​<a href="https://kyzylorda-news.kz/">Kyzylorda-news.kz.</a> Қазалы ауданына қарасты Әйтеке би кентіндегі Роза Бағланова атындағы мәдениет орталығында 8 наурыз Халықаралық әйелдер күніне орай «Әйелмен әлем әдемі» атты кездесу ұйымдастырылды.&nbsp;Мерекелік басқосу қыз ғұмырының балалық, бойжеткен, аналық кезеңінен көрініс беретін қойылыммен нәзікжандыларды шаттандырды. Аудан көркемөнерпаздарының сахналаған театрландырылған көрінісінен кейін аудан әкімі Мұхтар Оразбаев мерекелік лебізін білдірді.&nbsp;Салтанатты жиынға келген ақжаулықты әжелерді, көпбалалалы аналарды, әр салада жемісті еңбек етіп жүрген қыз-келіншектерді айтулы датамен шын жүректен құттықтады. Бүкіл жан-дүниесін ақтара, ақжарқын тілегін жеткізді.<blockquote>«Әйел – өмірдің өзегі, отбасының алтын діңгегі. Әйел әрбір әулеттің шамшырағы. Оларсыз өмірді елестету мүмкін емес. Әйелдің отбасында ғана емес, қоғамда да өзіндік орны бар. Бүгінде өңірдің қыз-келіншектері қай салада болмасын ерлермен қатар тең иық тірестіре жемісті еңбек етуде. Нәзікжандыларымыздың аудан экономикасын нығайтуда және өңір тұрғындарының әлеуетін арттырудағы ерен еңбегін ерекше бағалаймыз», – деді аудан басшысы Мұхтар Әуесұлы.&nbsp;</blockquote>Шара барысында әнші сазгер Индира Елубаева, Гүлнұр Нұрасыл әсем әнмен көңілдерді құйқылжытты. Сонымен бірге, қазалылық ақын Ақжол Түменбай аналардың құрметіне «Бүгін менің анамның туған күні» өлеңін нақышына келтіре оқып, жырдан шашу шашты.&nbsp;Кеш соңында ақжаулықтыларға, көпбалалы, тұрмыстық жағдайы төмен, мүмкіндігі шектеулі және әр салада қызмет етіп жүрген аяулы қыз-келіншектерге аудан әкімі Мұхтар Оразбаевтың атынан арнайы сыйлықтар мен гүл шоқтары табысталды.

Қазалылық ақжаулықты аналар ардақталды

<a href="https://kyzylorda-news.kz/">Kyzylorda-news.kz.</a> «Еңбектiң көзiн тапқан, байлықтың өзiн табады» деген көне тәмсiл тұғырынан еш тайған емес. Бейбіт қоғамда бейнетшіл адамға баюға барлық жағдай жасалған. Қайшы алып шаш қисаңыз да, қамшы алып төрт түліктің соңына түссеңіз де, кәсіп ашып нәпақа табамын десеңіз де ешкім бетіңізден қақпайды. Тек бойыңыздағы жалқаулықты жеңіп, жоспарлы жұмыс істесеңіз болғаны.&nbsp;Шиеліде еңбекке епті, қоғамға септігін тигізіп жүрген азаматтар көп. Сондай ізденімпаз және еңбекқор жанның бірі – Шырайлым Мадиярова декреттік демалыста қол қусырып отырмай, жаңа дүниені меңгерген. Ол шығыны мен кірісін есептеп, қиналмастан үйінде отырып-ақ ерекше іске білек сыбана кірісіпті.Бүгінде хит болған «Шоколадты құлпынайдың» дәмін татып көрген боларсыз? Бұл жай ғана қып-қызыл жидек емес, шоколадқа малынған, қорапқа салынған, өте әдемі орамадағы құлпынай. Кәсіптің бұл түрі енді ғана жанданып келе жатқандықтан, ауданнан табыла бермейтін. Мұны ескерген кейіпкеріміз дәл осы бизнесті үйреніп, дөңгелетіп отыр. Біз де елден қалмайық деп, «шоколадты құлпынайға» тапсырыс беріп, дәмін де таттық. Онсызда дәмі тіл үйірер құлпынай шоколадпен қапталғанда тіптен ерекше болады екен.<blockquote>«Қазіргі уақытта кент тұрғындарына балғын құлпынайдың жоғарғы сұрпы мен шоколадтың қосындысынан жасалған керемет дүниені ұсынып отырмын. Әр бизнестің өз қызығы мен шыжығы бар. Сол сияқты бұл құлпынайдың да өзіне тән машақаты жетерлік. Шоколадқа құлпынай салынады, оның несі қиын деуі де мүмкін. Бірақ шоколадтың еру температурасы, құлпынайды тазалау техникалары шамалы білімді қажет етеді. Мұны арнайы марафоннан меңгердім. Қажетті құлпынайды сатып алғанда әрдайым балғын түрін таңдаймын. Сондай-ақ шоколадты құлпынайды алдын ала жасап қоймаймын. Өйткені оның сақталу мерзімі – 24 сағат. Тапсырыс берушінің қажет уақытына қарай арнайы жасап беремін және оны тұтынушыға да ескертіп отырамын», – дейді ол.</blockquote>Шырайлым Даниярқызы тек қана «шоколадты құлпынай» ғана емес, құрғақ жемістен түрлі сыйлықтар да жасайды. Қаптамаға оралған тәттілерін инстаграм арқылы саудалап көрген ол, бұл кәсіптің қолынан келетіндігіне көз жеткізеді. Өзі бұл істі ұршықша иіріп әкететініне шүбәсіз сеніп, табысты іспен тұрақты шұғылдануды көздейді.<blockquote>«Иә, нәзік жандар қашанда гүлге құмар. Өкінішке қарай бағасы қалтаны көтермейді. Көтерсе де, арнайылап алған гүл шоқтарыңыз 2-3 күнде солып қалады. Ал осындай кезде құрғақ жемістерден жасалған сыйлық таптырмас дүние», – дейді ол.</blockquote>Шырайлым тынымсыз еңбек табыссыз қалмайтынына сенімді. Ол кездескен қиындықтарға мойымағанының арқасында ауданда дами қоймаған кәсіптің берекесін көріп отыр. Тұтынушылардың разылығы оны одан сайын шабыттандыра түсетінін айтады.<blockquote>«Кез келген істің өзіне тән қиындығы болады. Алғашында тауарымды жарнамалау қиындық тудырды. Бірақ ойға алған бастапқы мақсат орындалып сұраныс уақыт өте арта бастады. Менің құрғақ жемісті гүлдерімді сыйлыққа алған әрбір клиентім міндетті түрде «уау» дейтіндей, эмоцияда болады. Бір рет сатып алған клиенттерім бірнеше рет тапсырыс беріп жүр. Себебі мен тек жоғары сұрыпты кептірілген жемістерді қолданамын», – дейді жас кәсіпкер.</blockquote>Қазір өз кәсібін бастағысы келетін жанға еш кедергі жоқ. Қайта қолдаудың түрі көп. Осы тұста Шырайлым Мадиярова да замандастарын қолда бар ресурстармен жұмыс істеп, кәсіп бастауға шақырды.<blockquote>«Қазір инфобизнестің дамып тұрған шағында, мен секілді декреттік демалыста отырған аналарға нөлден бастап кететін істің қыр-сырын көрсету мақсатында арнайы курс жасап шығару ойымда бар. Қазір интернет арқылы өніміңізді сатып, мүмкіндігіңізбен еңбегіңізге қарай пайда табуға болады. Менде соны әрмен қарай кәсіп ашқысы келетіндерге үйреткім келеді. Жеке кәсіпті жүргіземін деген адамға ешқандай кедергі жоқ. Себебі біздің заман үйден шықпай дүкен аралап, мейрамхананың тамағын жеп, ұнатқан киіміңді киетін заман. Кәсіп бастағысы келетіндерге тек алға деймін. Өте ерекше, денсаулыққа пайдалы букет, дәмі тіл үйіретін «шоколадты құлпынай» іздесеңіз, @daratai_dan парақшасын оқи жүріңіздер», – дейді ол.</blockquote>«Еңбек атаулының бәрі де бағалы. Өйткені ол адамды ізгілендіреді» деген бар. Адал еңбекке ештеңе жетпейді. Әсіресе, өз бетімен тірлігін түзеп, бейнетінің зейнетін көрген бір ғанибет.&nbsp;

Шағын кәсіп - берекелі іс

<a href="https://kyzylorda-news.kz/">Kyzylorda-news.kz.</a>&nbsp; Көктеммен бірге шұғыласын шашаып кететін, бір ғажайып күйге енетін, аналарымыз мейірленіп, әжелеріміз күлім қағып, қыздарымыз, аруларымыз сұлуланып сала беретін ерекше күн, көктемнің ең алғашқы ауқымды мерекесі ол әрине – 8 наурыз – «Халықаралық әйелдер» күні. Маңызы бөлек мереке ауданымызда да кең көлемде аталып өтті. Қазақтың дәстүрінен сыр шертетін сахналық қойылым арқалы басталған мерекелік шарада нәзік жандыларға деген құрмет анық байқалды.«Сарқылмайтын жылылық, Ана мәңгі – ұлылық» атты мерекелік шарада аудан әкімі Серік Сермағамбетов барша әйелдер қауымына құттықтау сөзін арнап:<blockquote>– Бүгінде ауданымызда 2 мыңнан аса алтын құрсақты аналарымыз болса, оның 124-і батыр ана, 552-і Алтын алқа, 1300-і Күміс алқа иегері. Қоғамның түрлі салаларындағы жетістіктерде нәзік жандылардың қарымды үлесі бар екені ақиқат.Ауданымыздағы мемлекеттік қызмет саласындағы 36%-ын, білім беру саласындағы 65%-ын, медицина саласының 83%-ын, мәдениет саласындағы 80%-ы, өңірдегі кәсіпкерлердің 47%-ы әйел азаматшалар құрап отыр. Сонымен қатар Аралдың ақ алтыны атанған ас тұзы мен су маржаны балық өндірісінде, темір жол мен ауылшаруашылығы және құқық қорғау саласында да еңбек етіп жүрген апа-қарындастарымыз аз емес, – дей келе барша аудан тұрғындарын мерейлі мерекемен құттықтап, ізгі лебізін білдірді.</blockquote>Салтанатты шара одан әрі әр сала ер азаматтарының мерекеге арналған концерттік бағдарламасына ұласып, шараға жиналғандарға көтеріңкі көңіл күй сыйлады.

Аралдық аналар құрмет төрінде         

<a href="https://kyzylorda-news.kz/ru/">Kyzylorda-news.kz</a>. Қоғамдағы «бармақ басты, көз қыстылық» қай кезеңде де жегі құрттай жағымсыз кейіпте екені анық. Елді дамытуға келгенде кесе көлденең тұрған түйткілдің бірі. Бұл бағытта аймақта көптеген кешенді шаралар қолға алынып, нәтижелі жұмыс жолға қойылған.Сыбайлас жемқорлық әлеуметтік құбылыс ретінде қазіргі уақытта саяси дамуына қарамастан әлемнің барлық елдерінде, соның ішінде Қазақстанда да өмір сүруді жалғастыруда, тек ауқымымен ерекшеленеді. Сыбайлас жемқорлық әлеуметтік экономикалық даму процесін, нарықтық экономика құрылысын, инвестиция тартуды тежейді. Демократиялық мемлекеттің саяси және қоғамдық институттарына теріс әсер етеді, елдің болашақ дамуына елеулі қауіп төндіреді. Сыбайлас жемқорлыққа қарсы күрес негізгі терминдердің бірі ретінде анықталған сыбайлас жемқорлық латын тілінен «соггитреге» сөзі мағынасына қарай «мемлекет ағзасының, қоғамдық қатынастардың бұзылуы» дегенді білдіреді, «сатып алу» терминінің мәні ретінде – әдетте лауазымды адамның өз биліктік өкілеттіктерін және өзіне сеніп тапсырылған құқықтарын алдау, қорқытып алу, сөзбұйдаға салу жолымен Қазақстанда мемлекеттік саясат басымдықтарының заңнамасы мен моральдық нормаларына қайшы келетін пайдалануын білдіретін термин.Қазақстан Республикасының «Сыбайлас жемқорлыққа қарсы күрес туралы» Заңы Сыбайлас жемқорлыққа келесі анықтама береді-бұл «…мемлекеттік функцияларды орындайтын адамдардың, сондай-ақ оларға теңестірілген адамдардың өзінің лауазымдық өкілеттіктерін және олармен байланысты мүмкіндіктерді пайдалана отырып, жеке өзі немесе делдалдар арқылы мүліктік игіліктер мен артықшылықтарды заңда көзделмеген қабылдауы не мүліктік пайда алу үшін олардың өз өкілеттіктерін өзгеше пайдалануы, сол сияқты осы адамдарды жеке және заңды тұлғалардың аталған игіліктер мен артықшылықтарды құқыққа қарсы беруі арқылы сатып алуы».Пара деген не? Бұл лауазымды адамның басқа тұлғадан өзі атқаратын лауазымына байланысты қандай да бір қызметтер көрсетілетін ақша немесе өзге де игіліктер алуы. Бұл ретте аталған ақша мен игіліктерді әрдайым пара алушы ала алмайды, көбінесе олар оған жақын адамдарға немесе жалған ұйымдарға берілуі мүмкін.Осыған байланысты, 2014 жылғы 26 желтоқсанда Қазақстан Республикасының 2015-2025 жылдарға арналған сыбайлас жемқорлыққа қарсы жаңа стратегиясы бекітілді.Стратегияның мақсаты мемлекеттің сыбайлас жемқорлыққа қарсы саясатының тиімділігін арттыру, сыбайлас жемқорлықтың кез келген көріністеріне «мүлдем төзбеушілік» ахуалын құру арқылы барлық қоғамды сыбайлас жемқорлыққа қарсы қозғалысқа тарту және Қазақстанда сыбайлас жемқорлық деңгейін төмендету болып табылады.Иә, қоғам дертімен күресті әрбір қазақстандық азаматтық міндеті санау керек. Сонда ғана тұғыры биік туған елдің алар асуы асқар, бағындырар белесі биік болары анық.&nbsp;

Қоғамдық дертімен күрес – елге тиген үлес

<a href="https://kyzylorda-news.kz/ru/">Kyzylorda-news.kz</a>. Облыс әкімі &nbsp;басшысы Нұрлыбек Нәлібаев қала әкімі және облыс әкімі орынбасарларының қатысуымен Қызылорда қаласының өзекті мәселелерін қарады. Аймақтағы қордаланған мәселелердің шешілу жайын талқылап, түйінді түйткілдің тарқауына барынша ықпал етуді қолға алған аймақ басшысы алдымен коммуналдық проблемаларды шешу жолдары бойынша сала басшыларының баяндамаларын тыңдап, нақты тапсырмалар жүктеді.Атап айтқанда, 2022 жылы сатып алынған қоғамдық көліктердің қалған бөлігінің облыс орталығына жеткізіліп, бағытқа қосылуын қамтамасыз етуді қатаң тапсырды.Сонымен қатар, көпқабатты тұрғын үйлердегі ауыз су қысымының мәселесін шешу, аяқ су жеткіліксіз аумақтарды анықтап тиісті шаралар қабылдау, көпқабатты тұрғын үйлердің аулаларын абаттандыру бойынша және жалпы облыс көлемінде санитарлық тазалықтың сақталуын қадағалауды баса назарда ұстау қажеттігін айтты. Нұрлыбек Машбекұлы облыс тұрғындарына көрсетілетін қызметтің сапасын жақсарту, халықтың әл-ауқатын көтеру бағытындағы жұмыстар үнемі өзінің тікелей бақылауында болатынын ескертті.Айта кетейік, бүгін облыс әкімі Қазақстан Республикасының Президенті Қасым-Жомарт Тоқаевтың төрағалығымен өткен Қазақстан Республикасы Қауіпсіздік Кеңесінің отырысына қатысты.&nbsp;

Нәтижелі жұмыс елді дамытады

<a href="https://kyzylorda-news.kz/ru/">Kyzylorda-news.kz</a>. Жастар қай кезде де көш бастап, елімізді дамудың даңғыл жолына бағыттайтын қозғаушы күш саналады. Сондықтан бұл бағыттағы мемлекеттік қолдау толастамауы керек. Өңірдегі қала тұрғындарына және жастарға ақпараттық &nbsp;кеңес беру мақсатында «Жастар рухы» ЖҚ облыстық филиалының ұйымдастыруымен «Жастарға кеңес» жобасы жүзеге асырылып келеді. Жобаның мақсаты -жастардың өзекті мәселелерін анықтай отырып, оларға консультативтік көмек &nbsp;беру болып табылады.Бұл бағыттағы мақсатты шаралар легі бекітілген. Қала аумағына қарасты Тасбөгент кенті әкімдігінің қолдауымен С.Майқанова атындағы мәдениет үйінде өткен қоғамдық қабылдауда облыстық денсаулық сақтау басқармасы, «Атамекен» кәсіпкерлік палатасы,облыстық әділет департаменті, қалалық жұмыспен қамту орталығы, «Отбасы банк» &nbsp;тұрғын үй құрылыс жинақ банкі» акционерлік қоғамының Қызылорда филиалы, облыстық және қалалық «Жастар ресурстық орталығы» &nbsp;КММ мамандары жастармен кездесіп қолданыстағы мемлекеттік бағдарламаларды түсіндіріп, &nbsp;бірқатар мәселелер бойынша кеңес берді.<blockquote>— Жастардың өзекті мәселелерін шешу, тұрғын үй, жұмыспен қамту, құқықтық сүйемелдеу және т.б. мәселе бойынша консультациялық көмек көрсетуде жобаның алатын орны ерекше. Өткен жылы жоба аясында 5000-ға жуық жас шешімін таппай жүрген мәселелері бойынша бағыт-бағдар алды. Солардың ішінде көпшілігі жұмыссыздық және тұрғын уй, міндетті әлеуметтік медициналық сақтандырумәселелермен жүгінеді, – дейді жоба кеңесшісі Р.Қалиева.</blockquote>«Отбасы банк» &nbsp;тұрғын үй құрылыс жинақ банкі» акционерлік қоғамы Қызылорда филиалының қызметкеріД.Ниятовтың айтуынша шаңырақ көтерген жас отбасылар көпшілігітұрғын үй алу бойыншакеңес алуға келеді. Осы ретте 2025 жылға дейінқала жастарына арналған «Сыр жастары» жеңілдетілген ипотекалық кредит беру пилоттық бағдарламасын іске асыру көзделген.Алдағы уақытта кеңес орталығының кезекті қабылдау іс-шаралары жылдымалы түрде қала аумағындағы ауылдық округтер және аудандарда өз жалғасын табатын болады. Өйткені, әрбір жастың болашағы – елдің болашағы.

Жастар – мемлекеттің қозғаушы күші

<a href="https://kyzylorda-news.kz/ru/">Kyzylorda-news.kz</a>. Тыңнан түрең салған жаңа жоба жұртшылық жүрегіне жол тапты. Аймақтағы іргелі оқу орны – Қорқыт ата атындағы Қызылорда университетінде жас ғалымдардың ғылыми-зерттеу жұмысын жүргізуге арналған ректор грантына конкурс ұйымдастырылды. Байқауға университет бойынша 22 жоба ұсынылып, оның ішінде 6 жас ғалымның жобасы үздік деп танылды.Ойы зерек, болмысы бөлек жас ғалымдарды анықтау мақсатында қолға алынған конкурс талабына сәйкес, білім ордасының 40 &nbsp;жасқа дейінгі ғалымдары мен 1, 2 курс докторанттары жаңа зерттеулерін ұсынды.Айталық, жас ғалым, аға оқытушы Дархан Орынбеков заманауи Arduino технологиясымен «Smart ботаникалық бақ» жасақтамақ.<blockquote>– «Smart ботаникалық бақ» – әлемдік және жергілікті бірегей флора туралы қазіргі заманғы деректерді қамтитын жоба. &nbsp; &nbsp; &nbsp;&nbsp; Arduino – арнайы білімі жоқ, бірақ қызығушылығы жоғары қолданушыға арналған автоматика және робототехника салаларындағы әртүрлі электронды құрылғыларды жасауға арналған құрал. &nbsp;Arduino бөлшегі &nbsp;датчиктерден сигнал қабылдап, құрылғыларды басқара алады. Ол автономды режимде немесе компьютермен бірге жұмыс істейді. Бақта өсімдік топырағына ылғалдылықты анықтайтын датчик қойылады. Сол датчик көрсеткіштері арқылы автоматты түрде суару қосылады. Өсімдіктердің суару жүйесі автоматтандырылған. 24 сағатта бір рет 10-15 минут суарылады. Ол өсімдіктің түріне де байланысты, – деді грант иегері Дархан Даниярұлы.</blockquote>Ал, университеттегі «Археология және этнография» орталығының ғылыми қызметкері, PhD Ислам Құрманиязов Ежелгі Асанас, Қышқала, Арал-асар ескерткіштерінен табылған остеологиялық материалдарды ғылыми талдау және аймақтық ортағасырлар кезеңіндегі жануарлар әлемі мен өсімдіктер дүниесін зерттеу жұмысын қолға алғалы отыр.Сондай-ақ, «Мәдениеттану» мамандығы бойынша философия докторы Жарқынбек Әбікенов оңтүстік өңір тұрғындарының коммуникациялық мәдениетіндегі үдерістерді зерттеу жұмысымен айналыспақ. Ғалым Қызылорда, Түркістан, Жамбыл, Жетісу, Алматы облыстары мен Алматы, Шымкент қаласы тұрғындарының коммуникациялық дағдыларын басты назарға алуды жоспарлауда.Гранттық жобаларды іріктеуде жоба тақырыбының маңыздылығына, ашықтығына, өзектелігіне ерекше басымдық берілді. Қазақ халық педагогикасындағы дене шынықтыру дәстүрлерін терең зерттеп, студенттерді патриоттық тәрбиелеу жұмысы туралы PhD Талант Бимахановтың жобасы да конкурста қолдау тапты.Ал, педагогика ғылымдарының магистрі, аға оқытушы Ербол Бекіш XIX ғасырдың екінші жартысы мен XX ғасырдың басындағы қазақтың рухани және зайырлы интеллигенциясының ағартушылық-педагогикалық қызметін зерттемек. Сондай-ақ, конкурс барысында тіл мәселесі де назардан тыс қалмады. Бастауыш, орта және жоғары мектеп мұғалімдеріне арналған психологиялық-педагогикалық терминдердің үш тілде глоссарийін әзірлеу туралы Жанна Ізтілеуованың жобасы да қолдауға ие болды.Жобалары үздік деп танылған ғалымдар осы жылдың желтоқсан айына дейін зерттеу жүргізіп, республикалық және халықаралық ғылыми басылымдарға мақалалар жариялайды. Оларға осы жұмыстарды жүргізу үшін жалпы қаржы көлемі 10 млн теңгелік сертификаттар табысталды.Айта кетейік, 2021 жылы жалпы қаржы көлемі 10 млн теңгелік 4 жоба университеттің грантын иеленген болатын. Жас ғалымдарға арналған бұл конкурс дәстүрлі түрде жалғасын тауып келеді.Университеттің ғалымдарға деген қолдауы зерттеушілердің ғылымға деген қызығушылығын арттырып, жаңа жобалардың ашылуына жол ашпақ. Алдағы уақытта да мұндай тың жобалар қанат қаға бермек. &nbsp;

«Smart ботаникалық бақ» қолға алынбақ

<a href="https://kyzylorda-news.kz/">Kyzylorda-news.kz.</a> Театр – тәлім ордасы. Адамгершілік пен ізгіліктің, ұлағат пен тағылымның қарашаңырағы. Көрнекті жазушы Ғабит Мүсіреповтің «Театр – хас сұлудың көз жасындай мөлдір өнер» деп айтуы тегін болмаса керек. Мәдениет пен руханият әлемін театрсыз елестету әсте мүмкін емес.Өнер саласының ішінде театр өнерінің шоқтығы қашан да биік. Себебі, ол өзінің өміршеңдігімен ерекшеленеді. Ал сол өзгеше өнерге жан бітіретін театр артистерінің еңбегі қашанда елеулі.&nbsp;Өнерді заман талабына сай әрқилы етіп өңдеп, театрсүйер қауымға сапалы туындыларын ұсынып келе жатқан өнер ордаларының бірі – А.Тоқмағанбетов атындағы қалалық мәдениет үйі жанынан ашылған «Жастар» театры. Жеті жыл аралығында қаншама жетістікке жеткен шығармашылық ұжым талантты жастардан құралған. Актерлік шеберлігімен, еңбекқорлығымен, ізденімпаздығымен танылып келе жатқан талант Қарлығаш Қонақ солардың қатарында.Қарлығаштың өнерге келуі кездейсоқ емес. Балалық шағынан анасының қолдауымен өнер мектебінде білім алып, тәжірибелі, кәсіби биші атанған. Ұлбосын Жаналиеваның шәкірті атанып, хорда ән шырқаған. Талай додаларға қатысып, жетістікке жеткен.<blockquote>– Бүгінде сахнаға шығып, көрерменнің ыстық ықыласына бөленіп жүруіме анамның ықпалы мол болды. Ол кісі де өнерге біртабан жақын. Менің құлшынысымды арттырған анама алғыс айтамын, – дейді ол.</blockquote>Кейіпкеріміз театрға дейін музыкалық колледжде оқып, классикалық жанрда ән шырқап, үздік шәкірттер қатарында болған. Бір ғана өнермен шектеліп қалмай жан-жақты ізденіп жүріп, түрлі байқауларға қатысып, жеңімпаз атанған.<blockquote>– Колледжден соң Астана қаласындағы Қазақ Ұлттық өнер академиясына вокалдық өнер кафедрасына оқуға түстім. 4 жыл білім алып, кәсіби маман атандым. Оқуымды тәмамдаған соң Сыр еліне қайта келдім. Мамандығым бойынша жұмыс жасаймын деп көп жерге түйіндеме қалдырдым. Десе де, ешбір жер қабылдамады. Бағымды сынап көрейін деп Жастар театрына келгенімде ұстазым Оңталап Нұрмаханов тәжірибем болмаса да өзі тәрбиелеп, сахнаға бейімдеді. Ұстазымның арқасында өзім қатарлы жастармен жұмыс істеп, жаңа қырымнан танылдым, – дейді актриса.</blockquote>Үлкен ұжымға қосылған Қарлығаш талантымен көрерменді бірден баурап алды. Театр репертуарындағы көптеген спектакльдерде ойнай жүріп, әуезді үнімен көпшілік көзайымына айналды. Театрға келгеніне көп болмаса да бірнеше рөлді сахнаға алып шықты. Айта кетейік, жақында премьерасы өткен «Олимптің күйреуі» мифологиялық драмасында негізгі кейіпкердің бірі Афинаны сомдап, көрерменге естен кетпес әсер сыйлады. Шымылдық ашылғаннан финалға дейін оқиғаның өрбуіне атсалысты. Айтуынша бұл рөлді сомдау оңайға соқпаған. Бірақ өзіне бекітілген соң жақсы бейнелеп шықты. Оған көрерменнің шынайы ықыласы дәлел.Талантты артист үшін кішкентай рөл деген болмайды. Берілген образды шынайы жеткізу – қабілет ерекшелігі десек артық емес. Кейіпкеріміз көпшілік сахнадағы шағын рөлдерінен сәтті бейне жасап, қойылымның көзге көріне бермейтін штрихтарын тауып, өз кейіпкерлеріне үйлесімді пайдаланады. Мұның өзі – шығармашылық адамының бойынан табылатын ерекше қасиет.<blockquote>– Сахнаның құдіреті шексіз. Ол әрбір адамды сезеді. Себебі, сахна ол – айна. Актердің ішкі жан дүниесі мен рухани болмысын көрерменге көрсетіп тұрады. Жалпы театр өмірді сүйетіндерге ғана емес, жарық дүниенің сырын жан дүниесімен түсінетіндерге арналған. Бұл бағытта менің жолым болды, – дейді Қарлығаш.</blockquote>Артистің шығармашылық келбеті оның басты не қосалқы рөлді бейнелеуімен немесе олардың санымен бағаланбайды. Керісінше сол рөлдердің ерекшелігімен дараланады. Театр сахнасына шығу – кез келген адамның маңдайына жазылмаған бақыт. Осы өнердің дамуына үлес қосқан майталмандардың жолын жалғайтын талантты жасқа шығармашылық табыс тілейміз. Ақылына көркі сай арудың бағындырар белесі әлі көп.&nbsp;&nbsp;&nbsp;

Театр – ізгілікке толы орта

Қалалық кітапхана – білімпаздар мекені

<a href="https://kyzylorda-news.kz/">Kyzylorda-news.kz.</a>&nbsp; Көктемнің шуақты күндеріндегі айтулы мерекелердің бірі – 8 наурыз – Халықаралық әйелдер күні аудан бойынша кең көлемде аталып өткен болатын. Осы орайда аудан әкімі Серік Сермағамбетов аудан ардагерлерімен бірге ақ жаулықты аналардың отбасыларына арнайы барып, аймақ басшысы Нұрлыбек Нәлібаевтың жылы лебізі мен мерекелік сый-сияпатын жеткізді.Алдымен аудан әкімі Серік Сермағамбетов 98 жастағы 11 баланы дүниеге әкеліп, бүгінде 60 немере, 20 шөбере мен 10-нан аса шөпшекке ақ жаулықты әже болып отырған &nbsp;Қаншай Лекерованың үйіне барып, атаулы мерекесімен құттықтады. Каншай Мұқышқызы 1925 жылы 30 желтоқсанда айдынды Арал өлкесінде дүниеге келіп, Қарақұм ауылдық округінде мал шаруашылығымен айналысып, зейнетке шыққан тыл ардагері және көпбалалы ана.&nbsp;Аудан басшысы Серік Сағитжанұлы өңіріміздің дамуы мен өркендеуіне зор үлес қосқан, еңбек адамы атанған анаға аймақ басшысының құттықтауы мен құрметін жеткізді. Батыр ана әрдайым ардагерлерін ардақтап, үлкенге құрмет көрсеткен аймақ басшысына ризашылығын білдіріп, ақ батасын берді.Мұнан кейін аудан әкімі Күркейді Жиеналиеваны төл мерекемен құттықтап, ізгі тілегін білдірді. Ғасыр жасаған ана қазір 6 баланы дүниеге әкеліп, 12 немере, 52 шөбере сүйіп отыр. Ұзақ жылдар бойы балық зауытында қызмет етіп, еңбек адамы атанған. Ардагер ана аудан әкіміне өз алғысын білдіріп, батасын беріп, ризашылығын білдірді.&nbsp;<blockquote>– Қарттарымыз – қазынамыз. Біз әрдайым Сіздердің еткен еңбектеріңіз бен ел үшін жасаған қызметтеріңізді жадымыздан шығармаймыз. Сіздердің өмір жолдарыңызды әрдайым бүгінгі буынға өнеге етіп келеміз. Бүгінгі өздеріңіз арқылы барша ауданның ақ жаулықты аналары мен қыз-келіншектерді мерекемен құттықтаудамыз, – деді аудан әкімі Серік Сермағамбетов.&nbsp;</blockquote>Арнайы құттықтап келген азаматтарға ризашылығын білдірген ана еліміздің болашағының жарқын болуын тілеп, ашық аспан астында тәуелсіз ел болып өсіп-өркендей беруге тілектестік білдірді.

Ғасыр куәгерлеріне құрмет

Kyzylorda-news.kz. Қызылорда облысының әкімі Нұрлыбек Нәлібаев 8 наурыз – Халықаралық әйелдер күнімен құттықтады.&nbsp;Ардақты аналар! Аяулы әпке-қарындастар! Қыр қызғалдағындай қырмызы қыздар!Сіздерді 8 наурыз – Халықаралық әйелдер күнімен құттықтаймын! Жыл сайын көрікті көктем келіп, Жер-ана түрленгенде, тіршілік бастауы мен әдеміліктің үйлесіміндей әйелдер мерекесін атап өтеміз.Нәзік жандардың қоғамдағы орнын, елдің әлеуметтік-экономикалық дамуына қосқан үлесін бағамдап, құрмет көрсетеміз. Әр үйдің жылуы мен жарығы, бағы мен берекесі болған жандарды қуантуға асығамыз.&nbsp; Тәуелсіз елімізде отбасы институтының өркендеуіне, көпбалалы аналарды, кәсіпкер әйелдерді қолдауға, гендерлік теңдікті қамтамасыз етуге басымдық беріліп келеді.Бүгінде аймақтағы білім, денсаулық сақтау, мәдениет, мемлекеттік қызмет салаларында әйелдер үлесі басым. Олардың белсенді, тындырымды жұмысы абыройға ие. Шаңырақтың түтінін түзу ұшырып, өмірге ұрпақ әкелумен қатар қоғамдағы орнын да нықтаған жандар үлгі тұтуға лайық. &nbsp;&nbsp; Гүл көктемнің шуақты мерекесінде баршаңызға зор денсаулық тілеймін. Отанымыздың бір бөлшегі – отбасында бақытқа бөленіп, еңбекте, кәсіпте табысқа кенеле беріңіздер! Әйелдер мерекесі әлемді әдемілігімен әрлендірсін, әсерімен әлдилесін!Құрметпен, Облыс әкімі Н.Нәлібаев

Аймақ басшысы Халықаралық әйелдер күнімен құттықтады 

Kyzylorda-news.kz. Қала орталығындағы жалпы ұзындығы 4,2 км болатын Сұлтан Бейбарыс көшесін қайта жаңғырту жұмыстары қарқынды жүруде. Ақпан айында басталған жолдың құрылысы осы жылдың тамыз айында аяқталады деп жоспарлануда. Бұл туралы Өңірлік коммуникациялар қызметінің ұйымдастыруымен өткен көшпелі брифингте облыстық жолаушылар көлігі және автомобиль жолдары басқармасының басшысы Пакуатдин Шамұратов хабарлады.<blockquote>-Қазіргі таңда Сұлтан Бейбарыс көшесінде реконструкциялау жұмыстары жүріп жатыр. Жалпы осы жолды кеңейту мақсатында жобалық-сметалық құжаттарды әзірлеп, республикалық бюджетке ұсынылған болатын. Осының нәтижесінде, бюджеттен тиісті қаражаттар бөлінуде. Бұл жолдың мердігері «УАД» ЖШС мекемесі. Жалпы Сұлтан Бейбарыс көшесінің құрылысы 12 ай деп белгіленген болатын. Дегенмен, медігер мекемелермен бірлесіп, осы жылдың қыркүйек айына дейін заманауи жолды ел игілігіне табыстаймыз деп жоспарлап отырмыз, - деді басқарма басшысы Пакуатдин Шамұратов.&nbsp;</blockquote>Сұлтан Бейбарыс көшесінде заманауи жарық шамдар мен аялдамалар және жаяу жүргінші жолдар салынады. Сондай-ақ, бұл көше 4 жолақты болып кеңейтіледі. Осының нәтижесінде, қала орталығында кептілістер азайып, автомобиль жолы кеңеймек.<blockquote>-Қазіргі таңда Назарбаев даңғылынан бастап Құмкөл трассасына дейін реконструкциялау жұмыстары жүргізілуде. Бұл жобаның құны - 2 млрд.349 млн теңгені құрайды. Жалпы, бұл жолдың сапалы әрі ыңғайлы болуы үшін тиісті мекемелермен күнделікті қадағалау жүргізілуде. Күз мезгіліне дейін халық игілігіне табысталатын болады, - деді қалалық тұрғын үй-коммуналдық шаруашылық, автомобиль жолдары және жолаушылар көлігі бөлімі басшысының орынбасары Дархан Бақтияров.</blockquote><img src="https://knadmin.beoblood.kz/uploads/FB_IMG_1678245474294_5a066da57b.jpg" alt="FB_IMG_1678245474294.jpg">

Қазақстан және Қызылорда облысының жаңалықтары