<a href="https://kyzylorda-news.kz/">Kyzylorda-news.kz</a> Хәкім Абайдың бесінші қара сөзінде: «Әуелі Құдайға сыйынып, екінші өз қайратыңа сүйеніп, еңбегіңді сау, еңбек қылсаң, қара жер де береді, құр тастамайды» дегені бар. Осы өміршең өсиетті ұран етіп, жер төсінен талай жыл талғажау айырып жүрген азаматтар ауданда аз емес. Солардың бірі – Шиелідегі «Бала би» өндірістік кооперативі.«Бітер істің басына, жақсы келер қасына» демекші, туған жердің көркейіп, гүлденуіне үлес қосу әрбір азаматтың парызы. Қалың елі қайғырса қалқан, қабырғасы майысса сүйеу болатын азаматтарымыз баршылық. Бүгін біз сөз еткелі отырған «Бала би» ӨК төрағасы Пернебай Күзембай осындай абзал азамат. Ол 1990 жылдары Кеңес әскері қатарында Отан алдындағы борышын өтеп, 1991 жылы Алматы Сәулет құрылыс академиясына оқуға түседі. Еңбекке ерте араласқан П.Алтынбайұлы Алматы қаласында жүріп шағын кәсіпкерлікпен айналысады. Уақыт өте келе кәсібінің тасы өрге домалап, тәуекелмен бастаған жұмысы қанатын кеңге жаяды. Отыз жылдың ішінде түрлі бизнеспен айналысып, Алматы қаласының тұрғынына айналады. Тіршілік толқынымен шалғайда жүрсе де туған жерге деген сүйіспеншілігін жоғалтпайды. Ауыл азаматтарын жұмыспен қамтып, өзінің ірі кәсіпорнын ашқан Пернебай тек Алматы қаласын емес, туған жері Шиелінің өркендеуіне де үлес қосқан жан.Пернебай Күзембай – Бала би ауылының тумасы. 2017 жылы Талаптан ауылдық округінің азаматтары П.Алтынбайұлына хабарласып, туған жерге келіп қызмет жасауға шақырады. Қашанда елім деп ауылына қарайлап жүретін азамат ауылдағы игерусіз жатқан шағын егіс алқабын қайта қолға алуға бекінеді. 1985 жылдың аяғына таман жем-шөп қорын жинақтау мақсатында қазіргі «Батыс Еуропа – Батыс Қытай» тас жолының тау жақ беткейіндегі «Оқшы ата» мазаратына қарама-қарсы жерде жабайы алқаптан Кеңес үкіметі суармалы егістік алқабын ашады. Енді ғана қолға алына бастаған егістік жер Кеңес үкіметі құлаған сәтте қараусыз қалып қояды. Кейіннен тәуелсіздік жылдары кезінде 1990-2000 жылдардың тұсында қайта кішігірім күріш егумен айналысып бастағанымен көпке бармай тұралап қалады. Ен дала иесіз жатпасын деп көрші ауылдың диқандарына өткізгенімен жер игілігін көрген адам болмайды. Қаншама жылдан бері қараусыз қалған жердің тоз-тозы шығып, қалың қоға қаптаған. Жалпы Талаптан ауылы Кеңес үкіметі кезеңінен бері бірыңғай мал шаруашылығымен айналысып, төрт түлігін төлдеткен халық. Егін шаруашылығына небәрі 500 гектар жерді бөлсе, қалған мыңдаған гектар жер мал өрістететін жайылымдық жерлер. Кепілде тұрған жерді қайта жандандыру бір келсе туған жердің түлегі П.Күзембайдың қолынан келеді деп ауыл адамдары үміт етіп, кәсіпкерге хабарласқанда сенімдері ақталып, үлкен қаражатты қажет ететін шаруаны ойланбастан орайына келтіреді. Түртусіз жатқан жердің топырағын қопсытып, жер қойнына алтын дән себуді қолға алған Пернебай 400 гектарлық жерге 70-80 миллиондық «Torum 750», «Mc Don», «701», «XT3» маркалы жаңа техникаларды әкеледі. «Бала би» өндірістік кооперативінің төрағасы Пернебай Күзембай «Анам сауыншы, әкем мал дәрігері болып Шиелі ауданында қызмет етті. Менде өзімнің кіндік қаным тамған жерге өз үлесімді тигізу мақсатында осы егістік алқабын қайта инженерлік жүйеге келтіріп, каналдарды тазалау жұмыстарынан бастадым. Қолы қимылдағанның қыр асатынын алдыңғы буын ағаларымыздан көріп өстік. Сыр елі алтын дәні Ақмаржанымен дүйім жұртқа танылған киелі мекен. Жері құнарлы да қасиетті. Тамшы да тама-тама көл болатыны секілді шағын істің де берекесі бар. Еңбегімізге қарай еселі ризығымыз бар. Қайбір жылы 15 адам жұмысқа жұмылдырды. Көктемгі, күзгі науқандарда қосымша 10 адам жұмысқа тартылатыны тағы бар. Ұжым күріш өсірумен қатар бидай, жоңышқа егуді де қолға алып келеді. Күріш сушылары Құрманәлі Алшынбаев, Шәмшиддин Нұрғалиев, механизатор Әділ Бектұрғанов, Қаһарман Баетов сынды еңбекқор адамдар тынымсыз жұмыс істеп келеді» дейді.Дала төсінде дүбір басталуына біршама уақыт бар. Осындай науқан кезінде уақытқа есе жібермей, таңның атысы, күннің батысы бел жазбай, еңбекке мойын ұсынатын диқандардың күзгі жиын-терімнен кейін бір-ақ дамыл табатыны белгілі. Мұндай тынымсыз тірлік «Бала би» өндірістік кооперативінде де қыза түседі. Керіге шегініс жасасақ, аталған қожалық осыдан төрт жыл бұрын 250 гектар күріш, 70 гектар бидай, 70 гектар жоңышқа еккен екен. Алайда П.Күзембейдың сол жылғы жоспары ойдағыдай жүзеге аспапты. Оның бірден бір себебі – елімізде енгізілген карантин режимі еді. Бұл туралы қожалық төрағасы «Күріш алқабын 300 гектарға жеткіземіз деп ойлап, тұқымдарға тапсырыс беріп қойғанбыз. Бірақ карантинге байланысты ала алмадық. Оның үстіне сырттан келетін жұмысшыларымыз да келе алмай қалды. Күріштің суын әлі тартып жатырмыз» деп қынжылды. Бірақ «Еңбек адамды қашанда бақытқа бөлейді» деген бар емес па? Адал еңбектің арқасында әр адам өз бақытын табады. Сондықтан карантиннің кесірі егіс алқабына тисе де, ондағы еңбеккерлер маңдай терімен жұмыс істеуді бір сәт тоқтатқан емес.

Шиелілік тұрғын ата кәсіпті дамытуға үлес қосуда

<a href="https://kyzylorda-news.kz/">Kyzylorda-news.kz</a> Қазақ халқының ең жақсы қасиеттерінің төресі – жомарттық, қайырымдылығы, мұқтаж жандарға қиын сәтте көмек көрсетер дарқан мінезі. Жомарт болу – өзіңде барды шын зәру жанмен бөлісе білу. Адами қасиеттердің қадірлісі қайырымдылық болса, ал оны жасау үлкенін сыйлаған, қариясын қастерлеген, жетімін жылатпаған, кемтар жандарды ешкімнен кем көрмеген қазақ халқына тән екеніне ешкімнің де таласы болмас. Осындай игілікті істі мейірімді жүрегіне жақын көретін жандардың бірі – Шиелі аудандық кітапхана басшысы Гүлдана Жақыпова.&nbsp;Шиелі аудандық орталықтандырылған кітапхана ұжымы қайырымдылық жасаудан қашқан емес. Сауапты істің басы қасынан табылып жүретін олар қоғамдық жұмысқа да, түрлі іс-шаралар ұйымдастыруға да белсене ат салысады. Жылда ел жұртқа жария қылмай-ақ тұрмысы төмен отбасыларға азық-түлік, киім-кешек сынды қажеттіліктерді жеткізіп беруді дәстүрге айналдырған. Осындай сәттердің бірінде аудандық кітапхана басшысы Гүлдана Көпболсынқызы мен кітапханашылар жалғызбасты ана Лаззат Асатуллаеваның шаңырағына барады. 4 баланың анасы өте қиын жағдайда отырғанын көріп, көңіл түкпірінде қайырымдылық жасауға деген бір сәуле пайда болады. Ұжым қызметкерлері де үнемі бұл отбасына қамқорлық көрсетіп жүреді. «Дегенмен басында баспанасы бар деген аты болмаса, терезесі қырық жамау, қыста жылынбайтын, сүрілуге жақын тұрған үйін көрген сайын көңіліміз жабырқап қайтамыз. Айлық табысымыз қолға түссе осы сынды отбасыларға азын-аулақ тамақ апарып беруді қалап тұратын болдық. Осы көрініс, көз алдымыздағы сәбилердің мұңлы жанары бәріміздің жүрегімізді қозғады. Содан ойлана келе кітапхана ұжымы бірлесіп 2 бөлмелі үй салып беруді қолға алдық» – деп, жүрек түкпіріндегі әңгімесін қозғады Г.Жақыпова.Осыдан төрт жыл бұрын 2 бөлмелі 4/10 көлемді пәтердің іргетасын құйып біткен. Алла қалауымен құрылысты аяқтап, бір шаңырақтың шаттығын тамашалауға тырысып жатырмыз деді кітапханашылар. «Жақсы іс жаныңды жадыратады» деп бекер айтылмаса керек-ті. Сауапты істі қолға алған ұжым қызметкерлерінің жанары жанып тұр. Өзінің шаңырағына алып баратын қаржысының бір бөлігін мұқтаж жандарды қуантуға жұмсауды мақсат еткен олар бос уақыт бола қалса құрылыстың басынан табыла кетеді.&nbsp;&nbsp;&nbsp;Адам ұрпағына қайырымдылықты жастайынан үйретіп, адамгершілік қасиеттерге баулуға ұмтылады. Алайда мың құбылған дүниеде табысын біреумен бөліспек түгілі өз басын асырай алмай жүргендер де баршылық. Дегенмен, &nbsp;олардың терістеу тірлігінен гөрі, жақсылардың шарапаты өмірдің өзін әдемі көрсетеді. Жүрегінде иманы бар жұрт қолынан келгенше Алла алдындағы қасиетті парыздың бірін қайырым-дылық деп біледі.Пайғамбарымыз (с.ғ.с.): «Бес нәрсенің қадірін біл. Олар: өлімнен алдын өмірдің, ауру келмей денсаулықтың, әурешіліктен бұрын бос уақыттың, зағиптықтан бұрын жастықтың, кембағалшылықтан бұрын байлықтың қадірін біл» &nbsp;деген. Аста-төк болмаса да азын-аулақ табысының өзін өзгелермен бөлісіп жүретін жаз дидарлы жандарды көргенде, &nbsp;жүрегің жібіп сала береді. Сауапты істің сан соқтырмайтынын білетін елдің бір бөлігі қолындағы барын осылай бөлісіп келеді. &nbsp;«Кең болсаң – кем болмайсың». &nbsp;Демек, пайғамбарымыз Мұхаммедтің (с.ғ.с.): «Жақсылық жасаңдар, қайырымды болыңдар!» деген сөзін &nbsp;&nbsp;ұмытпауымыз керек.&nbsp;

Шиелі: Жақсылық жасауға жаны құмар жан

ҰБТ: талап, талпыныс, нәтиже

<a href="https://kyzylorda-news.kz/">Kyzylorda-news.kz</a> Бүгін Қызылорда облысы әкімінің Кубогі үшін бұқаралық ақпарат құралдары қызметкерлері арасында өткен шағын футболдан республикалық турнир өз мәресіне жетті.Жарысқа еліміздің әр аймағынан, атап айтсақ, Ақтөбе, Атырау облыстары мен Түркістан, Талдықорған, Шымкент, Қызылорда қалаларынан барлығы 8 команда бақ сынады.Тартысты ойын көрсеткен «Қарекет», «Ақпарат», «Ақмешіт» және «Қаламгер» командалары жартылай финалға шықты. Нәтижесінде «Қарекет» командасы Қызылорда облысы әкімінің Кубогі үшін өткен республикалық турнирдің чемпионы атанып, облыс әкімінің арнайы кубогімен, медальдармен және 1 000 000 теңге қаржылай сыйлықпен марапатталды.Екінші орынды жеңіп алған атыраулық «Ақпарат» командасына 700 мың, қола жүлдегер атанған қызылордалық «Ақмешіт» командасына 500 мың теңге, «Қаламгер» командасына 150 мың теңге ынталандыру сыйлығы табысталды.Бұл марапаттардан бөлек, «Үздік шабуылшы», «Үздік қорғаушы», «Үздік қақпашы» және «Үздік ойыншы» номинациялары бойынша озық ойын көрсеткен қатысушыларға арнайы кубоктар және қаржылай жүлделер тапсырылды.Еліміздің түкпір-түкпірінен 100-ге жуық БАҚ өкілдерінің басын қосқан турнирде қатысушылар қонақжай Сыр елі жұртшылығына ризашылықтарын білдірді.

Шағын футболдан республикалық турнир өз мәресіне жетті

Шиеліде сіла дақылын егуді жаңғыртқан жан

<a href="https://kyzylorda-news.kz/">Kyzylorda-news.kz</a> Қолөнер саласы – ата-бабадан мирас болып қалған ұлттық мұра. Бүгінде ауданда аталған &nbsp;сала қарқынды дамып келеді. Өз кәсібінің майталмандары заман талабына сай қайта жаңғырып, тұтынушының көңілінен шығу үшін түрлі дүние ойлап табуда. Қай ананы алсақ та, қызының жат әдеттерден аулақ болып, яғни қол қусырып отырмай, бес саусағынан өнер тамған, жан-жақты, еңбекке бейім болып өскенін қалайды. Сондықтан қолы қалт етсе бұрымдысына ине ұстатып, құрақ құрауды, пішуді, тігуді, кестелеуді &nbsp;үйретеді. Бүгінгі біздің кейіпкерімізді де тігін тігуге өз анасы баулыған.Айзауре Дүйсенбайқызы – Шиелі ауданы, Бестам елді мекенінің тумасы. &nbsp;Бала кезінен дәрігер болуды армандаған ол, бойжете келе &nbsp;ойы өзгеріп, ісмерлік өнерге жақын болады. Кейіпкеріміз үшін әсемдіктің жиынтығы – тігін тігу. Бала кезінен анасына қолғабыс болып, ине мен жіпті ұстап үйренген. Әу баста үй шаруашылығына қажетті заттарды тігумен &nbsp;бастаған ол, келе-келе тігіншілікке бет бұрады. Кейін тәжірибе жинап, білімін жетілдіру үшін 3 айлық тігін курсын оқып алады.&nbsp;– &nbsp;Қыз баласы &nbsp;болған соң тұрмыс құрып, бала тәрбиелеу алдыңғы орында тұратыны белгілі ғой. &nbsp;Мен де &nbsp;аналар салған ізбен &nbsp;ұрпақ тәрбиелеудемін. Айтайын дегенім бұл емес, әрине. &nbsp;Балаларым &nbsp;&nbsp;өскен соң &nbsp;&nbsp;мен де тігін курсын оқып алсам деген арманыма қол жеткіздім. &nbsp;Осылайша аудандық жұмыспен қамту орталығына тіркеліп, 3 айлық тегін тігін курсын оқуға жолдама алдым. &nbsp;Соның арқасында көптеген жолдас таптым. Тігіншіліктің қыр-сырын үйрендім әрі сол іске &nbsp;машықтана бастадым. Курста тігінші-пішуші мамандығы бойынша білім алдым. Кәсіби маман болмаған соң, пішуді онша білмейтін едім. Бұл маған үйренуге үлкен мүмкіндік туғызды, – дейді ісмер.&nbsp;Деректерге сүйенсек, ерте кезде құрақ құрау мата қиындысын ысырап етпес үшін жасалған екен. Ал сол құрақтан жасалған көрпе-көрпешелер бүгінде әр шаңырақтың шырайы, көркі. Әдемі дүниені шығару үшін оның ар жағында қажырлы еңбек пен төзім жатқаны айтпаса да түсінікті. Бүгінгі таңда шымылдырық, құрақ көрпе-көрпеше, түрлі төсеніш, перде, жапқыш, қол орамал т.б. дүниелерді тігетін А.Дүйсенбайқызы да &nbsp;ең алғашқы тапсырысын балабақшаға құрақ көрпеше тігуден бастапты.&nbsp;– Осыдан бірнеше жыл бұрын ауылымыздағы балабақша құрақ көрпеше тігіп беруімді сұрады. Құрақ құрау аса шыдамдылықты қажет етеді. Бұл жерде түстердің бір-бірімен үйлесім тауып әрі тігісі де өте сауатты тігілуі шарт. Не керек, көз майымды тауысып, бар ынта-жігеріммен өздері қалағандай жасап, 6 түрлі құрақ құрап бердім. Жасаған дүнием көпшіліктің көңілінен шықса болу керек, сол уақыттан бері көрші-қолаң, туған-туыс, құда-жекжат, дос-жаран тапсырыс бере бастады. Осылайша, үйде отырып, кішігірім нәпақамды тауып келемін. Жасыратыны жоқ, тігін тігуден тіпті ләззат аламын. Ол менің бойыма шабыт беріп, көңіліме шаттық сыйлайды, – &nbsp;дейді өз ісінің шебері.&nbsp;Жұмысын жан қалауымен орындайтын тігіншінің &nbsp;арманы да жоқ емес. Оның ойынша әрбір адамның бойында ұлттық өнерге деген жанашырлық болуы керек. Отбасындағы қылықты қыздарына тігін тігудің қыр-сырын үйретіп жүрсе де, өзі тұратын Бестам ауылының мектеп қабырғасында арнайы кабинет ашып, қыз балаларға үлгі-өнеге көрсетсем дейді. Алдағы уақытта біз де шәкірт тәрбиелегісі &nbsp;келген ісмерге сәттілік тілейміз.&nbsp;

Шиелілік тұрғын: Қолөнер саласы –  ұлттық мұрамыз!

Фото: vk.com/psykolog26<a href="https://kyzylorda-news.kz/">Kyzylorda-news.kz</a> Менталды арифметика немесе шапшаң есептеудің әдісі – математикалық және логикалық ойын екендігін дәлелдей отырып, баланың белсенді ойлауына және есте сақтау қабілетіне, ойының ұшқырлығына жақсы әсерін тигізетіндігі ғылымда жан-жақты дәлелденіп отыр.Бұл әдіс 4-14 жас аралығындағы балалардың зияткерлік қабілетін дамытуға арналған ойша есеп жүйесіне негізделген бағдарлама. Бағдарлама негізінен &nbsp;әдепкіде Жапонияда, кейін Қытайда пайда болған «абакус» есептеу құрылғысының пайда болуымен тығыз байланысты.&nbsp;Абакус – қосу, азайту, көбейту, бөлу сияқты амалдар сандарының орнына моншақтарды пайдалана отырып, орындауға арналған құрал. Осы әдістеменің көмегімен бала күрделі арифметикалық амалдарды бірнеше секундтың ішінде ойлап тауып немесе «абак» шотының көмегімен есептеп шығара алады.1993 жылы Малайзиялық профессор Дино Вонг осы бағдарлама негізінде алғаш рет UCMAS бағдарламасын ойлап тауып, осыған арналған орталық ашқан екен. Қазір бұл бағдарлама әлемнің 75 елінде сұранысқа ие. Бағдарлама Қазақстанға 2011 жылы келіп, осы жылдары аудан, облыстарда менталды арифметикаға арналған орталықтар ашыла бастайды және ол бағдарламаны жете меңгерген үйірмедегі көптеген бала халықаралық, әлемдік деңгейдегі жүлделерге ие болып жүргендігін теледидар, баспасөз беттерінен оқып жүрміз.Осы жүлдегерлер қатарынан көрініп жүрген Жосалы кентінің тумасы, Т.Көмекбаев атындағы №250 мектеп-лицейінің 3-сынып оқушысы Дидар Ерғазыұлын лайықты мақтан етуге болады.&nbsp;Оның кішкентай кезінен кез келген есеп түріне жүйріктігі байқалатын еді. Осыны байқаған ата-анасы мен пән мұғалімдері Ләйлә Сағатбекова мен Мереке Жөнербаевалар оны 2-сыныптан бастап, ауданда ашылған менталды арифметика орталығының үйірмесіне қатыстыра бастайды. Жастайынан зерек Дидар бағдарламаны шебер меңгеруімен көзге түсіп, түрлі деңгейдегі жарыстарға қатыса отырып, алдыңғы қатардан көріне білді. Атап айтқанда, өткен жылы Шымкент, Тараз қалаларында өткен жарыстарда І орын, осы жылдың қараша айында Египетте өткен халықаралық жарыста І орын, наурыз айында&nbsp;Біріккен Араб Әмірлігінде өткен халықаралық олимпиада бойынша гран-при иеленді. Осы жылы бастауыш сыныптар арасында өткен «Бастау» олимпиадасы бойынша ауданаралық мектептер бойынша І орын алып, облыстық сайыста ІІІ орынға ие болды. Осы жетістіктері үшін облыс әкімі Н.Нәлібаевтың алғыс хатымен марапатталды.<blockquote>– Үйірмеге қатысқалы оның шыдамдылығы мен зейінділігі, ойлау қабілеті арта түсті, – дейді Дидардың анасы Назым Қызылбаева. Бізде Дидар Таласбек баламызға алдағы уақытта да зор табыстар тілейміз.</blockquote><img src="https://knadmin.beoblood.kz/uploads/18575b41_e337_494f_bf24_002590ce9047_1d5a5333de.jpg" alt="18575b41-e337-494f-bf24-002590ce9047.jpg">

Менталды арифметиканың әдісін меңгерген қармақшылық оқушы жүлдегерлер қатарында

<a href="https://kyzylorda-news.kz/">Kyzylorda-news.kz</a> Қазір өңірде қарапайым бір мамандықты игеріп, оны кәсіппен байланыстырған жандар көп. Әсіресе, «аспаз» мамандығы бойынша білім алған нәзікжандылардың ішінде кондитерлік өнім өндіруді қолға алғандардың қатары қалыңдап келеді. Жалағаш индустриалды-аграрлық колледжінің оқытушысы Ақкенже Шідербаеваның да шәкірттері бүгінде өз өнімімен тұтынушы талабынан шығып, кәсіп бастауды қолға алуда.&nbsp;30 жылдан астам тәжірибесі бар білікті маман асхана төңірегінде жиған тәжірибесін өз шәкірттерімен бөлісуден жалыққан емес. Түрлі ас әзірлеудің қыр-сырын жетік меңгерген ол бастысы адамда ісіне деген ынта болса, қабілет өздігінен пайда болатынын айтады.&nbsp;– Осынша уақытта қаншама шәкірт тәрбиеледім. Қазір бұрынғыдай емес, жастардың кәсіптік білімге деген қызығушылығы артқан. Тіпті аспазшы мамандығына қызығушылық танытып жатқан жігіттеріміз де табылып жатады. Олардың ішінде ас әзірлеуге машықтанған мамандар да болды. Осынша уақытта мен бастысы адамда өз мамандығына деген ынта болса, қабілет, тәжірибе жүре келе қалыптасарына көз жеткіздім. Бір шәкіртім бар, өзінің мамандығына деген адалдығын ынтасымен аңғартады. Оны жасап жатқан жұмысына қарап-ақ байқауға болады. Бүгінде ол аудандағы маңдайалды кондитерлік өнім өндіретін цехтардың бірінде жұмыс жасайтын тәжірибелі маманға айналды. Талапкер кезінен-ақ өзінің әзірлеген тағамдарымен түрлі сайыстарда жүлдегер атанды. Ал мұндай ынталы жастарды қандай кәсіпорын болса да жұмысқа алуға тырысады. Сондықтан біз барынша сапалы маман дайындауға күш саламыз. Біреулерге тағам әзірлей білсе болды, аспазшы болу оңай көрінуі мүмкін. Алайда мүлде олай емес, мамандықтың бұл түріне де адалдық керек. Оны осы салада жұмыс жасағандар жақсы түсінеді, – дейді А.Шідербаева.&nbsp;Кәнігі маман тек дәмді тағам әзірлеумен шектелмей, оның жасалу жолына арналған ғылыми еңбектерге де қалам тербеді. Мәселен, осыған дейін А.Зәкірқызының «Балықты механикалық жолмен аспаздық өңдеу», Беларусь республикасының білікті жұмысшылар мен мамандар даярлауын ұйымдастыру және ғылыми-методикалық қамтылу тәжірибесі», сондай-ақ «Білім кілті» атты ғылыми еңбектері жарық көрген.&nbsp;Кәсіптік білімді шәкірт санасына сіңіруді басты мақсат еткен білікті педагогтың осынша уақыттағы еңбек жолында жеткен жетістігі де жоқ емес. Алайда ұлағатты ұстаз тек өзі баулыған талапкерлердің бойына жиған қабілетімен мақтанады. Осыған дейін облыстық білім басқармасының, «Аманат» партиясының алғыс хатымен, қалалық білім бөлімінің «Құрмет» грамотасымен, аудан әкімінің алғыс хатымен, облыстық білім басқармасының «Құрмет» грамотасымен және ҚР Білім және ғылым министрлігінің алғыс хаттарымен марапатталған. Сондай-ақ білікті педагогтан білім алған жастар да түрлі сайыстарда жеңіс тұғырынан көрініп келеді. Мәселен, А.Зәкірқызының жетекшілігімен сайысқа қатысқан колледж студенті Жеңіскүл Шапағат, Бекжан Байсақал, Ақниет Базарбай, Ұлбосын Әбікенова, Мархаббат Иса сынды бірқатар ізденуші республикалық, облыстық және аудандық сайыстарда топ жарып, жүлделі орындардан бой көрсетті.&nbsp;– Айта берсек, алған марапаттарымыз көп. Алайда мен шәкірттерім топ жарып, өмірден өз орындарын тауып жатса, үлкен жетістік сол деп есептеймін. Қазақта «Ұстазсыз шәкірт тұл» деген сөз бар. Мен өзім тәрбиелеген шәкіртерімнің бірі топ жарып, мамандығына деген адалдығын көрсетпесе құлазып қаламын. Аллаға шүкір, әзірге балаларым ондай жағдайға дейін жеткізген жоқ. Барлығы ас әзірлеудің майталман маманы болуға талпынып жатыр. Ал біз тек талабын шыңдаймыз. Бастысы, еткен еңбегіміз талапкерлерден қайтып жатса болғаны.&nbsp;Мен үшін басты жетістік – осы, – дейді білікті педагог.

Тағам әзірлеуге де үлкен талап керек

<a href="https://kyzylorda-news.kz/">Kyzylorda-news.kz</a> Қызылорда қалалық орталықтандырылған кітапханалар жүйесіне қарасты №12 кітапхана қалалық қосымша білім беру оқу-әдістемелік орталығымен бірлесіп «Zhazgy time» лагерінің жас бүлдіршіндерімен Әбілхан Қастеевтің туғанына 120 жыл толуына орай «Мирас болған мол мұра» атты танымдық іс-шара өткізді.Әбілхан Қастеев – қазақтың әйгілі кескіндемешісі, график- суретші, қазақ бейнелеу өнерінің негізін салушылардың бірі. Қазақ бейнелеу өнерін, әрине Ә.Қастеевсіз көз алдымызға елестету мүмкін емес. Атақты суретші – қазақ мәдениетінің сурет өнерінде айшықты қолтаңбасы қалған тұлға. Осы орайда оқушылардың қазақтың тұңғыш суретшісі Әбілхан Қастеев туралы білімдерін толықтырып, суретшінің қыл қаламынан туған шығармаларымен таныстыру, ұлттық өнерге деген сүйіспеншілік арқылы эстетикалық тәлім тәрбие мен кітап оқуға деген сүйіспеншілікті арттыру мақсатында ұйымдастырылған шараның берері көп. Оқушыларға ұлы суреткердің әрбір шығармасы – бір әлем Кітап қорындағы суретші шығармасына арналған кітаптардан «Түрксіб», «Қарындасымның портреті», «Көкшіл түсті көйлек киген қыз», «Мектепке бару» сынды көркем суреттері, туындылары таныстырылды.Фото: turkistan.today

Қызылордада «Мирас болған мол мұра» атты танымдық шара өтті

<a href="https://kyzylorda-news.kz/">Kyzylorda-news.kz</a> «Тірлікте сені солай көрмесем де,&nbsp;Еркелеп құшағыңа енбесем де.&nbsp;Бала болып өзіңді арқа сүйеп,Жабыққанда мұң шағып келмесем де».&nbsp;Тәй-тәй басқан үйелмелі-сүйелмелі үш ұл. Мейірін қандырып ұлдарын сүйе алмаған әке. Небәрі 32 жасында бақилық болған жан. Жүрек жарды бұл сөздер – Тұрсын әке тағдырының анықтамасы. Ұлы Отан соғысына аттанғанға дейін Шиелі аудандық комсомол комитетінің қызметкері болған әкем, елге мүгедек болып оралады. Келісімен ауыл мектептерінде мұғалім болады. Отанын қорғағанын, Шиелі үшін жасаған азғантай еңбегін асқар тауға бағалаған біздерге көңіл медеуіміз осы анықтамадағылар ғана.«Аялап мені, әке, тербеттің,&nbsp;Қияға, биік шыңға өрлеттің.Жинадың әке жаным біздер үшін,&nbsp;Жақсылық жауһарларын жер мен көктің»&nbsp;Ерен еңбектің айғағындай болған Жәлел Қонаевқа арналған. Ол Геология Министрлігі қаржысы есебінен скважина құдықтарын салдырып, Сарысу өңірі Шиелі жайылымдарын суландырған жұмыстарға мұрындық болған еңбегі айтусыз-ақ, марапатсыз-ақ халық игілігіне жаратылғаны жарияланбай тұрған шындық.Десе де, өткен ғасырдың 70-ші жылдары Шиелі ауданының іргелі шаруашылығы болған «Гигант» ұжымшарының мемлекеттік «Еңбек Қызыл Ту» орденімен марапатталуына, сол кезде осы ұжымның мал шаруашылығын басқарған Жәлел Қонаевтың үлесі бар екені даусыз. Оның үстіне сүт пен ет өндіру кешені – «Ақтам» үшін салынған тұтас бір ауыл. Мал өнімдерін өндіру үшін электрлендіру, механикаландыру, автоматтандыруды іске қосу арқасында мал басы мен одан өндірілген өнімнің артуы, сапасының жақсаруы Жәлел Қонаевтың тікелей басшылығымен болғаны айдан анық. Бұны көздері көрген, ақсақал болғандар әлі ауыздарынан тастаған жоқ. Еңбегі бағаланып, Шиелінің бір көшесі осы айтулы азаматтың атымен аталады, Аллаға шүкір!«Бердің сен шабытын ақынның,Сен бердің намысын батырдың.Бердің сен шабысын тұлпардың,Сен бердің қанатын сұңқардың»Қазақта ақын, батыр атану, тұлпар болып, сұңқар болып, елге танылу азамат үшін оңай шаруа емес. Әркімнің өзі шыққан төбесі өзіне биік. 70 жасты алқымдаған шағымда алды-артыма қарасам, жоғарыдағы ұйқасқан сөздер тек Тұрсын әкем мен Жәлел көкеме ғана арналып тұрған жоқ екен. Әкелеріммен бірге замандас, қатарлас болған Шиелі өңірі азаматтары тек менен ғана емес, басқалардан да кеңестерін аямапты. Орынды жерінде азаматтық танытып, Шиелі топырағының гүлденуіне ат салысыпты .Олардың бәрі де «әкесіз өсті» деген сөзбен күнге шайқасқан маған демеу болғандар. Қуанғанда қасымнан табылғандар. Олар мені еңбекпен шыңдап, тәлімімен тәрбиелегендер. «Айналайын» сөзін айтудан бір жалықпағандар. Жан-жағыңды жүрегіңмен көруді үйреткендер. Көзімен көргендеріне қуана білгендер. Мейірімді көз, сезімтал жүректе кітапта жазылмаған білім бар екенін түсіндіргендер. Олар Шиелі үшін жасаған жанқиярлық еңбектерін шаршағанына бағаламай, бақытына балағандар.Иә, ол кісілердің көбісі о дүниелік болып кетті. Тірілері де бар. «Тіршілік кейде шырпыдан сырық, қурайдан құрық жасатады. Шаңнан шапан, тозаңнан тон тігуді талап етеді. «Заманың зығыр етіп зынданына итерсе, жыланнан жүн, құмырсқадан құн алуға да барасың» дегендей, Шиелі жерінің киелілігін көтеріп, атын асқақтатқан жақсыларымның аттарын атап көрейін.Олар Ыбырай Жақаев, Қойшыбай Оразымбетов, Әнуарбек Сапақов, Сыздық Боқаев, Байдүйсен Оразов, Шырынкүл Қазанбаева, Ұлбала Алтайбаева, Заһира Ержанова, Рахмет Нүрекеев, Әлиакпар Монтаев, Жағыппар Рысманов, Сәттібай Алпамышев, Байтілес Жүсіпов, Омархан Жәрімбетов, Сұлтанхан Төрениязов, Перуза Жүсіпова, Досмағанбет Аюпов, Мәрия Жұматова, Өтеген Жарықбаев, Сыздық Нүркеев, Шәрібек Ібішев, Сәрсенбек Байжанов, Қазыбек Оспанов, Арыстан Бижанов, Әбілқасым Палымбетов, Нағима Бәйменова, Оразбай Досанов, Уәйда Алиханов, Нұрмахан Қасымов, Тастанбек Түкібаев, Қасым Бектегенов, Сейтжан Омаров, Серғара Ізтілеуов, Ұлман Мәмреева, Айтбай Бекжаппаров, Көшек Қосжанов, Дүйсахмет Қалымбетов, Дүйсенбек Ермаханов, Смайыл Кәрімбаев, Василий Шкуренко, Кенбай Доланбеков, Шайық Ыханов, Әлиакпар Қобланов, Иван Голото, Бәкір Тоқбаулин, Ертай Есенгелдиев, Ақәділ Сапарбаев, Жиенбек Молдабеков көкелерім мен апаларым еді. Бұл кісілер жұмыстарын құрғақ сөзбен емес, нақты істерімен дәлелдегендер. Дәлелдегендер дейтін себебім, бұл кісілермен жұмыстас болу маған бұйырды. Әңгіме сөздерін тыңдау маңдайыма жазылыпты. Қиындық деген не деген сұраққа жауап тауып, жоқты бардай, барды қордаланған қордай жасау жолдарын үйрендім. Сөзбен айтып тауыса алмайтын тәрбие үлгілерін көрсетті.&nbsp;«Өзінен бұрын өзгені ойлау, өзім білем дегеннен аулақ болу, кішіпейіл болуды мақсат ету, кешірім ақылдылықтан болатынын білу, жамандық іздеуің - өзіңнің жамандығың екенін мойындау, жауласу жаман әдет екенін түсіну, ақыл айта бергенше ақылды тыңдауға тәрбиелену». Бұл жеті тұжырымдық пәлсәпа нағыз өмір мектебі екені анық.Осы мектепте өнегелері көп болған, кеңес дәуірінде Шиелі топырағынан нан, ет пен сүт өндірген, маңызды құрылыстар салған, әлеуметтік мәселелерде білімділік пен зеректік танытқан, Шиелінің шырайын ән мен жырға айналдырған азаматтар қатарына &nbsp;Дүйсенбі Смайлов, Зәкім Жайлыбаев, Ақылбек Сматов, Нығымет Қозайдаров, Балтабек Сыздықов, Ибаш Байхожин, Нәрзілдә Айдаров, Сәрсен Қоңырбаев, Махмуд Нартаев, Төлес Аппасов, Мұхамбетияр Сейітов, Жағыппар Зермұхамедов, Жақсылық Ахметов, Кенжалы Достияров, Хан Виктор Петрович, Елтай Әбішев, &nbsp;Меңлібай Кенжебаев, Иманғали Әбдіқалықов, Күлжан Жәукебаева, Жадыра Таспанбетова, Жұмат Бақтыоразов, Жолдас Сырғабаев, Үсен Қабланбеков, Қапан Парманқұлов, Сүйіндік Ахметов, Нұрғали Төлегенов, Молдахмет Мырзахметов, Айдар Достияров, Шәмен Ермағанбетов, Емел Бәкіров, Құрбан Рысбеков, Сәми Қазкенов, Асқар Әлжанов, Мүтәліп Жантөреев, Өтеген Жәленов, Жәкен Мәмбеталиев, Сәулебай Аймаханов, Мұзаппар Жағыппаров, Сайлау Нұркеев, Райымбек Нұртазаев, Ысқақ Оспанов, Ыдырыс Жүсіпов, Сертай Пірімбетов, Мадияр Абсұлтанов, Тұңғышбай Кусепов, Пернебай Егенов, Ыдырыс Оразов, Раушанбек Әшіров, Әшірбай Түменбаев, Бектілеу Мұсаханов, Еламан Қобланов аға-апаларым, Манап Шорабаев, Досан Бәйділдаев, Елтан Ысқақов, Жаппарбек Оразмаханов, Ниязбек Мұсабаев, Алтынбек Ағажанов інілерімнің тынбай күндіз-түні еткен еңбектерін әріптес ретінде ерекше атай отырып, Шиелі үшін бұлданбай жасаған жақсылықтарына, санаспай атқарған қызметтеріне куә болғанымды айтқым келеді.Өмірге келдің. Одан кетесің де. Не тындырдың? Өлмей тұрып соны ойладың ба? Айтуға ғана оңай бұл түсінікте жаңылыспаған пенде жоқ шығар. Өмір сүре берсем екен демейтін адам жоқ шығар. Бірақ сол өмірді қалай сүруім керек деп бас қатыра бермейтіндер кездесіп жатады. Өмір сүрудің мәні мен мәнісі ұзақтығы мен байлығында емес. Кімдермен біргесің, кімдер қайғыңа ортақ, кімдер көңіліңе шуақ, кімдер сені бағалайды, кімдер сені сағынады, кімдер сені еске ала алады деген сұрақтармен өлшенсе керек.&nbsp;Осы өмір мектебінде маған басшы ғана емес, қамқор, тілектес, ниеттес болған төмендегі жандар да жоғарыдағы тізімге әбден лайық. Осылардың ішінен Смайыл Жандарбековтің ерен батылдығын, Жолдыбай Ақмолдаевтың мінез биязылығын, Мәлібек Санаубаевтың тынымсыз талапшылдығын, Орынбасар Бәйімбетовтің жан-жақты болжағыштығын, Сейілбек Шаухамановтың іскер ұйымдастырушылығын, Сәдуақас Рсымбетовтың тыңғылықты көзқарасын, Константин Хванның шаруақор жаңашылдығын, Әзімхан Исмайловтың кішіпейіл әдептілігін, Бибіжан Жәукебаеваның сезімтал ой жүйріктігін, Қален Әбдешовтің қарапайым әділеттілігін, Абдулла Әбеновтың білімді нұсқаушылығын, Ибрагим Әбибуллаевтың бір сөзді тұрақтылығын, Жақай Бодықбаевтың еңбекқор шалымдылығын баса айтқым келеді. Айта берсең жақсы істері таусылмас бұл жандар да Шиелі халқының есінен кетпейтін, аттары жүректерінде сақталған аса қымбаттылары.Ауданның халық шаруашылығы жұмыстарын ұйымдастырған, оны іске асырған, мемлекеттік жоспарларды орындау мен халыққа әлеуметтік жағдай жасауды күнделікті тіршіліктеріне айналдырған Рахым Мауяев, Мұхит Исмайлов, Нарынбай Омаров, Сейілбек Аманжолов, Қалдыбай Сүгірбаев, Берікқара Әбжаппаров, Перден Архабаев, Сұлтанбек Оразымбетов, Сайлаубай Әбішев, Ерғали Ишанқұлов, Әділхан Бектегенов, Үпілмәлік Мырзахметов, Жамалхан Баетов, Нұрлан Махмудов, Кеңескүл Смайлова, Әтіркүл Шорабаева, Ұлтай Сейілова, Нәзира Парманқұлова, Пернеш Жүсіпова, Сейітхан Тұрысбеков, Омархан Кемелов, Әнуар Кенбаев, Еламан Дүйсенов, Шәззат Қалымбетов, Айдар Сәрсенбаевтар менімен үзеңгілес қызметте болған аға-апа, інілерім. Қарап отырсам сонау 1967 жылдан бастау алып, зейнеткерлік жасқа жеткен 2014 жылдары аралығында менімен қызмет еткендердің көбісі, менен үнемі жасы үлкендер болып шығыпты. Оларды мен үлкен-кіші деп алаламасам, олар да мені кіші деп аласартпапты. Бұлардың адамгершілігі, парасаттылығы, әділдігі, туралығы, іскерлігі, тазалығы, білімділігі Шиелі қажетіне әлі күнге жарап жатса, мен үшін өте қымбат рухани азықтарым болды.Әрине, туған жер Шиелі туралы айту қаншалықты жауаптты іс болса, соншалықты мәртебе де. Шиелінің іргетасын қалаушылардан бастап, оны өркендетіп дамытқан кісілерін бір газеттік мақалаға сыйғызу түгіл, бірнеше том кітап жазса да толық қанды қамтылмауы мүмкін. Десе де, менің көкейімдегі толғатып жатқан бір ой – әрбір ұрпақтың, туған жер биігінен өз ата-анасының табыстарын көру бір төбе. Балалық базарыңның бағыландары қатарластарыңды, қызметтестеріңді ақсақалдық мәртебеде көру екінші төбе. Өмір мектебіндегі жоғарыда аттары аталған Шиелі шынарлары мен шамшырықтарының әрбір жақсы істерін баяндау мен үшін мәртебе.Шыққан төбең биік болсын дейді ғой. Сондықтан Шиелінің әрбір төбесі де, еңбеккерлері туралы да айтылу керек. Олар туралы ой толғатып тебіренсек, туған жерді жырға қосып толғансақ, жақсылардың жақсы істерін келешекте жаттайтындай жазсақ, артымызда жақсы деген сөз қалар еді. Айтылмаса, жазылмаса тарих шықпайды. Сондықтан Шиелінің тарихын үзбей жалғастыру, жақсыларын атаусыз қалдырмау біздерге, көзкөргендердің әрбірінің мәртебелі ісі болуы керек. Бұл абзал істі атқару жүрегі Шиелі деп соққан әрбір азаматтың міндеті ғана емес, парызы да болуы тиіс!

Шежірелі мекен Шиелі

<a href="https://kyzylorda-news.kz/">Kyzylorda-news.kz</a> &nbsp;Қызылорда қалалық орталықтандырылған кітапханалар жүйесіне қарасты №12 кітапхананың ұйымдастыруымен № 187 IT мектеп - лицейінің оқушылары мен Бердібек Соқпақбаевтің туғанына 100 жыл толуына орай «Менің атым Қожа» атты кино-тайм өткізілді.Бердібек Соқпақбаев – алғаш еңбек жолын ұстаздық етумен бастаған. Қазақстан Жазушылар одағында балалар әдебиетін жандандырған жазушылардың бірі болады. Шығармашылық жолын өлеңмен ғана тоқтатпай әңгіме,повесть, роман кітаптары жарық көреді. «Балалық шаққа саяхат», «Бозтөбеде бір қыз бар», «Өлгендер қайтып келмейді», «Менің атым Қожа» секілді туындылары көптеген шет тілдеріне аударылып және сахналық, экрандық нұсқаға айналған. Солардың бірі «Менің атым Қожа» атты туындысы балалардың ең сүйікті киносына айналды.&nbsp;«Менің атым Қожа» повесінде кішкентай Қожаның мектеп жасында басынан кешкен әр түрлі қызықты оқиғалары баяндалатыны жәйлі және дос бол білу мен қатар ұстазға деген құрметті үйрету кадрлары суреттелгенін жас ұрпаққа түсіндіріп, мазмұнын ашу. Оқушыларға кітапхана да тек кітап оқумен ғана шектелмей түрлі қызықты шаралардың болатынын көрсету және мақсатымызға жету үшін небір қилы қызықтардан тұратынын ұғындыру.

Қызылорда: Оқушылар «Менің атым Қожа» атты кино-тайм өткізді

<a href="https://kyzylorda-news.kz/">Kyzylorda-news.kz</a> Жас кәсіпкер Ержан Жайлыбаев жалағаштықтарға техникалық қызмет көрсетіп, автокөлік бөлшектерін сатумен айналысады. Бүгінде ол аудан жұртшылығына қажетті қызмет көрсетіп жүр.&nbsp;Кәсібің өрісті болуы үшін ынтаң жоғары, талғамың мықты болуы шарт. Іскер азамат Ержан Жайлыбаевтың ұстанымы осындай. Өз ісінің қыр-сырын терең меңгерген талапты жас бүгінде кәсібінен нәсіп тауып отыр.Ержанның темір тұлпарға әуестігі басым. Ол өзінің автокөлігін сәйгүліктей баптап, игілігіне күтіп тұтынады. Көліктің ұсақ-түйек қосалқы бөлшектерін жатқа білетін ол темір тұлпардың маркасын да жақсылап есте сақтайды. Осыдан барып, оның ойына қажетті және сұранысқа сай орында көлік бөлшектерін сату идеясы келді. Оның айтуынша, техникалық қызметтерге сұраныс жоғары. Мұны ескерген кәсіпкер жалпы жоба құны 28 млн теңгені құрайтын техникалық қызмет көрсету орталығын ашты. Қазіргі таңда қажетті құрал-жабдықтарды әкеліп, халыққа сапалы қызмет көрсетуде.&nbsp;Орталықта автокөлік жуу орны, май ауыстыру орны, автобөлшектер және азық-түлік дүкені бар. Онда барлығы 5 адам тұрақты жұмыспен қамтылған.&nbsp;– Мен өз кәсібімді ашпас бұрын, бизнес идеямды дамытып, іскерлік қабілетімді жетілдіре түстім. Содан кейін өз алдыма кәсіп ашуға бел будым. Бастапқыда дөңгелек жөндеу орталығының, көлік бөлшектерін сататын сауда орындарында болып, жұмысымен танысып, өзімді сынап көрдім. Қазір техникалық қызмет көрсету орталығын ашып, сұранысқа сай қызмет көрсетіп келеміз. Осымен тоқтап қалмай, кәсібімді одан әрі дамытқым келеді, – дейді іскер азамат.&nbsp;Жас кезінен осы кәсіпті армандаған Ержан тұрақты тұтынушылары көп екенін айтады. Бұлай болуы да заңдылық. Себебі ол ең алдымен кері байланысты мықтап қолға алған.&nbsp;– Кəсіптің дамуына кері байланыстың қосар үлесі орасан. Тіпті үй-үйге тапсырысты жеткізіп беруді қолға алдық. Басты мақсатым – тұтынушы талғамынан шыу, – дейді іскер азамат.&nbsp;Жас кәсіпкер мұндағы жұмысшылардың бәрі нағыз өз ісінің шебері екенін айтады. &nbsp;Мәселен, желімдеу орталығында еңбек ететін Ринат есімді азамат бұған дейін қала орталығындағы техникалық қызмет көрсету орталықтарында еңбек етіп, тәжірибесін шындап келіпті. Орталық қызметкері мұндағы заманауи құрал-жабдықтар қызмет көрсетуде уақыт үнемдеуге пайдасы тиіп жатқанын жеткізді.&nbsp;– Мен бұған дейін осындай техникалық қызмет көрсету орталығында жұмыс жасап, көлік дөңгелегін желімдеу ісін үйрендім. Қазір Ержанмен бірге жұмыс жасап жатқаныма бір жылға жуық уақыт болды. Орталықтағы құрылғылардың бәрі жаңа. Соның арқасында тұтынушыларға дер кезінде қызмет көрсетіп, уақытты үнемдеуге мүмкіндік туды. Жалақым да жоғары. Қазір айына 100 мың теңге аламын. Мұнан бөлек тұтынушылар саны артып қосымша жұмыс жасасақ, тағы да айлығымыздан бөлек қаржы төленеді, – дейді желімдеу ісінің шебері Ринат ағамыз.Жас болса да үлкен істі қолға алып, тұрғындардың сұранысына сай қызмет көрсетіп келе жатқан Е.Жайлыбаев облыс әкімі тағайындаған “Сыр үміті” сыйлығының иегері екенін де айта кеткен жөн. Өңірдегі қайырымдылық шараларға да қатысып, әркез аз қамтылған отбасыларына бағалы сыйлықтар үлестіріп келеді.

Қазақстан және Қызылорда облысының жаңалықтары