<a href="https://kyzylorda-news.kz/">Kyzylorda-news.kz.</a>&nbsp;Қостанай халқына көмек көрсету үшін «AMANAT» партиясы Қызылорда облыстық филиалы жанынан құрылған көмек көрсету пунктіне кешеден бері партия белсенділері азық-түлік, тұрмысқа қажетті заттарды толассыз әкелуде.
Осы орайда бүгін партия белсендісі Таңат Байкенжеев Қостанай халқына қазіргі таңда аса қажетті болып отырған шаруашылық тауарлары мен мектеп жасындағы балаларға арналған арнайы құрал-жабдықтар жеткізіп берді.
Сондай-ақ қайырымдылық шарасына облыс тұрғындары, әкімдік қызметкерлері мен мәслихат депутаттары, жергілікті кәсіпкерлер мен еріктілер жасағы атсалысып жатыр.
Қабылдау пункітіне алғаш болып өз көмегін жеткізгендердің бірі партия белсендісі, «BIALI»ЖШС –нің төрағасы Асхат Шәукенбаев. Ол осындай қиын сәтте өзінің қостанайлықтармен бірге екенін жеткізіп, барлық жерлестерді жұмыла көмек көрсетуге шақырды. Қостанайлық ағайынға көмекке «AMANAT» партиясы облыстық, қалалық, «Тұран», «Теміржол» филиалдарының ұжымы да ортақ қаржы жинап, азық-түлік өнімдері мен төсек бұйымдарын алуға үлес қосты.
Айта кетейік, «AMANAT» партиясы Қызылорда облыстық филиалы бойынша гуманитарлық көмек қабылдау пунктерінің Қызылорда қаласындағы мекенжайы партияның қалалық филиалының ғимараты Ы.Жақаев көшесі 15А. Байланыс нөмірі: 8-747-530-85-79, 8-778-460-23-00.
<img src="https://kyzylorda-news.kz/wp-content/uploads/2022/09/305766065_186140930544700_3929789953231761876_n.jpg" alt="" />
<img src="https://kyzylorda-news.kz/wp-content/uploads/2022/09/4766d3ef-0394-4ba3-8771-e7dd42e1952b.jpg" alt="" />

Қызылордада қостанайлықтарға берілетін көмек жалғасуда

<a href="https://kyzylorda-news.kz/">Kyzylorda-news.kz.</a>&nbsp;Мемлекет басшысы Қасым-Жомарт Тоқаевтың Қазақстан халқына Жолдауына қатысты Қызылорда облыстық Қазақстан халқы ассамблеясы жанындағы Қоғамдық келісім кеңесі төрағасының міндетін атқарушы Сайлаубай Әбішев пікір білдірді.
Халқымыздың бірлігі – болашағымыздың кепілі.
Халық бұл жолдаудан көп үміт күтеді. Жаңа Қазақстан құру жолындағы бүкіл мемлекеттік құрылым басшыларының халық алдындағы жауапкершілігін одан әрі күшейтуге мемлекет басшысының баса назар аударғаны түсінікті. Себебі, елімізде қордаланған мәселелер жеткілікті, мемлекеттік ресурстарды тиімді пайдалана отырып, әрбір атқарылған жұмыстың санына емес, сапалық көрсеткіштерге басты мақсат етіп қою міндеті айқындалғандай.
Қоғамда қалыптаса бастаған саяси реформаларды жүйелі, әрі пәрменді жүргізе отырып, ел экономикасының халықтың әлеуметтік жағдайын жақсартуға бағытталған іс-шаралардың уақытылы орындалуына айырықша назар аударылған. Үстіміздегі жылы бүкілхалықтық референдум арқылы қабылданған конституциялық реформаның сөзсіз әрі табанды түрде орындалуына бүкілхалықтық бақылау орнату біздің әрқайсымыздың азаматтық борышымыз екені даусыз. Алдағы болашақта елімізде іске асырылатын, орындалар жұмыстардың саяси астарының негізі – халқымыздың ауызбіршілік, ынтымақ бірлігінде жатқанын бір сәт естен шығармауымыз керек. Алдағы белгіленген ел тағдырына қатысты кезектен тыс республика Президентінің сайлауын өткізу жөніндегі ұсынысты қолдай отырып, алға қойған мақсатты күрделі де, кең ауқымды жұмыстарды жүзеге асыруға барлық Сыр бойының тұрғындарын шақырған болар едім.
<img src="https://kyzylorda-news.kz/wp-content/uploads/2021/04/sajlawbaj-abishov.jpg" alt="" />

Сайлаубай Әбішев: Халқымыздың бірлігі – болашағымыздың кепілі

<a href="https://kyzylorda-news.kz/">Kyzylorda-news.kz.</a> Елімізде жыл сайын қыркүйек айының алғашқы жексенбісінде мұнай-газ кешені қызметкерлері күні аталып өтіледі. Осыған орай бүгін Қазалы ауданы әкімдігінің мәжіліс залында бірқатар сала мамандары марапатталды.
Басқосуда аудан әкімі Мұхтар Оразбаев мұнай-газ кешені қызметкерлерінің аймақтың әлеуметтік-экономикалық дамуына қосқан үлестері зор екенін айтып, кәсіби мерекемен құттықтады.
<blockquote>
 «Біздің қазыналы Қазалы жерінде газ саласының қызметкерлері аймақтың әлеуметтік-экономикалық дамуына өзіндік үлестерін қосып келеді. Соның нәтижесінде Қазалы ауданының орталығы – Әйтеке би кенті мен Қазалы қаласы және Ғани Мұратбаев ауылындағы тұрғын үйлер табиғи газ желісіне қосылған. Биыл аудан орталығына жақын орналасқан Жалаңтөс батыр, Басықара және Қашақбай Пірімов ауылдарын газдандыру жұмыстары қарқынды жүргізілуде. Қазіргі таңда біз Абай ауылын газдандыру үшін аудандық бюджеттен қаржы бөліп, жоба-сметалық құжаттарын дайындап жатырмыз. Сондай-ақ, жеке кәсіпкер, Шымкент қаласында тұратын жерлесіміз Жылқайдар Тәңірбергеновтың демеушілігімен елді мекендерге магистральдық газ құбырын жеткізу үшін жоба-сметалық құжаттары әзірленіп, сараптамадан өтуде. Жоба жүзеге асқан жағдайда 15 елді мекен газ желісіне қосылады», – деді аудан басшысы.
</blockquote>
Мұнан соң бір топ сала қызметкерлеріне аудан әкімінің «Алғыс хаты» тапсырылып, құрмет көрсетілді.
Басқосуда «Қаз Транс Газ Аймақ» АҚ Қызылорда өндірістік филиалы Әйтеке би газ шаруашылығының директоры Қуаныш Сансызбаев әріптестерін құттықтап, аудан әкіміне алғысын жеткізді.
Мерекелік шарада аудан өнерпаздары мұнай-газ кешені қызметкерлеріне арнап әннен шашу шашып, көтеріңкі көңіл күй сыйлады.
<img src="https://kyzylorda-news.kz/wp-content/uploads/2022/09/304840544_3445249465695976_806076655832587851_n.jpg" alt="" />
<img src="https://kyzylorda-news.kz/wp-content/uploads/2022/09/304744097_3445249632362626_2521618646224747617_n.jpg" alt="" />

Қазалыда мұнай-газ кешенінің қызметкерлері марапатталды

<a href="https://kyzylorda-news.kz/">Kyzylorda-news.kz.</a> Шұғыл әрекет ету штабы отырысынан кейін Мемлекет басшысы орман өртінен зардап шеккен Аманқарағай ауылының аумағын аралады, деп хабарлады Ақорда.
Мемлекет басшысы Әулиекөл ауылындағы мектепте орналасқан эвакуациялау пунктінде зардап шеккен азаматтармен кездесіп, гуманитарлық көмек тарату пунктінің жұмысымен танысты.
<img src="https://akorda.kz/public/assets/media/uploadMedia/1662368259_KZ1_2351.jpg_2.jpg" alt="" />
<img src="https://akorda.kz/public/assets/media/uploadMedia/1662368044_KZ1_2433.jpg_2.jpg" alt="" />
Зардап шеккендермен кездесу барысында Қасым-Жомарт Тоқаев Үкімет қиын жағдайды еңсеру үшін барлық шараларды қабылдайтынын айтты.
<blockquote>
 – Өкінішке қарай, үлкен өрт болды. Дегенмен тиісті көмек көрсетіледі. Сіздердің баспанасыз қалғандарыңызды білемін. Үкімет екі, екі жарым айда сіздерге бұрынғыдан әлдеқайда жақсы жаңа үйлер салып береді, – деді Мемлекет басшысы.
</blockquote>
Президент еріктілермен әңгімелесіп, оларға көрсеткен көмегі үшін алғыс айтты.
<img src="https://akorda.kz/public/assets/media/uploadMedia/1662368114_KZ1_2532.jpg_2.jpg" alt="" />
<img src="https://akorda.kz/public/assets/media/uploadMedia/1662368114_KZ1_2559.jpg_2.jpg" alt="" />
<img src="https://akorda.kz/public/assets/media/uploadMedia/1662368114_KZ1_2583.jpg_2.jpg" alt="" />
<img src="https://akorda.kz/public/assets/media/uploadMedia/1662368114_KZ1_2524.jpg_2.jpg" alt="" />

Қасым-Жомарт Тоқаев Қостанай облысында орман өртінен зардап шеккен азаматтармен кездесті

<a href="https://kyzylorda-news.kz/">Kyzylorda-news.kz.</a>&nbsp; Бүгін Жалағаш ауданының әкімі Асқарбек Есжанов Мемлекет басшысының халыққа Жолдауынан туындайтын міндеттер мен тапсырмаларын іске асыруға арналған мәжіліс өткізді.
Жиынға ардагерлер, кент және ауылдық округ әкімдері, мемлекеттік мекеме, бөлім басшылары, аудандық мәслихат депутаттары, Қоғамдық кеңес мүшелері қатысты.
Аудан басшысы Президент Жолдауында саяси реформалардың жаңа бағдарламасы мен әлеуметтік-экономикалық бағытта атқарылатын іс-шаралар нақтыланып, алдағы міндеттерді айқындап бергенін жеткізді.
<blockquote>
 «Жолдауда айтылған барлық бағдар бойынша нақты шаралар қабылдап, сапалы іске асыруға тиіспіз. Мемлекет басшысы жаңа экономикалық саясат макроэкономикалық тұрақтылықты қамтамасыз ету, экономиканы әртараптандыру және цифрландырудың тың тәсілдері қажеттілігін атап өтті. Аудан бойынша 7 ай қорытындысымен барлық негізгі әлеуметтік-экономикалық көрсеткіштер бойынша өткен жылдың сәйкес кезеңімен салыстырғанда өсім қалыптасты», – деді Асқарбек Есжанов.
</blockquote>
Мәжілісте аудан әкімінің орынбасарлары Арнұр Нұрмағанбетов, Алтынбек Дәрібаев, Жасұлан Еспенбет Президент Жолдауының негізгі бағыттары бойынша ауданда атқарылатын жұмыстар туралы баяндады.
Сондай-ақ аудандық ардагерлер кеңесінің төрағасы Садық Әлиев Жолдауда көрсетілген міндеттер ел экономикасына серпін беретінін жеткізіп, ұсыныстарын ортаға салды.
Аудан әкімі Асқарбек Есжанов бірқатар бөлім, мекеме басшыларына, кент, ауылдық округ әкімдеріне Жолдаудан туындайтын міндеттер орындауға байланысты тапсырма берді.
Айта кетейік, Президент Жолдауын іске асыруға арналған Ұлттық жоспар аясында аудандық деңгейде арнайы жоспар әзірленеді.
<img src="https://kyzylorda-news.kz/wp-content/uploads/2022/09/305310070_1529744750810931_5490359684992936990_n.jpg" alt="" />
<img src="https://kyzylorda-news.kz/wp-content/uploads/2022/09/305568973_1529744920810914_1695497501106515396_n.jpg" alt="" />

Асқарбек Есжанов: Жолдауда айтылған барлық бағдар бойынша нақты шаралар қабылдауға тиіспіз

<a href="https://kyzylorda-news.kz/">Kyzylorda-news.kz.</a>&nbsp; «AMANAT» партиясы Қызылорда облыстық филиалының активі Президент Жолдауын талқылады. Алқалы жиынды партия филиалының Атқарушы хатшысы Ләйлә Төрешова жүргізді.
Жиында Атқарушы хатшы әділетті мемлекет құрып, берекелі қоғам қалыптастыруға бағыттайтын жаңа Жолдау партияға да айрықша жауапкершілік пен үлкен міндеттер жүктейтінін атап өтіп, Партия тарапынан Президент бастамалары аясында атқарылып жатқан жұмыстарға да тоқталды.
<blockquote>
 «Бүгінде Приезидент тапсырмасына сай партия бастамасымен жүзеге асып жатқан «Ауыл аманаты» мен «Жер аманаты жобалары, көпшілікпен жылы қабылданып, қолдау табуда. Мәселен, «Ауыл аманаты» жобасы аясында облыста 146 ауыл әкімдері арнайы оқудан өтті. 15 ауылдық округ тұрғыны ауыл халқының тұрмысын арттыруға негізделген көшпелі ақпараттық топтың семинарына қатысып, қажетті ақпараттармен қанықты. «Жер аманаты» жобасы аясында арнайы өңірлік комиссия құрылып, облыста 50 мың гектардан астам пайдаланылмай жатқан жер мемлекет меншігіне қайтарылды. «Халық үніне құлақ асатын мемлекет» тұжырымдамасына сәйкес, партия филиалының «ТАЛҚЫЛАУ» алаңында өңірдегі газ бағасын төмендету мәселесі бойынша арнайы мемлекеттік комиссия отырысы өткізіліп, шешімі күтіліп отыр. Мемлекет басшысының жаңа Жолдауындағы міндеттерді жүзеге асыруда партия органдары барлық ресурстарын жұмылдыратын болады»,- деді Ләйлә Төрешова.
</blockquote>
Актив жиынында партия белсенділері Жолдаудың негізгі басым бағыттары туралы ойларын ортаға салып, пайымды пікірлерін білдірді.
Жиын соңында, партияның облыстық филиалының Атқарушы хатшысы Ләйлә Төрешова Жолдауды жүзеге асыру аясында өңірлік партия филиалдары алдында тұрған негізгі міндеттерді атап өтті.
<img src="https://kyzylorda-news.kz/wp-content/uploads/2022/09/305560345_454850393347269_451255717463165960_n.jpg" alt="" />
<img src="https://kyzylorda-news.kz/wp-content/uploads/2022/09/305569628_454850066680635_8978976382970971548_n.jpg" alt="" />

«AMANAT»: Жолдау жүктеген міндеттер талқыланды

<a href="https://kyzylorda-news.kz/">Kyzylorda-news.kz.</a>&nbsp; Қазалылық Руслан Бөлекбаев халық арасында «кір сабын» аталып кеткен тұрмыстық сабын шығаруды бастады. Ол үшін Орал қаласынан Ресейде жасалған арнайы аппаратты сатып алған.
Бүгін аудан әкімі Мұхтар Оразбаев жаңа кәсіпті қолға алған азаматты қабылдап, алдағы жоспарларын талқылады.
Кездесуде Руслан Бөлекбаев сабын шығару жұмыстары қалай басталғанын тілге тиек етіп, өнім ешқандай химиялық қоспасыз шығарылып жатқанын айтып берді.
<blockquote>
 «Сабынның құрамы 100 пайыз экологиялық таза өнімдерден тұрады. Олардың ішіндегі ең негізгісі төрт түліктің сүйегі. Сүйек міндетті түрде жілік майымен болуы қажет. Бұл шикізатты Орал қаласындағы консервіленген ет шығаратын «Кублей» компаниясынан алатын боламын. Күні кеше арнайы барып, келісім-шартқа да отырдым. Қазіргі таңда 80 мың дана сабын шығаруға жететін шикізатым бар. Бүгінгі таңда 170, 200, 250, 300 және 350 грамдық сабындарды шығарып, тұтынушыларға өткізіп жатырмын. Сабынның бағасы да тұрғындар үшін қолжетімді болып табылады», – деді Руслан Жаңалықұлы.
</blockquote>
Жаңалыққа жаны құмар Руслан Бөлекбаев алдағы уақытта бір ғана сабын шығару ісімен тоқтап қалғысы келмейді. Осы жылдың аяғына дейін дәретхана қағазын, салфетка және қағаз сүлгі шығаруды жоспарлап отыр. Қазіргі таңда өзіне қажетті аппарат Ресейде құрастырылып жатыр. 
Одан бөлек, келесі жылдан бастап күнделікті тұрмысқа қажетті «Фейри» және «Белизна» шығару жоспарында бар.
Аудан әкімі Мұхтар Оразбаев ізденімпаз кәсіпкердің жұмысына сәттілік тілеп, әрдайым қолдау көрсетуге әзір екенін жеткізді.
<img src="https://kyzylorda-news.kz/wp-content/uploads/2022/09/305230323_3447658802121709_2741204143641248432_n.jpg" alt="" />

Қазалылық кәсіпкер сабын шығаруда

<a href="https://kyzylorda-news.kz/">Kyzylorda-news.kz.</a>&nbsp; Мемлекет басшысы Қасым-Жомарт Тоқаев биылғы «Әділетті мемлекет. Біртұтас ұлт. Берекелі қоғам» атты Қазақстан халқына Жолдауында еліміздегі маңызды мәселелерге көңіл аудара отырып, біз назарға алуға тиіс бірнеше басым бағыттарды атап өтті. Мемлекеттің экономикалық ахуалын жақсартып, оны оңтайландыру үшін тиісті жобаларды қолға алуды тапсырды.
Елдің тұғырлылығын нығайтатын – білім, ғылым, медицина, құқық қорғау органдары секілді тегеуренді салалалармен қатар көші-қон саясаты арқылы да өзекті мәселерлерді шешуді ұсынды. Адами капитал сапасын арттыру мақсатында мемлекет басшысы шетелден жоғары білікті кадрлар алынатындығын атап өтті. Енді ғылым, денсаулық сақтау, өндіріс, IT салаларының білікті мамандары елімізге келіп, тәжірибелерімен бөлісетін болады. Бұл дегеніміз – шетелдік әріптестерімен пікірі алмаса отырып, әлемдік жаңа құзыреттіліктер мен жаңа дағдыларды үйренуге жол ашу. Мәселен, XXI ғасырдағы саяси-экономикалық, әлеуметтік, қаржы секілді барлық салаларының бойына қан жүгіртіп, оның жүйелі жұмыс істеуіне мүмкіндік туғызып тұрған – IT саласы. Цифрлық платформа кез келген саланың жұмысын оңтайландырып, электронды база негізінде жұмыс істеуге жағдай жасайды. Ал бұл жұмыстарды одан әрі жетілдіріп, отандық мамандардың кәсібилігін тереңдету үшін шетелдік дарынды азаматтардың өз білгенімен бөліскені керек-ақ. Сонда ғана біз Г.М.Маклюен ұсынған «Ғаламдық ауыл» тұжырымдамасына сай әрекет етіп, жаһандану саясатының тиімді тұстарын сезінетін боламыз.
Сәйкесінше біздің еліміздегі ең сұранысқа сай, сапалы кадрларды қажет ететін бірден бір сала – IT саласы. Бүгінде әлемдегі ақпараттар ағыны, өзгерістер күретамыры осы саламен тығыс байланысты. Цифрландыру заманында IT саласының дамуы өзекті, сол арқылы әлемдік көшке бірге ілесу керектігі де белгілі. Сондықтан мемлекет басшысы Қасым-Жомарт Кемелұлы ақпараттық технология дәуіріндегі маңызды салаларды дамытуға бетбұруы еліміздің даму қарқынын жеделдетеді.
Нұрлан Нұрмағанбетов,
&nbsp;Қорқыт ата атындағы Қызылорда Университеті,
Бағдарламалық қамтамасыз ету және 
қашықтықтан білім беру технологиялары басқармасының басшысы

Нұрлан Нұрмағанбетов: Мемлекет басшысының ақпараттық технологияға бетбұруы еліміздің даму қарқынын жеделдетеді

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Қазақстан халқына Жолдауын арнады. Осыған орай «Сексеуіл» бастауыш партия ұйымында Жолдау талқыланды.
Жолдауда айтылған міндеттер мен берілген тапсырмалар әсіресе әйелдердің зейнет жасын 2028 жылға дейін 61 жас болатындығына және бала күтімі үшін төленетін төлемді 1,5 жасқа дейін ұзарту, Ұлттық қордағы қаржының 50%-ы 18 жасқа дейінгі балалардың есепшотына аудару тапсырмасы берілгендігіне аналар ерекше қуанатындығын айтты.
Себебі, мұның бәрі халыққа жасалып отырған үлкен қолдау. Сонымен қатар, Президент Қасым-Жомарт Тоқаевтың биылғы Жолдауы мазмұны жағынан бұрынғылардан ерекше. Жолдауда нақты міндеттер мен мақсаттар белгіленді. Яғни, ең алдымен құжатта адам мен оның мүддесіне басымдық берілген. Демек, Жолдау бәрінен бұрын қарапайым азаматтардың мүддесін көздейді. Атап айтқанда, құжатта басты талап ретінде халықтың табысына маңыз берілді. Ең төменгі жалақының 70 мың болып артатынына да ризашлылық танытып отыр. Түптеп келгенде, бұл Жолдауда қарапайым азаматтардың жағдайын жақсарту жайы қарастырылған.
Жиын қорытындысы бойынша аманаттықтар халықты ел бірлігін нығайтып, Әділетті Қазақстанды құру жолында түбегейлі және жан-жақты реформаларды табысты жүзеге асыруда аянбай еңбек етуге шақырды.
<img src="https://kyzylorda-news.kz/wp-content/uploads/2022/09/2e17deca-36f1-46b2-a5ad-75de00f331c3.jpg" alt="" />

Ұжым болып Жолдауға қолдау білдірді

<a href="https://kyzylorda-news.kz/">Kyzylorda-news.kz.</a> Қармақшы ауданындағы елді мекендерді газдандыру жұмыстары қарқынды жүргізілуде. Бұл туралы Қармақшы ауданындағы құрылыс нысандарына баспасөз-туры кезінде айтылды.
Бүгінде Төретам кентін табиғи газбен қамту бойынша республикалық және аудандық бюджеттен тиісті қаржы көлемі бөлініп, құрылыс жұмыстары басталды.
Төретам кентіне көгілдір отынды жүргізу жұмыстарын мердегір мекеме «Алия-Сервис» ЖШС қолға алған. Қазіргі таңда мұнда 12 мыңнан астам тұрғын бар.
Төретам елді мекеніндегі халықты толық табиғи газбен қамту жобасы 2023 жылы аяқталады деп жоспарлануда. Ал Ақай ауылдық округіндегі газдандыру жұмыстары биыл басталды. Мұндағы мердігер мекеме – «AKBARS STORY Ltd» ЖШС.
Сонымен қатар Қармақшы ауданы Жосалы кентіндегі дене шынықтыру-сауықтыру кешінінің құрылысы өткен жылы басталған болатын. Жоба медігері – «Сапақ» өндірістік кооперативі. Мұнда 400-ге жуық жасты әртүрлі спорттық үйірмелермен қамтуға мүмкіндік бар. Жаңа нысан аудан орталығында бұқаралық спортты дамытуға өз үлесін қоспақ.
Айта кетейік, дене шынықтыру-сауықтыру кешені биылғы жылдың қазан айында аудан халықының игілігіне берілмек.
<img src="https://kyzylorda-news.kz/wp-content/uploads/2022/09/gaz.jpg" alt="" />

Қармақшы: Елді мекендерді газдандыру жұмыстары жүргізілуде

<a href="https://kyzylorda-news.kz/">Kyzylorda-news.kz.</a> Қармақшы ауданы әкімдігінің қолдауымен, Қармақшы аудандық мәдениет және тілдерді дамыту бөлімінің К.Рүстембеков атындағы Жыраулар үйінің ұйымдастыруымен 5 қыркүйек – Қазақстан Халқы Тілдері күні қарсаңында түркітанушы, публицист, педагог, аудармашы, қоғам қайраткері – Ахмет Байтұрсынұлының туғанына 150 жыл толуына орай ұйымдастырылған «Ұлттың ұлы ұстазы» атты аймақтық ақындар мүшәйрасы өткізілді.
Ахмет Байтұрсынұлы – қазақ әліппесі мен қазақ тілі оқулықтарын жазып шыққан және онымен қоса қазақ графикасын жасауға белсене атсалысқан қайраткер, ұлы тұлға.
Ахмет Байтұрсынұлындай қайраткерді жырға қосқан ақындарға Қармақшы аудандық мәдениет және тілдерді дамыту бөлімінің басшысы Ержанов Дәурен Дауылбекұлы құттықтау сөз сөйлеп, ақындарға сәттілік тіледі.
Ақындардың тілге деген құрметін, отансүйгіштік қасиетін жырмен, өлеңмен жеткізді.
Жыр мүшәйрасына 11 талапкер ұсыныс беріп, 6 ақын жүлделі орындармен марапатталды.
Арнайы құрылған қазылар алқасының шешімімен бас жүлдені Қармақшы ауданынан Тұрар Бекмұрзаев иеленді. Жүлделі І орынды қармақшылық Асқар Әли иеленсе, ІІ орын Қызылорда қаласынан Мейіржан Қартбайға бұйырды. Ал ІІІ орынды Жалағаш ауданынан келген ақын Гүлжанат Қадырбекова, сырдариялық Бақтөре Айтбаев және Жалағаш ауданынан келген Зылиха Жаңабай өзара бөлісті. Жеңімпаздар арнайы дипломдар мен сыйлықтармен марапатталды.
<img src="https://kyzylorda-news.kz/wp-content/uploads/2022/09/305200036_3494795530755631_2740820791037370429_n.jpg" alt="" />

Қармақшыда облыстық ақындар мүшәйрасы өтті

<a href="https://kyzylorda-news.kz/">Kyzylorda-news.kz.</a> Қостанай облысындағы табиғи өртке байланысты көмекке мұқтаж халық ТЖД жедел желі телефонына хабарласа алады.
<blockquote>
 Жергілікті атқарушы органдар Көшірілгендерді тамақпен қамтамасыз ете отырып, Әулиекөл орта мектебі мен Әулиекөл мектеп-интернатына орналастыруды ұйымдастырды. ТЖМ және ТЖД психологтарының жұмысы ұйымдастырылды 8 717 2 53 32 84, 8 714 2 50 36 24. Сондай-ақ, көмекке мұқтаж халық 112 және 101 телефондары арқылы хабарласа алады»,&nbsp;– делінген хабарламада.
</blockquote>
Сондай-ақ, Қостанай облысының әкімдігі жергілікті ауқымдағы төтенше жағдайды жариялау мәселесін пысықтауда.
<blockquote>
 «Азаматтық қорғау туралы» Қазақстан Республикасы Заңының 58-бабына сәйкес азаматтардың табиғи сипаттағы төтенше жағдай нәтижесінде келтірілген зиянды (нұқсанды) өтеуге құқығы бар»,&nbsp;– делінген хабарламада.
</blockquote>

Қазақстан және Қызылорда облысының жаңалықтары