<a href="https://kyzylorda-news.kz/">Kyzylorda-news.kz</a> Жаңақорғандағы екі келешек мектептің бірі – Жаңарықтағы №167 білім ордасы. Заманауи жабдықтармен жабдықталған білім ошағында оқушылардың жан-жақты білім алуына үлкен мүмкіндіктер қарастырылған. Теориялық қана емес, практикалық негізге бейімделген мектептің бұған дейінгі жетістігі де аз емес еді. Енді шәкірттер білім бәсекесінде көштің алдыңғы қатарынан көрініп келеді. Бұл ең алдымен ұстаз еңбегінің жемісі десек болады. Ширек ғасырдан бері ұстаздық ететін Ақмарал Мұхамедханқызының шәкірттерінің бағындырған белесі бір төбе. Біз бүгін ұстаз өнегесіне тоқталып, маңдай терінің жемісі туралы жазуды жөн көрдік.Қаншама мемлекет және қоғам қайраткерлері білім алып, қанат қақққан бұл ыстық ұядан әлі талай дарынды, талантты балалар шығатынына сенімдіміз. Өйткені мұнда Ақмарал апай сынды білікті мұғалімдер аз емес. Педагог-зерттеуші Ақмарал Қаржаубаеваның бір ғана жетістігін тілге тиек етсек, оның авторлық бағдарламасы өңірдегі үш бірдей ауданға таратылды. Яғни, сабақ беру әдіс-тәсілінің қыр-сырын меңгерген ұстаздың озық тәжірибесі өзге ұстаздарға үлгі, әрі оқулық ретінде ұсынылған.Әңгімемізді ұстаздың еңбек жолынан бастайық. Қорқыт ата атындағы Қызылорда мемлекеттік университетін бітіргеннен кейін кейіпкеріміз еңбек жолын облыс орталығындағы No235 мектепте бастайды. Жаңарық ауылына келін болып түсіп, ұстаздық жолын осында жалғастырады. Екі жыл Қыркеңседегі №213 мектепте ұстаздық етеді.<blockquote>– Әрбір мамандық иесі өзінің жұмысын шынайы сүйгенде ғана білікті ұстаз, қабілетті оқытушы, талантты тәрбиеші бола алады. Мен жастайымнан ұстаз болуды мұрат еткен жанмын. Өзімнің атам мен әпкем осы салада еңбек сіңірген жандар. Сондықтан ұстаздықты текпен келген дей аламын, – деп бастады ол әңгімесін.</blockquote>Ұстаздың жеткен жетістігі бір төбе. 2010 жылы «Аудандағы үздік сынып жетекші» атанды. Одан бөлек, облыс әкімі және салалық кәсіподақтан алған марапаттары жетерлік. Оның басты ерекшелігі – үш тілді еркін меңгерген маман. Қазір ол биология пәнін ағылшын тілінде оқытады. Бұл пәннен дәріс алатын оқушыға барлық жағдай жасалынғанын көрдік. Цифрландырылған зертханалық кабинеттер материалдық-техникалық құралдармен толық қамтылған. Орыстың белгілі педагогы Антон Макаренко: «Адамды тәрбиелеу – демек оның ертеңгі қуанышқа ие болатын келешек жолын тәрбиелеу» дейді. Біздің кейіпкеріміз де қаншама шәкірттің ертеңіне жол салды.Оқушыларының көбі медицина саласында тер төгіп келеді екен. Олардың қатарында Мерей Жұмаш, Жансая және Самал Әшімовалардың есімін бөліп-жарып атау керек. Түркістан шаһарында тұратын дәрігер-терапевт Тәттігүл Тұрмановны да айтуға болады. Әсіресе, ҰБТ кезінде шәкірттері жоғары балл жинап, көбі «Алтын белгі» иегері атанып келеді. Басқа да шәкірттерінің жетістіктері бір төбе.<blockquote>– Ізімді жалғап, ұстаз боламын деген шәкірттерім аз емес. Солардың бірі – Қалдыбай Жүсіпбек. Ол Қазақ ұлттық аграрлық университетінде білім алуда. Химия пәнінен де оқушыларым ҰБТ-дан жоғары балл жинап, жоғары оқу орындарына түсіп, қазір әр салада қызмет атқаруда. Ветеринария саласында Әуелбек Бағдат, Жалғас Арынғазиев, Жұмаш Шапағат сынды шәкірттерім оқиды. Сондай-ақ Астана, Алматы және Ақтөбе медициналық университетінде болашақ дәрігер шәкірттерім бар, – деп мақтанышпен жеткізді.</blockquote>«Шеше көрген тон пішер» демекші, өзінің қызы да осы саланың тізгінін ұстауға бет бұрыпты. Ол тек білім саласында ғана емес, өзін қоғамның белсендісі ретінде де көрсетіп келеді екен. 2011-2015 жылдары әлеуметтік педагог өз жұмысын абыройлы атқарды. Яғни қайырымдылық акцияларын жиі ұйымдастырып, оқушылардың алаңсыз білім алуына қол үшін беретін азаматтардың басын біріктірді.Қорыта айтқанда, Ұланбек Бейімбетов басқаратын келешек мектебінің келешегі зор деп білеміз. Бүгінгі көкжиегінің өзі бір тарих, енді заманауи ұстаздардың бұдан да биіктен көріне беретіні анық. Сол жас ұстаздарға жол сілтеп, жөн көрсете алатын қабілет-қарымы жоғары Ақмарал Мұхамедханқызы секілді педагогтер тұрғанда мектеп шәкірттерінен күтеріміз көп.Әлібек ЖАРЫҚБАЕВ

Шәкірт жеңісі – ұстаз жемісі

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаевтың тапсырмасымен іске асқан «Жайлы мектеп» ұлттық жобасы өңірдің білім саласына жаңа леп алып келуде. Жоба аясында салынған заманауи мектептер тек білім беруді ғана емес, оқушылардың дамуына жағдай жасау мақсатында да ерекше көңіл бөлінген. Әрбір мектеп құрылысында экологиялық талаптар мен оқушылардың қауіпсіздігі басты назарға алынған.&nbsp;&nbsp;Еліміздегі білім жүйесіне тың серпіліс әкеліп, білім беру ісін түбегейлі өзгертетін бұл жоба Президенттің 2022 жылғы халыққа Жолдауында көтерілген болатын. «Жайлы мектеп» салу жобасының басты мақсаты - кез келген өңірдегі, кез келген әлеуметтік топтағы балаға сапалы білімді тең деңгейде қолжетімді ету. Бұған қоса, үш ауысымды оқытуды жою, апатты мектептерді алмастыру, оқушыға орын тапшылығын болдырмау еді.&nbsp;Расымен, республика бойынша 460 мыңнан астам оқу-шының болашағын айқындайтын оқу ордасы болған «Келешек мек-тептердің» жартысына жуығы ауыл¬дарда салынды. Бүгінде өңірімізде «Жайлы мектеп» ұлттық жобасы аясында 6900 орындық 10 мектеп ғимараты ел игілігіне берілді. Соның ішінде Арал қаласы мен Сексеуіл кентінде бой көтерген №292 және №294 «Келешек мектептері» – шын мәнінде болашаққа салынған берік көпір деуге негіз бар. Ауданда ашылған 300 орындық заманауи талапқа сай келетін сәулетті ғимараттардың іші өте кең, сыныптары жап-жарық. Жаңа мектептер зертханалық кабинеттерімен және жаңа технологиялық жабдықтарымен де ерекшеленеді. Әрбір баланың сапалы білім алып, таным көкжиегін кеңейтуіне мол мүмкіндік жасалған. Әр сыныптың пән бойынша қажетті құрал-жабдықтармен жабдықталуы оқушылардың сабаққа деген ынтасын ашып, ғылым мен білімге деген құлшынысын арттырары анық.&nbsp;Игілікті жоба іске асқалы Арал ауданындағы үш ауысымдық мектеп мәселесі оң шешімін тауып отыр. Бұл да өз кезегінде білім беру ісінің жүйеленіп, сапасының артуына ықпалын тигізуде.&nbsp;Ауданда ұлттық жоба аясында бой көтерген мектептерден бөлек, шалғай елдімекендерде де жаңа білім ошақтары салынған. Мәселен, ауданға қарасты Ақшатау ауылындағы оқушылар биыл жаңа да жылы білім ордасында оқыды. Жоба құны 250 миллион теңге болатын 60 оқушыға арналған мектеп демеушілердің қолдауымен салынған. Осылайша, көп жылдан бері ескі әрі тар ғимаратта оқып келген оқушылар су жаңа мектеп табалдырығын аттады. Енді ақшатаулық балалар кең, жарық сыныптарда алаңсыз білім алып жүр.Мұндай қуаныш Тоқабай елді мекенінде де жүзеге асқан. Ауыл халықының көптен күткен қуанышты сәт туды. Мұнда 100 орындық жаңа №248 орта мектебі пайдалануға берілді. Жаңа нысан тек сәулетімен ғана емес, толық қамтылған материалдық-техникалық базасымен де ерекшеленеді. Балаларға керек құрал-жабдықтың барлығы толық қамтамасыз етілген. Бұл білім ошағы ауылда білім берудің қаладағы оқыту сапасымен бірдей болуына мүмкіндік беріп отыр. &nbsp;Одан бөлек, ғасырдан астам тарихы бар №14 мектептің бастауыш сыныптары орналасқан ғимараты да күрделі жөндеуден өткен.&nbsp;Білім саласын дамыту, оқушылардың сапалы білім алып, ұстаздардың алаңсыз сабақ беруі үшін мемлекет тарапынан барынша қолдау көрсетілуде. Ал Аралдағы білім саласындағы құрылыс жұмыстары өз жемісін беруде. Тек жаңа білім орындарын салып қана қоймай, ескірген мектептерді қайта жаңғырту жұмыстары да қолға алынған. Нәтижесінде №62, №19, №262, №263 және №177 мектептер ағымдағы жөндеуден өтіп, жаңаша кейіпке енген. Үнемделген қаржыны тиімді пайдаланудың арқа-сында олардың шатыры жаңартылып, қабырғалары әрленген, терезелері ауыстырылыпты. Енді аралдық өрендер жарық та жылы сыныпта әрі қауіпсіз ортада алаңсыз білім ала алады. Бұл да мемлекеттің балаларға деген үлкен қамқорлығы деуге болатын шығар.&nbsp;Бүгінде ауданға қарасты білім ошағында барлығы – 17 487 өрен білім алуда. Аудан мектептері кең жолақты ғаламтор желісімен толықтай 100 процент қамтылған. Оның ішінде алыс шалғай елді мекендерде орналасқан 16 білім ордасы «СтарЛинк» желісіне қосылған. Жалпы қазіргі таңда білім аламын деген оқушыға барлық мүмкіндік қарастырылған. Балалардың оқуынан бөлек, шығармашылық қабілетін арттыруға да басымдық берілген. Бұл ретте &nbsp;аудан орталығындағы №262 мектеп-гимназиясында оқушыларды тігіншілік пен аспаздықты үйрететін оқу-өндірістік шеберханалары ашылған. Сондай-ақ бұл білім беру мекемесі &nbsp;АИТК, АКК және Қызылорда қаласындағы &nbsp;№278 IT мектебімен меморондумға отырған.&nbsp;Бұдан бөлек &nbsp;аудандағы 1-10 сынып аралығындағы &nbsp;16448 бала сауықтырумен, мектепішілік, мектептен тыс лагерлермен, үйірмелермен, экскурсиялар және көгалдандандыру жұмысымен қамтылған. Оның ішінде, «Қамбаш» олимпиадалар және қосымша білім беру орталығына жалпыға бірдей міндетті оқу қоры есебінен аз қамтылған отбасынан 715 бала, кәсіподақ есебінен 50 бала барлығы 765 бала жіберілген. &nbsp; Әлеуметтік жағынан қорғалмаған отбасы балаларына қолдау көрсету мақсатында дәстүрге айналған «Мектепке жол» республикалық акциясы аясында 1196 балаға 14 миллион 816 мың &nbsp;теңгеге мектепке қажетті сөмке, оқу формасы, оқу құралдарынан көмектер жасалған.&nbsp;Білім мен ғылымды дамыту үшін алдымен оқушыға қолайлы жағдай жасалуы керек-ақ. Алдағы уақытта да білім саласында мұндайигі істер жалғасын таппақ. Жақында шалғайдағы Мергенсай ауылында 100 орындық жаңа мектебін пайдалануға беру жоспарланып отыр. Бұл аудандағы білім беру жүйесінің тұрақты дамуының жалғасып келе жатқанын айқын аңғартса керек. Мұндай жайлы білім ордаларында сауат ашқан әрбір оқушының болашақта ел үмітін ақтап, халықтың қамын күйттер білімді де саналы ұрпақ қалыптасар деген сенім бар.&nbsp;

Биыл аралдық өрендер заманауи мектептерде білім алуда

<a href="https://kyzylorda-news.kz/">Kyzylorda-news.kz</a>&nbsp; Былтыр Қызылорда облысында 13 білім беру ұйымы ашылды. «Келешек мектептері» ұлттық жобасы аясында 10 жаңа мектеп салынып, пайдалануға берілді. 2023 жылдан бастап 9 мектеп жанынан қосымша ғимарат бой көтерді. Нәтижесінде өңірде үш ауысымдық мектептер мәселесі түбегейлі шешімін тапты, деді өңір әкімі Нұрлыбек Нәлібаев.<blockquote>«Соңғы үш жылда 5 млрд 300 млн теңгеге 15 мектептің ғимараттарына күрделі жөндеу жұмыстары жүргізілді. Биыл бұл мақсатқа облыстық бюджеттен 2 млрд 400 млн теңге бөлініп, 9 мектеп қайта жаңғыртудан өтті. Алдағы үш жылда өңіріміздегі 51 мектеп күрделі жөндеуден өтетін болады», - деді спикер ОКҚ алаңында өткен баспасөз конференциясында.</blockquote>Сонымен қатар, Арал ауданы Тоқабай ауылындағы апаттық мектептің орнына жаңадан білім ордасы салынды. «Білімді қолдау қоры» арқылы 2 млрд 333 млн теңгеге Мергенсай ауылында салынған 150 орындық мектеп жақын күндері пайдалануға беріледі. Аталған қор есебінен 8 млрд 400 млн теңгеге физика-математика бағытындағы «Білім-инновация» лицей-интернаты салынды.

Қызылорда облысында алдағы үш жылда 51 мектеп күрделі жөндеуден өтеді 

<a href="https://kyzylorda-news.kz/">Kyzylorda-news.kz</a> Қызылорда облысында ауыл мектебінде оқитын жас өнертапқыш ақпараттық технология саласында үлкен жетістікке қол жеткізді. Сырдария ауданына қарасты Шаған ауылындағы №37 мектеп-лицейдің 7-сынып оқушысы Нұрислам Айбекұлы ұялы телефондарға арналған Extrnos атты қауіпсіз операциялық жүйені ойлап тауып, облыстық деңгейде үздік атанды.Жас өнертапқыш бұл жобасын облыс орталығында өткен «InnoFest Qyzylorda» инновациялық IT жобалар фестивалінде таныстырып, бағдарламалық жасақтама бағыты бойынша І орын иеленді. Жобаны әзірлеу барысында оған №37 мектеп-лицейдің информатика пәнінің мұғалімі Гүлзат Ыбырай жетекшілік еткен.Android пен iOS-қа балама жүйеНұрисламның айтуынша, Extrnos жүйесі қауіпсіздік пен өнімділік тұрғысынан қазіргі кең таралған Android және iOS жүйелерінен кем түспейді, тіпті кей тұстарда басым түседі.«Мен ағылшын программисі Терри Дэвистің 64-биттік операциялық жүйесін зерттедім. Соған ұқсас, бірақ ұялы телефонға бейімделген жаңа жүйе жасағым келді. Нәтижесінде Extrnos жобасы пайда болды. Оған шамамен 7 ай уақытым кетті. Бұл жүйе телефонды хакерлік шабуылдардан қорғайды, құрылғының жылдам жұмыс істеуіне және қатып қалмауына мүмкіндік береді», – дейді жас өнертапқыш.Extrnos — қауіпсіздікке басымдық беретін, жүйелік ресурстарды тиімді пайдаланатын операциялық жүйе. Жоба әсіресе жеке деректердің қорғалуына және тұрақты жұмыс істеуге бағытталған.Информатикаға қызығушылық ерте басталғанНұрисламның информатикаға деген қызығушылығы 7 жасынан басталған. Оның бұл қабілетін байқаған ұстаздары оқушыны түрлі пән олимпиадалары мен IT байқауларға қатысуға бағыттап отырған. Сонымен қатар, ол Қызылорда стартаптар және IT өңірлік хабының жетекшісі Жанарыс Түбекбаевтан білім алып, заманауи технологиялардың қыр-сырын меңгерген.Жоба жасау барысында ең күрделі кезеңдердің бірі — Bootloader (операциялық жүйені іске қосу тетігі) әзірлеу болған.Жоба әлі де дамытыладыҚазіргі таңда Extrnos жүйесі толық аяқталмаған. Оны орнату үшін құрылғыда Android жүйесі, Raspberry Pi қолдауы және ARM64 архитектурасы болуы қажет. Орнату жұмыстары компьютер арқылы жүзеге асырылады.«Жоба аяқсыз қалмайды. Әлі де жетілдіретін тұстары бар. Толыққанды нұсқасын шығару үшін уақыт керек», – дейді Нұрислам.Жас өнертапқыштың бұл жетістігі — ауыл оқушыларының да жоғары технологиялық жобалар жасап, үлкен деңгейге шыға алатынын дәлелдейді. Extrnos жобасы алдағы уақытта Қазақстандағы отандық IT өнімдердің қатарын толықтыруы әбден мүмкін.<img src="https://knadmin.beoblood.kz/uploads/1_yzylordada_auyl_o_ushysy_yaly_telefon_a_arnal_an_auipsiz_zh_je_ojlap_tapty_6f5ef1a829.webp" alt="1Қызылордада ауыл оқушысы ұялы телефонға арналған қауіпсіз жүйе ойлап тапты.webp">

Қызылордада ауыл оқушысы ұялы телефонға арналған қауіпсіз жүйе ойлап тапты

<a href="https://kyzylorda-news.kz/">Kyzylorda-news.kz</a> Бүгінгі қоғамда еңбек нарығына қажетті мамандарды оқытып шығаруда әлеуеті нық қалыптаса түскен өңіріміздегі бірден-бір кәсіби- техникалық оқу орны – Жаңақорған агротехникалық колледжі.&nbsp;Аталған оқу орнында «Жұмысшы мамандықтардың қоғамдағы ролі мен маңызы» деген тақырыпта облыстық семинар болып өтті. Семинар жұмысына облыстық оқу орталығы кәсіптік білім беру бөлімінің басшылығы бастап келген өкілдер қатарында аудандардағы техникалық колледждердің оқу ісі жөніндегі меңгерушілері мен жетекші мамандары және өз өңіріміздегі өндіріс орнының жауапты қызметкерлері қатысып, жұмысшы мамандықтардың беделін арттыру, техникалық және кәсіптік білім беру жүйесі реформасын іске асыру бағытында ортақ міндеттерді таразылады.Алдымен Жаңақорған аграрлы-техникалық колледжінің директоры Тәттімбет Тұрғалиұлы сөз алып, оқу орнының тыныс-тіршілігімен таныстырды. 65 жыл тарихы бар білім ордасы алғашқы жылдары ауыл шаруашылығына қажетті машинист-тракторист мамандықтарын ғана дайындап келсе, қазіргі уақытта аграрлы-техникалық бағытта 19 мамандық, 24 біліктілік бойынша мамандар даярланатынын айтты. Оқу орнында 2 ақпараттық технология кабинеті, 2 шеберхана, 4 зертхана, 27 интерактивті тақтамен қамтылған оқу кабинеті студенттердің жан-жақты кәсіби білім алуына негіз қалап отыр. Колледждің 200 орындық акт залы, 160 орындық асханасы, 100 орындық жатақханасы бар. Түлектердің сапалы білім алып, тәжірибелік дағдыларын шыңдау үшін оқу орны басшылығы өңіріміздегі кәсіпорындар, шағын және орта кәсіпкерлер, ірі қожалықтармен меморандумға отырып, колледж білімгерлерінің өндірістік тәжірибеден өтуіне, жұмысқа орналасуына және дуальды оқу жүйесін жетілдіруге үлкен мүмкіндік туғызып отыр. Бүгінгі таңда колледж студенттерінің 134-і аудан көлемінде дуальды оқыту бағыты бойынша жергілікті жердегі өндіріс пен кәсіпорындарда іс- тәжірибеден өтуге мүмкіндігі барын білдік. Бұл нақты өндіріспен білімнің өзара байланысын көрсетеді.Семинарда облыстық оқу орталығы кәсіптік білім беру орталығының әдіскері Ұлан Жетібайұлы сөз алып, бүгінгі жиынның мән-маңызына тоқталды. Одан әрі жиынға арнайы шақырылған ардагер-ұстаздар қатарында Мадияр Ахметов оқу орнының бүгінгі әлеуетін тиімді пайдану бағытында ақыл-кеңестерін берді. 65 жылдық тарихы бар оқу орнынан 17 мектеп директоры, 12 ауыл әкімі шыққанын, кезінде Қазақ ССР Жоғарғы кеңесінің депутаты болған Әзия Қыстаубаеваның осы оқу орнының түлегі екеніне тоқталды. Сондай- ақ осы оқу ошағында білім алғандар қатарында 5 бірдей ғылым докторы, 11 ғылым кандидаты, басқа да мемлекеттік марапаттарға ие азаматтар бар екенін тілге тиек етті. Семинардың келесі бөлімінде қонақтар оқу орнында «Жас маман» жобасы аясында бес жылдан бері тиімді жүзеге асырылып келе жатқан заманау технологиялардың кәсіптік білімге бағдарлау процестерімен танысты. Нақтылап айтқанда, колледжде дәнекерлеу ісі және автомобиль көлігіне техникалық қызмет көрсету, жөндеу және пайдалану мамандықтары заманауи ақпараттық құрылғылармен оқытылуда. Мұның барлығы ғылыми-зерттеу тәжірибесін дамытып, инновациялық білім ортасын қалыптастыруға мықты тетік қалыптастырып келеді.Автокөліктерге техникалық қызмет көрсету мамандығы бойынша құрал-жабдықтармен таныстырған оқытушы Жасұлан Мұстапаев интерактивті тақтада жасанды интеллект арқылы автокөліктің құрылысын түсіндірді. Орталықта арнайы қойылған автокөлік макетінде көлікті басқару ережелерін бақылайтын камера бар екенін, В,С категориясынан оқушылар куәлікті соңғы курста осы жерде сынақ тапсырып алатынын айтты. Осындай ізденістердің нәтижесі болу керек, колледждің ұстаздары мен білімгерлері түрлі деңгейде өтіп жатқан білім мен кәсіби шеберлік байқауларында үнемі алдыңғы орыннан табылып жүр. Оның ішінде сандық бағдарламалық басқару, аспаз ісі, дәнекерлеу ісі, автомобильді жөндеу және техникалық қызмет бойынша колледж ұстаздары мен студенттері үнемі жүлделі орындарды иеленіп келеді. Оқу орнында 3 сарапшы, 15 модератор педагог, 48 магниттік педагог бар екендігі белгілі. Білім саласындағы көрсеткіштерімен қатар облыстық және республикалық техникалық және кәсіптік білім беру ұйымдарының арасында дәстүрлі волейболдан ұйымдастырылған жарыстарда ерлер арасында 15 дүркін, қыздар арасында 7 дүркін чемпион атануы да үлкен еңбектің нәтижесі.Өңірдің экономикалық дамуына үлес қосып, кәсіптік деңгейі жоғары мамандар даярлауда мемлекет қолдауын нәтижелі жетістіктерімен дәлелдеп келе жатқан оқу орны ұжымының бірлігі мен ынтымағы бүгінгідей ауқымды шарада айқын көрініс берді. Жиынға арнайы келіп, өздерінің қолдауын білдірген аймағымыздағы «СКЗ-U» күкірт қышқылы зауыты, «Қызылқұм» ЖШС, «Жаңақорған транзит» ЖШС мекемелерінің басшылары сөз алып, өндірістік мекемеде еңбек ететін мамандардың 80 пайызы жергілікті тұрғындардың өкілі екенін жеткізді. Тіпті бүгінде мекеменің инженерлері, цех басшылары, ұжым директорлары кезінде еңбек жолын операторлықтан бастаған жас мамандар, тәжірибеден өтіп, білімін үздіксіз жетілдірудің арқасында осындай дәрежеге қол жеткізіп отырғанын айтып, жас талаптырды жақсы оқуға қанаттандырды. Осы оқу орнында жұмысшы мамандығын игеріп шыққан түлектерідің келешек толық маман иесі болып шығуына мол мүмкіндік бар екенін айтып, мотивация берді.&nbsp;Семинардың келесі бөлімінде әлеуметтік серіктестіктермен меморандум рәсімі өтіп колледж басшылығы мен өңіріміздегі өндіріс мекемелері – «Байкен – U» ЖШС, «Қызылқұм» ЖШС, «СКЗ-U» ЖШС , «Шалқия Цинк ЛТД» ЖШС мекемелері басшылары келісімшартқа қол қойды. Осы келісімдердің бастамасы есебінде колледждің бітірушісі Диас Абдуллаевқа дәнекерлеу ісі мамандығы бойынша «СКЗ- U» ЖШС-на жолдама табыс етілсе, «Қызылқұм» ЖШС-на осы мамандық иегері Нұрперзент Оймауытов жұмысқа қабылданды. «Жаңақорған транзит» ЖШС басшысы Сансызбай Махметжан Бәкірұлы мен колледж директоры Тәттімбет Абдраймов өзара меморандумға қол қойды. Бұл мекемеге автомобиль көлігін жөндеу және пайдалану факультетінің бітірушісі Бекахмет Нұрғазы жолдама алды. Сондай-ақ «Шалқия Цинк ЛТД» ЖШС мекемесіне пайдаланған қазбаларды кен орындарын жер астында өңдеу мамандығы бойынша Мейірхан Даниялға жолдама берілді.Осы күні «Агросервис Жаңақорған» ЖШС басшылығымен меморандумға отыру рәсімі өтіп, колледж бітірушісі Оспан Ерсайын осы мекемеге ветеринария мамандығы бойынша жолдама алды. Жиын соңы оқу орны өнерпаздарының концертіне жалғасты.<img src="https://knadmin.beoblood.kz/uploads/Whats_App_Image_2025_12_22_at_11_06_33_fde66cb2c2.jpeg" alt="WhatsApp Image 2025-12-22 at 11.06.33.jpeg">

Техникалық және кәсіптік білім беру жүйесі реформасын іске асыру барысы қаралды

<a href="https://kyzylorda-news.kz/">Kyzylorda-news.kz</a>&nbsp; Шиелі кенті «Арман» мәдениет үйінде аудан әкімі Айтбай Жандарбековтың қатысуымен Мемлекет басшысы Қасым-Жомарт Кемелұлы Тоқаевтың 2025 жылды «Жұмысшы мамандықтар жылы» деп жариялауына және Президент бастамасымен жүзеге асырылып жатқан «Таза Қазақстан» республикалық акциясы аясында салтанатты марапаттау шарасы өтті.<img src="https://knadmin.beoblood.kz/uploads/Shielide_e_bek_adamdaryna_rmet_k_rsetildi_1_f5567e6e63.jpg" alt="Шиеліде еңбек адамдарына құрмет көрсетілді 1.jpg">Шараның басты мақсаты қарапайым еңбек адамдарының қоғамдағы мәртебесін арттыру, еңбегін лайықты бағалау және Киелі Шиелі ауданында таза, жайлы әрі қауіпсіз орта қалыптастыру жолында аянбай еңбек етіп жүрген азаматтарды құрметтеу болып табылды.Салтанатты жиында аудан әкімі өз сөзінде Мемлекет басшысының «Жұмысшы мамандықтар жылы» бастамасы еңбекке адал азаматтарды қолдауға бағытталған маңызды шешім екенін атап өтті. Сонымен қатар «Таза Қазақстан» акциясы аясында ауданда тазалық пен абаттандыру жұмыстары жүйелі түрде жүргізіліп, елді мекендер, көшелер мен қоғамдық орындардың көркі айтарлықтай жақсарғанын жеткізді.Өтіп бара жатқан Жылан жылының аудан үшін табысты болғанын атап өткен аудан әкімі Шиелінің «Үлгілі елді мекен» облыстық байқауында «Үлгілі аудан» атануын, сондай-ақ тазалық жұмыстарын күшейту мақсатында арнайы техникалардың алынуын оң нәтиже ретінде атап өтті.&nbsp;Сөз соңында аудан басшысы Айтбай Жандарбеков тазалық әрбір тұрғынның ортақ жауапкершілігі екенін атап өтіп, еңбек адамдарына алғысын білдіріп, барша аудан халқын бірлік пен еңбекке шақырды.Салтанатты шара барысында 5 азаматқа "Сарыағаш шипажайына" жолдама, 27 азаматқа қаржылай сыйлықтар табысталды.&nbsp;Сонымен қатар аудан өнерпаздары ән мен күйден шашу шашып, еңбек адамдарына мерекелік көңіл-күй сыйлады және салтанатты шараға қатысушыларға аудан әкімдігінің атынан жаңа жылдық сыйлықтар таратылды.

Шиеліде еңбек адамдарына құрмет көрсетілді

<a href="https://kyzylorda-news.kz/">Kyzylorda-news.kz</a> Жыл бойы толымды тірліктермен көш бастаған Арал ауданы жыл соңында тоғай табыстармен қорытындыламақ. Жуырда&nbsp;Арал ауданы жұртшылығы&nbsp;тағы бір&nbsp;қуанышқа кенелді. Ауданда экономикалық маңызы бар жол бойы сервистік қызмет көрсету орталығы мен бірқатар елдімекен халқы ауызсуға қол жеткізді.Мемлекет басшысының «Қуатты өңірлер – қуатты ел» қағидаты ел дамуының негізгі күшіне айналып келеді. Бұл бағытта өңірде жол бойы сервистік қызмет көосету орталықтарының құрылысына басымдық беріліп келеді. Бұған дейін Жаңақорған сынды бірқатар ауданның үлкен трассасы бойында ашылған нысан, жыл соңында Арал ауданында да бой көтеріп отыр.«Батыс Еуропа – Батыс Қытай» халықаралық автомобиль дәлізінің бойындағы жол сервисті дамыту үшін автокөлікке газ құю компрессорлық станциялары бар көпфункционалды кешендер салынуда. Оған «Qazaq Oil», «Compass», «Алаш Метан», «Dom» сияқты компаниялар тартылып, жобалар кезең-кезеңімен іске асырылып келеді. Жақында тағы екі заманауи газ құю станциясы пайдалануға беріледі деп жоспарланған. Мемлекет басшысы Қасым-Жомарт Кемелұлының биылғы Жолдауында «Кіші Аралды» сақтап қалу және «СексеуілБейнеу» бағытындағы автомобиль жолы құрылысын жеделдетіп бастауды тапсырған болатын. Мұндай ауқымды жобалар тек ауданның емес аймақтың да экономикалық әлеуетін арттыра түспек. Жалпы бүгінгі таңда «Батыс Еуропа – Батыс Қытай» халықаралық автомобиль дәлізінің бойында облыс көлемінде 55 жол бойы сервистік кешені жұмыс істейді екен. Ал Арал ауданындағы «PetroRetail» серіктестігінің В санатты кешені 2 миллиард теңгеге салынған. Инвестициялық жоба аясында заманауи талаптарға сай келетін 31 орындық қонақүй бой көтеріп, 20 келушіге қызмет көрсететін қоғамдық тамақтану орны іске қосылған. &nbsp;Жаңа нысанның бой көтеруі ауданның жұмыссыздық мәселесін шешуге де аз да болса үлесін тигізбек. Жол бойы қызмет көрсету орталығында қазір 20 адам тұрақты жұмыспен қамтылған.Ауданға қарасты алыс орналасқан ауылдардағы көптен бері түйіні тарқамаған мәселелерде ақырындап оң шешім тауып келеді. Елімізде шалғай ауылдардың инфрақұрылымын дамыту, ең алдымен сапалы сумен, жолмен қамтамасыз ету тұрғындардың жайлы өмір сүруіне, тұрмыстық жағдайының жақсаруына оң әсер беруге басымдық беріліп келеді. Бұған Мемлекет басшысының өзі тікелей тапсырма беріп, ел аумағын ауызсумен қамтуды биылдан қалдырмай аяқтауды нықтап айтқан еді. Президент тапсырмасы өңірде толық орындалып, барлық елді мекенге ауызсумен қамтамасыз етілді. Соның бірі – аудандағы Ерімбетжаға және Тоқабай елдімекенінде ауызсу берілді. Мемлекет басшысы 2025 жылы еліміздің барлық аймағын ауызсумен 100 пайыз қамтамасыз ету туралы тапсырмасы аясыгнда облыс аумағында 2022 жылдан бері 14 миллиард теңгенің 60 жобасы қолға алынған. Өткен жылдың қорытындысы бойынша өңір халқын орталықтандырылған ауызсумен қамту деңгейі 98,6 процентке жеткен. Биыл тағы 9 елді мекенге ауызсу жеткізілуде.Осы жылы 8 миллиард 100 миллион теңгеге Арал ауданындағы Абай, Тоқабай, 1 миллиард 45 миллион теңгеге Ерімбетжаға, Тастүбек елді мекендерін ауызсумен қамту жобалары жүзеге асып отыр. Қазір 1 миллиард 166 миллион теңгеге Тастүбек елді мекеніне су жеткізу жұмысы жүргізілуде. Осылайша, өңірдегі барлық елді мекен 100 пайыз орталықтандырылған ауызсумен қамтамасыз етілетін болады. Ауданға қарасты Ерімбетжаға елді мекеніне су жеткізу жобасына 1 022 350 миллиард теңге қаражат жұмсалған. Оның ішінде арнаулы қордан 636 325 миллион теңге бөлінген. Ал тоқабайлық тұрғындар үшін ауызсу мәселесі базыналы еді. Бүгінде ауыл жұртшылығы көптен күткен қуанышты күнге де жетті. Енді ауыл тұрғындары таза ауыз суды пайдаланып, қажетіне жарататын болады.&nbsp;

Аралдағы ауылдарда ауыз су мәселесі шешімін тапты

<a href="https://kyzylorda-news.kz/">Kyzylorda-news.kz</a>&nbsp;Сыр өңірінде экономикалық дамудың макрокөрсеткіштері бойынша оң динамика қалыптасты. Бұл туралы Қызылорда облысының әкімі Нұрлыбек Нәлібаев елордада өткен Орталық коммуникациялар қызметінің брифингінде хабарлады.Аймақ басшысы атқарылған жұмыстар мен алдағы уақытта қолға алынатын жобалар туралы баяндады.<blockquote>«Президентіміздің, Үкіметтің ерекше қолдауының арқасында өткен 11 айдың қорытындысымен негізгі макроэкономикалық көрсеткіштердің барлығының өсімі қамтамасыз етілді.Жалпы өңірлік өнім көлемі 3 трлн. 100 млрд. теңге (108,1%), жыл қорытындысымен 3 трлн. 700 млрд. теңгеге жетіп, 6,5 пайыздық өсім қамтамасыз етіледі (2021 жылмен салыстырғанда 2 есе артық).Аймақ бюджеті 851 млрд. 300 млн. теңге болып, 2021 жылдан бері 246 пайыз өсті. Оның 56 пайызы (477,6 млрд тг) әлеуметтік салаға бағытталған. Даму бюджетінің көлемі 2021 жылы 47 млрд. теңге болса, биыл 207 млрд. теңгеге жетіп, 4,4 есе артты.Өңірде қолайлы инвестициялық климат қалыптасып, ірі инвестициялық жобалар жүзеге асуда. 2022-2024 жылдары облыс экономикасына 1 трлн. 600 млрд. теңгеге жуық инвестиция тартылса, биылға 631 млрд. 400 млн. теңге жоспарланған. Бүгінде жаңа жобаларды іске қосу арқылы жоспар 750 млрд. теңгеден асып, 13,7 пайызға артығымен орындалды. 2021 жылмен салыстырғанда инвестиция көлемі 233 пайызға өсті, жеке инвестицияның үлесі 70 пайыз.Кәсіпкерлікті қолдауға 2022-2024 жылдары әртүрлі көздерден бөлінген 203 млрд. 81 млн теңгеге 16 634 жоба қаржыландырылды. Оның 37 млрд. 962 млн. теңгесі – мемлекеттік бағдарламалар қаражаты. Биыл 40 млрд. теңгеге 2 464 жоба қолдау тауып, кәсіпкерліктің экономикадағы үлесі 21% болады.Облыс экономикасының негізі саласы агроөнеркәсіп кешенін дамытуға соңғы 3 жылда 43 млрд. теңге қаржы бөлінді. Шаруашылықтар есебінен 41 млрд. теңгеден астам инвестиция тартылды.Мемлекет басшысының тапсырмасын орындау мақсатында Корея Республикасының жетекші жоғары оқу орындарының бірі Сеул ұлттық ғылым және технологиялар университетімен келіссөздер жүргізіліп, 2023 жылы 6 қарашада Қорқыт Ата атындағы Қызылорда университетінің базасында Жасанды интеллект институты ашылды.Президент тапсырмаларын жүйелі іске асырып, Әділетті, Қуатты, Қауіпсіз әрі Таза Қазақстанды құру жолындағы жұмыстарымызды әрі қарай жалғастырамыз», – деді Н.Нәлібаев.</blockquote>Айта кету керек, бюджет қаражатын оңтайландыру мақсатында 2022 жылдан бастап әлеуметтік салаға жан-жақты, терең талдау жүргізілді. Нәтижесінде 108 млрд. теңге қаржы үнемделді.Оның ішінде, білім саласынан 64 млрд. 300 млн. теңге, мәдениет және спорт саласынан («Арт-спорт» бағдарламасынан) 15 млрд. 400 млн. теңге, әлеуметтік қорғау саласынан 8 млрд. 200 млн. теңгенің мақсатсыз жұмсалуына жол берілмеді. Бұдан бөлек, әлеуметтік нысандардың құрылысын жүргізу барысында 20 млрд. 100 млн. теңге қаржыны үнемдеу шаралары қабылданды. Бұл қаражат аймақтың ең өзекті деген мәселелерін шешуге, жаңа инфрақұрылымдық жобаларды іске асыруға бағытталуда.Мемлекет басшысының «Туған жерді бірге түлетейік!» бастамасын кәсіпкер-меценаттар, қоғамдық қорлар белсенді қолдап, Сыр өңірін көркейтуге өз үлестерін қосып келеді. 2022 жылдан бері кәсіпкер азаматтар аймақтағы жаңа жобаларға 55 млрд. теңгеден астам қаржысын салды.Фото: Қызылорда облысы әкімінің баспасөз қызметі

Қызылорда облысының бюджеті 246 пайызға өсті

<a href="https://kyzylorda-news.kz/">Kyzylorda-news.kz</a> 2026 жылғы 1 қаңтардан бастап зейнетақы, жәрдемақы және әлеуметтік төлемдердің мөлшері артады. Бұл туралы Өңірлік коммуникациялар қызметінің ақпарат алаңында сала мамандары айтты. Брифингте алдағы өзгерістер, төлемдердің қайта есептелу тәртібі және азаматтарды әлеуметтік қолдау шаралары туралы баяндалды.<blockquote>– Жаңа жылдан бастап еңбек сіңірген жылдары үшін және жасына байланысты зейнетақы төлемдерінің мөлшері 10 пайызға артады. Сонымен қатар, жасына байланысты жаңадан тағайындалатын зейнетақы төлемдерінің мөлшерін есептеу үшін ескерілетін ең жоғары табыс мөлшері 237875 теңгеге көбейтіледі. Ең төменгі күнкөріс деңгейі шамасының 70 пайызы мөлшерінде, зейнетақы жүйесіне қатысу өтілі он жылдан артық әрбір толық жыл үшін оның мөлшері 2 пайызға артады, бірақ ең төменгі күнкөріс деңгейі шамасының 118 пайызынан аспайтын мөлшерде беріледі. Сонымен қатар, мүгедектігіне және асыраушысынан айрылу жағдайына байланысты мемлекеттік әлеуметтік жәрдемақылардың мөлшері ең төменгі күнкөріс деңгейі мөлшерінің ұлғаюына байланысты артады. Одан бөлек, жаңа жылдан бастап «Күміс алқамен» марапатталған аналардың ай сайынғы мемлекеттік жәрдемақысының мөлшері 27680 теңгені, ал, «Алтын алқамен» марапатталған немесе бұрын «Батыр ана» атағын алған, І және ІІ дәрежелі «Ана даңқы» ордендерімен марапатталған көп балалы аналарға ай сайынғы мемлекеттік жәрдемақының мөлшері 32005 теңгені құрайды,-деді халықты әлеуметтік қорғау саласындағы реттеу және бақылау комитетінің Қызылорда облысы бойынша департаменті басшысының орынбасары Алия Сламжанқызы.</blockquote>&nbsp;Қызылорда облысы бойынша 3293 алушыға еңбекке қабілеттілігінен айырылған жағдайға және 2833 асыраушысынан айырылған жанұяға төлемдер мөлшері ұлғайтылды.<blockquote>– Осылайша, жұмыс істейтін азаматтар алатын төлемдердің жиынтық мөлшері жұмыс істемейтін азаматтарға қарағанда көбірек болады. Бұдан басқа Қазақстан Республикасының Әлеуметтік кодексіне сәйкес бала бір жарым жасқа толғанға дейін оның күтіміне байланысты ай сайынғы әлеуметтік төлемнің мөлшері ұсталуға жататын міндетті зейнетақы жарналарын қосымша есептей отырып, бала туу кезектілігіне қарай белгіленген бала күтіміне байланысты мемлекеттік жәрдемақының мөлшерінен кем болмайды. Осыған байланысты, 2026 жылғы 1 қаңтардан бастап Қызылорда облысы бойынша осы төлем 5806 алушыға артады. Әлеуметтік төлемдерді қайта есептеу 2026 жылғы 1 қаңтардағы алушылардың қосымша құжаттарды ұсынуын қажет етпейді және автоматтандырылған режимде жүргізілді,- деді Қызылорда облысы бойынша «Мемлекеттік әлеуметтік сақтандыру қоры» АҚ филиалының директоры Гүлсім Жұмағалиқызы.</blockquote><img src="https://knadmin.beoblood.kz/uploads/zejneta_y_67ec262fee.jpg" alt="зейнетақы.jpg">Фото: Нұрболат Нұржаубай

Зейнетақы, жәрдемақы және әлеуметтік төлемдердің мөлшері артады

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы, Сырдария ауданына қарасты Бесарық ауылы бүгінде аймақтағы ең үлгілі елді мекендердің біріне айналып отыр. Соңғы жылдары ауылдың әлеуметтік-экономикалық дамуы қарқын алып, инфрақұрылымы жаңарып, тұрғындар үшін қолайлы өмір сүру ортасы қалыптасты. Елді мекеннің көркейіп, жаңаша кейіпке енуіне жергілікті кәсіпкерлік құрылымдар мен туған жерге жанашыр азаматтардың қосқан үлесі зор.Бүгінде «Берекелі Бесарық» атауы ауылдың шынайы болмысын айқындайды. Ауыл орталығы абаттандырылып, гүлзарлар мен жасыл желекке бөленген аллеялар тұрғындар мен қонақтардың көзайымына айналған. Жолдары тегіс, көшелері жарық әрі таза. Демалыс саябағы, субұрқақтар мен балалар ойын алаңдары ауылдың ажарын аша түскен.Ауылдың дамуына сүбелі үлес қосып отырған ірі шаруашылықтардың бірі – «Абай-Дәулет» жауапкершілігі шектеулі серіктестігі. Аталған серіктестік күріш өндірумен қатар төрт түлік мал шаруашылығын дамытып келеді. Сонымен бірге кәсіпорын басшылығы бизнестің әлеуметтік жауапкершілігін де басты назарда ұстап, ауылды абаттандыру, жолдарды асфальттау, әлеуметтік нысандарды жөндеу және демалыс орындарын жаңғырту бағытында тұрақты қолдау көрсетіп келеді.Телевизиялық түсірілім тобы ауылға арнайы келіп, қалаға бергісіз келбетке енген Бесарықтың тыныс-тіршілігімен және «Абай-Дәулет» серіктестігі қолға алған түйеқұс шаруашылығымен танысты. Бұл – ауыл шаруашылығындағы тың бағыттардың бірі ретінде ерекше қызығушылық тудырып отыр.Бесарық ауылында кәсіпкерлік саласы да қарқынды дамып келеді. 2023 жылы «Ауыл аманаты» жобасы аясында заманауи бизнес орталық пайдалануға берілді. Қазіргі таңда бұл орталықта 12 кәсіпкер өз кәсібін жүргізіп, түрлі өнімдер шығарып отыр. Атап айтқанда, пластик құты шығаратын шағын цех тәулігіне мыңдаған өнім өндіріп, нарық сұранысын қамтамасыз етуде. Сонымен қатар қолөнер шеберханасында көрпе-төсек, қыз жасауына қажетті бұйымдар тігіліп, ал наубайханада нан және кондитерлік өнімдер дайындалып, қала дүкендеріне жөнелтілуде. Бүгінде бұл кәсіпорындарда 45 адам тұрақты жұмыспен қамтылған.Ауылдың әлеуметтік-экономикалық жетістігі 2023 жылы жоғары бағаланып, Бесарық облыс бойынша «Үздік ауыл» атағын иеленді. Бұл жетістік – жүйелі жоспарлау мен инвестицияның нақты нәтижесі. Екі мыңнан астам халқы бар елді мекенде жұмыссыздық деңгейі өте төмен. Тұрғындардың басым бөлігі мал шаруашылығымен айналысып, облыс орталығы мен қала нарығын ет өнімдерімен қамтамасыз етіп отыр.Бесарық ауылдық округі әкімдігі аппаратының мәліметінше, 2025 жылға арналған бюджет көлемі 278 млн 397 мың теңгені құрады. Оның ішінде Мәдениет үйіне 50 млн 587 мың теңге бөлініп, жоспарланған жұмыстар толық орындалған. Сонымен қатар 2025 жылы салық түсімдері бойынша 16 млн 135 мың теңге бюджетке түскен. Атап айтқанда, жер, мүлік және көлік салығынан жиналған қаржы 100 пайызға орындалған.Ауылдың санитарлық тазалығы мен көркейту-көгалдандыру жұмыстары тұрақты түрде жүргізіледі. Ішкі аяқ су каналдары тазартылып, 400-ге жуық көшет отырғызылған. Аудандық бюджет есебінен 10 млн теңге бөлініп, балалар ойын алаңы салынды. Сондай-ақ ауылға кіреберіс автожол бойына жарық бағаналары орнатылып, бұл мақсатқа 39 млн теңгеден астам қаржы жұмсалды.Мәдениет саласында да жүйелі жұмыстар атқарылуда. «Бесарық ауылдық мәдениет үйінде» 13 қызметкер еңбек етеді. Мұнда ән, би, қолөнер, домбыра, хор, жайдарман, көркем сөз бағыттары бойынша 10 үйірме жұмыс істейді. 17 жылдық тарихы бар «Жаншуақты» халықтық әжелер ансамблі ауыл мәдениетінің айнасына айналған.Білім және денсаулық сақтау салалары да назардан тыс қалған емес. Мектепте 85 мұғалім қызмет етеді, олардың 98 пайызы – жоғары білімді мамандар. Ал дәрігерлік амбулатория 1570 тұрғынға қызмет көрсетіп, күндізгі стационар, егу және ем-шара кабинеттерімен толық қамтылған. Бір жедел жәрдем көлігі бар.Кәсіпкерлікті қолдау бағытында 2024 жылы «Өңірлік инвестициялық орталық» арқылы бірнеше жоба мақұлданып, ондаған миллион теңге несие берілген. Мал шаруашылығы мен ауыл шаруашылығы техникасын алуға бағытталған жобалар табысты іске асуда.Сонымен қатар «Абай-Дәулет» ЖШС демеушілігімен ауылдағы әлеуметтік мәселелер кезең-кезеңімен шешіліп келеді. Аяқ су жүйесі толық жаңартылып, каналдар тазаланып, жаяу жүргіншілер жолдары салынған. Бұл жұмыстарға ондаған миллион теңге жеке қаражат жұмсалған.Қорыта айтқанда, Бесарық ауылы – мемлекет, кәсіпкер және халықтың бірлескен еңбегінің нақты нәтижесін көрсетіп отырған үлгілі елді мекен. Мұндағы жүйелі даму алдағы уақытта да өз жалғасын табары сөзсіз.

Берекелі Бесарық – тұрақты даму мен кәсіпкерлік өркендеген ауыл

<a href="https://kyzylorda-news.kz/">Kyzylorda-news.kz</a> Бүгін Әйтеке би кентінде облыс әкімі Нұрлыбек Нәлібаевтың қатысуымен әлеуметтік осал топтағы азаматтарға кезекке сәйкес 80 пәтерлік 40 тұрғын үйді табыстау рәсімі өтті. Оған құқық қорғау органдарының, жауапты салалардың басшылары, зиялы қауым өкілдері мен аудан тұрғындары қатысты.Аймақ басшысы жиналған жұртшылықты, Жаңа жыл қарсаңында жаңа баспаналы болған азаматтарды құттықтады.<blockquote>«Қазан айында Мемлекет басшымыз Қасым-Жомарт Кемелұлы Сыр өңіріне арнайы жұмыс сапарымен келгенде әлеуметтік нысандар мен өндіріс орындарында болды. Атқарылған жұмыстарға оң бағасын беріп, Астана мен Алматы қалаларындағыдай тәулік бойы қызмет көрсететін үшінші Президенттік кітапхана Қызылордада ашылатындығын жеткізді. Бастаманы жерлестеріміз зор қуанышпен қабылдауда. Президентіміз Үкімет пен облыс әкімдеріне мемлекеттік қолдауларды тиімді және мақсатты пайдаланып, ауыл халқының табысын арттыру, экономикасын жоғары көрсеткіштерге жеткізу міндетін жүктеді. Кейінгі үш жылда өңірде бірінші рет барлық ауданда тұрғын үйлер салынып, атап айтсақ, &nbsp;2023 жылы 430, 2024 жылы 1015, 2025 жылы 332 жуық жаңа пәтер жерлестерімізге берілді», – деді Н.Нәлібаев.</blockquote><img src="https://knadmin.beoblood.kz/uploads/azaly_t_r_yn_j_tabystau_4e1376be4b.jpg" alt="Қазалы тұрғын үй табыстау.jpg">Рәсімде ауданның әлеуметтік-экономикалық дамуына үлес қосқан, тұрғын үйлер құрылысын салған азаматтар облыс әкімінің Алғыс хатымен марапатталды. Облыс прокуроры Ризабек Ожаров қазалылықтарды қоныстоймен құттықтап, қоғам қайраткері Самұрат Имандосов бата берді.Айта кетейік, өңірде 2022 жылдан бері 200-ге жуық халыққа қажетті әлеуметтік нысан салынып, тұрғындар игілігіне айналған. Кезекте тұрған азаматтарға 5 мыңнан астам пәтер (5148) табысталды. Биыл 3 600 пәтерлік үйлер салуға бюджеттен 58 млрд. 785 млн. теңге бөлінді.Қазалы ауданында өткен жылы 148 пәтерлік 74 тұрғын үй табысталған болатын.<img src="https://knadmin.beoblood.kz/uploads/azaly_t_r_yn_j_tabystau_2_453c575519.jpg" alt="Қазалы тұрғын үй табыстау 2.jpg">Қызылорда облысы әкімінің баспасөз қызметі

Қазалы ауданында кезекте тұрған азаматтарға тұрғын үй кілті табысталды

<a href="https://kyzylorda-news.kz/">Kyzylorda-news.kz</a> &nbsp; Жаңа жыл қарсаңында Арал қаласында облыс әкімі Нұрлыбек Нәлібаевтың қатысуымен әлеуметтік осал топтағы азаматтарға арнап жаңадан салынған 60 пәтерлік 30 тұрғын үйді табыстау рәсімі өтті. Оған құқық қорғау органдарының бірінші басшылары, облыстық мәслихаттың төрағасы, зиялы қауым өкілдері мен ардагерлер қатысты.Аймақ басшысы құрылыс саласындағы, оның ішінде тұрғын үй құрылысындағы атқарылған жұмыстарға тоқталып, жаңа қоныс иелерін құттықтады.<blockquote>«Мемлекет басшысы Қасым-Жомарт Кемелұлы: «Халықтың басым көпшілігі үшін тұрғын үй – ең өзекті мәселе. Бұл түйткіл мемлекет тарапынан мүмкіндігінше шешіліп жатыр. Мемлекет шын мұқтаж адамдарға жәрдем береді» деп атап өткен болатын.Өңіріміз қарқынды құрылыс алаңына айналып, 2022 жылдан бері 200-ге жуық әлеуметтік нысан салынды. Кейінгі үш жылда тұрғын үй кезегіндегі азаматтарға 5 мыңнан астам пәтер табысталды.Алғаш рет барлық ауданда 1 800-ге жуық жаңа пәтер жерлестерімізге берілді. Биыл 3600 пәтерлік тұрғын үй салуға бюджеттен 58 млрд. 785 млн. теңге бөлінді. Оның ішінде 322 пәтерлік 161 тұрғын үй аудандарда бой көтеруде.Бүгін – мемлекет қолдауымен баспаналы болған әрбір отбасы үшін ерекше күн! Жаңа жыл қарсаңында жаңа үйдің кілтін алып, отбасылық мерекені өз үйінде қарсы алу қуанышты еселей түседі.Қоныстарыңыз құтты, іргетасы берік, қабырғасы мығым, ішіндегі әр отбасының шаңырағы татулық пен берекеге толы болғай! Баршаңыздың дендеріңізге саулық, отбасыларыңызға амандық тілеймін!», – деді Нұрлыбек Машбекұлы.</blockquote>Іс-шарада ауданның әлеуметтік-экономикалық дамуына үлес қосқан азаматтарға, құрылыс мекемесінің мамандарына облыс әкімінің Алғыс хаты табысталып, аудандық ақсақалдар кеңесінің төрағасы Нұралы Оспанов батасын берді.Арал ауданында құрылыс және инфрақұрылымдық жобалар жоспарға сай жүзеге асырылуда. Жыл басынан бері 300 орындық «Келешек мектебі», «Руханият орталығы», қамқорлық және оңалту орталығы, әлеуметтік осал топтағы отбасыларға арналған 150 пәтерлік 75 тұрғын үй, сондай-ақ теміржол үстінен өтетін көпір пайдалануға берілді.<img src="https://knadmin.beoblood.kz/uploads/Aral_alasynda_60_p_terlik_30_t_r_yn_j_tabystaldy_6788e4e5e1.jpg" alt="Арал қаласында 60 пәтерлік 30 тұрғын үй табысталды.jpg">Сексеуіл кенті табиғи газға қосылып, 300 орындық мектеп пен 40 төсектік аурухана ел игілігіне табысталды. Тоқабай ауылында жаңа дәрігерлік амбулатория салынды. Сонымен қатар демеушілер есебінен апатты мектептің орнына тұрғызылған жаңа мектеп пайдалануға берілді. Бұл ауыл жақында таза ауыз сумен қамтылды.Ақшатау ауылындағы 60 орындық жаңа мектеп шәкірттер игілігіне айналды. Ақбасты және Ерімбетжаға ауылдарына таза ауыз су жеткізілді. Жақын күндері Абай ауылына ауыз су қосу жұмыстары аяқталады.Фото: Қызылорда облысы әкімінің баспасөз қызметі

Арал қаласында 60 пәтерлік 30 тұрғын үй табысталды

Арал: ауыл шаруашылығы саласында инвестиция көлемі жоғары 

<a href="https://kyzylorda-news.kz/">Kyzylorda-news.kz</a> Жыл қорытындысы бойынша өткен алқа отырысында балалардың құқықтарын қорғауды қамтамасыз ету мәселелері жөнінде облыс прокурорларының баяндамалары тыңдалды.Батыс Қазақстан облысының прокуратурасы қылмыстық тәуекелдерді анықтауға және азайтуға бағытталған «Қауіпсіз өңір» жобасын ұсынды. Жоба қауіпті учаскелерді абаттандыруды, көшелерді жарықтандыруды, инфрақұрылымды мониторингтеуді, сондай-ақ құқық бұзушылықтар туралы деректерді талдау негізінде профилактикалық және патрульдік жұмысты күшейтуді көздейді.Қазіргі таңда әжептеуір нәтижелер бар: бірқатар қауіптер төмендетілді, балалардың мектепке баратын жолында инфрақұрылым қамтамасыз етілді, буллинг фактілері анықталып, жедел шаралар қабылданды.Аталған жұмыс Мемлекет басшысы Қасым-Жомарт Тоқаевтың ұл-қыздарымыздың парасатты және жан-жақты болып өсуіне жағдай жасау, жас азаматтардың құқығын қорғап, денсаулығын сақтау әрдайым мемлекеттің басты басымдығы болып саналады деген талаптарына сәйкес келеді. Балалар – біздің болашағымыз. Сондықтан еліміздегі &nbsp;әрбір жеткіншектің мейірім мен қамқорлыққа бөленіп, үлкеннің қолдауын сезінуі ертеңгі күнге сеніммен қарауы өте маңызды.Барлық өңір прокурорларына балалар қауіпсіздігі мәселелеріне ерекше назар аудара отырып, осындай жұмысты жүргізу тапсырылды.&nbsp;Қауіпті учаскелерді анықтау, жарықтандыру мен патрульдеуді күшейту, жергілікті атқарушы органдармен және полициямен нақты өзара іс-қимылды қамтамасыз ету прокурорлардың алдағы кезеңдегі негізгі міндеті.Балаларды қылмыстық қол сұғушылықтан қорғау және олардың өмірі үшін қауіпсіз, сенімді орта қалыптастыру барлық деңгейдегі мемлекеттік органдардың жұмысының сөзсіз басымдығы болуы тиіс.Алматы облысының прокуратурасы Kundelik платформасымен меморандум жасап, қосымшаның басты бетінде прокуратураның блогын іске қосты.Блог балалардың құқықтық мәдениетін арттыруға және олардың қауіпсіздігін қамтамасыз етуге бағытталған. Құқықтық негіздерді тиімді қабылдау үшін өзара іс-қимылдың 4 негізгі тетігі қарастырылған.Материалдар (фото, видео, мәтіндік форматтар және вебинарлар) оқушылардың жас ерекшеліктеріне қарай жасалып, күрделі құқықтық мәселелер түсінікті тілде беріледі, ұсынымдар мен кеңестерді қамтиды және оқу процесінде қолданылады.Балалармен кері байланыс QR-кодтар, сондай-ақ мессенджерлер арқылы анонимді өтініш беру мүмкіндігімен қамтамасыз етілген.Блогты 210 мың оқушы мен олардың ата-аналары қарады.Kundelik платформасымен ынтымақтастық құқықтық ақпаратты жеткізумен қатар, қолда бар мәліметтерді талдауға, оларды «Бақытты және қауіпсіз балалық шақ» жобасы аясында пайдалануға, сондай-ақ тәуекел тобындағы балаларды және баланы тәрбиелеу бойынша өз міндеттерін орындамайтын ата-аналарды уақтылы анықтауға мүмкіндік берді.Атқарылған жұмыстың нәтижесінде 16 мыңнан астам бала тиісті медициналық қызметтермен қамтылды, 4 мыңнан астам ата-анаға заңда көзделген әлеуметтік төлемдер қамтамасыз етілді.Қамқорлықсыз қалған үш жасар балаға жедел көмек көрсетілді: әкесі жазасын өтеп жатқан, ал анасы қоғамға жат өмір салтын ұстанған. Анасы маскүнемдіктен мәжбүрлі емдеуге жіберіліп, бала Кәмелетке толмағандарды бейімдеу орталығында тиісті күтім мен бақылауға алынды. Бұл атқарылған жұмыстың бір бөлігі ғана.Балалардың құқықтарын қорғау жөніндегі прокурорлар жұмысын жүйелеу, сондай-ақ балалар мен ата-аналарды ақпараттандыру тиімділігін арттыру мақсатында Kundelik платформасымен осындай интеграцияны жүзеге асыру тапсырылды.Бұл:<ul><li style="text-align:justify;">балалардың құқықтарын қорғауға бағытталған прокуратура жобаларын біріктіруге және жүйелеуге;</li><li style="text-align:justify;">нақты балалар мен ата-аналар топтарымен жұмысты бірыңғай әрі үйлестірілген тәсілде жүргізуге;</li><li style="text-align:justify;">қолайлы әрі кеңінен қолданылатын цифрлық құрал арқылы құқықтық тәрбиені және заңға бағынатын азаматты қалыптастыруды күшейтуге мүмкіндік береді.</li></ul>Аталған жұмыстардың барлығы балалар үшін қауіпсіз орта қалыптастыруға және «Заң мен Тәртіп» қағидаттарын профилактика, уақтылы көмек көрсету және әрбір баланың құқығын қорғау арқылы іс жүзінде іске асыруға бағытталған.

Балалардың құқықтарын қорғауды қамтамасыз ету мәселелері жөнінде облыс прокурорларының баяндамалары тыңдалды

<a href="https://kyzylorda-news.kz/">Kyzylorda-news.kz</a> 2025 жылы Қазақстан Республикасы Қарулы Күштерінде әскери басқару органдарын, құрамаларды, әскери бөлімдер мен мекемелерді жоспарлы даярлау жүйелі түрде жүзеге асырылды.Оқу жылы барысында жауынгерлік даярлық бойынша шамамен 60 мың іс-шара өткізілді, олардың 17 мыңнан астамы түнгі жағдайларда ұйымдастырылды. Іс-шаралардың негізгі бөлігі Құрлық әскерлері мен Десанттық-шабуылдау әскерлерінің үлесіне тиесілі болды.Әуе қорғанысы күштері Әскери-әуе күштерінің ұшқыш құрамын даярлау деңгейінің оң серпіні атап өтіледі. Жыл ішінде күндізгі және түнгі уақытта шамамен мың ұшу ауысымы орындалды. Әуе әскерлерінің түрлі тектегі экипаждары ұшқыштық техникасын жетілдіру, күрделі метеорологиялық жағдайларда оқу-жауынгерлік міндеттерді орындау, сондай-ақ жер үсті және әуе нысандарына қарсы жауынгерлік қолдану бойынша жаттығуларды кезең-кезеңімен пысықтады.Әуе шабуылына қарсы қорғаныс әскерлерінің бөлімшелері мен әскери бөлімдерінде 760 жауынгерлік үйлестіру іс-шарасы өткізілді. Әскери-теңіз күштерінде есепті кезеңде 188 рет теңізге шығу жүзеге асырылып, кеме экипаждарының жалпы жүзу қашықтығы 25 мың теңіз милінен асты.Қарулы Күштердің түрлері, әскер тектері мен арнайы әскерлер бөлімшелерін үйлестірудің қорытынды кезеңдерінде шамамен 4,5 мың жауынгерлік атыс пен тактикалық оқу-жаттығу өткізілді. Іс-шаралар барысында әртүрлі жағдайларда оқу-жауынгерлік міндеттерді тікелей орындау мәселелері арналымына сәйкес пысықталды.Сонымен қатар жыл ішінде «Айбалта», «Десант», «Жауынгерлік достастық», «Каспий бризі» сынды ірі жедел-стратегиялық, жедел-тактикалық және арнайы оқу-жаттығулар өтті. Олардың аясында Қарулы Күштердің түрлері мен әскер тектерінің бөлімшелерінің өзара іс-қимылы пысықталып, соңғы жылдардағы әскери қақтығыстар тәжірибесін талдау негізінде әзірленген бөлімшелерді қолданудың жаңа нысандары мен тактикалық тәсілдері сынақтан өткізілді. Бұл жұмыс жүйелі түрде жүргізілуде.<img src="https://knadmin.beoblood.kz/uploads/Whats_App_Image_2025_12_24_at_13_52_42_1_8db4785f26.jpeg" alt="Қарулы Күштер.jpeg">

Бас тақырыптар

Қазалы ауданында кезекте тұрған азаматтарға тұрғын үй кілті табысталды

Арал қаласында 60 пәтерлік 30 тұрғын үй табысталды

Арал: ауыл шаруашылығы саласында инвестиция көлемі жоғары

Экономика

Аралдағы ауылдарда ауыз су мәселесі шешімін тапты

Қызылорда облысының бюджеті 246 пайызға өсті

Зейнетақы, жәрдемақы және әлеуметтік төлемдердің мөлшері артады

Берекелі Бесарық – тұрақты даму мен кәсіпкерлік өркендеген ауыл

Қоғам

Қазалы ауданында кезекте тұрған азаматтарға тұрғын үй кілті табысталды

Арал қаласында 60 пәтерлік 30 тұрғын үй табысталды

Балалардың құқықтарын қорғауды қамтамасыз ету мәселелері жөнінде облыс прокурорларының баяндамалары тыңдалды

Жыл қорытындысы: Қарулы Күштерде жауынгерлік даярлық іс-шарасы өтті

Шәкірт жеңісі – ұстаз жемісі

Биыл аралдық өрендер заманауи мектептерде білім алуда

Қызылорда облысында алдағы үш жылда 51 мектеп күрделі жөндеуден өтеді

Қызылордада ауыл оқушысы ұялы телефонға арналған қауіпсіз жүйе ойлап тапты

Техникалық және кәсіптік білім беру жүйесі реформасын іске асыру барысы қаралды