<a href="https://kyzylorda-news.kz/">Kyzylorda-news.kz.</a> Ықылымнан бай-бағыландар бөдененің еті де, жұмыртқасы да мың түрлі дертке дауа екендігін жақсы білген. Бұл құртақандай құс өнімі адамның ойлау қабілетін арттырып, ағзаны түрлі жұқпалы аурулардан қорғайтынынан да хабардар болған. Ал дәмі тіл үйіреді, әрі тойымды.Дәлірек айтсақ, кәдімгі тауық жұмыртқасына қарағанда, бір грамм бөдене жұмыртқасы құрамында А және D дәрумендері екі есе көп. В тобындағы дәрумендер де анағұрлым, яғни алты есе, фосфор, калий және темір төрт-бес есе жоғары. Осы кішкене ғана диеталық өнімде – мыс, кобальт, никотин қышқылы мен амин қышқылы да мол. Тағы бір дәлелденгені, бөдене жұмыртқасы тауықтардікіне қарағанда микробтардан таза келеді. Осы ерекшелік ғалымдарды әлі күнге дейін қайран қалдыруда. Өнімнің ең басты қасиеті – өз құнарлылығын жоймай ұзақ сақталуында. Бөлме температурасы жағдайында айға жуық, ал тоңазытқышта 60 тәулікке дейін сақтауға болады дейді қазалылық кәсіпкер Руслан Сәрсенбаев.Руслан Қуантқанұлының сөзінше, бала кезден үй жануарларын ұстап, баптағанды жаны сүйеді. Былай айтқанда өзінің жеке хоббиі саналады. Ауласында қаз, үйрек, тауық, күрке тауық, тіпті қоянға дейін баққан. Есейе келе бөдене құсына қызығушылық танытып, арнайы ізденіп, тәжірибе жинаған. Жақында 2021-2025 жылдарға арналған кәсіпкерлікті дамыту жөніндегі ұлттық жобаның екінші бағыты «жаппай кәсіпкерлікті дамыту» бойынша жаңа бизнес-идеяларды іске асыруға арналған мемлекеттік грант (стартап) алуға қатысып, қайтарымсыз қаржыға қол жеткізді. Бір мезетте мемлекеттік қолдауға ие болып, миллионер атанды.<blockquote>«Бизнес жүргізуге тиімді бұл құсты асыраумен айналысқаныма 10 жылдай болды. Дегенмен оның өзіндік тәсілдерін ұстанбасаң жемісін бермейді. Осы жылдар аралығында білместіктен біраз қателіктер де жасадым. Бір мезетте 600 балапандарды жойып алған да уақыттар болды. Сондайда бастаған ісімді тоқтатқан болатынмын. Бірақ бұл кәсіптен қол үзгенімде бәрібір бөдене құсына деген қызығушылығым басылмады. Қайта қолға алуды мақсат етіп, мемлекеттік бағдарламада бағымды сынап көруге бел буғанмын. Шүкір, дайындаған құжаттарымды комиссия мүшелері мақұлдап, өтеусіз қаражатты берді. Сол ақшаға 1000-ға жуық бөдене алдым. Арнайы орнын дайындауға құралдар иемдендім. Ас-суы өз алдына бөлек әңгіме. Қазір игілігін өзіммен бірге тұтынушыларым көріп отыр», – дейді кәсіпкер.</blockquote>Мамандар бөдене жұмыртқасын әсіресе, балаларға, қарттарға, аяғы ауыр және емізулі баласы бар әйелдерге, сырқат және әлсіз жандарға жиі тұтынуға кеңес береді. Себебі, бұл өнімнің адамның иммунитетін көтеріп, сергітетін қуаты мол.Экологиясы нашар аймақтың тұрғындары үшін бөдененің жұмыртқасы өте пайдалы деседі зертеушілер. Бөдене туралы еліміздегі алғашқы ғылыми зерттеу жұмысының авторы, Қазақ ұлттық аграрлық университетінің PhD докторанты Мұхтар Байбатшановтың айтқанындай, Чернобыль апатынан кейін ғалымдар апат аймағында радиациядан жапа шеккен балаларды бір орталыққа жинап, тәжірибе жүргізеді. Бір топтың балаларына бір ай бойына бөдененің жұмыртқасын шикілей ішкізсе, екінші топтағы балаларға жұмыртқа бермейді. Бір айдан соң жұмыртқа ішкен балалардың ағзасын тексергенде ғалымдар бөдене жұмыртқасы радиацияны ыдырататынын анықтаған. Мұрындарының қанауы, бас айналулары тоқтап, қандағы гемоглабиндері көбейген. Осыдан кейін көпшілік бөдене жұмыртқасын жаппай тұтына бастады.Жапондықтар бөдене жұмыртқасын тұрақты тұтынған науқастың қатерлі ісіктің өзінен тәуір болатынын дәлелдеген көрінеді. Қазіргі уақытта Жапонияда бөдене шаруашылықтары жақсы дамыған. Бұл елде жылына 19 миллиардқа жуық бөдене жұмыртқасы өндіріледі. Керек десеңіз, бөденені зерттейтін орталықтар, институттар құрылған. Сонымен қатар бүгінде Қытай, Үндістан, Германия және басқа да елдер бөдене ісін жандандыруға қатты көңіл бөлген.Жапонияда әрбір бала күніне екі бөдене жұмыртқасын жейді-мыс. Тарихқа көз жүгіртсек, Шыңғыс ханның өзі жаралы жауынгерлеріне кішкентай ғана бөдененің жұмыртқасын ішкізіп, аяққа тұрғызған дегенді келтіреді.Нақты айтқанда, бөдене еті мен жұмыртқасы сырқат адамның жазылуына, дені сау адам үшін аурудың алдын алуға көмектеседі. Таза, әрі табиғи азықты күнделікті қолданса, көп шығынсыз түрлі дертке қарсы тұра алатындай денсаулықты нығайтуға болады. Бүгінде «ханның асы» саналатын бұл өнімді Руслан Қуантқанұлы тапсырыспен Қазалының супермаркеттерінен бөлек, Арал мен Сексеуіл және Төретам халқына жеткізіп тұр. Сонымен бірге бөденені сұраныс бойынша сойып, тазалап тұтынушыларға етін де саудалайды.Бүгінде жұмыртқа бағытында жұмыс істеп жатқан кәсіпкер, алдағы уақытта ет бағытындағы эстондық, шанжурлық және броллер сортының бөденелерін алуды көздеуде. Арнайы қора салуды да діттеп отыр. Ал қазір жұмыртқа мен етінен бөлек, балапанын да алам деушілерге ұсынуда. Әрине қалтаға тиімді бағада беріледі. Ендеше, тұтынушылар қалағанынша сатып алуына мүмкіндігі бар.

Қазалылық кәсіпкер бөдене баптап, табыс тауып жүр 

<a href="https://kyzylorda-news.kz/">Kyzylorda-news.kz.</a> Президент Қасым-Жомарт Тоқаев шейх Сурур бен Мұхаммед Әл Нахаянмен кездесті, деп хабарлайды Ақорданың <a href="https://akorda.kz/kz/prezident-kasym-zhomart-tokaev-sheyh-surur-ben-muhammed-al-nahayanmen-kezdesti-2641049">ресми сайты</a>.Мемлекет басшысы Абу Даби Әмірлігін билеуші әулеттің өкілі, шейх Сурур бен Мұхаммед Әл Нахаянға ілтипат білдіре отырып, бүгінгі кездесу екі елдің ынтымақтастығын нығайту жолдарын талқылауға орайлы сәт екенін атап өтті.<blockquote>– Биыл жыл басында Әмірліктерге жасаған сапарымды және ел басшылығымен өткізген кездесулерімді жылы сезіммен еске аламын. Қол жеткізілген уағдаластықтар екі ел халықтарының игілігі үшін қызмет етіп жатқанын ерекше атам өтемін. Араб Әмірліктері – біз үшін ислам әлеміндегі сенімді әрі басты стратегиялық серіктес. Тәуелсіздіктің алғашқы жылдарынан бастап қолдау көрсетіп келе жатқан бауырлас ел. Мұны қазақ халқы ешқашан ұмытпайды. Әмірліктердің ел көркеюіне қосқан үлесін достық пен тығыз ынтымақтастықтың жарқын бейнесі деп қабылдаймыз. Мүмкіндікті пайдаланып, Араб Әмірліктерінің басшылығына алғысымды білдіремін және Президент шейх Мұхаммед бен Заид Әл Нахаянға ыстық ықыласқа толы сәлемімді жолдаймын, – деді Қасым-Жомарт Тоқаев.</blockquote>Өз кезегінде шейх Сурур бен Мұхаммед Әл Нахаян құрмет көрсеткені үшін Қасым-Жомартқа Тоқаевқа алғыс айтты және Қазақстан мен БАӘ қатынастары қарқынды дамып келе жатқанына назар аударды.<blockquote>– Сіздің қаңтар айында БАӘ-ге жасаған ресми сапарыңыз достас екі ел арасындағы ынтымақтастықты нығайту тұрғысынан табысты болды. Еліңізбен арадағы қарым-қатынасымыздың тарихы тереңде. Бүгінде халықаралық және аймақтық жағдайларға қарамастан, көптеген салада ынтымақтастығымыз нығайып келеді. Бірлескен инвестициялық жобаларымызды жүзеге асыруға барынша қолайлы жағдай жасағаныңыз үшін Сізге және Қазақстан үкіметіне ризашалығымызды білдіреміз, – деді шейх Сурур бен Мұхаммед Әл Нахаян.</blockquote>Кездесу барысында екі елдің сауда-экономика, инвестиция салаларындағы ынтымақтастықты одан әрі нығайту мәселелері қарастырылды. Президент Әмірліктер компанияларының мүмкіндіктері мен тәжірибесі мол екенін айта келіп, оларды ауыл шаруашылығы, энергетика, мұнай химиясы, тау-кен өндірісі, құрылыс, көлік және логистика, қаржы, туризм салаларындағы жобаларға белсенді қатысуға шақырды.Кездесу соңында Президент екі ел арасындағы ынтымақтастықты нығайтуға елеулі үлес қосқаны үшін шейх Сурур бен Мұхаммед Әл Нахаянды I дәрежелі «Достық» орденімен марапаттады.

Қасым-Жомарт Тоқаев шейх Сурур бен Мұхаммед Әл Нахаянмен кездесті

<a href="https://kyzylorda-news.kz/">Kyzylorda-news.kz.</a> ​26 мамыр күні әлеуметтік желілерде қоқыс полигондарына төгілген жарамсыз көкөніс қалдықтары туралы жазба тарады. Осыған қатысты төмендегіні назарларыңызға ұсынамыз, деп жазады «Байқоңыр ӘКК» АҚ басқармасының баспасөз қызметі.Өздеріңізге белгілі, әлеуметтік маңызы бар азық-түлік тауарлары бағасының негізсіз өсуіне жол бермеу үшін тұрақтандыру қорына азық-түлік сатып алынады.Бұл өнімдер арнайы әлеуметтік дүкендер мен ірі сауда үйлері желілеріне жеткізіліп, төмен бағамен сатылады. Сонымен бірге, көшпелі азық-түлік жәрмеңкелерінде өңір тұрғындарына жеңілдетілген бағамен ұсынылады.Дүкендерде жарамсыз болып қалған өнімдер қайтадан қоймаға әкелініп сақталады. Өнім сатып алынып, сақталып, сатылғаннан кейін ол жерде жарамсыз қалдықтардың қалуы – заңды құбылыс. Бұл – тұрақтандыру қорында да, жеке кәсіпкерде де болатын жағдай.Азық-түлікті сақтау кезінде ол өз салмағын жоғалтады. (ресми атауы – табиғи өзін-өзі жоғалту – естественная убыль до 15 %). Оған да заңды нормативтер белгіленген. Қоймадағы тауарлар бұл бағыт бойынша талданып, ай сайын сараптамадан өткізіледі.Көрсеткіштердің барлығы белгіленген нормалар аясында жасалған. Жою алдында, жарамсыз көкөніс тауарлары актіленіп, "Ұлттық сараптау және сертификаттау орталығы" акцонерлік қоғамының сынақ хаттамасы алынады.Әрі қарай, қауіпті тамақ өнімдерін жою жөнінде комиссия құрылып, Қызылорда қалалық санитарлық-эпидемиологиялық бақылау басқармасының, Қызылорда облысы бойынша экология департаментінің, «AMANAT» партиясының, Қызылорда қалалық полиция басқармасы қызметкерлерінің қатысуымен жою жөнінде шешім қабылданады.Жоғарыда атап өткенімдей, жарамсыз өнімдер іріктеліп, қалдықтары арнайы мамандардың қорытындысы бойынша есептен шығарылып, келісім-шартқа сәйкес қоқыс полигонына апарылады.Жарамсыз өнімдер биылғы 25 мамыр күні жойылған еді. Желіде тараған жазбада сол процесс баяндалған.Биыл бағаны тұрақтандыру мақсатында 588,1 тонна картоп, 720 тонна бас пияз, 106 тонна қырыққабат, 133 тонна сәбіз – барлығы 1547,1 тонна көкөніс сатып алынса, оның 9,2 пайызы тасымалдау, сақтау, дүкендерге апару, тұтынушылардың іріктеп сатып алуынан соң жарамсыз болуына байланысты жойылды.Былтыр 568,4 тонна көкөніс тауары сатып алынып, оның 32,7 пайызы, 2021 жылы 1197,4 тонна көкөністің 25 пайызы жойылған. Өздеріңіз байқағандай, биыл көкөніс алдыңғы жылдарға қарағанда 3 есе артық сатып алынғанмен, жою көрсеткіші 3 есе аз. Ол – алынған өнімнің сапасын қадағалағанның, дұрыс сақталуын қамтамасыз еткеннің нәтижесі.Жазбада «өнімдерді адамдарға таратып бермей ме?» деген сұрақ қойылған.Үкіметтің адам өмірі мен денсаулығына, жануарларға, қоршаған ортаға қауіп төндіретін тамақ өнімдерін кәдеге жарату және жою ережесі туралы қаулысы бар. Соған сәйкес жойылған көкөністерді адамдарға немесе үй жануарларына беруге болмайтындығын, олардың адамның өмірі мен денсаулығына зиян келтіретіндігін хабарлаймыз.

Жарамсыз тауарды жоюдың өз заңдылығы бар

Салаға серпін берген

Ауылдағы тындырымды тірлік

<a href="https://kyzylorda-news.kz/">Kyzylorda-news.kz.</a> «Мың бала» – ауылдық жерлердегі мектеп оқушыларының дарыны мен қабілетін қолдауға, дарынды балаларға арналған мамандандырылған мектептерде оқу үшін білімді оқушыларды іріктеуге бағытталған ұлттық ауқымдағы бірегей жоба. Олимпиада тегін өткізіледі, оған 5 немесе 6 сынып оқушылары қатыса алады. Олимпиада жеңімпаздары дарынды балаларға арналған еліміздің үздік мектептеріне оқуға түсуге мүмкіндік алады.&nbsp;Былтыр Ә.Оңалбаев атындағы №117 орта мектептен «Мың бала» ұлттық зияткерлік олимпиадасына Исмайл Шарапат қатысып, жеңімпаз атанды. Қазіргі таңда ол Қызылорда қаласындағы Назарбаев зияткерлік мектебінде білім алуда. Ал биылғы оқу жылында аталған олимпиадаға Нұрдәулет Меркемел қатысты.&nbsp;Олимпиада ІІ кезең бойынша өткізіледі. І кезеңде онлайн форматта тестілеу жүргізіледі. 5 мың оқушының ішінен топ жарған Нұрдәулет ІІ кезеңге жолдама алып, математикалық сауаттылық, қазақ тілі, ағылшын тілі және жаратылыстану бағыты бойынша білімін бағалауға бағытталған тестілеуден 575 балл жинап, 58 орыннан көрінді. Қатарынан екі жыл «Мың бала» олимпиадасында жеңімпаз атанған Нұрдәулет – зерделі зейінділігінің арқасында барлық пәннен жақсы нәтиже көрсетіп, аудандық пәндік олимпиада, ғылыми жобаларға қатысып жүлделі орындарды иеленіп жүрген үздік оқушылардың бірі.&nbsp;<blockquote>«Ата-анам әрдайым білімдінің болашағы жарқын деп айтып отырады. Мен де болашақта білімді, білікті маман болуды армандаймын. Арманым – білікті дәрігер болу. Оның ішінде тіс дәрігері болсам деймін. Болашақта жақсы маман иесі атанып, халықтың денсаулығының жақсаруына өз үлесімді қосқым келеді», – дейді дарынды оқушы.</blockquote>«Нұрдәулет – өте зерек оқушы. Барлық пәндерге қызығушылығы жоғары. Жаңа сабақтарды тез ұғып, өз бетінше тапсырмаларды жылдам орындайды. Әлі ойын жасындағы бала болса да білімге деген құштарлығы басым, алдына &nbsp;қойған мақсаты айқын. Бос уақытында есеп шығарып, әртүрлі кітаптар оқып, ағылшын және орыс тілін меңгеруді алға қойған оқушының арманы асқақ» деген сынып жетекшісі Гүлзат Дабылова Нұрдәулеттің айтар ойы мығым, талапты шәкірт екенін де жасырмады. &nbsp;&nbsp;Нұрдәулеттің әкесі Сәбит Тоғызбай мен анасы Әлия Бакирова &nbsp;– осы мектеп қабырғасында 17 жылдан бері білім беріп, шәкірт тәрбиелеп келе жатқан ұлағатты ұстаздар. Анасы Әлия – биыл математика пәнінен аудандық мұғалімдер арасында өткен «Математикалық регата» сайысында жүлделі ІІ орынды иеленген білікті маман.&nbsp;Әрине ол үшін мұғалім қазіргі заман талабына сай өзінің білім беру ісінде рухани, шығармашылық ізденіспен жұмыс істеп, жаңа тех-нологияларды меңгеріп, білігі мен білімі жоғары ұлағатты тұлға болуы керек. Дәл осы ұстанымдағы мектепте жоғары білімді педагогтар жұмыс жасайды. Білікті маман мен нәтижелі еңбектің арқасында мектеп оқушылары түрлі дәрежедегі олимпиадаларда жеңіске жетіп, аудан абыройын асқақтатып жүр. Ә.Оңалбаев атындағы білім ошағының ұжымы жаңа заман талабына сай, ақыл-парасаты мол, өскелең ұрпақ тәрбиелеуде қажырлы еңбек етуде.

Ұстазы мықтының ұстанымы мықты

<a href="https://kyzylorda-news.kz/">Kyzylorda-news.kz.</a> Өткен айда 2,5 пайыздық жеңілдетілген несиеге қызығушыларды көптеп кездестіретін едік. Қазір бұл тақырыптағы талқылау бәсеңдеп қалған сияқты. Аудандық жұмыспен қамту мен жастар орталығының мамандары жер-жерде халыққа барынша түсіндіріп жүр. Себебі әлі бұл жобаның кеңшілігін тағы 22 адам көруіне мүмкіндік бар. Аудандық жұмыспен қамту орталығы директорының орынбасары Алтынбек Төрехановпен әңгіме барысында 5 миллион теңгеге дейінгі несиені қалай оңай алуға болатынын жайында сіздермен бөліскенді жөн көрдік.– Алтынбек Төреханұлы, көптің қызығушылығын оятқан 2,5 проценттік жеңілдетілген несие бағдарламасы жоспардың бел ортасына жақындап қалды. Жоба басталғалы қанша жерлесіміз қолына қаражат алды?– Шынында да кәсіп бастаушыларды қолдау, жұмыссыз азаматтар санын мейлінше азайтуға бағытталған бағдарламалардың ішінде бұл жобаның алар орны ерекше. Өйткені бұл – осы уақытқа дейін іс бастаушылар үшін барынша тиімді етілген, кәсіптің айналымға шығу уақытын есепке алып, бейімдетіле іске қосылған бағдарлама. Наурыз айынан бері қазалылық 5 талапкер осындай несиені алып үлгерді. Олар бизнес жоспарына сәйкес, 15 миллионға жуық қаржы алды.Облыс бойынша жыл аяғына дейін 257 адамға ақша беріледі деп жоспарланып отыр. Қарыз алған күннен бастап 1 жылдан кейін төлеуге мүмкіндік беретін несиені 27 жерлесіміз алуы тиіс. Ол үшін мал, сауда-саттық пен техника сатып алатынын дәлелдеуі керек.– Бұл жобаның негізгі бағыты жастардың іскерлігін арттыруға бағытталғанын білеміз. Дегенмен 35 жасқа дейінгі азаматтардың арасында әлеуметтік жағдайы әлдеқайда «керемет» жастар да бар. Несиеге нағыз мұқтаж іскерлер көлеңкеде қалып қояды деп ойламайсыз ба?– Осы тұста қайтарымсыз грант қаржысы туралы да айта кеткен жөн болар. Жыл басынан бері 24 адамға 1 миллион 380 мың теңгеден үлестірілді. Әрине, бұл лайықты жоба ұсынып, комиссияның оң шешімін алғаннан кейін жүзеге асып отыр. Желтоқсан айының соңына дейін тағы 114 әлеуметтік жағдай төмен, көпбалалы аналар ойда жүрген арман-мақсаттарын жүзеге асыруға қаржылай көмек алады. Бұл үкіметтің өткен жылдары жастарға, биыл қолынан іс келетін аяулы аналарға ұсынып отырған «қармағы» десек жарасады. Байқасаңыздар, бұл бағдарлама да жастарға арналып іске қосылғанымен, тек жұмыссыз жүргендерді қамтып келеді. 2,5 пайыздық несие де көзделген топтағы азаматтарға жәрдем беруді мақсат етеді.Неге десеңіз, 5 миллион теңгеге дейінгі қаражатты мемлекеттік қызметкерлер мен мекеме, мектеп басшылары ала алмайды. Мұғалім, полицей, дәрігер, тіпті жұмыссыз болсаңыз да жеңілдетілген несиеге құжат жинап, өтініш тапсырсаңыз болады.– Жобаның шарттары жайында толықтырып айта кетсек... Талапкерлер үшін ең қиыны – кепілге қоятын үй табу. Құжат дайындауда басқа да қиындық тудыратын тұстар бар ма?– Жеңілдетілген қарыз, қомақты сомма болғандықтан кепілге мүлік қою – қалыпты дүние. Өзінің атында баспана болмаса да арнайы техникасы, көлігі бар жастар аз емес. Кепілзат ретінді оны да бағалатуға болады. Бұдан бөлек сіздің несие төлей алатыныңызды растайтын, жалпақ тілмен айтсақ «гарант» тұлға болуы шарт. Бұдан кейін жеке кәсіпкерлікпен айналысуды бастағаныңыз туралы мемлекеттік кірістер басқармасынан талон аласыз. Осы тұста жобаның тағы бір шартын еске сала кетейік, кәсіпкер ретінде тіркелгеніне 5 жылдан асып кеткен азаматтар бұл бағдарламаға қатыса алмайды. Тағы бір ескеретін жайт, біздің ауданға бөлінген лимиттің санына қарап, мүмкіндік аз деп ойлауға болмайды. Жыл аяғына дейін тағы қосымша қаржы қаралуы мүмкін. Тіпті болмаса, бизнес жобаңыз мықты болса, келер жылы жеңілдетілген несие үлестіру жалғасады. Оған дейін құжаттарыңызды түгелдеп, осында тексертіп, өзіңіз облысқа апарып тапсырасыз. Қызылордада облыс әкімінің орынбасары Нұрымбет Сақтағанов бастаған комиссия отырысында жобаңызды қорғайсыз. Олар оң шешім шығарса, 1 ай ішінде шотыңызға ақша түсіп, кәсібіңізді бастай берсеңіз болады.– Несиеге құжат қабылдағанда қандай кәсіп түріне басымдылық беріледі? Салаға байланысты қаржысын қайтаруда қандай айырмашылық бар?– Елімізде мал шаруашылығын қолдау ерекше қарқынмен жүреді. Сондықтан бұл бағдарлама да ет-сүтпен, төрт-түлік басын көбейтем деушілердің бетін қайтармайды. Бұдан бөлек техника, сауда-саттық үшін құрал-жабдық сатып алушылар бақ сынап көрсе мархабат. Алдымен жалпыға бірдей тапсыруы тиіс құжаттар жайына тоқталайық.Бірінші бизнес-жоспар жасау керек. Несиеден ниеттілер жеке кәсіпкерлік, жеке және неке кәлігі, зейнетақы түсімі жөніндегі анықтама, салық басқармасында қарызы жоқ екенін дәлелдейтін құжат пен салық декларациясын жинақтайды. Сонымен бірге, банкте есудалық қарыжы жоқ, 20 сандық шоты ашылған анықтамасын қоса тапсырады. Кепіл затты тігуге кепілгер мен талапкердің жұбайы немесе зайыбының келісімін алу да міндетті. Үйді немесе техниканы бағалатып, несие тарихы туралы анықтама да тізімге енуі тиіс. Енді тек мал сатып алатын азаматтар жергілікті мал дәрігерінен төрт-түлігі бар немесе жоғы жөнінде және жергілікті елді мекен бойынша эпизотиялық ахуалы таза екенін дәлелдейтін анықтама алуы міндетті. Мал сататын сатушының ИСЖ анықтамасын құжат тапсырғанда бірге өткізуіңіз керек. Бизнес-жоспарда сатып алатын мал басын 40 мың теңгеден бастап, 800 мың теңге тұратын түйеге дейін енгізуге болады.Сонымен қатар, техника сатып алуды көздейтін тұлғалар керекті техниканың техпаспортының көшірмесін алдыртады. Ал сауда-саттықпен айналысуға ниеттілер негізгі құжаттарға сатып алынатын құрал-жабдыққа коммерциялық ұсыныс немесе сатушымен алдын-ала келісім жасалған қағазды қосып тапсырады. Мал шаруашылығымен несие алғандар 7, қалған екі бағыт бойынша жобасы мақұлданғандар 5 жыл ішінде тиісті қарызды қайтарып болуы керек. Сондай-ақ несиенің 1 жыл каникулы барын қаперде ұстаған ұтады.– Мақұлданған жобаның қаржысын алғандар, несиені басқа мақсатта жұмсауына тосқауыл қою мүмкін бе? Әйтпесе, Үкіметтің кәсіпкерлікті дамытуға, жұмыссыздықты азайтуға бағытталған жобасы тиімсіз болып қалады емес пе?– Шынында да, экономиканы дамытып, елдің әлеуметтік жағдайын жақсартуды көздейтін мұндай бастамаларды мәресіне жеткізу маңызды. Десек те, бұл бағыттағы жұмыстар біздің құзіретімізге кірмейді. Есесіне, облыс орталығындағы «Аграрлық несие корпорациясының» мамандары мақсатсыз жұмсалған несиеге мониторинг жүрпгізіп тұрады. Егер бизнес-жоспарға сәйкесқаржы жұмсалмаса, болмаса бағытын өзгертсе, кәсіпкер мемлекеттен алған қаржыны толқытай қайтарады. Бұдан кейін мұндай ұтымды бағдарламаларға қатыса алмауы да бек мүмкін.– Сұхбатыңызға рақмет!

Алтынбек Төреханов: Талапты жаста таңдау көп

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласы әкімінің орынбасары Ғалымжан Еркебайдың төрағалығымен жолаушылар тасымалы қызметінің сапасын жақсарту мақсатында &nbsp;құрылған жұмысшы топтың отырысы өтті.​Жұмысшы топ жиын барысында ең алдымен үлкен сыйымдылықтағы қоғамдық көліктерге сараланған тарифті енгізу мәселесін талқылады. Сараланған тарифтің артықшылығы жолаушылар қоғамдық көлік қызметіне қолма-қол 130 теңге, электронды түрде 85 теңге көлемінде төлем жасайды. Қазірдің өзінде жолаушылардың 91 пайызы электронды түрде төлем жасаса, қалған 9 пайызы ғана қолма-қол тәсілге жүгінеді. ​Жолаушылардың жаппай электронды түрде төлем жасауы – көлеңкелі кәсіптің алдын алудың бірден-бір жолы, қаржы ағындарының ашықтығын қамтамасыз етіп, автопарктің кірісін арттыруға ықпалын тигізеді.​Бұдан бөлек, жиында халықтың әлеуметтік осал топтарына, оқушыларға, студенттерге, зейнеткерлерге жеңілдік қарастыру бойынша ұсыныстар енгізілді.​Айта кету керек, аталған жұмысшы топтың құрамында облыстық және қалалық әкімдік өкілдері, құқық қорғау органдарының қызметкерлері, жолаушылар тасымалы саласындағы мамандар, қоғам белсенділері және жастар бар.

Ғалымжан Еркебай: Жолаушыларға сапалы қызмет көрсетілуі керек

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» МК КЕАҚ халыққа қызмет көрсету орталығында Қазақстан Республикасы Сыбайлас жемқорлыққа қарсы іс-қимыл агенттігінің бастамасымен халықтың құқықтық сауаттылығын арттыру мақсатында «Халық заңгері» бірыңғай республикалық акциясы өткізілді.Шараға облыстық денсаулық сақтау басқармасының басшысы Искаков Олжас Ермекұлы және жергілікті атқарушы және құқық қорғау органдары, орталық мемлекеттік органдардың, облыстық департаменттерінің басшылары, сонымен қатар, жеке нотариустар, сот орындаушылар, заңгерлер мен адвокаттардан құралған 40-тан астам кеңесші маман қатысты.Қабылдауда жалпы 70-ке жуық облыс тұрғындарының көкейдегі сұрақтарына тиісті кеңестер берілді.

Басқарма басшысы акция аясында тұрғындармен кездесті

<a href="https://kyzylorda-news.kz/">Kyzylorda-news.kz.</a>&nbsp; &nbsp;Қызылордада ерекше жәрмеңке өтті. «Қызылорда қалалық мүгедектер қоғамы» ҚБ-нің ұйымдастыруымен өткен мүгедектігі бар тұлғалардың қолөнер көрмесіне 20 қолөнерші қатысып, өз бұйымдарын халыққа ұсынды.Жәрмеңкеге осы азаматтардың қолынан шыққан этно стильде киім, аяқ киім және әшекей бұйымдар, қолдан жасалған кілемдер, кәдесыйлар, ағаш және керамикалық ыдыс-аяқтар, заманауи күміс және бедерлі әшекейлер, тамаша сөмкелер мен қолдан жасалған ойыншықтар, тастан жасалған қазақ белгілері бар әшекейлер және тағы басқа бұйымдар қойылған. Мұның өзі өмірге құштар жандар үшін үлкен қолдау екені сөзсіз. Бұл – мүмкіндігі шектеулі жандардың шексіз мүмкіндіктерінің айқын көрінісі.<blockquote>Жәрмеңкенің басты мақсаты рухани мұраны сақтауға, оның мәдениетін және салт-дәстүрлерін сақтауға, Қызылордада қолөнер шеберлігін дамытуға және оны жастар арасында танымал етуге атсалысу болып табылады. Қолөнершілермен тікелей байланыс орнату, халық қолөнерін жаңғырту және дамыту, қолөнершілерді қолдау біздің міндетіміз, – дейді қолөнерші Әсия Сарықұлова.</blockquote>Осындай ізгі шаралар арқылы адамдар арасында мейірімділік артады. Алдағы уақытта да осындай қайырымдылық шаралар жүйелі түрде өткізіліп тұратын болады.

Қызылордада ерекше жандардың қолөнер жәрмеңкесі өтті

<a href="https://kyzylorda-news.kz/">Kyzylorda-news.kz.</a> Қызылорда облыстық қоғамдық кеңес мүшелері С.Нұртазаев, Е.Өмірсеріков және Қармақшы ауданық қоғамдық кеңесінің төрағасы Ә.Құлдүйсенов, аудандық кәсіпкерлік, өнеркәсіп және туризм, ауылшаруашылығы мен жер қатынастары бөлімдерінің басшыларымен қызметкерлері ауданға қарасты бірнеше ауылдық округінің іскер азаматтарымен, ауыл ақсақалдарымен кездесті.Кездесудің мақсаты - халықтың әл-ауқатын жақсарту бойынша қазіргі әлеуметтік экономикалық жағдайына және әлеуетіне талдау жасау. Талдау нәтижелерімен елді мекендерді дамыту бағытын айқындап, облыс әкіміне шешілу жолдарын нақты ақпаратпен ұсынатын болады.Кездесу барысында «Жаңажол» ЖШС-ның, «Айман» ШҚ-ның және Төребай би ауылдық округінің жеке кәсіпкер Жұлдызай Достанованың шығарған өнімдерімен танысты.

Облыстық қоғамдық кеңес мүшелері Қармақшыда болды

<a href="https://kyzylorda-news.kz/">Kyzylorda-news.kz.</a> Бүгін елдегі үш қалада ауа сапасы нашарлайды, деп хабарлайды «Қазгидромет».Болжам бойынша, 27 мамырда Петропавл, Ақтөбе және Алматы қалаларында қолайсыз метеорологиялық жағдайлар күтіледі.Қолайсыз метеорологиялық жағдайлар – атмосфералық ауаның беткі қабатында зиянды (ластаушы) заттардың шоғырлануына ықпал ететін қысқамерзімді метеофакторлардың (тымық ауа райы, жеңіл жел, тұман, инверсия) жиынтығы.Қолайсыз метеорологиялық жағдай кезінде елді мекендердегі атмосфералық ауаның сапасы нашарлауы ықтимал. Ал Қызылорда облысында күн жылы, 31 градусты көрсетіп тұр.

Архив