін биылдың басынан бастап Қызылорда облысы мен Арал ауданы әкімдіктерінің өкілдерімен бірқатар кеңес өткізілді. Сонымен бірге министрлігіміздің мамандары жергілікті тұрғындармен және қоғамдық ұйымдармен бірнеше рет кездесті. Аймаққа жұмыс сапары барысында Парламент депутаттарының, жобалаушылардың, су шаруашылығы саласы ардагерлерінің және басқа да мүдделі мемлекеттік органдардың қатысуымен азаматтармен кездесу өткіздім. Кездесуде Арал ауданы мен Арал қаласының тұрғындарының ұсыныстары тыңдалып, жобаны жүзеге асыру мәселелері талқыланды. Таңдалған нұсқа мерзім мен нақты жағдайларды, соның ішінде Сырдария өзені бассейнінің жағдайын ескере отырып, ең қолайлы шешім ретінде анықталды», – деді Су ресурстары және ирригация министрі Нұржан Нұржігітов.</blockquote>Самех Вахба өз кезегінде Дүниежүзілік банк Солтүстік Аралдың сақталуына алдағы уақытта да қатысуға мүдделі екенін жеткізді. Айта кетейік, халықаралық қаржы ұйымы жобаның техникалық-экономикалық негіздемесін әзірлеуге грант бөлген.<blockquote>«Біз балық өңдеу зауытын аралап, жобаны жүзеге асырғаннан кейін өңірде қаншама жұмыс орны ашылатынын өз көзімізбен көрдік. Сонымен қатар ауыл шаруашылығы, мал шаруашылығы және туризм сияқты басқа салаларда да жұмыспен қамту мүмкіндіктері пайда болады. Осылайша бұл жоба бүкіл өңір үшін жаңа экономикалық мүмкіндіктерге жол ашады. Солтүстік Аралды сақтау жобасы біз үшін өте маңызды, өйткені ол бүкіл әлемге тұтас бір экожүйені қалпына келтірудің нақты үлгісін көрсетеді, – деді Дүниежүзілік банктің Еуропа және Орталық Азия бойынша аймақтық директоры Самех Вахба.</blockquote>Министрлік әзірлеген техникалық-экономикалық негіздеме бойынша сараптама қорытындысын алу мерзімі 2025 жылдың желтоқсан айына жоспарланған.Солтүстік Аралды сақтау жобасы теңіздегі су көлемін арттыруға және сапасын жақсартуға, Сырдария өзенінің атырауын қалпына келтіруге, Арал теңізі табанынан тұз шөгінділерінің жел арқылы таралуын азайтуға, Солтүстік Арал теңізінің су ресурстарын басқаруды жетілдіруге, Қызылорда облысындағы балық шаруашылығын дамытуға және жергілікті тұрғындардың өмір сүру жағдайын жақсартуға бағытталған.Еске сала кетейік, жобаның бірінші кезеңінің нәтижесінде Солтүстік Аралдағы су көлемі 42%-ға артты, теңіз суының тұздылығы шамамен 4 есеге төмендеді, жыл сайынғы балық аулау көлемі 8 мың тоннаға жетті. Сондай-ақ теңіздің құрғаған табанының 870 шаршы шақырымы суға толып, жел арқылы тұздардың таралуы азайды.

Қазақстан және Қызылорда облысының жаңалықтары