<a href="https://kyzylorda-news.kz/">Kyzylorda-news.kz</a> &nbsp;Мамандық таңдау – өте маңызды әрі жауапкершілікті істің бірі. Әр адам өзінің өмірінде ең маңызды шешім қабылдап, екі нәрседен қателеспеу қажет дейді. Бірі өмірлік жар таңдау болса, екіншісі мамандық таңдау. Оқу жылының аяқталуына да аз ғана уақыт қалыпты. Ал 11 сыныпты аяқтағалы отырған жас түлектеріміз үлкен өмірге қадам &nbsp;басып, өмірдегі ең жауапты кезеңдердің бірі – мамандық таңдап, маңызды қадам жасағалы отыр. &nbsp;Ал мамандық таңдау әр адамның өмір жолын анықтайтын шешуші сәт белгілі. «Мамандық таңдау – өміріңнің бір кірпішін дұрыс қалау» демекші, кейінгі өмірде еш өкінбейтіндей, бойындағы қабілетіне, бейімділігі мен қалауына қарай кәсіп түрін таңдау қажет.Мамандық таңдауда нені ескеру қажет?&nbsp; &nbsp; Мамандық таңдау ісі – адам өміріндегі ең маңыздылығы жоғары әрі өзекті мәселенің бірі. Тек қазір ғана емес, бұрындары да қоғамдағы аса басым мәселе болағын белгілі. Иә, кез келген еңбекті мамандық деп айталмайтынымыз белгілі. Еңбектің мамандық деп аталуы үшін де өзінің шарттары бар. Бірі қолыңызда белгілі бір мамандық бойынша диплом &nbsp;болу керек болса, екіншісі сол мамандық бойынша өз ісінің маманы атану. Өз ісінің маманы атану кез келген адамға бұйыра бермейтін бақ. Ал ол үшін ең алдымен таңдаған мамандығыңызға деген үлкен махаббат керек. Махаббатпен жасалынған жұмыс нәтижелі болатыны анық. Бір сөзбен айтқанда мамандығыңыз сүйікті ісіңізге айналуы қажет. Осы жағдайда ғана адам жұмысына жауапкершілікпен қарап, құлшыныспен кірісіп, өз жұмысынан ерекше әсер алады. &nbsp;Сол себепті мамандық таңдауды мектеп бітірер сәтте ғана емес, жылдар бойы саралап, ойланып таңдауы қажет. Мамандық таңдау бір қарағанда жәй нәрсе болуы мүмкін, алайда ол – бүкіл саналы ғұмырымыздың айнасы, тағдыры десек болады. Мамандық таңдау – тек қолға диплом алу ғана емес, бұл өз болашағыңды таңдау.&nbsp;Бұндай маңызды шешім қабылдауда жас түлекке дұрыс бағыт-бағдар беретін ата-ана мен ұстаздың қолдауы өте маңызды.Тегін оқу үшін басқа мамандық таңдауға мәжбүр&nbsp; &nbsp; Жоғары білім берудің барлық деңгейлері бойынша 2024 2025 оқу жылына 78219 грант бөлу көзделген екен. Оның ішінде көш бастап тұрған педагогикалық ғылымдар&nbsp;бойынша 13735 грант бөлінген. Ал машина жасау, өңдеу және құрылыс өнеркәсібі – 19 344, жаратылыстану, математика және статистика – 8288, ауыл шаруашылығы және биоресурстар – 2673, өнер және гуманитарлық ғылымдар – 1765, әлеуметтік ғылымдар, журналистика және ақпарат – 1185, бизнес, менеджмент және құқық – 1323 грант бөлінген. Жоғары оқу орнын бітірген түлектердің 60%-ы өз мамандығы бойынша жұмыс істемейді. Оқыған мамандығымен емес, мүлдем бөлек салада жұмыс істеп жататындары қаншама. Оның басты себебінің бірі – мектеп бітіруші түлектер көп жағдайда тегін оқу үшін өзіне сай емес мамандық таңдап, сол бойынша білім алуға мәжбүр болып жатады. Мамандардың айтуынша сұранысқа ие мамандық бойынша грант саны көбейген сайын дипломы бар жұмыссыз жастар саны көбеюде екен. Сондықтан болашақта белгілі бір мамандықтарға мемлекеттік грант бөлерде, сол мамандық бойынша еңбек нарығында жұмыс бола ма, жоқ па соны жоспарлай отыра грант саны бөлінбек. Жастардың саналы түрде өз мамандығын таңдап, дұрыс шешім қабылдау &nbsp;үшін міндетті түрде кәсіби бағдар беру қажет. Көп жағдайда жастар мамандықты беделі немесе жалақысы үшін, және диплом алу ғана мақсатында таңдап, нәтижесінде кәсіби білім сапасының деңгейі төмен болуына әкеп соқтырады.Жиі таңдалатын мамандықтар&nbsp; &nbsp; Білім және ғылым министрінің айтуынша, мамандық таңдаудың алдыңғы қатарында дәрігер мамандығы тұр екен. Сонымен қоса соңғы уақытта педагог мамандығына да қызығушылық артқаны анықталды. – Бұл – біздің мұғалім мәртебесін көтеруге бағытталған жұмысымыздың нәтижесі, – деді министр. Иә расында дәрігер мен мұғалім мамандығын таңдаушылар жыл сайын көбейе түсуде. Бұл әрине қуантарлық жағдай. Мемлекет басшысы Қасым-Жомарт Тоқаевтың бастамасы бойынша қабылданған «Педагог мәртебесі» туралы заң шеңбері аясында мұғалімдердің жалақысы артқаны да осы мамандықты таңдауға деген сұраныстың артуына септігін тигізді. Мамандардың зерттеу нәтижесінде топ-10 жиі таңдалатын мамандықтар тізімін анықтады: дәрігерлер, педагогтар, стоматологтар, тауарлар мен киім дизайнерлері, ,ғимарат, құрылыс сәулетшілері, спорт жаттықтырушылары, нұсқаушылары, спорт саласындағы мамандықтар, психологтар косметология; жарнама, маркетинг саласындағы мамандықтар, графикалық және мультимедиа дизайнерлері.Мамандық таңдаудағы қателік&nbsp; &nbsp; Әлеуметтік сарапшы мамандарының айтуы бойынша қазіргі кезде мектеп бітіруші жас түлектер кім болам? деген сұраққа нақты жауап бере алмайды дейді. Оның басты себебі – жастайынан баланың бойындағы бейімділігі мен қабілетіне қарай бағыт-бағдар берілмеген. Ал мектеп баласының көп жағдайда қандай маман иесі боламын емес, ҰБТ-дан қанша балл аламын деген сұрақ мазалайтыны өтірік емес. Себебі мектепте бағыт-бағдар беруден гөрі, ҰБТ-ны жақсы тапсырып, жақсы балл алуына көп көңіл бөлінеді. Мектеп түлектерінің мамандықты кездейсоқ таңдайтындары да &nbsp;осы себептен. Мамандық таңдаудағы тағы бір қателік – бала өзінің емес, ата-анасының қалауындағы мамандықты таңдауға мәжбүр болады. Кейбір ата-аналар өзінің жүзеге аспаған арманын жүзеге асыру мақсатында баласының қарым-қабілетіне қарамай өздерінің қалауларын таңдауға мәжбүрлеп жатады. Мектеп бітірушілерден «ата-анамның қалауы бойынша таңдадым», «грант үшін осы мамандықты таңдауға мәжбүр болдым» дегендерін жиі естиміз. Бұл әрине өте дұрыс емес. Өзінің қалауы және бейімділігі болмағандықтан, болашақта сол мамандық бойынша білікті әрі сұранысқа ие&nbsp;маман иесі болмайтындығы айдан анық. Осы тұста біраз ата-аналар балаға еркіндік бермеуінің салдарынан баласының болашағына балта шауып, өте қатты қателеседі. Сондықтан бір сәт балаға еркіндік беріп, жүрек қалауы бойынша шешім қабылдау тізгінін өзіне қалдыру қажет.Кәсіптік бағыт-бағдар беру маңызы&nbsp; &nbsp; Кәсіптік бағдар беру – мамандық таңдаудың бір жолы. Қазіргі таңда замануи білім беру кеңістігінде өскелең ұрпақты кәсіби бағдарлау мәселесі өте өзекті болып отыр. Мектепте кәсіптік бағыт-бағдар берудің басты мақсаты – өзін өзі анықтау және кәсіби қызмет саласын таңдау бойынша оқушыларға кәсіби бағдар беру болып табылады. Кәсіби бағдар беру &nbsp;мектеп бітіруші түлектің еңбекке деген оң көзқарасын қалыптастыру, қызығушылықтары мен бейімділігін анықтау, қызметтің мазмұнын түсінуге үйрету, өз мүмкіндіктері мен қабілеттерін талдауға үйрету бойынша қызмет атқарады. &nbsp;Кәсіптік бағдарлау білікті маман болуға жол ашады. Жыл сайын елімізде 70 мыңнан аса жас түлек жұмысқа орналаса алмайды. Осындай олқылықтың орнын толтыру үшін қазіргі кезде сапалы кәсіптік бағдарлауға барынша көңіл бөліне бастады. Мектептегі кәсіби бағдар – бұл студенттердің кәсіптердің әлеуметтік-экономикалық және психофизикалық сипаттамалары туралы қажетті білім көлемін игеруге бағытталған оқу-тәрбие жұмысының негізгі жүйесі. Қоғамның әл-ауқаты үшін мектептің әр түлегі өзінің мүмкіндіктеріне, бейімділіктеріне неғұрлым толық қолдануды табуы, уақытты, күш-жігерді, құралдарды ысырап етпеуі, қоғамда өз орнын іздеуі қажет. Бұл оның жұмысына деген &nbsp;үлкен көмегін тигізеді. Мектеп қабырғасында &nbsp;кәсіптік бағдар беру жұмысын мектеп әкімшілігі, сынып жетекшілері және пән мұғалімдері жүргізеді. Кәсіби кеңес &nbsp;оқушының жеке басын зерттеу мен жеке сипаттама арқылы жүргізіледі. Кәсіби бағдар бойынша сынып жетекшісі оқушылардың іс-әрекеті мен дамуын бақылау, олардың оқу және сабақтан тыс жұмыстарының нәтижелерін зерттеу, сауалнама жүргізу, оқушылардың психологиялық-педагогикалық сипаттамаларын құрастыру сияқты жұмыс әдістерін қолдана алады. Оқушыларды түрлі пәндік олимпиадаларға, конкурстарға, іс шараларға қатыстыру осы кәсіптік бағдар беру мақсатында ұйымдастырылады. Қазіргі еңбек нарығында бәсекеге қабілетсіз мамандардың көбеюі мәселесі белең алып тұр. Сол себепті болашақ мамандардың дұрыс мамандық таңдау үшін мектеп табалдырығынан бастап өзінің қабілеті мен қай салаға бейімділігін анықтау маңызды болып табылады.ҰБТ деп мамандық таңдаудан қателеспе жас түлек&nbsp; Қазіргі&nbsp;таңда мектеп бітіруші түлектер ұлтық бірыңғай тестілеуге қызу дайындық үстінде. Барлығы да таңдау пәнін ой елегінен өткізіп, таңдап та үлгерген кезге жетті. Алдарында үлкен өмір жолы. Осы жолға шықпай тұрып оларды үлкен таңдаудың бірі – мамандық таңдау күтіп тұр. Барлығы іштей қобалжып, өте алмай қалам ба деген үлкен қорқыныш сезімі билейтіні белгілі. Тестілеу аяқталғаннан кейін жоғарғы оқу орындарына құжат тапсырып, сонымен қоса мамандық таңдау маусымы басталады. Бұл сәтте таңдаған мамандығына балы жетпей қалуы да әдбен мүмкін. Жеткен күннің өзінде бірнеше мамандыққа тапсыруға мүмкіндік болады. Көбінесе мектеп бітіруші түлектер мен ата аналар тапсыратын оқу орындарына аса мән беріп, мамандықты екінші орынға қойып жатады. Алайда жүрек қалауымен таңдамаған түлекке ауыр соғары анық. Сол себепті ең бірінші мамандық содан кейін ғана жоғарғы оқу орнына мән беру қажет.Түйін. Ел болашағы – білімді ұрпақ дейтін болсақ, жастарымыздың болашақ мамандығын таңдауда үлкен жауапкершілікпен қараса дейміз. Бұл әр адамның өміріндегі ең маңызды сәт және оны жіберіп алмай таңдауға байыптылықпен қарау қажет. Кемел келешектің жарқын кепілі – дұрыс таңдалған мамандық. Ұлы Абай атамыз айтқандай «қолын мезгілінен кеш сермеп» қалмау үшін ертерек іске көшкен абзал. Себебі өмір табалдырығынан аттаған жастың жүрегіне жақын мамандыққа ер салуы, ертеңгі күнге сеніммен нық қадам басуына да алғышарт болары анық деп айта аламыз. Заманың түлкі болса, тазы боп шалар уақытта өз ойын ашық жеткізе алатын тұлға болып қалыптасуды қазірден бастаған жөн.Алтынай ҚайратқызыСурет: freepik

Мамандық таңдауда нені ескеру керек?

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласы бойынша білім бөлімінің ұйымдастыруымен №176 &nbsp;орта мектепте&nbsp;«Біртұтас тәрбие: Құндылық. Ұлттық тәрбие. Жас ұрпақ» &nbsp;тақырыбында қалалық &nbsp;семинар өтті.Семинарға Қызылорда қаласы бойынша білім бөлімінің бас маманы Самат Күнқожаев пен білім бөлімінің әдіскері Газиз Убаев, қала мектептерінің тәрбие ісі-жөніндегі орынбасарлары қатысты.Семинардың мақсаты – біртұтас тәрбие бағдарламасы негізінде білім алушылардың бойында жалпыадамзаттық және ұлттық құндылықтарды қалыптастыру. Шара барысында «Ұлттық мектеп лигасы» жобасы аясында мектептегі «Асык ату», «Тоғызқұмалақ», «Бес асық» үйірме жұмыстары насихатталып, «Алтын домбыра» үйірмесі домбырашыларының күй күмбірледі.Мұнан соң ұлттық құндылықтарға бағытталған қолөнер, ұлттық тағамдар мен ұлттық, бұйымдардан жасалған көрме таныстырылды. Сонымен қатар, ата-аналарды педагогикалық қолдау орталығының&nbsp;жұмыстары бағытында "Даналық мектеп" &nbsp;жобасы аясында әжелер, әкелер, ата -аналармен шеберлік сағаты, әке мен бала уақыты, ата-аналармен ағартушылық жұмыстар жүргізілді. Қатысушы қонақтар семинар барысы мен ұйымдастырылған іс-шараларға оң бағасын беріп, пікір алмасты.

Қызылорда қаласында ұлттық тәрбие насихатталған семинар өтті

<a href="https://kyzylorda-news.kz/">Kyzylorda-news.kz&nbsp;</a> Қорқыт Ата атындағы Қызылорда университетінде «Іnfogo club» IT ұйымы ашылды. Ұйымның мақсаты – IT саласына қызығушылығы бар жастарды бір алаңға жинау. Жай ғана оқыту емес, теориямен қатар практиканы қолданып, қоғамға маңызы бар жаңа жобаларды іске асыру.Студенттерден құралған командамен таныссақ.Ғұбайдулла Орынбеков – «infogo club» ұйымының төрағасы. Ұйымның барлық бөлімшелері мен мүшелерінің жұмысын үйлестіреді. Клубтың даму стратегиялары мен іс-шаралар жоспарын әзірлейді. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті. Исатай Есмамбетов – «infogo club» ұйымының әзірлеу бөлімнің жетекшісі. Жобаларды сапалы әзірлеу және қоғамға ыңғайлы өнім жасайды. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті.Арман Қуанышбек – "infogo club" ұйымының пиар бөлімнің жетекшісі. Әлеуметтік желілер мен бұқаралық ақпарат құралдарында ұйымның болуында қолдайды. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті.Қайсар Жарылқасын – «infogo club» ұйымының дизайн бөлімінің жетекшісі. Клубтың іс-шараларына және жобаларға дизайн материалдарын жасайды. Қорқыт ата атындағы Қызылорда университеті, «Информатика мұғалімдерін даярлау» мамандығының 1-курс студенті. Даниал Айжарық – «infogo club» ұйымының музыка бөлімнің жетекшісі. Жобаларға авторлық саундтрек жазады, авторлық музыка шығарады. Қорқыт ата атындағы Қызылорда университеті, «Дене шынықтыру және спорт» мамандығының 1-курс студенті.Айта кетейік, студенттердің ұлттық рухты бойына сіңірген, шығармашылық қабілеттері шыңдалған, мақсаты айқын тұлға болып қалыптасуы үшін университетте 24 жастар ұйымы жұмыс істейді. Жалпы университет бойынша 2022-2023 оқу жылында 892 іс-шара ұйымдастырылды. Биылғы оқу жылында да қарқынды жалғасуда.Жоғары оқу орнында түрлі бағытта республикалық, облыстық ауқымды шаралар ұйымдастырылуда. Атап айтсақ, биыл дәстүрлі түрде «Студенттік көктем – 2023» студенттер фестивалі, «Университет аруы – 2023» байқауы, «Маусымашар-2023» жайдарман фестивалі, дебаттық ойындар, айтыс, кездесулер, спартакиадалар, поззия кештері, «Жауқазын» жастар театрының «Қош, махаббат» атты алғашқы &nbsp;қойылымы өтті. Университетте Әлем чемпионатының - 9, Азия чемпионатының – 23, Қазақстан чемпионатының - 125 жеңімпазы мен жүлдегерлері бар.&nbsp;2023 жылғы ЖОО арасындағы жазғы универсиадаға &nbsp;спорттың 16 түрінен 120 білім алушы қатысты. Жалпыкомандалық есепте университет спортшылары 9 орынды иеленіп, 37 медаль (алтын-7, күміс–8, қола-22) қоржынға салды. Қатысушылар университеттің арнайы спорттық киімдерімен толықтай қамтамасыз етілді. Белсенді жастардың шығармашылық ортасын қалыптастыру және олардың бастамасына мемлекеттік қолдау көрсету мақсатында ұйымдастырылған «Тәуелсіздік ұрпақтары» байқауында Қорқыт ата атындағы Қызылорда университетінің студенттері Әділхан Досым мен Тұрсынбай Елдос 600 мың теңге грант жеңіп алды. «Ақиқат» саяси пікірсайыс клубының мүшелері Түркістан қаласында өткен республикалық турнирде жеңімпаз атанды. Республикалық Алматы Ашық лигасының жартылай финалдық сайысында &nbsp;Қорқыт ата атындағы Қызылорда университетінің «Q құрамасы» финалдық ойында үздік өнер көрсетті.&nbsp;

«Іnfogo club» IT ұйымы ашылды

<a href="https://kyzylorda-news.kz/">Kyzylorda-news.kz</a> Ташкентте мектеп мұғалімі бірінші сынып оқушыларының қолдарын инемен шаншыған, деп хабарлайды&nbsp;<a href="https://egemen.kz/article/362579-bastauysh-synyp-mughalimi-balalardy-ine-men-shege-sughyp-tarbielegen?fbclid=IwZXh0bgNhZW0CMTEAAR1HZIyoDveBgIGaLAPh_2jF9XrpxjuofBB6KRi9OS5CG8WnBbDObYlBIAM_aem_AcR3bKJes3Y8taqqfHbilX5VIwZNsLWpHpoX0egqhFhPlu2-H7JScbnNjvJr22rL1xDs4l5SpeRztJdK3oWvqe0R">Egemen.kz.</a>Podrobno.uz&nbsp;порталы хабарлағандай, оқиға Сергелия ауданының №277 мектебінде болған. Онда мұғалімдердің бірі бірінші сынып оқушыларының қолдарын өткір заттармен, дәлірек айтқанда ине және бұрамашегемен шаншыған.Оқушылардың ата-аналары бұл оқиға бойынша мектеп директорына шағымданған.Балаларға қатігездік танытқан мұғалім қызметінен босатылды. Сергелия ауданының ІІО қызметкерлері тексеру жүргізіп жатыр.Фото: Нұрболат Нұржаубай

Бастауыш сынып мұғалімі балаларды ине мен шеге сұғып тәрбиелеген

<a href="https://kyzylorda-news.kz/">Kyzylorda-news.kz&nbsp;</a> Ғалым – әлемді өзгертетін болашағы зор мансап. Фактілер, теориялар мен заңдарды байланыстыра отырып, адамзатқа тың дүние сыйлатын ғылым саласында қазақстандықтардың, әсіресе қызылордалықтардың да атқарған еңбегі зор. Бүгінде қызылордалық оқу орындарында Сыр елінің ғалымдары дәріптелуде.Қазақ топырағында туып, оқу мен білімді жаны сүйген жандардың бірі &nbsp;– Алма Мүтәліпқызы. Қазақ әдебиетінің тарихы, бүгінге дейін зерттеліп келе жатқан тың дүниелердің бірі. Сөз өнерінің сан ғасырлық тарихын зерттеп, оның қазіргі маңызы жөнінде ізденіп жүрген ғалымдар аз емес. Соның ішінде алты Алаштың анасы болған Сыр елінің перзенті, көрнекті ғалым, филология ғылымдарының докторы әрі профессоры Алма Қыраубаеваның ғылымдағы орны һәм төлтума еңбектерінің маңызы бүгінгі ұрпақ үшін аса зор.&nbsp;«Профессор, филология ғылымдарының докторы Алма Мүтәліпқызы Қыраубаева – қазақ топырағында туып, ұлттық болмыстың нұрлы шуағынан нәр алған, табиғаты бөлек, оқу мен білімді өнер деп танып, ұлтты тәрбиелеудің ұлы құралы санаған жан», деген еді Фаузия Оразбаева.«Сыр елі, жыр елі – Түркінің жүрегі» демекші, киелі жерде дүние есігін ашқан соң, жерлестеріміздің қаламынан туған құнды еңбектерін зерттеу мен үшін жай ғана міндет емес, нағыз парыз. Сыр елінің борыштар перзенті ретіндегі міндетім бала шақтан бастау алып, бүгінде ғұмырлық мақсатыма айналды. Сол қалауыма жету үшін әрі сөз өнерінің асыл қазынасын айшықтай түсетін қазақ тілі мен әдебиеті пәнінің мұғалімі болуды өмірлік жол ретінде таңдаған соң Алма апамның салған сара жолымен жүріп, баға жетпес еңбектерін зерттеу үшін айқын міндет. Көрнекті ғалым қазақ халқының ежелгі дәуір әдебиетін зерттеп, сол ғасырдың бай мұраларын бүгінге жеткізіп, әдебиетіміздің дамуына сүбелі үлес қосты. Осындай маңызды зерттеулерінен ғалымның қаламынан «Махаббатнама», «Түркі әдебиеті», «Ғасырлар мұрасы», «Жаным садаға», «Шығыстық қисса дастандар» атты монографиялар мен оқу құралдары, жүзден астам ғылыми-әдістемелік, публицистикалық мақалалар жарыққа шықты. «Ұстазы мықтының – ұстанымы мықты» демекші, әдебиеттану ғылымдарының көрнекті қайраткері Бейсембай Кенжебаев – дарынды ғалымның жұлдызын жаққан ұстазы. Алма Қыраубаеваның әдебиетке деген кіршіксіз махаббатын оятқан ең алдымен өзінің жанжақтылығы мен дарындылығы десек, екінші жағынан оның рухы биік һәм ізгі мұратты қыз екендігін, биязы әрі ибалы, сонымен қатар топбасшылығын, өнер десе ішкен асын жерге қоятындығын, көзіндегі лаулаған шоқты көре алған ұстаздарының арқасы деп білемін. Оның ғылыми ізденістері негізінен көне түркілік әдеби мұраларды зерттеуге арналған. Ғалым ретінде оның алдына қойған екі мақсаты: бірі – әлі зерттелмеген құпияға толы әдеби құндылықтарды ғылыми тұрғыдан игеру болса, екіншісі – сол игерілген жауһарды қазақ халқының кәдесіне жарату болған. Оның ғылыми-зерттеу еңбектерін 4 салаға бөліп қарастыра аламыз. Олардың бірінші бағыты ретінде ғалымның орта ғасырлардағы шығыс қиссa-дастaндары мен орта ғасыр әдебиетін зерттеуін айтамыз. Бұл бағыт оның докторлық диссeртaциясы негізінде жазылған. Алма Қыраубаеваның 1997 жылы «Шығыстық қисса-дacтандар» монографиясы жарық көрді. Ал екінші бағыты – түркoлoгиялық зерттеулері. Бұл салаға ғалымның «Мaxаббатнама», «Түркі әдебиеті» сынды 1985-1988 жылдары жарық көрген еңбектерін жатқызуға болады. Үшінші бағытына келетін болсақ, бұл – пeдагoгикалық зерттеу еңбектері. Ғалымның осы педагогикалық зерттеу еңбектері мен ұстанымдары да жаңа буынды тәрбиелеуде, оқушыны жеке тұлға ретінде дамытуда тың тұжырымдарымен ерекшеленді. Алма Қыраубаеваның зерттеу еңбектерінің төртінші бағыты жыр алыбы– Жaмбыл Жaбаевқа арналды. Осы орайда ғалымның қазақ әдебиетінің өкілі Жамбыл Жабаевтың шығармашылығына қосқан үлесі зор екенін айта кеткеніміз жөн. Ол ақынның ескі әрі еш жерде жарық көрмеген термелерін жинақтап, «Жамбыл әуендері» жинағын құрастырған. Назар аударып қарайтын болсақ, ғалым өзінің ғұмырын қазақ әдебиетінің тарихын зерттеуден бастап, қазақ оқушылары мен студенттерінің білім алу жолына толық арнаған. Бұлай дейтін себебіміз біріншіден, Алма Қыраубаева жоғары оқу орындарында оқытылатын «Ежелгі әдебиет» оқулығының, «Ежелгі дәуір әдебиеті» хрестоматиясының тұңғыш авторы. Сонымен қатар ғалым қазақ мектептерінде басшылыққа алынуы тиіс «Тілaшap», «Eлтaнy», «Әлeмтaну», «Әдeп» бағдарламаларын жасады. Тәрбиенің алдында тұрған басты міндет қазіргі қазақ жастарының мінезін дұрыс қалыптастыру екендігін өз зерттеулерінде айшықтап көрсеткен. Осы орайда Алма Қыраубаеваның «Мұғaлiм – тeргeушi eмес, үйретyші, тәртіпкe сaлып қoюшы емес, рyxани өсіруші. Баланы қызықтыру арқылы ерте білетін адам балаға нені үйреткісі келсе, соны өзі көрсетеді. Баланың қазақ деген ұлы халықтың ұрпағы екеніне, қазақ жерінде тұратындығына мақтаныш сезімін қалыптастыру – мұғалімнің абыройлы ісі» деген сөз оралымдарынан қазақ балаларына жанашыр ұстаз әрі елінің ертеңіне алаңдайтын абыройлы ғалым екеніне толық көзіміз жетеді. Ғалымның шәкірті филология ғылымдарының докторы әрі профессор Қанипаш Мәдібаева да өзінің «Алма апайдың мектебі» атты мақаласында осы сөзімізді дәлелдей түскендей: «Алма Мүтәліпқызы сол бір жылдарда ұлт болашағы үшін үлкен жобамен жұмыс бастады. Қазіргідей тендер ұтып, қаржы алатын жоба емес. Көк тиын көмексіз, қазақ баласын өркениет төріне шығаруды көксеген көптің тілегіне орай аспаннан түскендей ғажайып бастама еді. Ғылыми негізді, сауатты, білікті маманның теориялық тұғырлы білім тұжырымдамасының тәжірибеде жүзеге аса бастағанын көзбен көрдік» деп жазған болатын. Демек Алма Қыраубаева ғылымның қай саласында да, әдебиеттің қай дәуірі болсын қазақ балаларының сауатты да саналы болуын ғұмырлық мақсатына айналдырған зиялылардың бірі. Оның бірден-бір дәлелі ретінде жоғары оқу орындарында «Ежелгі дәуір әдебиеті» Алма Қыраубаеваның авторлығымен оқытатындығын ауыз толтырып айта аламыз.Қорытындылай келе, Алма Қыраубаева өзінің бар ғұмырын білім мен ғылым жолына арнап, ел ертеңіне өшпес мол мұра қалдырды. Ұстаздың ұлы жолын құрметтейтін ұрпақ ретінде біздің міндетіміз ғалымның әр еңбегіне дұрыс баға бере алу және өз дәрежесіне көтеру деп есептеймін. Осы тұрғыда ұлы ғалым Алма Қыраубаеваның барлық зерттеу еңбектерін, мақалалары мен ұстанымдарын қамтитын үлкен монографиялық еңбек жарық көруі тиіс деген ұсыныс білдіремін. Әрине, ұстазымыздың еңбектерінің бағасы бұдан да биік, алайда қараңғы жолда жеті қарақшыдай жанып, жол көрсететін келешек ұстаздар үшін, көкірек көзін ашамын деген біз секілді жастарға және жас ізденушілерге таптырмас құрал ретінде ғалымның құнды еңбектерінің жинағы жарық көрсе, нұр үстіне нұр болар еді! Н. ЖАСҰЛАНОВАФото: anatili.kazgazeta.kz

Сырбойылық ғалымдар дәріптелуде

<a href="https://kyzylorda-news.kz/">Kyzylorda-news.kz&nbsp;</a> Оңтүстік Кореяның Сеул Ұлттық ғылым және технологиялар университетімен (СеулТех) Қорқыт ата атындағы Қызылорда университеті арасындағы келісімге сәйкес Қорқыт ата атындағы Қызылорда университетінде Жасанды интеллект институты ашылды. Мұнда қыркүйектен бастап ІТ сала бойынша еліміздегі ең үздік мамандар білім алмақ.&nbsp;Қазіргі заманның сұранысына сай ашылған жасанды интеллект институты (“Institute of аrtificial іntelligence) оқуға түскен талапкерлерге 4 мамандық ұсынады. Атап айтсақ, Information systems (Ақпараттық жүйелер), Cybersecurity system (Киберқауіпсіздік жүйесі), Computer science (Компьютер ғылымы), Computer software and programming (Компьютерлік бағдарлама және бағдарламалау).&nbsp;Білім алушылар бағдарламалау негіздерін, үлкен деректерді талдау және жасанды интеллект, сондай-ақ машиналық оқыту сынды сұранысқа сай кәсіби дағдыларды да үйренеді.&nbsp;Қазіргі уақытта білім ордасында СеулТех-пен бірлескен халықаралық LUPIC жобасы бойынша ауқымды жұмыстар жүзеге асуда.&nbsp;Тарқатып айтар болсақ, 2021 жылы Қорқыт ата университеті мен Оңтүстік Кореядағы Сеул Ұлттық Ғылым және технологиялар университеті (СеулТех) серіктестік орнатып, «Халықаралық ынтымақтастық бойынша жетекші университеттік жоба» (LUPIC) әзірленді.&nbsp;Студенттер мен профессор-оқытушылар академиялық ұтқырлық және бірлескен білім беру бағдарламалары бойынша СеулТех университетінде білім алып, ғылыми тағылымдамадан өте алады. Ал кореялық ғалымдар өз тәжірибесімен бөлісу үшін Қызылордаға шақырылады.&nbsp;Жасанды интеллект институтының ашылуы облыстың дамуына, еліміздегі ІТ саланың білікті мамандармен толығуына жол ашады. Отанымыз ғана емес, алыс-жақын шетелдер үшін жасанды интеллект саласындағы бірегей кадрлардың даярлануына ықпал етеді.Өздеріңіз білетіндей, 2023 жылғы 1 қыркүйекте ел Президенті Қасым-Жомарт Тоқаев Қазақстан халқына Жолдауында жасанды интеллект технологияларының дамуы ел болашағы үшін стратегиялық маңызды бағыт екенін атап өтті. Мемлекет басшысы жасанды интеллект технологиясын дамытуға ерекше назар аудару қажеттігін айтты. Алдағы бірнеше жылда әлем бойынша бұл салаға бір триллион доллардан астам инвестиция салынады.Сондықтан Қызылордада Жасанды интеллект институты ашылуының ел дамуы үшін маңызы зор.&nbsp;<blockquote>–Жалпы, шетелдік оқу орны жоба бойынша заманауи құрылғылармен де қамтамасыз етеді. Қазіргі уақытта Сеултех университетінен Қорқыт ата университетіне 190 компьютер, 8 сервер, Дрон зертханасы, AR/VR құрылғылар және видеоконференц байланысқа арналған құрал-жабдықтар келуде. Сондай-ақ, Жасанды интеллект инстиутында оқыған студенттеріміздің Оңтүстік Корея мен Қазақстандағы оқу орнының дипломын бірдей алуына мүмкіндік беретін "қос дипломдық жүйе" туралы келіссөздер жүргізудеміз.&nbsp;Бұл уақытқа дейін Оңтүстік Кореядан бірнеше профессор келіп, білім алушыларға дәріс өткізіп, тәжірибесімен бөлісіп үлгерді. Болашақта да Сеултех университетінің ең үздік профессорлары білім беруге келмекші.Жасанды интеллект институтына оқуға түсу үшін биылғы түлектер «информатика + математика» пәндері бойынша ҰБТ тапсыруы керек. Кейін міндетті түрде біздің ағылшын тілінің деңгейін анықтайтын сынағымыздан өтуі қажет немесе IELTS 5+ сертификаты жарайды. Себебі бізде білім алу толық ағылшын тілінде жүргізіледі, – деді Жасанды интеллект институтының директоры Нұрлан Құлмырзаев.&nbsp;</blockquote>Бүгінде еліміз бойынша "Қызылордада ең мықты ІТ мамандар даярланады деген көзқарас" қалыптасып келеді. Бұған сырбойылық жастардың ІТ саласындағы жетістіктері де дәлел.&nbsp;<blockquote>– Қызылордада "жақсы ІТ маман болғың келсе, басқа қаладағы ЖОО-да оқы" деген пікір бар. Біз қазір сол көзқарасты өзгертуге жұмыс істеп жатырмыз. Бүгін ғана Алматыдағы Нархозға кетіп қалған оқушым хабарласып, "ағай, сіздердің қандай жетістікке жеткендеріңді көріп отырмын, келесі жылы Нархоздан Қорқыт ата университетіне ауыссам бола ма?" деп жазса,&nbsp; екі-үш күн бұрын атыраулық оқушы "Қорқыт ата университетіне қалай түссем болады?" деп хабарласты.&nbsp;Ал осы аптада өзіміздің студенттеріміз оқушылармен калобарация жасап, Түркістанда өткен республикалық жарыста І орын алып келді. Мұның бәрі, әрине, біртіндеп Қызылорданың имиджін көтереді. Бастысы жасанды интеллект, ІТ сала бойынша Сыр өңірінде үздіктер дайындалады, мықты мамандар жұмыс істейді деген көзқарас қалыптасуда.&nbsp;Қазіргі уақытта жас мұғалімдердің арасында, Оқушылар үйінде де мықты бағдарламышалр жинақталған. Ешкімнің атын айтпай-ақ қояйын, есіме түспей қалғандары ренжіп қалар... Ең бастысы, бұрын өзіміз дайындаған жастар қазір өздері команда құрып, жаңа жобалармен айналысуда. Бұл – өте қуанатын жағдай, – деді Нұрлан Құлмырзаев.&nbsp;</blockquote>Айта кетейік, 2023 жылдың 6 қарашасында Қорқыт ата атындағы Қызылорда университетінің базасында Жасанды интеллект және информатика жоғары мектебінің ресми ашылу салтанаты өтті.Іс-шараға Қазақстан Республикасының Ғылым және жоғары білім министрі Саясат Нұрбек, Қызылорда облысының әкімі Нұрлыбек Нәлібаев, информатика және инженерия кафедрасының профессоры, LUPIC (Leading University project for International Cooperation) жобасының Қазақстандағы орталығының директоры, Сеул Ұлттық Ғылым және технологиялар университетінің (СеулТех) кванттық жасанды интеллект қауіпсіздігі әлемдік орталығының директоры Джесу Ким, LUPIC жобасының Қазақстандағы орталығы директорының орынбасары&nbsp; Ким Сунгон, профессор-оқытушылар құрамы мен IT саласы бойынша жұмыс берушілер қатысты.Жиында ҚР Ғылым және жоғары білім министрі Саясат Нұрбек жобаның маңыздылығына тоқталған болатын.«2029 жылға дейін есептелген «Халықаралық ынтымақтастық жөніндегі жетекші университеттік жоба» (LUPIC) IT технологиялар саласында адами капиталды қалыптастыру, тәжірибе және ғылыми зерттеу нәтижелерімен өзара алмасу, сондай-ақ Корея мен Қазақстан арасындағы жоғары білім саласындағы екіжақты ынтымақтастықты одан әрі нығайтуға серпін беретініне сенімдіміз.&nbsp;Келесі жылдан бастап қазақстандық жоғары оқу орындарының студенттері міндетті түрде жасанды интеллектті зерделеу курсынан өтетін болады. Біз үшін жоғары оқу орнындағы әрбір студенттің цифрлық сауаттылықтан бөлек, жасанды интеллект саласын да меңгеруі өте маңызды. Сондықтан бізде Google компаниясымен арнайы курс әзірленді. Биыл оны&nbsp;14 университетте пилоттық режимде іске қосамыз. Бұл тізімде Қорқыт ата университеті де бар», – деді министр.Оқырмандар арасында СеулТех қандай университет дегген сұрақ та болуы мүмкін.СеулТех – Кореяда 1910 жылы негізі қаланған ұлттық университет. Оқу орнында 23 факультет, 15 мыңға жуық студент бар. СеулТех Жоғары мектебінің ашылуына Қызылордада өмір сүрген Кореяның ұлттық батыры, генерал Хон Бом До сүйегінің тарихи отанына қайтарылуы ықпал етті. Қайта жерлеу рәсіміне Хон Бом Доны еске алу қоғамы белсенді қатысты.Алдағы уақытта университетте СеулТех филиалы мен қос дипломды бағдарламасын ашу жоспарлануда, соның нәтижесінде түлектер СеулТехтің және Қорқыт ата атындағы Қызылорда университетінің дипломын ала алады.Жасанды интеллект институтының табысты жұмыс істеуі облыстың дамуына және өңірлік IT хабты құрылуына драйвер болмақ. Сонымен қатар, республика мен таяу шет елдер үшін жасанды интеллект саласындағы бірегей кадрлардың даярлануына ықпал етеді.&nbsp;А.НҰРТАЙҚЫЗЫ Фото: Қорқыт ата атындағы Қызылорда университеті

Қызылордада ең мықты ІТ мамандар даярланбақ

<a href="https://kyzylorda-news.kz/">Kyzylorda-news.kz</a> Қазалы аудандық білім бөлімінің басшысы Әділхан Жөлекешов облыстық Білім басқармасының басшысы Асқарбек Есжановтың бастамасымен өткен «Бір мектеп – бір жоба» сайысының қатысушыларын қабылдап, ілтипат білдірді.<blockquote>– Сіздердің байрақты бәсекеден тартынбай, биіктен көрінулеріңіз осындағы директорлар корпусының бәсекеге қабілетті, білікті менеджерлерден кенде емес екенін тағы бір мәрте дәлелдеді. Ұрпақ тәрбиесіндегі жауапкершілікке толы жұмыс арасынан уақыт тауып, түрлі жоба ұсынғандарыңызға алғыс білдіремін. Келешекте осы жеңімпаз директорлар шыққан биікті сіздер де бағындырасыздар деп сенемін, – деді ауданның бас ұстазы Әділхан Жөлекешов. Бұдан кейін Қ.Нұрмаханов атындағы №95 мектеп директоры Оңталап Маханбетов құттықтау сөз сөйледі.</blockquote>Айта кетейік, аталған сайыстың облыстық кезеңіне Қазалыдан екі директор қатысып, Ғ. Мұратбаев атындағы №17 мектеп басшысы Эльмира Сматуллаева бірінші орын иеленді. Ал М. Матаев атындағы №170 мектеп директоры Нұрлан Имашев Алғыс арқалады.Математика мұғалімдері басқостыЖуырда Қазалы аудандық білім бөлімінің ұйымдастыруымен математика пәні мұғалімдері арасында «Математика пәні бойынша білім алушылардың ББЖМ-не дайындау шеңберіндегі мәселелерді шешу» тақырыбындағы аудандық семинар өтті.Семинарда пән мұғалімдері жылдам әрі функционалды түрде сыни ойлауды дамытатын сұрақтарға жауап берді, ББЖМ тапсырмаларының маңызы зор екеніне тоқталды.Тәжірибе алаңында оқушыға тақырыпты таныстырар кезде Комикс әдісі ұтымды екені тілге тиек етіліп, ұлттық деңгейде фукционалдық сауаттылыққа бет бұрудың негізгі идеясын ұсынды.Жиында тәжірибесімен бөліскен педагогтер Аудандық білім бөлімінің Алғыс хаттарымен марпатталды.Физика ұстаздары тәжірибе алмастыӨткен аптада Қазалы аудандық білім бөлімінің ұйымдастыруымен физика пәні мұғалімдері арасында «Физика пәні бойынша ББЖМ-не дайындау шеңберіндегі мәселелерді шешу» тақырыбында аудандық семинар өтті. Жиында ұстаздар ББЖМ–не білім алушыларды дайындау мақсатында озық жеке іс-тәжірибелерімен бөлісіп, пән мұғалімдері физиканың ең негізгі элементі, есеп арқылы оқушы білім сапасын көтеруге болатынын дәлелдеді.Мұғалім де оқушы да күнделікті өмірдің физикасын зерттеп, өз бетінше тапсырмалар құрастырып үйренсе, тапсырма орындау оңайға соғатыны айтылды. Сонымен бірге физика тарауларының негізгі оқу мақсаттарын ажыратып, ББЖМ тапсырмаларының ерекшеліктерін қарастыруды талқылады және жоғары қиындықтағы тапсырмаларды оқушымен жүйелі түрде талдаулар жүргізу және сын тұрғысынан ойлау арқылы тапсырмаларды іріктеуді ұсынды.Жиын соңында озық шығармашылық белсенділік көрсеткен мұғалімдер Аудандық білім бөлімінің Алғыс хаттармен марапатталды.Оқушылар тал ектіАдам – табиғаттың төл перзенті. Халқымыз көктем келісімен ауласын тазалап, үйінің айналасына гүл, жасыл желектер егіп, арық-каналдардың көзін ашқан.Осы орайда №266 мектеп-лицейде «Таза өлке» акциясы аясында бастауышты бітіргелі отырған 4 сыныптың балалары ата- әжелерімен бірге тал отырғызды. “Менің немеремнің жеміс ағашы” деген атпен іске асқан игі бастамаға 11 сынып түлектері де атсалысты.– Немеремнің мектептегі шағының бір кезеңінің куәсі болған бүгінгі тал-шыбықтар ертеңгі тәтті шағының естелігі болары анық. Оның үстіне баламды табиғатқа жанашыр етіп тәрбиелеуге, өзі өмір сүретінің ортаның гүлденуіне аталған акцияның берері мол. Ұйымдастарушыларға мың алғыс, – деді 4 сыныпта оқитын Нұрбақыттың әжесі Күлзира Тұрымбетова.Ал мектеп-лицей басшысы Ерлан Өтепбергенов таза ел болу, таза болашақ құруға ұмтылуды көздейтін осындай бір үлкен игі іс-шараның басында болуды ұжым болып мәртебе санайтындарын айтты.

Қазалы: Білім саласында қарқын бар

&nbsp;<a href="https://kyzylorda-news.kz/">Kyzylorda-news.kz</a> &nbsp;«Сұлу-ай» шығармашылық өнер орталығының үйірмелері қазіргі уақытта ауданға қарасты 8 елді мекенде тұрақты түрде жұмыс жасауда.&nbsp;Республикаға «ауылдардың астанасы» атауымен танылған Нағи Ілиясов ауылында «Эстрадалық вокаль», «Ұлттық би», «Домбыра», «Хор» үйірмесі орталық ашылғаннан бері халық баласын өнерге баулуда. Бүгін ауылдық мәдениет үйінде «Өнерді өрге тартқан өрендер» тақырыбында шығармашылық кеш өткізілген болатын.&nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp;Кеш барысында жыл көлемінде табысты өнер көрсеткен 70-ке жуық талантты балғындарға, үйірме жетекшілері Жанат Шайзадаева, Ботакөз Қалиасқарова, Аружан Әлішероваға &nbsp;орталық құрылтайшысы арнайы «Алғыс хаты» табысталып, сый-құрмет көрсетілді. Ауыл балалары жекелеген үйірмеден үйренген шығармаларын көпшілікке ұсынды. Білім мен өнерді ұштастыра білген білікті мамандардың жұмысы жоғары бағаланып, әрбір ата-ананың ыстық ықыласына бөленді. Сахна төрінде ән айтылып, би биленді. Күмбірлете күй орындалып, хор өнерпаздары даралана білді.&nbsp; &nbsp; &nbsp; &nbsp; &nbsp; &nbsp; &nbsp; &nbsp;Нағи Ілиясов &nbsp;ауылындағы өнерпаздар жыл көлемінде аудандық, облыстық іс-шараларға қатысып, сан бағыттағы байқаулардың жүлдегірі атанды. «Сұлу-ай» шығармашылық өнер орталығының құрылтайшысы&nbsp;Анар Қалдыбаева шығармашылық әлемінде&nbsp;таныла бастаған жастардың өнеріне баға берді.– «Сұлу-ай» шығармашылық өнер орталығының әрбір ауылдағы үйірмесінің жұмысы ұдайы біздің бақылауымызда. Балалардың сабаққа қатысуы, шығарманы жетік меңгеруі, байқауда бақ сынауы&nbsp;– назардан тыс қалмайды. Нағи Ілиясов ауылындағы ұстаздар қауымы кәсіби біліктілігі жоғары. Әрине, баласын бізге сеніп тапсырған ата-ана алдында есеп беруге мүдделеміз. Мемлекет тарапынан жасалған қолдауды кез келген отбасының көз қуанышы сезінуі тиіс. Орталық ашылған уақытта барлық 8 елді мекендегі мәдениет ошағының басшысымен бірлесіп, қандай үйірме ашу керектігі жөнінде ортақ шешімге келдік. &nbsp;Осы күні ауылда ашылған үйірменің озық нәтижесін көріп отырмыз. Бүгінгі шығармашылық кеште келешек жас жұлдыздардың &nbsp;шоғары қалыптасқаныңа &nbsp;көз жеткіздік, – деді орталық құрылтайшысы.Кеш соңында барлық өнерпазға балмұздақ таратылды.

Ауыл мектебінің білім сапасын арттыруда

<a href="https://kyzylorda-news.kz/">Kyzylorda-news.kz</a> &nbsp;Сырдария аудандық мәдениет үйінде аудан әкімдігінің ұйымдастыруымен «Баланың бас ұстазы-ата-ана» тақырыбында кеңейтілген аудандық ата-аналар жиналысы өтті.&nbsp; &nbsp; &nbsp; Жас ұрпақты парасатты, ақылды, мейірімді, жан-жақты азамат ретінде тәрбиелеуде ата-ананың рөлі жоғары. Оқушылардың жеке тұлға болып қалыптасуына ата-ана беретін тәрбиенің әдіс-тәсілдерін жетілдіру және қарым-қатынас орнату өте маңызды. Бала тәрбиесінде ата-аналарға оқытудағы жаналықтар туралы мәлімет беру, ата-аналардың мектеппен тығыз байланысын орнатуы бүгінгі күннің басты назарында. Әркез ата-аналарды балаларға жауапкершілікпен қарауға шақыру керек. Себебі баланың бүгінгі істеген қадамы ертеңгі тұлға ретінде қалыптасуына үлкен әсер ететіні белгілі.&nbsp; &nbsp; &nbsp; Баланың бас ұстазы – ата-ана. Бұл халқымыздың қанатты қағидасы. Бірақ қазіргі ата-анаға да, тіпті ұстазға да ұстаз қажет. Бүгінде кім кімді тәрбиелеп, кім кімге білім беріп жатқанын білмей қалдық, бағамдай алмайтын халге жеткендейміз. Ұрпақ тәрбиесі қараусыз қалғандай. Жаңашылдыққа ұмтылған жаһандану кезеңінің жастары ұстаздан да, ата-анадан да тайсалмайтын болды. Осы және өзге де өзекті мәселелер жөнінде іс-шара барысында талқыланып, қарастырылған болатын.&nbsp; &nbsp; &nbsp; Ата-аналармен өткен іс-шараға аудан прокурорының орынбасары Ғалымжан Манасұлы, «Сенімен Болашақ» Республикалық ата-аналар қоғамдық бірлестігінің Қызылорда облыстық филиалының директоры Шәкизат Қаратайұлы және Сырдария аудандық полиция бөлімінің қызметкерлері мен ата-аналар қатысты.&nbsp; &nbsp; &nbsp;Аудан әкімінің орынбасары Байдушев Димаш Серікбайұлы қатысушыларға форум қонақтарын таныстырып, шараның мән-мазмұнын жеткізді.&nbsp; &nbsp; &nbsp; Білім саласының ардагері, ардақты ұстаз Алтын Нұртайқызы және №210 орта мектептің ата-аналар комитетінің төрайымы Серіккүл Тұрсынбекқызы бала тәрбиесіндегі ата-ананың рөлі мен мектеп, ата-ана және оқушы арасындағы байланыс жайында хабарлама жасады.&nbsp; &nbsp; &nbsp; Іс-шара барысында мектеп жанындағы жасөспірімдердің қатысуымен орын алып жатқан келеңсіз оқиғалардың алдын алу, жасөспірімдер арасында құқықбұзушылық және ата-анасының бала тәрбиесіндегі рөлі мен жауапкершілігі, құқықбұзушылықтың алдын-алу, жасөспірімдерді зиянды заттардан қорғау (электрондық темекі, т.б) мәселелері қаралып, ата-аналар тарапынан ой-пікірлер мен сұрақтар қойылды.&nbsp; &nbsp; &nbsp; Өз кезегінде «Сенімен Болашақ» Республикалық ата-аналар қоғамдық бірлестігінің Қызылорда облыстық филиалының басшысы Шәкизат Қаратайұлы бірлестіктің мақсаты мен атқарып жатқан жұмыстары жайлы ақпараттар беріп, бірлестіктің миссиясы қоғамда саналы ата-ана мәдениетін қалыптастыру екенін атап өтті. Аталмыш іс-шара барысында ата-аналармен еркін пікір алмасып, сауалдарына ұтымды жауап берді.&nbsp; &nbsp; &nbsp; &nbsp;Ұрпақ тәрбиесіне бейжай қарамай, бірлесе атсалысуға шақырамыз.

Кеңейтілген аудандық ата-аналар жиналысы өтті

<a href="https://kyzylorda-news.kz/">Kyzylorda-news.kz&nbsp;</a> Арал ауданындағы білім ордаларында оқушылардың шығармашылық, интеллектуалдық қабілетін арттыруға бағытталған жаңа жобалар жүзеге асуда. Облыстық білім басқармасы мен Өңірлік коммуникациялар қызметі ұйымдастырған пресс-тур барысында Арал ауданындағы бірнеше мектеп пен балабақшалардың жұмысымен таныстық.Қаладағы №262 мектеп-гимназияда ұлттық құндылықтардың қайта жаңғыруына ерекше мән беріліп, тың бастама, инновациялық жобалар іске асуда. Педагогтер ұлттық ойындарды қазіргі заманға сай жаңа форматқа бейімдеп, қызықты тапсырмаларға толы «Көкпар», «Ақсүйек», «Қыз қуу» ойындарын ұйымдастырған. Бұл оқушылардың ұлттық құндылықтарымызды ұмытпауына әсер етумен қатар, зеректігін арттыратыны да рас. Мұндағы заманауи үлгіде жабдықталған телестудия да "елге белгілі тілші боламын" деген жастарға үлкен мүмкіндік.Оқу орнының басшысы осы студия жанынан жақын аралықта «астрономия» кабинеті ашылатынын атап өтті. Қазіргі уақытта білім ордасында «Оқуға құштар мектеп» жобасы бойынша да ауқымды жұмыстар жүріп жатыр.Аралдағы №220 мектепте «Медиа және журналистика» жобасы аясында ашылған студия да шығармашылыққа бейімі бар оқушылардың қанатын қататуда.&nbsp;№62 мектеп-лицейде инфокиоск бөлімі арқылы кітап оқуға мүмкіндік жасалған. Сондай-ақ IT салаға қызығатын оқушылар үшін, арнайы құрылғылармен жабдықталған робототехника кабинеті жұмыс істейді.Ал Сексеуіл кентіндегі «Алма-Рай» балабақшасында бүлдіршіндердің дамуына, сауат ашуына барынша жағдай жасалған. Балабақша меңгерушісі Алмагүл Еңсепова бөбекжайдың ерекшелігі туралы айтты.<blockquote>– Балабақша алаңы кішкентайлардың танымдық қабілетін арттыру мақсатында безендірілген, әр топтың алаңы қажетті ойын және спорттық құралдармен қамтамасыз етілген. Әдістемелік кабинетте балалар мен ата-аналар арасында жұмыс түрлерін ұйымдастыруға көмек көрсететін қажетті әдістемелік, анықтамалық, танымдық әдебиеттер бар. Жыл бойы балалар әдебиетінің кітапханасы толықтырылып отырады. Барлық ойын құралдары балаларға қолжетімді және санитарлық талаптарға сай келеді. Балабақшадағы әдістемелік құралдардың талаптарға сай келуі мемлекеттік стандарт бойынша жүргізілген, – деді ол.</blockquote>Мұнан кейін Сексеуіл кентіндегі №177 орта мектебіндегі оқушылардың жұмысымен танысып, «Ақмешіт» домбырашылар ансамблінің өнеріне тәнті болдық. Жас өнерпаздар орындаған Абайдың күйі «Торжорға» мен Құрманғазының «Балбырауын» күйі құлақтан кіріп, бойыңды алады. Бүгінде «Ақмешіттің» өнерпаздары жас ерекшеліктері бойынша «Кіші топ» (7-10 жас), «Орта топ» (10-13 жас), «Үлкен топ» (14-17 жас) болып үш топқа бөлінеді. Ансамбль құрамындағы Қадіржан Амедулла, Нұрдәулет Тәни, Рустам Жолдыбай, Қарақат Рахметқали, Әділжан Көпберген, Гүлсезім Қазиева сынды жеке орындаушылар – республикалық және халықаралық конкурстардың лауреаттары. Ансамбль құрамында үш оқушыдан құралған «Ақмешіт» триосы да үлкен сахналарда өнер көрсетіп жүр.<blockquote>– Ашылғанына 4 жыл болған ансамбль облыстық, республикалық, халықаралық кон- курстарда және жекелей орындау байқауларында жеңімпаз атанды. Оқушылар Құрманғазы, Дина, Қазанғап, Түркеш, Дәулеткерей секілді күйшілердің 20-дан астам күйін орындап жүр, – деді Салиха Қабделова.</blockquote>&nbsp;М.Төлеген

Білім беру ұйымдары жаңа жобаларды іске асыруда

<a href="https://kyzylorda-news.kz/">Kyzylorda-news.kz</a> &nbsp;Жапонияның «Шөп тамыры» бағдарламасы арқылы аймағымыздағы әлеуметтік нысандардың жұмысы жанданып жатыр. Соның бірі – Т.Есетов атындағы №264 мектеп-лицейі осыдан екі жыл бұрын «Мектепті автобуспен жабдықтау» атты жоба бойынша грант ұтып алған болатын.Бағдарламаның шарапатын көріп отырған мектеп ұжымымен Жапон елінің Қазақстан Республикасындағы Төтенше және Өкілетті елшісі Джун Ямада, Жапон елшілігінің Атташесі Шимон Комия, «Шөп тамыры» бағдарламасының үйлестірушілері Ютаро Икэноуэ мен Алия Чингишпаевалар келді. Шараға облыстық білім басқармасы басшысының орынбасары Бердаулетов Бағдат Камбозұлы мен БАҚ өкілдері қатысты.«Сабалақ», «Эдельвейс мекенжайларынан 630 бала қатынап оқитын мектепке тасымал қиынға түскен еді. Жоба бойынша қаржылай көмек алған мектеп, бүгінде саяжайларға 4 автобус балалар үшін қызмет жасауда.Шара барысында мектеп директоры Бек Сұлтанбекұлы «Сіздердің әлеуметтік жобаларға арналған көмектеріңіз білім саласына ғана емес, басқа да салалардың дамуына үлкен көмек. Әрине, бұл – маңызды жұмыс. Екі ел арасындағы қарым-қатынас бауырмалдыққа негізделген», деп өзі алғысын жеткізді.

Қызылордадағы мектептер жапондық жобаның игілігін көруде

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласы білім бөлімінің ұйымдастыруымен №7 мектеп-лицейі базасында ұлттық әдебиеттің классигі Ілияс Жансүгіровтың туғанына 130 жыл толуына орай «Ілияс оқулары» республикалық байқауының қалалық кезеңі өткізілді.Мазмұнды іс-шараның мақсаты – мектеп оқушылары арасында ақын шығармаларын насихаттау, жеткіншектердің әдеби көркем шығармаға құш¬тарлығын арттырып, эстетикалық талғамын қалыптастыру.Қалалық іріктеу кезеңіне 55 мектептен 50-ден аса оқушы қатысуға өтініш берген. Оқушылар 5 бағыт бойынша сынға түсіп, облыстық кезеңге жолдама алды.Байқауда әдебиет сүйер өрендер 5 кезең бойынша өз шығармашылық өнерлерін көрсетті. Нәтижесінде «Ілияс - эпик ақын» шығарманы жалғастыру бойынша №217 мектептің 9 сынып оқушысы Айтбай Жанымай, «Жаз! Жаз! Қалам, жорғалап» мәнерлеп оқу бойынша №189 орта мектебінің 10 сынып оқушысы Ақтай Нұрбек, «Ілияс -қарасөз шебері» -көркемсөз оқу бойынша №140 мектептің 9 сынып оқушысы Оспан Талшын, «Сұлу сөздің сүлейі» - шығарманың көркемдік құрылысын талдау бойынша №215 мектептің 10 сынып оқуышысы Әбутәліп Аида және «Заманның заңғар тұлғасы» - буктрейлер бағыты бойынша №7 мектептің 9 сынып оқушысы Сеитжан Меруерт облыстық кезеңге жолдама алды.

Қазақстан және Қызылорда облысының жаңалықтары: Білім