Kyzylorda-news.kz. Биыл ҚР Конституциясының қабылданғанына – 27 жыл толды.
Маусым айының 5-і күні жалпыхалықтық референдумда Ата Заңның 33-бабына 16 тармақ бойынша өзгерістер мен толықтырулар енгізіліп, толық күшіне енген болатын. Бүгін атаулы күнге орай Өңірлік коммуникациялар қызметінде өткен баспасөз конференциясында Қызылорда облысының Әділет департаменті басшысының орынбасары Әлмеш Баукен және Қызылорда облысы жеке сот орындаушылар Өңірлік палатасының басшысы Кирилл Десятниченко Ата заңның негізгі қағидаларына тоқталып, заң аясында атқарылған жұмыстарды баяндап өтті.
<blockquote>
 «Биыл Мемлекет басшысы ҚР Конституциясына өзгерістер мен толықтырулар енгізу бойынша арнайы Жарлыққа қол қойған болатын. Соның негізінде республикалық деңгейде Орталық сайлау комиссияның құрамымен өңірлерді аралап, құқықтық түсіндірме жұмыстары жүргізілді. Жаңадан енгізілген Конституцияда жоғары лауазымды тұлғаларды тағайындау, Конституциялық сот құру туралы арнайы заң қабылдады. Бұдан басқа, «ҚР Әкімшілік құқық бұзушылықтар туралы Кодексіне өзгерістер мен толықтырулар енгізу туралы» заң жобасы да әзірленуде. Аталған заңдарды осы жылдың соңына дейін қабылдау межеленген», – деді облыстық Әділет департаменті басшысының орынбасары Әлмеш Баукен.
 «ҚР жеке сот орындаушылар республикалық палатасы әлемдегі ең жас институттардың бірі. Қазіргі таңда республика аумағындағы барлық облыстарында жеке сот орындаушылар жұмыс істеуде. Жеке сот орындаушылардың негізгі мақсаты – сот шешімдерін, сот қаулыларын және басқа да құжаттарды орындау болып табылады. Бүгінде аймақ бойынша 80-ге жуық жеке сот орындаушы қызметкер бар. Осы ретте жыл басынан бері барлығы 267 872 атқарушы құжаты орындалып, 73 млрд теңгеден астам қаржы тиісті заң арқылы өндірілді. Бұл былтырғы жылмен салыстырғанда 44 мың атқарушы құжатқа артық орындалды», – деді Қызылорда облысы жеке сот орындаушылар Өңірлік палатасының басшысы Кирилл Десятниченко.
</blockquote>
<img src="https://kyzylorda-news.kz/wp-content/uploads/2022/08/fb_img_1661600922719.jpg" alt="" />

Әлмеш Баукен: Заңды осы жылдың соңына дейін қабылдау межеленген

Kyzylorda-news.kz. Бүгін ҚР Премьер-Министрі Әлихан Смайыловтың төрағалығымен Үкімет отырысы өтті.
Селекторлық жиында Қазақстанның 2023-2027 жылдарға арналған әлеуметтік-экономикалық даму болжамы және 2023-2025 жылдарға арналған республикалық бюджетті қалыптастыру жөніндегі заң жобалары қаралды. Сондай-ақ, қант саласын дамыту туралы айтылды.
Отырысқа министрлер мен өңір әкімдері қатысып, жауапты сала басшылары баяндама жасады.
Үкімет басшысы экономиканың нақты секторында өңдеу өнеркәсібін дамыту, бизнесті қолдау, көлік инфрақұрылымын дамыту және газдандыру басым бағыттар екенін жеткізді. Селекторлық жиыннан кейін облыс әкімі Нұрлыбек Нәлібаев өнеркәсіп өндірісі көлемін көбейту, экономикалық өсімді қалыптастыру бағытында қала, аудан әкімдері мен басқарма басшыларына бірқатар тапсырмалар жүктеді.
<blockquote>
 «Жыл қорытындысымен өнеркәсіп өндірісінде кем дегенде 1,0 пайыздық өсімді қамтамасыз ету бойынша шаралар қабылдауды тапсырамын. Ол үшін облыс төңірегінде жұмыс жасап тұрған кәсіпорындарға өнім шығаруды арттыру бойынша қолданыстағы заң аясында жәрдемдесу керек. Сонымен бірге шыны зауытында өнім шығаруды жеделдету және жаңа өндіріс көздерін ашу бағытында өңірге инвестиция тарту жұмыстарын жандандыру қажет», – деді Нұрлыбек Нәлібаев.
</blockquote>
2021 жылғы Қызылорда облысының Жалпы өңірлік өнімінің көлемі 1 трлн. 926 млрд. теңгеге жетті немесе 2020 жылмен салыстырғанда 2,2 пайыздық өсім қамтамасыз етілді. Ал, республиканың жалпы ішкі өнімі 4,3 пайызға артты. Осы ретте, жалпы өңірлік өнімнің ең көп үлесі, яғни 29,6 пайызы өнеркәсіп өндірісіне тиесілі.
Аймақ басшысы облыстық экономика және қаржы басқармасына Қызылорда қаласы мен аудандар бюджетіне берілетін жалпы сипаттағы трансферттер көлемін айқындау бойынша қала және аудандар бөлінісінде келісу кестесін әзірлеуді, ал, Қызылорда қаласы мен аудандар әкімдеріне бюджет заңнамаларына сәйкес бекітілген нормалар мен тарифтер негізінде өз бюджет шығыстарының есептемелерін сапалы түрде ұсынуды тапсырды. Биыл облыста 3,5 гектар жерге қант қызылшасы тәжірибе есебінде егілді. Тәжірибе есебінде егілген 3,5 гектар қант қызылшасынан осы жылы қанттылығы жоғары стандартқа сай сапалы өнім алынған жағдайда, келер жылдан бастап аймағымызда қант қызылшасының егіс көлемін көбейтеуге және өңдеу кәсіпорындарын салуға тиісті шаралар қабылданбақ.
Жиын соңында облыс әкімі тиісті сала басшыларына жаңа оқу жылына санаулы күн қалғанын ескертіп, дайындық жұмыстарын пысықтады.
<blockquote>
 «Сабақ процесі еш кедергісіз басталуы керек. Жаңадан пайдалануға берілетін мектептердің ашылуын жоғары деңгейде ұйымдастыру қажет. Мектеп құрылысы сапалы жүргізіліп, құрал-жабдықтары стандартқа сай болуын қадағалаңыздар. Бұл жұмыстарға асығыстық танытып, салғырт қарауға болмайды. Сапаға мән беру керек. Жылу маусымына барлық әлеуметтік және жеке сектордағы нысандар дайын болу керек. Осы жұмыстарды қатаң бақылауға алуды тапсырамын. Көмекке мұқтаж отбасының балаларына қажетті барлық қолдау шараларын жүзеге асырыңыздар. Қажет болған жағдайда қайырымдылық шараларына кәсіпкерлерді тарту жолдарын қарастырыңыздар. Шын мұқтаж отбасының балаларына қолдау көрсетуге міндеттіміз», – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2022/08/fb_img_1661600604893.jpg" alt="" />

Нұрлыбек Нәлібаев: Шыны зауытында өнім шығаруды жеделдету қажет

Kyzylorda-news.kz. Бүгін Достық үйінде 30 тамыз – ҚР Конституциясы күніне орай «Конституция – кемел келешектің кепілі» тақырыбында дөңгелек үстел өтті.
Қызылорда облыстық Қоғамдық даму басқармасының «Қоғамдық келісім» КММ және Дін мәселелерін зерттеу орталығының ұйымдастыруымен өткен шараға облыстық Қоғамдық келісім кеңесінің, ғылыми сарапшылық тобы, этномәдени бірлестіктерінің жетекшілері мен белсенділері және дін, БАҚ өкілдері қатысты.
Дөңгелек үстелдің мақсаты – Ата заң баптарындағы руханият, адам құқықтары мен бостандықтарының кепілі, қазақстандық патриотизмді одан әрі нығайту мәселелері бойынша ой пікірлерді ортаға салу болып табылады.
Шара модераторы «Қоғамдық келісім» КММ директоры Бақытжан Камалов алғы сөзінде «Еліміздің Ата заңы уақыт сынынан сүрінбей өтті. Оның негізгі қағидалары барлық халықаралық стандарттарға сай келіп, қоғам мен мемлекетті дамытудың ең жетілдірілген үрдістерімен үйлесім тапты. Бүгінгі күні татулық пен бейбітшіліктің мекені болып табылатын кең байтақ елімізде жүздеген ұлттар тұрады. Олар достық туын жоғары көтере біліп, ел экономикасын өркендетуге орасан еңбек сіңіріп келеді», -деп айтып өтті.
Шарада ҚР Президенті жанындағы мемлекеттік басқару Академиясының профессоры, заң ғылымдарының кандидаты Ақзада Мадалиева «Конституция – мемлекетіміздің тұрақты дамуының кепілі» тақырыбында баяндама жасады.
Профессор Тәуелсіздігіміздің тірегіне айналған Ата заң – мемлекет пен қоғамда орын алып отырған барлық саяси-экономикалық, әлеуметтік реформалардың ілгері басуына, дамудың қайнар көзіне айналғандығын тілге тиек етті.
Ал «Ата заң – елдік тұғыры» тақырыбында «Қоғамдық келісім» КММ бөлім басшысы, философия ғылымдарының докторы Дәулет Омаров Халықта өткенді білмей, болашақты болжау қиын деген нақыл сөз бар. Конституция қабылданғаннан бергі уақыттағы тарихи өлшемдер біз үшін бүкіл өткен жолымызды таразылап, ой елегінен өткізуге толық мүмкіндік беретін белгілі бір үлкен кезең. Ширек ғасырлық тарихы бар ата Заңымыз кез келген құқықтық актіден жоғары тұратын басты Заң. Ол ұлттық саяси-құқықтық жүйенің өзегі, егемендіктің құқықтық негізі, ең жоғары заңдық күшке ие құжат екендігін атап өтті.
Шара соңы пікір алмасуға ұласты.
<img src="https://kyzylorda-news.kz/wp-content/uploads/2022/08/fb_img_1661599921992.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661599941738.jpg" alt="" />

Конституция &#8211; кемел келешектің кепілі

Kyzylorda-news.kz. Қазіргі таңда Жалағаш ауданының диқандары алқаптардан өнімін жинауға кірісті.
Бүгін ауданға қарасты Ақсу ауылындағы «Сәрке батыр» жауапкершілігі шектеулі серіктестігінің егін алқаптарында аудан әкімі Асқарбек Есжановтың қатысуымен егінге алғашқы орақ түсті.
Егінге алғаш орақ түспестен бұрын аудандық ауыл шаруашылығы бөлімінің басшысы Марат Қалниязов арнайы дайындалған стенд бойынша ауданның егіншілік саласы бойынша көрсеткіштері мен атқарылып жатқан жұмыстар туралы мәліметтермен таныстырды.
«Ақбостай» учаскесінде аудан әкімі Асқарбек Есжанов, аудандық ардагерлер кеңесінің төрағасы Садық Әлиев дихандарға сәттілік тілеп, егінге орақ салу рәсімінің лентасын қиды.
Аудан ардагері Тұрмағанбет Сығайбаев ақ батасын беріп, өнімнің бітік шығуын тіледі. «Сәрке батыр» серіктестігінің диқандары былтыр күріштің әр гектарынан 60,0 центнерден өнім алды. Шаруашылық тек күріш егіп қана қоймай мал азығындық дақыл – жоңышқа да өндіріп келеді. Биылғы жылы 796 гектар күріш, 244 гектар жаңа жоңышқа, 289 гектар ескі жоңышқа, 56 гектар бидай, 146 гектар мақсары орналастырды. Құрылымда 115 адам тұрақты жұмыс істейді. Серіктестік жыл сайын жоғары өнім алып, аудан, облыс көлемінде биік белестерден көрініп келеді.
Айта кетейік, Жалағаш ауданы бойынша биыл 35486,5 гектар жерге ауыл шаруашылығы дақылдары орналастырылды. Негізгі дақыл – күріштің көлемі 18501 гектар. Бүгінгі таңда аудан бойынша егін жинау науқанына қатысатын 271 комбайн, 118 жатка, 495 трактор, 56 жүк көлігі және 163 трактор тіркемесі толықтай жөндеуден өткізіліп, егіс алқаптарында жұмыс атқаруда.
<img src="https://kyzylorda-news.kz/wp-content/uploads/2022/08/fb_img_1661595368423.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661595374093.jpg" alt="" />

Жалағаш ауданында егінге алғашқы орақ түсті

Kyzylorda-news.kz. Аймақ басшысының тапсырмасына сәйкес облыс әкімінің орынбасары Мархабат Жайымбетов жұмыс сапарымен Қазалы ауданында болып, бірқатар құрылыс жұмыстарының барысымен танысты.
Мархабат Жайымбетұлы алдымен аудан әкімі Мұхтар Оразбаевпен бірге Ү.Түктібаев ауылы тұрғындарының қуанышымен бөлісіп, жаңа спорт кешенінің іргетасын қалады.
Мұнан соң «Қарлаң» көпірі мен Қазалы қаласындағы 140 орындық балабақша құрылысының басына барып, мердігермен жолығып, құрылыс жұмыстарын сапалы әрі уақытылы аяқтау керектігін ескертті.
Қазіргі таңда Қазалы ауданында 3 бірдей елді мекенді газдандыру жұмыстары қарқынды жүргізілуде. Құрылыс жұмыстарының барысымен танысу үшін Мархабат Жайымбетов арнайы Басықара ауылына барып, мердігерлермен кездесті.
Кездесуде тиісті сала басшылары Басықара, Қ.Пірімов және Жалаңтөс батыр ауылы жақын күндері көгілдір отынға қосылатынын жеткізді.
Облыс әкімінің орынбасары Қазалы ауданына сапары кезінде Басықара ауылына кіре беріс көпір, Әйтеке би кентіндегі автоматтандырылған электронды емтихан алаңын абаттандыру мен 250 орындық мектеп құрылысымен де танысты. Сонымен қатар, Бекарыстан би мен Майдакөл елді мекендерінің аралығындағы жолды асфальттау мен Қазалы қаласындағы 10 көшені жарықтандыру жұмыстарының барысын көрді.
Мұнан соң Әйтеке би кентіндегі 600 орындық мәдениет үйі мен 6 көпқабатты тұрғын үйлердің абаттандыру жұмыстарымен де танысты. Құрылысы аяқталған мәдениет үйінде Мархабат Жайымбетұлы мердігер мекеменің басшысына нысанды тез арада пайдалануға беру қажеттігін айтты.
Ал, Ерімбет Көлдейбекұлы көшесіндегі тұрғын үйлердің ауласын абаттандыру жұмыстары өте баяу жүргізіліп жатқанын сынға алды. Мердігер мекеме басшысына жұмысты ширатып, уақытылы аяқтау қажеттігін айтты. Құрылыс жұмыстарының сапасын бақылауды тиісті сала басшыларына тапсырды.
<img src="https://kyzylorda-news.kz/wp-content/uploads/2022/08/fb_img_1661592642437.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661592645937.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661592649031.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661592655028.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661592657949.jpg" alt="" />
<img src="https://kyzylorda-news.kz/wp-content/uploads/2022/08/fb_img_1661592674397.jpg" alt="" />

Мархабат Жайымбетов Қазалы ауданындағы құрылыс жұмыстарымен танысты

<a href="https://kyzylorda-news.kz/">Kyzylorda-news.kz.</a>&nbsp;Қазалы ауданына қарасты Ү.Түктібаев ауылында жаңа спорт кешенінің іргетасы қаланды.
Жаңа нысанның іргетасын қалау рәсіміне Қызылорда облысы әкімінің орынбасары Мархабат Жайымбетов, аудан әкімі Мұхтар Оразбаев пен бірқатар облыстық басқарма басшылары және ауылдың ақсақалдары қатысты.
Салтанатты шарада облыс әкімінің орынбасары Мархабат Жайымбетұлы бой көтеріп жатқан нысанның тұрғындар үшін аса пайдалы екенін айта отырып, салауатты өмір салтына бейімделуге септігін тигізетініне сенім білдірді.
Жасөспірімдер қамы үшін салынып жатқан кешеннің жалпы құны 281 млн. теңгені құрайды. Мұнда ауыл балалары спорттың баскетбол, волейбол және кіші футбол түрлерін ойнай алады. Спорттық кешен келісім-шарт бойынша келесі жылдың басында аяқталады. Дегенмен мердігер мекеме басшылары құрылыс жұмыстарын екі ай көлемінде бітіріп, ел игілігіне пайдалануға беруді жоспарлап отыр.
Айта кетейік, бұған дейін ауданның Қ.Пірімов атындағы ауылда спорт кешені салынатынын хабарлаған болатынбыз. Бүгінгі таңда құрылысқа қажетті қаржы бөлінген. Бұл спорт кешенінде еркін, грек-рим күресі, самбо, дзюдо, бокс үйірмелеріне арналған залдар қарастырылған. Сонымен қатар,киіну, жуыну, медициналық, жаттықтырушылар, құрал-жабдықтар сақтау, техникалық бөлмелермен жабдықталады.
<img src="https://kyzylorda-news.kz/wp-content/uploads/2022/08/300981966_3440158269538429_3748147687393809419_n.jpg" alt="" />
<img src="https://kyzylorda-news.kz/wp-content/uploads/2022/08/300937597_3440158386205084_399840739998066810_n.jpg" alt="" />

Қазалыда жаңа спорт кешенінің іргетасы қаланды

<a href="https://kyzylorda-news.kz/">Kyzylorda-news.kz.</a> Арал ауданы орталығанан шалғай орналасқан Құланды ауылдық округіне қарасты Ақбасты елді мекеніне ауыз су құбыры тартылуда. Өтпелі негізде жүзеге асырылатын жоба арқылы ауыл тұрғындары таза ауыз сумен қамтылатын болады.
Аудан әкімі Серік Сермағамбетов ауылдық округтерге жасаған сапары барысында құрылыс жүргізіліп жатқан аймаққа барып, жұмыс барысын көрді. Жауапты мамандармен мердігер мекеме өкілдеріне барлық жұмыстардың талапқа сай орындалуын тапсырды.
Қазіргі таңда мердігер «Сапа Құрылыс» мекемесі тарапынан барлығы 117 шақырым болатын құбыр желісінің 85 шақырымы қазылған. Оның 61 шақырымына құбыр желісі салынған. Мұнымен бірге ауылішілік су жүйесін жүргізу жұмыстарыда басталып кеткен. Елді мекен ішіне 8 шақырым құбыр тартылып, барлық тұрғын үйлерге кіргізіліп, су есептегіш құрылғылары орнатылатын болады.
Айта кетейік, аудандағы Көнту елді мекенін ауыз су желісін жүргізу үшін аудандық бюджеттен 13,4 мың теңге қаржы бөлініп, бүгінгі күні мердігер мекеме тарапынан елді мекен ішіне су құбырларын жүргізу жұмыстары аяқталып, ауыз су желісі тұрғын үйлерге кіргізілуде.
Айта кетейік, өткен жылы орын алған қуаңшылықтың ауданының ауылшаруашылығы саласына келтірген зияны орасан зор болды. Биылғы жылы осы шаралардың алдын алу мақсатында су шаруашылығына барлығы 568,2 млн. теңге қаржы қаралып, өз деңгейінде тиісті шаралар атқарылуда.&nbsp; Атап айтар болсақ, 176,1 млн. теңгеге Тоғыт, Ащықұдық, Сульфат-2, Боранбай, Мергенсай, Қазанғап Ата, Ақбай, Арал-1 ұнғымаларын қазу және 392,1 млн. теңгеге Жыланды, Ералы, Қулы, Ақшақыз, Қайролла, Нұралы жарма каналдарын тазарту жұмыстары жүргізілуде.
<img src="https://kyzylorda-news.kz/wp-content/uploads/2022/08/whatsapp-image-2022-08-27-at-12.16.18-1.jpeg" alt="" />
<img src="https://kyzylorda-news.kz/wp-content/uploads/2022/08/whatsapp-image-2022-08-27-at-12.16.18-2.jpeg" alt="" />

Ақбастыға ауыз су құбыры тартылуда

<a href="https://kyzylorda-news.kz/">Kyzylorda-news.kz.</a> ҚР Денсаулық сақтау министрлігінің алқа отырысы барысында денсаулық сақтау министрі Ажар Ғиният аймақтарға жұмыс сапары және халықпен кездесу, азаматтарды қабылдау және ведомствоға келіп түскен арыз-шағымдарды ескере отырып, медициналық көмек сапасының стандарттарын өрескел бұзатын бірқатар аймақтар мен медициналық ұйымдардың жұмысын қатаң сынға алды.
<blockquote>
 ​Жыл сайын медициналық көмек сапасына қатысты 5,6 мыңнан аса арыз тіркеледі. Биыл бірінші жартыжылдықта осындай 2,8 мың арыз-шағым келіп түскен. Бұл ретте 30%-дан аса жағдайда фактілер нақтыланады. Өкінішке қарай, жағдай жақсы жағына өзгеріп жатқан жоқ. Бірқатар өңірлерде медицина қызметкерлерінің өз қызметтік міндеттеріне орындауға салғырт қарауы және медициналық ұйымдардың менеджементі нашар ұйымдастырылғаны байқалады», – деп атап өтті Денсаулық сақтау министрлігінің басшысы өз баяндамасында.
</blockquote>
​Министр медициналық көмек көрсету ережелері мен стандарттарын бұзу жаппай сипат алып бара жатқанына назар аударды. Ағымдағы жылдың 6 айында осы тектес 500-ден аса жағдай тіркелген. Сондай-ақ Медициналық және фармацевтикалық бақылау комитеті көбінесе жағымсыз жайттарға әкеліп соғатын клиникалық хаттамалардан негізсіз ауытқуға қатысты 1600-ден аса фактіні анықтады.
<blockquote>
 ​«Ана өлімі жағдайларын тексеру де стандарттардың сақталамайтынын көрсетеді, себебі аналар өлімінің құрылымын сараласақ, 73% – бұл басқарылатын, яғни әрекет-амал жасауға болатын себептер, 27% өлім жағдайы ғана ауыр соматикалық аурулардың салдарынан болған», – деп атап өтті А.Ғиният.
</blockquote>
​Министр ана өлімі бойынша ахуал мәз емес өңірлердің рейтингінде Қарағанды, Павлодар, Батыс Қазақстан, Қызылорда, Шығыс Қазақстан облыстары мен Алматы қаласын атады.
​Ол Акушерлік, гинеокология және перинатология ғылыми орталығында биыл 3 рет ана өліміне жол берілгенін «сорақы жағдай» деп атады. Сарапшылар барлық жағдайда да диагностика кеш жасалғанын, қауіп-қатер мен емдеу тактикасы дұрыс бағаланбағанын нұсқады. Салдарынан өмірі үшін маңызды ағза мүшелері қайтымсыз өзгеріске ұшырап, соңы өліммен аяқталғанын айтты министр. Акушерлік, гинекология және перинатология ғылыми орталығының басшысы қызметінен босатылды.
Амбулатория мен стационар деңгейінде науқастың жай-күйін жете бағаламау, медициналық ұйымдар арасындағы сабақтастықтың жоқтығы салдарынан өлім жағдайына алып кеткен осындай шулы жайттар Жамбыл, Қызылорда, Түркістан облыстарында да орын алғанын мысалға келтірді Ажар Ғиният.
<blockquote>
 ​«Әріптестер, мұндай сорақы жайттар бүкіл өңірдегі жұмысты жоққа шығарады әрі денсаулық сақтау саласына нұқсан келтіреді», – деп ескертті ведомство басшысы.
</blockquote>
​Мәселен, министр атап өткеніндей, Комитетке келіп түскен орынды шағымдар бойынша аймақтарды саралау нәтижесінде денсаулық сақтау саласындағы ахуал мәз емес 6 аймақ анықталды. Олар келіп түскен шағымдардың 59% нақтыланған Павлодар облысы (№1қалалық аурухана, Екібастұз қалалық ауруханасы, Павлодар қаласындағы №3 емхана). Одан кейінгі шағым көп түсетін аймақтар: Алматы облысы (Іле, Талғар ауданының орталық ауруханасы, Қарасай ауданындағы ауданаралық көпбейінді аурухана) – 56,3%, Жамбыл облысы (Байзақ, Жамбыл аудандық орталық ауруханасы, №5, №8 қалалық емханалар, Шу қаласының емханасы) – 51%, Қызылорда облысы (Көпбейінді қалалық аурухана, Шиелі және Жаңақорғандағы ауданаралық аурухана, №3 қалалық аурухана) – 44,4%, Алматы қаласы (№4 қалалық аурухана) – 35,7%, Маңғыстау облысы (Бейнеу аудандық орталық ауруханасы) – 31,3%.
​Әлеуметтік медициналық сақтандыру қорының 1406 Бірыңғай байланыс орталығы алғашқы жартыжылдықта халықтан денсаулық сақтау мәселелері бойынша 400 мыңнан аса арыз-шағым қабылдады. Бұл орайда ТМККК мен МӘМС шеңберіндегі медициналық қызметке қатысты шағым 1,7 есе – 6,5 мыңңан 11,1 мыңға дейін өскен. Мәселен, 2022 жылдың 1 жартыжылдығында Әлеуметтік медициналық сақтандыру қорына 11 мыңнан аса адам медициналық қызметтің төмен сапасына, медициналық қызмет көрсетуден, дәрі-дәрмекпен қамтамасыз етуден бас тартуға қатысты шағым түсірген. Бұл халық арасында медицина қызметінің сапасына көңілтолмаушылық ұлғайғанын, әрі жұртшылықтың бұл сыны орынды екенін білдіреді.
​Шағымдардың түп себебі медициналық көмектің қолжетімділігін қамтамасыз етуде проблема бар екенін айқындап берді – мұндай шағымдардың үлесі 26% құрады (2021 ж. – 20,6%). Медициналық қызмет сапасына қатысты шағымдар 23,2% (2021 ж. – 38%), медициналық көмекті ұзақ күтуге қатысты шағым 8,5% (2021 ж. – 8,4%) құрады.
<blockquote>
 ​«Медициналық қызметтің сапасына ықпал етуші құрал болуға тиіс Әлеуметтік медициналық сақтандыру қоры мониторингінің рөліне айрықша тоқталғым келеді. Жалпы қаржыландырудан алынатын соманың өскеніне қарамастан, 2021 жылы қор сарапшылары 25,7 млрд теңгеге 1,1 млн олқылықтарды әшкереледі. Жалпы алғанда, Әлеуметтік медсақтандыру қорының қаржылық санцияларының тиімділігі төмен екені байқалады. Медициналық қызметті тиісті деңгейде көрсетпейтін өнім берушілерге қатысты ықпал ету шараларын қатаңдату керек», – деп мәлімдеді А.Ғиният.​
</blockquote>
Жыл сайын бюджеттің ұлғаятынына қарамастан, министрдің айтуынша, дәрі-дәрмекпен қамтамасыз ету бағытында да түрлі бұзушылық фактілері анықталып жатыр. Мәселен, 2021 жылы Комитет осындай 28 фактіні анықтады. 72 жауапты тұлға әкімшілік жауапкершілікке тартылып, 10 млн теңгеден аса айыппұл салынды.
​2022 жылдың бірінші жартыжылдығынды дәрі-дәрмекпен қамтамасыз ету бойынша осындай 17 бұзушылық тіркеліп, 2,3 млн теңгеден аса айыппұл салынды.
​«Шағымдардың 80%-ына медицина қызметкерлерінің, медицина ұйымдары басшыларының жұртпен әлсіз коммуникациясы себеп болып отыр. Пациенттерді қолдау қызметінің жұмысын медицина ұйымының басшылары да, денсаулық сақтау басқармалары да тиісті деңгейде қадағаламайды», – деді Денсаулық сақтау министрлігінің басшысы.
​600-ден аса қызметкерден тұратын пациенттерді қолдау және ішкі сараптама тобы пациенттердің мәселесін «дәл қазір және дәл осы жерде» қағидатымен кезек күттірмей шешуге тиіс еді. Алайда медицина қызметкерлеріне шағым толастар емес.Шағымның 90% жоғары тұрған инстанцияға келіп түседі, демек халықтың пациенттерді қолдау қызметі мен медицина ұйымдарының және денсаулық сақтау басқармаларының басшыларына сенуден қалғанын білдіреді деп айтпасқа амал қалмады деп қосты А.Ғиният.
​Министр, бірінші кезекте, медициналық көмектің сапасын тиімді басқару механизмдерін қолдануға аса мүдделі емес медициналық ұйым басшыларын сынға алды.
​Өңірлерде медициналық ұйымдарды аккредиттеу бойынша жұмыс дұрыс атқарылмайды. ТМККК/МӘМС өнім берушілерінің 47%-ы ғана (847-ден 401-і ғана) аккредиттелген.Клиникалар ең аз аккредиттелген аймақтар қатарында Қостанай, Солтүстік Қазақстан, Алматы, Маңғыстау, Шығыс Қазақстан облыстарын және Шымкент қаласы тұр. Аккредиттеу деңгейі небары 17%-30% аралығында.
​Министр лицензиясыз қызмет көрсету, мамандардың сертификатсыз жұмыс істеу фактілері жиі тіркелетініне назар аударды.
​Мәселен, ағымдағы жылдың 1-ші жартыжылдығында аймақтарда лицензиясыз қызмет көрсетудің 706 фактісі анықталды: 536 факт 42 Медциналық-санитариялық алғашқы көмек ұйымында және 170 факт 32 стационарда тіркелді. Мұндай жайттар көбінесе Ақмола, Қарағанды, Қостанай, Жамбыл облыстарында, Шымкент, Алматы қалаларында кездеседі.
​Сөзін қорыта келе министр жергілікті атқарушы орган өкілдерін кадрмен қамтамыз ету, медицина техникасымен жабдықтау, МСАК-тағы үздік тәжірибелерді тарату, ақпараттық жүйелерді цифрландыру мен интеграциялау процесін аяқтау секілді бірқатар өзекті мәселелерге назар аударуға шақырды.
​Сөз соңында Ажар Ғиният өңірлердің медициналық көмектің сапасы мен қолжетімділігіне қатысты әлсіз жұмысын атап, бірқатар тапсырмалар берді.
​Денсаулық сақтау басқармасы басшыларына медициналық ұйым басшыларымен бірге халықпен тұрақты кездесу ұйымдастырып, проблемалық мәселелердің шешу жөнінде хабардар ету, кадрлық құрамын тексеріп, пациенттерді қолдау қызметінің жұмысын жетілдіру, олардың жұмысын шағымды азайтуға және халықпен кері байланысты қамтамасыз етуге бағыттау, медицина ұйымдарының бірінші басшыларының аттестациясын жүргізіп, аттестация нәтижесі бойынша тиісті шаралар қабылдауға кеңес берілді.
​Алқа отырысында сондай-ақ денсаулық сақтау вице-министрлері мен ведомствоға бағынысты ұйымдардың басшылары сөз сөйледі. Олар босандыру қызметі және балалар денсаулығына қамқорлық қызметін жетілдіру, ауылдағы денсаулық сақтау деңгейін жақсарту, EHealth цифрлық денсаулық сақтау жүйесі құру және МӘМС жүйесінің тиімділігін арттыру секілді бағыттар бойынша Мемлекет басшысы тапсырмаларының орындалу барысы туралы баяндады.

Министрлік: Қызылорда облысында ана өлімі көбейген

<a href="https://kyzylorda-news.kz/">Kyzylorda-news.kz.</a> Биыл Конституцияның қабылданғанына 27 жыл! Мемлекет үшін айтулы мереке әрбір қазақстандық үшін айрықша маңызға ие. Сыр елінде де айтулы күн Н.Бекежанов атындағы қазақ музыкалық драма театрында Конституция күніне орай салтанатты шарамен әспеттелді.
Жиынға қатысқан аймақ басшысы Нұрлыбек Нәлібаев «Ата заңды ардақтау – болашаққа батыл қадам басқан әрбір азаматтың асыл парызы екенін» жеткізіп, барша Сыр жұртын Конституция күнімен құттықтады.
<blockquote>
 «Конституция – қағаз жүзіндегі құжат емес, ол – елдің, халықтың, әрбір азаматтың өмір сүру ережесі, мемлекеттіліктің іргесін бекітіп, халықаралық кеңістікте ұдайы өркендеуін қамтамасыз ететін негіз.Осы жылдың елімізге түбегейлі өзгеріс әкелгенін жақсы білесіздер. Ел Президентінің тегеурінділігімен Қазақстан дамудың жаңа жолына түсті.Наурыз айында Мемлекет басшысы Қасым-Жомарт Тоқаев ел дамуы үшін мәні зор саяси реформалар жариялады.Бұл өз ретінде елдің басты заңы – Конституцияға бірқатар өзгерістер әкелуді талап ететіні сөзсіз. Осылайша, биылғы 5 маусымда республикалық референдум өткізіліп, Қазақстан Ата Заңының 33 бабына 56 өзгерту енгізілді.Баршаңызды Конституция күнімен шын жүректен құттықтай отырып, дендеріңізге саулық, әр шаңыраққа құт-береке, ырыс-ынтымақ тілеймін! Толайым табыстарға жете беріңіздер! Тәуелсіз еліміздің іргесі берік, тұғыры нық болсын», – деді Нұрлыбек Нәлібаев.
</blockquote>
Мерекелік жиында Рәміздер мерекесінің 30 жылдығы мен мерейлі сексен жасы қатар келген Мемлекеттік Елтаңба авторы Жандарбек Мәлібеков пен асқаралы алпыс жасқа жеткен білікті дәрігер, 8000-ға жуық ота жасаған хирург, қоғам қайраткері Болатбек Баймахановқа «Қызылорда облысының Құрметті азаматы» атағын табыстады.
<blockquote>
 «Туған жеріме келіп, халықтың құрметіне бөленуден артық бақыт жоқ. Елімізге адал қызмет етуіміз керек. Байқағаным, Қызылорданың өңі өзгеріп, келбеті келісіп, жаңа заман талабына сай өніп-өсіп жатыр. Мұның бәрі туған жерге қызмет ететін азаматтардың арқасы. Сыр елі өрлей берсін, мереке құтты болсын жерлестерім», – деді Жандарбек Мәлібеков.
</blockquote>
Салтанатты іс-шараға жиналған қауым қарапайымдылықты ту еткен қос азаматқа құрмет көрсетіп, ыстық ықыласын қошеметпен білдірді.
Сондай-ақ, аймақ дамуына сүбелі үлес қосып, аянбай еткен еткен бірқатар азаматтарға Қызылорда облысы әкімдігінің Құрмет грамотасы мен Алғыс хат табысталды.
Арнайы кеште аймақтың өнер майталмандары көпшілікке мерекелік көңіл-күй сыйлады.
<img src="https://kyzylorda-news.kz/wp-content/uploads/2022/08/img-20220827-wa0026.jpg" alt="" />
<img src="https://kyzylorda-news.kz/wp-content/uploads/2022/08/img-20220827-wa0027.jpg" alt="" />

Елтаңба авторы Жандарбек Мәлібеков пен дәрігер Болатбек Баймахановқа «Қызылорда облысының Құрметті азаматы» атағы табысталды

<a href="https://kyzylorda-news.kz/">Kyzylorda-news.kz.</a>&nbsp;Аймақ басшысының тапсырмасына сәйкес облыс әкімінің орынбасары Мархабат Жайымбетов Арал ауданында болып, бірқатар құрылыс нысандарының жұмысымен танысты.
Алдымен Арал қаласындағы темір жол үстінен салынатын аспалы көпірдің орнын көрді. Мұнда жауапты мамандарға құрылысты қаржыландыру үшін бюджеттік өтінім тапсырылған министрліктермен жұмыс жасап, тиісті шаралар қабылдауды тапсырды.
Облыс әкімінің орынбасары жаңадан бой көтерген № 71 мектеп-интернатында болды. Білім ошағының аралап, мердігер мекемесінің басшысына кеткен кемшіліктерді тез арада реттеп, оқу маусымына дайын болу керектігін міндеттеді.
Жіңішкеқұм ауылдық округіне қарасты Тоқабай елді мекенінде жаңа мектеп құрылысы басталды. Айта кетейік ауылдағы № 248 орта мектеп апатты деп танылған болатын. Білім нысаны жеке кәсіпкердің демеушілігі есебінен салынуда. Мархабат Жайымбетұлы осы ауылда болып, құрылыс жұмыстарымен танысты.
Мұнан соң Сапақ ауылдық округіне қарасты Көктем елді мекеніне жүргізіліп жатқан ауыз су желісінің құрылысын көрді. Мердігер мекеме өкіліне тұрғын үйлерге су құбырын жеткізу жұмыстарын белгіленген кестеге сәйкес сапалы әрі тиянақты жүргізу қажеттігін ескертті. Ардагерлер ауылдың өсіп-өркендеуі жолында жасалып жатқан жұмыстарға ризашылығын білдіріп, игі істің басында жүрген азаматтарға батасын берді.
Мархабат Жайымбетов «Ауыл – ел бесігі» жобасы аясында жүріп жатқан Қамыстыбас елді мекеніндегі денешынықтыру және сауықтыру кешенінің жұмысымен танысты. Тиісті салалық басқарма басшылары мен мердігер мекемесіне жаңа оқу жылының басталуына санаулы күн қалғанын, сол себепті құрылыс жұмыстарын сапалы етіп, бітіруді тапсырды.
Елді мекен жанында облыстық маңызы бар «Қамыстыбас-Аманөткел» бағытындағы автомобиль жолына орташа жөндеу жұмыстары жүргізілуде. Құрылыс барысын бағамдаған облыс әкімінің орынбасары ең алдымен жол сапасына мән беру керектігін айтты.
Бұдан кейін «Аманөткел-Жаңақұрылыс» автожолы мен «Бөген-Ақлақ» бағытында жүріп жатқан жұмыс барысын да көрді. Бұл жолдың тұрғындар үшін маңызы зор. Сондықтан мердігер мекеме басшыларына жөндеу жұмыстарын талапқа сай жүргізіп, мерзімінде ел игілігіне беру қажеттігін ескертті.
Облыс әкімінің орынбасары кездесу қорытындысымен аудан көлеміндегі құрылысы жүріп жатқан барлық нысандар бойынша тапсырыс беруші облыстық басқарма басшыларына, аудан әкімдігіне, мердігер мекемелердің басшыларына құрылыстарды уақытында аяқтап, сапасына жауапкершілікпен қарауды жүктеді.
<img src="https://kyzylorda-news.kz/wp-content/uploads/2022/08/301711207_371599758494608_7292851476654378165_n.jpg" alt="" />
<img src="https://kyzylorda-news.kz/wp-content/uploads/2022/08/301833863_371599891827928_4652652908177913897_n.jpg" alt="" />
<img src="https://kyzylorda-news.kz/wp-content/uploads/2022/08/301847958_371599848494599_2419121590581842021_n.jpg" alt="" />
<img src="https://kyzylorda-news.kz/wp-content/uploads/2022/08/301947703_371599925161258_754764677826326302_n.jpg" alt="" />
<img src="https://kyzylorda-news.kz/wp-content/uploads/2022/08/302055979_371600038494580_7801981071768015139_n.jpg" alt="" />
<img src="https://kyzylorda-news.kz/wp-content/uploads/2022/08/301931416_371600001827917_620448103693028469_n.jpg" alt="" />

Мархабат Жайымбетов іссапармен Арал ауданына барды

<a href="https://kyzylorda-news.kz/">Kyzylorda-news.kz.</a>&nbsp; Қызылорда облыстық полиция департаментінде Қазақстан Республикасы Конституция күніне орай салтанатты шара өтті.
Тәртіпсіз ел болмайды, тәртіпке бас иген құл болмайды демекші, қандай мемлекет болмасын оның өсіп – өніп өркендеуінің тірегі Ата Заңы – Конституция. Конституция талаптары елдегі заң салаларының негізі, ал оның нормалары басқа заңдар үшін қағида болып есептеледі. Еліміздің заң нормаларының орындалуын қамтамасыз ету жолында еңбек етіп, ел тыныштығы мен тұрақтылығына өзіндік үлестерін қосып жүрген полицейлер Ата Заңымызды ұлықтауда.
Осы орайда, бүгін Қызылорда облысы полиция департаментінің үлкен мәжіліс залында Конституция күніне орай салтанатты жиын өтті.
Шараға ішкі істер органдарының ардагерлері, департамент басшылығы мен жеке құрам қатысты.
Салтанатты шара Қазақстан Республикасының Әнұраны ырғағымен ашылды. Мерекелік шара барысында Ішкі істер министрі полиция генерал-лейтенанты Ахметжанов Марат Мұратұлының мерекелік жедел хаты оқылды.
Ішкі істер министрінің бұйрығымен 18 қызметкер марапатталып, мерзімінен бұрын 3 қызметкер «подполковник» шенін, 2 қызметкер бір саты жоғары «подполковник» шенін алды. Сондай-ақ «Құқық тәртібін қамтамасыз етуге қосқан үлесі үшін» медалімен 2 қызметкер, «Ішкі істер органдарының үздігі» төсбелгісімен 2 қызметкер марапатталды.
Департамент бастығы полиция полковнигі Мұхтар Қожабаев ардагерлер мен қызметкерлерді айтулы мерекемен құттықтады.
<blockquote>
 «Ата Заңымыз – тәуелсіз еліміздің алтын қазығы, кемел келешегіміздің кепілі. Қай елдің болмасын заңға бағынбай өсіп-өркендеуі мүмкін емес. Сондықтан да тәуелсіздік тірегіне айналған Ата Заңымыз, Конституцияны құрметтеу біздің парызымыз. Сіздерді Конституция күнімен құттықтай отырып, әр шаңыраққа құт – береке, ынтымақ тілеймін! Еліміз тыныш, жұртымыз аман болсын! Бірлігіміз нығая берсін, еліміздің іргесі берік болсын!», – деді департамент бастығы Мұхтар Аманқұлұлы.
</blockquote>
Қызылорда облысы полиция департаментінің бастығы полиция полковнигі Мұхтар Қожабаевтың бұйрығымен қызметтік міндеттерін адал атқарған, құқықтық тәртіп пен қауіпсіздікті қамтамасыз етуде ерекше көзге түскен департаменттің 561 қызметкері, оның ішінде 164 ардагер марапатталды.
Айтулы күнмен Ардагерлер кеңесінің төрағасы Тұңғышбай Серікбол Қуатбайұлы қызметкерлерді құттықтап, азаматтық борыштарын абыроймен атқаруларына тілектестік білдіріп, ыстық ықыласын жеткізді.
Мерекелік іс-шара концерттік бағдарламаға ұласты. Халықтың тыныштығы мен қауіпсіздігін қорғап, қоғамдық тәртіпті қамтамасыз ету бағытында абыройлы қызмет етіп жүрген полиция қызметкерлеріне арнап Облыстық филармонияның әншілері өнер көрсетті. Концертте полиция қызметкерлерінің өнерлері де тамашаланды.
<img src="https://kyzylorda-news.kz/wp-content/uploads/2022/08/0v4a2959-scaled.jpg" alt="" />
<img src="https://kyzylorda-news.kz/wp-content/uploads/2022/08/0v4a2817-scaled.jpg" alt="" />

Қызылордалық полицейлер Конституция күніне орай салтанатты шара ұйымдастырды

<a href="https://kyzylorda-news.kz/">Kyzylorda-news.kz.</a> Қызылорда облысында 30 тамыз – Конституция күніне арналған салтанатты шара өтіп жатыр.
Шараға Қызылорда облысының әкімі Нұрлыбек Нәлібаев қатысуда.
<blockquote>
 «Конституция – қағаз жүзіндегі құжат емес, ол – елдің, халықтың, әрбір азаматтың өмір сүру ережесі, мемлекеттіліктің іргесін бекітіп, халықаралық кеңістікте ұдайы өркендеуін қамтамасыз ететін негіз. 1995 жылы бүкілхалықтық референдумда қабылданған Ата Заң халықтың бірлігін, қоғамдық және рухани келісімін нығайтып, егемендік пен саяси тұрақтылықтың кепілі болғаны белгілі.Тәуелсіздік жылдарында құқықтық жүйенің тиімділігінің арқасында еліміз әлеуметтік-экономикалық дамуда әлеуетті табыстарға қол жеткізіп, іргелі мемлекеттер қатарына қосылды. Ел Конституциясы Қазақстанның табыстылығы мен одан әрі өркендеуінің нышанына айналды», — деді облыс әкімі Нұрлыбек Нәлібаев.
</blockquote>
Шара барысында мемлекеттік Елтаңба авторы Жандарбек Мәлібекұлы мен Ұлттық хирургия орталығының директоры Болатбек Бимендіұлына «Қызылорда облысының Құрметті азаматы» атағы табысталды.
Жандарбек Мәлібекұлы – Тәуелсіз Қазақстанның қалыптасу тарихында өзіндік үлесін қосып, Мемлекеттік нышанның бірі Елтаңбаның авторы ретінде танылған бірегей сәулетші. Еуразия ұлттық университетінің профессоры, еліне қалтқысыз қызметі үшін «Құрмет» және «І дәрежелі Барыс» орденінің иегері атанды. Жандарбек Мәлібекұлы биыл 80 жаста.
Баймаханов Болатбек Бимендіұлы – «Денсаулық ісінің үздігі», «Алтын дәрігер» төсбелгілерінің иегері, «Құрмет» орденімен наградталған білікті дәрігер, ғалым, медицина ғылымының докторы, профессор, жоғары санатты хирург, қоғам қайраткері, 200-ге жуық ғылыми-тәжірибелік мақаланың авторы. А.Сызғанов атындағы ұлттық хирургия орталығының директоры.
Айта кетейік, Елтаңба авторы облыс әкіміне ЕЛТАҢБА бейнесіндегі арнайы сый жасады.
<img src="https://kyzylorda-news.kz/wp-content/uploads/2022/08/302002563_5409251092522981_2927920477005234157_n.jpg" alt="" />

Қазақстан және Қызылорда облысының жаңалықтары

Әлмеш Баукен: Заңды осы жылдың соңына дейін қабылдау межеленген

Нұрлыбек Нәлібаев: Шыны зауытында өнім шығаруды жеделдету қажет

Конституция – кемел келешектің кепілі

Жалағаш ауданында егінге алғашқы орақ түсті

Мархабат Жайымбетов Қазалы ауданындағы құрылыс жұмыстарымен танысты

Қазалыда жаңа спорт кешенінің іргетасы қаланды

Ақбастыға ауыз су құбыры тартылуда

Министрлік: Қызылорда облысында ана өлімі көбейген

Елтаңба авторы Жандарбек Мәлібеков пен дәрігер Болатбек Баймахановқа «Қызылорда облысының Құрметті азаматы» атағы табысталды

Мархабат Жайымбетов іссапармен Арал ауданына барды

Қызылордалық полицейлер Конституция күніне орай салтанатты шара ұйымдастырды

Қызылордада Конституция күніне орай салтанатты шара өтуде

Қазақстан және Қызылорда облысының жаңалықтары

Әлмеш Баукен: Заңды осы жылдың соңына дейін қабылдау межеленген

Нұрлыбек Нәлібаев: Шыны зауытында өнім шығаруды жеделдету қажет

Конституция &#8211; кемел келешектің кепілі

Жалағаш ауданында егінге алғашқы орақ түсті

Мархабат Жайымбетов Қазалы ауданындағы құрылыс жұмыстарымен танысты

Қазалыда жаңа спорт кешенінің іргетасы қаланды

Ақбастыға ауыз су құбыры тартылуда

Министрлік: Қызылорда облысында ана өлімі көбейген

Елтаңба авторы Жандарбек Мәлібеков пен дәрігер Болатбек Баймахановқа «Қызылорда облысының Құрметті азаматы» атағы табысталды

Мархабат Жайымбетов іссапармен Арал ауданына барды

Қызылордалық полицейлер Конституция күніне орай салтанатты шара ұйымдастырды

Қызылордада Конституция күніне орай салтанатты шара өтуде

Конституция – кемел келешектің кепілі