<a href="https://kyzylorda-news.kz/">Kyzylorda-news.kz</a> &nbsp;Сыбайлас жемқорлыққа қарсы қызмет білім беру саласындағы заңдылықты қамтамасыз ету жөніндегі жұмыстың нәтижесінде Алматы облысында жүйелі сыбайлас жемқорлық фактілерінің жолын кесті,&nbsp;деп хабарлайды&nbsp;<a href="https://el.kz/audandyq-bilim-boliminin-basshysy-zhane-zheti-buhgalter-sottaldy_400024186/">El.kz</a>&nbsp;ақпарат агенттігі.Мәселен, Алматы облысында Іле аудандық соты аудандық білім бөлімінің басшысы Л.Каткееваға және осы бөлімнің 7 бухгалтеріне қатысты үкім шығарды.Олар білім беру саласында нақты еңбек қызметін жүзеге асырмаған адамдарға жалақы аудару арқылы 686 млн теңге сомасында бюджет қаражатын жымқырғаны үшін кінәлі деп танылды.Сонымен қатар, ол лауазымдық өкілеттіктерін асыра пайдаланып, өзінің жүргізушісін ведомстволық бағынысты мектеп-гимназияға жалпы сомасы 4,9 млн теңге жалақы заңсыз төленген кәсіптік бағдар беруші лауазымына жалған жұмысқа орналастырған.Каткеева мемлекеттік қызметте қызмет атқаруға өмір бойына тыйым сала отырып, 8 жылға бас бостандығынан айырылды.Бухгалтерлерге мемлекеттік қызметте 10 жыл қызмет атқаруға тыйым салынып, 7 жылдан 8 жылға дейін бас бостандығынан айыру жазасы тағайындалды.Сот актісі заңды күшіне енген жоқ.Фото: Нұрболат Нұржаубай

Аудандық білім бөлімінің басшысы және жеті бухгалтер сотталды

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде Қызылорда облысының прокуроры Ризабек Ожаров білім алушылармен кездесу өткізді.Шараның негізгі мақсаты – қоғамдағы құқықтық мәдениетті арттыру, жастардың заңға деген көзқарасын қалыптастыру және құқықтық сауаттылықты жетілдіру.Кездесуді университеттің Басқарма Төрағасы – Ректор Бейбіткүл Каримова ашып, оның маңыздылығына тоқталды. Ол өз сөзінде құқық қорғау органдары мен университет арасындағы тығыз байланыстың маңызын атап өтті. Сонымен қатар, жастардың құқықтық білімін арттыруда мұндай кездесулердің тиімді екенін айтып, университет тарапынан білім алушылардың құқық саласындағы кәсіби дамуына бағытталған бастамалар әрдайым қолдау табатынын жеткізді.Жиынға университеттің студенттері мен «Экономика және құқық» институтының оқытушылары қатысты. Бүгінде аталған институттың «Құқықтану» білім беру бағдарламасында 414 студент білім алуда. Олар азаматтық, әкімшілік және қылмыстық құқық салалары бойынша білім алып, «Студенттік заң клиникасы» мен «Жас заңгерлер» ғылыми-шығармашылық үйірмесі аясында теориялық білімдерін тәжірибемен ұштастырып келеді.Кездесу барысында Ризабек Кәрімұлы студенттермен өзінің қызметтік жолындағы тәжірибесімен бөлісіп, құқық қорғау саласының ерекшеліктері мен талаптары жайлы кеңінен әңгімеледі. Сондай-ақ, жастарға заң алдындағы жауапкершілікті сезініп, әділетті қоғам құруда белсенді болуға шақырды.Кездесу соңында&nbsp;оқытушылар мен студенттер өздерін толғандырған түрлі мәселелер бойынша сұрақтар қойып, прокурормен еркін форматта пікір алмасты.<img src="https://knadmin.beoblood.kz/uploads/Studenttermen_kezdesu_1_1ae8178536.jpg" alt="Студенттермен кездесу 1.jpg">

 Қызылорда облысының прокуроры студенттермен кездесті

<a href="https://kyzylorda-news.kz/">Kyzylorda-news.kz</a> Бүгін Мемлекеттік қызмет істері агенттігінің төрағасы Дархан Жазықбай Президенттік жастар кадр резервіне кезекті іріктеудің ерекшеліктері мен кезеңдері туралы айтты.Агенттік төрағасы, Президенттік жастар кадр резерві – дарынды, бастамашыл, кәсіби білікті жастарды мемлекеттік басқару жүйесіне тартуға бағытталған маңызды жоба екендігіне назар аударды. Мемлекет басшысы Президенттік жастар кадр резервінің форумында атап өткендей, «еліміздегі бизнес, ауыл шаруашылығы, қаржы, медицина, білім және басқа да секторларда табысты еңбек етіп жүрген адамдар жеткілікті. Нақты нәтижеге ұмтылып, тұтынушының қажеттілігін өтеу үшін жұмыс істейтін осындай мамандардың әлеуетін жұмылдыру керек».Бұған дейін 2019, 2021 және 2023 жылдары өткен іріктеулерге қатысуға жалпы 60 мыңнан астам қазақстандықтар қызығушылық танытты. Іріктеулер қорытындысы бойынша резервке 400 адам қабылданды. Бүгінде олардың 318-і жауапты қызметтерге тағайындалып, экономиканың түрлі салаларында еліміздің дамуына өз үлестерін қосуда.Атап айтқанда, 167 – орталық мемлекеттік органдарда, 37 -жергілікті атқарушы органдарда, 62 – ұлттық компанияларда, 52 – өзге ұйымдарда қызмет атқаруда. Сондай-ақ 39 резервші саяси лауазымдарда, 3 – «А» корпусының лауазымдарында, 2 – Мәжіліс депутаты, 1 – мәслихат депутаты болып қызмет етуде.Дархан Жазықбайдың айтуынша, биылғы іріктеудің басты ерекшелігі – әр бағыт бойынша кандидаттардың біркелкі санын қамтамасыз ету мақсатында әрбір кезеңде пропорционалды іріктеу өткізу. Резервтің әр салалық бағыты бойынша квоталар қарастырылып, іріктеу сол салалық бағыт бойынша ғана жүргізілетін болады. Бұл әдіс салалар арасындағы теңгерімді қамтамасыз етіп, нақты бағыттар бойынша үміткерлерді іріктеуді қамтамасыз етеді.Іріктеу мемлекеттік аппараттың салалық кадрларға қажеттілігін ескере отырып, инфрақұрылым, өнеркәсіп және сауда саясаты, агроөнеркәсіптік кешен және қоршаған орта, сыртқы саясат және инвестициялар; экономикалық және қаржылық саясат, цифрландыру, әлеуметтік саясат және азаматтық қоғам сынды 6 негізгі сала бойынша жүргізіледі. Кандидат тіркелу кезінде көрсетілген салалық бағыттардың бірін таңдауы қажет.Үміткерлерге қойылатын талаптар өзгеріссіз қалады: іріктеуге жасы 35-тен аспаған, жоғары білімі және 5 жыл жалпы жұмыс тәжірибесі бар, мемлекеттік тілді В1 деңгейінен төмен емес меңгерген Қазақстан Республикасының азаматы қатыса алады.Президенттік жастар кадр резервінің мүшесі болу үшін үміткерлер 6 кезеңнен тұратын кешенді іріктеуден өтуі тиіс.Құжаттарды қабылдау – 1-30 маусым аралығында pkrezerv.gov.kz ресми платформасында онлайн режимде жүзеге асырылады. Іріктеудің объективтілігін қамтамасыз ету үшін кандидаттардың деректері жеке нөмір беру арқылы жасырылады. Бағалаушылар үшін үміткердің кім екендігі беймәлім болады.Мәтіндік және сандық ақпаратпен жұмыс істеу қабілетін бағалау – тестілеу прокторинг жүйесімен, аудио және бейнефиксациямен өтеді, әділдік пен ашықтық қамтамасыз етіледі. Талаптарға сәйкес келетін барлық кандидаттар мәтіндік ақпаратпен жұмыс істеу қабілетін бағалаудан өтеді. Бұл ретте сандық тестілеуге әр салалық бағыт бойынша ең көп балл жинаған кандидаттардың 50%-ы жіберіледі.Ситуациялық тапсырмаларды шешу кезеңі – кандидаттардың таңдаған салалық бағыттарына байланысты нақты проблемаларды шешу бойынша ұсыныстарын бағалауға бағытталған. Бұл кезең онлайн-режимде эссе жазу форматында өтеді.Ассессмент-орталығы мен құзыреттер бойынша сұхбат – офлайн форматта, Президент жанындағы мемлекеттік басқару академиясында өтетін бұл кезеңде үміткерлер мінез-құлық индикаторлары және кәсіби құзыреттер бойынша топтық және жеке тапсырмалардан өтеді. Онлайн форматтағы жеке сұхбат кәсіби HR-менеджерлермен өткізіледі.Сарапшылық комиссиямен әңгімелесу – арнайы комиссиямен сұхбаттасу түрінде жүзеге асырылады. Оның қорытындысы бойынша Ұлттық комиссия отырысына 100-ден аспайтын кандидаттар тізімі ұсынылады.Ұлттық комиссияның отырысының қорытындысымен үздік 50 кандидат Президенттік жастар кадр резервіне қабылданады.Іріктеудің ашықтығы мен әділдігін қамтамасыз ету мақсатында кандидаттарды бағалау нәтижелері олардың жеке кабинетінде және кезең қорытындысы бойынша ақпарат ресми сайтта жарияланады.Агенттік төрағасы ел мүддесіне қызмет етемін деген белсенді жас азаматтарды Президенттік жастар кадр резервіне қатысуға шақырды.<blockquote>«Білімді, еңбекқор, отанға қызмет етуді парыз санайтын жастар – еліміздің тұрақты дамуының басты қозғаушы күші. Жастардың білімін, әлеуеті мен күш-жігерін ел игілігі үшін тиімді пайдалану, қоғамдық мүдделерге негізделген кәсіби мемлекеттік қызметшілердің жаңа буынын қалыптастыру – Агенттік жұмысының басты бағыттарының бірі», – деді Дархан Жазықбай.</blockquote>

1 маусымда Президенттік жастар кадр резервіне кезекті іріктеу басталады

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласындағы NIS-тің 7-сынып оқушысы Нұрдәуіт Мұхтар «Science. Technology. Algorithmization. Programming» халықаралық ғылыми-тәжірибелік конференциясында «Автономды жұлдыз іздеуші» жобасын ұсынып, STEM номинациясы бойынша 375 қатысушының арасынан ІІ орынға ие болды.Жоба – телескопты автоматты түрде жұлдызға бағыттайтын Arduino платформасында жасалған құрылғы. Бұл жоба STEM білім беру бағытына, яғни ғылым (физика мен астрономия), технология, инженерия және математикаға негізделген.<blockquote>«Қазылар алқасы жобаның техникалық мүмкіндіктерін, идеясының өзіндік ерекшелігін және практикалық маңызын жоғары бағалады. Нұрдәуіттің өнертабысы қазіргі мектеп оқушыларының ғылым мен технологиядан шабыттанып, нақты инженерлік шешімдер жасай алатынын көрсетеді», – дейді жоба жетекшісі Айнұр Құрақбаева.</blockquote><img src="https://knadmin.beoblood.kz/uploads/N_Ish_607228a276.jpg" alt="НИш.jpg">

Автономды жұлдыз іздеуші: Нұрдәуіттің инженерлік жобасы

<a href="https://kyzylorda-news.kz/">Kyzylorda-news.kz</a> Қытай Халық Республикасының Шыңжаң-Ұйғыр автономиялық ауданының орталығы – Үрімжі қаласында алғаш рет «Study in Kazakhstan» халықаралық білім беру көрмесі өтті. Ауқымды шара ҚР Ғылым және жоғары білім министрлігінің бастамасымен, Орталық Азия мен Қытай елдері білім министрлерінің алғашқы кездесуі және Шанхай ынтымақтастық ұйымына мүше мемлекеттердің білім министрлерінің 9-отырысы аясында ұйымдастырылды.Көрмеге Қазақстанның 16 жетекші жоғары оқу орны қатысып, олардың қатарында Қорқыт ата атындағы Қызылорда университеті де болды. Университетіміз көрме аясында білім беру саласындағы халықаралық байланыстарды кеңейту және инновациялық серіктестік орнату мақсатында белсенді жұмыс жүргізді.Іс-шара барысында Қорқыт ата атындағы Қызылорда университеті Орталық Азия мен Қытайдың жетекші жоғары оқу орындарымен ғылыми-білімдік ынтымақтастық туралы маңызды келісімдерге қол қойды. Атап айтқанда, Синьцзян педагогикалық университеті (ҚХР), Гонконг педагогикалық университеті (ҚХР), Абай атындағы Қазақ ұлттық педагогикалық университеті (Қазақстан), Жүсіп Баласағын атындағы Қырғыз ұлттық университеті (Қырғызстан), және Науаи мемлекеттік университеті (Өзбекстан) сынды беделді білім ордаларымен стратегиялық әріптестік орнатылды.Келісімнің негізгі бағыттарына бірлескен ғылыми жобалар мен гранттық бағдарламаларды жүзеге асыру, халықаралық конференциялар мен семинарлар ұйымдастыру, оқытушылар мен студенттердің академиялық ұтқырлығын қамтамасыз ету, инклюзивті білім беру, STEAM-технологияларды енгізу және білім берудегі цифрландыруды дамыту жатады.Аталған ынтымақтастық заманауи педагогикалық зерттеулерді ілгерілетуге, тәжірибе алмасуға және жаһандық білім беру кеңістігінде жаңа мүмкіндіктерге жол ашады. Келісім екі жыл мерзімге жасалып, тараптардың келісімі бойынша ұзартылуы мүмкін.<img src="https://knadmin.beoblood.kz/uploads/Korkyt_970f12cb5a.jpg" alt="Коркыт.jpg">

 Қорқыт ата атындағы Қызылорда университеті Қытайда өткен халықаралық білім беру көрмесіне қатысты

БЕС ЖАҢАЛЫҚ: Апталық шолу

<a href="https://kyzylorda-news.kz/">Kyzylorda-news.kz</a> &nbsp;Қазақстан Республикасы Энергетика министрлігі 2025 жылғы қаңтар–сәуір айларындағы ірі мұнай өңдеу зауыттарының жұмыс қорытындыларын шығарды.Елдің ірі мұнай өңдеу зауыттарында 2025 жылдың алғашқы төрт айында 6,092 млн тонна мұнай өңделді. Бұл көрсеткіш 2024 жылдың сәйкес кезеңімен салыстырғанда 10,8%-ға жоғары.Өңдеу көлемінің артуы ішкі және сыртқы нарықтарда сұранысқа ие негізгі мұнай өнімдерінің өндірісінің ұлғаюына басты фактор болды.Атап айтқанда: автомобиль бензині өндірісі 25,4%-ға артып, 2,082 млн тоннаны құрады; дизель отынының өндірісі 18,9%-ға өсіп, 1,921 млн тоннаға жетті; авиациялық керосин өндірісі 5,3%-ға артып, 0,255 млн тоннаны құрады.Энергетика министрлігі мұнай өңдеу саласының тұрақты жұмысын қамтамасыз ету, ішкі нарықты мұнай өнімдерімен сенімді жабдықтау, сондай-ақ кәсіпорындардың тиімділігі мен технологиялық даму деңгейін арттыруға бағытталған стратегиялық шараларды іске асыруды жалғастырады.

Қазақстанда мұнай өңдеу көлемі 10,8%-ға артты 

<a href="https://kyzylorda-news.kz/ru">Kyzylorda-news.kz</a> 2025 жылғы 13 мамырдағы Үкімет отырысында Қызылорда облысында «Қорқыт Ата» арнайы экономикалық аймағын (АЭА) құру туралы шешім қабылданды.Мемлекет басшысының халыққа Жолдауынан туындайтын негізгі міндеттердің бірі – аэрохабтарды дамыту, әуежайлардың, автомобиль магистральдарының инфрақұрылымын жетілдіру.Осы бағытта Қызылорда қаласындағы халықаралық әуежайдың жаңа терминалына іргелес 550 гектар аумақта «Қорқыт Ата» арнайы экономикалық аймағы құрылады. Бұл бастама - өңір экономикасын әртараптандыруға, мұнай өндірісіне тәуелділікті төмендетуге және жаңа өндірістік бағыттарды қалыптастыруға бағытталған стратегиялық қадам.АЭА құрылымына авиацияға қызмет көрсету, көтерме-бөлшек сауда, қоймалау және сақтау, сондай-ақ, өнеркәсіптік аймақтары кіреді. Арнайы экономикалық аймақта құрылыс индустриясы, жеңіл және тамақ өнеркәсібі, машина жасау, көлік-логистика, технологиялар мен инновациялар салаларында инвестициялық жобаларды жүзеге асыру жоспарланған.Атап өту қажет, АЭА құрудың белгіленген қағидаларына сәйкес, 28 экономикалық қызмет түрінің тізбесі келісілді.«Қорқыт Ата» АЭА құрылуы - инвестиция тартуға, өндірістік қуатты арттыруға және Қызылорда облысының экспорттық әлеуетін дамытуға жаңа мүмкіндіктер ашады.

«Қорқыт Ата» арнайы экономикалық аймағын құру туралы шешім қабылданды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев «Өндіріс» индустриялық аймағындағы заманауи кірпіш зауытының құрылыс барысымен танысты.<img src="https://knadmin.beoblood.kz/uploads/Kirpish_zauyty_zha_yn_k_nderi_iske_osylady_1_9efa8d48c7.jpg" alt="Кірпіш зауыты жақын күндері іске қосылады 1.jpg">«Қызылорда Саз М» ЖШС кірпіш зауытын орналастыру үшін өңірлік үйлестіру кеңесінің шешімімен 7 гектар жер телімі бөлінген.Зауыттың құрылыс жұмыстары 98% аяқталды. Жабдықтарды монтаждау жұмыстары 100% орындалды. Әкімшілік-тұрмыстық ғимараттың құрылысы 80% біткен, сырты қапталып болды. Қазір аумақты абаттандыру және көгалдандыру жұмыстары жүргізілуде.<img src="https://knadmin.beoblood.kz/uploads/Kirpish_zauyty_zha_yn_k_nderi_iske_osylady_2_d22bd2b252.jpg" alt="Кірпіш зауыты жақын күндері іске қосылады 2.jpg">Мұнда негізгі техникалық құрылғылар орнатылып, өндіріс процесі автоматтандырылып, баптау жұмыстары жүргізілуде. Зауыт іске қосылғаннан кейін жылына 90 миллион дана кірпіш өндіреді деп күтілуде, 70 адам жұмыспен қамтылмақ. Бұл кірпіш зауытының басты ерекшелігі – өндіріс толық автоматтандырылған. Жаңа технологиялар өндіріс тиімділігін арттырып, өнім сапасын жоғары деңгейде сақтауға мүмкіндік береді.

Кірпіш зауыты жақын күндері іске қосылады

<a href="https://kyzylorda-news.kz/">Kyzylorda-news.kz</a> Креативті индустрияларды дамыту – мемлекет саясатының басым бағыттарының бірі, бұл сала Мемлекет басшысының тікелей бақылауында. «Креативті индустрия экономикамызды өркендетуге тың серпін беретініне сенемін», – деп атап өткен болатын Қасым-Жомарт Тоқаев.2021 жылдан бастап Президент Қазақстан халқына арнаған Жолдауларында бұл секторды ірілендіріп, экономиканың толыққанды бөлігіне айналдырудың маңыздылығына бірнеше мәрте тоқталған.Бүгінде Қазақстандағы креативті индустрия 12 бағыт пен 43 ЭҚЖЖ (экономикалық қызмет түрлерінің жалпы жіктеуішін) қамтиды.Креативті индустрия саласында тіркелген субъектілердің жалпы саны – 45 597. Олардың басым бөлігі Алматы мен Астанада шоғырланған.Бағыттар бойынша алғанда, ең көп тіркелген шағын және орта бизнес субъектілері – «халықтық қолөнер» саласында (12 660). Қолөнершілер саны жағынан Алматы (1 976), Астана (1 349), Шымкент (1 254) және Түркістан облысы (969) көш бастап тұр.Қазіргі таңда Қазақстандағы креативті секторларда 143 600 адам жұмыс істейді. Ең көп еңбек ресурсын қажет ететін бағыттар – IT, сәулет өнері мен сән индустриясы, мәдени-демалыс мекемелері, кітапханалар мен музейлер, халықтық қолөнер.Бұл стратегиялық маңызды сала 2029 жылға дейінгі Ұлттық даму жоспарына енгізілген. Саланы дамытуға бағытталған заңнамалық және институционалдық қолдау шаралары, инфрақұрылымды жетілдіру, сондай-ақ отандық креативті өнімдердің экспортын ұлғайту негізгі басымдықтардың қатарында.2024 жыл Қазақстанның креативті индустриялар саласы үшін жаһандық серпіліспен ерекшеленді. Еліміз Global Innovation Index-2024 рейтингінде «Креативті тауарлар мен қызметтер» көрсеткіші бойынша 93-орыннан 65-орынға көтерілді. Мұндай оң динамика – жүйелі жұмыстың және мемлекеттік қолдаудың нақты нәтижесі.Креативті экономиканы дамыту мақсатында ҚР Мәдениет және ақпарат министрлігі арнайы қолдау шаралары пакетін әзірледі.Министрлік алдына қойған алғашқы міндеттердің бірі — креаторларды көлеңкелі экономиканың аясынан шығару болды. Осы мақсатта креативті қызметтің 40 түрі ресми түрде реестрге енгізіліп, арнайы салық режимі белгіленді. Енді бұл саладағы бизнес субъектілері корпоративтік табыс салығынан, жеке табыс салығынан және қосылған құн салығынан толық босатылып, орнына жеңілдетілген біртұтас салық төлейді: жеке кәсіпкерлер үшін — 2–4%, жауапкершілігі шектеулі серіктестіктер үшін — 8%.Нәтижесінде, салықтық жеңілдіктердің арқасында креативті индустриялардағы жұмыспен қамтылғандар саны мен тіркелген субъектілер саны 15%-ға, яғни 6 мың бірлікке артты. Бүгінде бұл салада 135 мың адам еңбек етіп, 45 597 бизнес субъектісі жұмыс істейді.Креаторларға арналған инфрақұрылым құру — мемлекеттік саясаттағы маңызды бағыттың бірі. Мемлекет басшысының тапсырмасымен еліміздің барлық ірі қалаларында креативті хабтар кезең-кезеңімен ашылып жатыр. Қазіргі таңда Астана, Алматы, Түркістан, Шымкент, Атырау, Қызылорда, Петропавл, Ақтөбе, Семей, Өскемен, Ақтау және Жезқазған қалаларында 12 хаб жұмыс істеуде. 2025 жылы тағы 8 орталықты іске қосу жоспарланған.Сонымен қатар, 2024 жылы Алматы облысында Energo University негізінде Қазақстандағы алғашқы Креативті индустриялар паркі ашылды. Ал Астана қаласында белгілі опера әншісі Бибігүл Төлегенованың есімімен аталатын алғашқы Креативті мектеп өз жұмысын бастады.2024 жылдың 10 қаңтарында Мемлекет басшысы креативті индустрияны дамытуға бағытталған Заңға қол қойды. Бұл заң креативті саланың әлеуетін арттыруға бағытталған бірқатар нормаларды, соның ішінде уәкілетті мемлекеттік орган мен жергілікті атқарушы органдардың дарынды тұлғаларға жағдай жасау және өзін-өзі дамытуына мүмкіндік беру бағытындағы өкілеттіктерін кеңейтуді қарастырады.Биыл Үкімет креативті индустрияларды дамыту қорын құрады. Аталған Қордың негізгі міндеттері — таланттарды анықтау, жобалар мен инфрақұрылымды дамыту, сондай-ақ қазақстандық креативті өнімдер мен қызметтерді экспорттауға қолдау көрсету.Қор халықаралық нарықтарға бағытталған креативті жобаларды дамыту үшін түрлі қаржылық және қаржылық емес қолдау тетіктерін әзірлеп, байқау негізінде жүзеге асыратын болады.Сонымен қатар, Бюджет кодексіне және соған ілеспе заңнамаларға өзгерістер енгізіліп, креативті индустрияны қаржыландыру көздері бекітілді. Енді бұл салаға ұлттық лотерея операторы сатқан билеттердің 3%-ы көлемінде арнайы аударым қарастырылған.Зияткерлік және шығармашылық әлеуетті қолдау мен оны тиімді монетизациялау – ұлттық стратегияның ажырамас бөлігіне айналды. Алдағы уақытта креативті индустрия ел экономикасының жаңа серпін беретін маңызды қозғаушы күші болмақ.&nbsp;ҚР Мәдениет және ақпарат министрлігінің баспасөз қызметі

Креативті индустриялар: Қазақстанда экономиканың стратегиялық маңызды секторы қалай дамып жатыр?

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Парламент Мәжілісінің депутаты Мархабат Жайымбетовты 60 жасқа толуына орай құттықтады. Басқосуға Парламент Сенаты мен Мәжілісінің депутаттары Наурызбай Байқадамов, Руслан Рүстемов, Мұрат Әбенов, Мұрат Ергешбаев, бірқатар сала басшылары мен зиялы қауым өкілдері қатысты.Аймақ басшысы мерейтой иесінің еңбек жолына тоқталып, Сыр елінің дамуына өлшеусіз үлес қосқанын айтып, алғысын білдірді.<blockquote>«Киелі Сыр бойы – өзінің адалдығымен, парасатымен ел құрметіне бөленіп, алғысын алған қабырғалы қайраткерлер мен текті тұлғаларға бай мекен. Мемлекет басшымыз Қасым-Жомарт Кемелұлы: «Адал еңбек етіп, адал табыс тапқан адам жетістікке жетеді, құрметке ие болады. Нағыз еңбек адамы бұл – істің адамы, яғни әр ісіне, әр қадамына жауапкершілікпен қарайтын адал азамат. Әділетті Қазақстан және Адал азамат ұғымдары егіз құндылық ретінде әрдайым қатар тұруға тиіс», – деген болатын. Біз саналы ғұмырын аймағымыздың әлеуметтік-экономикалық, мәдени-рухани дамуына арнаған, елдің қошеметіне бөленген өздеріңіздей азаматтарды ардақтап, лайықты құрмет көрсетуді дәстүрге айналдырдық. Парламент Мәжілісінің депутаты, «Құрмет», «Парасат» ордендерінің иегері, жерлесіміз Жайымбетов Мархабат Жайымбетұлы еңбек жолын жұмысшы маман ретінде бастаған. Президентіміздің 2025 жылды «Жұмысшы мамандықтар жылы» деп жариялауына орай, еңбек жолын қарапайым электрик болып бастап, Мәжіліс депутатына дейінгі сан түрлі қызметті абыроймен атқарған, өңірдің әлеуметтік-экономикалық дамуына елеулі үлес қосқан мерейтой иесіне арнайы құрмет көрсетуге жиналдық. Сізді жерлестеріміздің, өзімнің атымнан мерейлі жасыңызбен шын жүректен құттықтаймын! Ақыл-парасат, даналық пен даралық секілді төл өнегеңіз ұрпаққа үлгі, ұлтқа ұлағат бола беруіне тілектеспін», – деді Н.Нәлібаев.</blockquote><img src="https://knadmin.beoblood.kz/uploads/Marhabat_Zhajymbetov_oblysty_rmetti_azamaty_0d87c98ba8.jpg" alt="Мархабат Жайымбетов облыстың құрметті азаматы.jpg">Кездесуде Ақмарал Әлназарова, Наурызбай Байқадамов, Мұрат Әбенов құттықтау лебіздерін жеткізді. Сонымен қатар, Қызылорда облысының құрметті азаматы Жарылқасын Шәріпов мерейтой иесінің елеулі еңбегіне тоқталды.Мемлекет мүддесі, аймақ игілігі, халық мұраты жолында табысты еңбек еткен Мархабат Жайымбетовке «Қызылорда облысының құрметті азаматы» атағы беріліп, халқымыздың игі дәстүріне сай Сыр жұртшылығы атынан сый-құрмет көрсетілді.Мархабат Жайымбетов мемлекеттік қызметтің барлық сатысынан өткен. Қай қызметте де өзін білікті басшы, мықты ұйымдастырушы, жанашыр азамат ретінде танытып келеді. Қызылорда қаласының, Арал ауданының әкімі, облыс бойынша төтенше жағдайлар департаментінің бастығы, екі рет облыс әкімінің орынбасары қызметтерін атқарып, қоғам құрметіне бөленді. Президент Әкімшілігінің мемлекеттік инспекторы қызметінде, Құрылыс және тұрғын үй-шаруашылық істері комитетін басқарған 6 жылдан астам уақытта қаламызда тұрғын үйлердің бой көтеруіне, инфрақұрылым тартылуына, сол жағалауды игеруге қолдау білдірді.Облыс әкімінің орынбасары қызметінде энергетика, құрылыс, көлік, мемлекеттік сатып алу салаларына жетекшілік етіп, негізгі индикаторларға қол жеткізуге өз үлесін қосты. 2023 жылдан бері Парламент Мәжілісінің депутаты ретінде халықтың әл-ауқатын жақсартуға бағытталған бірқатар маңызды бастама көтеріп келеді.Басқосуда мерейтой иесі көрсетілген құрметке алғысын білдірді.<img src="https://knadmin.beoblood.kz/uploads/Marhabat_Zhajymbetov_oblysty_rmetti_azamaty_3_8f83715baf.jpg" alt="Мархабат Жайымбетов облыстың құрметті азаматы 3.jpg">Фото: Қызылорда облысы әкімінің баспасөз қызметі

Мархабат Жайымбетов "Қызылорда облысының құрметті азаматы" атанды

<a href="https://kyzylorda-news.kz/">Kyzylorda-news.kz</a> &nbsp; Бүгін Қызылордада облыс әкімі Нұрлыбек Нәлібаевтың қатысуымен «Қазақстан Республикасында тәуелсіз мейіргерлік қызметтің озық тәжірибелерін енгізу» тақырыбында халықаралық ғылыми-тәжірибелік конференция өтті. Оған Денсаулық сақтау министрі Ақмарал Әлназарова, Дүниежүзілік денсаулық сақтау ұйымының Қазақстандағы сақтандыру кеңсесі басшысы Скендер Сыла, онлайн режимде Дүниежүзілік денсаулық сақтау ұйымы Еуропалық аймақтық бюросының директоры Ханс Клюге, Германия, Қырғызстан, Латвия, Өзбекстан, Ресей, Түркия, Финляндия мемлекеттерінің өкілдері, ғалымдар, барлық өңірдің денсаулық сақтау басқармасының басшылары, дәрігерлер, мейіргерлер, медициналық оқу орындары мен клиника басшылары қатысты.Конференцияда аймақ басшысы денсаулық сақтау саласының қызметкерлеріне арналып 100 пәтерлік жаңа тұрғын үй салынатынын айтты.<blockquote>«Өңірде медицина қызметкерлерін шетелде оқыту үрдісі 5 жылдан соң қайта жаңғыртылып, қолға алынды. Саланы білікті кадрлармен қамтамасыз ету де басты назарымызда. Былтыр жергілікті бюджет қаражаты есебінен мамандар біліктілігін арттыруға 144 млн теңге бөлінді. Облыстың медициналық ұйымдарының 30 дәрігері хирургия, эндоскопия, неврология, кардиохирургия, неанаталды хирургия, балалар ортопедиясы бойынша Түркия, Ресей, Беларусь Республикаларының жетекші клиникалық-академиялық базаларында білім жетілдірді. Колледж оқытушыларының өзге елдерде тағылымдамадан өтіп, жастардың да тәжірибе алмасуы ертеңгі күні өз жемісін береді. Аймақта медицина мамандарын даярлауға, біліктілігін арттыруға әркез қолдау көрсете береміз. Бүгінгі жас маман – ертең адам өмірі мен денсаулығының сақшысы.Өңірге аса қажетті медицина мамандықтары бойынша 176 резидент облыс әкімінің грантымен білім алуда. «Жалпы тәжірибелі дәрігер» мамандығы бойынша маман даярлауға облыс әкімінің 177 білім беру гранты бөлінді. Халықаралық байланыстың артуы болашақ тәжірибелі мамандар даярлауға зор үлес қосуда.Жалпы әлеуметтік сала қызметкерлерінің тұрмысына баса назар аударып, материалдық қолдауды тұрақты көрсетіп келеміз. Өткен жылы мәдениет саласының қызметкерлеріне алғаш рет көпқабатты тұрғын үй салынып, 40 жаңа қызметтік пәтер табысталды. Бүгінгі халықаралық маңызды шарада денсаулық сақтау саласының қызметкерлеріне де 100 пәтерлік жаңа тұрғын үй салу жөнінде шешім қабылдадық. Жақын арада құрылысы басталып, жыл соңына дейін табысталады», – деді Н.Нәлібаев.</blockquote>Айта кетейік, соңғы екі жылда облыстың барлық елді мекеніндегі денсаулық сақтау мекемелеріне 225 жаңа санитарлық автокөлік табысталды. Халық сұранысына сәйкес 45 жедел жәрдем көлігі алынып, облыстық медициналық жедел жәрдем стансасы 100 пайыз қамтамасыз етілді. Осылайша санитарлық автокөлікпен қамту мәселесі толық шешімін тапты.<img src="https://knadmin.beoblood.kz/uploads/Densauly_sa_tau_salasyny_yzmetkerlerine_100_p_terlik_zha_a_t_r_yn_j_2_d3781385df.jpg" alt="Денсаулық сақтау саласының қызметкерлеріне 100 пәтерлік жаңа тұрғын үй 2.jpg">Аймақтың медицина саласын өркендетуге бюджеттен тыс ресурстар да тартылуда. «Қазақстан халқына» қоғамдық қоры соңғы екі жылда өңірдің денсаулық сақтау саласына 4 млрд. теңге қаржы бағыттады. Бұл қаржыға облыстық балалар ауруханасы базасында «Қамқорлық» орталығы ашылып, қажетті дәрі-дәрмек алынды. Қор облыстық онкология орталығын құны 1 млрд. 100 млн. теңге тұратын скрининг жүргізуге арналған жылжымалы медициналық кешенмен қамтамасыз етті. Мұндай кешен республиканың 3 өңірінде ғана бар. Қазір шалғай елді мекендердегі тұрғындарға тұрақты қызмет етуде.<img src="https://knadmin.beoblood.kz/uploads/Densauly_sa_tau_salasyny_yzmetkerlerine_100_p_terlik_zha_a_t_r_yn_j_1_fbc21f9bdc.jpg" alt="Денсаулық сақтау саласының қызметкерлеріне 100 пәтерлік жаңа тұрғын үй 1.jpg">Атқарылған жұмыстар нәтижесіз емес, өмір сүрудің орташа ұзақтығы облысымызда 74,5-тен 75,2 жасқа артты.Фото: Қызылорда облысы әкімінің баспасөз қызметі

Облыс әкімі: «Денсаулық сақтау саласының қызметкерлеріне 100 пәтерлік жаңа тұрғын үй салу жөнінде шешім қабылдадық»

<a href="https://kyzylorda-news.kz/">Kyzylorda-news.kz</a> Кәмелетке толмаған балалардың құқықтары мен заңды мүдделерін қорғау Қазақстанның мемлекеттік әлеуметтік-құқықтық саясатының ең басты бағыты.Қазақстан Республикасының Конституциясының 27 бабына сәйкес Неке мен отбасы, ана мен әке және бала мемлекеттің қорғауында. Балаларына қамқорлық жасау, оларды тәрбиелеу ата-ананың құқығы әрі парызы.ҚР "Неке және отбасы туралы" кодексіне сәйкес ата-анасы немесе басқа да заңды өкілдері баланы тәрбиелеуге және оқытуға, оны күтiп-бағуды жүзеге асыруға, баланың жан-жақты дамуы үшiн қажеттi өмір сүру жағдайын жасауға, тұрғын үймен қамтамасыз етуге міндеттi.Балалардың бірнеше құқықтары бар: Баланың денсаулық сақтауға, даралық ерекшелікке және оны сақтауға; өмір сүруіне, жеке басының бостандығына, қадір-қасиетіне және жеке өмірге қол сұғылмаушылыққа; сөз және ар-ождан бостандығына, ақпаратқа және қоғамдық өмірге араласуға; қажеттi тұрмыс деңгейiне; тұрғын үйге; білім алуға; еңбек бостандығына; экономикалық қанаудан қорғалуға; дем алуға және бос уақытын пайдалануға және т.б. құқықтары бар.Ұлттық деңгейде балалардың құқықтарына келесі заңнамалық актілер кепілдік береді:"Қазақстан Республикасындағы бала құқықтары туралы" заңы, Қазақстан Республикасының Қылмыстық, Қылмыстық-процестік кодекстері, "Әкімшілік құқық бұзушылық туралы" кодексі, "Халық денсаулығы және денсаулық сақтау жүйесі туралы" кодексі, "Неке және отбасы туралы" кодексі, Қазақстан Республикасының Әлеуметтік кодексі және т. б.заңнамалық актілер.ҚР «Әкімшілік құқық бұзушылық туралы» кодексте кәмелетке толмағандардың құқықтарына қол сұғатын құқық бұзушылықтарға арналған тұтас тарау бар. Санкциялар айыппұлдан қамауға алуға дейін қарастырылған.1989 жылдың 20 қарашасында БҰҰ Бас Ассамблеясының 44/25 резолюциясымен Бала құқықтары туралы Конвенция қабылданған.Бала құқықтары туралы конвенцияны 196-дан астам мемлекет ратификациялады, бұл оны тарихтағы адам құқықтары туралы ең көп ратификацияланған халықаралық шартқа айналдырды.Қазақстан дүние жүзіндегі басқа елдермен бірге балалардың құқықтарын сақтау жөніндегі жаһандық міндеттемені қолдады.1994 жылдан бастап Қазақстан Бала құқықтары туралы конвенцияға қатысушы болып табылады. Бұл құжат қатысушы мемлекеттерді баланың ең жақсы мүдделерін қамтамасыз ету үшін, оның ішінде баланы физикалық немесе психологиялық зорлық-зомбылықтың барлық түрлерінен қорғау мақсатында қажетті шаралар қабылдауға міндеттейді.Мемлекет басшысы Қасым-Жомарт Тоқаев 2024 жылғы 15 сәуір күні балалар мен әйелдерді қорғауға бағытталған Қазақстан Республикасының кейбір заңнамалық актілеріне енгізілген өзгерістер мен толықтыруларға сәйкес балаларға қатысты зорлық-зомбылық жасағандарға жаза күшейтілді.Кәмелетке толмағандарды жәбірлегені, яғни буллинг үшін әкімшілік жауапкершілік енгізілді. Бұл талап елімізде алғаш рет заң жүзінде бекітілді.Білім беру ұйымдарындағы зорлық-зомбылық пен буллинг мәселесі бүкіл әлемді толғандырып отыр. 2019 жылы ЮНЕСКО мектеп ортасындағы зорлық-зомбылық пен қудалауға, соның ішінде кибербуллингке қарсы халықаралық күнді белгіледі. Ол әр қарашаның бірінші бейсенбісінде өтеді.Буллинг дегеніміз не? Буллинг әр түрлі мағынаны білдіруі мүмкін. Ол: адамды мазақтау, қорлау, оның ақшасын не басқа заттарын тартып алу, оларды бүлдіру, сол жайында өсек тарату, оны елемеу немесе жекелету, ренжітетін, жаман әзіл айтып, басқа адамдардың алдында ыңғайсыз жағдайға қою, ,ұрып-соғу, тепкілеу, итеру немесе басқаша зақым келтіру, қоқан-лоқы көрсету немесе қорқыту.Буллинг онлайн немесе телефон арқылы жүзеге асырылуы мүмкін. Олардың қатарына ренішті хабарламалар мен суреттер, зұлым мінеп-сынаулар жіберу жатады. Бұлардың барлығы кибербуллинг деп аталады. Буллинг қандай жағдайларға әкеліп тіреуі мүмкін? Біреудің күш көрсетпей, қорлап, қорқытқаны баланың жаныңа қатты батады. Буллингке ұшыраған балалар мектепке барғысы келмейді, түрлі сылтаулармен сабақтан қалуға тырысады. Яғни, баланың ішкі күйзелістерге берілуіне, сабаққа деген ынтаның жоғалуына, сабақ үлгірімінің нашарлауына әкеліп соғады.Мектептердегі буллингті анықтау өте қиын. Өйткені буллингке тап болған баланың оны ата-анасына немесе мектептегі сынып жетекшісіне айтуы екіталай. Сондықтан, білім беру ұйымдары мектеп оқушылары арасында зорлық-зомбылық пен буллингке қатыстыанонимдік сауалнама жүргізіп, мектеп тіпті сынып ішіндегі балалардың буллингке ұшырау ахуалын анықтауға болады. Сол арқылы буллингтің алдын алу жұмыстарын жүргізу қажет.Сонымен қатар, балаларды құқықтық тәрбиелеубағытында ағымдағы жылдың 13 мамырында Қазақстан Республикасындағы Адам құқықтары жөніндегі уәкілдің Қызылорда облысы бойынша өкілі тарапынан облыстағы 124 мектептің 6 мыңнан астам оқушыларына&nbsp;«Балалар мен жастардың құқықтары» туралы бірыңғай сабақ өткізілді.Қоғамды құқықтық тәрбиелеуге арналған мұндай іс-шаралар Қазақстан Республикасындағы Адам құқықтары жөніндегі уәкілдің тапсырмасы бойынша тұрақты негізде өткізіліп тұратынын айта кеткен жөн.&nbsp;Берікбол Байхожаев,Адам құқықтары жөніндегі уәкілдіңҚызылорда облысы бойынша өкілі&nbsp;Фото: Нұрболат Нұржаубай

Балаларды құқықтық тәрбиелеудің рөлі

<a href="https://kyzylorda-news.kz/">Kyzylorda-news.kz</a> Қазақстанда жемқорлардың жақындарының мүлкін тәркілеу мәселесі көтерілді. Егер олар мүліктің заңды жолмен табылғанын дәлелдей алмаса, активтер мемлекет пайдасына алынуы мүмкін. Мәжіліс депутаты Марат Башимов Бас прокурор Берік Асыловқа "кеңейтілген тәркілеуді"&nbsp;қолдауды сұрап хат жолдағанын хабарлады, – деп хабарлады&nbsp;<a href="https://dauletten.kz/">Dauletten.kz.</a>Депутаттың айтуынша, алдағы уақытта Мәжілісте ақшаны жылыстатуға қарсы маңызды заң жобасы бірінші оқылымға шығарылады. Онда ФАТФ (Ақшаны жылыстатуға қарсы қаржылық шараларды әзірлеу тобы) ұсынған жүзге жуық түзету қамтылған. 'Кеңейтілген тәркілеу"&nbsp;институты Қазақстан үшін ерекше маңызды, себебі мұншалықты көлемдегі ұрлық басқа елдерде болмаған, дейді Башимов.Оның сөзінше, әлемнің көп елінде ФАТФ ұсынымдары заңнамаға енгізілген, ал Қазақстанда бұл үрдіс "барлық деңгейдегі лоббистердің, әсіресе олигархтардың"&nbsp;ықпалымен баяу жүруде.<blockquote>- Қазіргі заңнамада мұндай норма болмағандықтан, активтерді үшінші тұлғаларға аударып үлгергендер жауапкершіліктен құтылып кете алады, ал олардың мүлкі толық тәркіленбейді. Сотталғандар да тыныш отырады, себебі мүлкін туыстарына не серіктестеріне аударып қойғандарын біледі. Ертең толық еркіндікке шыққан соң сол ақшаны пайдаланады, – деді депутат.</blockquote>Ұсынылған тәртіпке сәйкес, сотқа дейінгі тергеу басталған тұлға өз мүлкінің заңды жолмен алынғанын дәлелдеуі тиіс. Егер дәлел ұсына алмаса, ол мүлік тәркілеуге жатады.Фото: Нұрболат Нұржаубай

Қазақстанда жемқорлардың жақындарының мүлкі тәркіленуі мүмкін

<a href="https://kyzylorda-news.kz/">Kyzylorda-news.kz</a> Сыр өңіріне жұмыс сапарымын келген ҚР Парламенті Мәжілісінің депутаттары, «AMANAT» партиясы фракциясының мүшелері Мархабат Жайымбетов, Мұрат Әбенов, Мұрат Ергешбаев Қызылорда қаласында жаңадан бой көтеріп жатқан нысандары аралады.Атап айтсақ, сол жағалауында жаңадан бой көтерген 11 мың орындық жаңа заманауи үлгідегі стадионның және облыстық тарихи-өлкетану мұражайының құрылысымен танысты.Өңір халқының сұранысына сай салынған жаңа спорт нысаны тек футбол алаңымен шектелмейді. Мұнда бокс, күрес, спорттық гимнастика, ауыр атлетика, таеквондо және фитнеске арналған арнайы залдар қарастырылған. Қазіргі таңда құрылыс жұмыстары қарқынды жүріп жатыр. Заманауи талаптарға сай салынып жатқан нысан жыл соңына дейін пайдалануға беріледі.Ал, қасиетті Сыр өңірінің баға жетпес тарихи-мәдени мұрасын сақтау және кеңінен насихаттау мақсатындағы жаңа музей сандық және мультимедиялық технологиялармен жабдықталған. Музейдің 85 жылдық тарихында алғаш рет типтік ғимарат қор сақтау қоймаларымен жабдықталуда.Қазіргі уақытта музей қорында 67 613 экспонат сақталған. Музейдің жаңа экспозицияларында аймақтың флорасы мен фаунасы, палеонтология, археология және этнография, Қызылорда облысының экономикалық және әлеуметтік-мәдени дамуы көрсетіледі.11 залдан тұратын мұражайдың тақырыптық құрылымы, жабдықтары мен безендірілуі жасанды интеллект элементтерін қолдана отырып, 3D модельде жасалуда.Фото: Аманат партиясы

Мәжілістегі фракция мүшелері жаңадан бой көтеріп жатқан құрылыс нысандарымен танысты

<a href="https://kyzylorda-news.kz/">Kyzylorda-news.kz</a>&nbsp; Қазақстанда тұрғын үйді бөлудің жаңа бірыңғай жүйесі іске қосылады, - деп хабарлады <a href="https://dauletten.kz/">Dauletten.kz.</a>Енді үй кезегі жергілікті әкімдіктер емес,&nbsp;Отбасы банкі&nbsp;арқылы жүргізіледі және онлайн бақыланады.Бұрынғыдай тек жеңілдік санатындағы азаматтар ғана емес, тұрғын&nbsp;үйге мұқтаж барлық азаматтар&nbsp;үй кезегіне тұру үшін өтініш бере алады.Басты шарт – соңғы&nbsp;5 жылда өтініш берушінің атына жеке тұрғын үй тіркелмеуі керек.Отбасы банкі өтініштерді 24 мамырдан бастап арнайы сайт арқылы қабылдайды.Өтініш беру тәртібі:1.&nbsp; ЭЦҚ арқылы сайтқа кіру2.&nbsp; Егер бар болса – әлеуметтік осал топты таңдау3.&nbsp; Деректерді өңдеуге келісім беру4.&nbsp; Егер үй апатты болса – техникалық қорытындыны жүктеу5.&nbsp; Жүйе автоматты түрде сіздің деректеріңізді және тұрғын үйдің бар-жоғын тексереді.Фото Ru.freepik.com

Бас тақырыптар

Мархабат Жайымбетов "Қызылорда облысының құрметті азаматы" атанды

Облыс әкімі: «Денсаулық сақтау саласының қызметкерлеріне 100 пәтерлік жаңа тұрғын үй салу жөнінде шешім қабылдадық»

1 маусымда Президенттік жастар кадр резервіне кезекті іріктеу басталады

Экономика

Қазақстанда мұнай өңдеу көлемі 10,8%-ға артты

«Қорқыт Ата» арнайы экономикалық аймағын құру туралы шешім қабылданды

Кірпіш зауыты жақын күндері іске қосылады

Креативті индустриялар: Қазақстанда экономиканың стратегиялық маңызды секторы қалай дамып жатыр?

Қоғам

Балаларды құқықтық тәрбиелеудің рөлі

Қазақстанда жемқорлардың жақындарының мүлкі тәркіленуі мүмкін

Мәжілістегі фракция мүшелері жаңадан бой көтеріп жатқан құрылыс нысандарымен танысты

24 мамырдан бастап тұрғын үй кезегіне үйі жоқ азаматтардың бәрі тұра алады

Аудандық білім бөлімінің басшысы және жеті бухгалтер сотталды

Қызылорда облысының прокуроры студенттермен кездесті

1 маусымда Президенттік жастар кадр резервіне кезекті іріктеу басталады

Автономды жұлдыз іздеуші: Нұрдәуіттің инженерлік жобасы

Қорқыт ата атындағы Қызылорда университеті Қытайда өткен халықаралық білім беру көрмесіне қатысты