<h4 id="kyzylordanewskzhttpskyzylordanewskzrunbsp50nbspgazetarunbsp"><a href="https://kyzylorda-news.kz/ru/">Kyzylorda-news.kz.</a>&nbsp; Диетолог Молли Хембри брокколи, асжапырақ, мангольд, кейл қырыққабаты мен романо аскөгін 50 жастан асқан адамдар міндетті түрде жеуі керек деп санайды. Бұл туралы&nbsp;gazeta.ru хабарлады.&nbsp;</h4>
Диетологтың пікірінше, бұл көкөністерді тұтыну жас ұлғайған пайда болатын созылмалы аурулардың алдын алуға көмектеседі. Ең алдымен, асжапырақты жеген дұрыс дейді ол.&nbsp;
<blockquote>
 &nbsp;Асжапырақтың құрамында А дәрумен, лютеин, зеаксантин бар. Бұл заттектер көз жанарына жақсы әсер етіп, көз ауруларының алдын алуға пайдасы мол, – деп түсіндірді диетолог.
</blockquote>
Ал сүйектерді қатайту үшін кейл қырыққабатын пайдалану маңызды, оның құрамныда кальций мен Д дәрумені көп.&nbsp;
Романо аскөгі А дәрумені, калий мен талшыққа бай, әрі калориясы аз. Ал буындары ауыратын жандар үшін брокколи пайдасы ұшан-теңіз дейді дәрігер. Күнделікті мангольд атты жемісті жеу деменция мен Альцгеймер ауруының алдын алуға таптырмас дәрумен.

50 жастан асқан адамдар қалай тамақтануы керек?

Kyzylorda-news.kz. Аймақ басшысының тапсырмасына сәйкес бүгін облыс әкімінің орынбасары Мархабат Жайымбетов Қызылорда қаласындағы құрылысы жүріп жатқан бірқатар нысандардың жұмысын саралады.
Алдымен, Мархабат Жайымбетов «СПМК-70/2» кварталында орналасқан 50 пәтерлік 10 ипотекалық тұрғын үйдің құрылысымен танысты.
Жоба «Нұрлы жер» мемлекеттік бағдарламасы аясында жүзеге асырылуда. Қазір құрылыс-монтаж жұмыстары жүргізілуде. Жыл аяғына дейін 33 615 шаршы метр болатын 500 пәтер пайдалануға беріледі. Облыс әкімінің орынбасары мердігер компания өкілдеріне нысанды сапалы аяқтап, межеленген уақытында тапсыру керектігін қаперге салды.
Мұнан соң, Мархабат Жайымбетов Бәйтерек мөлтек ауданындағы бірнеше жобаның жүзеге асырылуын бағамдады. Тұрғындар үшін маңызды саналатын жол салу, ауыз сумен қамту, көгілдір отын жүргізу жұмыстары кезең-кезеңімен жүзеге асырылуда. Мәселен, Бәйтерек-2 мөлтек ауданына кіре-беріс көшесіне орташа жөндеу жұмыстары қыркүйек айына дейін аяқталады. Облыс әкімінің орынбасары жаңа оқу жылында оқушылардың мектепке кедергісіз қатынауы керектігін ескертіп, жұмысты сапалы жүргізуді тапсырды. Аталған мөлтек аудан көлемінің ұлғаюымен жаңа білім ошағын салу қажеттілігі туындағаны жасырын емес. Қазір бұл аумақта 600 орынға арналған мектеп құрылысы жүргізілуде. Нысанды жаңа оқу жылының І тоқсанында пайдалануға беру жоспарланып отыр.
Қалыптасқан геосаяси жағдайларға қарамастан облыс әкімдігі құрылыс компаниялармен ортақ мәмілеге келді. Бастау алып, жұмысы жоспарланған жобалар аяқсыз қалмайды.
<blockquote>
 Қазір Бәйтерек мөлтек ауданында 1800-ден астам тұрғын үй салынған. 8000-ға жуық тұрғыны бар. Жаңадан бой көтерген мөлтек аудан болғаннан кейін, бірінші кезекте, жол керек. Облыс әкімі тағайындалғаннан кейін, Бәйтерек-1, Бәйтерек-2 көшелерін салуға 500 миллион теңгедей бөлуге ықпал жасады. Осы секілді инфрақұрылымды, инженерлік желілерді салу мен жаңарту жұмыстары қарқынды жүргізілуде. 
 Қазір құрылыс заттарының қымбаттағаны барлығымызға мәлім. Осыған байланысты 3-4 ай бұрын облыстық бюджеттік комиссия қосымша 3,5 млрд.теңге бөлген екен. Бүгінгі таңда аймақтағы құрылыс компаниялармен құжатта көрсетілген қаржымен құрылысты бітіру жөнінде келесімге келдік. Өзіміздің тарапымыздан олардың кейінгі жобаларын қаржыландыруға көмектесетін боламыз, – деді М.Жайымбетов.
</blockquote>
Әрмен қарай, облыс әкімінің орынбасары бастаған топ Бәйтерек мөлтек ауданы және №222 мектеп аумағындағы балаларға арналған ойын алаңы құрылысының барысымен танысып, «Ауыл-Ел бесігі» жобасы шеңберінде Қарауылтөбе елді мекеніндегі 150 орындық клуб құрылысының орындалу барысын таразылады. Шанхай, Оңтүстік аудандардағы және Тәжібаев, Бостандық көшесінің бойындағы су құбыры және кәріз желілерін реконструкциялау жұмыстарын саралады. 
Облыс әкімінің орынбасары Мархабат Жайымбетов мердігер компания мен жауапты мекеме басшыларына құрылыс жұмыстарының сапалы әрі уақытылы тапсыруын тағы бір қаперге салды.
<img src="https://kyzylorda-news.kz/wp-content/uploads/2022/07/fb_img_1657906774767.jpg" alt="" />

Мархабат Жайымбетов Қызылорда қаласындағы құрылыс жұмыстарын бағамдады

Kyzylorda-news.kz. Облыс әкімінің өкімімен ҚР Президентінің «Байқоңыр» кешеніндегі арнаулы өкілінің қызметін қамтамасыз ету басқармасының басшысы лауазымына Нариман Мақұлбеков тағайындалды. 
Облыс әкімі Нұрлыбек Нәлібаев осы уақытқа дейін Шиелі ауданының әкімі лауазымын атқарған Нариман Мақұлбековке алғыс білдіріп, жаңа қызметіне сәттілік тіледі.
<blockquote>
 «Нариман Әскербекұлы Шиелі ауданында бір жылға жуық уақыт еңбек етіп, ауданның дамуына сүбелі үлесін қосты. 
 2021 жылдың қорытындысымен ауыл шаруашылығы саласы бойынша Шиелі ауданын алдыңғы қатарға көтерді.
 Нариман Әскербекұлы – тәжірибелі және іскер басшы. Ол мемлекеттік қызметтің түрлі сатысынан өтіп, облыс әкімі аппараты басшысының орынбасары, аудан әкімі қызметтерін абыроймен атқара білді. Нариман Әскербекұлын білікті де білімді кадр, мықты заңгер екенін ескере келе, өте жауапты қызметке тағайындадық», – деді аймақ басшысы.
</blockquote>
Нариман Мақұлбеков 1968 жылы Қызылорда қаласында туған. Әл-Фараби атындағы Қазақ мемлекеттік ұлттық университетін құқықтану мамандығы бойынша бітірген. 
Еңбек жолын Қызылорда қаласындағы автобазада слесарь болып бастаған. Қарулы күштер қатарында әскери борышын өтегеннен кейін Қызылорда қалалық прокуратурасының тергеуші стажерінен облыс прокурорының орынбасары, Бас прокуратураның департамент бастығына дейінгі қызмет сатысынан өткен. Жеке секторда “Jfc colos” ЖШС директорының кеңесшісі лауазымын атқарған. Сондай-ақ, Қызылорда облысы әкімі аппараты басшысының орынбасары қызметін атқарған.
2021 жылдан бастап осы кезге дейін Шиелі ауданының әкімі қызметін атқарып келді. 
Ауданның зиялы қауым өкілдері Нариман Әскербекұлының әкім ретінде атқарған жұмыстарына оң бағасын білдіріп, аудан халқының атынан алғаусыз алғысын жеткізді.
©Қызылорда облысы әкімінің баспасөз қызметі

«Байқоңыр» кешеніндегі арнаулы өкілінің қызметін қамтамасыз ету басқармасының басшысы тағайындалды

Kyzylorda-news.kz. Қазақстан Республикасы Президенті Әкімшілігі мен Шиелі аудандық мәслихатының келісімдері бойынша облыс әкімінің өкімімен Шиелі ауданының әкімі лауазымына Нұржан Ахатов тағайындалды. 
Облыс әкімі Нұрлыбек Нәлібаев актив отырысында жаңа әкімді таныстырып, қызметіне сәттілік тіледі.
«Нұржан Сәбитұлы басшылық қызметтегі ұйымдастырушылық қабілеті мен тәжірибесі мол, өз жұмысын жоғары кәсіби деңгейде атқаратын білікті азамат. 
Қызметтік сатылардан сүрінбей, сапалы жұмысымен көзге түсті. 
Сондықтан, Мемлекет басшысының саясаты аясында берілген тапсырмаларды бұлжытпай орындап, Өздеріңізбен бірге туған жері Шиелі ауданын одан әрі дамытуға аянбай жұмыс жасайтынына сенемін,-деді Нұрлыбек Нәлібаев.
Нұржан Ахатов қызмет жолын Қызылорда облысының статистика жөніндегі есептеу орталығы жабдықтаушы маманынан бастаған. Кейін Шиелі ауданы әкімі аппаратының ұйымдастыру және кадр жұмысы бөлімінің бас маманы, аудандық экономика және бюджетті жоспарлау бөлімінің меңгерушісі, аудан әкімінің орынбасары қызметтеріне дейін көтерілген. Қызылорда облысы әкімі аппараты ұйымдастыру-инспекторлық жұмыс бөлімінің бас инспекторы, Қызылорда облысының кәсіпкерлік басқармасы бастығының орынбасары, Шиелі ауданы әкімі аппаратының жетекшісі, Қызылорда қаласы әкімі аппаратының жетекшісі, Қызылорда қаласы әкімінің орынбасары ретінде жауапты қызметтер атқарған.
Өндіріс саласында да мол тәжірибе жинақтап, «Қызылорда» автобус паркі» ЖШС директоры лауазымын абыроймен атқарып, қалалық мәслихат депутаты ретінде де қаланың әлеуметтік-экономикалық дамуына зор үлесін қосты. Соңғы кездері «Байқоңыр» ӘКК басқарып келді. 
Жиында сөз алған ардагерлер қауымы жаңа әкімді ыстық ықыласпен қабылдап, аймақ басшысына алғысын жеткізіп, туған жердің перзентін лайықты қызметке тағайындау туралы оң шешім қабылданғанын айтып, тілеулестік танытты.
Айта кетейік, Ахатов Нұржан 1978 жылы Шиелі ауданында дүниеге келген. Қорқыт Ата атындағы Қызылорда мемлекеттік университетін «Бухгалтерлік есеп және аудит», Қазақ гуманитарлық заң университетін «құқықтану» мамандықтары бойынша бітірген.

Шиелі ауданына жаңа әкім тағайындалды

<a href="https://kyzylorda-news.kz/">Kyzylorda-news.kz.</a> Синоптиктер еліміз бойынша 16 шілдеге арналған ауа райы болжамын ұсынды: Солтүстік-батыс циклонының әсерінен солтүстікте, солтүстік-батыста қатты жаңбыр жауады, найзағай ойнап, бұршақ жауады, жел күшейеді, дауыл тұрады.
<blockquote>
 Тек Қазақстанның оңтүстігінде, оңтүстік-шығысында, батысында және орталығында антициклон жотасы жауын-шашынсыз ауа райын сақтайды.
</blockquote>
Қызылорда облысында төтенше өрт қаупі күтіледі.

Сенбіге арналған ауа райы болжамы

<a href="https://kyzylorda-news.kz/">Kyzylorda-news.kz.</a>&nbsp; Бүгін Қызылордада «Қазақстанның үздік тауары» байқауының облыстық кезеңі қорытындыланып, арнайы көрме барысында жеңімпаздар республикалық байқауға жолдама алды. Облыс әкімі Нұрлыбек Нәлібаев көрме жұмысымен танысып, өңірдің беткеұстар тауарөндірушілерін марапаттады.
Алдымен облыс әкімі «Атамекен» кәсіпкерлер палатасы мен «Бизнеске арналған үкімет» мекемесінің қызметімен танысып шықты. Мұндағы кәсіпкерлерге қызмет көрсету орталығы инженерлік-инфрақұрылымға техникалық шарттар алып беру, тауардың сыртқы жарнамалау эскизін даярлап беру сияқты кәсіпкерлерге бірінші кезекте керекті қызметтерді ақысыз негізде жасап береді.
Облыс әкімі кәсіпкерлермен тілдесіп, бизнес өкілдеріне мемлекет тарапынан қолдау көрсетілетінін қаперге салды.
Іс-шара аясында жергілікті тауарөндірушілеріміздің балалар жылына орай тіккен киімдерінен дефиле ұйымдастырылды. Жеке кәсіпкер «Айман Абди» қазақи нақыштағы балаларға арналған киім үлгілерін таныстырса, Светлана Цой балаларға арналған кешкі көйлектер топтамасын көрермен назарына ұсынды, ал «Далатекс» ЖШС «Мектеп формасы» топтамасын көрсетті. 
Аймақ басшысы мұндай көрме-байқау жергілікті өндірушілерге қолдау көрсету, олардың өндіретін тауарлары мен көрсететін қызметтердің сапасын арттыруға ынталандыру екенін атап өтіп, жеңімпаздарды марапаттады.
<blockquote>
 «Құрметті шараға қатысушылар! Жақында ғана Мемлекет басшысы Қасым-Жомарт Кемелұлы Тоқаев еліміздің бизнес өкілдерімен жүздесіп, «Егер бизнес адал жұмыс істеуге дайын әрі креативті, заманға сай сұранысқа ие болса, оны қолдау қажет» – деп, қоғам талабына сай еңбек етіп жүрген кәсіпкерлерді мемлекет әрқашан қолдайтынын жеткізді. 
 Сіздер аймақ экономикасының дамуына, тұрғындардың әл-ауқатының артып, тұрмысының жақсаруына сүбелі үлес қосып келесіздер. Алдағы уақытта да облыстың әлеуметтік-экономикалық әлеуетін арттыруға аянбай еңбек етіп, мемлекеттік бағдарламаларды жүзеге асыруға баршаңызды қатысуға шақырамыз», – деді Н.Нәлібаев.
</blockquote>
Сонымен бірге, көрме-байқауда демеушілік көрсету жөнінде бастама көтерген 9 кәсіпкер арнайы сыйлыққа ие болды. 
Айта кетейік, күні кеше «Атамекен» палатасы жанындағы өңірлік кәсіпкерлер кеңесінің төрағасы лауазымына танымал кәсіпкер Ерлан Раимов тағайындалды.
<img src="https://kyzylorda-news.kz/wp-content/uploads/2022/07/293759380_343909121263672_8689355148250044719_n.jpg" alt="" />
<img src="https://kyzylorda-news.kz/wp-content/uploads/2022/07/294275509_343909231263661_679310299338154917_n.jpg" alt="" />
<img src="https://kyzylorda-news.kz/wp-content/uploads/2022/07/824a8939-scaled.jpg" alt="" />

Қызылорда облысының үздік тауарөндірушілері марапатталды

<a href="https://kyzylorda-news.kz/">Kyzylorda-news.kz.</a>&nbsp; Елімізде 13 шілдеден бастап мемлекеттік грант байқауына құжаттар қабылдау науқаны басталды. Қазіргі уақытта Қорқыт ата атындағы Қызылорда университетінің №5 оқу ғимаратында қабылдау комиссиясы демалыссыз жұмыс істеуде.
Құжат тапсыруға келетін талапкерлер легін қабылдауға&nbsp; Қорқыт ата атындағы Қызылорда университетінің мамандары толықтай дайын. Керекті құрал-жабдықтармен қамтылған кеңесшілер, техникалық хатшылар талапкерлерге ақпарат беріп, жан-жақты қолдау көрсетуде.
Қорқыт ата атындағы Қызылорда университетіндегі қабылдау комиссиясы 20 шілдеге дейін жұмыс істейді.
Осы кезге дейін, яғни 13-14 шілде күндері 923 өтініш келіп түсті.
Талапкерлер оқуға түсуге қатысты барлық сұрақтар бойынша төмендегі номерлерге&nbsp; хабарласа алады: 8&nbsp;7242 23-53-92, Call center 8702 922 44 58, Watsapp 8 776 538 88 99;&nbsp; Инстаграм @korkyt_ata_university
Қабылдау комиссиясының мекен-жайы: Нұрсұлтан Назарбаев даңғылы 15, № 5 оқу ғимараты.
Қазіргі таңда Қорқыт ата атындағы Қызылорда университетінде 8 мыңға жуық білім алушы бар. Биылғы оқу жылын 2159 түлек бітіріп, оның 200-ге жуығы үздік диплом иегері атанды.&nbsp;
Университетте 62 бакалавр,&nbsp; 36 магистратура және 13 докторантура білім беру бағдарламалары бойынша мамандар даярланады. Білім алушылардың жан-жақты дамып, өз саласының үздігі атану үшін оқу орны тарапынан мүмкіндіктер берілген.
<img src="https://kyzylorda-news.kz/wp-content/uploads/2022/07/3-1.jpg" alt="" />

Мемлекеттік грантқа құжаттар қабылдануда

<a href="https://kyzylorda-news.kz/">Kyzylorda-news.kz.</a> Қазақстан халқы Ассамблеясының бастамасымен бейбітшілік пен келісім шеруі Сыр өңіріне келді.
Шілденің 15 жұлдызында қызылордалықтар «Еуропа-Азия» Халықаралық Бейбітшілік және келісім маршының 1-ші кезеңінің қатысушыларын қарсы алды. Татулықты ту еткен шеру қаланың көрікті жерлерімен өтіп, Достық үйіне келді. Мәртебелі қонақтарды Сыр әжелер ансамблі әндетіп, шашу шашып күтіп алды.
Салтанатты шараға қатысушылар Достық үйінде әзірленген Сыр өңірінде табылған археологиялық құнды жәдігерлер көрмесі мен «Қызылорда: кеше, бүгін» фотокөрмесімен танысты.
Мұнан соң Достық үйінің мәжіліс залында «Еуропа-Азия» Халықаралық Бейбітшілік және келісім маршының делегаттары жергілікті БАҚ өкілдеріне баспасөз конференциясын өткізді. 
Салтанатты шараның алғы сөзі Қызылорда облыстық қоғамдық даму басқармасының “Қоғамдық келісім” КММ директоры Бақытжан Камаловқа берілді.
<blockquote>
 Қазақстан халқы Ассамблеясының ұйымдастыруымен достықты дәріптейтін «Еуропа-Азия Бейбітшілік және келісім маршы» Нұр-Сұлтан қаласынан бастау алып, оңтүстік өңірден өтіп, бүгінгі таңда қасиетті Қызылордаға келіп жетті.
 Еліміздің 16 қаласы мен шекаралас 3 елде өтетін бұл шерудің басты мақсаты бірлік туын желбірету. 
 Қазақстан халқының татулығы, ынтымақтастығы, бейбітшілігі біздің еліміздің ең басты байлығы болып табылады. Осы тұрғыда, бірлік, келісім және өзара қолдау қағидаттарына негізделген бұл шерудің рөлі ерекше, – деді.
</blockquote>
Өз кезегінде «ЕУРОПА-АЗИЯ» халықаралық бейбітшілік және келісім шеруінің атқарушы директоры Руслан Абдуллин Сыр өңірінің ыстық ықыласы мен қонақжайлылығына ризашылығын білдіріп, үлкен қолдау үшін Бақытжан Жарылқасынұлына Алғыс хат табыстады.
Қоғамдағы бірлік пен ынтымақты сақтаудың жарқын үлгісін паш еткен ауқымды шарада өңірлік этномәдени бірлестіктердің өкілдері концерт қойып, патриоттық, ұлттық әндер шырқады.
Мұнан соң Достық үйінің мәжіліс залында «Еуропа-Азия» Халықаралық Бейбітшілік және келісім маршының делегаттары жергілікті БАҚ өкілдеріне баспасөз конференциясын жасады. 
Халық достығын арттыру, отандық өнімді дәріптеу, патриоттықты насихаттау мақсатын көздеген шеру киелі Қармақшы ауданына жол тартты.
<img src="https://kyzylorda-news.kz/wp-content/uploads/2022/07/293749380_3256594171326407_8960614485254096286_n.jpg" alt="" />
<img src="https://kyzylorda-news.kz/wp-content/uploads/2022/07/293768881_3256594107993080_7442651036104830635_n.jpg" alt="" />

Бейбітшілік пен келісім шеруі Сыр өңіріне келді

<a href="https://kyzylorda-news.kz/">Kyzylorda-news.kz.</a>&nbsp;Мемлекет басшысы Қасым-Жомарт Кемелұлы Тоқаевт Үкіметтің кеңейтілген отырысында азаматтардың табысын арттыру мен адами капиталды дамыту жайлы маңызды тапсырмалар берді.
Бүгінгі заманның ерекшелігі, жаһандық және жергілікті, жеке проблемалар өзара тоғыса түсуде. Осындай жағдайда, еліміздің табысқа жетуінің кепілі, Отанымыздың негізгі байлығы – адам капиталының даму мәселесі болып отыр.
Әрқайсымыздың әл-ауқатымыздың сапасы табысымыздың өсуімен тығыз байланысты. Тарылмай, тарықпай өмір кешудің бір ғана жолы – еңбек ету, кәсібіңді иелену. Жаңа жұмыс орындары жобаларының да іске асуында сұрақтар жиі туындайды. Өйткені кейбір жобаларды іске асыру барысында оның жан-жақты терең зерделенбейтінін, дайындалмайтынын байқаймыз. Ал жеке кәсіп арқылы жұмыс орындарын ашудың құқықтық-нормативтік негіздері түсініксіз, адамдарды шатастырады, содан көбі кәсібін бастамай жатып тастап кетеді.
Президент қазіргі замандағы жұмысшы күшінің көші-қоны жүріп жатқанын орынды көтеріп отыр. Бізде осы үрдіске бейімделе алуымыз қажет. Бір үйде бірнеше адам жұмыссыз отырса да басқа жаққа барып тіршілік жасауға ынталы емес. Неде болса үйден кіріп-шыққанымыз дұрыс деп түсінеді. Әрбір адамның басты арманының бірі – еркіндікте болуы. Ал, еркіндік дегеніміз – өзгеруге еш кедергінің болмауы. Бізде бұл бағытта мемлекеттік қолдау бар. Адамдардың көпшілігі өмірінің толыққанды проблемасыз болғанын қалайды. Бірақ проблемалар өмірдің маңызды және мағыналы бір бөлшегі екенін мойындауымыз қажет. Өзгеруге ынталы, өмірге сенімді, бойында рухы мықтылар үшін ғана проблема қасірет емес, қайта жетістікке жетелейтін құбылыс болып саналады. Өмірге бейімделмегеннің ісі өнбейді.
Балаларды зорлық-зомбылықтан, суицидтен қорғау, құқықтарын қамтамасыз ету, қосымша білім беру сапасы, балабақша ұйымдарының қызметін лицензиялау тәртібін енгізу, жастарды жұмыспен қамту күн тәртібінен түспей келе жатырған мәселелер. Мемлекет басшысының осы мәселелерге өзі араласып, нақты пәрмен беруі дұрыс болды. Президент өз сөзінде «Адам капиталын дамыту ісінде білім саласы негізгі рөл атқарады» деп атап өтті. Біз білім беру деген сөзді, білім алу деген сөзбен өзектендіруіміз керек. Білімге алдымен білім алушы құштар болғаны керек. ХХІ ғасырда оқи, жаза алмайтындар сауатсыз болып саналмайды, өзіне керекті білім алу мүмкіндігін тиімді пайдалана алмағандар сауатсыз болып табылады. Әрбір мұғалім, маған ата-аналар ең қымбат дүниесі – ұрпағын аманат қылып отыр деп намысқа тырысқаны абзал. Ал ата-аналар да тәрбиенің бастауы да негізі де отбасы екенін басты назарда ұстамаса болмайды. Тәрбиелі бала бағымыз болса, тәрбиесіз бала сорымызға айналуы ықтимал. Мемлекет тапсырысы бойынша жұмыс жасайтын бала бақша, спорттық және шығармашылық білім беру ұжымдарының жауапкершілігіне қатаң қарауымыз керек. Адам тәрбиесіне бөлінген қаржыны пайданың көзі деп қарау өзімізді өкіндірмесін. Ол құрылыс емес бұзып қайта салатын. Кәсіби мамандар таңдалуы тиіс. Қазір адамзат көп білімнен пайдалы білімге ұмтылуда. Яғни, мемлекет өз тарапынан сапалы білім мен тәрбие алуға тең қолжетімділік жасауға ұмтылуда. Осы бағытта президент тапсырмасын бірлесе тиімді үйлестіре алсақ, біздің биылғы балалар жылындағы қоғамға қосқан үлесіміз зор болар еді.
Мемлекет өз азаматтарының бойынан өзіне бәсекелесті және тек жатып ішер мешкейді көрмеуі тиіс. Мемлекет пен азаматтар өзара тең әріптес және экономикалық-әлеуметтік дамудың қозғаушы күші екенін көруі керек. Ал өз кезегінде біз тұрғындарда билікке міндетсіне бермей, үкіметке қоғамдық мүддені нығайту тетігі ретінде қарағанымыз жөн. Мемлекеттен шектен тыс әлеуметтік қамтамасыз етуді талап ету, адамдардың бойында енжарлық туғызады, әрекетсіздікке итермелейді. Оның аяғы мемлекеттің де өркендеуіне кері әсер етеді. Технология қанша дамығанымен табиғи, адами қатынасты ауыстыра алмайды. Біз бүкіл ақыл-ойымызбен, жүрегімізбен, рухымызбен, физикалық күшімізбен саналы, еркін түрде ұжымдаса жұмыс жасаған жағдайда дамимыз, жетіле түсеміз, табысымыз, әл-ауқатымыз арта түседі.
Наурызбай Байқадамов,
Қызылорда облыстық мәслихат хатшысы

Наурызбай Байқадамов: Өмірге бейімделмегеннің ісі өнбейді

<h4 id="kyzylordanewskzhttpskyzylordanewskznbsphttpsexkkzkk"><a href="https://kyzylorda-news.kz/">Kyzylorda-news.kz.</a> Қазалы ауданында ауыл тұрғындары тіпті қансорғыш жәндік жабысқан малдарының арам өліп жатқанын айтады, деп хабарлайды&nbsp;<a href="https://exk.kz/kk">Экспресс К.</a></h4>
Бозкөл ауылының Самат есімді тұрғыны биыл осы бір жәндіктер тым көбейіп кетті дейді. Тіпті кене жабысқан малдары өздігінен жүре алмай қалғанын айтады. Сөйтсе де, кенені улауға мамандар шарасыз отыр деп ашулы тұрғын.
<blockquote>
 «Жайылымда жүрген жылқылар өліп жатыр. Өткенде ветеринарияның қызметкерлері келіп, кенені улауға өздерің ақша шығарыңдар дейді. Бізде ғана емес, басқа ауылдарда да кене жабысқан малдар қырылып жатыр. Бізге кім көмек береді? »— дейді Бозкөл ауылының тұрғыны.
</blockquote>
Ал ауыл әкімі төрт түліктен әзірге улы кене табылмады дейді. Сондай-ақ бұл мәселеге байланысты санитарлық эпидемиялогиялық қадағалау мекемесінің мамандары тексеру жұмыстарын бастағанын жеткізді.
<blockquote>
 «Малдардың неден өліп жатқаны әзірге белгісіз. Ол басқа бір ауру түрі болуы да мүмкін. Бірақ кененің көбейіп кеткені рас. Біз қазір осы жәндікті жоюға даярланып жатырмыз», – деді ауыл әкімі Ақылбек Бөлебай.
</blockquote>

Қазалы ауданында улы кене қаптап жатыр

<a href="https://kyzylorda-news.kz/">Kyzylorda-news.kz.</a> “Азаматтарға арналған үкімет” мемлекеттік корпорациясы әлеуметтік салада проактивті қызметтерді белсенді түрде енгізуді жалғастырып келеді. Бұл форматтың арқасында клиенттер ХҚКО-ға бармай-ақ, SMS арқылы бірнеше жәрдемақыны рәсімдей алады.
Әлеуметтік саладағы ең сұранысқа ие мемлекеттік қызметтердің бірі –&nbsp; бала туу және оның күтімі бойынша&nbsp; төленетін жәрдемақыларды ресімдеу. Бала өмірге келгеннен кейін оның анасына жәрдемақы бойынша өтініш беру үшін SMS-хабарлама келеді. Бұл хабарламаға оң жауап беріп, жәрдемақы төленетін банктің шот нөмірін көрсету керек. Ары қарай бала туу және бір жасқа дейінгі бала күтімі бойынша жәрдемақылар проактивті түрде ресімделетін болады. Еске салайық, осы қызметті пайдалану үшін мобильді азаматтар базасында тіркелу керек.&nbsp;
Осылайша, 2022 жылдың кейінгі бес айында бала туу және бала күтімі бойынша 152 298 мың жәрдемақы белсенді түрде ресімделді, бұл 2021 жылдағы кезеңмен салыстырғанда 2,2 есе көп (66 894 мың).&nbsp;
Айта кетейік, бала туу бойынша жәрдемақы мөлшері балалар санына байланысты. Бірінші, екінші және үшінші баланың тууына байланысты жәрдемақы – 120 840 теңге (2022 жылы 38 АЕК), одан кейінгілеріне – 200 340 теңге (63 АЕК) болады.&nbsp;
Жұмыс істемейтін әйелдер үшін бір жасқа дейінгі бала күтімі бойынша жәрдемақы:
•&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Бірінші бала күтімі бойынша – 18 317 теңге (5,76 АЕК);
•&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Екінші бала күтімі бойынша –&nbsp; 21 656 теңге (6,81 АЕК);
•&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Үшінші бала күтімі бойынша –&nbsp; 24 963 теңге (7,85 АЕК);
•&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp; Төртінші және одан да көп бала күтімі бойынша –&nbsp; 28 302 теңге (8,90 АЕК).
Баланың бір жасқа толғанға дейінгі (босанғаннан кейін) күтімі бойынша ай сайынғы әлеуметтік төлем жұмыс істейтін әйелдерге ғана тағайындалады. Төлем мөлшері әлеуметтік аударымдар жүргізілген табысқа да байланысты болады.&nbsp;
Төлемді есептеу үшін кейінгі 2 жылдағы орташа айлық табысты 0,4-ке көбейтіп, зейнетақы жарналарының 10 пайызын ұстап қалу қажет. Орташа айлық табыс 24-ке бөлінген кейінгі 2 жылдағы барлық ай сайынғы кірістердің сомасы ретінде есептеледі.
Бұл ретте табысынан айырылған жағдайда баланың бір жасқа толғанға дейінгі күтіміне байланысты төленетін әлеуметтік төлемнің ең жоғары мөлшері ең төменгі жалақының жеті еселенген мөлшерінің қырық пайызынан, ал әлеуметтік төлемнің ең төмен мөлшері – бала бір жасқа толғанға дейін оның күтіміне байланысты төленетін ай сайынғы мемлекеттік жәрдемақының мөлшерінен кем болмауға тиіс. Жәрдемақы төмендегідей есептеледі:&nbsp;1. Егер алушының 2 жыл ішіндегі табысының орташа айлық мөлшері 120 000 теңге болса, онда төлем 48 000 теңге (120 000x 0,4) мөлшерінде тағайындалады. Осы сомадан зейнетақы жарнасының 10 пайызы шегеріледі.
2. Егер табыс мөлшері 7 АЕК-ден (2022 жылға 420 000 теңге) асатын болса, онда төлем ең жоғары 168 000 теңге (420 000x 0,4) деңгейде тағайындалады. Осы сомадан зейнетақы жарнасының 10% шегеріледі.
3. Егер табыс 40 000 теңгені құраған жағдайда, онда төлем 16 000 теңге (40 000×0,4) мөлшерінде тағайындалады. Осы сомадан зейнетақы жарнасының 10% шегеріледі. Осы ретте жәрдемақылар ҚР міндетті әлеуметтік сақтандыру туралы заңнамасына сәйкес жүзеге асырылатын еске саламыз.&nbsp;Бұл қызмет 7 жұмыс күні ішінде көрсетіледі.

SMS арқылы 150 мыңнан астам бала күтімі бойынша төленетін жәрдемақы рәсімделген

<a href="https://kyzylorda-news.kz/">Kyzylorda-news.kz.</a>&nbsp;Қорқыт ата атындағы Қызылорда университетінде 13-14 шілде күндері бітіруші түлектерге салтанатты түрде диплом табыстау шарасы өтті.
Сыр еліндегі ғылым мен білімнің қарашаңырағы, сексен бес жылдық тарихы бар оқу орнында қазір 8 мыңға жуық білім алушы бар.
Биыл университетті Гуманитарлық-педагогикалық институты, Жаратылыстану институты, Экономика және құқық институты, Дәстүрлі өнер институты, Инженерлі-технологиялық институты бойынша 2159 түлек бітіріп, оның 200-ге жуығы үздік диплом иеленді.
Салтанатты жиынға Басқарма Төрағасы – ректор Бейбіткүл Кәрімова қатысып, түлектерге сәттілік тіледі.
<blockquote>
 – Ғылым мен технологияның дамуы қоғамда жаңа мамандық иелеріне сұраныс туғызуда. Сондықтан елімізге қажетті маман даярлау ісіне басымдық берудеміз. Білім алушылардың мықты маман, жан-жақты тұлға болып қалыптасуы ерекше назарда. Университетте ғылым саласын дамыту, жас ғалымдарды қолдау жұмыстары кең қанат жайды. Ғылыми зерттеу жұмысын жалпы қаржыландыру көлемі 20%-ға өсті.
 Биыл Қорқыт ата атындағы Қызылорда университетін 2159 түлек бітіруде. Біз үшін әр шәкірттің өмірден өз орнын тауып, сапалы маман атануы өте маңызды, – деді Бейбіткүл Сәрсемханқызы.
</blockquote>
Жиында «Қазақстан барысы» турнирінің жеңімпазы, университет түлегі&nbsp; Мақсат Исағабыловқа «Қорқыт ата атындағы Алтын медаль» табысталды. Сыр елінің абыройын асқақтатқан Мақсат Исағабылов – университет мақтанышы.
Сондай-ақ, салтанатты шарада білім сыналатын байқаулар мен қоғамдық шараларға белсене қатысып, оқу орнының мақтанышына айналған түлектер университет ректорының алғыс хатымен марапатталды.
Осы кезге дейін мыңдаған түлектің жарқын болашағына жолдама берген Қорқыт ата атындағы Қызылорда университеті еліміз бойынша үздік университеттердің қатарында. Қазақстанның үздік көпбейінді жоғары оқу орындарының рейтингісінде 7-ші орында.
Жыл сайын университетті таңдайтындар саны да артып келеді. 2019-2020 оқу жылында оқу жылында жалпы білім алушылар саны 5 мыңды құраған, осы оқу жылында 8 мыңға жетті. Оның ішінде грант негізінде білім алатындар саны 2500-ге көбейді.
Қорқыт ата атындағы Қызылорда университетінде 62 бакалавр, 36 магистратура және 13 докторантура білім беру бағдарламалары бойынша мамандар даярланады.
Оқу орны 170 шетелдік университетпен ынтымақтастық байланыс орнатқан. Бүгінде білім алушылар «Академиялық ұтқырлық», «Қос диплом» бағдарламасы бойынша АҚШ, Түркия, Польша, Бельгия, Словакия және отандық оқу орындарында білім алып, тәжірибе жинақтауда. Соңғы үш жылда «Ішкі академиялық ұтқырлық» бағдарламасы арқылы 200-ге жуық студент білім алды.
Салтанатты жиынға облыс әкімі аппаратының басшысы Шахмардан Байманов, қала әкімінің орынбасары Ақзира Қасымова, Қызылорда облысының білім саласында сапаны қамтамасыз ету департаментінің директоры Ғалия Дәулетова, техника ғылымдарының докторы, профессор Қылышбай Бисенов, ауыр атлетикадан Қазақстан Республикасының еңбек сіңірген спорт шебері Илья Ильин, «Қазақстан барысы-2022» республикалық турнирінің жеңімпазы Мақсат Исағабылов және университеттің профессор-оқытушылары мен ата-аналар қатысты.
<img src="https://kyzylorda-news.kz/wp-content/uploads/2022/07/b48e54f0-776f-461b-88ad-85b0dac5b4dc-scaled.jpg" alt="" />
<img src="https://kyzylorda-news.kz/wp-content/uploads/2022/07/2b4c2d24-2ff8-4e77-95ec-8cb5613149aa-scaled.jpg" alt="" />
<img src="https://kyzylorda-news.kz/wp-content/uploads/2022/07/imgl3447-scaled.jpg" alt="" />
<img src="https://kyzylorda-news.kz/wp-content/uploads/2022/07/imgl2611-scaled.jpg" alt="" />
<img src="https://kyzylorda-news.kz/wp-content/uploads/2022/07/imgl2925-scaled.jpg" alt="" />

Қазақстан және Қызылорда облысының жаңалықтары