<a href="https://kyzylorda-news.kz/">Kyzylorda-news.kz</a> Қазір кәсіп бастаймын деген адамға мемлекет тарапынан көрсетілер көмектің түрі көп. Себебі, қайтарымсыз грант жобаны жетілдірсе, кәсіпке ынталы жандардың шаруасын дөңгелентуге жеңілдетілген несиелер де қарастырылған. Осы жобалар арқылы қаншама адам кәсіпкер атанды. Солардың бірі – қала тұрғыны Жазира Рамазан.Ол тігіншілік саласында 10 жылдан бері еңбек етіп келеді. Бастапқы кезде түрлі тасдан қыздарға арналған әшекей бұйымдар жасаған. Кейін тігінді қолға алып, үйінің бір бөлмесін жұмыс орнына айналдырды. Тапсырыс көбейген соң, жолдасы қолдау білдірді. Қала орталығынан тігін шеберханасын ашып берді, 5 адамды тұрақты жұмыспен қамтып отыр.Осылайша «Qoloner brend by Zhazira Ramazan» брендін қалыптастырып, түрлі дизайндағы қазақтың ұлттық нақыштағы киімдерін тігуде. Ұлттық құндылығымызды дәріптеуді қолға алған оның идеялары мықты. «Күнделікті киетін киіміміз арқылы ұлттық болмысымызды айшықтауға болады» деген ұстанымда. Осы мақсатта үлкен-кішіге арналған қазақы шапан, бөрік, көздің жауын алатын сәукеле мен көйлектер тігеді.<blockquote>– Қазір ұлттық нақыштағы киімдерге сұраныс жоғары. Тек заман талабына сай етіп тігу керек. Сапасы жоғары болуы тиіс. Бұрын Наурыз мерекесінде ғана шапан, көйлек іздейтін. Бүгінде күнделікті киюге арналған үлгілеріне тапсырыс көп. Жақында ғана 30 балаға шапан тіктім. Матасы жақсы, терлетпейді, қалың әрі сырмалы. Өте ыңғайлы. Тапсырыстың көбіне үлгермей де жатырмыз. Тігін цехы үш бөлмелі. Бір бөлмесіне тек арнайы техникаларды орналастырдым. Енді қиюға арналған құрылғы сатып алмақпын. Оған қоса тігін машинасының да санын көбейту керек болып тұр, – дейді ол.</blockquote>Кәсібін дамыту үшін «Бастау Бизнес» жобасына қатысып, 1,4 млн теңге қайтарымсыз грант ұтып алды. Қаржыға кәсібіне керекті құрал-жабдығын, соңғы үлгідегі тігін машинасын әкелді. Осылайша жұмысы жеңілдеді, мемлекеттік қолдаудың игілігін көрді.<blockquote>– Жұмыс істеймін дегенге мүмкіндік мол. Қолдау бар &nbsp;жерде жетістікке жетуге болады. Тек ынта мен ниет болса болғаны. Интернеттің де мүмкіндігі көп. Тапсырысты да әлеуметтік желіден қабылдаймын. Керекті мата, түйме сынды бұйымдарды да желі арқылы тапсырыс беремін. Ал қойдың жүнін жергілікті шеберлерден алдырамын. Оны түтетін арнайы цех болмағандықтан жинап, жаз мезгілінде өзім дайындауды қолға алмақпын. Қой жүнінен балалар мен үлкендерге арналған көрпе, жастық тігемін, – дейді шебер.</blockquote>Тігіншінің алдына қойған жоспары көп. Этностильдегі киімнен бөлек, шүберек сөмке, ою-өрнектермен көмкерілген жастықтың да түр-түрін тігеді. Сонымен қатар ұлттық киімді фотосессия жасауға және мерекелік іс-шараларға киюге жалға береді.Алдағы уақытта шеберханасын кеңейтіп, қауіпсіз жұмсақ ойыншақтар тігуді қолға алмақ. Ол үшін тағы да мемлекеттік грантқа қатысу жоспарында бар. Қажетті құжаттарын дайындап, өткізіп қойды. Тек нәтижесін күтуде. Әрине, қолдау тапқаны игі.

Кәсіп бастағанға қолдау көп

<a href="https://kyzylorda-news.kz/">Kyzylorda-news.kz</a> Мал шаруашылығы – қазақ халқының ежелгі ата кәсібі. Оның ішінде қой түлігін ерекше қастерлеп бағалаған. Қысыжазы соңынан қалмайтын бейнеті көп қой түлігінің берер ризығы да мол. Қойдың жүнінен кілем тоқып, киіз басып, киім тігіп күнделікті тұрмыстарына тұтынған. Сүтінен айран, май, ірімшік, құрт жасап, етін азық ретінде пайдаланған. Қой малы қашанда қазақ халқы үшін табысты түлік. «Мал өсірсең қой өсір, табысы оның көл көсір» дейтіні сондықтан.Елімізде 1970 жылдары мал басын 50 миллионға жеткізу міндеті көзделіп, шұғыл шаралар ұйымдастырылып қарқынды жұмыстар жүргізілді. Жер-жерден жастар бригадалары жасақталып, «екінші тың» аталған мал шаруашылығын өсіріп-өркендетуге белсене араласып кетті. Мектеп қабырғасын жаңа бітірген жас түлектер бірден шопандар бригадасына барып, еңбек жолын бастады. Жекелеген жастар өз алдына мал алып, шопан таяғын қолына ұстады. Солардың бірі Елшіманов Нұрділла Сейілбекұлы еді. Ол 1955-жылы 20 тамызда Ынтымақ өзенінің бойында жылқышы отбасында дүниеге келді. Әкесі Сейілбек немере ағасы Досжанға (жазушы Дүкенбай Досжановтың әкесі) көмекші жылқышы еді. 1957 жылдары ұсақ колхоздар совхозға біріктірілді. Сейілбек ақсақал жаңадан ашылған Бірлік совхозының №3 фермасының орталығы Қосүйеңкіге көшіп келіп, өз алдына совхоздан отар қабылдап алып, шопандық кәсіпке түбегейлі ауысады. Нұрділла 1962 жылы Жаңақорған кентінің орталығынан малшылардың балаларына арналып ашылған сегізжылдық мектепинтернатқа қабылданады.Мектеп бітірісімен әкесінің жанына келіп көмек беріп, қолғабыс жасайды. Әке жанында жүріп мал бағудың қыры мен Атакәсіпке адалдық Қазақ халқының ежелгі атакәсібі – мал шаруашылығы. Оның ішінде қой түлігін ерекше қастерлеп бағалаған.Қысыжазы соңынан қалмайтын бейнеті көп қой түлігінің берер ризығы да мол. Қойдың жүнінен кілем тоқып, киіз басып, киім тігіп күнделікті тұрмыстарына тұтынған. Сүтінен айран, май, ірімшік, құрт жасап, етін азық ретінде пайдаланған. Қой малы қашанда қазақ халқы үшін табысты түлік. «Мал өсірсең қой өсір, табысы оның көл көсір» дейтіні сондықтан. сырын үйреніп тағылым алып, тәжірибе жинақтайды. Жас та болса мал бағудың сырын ерте ұғып қаныққан Нұрділла атакәсіпке бет бұрып біржола шопан болуды мақсат етті. Байырғы майталман, орденді шопандар Рәш Мырзахметовті, Әбсадық Сәдібековті, Әбдіхалық Жаппаровты үлгі тұтты.Осы тұста мал шаруашылығын өркендетуге үн қосып, бас шопан міндетін мойнына алып, қиындығы мен бейнеті зор шопандық кәсіпке бел шешіп кірісіп кетті. Ә дегеннен еңбегі жанып, тырнақтап жинаған тәжірибесі мен әке тағылымы өз нәтижесін бере бастады. Озат шопан атанып аудандық, облыстық жиындарға, кеңестерге қатысып, тәжірибесімен бөлісіп, жігерін жанып шыңдай түсті. Жас шопан мақтау, марапаттарға ілініп белгілі басылымдар бетінен көріне бастады. Жүлдегер шопан ретінде 1973 жылы Алматы қаласында өткен республикалық жас шопандар слетіне қатысып тәжірибе алмасып қайтты. 1975-1977 жылдары әскер қатарында болып жауынгерлік міндетін атқарып келді. Әскерден соң атакәсібін қайта жалғады. Нұрділаның жоғарғы көрсеткіштерге жетуіне жары Зүбайра інілері Нәзен (Нәрзілда) мен Ерғали көп үлес қосты.Жыл сайын социалистік жарыстың жеңімпазы атанып, әр жүз бас саулықтан 140- 150-ден төл алып, қаракөл елтірісінің сапасын 80-85 пайызға жеткізіп, қойды өз төлінен өсіруде, жүн алуда жоғарғы деңгейдегі нәтижелерге қол жеткізді. Аудандық партия комитетінің пленум мүшесі, аудандық кеңестің депутаты болып сайланды. Бірнеше рет мерекелік медальдармен, төсбелгілермен марапатталды. 1986 жылы 3-дәрежелі "Еңбек даңқы" орденінің иегері атанды. Еңбектен қол үзбей жүріп 1988-1991 жылдары Қызылорда совхоз-техникумында оқып, фельдшерлік мамандығын алып шықты. Совхоз тараған соң осы мамандығы бойынша зейнеткерлікке шыққанша қызмет етті. Жұбайы Зүбайра қолы ашық, мінезі жұмсақ, қандай қиындықта да Нұрділламен бірге болып, бейнеті мол шопан кәсібіне бірге төзіп, бірге болды. Қақаған аязда, аптап ыстықта жарының жанынан табылды. Мал соңында жүріп 3 ұл мен 2 қызды дүниеге әкелді. Ұлдары ұяда, қыздары қияда. Екеуі де құрметті зейнеткер. Немерелерінің қызығын көріп отырған ардақты ата, аяулы әже. Ұлдары жеке кәсіпкерлер. Ерболы Астанада, Елдос Жаңақорғанда, Нұржаны Алматыда тұрады. Гүлдана қызы ҚазҰУ-дың журналистика факультетін бітірген. Мектепте ұстаз. Айдана Түркістан қаласындағы өнер мектебінде биология пәнінен сабақ береді. Аязда қалып қол-аяқ үсіген күндер, боран соғып көз ілмей қой күзеткен түндер артта қалғанымен, бәрі күні кешегідей есте. Ферма басшылары Алтынбек Нұржігітов, Әбутәліп Бакиров, Жанай Жанпейісов, зоотехниктер Үсенбек Ермеков, Болат Исаев, малдәрігерлер Әбдіманап Бакиров, Қалдаяқ Қалтаев, Шайхслам Елбергеновтермен қоянқолтық бірлесіп жұмыс істеген жылдар естен шығар ма әсте?! 35 жыл шопан таяғын қолына ұстап, кәсібіне адал болған Нұрекең бүгінде елі сыйлайтын, ауылы мен ағайыны қадір тұтатын ел ағасына айналған.&nbsp;Қалмұрат МҰСАБЕКҰЛЫ&nbsp;

Еңбек адамы - қоғамның қозғаушы күші

<a href="https://kyzylorda-news.kz/">Kyzylorda-news.kz</a> Экономика саласын әртараптандыру - елдің экономикалық дамуын тұрақты ету және тәуекелдерді азайту мақсатында бірнеше түрлі салаларға сүйену стратегиясы екені белгілі. Әртараптандыру бір немесе бірнеше салаға тәуелділікті төмендетіп, экономиканың басқа секторларын дамытуға бағытталған. Әсіресе, табиғи ресурстарға бай елдерде, мұнай немесе минерал сияқты шикізатқа тәуелділік экономикаға үлкен тәуекелдер әкелуі мүмкін, сондықтан осы тәуелділікті азайту маңызды. Сол себепті қазір экономика саласын әртараптандыру бағытында кешенді шаралар қабылданып, нақты міндет пен меже айқындалуда. Әсіресе, ауыл шаруашылығы, оның ішінде егін саласын әртараптандыру басты назарға алынды. Бұл Сыр өңірі диқандарына да тікелей байланысты.Нәпақасын жерден теріп отырған ауылдағы ағайынға суды үнемдеу технологиясын енгізу, күрішті азайту оңай шаруа емес, бірақ заман ағымы солай. Әртараптандыру, біріншіден, суды үнмедеуге, екіншіден, нарықты реттеуге үлкен мүмкіндік береді. Әйтпесе, базарымызды жаулаған өзге өңірдің тауарынан көз ашпай қаламыз. Импортталған тауардың құны екі есе қымбат болатыны да белгілі. Сондықтан әртараптандыруды жетілдіру – бүгінгі күннің өзекті мәселесі.Алдымен ауданнан бастайық. 2-3 жылда аудан көлемінде егінді әратаптандыру жүйелі жолға қойылып келеді. Десе де, әлі де кенже қалған тұстарымыз жоқ емес. Мәселенің мән-жайын білу үшін аудандық ауылшаруашылығы және жер қатынастары бөлімінің есігін қақтық.<blockquote>– 2024 жылы облыс әкімінің тапсырмасына сәйкес 400 гектар отбасылық егістіктер орналастырылды. Ауылдық округтер бөлінісінде 805 адам дайындалған егістік жерлермен қамтамасыз етілді. Жайылма, Ақүйік ауылдық округтерінде су үнемдегіш полиэтилен асты (подпленка) арқылы 611 гектарға бақша дақылдары егілсе, тамшылатып суару әдісімен Қыраш ауылдық округіне қарасты «Qaratau Fruits» шаруа қожалығында 30 гектарды құрайтын қарқынды алма бағы (интенсивный сад) биыл өз өнімін көрсетті. 2024 жылы 50 гектар классикалық алма бағы қосымша орналастырылып, күтімге алынды.Аудан бойынша жаңбырлатып суару технологиясымен 30 гектар жоңышқа дақылдары, тамшылатып суарумен 25 гектар көкөніс, бақша дақылдары егілді, – деді бас агроном Дәурен Серікұлы.</blockquote>Биыл алғаш рет егістіктерді әртараптандыруды ұлғайту бойынша жер асты суын пайдалануды жүзеге асырған Талап ауылдық округіне қарасты «Қалмен ата» шаруа қожалығы қарбыз дақылын 20 гектарға орналастырып, сапалы 700 тонна өнімді ерте мерзімде нарыққа шығара алды. Бұл да үлкен нәтиже.Айта кететіні, облыс әкімінің тапсырмасына сәйкес, 2023 жылы 295 гектар жер жаңадан ашылып отбасылық егістіктерге берілсе, 2024 жылы оның көлемі 400 гектарға артты. Нәтижесінде ауылдық округтер бөлінісінде 805 адам дайындалған егістік жерлермен қамтамасыз етілетін болады. Әртараптандыру егістіктерін суаруға қажетті дизельді және электрлі су насостары жеткілікті деңгейде.Мемлекет басшысы 2028 жылға қарай елде ауыл шаруашылығы өнімдерінің көлемін екі есе ұлғайту міндетін қойып отыр. Ауыл шаруашылығы дақылдарының өнімділігін арттыруда минералды тыңайтқыштарды енгізудің пайдасы зор екенін айту керек. Жалпы, ауыл шаруашылығы – еліміздегі ең маңызды саланың бірі. Сондықтан бұл салаға қатысты мәселелер шешімін ерте табуы тиіс. Оның ішінде, су мәселесі де бар. Бір ауыл бүтіндей бір кәсіп, бір өніммен күнелтіп отырғаннан кейін егінші қауымға оңай болмайтыны анық. Мәселен, Сыр беткейдегі ауыл халқының басым көбі күріш шаруашылығына дем берсе, Жайылма жұрты қарбызбен қамбасын толтырып келеді. Қазақстандағы жалпы егіс алаңы 2024 жылы 23,8 млн гектарды құрады. Биылғы әртараптандыру жоспарына толық деңгейде қол жеткізілді дейді ауыл шаруашылығы министрі Айдарбек Сапаров. Мәселен, бидай алаңы 450,3 мың гектарға қысқарды, майлы дақылдар 608 мың гектарға, қант қызылшасы 9,4 мың гектарға ұлғайтылды. Суды көп тартатын дақыл алаңдары: күріш 6,9 мың гектарға, мақта 16 мың гектарға азайтылды.Ал Қызылорда облысында Жол картасын орындаудағы оң нәтижелер атап өтілді. Өңірде күріштің егіс алқаптарын азайту және су үнемдеу технологияларын енгізу бойынша индикатор асыра орындалды. Облыс минералды тыңайтқыштарды енгізу бойынша жоспарды 100% орындаған. Саланы қолдау мақсатында шаруалар үшін биыл қаржыландыру арналары, оның ішінде әлеуметтік-кәсіпкерлік корпорацияларды тарту есебінен барынша кеңейтілді. Қаржы институттарын тікелей субсидиялау және агроөнеркәсіп кешені субъектілерінің қарыздарына кепілдік беру мүмкіндіктері енгізілді.Үкімет басшысы диқандарды жеңілдетілген қаржыландырумен қамтуды, оның ішінде әлеуметтік кәсіпкерлік корпорациялар арқылы қамтуды 100%-ға дейін жеткізу қажеттігін атап өтті. Биыл көктемгі егіс жұмыстары мен ауыл шаруашылығы техникаларының лизингіне ауқымды қаражат бағытталды. Жеңіл шарттармен кредит беру көлемі бірінші рет 580 млрд теңгеге жеткізілді. Бұған дейін бұл көрсеткіш 180 млрд теңгеден асып көрмеген. Қабылданған шаралар егіншілердің барлық қажетті агротехникалық іс-шараларды толық көлемде жүргізуіне мүмкіндік берді. Бұл ретте диқандар пайдаланатын элиталық тұқымдардың үлесі 7,1%-дан 9%-ға дейін өсті. Енді ауданға келсек. Биылғы жылы Жаңақорғанда 36026 гектарға ауылшаруашылығы дақылдары орналастырылды.Бүгінде Шардара су қоймасына жоғарыдан түсіп жатқан су көлемінің аз болуына байланысты өткен жылдың тиісті кезеңімен салыстырмалы түрде алғанда су 2,0 млрд текшеметрге аз жиналған. Сәйкесінше вегетациялық кезеңде Сырдария өзені арқылы өңірімізге келетін су деңгейінің төмен болатындығы күтілуде. Облыс әкімінің тапсырмасына сәйкес, суды көп қажет ететін күріш дақылының көлемін қысқартып, облыс бойынша 78,0 мың гектарға, оның ішінде біздің ауданға 6 035 гектарға егу жоспары бекітілген. Бұл былтырғы жылмен салыстырғанда әжептеуір аз екені көрініп тұр.Егін шаруасын ширату, түрлендіріп, нарыққа жұмыс жасауды жетілдіру маңызды. Ауыспалы егістікті қолдау және оған жеңілдіктер әлі де жалғасын табады. Оны шаруалар ұтымды пайдаланып қалғаны абзал. Мамандардың пікірінше, ауыспалы егістің жемісі бір жылда көрінбеуі мүмкін, бірақ бұл тәсілдің әсері үлкен деседі. Бастысы, дәстүрлі бірізділіктен құтылуға жұмыс жасап, жақсы нәтижеге көшкен жөн. Бұл ойымызды қандөздік диқандар да құп көріп, бақша дақылдарының табысы тары өсіруден артық болмаса, кем емес екенін түсінді. Әртараптандыру жөнінде алдағы уақытта тереңірек зерделеп жазатын боламыз. Биылға мәселе шешіліп, диқандар егінін нарыққа жөнелтуде.&nbsp;Әли ТЕМІРБЕК &nbsp;

Әртараптандырудың әлеуеті артып келеді

<a href="https://kyzylorda-news.kz/">Kyzylorda-news.kz</a> Жалпы Жаңақорғанымызда екі бірдей спорт мектебі бар. Екеуінің де жеткен жетістігі, бағындырған биігі бір төбе. Спорт мектебінің бірі Түгіскенде орналасқан №8 спорт мектебі. Негізгі орталығы осы ауылда болғанымен басқа елді мекендерде де аталмыш мектептің филиалдары бар. Әбдісаттар Садықов басшылық ететін мектептің іргетасы 2004 жылы қаланып, 2018 жылы су жаңа нысан бой көтеріп, ел игілігіне пайдалануға берілді. Бүгін осы №8 Олимпиадалық резервтің-мамандандырылған балалар-жасөспірімдер мектебінің тыныс-тіршілігі мен тұғырлы төрі туралы қысқаша сөз етпекпіз.Түгіскен ауылындағы спорт мектебі – жергілікті тұрғындардың спорттық қабілеттерін дамытатын маңызды мекеме. Мұндай мектептер ауылдық жерлердегі балалар мен жасөспірімдерге дене шынықтырумен айналысуға, спорттық машықтарын арттыруға мүмкіндік береді. Спорт мектептері әдетте әртүрлі спорт түрлерін қамтиды. Бұл ауылдық мектептер ауыл балаларына кәсіби спортқа алғашқы қадам жасауға да мүмкіндік береді.Қазақ күресімен қоса белбеу, самбо күрестерінің балуандары шыққан бұл мектептің тарихы өз алдына. Құрылғанына 20 жыл болған бұл ордада белбеу күресінен бірнеше Әлем чемпионы шықты, Мереке Құдайбергенова, Меруерт Әбубәкір бастаған бұрымдылар мен Айберген Алдаберген бастаған білекті оғландар қазақ елінің туын көкте желбіретіп, әнұранын талай шырқатты. Шыны керек, белбеу күресінен өңірлер арасының үздік үштігін түйіндейтін Сыр мектебінің негізі жаңақорғандық саңлақтарда жатыр. Қаншама «Халықаралық дәрежедегі спорт шебері» атағын алған жастар да жетерлік. 2021 жылдың қорытындысымен белбеу күресі бойынша Қазақстанның ең белді ауданы ретінде Жаңақорған танылды. Міне, спортшылардың маңдай тер, ерен еңбегі мен бапкерлердің білігі осыдан білінді. Одан бөлек, самбо және қазақ күресінен кіл мықтылар шықты.Соңғы 7-8 жылын алып қарасақ осы балуандар аудан спортшылары арасындағы “Жыл үздіктері” аталып үлгерді. Диана есімді балуан қыз ең жас спортшы атанса, 2022 жылы Айберген жыл спортшысы атанды. Тағы бір айтатыны, әйелдер күресінің дамуында Гүлжан Жұманованың да еңбегі өте зор. Өзі де кезінде ел чемпионаттарында талай жүлде алып келген Гүлжан апай бүгінде мықты-мықты аруларды дайындауда. Ол кісі Жаңақорғаннан шыққан әйел жаттықтырушылар тізіміндегі үздік бестікке енген білікті бапкер. Белбеу күресі мен самбо, қазақша күресті қорытындылайтын болсақ, білікті басшы, белді бапкер Әбдісаттар ағайдың орны бір төбе. Ол кісінің ауыл спортына сіңірген еңбегі өте зор.<blockquote>– Құрылғанына 20 жыл болған мектептің бүгінгі күнге дейін жеткен жетістігі қуантады. Қаншама Әлем чемпионы шықты, сары құрылықтың мықтылары да бізден көрінуде. Волейбол, гандбол, футбол, таеквандо, ауыр атлетика спорты да қарқын алып келеді. Бұйырса, кеелр жылы бұдан да биіктен көрінуге барымызды саламыз. Ең бастысы, ауыл спортының болашағы зор, тек осы тұғырдан таймауымыз керек, – деді мектеп директоры.</blockquote>Балуандар демекші, бұл мектептен қазір еркін күрестен жас жеткіншектер өсіп келеді. Айдар Әбенов бастаған бапкерлер көшінің нәтижесі көңіл қуантады, шәкірттері облыстық, республикалық турнирлерде топ жарып жүр. Негізі Сыр елінің еркін күрес мектебінің іргетасы Жаңақорғанда қаланған. Ел егемендігін алғаннан бері Әлем және Олимпиада ойындарында біздің балуандар тер төгіп, тұғыр төрінен көрінді. Сол чемпиондық жол жалғасып келеді десек болады.Келесі кезекте волейболды айтуға болады. Жаңарық волейболының да қарқыны қатты болып келеді. Бәсекелестік қалыптастырып, аудан волейболының көшін алға сүйреп жүр. Аудан емес, Сыр спортының биігін танытып жүрген тағы бір спорт түрі бар. Ол гандбол, бүгінде қызылордалық қыздар ел чемпионатының үздік үштігінде жүр. Сол аймақ гандболының басым көбі біздің, Жаңақорғанның қыздары.Бұл мектептің абырой беделінің бір белесі гандбол спортына да байланысты болып тұр. Жақында өткен облыстық ауыл спортының спартакиадасында бұл гандболшы қыздардың екпінін ешкім баса алмады. Өзге аудан құрамалары біздің арулардың мықтылығын тағы мойындады. Ұлттық құрамаға шақырту алып жүрген ойыншылардың деңгейі бір бөлек.Қысқаша қайырғанда, спорт мектебінің тарихы осылай толығып келеді. 20 жылда жеткен жетістік аз емес, әлі де бағындырар белес пен шығар шыңырау алдымызда деп сенеміз.&nbsp;Әлібек ЖАРЫҚБАЕВ &nbsp;

Спорт: Талай тарланды тәрбиелеген орда 

<a href="https://kyzylorda-news.kz/">Kyzylorda-news.kz</a> Бүгін «АMANAT» партиясының облыстық филиалы жанындағы Азаматтық қоғам мен мәдениетті дамыту жөніндегі «Miras» аймақтық кеңесі Шиелі ауданында көшпелі отырыс өткізіп, аудандағы тарихи-мәдени нысандардың жай-күйі мен ұрпақ тәрбиесін талқылады.Жалпы Қызылорда облысында тарих сырын шертетін ескерткіштер өте &nbsp;көп. Осындай өзіндік құндылығымен танымал ескерткіштер мен тарихи-мәдени мұра объектілерінің 42-сі Шиелі ауданы аумағында орналасқан.&nbsp;Көшпелі жиын алдында кеңес мүшелері бірқатар тарихи-мәдени ескерткіштер мен мәдениет үйлерінің жағдайымен танысқан болатын. &nbsp; Отырыста алдымен осы бағытта ауданда атқарылып жатқан жұмыстардың барысын аудан әкімінің орынбасары Болатбек Ысмағұлов баяндап, кеңес мүшелерінің сауалдарына жауап берді.&nbsp;Жалпы өңірдегі 42 ескерткіштің 3-і республикалық, 33-і жергілікті маңызға ие. Алтауы алдын ала есепке алынған тарихи мәдени мұра объектілері. Барлығына қолданыстағы заңдылықтар негізінде қорғау тақталары орнатылып, төлқұжаттары рәсімделген. Аудан бойынша &nbsp;мобильді қолжетімді жерлердегі 17 тарихи және мәдени ескерткіштерге QR-код тақтайшалары орнатылған. Сонымен қатар, қасиетті жерлерді сандық форматқа көшіру және олар туралы әлеуметтік желі қолданушыларға қолжетімділікті қамтамасыз ету мақсатында облыстық бюджеттен облыс, аудан бойынша жергілікті маңызы бар киелі жерлердің 3D форматтағы интерактивті картасы дайындалып, облыстық жергілікті атқарушы органдардың сайттарына орнатылған.<blockquote>«Ғылыми-реставрациялау, жөндеу, абаттандыру жұмыстары бойынша; 2018 жылы «Оқшы ата» мазаратына аудандық бюджеттен қаражат бөлініп, Бәйгеқұм ауылына кіре берістен 4,7 шақырымдық жол салу, тас төсеу, автотұрақ салу жұмыстары жүргізілген. Осы бағыттағы республикалық жоспарға сәйкес, Оқшы ата мен Асан ата кесенелеріне 23 000 000 теңге қаржы бөлініп қайта қалпына келтіру жұмыстары жасалса, жергілікті маңызы бар Қыш ата, Ғайып ата кесенелерін қайта қалпына келтіру жұмыстарына жергілікті бюджеттен есебінен тиісті жұмыстар жүргізілуде. Ескерткіштерді қорғау, құрылыс салуды реттеу және қорғалатын табиғат ландшафт аймақтарын белгілеу жұмыстары бойынша ағымдағы жылы жергілікті бюджеттен 5 млн тг жуық қаржы бөлініп тиісті жұмыстар жасалды»,- деді аудан әкімінің орынбасары Болатбек Ысмағұлов.</blockquote>«АMANAT» партиясының Cайлауалды бағдарламасында «Ұлттық тәрбие – ұлт болашағы» тұжырымдамасын дайындау қарастырылған. Бүгінгі күні жасөспірімдер арасында жаппай төбелес, суицид, зорлық-зомбылық әрекеттерінің белең алып, олардың қатысуымен орын алып отырған қайғылы оқиғалардың көп кездесуін тілге тиек еткен кеңес төрағасы Баймырза Қожамберлиев бұл мәселе бойынша жағдай Шиелі аудынында көңіл көншітпейтінін айтты. &nbsp;<blockquote>«Өткен оқу жылында ауданда 4 оқушы жол-көлік оқиғасынан жарақат алса, 3 жасөспірім қайтыс болған. Ағымдағы жылы да жол-көлік оқиғасынан 1 оқушы жарақат алып, 1 оқушы көз жұмды. Суицид бойынша өткен жылы бір, биыл бір бала қайтыс болды. Мамыр айында 1 оқушы қатты соққыдан көз жұмыса, 2 оқушы пышақ жарақатын алған. Бұл қуанатын жағдай емес»,- деді &nbsp;Баймырза Қожамберлиев.</blockquote>Жиында ұрпақ тәрбиесіне қатысты атқарылып жатқан жұмыстар бойынша аудандық білім бөлімі басшысының міндетін атқарушы Марат Ақпанбетовтың хабарламасы тыңдалып, кеңес мүшелері тарапынан ұсыныстар берілді.Отырысқа арнайы қатысып, кеңес жұмысын қорытқан партияның облыстық &nbsp;филиалының төрағасы Алмасбек Есмаханов күн тәртібіндегі екі мәселенің өзектілігін атап өтті.<blockquote>«Еліміздің Президенті Қ.К. Тоқаев Мәдениет пен өнер – ел өміріндегі өте маңызды сала. Өнер – ұлттың жаны, ал мәдениет – рухани келбеті. Бұл қос құндылықты өркениетіміздің өзегі деуге болады. Оны сақтап, байыта түсу – ортақ парыз-деген болатын. Ал, тәрбиеге байланысты «Жас ұрпақ төл тарихымыз бен салт-дәстүрімізді терең танып, одан тағылым алуы қажет» - деген болатын. Сондықтан &nbsp;кеңесте көтерілген мәселелерге байыппен қарап, олардың тиісті теңгейде орындалуына әр қайсымыз жауаптымыз»,- деді Алмасбек Есмаханов.</blockquote><img src="https://knadmin.beoblood.kz/uploads/Miras_ajma_ty_ke_esini_k_shpeli_otyrysy_Shieli_audanynda_tti_ba32fe5be3.jpg" alt="«Miras» аймақтық кеңесінің көшпелі отырысы Шиелі ауданында өтті.jpg">

«Miras» аймақтық кеңесінің көшпелі отырысы Шиелі ауданында өтті

<a href="https://kyzylorda-news.kz/">Kyzylorda-news.kz</a> Кәсіпті жүйелі жүргізсең ісің алға басады. Тынымсыз еңбектің қай кезде де жемісін беретіні белгілі. Қала тұрғыны Абзал Ерназаровта еңбек пен қажырлы қайратын біріктіре білген кәсіпкер.&nbsp; &nbsp;Ол алғашында мемлекеттік бағдарлама аясында жеңілдетілген несиеге жүк көлігін сатып алған. Кейбір азаматтар сынды тек несиенің аз пайызына қызықаннан емес, шын кәсіп қыламын деген мақсаты оны алдыға жетеледі. Бүгінде ол өдірістік кәсіпті дамытып, құрылыс материалдарын өндіруді қолға алған. Кәсіпкер 2020 жылы «Orda Best Stroy» ЖШС құрып, құрылыс материалдарын өндіру үшін индустриялды аймақтан жер телімін алады.<blockquote>– Кәсібімізді жаңа бағытта бастамас бұрын нарықты толықтай зерттедік. Бізде бар негізгі шикізат көзіне байланысты жобаны іске қосуды жоспарладық. Шиелідегі құм мен цементтің сынамалары жоғары сапалы кафель желімін өндіруге мүмкіндік беретінін басшылыққа алып, кәсіпті осы бағытта дамытқымыз келді, – дейді кәсіпкер Абзал Ерназаров.</blockquote>Осылайша, кәсіптің көзін тапқан отбасы 2021 жылы «Қызылорда» өңірлік инвестициялық орталығы арқылы кезекті рет жеңілдетілген несиеге қол жеткізді. Бұл жолы құрғақ қоспа өндіру цехының құрылысын салуды көздеген олар алынған 10 миллион теңгеге цехтың құрылысын салып, өндірісті іске қосқан.<blockquote>– «Қызылорда» өңірлік инвестициялық орталығынан алғаш жүк көлігі үшін несиені 10,5 пайызбен алған едік.&nbsp;Бұл жолы цех құрылысына 6 пайыз үстемемен берді. Өзге қаржы ұйымдарына қарағанда несие алу процесі жеңілдеу. Өздеріңіз де жақсы білесіздер, ауылдық елді мекендерде кепіл мүлікке қатысты мәселе бар. Қаржы ұйымдары ала бермейді. Ал өңірлік орталық бұл жағынан келгенде үлкен қолдау көрсетіп отыр, – дейді кәсіпкер.</blockquote>Бүгінде кәсіпкер өндірісте күніге 700 қапқа дейін құрғақ қоспа дайындайды. Бұл көрсеткіш алғашқы уақытта 150-200 қап шығарған.<blockquote>– Нарыққа біз ұсынып жатқан өнім сапасы жағынан танымал кафель желімдерімен кем түспейді.&nbsp;Арнайы зертханаларға жіберіп қортындылары алынды. Соңғы жылдары Қызылорда облысы көлемінде құрылыс нысандарының көптеп бой көтеруі біздің өнімдерімізге жоғары сұраныс туғызып отыр. Қазір Шиелі ауданы мен Қызылордадағы құрылыс дүкендерінде сатылымға шығарылуда, – дейді Абзал Ерназаров.</blockquote>Кәсібі дамыған сайын өндіріс аясы да кеңейетіні анық. Қазіргі таңда өндірісте сегіз адам тұрақты жұмыспен қамтылған.&nbsp; сондай-ақ жұмыс ауқымы да кеңейген. Құрылыс материалдарына байланысты өнім түрлерін көбейтіп, газоблок, темір бетон өнімдерін шығару кәсіпкердің бүгінгі таңда алға қойған басты мақсаты.<blockquote>– Біздің өңірде кәсіппен айналысуға жақсы жағдай жасалған. Әр отбасының өз кәсібі болуы керек деп ойлаймын. Кәсіппен айналысу, оның жаңа түрлерін ашу мен үшін еркіндік, сондай-ақ өзіңе үлкен міндеттеме, жауапкершілік алу дегенді білдіреді. Тәуелсіз қаржы көзін қалыптастырасың, жаңа жұмыс орындарын құрасың. Өзіңе ғана емес, қоғамға да пайдаңды тигізесің, – дейді&nbsp;ол бізбен әңгімесінде.</blockquote>А.Әлім

Кәсіптің көзін тапқан

<a href="https://kyzylorda-news.kz/">Kyzylorda-news.kz</a>&nbsp; Қазір айналамызға аңдап қарасақ, кәсіп ашып, көкжиегін кеңейтіп жатқандар көп. «Жұмыс жоқ» деп отыратын заман емес. Қолы қимылдаған адамға кедейлік жоқ. Рас, дүние. Ебін тауып әрекет етсеңіз, кәсіпті дөңгелетіп әкетуге болады. Әркім тек өзіне ыңғайлы, бейіміне қарай еңбек етсе болғаны. Осындай кәсіпті жан-жақты зерттеп, оны табыс көзіне айналдырып жүрген жанның бірі – Жұлдызай Есіркепова. Сыйлықтар әлемін серік еткен жүзі жылы, сөзге мығым кәсіпкермен жақында тілдесудің сәті түсті.Әрдайым жаңа идея ойлап тауып, ізденіс үстінде жүретін Жұлдызай сүйікті ісі туралы айтудан жалықпайды. Оның әңгімесінен өзінің кәсібіне жан-дүниесімен берілгенін ұқтық. Бизнесте өзін сынап көргісі келген көптің біріне ұқсамайды. Ең әуелі пайданы емес, ойға алған идеясының жүзеге асуына білек сыбана кіріскен оның еңбегі де нәтижесіз емес.&nbsp;Ол Қызылорда қаласының тумасы. Қармақшыға 2020 жылы келін болып түскен сәтінен бастап кәсіп ашуға ықыласы оянады. Сол жылы &nbsp;шар бизнесін қолға алып, үйде отырып-ақ халықтың сұранысына сай жұмыс істеп бастайды. Қосымша тұсаукесер тойларына киімдерді жалға беріп отырады.<blockquote>– Астана қаласында фитосанитария мамандығы бойынша білім алдым. Мұны кейін магистратурада жалғастырдым. Сонда оқып жүргенімде дәл қазіргі дүкенімдегідей жерге жұмыс істегенім бар. Сол кезде іштей «өзімнің осындай кәсібім болса» деп армандаушы едім. Адамның &nbsp;арманы алдамайды ғой. Төрт жыл бұрын бастаған кәсібімді дамытып, өткен жылдың аяғында Аллаға тәуекел етіп, сыйлықтар дүкенін аштық. Оған «Балнұр» қызымыздың атын бердік, – дейді кәсіпкер.</blockquote>«Жас келсе, іске» демекші, ерінбеген адам табыстың көзін табады. Жұлдызай Омарқызы бойындағы жастық жалынын жұмысқа, кәсіпке қарай арнағанды жөн көреді. Сыйлықтар әлемінде қуантуға арналған құшақ-құшақ гүлден бастап безендіруге қажеттінің дүниенің бәрі бар.&nbsp;<blockquote>– Кәсіп бастау үшін айқын мақсат керек. Бірінші кезекте қалтаны қалыңдату емес, сүйікті ісіңді сапалы жасау. Нарықты зерттеу, сұранысқа талдау жүргізу қажет. Бұл менің жаныма жақын сала. Өзім осы гүлдер арқылы жаныма жайлылық ұялайды. Дүкендегі гүлдерді аптасына 2 рет Алматы қаласынан арнайы алдырамын. Биыл бітіру кешінде гүлдердің бәрі жаппай өтіп кетіп, халық гүл таба алмай біраз әуреге түсіп қалғаны бар. Біздегі алғашқы тәжірбие болған соң мұндай жағдай болуын қалыпты деп қабылдадық. Жалпы кез келген дүниені адамға тәжірибемен келеді ғой. Келген адамның барлығын бір жерден тапқанын қаладық. Сол үшін де қазір аниматор қызметін ұсынатын Гауһар Әбдікәрімовамен бірлесе жұмыс істеп жатырмыз. Сондай-ақ сыйлық іздеп келген адам тәтті тортының болғанын жақсы көреді. Мұндайда арнайы кондитерлермен келісіп, оны да қосып отырамыз, – дейді ол.&nbsp;</blockquote>Жұлдызайдың жарқын кәсібі тұтынушы тарапынан жоғары бағалануда. Тұрақты тапсырыс беретін тұрғындармен қоса сұраныс саны күннен-күнге көбеюде. Ең бастысы баға – қолжетімді, сапа – көңілге қонымды. Кәсіп қылған адам қашанда жетістікке, мақсатына жетеді. Оны көзімізбен көріп келеміз.&nbsp;Бастаған істі жан дүниеңмен атқара білгенге табыс өзі келеді. Мақсат, жігер, ізденіс алға жетелейтіін айтқан кәсіпкер әлі талай белесті бағындыратынынан үмітті.&nbsp;Ақнұр САҒЫНТАЙ

Қармақшылық кәсіпкер гүл сатып, табыс табуда

<a href="https://kyzylorda-news.kz/">Kyzylorda-news.kz</a> Заманымыздың әр кезеңінде кітапханашы деген ұғым жоғары болуы тиіс. Кітапханашы кітапханада кітапты қолға береді деген тар ұғым орнына, қоғамда кітапханашы мамандығының қажеттілігін мойындататын оң пікірлер мен көзқарастар қалыптастыру керек сыңайлы. Кітаптың құдіреттілігін терең түсіне білген жан ғана осы рухани ордада қызмет атқара алады. Жастарды кітап оқу мәдениетіне тәрбиелеуге, олардың әдеби шығармаларға деген қызығушылығын арттыруға, талғамына, таңдауына сай әдебиеттерді іріктеуге көмек көрсету, оқуға деген ынта ықыласын көтеру жұмыстарын атқару. &nbsp;Заманымыздың заңғар жазушысы, қоғам қайраткері Әбіш Кекілбаев кітапханашылар турасында «Мен кітапханашы ақыл, білім, адамгершілік ордасы деп білемін. Ал кітапханашыларды ешқашан жоғалмауға тиісті сол асыл қазынаның сақшылары санаймын» дейді. Осындай міндетті алып жүрген жанның бірі – Т.Жүргенов атындағы №80 мектеп-гимназиясының кітапханашысы Гүлімжаз Бүрлібаева.&nbsp;Гүлімжаздың ойынша, бүгінгі кітапханашы – білімді, заманауи технологияларды жетік меңгерген, жаңашыл, оқырманды жан-жақтылығымен өзіне, кітап оқуға баурай білетін, талапшыл, адамгершілігі мол, мейірімді, қиын кезде сырлас бола білетін оқырманның шын жанашыр досы болуы тиіс.&nbsp;Кейіпкеріміз өз мамандығын сүйіп, жетік білетін, іс-тәжірбиесі мол, кәсіби ой-өрісі кең, іскер кітапханашы екендігі сөз саптауынан байқалды. Өзінің уақыт талабына сай әр іс-шараларды жаңаша ұйымдастырып, әдіс-тәсілдерді тиімді пайдалана отырып, оқушыларды шығармашылыққа жетелеп келеді. Күнделікті жұмысқа жауапкершілікпен қарайтын ол оқушылармен тығыз қарым-қатынаста болып, олармен тез тіл табысатындығы кітапханаға кірген балаға мейірімділікпен қарауынан байқауға болады.&nbsp;<blockquote>– Жас ұрпаққа білім мен тәрбие берудегі мақсат рухани дүниенің кітаппен тығыз байланысты екенін түсіндіріп айтамын. Оқушылардың ішкі дүниесін, өз ойларын, пікірін еркін жеткізуіне көңіл бөлемін. Әр оқырманның жүрегіне жол таба білу керек, әр балаға қызмет көрсету кезінде оның не оқитынын, нені оқығысы келетіндігіне жәрдемдесіп, әңгімелесу арқылы білемін, – дейді кітапханашы. &nbsp;</blockquote>Жұмысына жауапты маман республика көлеміндегі мектеп кітапханашылары арасындағы «Табиғат аясында кітап оқу» тақырыбындағы семинарға қатысады. Онда көркем әдебиеттерді оқыту және насихаттауда кәсіби іс-шара көрсетіліп, 25 аймақтан келген 200-ден аса кітапханашылармен додаға түсіп, ІІІ дәрежелі дипломды иеленеді. &nbsp;Талапты маманның бұдан да өзге жетістігі мол. Ол өз мамандығын ерекше жақсы көруінің себебін былайша түсіндіріп өтті.&nbsp;<blockquote>– Қай мамандықтың болсын өз ерекшелігі бар. Маған өзімнің мамандығым ұнайды. Бұл менің өмірімді арнаған сүйікті кәсібім. Балалармен жұмыс, олардың қойған сұрақтары, білуге, үйренуге деген талпыныстары мені шабыттандырады. «Бала тілі – бал» ғой. Олардың сабақтан шыға сала кітапханаға асығуы мені қуанышқа бөлейді. Қазіргі таңда салалық басылымдарға қарағанда әдеби басылымдарға сұраныс өте жоғары. Қазірдің өзінде кітапхана қоры жаңа кітаптармен жақсы толығып отыр. Бүгінгі өсіп келе жастқан жас буынның кітапқа деген ынтасы өте жоғары. Оған себеп ұстазы мен үйдегі ата-ананың да бағыт сілтеуі деп білемін. Баламен балаша жұмыс жасау да оңай емес, дегенмен өз жұмысынан ләззат ала білген адам үшін аса қиындық тудырмайды. Менің мақсатым – бала санасына құндылық құю. Осы асыл мақсат жолында еңбектенуге ерінбеймін, – дейді Гүлімжаз.</blockquote>&nbsp;Ардақ СӘКЕНҚЫЗЫ

Гүлімжаз Бүрлібаева: Кітапханашы әр оқырманның жүрегіне жол таба білу керек

<a href="https://kyzylorda-news.kz/">Kyzylorda-news.kz</a> &nbsp;Сырдария ауданының азаматы Нұрымхан Сәтібеков – еңбекқор жігіт. Сан кәсіптің қыр-сырын меңгерген ол әлеуметтік желіде белсенді. Бүгінде TikTok желісінде оқырмандары көп. Ол алғашында мал шаруашылығымен айналысып бастады. Өңірлік инвестициялық орталығы арқылы «Іскер» бағдарламасына қатысып, жеңілдетілген несие алды. Қаражатқа жылқы басын көбейтті.– Негізгі мамандығым – фельдшер. Осы салада еңбек етіп келемін. Қосымша кәсіпкерлікті де қолға алдым. Бүгінде бір іспен ғана шектелуге болмайды. Бұл – уақыт талабы. Мемлекет тарапынан жас кәсіпкерлерге қолдаудың артқанын көріп, осы бағытта өзімді сынап көруге бел будым. Бастапқыда біршама қиындық болды. Мойымай қайта жігерлендім. Өзім секілді жастардың тәжірибесін көрдім. Кәсіпкерлік саласы мамандарынан кеңес алдым. Қазір жаман емес. Ісім алға жылжып келеді, – дейді ол.Шаруасы дөңгеленген жігіт мұнымен тоқтап қалмады. Биыл «Іскер» бағдарламасы аясында «Ара балын өндіру» жобасы қолдау тапты. 4 миллион теңге несие алып, керекті құрал-жабдықтарын түгендеді. 20 жәшік-ұяда ара бағады. Өнімін жергілікті тұрғындар тұтынады, бағасы да қалтаға қонымды. Келісі – 2500 теңге. Ара балының пайдасы айтпаса да түсінікті. Салқын түскелі тұтынушылар көбейген. Көпшілігі әлеуметтік желі арқылы тапсырыс береді екен. Шаруашылық ауылдан 8 шақырым жерде орналасқан, онда жылына екі рет ара балы тартылады. Балдың құрамында шеңгел, бәйшешек, жантақ, жоңышқа шырыны бар.Жас кәсіпкердің алдына қойған мақсаты айқын. Бұл тек бастамасы екенін айтады. Ара балынан өзге де өнім шығаруды көздеп отыр.Сонымен қатар оның тауары жақында «Атамекен» кәсіпкерлер палатасының «Бір ауыл – бір өнім» жобасы аясында өткен көрменің үздіктері қатарынан табылды. Осылайша, шаруаға мығым жігіт ісін ширатып келеді. Алдағы уақытта жәшік санын көбейтіп, өнімін өзге де өңірлерге шығару жоспары бар.

Қосымша кәсіпкерлікті қолға алған фельдшер

<a href="https://kyzylorda-news.kz/">Kyzylorda-news.kz</a> 2024 жылдың 9 айының нәтижесі бойынша «Азаматтарға арналған үкімет» Мемлекеттік корпорациясы 11 миллионнан астам мемлекеттік қызмет көрсеткен. ХҚКО өз-өзіне қызмет көрсету бөлімінде 5 миллионнан астам қызмет алынған. Мемлекеттік көрсетілетін қызметтердің қолжетілімділігі мен сапасын арттыру стратегиясы аясында Мемлекеттік корпорация цифрлық технологияларды белсенді түрде енгізу арқылы құжаттарды алу және мемлекеттік органдармен өзара іс-қимыл процесін жеңілдетуде.Мемлекеттік корпорация мемлекеттік қызметтерді оңтайландыруға және жақсартуға арналған цифрлық жобалар кешенін жүзеге асыруда. Мемлекеттік корпорацияның маңызды жобаларының біріне өткен жылы жүзеге асырылған құжаттандыру терминалы кіреді. Оның көмегімен Қазақстан тұрғындары төлқұжат пен жеке куәлікті алуға өтінішті 5 минут ішінде бере алады. Жыл басынан бері аталған қызмет түрін 50000 астам азамат қолданып үлгерген: Астана – 37585, Алматы – 12476, Көкшетау – 540.Одан бөлек Мемлекеттік корпорация мемлекеттік қызметті қашықтан алуға мүмкіндік беретін «ХҚКО» мобильді қосымшасын белсенді дамытуда. Бүгінгі таңда 79 түрлі қызмет қолжетімді, оның көмегімен 132 890 мемлекеттік қызмет көрсетіліп, 400 181 рет ХҚКО операторлары бейнеқоңырау арқылы қоңырау шалған.«Цифрландыру мемлекеттік қызметтің халыққа тез әрі қолжетімді болуына көмектеседі. Бүгінгі таңда көптеген процедуралар, соның ішінде төлқұжатқа өтініш беру бірнеше минутты алады. Біз қызметтерімізді одан әрі жаңартып, азаматтардың үмітін ақтайтын IT шешімдерді енгізуді жоспарлап отырмыз», – деп атап өтті Мемлекеттік корпорацияның Басқарма Төрағасы Арман Кенжеғалиев.Айта кетейік, Мемлекеттік корпорацияның негізгі цифрлық шешімдерінің қатарына кіреді:- Жылжымайтын мүліктің бірыңғай мемлекеттік кадастры (БМЖМК). Енді жер актісі мен техпаспорт бірыңғай кадастрлық паспортқа біріктіріліп, құжаттарды қарау уақыты бір жылдан 30 күнге дейін қысқартылды. Сондай-ақ, құжаттарды өңдеу кезеңдеріне онлайн-мониторинг жүргізу мүмкіндігі енгізілді;- Азаматтардың ыңғайлылығы мен қауіпсіздігі үшін электрондық үкімет порталындағы жеке кабинетке жылжымайтын мүлікке құқықтарды тіркеу, өзгерту және тоқтату туралы хабарламаларды жіберуге арналған сервис әзірленді. Жыл басынан бері 5,7 миллионнан астам хабарлама жіберілді.- Цифрландыру аясында Мемлекеттік корпорация әлеуметтік қорғау және еңбек саласындағы қызметтерді автоматтандыру бойынша жобаларды іске қосты;- тағы да өзге де шешімдер.Айта кетейік, Қазақстанның әрбір тұрғыны кез келген уақытта және кез келген жерде қажетті қызметтерді ала алатындай цифрлық жобаларды дамыту – Мемлекеттік корпорацияның жоспарында.

Мемлекеттік корпорация цифрлық трансформация жолында

<a href="https://kyzylorda-news.kz/">Kyzylorda-news.kz</a> Облыс әкімінің төрағалығымен өткен мәжілістен кейін шаһар басшысы Нұржан Ахатов жылу беру маусымында өрт қауіпсіздігінің алдын алу бағытындағы шараларды күшейту бойынша жауапты сала басшыларына бірқатар тапсырмалар жүктеді.Жалпы, жыл басынан бері 10 айда Қызылорда қаласының аумағында 135 өрт оқиғасы тіркелген. Былтырғы жылмен салыстырғанда бұл көрсеткіш 15 пайызға азайған. Өрттің шығу себептерінің басым бөлігі электр сымдарының қысқаша тұйықталуынан және ашық от салдарынан орын алған. Осы ретте, қала әкімі Нұржан Сәбитұлы жеке сектордағы үйлерге жіті тексерулер жүргізіп, газ тұтынушыларға күнделікті түсіндірме жұмыстарын ұйымдастыруды міндеттеді.Сонымен қатар, ел Президентінің, Үкімет басшысының қолдауымен және облыс әкімінің үйлестіруімен жүзеге асырылып жатқан игілікті бастамаларды сапалы орындауды тапсырды.<img src="https://knadmin.beoblood.kz/uploads/ala_kimi_zhauapty_sala_basshylaryna_bir_atar_tapsyrmalar_zh_kted3_1_4d50a62117.jpg" alt="Қала әкімі жауапты сала басшыларына бірқатар тапсырмалар жүктед3 1.jpg"><img src="https://knadmin.beoblood.kz/uploads/ala_kimi_zhauapty_sala_basshylaryna_bir_atar_tapsyrmalar_zh_ktedi_2_6e9fe28854.jpg" alt="Қала әкімі жауапты сала басшыларына бірқатар тапсырмалар жүктеді 2.jpg">

Қауіпсіздікті сақтау – бәрінен маңызды

<a href="https://kyzylorda-news.kz/">Kyzylorda-news.kz</a> Қызылорда облысының Сырдария ауданында кәсіпкерлік көкжиегі кеңеюде. Аудан көлемінде қаншама жан өзіне тиісті кәсіппен айналысып қана қоймай, аудан экономикасының артуына титтей де болса септігін тигізіп отырғаны қуантады.&nbsp;Бесарық ауылында жақында шағын өндіріс орталығы ашылды. Аумағы 1 мың шаршы шақырымды құрайтын орталықта бүгінде 13 кәсіпкер кәсібін жүргізуде. Орталықта кәсібін ашқан ауыл тұрғындарының бірі ерлі-зайыпты Жанат мен Мұхит Молдабаевтар.Молдабаевтар отбасы кәсіп жүргізуден хабары бар жандар. Осы уақытқа дейін сауда-саттықпен айналысып келген. Бизнесте жинаған тәжірибесін пайдалана отырып, өнім өндіруге бет бұрады. Сауда-саттықпен айналысу барысында пластик бөтелкелерге сұраныстың жоғары екенін аңғарады. Өңірде бөтелке шығаратын бірлі-жарым кәсіпкер болмаса, нарықтың бос екенін анықтайды. Осылайша пластик бөтелкелер шығару жөнінде шешім қабылдайды.<blockquote>«Біздің негізші тұтынушыларымыз ауылдық елді мекеннің тұрғындары болмақ. Себебі сүт өнімдері мен өзге де түрлі сусындарға қажет пластик бөтелкеге сұраныс жоғары. Қазірдің өзінде тәжірибе үшін шығарып жатқан бөтелкелеріміз өтіп кетіп жатыр», – дейді кәсіпкер Мұхит Молдабаев.</blockquote>Кәсіп иелері өндіріске қажет 12 млн теңгені «Қызылорда» Өңірлік инвестициялық орталығы арқылы мемлекеттік бағдарлама аясында жеңілдетілген пайызбен алған.<blockquote>«Аймақ басшысы Нұрлыбек Машбекұлы өңірде өндірісті дамыту жөнінде алдымызға міндет қойып отыр. Ол үшін жергілікті бюджеттен 1,5 млрд теңге қаржы бөлді. Біздің Өңірлік орталықтың кәсіпкерлік мақсатта берілетін несиелері өте тиімді. 6 пайызбен, 5 жылға беріледі және 1,5 жыл демалыс кезеңі бар. Бесарықтағы өндіріс орталығында жұмысын бастаған 13 кәсіпкердің бесеуінің жобасы біздің орталық арқылы қаржыландырылды», – дейді «Қызылорда» Өңірлік инвестициялық орталығының директоры Талғат Матаев.</blockquote>Өнім шығаруға қажет құрал-жабдықтарды кәсіпкерлер Алматыдан алдырса, шикізатын Шымкентке тапсырыс беруде.<blockquote>«Сағатына 700 данаға дейін бөтелкелер шығаруға болады. Бөтелкелерді жарты, бір және бір жарым литр көлемде шығара аламыз. Өндірістің жұмысын жолға қойғаннан кейін толық қуаттылықта жұмыс істейміз деген үміттеміз», – дейді Жанат Азизова.</blockquote>Жанұялық бизнес иелері кәсіпті әзірге өздері жүргізбек. Тапсырыс көлемі артқан жағдайда жаңа жұмыс орнын ашуды көздеуде.Айта кету керек, «Қызылорда» өңірлік инвестициялық орталығы – &nbsp;микроқаржы ұйымы. 10 жылдан бері аймақта кәсіпкерлік саласындағы жобаларды мемлекеттік бағдарлама аясында қаржыландырып келе жатыр. Бүгінгі күнге дейін орталық жалпы құны 14,6 млрд теңгені құрайтын кәсіпкерлік мақсаттағы 2739 жобаны қаржыландырды. 2953 жаңа жұмыс орны құрылды. Бесарық ауылында жұмыстарынан тыс уақытта кәсіптерін дөңгелетіп отырған тағы бір ерлі-зайыпты жұп ауылдағы мектептің дене шынықтыру пәні мұғалімі Самат Ақпанбетов жары Гүлзирамен бірге жұмысқа арналған қолғап шығаруда.<blockquote>«Кәсібімізге қажет қаржыны «Қызылорда» Өңірлік инвестициялық орталығынан алдық. Мемлекеттік бағдарлама аясында аз пайызбен 6 млн теңге несиеге осы ісімізді бастап отырмыз. Қазір нарықта жұмысқа қолдануға арналған қолғап парымен 120-150 теңгеден сатылып жатыр. Біз 80-85 теңгеден береміз. Сұраныс жоғары. Енді ғана ғой бастап жатқанымыз. Десе де алғашқы шығарған партияны құрылыс заттарын сатумен айналысатын кәсіпкерлер қуана-қуана алып кетті», – дейді.</blockquote>ЖК «Гүлзира» қазір күніне 200-250 дана, аптасына 1200-1500 дана қолғап шығарып жатыр. Цехтың қуаттылығына сай өнім шығаруына Гүлзира, ал өнімнің сапасы мен тұтынушы табуға Самат жауапты. Әзірге бар шаруаны өздері істеп жатқан отбасылық кәсіп иелері болашақта екі жұмысшы алуды көздеп отыр.

Архив