<a href="https://kyzylorda-news.kz/">Kyzylorda-news.kz</a> Әзербайжан Республикасының Баку қаласында өткен Дүниежүзілік урбан форумның 13-сессиясына Сыр өңірінің делегациясы қатысты. Аталған халықаралық алаң БҰҰ-Хабитат ұйымының қолдауымен ұйымдастырылып, урбанизация, қала құрылысы, климат тұрақтылығы және заманауи инфрақұрылым мәселелерін талқылауға арналды.Форумға әлемнің 100-ден астам елінен 20 мыңнан аса делегат жиналды. Олардың қатарында мемлекет және үкімет басшылары, халықаралық ұйымдар өкілдері, сарапшылар мен урбанистика саласының мамандары бар.Қазақстан делегациясы құрамына Қызылорда облысының өкілдері де енген. Олар өңірдің тұрақты дамуы, қала инфрақұрылымын жаңғырту және экологиялық бастамалар бағытында тәжірибе алмасты.Форумда ҚР Премьер-министрі Олжас Бектенов Мемлекет басшысы Қасым-Жомарт Тоқаев айқындаған урбанистикалық даму саясатының негізгі басымдықтарына тоқталды. Атап айтқанда, азаматтарға қолайлы әрі қауіпсіз орта қалыптастыру, цифрландыру мен жасанды интеллект технологияларын енгізу, су қауіпсіздігі және климат тұрақтылығы мәселелері кеңінен талқыланды.Сонымен қатар Urban Expo көрмесі өтуде, онда қатысушылар назарына Қазақстанның ұлттық павильоны ұсынылды. Экспозиция қоғамдық кеңістіктерді жаңарту, инфрақұрылымдық шешімдер және жаңа қала құрылысы жобалары арқылы елдің тұрақты, жайлы әрі экологиялық таза қалаларды дамытуға заманауи көзқарасын көрсетеді. Green ID жобасына ерекше назар аударылды, бұл – көгалдандыруға, климат тұрақтылығы мен қалалық ортаның сапасын арттыруға бағытталған бастама.Айта кету керек, өткен жылы Қызылорда қаласында тұңғыш Ұлттық урбан форум ұйымдастырылып, мемлекеттік органдар, халықаралық ұйымдар, сарапшылар мен бизнес өкілдері бас қосты. Іс-шара өңірдегі тұрақты қалалық даму, заманауи инфрақұрылым қалыптастыру және урбанистика бағытындағы өзекті мәселелерді талқылауға мүмкіндік берді.<img src="https://knadmin.beoblood.kz/uploads/yzylorda_oblysyny_delegacziyasy_haly_araly_forum_a_atysty_2_50de59aa49.jpg" alt="Қызылорда облысының делегациясы халықаралық форумға қатысты 2.jpg">

Қызылорда облысының делегациясы WORLD URBAN FORUM-13 халықаралық форумына қатысты

Қызылордадағы тұңғыш интернет газет он бес жылдық белесті бағындырды

<a href="https://kyzylorda-news.kz/">Kyzylorda-news.kz</a> 2024 жылғы 11 наурыз. Дүйсенбі болатын. Хатшы қыз қоңырау шалып, бас директор Марат Жайылханұлы шақырып жатыр деген хабарды жеткізген. Ол кезде Қызылорда қалалық «Ақмешіт апталығы» газетінің бас редакторымын. Бас директор көп созбалақтамай шақырған себебін бірден айтып, «Қызылорда ньюс.кз» ақпарат агенттігіне бас редактор етіп ауыстырғысы келіп отырғанын мәлім етті.Содан не керек, сайтта да жұмыс істеп көрейік деп, білек сыбана кірістік те кеттік.Күн сайын жиналысБұрын істеп көрмеген адамға сайттың жұмысы аз секілді көрінеді. Газетте аптасына екі нөмір шығарып, мақалаларды соған лайықтап дайындайтынбыз. Бұл жерде минут сайын ақпараттар алмасып жатады. Оқып үлгеру қиын. Бас редактор болған соң шыққан әр мақалаға жауаптысың. Оның грамматикалық, стилистикалық қатесінен бөлек, саяси жағы тағы бар. Сайт қаралымын арттыруға сеп болатын жарқ еткен дүниелер өтімдірек. Тіпті әншілердің өміріне қызығатын, күнделікті бақылайтындар көп екен. Әйтсе де аудитория солай екен деп, жылтырақ дүниелерді беруге де болмайды.Жұмысты жетілдіру үшін ұжым болып іздендік. Басқа сайттар не істеп жатыр? Қандай мақала оқылымды? Қаралымды қайтіп көбейтуге болады? Міне, осы сұрақтардың жауабын іздей бастадық.«ҚазАқпарат», «Тенгри ньюс. Кз» сынды алдыңғы қатарлы сайттардың қандай мақала беріп жатқанын, тіпті қайсысы көп оқылғанына дейін сараладық.Редакциядағы жігіттер мен қыздар түгел жұмылды. Күн сайын ақылдасамыз. Бір мәселенің түйінін тарқату үшін әр пікірге мән бердік. Әлеуметтік желілердегі жұмысты күшейту жағын да кеңестік. Редакциядағы Фариза Омарова, Аида Маратбекқызы, Айжан Жарманова, Мөлдір Сабыржанқызы, Аружан Ералы сынды қыздар мен Айдос Мырзалы, Азамат Абимолда, Қуаныш Мұстафаев, Балтабай Тұраровтай жігіттер жанымнан табылып, қиын деген мәселенің өзі оңайға айналды.<img src="https://knadmin.beoblood.kz/uploads/Whats_App_Image_2026_05_05_at_11_06_57_aca223a0c7.jpeg" alt="Ньюс.jpeg">3 теңгенің жырыЖаңа редакцияға үйренемін дегенше мемлекеттік тапсырыс та келді. Мемлекеттік тапсырыс аясында 20 млн теңгені игеру керек болды. Оның үстіне әр мақала кемі мың белгіден тұруы керек деген талабы бар.Мемлекеттік тапсырыс болған соң облыстық, аудандық әкімдіктердің атқарған жұмысын ақпараттандыру керек. Күн сайын мемлекеттік мекемелерге хабарласып, департамент, басқарма басшыларымен сөйлесеміз. Олардан келіп жатқан ақпаратта да есеп жоқ. Сықиған цифр, &nbsp;болмаса жылдық не алты айлық есеп. Бірақ соны өңдеп, мақалаға айналдыру керек. Құрығанда әр белгіге 3 теңге 25 тиыннан төлейді екен. 20 млн белгісі бар мақалаларды жазып боламын дегенше өзіміз де бір сияқты болдық. Мың белгіден тұратын мақала жазғанның өзінде 20 мың мақала жазуымыз керек екен. Көлемді сараптамалық мақалалар мен сұхбаттарды көбейтпесек, өнбейтінін білдік. Бұл жолы «Сыр медиа» ЖШС-на қарасты барлық редакцияның сайт мамандары түгел көмекке келді. Әрқайсысына тапсырма беріп, меже бекіттік. Күн сайын есебін аламыз, күн сайын сараптап, қанша белгі қалғанын санаймыз. Әйтеуір не керек, 3 теңгенің жыры біткенше тоқтаусыз жұмыс істедік.Сол жылы әкімдікке хат жазып, мемлекеттік тапсырыс аясында жарияланған мақалаларға басқа аймақтарда бізден әлдеқайда көп төленетінін жеткіздік. Нәтижесінде мемлекеттік тапсырыс аясында сайтқа жарияланатын материалдағы әр белгі үшін 17 теңгеден төленетін болды.Жаңа жобалар нәтижесін берді«Қызылорда ньюс.кз» ақпарат агенттігіне бас редактор болып тағайындалған күні видеостудия ашу жайлы тапсырма берілді. Алдымен студияға қажетті құрал-жабдықтар тізімін дайындадық. Көп ұзамай барлығы алынды. Студияны Айдос Мырзалы мен Қуаныш Мұстафаев әрледі. Кейін Балтабай Тұраров деген азаматты жұмысқа алдық. Үшеуі бірігіп, алғашқы жобаларды жүзеге асырды. «5 жаңалық», «Қазақтың сөзі», «Мамандықтар әлемі», «Өзіңдей бала», «Спорт-11» деп аталатын жобаларды жүргізіп, нәтижесін көре бастадық. «5 жаңалықты» Айдос Мырзалы мен Айжан Жарманова жүргізді. «Мамандықтар әлемі» мен «Спорт-11»-дің тізгіні Қуаныш Мұстафаевта болды. Айдос Мырзалы «Өзіңдей бала» арқылы талай жасты үлгі етті. Осының барлығын түсіру, монтаждау, көрерменге сапалы дүние ұсыну Балтабай Тұраровтың мойнында екенін айта кеткен жөн.Осыдан 15 жыл бұрын, яғни 2011 жылдың 5 мамырында&nbsp;«Қызылорда ньюс.кз» ақпарат агенттігінің негізі қаланған. Бүгінде тәжірибелі журналист Айжан Абдуллаева басқаратын ұжымды «Қызылорда ньюс.кз» ақпарат агенттігінің 15 жылдығымен құттықтаймын. Әріптестеріме шығармашылық табыс тілеймін. Ең бастысы, шығар биік көп болсын! Өсіп-өркендей беріңіздер!Әзиз БАТЫРБЕКОВ,«Сыр медиа» ЖШС бас директорының орынбасары

Әзиз Батырбеков: «Шығар биік көп болсын, әріптестер!»

Бізге – 15 жыл

<a href="https://kyzylorda-news.kz/">Kyzylorda-news.kz</a> Биылдан бастап елімізде Мемлекет басшысы Қасым-Жомарт Тоқаев бастамасымен Кітапханашылар күнін атап өту тәртібіне өзгеріс енгізіліп, 23 сәуір - Ұлттық кітап және кітапханашылар күні болып белгіленді. Бұл бастама - қоғамда кітап оқу мәдениетін қалыптастыруға, рухани құндылықтарды дәріптеуге бағытталған маңызды қадам. Осыған орай бүгін Өңірлік коммуникациялар қызметі ұйымдастырған көшпелі брифинг барысында Ә.Тәжібаев атындағы облыстық әмбебап ғылыми кітапханасының директоры Сапар Көзейбаев атаулы күннің маңызына кеңінен тоқталып, БАҚ өкілдерінің сұрақтарына жауап берді.Спикер Мемлекет басшысы ұсынған «Кітап оқитын ұлт» жобасының маңыздылығына ерекше назар аударды. Оның айтуынша, бұл бастама ел ішінде кітапқа деген қызығушылықты арттырып қана қоймай, жастардың білімге, ізденіске деген құлшынысын күшейтуге ықпал етуде.<blockquote>-Қазіргі таңда облыстық кітапхана қорында 4,5 миллионға жуық кітап сақталған. Бұл - өңірдің рухани әлеуетін айқындайтын ірі көрсеткіштердің бірі. Сонымен қатар, 2024-2025 жылдар аралығында аудан орталықтарында жаңа руханият орталықтары бой көтеріп, 7 аудандағы кітапханалар толықтай жаңғыртылып, заманауи талаптарға сай жабдықталып, халық игілігіне пайдалануға берілген. Сондай-ақ, Ұлттық құрылтайдың бесінші отырысында Мемлекет басшысы Қасым-Жомарт Тоқаев елімізде үш президенттік кітапхана салынатынын, оның біреуі Қызылорда қаласында бой көтеретінін мәлімдеген болатын. Бүгінде аталған нысанның іргетасы қаланып, капсуласы салынды. Бұл - өңір үшін ғана емес, жалпы ел руханияты үшін маңызды әрі қуанышты жаңалық. Ұлт болашағы - білім мен ғылымда, ал оның негізі - кітап оқу мәдениетінде жатыр. Сондықтан кітапханалардың қызметін жаңғырту, оқырман санын арттыру - басты міндеттердің бірі. Кітапханашылар күніне орай жоспарланған апталық іс-шаралар да осы мақсатты көздейді. Бүгінгі шараға аудан кітапханашылары белсенді қатысып, түрлі көрмелер ұйымдастыруда. Алдағы уақытта да бұл бастамалар өз жалғасын табатын болады, - деді Сапар Әлиасқарұлы.</blockquote>Айта кету керек, мерекеге орай өңір кітапханаларында түрлі мәдени-танымдық іс-шаралар, кітап көрмелері, әдеби кештер мен зияткерлік жобалар ұйымдастырылып, оқырмандарға рухани азық сыйлауда. Бұл бастамалар кітаптың қоғамдағы рөлін арттырып, жас ұрпақты білім мен парасатқа жетелеуге бағытталған.<img src="https://knadmin.beoblood.kz/uploads/Kitaphanashylar_k_ni_2_1dc2dcb637.jpg" alt="Кітапханашылар күні 2.jpg">

Қызылордада ұлттық кітап және кітапханашылар күні кең көлемде аталып өтті

<a href="https://kyzylorda-news.kz/">Kyzylorda-news.kz</a>&nbsp;«TURǴYNDAR AMANATY» партиялық жобасы аясында Қазақстан Республикасы Парламенті Мәжілісінің депутаты Екатерина Смышляеваның қатысуымен ZOOM платформасы арқылы арнайы жиын өтті.Жиынға «AMANAT» партиясы Қызылорда облыстық филиалының төрағасы Жандос Базартай, партияның облыстық филиалының атқарушы хатшы Ләйлә Төрешова, сондай-ақ жауапты сала басшылары қатысты. Кездесу барысында көппәтерлі тұрғын үйлерді басқару жүйесінде ашықтықты, есептілікті және тиімділікті арттыру, тұрғындардың сенімін нығайту, сондай-ақ қызмет көрсетуші кооперативтер мен мүлік иелерінің бірлестіктері жұмысының сапасын жақсарту секілді тұрғын үй қатынастары саласындағы өзекті түйткілдер көтеріліп, оларды шешу жолдары талқыланды.Орталықпен өткен жиыннан кейін партия филиалының төрағасы өңірдегі мүлік иелері бірлестіктері мен пәтер иелері кооперативтерінің өкілдерімен кездесіп, «TURǴYNDAR AMANATY» жобасы аясында жүзеге асырылатын негізгі міндеттерге тоқталып өтті. Оның айтуынша, ең алдымен ОСИ мен КСК төрағаларына арналған «OSI-SKILLS» форматындағы оқыту семинарлары ұйымдастырылады. Бұл қаржылық сауаттылықты арттыруға, тиімді коммуникация қалыптастыруға және заң талаптарын сақтау бойынша жүйелі білім беруге мүмкіндік береді.Бұдан бөлек, «Таза Қазақстан» акциясы аясында аулаларды абаттандыру жұмыстары ұйымдастырылып, бейсенбілік және сенбіліктер тұрақты түрде өткізілетін болады. «Халық қатысатын бюджет» бағдарламасын іске асыру жанданып, тұрғындарға оның шарттары түсіндіріліп, жобаларды әзірлеуге әдістемелік қолдау көрсетіледі. Сондай-ақ «Үздік тазалаушы», «Үздік аула», «Үздік ОСИ, КСК төрағасы» секілді байқаулар өткізу жоспарланып отыр.Сондай-ақ партияның облыстық филиалының төрағасы тұрғындар тарапынан түсетін барлық ұсыныс-пікірлер мен сұрақтар назардан тыс қалмайтынын атап өтті.&nbsp;<blockquote>«Бұл бағытта мәслихат депутаттарының әлеуеті кеңінен қолданылады. Яғни, маслихаттардағы партияның депутаттық фракциясының мүшелері көшпелі кездесулер өткізіп, тұрғындар алдында есеп береді. ОСИ мен КСК төрағаларының ұсыныстары жергілікті атқарушы органдарға жеткізіліп, тұрақты қабылдаулар ұйымдастырылады»,- деді ол.&nbsp;</blockquote>Атап өтейік, жоба пилоттық болғандықтан, алдағы уақытта толықтырылып, заман талабына сай жаңартылып отырады.

«Turǵyndar amanaty» партиялық жобасының мақсат міндеті таныстырлды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев еңбек ардагерлері Сайлаубай Әбішевті 80, Салхадин Мырзабековті 70 жас мерейтойымен құттықтап, адал еңбекті бағалаудың маңызын атап өтті.<blockquote>«Президентіміз Қасым-Жомарт Кемелұлы: «Әділетті Қазақстанда еңбек адамына ерекше құрмет көрсетілуге тиіс. Еңбек адамдары – еліміз бен мемлекетіміздің тірегі» деген болатын. Сыр өңірінде адал қызмет атқарып, саналы ғұмырын аймағымыздың әлеуметтік-экономикалық, мәдени-рухани дамуына арнаған, елдің қошеметіне бөленген азаматтарды ардақтауды дәстүрге айналдырдық. Бүгінгі ресми жиынымыз өнегелі істердің ұйытқысы болған, жұртшылыққа етене таныс Әбішев Сайлаубай Әбішұлы ағамыздың 80 жасқа, Мырзабеков Салхадин Мырзабекұлы ағамыздың 70 жасқа толған мерейтойына арналады. Сіздердің жылдар бойы туған өлкенің игілігі жолында атқарған еңбектеріңіз, адал қызметтеріңіз шынайы құрметке лайық. Сыр жұртшылығы аймақтың дамуына зор үлес қосқан Өздеріңіздей жерлестерімен мақтанады. Тілеулес, ақадал ниетті азаматтардың атынан бүгінгі мерейтойларыңызбен шын жүректен құттықтап, дендеріңізге саулық, отбасыларыңызға амандық тілейміз!», – деді Нұрлыбек Машбекұлы.</blockquote><img src="https://knadmin.beoblood.kz/uploads/E_bek_ardagerlerin_marapattady_2_90a57447f7.jpg" alt="Еңбек ардагерлерін марапаттады 2.jpg">Жиында облыс әкімі мерейтой иелеріне Қызылорда облысының Құрмет грамотасы мен Алғыс хат табыстап, дәстүрге сай құрмет көрсетті. Ел ағалары Дайрабай Ысқақов, Бекмырза Еламанов, Биғали Қаюпов сөз сөйлеп, ізгі тілек білдірді.Сайлаубай Әбішұлы еңбек жолын мұғалімдіктен бастап, кейін комсомол органдарында, Шиелі ауданында басшылық қызметтер атқарған. Әр жылдары колхоз төрағасы, совхоз директоры, аудандық бөлім басшысы және «Білім жабдық» мекемесінің директоры қызметтерінде болған.&nbsp;Қоғамдық-саяси жұмыстарға белсене араласып, партия құрылымдарында 20 жылға жуық еңбек етті, 8 шақырылым бойы аудандық кеңес депутаты болып сайланған.Салхадин Мырзабекұлы еңбек жолын 1973 жылы жұмысшы болып бастап, кейін бас экономист, аудан әкімінің орынбасары, салық комитетінің төрағасы, кеңшар директоры қызметтерін атқарған. 1996-1999 жылдары Жаңақорған ауданының әкімі ретінде өңірдің дамуына үлес қосты.&nbsp;Экономика ғылымдарының кандидаты, ауыл шаруашылығы саласында ғылыми зерттеулер жүргізген. Жиырма жылдан астам әлеуметтік қорғау саласында еңбек етіп, облыстық департаменттерді және мемлекеттік зейнетақы төлеу орталығының өңірлік филиалын басқарды.

Аймақ басшысы еңбек ардагерлерін мерейтойымен құттықтады

<a href="https://kyzylorda-news.kz/ru">Kyzylorda-news.kz</a> Қазақстан Республикасы Премьер-министрінің орынбасары – мәдениет және ақпарат министрі Аида Балаеваның төрағалығымен Қызылорда қаласында өңірдің әлеуметтік саласын дамыту мәселелері қаралды. Кеңеске облыс әкімі Нұрлыбек Нәлібаев, сондай-ақ салалық министрліктердің өкілдері қатысты, деп хабарлайды Primeminister.kz.Жиын барысында алдымен жоғары білім мен ғылым мәселелері талқыланды. Қатысушылар өңірдегі жоғары білім мен ғылым саласының әлеуетін жан-жақты саралады. Қызылорда облысында үш жоғары оқу орны жұмыс істейді, онда 20 мыңға жуық студент білім алуда. Кейінгі үш жылда студенттер саны 21 %-дан астам артқан. Бұл – жастар арасында жоғары білімге деген тұрақты сұраныс бар екенін көрсететін маңызды көрсеткіш.Салаға жауапты министр еңбек нарығында сұранысқа ие мамандықтар бойынша басым бағыттарды атап өтті. Сонымен қатар, өңірге қажетті кадрларды даярлау жұмысын білім беру тапсырысымен нақты сәйкестендіру және оқытуды практикаға бағыттап күшейту қажет екенін айтты.<blockquote>«Мамандар даярлауда формалды тәсілден арылатын уақыт келді. Әкімдіктер кадр даярлау жұмысын алдын ала жоспарлап, білім беру тапсырысын нақты бағыттар бойынша жүргізуге тиіс. Өңірлік қолдау тетіктері, оның ішінде әкім гранттары мен өңірлік гранттар да болуы керек. Егер қандай да бір бағыттар нәтиже бермей, экономиканың сұранысына сәйкес келмесе, онда нақты шешімдер қабылдау қажет. Тіпті жекелеген факультеттерді оңтайландыруға дейін бару керек», — деді Аида Балаева.</blockquote>Кеңесте денсаулық сақтау саласына қатысты мәселелер де талқыланды. Ведомствоның мәліметінше, өңірде алғашқы медициналық-санитариялық көмектің инфрақұрылымын және аудандық ауруханаларды дамыту жұмыстары жалғасып жатыр. Бұл бағытта жаңа нысандар салу, сондай-ақ диагностикалық базаны жаңарту шаралары жүйелі түрде жүргізілуде.Сонымен бірге нақты шешімдерді қажет ететін бірқатар түйткілдер де көтерілді. Атап айтқанда, алғашқы медициналық-санитариялық көмектің тиімділігін арттыру, алдын алу жұмыстарының нәтижесін күшейту, балалы отбасыларға көрсетілетін патронаж қызметінің сапасын жақсарту, скринингтердің объективтілігін қамтамасыз ету және ауруларды ерте анықтау тетіктерін жетілдіру қажеттігі айтылды. Сондай-ақ кейбір аудандық ауруханаларда диагностикалық мүмкіндіктердің жеткіліксіздігі салдарынан инсульт қызметінің жұмысы шектеліп отырғаны секілді өзекті мәселелер де назарға алынды.Осы ретте Аида Балаева басты басымдық алдын алу жұмыстары болуы керектігін ерекше атап өтті.<blockquote>«Біз үшін басты міндет – ауруды емдеуден бұрын, оның алдын алу шараларын жүйелі түрде күшейту. Біріншіден, скрининг сапасын арттырып, дертті ерте анықтауды формализмсіз жүргізу қажет. Екіншіден, медициналық қызмет көрсету деңгейі жоғары болуға тиіс. Үшіншіден, халықпен тұрақты әрі тиімді ақпараттық-түсіндіру жұмыстарын ұйымдастыру маңызды. Сонымен қатар бақылау қатаң болуы керек. Бөлінген қаражаттың қалай жұмсалғанын және тұрғындардың нақты қандай нәтиже алғанын көріп отыруымыз қажет. Өйткені Үкіметтің қаржысы – халықтың ақшасы», — деді Премьер-министрдің орынбасары.</blockquote>Жиында ҚР Оқу-ағарту министрлігі басқару сапасы мен оқу нәтижелеріне қатысты жүргізілген талдаудың қорытындыларын таныстырды. Проблемалық мәселелердің қатарында білім сапасын ішкі және сыртқы бағалау нәтижелері арасындағы айырмашылық ерекше аталды.Сондай-ақ баяндамада кейбір білім беру ұйымдары біліктілік талаптарына сай келмегендіктен жабылғаны айтылды. Бұл жағдай білім сапасын бақылауды күшейтуді, мектептерге нысаналы әдістемелік қолдау көрсетуді, сонымен қатар саланың цифрлық трансформациясын жеделдетуді қажет ететіні атап өтілді.Өңір үшін басым бағыт ретінде Байқоңыр қаласындағы мектептерді дамыту жобалары, сондай-ақ Қызылорда қаласындағы №3 IT мектеп-лицейі базасында «Жасанды интеллект» бейінді мектебін құру бастамасы көрсетілді.Сонымен бірге, жұмыспен қамтуды әкімшілендіру және мемлекеттік қолдау шараларының тиімділігін арттыру мәселелері бойынша ҚР еңбек және халықты әлеуметтік қорғау бірінші вице-министрі Асқарбек Ертаев баяндама жасады. Ол субсидияланатын жұмыс орындарын ұйымдастыру қағидаларына енгізілген өзгерістерді қосымша пысықтау және өңірлермен келісу қажет екенін жеткізді. Бұл ретте жұмыс берушілерге қойылатын талаптарды нақтылау, сондай-ақ қолдау шараларын цифрлық құралдар арқылы сүйемелдеу тәжірибесін жетілдіру қажеттігі айтылды.Тарихи-мәдени мұра нысандарына бай Сыр өңірінде мәдени туризмді дамыту мәселесі де кеңестің күн тәртібінен тыс қалған жоқ. Сонымен қатар жиында Байқоңыр ғарыш айлағының туристік әлеуеті де талқыланды.Маңызды бағыттардың бірі ретінде тарихи-мәдени мұрамен жүйелі жұмыс жүргізу қажеттігі атап өтілді. ҚР Мәдениет және ақпарат министрлігінің мәліметінше, өңірде мәдениет және архив ісі саласында 413 ұйым қызмет етеді. Кейінгі жылдары бірқатар жаңа нысандар пайдалануға беріліп, бұл мәдени инфрақұрылымды кезең-кезеңімен жаңартуға және тұрғындардың жергілікті деңгейде көрсетілетін қызметтерге қолжетімділігін кеңейтуге мүмкіндік беріп отыр.Сонымен бірге, белгіленген нормативтерге сәйкес, тұрғындарды мәдениет мекемелерімен жеткілікті қамту үшін инфрақұрылымды әлі де кеңейту қажет екені айтылды.Қорытындылай келе, Аида Балаева өңірдің негізгі даму бағыттары бойынша жүйелі жұмысты күшейтуді тапсырды. Әсіресе кадр даярлау ісін экономиканың нақты сұранысымен үйлестіру, нәтиже бермейтін білім беру бағдарламаларын қайта қарау, сондай-ақ мектептер мен жоғары оқу орындарындағы идеологиялық және тәрбиелік жұмысты бастауыш сыныптан бастап үнемі бақылауда ұстау қажеттігіне ерекше назар аударылды.Сонымен қатар ғылым саласында ғылым мен өндіріс арасындағы байланысты күшейту міндеті қойылды. Бұл ғылыми әзірлемелердің нақты нәтижеге айналып, өнеркәсіптің тиімділігін арттыруға тікелей ықпал етуге тиіс екені атап өтілді.Сонымен қатар МӘМС жүйесінде сақтандырылмаған азаматтармен жұмысты күшейту, алдын алу шаралары мен скринингті жандандыру, вакциналауға қатысты жалған ақпараттың таралуына қарсы әрекет ету, емханалардағы қызмет көрсету сапасын арттыру бойынша нақты тапсырмалар берілді.Бұдан бөлек, орфандық аурулар мен паллиативтік көмек мәселелері, сондай-ақ бюджет қаражатының мақсатты жұмсалуы қатаң бақылауда болуы тиіс екені ерекше атап өтілді.Әлеуметтік салада жастар арасындағы жұмыссыздықты талдау, оларды қолдауға арналған нақты әрі жүйелі іс-шаралар жоспарын әзірлеу, сондай-ақ мүгедектігі бар адамдарды креативті индустрия және қолөнер бағыттары арқылы еңбекке тарту қажеттігі көрсетілді.Білім беру саласында бастауыш сыныптағы білім сапасын көтеру, мұғалімдердің кәсіби дайындығын күшейту, әрі педагогтердің жұмысын жеңілдету үшін жасанды интеллектіні көмекші құрал ретінде енгізу міндеті қойылды. Сонымен бірге балалардың сын тұрғысынан ойлауын және шығармашылық қабілетін қатар дамытуға басымдық берілуге тиіс.Туризм саласында өңірдің туристік әлеуетін күшейту үшін даму тұжырымдамасына нақты ұсыныстар енгізу, инфрақұрылымды жақсарту және ақпараттық қолдауды арттыру тапсырылды. Сонымен қатар мәдени туризмді дамыту, іс-шаралар күнтізбесін қалыптастыру, сондай-ақ бірегей фестивальдер ұйымдастыру арқылы өңірдің туристік брендтерін жүйелі түрде ілгерілету қажет екені айтылды.Кеңес қорытындысында өңірлік және республикалық деңгейде ақпараттық жұмысты күшейтудің маңызына ерекше назар аударылды. Нақты нәтижелерді ашық көрсетіп отыру қажеттігі айтылып, негізгі мақсат елдің дамуын қамтамасыз ету және халықтың әлеуметтік жағдайын жақсарту екені атап көрсетілді.Фото: рrimeminister.kz

Қызылорда облысында өңірдің әлеуметтік саласын дамыту мәселелері бойынша кеңес өтті

<a href="https://kyzylorda-news.kz/">Kyzylorda-news.kz</a>&nbsp; Шиелі кенті «Арман» мәдениет үйінде аудан әкімі Айтбай Жандарбековтың қатысуымен Мемлекет басшысы Қасым-Жомарт Кемелұлы Тоқаевтың 2025 жылды «Жұмысшы мамандықтар жылы» деп жариялауына және Президент бастамасымен жүзеге асырылып жатқан «Таза Қазақстан» республикалық акциясы аясында салтанатты марапаттау шарасы өтті.<img src="https://knadmin.beoblood.kz/uploads/Shielide_e_bek_adamdaryna_rmet_k_rsetildi_1_f5567e6e63.jpg" alt="Шиеліде еңбек адамдарына құрмет көрсетілді 1.jpg">Шараның басты мақсаты қарапайым еңбек адамдарының қоғамдағы мәртебесін арттыру, еңбегін лайықты бағалау және Киелі Шиелі ауданында таза, жайлы әрі қауіпсіз орта қалыптастыру жолында аянбай еңбек етіп жүрген азаматтарды құрметтеу болып табылды.Салтанатты жиында аудан әкімі өз сөзінде Мемлекет басшысының «Жұмысшы мамандықтар жылы» бастамасы еңбекке адал азаматтарды қолдауға бағытталған маңызды шешім екенін атап өтті. Сонымен қатар «Таза Қазақстан» акциясы аясында ауданда тазалық пен абаттандыру жұмыстары жүйелі түрде жүргізіліп, елді мекендер, көшелер мен қоғамдық орындардың көркі айтарлықтай жақсарғанын жеткізді.Өтіп бара жатқан Жылан жылының аудан үшін табысты болғанын атап өткен аудан әкімі Шиелінің «Үлгілі елді мекен» облыстық байқауында «Үлгілі аудан» атануын, сондай-ақ тазалық жұмыстарын күшейту мақсатында арнайы техникалардың алынуын оң нәтиже ретінде атап өтті.&nbsp;Сөз соңында аудан басшысы Айтбай Жандарбеков тазалық әрбір тұрғынның ортақ жауапкершілігі екенін атап өтіп, еңбек адамдарына алғысын білдіріп, барша аудан халқын бірлік пен еңбекке шақырды.Салтанатты шара барысында 5 азаматқа "Сарыағаш шипажайына" жолдама, 27 азаматқа қаржылай сыйлықтар табысталды.&nbsp;Сонымен қатар аудан өнерпаздары ән мен күйден шашу шашып, еңбек адамдарына мерекелік көңіл-күй сыйлады және салтанатты шараға қатысушыларға аудан әкімдігінің атынан жаңа жылдық сыйлықтар таратылды.

Шиеліде еңбек адамдарына құрмет көрсетілді

<a href="https://kyzylorda-news.kz/">Kyzylorda-news.kz</a> Ауданда биылғы жылға жоспарланған бірнеше инфрақұрылымдық жоба сәтті жүзеге асып келеді. Бұл жобалар – халыққа қолайлы жағдай жасап, ауданның әлеуметтік-экономикалық дамуына серпін беруді көздейді. 10 айдың қорытындысы бойынша «Ауыл – ел бесігі» жобасы аясында бірқатар маңызды әлеуметтік нысан бой көтеріп, толықтай пайдалануға берілді. Бұл туралы аудандық құрылыс, сәулет және қала құрылысы бөлімі басшысының міндетін атқарушы Нұршат Бағдатұлы хабарлады.Кентте спорт кешені салынды&nbsp;Аудан орталығында салынған жаңа спорт кешені тұрғындардың салауатты өмір салтын ұстануына мүмкіндік бермек. Жобаның жалпы құны – 363,2 млн теңге. Құрылыс жұмыстары үшін бас мердігер – «Алтын Айдарлы» ЖШС-мен келісімшарт жасалды. Жобаны «Гранд Тауэр Сервис» ЖШС авторлық, ал «МунайГаз Инжиниринг» ЖШС техникалық жағынан қадағалады. Құрылыс 100% аяқталып, нысан халық игілігіне берілді.&nbsp;Бестам ауылында 150 орындық клуб пайдалануға берілмек&nbsp;Сонымен қатар Бестам ауылында 150 орындық жаңа клуб салынды. Бұл жоба да «Ауыл – ел бесігі» бағдарламасы аясында жүзеге асып, ауыл тұрғындарының мәдени өміріне серпін беретін маңызды нысанға айналмақ. Құрылыс жұмыстарының жобалық құны – 460,6 млн теңге. Бас мердігер ретінде «СК Дәнекер» ЖШС жұмыс атқарса, авторлық бақылаушы – «ПроектСервис» ЖШС, техникалық қадағалаушы – «ARTERIA» ЖШС болды. Жоба 439,8 млн теңгеге орындалып, бүгінгі таңда құрылыс жұмыстары толығымен аяқталған. Бұл нысандардың іске қосылуы ауданның әлеуметтік инфрақұрылымын дамытуға серпін беріп, жергілікті тұрғындардың өмір сүру сапасын арттыруға зор үлес қосады. Мұндай жобалар алдағы уақытта да жалғасын табатын болады.Инфрақұрылымдық жұмыстар жүйелі жүргізілудеЖалпы ауданда тұрғындарға қолайлы жағдай жасау мақсатында бірнеше маңызды инфрақұрылымдық жоба жүзеге асырылуда. Ауданның шығыс аймақтары мен Ақорда аумағында жүргізілген құрылыс жұмыстары тұрғындардың өмір сүру сапасын жақсартуға бағытталған.Сонымен қатар Шиелі кенті Т.Рысқұлов көшесіндегі No19 мекенжайға автотұрақ салынды. «Милениум Строй» ЖШС атқарған құрылыс 67,8 млн теңгеге бағаланды. Белгіленген мерзімнен кешіккені үшін мердігерден 1,5 млн теңгеден астам айыппұл өндірілді. Қазіргі таңда бұл нысан да ел игілігіне берілді. Бұдан бөлек, Шиелі кентінің шығыс аймақтарына инфрақұрылым жүргізу жұмыстарының 1-кезеңі басталды. Атап айтқанда, жол белгілеу жұмыстары «Шиелі Жолшы» ЖШС тарапынан жүзеге асырылуда. Жалпы жоба құны 312,5 млн теңге болса, 2025 жылға 124,8 млн теңге қаралған. Қараша айының өзінде 40 млн теңге игерілді.Сонымен бірге Ақорда ауданындағы тұрғын үйлердің инфрақұрылымына қатысты сметалық құжаттамаға түзету енгізіліп, құрылыс жұмыстары басталды. Мемлекеттік сатып алу нәтижесінде бас мердігер ретінде «Нур-Талап и К» ЖШС таңдалды. Жобаның авторлық қадағалаушысы – «Нур Жол Проект» ЖШС, техникалық қадағалаушы – «BSP CONSULTING» ЖШС. Жалпы құны 48,5 млн теңге болатын жоба толық аяқталып, нысан пайдалануға берілді.&nbsp;Сумен қамту – бірінші кезекте&nbsp;Шиелі кентінің шығыс аймақтарына инфрақұрылым тарту жұмыстарының бірінші кезеңі – сумен жабдықтау жүйесімен қамтамасыз ету. Аталған жоба 2025 жылдың ақпан айында басталып, мемлекеттік сатып алу жұмыстары толық аяқталды.Бас мердігер – «Ансар-сервис» ЖШС. Жобаның авторлық қадағалаушысы – «ВИБО-строй» ЖШС, ал техникалық қадағалаушы – «Flatiron Building» ЖШС. Жалпы жоба құны 210,0 млн теңге болса, аудандық бюджеттен 17,2 млн теңге бөлініп, толығымен игерілді.&nbsp;Тұрақты даму – басты мақсат&nbsp;Аталған жобалар ауданның әлеуметтік инфрақұрылымын жетілдіріп, тұрғындардың қажеттіліктерін өтеуге бағытталған. Аудан әкімдігі мен мердігер ұйымдардың тығыз қарым-қатынасы, қадағалау құрылымдарының бақылауы арқасында жұмыстар сапалы әрі уақытында атқарылып отыр. Шиелі өңірі алдағы уақытта да осындай игі істермен жаңғырып, тұрғындарға жайлы орта қалыптастыру жолында табысты қадамдар жасауда.Маңызды нысандар күрделі жөндеуден өтудеМемлекеттік кірістер департаментінің Шиелі аудандық басқармасының ғимаратына ағымдағы жөндеу жұмыстары жүргізілді. Мердігер «АК-ЮГ ҚҰРЫЛЫС» ЖШС-мен жасалған келісімшарт аясында 18,6 миллион теңге игеріліп, құрылыс толық аяқталып, нысан пайдалануға берілді. Сондай-ақ Шиелі кенті, Абай көшесі No28 үйде орналасқан спорт кешеніне күрделі жөндеу жұмыстары жүргізілуде. 2025 жылдың сәуір айында мемлекеттік сатып алу рәсімдері аяқталып, бас мердігер ретінде «СК ЛИРА» ЖШС-мен келісімшарт жасалған. Жобаның авторлық қадағалаушысы – «Проектная группа «НЕО»» ЖШС, техникалық бақылаушы – «Atlant Engineering» ЖШС. Жалпы жобаның құны 249,9 млн теңге. Аудандық бюджеттен 50 млн теңгеден астам қаражат бөлініп, қазіргі уақытта құрылыс жұмыстары белсенді жүргізілуде.&nbsp;22-бекет газбен қамтылды&nbsp;Сонымен қатар өткен жылы тамыз айында Шиелі ауданына қарасты 22-бекет елді мекенінде орамішілік газ тарату желілерін салу жұмыстары басталған болатын. Бас мердігер – «Дос Строй Проект» ЖШС, келісімшарт 10.08.2024 жылы бекітілген. Жобаның авторлық қадағалаушысы – «AES and Limited» ЖШС, техникалық қадағалаушы – «СтандартСтройСервис LTD» ЖШС. Жалпы құны 34,4 млн теңге болатын құрылысқа 2024 жылы аудандық бюджеттен 30 млн теңге, ал 2025 жылы 4,4 млн теңге бөлініп, наурыз айында барлық жұмыстар толығымен аяқталып, нысан пайдалануға берілді.&nbsp;69 заңсыз кәсіпкерлік нысан анықталды&nbsp;2025 жылғы 23 қыркүйекте Қызылорда облысының мемлекеттік сәулет-құрылыс бақылауы басқармасына Шиелі ауданы аумағында жүргізілген мониторинг нәтижесінде заңсыз салынған 69 кәсіпкерлік нысан туралы ақпарат жолданды.Анықталған бұл нысандардың ешбірі құрылыс- монтаж жұмыстарына рұқсат құжаттарынсыз салынғаны белгілі болды. Бұл — «Қазақстан Республикасындағы сәулет, қала құрылысы және құрылыс қызметі туралы» Заң талаптарына қайшы. Аталған заңсыз құрылыстар бойынша тиісті шаралар қабылдау мақсатында басқарма тарапынан тексерулер жүргізіліп, нысан иелеріне әкімшілік жауапкершілікке тарту, құжаттарды заңдастыру, жою немесе қайта жобалау сияқты талаптар қойылатын болады. Мұндай жұмыстар тұрғындар мен кәсіпкерлер арасында құрылыс саласындағы құқықтық мәдениетті арттыруға және қауіпсіздікті қамтамасыз етуге бағытталған. Бақылау шаралары алдағы уақытта да тұрақты түрде жалғасын табады.Г.ЯхияФото: автордікі

Шиелі: Құрылыс қарқыны жоғары

<a href="https://kyzylorda-news.kz/">Kyzylorda-news.kz</a> Бүгін – Сыр өңіріндегі ғана емес, ел өміріндегі айтулы күн! Өйткені экономиканың күретамыры саналатын отандық жол инфрақұрылымын жетілдіру тарихының жаңа парағы ашылды! Халық көптен күткен, көлік жүргізушілері мен жолаушылардың арманына айналған «Қызылорда-Жезқазған» жолы пайдалануға берілді.Салтанатты рәсімге облыс әкімі Нұрлыбек Нәлібаев, «Қазавтожол» ҰК» АҚ басқарма төрағасы Дархан Иманашев, құқық қорғау органдарының бірінші басшылары, облыстық мәслихат хатшысы Мұрат Тілеумбетов, депутаттар және ардагерлер қатысты.Аймақ басшысы бұл жолдың өңір экономикасына, өндірістің өркендеуіне, тұрғындардың әл-ауқатының артуына тигізетін оң ықпалы мен ерекше маңызын атап өтті.<blockquote>«Бүгін – аймағымыз үшін тарихи күн! «Қызылорда-Жезқазған» автомобиль жолының ашылу рәсімінде бас қостық. Халқымыз ұзақ жылдан бері армандап келген автожолды салуға қолдау көрсеткен Мемлекет басшымыз Қасым-Жомарт Кемелұлына барша Сыр жұртшылығының атынан зор ризашылығымызды, шынайы алғысымызды білдіреміз.Республикалық маңызы бар автомобиль жолы туралы мәселе Тәуелсіздік алған кезеңнен бері бірнеше мәрте көтерілді. Ауа райының қолайсыздығына қарамастан, тұрғындарымыз қара жолмен Елордаға, Ұлытау, Қарағанды облыстарына қатынады. Астанаға 2 мың шақырымнан астам жол жүріп, Балқаш арқылы да барды.Енді міне, Президентіміздің ерекше қолдауының арқасында қанша жылдан бері халқымыз көтерген өзекті мәселе өз шешімін тапты. Облыс аумағындағы 216 шақырым жол толық қайта жаңғыртудан өтіп, тиісті жұмыстар аяқталды. Жобаны жүзеге асыруға 84 млрд. теңге бөлінді.Бұрынғы өткен бабалардан қалған «Бақ, қайда барасың, ынтымағы жарасқан елге барамын», – деген жақсы сөз бар. Әрдайым бірлігіміз бекем, ынтымағымыз ырысты болсын! Жүргізушілер мен жолаушыларға әрдайым ақ жол, сәт сапар тілейміз! Жаңа жол берекенің бастауы болғай», – деді Нұрлыбек Машбекұлы.</blockquote>Рәсімде ауқымды жобаның жүзеге асуына үлес қосқан құрылысшылар мен инженерлерге, жол саласының мамандарына облыс әкімінің Алғыс хаты табысталды. «Қазавтожол» ҰК» АҚ басқарма төрағасы Дархан Иманашев, облыстық ардагерлер кеңесінің төрағасы Серік Дүйсенбаев құттықтау сөз сөйледі.Негізі «Қызылорда-Жезқазған» жолының ашылуы келесі жылға жоспарланған болатын. Халықтың сұранысы ескеріліп, мерзімінен бұрын пайдалануға берілді.<img src="https://knadmin.beoblood.kz/uploads/588310925_2461691284226369_5897200104540059547_n_16d35524f7.jpg" alt="588310925_2461691284226369_5897200104540059547_n.jpg"><img src="https://knadmin.beoblood.kz/uploads/590425837_2461691577559673_2693692616413657905_n_d4c9225201.jpg" alt="590425837_2461691577559673_2693692616413657905_n.jpg">Бұрын сапарға шыққандар екі аралықта 20 сағат жол жүретін. Енді жаңа жолға түскен жолаушылар 16 сағатта діттеген жеріне барады. Жол тегіс, сапасы жоғары, қауіпсіздік, жайлылық ескерілген.Ұлытау облысының аумағында басталған құрылыс жұмыстары аяқталып, жаңа жол пайдалануға берілгенде Астанаға бағыт алған көлік 12 сағатта жететін болады.Бүгінде «Қызылорда-Жезқазған» жолын «Батыс Еуропа-Батыс Қытай» автодәлізіне қосатын 25 шақырымдық айналма жол салатын мердігер мекеме анықталуда. Жақын күндері құрылысы басталады. Жоба құны – 46 млрд. 3 млн. теңге.<img src="https://knadmin.beoblood.kz/uploads/586964906_2461691604226337_7306959996438302161_n_ccf1f94fb7.jpg" alt="586964906_2461691604226337_7306959996438302161_n.jpg">Республикалық маңызы бар жол көлік қатынасын едәуір жеңілдетіп, жүк тасымалының тиімділігін арттырады. Жол бойында заманауи сервистік қызмет көрсететін пункттер бой көтеріп, шағын және орта бизнес жанданады. Аймақтар арасындағы әлеуметтік-экономикалық интеграция нығая түседі.Фото: Қызылорда облысы әкімінің баспасөз қызметі

«Қызылорда- Жезқазған» жолы пайдалануға берілді

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың қатысуымен Қармақшы ауданының Дүр Оңғар ауылына газ қосу рәсімі өтті. Оған Парламент Сенаты мен Мәжілісінің депутаттары Руслан Рүстемов, Мұрат Әбенов, Мұрат Ергешбаев, ел ағалары мен ауыл тұрғындары қатысты.Аймақ басшысы тұрғындарды көптен күткен ігіліктің іске асуымен, яғни ауылға көгілдір отынның келуімен құттықтады.<blockquote>«Мемлекет басшымыз «Үкімет газ тартылған елді мекендердің санын барынша арттыруға және 1700 шақырым газ желісін жаңғыртуға тиіс. Бұл 300 мыңнан астам адамды көгілдір отынмен қамтамасыз етуге мүмкіндік береді», – деп атап өтті.Аймағымызда 2021 жылдың соңында газдандыру деңгейі 67 пайыз болатын, 2022-2025 жылдар аралығында 63 млрд. 600 млн. теңгеге 77 жоба жүзеге асырылды.Өткен аптада Сырдария ауданының Шаған ауылына табиғи газ берілсе, Жаңақорған ауданында автоматты газ тарату станциясы іске қосылды. Бүгін Өздеріңізбен бірге Дүр Оңғар ауылы тұрғындарының тұрмыс-тіршілігіне жаңа тыныс беретін іс-шараға, табиғи газға қосу сәтіне куә болудамыз. Осындай жұмыстардың нәтижесінде биыл облысымыздың газдандыру көрсеткішін 83 пайызға жеткіземіз.Жерлестерімізді көптен күткен газдың қосылуымен құттықтаймын! Бұл – бәріміздің ортақ қуанышымыз! Көгілдір отын әрбір отбасының жылуын, Отанымыздың қуатын арттыра берсін!Елдің дамуы ауылдан, ауылдың гүлденуінен басталады. Ауылдың дамуы, келешегінің жемісті болуы – Сіздерге, еңбекқорлықтарыңыз бен ауызбірліктеріңізге байланысты. Баршаңызға мықты денсаулық, отбасыларыңызға бақ-береке, ел игілігі жолындағы қызметтеріңізге сәттілік тілеймін!», – деді Нұрлыбек Машбекұлы.</blockquote>Рәсімде ауданның әлеуметтік-экономикалық дамуына үлес қосқан алдыңғы буын ағалар мен мердігер мекеме қызметкерлері облыс әкімінің Алғыс хатымен марапатталды. Парламент Сенатының депутаты Руслан Рүстемұлы құттықтау сөз сөйледі.Айта кетейік, бүгінде Қармақшы ауданын газдандыру деңгейі 78 пайыз. Екі мыңнан астам тұрғыны бар Дүр Оңғар ауылының газ желісіне қосылуы бұл көрсеткішті 83 пайызға жеткізеді. Аталған жобаға облыстық бюджеттен 7 млрд 200 млн теңге бөлінді.<img src="https://knadmin.beoblood.kz/uploads/588436733_1145528464435063_7118434669885202696_n_b012da5632.jpg" alt="588436733_1145528464435063_7118434669885202696_n.jpg">Ауылға тартылған 62,5 шақырымдық жоғары қысымды газ құбыры Жосалы кентіндегі автоматтандырылған газ тарату станциясынан Сырдария өзені арқылы жүргізілді. Бұл жоба алдағы уақытта 10 мыңнан астам халқы бар 9 елді мекенді кезең-кезеңімен магистральдық газ желісіне қосуға мүмкіндік береді.

Редакция таңдауы