<a href="https://kyzylorda-news.kz/">Kyzylorda-news.kz.</a> Жалағаш кентінің тұрғыны Нұрлыбек Әбілхановтың үй жиһаздарын жасаумен айналысып келе жатқанына он жылға жуықтапты. Әрине, адамның кәсібін кеңейтетін де, тәжірибесін толықтыратын да – уақыт. Жасынан қолөнерге қызығатын Нұрлыбек әдепкіде дайын жиһаздарды құрастырумен айналысқан. Қазіргі заманауи үй жиһаз-дарының құрылымы күрделі екенін ескерсек, оны құрастырып, орналастыру үшін де бейімділік және көп уақыт пен темірдей төзім керек. Ал «трансформер» деп аталатын жиналмалы ағаш жиһаздардың әр бөлшегі өте бағалы. Сондықтан бұл орайда үлкен жауапкершілік те керек.Осындай жұмыстарды бар ынтасымен өте тиянақты атқаратын Нұрлыбекке жаңа жиһазды жинауға шақыртулар көп болыпты. Адам баласының не нәрсеге де қызығушылығы көзімен көріп, білген соң оянады. Егер соған бар ықыласымен ден қойса, сол адам қиялынан туып, қолынан шыққан дүниені өзі де жасап үйренеді. Нұрлыбектің де кәсіп бастауына сол қызығушылығы себеп болған.&nbsp;– Әр адамның өз табиғатына қарай бейімділігі болады ғой. Егер ата-анасының немесе басқа да жанашыр жақындарының бағыт-бағдарымен бойында бар бейімділігіне қарай кәсіп істесе, жұмысы берекелі болады екен. Мен әу баста туған-туыстарымның, таныстарымның өтінішімен сатып алған дайын үй жиһаздарын құрастырып беріп жүрдім. Дайын дүниені жинау сырт &nbsp;көзге оңай көрінгенімен, жұмыс барысында оның да өз қиындығы білінеді. Біріншіден, ол жұмыс икемділікті, аса ұқыптылықты қажет етеді. Өйткені қыруар қаржыға келген бағалы жиһаздың бір-біріне кірігіп, бекітілетін бөлшектерінің орнын ауыстырып алсаңыз, ағаштары жараланып, жаңа жиһаз жарамсыз болып қалады. Екіншіден, қиналмай жұмыс істеуің үшін қажетті құрал-сайманың түгел болуы керек. Сондықтан мен ақырындап қажетті құралдар сатып ала бастадым. Өйткені басында жақын адамдардың өтінішімен тегін істеп беріп жүрген жұмысыма шақырғандар соңғы уақытта ақы төлей бастады. Әрине қазіргі заманда еткен еңбегіңе қарай оның өтемі де болуы керек деп ойлаймын және ол – сенің Алла адалдан бұйыртып тұрған несібең. Ал несібеден бас тартуға болмайды. Сонымен мен аудан төңірегінде көп үйдің жаңа жиһазын орнатып бердім. Күн өткен сайын өз жұмысыма көңілім толып, содан бір жақсы әсер алатын болдым. Қазір біз жаңа заманға сай жақсы тұрмыста өмір сүруіміз керек дегенді көп айтып жүрміз. Бұл есепсіз ақша шашып, үйге байлық жинап, қымбат жиһазға толтырып қою керек деген сөз емес. Менің ойымша, үйімізде тек бізге қажетті, біздің өмір сүруімізге қызмет ететін дүниелер ғана тұруы керек. Басы артық нәрсе үйді тарылтады әрі бөлмелердегі өзара эстетикалық үйлесімді бұзады. Бұл ой маған сол жиһаз құрастырып жүргенде келді. Жасыратыны жоқ, көбіміз қазақы ұғымға, өлшемге салып, үй ішіне үйлеспейтін жиһаздарды жинай береміз. Тіпті кейде алған дүниелерімізді тар бөлмелерге сыйғыза алмай, қиналып жатамыз. Осындай жағдайларға бірнеше мәрте куә болғасын менің дизайнерлік қырым да ашыла бастады. Қорабынан алынған жаңа жиһаздарды құрастырып болған соң, әр бөлменің қай бұрышына, қалай тұру керектігіне дейін өзімнің талғамым бойынша кеңес беріп жүрдім, – дейді Нұрлыбек Әбілханов.&nbsp;Иә, ең алғаш кәсібін дайын жиһазды құрастырушы болып бастаған Нұрлыбек қазір үйінің жанынан шағын цех ашып, тапсырыс бойынша үй жиһаздарының түр-түрін жасап отыр. Бүгінде заманға қарай адамдардың тұрмыстағы талғамы да өзгерді. Әсіресе киген киімімізден бастап, тұтынатын барлық заттарымыздың дизайнына жіті мән беретін болдық. Соның ішінде заманға лайық жаңа үй салып, оның ішіне орналасатын жиһаздарды да түр-түсіне, пішін үйлесімділігіне қарай таңдайтын жағдайға жеттік. Әрине бұған қуануымыз керек. Таңдау мен талғам болған жерде жақсы да жайлы тұрмыс қалыптасады. Жақсы, жайлы тұрмыста өмір сүрген адам ұзақ жасайды.&nbsp;Нұрлыбек қазір өзінің шағын цехында ас бөлменің, қонақ бөлменің, жатын бөлменің, балалар бөлмесінің және демалыс бөлмелерінің, ауызғы бөлменің сәнін кіргізіп тұратын жиһаздардың барлық түрін тапсырыс берушінің таңдауына, талғамына қарай әдемі әрі сапалы етіп жасап шығарып отыр. Дизайндары да ерекше, бір-біріне ұқсамайды. Аудан тұрғындарынан түскен тап¬сырысты қолдың жұмысымен үлгеріп, үдесінен шыға алмайтыны белгілі. Сондықтан Нұрлыбек Әбілханов өткен жылы шағын несиелік ұйым арқылы 5 млн теңге несие алып, өзіне қажетті станоктар әкеліп, орнатыпты. Қазірде цехта жиһаздың ағаштарын түрлі пішінде кесіп, қиып дайындайтын және сол дайын болған бөлшектердің бетіне түрлі ою-өрнек салатын, сонымен бірге ағаштың сапасын арттыру үшін нығыздайтын электрлі заманауи 3 станок үздіксіз жұмыс істеп тұр. Бұл станоктардан кесіліп, қысқарып, жонылып шыққан материалдардың түзулігінде, дәлдігінде және салынған мәнер, өрнегінде мін болмайды. Өйткені жұмыс барысын адамнан бөлек, компьютер мүлт жібермей бақылап тұрады. Алдымен тақтайға түсетін нақыш-бедерін, көлемін, әр бұрышының өлшемін есептеп, мониторға салады да, сол бойынша кесіп-пішіп, кескіндеп шығарады.&nbsp;Жиһаз цехында болдық. Біз барғанда ішінде қызу жұмыс жүріп жатыр. Дайын болып, жарқырап тұрған жиһаздар көздің жауын алады. Айтпақшы, бұл жерде тек үй жиһаздары ғана жасалмайды. Сонымен бірге мекемелерге және мектептер мен балабақшаларға, асханаларға, мейрамханаларға қажетті жиһаз-жабдықтарға да тапсы-рыс көп түсетінін көрдік. Олар жұмыс істеуге ыңғайлы, балаларға қауіпсіз болуы үшін белгілі бір стандарттарға сәйкес жасалады.&nbsp;Нұрлыбек қазір жұмысына қажетті шикізаттарды Қызылорда қаласынан арнайы тапсырыспен алдырып отыр. Тұрғындар бағасына қарай және өздерінің талғамына сай ЛДСП, МДФ және акрил секілді материалдардан жасалған жиһаздарды таңдайды.Әзірге барлық жұмысты жалғыз өзі істеп жатқан цех иесі алдағы уақытта екі адамды жұмысқа алатынын айтады.

Жалағашта жиһаз жасалады

<a href="https://kyzylorda-news.kz/">Kyzylorda-news.kz.</a> Жаңақорғандық өрендер Дубайдан сүйінші жаңалықпен келді. Оқушылар арасында өткен ментальді арифметикадан Халықаралық олимпиададан біздің жеткіншектер олжалы оралды. “Озат” оқу орталығынан барған математиктер бір алтын, екі күмісті қоржынға салып, қазақ елінің абыройын асырып қайтты. Жүлдегерлерді жерлестері күтіп алып, қошемет көрсетті.Халықаралық Олимпиаданың алауы бұл жолы Араб елінде желбіреді. Қазақстан, Өзбекстан, Ресей, Словакия және жергілікті оқушылар арифметикадан өзара бақ сынап, озықтарды анықтады. Бұл сынға біздің ауданнан үш оқушы қатысты. Олар алдымен облыстық, республикалық байқаулардан оза шауып, жолдама жеңіп алды. Көп ұзамай Дубайға бет алды. Бірнеше күнге созылған сында үш математигіміз де тұғыр биігінен көрінді.<blockquote>«Әрине, өзге елде өтіп жатқаннан кейін қобалжу болды. Дегенмен, қазақ елінің сенімін арқалап келген соң жеңіспен оралу керек деген мақсат тұрды. Әуелі ата-аналарымызға, мектептегі және оқу орталығындағы ұстаздарға үлкен алғыс айтамыз. Бұйырса, бұдан да биіктен көрінеміз деген үміт бар», – деді чемпион Алихан Батырбек.</blockquote>Алихан №163 мектептің оқушысы, ал, қос күмісті иеленген Бекзат Пірназар мен Саида Алихан №169 Н.Илялетдинов атындағы білім ошағының тәрбиеленушілері. Жеңімпаздарды аудан әкімінің орынбасары Бектас Нұрдинов, аудан әкімінің әйелдер ісі, отбасы гендерлік саясат жөніндегі кеңесшісі Роза Исаева бастаған бір топ ұстаздар мен оқушылар арнайы күтіп алып ізгі тілегін білдірді.Жалпы, ментальді арифметика деген не? Ментальді арифметика 4-14 жас аралығындағы балалардың зияткерлік қабілетін дамытуға арналған, ойша есеп жүйесіне негізделген бағдарлама. Негізінен, оның тарихы тереңде, ежелгі Қытайдағы абакус есептеу құрылғысының пайда болуымен тығыз байланысты. Бұл сала мамандарының айтуынша, балалардың ұсақ моторикасын дамытып, миының екі жақ жарты шарының үйлесімді дамуына әсер етеді. Сонымен қатар баланың зейіні мен фотографиялық есте сақтау қабілеті артып, шығармашылық ойлау, байқампаздық, өз-өзіне сенімділік, нақтылық, жылдамдық пайда болады.<blockquote>«Үш оқушы да біздің орталықтың үйірме қатысушылары. Орталықтың жұмыс жасап келе жатқанына 6 жылға жуық уақыт өтті. Осы жылдар ішінде қаншама баланы біліммен сусындатып, байқауларға қатыстырып келеміз. Олар пәндік олимпиадаларға жиі қатысып, олжалы оралуда. Әсіресе, ағылшын, орыс тілінен еркін сөйлеп, математикадан толайым табыстарға жетіп жүрміз. Қазір орталықта 100-ге жуық оқушы бар, олар 9 түрлі бағытта білім алады. Ұзартылған топ, көркем жазу, жылдам оқу, математика, ментальді арифметика, ағылшын және орыс тілі, ерте жастан дамыту курсы, логопеддефектолог сынды үйірмелер жұмыс жасауда. Бұл жеке мектеп емес, үйірме үйі, көп ата-аналар осыдан шатасады. Жоспар көп, ең бастысы, балалардың зейінін ашып, оқу үлгерімін жақсарту біздің мақсатында жұмыс жасаудамыз», – дейді орталық директоры Айдана Ақәділқызы.</blockquote>Болашақ – білімді жастың қолында. Білімімен, әрі өнерімен көзге түсіп жүрген кішкентай бүлдіршін атаулы байқауға қатысқан Асан Айгерім Талғатқызының да өз айтары бар. Жастайынан зеректігімен ұстаздарының көзіне түскен оқушы математика пәнінен алғырлығын танытып, облыстық, аудандық сайыстарда жүлделі белестерді бағындырып жүр. Халықаралық олимпиадада ментальды арифметикадан жүлделі орынды &nbsp;иеленіп, мерейі өсті. Ол аудандағы &nbsp;«Зейін» бастауыш мектебінің 4 сынып оқушысы.Бұл сөзімізді Айгерімнің ұстазы Әлия Сейдуалиева қолдай кетті:<blockquote>«Айгерім өте зерек шәкірт. Математика тіліне деген қызығушылығы басым. Үйреткен жаңа сабақты тез ұғып, өз бетінше сөздіктерді жаттап, сөйлемдерді құрастырып отырады. Әр баланың өзіне тән ерекше қасиеті болады. Жаңартылған білім бойынша сабақ беріп келе жатырмын. Өзінің білімге, есепке ынтасы өте жоғары», – дейді ұстазы.</blockquote>Әлі ойын жасындағы бала болса да Айгерімнің білімге деген құштарлығы басым, болашағына қойған мақсаты айқын. Бос уақытында есеп шығарып, түрлі кітап оқып, ағылшын және орыс тілін меңгеруді алға қойған оқушының арманы асқақ. Айтар ойы мығым.<blockquote>«Ата-анам әрдайым білімдінің болашағы жарқын деп айтып отырады. Мен де болашақта білімді, білікті маман болуды армандаймын. Арманым болашақта білікті, өз ісімнің нағыз маманы болғым келеді», – дейді дарынды оқушы.</blockquote>Болашағын баянды етуді мақсат тұтқан балауса қыздың талпынысы қатарластарына үлгі-өнеге екені даусыз. Ол білімін шыңдауда білім додаларына да жиі қатысып отырады. Осы талабынан жаңылмаса Айгерім Талғатқызын әлбетте биіктен көреріміз анық, «Талаптыға нұр жауар», – дегендей жас талапкерге болашақта алар асуы биік, жолы ашық болуына тілекшіміз. ХХІ ғасыр білім ғылымның, озық техниканың алтын дәуірі. Алдағы уақытта осындай талантты жастардың дарынын шыңдап, білімін жетілдіре түсу міндеті тұр. Сонда ғана өркендеудің биік белесіне көтерілеріміз анық.Бұл орталық туралы біз білеміз, 2017 жылдан бері жұмыс жасап келеді. Жетістіктері де бір төбе. Бүгінгі жүлдегер үш оқушының ұстазы Лаура Нұрымбетова: “Бұл оқушылардың ең ірі жетістіктерінің бірі. Бұйырса, биылға меже биік. Оқушылар мұнымен тоқтап қалмайды. Жеңімпаз оқушылардың ата-аналарына алғысымыз шексіз. Осындай зерек бала тәрбиелеп жатқандарына ризашылығымызды білдіреміз» – деп жылы тілегін жеткізді.Айта кететіні, егер балаңызды оқу орталығына бергіңіз келсе еш кедергі жоқ. Оқу ақысы да қалтаға қонымды. Бәрінен бұрын баланың сөйлеу, ойлау және жазу қабылетінің артуына ұжым жұмыс жасайды. Міне, 2023 жылы Дубайдан жеткен дүбірлі жаңалықтың басы осы болды. Алда әлі шет ел асатын оқушылар жетерлік. Ол уақыттың еншісінде.

Жаңақорғандық өрендер Дубайдан олжалы оралды

<a href="https://kyzylorda-news.kz/">Kyzylorda-news.kz.</a> Қызылорда қалалық прокуратурасы мен қалалық пробация қызметінің ұйымдастыруымен қалалық жұмыспен қамту орталығында «Бос жұмыс орындары жәрмеңкесі» акциясы өтті.Жәрмеңкеге қалалық пробация қызметінің есебінде тұрған 18 азамат жұмыс іздеуші ретінде қатысты. Бос орындар жәрмеңкесінде «Қызылорда Тазалығы», «Қызылорда су жүйесі», «Қызылорда автобус паркі» секілді бірнеше жұмыс беруші мекемелерден бос жұмыс орындары ұсынылды.Нәтижесінде пробация қызметінің есебінде тұрған 14 азамат жұмысқа орналасуға жолдама алды.<blockquote>«Есепте тұрған сотталғандарды жұмысқа орналастыру олардың құқық бұзушылықтармен қайта қылмыс жасауларының алдын алу шараларының бірі болып табылады. Есептегі азаматтарға жергілікті атқарушы органдармен бірлесіп, әлеуметтік-құқықтық, заңгерлік, медициналық, психологиялық және тағы басқа көмектерді көрсетеміз. Сондай-ақ қалалық жұмыспен қамту орталығымен сотталғандарды жұмысқа орналастыру, кәсіпкерлік негіздері курстарына оқуларға жіберу секілді жұмыстарды атқарып келеміз. Қазіргі таңда қалалық пробация есебінде 500-ден астам азамат есепте тұрады. Осы азаматтардың арасында 12 сотталған азамат бүгінде тұрақты жұмысқа орналастырылды. Бас бостандығынан айыру орындарынан босатылған және пробация қызметінің есебінде тұрғандарды жұмыспен қамту мақсатында Қызылорда қаласы әкімдігінің қаулысымен 50 жұмыс орындарының квотасы бекітілген. Есептегі жұмыссыз 18 адам квотамен жұмысқа орналасты. Алдағы уақытта да есептегі жұмыссыз азаматтарды жұмысқа орналастыру үшін осындай жәрмеңкелерге қатыстырып, жұмыс табуына ықпал етеміз», - дейді қалалық пробация қызметінің бастығы, әділет подполковнигі Даулет Садуақасов.</blockquote>

Бос жұмыс орындары жәрмеңкесіне қатысқан 14 сотталған жолдама алды

<a href="https://kyzylorda-news.kz/">Kyzylorda-news.kz.</a>&nbsp;Қазір сәулет-құрылыс нысандары мен тұрғын үй құрылысы жұмыстарына экономикалық және экологиялық жағынан тиімді өнімдерге деген сұраныс көбейіп отыр. Осыны ескерген кәсіпкер Мұрат Әбілов өңірде сұранысқа ие «Ековата» құрылыс материалын шығаруды қолға алды. Бұл өнім – экологиялық тұрғыдан тиімді әрі салмағы жеңіл. Бағасы да қолжетімді. Ең бастысы, материал сапалы әрі төзімді.Бір ерекшелігі, бұл «Ековата» құрылыс материалына құрт-құмырсқа жоламайды, ыстыққа төзімді, суыққа шыдамды көрінеді. Мәселен, еліміздің батыс, солтүстік өңірлері үй қабырғасын қаптауға және төбесін жабуға осы материалды жиі қолданады екен. Қыста үйдің жылы болуына осы «Ековатаның» үлкен септігі бар. Міне, енді көптің игілігіне жараған, оңтүстік өңірлерде де сұранысы артқан бұл сапалы құрылыс материалы бізге де келді.Мұрат Әбілов материалдың дайындалу технологиясын меңгеруге 3-4 жылын арнады. Сапалы дүние шығару үшін цех құрылғыларын шетелден арнайы тапсырыспен алдырды. Бүгінде қолға алған кәсібін дөңгелентіп, тұрғындардан тапсырыс қабылдауды бастаған.Айта кету керек, жеке кәсіпкер 2020 жылы эковата өндіру цехына жеке қаражат есебінен 13,0 млн теңге және «Бизнестің жол картасы 2020» мемлекеттік бағдарламасы аясында 2,0 млн теңге грант қаражатын иеленген. Ол «Адима» ЖК-нің жетекшісі. Кәсіпкер мемлекеттен берілген қаржыға өндіріске қажетті құрал жабдықтарын сатып алып, кәсібін алғаш бастаған. 2 адамды жұмыспен қамтыған цех аудан тұрғындарының қажеттілігін қамтамасыз етіп отыр.&nbsp;

Кәсіпкер өңірде сұранысқа ие «Ековата» құрылыс материалын шығарып жатыр 

<a href="https://kyzylorda-news.kz/">Kyzylorda-news.kz.</a>&nbsp; «AMANAT» партиясы Қызылорда облыстық филиалының ұйымдастыруымен тұрғын үй және коммуналдық шаруашылық сала бойынша тақырыптық қабылдау өткізілді. Қабылдауға қалалық тұрғын үй инспекциясы бөлімінің басшысы Абзал Рысбек және қалалық тұрғын үй-коммуналдық шаруашылық, автомобиль жолдары, жолаушылар көлігі бөлімінің қызметкерлері қатысты.Қабылдау барысында Қызылорда қаласы, Назарбаев 2а көпқабатты үйдің тұрғындары жертөлесі суға толғанын айтып, жертөледегі канализациялық трубаны жөндеу жұмыстарына көмек сұрады.Келушілерге жөндеу жұмыстарын осы жартыжылдықта жүргізу қажеттілігі, тұрғын үйге барып, ақау актісін әзірлейтіні түсіндірілді. Қажетті құрылыс материалдарын сатып алса, жөндеу жұмыстарына көмек көрсетілетіндігі айтылды.Әйтеке би 26 көпқабатты үй тұрғыны пәтеріндегі жылу мәселесіне қатысты шағым білдірді.Тұрғынның мәселесі бойынша бөлім қызметкерлері тарапынан арнайы зерттеу жұмыстары жүргізіліп, көмек көрсету мүмкіндіктері қарастырылатын болды.Сонымен қатар, Атамекен көшесінің тұрғындары көшеге тас жол төсеу бойынша өтініш білдірді.Қалалық тұрғын үй-коммуналдық шаруашылық, автомобиль жолдары, жолаушылар көлігі бөлімінің қызметкерлері аталмыш көше тас жол төсеуді қажет ететін көшелер тізіміне енгізілгенін және алдағы уақытта тиісті жобалық-сметалық құжаттар әзірленетінін жеткізді.<figure class="image"><img src="https://knadmin.beoblood.kz/uploads/339260636_609841500718044_1271603958242701241_n_a6f763d8c5.jpg" alt="339260636_609841500718044_1271603958242701241_n.jpg"></figure>

«AMANAT»: Тұрғын үй және коммуналдық шаруашылық сала бойынша қабылдау өткізілді

<a href="https://kyzylorda-news.kz/">Kyzylorda-news.kz.</a> «AMANAT» партиясы Республикалық сайлауалды штабының Сыр өңіріндегі ауылшарушылығы саласы өкілдерімен кездесуі барысында «Ы.Жақаев атындағы Қазақ күріш шаруашылығы ғылыми зерттеу институты» ЖШС басқарма төрағасы Самалбек Қосанов қала тұрғындарына бау-бақша өсіруге жағдай жасау мәселесін көтерген болатын.Аталмыш мәселе жақында партияның облыстық филиалының Атқарушы хатшысы Ләйлә Төрешованың төрағалығымен партия алаңында арнайы қаралды.Отырысқа Қызылорда қаласы әкімінің орынбасары Д.Ермеков, қалалық ауыл шаруашылығы және жер қатынастары бөлімі басшысы м.а. Қ.Жүсіпов, Қарауылтөбе ауылдық округінің әкімі Е.Ахетов және С.Қосановтың өзі қатысты.Жиын барысында аталған ұсыныс жергілікті әкімдік пен тиісті бөлімдер тарапынан қолдау тауып, оң шешілетін болды. Қазір қала тұрғындарына бау-бақша егіп, күнкөріс қамын жасаймын деген азаматтар болса, әр отбасына маусымдық кезеңге Қарауылтөбе ауылдық округі маңынан картоп, көкөніс және бақша дақылдарын егуге 10 сотық жер берілетін болып шешілді. Атап өтейік «Ы.Жақаев атындағы Қазақ күріш шаруашылығы ғылыми зерттеу институты» бұл іске қолдаушы болып отыр. Жер, аяқ су барлық мүмкіндік жасалады. Мұнан бөлек жиын барысында Қарауылтөбе ауылының есік алдында бақша өнімдерін өсіруді жүзеге асырамын деген тұрғындары үшін тегін тұқым қарастыру мәселесі де сөз болды.Бақша дақылдарын егуге ынталы тұрғындарды Қызылорда қаласы әкімдігінің «Қызылорда қаласының Ауыл шаруашылығы және жер қатынастары бөлімі» КММ-не 27-11-58, 27-45-49 байланыс телефондары арқылы хабарласуға болатындығын назарға саламыз.<figure class="image"><img src="https://knadmin.beoblood.kz/uploads/339163266_1549128765496830_3030506232063541425_n_28d924f34d.jpg" alt="339163266_1549128765496830_3030506232063541425_n.jpg"></figure>

Қала тұрғындарына бақша дақылдарын егуге жер беріледі

<a href="https://kyzylorda-news.kz/">Kyzylorda-news.kz.</a>&nbsp; Жас мамандардың үйлі болуына «Дипломмен – ауылға» бағдарламасы арқылы зор мүмкіндік жасалып келеді. Өткен жылы мемлекеттік бағдарлама шапағатын көрген жас мамандар жаңа отаудың иесі атанған болатын.Жалпы, «Дипломмен – ауылға» мемлекеттік бағдаламасы елімізде осыдан 13 жыл бұрын қолданысқа енгізілгендігін еске салайық. Негізгі жобаның мақсаты – ауылдық жерлерде жұмыс істеуге келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен саласының жас мамандарын ынталандыру болып табылады. Аудан жастарының баспаналы болуына жол ашатын жоба бүгінде өз тиімділігін көрсетті. Көптеген жас маман бағдарлама бағытымен ауылдық жерлерге жұмысқа орналасып, бүгінде елді мекеннің тұрғылықты тұрғындарына айналды.2022 жылға көтерме жәрдемақының мөлшері 100 АЕК мөлшерімен есептеліп, бір маманға 306300 теңгені құраған. Яғни, 106 маманға 32 467,8 мың теңге қаржы бөлініп, көтерме жәрдемақы төленген. Оның ішінде, денсаулық сақтау саласында 25 маман, білім саласында 61 маман, мәдениет саласында 8 маман, спорт саласында &nbsp;6 маман, агроөнеркәсіп саласында 3 маман және мемлекеттік қызмет саласында 3 маманға мемлекет тарапынан атаулы жәрдемақы берілген. Сонымен бірге Өткен жылы тұрғын үй сатып алу үшін берілетін бюджеттік несиенің мөлшері 1500 АЕК мөлшерімен есептеліп, бір маманға 4 594,5 мың теңгені құраған. Яғни, 54 маманға 248 103,0 мың теңге қаржы бөлініп, бюджеттік несие берілген. Оның ішінде денсаулық сақтау саласында 14 маман, білім саласында 29 маман, мәдениет саласында 1 маман, спорт саласында &nbsp;6 маман, агроөнеркәсіп саласында 2 маман және мемлекеттік қызмет саласында 2 маманға бюджеттік несие берілген. Жәрдем ақыға қол жеткізген сала мамандарын жаңа отаудың иесі атанған.&nbsp;<blockquote>&nbsp;Ауылдық жерлерде тұратын жастарға «Дипломмен – ауылға» бағдарламасы қолайлы етіп жасалған. Өзім медициа саласының маманымын. Өткен жылы аталған бағдарлама бойынша несие алып, өз үйіме қол жеткіздім. Жас отбасы ретінде бағдарламаның шапағатын сезіндік. Бюджеттік сала мамандары қалауынша үй таңдап, бағдарламаның көмегіне жүгінсе болады. Қазіргі уақытта мемлекет тарапынан көрсетілген қолдауды анық сезінген жастардың үйлі болуға зор мүмкідігі бар. Алдағы жылдары біз секілді аудан жастары жаңа үйдің кілтіне қол жеткізеді деп сенеміз, – деді Тереңөзек кентінің тұрғыны Әсел Аябекова. &nbsp;</blockquote>

«Дипломмен – ауылға» бағдарламасының игілігі мол

<a href="https://kyzylorda-news.kz/">Kyzylorda-news.kz.</a> Ел өңірлерінде жанар-жағармай құю станцияларында ЖЖМ өткізуді шектеу фактілерінің жиілеуіне байланысты Бәсекелестікті қорғау және дамыту агенттігі бұл әрекеттер монополияға қарсы заңнаманы бұзу екендігін еске салады.Кәсіпкерлік кодекс нарыққа қатысушылардың келісілген іс-әрекеттеріне және басым компаниялардың тауарды өткізуден негізсіз бас тарту жөніндегі іс-әрекеттеріне тыйым салады.Мемлекеттік органдар күн сайын жанар-жағармай құю станцияларында және сақтау базаларында мұнай өнімдерінің сатылуына мониторинг жүргізеді.Бағаның жоспарлы өсуіне қарамастан, кәсіпкерлік субъектілері ЖЖМ болған кезде оларды белгіленген бағалар бойынша уақтылы өткізу міндетті.ЖЖМ қалдық көлемі ұлғайған және ЖЖМ өткізуді шектеу кезінде жосықсыз кәсіпкерлерге қатысты шаралар қабылданатын болады.Монополияға қарсы заңнаманы бұзғаны үшін әкімшілік құқық бұзушылық туралы Кодекс аясында компания табысының 5% - на дейін айыппұл салуды көзделген.Қазіргі уақытта Бәсекелестікті қорғау және дамыту агенттігінің аумақтық органдары заңнаманы бұзу белгілерінің болуы тұрғысынан ЖЖМ өткізуді шектеу фактілерін пысықтауда.Бәсекелестікті қорғау және дамыту агенттігі кәсіпкерлерді бәсекелестік заңнаманың талаптарын мүлтіксіз сақтауға және ЖЖМ-ды толық көлемде іске асыруға шақырады.Сондай - ақ азаматтардан ЖЖМ сатудан бас тартқан жағдайларда Агенттіктің аумақтық бөлімшелеріне, ал белгіленген бағалар асып кеткен жағдайда - Ұлттық экономика министрлігі Табиғи монополияларды реттеу комитетінің аумақтық бөлімшелеріне жүгінулерін сұраймыз.<a href="https://www.gov.kz/.../entities/zk/about/structure/100/1...">БҚДА аумақтық департаменттерінің колл орталығы</a>.<a href="https://www.gov.kz/memleket/entities/krem/contacts?lang=kk">ҰЭМ Табиғи монополияларды реттеу комитеті аумақтық департаменттерінің колл орталығы</a>.&nbsp;

Май құю бекеттері жанар-жағармай саудасында шектеу қойғандары үшін жауапкершілікке тартылады

<a href="https://kyzylorda-news.kz/">Kyzylorda-news.kz.</a>&nbsp; Cырдария ауданына қарасты Тереңөзек кенті мәдениет үйінде «Нұра топтық су құбыры» ШЖҚ РМК «Арал» СЖКБД филиалы Сырдария ауданының оқшау сумен жабдықтау жүйесін пайдаланушы өндірістік бөлімшесінің есеп беру жиыны өткізілді. Жиынға аудан әкімінің орынбасары Талғат Нұртазаев, «Нұра топтық су құбыры» ШЖҚ РМК «Арал» СЖКБД филиалының директоры Нәжмәдин Шамұратов, сала ардагерлері мен қызметкерлері қатысты.Келелі басқосуда Сырдария ауданының оқшау сумен жабдықтау жүйесін пайдаланушы өндірістік бөлімшесінің директоры Ерсұлтан Дүзімбетов хабарлама жасады. Ол алдымен халықты ауыз сумен қамтамасыз ету бойынша өткен жылы атқарылған жұмыстарға тоқталып өтті.<blockquote>Өндірістік бөлімше өткен жылы 1 055 215 текше метр су көлемін өндіріп, 901 153 текше метр ауыз су тұтынушыларға таратылды. Былтыр бекітілген жоспар бойынша халыққа 788 105 текше метр су қаралса, одан ақшалай есебі 24 647 654 теңге қаражат жиналуы қажет. Бұл жұмыс бекітілген жоспардан асып, яғни халық тұтынған ауыз су көлемі 808 497 текше метр болып, нақты 33 887 695 теңге қаражат жиналды. Оның ішінде толық тарифтен 9 455 372 қаржы жиналды. Аудан бойынша ауыз су тұтынушы жеке тұлғалар саны – 7413 абонент, олардың 6685-іне су есептегіш құрал орнатылған, – деген бөлімше директоры кәріз жүйесі бойынша атқарылған жұмыстарды атап өтті</blockquote>Кәріз саласы бойынша өткен жылға халықтан 16 680 текше метр, мекемелерден 17 435 текше метр лас су шығару жоспары қаралған. Ал орындалғаны халықтан 20 189, мекемелерден 35 547 текше метрді құраған. Жалпы 2022 жылы 55 843 текше метр лас су шығарылған. Ауданда кәріз жүйесін 312 абонент және 14 мекеме тұтынады.Бөлімше директоры есепті баяндамасында күрделі мәселелерді де қозғады. Атап айтқанда, аудан бойынша 21 көшеде ауыз су құбырының тозығы жетіп, ақау пайда болуда. Бұған қатысты бөлімше тарапынан сызба жұмыстары әзірленіп, аудандық бюджет есебінен жобалық-сметалық құжаттары дайындалған. Енді биыл күрделі жөндеу жұмыстары жүргізіледі деп күтілуде. Сондай-ақ Тереңөзек кенті, Шіркейлі, Іңкәрдария ауылдарындағы сыйымдылығы 25-50 текше метрді құрайтын ауыз су мұнаралары да тозығы жетіп, жаңасын ауыстыруды қажет етеді. Негізінен, өткен жылы аудан бойынша салаға қатысты 309 апаттық жағдай тіркелген. Оның 42-сі кәріз жүйесіне қатысты болған.Сондай-ақ, есепті кездесуде «Нұра топтық су құбыры» ШЖҚ РМК «Арал» СЖКБД филиалының директоры Н.Шамұратов сөз сөйлеп, сала жұмысына серпін беру бағытында атқарылатын жұмыстарға тоқталды. Ең алдымен филиал директоры қазіргі таңда ауыз су тарифіне өзгеріс енгізу бағытында жұмыс жүргізіліп жатқанын жеткізді. Оның негізгі себебі ауыз су жүйесіндегі құбырларды жаңарту, жаңа техникаларды алу секілді саладағы көптеген мәселелердің шешімін табуы қаржыға келіп тіреледі. Мәселен, халық 1 куб, яғни 1000 литр суға 30 теңге төлейді. Оның өзінде тұтынған суға ақысын төлемейтін тұтынушылар бар екен. Сондықтан осыларды ескеріп, сала жұмысына серпін беру үшін, қызметкерлердің айлық жалақысын көтеру үшін осындай ұсыныстар енгізіліп жатқанын жеткізді филиал директоры. Одан бөлек қазіргі заман талабына сай су ақысын жинау жұмыстарын цифрландыру бағытындағы шаралар қолға алынып жатқандығын да тілге тиек етті. Бұл бағытта аудан әкімдігімен тығыз жұмыс жасап, қолдау көрсететініне сенім білдірді.Өз кезегінде аудан әкімінің орынбасары Т.Нұртазаев сырдариялықтарды тәулік бойын сапалы ауыз сумен қамтамасыз етіп отырған мекеме жұмысына, қызметкерлеріне алғыс білдірді. Сала қызметкерлерінің кез келген уақытта орын алған ақауды жылдам қалыпқа келтіріп, уақытылы ауыз су беріп жатқанын айтты. Сондықтан сала жұмысын жандандыруға бірлесе жұмыс атқарыла беретінін жеткізді.

Сырдария: Су мұнаралары жөндеуді қажет етеді 

<a href="https://kyzylorda-news.kz/">Kyzylorda-news.kz.</a> Өткен жылы Жалағаш ауданында туберкулез ауруының 16 жаңа жағдайы есепке алынған. Оның ішінде 15 жағдайы өкпе туберкулезі болса, 1 жағдай өкпеден тыс туберкулез болып табылады. Аурушаңдық көрсеткіші 100 мың халыққа шаққанда – 39,6. Тіркелген науқастардың ішінде &nbsp;1 жасқа дейінгі 1 бала Ақарық елді мекенінен екені белгілі болды. Ал 14 жасқа дейінгі 1 бала Бұқарбай батыр елді мекенінен тіркелген. Қазіргі таңда науқастар түгелдей ем алуда. Бұқаралық ақпарат құралдары өкілдерімен өткен брифингте Жалағаш аудандық санитариялық-эпидемиологиялық бақылау басқармасының бас маманы Светлана Жүнісахметова осылай деді.Баяндамашы биыл бір тоқсанда туберкулез ауруының тағы да 3 жаңа жағдайы Жалағаш кентінде тіркелгенін жасырмады. Оның ішінде өкпе туберкулезімен 2 жағдай, өкпеден тыс туберкулез бойынша 1 жағдай анықталған. Басқарманың бас маманы өткен жылдың тиісті кезеңімен салыстырғанда биыл бір жағдайға өсу тенденциясы байқалғанын айтады. Қазіргі таңда барлық науқастар ОФПО-да ем қабылдап жатқан көрінеді.Спикердің сөзіне сүйенсек, туберкулезбен ауырған науқастар дер кезінде медициналық көмекке жүгінбейтін көрінеді. Яғни олардың басым бөлігі өз бетінше үйден ем қабылдағанды жөн көріп, ауруы асқынуға жақындаған сәтте ғана медициналық көмекке жүгінеді екен. Бұл өз кезегінде медицина мамандары үшін де науқасты дертінен айықтыруға қиындық тудыратыны сөзсіз.&nbsp;Қазіргі таңда Жалағаш ауданының перзентханасында туған 119 нәрестенің 113-іне БЦЖ вакцинасы егілген, екпе салынбаған 6 баланың 2-еуіне уақытша медициналық шектеу қойылса, 4 нәрестенің ата-анасы БЦЖ вакцинасын алуға қарсылық білдірген. Аудан тұрғындары арасында екпенің адам баласы үшін қаншалықты пайдасы барын насихаттасақ та, одан бас тарту жағдайлары әлі де кездеседі. Сонымен қатар 3721 балаға манту сынамасы қойылып, сынама нәтижесіне байланысты 7 балаға химипрофилакткалық ем тағайындалған.&nbsp;– Туберкулез – өкпе және лимфа түйіндерде ерекше қабыну өзгерістерінің пайда болуымен сипатталатын жұқпалы ауру. Ол тек өкпе ауруы ғана емес, сонымен &nbsp;қатар адамның барлық ағзаларының, сүйектердің, бүйректердің, мидың және ми қабықтарының, терінің, көздің және басқа да ағзалардың зақымдануынан болады. Алайда қазіргі таңда қоғамда өкпе туберкулезі жиі кездеседі. Жұқтырудың негізгі көзі – туберкулездің ашық түрімен ауыратын, яғни сыртқы ортаға микобактерияны бөлетін адам. Туберкулез адамнан адамға ауамен таралады. Жөтелгенде, түшкіргенде немесе қырғанда өкпе туберкулезі бар адамдар ауаға туберкулез бактерияларын жаяды. Жұқтыру үшін адамға осындай бактериялардың аз ғана мөлшерінде дем алуы жеткілікті. Туберкулез қоздырғышының сыртқы ортада ұзақ уақыт сақталу қабілеті бар, мысалы, микобактериялар тозаңданған, көгерген үй-жайларда адамдар үшін қауіпті &nbsp;бола отырып, жылдар бойы өмір сүруге қабілетті. Науқас адам жөтелгенде қақырықпен бірге түшкіру, сөйлегенде қоршаған ортаға 2-6 м радиуста ауада таралатын миллиондаған микобактерияны бөледі, олар еденге, заттарға шаңмен бірге тұнады және көптеген жылдар бойы өміршең болып қалуы мүмкін, – дейді басқарманың бас маманы.&nbsp;Баяндамашының сөзіне құлақ түрсек, туберкулез ауруына тек адамдар ғана емес, малдар да шалдығады екен. &nbsp;Тіпті олардың ішінде сиыр, ешкі, түйе секілді үй жануарлары да бар. Сондықтан спикер ауру жануардың сүті мен еті адам үшін қауіпті екенін жасырмайды. Айта кетейік, өкпе туберкулезімен ауыратын науқас барлық гигиеналық талапты сақтаса, ол айналасына қауіпсіз көрінеді. Бір жағынан өкпе туберкулезі тұқым қуаламайды екен. Светлана Жүгінісова туберкулез ауруымен ауыратын &nbsp;ата-аналардың балалары сау болып туатынын айтады. Алайда барлық сақтық шараларын сақтамаған жағдайда бала туберкулезді жұқтырып, ауырып қалуы да мүмкін екен.&nbsp;– Туберкулез микобактериалары адам ағзасына түскенде ауру жұғады, бірақ туберкулез ауруының дамуы әр жағдайда болмайды. Өкпе туберкулезінің ауруы иммунитет төмендеген, жеткіліксіз тамақтану, қанағаттанарлықсыз санитариялық-гигиеналық жағдайларда орын алады. Негізінен иммунитеті нашар жас балалар, жыныстық жетілу кезеңіндегі жасөспірімдер және иммунитеті төмен қарт адамдар ауырады. Адамның туберкулезге шалдығуына толыққанды тамақтанудың болмауы ықпал етуі мүмкін. Бұл дертке шалдыққандармен тығыз, ұзақ қарым-қатынас жасау да қауіпті, тіпті кішкентай балаларға қысқамерзімді қарым-қатынастың өзі жеткілікті. Ал оның белгілеріне келсек, ұзақтығы екі аптадан асатын жөтел, шаршау және әлсіздік, дене салмағының төмендеуі, температураның ұзақ көтерілуі, түнде тершеңдік, кеуде қуысындағы ауырсыну, қан түкіру жатады. Туберкулезді қалай анықтауға болады? Алдымен тері туберкулин сынамасы адамның жұқтырғанын көрсетеді. Сондай-ақ Рентгенологиялық тексеру (флюораграфиялық) өкпенің зақымданғанын көрсетеді. Ал қақырықты зерттеу, жөтел кезінде бөлінетін микробтардың бар-жоғын анықтайды. Мейлінше аурудың емін іздегенше, ауырмаудың жолын бұрын тапқан дұрыс. Ол үшін медициналық тексерістен уақытылы өтудің маңызы зор, – дейді Светлана Елтайқызы.Брифинг барысында «Дерттің алдын алу үшін қайтпек керек?» деген сауалымызды да спикер жауапсыз қалдырмады. Ол үшін салауатты өмір салтын ұстану ерекше маңызға ие көрінеді. Бұл мақсатқа жетудің ең жақсы жолы – күн тәртібін құру және ағзаны шынықтыру. Таза ауада серуендеу, күн және су процедуралары, дене шынықтырумен айналысу, демалыспен еңбек жүктемесінің дұрыс үйлесімі, толыққанды дәрумендерге бай тамақтану, жеткілікті және уақытылы ұйқы, яғни дұрыс гигеналық тәртіп адам ағзасының нығаюына ықпал етеді &nbsp;және оны туберкулез ауруынан қорғайды.Басқарма өкілі жыл мезгіліне қарамастан, таза ауада мүмкіндігінше көбірек болу қажеттігін алға тартады. Өйткені таза ауа ағзаға жақсы әсер етеді және шынығудың тамаша жолы болып табылады. Ал жеке гигиена ережелерін сақтау, яғни жуу құралдарын және ағынды суды пайдалана отырып қолды, ыдыстарды жуып, тұрғын үй-жайларды ылғалды жинау және желдету, ет пен сүтті міндетті термалық өңдеу, жеке гигиеналық құралдармен ыдыстарды пайдалану, су процедураларының да маңызы зор екен.&nbsp;– Гигиеналық тәртіптің маңызды бөлімі дұрыс тамақтану болып табылады. Адам тәбетінің жоғарылауына ықпал ететін және ағзамен жақсы сіңіретін түрлі тағамдар жеу керек. Тағам құрамына ақуыздар, майлар мен көмірсулардан басқа міндетті түрде витаминдер мен минералды тұздар кіруі тиіс. Ақуыздар ет, сүт, сүзбе, жұмыртқада болады. Көмірсулар қант, нан, картоп, жармада бар. Витаминдер мен минералды тұздар негізінен жаңа піскен көкіністер мен жемістерде болады, – дейді ол.&nbsp;Светлана Жүгінісова сондай-ақ баланы туған кезде БЦЖ-мен міндетті түрде вакцинациялау және 6-7 жаста қайта вакцинациялаудың маңызына тоқталды. Сондай-ақ ол туберкулезді дер кезінде диагностикалау қажеттігін қаперге салды.

Дерттің алдын алған абзал

<a href="https://kyzylorda-news.kz/">Kyzylorda-news.kz.</a> Қызылорда облысының полиция департаментінде ішкі істер органдарының ардагерлерімен кездесу жиыны өткізілді.&nbsp;Жиынға барлық қала және аудандық полиция бөлімдерінің Ардагерлер кеңесінің төрағалары қатысты. Ішкі істер органдарының ардагерлер ұйымдарының қызметін жақсарту жөніндегі іс-шаралар жоспарына сәйкес ұйымдастырылған шара департамент бастығының орынбасары полиция полковнигі Өтегенов Әміржан Сермаханұлының төрағалығымен өтті. &nbsp;Кездесу барысында жеке құрам мен ішкі істер органдарының зейнеткерлері арасында қызметкерлерді әлеуметтік қолдауды нығайту қызметін ұйымдастыруды жақсарту мәселелері бойынша қабылданып жатқан шаралар туралы түсіндірме жұмыстары жүргізілді.«Қазіргі уақытта ардагерлерді полиция қызметіне араласуға жұмылдыру, кеңес, бағыт-бағдар алу, оларды қолдау жұмыстарына аса көңіл бөлінуде. Себебі, саналы ғұмырын осы салаға арнаған әрбір ардагердің жастарға берер тәлімі мол», - деп атап өтті Әміржан Сермаханұлы. &nbsp;Полиция департаментімен ұйымдастырылған бүгінгі шара барысында ашық алаң, еркін пікірталас жүргізіліп, ардагерлердің ұсыныстары мен сұраныстары тыңдалды. Мәселен, Қызылорда облысы полиция департаментінің Ардагерлер кеңесінің төрағасы Серікбол Тұңғышбаев сөз сөйлеп, жеке құраммен жұмыс жасау, жеке құрамның тәртібіне аса көңіл бөлу қажеттігін, сонымен қатар, әр учаскелік полиция пункттеріне бір-бірден жауапты ардагер тағайындау бойынша жұмыстар жүргізу және ардагерлерді әлеуметтік қолдау мәселесіне ерекше тоқталды. Бұдан бөлек, Қармақшы аудандық полиция бөлімінің Ардагерлер кеңесінің төрағасы Есет Назарқұлов өткір мәселелерді қозғады.Көпті көрген ардагерлер &nbsp;өмірден білген-түйгенін, жетістікке жетудің жолдары мен абыройлы еңбек етудің сырын бөлісіп, жастарды ерінбей еңбек етуге, елдің дамуы үшін аянбай тер төгуге шақырды. Сонымен қатар, өздерінің қызметтік жолдарын, бастан кешкен оқиғаларын да еске алды. Қоғамдық қауіпсіздікті қамтамасыз ету мақсатында полиция қызметкерлерімен бірлесе жұмыс жасау, серіктестікті жаңғырту, жас қызметкерлер тәрбиесі жөнінде де келелі әңгімелер қозғалды. &nbsp; &nbsp;<figure class="image"><img src="https://knadmin.beoblood.kz/uploads/336369695_476925874560796_6839869420854439581_n_8a06ae209c.jpg" alt="336369695_476925874560796_6839869420854439581_n.jpg"></figure><figure class="image"><img src="https://knadmin.beoblood.kz/uploads/336751988_908064000312192_2953509615034719838_n_3c7a4f652e.jpg" alt="336751988_908064000312192_2953509615034719838_n.jpg"></figure>

Қызылорда облысы полиция департаментінің басшылығы ішкі істер органдарының ардагерлерімен кездесті  

<a href="https://kyzylorda-news.kz/">Kyzylorda-news.kz.</a>&nbsp; Президент Қасым-Жомарт Тоқаев VIII сайланған Қазақстан Республикасы Парламентінің бірінші сессиясының ашылуында елдің дамуына қатысты көптеген мәселені қозғап, алдағы жоспарларды айқындап берді. Осы орайда Мемлекет басшысы экономика саласына соның ішінде іскерлік белсенділікті ынталандыру мен еліміздің өндірістік әлеуетін арттыру мәселесіне мән берді.<blockquote>Еліміздің өндірістік әлеуетін барынша арттыру маңызды. Қазақстан экономикасы әлі күнге дейін пайдалы қазбаларға тәуелді болып отыр, яғни ел экономикасының құрылымы – қарапайым. Шын мәнінде, бізге қарқынды даму үшін күрделі, әртарапты экономикалық құрылым қажет. Әрине, шикізат нарығындағы әлемдік бәсекеде біздің өз артықшылығымыз бар. Қазіргі және стратегиялық міндеттерді орындау үшін оны тиімді пайдалану қажет. Сондықтан осы саланы одан әрі дамыта беру керек, – деді Президент.</blockquote>Елдің дамуы экономикаға байланысты екені түсінікті. Сондықтан барлық күш-жігер осы саланы көтеруге жұмсалып жатқаны айқын. Әсіресе ол республиканың өңірлерінде айрықша көрініс тапқан. Мәселен, біздің облыста өндірісті дамыту бағытында мемлекеттік жоба мен бағдарламалар аясында түрлі жұмыстар мен бастамалар қолға алынып келеді. Соның нәтижесінде Сыр елінің өндірістік әлеуеті жылдан-жылға ұлғаюда. Бұл өз кезегінде қосымша жұмыс орындарының ашылуына және халықтың кәсіпкерлікке бет бұруына үлкен септігін тигізеді.Табыстың көзі – тұз«Аралтұз» зауытында жаңадан іске қосылған ІІІ испан цехы жұмыс жасайды.Өңір басшысы өндіріс орнының еліміз үшін ғана емес, көршілес мемлекеттер үшін экономикалық маңызына тоқталып, өнім өндіру мәселесінің өзекті екенін жеткізген еді.Айта кетейік, «Аралтұз» зауыты жылына 600 мың тонна тұз өндіруге қауқарлы. Өнім Қазақстан және ТМД елдері нарығына жеткізіледі. Бүгінде 1200 адамды тұрақты жұмыспен қамтыған. Бұған дейін аталған өндіріс орны индустрияландыру бағдарламасы шеңберінде ас тұзы мен техникалық тұз өндіретін испан цехын іске қосты. ІІІ испан цехы 2021 жылы іске қосылған. Жоба құны 3 млрд теңгені құрайды.&nbsp;

Қазақстан және Қызылорда облысының жаңалықтары