<a href="https://kyzylorda-news.kz/">Kyzylorda-news.kz</a> Мал баққан әрбір қазақ шаңырағы &nbsp;үшін ақтың орны аса бағалы. Ақ дегеніміз – төрт түліктің сүтінен жасалатын тағамдар. Халқымыз молшылық, ырыс-береке, несібе, бақыт &nbsp;деп ерекше қастерлеп, одан адам ағзасына пайдалы &nbsp;шұбат, қымыз, қатық, айран, сүзбе, құрт, ірімшік, май, уыз сияқты тағамдар әзірлеген. &nbsp;Қазіргі нарық заманында тіпті осы өнімдерді шығарып, өз кәсібін дөңгелетіп отырған жандар да аз емес. Сондай жас кәсіпкерлердің бірі – Шиелі кентінің тұрғыны Мұрат Қалиев. Ол сүттен жасалатын &nbsp;ұлттық тағамдардың бірі – құрттың 8 түрін шығаруда.&nbsp;– Елімізде алға ұмтыламын, дамимын, кәсіп ашамын деген адамға мүмкіндік мол. Маған да неге кәсіп ашпасқа деген ой келді. Содан 2017 жылы ойымды жүзеге асыруды мақсат еттім. Құрттың дәмін татып көрмеген жандар кемде-кем шығар. Оны бала күнімнен білемін, бірақ құрт &nbsp;шығарумен айналысамын деген ой үш ұйықтасам түсіме кірмепті. Басында қаймақ шығарумен айналыса бастадым. Кейін құртқа ойысып, қаймақ қалып қойды (күліп), – дейді жас кәсіпкер.&nbsp;Иә, «құрғатылған», «кептірілген» деген мағына беретін бұл тағамның берер пайдасы көп. Медицина мамандарының айтуынша, құрттың құрамында А, В, С дәрумендері мен мырыш, кальций, калий, мыс, күміс, темір, алюминий, &nbsp;магний микроэлементтері бар. Сол себепті тойымды тағам болып саналады. Тіпті оны жеген бүлдіршіннің тісі сау, сүйегі берік болса, егде тартқан қариялардың ұзақ жасауына да өзіндік септігін тигізеді. Кейіпкеріміз ұзақ сақталатын тағам түрін дайындау үшін керекті сүзбені Шымкент қаласы, Қарабұлақ ауданынан алып келетінін айтты.&nbsp;– 2018 жылы Үкіметтен 950 мың теңге көлемінде қайтарымсыз &nbsp;грантқа ие болдым. Содан &nbsp;жұбайым екеуміз жақсылап қолға алдық. Үйіміздің жанынан құрт шығаратын цех аштық. Қажетті құжатын дайындап, өзімізге тән «Жаннұр» логотипін жасап, жеке &nbsp;штрихкод &nbsp;алдық. Сонымен қатар біз құрт жасайтын сүзбені арнайы Қарабұлақтан алдыртамыз. Бүгінде аудандағы көптеген дүкендерде өніміміз сатылады. Одан бөлек &nbsp;арғысы Арал мен бергі басы Жаңақорған халқы да біздің өнімді тұтынуда, – дейді ебін тауып еңбек етіп отырған &nbsp;М.Қалиев.&nbsp;Алыс &nbsp;сапарда жүріп таңдайға салсаң – сусын болатын, қарның ашса, ас орнына жүретін құртты білмейтін қазақ жоқ. Алайда, оның сан алуан түрін көбі біле бермейтіні жасырын емес. Жас кәсіпкердің айтуы бойынша, қазіргі таңда &nbsp;көлеміне, құрамына қарай құрттың 8 түрін шығарады екен. Олардың қатарында бұрыш қосылған құрт, қақталған құрт, төртбұрышты, дөңгелек т.б. түрлері ерекше назар аудартады. &nbsp;Алдағы уақытта құрттың санын арттырып, ата кәсіп қылу ойында бар.&nbsp;Бүгінде құртқа деген сұраныстың жоғары екенін базардан байқаймыз. Есіктен енгенде-ақ сан түрі елітіп әкететін құрттың бағасы да алуан. Көпшілік 1 келі құртты 2000 теңгеден саудалауда. Бұл баға әлдекімдер үшін қымбат болуы мүмкін. Әйтсе де, ақтың дәмін татқысы келген тұрғындар бағасына қарамастан құртты ойланбай алады. Ендеше кейіпкеріміздің өзінің жеке цехын ашып, құрт шығаруы бекершілік емес.&nbsp;

Шиелілік кәсіпкер құрттың 8 түрін шығарады

<a href="https://kyzylorda-news.kz/">Kyzylorda-news.kz</a> Біздің кейіпкеріміз – ұстаз деген ұлы есімді арқалаған, тамыры тереңге бойлаған үлкен шаңырақтың иесі, Жалағаш ауданына қарасты Жаңадария ауылының тұрғыны Жақсыбай Тұрғанов. Ол кісінің түр-тұлғасы, адамдық пайым-парасаты, өзгелермен қарым-қатынасы, тіпті адамға қараған көзқарасының өзі ерекше. Қазынаны кеудесіне жиған ардагердің сөйлеген сөзінде салмақ, түсіне алғанға үлкен мән жататын. Жүзінен осынша салмақтылық пен тереңдік жатқанын көрген адам еріксіз тартынып, өз бойын қалай тіктеп, жиып алғанын білмей қалады. Басындағы тақиясын сәл түзеп, жүзіңе біресе байыппен, біресе сын көзбен қарағанда жер шұқып қалатынымыз анық. Расында, бұрынғының бәрінде ғибрат бар. Ол кісілермен ұшыраса қалсаң, ұстаз деген ардақ аттың ұлылығын түсінесің. Көз алдыңа шәкірттерін біраз еркіне жіберіп алып, біресе аталы сөзбен шегелеп қоятын ғибратты ғұмыр иесі елестейді. &nbsp;Ұстаз болу адамзат алдындағы ең жауапты жұмыс, қоғамның, елдің ертеңін тәрбиелейтін, оған адами құндылықтарды, ұлттық менталитет пен ұлттық сананы дарытатын, сонымен қатар әлемнің алпауыт елдерімен бәсекеге түсе алатын қабілетті де қарымды тұлға қалыптастыратын маман иесі.&nbsp;Ғалым да, дана да, небір палуан да, жер бетіндегі патшалар да барлығы да осы ұстаздың алдынан өтеді. Ұстаздан тәлім-тәрбие алады, өмірінің алғашқы баспалдағына осы қауымның демеуімен шығады. Өмірдің көшіне осылай ілестіріп жіберген, сол жолда мол еңбек сіңірген осы жандардың үмітін ақтап, үйреткен, көрсеткен бағыт-бағдарын дұрыс түсінген шәкірт қана білім шыңына шығар мақсатын дұрыс айқындай алады. Яғни арманы асқақ, мақсаты айқын, алар асуы биік жеке тұлға болып қалыптасады. Ерлі-зайыпты ардагерлер Жақсыбай Тұрғанов пен Күлдихан Нығыметовалар (қазір о дүниелік болып кеткен) ұстаздық жолда өмірлері тоғысқан жандар.Сонау сұрапыл соғыс жылдары, яғни 1942 жылы Жалағаш ауданы, Ақарық ауылында дүниеге келген Жақсыбай ата Қызылорда қаласындағы педагогикалық институтында оқып, қазақ тілі мен әдебиеті пәні мұғалімі мамандығын алған. Ол кісінің жары Күлдихан апамыз Қостанай облысы, Жанкелді ауданы, А.Байтұрсыновтың атымен аталатын ауылда туған. Осы кісінің ұрпақтары болып келеді. Алланың жазуымен 1965 жылы отбасын құрған қос ұстаздың басты мақсаты – жас ұрпаққа сапалы білім мен саналы тәрбие беріп, тұлға қалыптастыру болды. Армандары орындалып, екеуі мамандықтары бойынша ұзақ жыл қызмет етті. Жүздеген ұрпақты тәрбиелеп, қанаттандырды. Өмір жолдары өнегелі өрілген ұлағатты ұстаздар 7 ұл, 3 қызды дүниеге әкеліп, перзенттері осы қасиетті қара шаңырақта өсіп-өніп, барлығы бір-бір үйдің иесі, ұйытқысы болып отыр. Бұл кісілерден тараған ұрпақтардың барлығы дерлік ата-ана жолын қуып, ұстаздық қызметте жүр.&nbsp;&nbsp;Атап айтар болсақ, Гүлманат Тұрғанова Қорқыт ата атындағы Қызылорда мемлекеттік университетінің тарих факультетін бітірген. Жолдасы Марат Ертуғанов екеуі №201 мектеп-лицейінде мұғалім болып қызмет атқарады. Мейрамбек Тұрғанов осы университетті бітіріп, қазіргі таңда И.Әбдікәрімов атындағы колледжде мұғалім, жары Ұлжан Естаева №278 орта мектепте химия-биология пәнінің мұғалімі. Қайрат Тұрғанов Қорқыт ата атындағы Қызылорда мемлекеттік университін бітіріп, Тереңөзек ауданында мектепте директордың тәрбие ісі жөніндегі орынбасары, ал жары Айгүл Жаңабергенова №210 орта мектепте оқу ісінің меңгерушісі болып қызмет атқарып келеді. Ал Бағдат Тұрғанов аталған жоғары оқу орнын бітіріп, бүгінгі таңда №203 орта мектепте тарих пәнінің І санатты мұғалімі. Жары айман Абызова да осы білім ошағында математика пәнінің мұғалімі. Сағдат Тұрғанов деген баласы жоғары оқу орнын бітіріп, білім саласында қызметте жүр. Пакизат Тұрғанова №261 орта мектепте бастауыш сынып мұғалімі. Республикалық, облыстық әдістемелік шараларға белсене қатысып жүрген білікті маман, жоғарғы санатты мұғалім. Темірхан Тұрғанов та аталған оқу орнын бітіріп, жары Гүлзат Орақова екеуі №201 мектеп-лицейінде ұстаздық қызмет атқарады. Әмірхан Тұрғановтың да жоғары білім алған оқу орны осы университет. Ол өмірлік серігі Гүлнәр Мұхамедқызымен бірге №261 орта мектепте. Ал Әуесхан Тұрғанов болса жоғары оқу орнынан соң Жаңадария ауылындағы №203 орта мектепке мұғалім болып орналасқан. Жары Салтанат Сейітқасымова да балабақшада жұмыс жасайды. Балаларының ішінен тек Салтанат Тұрғанова ғана дәрігерлік қызметте жүрген абыройлы жан. Міне, осындай үлкен шаңырақтың балалары отбасылық дәстүрді жалғап, осы жолда жемісті еңбек етіп келеді.&nbsp;Жақсыбай ата бізге сабақ бермесе де, мектепте ол кісінің оқушыларға келгенде тәртібі басқаша екенін білмейтін адам жоқ шығар. Қазіргідей әр баланың көңілін бағып отырмайды. Тіпті мектеп дәлізінде оң жақтағы белгіленген жерден сәл қисық жүрсең аяғыңа шыбықтың қалай, қай тұстан келіп тигенін байқап үлгермейсің. Алда-жалда балалықпен еркінсіп кетіп, ағайдың шыбығына іліксең, дымың шықпастан иә аяғыңды басарыңды, иә баспасыңды білмей біраз абдырап тұрып қаласың. Кейде сабағына бекем оқушыларды көргенде басынан сипап, әкелік мейірімін де көрсететін. «Жақсы әке балаға қырық жыл азық» демекші, қос ұстаздан тараған перзенттерінің барлығы дерлік әкесі салған дара жолмен жүріп, отбасындағы тәрбиесін өмірлік азық етіп келеді. Қара шаңырақтағы келіндері де парасатты тұлғаның әр сөзінен мән іздеп, өздеріне рухани азық алып қалуға тырысады. Жақсыбай ата «Келіндердің қабағын кірлетпеу керек, олар да біреудің қызы. Отбасында көңілденіп жүретін, мейірімге бөленген келіннен туған ұрпақ мықты азамат болып қалыптасады» деп отырады. Қолындағы келіні де көп баланы дүниеге әкелген, батыр ана. Бүгінде немерелері де әулеттің дәстүрімен білім саласына келуде. Ұстаздар династиясы деген осы болар.&nbsp;Бұл отбасының бір жетістігі 2016 жылы ел тәуелсіздігінің 25 жылдығы қарсаңында өткен «Отан қуат – отбасы шуақ» атты отбасылық байқауда «Мерейлі отбасы» номинациясын жеңіп алып, сый-сияпат иеленген.&nbsp;Ата-бабадан келе жатқан дәстүр мен ұлт құндылығын бойға сіңіріп, даналар салып кеткен білім шыңына шығып, елдің ертеңін кемел етер жас буынды тәрбиелеу жолында бар уақытын, өмірін сарп етіп, көз майын тауысқанша ізденіп, шәкірттеріме бір нәрсе болса да үйретсем деп жүрген бүтіндей бір әулеттің ізгі дәстүрі, өнегелі өмір жолдары көпке үлгі боларлықтай дүние. Шалғай орналасқан кішкентай ғана ауылда өсіп-өніп, қаншама жасөспірімге білім бұлағының көзін ашып жүрген осындай жандарды біреу білсе, біреу білмес. Сондықтан да ол кісілердің ұстаздық жолын, бізге берген мейірімімен біте қайнасқан тәлімді тәрбиесін айту, еткен еңбектеріне басымызды иіп, алғысымызды білдіру – бұл біздің ұстаз алдындағы шәкірттік парызымыз.

Ұстаздар әулетіндегі ұлағат

Шиелі: Өркеннің өрелі өмірі

Бүгінде елімізде полицияның жұмысына барынша қолдау көрсетіліп, оңтайлы жағдай жасалуда. Облыс әкімдігінің қолдауымен жергілікті бюджет есебінен учаскелік полиция инспекторларына отандық су жаңа «Jac JS4» маркалы 18 бірлік қызметтік автокөліктері берілді.&nbsp; Жаңа қызметтік автокөліктер полицейлерге 23 маусым «Қазақстан полициясы күні» мерекесі қарсаңында табысталды. Бұл ретте барыс – келісі қиын шалғай ауылдардың учаскелік полиция инспекторларына басымдық берілді. Жергілікті полиция қызметі басқармасының алаңында өткен шара барысында&nbsp; Полиция департаментінің бастығы полиция генерал-майоры Аблазимов Махсудхан Нұғманұлы учаскелік полиция инспекторларына жаңа жер талғамайтын автокөліктердің кілтін табыс етті.&nbsp; М.Аблазимов көліктерді тапсырып, өңірдегі қауіпсіздіктің артатынына сенім білдірді.&nbsp; Барлық автокөліктер заманауи арнайы техникамен, бейнетіркегіштермен және аса қуатты көк, қызыл түсті жарық диодты қондырғымен&nbsp; және навигациялық жүйелермен жабдықталған.&nbsp; «Бүгінде елімізде полицияның жұмысына барынша қолдау көрсетіліп, оңтайлы жағдай жасалуда. Жергілікті атқарушы органдардың көмегімен автопарк отандық жаңа көліктермен толықты, барлығы да «Jac» маркалы автокөліктер. Олардың барлығы ішкі істер органдарының негізгі буыны - халықпен тікелей жұмыс жасайтын учаскелік полиция инспекторларына берілді. Бұл ең алдымен өңіріміздің шалғай ауылдарындағы криминогендік жағдайды жақсартуға мүмкіндік береді.&nbsp; Облысымызда бүгінгі күні қылмыс деңгейі айтарлықтай азайып, қазіргі уақытта өңірдегі криминогендік ахуал тұрақты. Осы тұрғыда полиция қызметкерлерін материалдық-техникалық жабдықтау – қылмыс санын азайтуға септігін тигізуде деп ойлаймыз» деді Қызылорда облысы ПД бастығы полиция генерал-майоры Махсудхан Аблазимов. Айта кетерлігі, облысымызда 262 учаскелік полиция инспекторы жұмыс істейді, оның 79 облыс орталығында. Жыл басынан олар 300-ге жуық қылмыстың бетін ашып,&nbsp; 21 мыңнан астам құқық бұзушылықты анықтады.&nbsp; Жаңа авокөліктермен учаскелік полиция инспекторларының қызмет атқару сапасы артып, құқық бұзушылық пен қылмысқа жол бермеуге, ел тыныштығын күзетіп, темірдей тәртіпті сақтап жүрген полицейлер қызметінің жеделдігін арттырып, облыстағы қоғамдық тәртіпті қамтамасыз етуге өз септігін тигізбек.

Қызылорда облысының учаскелік полиция инспекторларына жаңа қызметтік автокөліктер берілді

<a href="https://kyzylorda-news.kz/">Kyzylorda-news.kz</a> Ауыл шаруашылығы – қашаннан өндіріс саласы. Әсіресе егін егіп, ерінбегеннің еңбегі еш кетпейтінін, еңбектенгеннің еңсесі биік екенін ұғынған, несібесін жер-анадан жиып-терген еңбеккерлер қауымы жақсы біледі. Ал Жалағаш ауданындағы осы саланың көш ілгері болуы, өңіріміздің дамуына тікелей әсер етеді. Жалпы бұл ауданда ауыл шаруашылығының өркендеуіне үлес қосып жүрген азаматтар жетерлік. Есет батыр ауылындағы Дүйсенғазиевтер – шаруашылық жұмысын ширатқан отбасы. Бүгінде шаруашылық жұмысына отбасы мүшелері түгелдей атсалысуда. &nbsp;Әке жолын жалғаған ер балалары ерте жастан еңбекке араласты. Қазірде барлығы бір-бір үйдің иесі болса да әкелері бастаған жұмысты аяқсыз қалдырмады.&nbsp;Мақаламызға арқау болған Хамит Дүйсенғазиев 1940 жылдың жиырмасыншы қарашасында Ақарық ауылында дүниеге келген. Орта мектепті бітірісімен еңбекке араласады. Еңбек жолын туған ауылы Ақарық колхозында механизатор болып бастады. Ол өндіріс бригадирінің көмекшісі, одан кейін механик болып қызмет атқарды. Сол салада көптеген өндіріске жаңалықтар енгізіп, халыққа қызмет етті. Алғашқы ұн, күріш диірмендерін қолмен құрастырып, халықтың қажетіне жаратты. Совхоздың күрішті көп өндіруіне байланысты тазартып мемлекетке өткізуге көп жұмыс қолы қажет болатын, осыны жеңілдету мақсатында механикаландырылған түрін жасап, жұмыс қолын азайтты.&nbsp;1969 жылы өмірлік жары Рсалды Садуовамен шаңырақ құрды. Жары Рсалды апамыз да 1967 жылдан бастап Ақарық колхозында күріш егумен айналысқан екен. Одан кейін кезіндегі «Жақаевшылар» мектебінде оқып білім алып, Социалистік Еңбек Ері, мемлекеттік сыйлықтың лауреаты Ыбырай Жақаевтың өз қолынан аттестат алған. 1967 жылы Жалағаш аудандық партия комитеті, аудандық Кеңес атқару комитеті Ұлы Октябрь социалистік революциясының 50 жылдық мерекесі құрметіндегі социалистік жарыста озып шығып, еңбек пен тұрмыста үлгі көрсеткендігі үшін дипломмен марапатталды. 1968 жылы коммунистік партия қатарына еніп, сол жылдары ерен еңбегі үшін бірнеше рет марапат төрінен көрінген. Аудандық кеңестің депуттаттығына бірнеше мәрте сайланған. Тіпті озаттар қатарынан табылып, Германияға саяхаттап қайтқан.&nbsp;Хамит әкемізге тұрмысқа шыққан соң жолдасы екеуі совхоз, колхоз жұмыстарында еңбек етті. Хамит Дүйсенғазиев 1996 жылы 55 жасында зейнетке шықса, Рсалды апамыз 1995 жылы еңбек демалысына жіберілген. 2010 жылы көпбалалы ана Президенттің Жарлығымен «Күміс алқа» иегері атанды. &nbsp;&nbsp;&nbsp;Хамит әкеміз 2002 жылы «Нағи» шаруа қожалығын ұйымдастырып, өз балаларын сол жұмысқа жұмылдырды. Егіске қажетті техникалардың кейбіреуін қолдан жасап, Магдон сияқты күріш оратын жаткалы комбайн құрастырып, еңбекке пайдаланды.&nbsp;– Шаруашылық құрылған жылдары бізге инженерлік жүйеге келтірілген жер тимегендіктен егістіктен қалған жай жерді пайдалануға тура келді. Әдепкіде 40 га жерді пайдаландық. Содан кейін бірте-бірте жер көлемін үлкейтіп, 10 га, 20 га, 28 га-ға дейін жер аштық. Жаңадан жер ашып қосу үшін техника ауадай қажет. 2008 жылға дейін комбайн, тракторларды “ҚАЗАгроҚаржы” АҚ арқылы алдық. Кейін күріш оратын техника күші жетіспегендіктен қолдан Магдон кобайнын жасап шығаруға тура келді. Осылайша қолда барды қанағат тұтып, шаруашылық жұмысын жүргізе бердік. Содан соң Магдон 155 жаткасын, 2 CLASS 580 комбайнын, ал биыл трактор, соқа және жердің арық-атызын қазуға қажетті техникаларды алдық. Қазір шаруашылықта 158 га жай жер, 85 га инженерлік жүйеге келтірілген жер бар. Қазір менің жасым ұлғайды, бұрынғыдай күш-қуат жоқ. Сондықтан 2017 жылы «Нағи-1» шаруа қожалығын құрып, екі шаруашылықты да үлкен ұлым Серік жүргізіп отыр. Шаруашылықта 17 адам жұмыспен қамтылған, – дейді шаруашылық төрағасы Серік Дүйсенғазиев.Айта кетейік, бүгінде Хамит атамыз салған сара жолды балалары жалғап келеді. Олар да өз алдына үй-жайлы. Көзі тірісінде балаларына ең бірінші еңбекті өсиет еткен ол өзі де ерінбей еңбектен несібесінайырған.&nbsp;– Жер-Ана жомарт қой, бейнеткерге қашанда молынан ризығын береді. Әсіресе бізді еңбекке ерте араластырып, маңдай термен тапқанның дәмі тәтті болатынын түсіндірді, көрсетті. Шүкір, қазір біз әке жолын жалғастырып келеміз, барлығы осы шаруашылықта еңбек етеді. Үлкен ұлы шаруашылық жұмыстарын жүргізсе, одан кейінгіекі ұлы осында механизатор. Қыздарының екеуі білім саласында, біреуі медицина саласын бітірген. Ал анамыз отызға жуық немере, онға жуық шөбере сүйіп отырған бақытты жан, – дейді Әсет Дүйсенғазиев&nbsp;Отбасы – құтты мекен. Мұнда еліміздің болашағын тәрбиелейміз, келешек тұлғаны қалыптастырамыз. Сондықтан бұл шаңырақта қазақы дәстүрімізге, құндылықтарымызға үлкен мән беріледі. Өзі қазақ деген дана халық қой. Баланы үш сөзбен-ақ тәрбиелеген. Хамит атамыз балаларыма кішкентайынан обал мен сауапты, жақсы мен жаманды ажырата білуді, ұят болатын істерден аулақ болуды үйреткен.Отбасының ақылшысы, Хамит Дүйсенғазиев еңбегі ескеріліп, «Боир» (бүкілодақтық жаңалық және өнертапқыштық) белгілерімен марапатталып, бір рет аудандық, үш рет ауылдық кеңеске депутат болып сайланған. Сонымен бірге 2010 жылы «Алтын дән-2010» мерекесінде аудан әкімінің «Алғыс хатына», «Ең үздік диқан» номинациясына және 2019 жылы облыс әкімінің Құрмет грамотасына ие болған.&nbsp;

Құт қонған шаңырақ

Бүгін Қызылорда облысы Полиция департаментінің Жергілікті полиция қызметі басқармасының алаңында жеке құрамның қатысуымен гарнизондық жиын өтті. Департаменттің қызмет салалары 8 қорапты құрады. Гарнизондық жиынды Полиция департаментінің бастығы полиция генерал-майоры Аблазимов Махсудхан Нұғманұлы өткізді.&nbsp; Саптық шеру саптық дағдыны жетілдіру, саптық командаларды орындау кезіндегі реттілікті, сондай-ақ қатардағы және басшы құрамның нысандық киім үлгісін қатаң ұстануын қамтамасыз ету мақсатында өткізілді.&nbsp; Департамент бастығы қызметкерлердің сыртқы түр-сипатын, үлгілік киімін, қызметтік куәліктерінің, айырым белгілерінің талаптарға сай болуын, автокөлік пен байланыс құралдарының техникалық жай-күйін тексерді.&nbsp; Қоғамдық тәртіпті сақтауға кірісетін полиция қызметкерлеріне облыстағы жедел жағдайдың жай-күйі туралы жеткізіліп, бағдарлар таныстырылды. Сонымен қатар департамент бастығы саптық бөлімшелердің командирлеріне тапсырма берді.&nbsp; «Мемлекет басшысы «Заң және Тәртіп» қағидатын біржола орнықтыруда полиция айрықша рөл атқаратынын, мемлекетте заң талаптары мүлтіксіз орындалуы керектігін және заң бұзған кез келген адам жазасын алуға тиіс, – деп атап өтті.&nbsp; Осы ретте, біз Мемлекет басшысымен алға қойған міндеттердің сапалы орындалуына, елімізде заң үстемділігі мен әділдікті сақтауда нақты нәтижелерге қол жеткізуге барлық шараларды қабылдауымыз қажет.&nbsp; Полиция үшін қашан да қоғамдық қауіпсіздікті сақтау, адамдардың тыныш, бейбіт өмір сүруін тұрақты қадағалау басты міндет. Сондықтан да елдегі тұрақтылық пен қоғамдық тәртіпті нығайту бойынша алдымызға қойған міндеттерін орындауда барлық күш-жігерімізді барынша жұмылдыруға тиіспіз»&nbsp;деді Департамент бастығы Махсудхан Аблазимов.&nbsp; Айта кетерлігі, қазіргі уақытта облыс аумағында&nbsp; «Құқықтық тәртіп» жедел профилактикалық іс-шарасы өткізілуде.&nbsp; Жедел-профилактикалық шара аясында полиция қызметкерлері күшейтілген жұмыс түріне көшіріліп, қоғамдық тәртіпті, оның ішінде көшеде жасалатын қылмыстық құқық бұзушылықтардың алдын алу мен жол қозғалысы ережелерін өрескел бұзушылықтың, көлік құралын мас күйде басқарудың жолын кесу мақсатында жұмыстар ды жүргізуде.&nbsp; Сондай-ақ, учаскелік полиция инспекторлары әкімшілік аймақтарындағы профилактикалық есепте тұрған тұлғаларды тексере отырып, әкімшілік учаскелерді аралап тексеретін болады.

Қызылорда облысының Бас полицейі гарнизондық жиын өткізді

<a href="https://kyzylorda-news.kz/">Kyzylorda-news.kz</a> Әр салада халықтың қажетіне жарауды мақсат етіп, артқан сенім үдесінен шығатын жандар болады. Мұндай абыройлы міндетті орындау екінің бірінің қолынан келе бермейді. Себебі көздеген мақсатына жетуде түрлі қиындықты еңсеріп, төзімділік пен табандылық танытқан жан ғана батыл қадам жасайды. Ішкі істер саласында 10 жылдан астам тәжірибесі бар Жасұлан Бекенов те саналы ғұмырын қоғам қауіпсіздігіне арнап, мемлекет алдында қабылдаған антына адалдық танытып келеді.Кейіпкеріміздің осынша уақытта аудан төңірегінде орын алған қылмыстарды анықтауда жасаған ерлігі көп. Қазір оның әрқайссының тарихына тереңдесек, басылымның бірнеше бетін Жасұлан Бекеновтың биографиясына арнауға тура келеді. Әсіресе, осыдан 7-8 жыл бұрын ауданда көбейген мал ұрлығына қатысты қылмыстарды тежеуде тәртіп сақшысының еңбегі ерен.&nbsp;Осыған дейін аудандық полиция бөлімі қызметкерлерінің атқарған жұмысының нәтижесінде Жалағашта мал ұрлығы едәуір төмендегенін айтқан едік. Ал бұған қатысты орын алған қылмыстарды анықтауға Жасұланның қосқан үлесі зор. Осыдан 7-8 жыл бұрын өңірде барымташылардың қатысуымен бірнеше қылмыс орын алса, соның барлығының ашылуында Ж.Қыдырәліұлының қолтаңбасы бар десек, қателеспейміз.Ұмытпасам, 2017 жылдың екінші жартысы болу керек, әйтеуір ауданда мал ұрлығын кәсіп еткен азаматтың қатысуымен орын алған қылмыс анықталған болатын. Өз үйін қасапқанаға айналдырған күдіктіні қолға түсіруде де батыл қадамға барып, ерекше көзге түскен осы Жасұлан Бекенов болатын. Түн жарымда үй ішінен жанып тұрған жалғыз жарықшамнан сезіктенген учаскелік полиция инспекторы мән-жәйді анықтап болған соң дереу әріптестерін жұмылдыру арқылы арам пиғылды қылмыскерлерді құрықтайды. Осылайша қорадағы малы қолды болған бірнеше жәбірленушінің ақ алғысын алды. Мұнан кейін де Есет батыр ауылында мал ұрлығына қатысты топтасып жасалған бір қылмыстың беті ашылды. Осылайша ауданда полиция бөліміне Талғат Лекеров басшы болып келгелі Жалағашта барымташылардың қолы байланды. Қылмыстың бұл түрі расында түлік асыраған жергілікті халықты алаңдатып қойған еді. Ал қазір жағдай мүлде басқа.&nbsp;Антына адалдық танытып келе жатқан кейіпкеріміз карантин кезінде Аққұм ауылының кіре берісіне қойылған блок бекетте жұмыс жасаған болатын. Халықтың қауіпсіздігін қамтамасыз етуді бірінші кезекке қойған ішкі істер саласының қырағысы мұнда да екі жеп биге шығу салтынан жаңылмапты. Тек кірген-шыққан жолаушының белгіленген тәртіпке бағынуын қадағалаумен шектелмеген Жасұлан мұнда да бір қылмыстың ашылуына себеп болыпты.&nbsp;Тәулік бойы блок бекетте көз ілмей тұрған тәртіп сақшысына үлкен жолдың бойындағы сол төңіректе күдікті біреудің жүргені жайында ақпарат түседі. Мән-жайға қаныққан Ж.Қыдырәліұлы көп ұзамай жұрттың ақадал малын оңай олжа етуді кәсіп қылған әккі ұрыны құрықтайды. Осыған дейін бірнеше ауданда талайды сан соқтырған қақсал қасапшы бұл жолы тәжірибелі тәртіп сақшысынан айласын асыра алмады. Бетімен кеткен барымташының жолын кескен Жасұлан тек Аққұмда орын алған бір ғана қылмыстың бетін ашумен шектелген жоқ. Керісінше арам пиғылын жүзеге асыруды көздеген Қызылорда қаласының тұрғынына қатысты бүгінде бірнеше қылмыстың орын алғаны белгілі болып отыр.&nbsp;Полиция майоры қандай жағдайда да елдің тыныштығын күзетуді өзіне міндет санайды. Себебі ол мемлекет алдында қабылдаған антына адалдық танытудың негізгі бағытын да сонымен байланыстырады.&nbsp;– Әуел бастан жұмысқа кірерде халыққа қалтқысыз қызмет етуді мақсат еттім, енді сол өзіме өзім артқан сенім үдесінен шығуым керек. Алдағы уақытта да мұнан да үлкен қылмыстың ашылуында қолтаңбамды қалдырармын. Бірақ ешқашан тоқмейілсуге болмайтынын назардан шығармаймын. Қандай жағдайда да елдің тыныштығын күзетуді бірінші кезекке қоюға тырысамын, – дейді полиция майоры.&nbsp;Тәртіп сақшысының бұл сөзінде ешқандай жасандылық жоқ. Расында мемлекет артқан сенім үдесінен шығуды бірінші кезекке қоятын білікті кадр екенін ісі де аңғартып тұр. Осыған дейін бірнеше рет марапат төрінен көрінген Жасұлан Бекеновты қазіргі таңда әріптсетері құрметтейді. Осыған дейін елдің ықыласына еңбегімен бөленген жанның атқарған жұмы кейінгі буынға үлгі.&nbsp;

Қылмыстың жолын кескен Жасұлан Бекенов

Бүгін Қызылорданың іргесіндегі «Байтерек-1» мөлтек ауданында жаңа учаскелік полиция пункті ашылды. Ашылу салтанатына Қызылорда облысы Полиция департаментінің бастығы полиция генерал-майоры&nbsp; Аблазимов&nbsp;Махсудхан&nbsp;Нұғманұлы және ішкі істер органдарының ардагерлері қатысты.&nbsp; Аталмыш кеңсе азаматтардың қажеттіліктері, учаскелік полиция инспекторларының функционалдық міндеттері ескеріліп, қажетті жиһазбен, техникамен, байланыс құралдарымен және бейнебақылау жүйесімен жабдықталған. Бұл азаматтармен қарым-қатынас процесі үнемі бақылауда екенін білдіреді, сондай-ақ сыбайлас жемқорлық әрекеттеріне де тосқауыл болатыны анық.&nbsp; Атап айтқанда, азаматтарды қабылдау бөлмесі, аға учаскелік полиция инспекторының қызметтік бөлмесі, учаскелік полиция инспекторының және көмекшісінің қызметтік бөлмесі, ювеналды полиция инспекторының қызметтік бөлмесі, шағын мәжіліс бөлмесі, ас бөлмесі, жуынатын орын, дәретхана және қазандық бөлмесі.&nbsp; Одан бөлек&nbsp; айғақ заттар қоймасы, қызметтік көлікке арналған қыстық автотұрақ қалқасымен қамтылған. Бұл ретте учаскелік полиция инспекторларының жұмыс жасауына қолайлы жағдай жасалған.&nbsp; 10 бөлмеден тұратын ғимараттың ауданы 207,79 шаршы м2. Қызмет көрсетілетін учаскедегі халық саны 5 мыңнан астам адамды құрайды.&nbsp; «Полицияның сервистік моделінің басты тұлғасы ретінде учаскелік полиция инспекторларына басты рөл беріліп отыр. Қазіргі уақытта учаскелік инспекторлардың жұмысына барлық жағдай жасалуда» деді өңірдің Бас полицейі М.Аблазимов.&nbsp; Қоғамдық тәртіпті қамтамасыз етуде учаскелік инспекторлардың рөлі зор. Олар халықпен күнделікті тікелей байланыста, азаматтарға оқыс жағдайда бірінші болып көмекке келіп, қастарынан табылады, оларды алаңдататын мәселелерді біледі, шешуге тырысады, азаматтардың өмір сапасын арттыруда басты тұлға саналады. Учаскелік инспекторлар азаматтардың қауіпсіздігін қамтамасыз ету, қоғамдық тәртіпті сақтау бойынша белгілі бір аумақтағы қылмысты болдырмау үшін күрделі жұмыстарды атқарады.&nbsp; Осылайша халық пен полиция арасындағы негізгі байланыстырушы буын&nbsp; саналатын учаскелік полиция инспекторларының материалдық-техникалық базасы нығайтылып, жаңа заманауи жабдықталған учаскелік полиция пунктінің ашылуы олардың өнімді қызмет атқаруына, қызметке деген ынта-жігерінің артып, қызмет сапасының жоғарылуына өз септігін тигізбек.

Қызылордада жаңа учаскелік полиция пункті ашылды

<a href="https://kyzylorda-news.kz/">Kyzylorda-news.kz</a> Қоғамның тыныштығын күзетіп, күн-түн демей, уақытпен санаспай жұмыста жүретін полицейлер қауымының да қызметін ерекше құрметке лайық дер едім. Қауіп-қатерге толы қызметін абыроймен атқарып, қызмет бабында қапыда қаза тапқан қоғам күзетшілерінің ерлігі осы сөзімізді қуаттай түспек. Қоғам тыныштығын күзеткен бүтіндей бір отбасының тағылымды жолын мақаламызға арқау етуді жөн көрдік. &nbsp;Осы салада жүріп, айтарлықтай еңбегі сіңген Жалағаш ауданындағы Калменовтер отбасының еңбек өтілі 50 жылдан асады. 1956 жылы 26 ақпанда дүниеге келген Табынбай Калменов Мырзабай ахун ауылының тумасы. Ол 1973 жылы аудан орталығындағы №123 орта мектепті бітіріп, сол жылы Н.В.Гоголь атындағы педогогикалық институтына түсіп, 1977 жылы жоғарғы білім алып шығады. 1977-1979 жылдары аралығында Тәжікстан Республикасы Душанбе қаласында Отан алдындағы борышын өтеген. &nbsp;1979 жылдан бастап зейнеткерлік жасқа дейін ішкі істер саласында әртүрлі офицерлік лауазымда қызметтер атқарған. Еңбек жолында Жалағаш аудандық ішкі істер бөлімі бастығының кадр жұмыстары жөніндегі орынбасары қызметін абыроймен атқарып, 2002 жылы демалысқа шыққан. Отставкадағы полиция подполковнигі Табынбай Тұяқбайұлы 2019 жылы ақтық сапараға аттанды, артында ел үшін еткен елеулі еңбегі мен ізін жалғар ұл-қыздары қалды.&nbsp;Әке жолын қуған, полицейлер отбасында тәрбиеленген жалғыз ұл Дәулет Калменов те бүгінде отставкадағы полиция майоры. 1981 жылы Қызылорда қаласында дүинеге келген ол әкесі секілді саналы ғұмырын қоғам сақшысы болуға арнады. Еңбек жолында ҚР ІІМ-нің &nbsp;Шымкент қаласындағы училищесінің тыңдаушысы, Қызылорда облысы, Қармақшы АІІб-нің қоғамдық қауіпсіздік бөлімшесінің учаскелік полиция инспекторының көмекшісі, Қызылорда облысы, Жалағаш АІІб-нің КЖТІ жөніндегі тобының учаскелік полиция инспекторы, Қызылорда облысы, Жалағаш АІІб-нің қоғамдық қауіпсіздік бөлімшесінің маманы учаскелік полиция инспекторы, Қызылорда облысы, Жалағаш АІІб-нің КЖт-ның аға &nbsp;инспекторы, Қызылорда облысы, Жалағаш АІІб-нің &nbsp;КЖт-ның әскери-қызметтік дайындық жөніндегі аға инспекторы, Қызылорда облысы, Жалағаш АІІб-нің тергеу бөлімшесінің аға тергеушісі, сондай-ақ бірнеше жыл аудандық тергеу бөлімшесінің бастығы қызметтерін атқарған. Отставкаға шыққаннан кейін облыстық адвокаттар алқасының адвокаты болып қызмет атқарып келеді. Қоғам күзетшісінің өмірлік жары Айгүл Сейтенова да 2006 жылдан бастап Қызылорда облысы мамандандырылған күзет қызметі басқармасында қызмет атқаруда.&nbsp;Сонымен бірге осы отбасындағы Салтанат Калменова да – ерлермен қатар ел тыныштығын күзетіп жүрген полицей қыздардың бірі. Ол ер азаматтармен бірлесе талай қылмыстың бетін ашуға, қоғамдағы тыныштықты сақтауға үлес қосып келеді. Үйде мейірімді ана, ибалы ару. Түзде темірдей тәртіпке бағынған сақшы. Аудандық полиция бөлімінің кадр саясаты тобының инспекторы Салтанат Табынбайқызы бала кезінен әкесі сияқты полицей болуды армандаған екен. Ата-анасының қыз балаға бұл салада жұмыс істеу қиын болады дегеніне қарамастан, осы мамандықты таңдап, бүгінде әке жолын жалғап, абыроймен жауапкершілік жүгін арқалап келеді. Қызмет барысында аудандық ішкі істер бөлімі қызметкерлерінің әскери-қызметтік тәртібі мен кәсіби шеберлігін арттыруға бағытталған іс-шараларды жүргізіп, жеке құраманың моральдық-психологиялық ахуалын қалыптастыру мақсатында да жұмыс істеді.&nbsp;– Алғашқы кездері бұл қызметке үйрену оңай болмады. Бізде белгілі бір жұмыс уақыты біткенше ғана жұмыста болу деген жоқ. Түнде де жастарды бақылап, көшедегі тәртіпті күзетіп рейдтерге шығып тұрамыз. Арасында &nbsp;түн ортасында да шақыртулар болып жатады. Осындай жағдайлар, қызметім мені қаттылыққа, ер мінезді болуға тәрбиеледі. Форма кигеннен кейін халықтың қорғаны болуға, мықты сақшы болуға бейімделдім. Осы салаға келгеннен бері көптеген тәжірибеден өттім. Әйел заты болсам да, ең басты мақсатым – қоғамдық тәртіпті күзету, азаматтардың құқықтарын қорғау деп ойлаймын. Өз жұмысымды жауапкершілікпен, адалдықпен атқаруға тиіспін, – дейді Салтанат Табынбайқызы.&nbsp;Иә, қоғам тыныштығын күзету, оны асқан жауапкершілікпен атқару оңай емес екені бәрімізге белгілі. Бұл сала ішкі істер органы болғасын ерлер немесе әйелдер деп бөлінбейді. Ереже, тәртіп бәріне бірдей. Салтанат та отбасында әкесінен, ағасынан алған ақыл-кеңесіне құлақ асып, өмірлік тәжірибесіне еңбек жолында арқа сүйеп келеді. Осы салада бұған дейін ҚР ІІМ-нің &nbsp;Қызылорда қаласындағы училищесінің тыңдаушысы, Қызылорда облысы, МКҚБ-нің ММ-нің полиция батальонының полицейі, &nbsp;Қызылорда облысы, Сырдария және Жалағаш ауданының батальонының полицейі, Қызылорда облысы, Жалағаш АІІб-нің кадр саясаты тобының инспекторы &nbsp;болған. Жұмысына деген адалдығы, халыққа қалтқысыз қызметі еленіп, бірнеше мәрте марапат төрінен көрініп те жүр.&nbsp;Калменовтер отбасының полиция қызметіндегі еңбек өтілі 50 жылдан асады. Салғырттықты көтермейтін бұл саладағы &nbsp;әке-ағаларының сара жолын жалғап келе жатқан Салтанат та қоғамның тыныштығын бірінші орынға қояды.&nbsp;

Қоғам тыныштығын күзеткен отбасы

<a href="https://kyzylorda-news.kz/">Kyzylorda-news.kz</a> Жалағаш ауданында соңғы жылдары кәсіпке бет бұрып, табысқа кенелуді көздеген жандардың қатары артып келеді. Бірі аталған саланы қолдауға арналған мемлекеттік бағдарламаның көмегімен өз ісін өрістетсе, енді бірі қолда бар қаражатымен кәсіп ашып, жұмысын жандандыруда. Аудан әлеуетін арттыру үшін бізге екеуі де тиімді. Себебі өңірде кәсіпкерлік жанданса, аудан экономикасында тұрақты өсім қалыптасады, бір жағынан жұмыссыздық мәселесіне жол бермеуге де кәсіптік нысандардың артуы оң әсерін тигізері сөзсіз.Бұрын ауданда аграрлық өңір болғандықтан көп адам тек мал шаруашылығы саласы бойынша кәсібін жандандыруды мақсат ететін. Жем-шөптен тапшылық көрмеуді көздеген олардың бұл бастамасы да жаман емес. Алайда өнімнің тек жалғыз түрін сатылымға шығаратын кәсіптік нысандардың бір өңірде көптеп шоғырлануы тауарды өткізуде айтарлықтай қиындық тудыратыны анық. Осыған орай қазір жалағаштықтардың да іс бастар алдындағы мақсаты да өзгерген. Яғни олар ауданда соңғы жылдары бұрын-соңды қолға алынбаған немесе саны аз кәсіптік бағытты таңдап, пайдаға кенелуді жоспарлап отыр. Іскер азаматтар бұл бір жағынан тауарды өткізуге де қолайлы екенін айтады. Осындай мақсатпен кәсіпке бет бұрған жандардың бірі – кент тұрғыны Дәуренбек Алтыбаев.&nbsp;Осыдан он бес жыл бұрын өз ісін бастаған Дәуренбек Алтыбаев бүгінде жұмысының жемісін көріп отырғанын айтады. Бұрын елордадағы пластик есік-терезе өндіретін цехта жұмыс жасаған ол Сыр бойында өнімнің бұл түріне деген сұраныстың жоғары екенін байқайды. Осылайша туған жерге келіп, бұған дейін жалақысынан үнемдеп жинаған қаражатына қажетті құрал-жабдықтар алып, іске кіріседі.&nbsp;– Бұрын Астана қаласындағы есік-терезе өндіретін цехта жұмыс жасайтын кезде тұтынушыларымыздың көбісі сырбойылықтар болатын. Осыдан-ақ Қызылордада пластик есік-терезеге деген сұраныстың жоғары екенін аңғардым. Туған жерім Жалағашқа келіп осы салада өнім өндіретін цех ашуды жоспарладым. Бастапқыда ертеңгі күні тапсырыс болмай жатса, кәсібім жүрмей бизнесім аяқсыз қалады-ау деп еш уайымдаған жоқпын. Себебі мен цех ашу үшін айтарлықтай қомақты қаражат жұмсамадым. Небәрі екі аппарат пен аз ғана шикізат алып, ісімді бастап кеттім. Кейін жұмысым жүріп, сұраныс артқан сайын өз ісімді өрістете бастадым. Қазір жаман емес, кәсібімнің арқасында үлкен пайдаға кенеліп жатырмын. Бастысы мемлекетке салмақ салмай өз-өзімді жұмыспен қамтып отырмын. Өнімнің бұл түріне әлі де сұраныс жоғары. Уақытпен санаспай барынша тұтынушы талабына сай өнім шығаруға күш салып жатырмын. Қазір нағыз құрылыстың қызып тұрған шағында тапсырыс саны да артып келеді.&nbsp;Тұтынушыларым да риза, мен де жеке табысыма қол жеткізіп жатырмын. Бұйыртса, тағы да қосалқы аппараттар алдым, енді цехта өндірілетін өнім түрлерінің санын көбейту жоспарда бар, – дейді «Димаш» ЖК-ның басшысы.Үй ауласының жанынан ашылған цехқа келіп жатқан тұтынушылар санының көбіне біз де көз жеткіздік. Бар-жоғы екеуара болған 20-25 минуттық диалог барысында 7 адам 16 терезе, 4 есікке тапсырыс беріп кетті. Іскер азамат бұл тауар түрін шикізат көзі келген бойда 5 күн ішінде дайындай алатынын айтып отыр. Қазіргі таңда «Димаш» ЖК-да өндірілген өнім түріне тек кент орталығынан ғана емес, ауылдық округтерден, және көршілес Қармақшы, Сырдария аудандарынан да тапсырыс түсуде.&nbsp;Салада 20 жылдық тәжірибесі бар ісмер азамат көбіне тұтынушылар түркиялық тауар түрін таңдағандықтан шикізат көзін де сол жақтан тапсырыспен аллдырады. Ал пластик есік-терезелердің әйнектері Ресейден келеді екен. Қазіргі таңда кәсіпкер тұтынушы талабына сай есік-терезелердің шаршы метріне 28 мың теңгеден тапсырыс алуда. Мұндағы тауралардың бағасындағы сәл қымбатшылықты Дәуренбек Алтыбаев мұнда жеткізілетін шикізат көзімен байланыстырады. &nbsp;– Рас, соңғы жылдары пластик есік-терезелердің бағасы сәл қымбаттады. Мұның бәрі келетін шикізат бағасымен байланысты. Себебі олардың бағасында да өсім қалыптасып отыр. Сондықтан біз де өндірген өніміміздің бағасына өзгеріс енгіземіз. Егер келетін шикізат көзі арзандаса біз де есік-терезелердің бағасын түсіруге тырысамыз. Әзірге оған мүмкіндік болмай отыр. Кейбір тұтынушылардың жағдайына қарап, қалтасы көтерген бағаға да жасап берген күніміз болды. Алып кәсіпорынның иесі емеспін, бірақ шама-шарқымша ауданда өтіп жатқан қайырымдылық шараларынан құр қалмаймын. Себебі мен осыған дейін қандай жетістікке жетсем, соның бәрін жасаған жақсылығыммен байланыстырамын, – дейді Дәуренбек Алтыбаев.&nbsp;Кәсіпкер жыл сайын мұндай шараларға атсалысуды дәстүрге айналдырған. Мәселен, еліміздегі&nbsp;«Аманат»&nbsp;партиясының аудандық филиалына барып, жағдайы төмен отбасылардың тізімін сұрап, соларға өзінің өнімін тегін ұсынады. Жыл сайын Д.Алтыбаев үш жағдайы төмен отбасына көмек қолын созуды дәстүрге айналдырған. Егер құрылыс жүргізіп жатқан аталған санаттағы отбасылар саны мұнан да көп болса, тек шикізаттың бағасына ғана ақы алып, өз еңбегін пұлдамайды. &nbsp;

Сұранысқа сай өнім шығарады

<a href="https://kyzylorda-news.kz/">Kyzylorda-news.kz</a> Аймақта командалық сайыста жалағаштық аяқдоп шеберлері оң нәтижелерге қол жеткізіп келеді. Әсіресе соңғы жылдары футболдан ауданның аяқдоп шеберлері жеңіс тұғырынан көрінуді дәстүрге айналдырды. Әрине, мұның әр жағына үңілсек, үлкен еңбектің жатқанын аңғара қоямыз. Алайда өңірде команда жасақтауда және оның құрамындағы спортшылардың қабілетін шыңдауда салада 30 жылдан астам тәжірибесі бар Жанқожа Қаниевтің қолтаңбасы барын бірі білсе, бірі білмейді.1999 жылдан бері футболға шәкірттер баулыған бапкердің нәтижелі ісі көп ұзамай жемісін бере бастады. Дайындыққа қажетті ғимарат пен қаржы тапшылығына мойымаған ол бүгінде шәкірттерінің еңбекті ақтағанына қуанады.&nbsp;– Біздің кезімізде спорттың бұл түріне бала тәрбиелеу жұмыстарында мәселелер көп болды. Қазір ол күндердің бәрі артта қалды. Футболдан өтетін сырттағы сайыстарға көбіне біз &nbsp;аяқдоп шеберлерін жиі қатыстыра алмаймыз. Себебі команда құрамында бірнеше адам болғандықтан, оның жол шығыны, формасы, барлығы бюджетке салмақ салатын. Тіпті өз қалтамнан қаражат жұмсап та жарысқа шәкірттерімді алып барған күндер болды. Қазір шүкір ғой, қайда барып дайындаламын десең де ғимараттан мәселе жоқ. Олардың қатысатын жарыстарына да уақытылы қаржы қаралып тұр. Біздің ауданда спорттың бұл түрінің алға басуына «Наркескен» спорт клубының көп көмегі болды. Мұнан бөлек, мектептерде де футзалға балалар дайындау жұмыстары бір ізге түсті, – дейді &nbsp;Жанқожа Сағынбайұлы.&nbsp;Кейіпкеріміз 20 жылдан астам уақыттан бері футболдан ерлер және қыздар командасын жаттықтырып келеді. Бүгінге дейін ұйымдастырылған түрлі сайыстарда шәкірттерінің жеткен жетістігі көп. Мәселен, мектеп оқушылары арасында ұйымдастырылған «Теңбіл доп» облыстық &nbsp;спартакиадасында жалағаштықтарға үздік үштіктен төбе көрсету арман болған. Ал бапкерлікті Жанқожа Қаниев қолға алған жылы қыздарымыз көш бастап, туған жерге жеңіспен оралыпты. Сол уақыттан бері қаракөз қарындастарымыздан құралған оқушылар командасы қатарынан 4 жыл кубокты жеңіп алды. Мұнан бөлек, 2 мәрте Шымкент қаласында және 1 рет елордада өткен республикалық сайыста да Жанқожа шәкірттері өнер көрсетті. Республикалық сайыста 2016 жылы жалағаштықтар ерлер арасында үздік үштікті түйіндеген болатын.&nbsp;Қазіргі таңда кейіпкеріміз баулыған аяқдоп шеберлері елімізге танымал клубтардың жастар құрамасында және академияларында өнер көрсетіп жүр. Бүгінгі таңда ағайынды Батырбек, Бақытбек Мұқашовтар футболдан облыс құрамасында өнер көрсетсе, Сағымбай Диас «Байқоңыр» футбол клубында тер төгеді. Жанқожаның соңғы жылдары оң нәтижелерге қол жеткізіп жүрген шәкірттерінің қатарында Мақсат Әбжәли де бар. Ол жергілікті «Қайсар» футбол клубының жастар құрамасында әріптестерімен бірге бірнеше мәрте жеңіске қол жеткізді. «Оңтүстік» футбол академиясының құрамында өнер көрсеткен Төлепберген Әнуар да жалағаштық бапкердің шәкірті болатын. Аталған футбол академиясының шабуылшысы жуырда әріптестерімен бірге Қазақстан кубогын иеленді. Сол ойыннан кейін Жанқожа Сағымбайұлының шәкіртін «Қайрат» футбол академиясы сатып алды.&nbsp;Жалпы футболдан жетістігі мол жалағаштық тәжірибелі ойыншылар көп. Мұның бәрі – Жанқожаның ұстарасынан өткен кәнігі спортшылар. Кейіпкеріміз қарапайым адамнан шыңдалған ойыншы шығарудың да өзіндік тәсілі барын айтады. Мәселен, жалағаштық бапкер алдымен жаттығу барысында балаға ойынды емес, алаң көруді меңгертеді екен. Яғни басы салбырап, тек көзін доптан алмайтын адамнан тәжірибелі ойыншы шығару мүмкін емес. Мұнан кейін барып әріптесімен пастасу, байланыс орнату маңызды. Бапкер өз шәкірттерін дайындық барысында қатты пас беруге, оны тоқтатып алуға баулиды. Себебі ойыншы үшін үлкен жарыстарда қатты келген допты уақытылы тоқтатып алу маңызды.&nbsp;Қазіргі таңда Жанқожа Қаниевтің сөзінше, спорттың бұл түрін ауданда әлі де жетілдіруге жабық алаңдардың жоқтығы кедергі келтіретін көрінеді. Мәселен, мұндай алаңдардың көршілес Сырдария ауданында бір емес, екеуі бар көрінеді. Есесіне Сырдарияда қазір спорттың бұл түрі алға басып келеді. Мұнан бөлек, аймақта футбол академиясы ашылса деген арманы бар. Себебі, қазіргі таңда Алматы, Шымкент, Ақтөбе, Жамбыл облыстарында ашылған академиялардың арқасында ол өңірдің жастары соңғы жылдары қай сайыста да жеңіс тұғырынан көрінуді дәстүрге айналдырған.

Жалағаштық аяқдоп шеберлері аймақтық сайыстарда оң нәтижелерге қол жеткізіп келеді

<a href="https://kyzylorda-news.kz/">Kyzylorda-news.kz</a> «Құлақтан&nbsp;кіріп, бойды алар,&nbsp;Әсем ән мен тәтті күй,&nbsp;Көңілге түрлі ой салар,&nbsp;Әнді сүйсең менше сүй, – деп хәкім Абай ән құдіретін бір-ақ ауыз сөзбен жеткізген. Иә, қазақтың әні мен күйі – халқымыздың ықылым заманнан бері қалыптасқан, еш жұтамайтын асыл қазынасы. Ұлттың бекзат болмысы мен арғы-бергі тарихынан сыр шертетін шежіресі. Ән арқылы көңілдегі алуан сезімді жеткізіп, жүректің нәзік қылын шертуге, тіпті бойдағы мұң-шерді шығаруға болады. Демек, әркімнің таласы бар өлең өнерін киелі десек, қате емес. Шиелі ауданында осы өнердің қанатына қонып, киесін түсініп, өн бойына дарытып жүргендер жетерлік. Тек ән өнері ғана емес, Шиелі топырағында дүниеге келген талай жан сегіз қырлы, бір сырлы. «Ел іші – өнер кеніші» демекші Шиелі өнерпаздары республиканың мәдениет министрлігі тарапынан өнер ұжымына берілетін «халықтық» деген атақты алпысыншы жылдардың аяғында ала бастапты. Мұндай мәртебелі дәрежеге жеткен алты өнер ұжымы біздің ауданда болған. Алғаш рет «халықтық» атауын 1969 жылы Шиелі аудандық мәдениет үйінің халық аспаптар оркестрі, кейін осындағы театр жеңген. Содан кейін «Қазақстанның 30 жылдығы» атанып, қазір Бала би болып өзгерген ауылдың өнерпаздары да халық театры атанып, көпшілікті талантымен таңдай қақтырды. Бұл кезде өнер көрсетіп жүргендердің ішінде күрішші, механизатор, шопан, мұғалім сынды қарапайым еңбек адамдары көп еді. «Нартай сазы» фольклорлық ансамблі, «Жас дәурен» ән-би ансамблі, Ноғайбаевтардың отбасылық ансамблі де осындай деңгейге көтерілген. Әрине, жемісті жеңістің астарында төгілген тер мен еңселі еңбек жатыр. Ал солардың барлығына үлес қосып, өзіндік қолтаңбасын қалдырған жандардың арасында Бөрібай Қоңқабаев, Әмина Тасболатова, ағайынды Әшімхан, Әлімхан Оспановтар, Әлмырза Ноғайбаев бар. Шиелінің ауыз толтырып айтатын өнерпаздары мұнымен таусылмақ емес. Бір кездері Нартай Бекежановтан бастап, осы заманғы театр әртістері М.Нұрекеев, Ғ.Әбдінәбиева, Ш.Әбдібаева, сазгер, өнер зерттеуші М.Қалауов, республикалық «Гүлдер» ансамблінің ұйымдастырушыларының бірі С.Елеусізов, Құрманғазы атындағы оркестрдің бас концертмейстері, «Отырар сазы» оркестрінің дирижері Қ.Тасболатов, жыршы Ш.Ділдебаев, айтыскер-ақын М.Тұрсанов та әлі күнге дейін шиелілік ағайынның аузынан түскен жоқ. Бұдан бөлек Сәуле Бапанованың отбасы да түгелімен өнер қуған жандар. Шиелілік ару С.Бапанованың отбасы қолданбалы өнер – тоқыма, гобелен саласының майталмандары. Олардың қолдарынан шыққан киіз бен алашаларда поэтикалық пейзаждар, натюрморттар, түрлі композицияларға қызықпай қарау мүмкін емес. Мәдениет саласына өлшеусіз үлес қосып, аянбай еңбек еткен жандардың бәрін атап шығу әрине, мүмкін емес. Дегенмен есімдері елге танылып, адамды рухани ләззатқа кенелткен өнер майталмандарын әр жас біліп, біліп қана қоймай сол сара жолды жалғастыруды мақсат ету қажет. Қазақта «Ақыл жастан, өнер тастан шығар» деген тәмсіл тегін айтылмаған. Бұл сірә, жас баланың өнерге икемі егде тартқан кісіге қарағанда жақсы екенін білдірсе керек. Осы орайда баланың болашағына бағдар жасап, оны қарғадайынан өнерге баулу ата-ана үшін маңызды қадамның бірі.&nbsp;Бүгінгідей жаһандану заманының бір осал тұсы – жасөспірімдердің табалдырықтан аттап шығуға ерініп, үздіксіз ұялы телефонға телміруі. Жасыратыны жоқ, қай босағаны аттасаңыз да бір бұрышта қалтафонға қарап отырған баланы кездестіруге болады. «Қандай өнерің бар? Қай үйірмеге барасың?» деп сұрай қалсаңыз кібіртіктеп, көзімен жер сүзіп кетерін қайтерсіз? Бұл қазіргі балалардың өнерге деген қызығушылығының жоғын білдіріп тұрғандай. Сол қызығушылықтың жоқтығынан ғой жаңа жыл бола қалса тақпақтың барлығы «Аяз ата келіп тұрдан» әрі аспайды. Әрине, бұл жерде бүлдіршінді кінәлаудың қажеті жоқ. Егер ата-ана баласын өнерге баулуға құлықсыз болса, қаршадай баладан не қайыр? Қазір «Бұлақ көрсең көзін аш» деп өнерге баулитын үйірмелер жетерлік. Мәселен, аудандағы оқушылар үйін алайық. Мұнда балаларды өнер мен білімге баулитын жиырмадан асып жығылатын үйірме бар. Оның ішінде «Би өнері», «Балдәурен» және қолөнер мен сурет өнерін үйретіп, бүлдіршіннің қанатын қомдап, өнер әлемінде биікке самғауына мүмкіндік жасайды. Қуаныштысы, аталған мекеме балаларды тегін оқытады. Оқушылар үйінің директоры Бауыржан Әбішевтің айтуынша, кейбір үйірмелер аудандағы білім ошақтарының ішінен де ашылған. Бұл бір жағынан баланың қаржысын үнемдесе, екінші жағынан қатысушының қауіпсіздігін сақтайды. Демек қай кезде болсын ата-ана баласын оқушылар үйіне немесе мектепте аталған үйірмелерге қатыстыра алады.&nbsp;Сыр елі – Жыр елі. Жыр еліне тән өнердің бірі – жыршылық. Замана бұлбұлы Нартай Бекежановтың жыршылық дәстүрін жалғастырушылар да біздің ауданда табылады. Бұл тұста Шиелі аудандық мәдениет үйі жанынан «Нартай өнер мектебі» құрылған. Республиканың мәдениет қайраткері, белгілі әнші-термеші Құрманбек Бекпейісов бастаған өнер мектебін қазір ұлы Мұхамедәлі Бекпейісов жалғастырып келеді. Бір кездері Махамбет, Шернияз, Құрманай, Доғалақ, Сүйінбай, Дулат Тұрмағамбеттер салып кеткен сара жолды осы өнер мектебі насихаттауда. Аталған өнер ордасының түлектері Мейірбек, Нұртілек, Ержан, Еркін, Ақмарал, Әзілхан сынды жас таланттар да дәстүрлі өнерді жанжандырушылар. Қазір дәстүрлі өнерді жалғаған мектепте «Нартай ақын» жыр-терме, «Тайжан ақын» дәстүрлі ән, «Халық әні», «Сырнаймен ән салу», «М.Тұрсанов» ақындар үйірмесі бар. Үйірмеге қатысатын оқушылардың жалпы саны – 40. Солардың ішінде оқ бойы оза шауып, шаршы топта өнерімен танылып жүргендер де жоқ емес. Айқын Төлеген, Дидар Сүгірәлиев, Досхан Нұрланұлы – соның айғағы.&nbsp;Өнерімен өрге жүзіп, биікті бағындырған шиелілік жұлдыздардың тізімін әрмен қарай жалғастыру келешек ұрпақтың қолында. Егер балаларымызға қазірден қазақтың қара домбырасын үйретіп, ән мен жырға баулып, өнердің қанатына қондырсақ, Шиелі аспанында олардың үні қалықтап тұрады.

Қазақстан және Қызылорда облысының жаңалықтары