<a href="https://kyzylorda-news.kz/">Kyzylorda-news.kz</a> Қазақстан Республикасының Премьер-министрі Олжас Бектенов Қызылорда облысының орталығындағы балаларды қосымша біліммен қамтуды арттыру бағытында атқарылып жатқан шаралармен танысты.Жеке инвестиция есебінен салынған жаңа Оқушылар сарайы биыл қазан айында пайдалануға берілді. Жобаның құны – 2,4 млрд теңгені құрайды. 350 адамға дейін сыятын әлеуметтік нысан әртүрлі жастағы оқушылардың жан-жақты дамуына ықпал ететін, гидропоника, робототехника, өнеркәсіптік дизайн, телестудия сынды басқа да жаңа жабдықтармен қамтамасыз етілген.Мұнда Премьер-министрге Президент жариялаған Жұмысшы мамандықтары жылы шеңберінде Қызылорда облысында кәсіптік-техникалық білім беру және кадрлар даярлау жүйесін трансформациялау бойынша атқарылып жатқан шаралар туралы ақпарат берілді. Өңірде 28 колледж жұмыс істейді, онда бүгінде 20 мыңнан астам студент білім алып жатыр, оның 5 мыңға жуығы жұмысшы мамандықтары бойынша оқиды.2024-2025 оқу жылында облыстың барлық аудандарында 7 оқу-өндірістік комбинаты ашылды. Қысқамерзімді кәсіптік оқыту курстары 300-ге жуық адамды қамтыды. Алғашқы комбинат 2022 жылы қалалық мектеп-лицей базасында ашылған. Аспаз, тігінші, графикалық дизайнер және басқа да сұранысқа ие мамандықтар бойынша 164 маман бітірді. Алдағы уақытта тәжірибені кеңейту жоспарланып отыр.<img src="https://knadmin.beoblood.kz/uploads/Premer_ministr_o_ushylar_sarajyna_bardy_1_b01dcac57f.jpg" alt="Премьер-министр оқушылар сарайына барды 1.jpg">

Премьер-министр оқушылар сарайына барды

<a href="https://kyzylorda-news.kz/">Kyzylorda-news.kz</a> Сырдария ауданы, Бесарық ауылында Премьер-министр «Ауыл аманаты» бағдарламасын іске асырудың және бизнестің әлеуметтік жауапкершілігінің табысты мысалдарымен танысты.«Абай Дәулет» ЖШС құрған өндірістік алаңда 318,2 млн теңгеге ауыл тұрғындарының 13 бизнес-бастамасы іске асырылуда. Жартылай фабрикаттар, пластикалық ыдыстар, ағаштан жасалған бұйымдар, тоқыма, кондитерлік өнімдер, сабын және басқа да өнімдер өндіретін цехтар ашылды. Олжас Бектенов ауыл тұрғындары шығаратын өнімдер желісімен танысты.Оң тәжірибені кеңінен тарату үшін облыстың әр ауданында кемінде 3-4 ауылда осындай бизнес-инкубаторлар ашу жұмыстары жүргізілуде.Қызылорда облысында «Ауыл аманаты» бағдарламасы аясында биыл өңдеу өнеркәсібін, мал шаруашылығы, өсімдік шаруашылығы және басқа да келешегі бар салаларда 610 жұмыс орнын ашқан 575 жоба іске асырылды.«Kaz Fries» зауытында Премьер-министрге АӨК өнімдерін терең өңдеу саласындағы әлеуетті ашу шаралары таныстырылды. Кәсіпорынның қуаты сағатына 150 килоға дейін қуырылған картоп таяқшаларын өндіруге жетеді, дайын өнім мұздатылып, ішкі нарықта сатылады. «Абай-Дәулет» ЖШС директоры Мұрат Сәрсенбаев өсімдік, құс, мал шаруашылықтарымен және құрылыс өнімдерін шығарумен айналысатын көпсалалы компанияның өндірістік қуатын одан әрі кеңейту жоспарлары туралы хабардар етті.Серіктестік ауылдың дамуына үлкен үлес қосып келе жатқанын атап өткен жөн. 2018 жылдан бері компания бұл мақсаттарға 1,5 млрд теңгеден астам қаржы бөлді. Қаражат 360 орындық мектеп, 120 орындық балабақша және дәрігерлік амбулатория сияқты әлеуметтік нысандарды абаттандыруға, көгалдандыруға, жөндеуге бағытталған. Демеушілік қолдау есебінен осы жылы 150 адамға арналған Мәдениет үйі күрделі жөндеуден өтті. Мұнда Президенттің бастамасымен жастарды отаншылдық, адамгершілік рухында тәрбиелеуге бағытталған «Адал адам» тұжырымдамасы іске асырылуда. Балалар үйірмелері ашылып, музыкалық шығармашылық ұжым құрылды. Сонымен қатар «Адал адам» мәдени орталығында подкаст-студия орнатылған, онда тікелей эфирде ауыл бизнесін дамытудың өзекті мәселелері талқыланады, көрермендерге жергілікті цехтарда өндірілген өнімдер таныстырылады.Премьер-министр бизнестің ауылдық жерлердегі тұрмыс сапасын жақсартуға қосқан үлесі маңызды екенін атап өтті.«Ауылды дамыту, нәтижелі жұмыспен қамтуды ынталандыру, сапалы әлеуметтік инфрақұрылым құру – Үкіметтің басым міндеттерінің бірі. Осы бағытта біз кәсіпкерлердің барлық бастамасын қолдаймыз. Егер Қазақстандағы әрбір ауылда осы жерде бизнес ашатындар тарапынан жауапты қолдауға ие болса, халықтың тұрмыс сапасы да анағұрлым серпінді түрде жақсарады», — деп атап өткен Олжас Бектенов Бесарық ауылын дамыту тәжірибесін одан әрі кеңейту қажеттігіне тоқталды.Айта кетейік, бұған дейін Қызылордадағы "Қорқыт ата" әуежайының жаңа терминалы ашылғанын хабарлағанбыз.Бизнестің әлеуметтік жауапкершілігі шеңберінде іске асырылған жоба өңірдің сауда-экономикалық, туристік әлеуетін дамытуға және халықтың тұрмыс сапасына тікелей әсер ететін көлік қызметтерінің қолжетімділігін қамтамасыз етуге ықпал етеді. Жаңа терминалды іске қосу әуе айлағының өткізу мүмкіндігін 7 есеге – жылына 300 мыңнан 2 млн жолаушыға дейін арттырады. Жаңартылған «Қорқыт ата» терминалы Халықаралық әуе көлігі қауымдастығының (IATA) және Халықаралық азаматтық авиация ұйымының (ICAO) жоғары стандарттарына сәйкес келеді.

Бектенов Бесарықтағы байыпты бастамалармен танысты

<a href="https://kyzylorda-news.kz/">Kyzylorda-news.kz</a>&nbsp; Шәкiрттерiн бiлiм нәрiмен сусындатып, тәлім-тәрбиe беру, жақсы қасиeттерді бойына дарытып, адамгершілік рухта бағыт-бағдар берудe ұстaздың еңбегi зор. Сондықтан да ол әрдайым құрметті тұлға ретінде ерекшеленеді. Қазалыда осынау ұлы салада он бір ғасырға жуық қызмет етіп келе жатқан әулет бар десем, сенер ме едіңіз?! Иә, бұл мамандығын парызы тұтқан әулеттің бірегейі – ұстаздық жолын ұстанып, қаншама шәкірттің шырағын жағып келе жатқан, 1070 жыл жұмыс өтілі бар – Жәдиевтер отбасы.Кезінде Жәдиден тараған алты баланың біреуі Өмірзақ ауыл шаруашылығы саласында қызмет істеп, зейнет демалысына шықса, қалған бесеуі – Жаниет пен Ақниет, Жандәулет, Жанғазы және Шынтас ұстаздық жолын таңдады.Бұлардың арасында Шынтас Жәдиев 46 жыл өмірін мұғалімдікке арнап, бүгінде зейнетке шыққан. Алғаш еңбек жолын №97 мектепте тарих пәнінің мұғалімі болып бастаған. 1977-1978 жылдары Ақтан батыр ауылындағы №190 мектепте тарих пәнінің мұғалімі болды. Одан кейін №102 мектепте директор болды. 45 жылға жуық уақыт бала тәрбиелеу ісімен айналысып келе жатқан Шынтас Жәдиұлы 1997 жылы Қазақстан Республикасының Білім және ғылым министрлігінің, 1986 жылы облыстық білім басқармасының «Құрмет грамотасымен», 2011 жылы облыстық ғылыми-практикалық конференцияда «Орта мектептерде он екі жылдық білім беру туралы» баяндама жасап, облыстық білім жетілдіру институтының «Алғыс хатымен» марапатталған.Шынтастың ізін жалғаған балалары мен келіндері, немерелері де осы жолды таңдаған. Жәдиев Ержан Шынтасұлы 1993 жылдан бері №98 география пәнімен қатар тәрбие ісі жөніндегі орынбасары қызметін қалтқысыз атқарып келеді. Ал оның жұбайы Гауһар Әбілдаева сол білім ордасында 21 бойы бастауыш сынып мұғалімі қызметінде. Сонымен қатар Шынтастың қыздары Әсия тарих пәнінен 21 жыл шәкірттерді шыңдап келе жатса, Ләззат 15 жыл бойы бастауыш сыныптарының зейінін ашып келеді. Сондай-ақ немерелері Ерсұлтан география пәнен мұғалімдік қызметін атқарса, Рауан қазақ тілі мен әдебиеті пәнінің мұғалімі.Жалпы Жәди ақсақалдан тараған алты ұлдың да ұрпақтары осы асыл қызметте жүздеген жылдық жұмыс өтілі бар. Мәселен, Жәниет Жәдидің әулетінің педагогика саласындағы еткен еңбек өтілі 299 жыл болса, Ақниет Жәдиевтің ұрпақтарының бұл жолда 124 жыл жұмыс өтілі бар. Ал Жандәулет Жәдиевтің балаларының білім саласында 200 жыл жұмыс өтілі болса, Жанғазының ұрпақтары 205 жыл қызмет еткен. Сонымен қатар Өмірзақтың ұрпақтары 80 жыл және Жәди ақсақалдың кенжесі Шынтастың балаларының 148 жыл жұмыс өтілі бар. Яғни ата жолын жалғап, шәкірттерді білім нәрімен сусындап, осынау киелі ұстаздық жолымен келе жатқан әулеттің бүгінде жұмыс өтілі 1066 жылды құрайды.Жәдиевтер әулеті өте белсенді, аудандағы, облыс пен республикадағы ауқымды отбасылық байқауларда бақ сынап та келеді. Жуырда өткен «Мерейлі отбасы» ұлттық конкурсының аудандық кезеңінде бақ сынап, «Үлгілі отбасы» бағамын иеленді. Отбасының ардақты атасы Шынтас Жәдиев қазір 70 жаста. Ол – білім беру ісінің үздігі. 46 жыл өмірін ұстаздық жолға арнап, білім саласында елеулі еңбек еткен ардагер-ұстаз. Қазақстан Республикасының білім және ғылым министрлігінің «Құрмет грамотасын» иеленген. Жұбайы Күлпәш Қалымбетовамен 4 бала тәрбиелеп, 14 немере, 5 шөбере сүйген үлгілі отбасы.Сонымен қатар Өмірзақ Жадиевтің отбасы да «Мерейлі отбасы» ұлттық конкурсында бағын сынап келеді. Өмірзақ ақсақал 13 жыл бойы математика пәнінен сабақ беріп, қазір бейнетінің зейнетін көріп отыр. Оның Жұбайы да осы жолда, қазақ тілі пәнінен 39 жыл қызмет еткен. Бүгінде Өмірзақтың ұлдары мен келіндері де білім саласында қызмет етіп келеді. Жалпы Жәдиевтер әулеті елге еткен қызметі үшін қандай да болсын мадаққа, марапатқа лайықты. Жапырағы жайқалып, тамырын тереңінен жайған әулетке тек жақсылық тілейміз. Серік АҚМЫРЗА

Ұлағаттылық жолында 1070 жыл

<a href="https://kyzylorda-news.kz/">Kyzylorda-news.kz</a>&nbsp; Қазалы ауданының абыройын әлемдік ареналарда асқақтатып жүрген спортшылар баршылық. Солардың бірегейі – биыл Франция елінің астанасы Париж қаласында өткен Олимпиада ойындарында боз кілемде білек күшін сынаған палуан, дзюдодан жоғары дәрежедегі сайыстарда жеңіс тұғырынан көрініп жүрген жас спортшы Абылайхан Жұбаназар. Жақында жас спортшымен әңгімелесудің орай түскен еді.– Абылайхан, ең әуелі үздіктер үзеңгі қағыстырған Париж олимпиадасына тоқталсақ...– Олимпиада – әрбір спортшы үшін ең үлкен жарыс. Себебі басқасына қарағанда мұндағы жауапкершілік жүгі әлде қайда ауыр. Бұл моральдық тұрғыда да ой-өрісіңе әсеретеді. Бірақ мен моральды түрде де, физикалық түрде де дайын болдым. Тек өкінішке орай, жаратқанның дегені болды, жеңіліс таптым. Бұған еш мойымаймын. “Бүгінгі Абылайхан, кешегі Абылайханнан мықты болуы керек” деген ұраным бар. Алла амандығын берсе, алдағы уақытта Лос-Анджелес қаласында өтетін олимпиадаға тыңғылықты дайындалып, енді есе жібермеуге жұмыс жасайтын боламыз. Оған дейін жауырынды жерге тигізбеу керектігі де бар.– Енді балалық шағыңызға оралсақ... Жалпы боз кілемге қалай келдіңіз?– Спортқа алғаш достарыма еріп, он екі жасымда келдім. Қазақша күрес үйірмесіне қатысып, әрі қарай қызығушылығым артып, түрлі деңгейдегі жарыстарға бардым. Бірнеше мәрте жеңіске де жеттік. Сондай жарыстың бірінде жүргенімде қызылордалық жаттықтырушы ағайымыз кезігіп, сондағы үлкен жарыстарда бақ сынауға шақырды. Сөйтіп, он жеті жасымда Қызылордаға ауысып, сонда дайындық бастадым. Жаттықтырушымыздан жаңа әдістер үйреніп, көптеген белестерді бағындырдық. Жалпы спортқа осылай келдім.– Әдетте былғары қолғап киген немесе боз кілемде белдескен жігіттердің дені аралас жекпе-жек, яғни ММА-да бақ сынап жатады. Бұл жайында ойыңыз қалай?– Иә, бүгінде ондай спортшылар қарасы қалыңдады. Әдетте белгілі бір спорт түрін жолға қойып, кейін өзін басқа спортта көретін азаматтар таңдап жатады аралас жекпе-жекті. Оның ішінде жоғары жетістіктерге жетіп жүргендері де бар. Бірақ менде әзірге ондай ой жоқ. Себебі дзюдо – өте күрделі, ауыр спорт түрі. Мұнда назарың нақты осы спорт түріндеболмаса, нәтиже шығару қиынның қиыны.– Алдағы уақытта шәкірт тәрбиелеу ойыңызда бар ма?– “Жүз жыл өмір сүрсең, жүз жыл үйрен” деген бар ғой, сол секілді әлі де үйренерім көп. Сол үшін шәкірт тәрбиелеуге әзірге асығыс емеспін. Барлығы өз уақыты, өз орнымен болады.– Жігітке жеті өнер де аз десек, жетеуді де жығатын жігерлі жігіт Абылайханның басқа қандай өнері, хоббиі бар?– Негізі дзюдодағы арнайы рейтинг тізімінен құлап кетпес үшін ай сайын өтетін жарыстардан қалмай, қатысып тұру қажет. Уақыттың көбі сол үшін боз кілемде өтеді. Жалпы күресу де өнер деп білемін. Одан бөлек, күмбірлетіп күй ойнамасақ та, аңшылық пен атсейістікке икемім бар. Спорттан тыс уақытта осы істермен айналысамын.– Кумиріңіз кім?– Кумирім – елдің батыры, осы спортта өзінің өшпес тарихын жасап жатқан Елдос Сметовағамыз. Бұл жайында бұған дейінгі берген сұхбаттарымда да айтып жүргенмін. Елдос ағамыз әрбір жас үлгі тұтып, еліктеуге лайықты еліміздің тау тұлғалы азаматтарының бірі. Қазір дайындықтарда жанымызда болып, өзінің білгенімен бөлісіп жүр. Жарыстарда да шынайы жанашырлығын көрсетіп, жігерлендіріп жүреді.– Алға қойған мақсат-жоспарыңыз қандай? Бөлісе отырсаңыз...– Үлкен спортта жүрген соң кейде түрлі сынақтардан өтеміз. Жарыс алдында не барысында жарақат алып, соған төзіп те өтіп жатамыз. Мұның барлығы түптеп келгенде ерім деген елдің атын асқақтату, Туымызды көкте желбіретіп, Әнұранымызды шырқату үшін жасалып жатқан еңбек. Бұл – бірінші. Ал екіншісі, ел спортында басқа да аға-әпкелеріміз секілді өшпес із қалдыру. Одан кейін, әрине, өткен олимпиадада кеткен есені Алла қаласа 2028 жылы Лос-Анджелес қаласында өтетін жарыста қайтару.– Абылайхан, ашық әңгімеңіз үшін көп рақмет! Жеңісті күндеріңіз көп болғай! Серік АҚМЫРЗА

Қазалылық олимпиадашының алар асуы көп

<a href="https://kyzylorda-news.kz/">Kyzylorda-news.kz</a>&nbsp; Елімізде «Педагог мәртебесі туралы» заңға сәйкес, 2021 жылдан бастап «Қазақстанның еңбек сіңірген ұстазы» атағы енгізілді. Мемлекет басшысы Қасым-Жомарт Тоқаевтың тапсырмасымен қабылданған заң аясында біршама оңтайлы іс атқарылып жатыр. «Қазақстанның еңбек сіңірген ұстазы» атағы – мәртебелі мемлекеттік награда. Бұл атақ мұғалімдерге үздік жетістіктері мен мемлекет алдындағы ерекше еңбегі үшін беріледі. Осы уақытқа дейін республика бойынша 46 мұғалім осы марапатқа ие болса, биылғы 5 қазанда тағы 24 мұғалімге жоғары награда берілді.&nbsp;Кәсіби мерекеде мерейі үстем болған ұстаздар қатарында – Қызылорда қаласындағы №10 дарынды балаларға арналған облыстық «Білім-инновация» лицейінің қазақ тілі мен әдебиеті пәнінің мұғалімі Нағиша Есбосын да бар. Қасиетті Қазалы топырағының тумасы, ұлағатты ұстаз Нағиша Қожаққызымен телефон арқылы тілдесіп, сұхбат алудың сәті түскен еді.– Нағиша Қожаққызы, құрметті атағыңыз құтты болсын. Бұған дейін де бірнеше рет марапат төрінен көрініп, түрлі атақтарды иелендіңіз. Десе де бұл награданың жөні бөлек. Президент Қасым-Жомарт Тоқаевтың қолынан марапат алғанда қандай сезімде болдыңыз?– Әрине, ерекше толқыдым. Бұл – Президенттің өз қолымен табыс ететін мұғалім үшін ең үлкен, мемлекеттік деңгейдегі құрметті атақ болып табылады. 2021 жылы ең алғаш 20 мұғалімге берілді. Солардың бірі болып Қазалы ауданы, Әйтеке би кентіндегі №249 мектеп-лицейдің ағылшын тілі пәнінің мұғалімі, менің жан құрбым Жамила Әбжанова алып келді. Сол кезде қатты қуанып, дәл осындай ұстазға жасалып жатқан құрметке, шынайы еңбегіне берілген марапатқа риза болдым. Дәл осы сезімді өзім алған кезде де басымнан кешірдім. Оның үстіне Ақорданың төрінде керемет әсер. Ауызбен айтып жеткізу мүмкін емес. Үлкен толқыныс, толғаныс. Адам өмірінде төбеңнен нұр төгіліп тұратын сәулелі сәттер болады ғой. Міне, менің бойымды дәл осы күй биледі.&nbsp;Мамандығына адал болып жүрген барша мұғалімдер қауымына, балаларға білім беру, шәкірттерді қанаттандыру жолында уақытын да, өмірін де арнап жүрген әрбір ұстазға жұғысты болса екен деп тілеймін. Бұл, әсіресе, жас мұғалімдерге үлкен мотивация. Адал еңбектің жоғары бағаланатындығының дәлелі деп санаймын.&nbsp;Иә, сөзіңіздің жаны бар. Еткен еңбегімнің жемісін көріп, сый-құрметке бөлендім. Атап айтар болсам, бірнеше жинағым мен әдістемелік құралдарым жарыққа шықты. Соның ішінде «Қыздармен сырласу сабағы» және «Оқытудың жаңа әдіс-тәсілдері қоржынынан» жинақтарым республика көлемінде таратылып, мектептерде факультативтік сабақтар ретінде өткізіліп жүр. Республика, облыс көлемінде семинарлар мен шеберлік сабақтарын өткіздім. Республикалық «Q talks» жобасындағы сөзім телеарналар мен әлеуметтік желілер арқылы таратылды. Облыстық ішкі саясат бөлімінің пулспикері ретінде үнемі саяси ақпараттарды насихаттау жұмыстарына да араласып келемін. Менің бастамаммен әдістемелік желілер, іс-әрекетті, сабақты зерттеу жұмыстары облыс көлемінде жүзеге асып, бірнеше мектептермен тікелей жұмыс жасап отырмын. 2020 жылы «Қызылорда облысының білім беру саласын дамытудағы еңбегі үшін» төсбелгісімен, 2021 жылы «Ы.Алтынсарин» белгісімен марапатталдым.Ұстаздың мерейін тасытатын, еңбегінің нәтижесін көрсететін ол – шәкірттерінің шыққан шыңы. Дайындаған оқушыларым облыстық, республикалық пән олимпиадалары мен ғылыми жобалар байқауында, түрлі мүшәйралар мен сайыстарда жеңімпаз атанып, биік тұғырлардан көрініп жүр. Соңғы 5 жылда 3 оқушым республикалық олимпиаданың «Алтын», «Күміс» медальдарын иеленді.– Ұстаздық деген ұлы жолда тер төгіп, шәкірт тәрбиелеу бала күнгі арманыңыз ба, әлде ата-ана ықпалы әсер етті ме?– Мен 1973 жылы 1 қыркүйекте Қазалы ауданына қарасты Ғани Мұратбаев ауылындағы №91 мектепке бірінші сыныпқа қабылданып, алғашқы ұстазымды, жаңа достарды, мектеп партасын көрген сәттен-ақ ерекше әсер алдым. Сол жылы көрініс, жап-жас ұстаз, оның маған мейіріммен күлімсірей қараған сұлу жүзі көз алдымда. Сол күні сабақтан үйге «Мен мұғалім боламын» деп айқайлап кіргенім әлі есімде. Бастауыш бітіріп, бесінші сыныпқа барған кезде Райхан Жұмағамбетова апай математика пәнінің мұғалімі болды. Сол кісіні көрдім де, «Математика пәнінің мұғалімі боламын» деп шештім. Абайдың өзі: «Адамға жақсы мінез ата-анадан, жақсы ұстаздан, құрбыдан жұғады. Әсіресе, кімді қаттырақ жақсы көрсе, содан көбірек жұғады» деп айтады. Мұғалімдерімді жақсы көргендігімнен болар, мамандыққа деген қызығушылығым, бала арманым сонау шақта санамда қалыптасты. Күндердің бір күнінде менің алғашқы ұстазым аяқ астынан дүниеден озды. Бұл оқиғадан кейін бастауыштағы арманым қайта тірілгендей болды. Ең алғашқы ұстазыма: «Сіз сияқты мұғалім боламын» деген сертім санамда лаулады. 8-сыныптан кейін Қызылорда қаласындағы М.Мәметова атындағы педагогикалық училищеге түсіп, бастауыш сынып мұғалімі болуға бел будым. Кейінірек бұл туралы былай жазғаным есімде:&nbsp;Бір арман әлдиледі бала жастан, Тәтті еді сол әлдиім әуел бастан. Ең алғаш ұстаз алдын көрген күні «Мұғалім болам!» – дедім ­ойланбастан. Тұрғасын лүп-лүп етіп жүрек қалап, Өзімді әжептәуір ұстаз санап. Жасап ап көрнекілік ағаш-тастан Өтуші ем қозы-лаққа күнде сабақ.Ол кезде біздің ойыншығымыз, қуыршақтарымыз болған жоқ. Төл бағатынбыз. Сол төлдерге өзімнің сыныптастарымның атын қойып, апайдың бүгін өткен сабағын соларға қайталап өтіп жүретін едім.&nbsp;Нығайып әр жыл сайын қадамым бек,&nbsp; Ұстаз қып елестеттім өзімді тек. Серт бердім алғашқы ұстаз қазасында, «Мұғалім дәл өзіңдей боламын» – деп. Әрі қарай осы өлеңім жалғаса береді.&nbsp;Арман қуып, педагогикалық училищеге түстім. Ол жақта жүргенде де математика пәнін жақсы көрдім. Бітіргеннен кейін «физика-математика» пәнінің мұғалімі боламын деп жүрдім. Әртүрлі себептермен физика-математика пәні мұғалімдігіне бармадым.&nbsp;Педагогикалық училищені бітіргеннен кейін Қазалы ауданындағы №249 орталау мектептің аға пионер вожатыйы болып еңбек жолымды бастадым. Келесі жылы ҚазГУ-дің филология факультетіне түстім. Қазалы ауданының комсомол комитетінің үшінші хатшысы бола жүріп, мектептермен тығыз байланыс жасадым. 1992 жылы ҚазГУ-ды бітіргенен кейін Қазалыдағы №216 Қ.Сәтбаев атындағы орта мектепке мұғалім болдым. Одан кейін директордың бастауыш сыныптар жөніндегі орынбасары қызметін атқардым. Бертін келе Қызылорда қаласына ауыстым. Қорқыт ата атындағы университеттің жанындағы «Қабілет» мектеп-гимназиясында жұмыс жасадым. 2012 жылы Қазақ-түрік лицейіне «Қазақ тілі мен әдебиеті» пәнінің мұғалімі болып ауыстым. Содан бері 12 жылдың жүзі болды. Осы жерде еңбек етудемін. Қазір қазақ-түрік лицейі №10 дарынды балаларға арналған облыстық «Білім-инновация» лицейі деп аталады.&nbsp;– Шәкірт болдыңыз, шәкірт тәрбиелеп жүрсіз. Бүгінгі ұстаз бен бұрынғы ұстаздың беделінде айырмашылық бар ма?&nbsp;– Мен, жалпы, бұрынғы мұғалім, қазіргі мұғалім деп бөлуге қарсымын. Қай кезде де мұғалімнің жүгі, жауапкершілігі бірдей деңгейде. Мұғалім шәкіртіне сапалы білім, саналы тәрбие, үлгі-өнеге берудің жолында ізденеді, жаңалықтың көшінен қалмайды. Сондықтан бұрынғы мұғалімдер басқаша еді, қазіргі мұғалімдер былай еді деп айтуға болмайтын секілді.&nbsp;– Әрбір адамның болашағына айқын бағыт-бағдар беретін бірден-бір тұлға ол – ұстаз! Мектептің жүрегіне баланатын мұғалімнің мәртебесі қалай қорғалып жүр?&nbsp;– &nbsp;Мұғалімге жасалып жатқан құрмет жақсы деңгейде. «Педагог мәртебесі» туралы заң қабылданғаннан кейін де ұстаздарға Президент тарапынан, құзырлы орындардың тарапынан жақсы көңіл бөлініп, олардың әл-ауқатын жақсартуға, жұмысына деген құлшынысын арттыруға мотивация беруде көптеген шаралар жүзеге асырылып жатыр. Мен оны қуана құптаймын.&nbsp;Бізде азғантай келеңсіз жағдай болса, соны дабырайтып көрсету сәттері өте көп. Мәселен, ата-ана тарапынан немесе қоғамдағы кейбір мәселелерге байланысты жүзден бір келеңсіз оқиға болып қалса, барлығы сондай секілді қабылданып кетеді. Ал тоқсан тоғызы жақсы бола тұра, кейде көрінбей қалады.&nbsp;Ұстаз мәртебесін көтеруде оларға жасалып жатқан құрметтің, шәкірттерінің, ата-аналардың, жұртшылықтың қолдауы, демеуі жылдан-жылға жақсарып келеді.&nbsp;– Нағиша апай, уақыт бөліп, сұхбат бергеніңізге рақмет. Шығармашылық табыс тілеймін. Ұлболсын ТАЛАПБАЕВА

«Білім-инновация» лицейінің мұғалімі: Төбемнен нұр төгіліп тұрған сәулелі сәт еді

<a href="https://kyzylorda-news.kz/">Kyzylorda-news.kz</a> Осыдан 2 жыл бұрын халыққа Жолдауында Мемлекет басшысы Қасым-Жомарт Тоқаев «Жайлы мектеп» пилоттық жобасын әзірлеу керектігі туралы айтқан еді. Бұл жоба апатты мектептерді жою, үш ауысымды мектептер мен оқушы орындарының тапшылығы мәселесін шешу және білім саласындағы бірқатар мәселелерді шешу мақсатында қолға алынған еді. Бұл бағытта 2023-2025 жылдар аралығында елімізде 369 орта білім беру нысанын салу жоспарланған.&nbsp;Нәтижесінде жоба екі ауысымда 740 мың жаңа оқушы орнын құруға мүмкіндік береді. «Жайлы мектептің» құрылысы екі кезең бойынша жүзеге асады. Бірінші кезең бойынша 2023-2024 жыл аралығында 208 жайлы мектеп салынуы қажет. Ал екінші кезеңде 151 жаңа білім ошағы ел игілігіне беріледі деп жоспарлануда. Осылайша, елімізде 2025 жылға дейін 300-ден астам заманауи үлгідегі жайлы білім ошағы бой көтереді.Аты да заты да бөлек бұл мектептің жобасы, сапалы салынуы, қаржыландыруы «Samruk-Kazyna Construction» АҚ жауапкершілігінде. Республика бюджеті мен Ұлттық қордан ұлттық жобаны жүзеге асыруға 2,38 триллион теңге қаржы бөлінген. Оның ішінде 2023 жылға 499,9 миллиард теңге бөлінсе, биылға 976,7 миллиард теңге, келер жылға – 909,4 миллиард теңге қарастырылған. Сондай-ақ жоспарланған 369 мектептің 206-сы қалада, 163-і ауылдық жерде салынбақ.Ұлттық жобаның уақытылы әрі сапалы жүзеге асуы жоғарыда аталған компанияның бақылауында. Жалпы «Жайлы мектеп» ұлттық жобасының тағы бір мақсаты – отандық өнімді қолдау. Осы орайда нысанды салушы құрылыс мекемелері қажетті жабдықтар мен жиһаздарды отандық тауар өндірушілерден алуы тиіс. Бұл тек сөз жүзінде қалмай, іс жүзінде қадағаланады. Себебі мердігерлерге ай сайын Қазақстанда өндірілген материалдар мен тауарларын пайдалану бойынша есеп беріп отыру міндеттелген. Бұдан бөлек жобаны іске асырудың ашықтығын қамтамасыз ету мақсатында бірыңғай кросс-платформа әзірленген. Жайлы мектептердің мердігерлері апта сайын құрылыстың барысы туралы электрондық форматта есеп дайындап порталға жүктеуге міндеттелген. Осылайша бақылау бір уақытта бірнеше деңгейде жүзеге аспақ. Бұл мектептерді жобалау және салу процесін бақылауға, жобаны әзірлеу кесте бойынша жүріп жатқанына көз жеткізуге мүмкіндік береді.&nbsp;Егер мердігер қандай да бір жұмыс түрлері бойынша үлгермесе немесе артта қалса, порталда ашық көрсетіп тұрады. Сондай-ақ порталда барлық төлем құжаттары мен орындалған жұмыс актілері болады. Осылайша мердігердің қанша ақша алғаны және атқарған жұмысы көрінеді. Сонымен қатар құрылыс нысандарында фото және бейнебақылау орнатылған. Бұл арқылы әрбір мектептің құрылысын техникалық қадағалау сарапшылары бақылай алады. Нәтижесінде сапалы жұмыс болады.Қазіргі таңда «Жайлы мектеп» ұлттық жобасы Қазақстанның барлық өңірлерінде, ауыл-аймақтарында жүзеге асырылуда. Дегенмен мектептерде оқушы орындарының тапшылығы бар аймақтарға басымдық берілген. Бұл қатарда Алматы, Астана, Шымкент сынды ірі қалалар мен Түркістан, Қызылорда облысы да бар. &nbsp;Мемлекет басшысының бастамасымен қолға алынған жобаның игілігін көруді жұртшылық асыға күтуде. Бұл білім ошағында тәлім алғысы келетін оқушылардың қарасы қалың.Ал жұртшылық тағатсыз күткен жайлы білім ордасы қандай артықшылығы бар? Пилоттық жобаны жүзеге асыру аясында jaily-mektep.kz арнайы сайты іске қосылған. Аталған ақпарат порталында «Жайлы мектептің» несімен ерекшеленетіні жазылған. Ондағы ақпарат көзіне сүйенсек, аталған білім ордасының ауданы, сынып бөлмесі басқа мектептерге қарағанда 15-20 процентке кең болмақ. Сонымен бірге техникалық жабдықталуы 4 есе жоғары болады. Теория мен тәжірибеге арналған құрал-жабдықтар толық қамтамасыз етіледі. Заманауи компьютерлер мен интерактивті тақталар орнатылып, қауіпсіздік шарасын сақтауда бейнекамералар, кіріп-шығуды қадағалау жүйесі орнатылады. Сондай-ақ оқушылар мен мұғалімдерге арналған демалыс және нетворкинг аймақтары жабдықталады. Бұдан бөлек 3-4 спорт залы, мектеп аумағында спортпен шұғылдануға және басқа да іс-шараларға арналған алаңдар жасалады. Ерекше балалар үшін кедергісіз орта қамтамасыз етіліп, пандус, лифт, арнайы дәретханалар және инклюзивті білім беру кабинеті жұмыс істемек. Техникалық бағыттағы кабинеттер қажетті құрылғылармен қамтамасыз етіліп, оқушылардың теорияны тәжірибемен ұштастыруына мүмкіндік жасалады. Робототехниканы игеруге басымдық беріледі. Сонымен қатар жоғары сынып пен бастауыш сынып ғимараттары бөлек орналасады.Аймақта ұлттық жоба аясында 2025 жылға дейін 12300 орынға арналған 21 мектеп бой көтеруі керек. Оның ішінде облыс орталығынан бастап барлық аудан және ауылдар қамтылған. Атап айтқанда, Арал ауданында және Сексеуіл, Жақсықылыш ауылында – 300 орындық, Жалағаш ауданында – 300, Қазалы ауданына қарасты Жанқожа батыр ауылында – 300, Әйтеке би кентінде – 600, Жаңақорған ауданында – 600, оған қарасты Жаңарық ауылдық округінде – 300, Қармақшы ауданының ІІІ интернационал ауылында – 300, Жосалы, Тереңөзек кентінде – 300, Шиеліде – 900 орындық білім ошағы бой көтереді. Ал Қызылорда қаласы бойынша 6 жайлы мектеп салынады. Оның ішінде сол жағалауда – 900, СПМК-70 – 1500, Арайда – 1500, КБИ-де – 600, Ж.Махамбетов және Қызылжарма ауылдық округінде – 600 орындық мектеп бой көтереді деп жоспарланған. Бұл ретте аймақ басшысы Нұрлыбек Нәлібаев жаз бойы құрылыс алаңдарын аралап, нысанның сапалы салынуын қадағалады.Бұл туралы облыс әкімдігінің «facebook» парақшасында биыл 6900 орындық 10 мектеп, алдағы жылы 5400 орындық 11 мектеп пайдалануға берілетіні айтылған. Облыс әкімдігі оларға инфрақұрылым жеткізуге жергілікті бюджеттен 118,4 миллион теңге бөліп, жоба-сметалық құжаттары әзірленді, сараптаманың оң қорытындысы алынды. Инфрақұрылым жүргізуге жергілікті бюджеттен 1,7 миллиард теңге бөлініп, қазір 10 мектептегі құрылыс-монтаж жұмыстары толық аяқталды. Биыл құрылысы басталатын 11 мектептің жер телімдері белгіленіп, «Самұрық-Қазына Констракшн» акционерлік қоғамына берілген.Ұлттық жоба туралы ақпарат беретін «Jaily-mektep.kz» сайтында көрсетілген ақпаратқа сүйенсек, биыл Қызылорда қаласына қарасты Ж.Махамбетов ауылынан басқа аумақтардағы білім ошағы пайдалануға берілуі тиіс.Ал аймақтағы алғашқы 900 орындық «Жайлы мектеп» сол жағалаудан қала күні қарсаңында оқушылар игілігіне берілді. Білім ғимаратының ашылу салтанатына облыс әкімі Нұрлыбек Нәлібаев арнайы қатысты. Шара барысында аймақ басшысы қала тұрғындарын жаңа мектептің ашылуымен құттықтап, жиналған жұртшылыққа ізгі тілегін айтты.<blockquote>– Жас ұрпақтың білімі мен оқу-ағарту ісіне барынша көңіл бөлу – мемлекетіміздің ең маңызды міндеті. Биыл өңірдің білім саласына бөлінген қаржы 262 миллиард 100 миллион теңгеге жетіп, облыс бюджетінің 35,2 пайызын құрады. Мемлекет басшысының бастамасымен «Жайлы мектеп» ұлттық жобасы еліміздің барлық аймағында жүзеге асырылуда. Ұлттық жоба аясында 740 мың оқушыға арналған 369 мектеп салынады. Осы жобамен өңірімізде 12 300 орынға лайықталған 21 мектеп салу жоспарланған, оның 10-ның құрылысы жүргізілуде. «Жайлы мектеп» жобасын іске асыру арқылы аймағымыздағы 4 апатты және 3 бейімделген мектептің мәселесі түбегейлі шешімін табады. Бүгін республикалық бюджеттің тікелей қаржыландыруымен, «Самұрық-Қазына» акционерлік қоғамының үйлестіруімен, 6 миллиард 851 миллион теңгеге салынған облыстағы алғашқы 900 орындық «Жайлы мектеп» ел игілігіне берілуде. Бұл ғимарат Қызылорда қаласының сол жағалауы тұрғындарының мемлекеттік мектепке деген сұранысына толық жауап береді. Білім ордасында шәкірттердің барлық пәнді оқып үйренуіне, ұстаздардың шығармашылықпен еңбек етуіне толық мүмкіндік жасалған. Өскелең ұрпақтың игілігі үшін Жаңақорған, Шиелі аудандарында 200 орындық оқушылар үйі мен 50 орындық өнер мектебі, «СаутсОйл» компаниясының демеушілігімен музыкалық колледждің жаңа ғимараты, Шығармашылық-инновациялық орталық, «Білімді қолдау қоры» есебінен физика-математика мектеп-интернаты салынуда. Мектеп-интернат екінші тоқсанда пайдалануға беріледі.</blockquote>Жаңа мектеп салу, апатты мектептер мен үш ауысымдық оқытуды жою – білім саласындағы басым бағыттың ең маңыздысы. Осы білім ошағында ұстаз бен шәкірт, мектеп пен ата-ана байланысы артып, алдыңғы буынның ізгі жолын жалғаған білімді де талантты, санасы сергек, ойы ұшқыр, бәсекеге қабілетті жас ұрпақ тәрбиеленіп шығарына сеніміміз мол. Жаңа оқу жылында биік табыстарға қол жеткізіп, алға қойған мақсаттарыңыз орындалсын! Ел мүддесі жолындағы игі істерді бірге атқарайық, жетістікке бірге жетейік! Егемен еліміздің ертеңі еңселі, тәуелсіздігіміз тұғырлы болғай!», – деді облыс әкімі Нұрлыбек Нәлібаев ашылу рәсімінде.«Жайлы мектептің» ашылу жиынына сонымен бірге «Самұрық-Қазына Констракшн» акционерлік қоғамының басқарма төрағасы Мәулен Айманбетовте болды. Ол қала тұрғындарын жаңа мектептің ашылуымен құттықтап, қатысушыларға игі тілегін жеткізді.Жоспар бойынша жыл соңына дейін 12 жаңа мектеп және 4 мектеп жанындағы қосымша құрылыс аяқталып, пайдалануға беріледі деп күтілуде. Өткен жылы облыс орталығындағы 4 мектепке 1850 оқушыға арналған қосымша ғимарат салынған еді. Осылайша артық шығындалмай, бюджетке салмақ салмай үш ауысымды оқытуға көшуі мүмкін мектептер мәселесі шешімін тапқан еді. Бұл бағытта былтыр 1170 орындық төрт мектеп, осы жылдың басында 550 орындық екі мектеп пайдалануға берілді. Сонымен қатар биылғы жаңа оқу жылында шиелілік өрендер «Білім беру инфрақұрылымын қолдау» қорының қаржыландыруымен 100 орындық мектепте, ал жаңақорғандық оқушылар жергілікті бюджет есебінен 150 орындық мектепте білім білім шырағын жағуға мүмкіндік алды.А.ӘЛІМ

Жайлы мектеп сапалы білім кепілі

<a href="https://kyzylorda-news.kz/">Kyzylorda-news.kz</a>&nbsp; Соңғы жылдары Қазалы ауданында құрылыс индустриясы қанат жайып, ауданның әр түкпірінде түрлі нысан бой көтерді. Бұған дәлел Әйтеке би кентіндегі жаңа “Руханият” орталығы, орталық алаң мен “Жеңіс” саябағының қайта жаңғыруы болса керек. Мұндағы құрылысшыларға бағыт-бағдар беріп, олардың жұмыс жоспарын жасап, қадағалап, назарға алатын арнайы бөлім қызмет ететінін бәрі біледі. Біздің ауданның да өркендеп, көрікті мекенге айналуына сала мамандарының қосып жатқан өзіндік үлесі зор.&nbsp;Қазалы ауданы жыл көлемінде жаңа құрылыс нысандарымен ауқымын кеңейтіп, көрсе көз тоятын іргелі мекенге айналды. Сән-салтанаты да жарасып, көрікті жерлер көбеюде. Аудандағы құрылыс жұмыстары қазіргі таңда еш кідіріссіз жалғасуда. Сондай іргелі құрылыс орындарының бірнешеуін мақалаға арқау етуді жөн көрдік. Құрылыс басталған күннен-ақ, жұмыс қазандай қайнаудан жаңылған емес. Қайта, қарқынға қарқын қосылып, күн өткен сайын қыза түсуде. Нысанның айналасындағы қым-қуыт тірлік осыны аңғартады емес пе?Қазір Әйтеке би кентінде құрылыс жұмыстарымен қатар аудан орталығын көркейту-көгалдандыру, абаттандыру жұмыстары қарқынды жүргізілуде. Жасалып жатқан жұмыстардың да сапасы күнделікті аудан әкімінің бақылауында.Ауданның бас қақпасы саналатын теміржол вокзалы аумағы мен сол жердегі Әйтеке би алаңын, Жанқожа батыр көшесінің бойында орналасқан Ержігіт Бозғұлов атындағы №249 мектеп-лицей, аудан әкімдігі ғимаратының алдын және Жанқожа батыр кесенесінің аумағы абаттандырылып жатыр.<blockquote>– Қазыналы Қазалы ауданы – қашанда қайнаған қызу жұмыстың, тынымсыз тіршіліктің, қарқынды құрылыстың ордасы. Ауданда жүріп жатқан жүйелі жұмыстарға, әрбір жағымды жаңалық пен жаңаруға куә болып келеміз. Қазіргі таңда әрбір саланың толымды тірлігінің арқасында аудан экономикасы тұрақты дамып келеді. 2024 жылдың 9 айында аудан экономикасының әр саласында жүзеге асырылған жұмыстар Мемлекет басшысының жолдауынан туындаған міндеттерді жүзеге асыруға бағытталуда. Биыл көктем айы басталысымен, Мемлекет басшысы Қасым-Жомарт Тоқаевтың тапсырмасына сәйкес, елде «Таза Қазақстан» республикалық экологиялық акциясы да басталды. Акция аясында аудан орталығы мен барлық елді-мекендердің көшелері, аяқ су арықтары, саябақтар, скверлер, мекеме, кәсіпорын аумақтары, ауданның ішкі, сыртқы аймақтары қоқыстардан тазартылып, ағаш және гүл шоқтары отырғызылып, ғимараттардың қасбеттерін әктеу мен көше бойындағы шартақтар мен қоршаулар, жол белгілері, аялдамалар басқа да нысандарды әктеу, сырлау жұмыстары атқарылды. Ерлік пен батырлықтың үлгісіне айналған халық батырына арнап еңселі ескерткіш те орнатылды, – дейді аудан басшысы Мейрамбек Шермағанбет.</blockquote>Айта кеткен жөн, облыс әкімі Нұрлыбек Нәлібаевтың бастамасымен биыл Сыр өңірінде «Руханият жылы» болып жарияланды. Жыл аясында барлық аудандарда «Руханият орталықтары» салынуда. Жуық арада аудандағы құны 1,7 миллиард теңге болатын аталған нысанның іргетасы қаланбақ. Бүгінгі күнге құрылыс-монтаж жұмыстары басталып, орталықтың іргетасын құю жұмыстары жүргізілуде. Нысанның құрылыс жұмыстары толық аяқталғаннан кейін мұнда музей, кітапхана, мұрағат, неке қию залы, ардагерлер және аналар кеңесі, жастар орталықтары, азаматтық қоғам өкілдері мен тарихи-мәдени, рухани ұйымдарын біріктіріліп, типтік үлгідегі жаңа нысан аудан халқының игілігіне пайдалануға берілмек. «Руханият орталығының» құрылыс жұмыстарымен «АСАР» жауапкершілігі шектеулі серіктестігі мекемесі айналысуда.Қазалылықтар көктем айы басталысымен «Таза Қазақстан» республикалық экологиялық акция аясында біршама жұмыс атқарды. Әрине, оның ішінде айта кету керек, абаттандыру жұмыстарына үлкен көңіл бөліп, әсіресе аудан орталығы – Әйтеке би кентінде біршама жұмыстар қолға алынды. Бүгінгі таңда Әйтеке би кентіндегі ауданның бас қақпасы саналатын Теміржол вокзалы аумағын, вокзал жанында орналасқан Әйтеке би алаңын, Жанқожа батыр көшесінің бойынан «Руханият» скверін (аудан әкімдігі ғимараты мен Ержігіт Бозғұлов атындағы №249 мектеп-лицей және 600 орындық Роза Бағланова атындағы аудандық мәдениет орталығы ғимаратының алды), абаттандыру жұмыстары қарқынды жүргізілуде. Ал Әйтеке би кентіндегі «Орталық алаң» мен «Жеңіс» саябағын Қазалы мәдени-демалыс кешеніне айналдырып, мұнда да ауқымды жұмыстар жүзеге асуда. Жобаға сәйкес алаңға жаңадан қазақы нышандағы брусчатка төсенішін салу, субұрқақ орнату және жаңа типтегі балалар ойын алаңы мен кіші сәулеттік формалар, гүлзарлар орнатылады. Сонымен қатар Төремұрат жырау көшесі бойына кәсіпкерлік мақсаттағы дүңгіршектер орналастыру қаралған.Айта кеткен жөн, жалпы көлемі – 6500 шаршы метрді құрайтын орталық алаңды абаттандыру жұмыстарымен «СК и Монтаж-Строй» жауапкершілігі шектеулі серіктестігі айналысады. Әйтеке би кентіндегі Орталық алаңды кеңейту және жақсарту мақсатында абаттандыру жұмыстары жүргізілуде. Саябақ ішіндегі бұл жұмыстардың барлығы аяқтал ғаннан кейін қазалылықтар мен аудан конақтары Қазалы мәдени-демалыс кешеніне айналған керемет орында бос уақыттарын тиімді өткізеді деп көзделуде. Бүкілхалықтық серуендейтін «Жеңіс» саябағы ішінде басталған абаттандыру жұмыстарын аудан әкімі Мейрамбек Шермағанбет күнделікті бақылауда ұстайды. Абаттандыру ісімен айналысатын мердігер мекеме және тиісті сала басшыларына жұмыстарды жеделдетіп ең әуелі сапасына мән беруді тапсырды.Сондай-ақ келушілерге арналған сауда қатарлары, жастар бас қосатын арнайы орындар және басқа да тұрғындардың бос уақыттарын тиімді өткізу бағытында бірқатар нысанның құрылысы жүргізіледі.Президент Қасым-Жомарт Тоқаевтың бастамасымен қолға алынған «Жайлы мектеп» ұлттық жобасы аясында Жанқожа батыр ауылынан 300 орындық мектеп ғимараты құрылысы қарқынды жүргізілуде. Қазіргі таңда мектеп ғимаратының кірпіш қалау жұмыстары аяқталып, төбесі жабылуда. Сонымен қатар ішкі, сыртқы әрлеу, кафель орнату, мектеп ауласын абаттандыру жұмыстары жасалуда. Білім ордасының құрылысы биыл аяқталады деп жоспарлануда. Мердігер мекеме – «Асар» ЖШС. Аталмыш жоба аясында Әйтеке би кенті мен Қазалы қаласының аралығынан 600 орындық мектеп құрылысы басталмақ. «Ауыл – ел бесігі» бағдарламасы аясында 3 спорт кешені және 1 ауылдық клуб нысаны құрылысын бастауға 200,0 миллион теңге бөлініп, мердігерлері анықталып, құрылыс жұмыстары басталды. Олар құны 628,7 миллион теңге болатын Әйтеке би кентінденгі «Жеңіс» саябағынан спорт кешені, 398,4 миллион теңге болып белгіленген Бекарыстан би ауылынан спорт кешені, Қожабақы ауылынан спорт кешені. Құны – 537,7 миллион теңге. Бұл қатарда 399,1 миллион теңгелік Майдакөл ауылынан 100 орындық клуб та бар.Адам өмірінде тұрғын үй жайы-негізгі мәселелердің бірі. Себебі, елдегі барлық азаматтардың әлеуметтік жағдайы олардың тұрғын үймен қамтылуына тікелей байланысты. Осы мақсатта аудан орталығында атқарылып жатқан жұмыстар аз емес. Мәселен, былтыр аудандағы халықтың әлеуметтік осал топтары үшін 52 отбасыға баспана табысталған болатын. Биыл да үлгілі үрдіс жалғасып, жалға берілетін тұрғын жай сатып алуға қаржы бөлініп, барлығы 2 пәтерлі 72 тұрғын үйдің құрылысы басталды. Қазір бастапқы 123 тұрғын үй сатып алуға 1 777,2 миллион теңге бөлінген. Дәл қазіргі уақытта тұрғын үйлердің құрылыс жұмыстары аяқталуға жақын. Тұрғын үйлердің сапалы болып соғылуы құрышқолды құрылысшыларға тікелей байланысты. Сондықтанда олардың қалаған әрбір кірпіші мен қаққан шегелері өз үйлесімін тауып тұрса, үйдің іргетасы да берік болады. Қарбалас құрылыс жұмыстары өз қарқынын әрі қарай үдетсе тұрғын үй кезегінде тұрған аудан тұрғындарының қоныстойларын тойлайтын күн де алыс емес.Мемлекет басшысы Қасым-Жомарт Кемелұлы Тоқаевтың Жолдауларында арнайы экономикалық аймақтарға инвестициялық жеңілдіктерді саралап беру, аумақтық даму жолында әр өңірдің бәсекелі артықшылығын ескеру қажеттілігі, өңірлерді дамыту ісіне қатысты тың тәсілдер еліміздің дамуы үшін өте маңызды екені айтылған еді. Сондай-ақ Президент инвестиция тарту жұмысын жүйелі жүргізу керегін, әрбір аймақ өзінің әлеуетін ескеріп, инвестиция бағыттау жұмыстарын жеделдетуді тапсырды. Бұл орайда біздегі атқарылып жатқан шаруалар да аз емес. Мәселен, биылғы жылдың 9 айдағы дерегі бойынша, негізгі капиталға тартылған инвестиция көлемі 16,2 миллиард теңгені құрап, өткен жылдың тиісті кезеңімен салыстырғанда нақты көлем индексі 104,6 пайыз болған. Тартылған инвестиция көлемінде жеке қаржылардың үлесі артып келеді. Есепті кезеңде жеке қаражат есебінен 10,2 миллиард теңге қаражат тартылып, жалпы тартылған инвестиция көлеміндегі үлесі 62,9 пайызды құраған. Құрылыс жұмыстарының көлемі 10 пайызға артып, көлемі 8,9 миллиард теңге болып отыр. Ал пайдалануға берілген тұрғын үй көлемі 41489 шаршы метрді құрап, өткен жылдың тиісті кезеңімен салыстырғанда 3,3 пайызға артық орындалған.Иә, бүгінде аудан көлеміндегі құрылысы жүріп жатқан аталған нысандарға зерделеу жұмыстары тұрақты жүргізілуде. Құрылыстың қарқынды жүргізілуі тиісті мекемелер тарапынан ұдайы бақылануда. Себебі талап – қатал, жұмыс – тұрақты болғанда ғана сапалы нәтиже көрсетеді. Жоғарыда аталған жұмыстар ауданда атқарылған құрылыс жұмысының бір парасы ғана. Жыл аяғына дейін әлі де біраз құрылыстың іргетасы қаланып, біршама объектінің іске қосылатыны анық. Иә, жүріп жатқан жүйелі жұмыстар тұрғындардың ертеңгі күнге деген сенімін одан әрі ынталандыра түскендей. Айнұр ӘЛИ

Қазалыдағы құрылыс қарқыны көз қуантады

<a href="https://kyzylorda-news.kz/">Kyzylorda-news.kz</a>&nbsp; Жоқ-жітікке қарасу, жылағанды жұбату, сүрінгенді сүйеу, мұқтаждардың талған өзегіне талғажау табу – қасиет қоған Қазалының әр қазағының бойынан табылатын қасиет. Мұндағылар қысқа жіп күрмеуге келмейтін қысылтаяң шақтарда ауызбіршілікті, адалдықты, ынтымақты ту етіп көтерген. Әсіресе, көптің мәселесін қара бастың қамынан жоғары қойған. Яғни «Бір үй аш болса, бір ауыл аш, бір ауыл аш болса, бүкіл ел аш» деген қағиданы берік ұстанып, адам тағдыры ұлыс тағдырымен тығыз байланысты екенін қапысыз таныған. Бүгінде ата-баба жолынан жаңылмай, қайырымды іс жасап, тура жолынан таймаған жандар көп. Солардың бірі – қазалылық қайырымды жас, ерікті, кәсіпкер Мәулен Көбесов. Жуырда жомарт жанмен әңгімелесіп, сұхбат алған едік.– Мәулен Талғатұлы, мейірімді, бауырмал, көмекке дайын тұратын жандар кез келген қоғамның негізгі тірегі саналады. Оның үстіне қайырымдылық сынды қайырлы қасиет бәріне бірдей тән емес. Жалпы қоғамда қысылып, қиын да қилы өмірдің -жолаушысы болған жандарға көмек қолын созуды қашаннан бастадыңыз?– Өмірде өзі қашан да қайғы мен қуаныш қатар жүреді ғой, сондықтан бір-бірімізге қайырымды болғанымыз абзал деп ойлаймын. Ал маған келер болсақ, қайырымдылықпен ең алғаш жолдас жігіттермен бірге бастағанбыз. Әлеуметтік желіге таралып кетеді деп ойламадық. Бірақ көрген жандарға сәл болсын ой салсам қуаныштымын.– Жақсылық жасаймын деген жанға жағдай табылады. Десек те, бүгінгі қоғамда «Оның қажеті жоқ», «Өз туғаныңды асырамайсың ба?», «Ақшаң тасып жатыр ма?» деген пікірлерді көптеп естіп жатамыз. Бұл – сананы тұрмыс билеп, рухани құндылықтың азайғандығының бір белгісі болса керек. Сіздің осылай Хақ Тағаланың берген ризығын мұқтаж жандармен бөлісуіңізге отбасыңыз, ет-жақыныңыз қалай қарайды?– Иә, Құдайдан келген ризықты барынша берекелі етіп жұмсаудың бір жолы қайырымдылық. Онымен бөлісе отыра өз несібе-берекеңде артады, жан тынышты алады. Жалпы отбасым, әкем мен анамда қайырымды іс жасағанды жаны сүйеді. Меніде арқамнан демеп, қолдайды. Бірақ ол істерін көбіне жария етпейді.– Қазір жағдайы жақсы болса да қайырымдылыққа әбден үйреніп, масыл болған жандар кезігеді. Айтпағым, сол жандардың артында шын мұқтаждар көріне алмай қалады. Жалпы қайырым жасарда тереңірек зерттейсіз бе? Қандай мәліметтерге жүгінесіз?– Әрине, сауалыңыз орынды. Қазір қоғамда масылдар қарасы қалыңдады. Әсіресе желіде жалған жарлылар қатары да көп. Сондай жандарға кезігіп қалмасы үшін алдымен ауданның мешіттерінен шын мұқтаж азаматтардың тізімін аламын. Кейін сол бойынша азық-түлік сынды басқа да көмектерін береміз.– Жақсылық жасап, өзгелердің қуанғанын көру, сезіну ерекше құбылыс қой. Мұндай сәтке көбінің куә бола бермесі хақ. Айтыңызшы, қайырымдылықты алғаш жасағанда қандай сезімде болдыңыз?– Біреуге кішкентай болсын қол ұшым тиіп, қуанышына себепкер болсам, бұл өмірде босқа жүрмегенім деп білемін. Ең алғаш рет жүздеріндегі жымиюды көріп, жүрегімдегі жылыған сезім әлі есімде.– Алдағы уақытта жақсылық жасап жарысқандар жасағын құрып, қайырымдылық қорын ашу ойыңызда бар ма?– Ойымыз бір жандармен қатарымды толықтырып, үлкен қор ашу, әрине ойда бар. Ал қазірге қолымдағы барыммен әрі шын көңілмен қайырымдылық жасауды жалғастыра бермекпін.– Сөз соңында не айтар едіңіз?– Асыл дінімізде «Садақа берген адамның ризығы көбейеді және дұғасы қабыл болады» делінген. Расында бүгінде ризығым мен табысымның артуының негізгі бір себебі – қайырымдылық деп білемін. Сондықтан да барша жандарды жақсылық жасап жарысуға шақырамын. Көп рахмет!– Уақыт бөліп, сұхбат бергеніңіз үшін рахмет! Алдағы істеріңізге сәттілік тілейміз! Серік АҚМЫРЗА

Жақсылыққа жаршы болған жан

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы, Қазалы ауданында балалардың зейінін ашып қана қоймай, балғындарды бақытқа бөлеген – «Алпамыс» бөбекжай-балабақшасы бар. Заманауи ілім менен білім берер, аудандағы бәсі биік балабақшаның алған асуы, бағындырған белесі де ауызтолтырып айтарлықтай. Жақында аталған орынға барып, меңгерушісі Жанат Көлановамен жолығып, бала бағбандарының бүгіні мен болашағын саралап, көріп қайтқан едік.Әйтеке би кентінің 5-ші квартал аталып кеткен аймағында орналасқан №21 «Алпамыс» бөбекжай-балабақшасы» «Балапан» мемлекеттік бағдарламасы аясында салынып, 2014 жылы қазан айының алтыншы жұлдызынан бастап пайдалануға берілді. Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан өтіп, ұлт болашағы – бүлдіршіндерді заман талабына сай тәрбиелеуде елеулі үлес қосып келеді. Балабақшада 12 топ бар. Бұнда баланы қабылдау, ойын, жатын, ыдыс-аяққа және қол жууға арналған бөлме, меңгеруші, әдіскер кабинеті, логопед, дефектолог, есепші, педагог-психолог, шаруашылық меңгерушісі кабинеті, музыка, денешынықтыру залы, медициналық кабинет және оқшаулау бөлмесімен қамтамасыз етілген. Сонымен қатар бүлдіршіндерге патриоттық, эстетикалық, адамгершілік тәрбие беру, өз ой-пікірін білдіре алатын, салауатты өмір салтына сай, болашақтың тірегі болатын дені сау, жан-жақты азамат етіп тәрбиелеуде балабақшада дене шынықтыру нұсқаушысы, педагог ұйымдастырушы, педагог-психолог, логопед, дефектолог мамандары, музыка жетекшісі, би жетекшісі жұмыс істейді.<blockquote>– Мектепке дейінгі тәрбие мен оқытудың үлгілік оқу бағдарламасын басшылыққа алып, әр баланың қызығушылығын, ерекшеліктері мен қажеттіліктерін ескере отырып, жалпы адами және ұлттық құндылықтар негізінде оларды толыққанды дамыту мен әлеуетін ашу мақсатында жұмыс жүргізіп келеді. Рухани адамгершілік құндылықтың негізі – халық педагогикасынан бастау алады. Оның бірнеше ғасырлық тәжірибесіне сүйене отырып, рухани құндылықты сақтай отырып, болашақ ұрпақты еңбекке, қоғамдық ортаға дайындау, имандылық қасиеттерін бала бойына сіңіру әрбір педагогке жүктелген. Сондықтан да заман талабынан кеш қалмай жаңашылдыққа, инновациялық өзгерістерді күнделікті тәрбиелеу – білім беру процестерінде ұйымдастыру балабақша педагогтеріне қойылатын басты талаптардың бірі, – дейді балабақша меңгерушісі Жанат Көланова.</blockquote>Балабақшаның материалдық-техникалық базасы заман талабына сай жабдықталып, педагог мамандар заманауи технологиялар бойынша білім жетілдіру курстарынан өтіп, ұлт болашағы – бүлдіршіндерді заман талабына сай тәрбиелеуде елеулі үлес қосып келеді. Балабақша педагогтерінің озық тәжірибелерін аудан, аймақ, облыс көлемінде тарату мақсатында аудандық білім бөлімінің ұйымдастыруымен «Мектепке дейінгі ұйымда тәрбиелеу мен оқыту үшін баланың жас ерек¬шеліктеріне сәйкес біліктері мен дағдыларын әрекет түрлерінде ойын ар¬қылы қалыптастыру» тақырыбында аудандық семинар өткізілді. Семинарға аудандағы мектепке дейінгі ұйымдардан екі жүзге жуық педагог қатысты. Сонымен бірге педагогтердің шығармашылық шеберлігін шыңдау, педагогикалық тәжірибелерін көпшілікке тарату, мектепке дейінгі балалардың заманауи ақпараттық-технологияларды пайлану арқылы білім, білік дағдыларын меңгерту мақсатында 2024 жылы 22 мамыр күні Қызылорда облыстық оқу орталығының ұйымдастырумен «Тәрбиеленушілердің дене, зияткерлік және жеке тұлғалық дамуын қамтамасыз етудегі жаңашыл бағыттар, ортақ ізденіс, тиімді нәтиже» тақырыбындағы облыстық вебинар өткізілді. Вебинарға облыстық оқу орталығы директорының орынбасары Г.Б.Дихамбаева, облыстық оқу орталығы мектепке дейінгі бөлімінің меңгерушісі Ж.С.Хожбанова және облыс көлемінде 100-ге жуық педагог қатысып, тәжірибе алмасып, оң пікірлерін айтты. Аталған семинарларда мектепке дейінгі мекемедегі білім берудің 5 дағдысы бойынша заманауи, ақпараттық технологияларды пайдаланып, өз тәжірибесін бөлісіп, шығармашылықпен жұмыс жасаған Г.Жұбаныш, М.Танирбергенова, А.Бауыржан, А.Утеген, Н.Нұрылла, С.Тұрғанбай, М.Шапихова, А.Жолмырзаева, Т.Казмамбетова, М.Мейрамбек, А.Нұрдәулет, Б.Көзімай, Г.Жолмырзаева, Г.Уразымбетова, Б.Сержанова, Р.Алгазиевалардың ашық ұйымдастырылған іс-әрекеттері ұсынылды.<blockquote>– 2024 жылдың қаңтар айынан бастап балабақшамызда «IT балабақша заман талабы» жоба аясында, мектепке дейінгі білім беруде ақпараттық технологияларды кеңінен пайдалану мақсатында STEAM кабинет ашылды. Бұл кабинеттің мақсаты – цифрлық білім беру ресурстарын пайдалану арқылы мектепке дейінгі білім беру сапасын арттыру, мектепке дейінгі ұйымда өзгерістерді енгізу үшін қажеттіліктерді анықтау, заман талабына сай инновациялық технологияларды енгізу үшін IT-жобасын іске асыру, «Тірек білім беру ұйымы» базасында ақпараттық технологияларды пайдалану тәжірибесін облыстың басқа білім беру ұйымдарына тарату, жаңартылған білім беру мазмұнына көшуді ескеріп, цифрлық технологияларға негізделген оқу бағдарламаларын әзірлеу, мектепке дейінгі ұйымда өзгерістерді енгізе отырып, заманауи тұлға қалыптастыру және бала, ата-ана, педагог бірлесіп, мақсатты нәтиженің жоғары көрсеткішіне ие болу, – дейді балабақша кабинеттерімен таныстырған Жанат Қуанышқызы.</blockquote>Ұйымдастырылған тәрбиелеу – білім беру жұмыстарының нәтижесінде балабақша бірнеше рет аудандық білім бөлімі, облыстық білім басқармасы, Қызылорда облыстық оқу орталығының және республикалық балаларды ерте дамыту институтының Алғыс хаттарымен марапатталды. Ұлболсын ТАЛАПБАЕВА

Балғындарды бақытқа бөлеген балабақша

<a href="https://kyzylorda-news.kz/">Kyzylorda-news.kz</a>&nbsp; Күздің кереметі көп. Маңыздысы – ала жаздай арқасын күнге күйдірген еңбек адамдарына құрмет пен қошемет көрсетер шақ. Алдыңғы апта облыста озаттар анықталып, ақжолтай жаңалықтың куәсі болдық.&nbsp;«Озат жатка машинисі» аталымымен аудандағы «Агро Өркен» серіктестігінің жатка машинисі Аралбек Балғанұлы марапатталды. Ол науқан кезінде 850 гектар күрішті жалға салды. Иә, марапат пен мадақ күтпейтін, жүрегі баладай, көңілі даладай сала мамандары әуелі еккен дәнді ысырапсыз жинап алуды олжа дейді. Ауыл шаруашылығы саласында табанды еңбек етіп, жұмысы таразыланған маманмен байланысудың сәті түсті.<blockquote>– 1976 жылы дүниеге келдім. Мектепті тәмамдаған соң 1993 жылдан бастап еңбек жолым басталды. 2008 жылдан бастап “Агро Өркен” серіктестігінде жұмыс істеп келемін. Негізгі қызметім жаткист, механизатор. Беларусь айдаймын. Көктемде тұқым себемін, одан соң жоңышқа шабамын. Ал күзде күрішке шығамыз. Біздің мамандықты бүгінгі жас­тар ұната бермейді. Десе де біз жастық шағымызда тәрбиенің әсерімен осы саланы игердік. Мен атақ-даңқ үшін емес, отбасымның алдындағы жауапкершілігім үшін адал еңбек етіп келемін. Өзімнен кейінгіге үнемі «адал нәрсенің берекесі бар» деп айтып отырамын. Осылай ел үшін жасаған еңбегіміздің ескеріліп жатқанына қуаныштымын, – дейді озат еңбеккер.</blockquote>Иә, еңбек еткеннің еңсесі биік. Елдің ырысын еселеуде ауыл еңбеккерлері қарап қалмаған. Оған дәлел біздің кейіпкеріміз. Аралбек Балғанұлы секілді білікті мамандардың еткен еңбегі көпке үлгі екені хақ. Айнұр ӘЛИ

«Агро Өркеннің» Озат жаткист

<a href="https://kyzylorda-news.kz/">Kyzylorda-news.kz</a> «Қызылорда су жүйесі» МКК-ға тұтынушылар соңғы бес жылда 450 миллион теңгеден астам қарыз. Бұл қарызды сот арқылы да қайтару мүмкін емес. Осыған қарамастан, мекеме су және кәріз желілерін қайта жаңғырту жұмыстарын қолға алып, халыққа сапалы қызмет көрсету үшін бар күшін салуда. Осы мақсатта кәсіпорынның 2023-2024 жылдарға арналған инвестициялық бағдарламасы бекітілді. Онда жұмысты атқаруға 1,2 миллиард теңгеден астам қаржы бөлінген.&nbsp;Кәсіпорынның бас инженері Наурыз Баярыстановтың мәлімдеуінше, бұл жұмыстардың жалпы құны 522 миллион теңгені құрайды.Шағын аудан мен үйлерді сумен қамтамасыз ететін Сырдария өзенінің сол жағалауында орналасқан «Арай» водазаборы 2013 жылы салынған және қазір қайта жаңғыртуға дайындалып жатыр. Бүгінде мердігер компанияны таңдау үшін конкурс жарияланған. КНС-29-дың жөндеу жұмыстары жақында аяқталған. Жалпы қалаға 67 КНС қызмет көрсетеді, оның 10-ы жаңадан салынған.Н.Баярыстановтың айтуынша, қазіргі уақытта су құбыры желілерінің тозуы 16,2, ал кәріз желілерінің тозуы 18,9 пайызды құрайды.<blockquote>− Мемлекет басшысы Қасым-Жомарт Тоқаевтың Жолдауында көрсетілген міндеттерді іске асыру мақсатында 2023 жылдан бастап «Тарифті инвестицияларға айырбастау» бағдарламасы жұмыс жасауда. Оның негізгі міндеті − жөндеу жұмыстарының көлемін ұлғайту және табиғи монополиялар субъектілеріне қосымша инвестициялар тарту есебінен электр, жылу және сумен жабдықтау саласындағы желілердің тозуын кемінде 15-20 пайызға төмендету. Өткен жылы кәсіпорынның қаражаты есебінен 19 ұңғыманы ауыстыру және сорғы жабдықтарын орнату жұмыстары жасалды. Сондай-ақ 440 метр кәріз желілеріне күрделі жөндеу жүргізілді. Бюджет қаражаты есебінен «инвестицияларға айырбастау тарифі» бағдарламасы шеңберінде сегіз шақырымнан астам су құбыры желілері қайта жаңартылды. Бұл жұмыстардың барлығы тозуды екі пайызға азайтуға көмектесті, – дейді бас инженер.</blockquote>Биыл 185 метр су құбыры және 280 метр кәріз желілеріне күрделі жөндеу жүргізіліп, 40 өрт гидранты ауыстырылды. Сондай-ақ «Тасарық», «СПМК-70» және «Наурыз» кәріз сорғы станцияларына күрделі жөндеу жүргізілуде. Бюджет қаражаты есебінен «инвестицияларға айырбастау тарифі» бағдарламасы аясында қазір 8,18 шақырым кәріз желілері қайта жаңғыртылуда. Жүргізілген жұмыстар жалпы тозуды тағы екі пайызға төмендетеді деп күтілуде.Бүгінгі таңда сумен жабдықтау мен су бұруды қайта құру және жаңғырту жұмыстары қырық пайызға жуық орындалған. Мамандар түсіндіргендей, су тарифі 2020 жылдан бері көтерілмеген. Өйткені ол бастапқыда төрт жылға бекітілген. Осы уақыт ішінде біз білетіндей, жарық пен газ тарифтері өсті. Олар «Қызылорда су жүйесі» МКК үшін де қымбаттады. Енді кәсіпорын 2025 жылдан бастап тарифті көтеру мүмкіндігін қарастыру үшін департаментке жүгінбек. Қазір барлық қажетті құжаттарды жинауда. Бүгінгі таңда бір текше метр судың бағасы 49 теңгені құрайды, кәріз үшін қызылордалықтар 48 теңге төлейді. МКК мамандарының айтуынша, бұл Қазақстан бойынша ең төменгі тариф және ұйым үшін де бұрыннан тиімсіз болып келген. Табиғи монополияларды реттеу комитеті облыс бойынша департаментінің басшысы Айбек Егембергеновтің айтуынша, инвестициялық бағдарламаны іске асыру облыс орталығының тұтынушыларын сенімді және үздіксіз сумен жабдықтауды қамтамасыз етуге, сондай-ақ сумен жабдықтау шығындарын және негізгі құралдардың тозу дәрежесін төмендетуге мүмкіндік береді.

Қызылорда: Су құбыры және кәріз желілері жаңғыртылуда

<a href="https://kyzylorda-news.kz/">Kyzylorda-news.kz</a>&nbsp; Қазалыда биік белестерді бағындырып, дүбірлі додаларда топ жарып жүрген спортшы жетерлік. Соның бірі – самбодан Азия чемпионы, дзюдодан Қазақстан жастары арасында бірнеше дүркін жеңімпаз Грузияның астанасы Тбилисиде дзюдодан өткен «Grand Slam» турнирінің күміс жүлдегері Абылайхан Жұбаназар. Жуырда Франция елінің астанасы Париж қаласында өткен Олимпиада ойындарында боз кілемде бақ сынаған талабы таудай спортшымен әңгімелесудің орайы туған еді.– Абылайхан, ең әуелі үздіктер үзеңгі қағыстырған Париж олимпиадасына тоқтал­сақ...– Олимпиада – әрбір спортшы үшін ең үлкен жарыс. Себебі басқасына қарағанда мұндағы жауапкершілік жүгі әлдеқайда ауыр. Бұл моральдық тұрғыда да ой-өрісіңе әсер етеді. Бірақ мен моральды түрде де, физикалық түрде де дайын болдым. Тек өкінішке орай, жаратқанның дегені болды, жеңіліс таптым. Бұған еш мойымаймын. “Бүгінгі Абылайхан, кешегі Абылайханнан мықты болуы керек” деген ұраным бар. Алла амандығын берсе, алдағы уақытта Лос-Анджелес қаласында өтетін олимпиадаға тыңғылықты дайындалып, енді есе жібермеуге жұмыс жасайтын боламыз. Оған дейін жауырынды жерге тигізбеу керектігі де бар.– Енді балалық шағыңызға оралсақ... Жалпы боз кілемге қалай келдіңіз?– Спортқа алғаш достарыма еріп, он екі жасымда келдім. Қазақша күрес үйірмесіне қатысып, әрі қарай қызығушылығым артып, түрлі деңгейдегі жарыстарға бардым. Бірнеше мәрте жеңіске де жеттік. Сондай жарыстың бірінде жүргенімде қызылордалық жаттықтырушы ағайымыз кезігіп, сондағы үлкен жарыстарда бақ сынауға ша­қырды. Сөйтіп, он жеті жасымда Қызылордаға ауысып, сонда дайындық бастадым. Жаттықтырушымыздан жаңа әдістер үйреніп, көптеген белестерді бағындырдық. Жалпы спортқа осылай келдім.– Әдетте былғары қолғап киген немесе боз кілемде белдескен жігіттердің дені аралас жекпе-жек, яғни ММА-да бақ сынап жатады. Бұл жайында ойыңыз қалай?– Иә, бүгінде ондай спортшылар қарасы қалыңдады. Әдетте белгілі бір спорт түрін жолға қойып, кейін өзін басқа спортта көретін азаматтар таңдап жатады аралас жекпе-жекті. Оның ішінде жоғары жетістіктерге жетіп жүргендері де бар. Бірақ менде әзірге ондай ой жоқ. Себебі дзюдо – өте күрделі, ауыр спорт түрі. Мұнда назарың нақты осы спорт түрінде болмаса, нәтиже шығару қиынның қиыны.– Алдағы уақытта шәкірт тәрбиелеу ойыңызда бар ма?– “Жүз жыл өмір сүрсең, жүз жыл үйрен” деген бар ғой, сол секілді әлі де үйренерім көп. Сол үшін шәкірт тәрбиелеуге әзірге асығыс емеспін. Барлығы өз уақыты, өз орнымен болады.– Жігітке жеті өнер де аз десек, жетеуді де жығатын жігерлі жігіт Абылайханның басқа қандай өнері, хоббиі бар?– Негізі дзюдодағы арнайы рейтинг тізімінен құлап кетпес үшін ай сайын өтетін жарыстардан қалмай, қатысып тұру қажет. Уақыттың көбі сол үшін боз кілемде өтеді. Жалпы күресу де өнер деп білемін. Одан бөлек, күмбірлетіп күй ойнамасақ та, аңшылық пен атсейістікке&nbsp;икемім бар. Спорттан тыс уақытта осы істермен айналысамын.&nbsp;– Кумиріңіз кім?– Кумирім – елдің батыры, осы спортта өзінің өшпес тарихын жасап жатқан Елдос Сметов ағамыз. Бұл жайында бұған дейінгі берген сұхбаттарымда да айтып жүргенмін. Елдос ағамыз әрбір жас үлгі тұтып, еліктеуге лайықты еліміздің тау тұлғалы азаматтарының бірі. Қазір дайындықтарда жанымызда болып, өзінің білгенімен бөлісіп жүр. Жарыстарда да шынайы жанашырлығын көрсетіп, жігерлендіріп жүреді.&nbsp;– Алға қойған мақсат-жоспарыңыз қандай? Бөлісе отырсаңыз...–Үлкен спортта жүрген соң кейде түрлі сынақтардан өтеміз. Жарыс алдында не барысында жарақат алып, соған төзіп те өтіп жатамыз. Мұның барлығы түптеп келгенде ерім деген елдің атын асқақтату, Туымызды көкте желбіретіп, Әнұранымызды шырқату үшін жасалып жатқан еңбек. Бұл – бірінші. Ал екіншісі, ел спортында басқа да аға-әпкелеріміз секілді өшпес із қалдыру. Одан кейін, әрине, өткен олимпиадада кеткен есені Алла қаласа 2028 жылы Лос-Анджелес қаласында өтетін жарыста қайтару.– Абылайхан, ашық әңгімеңіз үшін көп рақмет! Жеңісті күндеріңіз көп болғай!&nbsp;Серік АҚМЫРЗА

Архив