<a href="https://kyzylorda-news.kz/">Kyzylorda-news.kz.</a> Елде “омикрон” штамының таралуына, сондай-ақ коронавирусты жұқтыру жағдайларының көбеюіне байланысты 14 қаңтардан бастап қосымша алдын алу шаралары <a href="https://sputnik.kz/society/20220114/19140248/karantin-kantar-shekteuler.html">енгізіледі.</a>
Жұмыс және демалыс күндері сауда орталықтары, сауда үйлері мен сауда желілері, спорттық-сауықтыру және фитнес-орталықтары, йога-орталықтары, бассейндер, сауналар, моншалар “жасыл” статус арқылы (вакцинацияның болуы, сынамалар алынған сәттен бастап 7 тәуліктен аспайтын теріс нәтижесі бар ПТР-тесілеудің болуы, соңғы 3 ай ішінде ауырып жазылған, тұрақты медициналық қарсы көрсетілімдері бар адамдар) шектеусіз жұмыс жүргізеді.
Қазақстанда эпидемиологиялық жағдайдың нашарлағаны байқалады. Тек соңғы тәулікте елде 9122 коронавирус жағдайы тіркелді.
Қаулының толық мәтінімен <a href="https://www.gov.kz/memleket/entities/kkkbtu/press/news/details/312112?lang=kk">мында</a> таныса аласыз.

Жаңа қаулы: 14 қаңтардан бастап жаңа шектеулер енгізілді

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласында 6 қаңтар күні таңғы сағат 05:00 шамасында белгісіз азаматтар аңшы дүкенінің терезесін сындырып кірген. Олар дүкеннен киімдер, дүрбілер және арнайы пышақ құралдарын ұрлаған.
Жедел шаралар нәтижесінде Қызылорда қалалық Полиция басқармасының қызметкерлері дүкенге ұрлыққа түсті деп күдіктелген екі қала тұрғынын ұстады. Күдіктілер уақытша ұстау абақтысына қамаққа алынды.&nbsp;
Қазіргі уақытта аталған дерек бойынша Қазақстан Республикасының Қылмыстық кодексінің 188-бабының 3-бөлігінің 3-тармағы (Ұрлық, тұрғын, қызметтiк немесе өндiрiстiк үй-жайға, қоймаға не көлік құралына заңсыз кiрумен жасалған ұрлық) бойынша сотқа дейінгі тергеп-тексеру әрекеттері жүргізілуде.&nbsp;
Қазіргі уақытта оқиғаның мән-жайлары анықталып жатыр. Басқа да тұлғалардың қатыстылығы тексерілуде. Тергеу жалғасуда.

Қызылордада аңшы дүкеніне ұрлыққа түскендер ұсталды

<a href="https://kyzylorda-news.kz/">Kyzylorda-news.kz.</a> Облыс әкімі Гүлшара Әбдіқалықованың төрағалығымен аймақтағы террорлық актіден зардап шеккен нысандарды қалпына келтіру мәселелері бойынша жиналыс өтті. Отырысқа облыс әкімінің орынбасарлары, аппарат басшысы, қала әкімі, салалық басқарма мен құрылыс мекемелерінің басшылары қатысты.
Аймақ басшысы жиын барысында залал келген нысандарды қалпына келтіру мәселелерін шешуге жедел кірісу қажет деп ескертті. Сондай-ақ, ғимаратқа жасалған әрбір жұмыс сапалы әрі бұрынғы қалпынан кем болмауы тиіс екенін жеткізді.
<blockquote>
 «Зардап шеккен әкімшілік ғимараттарды жөндеу және қалпына келтіру жұмыстарын жедел жүргізу қажет. Сондықтан, облыстық құрылыс, сәулет және қала құрылысы басқармасы айқындалған жөндеу жұмыстарын жүргізетін мердігерлермен бірлесіп, тиісті шараларды қолға алыңыздар», – деді облыс әкімі.
</blockquote>
<img src="https://kyzylorda-news.kz/wp-content/uploads/2022/01/271925189_223893043265281_6030732077368981006_n.jpg" alt="" />
Жиында облыс әкімі террорлық әрекет салдарынан ғимараттары зардап шеккен Ішкі істер органдары, облыс әкімінің аппараты және Қызылорда қаласының әкімдігіне мердігерлік ұйымдармен шарт жасасу жөніндегі жұмысты жүргізіп, жөндеу және қалпына келтіру жұмыстарын бастауын тапсырды. Ал Соттар әкімшісінің және Nur Otan партиясының ғимараттарын жөндеу жөнінде келісім-шарттар жасауды облыстық жұмылдыру дайындығы басқармасына жүктеді.
Айта кетейік, шығынды есептейтін арнайы комиссия нысандар бойынша 6 млрд.теңге шамасында залал келгенін жеткізді.
<img src="https://kyzylorda-news.kz/wp-content/uploads/2022/01/271882113_223893049931947_96756156876324951_n.jpg" alt="" />

Облыс әкімі террорлық әрекет салдарынан қираған ғимараттарды тез арада қалпына келтіруді тапсырды

<a href="https://kyzylorda-news.kz/">Kyzylorda-news.kz.</a> Президент Мәжілістегі сөзінде үлкен саяси міндеттерді алға қойды. Бұл – мемлекеттік табыстың әділетті бөлінуі. Президент жаңа сайланған үкіметке осы бағыттағы жұмысты жалғастыруға, халықтың көкейінде жүрген көптеген мәселелерді шешуді тапсырды. Бұл үкіметке берілген үлкен сенім және мүмкіншілік.
Бұл туралы Орталық коммуникациялар қызметі алаңында Парламент Мәжілісінің депутаты Берік Әбдіғалиұлы мәлімдеді.
<blockquote>
 «Көбіміз білеміз, бұрын әлеуметтік желіден оқып жүрдік, бірақ ресми айтылмаған белгілі бір топтар мемлекеттің байлығын әділетсіз бөлуге қатысатын. Бұл нағыз жемқорлықтың көрінісі. Қоғамда ондай деректер өте көп. Мемлекеттік компанияларда қаншама тиімсіз жұмсалған қаражаттар бар. Президенттің айтқанымен шектелмей, осындай деректерді бәріміз айтып, қоғамның талқылауына шығарып, тиісті органдарға беруіміз керек. Басты мақсатымыз – осы жұмысты бәріміз жұмылып, мемлекет басшысының бастаған бағытын жалғастырып, тоқтатпауына ықпал етуіміз керек. Барлық қоғам мүшелері, кәсіпкер болсын, ер азамат болсын. Өйткені, бұған бәрібір де қарсылық болады. Соны жасап жүрген адамдар әлі де сол қызметтерде жүр. Сондықтан қоғамның қолдауы керек. Мемлекет басшысы Мәжілісте саяси реформалар туралы айтып кетті, Ұлттық кеңес мүшелері бірқатар ұсыныстар жасады, енді осы қалыптасқан ахуалға байланысты тағы да біраз ұсыныстар дайындалады. Жыл соңына дейін нақты саяси реформалар жүргізілуі тиіс. Қоғамның, атқарушы биліктің бақылауын күшейту, қажет болса, сайлау заңын қарастыру керек. Әкімдерді, облыс әкімдерін сайлау. Ең бастысы демократиялық процестер енді басталып жатыр. Осыған бәріміз жұмылып, қолдауымызды көрсетуіміз керек», – деді Мәжіліс депутаты.
</blockquote>

Берік Әбдіғалиұлы: Еліміздегі демократиялық процестерге қолдау көрсетуіміз керек

<a href="https://kyzylorda-news.kz/">Kyzylorda-news.kz.</a>&nbsp;&nbsp;Қазақстанда өткен тәулікте 10418 адамның коронавируспен ауырған ПТР арқылы расталды, деп хабарлайды <a href="https://www.coronavirus2020.kz/kz/otken-taulikte-10418-adamnan-koronavirus-anyktaldy_a3885566">coronavirus2020.kz</a>&nbsp;.
Аймақтар бойынша:
Нұр-Сұлтан қаласы – 5548,
Алматы қаласы – 1115,
Шымкент қаласы – 370,
Ақмола облысы – 290,
Ақтөбе облысы – 323,
Алматы облысы – 257,
Атырау облысы – 437,
Шығыс Қазақстан облысы – 31,
Жамбыл облысы – 104,
Батыс Қазақстан облысы – 186,
Қарағанды облысы – 820,
Қостанай облысы – 97,
Қызылорда облысы – 318,
Маңғыстау облысы – 200,
Павлодар облысы – 150,
Солтүстік Қазақстан облысы – 25,
Түркістан облысы – 147.
Жалпы ел бойынша ауырғандар саны 1024004.

Қызылордада өткен тәулікте 318 адам коронавирус жұқтырған

<a href="https://kyzylorda-news.kz/">Kyzylorda-news.kz.</a> Қазақстандық синоптиктер 14 қаңтарға арналған ауа райы болжамын ұсынды.
Атмосфералық фронтальды бөліктердің өтуімен Қазақстанның басым бөлігінде тұрақсыз ауа райы сақталады – қар жауады, оңтүстік жартысында жауын-шашынды (жаңбыр мен қар) болады. Республиканың кей жерлерінде тұман түсіп, көктайғақ болады. Жел күшейіп, бұрқасын күтіледі.
“Қазгидромет” РМК мәліметінше, Батыс Қазақстан облысында күндіз синоптиктердің болжауынша, жел жылдамдығы 15-20 м/с-ке дейін күшейеді, облыстың солтүстігінде, оңтүстік-шығысында көктайғақ болып, қар жауады, облыстың батысында, солтүстігінде тұман түседі.
Қызылорда облысының орталығында көктайғақ, тұман болады.

14 қаңтарға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Қызылорда облысында жеке меншік әріптестік бағытында спорт кешендері салынып, саны артуда. Мемлекет тарапынан да қаржы бөлініп, биыл бес спорт кешені пайдалануға беріледі. Бұл туралы облыстық дене шынықтыру және спорт басқармасының басшысы Асылжан Жаманқұл мәлімдеді.
<blockquote>
 «Алда атқарылатын шаруа көп. Қазір ең бірінші мәселе жан басына шаққандағы қаржыландыруды ұйымдастыру. Бұл бойынша облыс әкімі спорт саласына қолдау көрсетіп, қаржы мәселесі шешілді. Сондай-ақ бөлінген қаржы арқылы бұқаралық спортты дамытып, оған жасөспірімдер мен жастарды тартатын боламыз. Өйткені бұл үлкен мәселе. Бұған тек қала емес, ауыл-аудан спортшылары белсенділік танытуда», – деді Асылжан Зулфқарұлы.
</blockquote>

Биыл Қызылордада 5 спорт кешені пайдалануға беріледі

<a href="https://kyzylorda-news.kz/">Kyzylorda-news.kz.</a> Қызылорда облысында онлайн форматта барлық деңгейдегі жастар ресурстық орталығы басшыларының жиныны өтті.
Мемлекет басшысы Қасым-Жомарт Кемелұлы Тоқаевтың Парламент Мәжілісінің отырысында белгілеген мақсат-міндеттерді негізгі ала отырып, жұмыс жоспарын жасақтап, Президент жүктеген тапсырмаларды орындау барысы талқыланды.
Аудандық жастар ресурстық орталықтарының директорлары еліміздегі соңғы жағдайларға байланысты аудан жастарының ахуалын баяндап, қазіргі таңда жағдайдың тұрақты екендігін жеткізді.
<blockquote>
 «Мемлекет басшысының «Ауылшаруашылығымен қатар, шағын және орта бизнесті дамыту керек» деген сөзін негізге ала отырып, аудан, ауыл жастарының еңбекке етене араласуына аса назар аудару қажеттігі ескертіліп, бірқатар тапсырмалар берілді. Бүгінгі күні еріктілік бағытының қоғамдағы орны мен мәртебесін қайта түсіндіруіміз қажет. Еріктілік – тек қайырымдылық, оның ішінде азық-түлікті үлестірумен шектеліп қалмауы тиіс. Бизнестегі еріктілік, құқықтық еріктілік және ЭКО-Волонтерлік бағыттарын жолға қоямыз», – деді Қызылорда облыстық «Жастар ресурстық орталығының» директоры Асқар Құрмаш.
</blockquote>
Сондай-ақ, қазіргі таңда күн тәртібіндегі басты атқаратын жұмыс ол – NEET санатындағы жастармен жұмыс. Аталған жастарды анықтау жұмыстарының алғашқы кезеңі өз деңгейінде жүзеге асты. Облыс жастарының 38 пайызына адрестік жұмыстар жүргізілді. Екінші кезеңде 1 наурызға дейін облыс көлемінде адрестік жұмыстар өз жалғасын табады. Негізгі басымдық облыс орталығы мен аудан орталығының жастарына берілмек. Бұл бағыттағы жұмыстарды атқарып, дерекқорлар базасы жасақталғасын, жұмыстың үшінші кезеңіне көшеміз,- деді.
Сонымен қатар, жиналыста Мемлекет басшысы ерекше атап өткен жастар арасындағы әскерден жалтарған жастардың қызығушылығын арттыру мәселесі айтылып, бірнеше ұсыныстар мен идеялар ортаға салынып, талқыланды.
Кездесу соңында Асқар Шалқарұлы жастар ресурстық орталықтарының басшыларының алдағы жұмыстарына сәттілік тіледі.
<img src="https://kyzylorda-news.kz/wp-content/uploads/2022/01/271817029_1163906694383988_1597827391723924100_n.jpg" alt="" />

Ауыл жастарының мәселелері басты назарда

<a href="https://kyzylorda-news.kz/">Kyzylorda-news.kz.</a>&nbsp;Бүгіннен бастап Қазақстанның үш облысында – Батыс Қазақстан, Солтүстік Қазақстан және Павлодар облыстарында төтенше жағдай режимі тоқтатылды. Бірақ кейбір өңірлерде блокбекеттер өз жұмысын жалғастырады, деп хабарлайды Tengrinews.kz.
Солтүстік Қазақстан облысында бүгіннен бастап төтенше жағдай режимі тоқтатылды, бірақ өңірлік жедел штаб лаңкестік қауіп бойынша “сары” деңгейді белгілеу туралы шешім шығарды.
<blockquote>
 «Басқа қалалардағы басқыншылық әрекеттерге қатысы бар адамдар облыс аумағына кіруі мүмкін екенін ескере отырып, лаңкестерге қарсы күрес жөніндегі өңірлік жедел штаб 2022 жылғы 13-26 қаңтар аралығында Солтүстік Қазақстан облысы аумағында қауіптің орташа (сары) деңгейін белгілеу туралы шешім шығарды», – деп мәлімдеді облыс әкімдігі өкілі.
</blockquote>
Жергілікті билік өңірде блокбекеттер жұмысы жалғасатынын, құжаттарды тексеретін бақылау-өткізу режимі бұрынғыдай жүргізілетінін айтты.
Батыс Қазақстан облысында 13 қаңтарда таңғы сағат 7-ден бастап ТЖ режимі алып тасталды, бірақ өңірде блокбекеттер жұмысы жалғасады.
<blockquote>
 «Мұндай шешім құқық қорғау органдарының экстремистік және лаңкестік әрекеттерді ұйымдастырушыларды анықтау, ұстау бойынша жұмыс жүргізуіне байланысты қабылданды. Біздің міндетіміз – осы адамдардың облыс аумағына кіруіне жол бермеу», – деді облыстық полиция департаментінің ресми өкілі Болатбек Нұрғожин.
</blockquote>
Батыс Қазақстан облысында барлық шағын және орта бизнес нысандарының жұмысы қалпына келтірілді, банк филиалдары ашылды. Сауда орталықтары мен базарлар жұмысын қайта бастады, жер және әуе жолдары ашылды. Жеке және заңды тұлғалардан уақытша алынған қаруды қайтару жұмысы жүргізіліп жатыр.
Павлодар облысында ТЖ режимі кезінде бетоннан жасалған және құм салынған қаптармен нығайтылған екі блокбекет жұмыс істеді. Аймаққа кіріп-шығу шектелді.
Аймақ комендатурасының ақпараты бойынша, ТЖ режимі кезінде блокбекеттер арқылы 25 046 автокөлік, оның ішінде 44 974 адам өткізілген. 645 автокөлік пен 1402 азаматтың рұқсаты болмағасын жүріп-тұруы, шығуы шектелген. Ресми мәліметтер бойынша, қазір барлық блокбекет алынған. Айта кетейік, коменданттық сағатты бұзғаны үшін өңірде 811 адам мен 349 автокөлік ұсталды. Сондай-ақ, митингке қатысқан 909 адам әкімшілік тәртіп бойынша жазаланды. Оның ішінде 345 адам 15 тәулікке дейін қамауға алынды, 288 адамға 30 айлық көрсеткіш есебінде айыппұл салынды. Ұсталғандар тізімінде 8 шетел азаматы бар, олар сот шешімі бойынша елден шығарылды.
Қарағанды облысында ТЖ режимін бұзған 680 адамға әкімшілік хаттама толтырылды. 69 тұрғын қамауға алынып, 26 адамға айыппұл салынды. 525 адам ескерту алды. Кейінгі тәулікте өңірде 34 қылмыстық құқықбұзушылық тіркелді.
ТЖ кезінде барлығы 45 тыйым салынған зат, оның ішінде 18 тегіс ұңғылы қару тәркіленген. Сондай-ақ, есірткі заттарына қатысты 9 дерек анықталды. 6 шетел азаматы көші-қон заңнамасын бұзғаны үшін әкімшілік жауапкершілікке тартылды.
Қызылорда облысында 28 блокбекет қойылды. Өңірде ТЖ режимі кезеңінде негізгі шаралар атқарылып, уақытша шектеулер қойылды. Коменданттық сағат 23.00-ден таңғы 7.00-ге дейін енгізілді.
5 қаңтардан бастап ТЖ режимін сақтамаған 289 әкімшілік құқықбұзушылық анықталды. Мамандандырылған әкімшілік сотта 7 азамат ескерту алды, 28 адамға айыппұл салынды, 186 адам әкімшілік қамауға алынды.
Кеше полиция қызметкерлері жаппай тәртіпсіздік кезінде әскери КамАЗ-ды айдап әкеткен ер адамды ұстады. Қызылорда облыстық полиция департаменті баспасөз қызметінің мәліметінше, бұл оқиға 5 қаңтарда болған.
Айыпталушы көлік артына отырып, жедел басқару орталығының бейнебақылау камераларын сындырған. Әскери көлікпен жергілікті Полиция қызметі басқармасы ғимаратының қоршауын бұзып, қарақшыларға ғимаратқа іргелес аумаққа кіруге мүмкіндік жасаған. Ал өзі оқиға орнынан қашып кеткен.
Бұл дерекке қатысты ҚР Қылмыстық кодексінің 272-бабы 2-бөлігіне сәйкес сотқа дейінгі тергеу басталды. Күдіктіге қатысты күзет арқылы ұстау түріндегі бұлтартпау шарасы тағайындалды.

Қазақстан өңірлерінде блокбекеттер әзірше алынбайды

<a href="https://kyzylorda-news.kz/">Kyzylorda-news.kz.</a> ҰҚШҰ бітімгершілік күштерінің Қазақстандағы бөлімшелері тұрақты орналасу пункттеріне оралу үшін техниканы дайындауға кірісті, деп хабарлады <a href="https://sputnik.kz/">Sputnik Қазақстан.</a>
<blockquote>
 “ҰҚШҰ Ұжымдық бітімгершілік күштерінің қолбасшылығы мен Қазақстан Республикасы қорғаныс министрлігі әзірлеген жоспарға сәйкес бітімгершілік күштері күзететін әлеуметтік маңызы бар нысандарды елдің құқық қорғау органдарына тапсыру басталды”, – делінген хабарламада.
</blockquote>
Бітімгерлер Ресей әуе ғарыш күштерінің ұшақтарына техника мен материалдарды тиеуге және тұрақты орналасу пункттеріне оралуға дайындалып жатыр.
ҰҚШҰ бітімгершілік күштерін өз еліне қайтару қазақстандық тараппен бірлесіп ұйымдастырылатыны аталып өтті.
Бейсенбі, 13 қаңтарда ҰҚШҰ-ның алғашқы бітімгершілік күштері Қазақстаннан кетуге дайындалуда. Қырғызстанның әскери контингентін шығару басталды.
Бұған дейін Қазақстаннан ҰҚШҰ бітімгершілік күштерін шығару 10 күннен аспайтыны хабарланған болатын.

ҰҚШҰ бітімгерлері күзетілетін нысандарды тапсыра бастады

<a href="https://kyzylorda-news.kz/">Kyzylorda-news.kz.</a> Елордада Парламент Мәжілісінің жалпы оты­р­ы­­сы өтіп, онда Мемлекет басшысы Қасым-Жомарт Тоқаев саяси және әлеуметтік-экономикалық салалардағы өзекті мәселелерді шешу бойынша ауқымды баяндама жасады және жаңа Үкіметке нақты тапсырмалар жүктеді.
Президенттің мәлімдемесі кешегі қайғылы оқиғалардан есін енді ғана жиған халқымыздың ертеңге деген сенімін нығайтып, болашаққа деген үмітін жалғағандай болды. Мемлекет басшысының мәлімдемесінде нақтыланған міндеттер орын алған бірқатар мәселелерді шешуге бағытталғанын байқадық. Әсіресе Президенттің жастарға көңіл бөлуі бізді қатты қуантты. Ұлттың болашағы, мемлекеттің ертеңі біз секілді жастардың қолында екені сөзсіз. Олай болса олардың білім алуына, өмір сүруіне қамқорлық таныту – аға ұрпақтың бір парызы. Осы ретте Президент өзінің жастарға деген ағалық қамқорлығын көрсетуде деп ойлаймын. Әсіресе жас­тар арасындағы жұмыссыздықты жоюға назар аударуы, олардың бастамаларын қолдау төңірегінде айтылған міндеттер менің қатарластарымды, яғни, жастар өкілдерін қанаттандырғаны белгілі.
«Жұмыссыздық деңгейін түсіруге ерекше назар аудару керек. Әсіресе жастар арасында. Жоғары оқу орындарының, колледждердің түлектері, әсіресе, білімі жоқ жастардың тұрақты жұмысқа орналасу мүмкіндігі әрдайым бола бермейді. Мұны біз жақсы білеміз. Кездейсоқ нәпақамен күн көріп жүр. Кейбіреулері табыс іздеп жүріп заңнан аттап кетуі мүмкін», – деген Мемлекет басшысы жастардың бас­тамаларына қолдау білдірудің жаңа тетіктері керек екенін атады. Сонымен қатар жастардың бастамасына берілетін гранттар құны 400 АЕК-ке дейін артатынын айтты.
Президент «Үкіметке «Жастар іс-тәжірибесі» және «Алғашқы жұмыс орны» жобаларына қатысудың мерзімін созып, еңбекақысын көтеру мүмкіндігін қарастыруды тапсырамын. Халықтың әлеуметтік осал тобындағы жастардың іскерлік бастамаларын іске асыруға жағдай жасау маңызды. Үкіметке тиісті гранттардың мөлшерін 2 есе – 400 айлық есептік көрсеткішке дейін көбейту жүктеледі», – деді.
Сондай-ақ, Президент 2025 жылға қарай елімізде беделді шетелдік бес жоғары оқу орнының филиалын ашуды тапсырды және оның екеуі техникалық бағытта болатынын да айтты. Бұл білімге құштар жастардың талабын шыңдауға, елде білікті жастардың көбеюіне үлкен септігін тигізетін оң бастама екені белгілі.
Мемлекет басшысы Қасым-Жомарт Тоқаев Мәжіліс отырысында жастардың әскери борышын өтеуден қашатынын сынға алды.
Мемлекет басшысы өз сөзінде «Баса назар аударуды қажет ететін тағы бір мәселе бар. Көптеген жас азаматымыз Қарулы күштер қатарына әскери борышын өтеуден қашады. Әскери билетке ие болу жастардың мақтанышын тудырмайды және Отанға қызмет етудің белгісі саналмайтын болды. Армия қатарында қызмет ету, құқық қорғау саласында жұмыс істеу – айрықша миссия. Бұл Отан үшін жанын салуға бел буған азаматтардың саналы таңдауы. Жастарымызды әскери борышын өтеуге қалай ынталандыруға болатынын бүкіл қоғам болып ойластыруымыз керек» деген болатын.
Президенттің бұл сыны өте орынды. Әскерге бармайтын, әскери борышын өтеуден қашатын жас­тардан отансүйгіштік, елжандылық әрекет күтудің өзі қисынсыз деп ойлаймын. Сондықтан жастарға, қатарластарыма айтылған бұл сынды дұрыс қабылдаймын әрі сынды түзетуге атсалысуымыз керек деп білемін. Өйткені кешегідей ел басына күн туған қиын сәтте өз елімізді, жерімізді өзімізден басқа ешкім қорғамайды, өзімізден басқа ешкімнің жаны ашымасы анық.
Мағжан ЕРӘЛИЕВ,
«Абзал және К» толық серіктестігі директоры, 
«Сыр үміті»жастар қауымдастығының төрағасы

Жастарға деген қамқорлық алға жетелейді

<a href="https://kyzylorda-news.kz/">Kyzylorda-news.kz.</a>&nbsp;Коронавирустың «омикрон» штамын жұқтыру қарт адамдар мен вакцина алмаған азаматтар үшін қауіпті. Бұл туралы Дүниежүзілік денсаулық сақтау ұйымының мамандары мәлімдеді. Қазіргі уақытта жаңа штамды жұқтырғандар арасында егде жастағы адамдардың өлім деңгейінің артқаны байқалған, деп хабарлайды <a href="https://stan.kz/">Stan.kz</a>.
Жаңа штамды жұқтырып, қаза тапқандардың көпшілігінде иммунитет әлсіз және&nbsp;созылмалы аурулары болған. Ал вакцина алғандар коронавирусты жеңіл өткереді. ДДСҰ мамандары омикронның&nbsp;дельта штамымен салыстырғанда қауіп деңгейі төмен болғанымен, жеңіл қабылдауға болмайтынын айтады.
<blockquote>
 «Омикрон&nbsp;жұқтырғандар арасында жеңіл өткенімен, оның қауіпті вирус екенін ұмытпауымыз керек. Әсіресе&nbsp;вакцина алмағандар үшін. Вируспен қатар өмір сүру өлім деңгейінің көптігіне көз жұмып қарау дегенді білдірмейді. Бұл инфекцияның таралуына жол бермеуіміз керек», –&nbsp;деді ДДСҰ директоры Тедрос Адхан Гебрейесус.
</blockquote>

Қазақстан және Қызылорда облысының жаңалықтары