<a href="https://kyzylorda-news.kz/">Kyzylorda-news.kz.</a>&nbsp;Бүгін Сырдария ауданы, Шаған ауылының дихандар егінге орақ салды. №6 өндіріс бригадасында ұйымдастырылған дала еңбеккерлерінің мерекесіне аудан әкімі Мұрат Ергешбаев қатысып, шаруаларды құттықтады.
<blockquote>
 «Баршаңызды бүгінгі егін орақ түсу қуанышымен құттықтаймын. Ауыл шаруашылығы құрылымдарынан алынған мәліметке сәйкес, өткен жылғыдан да жоғары өнім өндіріледі деп күтілуде. Ол дихан қауымының ала жаздай төккен тері мен ерен еңбегімен келетіні белгілі. Ендігі мақсатымыз адам күшімен барлық материалдық-техникалық ресурстарды жұмылдырып, егінді қысқа мерзімде төкпей – шашпай жинап алу. Оған толық мүмкіндігіміз бар. Ендеше шағандық дихандардың қамбасы астыққа толсын», – деді өз сөзінде аудан әкімі Мұрат Ергешбаев.
</blockquote>
Жеңісбек Сыздықов басқаратын «Шаған жер» шаруашылығы жыл сайын егістік алқапқа күріш егіп, одан мол өнім алып келеді. Кәсіпкер ауыл тұрғындарын жұмыспен қамтып, ауданның аграрлық саласын дамытуда өз үлесін қосуда.
Айта кету керек, серіктестік биылғы жылы 2 800 гектар алқапқа күріш орналастырып, одан мол өнім алуға ниетті. Сонымен қатар бидай, жоңышқа, жаңа жоңышқа және бақша дақылдарын егіп, әртараптандыру бағыты бойынша жүйелі жұмыс жасауда.
<img src="https://kyzylorda-news.kz/wp-content/uploads/2022/08/301732799_1189303811632509_1043032907925601851_n.jpg" alt="" />
<img src="https://kyzylorda-news.kz/wp-content/uploads/2022/08/301599567_1189303848299172_1710296623468286004_n.jpg" alt="" />

Сырдария ауданында диқандар егінге орақ салды

<a href="https://kyzylorda-news.kz/">Kyzylorda-news.kz.</a> Бүгін Жалағаш ауданының әкімі Асқарбек Есжанов білікті дәрігер, қоғам қайраткері, Жалағаш ауданының «Құрметті азаматы», жерлесіміз Болатбек Баймахановты 60 жасқа толуына орай мерейлі мерекесімен құттықтады.
Асқарбек Темірбекұлы елімізге белгілі азамат, ғалым, медицина ғылымының докторы, профессор, жоғары санатты хирург Болатбек Баймахановтың өңіріміздің өркендеуі мен дамуы жолындағы қосқан елеулі үлесі мен ел игілігі жолындағы еселі еңбегін атап өтіп, құрмет көрсетті.
<blockquote>
 «Елдің атын ер шығарады» дегендей киелі Жалағаш жерінде дүниеге келіп, еліміздегі медицина саласының дамуына ерекше үлес қосып келе жатқан медицина ғылымдарының докторы, профессор, хирург Болатбек Бимендіұлы асқаралы 60 жасқа толып отыр. Туған жеріне аңсап жетіп, топырағына табан тигізген, жүрегі дүрсіл қағып, өткен күндерімен, жастық дәуренімен қайта қауышқан Болатбек Бимендіұлы қадамыңыз құтты болсын демекпін, – деді аудан басшысы.
</blockquote>
Басқосуда мемлекет және қоғам қайраткері Қожахмет Баймаханов, Жалағаш ауданының және Сырдария ауданының Құрметті азаматы Батырбек Маншарипов мерейтой иесінің өмір жолын, ізгі істерін атап айтып, ыстық ілтипаттарын білдірді.
Қазіргі күні Болатбек Баймаханов өзі оқыған, ғылымға алғашқы қадамдарын жасаған, хирургияның қара шаңырағы болып табылатын А.Н.Сызғанов атындағы Ұлттық ғылыми хирургия орталығында абыройлы қызмет атқаруда.
Аудан басшысы мерейтой иесін құттықтап, жылы лебізін жеткізіп, қазақы дәстүрмен иығына шапан жапты.
Өз кезегінде Болатбек Баймаханов құрмет көрсетіп, еңбегін елеген аудан басшысына, жерлестеріне алғысын білдірді.
<img src="https://kyzylorda-news.kz/wp-content/uploads/2022/08/bezymjannyj-1.jpg" alt="" />

Жалағаш ауданының әкімі Болатбек Баймахановты мерейтоймен құттықтады

<a href="https://kyzylorda-news.kz/">Kyzylorda-news.kz.</a> Қазақстан Республикасы Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Қызылорда облысы бойынша департаменті «Байқоңыр (Байқоңыр) «Әлеуметтік – кәсіпкерлік корпорациясы» акционерлік қоғамы «Әділдік жолы» республикалық қоғамдық бірлестігі өкілдерімен және белсенді азаматтармен кездесу өткізілді.
Кездесу аясында ӘКК қызметіндегі сыбайлас жемқорлық тәуекелдеріне сыртқы талдау нәтижелері талқыланды.
Талдау нәтижелерімен ӘКК-дың жұмысын реттейтін нормативтікқұқықтық базаның жетілмегендігі, төмендетілген құн бойынша активтерді сату, әлеуметтік маңызы бар азық-түлік тауарларына бағаларды тұрақтандыруға тиісті шараларын уақытылы қабылдамау осы саладағы түйінді проблемалық мәселелер екені белгілі болды.
Мәселен,әлеуметтік маңызы бар азық-түлікті есептен шығару кезінде тәуекелдер орын алған, яғни тауар жеткізілгеннен кейін 3 айдан астам уақыт өткеннен кейін ӘКК өнімдердің бір бөлігі дұрыс сақталмау салдарынан жарамсыздығы анықталып, есептен шығарылған.
Атап айтқанда, 2021 жылы басты пияз – 288 тоннаның 204 тоннасы (барлық дерлік көлемі) немесе 11 млн. теңгеге, сәбіз – 80 тоннаның 44 тоннасы (жартысы) немесе 2 млн. теңгеге және қырыққабат – 15 тоннаның 6 тоннасы немесе 553 мың теңгеге жарамсыз ретінде есептен шығарылған.
Сонымен қатар өткен жылы картоп пен сәбізді ӘКК-мен жалпы 39 млн.теңгеге қымбат алынғаны да әлеуметтік маңызы бар азық-түлік тауарларын алатын өнім берушіні таңдау мәселесіне де сұрақтар туындатады.
Бұлар өз кезегінде карантиндік мерзімде ӘКК-мен әлеуметтік маңызы бар азық-түлік өнімдерін тиісінше сақтауға шаралар қабылдамағандықтан немесе жоғары бағамен алынуы олардың нарықтық бағасының жоғарылауына да себебі болғаны жоққа шығарылмайды.
Бұдан бөлек, ӘКК-да кадр мәселесі бойынша, яғни жұмысқа қабылдау барысында ашықтық қамтамасыз етілмегендігі жеткізілді.
Департамент тарапынан анықталған сыбайлас жемқорлық тәуекелдерін жою туралы тиісті ұсыныстар енгізілді.
Жиын нәтижесінде ӘКК-нің басшылығымен анықталған сыбайлас жемқорлық тәуекелдерін жоюға іс-шаралар жоспарын орындау шеңберінде қабылданатын және алдағы уақытта мұндай кемшіліктерге жол бермеуге жүйелі шаралар жүргізілетіні хабарланды.
<img src="https://kyzylorda-news.kz/wp-content/uploads/2022/08/78071635-8ad4-41b0-930b-ed7bddc89680.jpg" alt="" />

«Байқоңыр» ӘКК АҚ-на жүргізілген сыртқы талдау нәтижелері талқыланды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысындағы педагогикалық тамыз кеңесіде 2 жарым жастағы баланы құдықтан құтқарған 15 жасар Арман Аманжоловқа 2 бөлмелі пәтердің кілті табысталды.
Елімізде ерлігімен көзге түсіп, халықтың ыстық ықыласына бөленген азаматтар аз емес. Жақында ғана бұл тізімге қызылордалық тағы бір жас қосылды.
Өткен аптада қала орталығындағы «Универсам» шағын ауданында оқыс оқиға орын алып, екі жарым жастағы сәби ашық тұрған кәріз құдығына түсіп кеткен. Аралдан арман қуып, оқуға келген 15 жастағы Арман Аманжолов оқиға сәтінде көзсіз ерлікке барып, баланы құдықтан алып шықты. 
Бозбаланың батырлығына тек жерлестері ғана емес, тұтас ел болып қуанып, ерлігіне тәнті болды.
Бүгін облыс әкімі Нұрлыбек Нәлібаев педагогтардың тамыз кеңесінде мұқалмас ерік-жігерімен, табанды тәуекелге барған аралдық Арманға демеушілер көмегімен пәтер кілтін табыс етті.
<blockquote>
 «Мемлекет басшысы тарапынан азаматтарымыздың мұндай ерекше батыл қимылдарын елеусіз қалдырмай, өзгелерге үлгі ету туралы ұстанымы аясында бүгін Арман батырға, оның ата-анасына барша Сыр елінің атынан зор ризашылығымызды білдіремін. Бүгінде аймағымызда жомарт жүректі жанашыр азаматтар жетерлік. Сол демеушілердің атынан бүгінгі бейбіт күннің батыры болған бозбалаға баспана кілтін табыс етеміз. Қарапайым ғана ауыл баласының бұл ерлігі өзі сияқты қатар жүрген балаларға үлгі болсын, елдің ішінде осындай азаматтар көп болсын», – деді Нұрлыбек Нәлібаев.
</blockquote>
Арман Аманжолов Арал ауданы, Бөген ауылында 2007 жылы дүниеге келген. Бес ағайынды, екі тәтесі, екі ағасы бар. Әкесі Жаңалық жұмыссыз, анасы Майра мектеп асханасында жұмыс істейді.
<a href="https://kyzylorda-news.kz/kogam/arman-amanzholov-koep-ojlanbaj-songynan-sekirdim-162573/">Айта кетейік</a>, Қызылорда қаласында төрт метрлік құдыққа түсіп кеткен екі жасар баланы кездейсоқ өтіп бара жатқан жасөспірім құтқарып қалды. Оқиға 19 тамыз күні орын алған. Баланың шұңқырға түсіп кеткенін көрген жасөспірім бірден құтқару үшін құдыққа түскен.
<img src="https://kyzylorda-news.kz/wp-content/uploads/2022/08/301682302_371006521887265_4865065484552217509_n.jpg" alt="" />

Баланы құдықтан құтқарған жасөспірімге 2 бөлмелі пәтердің кілті табысталды

<a href="https://kyzylorda-news.kz/">Kyzylorda-news.kz.</a> Бүгін Сыр елінде 1000-ға жуық педагогтың қатысуымен облыстық Тамыз кеңесі өткізіліп, білім саласының өзекті мәселелері қаралып, үздік ұстаздар марапат мінберінен көрінді.
Алқалы жиынға облыс әкімі Нұрлыбек Нәлібаев, оқу-ағарту вице-министрі Ғани Бейсембаев, ҚР Парламент Сенатының депутаттары Мұрат Бақтиярұлы, Ақмарал Әлназарова, Мәслихат депутаттары және сала ардагерлері, мектеп директорлары мен ұстаздар қатысты.
«Білімді ұлт: терең білім, еңбекқорлық және отаншылдық қасиет» тақырыбында өткен педагогтер кеңесінде Нұрлыбек Нәлібаев «білім – басты құндылық, мемлекет әрдайым ұстаздарға лайықты деңгейде қолдау шараларын жүргізетінін» жеткізді.
<blockquote>
 «Президент бастамасымен соңғы жылдары білім саласында ауқымды реформалар жүзеге асырылып, педагог мәртебесін көтеруде тың бастамалар қолға алынды. Бұл өз кезегінде ұстаздарға деген айрықша құрмет, білім саласына жасаған ерекше қамқорлық. Аймақтағы демографиялық өсімді ескере келе, алдағы 3 жылда аймақта 20 мемлекеттік мектептің іргетасын қалаймыз. Бүгінгі күні демеушілердің өз қаражатына салынған жеке мектептердің желісі 20-ға жетті. Алдағы жылдары инвестор есебінен тағы 12 мектеп салынатын болады. Ал, биылдың өзінде облыста 6 жаңа мектеп бой көтереді, оның 2-еуін келер айда, қалған 4-еуін жыл соңына дейін пайдалануға береміз. Ал, аймақтағы 6 мектептің үш ауысымға өту қаупі бар, ал 4 апатты деп танылған 3 мектептің мәселесі биыл шешімін таптық. Оның екеуін қыркүйекте табыстаймыз. Орын тапшылығы жағдайының алдын алу үшін жыл аяғына дейін 1,6 млрд. теңге көлемінде қаладағы Абай мектебіне 550, №101 мектепке 375 орынға лайықталған қосымша құрылыс салынатын болады. Осы арқылы көп жылдардан бері шешімін таппаған бұл мектептегі үшауысымға ауысу қаупіндегі мәселе түбегейлі шешіледі», – деді Нұрлыбек Нәлібаев.
</blockquote>
Конференцияда сөз алған спикерлер білім саласындағы соңғы өзгерістерге тоқталып, дарынды балаларды қолдау, білім берудің ортақ мәселелерін талқыға салып, идеяларымен бөлісті. Вице-министр Ғани Бейсембаев өзгерістер заманында білім беру саласының даму қарқынына ілесу үшін ұстаздардың әдістемесі де жаңарып отыру қажет екенін алға тартып, оқу жылына енетін өзгерістерге тоқталды. Ал, Сенат депутаты Мұрат Бақтиярұлы оқулықтар мәселесін шығару, колледждерде маман даярлау мәселесін қозғады.
Педагогтер жиында алғаш рет халықтың құрметіне бөленген қос ардагер ұстаз Төлепберген Қасымов пен Марк Подольскийге Қызылорда облысының «Құрметті азаматы» атағы берілді. Тоқсанның төріне шыққан қос ұстазға аймақ басшысы ілтипат білдіріп, ең жоғары марапатты табыс етті.
Мерейлі күндегі ең маңызды сәттің бірінде облыс әкімі Нұрлыбек Нәлібаев 2,5 жастағы сәбиді ашық тұрған кәріз құдығынан құтқарған 15 жастағы Арман Аманжоловқа ерекше алғыс білдіріп, демеушілермен бірге екі бөлмелі пәтер кілтін табыстады.
Сондай-ақ, жыл сайын өткізілетін конкурс нәтижесінде үздік білім беру гранты ауыл мектебіне бұйырып, Ұзақбай Қараманов атындағы №262 мектебі 34 млн. теңгенің сертификатын жеңіп алды. 
Жиында облыс әкімінің грантын иеленген 100 оқушының бірқатарына грантын табыстады. Өңір басшысы үлкен өмірге қадам басқан жастарға сенім білдіріп, терең білім алуға шақырды.
Ұстаздардың төл жиынында еңбегімен көзге түсіп, үздік шәкірттерімен танылған 3 мұғалім «Ы.Алтынсарин» төсбелгісімен, 1 азаматқа Білім беру ісінің Құрметті қызметкері» төсбелгісі тағылды. Мұнан бөлек, «Еңбек ардагері», «Мейірім» төсбелгісінің иегері анықталып, 5 мұғалімге облыс әкімінің Алғыс хаты берілді.
<img src="https://kyzylorda-news.kz/wp-content/uploads/2022/08/whatsapp-image-2022-08-26-at-13.02.57.jpeg" alt="" />
<img src="https://kyzylorda-news.kz/wp-content/uploads/2022/08/301560151_371069375214313_7779133433306797884_n.jpg" alt="" />
<img src="https://kyzylorda-news.kz/wp-content/uploads/2022/08/301810197_371069135214337_3161848340640517421_n.jpg" alt="" />

Сыр елінде үздік мектепке 34 миллион теңге, 100 балаға әкім гранты табысталды

<a href="https://kyzylorda-news.kz/">Kyzylorda-news.kz.</a> «Білімді ұлт: терең білім, еңбекқорлық және отаншылдық қасиет» педагогикалық тамыз кеңесі пленарлық мәжілісінде қызылордалық қос ардагер ұстазға «Құрметті азаматы» атағы берілді.
Педагогтер жиында алғаш рет халықтың құрметіне бөленген қос ардагер ұстаз Төлепберген Қасымов пен Марк Подольскийге Қызылорда облысының «Құрметті азаматы» атағы берілді. Тоқсанның төріне шыққан қос ұстазға аймақ басшысы ілтипат білдіріп, ең жоғары марапатты табыс етті.
Төлепберген Смағанбетұлы – «КСРО – халық мұғалімі», «Кәсіптік білім саласының еңбегі сіңген қызметкері» атағымен марапатталған. Бірнеше мәрте КСРО – Жоғарғы Кеңесінің, КСРО-ның ғылым академиясының құрметтеріне ие болған. Төлепберген Қасымовтың есімі КСРО-ның үлкен энциклопедиялық сөздігіне, мемлекеттік Құрмет кітабына енген.
Марк Захарович – білікті маман, сауатты басшы және шебер ұйымдастырушы ретінде аймақтың дамуына үлес қосқан қайраткер.Білім саласына сіңірген ерлеулі еңбегі үшін «Парасат» ордені мен «Ерең еңбегі үшін» медалімен марапатталған.
Айта кетейік, білім саласының қызметкерлеріне Қызылорда облысының «Құрметті азаматы» атағы алғаш рет табысталып тұр.
<img src="https://kyzylorda-news.kz/wp-content/uploads/2022/08/301994355_371018655219385_7622791039255972453_n.jpg" alt="" />
<img src="https://kyzylorda-news.kz/wp-content/uploads/2022/08/301771503_371018421886075_1844827193685649738_n.jpg" alt="" />

Қос ардагер ұстазға Қызылорда облысының «Құрметті азаматы» атағы берілді

<a href="https://kyzylorda-news.kz/">Kyzylorda-news.kz.</a> Киелі Шиелі жерінде, ақ күріштің атасы, дала академигі атанған, екі мәрте Социалистік Еңбек Ері Ыбырай Жақаев бастаған ауданда Сырдың басты дақылы, ел ырысы – күрішке орақ түсті.
«Алтын орақ – 2022» мерекелік іс-шарасына аудан әкімі Ахатов Нұржан Сәбитұлы, мәслихат хатшысы Т.Жағыпбаров, аудандық ардагерлер кеңесінің төрағасы Ө.Исмаил, аудан ардагерлері, шаруа қожалық басшылары, ауданның зиялы қауым өкілдері мен БАҚ өкілдері қатысты.
Аудан әкімі Нұржан Ахатов ауданымыздың диқаншылар қауымын алғашқы егін жинау жұмыстарының басталуымен арнайы құттықтап, күннің ыстық-суығында үздіксіз жер жыртып, егіс алқабына көзінің қарашығындай қарап, оны баптап тынбай еңбек еткен диқаншылардың есіл еңбегін айтып, шаруалардың жұмыстарына алғысын білдірді.
<blockquote>
 «Биылғы жылы ауданда барлығы 30,1 мың гектарға ауыл шаруашылығы дақылдары орналастырылды. Жылдың басында негізгі дақыл күріштің межесі 8500 гектар болатын. Облыс әкімінің қолдауымен 12000 гектар егу мүмкіндігі берілді. Дегенмен де шаруа қожалықтары вегетация кезеңінде судың тапшылығына байланысты тәуекелдің алдын алып, барлығы 10750 гектар жерге күріш орналастырылды. Диқандардың тынымсыз еңбектерінің арқасында күріштің әр гектарынан 50-55 центнерден өнім алынады деп күтілуде. Бүгінгі таңда жоңышқа шөбінен 43172, жаздық бидайдан 410, көкөністен 30225 және бақша дақылынан 45000 тонна өнім жиналды», – деді аудан әкімі.
</blockquote>
Ерте көктемнен бастап ала таңнан күн батқанша дейін тынымсыз әрі адал еңбектің, татқан бейнет пен теккен төрдің нәтижесіне арналған шарада Шиелі ауданының Құрметті азаматтары ауылшаруашылығы саласының ардагерлері Оразымбетов Сұлтанбек Қойшыбайұлы тілегін жеткізіп, Смайылұлы Киікбай ағамыз шаруаларға ақбатасын берді.
Биылғы жылы диқандарамыз орын алған қиындықтарға қарамастан суды тиімді пайдалану, егістікті кезектеп суару, қашыртқыдағы суды екінші рет пайдалану қолға алды. Онымен қоса, әртараптандыру бағытындағы суды аз қажет ететін мал азығы, көкөніс, бақша дақылдарының көлемін арттыруға жұмыс жасалды.
Атқарылған жұмыстардың нәтижесінде дихан қауымы егілген күріш алқаптарын судан қалдырмай, агротехникалық талаптарға сай күтіп-баптап өсірді.
Шаруашылық құрылымдары ішкі каналдар мен қашыртқы жүйесін тазартуға, су беру кезеңінде оны үнемді пайдалану мақсатында қашыртқыларға артық су жібермеуге барынша тырысты.
Диқандардың тынымсыз еңбектерінің арқасында күріштің әр гектарынан 50-55 центнерден өнім алынады деп күтілуде.
Үстіміздегі жылы аудан бойынша егін шаруашылығын әртараптандыру мақсатында ескі жоңышқа көлемі 6147 гектарға, жаңа жоңышқа 3400 гектарға, соя 150 гектарға, дәнді жүгері 110 гектарға, арпа 50 гектарға, жемдік жүгеріні 60 гектарға, мал жемдік асқабақ 137 гектарға, тары 280 гектарға, мақсары 1494 гектарға артып отыр.
Шара соңы аудандық мәдениет саласы қызметкерлерінің ұйымдастыруымен мерекелік концертке ұласты.
<img src="https://kyzylorda-news.kz/wp-content/uploads/2022/08/300960882_3234909220115640_4527059368591051064_n.jpg" alt="" />
<img src="https://kyzylorda-news.kz/wp-content/uploads/2022/08/301033349_3234909290115633_8745162688023893585_n.jpg" alt="" />
<img src="https://kyzylorda-news.kz/wp-content/uploads/2022/08/301017542_3234909350115627_2119886097497287338_n.jpg" alt="" />
<img src="https://kyzylorda-news.kz/wp-content/uploads/2022/08/301374941_3234909373448958_7356887859138862327_n.jpg" alt="" />

Шиелі ауданында «Алтын орақ – 2022» мерекелік іс-шарасы өтті

<a href="https://kyzylorda-news.kz/">Kyzylorda-news.kz.</a> «Білімді ұлт: терең білім, еңбекқорлық және отаншылдық қасиет» педагогикалық тамыз кеңесінде Қызылорда облысының әкімі Нұрлыбек Нәлібаев мұғалімдерді әлеуметтік қолдаудың нақты қадамын атап өтті.&nbsp;
<blockquote>
 «Соңғы жылдары мұғалім мәртебесін көтерудің барлық алғышарттары жасалып, материалдық ынталандыру аясы кеңейіп келеді. 2020 жылдан ұстаздарға қажетті үстемақы төленуде, биыл бұл мақсатқа републикалық бюджеттен – 52,4 млрд. теңге қаржы бөлінді. Келесі жылы педагогтер жалақысы тағы 25 пайызға көбейеді. Бұл – мұғалімдерді әлеуметтік қолдаудың нақты бір қадамы. Біз де қоғам алдында ұстаздардың беделін арттыруға ынталымыз», – деді Нұрлыбек Нәлібаев.
</blockquote>
Ұстаздар жиынында аймақ басшысы он жылдан аса уақыттан бері бір мектепті басқарып келе жатқан директорлар туралы да айтып өтті.
<blockquote>
 «Білім беру жүйесіне ротациялау тәртібін енгізу уақыт талабынан туындаған міндет. Ашығын айтқанда, бізде бір орында 10-15 жыл және одан да көп қызмет атқарып жүрген директорлар аз емес. Әрине, олардың арасында өз жұмысын жетік білетін, білім беру ұйымдарының дамуына елеулі үлес қосып жүрген басшылар да бар. Әлеуметтанушылардың пікірінше, мекемені ұзақ жылдар басқару адамның бастамашыл идеясы мен жұмысқа деген ынтасын төмендетеді. Сәйкесінше, басшыларды ротациялау сала дамуына жаңаша леп, тың серпін береді», – деді облыс әкімі.
</blockquote>
Аталған мәселеге қатысты аймақ басшысы облыстық білім басқармасына заң шеңберінде ротациялау рәсімдерін 1 қазанға дейін аяқтауды тапсырған.
<blockquote>
 «Білім саласы қай кезде де ашықтықты қажет етеді. Соған сәйкес, сыбайлас жемқорлықты болдырмау және оның алдын алу-баршамыздың міндетіміз. Өйткені бір ғана сыбайластық фактісі біздің жасап жатқан жұмысымыздың нәтижесін жоққа шығарады. Сондықтан, білім беру ұйымдарының басшылары кадр мәселесіне келгенде, азаматтық ұстаным мен адалдық принципін ұстануы керек. Облыстық білім басқармасына сыбайлас жемқорлыққа жол бермеу және оның алдын алу бойынша мүдделі органдармен бірлескен тиімді жұмыстарды жүргізуді және мұғалімдерді конкурс тәртібімен жұмысқа қабылдауды тапсырамын», – деді Нұрлыбек Мәшбекұлы.
</blockquote>
Облыс әкімі білім берудің үздік тәжірибесін лайықты жалғастыра келе, ұлттық құндылықтар мен тұлғатану институтын қалыптастыру қажет екенін жеткізді.
<blockquote>
 «Бұл – бүгінгі буынның біліміне жауапты ұстаздарды ғана емес, бауыр еті баласы үшін барын беретін ата-аналарды да алаңдатуы қажет. Сондықтан құндылықтарға негізделген білім арқылы парасат биігіне жетеміз. Бұл ретте, биыл еліміз бойынша кең ауқымдағы аталып өтіп жатқан Ахмет Байтұрсыновтың, Мұхтар Әуезовтің, Ғани Мұратбаевтың мерейтойлық шаралар балалардың рухани танымын тереңдетуге жол ашады», – деді аймақ басшысы.
</blockquote>
<img src="https://kyzylorda-news.kz/wp-content/uploads/2022/08/whatsapp-image-2022-08-26-at-15.49.20.jpeg" alt="" />

Аймақ басшысы: Ротациялау рәсімдері 1 қазанға дейін аяқталуы тиіс

<a href="https://kyzylorda-news.kz/">Kyzylorda-news.kz.</a>&nbsp;«Білімді ұлт: терең білім, еңбекқорлық және отаншылдық қасиет» педагогикалық тамыз кеңесі пленарлық мәжілісіне Қызылорда облысының әкімі Нұрлыбек Нәлібаев&nbsp;білім саласының жан-жақты және жүйелі жұмысты қажет ететін күрделі, әрі ауқымды сала екенін айтып өтті.
<blockquote>
 «Мемлекет басшысы Қасым-Жомарт Кемелұлы Тоқаев «Болашаққа жол сілтейтін мұғалімнің еңбегін лайықтыбағалау – өте маңызды міндет» деп атап өтті. Бұл ретте, биылғы тамыз кеңесінің «Білімді ұлт: терең білім, еңбекқорлық және отаншылдық қасиет» атауын еншілеуі құндылықтардың қай кезде де биік екенін тағы бір дәлелдеді. Себебі адамзатты кемел ойға тек білім ғана жетелейді. Президент бастамасымен соңғы жылдары білім саласында ауқымды реформалар жүзеге асырылып, педагог мәртебесін көтеруде тың бастамалар қолға алынды.Бұл өз кезегінде ұстаздарға деген айрықша құрмет, білім саласына жасаған ерекше қамқорлық. Білім – жан-жақты және жүйелі жұмысты қажет ететін күрделі, әрі ауқымды сала. Соның маңызды құрамының бірі – қаражат мәселесі», – деді облыс әкімі.
</blockquote>
Сонымен қатар аймақ басшысы өз көзінде алдағы жылдары білім саласына бөлінетін қаржының арта түсетінін айтты.
<blockquote>
 «Биылғы жылы білім саласына бөлінген қаржы 204,8 млрд. теңгеге жетіп, облыс бюджетінің 42,8%-ын құрады. Бұл былтырғы жылмен салыстырғанда 17%-ға артық. Былтырғы жылы 2021 жылы 173 674,7 млн. теңгені құраған. Тиісінше, алдағы жылдары білім саласына бөлінетін қаржы көлемі арта бермек», – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2022/08/301669953_371069531880964_1603717394718150827_n.jpg" alt="" />

Нұрлыбек Нәлібаев: Алдағы жылдары білім саласына бөлінетін қаржы көлемі арта бермек

<a href="https://kyzylorda-news.kz/ru/">Kyzylorda-news.kz</a>. Жаңа мектеп салу, апатты және үш ауысымды жою – білім саласындағы басым бағыттардың бірі. Бүгінде аймақтағы 6 мектептің үш ауысымға өту қаупі бар, ал 4 апатты деп танылған 3 мектептің мәселесі биыл шешімін тапты. Оның екеуі қыркүйекте табысталады. Бұл туралы Қызылорда облысының әкімі Нұрлыбек Нәлібаев «Білімді ұлт: терең білім, еңбекқорлық және отаншылдық қасиет» педагогикалық тамыз кеңесінің пленарлық мәжілісінде мәлімдеді.
<blockquote>
 «Арал ауданы Тоқабай ауылындағы апатты мектеп әкімдіктің ұйымдастыруымен жеке инвестор есебінен салынуда. Қазалы ауданындағы №94 мектептің жоба-сметалық құжаттары әзірленуде. Аймақтағы демографиялық өсімді ескере келе, алдағы 3 жылда аймақта 20 мемлекеттік мектептің іргетасын қалаймыз. Бүгінгі күні демеушілердің өз қаражатына салынған жеке мектептердің желісі 20-ға жетті. Алдағы жылдары инвестор есебінен тағы 12 мектеп салынатын болады.&nbsp;
 Ал, биылдың өзінде облыста 6 жаңа мектеп бой көтереді,оның 2-еуін келер айда, қалған 4-еуін жыл соңына дейін пайдалануға береміз. Бұған қоса 6 мектепке күрделі жөндеу жүргізілуде, бұл мақсатқа облыстық бюджеттен – 2,1 млрд.теңге қаралды. Әрбір нысан уақытылы әрі сапалы аяқталуына мердігерлер мен мектеп директорлары мүдделі болуы тиіс!», – деді аймақ басшысы.
</blockquote>
Жыл сайын мектептерде орын тапшылығы туындайтыны жасырын емес.
Нұрлыбек Мәшбекұлының айтуынша жыл аяғына дейін қаладағы Абай мектебіне 550, №101 мектепке 375 орынға лайықталған қосымша құрылыс салынбақ. Осы арқылы көп жылдардан бері шешімін таппаған бұл мектептегі үш ауысымға ауысу қаупіндегі мәселе түбегейлі шешіледі.
<blockquote>
 «Ал, келесі жылы облыс орталығындағы бала саны көп №3 лицейге 300, №264 мектепке 600 орындық қосымша ғимарат құрылысын бастаймыз. Бұған облыстық бюджеттен жоба-сметалық құжаттарды әзірлеуге қажет қаржы бөлдік.
 Жерлестеріміз үшін тағы бір жағымды жаңалық, 2024 жылы Арай, СПМК-70 мөлтек аудандары мен Сырдарияның сол жағалауында жаңа мектептер бой көтеретін болады» – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2021/05/shkola.jpg" alt="" />

Қызылорда: Алдағы 3 жылда 32 мектептің іргетасы қаланады

<a href="https://kyzylorda-news.kz/">Kyzylorda-news.kz.</a> Н.Бекежанов атындағы облыстық қазақ академиялық музыкалық драма театрында педагогикалық тамыз кеңесі басталды.
«Білімді ұлт: терең білім, еңбекқорлық және отаншылдық қасиет» педагогикалық тамыз кеңесі пленарлық мәжілісіне Қызылорда облысының әкімі Нұрлыбек Нәлібаев қатысады.
<img src="https://kyzylorda-news.kz/wp-content/uploads/2022/08/whatsapp-image-2022-08-26-at-11.12.33.jpeg" alt="" />

Қызылордада педагогикалық тамыз кеңесі басталды (ВИДЕО)

<a href="https://kyzylorda-news.kz/">Kyzylorda-news.kz.</a> ҚР Парламенті Мәжілісінің депутаты Әміреев Ғалым Махмұтбайұлы Қызылорда қаласына қарасты Талсуат ауылдық округінде салынып жатқан 150 орындық клуб құрылысымен танысты.
Мердігер компания өкілдеріне құрылысты сапалы жүргізіп, мерзімінде аяқтау керектігін тапсырды. Сонымен қатар Ғалым Махмұтбайұлы құрылыс барысында еңбек қауіпсіздігін қатаң сақтау керектігін айтты.
Мұнан соң халық қалаулысы Қызылжарма ауылдық округінде болып, ауыл тұрғындарымен кездесті. Кездесу пікір алмасу форматында өтті. Онда ауыл тұрғындары көкейлерінде жүрген сұрақтарды қойып нақты жауаптар алынды. Сонымен қатар ауылдыұтар Мәжіліс депутатына жаңадан мектеп салу мәселесін, халық саны артуына байланысты емхананың тарлығы, емхана айналасына автотұрақ салу мәселесін және де жастарға арнап спорт кешенін салу мәселесін көтерді. Өз кезегінде Ғалым Махмұтбайұлы мәселелерді тиісті жерлерге ұсыныс ретінде жолдап, назарында ұстайтынын жеткізді.
Депутаттың Қызылорда қаласына іссапары қаладағы Бәйтерек тұрғын ауданындағы бой көтеріп жатқан 600 орындық мектеп құрылысы барысымен танысумен жалғасты. Оқу жылының екінші тоқсанына берілуге тиіс мектеп құрылысының сапасына мән беріліп, құрылысты мерзімінде аяқтау тапсырылды.
Мәжіліс депутаты келесі нысан ретінде осы аудандағы 1-ші және 2-ші кіре беріс жолдарына жүргізілген орташа жөндеу жұмыстарының барысын бақылады. Бұл ретте Ғалым Махмұтбайұлы жол салуда сапаның бақылауда ұстаудың маңыздылығын ескертті.
Партиялық бақылау посты ашылды
«AMANAT» партиясы Қызылорда қалалық партия филиалының «Өзгерістер жолы: Әр азаматқа лайықты өмір!» атты сайлауалды бағдарламасын іске асыру бойынша қабылданған жол картасының 53.2 тармағында көрсетілген Бәйтерек шағын ауданындағы 600 орындық мектептің құрылысы және Талсуат ауылдық округіндегі 150 орындық ауылдық клубтың құрылысының сапалы жүргізілуін қадағалау мақсатында қалалық партиялық бақылау посттары құрылды.
Аталған посттардың мүшелігіне қалалық мәслихаттың депутаттары, бастауыш партия ұйымдарының төрағалары, белсенді партия мүшелері енгізілді. Құрылыс және жөндеу жұмыстары аяқталғанға дейін аталмыш тұлғалар бақылау шараларын жүргізетін болады.
<img src="https://kyzylorda-news.kz/wp-content/uploads/2022/08/301423233_183939924098134_692437760965021732_n.jpg" alt="" />
<img src="https://kyzylorda-news.kz/wp-content/uploads/2022/08/301500316_183941854097941_2765299757398770460_n.jpg" alt="" />

Қазақстан және Қызылорда облысының жаңалықтары