<a href="https://kyzylorda-news.kz/">Kyzylorda-news.kz.</a>&nbsp;Қорқыт ата атындағы Қызылорда университетінде философия ғылымдарының кандидаты, профессор Мұстафа Матаевтың 90 жылдығына арналған «Трансформация кезеңіндегі қазақстандық қоғамның дамуының гуманитарлық аспектілері» атты халықаралық (офлайн-онлайн форматта) &nbsp;ғылыми-тәжірибелік конференция өтті.&nbsp;Жиында білім беру жүйесін дамыту, аймақтық жастар саясаты, қазақ философиясы, қазақ зиялыларының ұлттық сана-сезімді қалыптастырудағы рөлі туралы баяндамалар жасалды.&nbsp;Конференцияда Қызылорда облыстық мәслихатының төрағасы, тарих ғылымдарының кандидаты Наурызбай Байқадамов ғалымның білім мен ғылым жүйесін дамытуға қосқан үлесіне тоқталды.&nbsp;Ал, Қорқыт ата атындағы Қызылорда университетінің Басқарма төрағасы–ректоры, филология ғылымдарының кандидаты Бейбіткүл Кәрімова ғалымның өмір және еңбек жолы бүгінгі жастарға нағыз үлгі-өнеге екенін атап айтты.<blockquote>«Мұстафа Матайұлы тәуелсіздіктің алғашқы жылдары &nbsp;мемлекетіміздің басты бағыты құқықтық мемлекет орнату екенін, осының аясында өңірге жоғары білімді заңгер кадрлар көптеп керек екенін, ондай кадрлардың жоғары оқу орны базасында даярлануы қажеттігін құзырлы органдар алдында дәлелдеп берді. Көп ұзамай университетте аталған мамандық бойынша кадр даярлау жұмысы қолға алынып, 1992 жылы ашылған тұңғыш “Құқықтану” кафедрасын басқару талантты ғалым, білікті ұстаз Мұстафа Матайұлына сеніп тапсырылғаны заңды еді. Мұстафа Матайұлы заң мамандарын оқытатын, білікті ұстаздарды да еліміздің әр түкпірінен жинады, сонымен бірге &nbsp;заң мамандарына қажетті оқу-әдістемелік базаны қалыптастырды», – деді Бейбіткүл Сәрсемханқызы.</blockquote>Мұстафа Матаев 1969-1980 жылдары Н.В.Гоголь атындағы Педагогика институтының (қазіргі Қорқыт ата атындағы Қызылорда университеті) марксистік-лениндік философия кафедрасының меңгерушісі, Жоғарғы Аттестациялық Комиссиясының 1971 жылғы 1-ші желтоқсандағы шешімі бойынша марксистік-лениндік философия кафедрасының доценті атағы берілді.1980-1992 жылдары филология факультетінің деканы, 1992-2002 жылдары «Құқықтану», кейіннен «Мемлекет және құқық теориясы мен тарихы» кафедрасының меңгерушісі қызметтерін атқарды. 2002 жылдан өмірінің соңына дейін осы кафедраның кұрметті меңгерушісі, кафедра профессоры болып еңбек етті.Білім беру, ғылыми және қоғамдық қызметінде көптеген медальға, белгілерге алғыстар мен атақтарға ие болған. Ғылыми зерттеу және оқу-әдістемелік жұмыстарының нәтижесінде 55 ғылыми еңбектің авторы атанды.&nbsp;Ғалымның ұсынысымен білікті жастар Мәскеуге, Санкт-Петербургке, Алматыға, Астанаға заң мамандығы бойынша аспирантураға, тәжірибе алмасуға жіберілген. Осының нәтижесінде университеттегі заң ғылымдары кандидаттарының саны оннан асты. Бүгінде университетте заңгер кадрлар даярлайтын арнайы кафедра, білімді, тәжірибелі заңгерлер мен ғалымдар еңбек етіп, ұстазының ұстанымын әрі қарай жалғастыруда.&nbsp;Мұстафа Матайұлы кезінде негізін қалаған Криминалистика лабораториясы ауқымды жобаларды қолға алуда. Студенттердің «Заң клиникасы» тұрғындарға сапалы құқықтық қызмет көрсетумен жүйелі айналысса, «Жас заңгер» &nbsp;үйірмесі де нақты &nbsp;зерттеу жұмыстарын жүргізуде.Жиынға отандық және шетелдік ғалымдар, Мұстафа Матайұлының жары Торғын Аймұратова, ұл-қыздары, бауырлары, &nbsp;шәкірттері, Қорқыт ата атындағы Қызылорда университетінің ғалымдары, профессор-оқытушылар құрамы, білім алушылары, БАҚ өкілдері онлайн және офлайн форматта қатысты.Конференцияға қатысушылар университеттің №1 ғимаратында орналасқан М.Матаев атындағы дәрісханамен танысты. Ғалымның ұрпақтары М.Матаевтың жеке қорындағы кітаптарды университеттің ғылыми кітапханасына табыстады.

Қызылордада ғалым Матаевтың құрметіне конференция өтті

<a href="https://kyzylorda-news.kz/">Kyzylorda-news.kz.</a> Қызылорда қаласы бойынша білім бөлімінің ұйымдастыруымен 7 және 11 сынып оқушылары арасында Мағжан Жұмабаев мұрасын жас ұрпаққа насихаттау, таныту, олардың азаматтық ұстанымының, ұлттық ой-санасының қалыптасуына ықпал ету мақсатында «Мағжан оқулары» республикалық ғылыми-шығармашылық байқауының қалалық кезеңі өтті.Шығармашылық байқауға жалпы білім беру ұйымдарынан елуге жуық оқушы қатысып, өзара бақ сынасты. Нәтижесінде, «Өлең – менің Шолпаным, Айым, Күнім» бағыты бойынша №218 орта мектебінің 8-сынып оқушысы Амангелді Жансая жүлделі І орын алып, облыстық кезеңде ІІІ орынға ие болды.&nbsp;Ал, «Жасынан оқу оқып, өнер қуған» бағытында Ж.Махамбетов атындағы №43 орта мектебінің 10-сынып оқушысы Сақтаған Еңлік І орынға лайық деп танылды. Еңлік облыстық кезеңде де топ жарып, республикаға жолдама алды.&nbsp;Келесі «Ақын да бір бала ғой айға ұмтылған» кезеңі бойынша №143 орта мектептің 10-сынып оқушысы Өмірбек Нұрасыл да қалалық кезеңде І орын алып, облыстық кезеңде топ жарды. Нұрасыл алдағы республикалық кезеңде бақ сынайтын болады.&nbsp;Жүлдегер шәкірттерімізді құттықтай келе, республикалық кезеңде сәттілік тілейміз!

Қызылордада «Мағжан оқулары» байқауы мәресіне жетті

<a href="https://kyzylorda-news.kz/">Kyzylorda-news.kz.</a> Қармақшы ауданының әкімі Жандос Еркінбек Ахмет Байтұрсынұлы атындағы оқытушылардың республикалық байқауына және Әзірбайжанның Баку қаласында Халықаралық балалар арасындағы «Мугам» өнер байқауына Қазақстан атынан қатысып, жүлделі оралған өнерпаздарды қабылдады.Атап өтер болсақ, осы жылдың 25 мамырында Атырау қаласында ұлт ұстазы Ахмет Байтұрсынұлы атындағы республикалық мемлекеттік тіл оқытушыларының байқауына Қызылорда облысынан қатысқан Облыстық қоғамдық даму басқармасының Тілдерді оқыту орталығының мемлекеттік тіл оқытушысы, жерлесіміз Гүлжанат Өмірқызы Бас жүлдені жеңіп алып, облыс абыройын асқақтатты.Сонымен қатар Әзірбайжанның Баку қаласында «Кайнат» жастар орталығының ұйымдастыруымен Халықаралық балалар арасындағы «Мугам» өнер байқауында Қазақстанның атынан қатысқан К.Рүстембеков атындағы жыраулар үйінің жас шәкірті Елдес Мәди (жетекшісі Әлішер Мырзағалиев) жүлделі ІІІ орын иеленді. Аудан басшысы тек ауданымыздың ғана емес тұтас еліміз бен аймағымыздың мәртебесін арттырған жерлестерімізге ізгі лебізін білдіріп, сый-сияпат жасап, құрмет көрсетті. Сондай-ақ, талантты өнерпаз Елдес Мәдиге ыстық ықыласын жеткізіп, қазақтың қасиетті домбырасын тарту етті.Осы ретте республикалық додада топ жарып, облыс абыройын асқақтатқан бұрынғы әріптесімізді сөзге тарттық.<blockquote>«Тілге деген құрмет пен жанашырлықтың деңгейі, сол бағытта жасалып жатқан жұмыстар сараланатын, бағаланатын байқауға Сыр бойының сенімі мен үмітін арқалап барғанда қанжығам майланып қайтқанына қуаныштымын. Он бес күннен асса да жүлделі оралған жеңімпазды құттықтаулар әлі толастар емес. Бұл жеңіске менен бұрын додаға дайындаған облыстық тілдерді оқыту орталығының ұжымы, әріптестерім қатты қуанды. Ауылға жетпей өзім он жылдан аса еңбек еткен аудандық «Қармақшы таңы» газеті «Байтұрсынов байқауының бас жүлдегері», облыстық «Сыр бойы» газеті «Бұрынғы әріптестің бүгінгі жетістігі» атты тақырыппен сүйінші мақалаларын жариялап үлгерді. Облыстық қоғамдық даму басқармасының басшысы А.Есмаханов қабылдап, облыс әкімінің орынбасары Н.Сақтағановтың алғыс хатын табыстады. &nbsp;«Қазақстан-Қызылорда» телеарнасы сұқбат алды. 4 маусым – Рәміздер күніне орай аудан әкімдігі облыс әкімінің Алғыс хатын ұсынды. Аудан әкімі Жандос Еркінбекұлы қабылдап, құттықтауы мен сый-сияпатын жасады. Одан бөлек, қоғам белсендісі Гүлжауһар Раева байқау жеңімпазы ретінде халықаралық «Қазақ тілі» қоғамының аудандық филиалы ұйым мүшелерімен кездесу өткізді. Қысқасы, бұл марапаттар маған екі есе үміт пен сенім жүгін арқалатты. Мұның барлығы биліктің тілге деген, өнерге деген құрметінің айрықша екенін аңғартады. Тіл мәртебесінің артуына, жерлестерімнің мемлекеттік тілде сауатты сөйлеуі мен жазуына тілдерді оқыту орталығының курстары арқылы көмектесе бермекпін», – дейді жеңімпаз оқытушы Гүлжанат Дүзенова.</blockquote>

Қармақшы ауданының әкімі байқау жеңімпаздарын қабылдады

<a href="https://kyzylorda-news.kz/ru">Kyzylorda-news.kz.</a> Қазіргі уақытта нашақорлық мәселесі саясаткерлерді, дәрігерлерді, мұғалімдерді, ата-аналарды мен саналы жастарды алаңдатады. Халықты психологиялық және физикалық тәуелділікті тудыратын есірткі заттарын медициналық емес қолданудың барлық жағымсыз әсерлері туралы хабардар ету мақсатында Қызылорда облысы Полиция департаментінің Есірткі қылмысына қарсы іс-қимыл басқармасы әртүрлі жас топтарымен профилактикалық жұмыстар жүргізеді. &nbsp;&nbsp;«26 маусым – Халықаралық нашақорлыққа қарсы күрес күні» мерекесі аясында өткізіліп жатқан айлық шеңберінде, Сырдария өзенінің жағасында, полиция қызметкерлері «Байкерлер есірткіге қарсы!» акциясын өткізді.&nbsp;Нашақорлық сияқты әлеуметтік зұлымдықпен күреске Қызылорда қаласының байкерлері де қосылды. Акцияның мақсаты &nbsp;- қоғам тарапынан нашақорлыққа теріс көзқарасты қалыптастыру, салауатты өмір салтын насихаттау, жастар арасында нашақорлықтың таралуының алдын алу болып табылды.Акция барысында Қызылорда байкерлері мен байкерлерді қолдау тобы жағаға жиналып, есірткіні қолдануға деген теріс көзқарастарын білдіріп, қаланың барлық тұрғындарын салауатты өмір салтын ұстануға шақырды.Қызылорда облысының байкер қоғамдастығы облыстың түрлі әлеуметтік жобаларына қатысады, қоғам мүшелері салауатты өмір салтын ұстанады және жеке бос уақытын сүйікті ісімен және өздеріне және айналасындағыларға пайдалы өткізуге болатындығын үлгі ретінде көрсете біледі.<figure class="image"><img src="https://knadmin.beoblood.kz/uploads/narkotik_2_28209032af.jpg" alt="наркотик 2.jpg"></figure><figure class="image"><img src="https://knadmin.beoblood.kz/uploads/narkotik_3_0cf9d61557.jpg" alt="наркотик 3.jpg"></figure>

Қызылорда облысының есірткімен күресшілері  «Байкерлер есірткіге қарсы!» акциясын өткізді 

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы денсаулық сақтау басқармасының басшысы Олжас Искаков жұмыс сапарымен Қазалы ауданында болды.&nbsp;Аймақтың бас дәрігері аудан әкімінің орынбасары Дәурен Тілеумбетовпен бірге ең алдымен Бозкөл ауылдық округіне барып, жаңадан бой көтеретін амбулаторияның орнын көрді. Сондай-ақ, Қазалы қаласындағы «Шипагер» дәрігерлік амбулаториясының жұмысымен танысты.&nbsp;Мұнан соң «Жетес би» дәрігерлік амбулатория ғимаратының күрделі жөндеу жұмыстарын көрген Олжас Ермекұлы аудандық емхананың жұмысына да қанығып, ақ халатты абзал жандармен кездесті.&nbsp;Өңірдің бас дәрігері бұдан бөлек аудандық көп бейінді орталық аурухана, орталық жедел жәрдем көмек көрсету стансасы және теміржол ауруханасына да аялдады. Сонымен қатар облыстық денсаулық сақтау басқармасының басшысы Олжас Искаков пен аудан әкімінің орынбасары Дәурен Тілеумбетов тұрғындарды жеке мәселелері бойынша қабылдап, талап-тілектерін тыңдады.&nbsp;Айта кетейік, өңірдің бас дәрігерінің ауданға сапары барысында Қазалы ауданаралық ауруханасының бас дәрігері Бақыткүл Әлішева да бірге жүрді.Аудандағы медицина саласының хал-ахуалымен танысқан аймақтың бас дәрігері әріптестерінің жұмысына сәттілік тіледі.

Аймақтың бас дәрігері Қазалы ауданына іссапармен келді

<a href="https://kyzylorda-news.kz/">Kyzylorda-news.kz.</a>&nbsp;Бүгінде «AMANAT» партиясы түрлі спорт федерацияларымен және ұйымдармен бірлесіп бұқаралық спортты дамытуға бағытталған көптеген спорттық шараны тұрақты ұйымдастырып келеді.Осы мақсатта өткен аптаның басында аудандық партия филиалының, Жастар ресурстық орталығы мен «Жастар Рухы» ЖҚ аудандық филиалының ұйымдастыруымен Әйтеке би кенті жастарының арасында «Жастар кубогы» атты доп додасы бастау алған болатын. Бүгінде аталған спорттық сайыс аясында аудан орталығының әр аумағынан құралған әр түрлі командалар бақ сынауда.&nbsp;Атап айтқанда 4 маусым – Мемлекеттік рәміздер күні қарсаңында орталық аймақ жастарының аяқдопшылары өзара сынға түсті. Тартысты сайыс қорытындысы бойынша жеңімпаз командаларға «Жастар Рухы» ЖҚ аудандық филиалының жетекшісі Нұрбек Ақпанбетов дәрежелі дипломдар мен медальдар табыстады.<blockquote>«Спорт – денсаулық кепілі. Біздің аудан жастары спорттық жарыстардың қай түрі болсын үнемі біркісідей атсалысады. Әсіресе футболға деген қызығушылықтары ерекше. Міне, бүгін соның нәтижесін көрдік. Жеңімпаз командаларды құттықтаймын. Барлық қатысушыларға алғыс білдіремін. Алдағы уақытта бұндай пайдалы шаралар өз жалғасын табады деген сенімдемін», – деді Нұрбек Ақпанбетов.</blockquote>

Қазалылық жастар спортқа жақын

<a href="https://kyzylorda-news.kz/">Kyzylorda-news.kz.</a>&nbsp;Күн тәртібінен түспей тұрған мәселенің бірі – жастардың жұмыссыздығы. Қоғамда бұларды «Neet санатындағы жастар» деп атап кеткен. Шет елдерде бұрыннан қолданылып жүрген бұл термин елімізде бірнеше жыл бедерінде ғана айтылып келеді. Қазақша баламасы «жұмыc іcтемейтін, оқымaйтын, өзге де пайдалы іcпен шұғылдaнбaйтын, бос жүрген aдaм» дегенді білдіреді. Ағылшын тіліндегі «Not in Employment, Educationor or Training» ұғымының бac әріптерінен құрaлғaн. Бүгінде үкімет бұл санаттағы жастардың қатарын азайту үшін көптеген жұмыс жүргізуде.Аталған мәселеге орай аудан әкімінің орынбасары Болат Ысмұғаловтың төрағалығымен мәжіліс өтті. Оған облыстық қоғамдық даму басқармасының Жастар ресурстық орталығы директорының орынбасары – Гүлназ Айдарбекова, облыстық Жастар ресурстық орталығының бөлім басшылары – Алмагүл Құлмағамбетқызы мен Динара Миліханқызы, сонымен қатар дербес бөлім басшылары қатысты.Ауданда 14 пен 35 жас аралығындағы жастардың саны – 25 442. Бұл жалпы халықтың 30,2 проценті. Оның 1029-ы NEET санатындағы жастардың тізімінде бар. Олардың арасындағы жұмыссыздық деңгейі 3,8 процент. Бұл – аудандық статистика бөлімінің ұсынған соңғы дерегі. Бұған қарап, кейінгі бес жылда аталған көрсеткіштің едәуір жақсарғанын байқаймыз. Ендігі міндет – алдағы уақытта осы еріншек жастардың қатарын тағы да азайту. Осыған байланысты аудан әкімінің орынбасары Болат Ысмағұлов жиналысқа қатысқан сала басшыларына арнайы тапсырма беріп, NEET санатындағы жастардың нақты санын біліп, оның алдын алу үшін жұмылып жұмыс істеу керектігін тілге тиек етті.«Еңбек – адамның екінші анасы» деген тағылымды тәмсіл бар. Тәрбиелік мәні терең бұл сөздің мағынасын «Адамды адам еткен – еңбек» деген тағы бір дана сөз аша түседі. Иә, еңбек адамды өсіреді, өмірден өз орныңды тауып, тұлға болып қалыптасуыңа бастайды. Өкініштісі, қазіргі кезде осынау құндылықты құнттамайтын, еңбек етуге, ізденуге құлықсыз, ынта-жігері жоқ жастар да арамызда жүр. Жоғарғы оқу орнын немесе колледжді бітірген жастар дипломын қолына ала салып, жұмысқа орналасуды қалайды. Бірақ кейбір жұмыс беруші тарап олардың қолында қатырма қағазы болса да, жұмысқа тәжірибелі қызметкерді алғысы келеді. Ал екіншіден, кейбір мекемелердің ұсынған жалақысы жастардың көңілінен шықпай жатады. Екі қолға бір күрек таппаған соң олар осы жұмыссыз жастар санатын толықтыруда.Осындай проблеманың алдын алу үшін мемлекет түлектерге «Дипломмен ауылға», «Жастар тәжірибесі», «Серпін» және тағы басқа да бағдарламалар мен жобалар ұсынып отыр. Мәселен, өткен жылы «Бастау-Бизнес» кәсіпкерлік негіздеріне оқыту курстарынан 1587 азамат онлайн түрде оқып, сертификаттарын алған. Сондай-ақ 2022 жылы аудандық жұмыспен қамту орталығына 723 азамат жұмыс іздеуші ретінде тіркеліп, оның 689-ы тұрақты жұмыспен және жұмыспен қамтудың мемлекеттік қолдау шараларымен қамтылған.

Шиеліде NEET санатындағы жастармен жүйелі жұмыс жүргізілуде

Медициналық-әлеуметтік сараптаманың өзекті мәселелесі

<a href="https://kyzylorda-news.kz/">Kyzylorda-news.kz.</a>&nbsp;Онкологиялық ауруларды жаңаша тәсілдермен емдеп, радиацияны медицинаның игілігіне пайдаланып жүрген жас физик. Шетелде білімі мен біліктілігін шыңдап, Ресейдің белгілі ядролық физигі, құрметіне химиялық элементтер кестесінен аты аталған әйгілі ғалым Юрий Оганесяннан тәлім алған маман. Бүгінде томотерапия бөлімінде қызмет етіп, ондағы күрделі математикалық есептеуден тұратын жұмыспен айналысып, өз кезегінде физиканың медицинаға беретін әлеуетін арттырып, адамзат пайдасы үшін адал еңбек етуді мақсат тұтатын жас ісмер, тарихы терең Қазалының тумасы Ернар Орда жайлы әңгіме өрбітпекпіз.– Ернар Мақсұтұлы, ең алдымен өзіңіз жайлы әңгіме өрбітсек…– Отбасында анам, екі әпкем, бір қарындасым және келіншегім екеуіміз тұрамыз. Марқұм әкем Мақсут Ерімбетов деген кісі. Ол өз заманында ауданға танымал тұлға, интеллекті жоғары, өте сауатты әрі бала тәрбиесінде ұстанымы мен бағыт-бағдар бере білді. Сегізінші сыныпта облыстық дарынды балалар мектеп-интернатына оқуға аттандым. Отбасында жалғыз ұл болдым. Әкем қимастығына қарамастан сонда білім нәрін сусындауға жіберген. Әрине, оның барлығы менің болашағым үшін жасалған әкемнің батыл қадамы деп білемін. Марқұм әжем оған «жалғыз ұлды неге жібересің» деп ұрысып та алатын. Сөйтіп, мектепті тәмамдап, жоғары оқу орнына тапсырдым. Студенттік өмірді сүріп жүріп, Ресейге әлемдік үздік зерттеу орталықтарының бірі болып саналатын «Біріккен ядролық зерртеулер институтына» оқуға тапсырып, Дубна қаласында білім алдым. Сол жақтан көп бағдарламалар жайлы біліп АҚШ-қа да барып қайтуды көздедім. Айта кетейін, отбасымызда шетелде дәріс алған жалғыз мен емес. 2007 жылы әпкем де АҚШ-қа барып, сонда мол тәжірибе жинап келген.Мектеп қабырғасынан физика саласына, яғни ядролық физика бағытына барғым келді. Онда мені еліткені шексіз энергия және оны алудың жолдары сутегі энергиясы. Сол уақытта бала қиялым болды. Осы энергияға қол жеткізсем, термоядролық синтезді жасай алсам деген. Әрине оның барлығы фундаменталды ғылым, бірақ солардың барлығын қорыта келе, оның практикалық қолдану жөнін, басқа да қырларын уйренуге тырыстым. Ал соның бірі – медициналық физика болып табылады. Діттегеніме жетіп, бүгінде сол салада қызмет етіп келемін.Қазіргі таңда Нұр-Сұлтан қаласында орналасқан «ҮМІТ» халықаралық онкологиялық томотерапия орталығында жұмыс істеймін. Алғашында магистратураны тәмамдаған соң, сан түрлі іріктеуден өтіп, орталыққа жұмысқа тұрдым. Жалпы ядро мен медициналық физика аз ғана ұқсастығы болғанымен, екі түрлі сала. Сондықтан білімімді жетілдіру үшін халықаралық екінші тәжірибем ретінде Индия елінің Дели қаласында орналасқан «Меданта» халықаралық клиникасында екі апта тәлім алдым. Онан соң, тиісті аппаратпен жұмыс жасау үшін, екінші мәрте АҚШ-қа томотерапия құрылғысын өндіруші «Аккюрей» компаниясының зауытына барып, құрылғының жасалу жолымен танысып қайттым. Білімнің ешқашан шегіне жету мүмкін емес. Сол себепті әлі күнге дейін, жер жаһанның түкпір-түкпіріне барып, арнайы курстар мен ғылыми конференцияларға қатысып, тәжірибе алмасып, маңызды ақпаратты түйіп келеміз. Жуырда ғана Венгрия астанасы Будапешт қаласында болған, ауқымды конференцияда да болдым.Бүгінде онкологиялық ауруға шалдыққан жандарды емдеуге дәрігерлер доза тағайындаса, мен сол дозаның жеткізу жолдарымен айналысамын. Негізі дәрігер науқасқа доза тағайындау барысында кішкене ғана мөлшерде артық немесе кем болса, ол науқастың өміріне қауіп төндіреді. Сондай олқылықтың алдын-алу мақсатында физиктер, яғни біз жеткізу ісімен айналысамыз. Олар күрделі математикалық есептеу жолдары мен томотерапия аппараты арқылы жүзеге асырылады. Сол арқылы тиісті дозаны жеткіземіз десек те болады.– Шетелде дәріс алу барысында болған қызықты да қиын сәтіңізді бөліссеңіз…– Онда ең бірінші өзге елден келген азаматтар үшін қиыны, әрине ол – тіл. Мен де тіл білу мәселесімен бетпе-бет келдім. Қазақта «адам баласы үш күннен соң тозаққа да үйренісіп кетеді» деген сөз бар ғой. Расымен, кейін келе сол елдің тыныс-тіршілігі мен ағымына ілестік. Мені бір таңғалдырғаны американдықтардың менталитеті мен қарым-қатынасы. Олар еркін, әрі ессіз десек болады. Яғни, алдына қандай мақсат қойса, оған жету жолында бәрін құрбан етуге дайын.Ал қызықты сәтімді айтар болсам, сонда жұмыс жасап жүріп, жалға пәтер алғанбыз. Сөйтіп, бір аптадан соң, пәтерімізді өрт шалды. Тілсіз жаумен арпалысамын деп жүріп, қолымды күйдіріп алдым. Тиісінше жедел-жәрдем шақырып, мені ауруханаға алып бара жатқанда, ауруды сезбес үшін морфин салған. Оның әсерінен діттеген жерге жеткенге дейін неше түрліні айтыппын. Жеткен соң, бір күндік ем-домын алып, ауруханадан шықтым. Осы орайда айта кететіні, АҚШ-тың ең үлкен бір олқылығы десем де болады. Ондағы медициналық көмек пен ауруханада ем алу ақысы өте қымбат. Мен ауруханадан шыққаннан кейін, бір күндік емге арнайы түбіртек келді. Оның ішінде емделу ақысы жазылған екен. Сондағы бір күн ем мен морфиннің құны 10 мың АҚШ доллары болып шықты. Алайда мен онда студент болып барғаннан кейін, жеңілдікпен 700-800 долларға арзандады. Ол да сол уақыттағы нарықпен аз ақша емес еді. Қуанышқа орай сонда мекендеген қазақ бауырларымыз көмек етіп, емнің тиісті соммасын төлеп тастадық. Жалпы қазақтың бауырластығы бір төбе. Сол сәтте қол ұшын созған жандарға алғысым шексіз. Сөйтіп, АҚШ-тағы 4 ай уақытым қызықты сәттерге толы өтті. Елге оралғаннан кейін, мен тек қалта жайынан ғана емес, рухтық, мотивациялық жағынан да байып келдім десем болады. Жас буынға айтарым, шетелге бару мүмкіндігі туса қалыс қалмаңыздар. Ол жақта сіз бен біздің үйренеріміз көп.– Ернардың осындай дәрежеге жетуіне кім немесе не себеп болды?– Кейбір қазақ отбасында, бала мен әке арасындағы қарым-қатынас өте суық деп айтсақ қателеспейміз. Ал, менде бәрі керісінше. Уақытында әкеммен етене араласып, кез келген мәселені ашық түрде талқылай беретінбіз. Яғни, ол менің өмірімдегі ең алғашқы да, адал да досым болды десем артық айтқандық емес. Жалпы әкелік міндеті ретінде, қайсы біріміздің болмасын, жоғары дәрежелі білім алып, жақсы маман атануымыз жолында аянбай тер төкті. Әлі күнге дейін есімде, алғашқы сұрағыңызда айтқандай 2007 жылы әпкемнің АҚШ-қа барып, ел мен жерді көріп, сондағы ілім-білімді бойына сіңіру үшін несие алып, барлық мүмкіндікті жасаған. Сол жылдары әпкем аудан бойынша ең алғашқылардың бірі болып сапарлап қайтқан. Ол кезде әлеуметтік желі дамымаған. Әжем қаршадай қыздың шетелге жалғыз кеткенін құптамай, оны үнемі сұрап отыратын. Қуанышымызға орай Қазалы қаласында тұратын әкемнің досының үйінде мейл поштасы арқылы хат жолдап, келген хатты қағазға басып алатын мүмкіндік болды. Шетелден хат келісімен оны шығарып, ең бірінші әжеме оқытатынбыз. Сол кісінің көңілі орнығып, жаны тынышталсын деп. Кейін келе мағанда шетелге сапарлаудың сәті түскен. Менің өмірімдегі тағы бір өзіндік ойып тұрып орны бар бір кісі ол марқұм Абдулла Сапар деген ұстазым болды. Ол кісі менен бір ерекшелікті байқады ма, әйтеуір өзіне жақын тартты. Ағалық ақылын, ұстаздық тәлімін берді. Түрлі олимпиадаларға қатыстырып, географиялық бағытқа зейінімді ашқан бірден бір жан болатын.– Жалпы елде көптеген жас буын мұхит асып, жер жаһанды көруді армандайды. Сол арманға жетіп, қажетті білімді бойға сіңіріп жатады. Бірақ, батыстың сұлулығына тамсанып, сонда біржола қалуды мақсат ететіндерге не айтасыз?– Әрине, батыстың сұлулығы елітері сөзсіз. Осы орайда жас буынның мұхит асуды армандауы дұрыс және оны іске асыруға тырысқаны да дұрыс. Елде болашақ және стипендиялық бағдарламалар өте көп. Оны ізденген жан табады.Діттегеніне жеткен соң, еліп, қалып қоятындары бар келісемін. Бірақ сол үшін бізде өкініш болмауы керек. Себебі ол адам ертелі-кеш туған жерді сағынып болса да келеді. Біз қазақ болып туғаннан кейін, ел, жер, ағайын-туыспен қарым-қатынасты ешқашан үзбегенбіз және үзбеймізде.– Егер сізге тұтастай бір елдің оқу жүйесін ауыстыру, яғни өзгерту мүмкіндігі туса, не істер едіңіз?– Әлемге әйгілі ойшыл, пәлсапашы, математик Әбу Насыр әл Фараби айтып кеткен ғой «Тәрбиесіз берілген білім, адамзаттың қас-жауы» деп. Бұған мысал Ресей ғалымы Сахаровтың ойлап тапқан сутегі бомбасы. Ол өзінің көптеген жылдар бойы ізденіп тапқан туындысын, яғни сутегі бомбасының әлемге әкелген зардабына куә болғанда, қыруар сызбасы мен жобаларын жойып тастағысы келді. Алайда, ол үшін өте кеш болды. Бұл жерде не айтқым келді. Тәрибесіз, негізсіз білімнің екі ұшы болады. Біреуі пайдасы болса, екіншісі зияны. Жалпы сутегі энергиясы дегеніміз ол сутегін энергия. Өйткені бұл өте арзан деңгейдегі энергия. Бірақ оның технологиясы өте күрделі және қиын.Негізі бізге ең алдымен керегі менталитет, көзқарас, сауаттану мен интелектуал жетіспейді деп ойлаймын. Жалпы алғанда біз де әлі де қараңғылық бар. Ал, кереметтей оқу системасын ойлап табу мүмкін емес. Яғни кез келген мемлекеттің өзіндік білім-ғылымды дамыту системасы бар. Оның әрқайсысының орны ерек және әрқайсысының өзіндік нәтижесі бар. Сондықтан өзгеріс заман ағымына байланысты жайлап, тамырын жаймаса, оны аяқ асты ешкім өзгерте алмайды.– Уақыт бөліп, әңгімелескеніңіз үшін алғысымыз шексіз.

Ернар Мақсұтұлы, медициналық физик: Маған жүктелген міндет қателікті кешірмейді

<a href="https://kyzylorda-news.kz/">Kyzylorda-news.kz.</a> Жақында №93 орта мектепте «Бар мейіріміміз балаларға» атты мектеп жанындағы «Балбұлақ» жазғы тынығу лагерінің ашылуы өтті.&nbsp;Балалардың жазғы демалысын қызықты өткізу мақсатында өткен салтанатты шараға мектеп басшысы, ұстаздары мен мектеп қызметкерлері және мектеп оқушыларының ата-аналары қатысты.&nbsp;Көңілді кеші барысында мектеп басшысы Серікбол Сансызбаев оқушыларға алдағы 10 күнде жақсы демалып, уақытты тиімді әрі қызықты өткізулеріне тілектестігін білдірді.<blockquote>«Құрметті балалар, бүгін мереке қарсаңында мектеп лагерінің ашылуы салтанаты керемет өтіп жатыр. Бұның барлығы әрине сіздер үшін. Осынау балғындарға қуаныш сыйлап, ұйымдасып жатқан барша жандарға алғысым шексіз. Демалыстарыңыз жақсы өтсін», – деді мектеп директоры.</blockquote>Шара барысында оқушылар ән айтып, би билеп өз өнерлерін ортаға салды. Нағашыбай Айхан, Серік Ақтоты, Темірбек Назгүл, Айша Нағашыбай сынды оқышылардың керемет өнеріне куә жұрт ду-қол шапалақ соқты.«Балбұлақ» жазғы тынығу лагері жалпы қордан бөлінген қаражатқа 2-15 маусым аралығында жұмыс жасайды. Мұнда 30 бала тартылған.С.Сансызбаев, Ж.Ілияс, Н.Жұбаниязов, Ж.Уксикбаев, Ұ.Тәуекелова, Қ.Өмірзақова, С.Бисеналиева, Б.Мақсатбаев, Ф.Боранбаева, А.Баймұратова сынды ұстаздар балалар күні мерекесі мен лагердің ашылу құрметіне орай кдемеушілік жасап балғындарды қуантты. Кеш соңында директорының тәрбие ісі жөніндегі орынбасары Г.Уалиев оқушыларға сәттілік тіледі.

Архив

Қызылордада ғалым Матаевтың құрметіне конференция өтті

Қызылордада «Мағжан оқулары» байқауы мәресіне жетті

Қармақшы ауданының әкімі байқау жеңімпаздарын қабылдады

Қызылорда облысының есірткімен күресшілері «Байкерлер есірткіге қарсы!» акциясын өткізді

Аймақтың бас дәрігері Қазалы ауданына іссапармен келді

Қазалылық жастар спортқа жақын

Шиеліде NEET санатындағы жастармен жүйелі жұмыс жүргізілуде

Медициналық-әлеуметтік сараптаманың өзекті мәселелесі

Ернар Мақсұтұлы, медициналық физик: Маған жүктелген міндет қателікті кешірмейді

Қазалыда мектеп жанындағы лагерлер өз жұмысын бастады

Айгүл Үсейінқызы: Ұлттың сапасын көтереміз десек, тәрбиенің негізін дұрыс қалау керек

Қызметкерлер мен жұмыс берушілердің сақтандыру қорына төлем жасаған кезде ескеретін 10 жағдай