<a href="https://kyzylorda-news.kz/">Kyzylorda-news.kz.</a> Қызылорда қаласына қарасты Белкөл кенті мен Бірқазан елді мекенін қоса есептегенде халық саны 4749 адамды құрайды. Оның ішінде экономикалық белсенді халық саны 2227 адам болса, жұмыспен қамтылғандар саны 1731 адам. Кент тұрғындарының 450-і өзін-өзі жұмыспен қамтып отырса, 324 адам зейнеткер. Сонымен қатар Белкөл кентінде жұмыссыз 8 азамат бар.Белкөл кентінің 2022 жылғы бюджеті 85,5 миллион теңгені құрап, оның 84,3 миллион теңгесі, яғни бөлінген қаржының 98,6 пайызы игерілген. Осылайша бюджетке бөлінген 1,2 миллион теңгесі үнемделген қаржыны құрады. Өткен жылы кентте 9 салық түрі бойынша жалпы 24,8 миллион теңге түсім жоспарланған. Жыл қорытындысымен 28,1 миллион теңгеге орындалып, көрсеткіші 113,1 пайызды құраған.Кентте 124 кәсіпкерлік субъект тіркеліп, 135 тұрақты жұмыс орны ашылды. Былтырғы жылмен салыстырғанда өсім 51,8 процентті құраған. 10 мың адамға шаққанда 100 жаңа жұмыс орнын ашу межесі орындалған.«Микробизнес-Қызылорда» бағдарламасы аясында «Өңірлік инвестициялық орталық» микроқаржы ұйымы арқылы 28 миллион теңгеге 3 жоба, «Бизнестің жол картасы 2025» бағдарламасы бойынша екінші деңгейлі банктер арқылы 9 жоба 99,8 миллион теңгелік несиеге қол жеткізген.«Еңбек» бағдарламасы аясында жалпы көлемі 5 миллион теңгені құрайтын 1 жоба жүзеге асырылса, 2021-2025 жылдарға арналған кәсіпкерлікті дамыту жөніндегі ұлттық жоба бардарламасының қайтарымсыз қаражаты есебінен 20 жоба жалпы құны 24 миллион теңге болатын грантқа қол жеткізді. Кент бойынша 1,3 миллиард теңгеден астам қаражатқа инвестициялық жобалар жүргізілуде.&nbsp;«Марал Нұр» ЖШС жолаушылар вагондарын жөндеу депосының құрылысына 900 миллион теңге кәсіпкердің өз қаражаты есебінен игерілген. Жобаның аяқталу мерзімі 2023-2024 жылдарға көзделіп отыр. Жалпы құны 4 миллиард теңгені құрайтын жоба құрылысы толық аяқталып, өз мәресіне жеткен уақытта шамамен 300-400 адамды жұмыспен қамтамасыз етеді деп жоспарланған. Сондай-ақ аталған кәсіпкер өз қаражаты есебінен құны 200 миллион теңгеге Медресе салып, бүгінде халық игілігі үшін пайдалануға берілді.Кенттегі жеке кәсіпкер «Сауенова» «Бизнестің жол картасы 2025» бағдарламасы аясында екінші деңгейлі банк арқылы 30 миллион теңгеге спорт кешені жанынан кіші футбол алаңы құрылысын жүргізді.&nbsp;«Вега Пром» ЖШС-і «Қызылорда қаласында құрғақ құрылыс қоспаларын шығару» жобасына кент аумағынан 2,9 гектар жер телімін игеруде. Қазіргі таңда серіктестік «Қызылорда Өңірлік инвестиция орталығы» микро қаржы ұйымы арқылы 20 миллион теңгеге қолдау алған. Жобаның негізі жалпы құны 103 миллион теңге.&nbsp;Сонымен қатар «Нұр Орда жолы» ЖШС-і Белкөл кенті аумағынан 4 гектар жерге жалпы құны 87 миллион теңге болатын асфальт-бетон зауытының құрылысын жүргізуде.2022 жылы кент тұрғындарының жұмыспен қамтудың белсенді шараларына қатыстыру арқылы 28 адам қоғамдық ақылы жұмыспен қамтылған. Жастар тәжірбиесі арқылы 4 азамат, кәсіптік оқыту 1азамат, алғашқы жұмыс орнына 2 азаматқа жолдама берілген. Сондай-ақ өткен жылы 101 отбасындағы 373 адмға 13,8 миллион теңге қаржыға атаулы әлеуметтік көмек тағайындалған.Белкөл кентіндегі №189 орта мектеп 1995 жылы пайдалануға берілген. Мұнда екі ауысымда барлығы 784 оқушы білім алады. Мектепте 21 сынып жиынтығы мен 3 мектепалды даярлық тобы жұмыс істейді. Ал 2013 жылы пайдалануға берілген №145 орта мектепте 1 ауысымда 64 оқушы білім алады. Мұнда 11 сынып жиынтығы мен 1 мектепалды даярлық тобы жұмыс істейді.Сонымен қатар Белкөл кентінде 160 баланы тәрбиелеп отырған «Балапан» бөбекжай балабақшасы және 22 бала тәрбиеленетін жеке «Ғазиза» балабақшасы жұмыс істейді. Кентте 1 ауылдық клуб және 1 кітапхана бар. Ауылдық клубта көркем сөз оқу, ән айту, әжелер ансамблі, атамұра дәстүрлі ән үйірмесі ұйымдастырылған болса, 35 оқушы қатысатын «Әл-Әзиз» оқу орталығында «Қарлығаш» хор үйірмесі мен вокал үйірмесі бар.Кентте сондай-ақ 3 ойын алаңы, 1 футбол алаңы және тұрғындарға арналған 1 жаттығу орны болса. Бірқазан елді мекенінде 1 футбол алаңы бар. Белкөлдік 250-ге жуық бала еркін күрес, джио джитсу, қазақша күрес, дзюдо, каратэ, үстел теннисі, шахмат секілді спорттың 8 түрімен шұғылданады.Белкөл кентіндегі К.Әбдіқадыров №3 көшесіне түнгі жарық бағаналарын орнату үшін жергілікті бюджеттен 2,5 миллион теңге қаралып, құрылыс жұмыстары толықтай аяқталған. Сонымен қатар бұл көшеге демеушілер есебінен балалар ойын алаңы бой көтерді. Асфальт төсеуге Сарыарқа көшесіне 21,1 миллион теңге, Путейцев көшесіне 26,5 миллион теңге, қиыршық тас төсеуге Әбдіқадыров №4, Жерұйық, Әбдіқадыров №2, Әбдіқадыров №9, Әбдіқадыров №6 және Путейцева тұйығына 42,3 миллион теңге, Орталық көше және Бірлік көшесіне жаяу жүргіншілер жолын салу үшін 39,1 миллион теңге қаржы қаралып, биылғы жылы жүзеге асыру көзделінген.Мұнда электр желісінің ұзындығы 15,8 шақырым болатын 5 дана электр трансформаторы орнатылған. Кенттегі 8 көше түнгі жарықпен жарықтандырылып, жыл көлемінде жанып тұруы мен күтіп ұстауға қалалық бюджеттен 7,5 миллион теңге бөлініп, тиісті жұмыстар атқарылған. Ал Бірқазан елді мекеніне түңгі жарық бағаналарын орнатуға жоба-сметалық құжаттары әзірленіп, 11,6 миллион теңгеге бюджеттік өтінім ұсынылған.Сарыарқа, Жерұйық және Бірлік көшелеріне жаңадан электр желісін тарту үшін ЖСҚ дайындалып, 76,6 миллион теңгеге қалалық құрылыс бөліміне бюджеттік өтінім ұсынылған.Белкөл кентінің жалпы жер көлемі – 2095 гектарды құрайды. Оның ішінде ауыл шаруашылығы мақсатында табысталған жер учаскесінің көлемі – 1772 гектар. Елді мекен жері 921 гектар болса, жайылымдық жер көлемі 1757 гектарды құрайды. Сондай-ақ Бірқазан елді мекенінің тұрғындары 20 гектарға картоп, көкөніс және бақша дақылдарын егіп отыр.Кенттегі 369 пәтерлі 4 көпқабатты тұрғын үй, мектеп, балабақша, интернат орталықтандырылған жылумен және табиғи газбен қамтылған. Белкөл кентіндегі жалпы ауыз су құбырының ұзындығы - 20,2 шақырымды құрайды және кент толықтай «Ақбұлақ» бағдарламасы аясында ауыз сумен 100 пайыз қамтылған. Кенттегі жалпы жолдың ұзындығы 17,2 шақырым болса, оның ішінде асфальт төселген жолдың ұзындығы - 10456 метр, қара жолдар – 6750 м. &nbsp;

Қызылорда қаласы: 2022 жылы Белкөл кентінде бірқатар жұмыс атқарылды

<a href="https://kyzylorda-news.kz/">Kyzylorda-news.kz.</a> Жаңақорған ауданының тұмса табиғаты мен қасиетті мекендері туризмге сұранып тұрған өңір. Осы мақсатта, жауапты мамандар мен жанашыр ел ағалары туризмді дамытудың алуан түрін қарастырып, дөңгелек үстел өткізді.Қазір дамыған елдердің экономикасын шағын және орта бизнес пен туризмнен түсетін кіріс көзі арттырып тұр. Сарапшылардың айтуынша туризмге әлемдік жиынтық өнімнің 10 пайыздайы тиесілі, яғни бұл сала мұнай және мұнай өнімдерін, автокөліктерді экспорттаудан кейінгі үшінші орында екен. Бір өкініштісі, біздің ел тұмса табиғаты, тарихи орындары, көне жәдігерлері мен жауһазан жерлері бола тұра туризм көшінен әлдеқайда қалып келеді. Басқасын айтпағанда өндірісі мен өнері, спорты мен сан саласы, әлеуметі мен экономикасы өрлеу жолында келе жатқан Жаңақорған ауданында осы туризм саласы әлі де еңсе көтере алмай келеді. Осы бағытта мамандар жұмыла жұмыс жасаудың тәсілдерін қарастырып жатыр.Қазір қалтасы мен қолында қаржысы барлар көбіне шетелге шығып демалғанды дұрыс көреді. Ел көріп, жер көріп, өзгені танығанға не жетсін. Бірақ демалуға тірнектеп жинаған қаражат өзге елдің қазынасын қампайтып, өзіміздікін ортайтып жатқанын түсінгіміз келмейді. Отандық туризмнің ұтылатыны – осы тұс. «Елде неге демалмайсың?» деп сұрай қалсаң, жауап дайын. Сын көтермейтін сервис жайын сөз етіп, шектен шыққан қымбатшылықты қозғайды. Ол дұрыс енді.Әлбетте, өңірдегі туризмді өркендетпей, ішкі туризмді дамыту туралы сөз айту артықтау сияқты. Осы ретте ауданның туристік әлеуеті туралы сөз қозғамақпыз.Тау мен тасы, өзені мен көлі, жазық даласы, орманды алқабы бар киелі өлкенің қойын-қонышы тұнып тұрған тарих һәм шежіре. Ыстық суы мен шипалы батпағын да қосыңыз. Бізде баратын жер көп, бірақ насихаты кемшін. Жарнамасы жеткіліксіз. Сосын сол келетін туристерге қолайлы жағдай жасау маңызды. Жүйкені жұқартатын жол азабы, дамымаған инфрақұрылым, интернеттің жоқтығы – отандық туризмнің ортақ мәселесі осы.Біз жоғарыда атап өткендей дамыған елдердегі туризмнің басты жетістігі ол инфрақұрылымы мен жарнамасы. Мәселен, қазақтар көп баратын Түркия экономикасына туризм саласы жыл сайын 35-40 млрд АҚШ долларын алып келетін ең маңызды салалардың бірі. Туристер саны бойынша Түркия әлемдегі 6-7 орында тұрған ел. 2022 жылы Түркия 50 млн-ға жуық турист қабылдаған, ең көп турист Германия, Ресей және Ұлыбританиядан.Туристтердің негізгі бөлігі Стамбул мен Анталья қалаларына барса да, ақпан айының басында орын алған жер сілкінісі, әрине, туризм саласына кері әсерін тигізетін болады. Осыған қарамай түрік Үкіметі туризмді қайта қалпына келтіруді көздеп отыр.Сол секілді ислам елдері ішінде араб мемлекеттеріне саяхаттаушылардың санында есеп жоқ. Дубай, Египет жне өзге де өзіндік өрнегі бар керемет мегаполистерге кім-кімнің болсын барғысы келетіні анық. Италия болса көне шаһарларымен, Франция зәулім ғимараттарымен, Германия болса әдемі табиғатымен мақтана алады. Ал, бізде осылардың барлығы бар. Жер асты және жер үсті байлығының барлығы бізде тұнып тұр.“Travellers' Choice Awards” халықаралық премиясының 2023 жылғы нәтижесі бойынша демалуға арналған үздік ел – Куба деп танылды.Рейтингтің екінші және үшінші орындарын Вьетнам мен Маврикий аралы өзара бөлісті. Олардың артынан &nbsp;Камбоджа мен Таиланд үздік бестікке енді. Кайман аралдары, Марокко, Әзербайжан және Непал да саяхаттаудың ең тамаша орындары ретінде танылған. Ең көп сұранысқа ие туристік бағыттардың үздік ондығын Польша жапты.Бұл салаға Мемлекет басшысы арнайы пәрмен беріп, нақты міндеттер жүктеді. Жыл соңына дейін елге келетін туристер саны артуын, көркем жерлердің келбетін қайта келтіруін шегелеп берді.<blockquote>«Әлемде орын алған пандемия салдарынан Қазақстанның ішкі туризм саласы да бәсеңдеп қалған еді. Бірақ қазір 2019 жылмен салыстырғанда туристердің саны өсіп келеді. Соңғы 9 айда ішкі туризм статистикасы 6,5 миллион болса, жыл қорытындысы бойынша бұл көрсеткіш 8 миллионға жетуі мүмкін. Ал шетелден келген туристер саны 610 мыңнан 1 миллионға дейін жетеді. Халықаралық туризм кеңесінің болжамы бойынша 2024 жылы әлемдік туризм саласы қалпына келуі керек. Ал Қазақстанда бұл болжам 2022 жылы орындалды деуге болады», деді туризм индустриясы комитетінің төрағасы Дастан Рыспеков.</blockquote>Мысалы, 2021 жылы Қазақстан өз позициясын жақсартып, 117 ел арасында 66-орынға ие болды, 2019 жылы – 140 ел ішінде 80-орында еді. Қазақстанның біз білетін Көкшетауы, Алматының әсем жерлері, тарихи өңірлері мен тауларынан тұратын облыстары саяхатшыларды қызықтырмай қоймасы анық. Ол да уақыттың еншісіндегі меже.Туризм жобаларын субсидиялау «Туризмдегі инвестициялық әлеуетті дамытуға баса мән беріледі. Біздің министрлік «Қазақтуризм» компаниясымен бірлесіп, инвестициялық жобалар пулын қалыптастырды. Өткен жылдың қорытындысы бойынша 40 млрд теңгеге 138 жоба іске асырылды. Биыл 288 млрд теңгеге 115 жобаны іске асыру жоспарланып отыр», – деді мәдениет және спорт вице-министрі.Қазіргі жеңілдетілген несиелеу механизмі белгіленген мерзімде шығынды ақтауға мүмкіндік бермейді. Орта есеппен қонақ үй құны 10 жылда өтеледі.«Осыған байланысты туризм жобаларын субсидиялау мерзімдерін 5 жылдан 10 жылға дейін ұзарту, сондай-ақ қаржыландыру лимиттерін 5 млрд теңгеге дейін ұлғайту қажет. Тиісті ұсынысты Ұлттық экономика министрлігіне жібердік», – деді вице-министр.Жаңақорған ауданында туризм саласы бойынша 15 субьекті тіркелген. 4 шипажай, 2 балалар лагері, 6 қонақ үй, 3 демалыс орны. Сонымен қатар бүгінгі күнге дейін «Батыс Қытай – Батыс Еуропа» көлік дәлізі бойында жалпы құны 2 млрд 556 млнтеңгені құрайтын 6 жол бойы қызмет көрсету кешендері, В санатындағы – 4, С санатындағы –2 жол бойы қызмет көрсету кешендері жұмыс жасап келеді.«Батыс Қытай – Батыс Еуропа» көлік дәлізі бойында салынған жол бойы сервистік қызмет көрсету нысандарын дамыту тұрақты түрде жалғасуда. Мәселен, «Рахат» жол бойы қызмет көрсету кешеніндегі санитарлы-гигиеналық торап ҚР Мәдениет және спорт министрініңбұйрығымен бекітілген «Кәсіпкерлік субьектілерінің СГТ – ды күтіп ұстауға арналған шығындарының бір бөлігін субсидиялау» қағидаларының талаптарына сәйкестендірілді.Бүгінгі таңда жол бойы қызмет көрсету кешендерінің сапалы қызмет көрсетілуі, ыңғайлылығы, тазалығы, оның ішінде дәретханалары, олардың күтіп-бапталуы, терминалдар мен интернет желілерінің орнатылуы арнайы бақылауда дейді жауапты сала мамандары.Жалпы Жаңақорғанның брендіне айналған шипалы батпағы шипажайлардың жиі ашылуына мүмкіндік беруде. Қазірдің өзінде аудан орталығында 4 шипажай жұмыс істеп тұр. «Жаңақорған» шипажайы АҚ, «Шипажай Жаңақорған», «Ақ-Шуақ» және«Орда-Сығанақ» ЖШС.2022 жылы «Жан-Арай» ЖШС жол бойы қызмет көрсету кешенінің жанынан салынып жатқан тағы бір 100 орындықты шипажай құрылысы осы жылдың1 жартыжылдығында аяқталады деп күтілуде. Жоба құны 1,2 млрд теңге. Республикадағы қайсыбір шипажайды алмаңыз, сыртқы және ішкі ағзаларды бірдей емдейтін батпағы, тұзды және минералды суы бар емдеу орындары бізде ғана. Ем алумен қатар емделушілерге би кештері, концерт, киелі мекендерге әр аптаның жексенбісінде Арыстан баб, Түркістан, Сауран, өзіміздегі киелі жерлер Қорасан ата, Төлегетай-Қылышты ата кесенелеріне саяхат жасау ұйымдастырылған.Сондықтан келушілер саны да жылдан-жылға артып отырады. Әрине, келушілер емдік бағытта болмаса, туристік түсінікпен келмейді.Одан бөлек, Апанғақ, көне шаһарлар да бар бізде. Көркем жерлерді жеке кәсіпке айналдырып, табыс тауып отырған аймақта аудандар да жоқ емес. Мәселен, Шиелі ауданындағы “Бәгеқұм” демалыс орны маусымдық кезеңде әжептеуір қазынаны толтырады. Бізде де бай-бағландар жетеді, бірақ оны кім ойласын. Тау бөктерінен зәулім ғимарттар салып, керемет демалыс орнына айналдыруға болады. Бұл жөнінде әкімдікте талай талқылау болуда, бірақ қалталы азаматтар үйреншікті төрт түлікті көбейтіп, мемлекеттен тегін субсидияны алуға дағдыланып алған. Ол да шешілер. Жалпы туризмге қатысты шешімін таппай отырған мәселелер біздің ауданда аз емес. Бұл жайында аудандық кәсіпкерлік және туризм бөлімнің бас маманы Бекзат Омарова нақты жауап берді.– Жаңақорған ауданында белгіленген туристік маршруттар бойынша бүгінгі күні шешімін таппай келе жатқан мәселелер жетерлік.Соның бірі Ақүйік ауылдық округінің оңтүстік шығысында 25 шақырым қашықтықта орналасқан «Қатын қамал» үңгірі. 2021 жылы «Қатын қамал» үңгірін туристік орынға айналдыру мақсатында 25 шақырым жолды салу жоспарланып, облыстық жолаушылар көлігі және автомобиль жолдары басқармасынахатпен қажетті қаржы көрсетілген бюджеттік өтініммен ұсыныс хат жолданды. Алайда, бұл мәселе бүгінгі күнге әлі шешімін тапқан жоқ. Сонымен қатар, ортағасырлық тарихы бар Сығанақ қалашығын қайта жаңғырту, зерттеу жұмыстары баяу жалғасуда. Жыл сайын республикадан, облыстан қаралған мардымсыз қаржылар көне қаланың архитектуралық келбетін толық айқындауға жеткіліксіз деп ойлаймын, – деді бас маман.Қаратау сілемдеріндегі ежелгі таңбалы тастар,Бесарық өзенінің шатқалындағы ежелгі адамдардың жазған петроглифтері. Таңбалы тасқа Жаманбай батыр ауылдық округінен ары қарай 20 шақырым жол салынып, қолжетімді болып жатса ауданымызда туризмнің дамуына өз үлесін қосары сөзсіз. Бұл ретте, Жаманбай батыр ауылдық округінің басшылығы сол тау етегінде кәсіптерін жүргізіп жатқан кәсіпкерлердің кәсібін жандандыру мақсатында төменгі пайызбен несие алуларына сүйемелдеу жұмыстарын жүргіссе дейді Бекзат апайымыз.– Киелі жерлеріміз тарихи қасиетті нысандар тізіміндегі Қорасан ата кесенесі, Төлегетай-Қылышты ата кесенелерін ұрпақтары өз бақылауларына алып отыр. Бюджеттің есебінен асфальт жолдары салынған. Сонымен қатар, Қорасан ата кесенесі, Ақтас мешіті басынан зиярат етіп барушылар үшін 15 орындықты, заманауи талаптарына сай қонақ үйлер салынған. Түйінін айтқанда, ежелгі «Қатын қамал» үңгіріне, «Таңбалы тасқа» қарай баратын жолдар салу және Сығанақ қалашығын қайта қалпына келтіріп, аспан астындағы мұражайға айналдыру мақсатында бюджеттен қомақты қаражаттың қаралуы тиіс, – деді бас маман

Жаңақорғандықтар туризмді табыс көзіне айналдырмақ

<a href="https://kyzylorda-news.kz/">Kyzylorda-news.kz.</a>&nbsp; Ұлы ақын Абай атамыз: «Сен де бір кірпіш дүниеге, кетігін тап та бар қалан» демекші, өз кәсібін таңдап, сала бойынша өз орнын табу бүгінгі жастардың жеткен басты мұраты десек артық болмас. Ғылым мен техниканың қарқынды дамуымен қатар, кей мамандық қолданыстан шығып жатса, енді бірі қажеттіліктен пайда болып жатыр. Осындай қажеттіліктен туындаған кәсіптің бірі – адам денсаулығына пайдасы мол массаж түрлері болып отыр.Ауданда осы сала бойынша өзінің жеке кәсібін ашып отырған ақ халатты абзал жанның бірі – Гауһар Зарлық. Өзінің “GAUKHAR” массаж орталығын ашып, көптеген аурудың емі, сондай-ақ шаршаудың алдын алу үшін массаж түрлерін де қарастырған. Қазіргі бастың қысуы мен көз айналасындағы қан айналым жүйесінің дұрыс болуына, бас массажы да бар. Сонымен бірге аяқ-буыны ауыратын егде жастағы кісілердің емі ретінде, аяқ массажы да назарға алынған. Бет терісін күтуде әжімнің алдын алу, бет терісін тазалап, тегістеу құрылғысымен де қамтамасыз етілген. Сонымен бірге мүмкіндігі шектеулі балаларға немесе әлеуметтік жағдайы төмен отбасыларға жеңілдіктер қарастырылған. Жасап жүрген жұмысын Гаухардың өзі кеңінен әңгімелеп берді:<blockquote>Жалпы өзім медицина маманымын. Ауданда медициналық массаж орталығы қарастырылмаған, сондай-ақ ауыл тұрғындары қалаға барып ем алып жүргенін студент кезімде көретінмін. Міне, сол уақытта ойға алған кәсібімді 2021 жылы ашудың сәті түсіп, ауыл игілігі үшін осы кәсіпті ашуға бел буған болатынмын. Негізінен 2019 жылдан бастап қызығушылығым артып, алдыма мақсат қойдым. Енді, міне, осы мақсатыма жету жолында білім алып, кәсіпкерлікті қолдау аясындағы бағдарлама арқылы өз кәсібімді ашып отырмын. Сонымен қатар «Бизнестің жол картасы - 2025» бағдарламасы аясында қайтарымсыз грант жобасын қорғап, 3 млн теңге грант иегері атандым. Бүгінгі күні адам денсаулығындағы ауытқуларды түрлі массаж арқылы емдеймін. Орталықта бір адам жұмыспен қамтылған. Алдағы уақытта осы кәсібімді әрі қарай дамытып, білікті маман иелерін жұмыспен қамту ойда бар. Биоэнергомассажер “FOHOW” бұл барлық дене бұлшық еттерін босатып, ішкі организмге дейін әсер ететін аппарат түрі.Yamaguchi аяқ буындарын жақсартатын аппарат түрі, сонымен қатар Yamaguchi көзге арналған массаж аппараты көздегі қысымдарды және желке тұстағы ауырсынуларды жоюға пайдасы зор. “Fohow” компаниясының жоғарғы сападағы майларын &nbsp;пайдаланып отырмыз. Көбіне демалыс күндері орталыққа келіп ем алушылар саны артып келеді. Осылайша жалпы саны 43 адамға көмек көрсетілді,– дейді.</blockquote>&nbsp; &nbsp; &nbsp; &nbsp; Міне, елімізде алдына үлкен мақсат қойып, кәсіп ашамын деген азаматтар үшін көптеген мүмкіндік қарастырылған. Түрлі бағдарламалар арқылы кәсіпкерлерді қолдау аясында өз кәсібін ашып, берекетін көріп отырған адамдар да жетерлік. Ең бастысы, адамның ерінбей еңбек етуі. Сол кезде ғана адамзат баласы өз мақсатына жетері анық.

Аралда медициналық массаж орталығы ашылды

<a href="https://kyzylorda-news.kz/">Kyzylorda-news.kz.</a> &nbsp;Жалағаш ауданы әкімінің тапсырмасына сәйкес тиісті сала бойынша жауапты аудан әкімінің орынбасарлары шағын дүкендер мен ірі сауда орындардағы азық-түлік бағасына мониторинг жасады.Халықты азық-түлікпен қамтамасыз ету – атқарушы биліктің басым міндетінің бірі. Бағаны тұрақтандыру шаралары қалай жүргізіліп жатыр? Жалағаш ауданында тұрғындардың әлеуметтік хал-ахуалы атқарушы биліктің тұрақты бақылауында. Әсіресе, бұл ретте азық-түлік тауарларының бағасын назарда ұстау маңызды болып отыр.Осы ретте Жалағаш ауданы әкімінің тапсырмасына сәйкес тиісті сала бойынша жауапты аудан әкімінің орынбасарлары шағын дүкендер мен ірі сауда орындардағы азық-түлік бағасына мониторинг жасады. Кәсіпкерлерге дүкендердің сөрелеріне қойылған халық көп тұтынатын әлеуметтік маңызы бар азық-түлік тауарларларының баға тұрақтылығын сақтау жөнінде түсіндірме жұмыстары жүргізілді.Сонымен қатар, Жалағаш ауданында аудан бойынша мерзімді уақытқа дейін баға тұрақтылығын сақтау үшін жанармай және газ құю бекеттерінде дефицитті қолдан жасауға жол бермеу, негізсіз лимиттер орнатқан тұлағаларды анықтау және түсіндірме жұмыстарын жүргізу мақсатында арнайы штаб құрылып, жанармай және газ құю бекеттеріне мониторинг жұмыстары жүргізілуде.<img src="https://knadmin.beoblood.kz/uploads/zh_gaz_a755d3c003.jpg" alt="ж газ.jpg"> &nbsp;

Жалағашта баға тұрақтылығына мониторинг жүргізілуде

<a href="https://kyzylorda-news.kz/">Kyzylorda-news.kz.</a>&nbsp;Жер тоңы жібіп, алғашқы көк дүркіреп шыға бастаған кезде шыбық қадап, тал отырғызу – сауапты іс. Өйткені, жерге шаншылған әрбір тал күтімі жақсы болса, күні ертең жапырағы дараққа айналып, жазда сая, қыста қамсау болады. Бұл бағытта бірнеше жылдан бері Қызылорда облыстық өзбек этномәдени бірлестігі Айтбай мешіті ауласын көгалдандырумен айналысып келеді. Оған қоса, жеміс сорттарға айрықша назар аударуда. Алдыңғы жылдары еккен жеміс ағаштары гүлдеп, аулаға көрік беріп тұр.2019 жылдың 20 наурызынан бері сауапты іске себепкер болып жүрген бірлестік мүшелері осы күнге дейін аулаға 100-ге жуық шие, өрік, алма ағаштарын, роза гүлдерін және тағы басқа көшеттерді еккен. Сенбі, жексенбі күндері бірлестік мүшелері тағы да 50-ге жуық әртүрлі тал-дарақтарды мешіт ауласына әкеліп, жерімізді көркейтуге үлестерін қосты.<blockquote>«Біз әр сенбі күні жұмыстан шыққан соң, мешіт ауласына келіп, су құйып, бақшаға күтім жасаймыз. Арнайы насос қойдырдық», - дейді бірлестік жетекшісінің орынбасары Алимжан Шайымкулов.</blockquote>Бірлестіктің мүшелері «Істің басы – ниет. Ниет болса, тақыр жерді де гүлдендіруге болады. Ең маңызды шаруа - жер анамызды сауықтыру» дейді.<img src="https://knadmin.beoblood.kz/uploads/340006235_1224058708472357_4283343888160496854_n_0d6f8852d4.jpg" alt="340006235_1224058708472357_4283343888160496854_n.jpg">

Қызылордада өзбек этномәдени бірлестігінің мүшелері көшет екті

<a href="https://kyzylorda-news.kz/">Kyzylorda-news.kz.</a> Қазақ «Бірлік болмай тірлік болмас» деген сөзді бекерге айтпаған. Біле білсек, береке қай жерге орнаса, сол жерде құт пен ырыс қонақтайды. Ал ондай елдің де, жердің де дамуы тез, тірлігі тындырымды. Міне, сондықтан бірлік пен тұрақтылықтың құнын халқымыз қашанда жоғары қоя білген. Бірлік екі адамның бірлігі, қала берді отбасының, әулеттің, ауылдың, елдің бірлігі. Біз осы орайда біртұтас ауылдың татулығы мен мызғымас бірлігі жайында айтқымыз келді.Осы Аралдан үлкен жолға түсіп Сырға бет алсаңыз, Сырдарияны жағалай жатқан қаншама ел бар. «Өзен жағалағанның өзегі талмас» деген бабалар сөзінің расында салтанат құрғаны қазір де байқалып жатады. Өйткені бір дарияның өзімен қазірде қаншама ел жан бағып отыр. Балығын аулайды, жиегіне малын жайлайды. Сондай құтты өңірдің бірі – Қосжар.Қамбашты кеулей жатқан бұл ауылдың береке-бірлігін ұдайы өзгелерге үлгі етіп айтуға болады. Табиғат тамаша суреттеген көрініс көз алдыңызға екі жарды алып келеді. Сол жардың басына шықсаңыз, төңірек тұтастай көз алдыңызда. Қамбаш көлі де иек астында. Табиғаты тамаша, сулы да нулы алқаптың ақеден адамдары да әркез кеңпейіл. Ауылға қонақ келсе бір кісідей қарсы алып, сыйласа қалсаң, туысыңдай араласа кететін құтты мекеннің бірлігі қашанда ажыраған емес.Тарихына тоқталар болсақ, сонау 1966 жылы ауылға негізінен республикалық маңызы бар «Қамыстыбас балық питомнигі» РМҚК кәсіпорны құрылып, балық ресурстарын жасанды өсімін молайту мақсатында пайдалануға берілген. Содан бері бұл маңды жайлаған елдің жалпы саны алты жүзге жуықтады. Бұл ауылда 100-ге тарта шаңырақ бар. Негізгі кәсібі – балық және мал шаруашылығы. Ауылда халыққа қызмет көрсететін мектеп, кітапхана, клуб, медициналық пункт және ветеринариялық мал дәрігерлік пункті бар. Бұдан бөлек, ауылдағы мектеп жанынан 40 орындық балабақша ашылған. Бүгінде ол ауыл балаларын толық құрамда қамтып келеді. Басқалар қызыға да қызғана қарайтын ауыл бірлігі жайында сол елге басшы болып отырған Қосжар ауылдық округінің әкімі М.Әбдікеров:<blockquote>&nbsp;Өзім тұратын, өзім қызмет жасайтын ауылым жайында еш қысылмастан мақтау айтуға бармын. Себебі Қосжар ауылы – расында бірлігі мен тірлігі жарасқан Сыр бойындағы үлгілі ауылдардың бірі. Үлкені айтатын, кішісі соған тоқтайтын ауылымыздың ақсақалдары да жастарға ұдайы ақыл-кеңестерін айтып, қажет кезде жат әдеттерден тыйып отырады. Соның арқасында ауыл жастары толықтай жаман әдеттерден тыйылды. Ауылда қазір ішімдік атаулы мүлдем сатылмайды. Бір-бірінің бетін ашып, ел алдында масқара болған жағдайлар да ауылда мүлдем болған емес. Барлығы да бір атаның баласындай бірге тату-тәтті тұрмыс кешіп келеді. Қашанда бірлігі бар елде барлығы болады ғой. Оған дәлел, ауылда қазір қоғамдық көлік қатынасы тұрақты жолға қойылған. Аудан орталығымен байланыста ешқандай жол кедергісі жоқ. Ауылдың ішкі көшелері толықтай жарықтандырылған. Көшелердің де 50 пайызы –тас жол, 50 пайызы – шебін жол. Байланыс жақсы. Осының барлығы бірлігі жарасқан елдің жақсы бір көрінісі деп білемін, – дейді.</blockquote>Қашанда бірлігі басқаларға үлгі болған, тірлігі жұрт қызығарлықтай құтты мекен Қосжардың қазыналы қариялары да әркез кішіге жол көрсетуден танған емес. Алдына бара қалсаң ақылын айтатын, әділдік іздесең турасын айтатын қазына кеуде қартқа да бұл ауыл кенде емес. Осы ауыл құрыла бастағанда-ақ елге келген Қ.Тәжімбетов бүгінде сексеннің сеңгіріне таяған қазыналы қарт. Елге тұтқа, халықтың айнасы болып отырған Қарасай ақсақалдың да ауылы туралы айтары бір бөлек.<blockquote>– Мен Қосжарды киелі өңір дер едім. Өйткені бұл ауылдың халқы бір әкенің баласындай. Бір-бірімен келісе алмай, қырық пышақ болған адамдар жоқ. Әрине өмір болған соң торқалы той, топырақты өлімнің қатар жүретіні ақиқат қой. Сондайда ауыл адамдарының бірлігі сол шаңыраққа келген адамдарды тәнті етеді. Қай істі болмасын ауызбіршілікпен атқара білетін ауыл азаматтары қай шаңырақта болса да бірлесіп іс қылуға дайын. Оны осы ауылдың ақсақалы ретінде талай көріп жүрмін. Аллаға шүкір, ауыл адамдары өте ұйымшыл, айтқанға тоқтай қалатын, жөн білетін жандар. Ауылымыздың әкімі Мәди де елге ортақ мәселені жоғары жаққа жеткізуге ұдайы дайын тұрады. Соның арқасында қазір ауылымыздың ажары кіріп, қоңыр тірлігі қалыпты жүріп жатыр. Мұның барлығы алдымен заманның тыныштығы, елдің татулығы дер едім. Орайы келгенде айтарым, елімізге мызғымас бірлік, тұрақты татулықтың үлкен септігі тиеді. Дамудың айқын көрінісі сол болмақ, – дейді ауыл ардагері Қ.Тәжімбетов.</blockquote>«Бақ қайда барасың десе, бірлігі мен ынтымағы бар елге барамын» деген екен. Оған дәлел біз әңгімеге арқау еткен Қосжар ауылы. Қазақы қаймағы бұзылмаған, дәстүрдің озығы мен тозығын теңдей дәріптейтін ауылдың бірлігі басқаларға үлгі етуге әбден лайық. Тентегін тезге салатын ақсақалы бар, келінін келісті етер кейуанасы бар қазыналы елдің бір байлығы болса ол – балталаса да бұзылмайтын бірлігі. Жаратқан содан айырмасын.

Ауылда берекелі тірлік бар 

<a href="https://kyzylorda-news.kz/">Kyzylorda-news.kz.</a>&nbsp;Сыр елінде IT және инновациялар саласын дамытуда орталықтар ашылғаны белгілі. Сәйкесінше, орталық жастар арасында грант жариялауда. Бұдан бөлек, жастарға өзге де жеңілдіктер жүріп жатыр. Бұл туралы Өңірлік коммуникациялар қызметінің ақпарат алаңында өткен брифингте Қорқыт Ата атындағы Қызылорда университетінің Кәсіпкерлік орталығының басшысы Жанарыс Түбекбаев мәлімдеді.<blockquote>«Бүгінгі таңда Астана хаб технопарктің Қызылорда облысында өкілетті офисі ашылды. Хабтың басты мақсаты- өңіріміздегі ІТ кадрлар мен жобаларды дамыту, білім беру және қаржыландыруға шығару. Бұл Сыр жастарына IT және инновациялар саласындағы жобаларын іске асыруға мол мүмкіндік береді. Осы серіктестік аясында жасайтын алғашқы іс-шарамыз «Startup Talapker» атындағы байқау мектеп және колледж бітіруші түлектердің арасында өтеді. Байқау 20-сәуірде басталады. Байқау барысында мектеп бітіруші оқушылар мен колледждің үшінші, төртінші курс студенттерінен кәсіпкерлік жобалары жиналады. Бәсекелестікке сай келетін жобалардың жеңімпазы 5-мамырда белгілі болады. Жеңіске жеткен жоба Қорқыт Ата атындағы Қызылорда университетінің грантын иегері атанады. 1-і орынға 100 пайыз, 2-і орынға 50 пайыз, 3-і орынға 25 пайыз жеңілдік беріледі. Басқа да қатысушыларға естелік сыйлықтар мен сертификаттар тағайындалады. Бұл жоба барлық түлектерге пайдасын тигізеді деген ойдамыз. Байқауға қатысам деушілер өтінімдерін онлайн түрде www.startuptalap.kz сайтында бере алады. Өтінімдер 20 сәуірге дейін қабылданады», - деді Жанарыс Алтынбекұлы.</blockquote>

Қызылордада түлектер грантына байқау жарияланды

<a href="https://kyzylorda-news.kz/">Kyzylorda-news.kz.</a>&nbsp; Елімізде жеке кәсібін ашып, жаңа жұмыс орындарын қалыптастырамын деген әрбір жанға әрдайым қолдау бар. Ең бастысы – ашқалы отырған кәсібінің қоғамға қаншалықты маңызды екендігін дәлелдеп, арнайы бизнес жоспарын қорғап шықса болғаны. Бүгінгі күні мемлекет тарапынан қолдау тауып, өз кәсібін дөңгелетіп отырған жандар жетерлік. Солардың бірі сүйікті ісін кәсіпке айналдырып, көпшілік ризашылығына бөленген – Даража Бижанова.&nbsp;Даража Әлімбайқызы өз кәсібі жөнінде:<blockquote>Бұл кәсіпке келгенге дейін түрлі жұмыстарды істеп жүрдім. Тіпті үйлерді ремонттап, дизайндар жасадым. Бірақ өзім бала кезден тігін тіккенді жақсы көрдім. Алғашында үйде тұрмысқа қажетті дүниелерді келтіріп тіге беретінмін. Содан кейін әлеуметтік желілерден видео сабақтарды қарап жүріп, құрақ көрпе тігуге ой келді. Міне, қазір құрақ көрпе тігіп жүргеніме 3 жылдан асты. Осы ісімді әрі қарай жетілдіру мақсатында қалаларға барып ақылы курстар оқыдым. &nbsp;Тапсырыс алып, қыздың жасауларын, қонаққа жаятын арнайы көрпелер жасаймын. Күндізгі күйбең тіршілік қамынан соң кешкілік уақыттары қолыма ине мен жіп алып, ойыма түскен түрлі фантазиялар арқылы көрпелер тігемін. Иә, құрақ жасау үлкен шыдамдылықты талап ететін жұмыс. Себебі бұл жерде түстердің бір-бірімен үйлесімділігі өте маңызды болып табылады. Сондай-ақ матаның да қалай қиылғандығына ерекше назар аудару қажет. &nbsp;Ендігі мақсатым – тігін тігумен айналысуға арнайы шағын ғимарат алып, қасыма көмекші қыздар алсам ба деймін. Себебі &nbsp;кейде тапсырыстың көптігінен жалғыз өзім үлгере алмай қалып жатамын. Өзім көпбалалы ана, «Күміс алқа» иегерімін. Аудандағы кәсіпкерлер палатасымен кеңесе отырып, «Бастау бизнес» жобасына қатыстым. Содан қайтарымсыз грант ұтып, тігін тігуге арналған түрлі машиналар мен құралдар алдым. Елімізде кәсіпкерлерді қолдайтын осындай жобалардың болғанына ризамын,–деді.</blockquote>Көз майын тауысып, қара нардай қайратын арнап тігін тігумен айналысып келе жатқан Даража Бижанова бүгінде осы кәсібінің несібесін көріп келеді. Иә, тәуелсіз елімізде кәсіпкерлерге көмек көрсетіп, қолдайтын жобалардың бары қалың бұқараны да қуантпай қоймайды.

 «Бастау бизнес»: Қайтарымсыз грант иегері өз кәсібін ашты 

<a href="https://kyzylorda-news.kz/">Kyzylorda-news.kz.</a> Қармақшы ауданында халықтың алғысын арқалаған мейірім орталығы бар. Көбісі оны «Пернеш әжейдің дүкені» дейді. Ашылғанына 7 жыл толған әлеуметтік дүкеннің негізгі мақсаты – әлеуметтік аз қамтылған отбасыларға қолдау білдіру, көмек қолын созу.Қазіргі кезде жұмысын бір жүйеге келтіріп алған дүкенді аудан тұрғындары жақсы біледі. Қайырымдылық жасауға ниеттенген тұрғындар да осы дүкенге қайырылып, хал-қадірінше көмек қолын созуда.&nbsp;<blockquote>«Қайырымдылық жасасаң, қайырын көресің» дейді дана қазақ. «Мейірім» орталығын ашқалы халықтың алғысына бөленіп келемін. Бүгінгі күні әлеуметтік дүкеннің қызметі аудан жұртшылығына бес саусақтай аян. Бастапқы жылдары мешітке әкелінген киімдерді алып, мұқтаж жандарға таратушы едім. Қазір арнайы отыратын, заттарды қоятын орным бар. Іздеп келгендер керек киімін алып рақметін айтып жатады. Мұнда көбіне көпбалалы аналар, әлеуметтік жағынан әлжуаз отбасылар және оқушылар келеді. Келетін киімдер таза, бір-екі рет киілген немесе су жаңалары да кездеседі» дейді Пернегүл Өтепова.</blockquote>Қайбір жылдары Төтенше жағдай жарияланған уақыттарда әлеуметтік дүкеннің қызметі біршама тоқтап қалады. Алайда қоңырау шалып киім-кешек сұраушылардың қатары көбейіп, дүкеннің қайта жұмыс істеуін қалағандар болыпты. Мұндай да Пернегүл апамыз киімдерді сұраушыларға өзі апарып берген.&nbsp;<blockquote>«Маған киімдерді әкеліп беруші де көп, сұраушы да көп. Ондай кезде отыра алмаймын. Балаларының дене өлшемдерін сұрап аламын да жеткізіп беремін. Көлік жағынан еш қысылмаймын. Маған мекемелерден көлік жіберіп, жәрдемдесіп тұрады» дейді Пернегүл Өтепова.</blockquote>Кең пейіл жан жасаған еңбегіне ақы алмайды. «Тек балалардың қуаныштан жадыраған жүздерін көріп мен де бір жасарып қаламын» дейді ол өз сөзінде.<blockquote>«Бұл орталықты 2016 жылдың мамырында аштым. Әуеліде мешіттегі көмекке арналған заттарды алып, мұқтаж жандарға таратып жүрдім. Кейін арнайы орталық ашуды жөн көріп, аудан әкімдігіне жүгіндім. Ондағылар менің ұсынысымды бірден қолдап, мекеме тауып берді. Қазір «Мейірім орталығы» өз жұмысын толықтай атқарып, елдің игілігі үшін қызмет етуде» дейді бар ықыласымен. &nbsp;</blockquote>Әлеуметтік дүкеннің басты мақсаты – қолдан келгенше көмек қажет ететіндерге қол ұшын созу, жәрдемдесу. Бұрын тұтынуда болғанымен сапасы тәуір дүниелерді адамдарға тарту етеді. «Ысырап болмасын» деп орталыққа әкеліп жататындар аз емес. Қағазы үзілмеген жаңа киімдер де өткізеді. Бұл күнде Пернегүл Әбіләкімқызы алпыстың асқарынан асса да қолға түскен затты өзі алып кетіп, үйді-үйге таратып береді. Бұл орталыққа өз көмегін берушілер қатарында ел ағалары, мектеп мұғалімдері, оқушылармен қатар қарапайым тұрғындар да бар. Орталық жұмысын атқарып бастағалы талай көмек көрсетіліп, бірнеше қызықты оқиғалар да болған.<blockquote>«Бірде бір үйден зат алып кетуге барғанымда үй иесі компьютерді де алуымды ұсынды. Құрылғы аз-маз ескірсе керек. Біреуге жарап қалар деген оймен ала кеттім. Екінші күні бір әйел келіп, әлгі компьютерді алуға рұқсат сұрады. «Орталықтағы барлық заттар сіздер үшін! Қалаған затыңызды ала беруіңізге болады» дедім. Ол қуанып, компьютерді алып кетті. Бір-екі күн өткен соң жұмысқа келе жатқанымда толып тұрған кішкентай балаларды көрдім. Мектеп оқушылары болса керек, бір-бір сөмкелерін арқалап алған. Не үшін күтіп тұрғандарын сұрағанымда: &nbsp;«Апа, сіз компьютер таратып жатыр деп естідік. Бізге де беріңізші» дейді. Жүзіме күлкі үйіріп, балаларға мән-жайды түсіндірдім» дейді ол.&nbsp;</blockquote>Кең пейіл жанның жәрдемдесіп жүрген барша Қармақшы ауданы тұрғындарына алғысы шексіз. Қоңырау шалса киім-кешекті әкеліп, таратып беруге қай мекеменің болса да басшысы көлік тауып беруге даяр. Қарапайым тұрғындардың өзі де орталыққа киім, жиһаз бен ыдыс-аяқ әкеліп, сөрелерді толтыруда.&nbsp;

Қармақшы ауданында мейірім орталығы қызмет етіп тұр

<a href="https://kyzylorda-news.kz/ru/">Kyzylorda-news.kz</a>. &nbsp; Қазаққа төрт түлік қай уақытта болсын жат болмаған. Әсіресе түйе малына деген махаббаты оны бағудағы машақатты ұмыттырып жіберетінін де бабаларымыз жақсы білген. Мінсең көлік, жесең ет, ішсең сусын, кисең киім болатын мұндай жануардың көшпелі жұрттың жүгін артып, жаңа дәуірге жеткізуінің өзі оған деген құрметтің қаншалықты деңгейде екенін байқатады. Бұл жануардан халқымыздың тұрмысына демеу, аш өзегін жалғап, шөлін қандыратын «Шұбат» деген ұлттық сусын әзірленеді. Бұны бабаларымыз ерте заманнан біліп, ақтан қол үзбеген. Содан да шығар, түйе шаруашылығын қолға алған жандардың табысы тәуір, жағдайы жақсы. Ал оның сүтін өндіріп, өмір өзегіне айналдыруды қолға алған жандардың да жақсы жетістікке жетіп жатқаны жасырын емес.Бізде шұбат бар. Себебі түйе ұстаған шаруа шұбат ішеді. Бірақ өнім өзіне ғана. Оны сұранысқа сай баптап, арнайы құтыға құйып, сауда сөрелеріне жіберіп отырғандар санаулы ғана. Содан да болар бізде кәсіптің бұл түрі кенжелеп тұр. Десе де осындай қадамға бел буып, мемлекеттік бағдарлама арқылы шұбат өндірісін қолға алған сексеуілдік кәсіпкер жайында білесіз бе? Біз сол шұбат өндіретін нәзік жанды Нұрсұлу Жолмахан жайында айтамыз.Бұған дейін де түйе ұстаған Шымкеновтер әулетінде шұбат дайындау үрдісі үзілген емес. Алайда оны кәсіпке айналдырып, аралдық бренд қалыптасатыру ойын Нұрсұлу жолдасы Дәулетке жиі айтып жүретін. Ақыры айтылған ой ақиқатқа айналды. Бұл кәсіпті бастандыруда Нұрсұлуға жолдасы Дәулет пен туыстарының қолдауы көп болды. Осылайша 2021 жылы «Бизнестің жол картасы – 2025» мемлекеттік бағдарламасы аясында 3 млн теңге грант қаражатын алған кәсіпкер дайындалған шұбатты үй жағдайында арнайы құтыға құю технологиясына қол жеткізді. Бүгінде «Жолмахан Нұрсұлу Жолмаханқызы» жеке кәсіпкер аптасына 400 литр шұбат дайындап, оны арнайы құтыларға құйып, сауда нүктелеріне жіберіп отыр. Негізі аппараттың күніге 500 литр құюға мүмкіндігі бар. Алайда сүттің мөлшері аз болғандықтан, кәсіпкер күніге 50-60 литрдей өндіріп отыр. Шұбаттың литрі 1350 теңгеден босатылуда.<blockquote>– Алғашында бұл қадамға бару біз үшін жай ғана ой болды. Өйткені көп жерде қаржының жетімсіздігі қолбайлау болып жатады ғой. Алайда мемлекеттік бағдарлама арқылы бұл кәсіпті жүзеге асыру идеясын жолдасым Дәулет айтып, үміт сыйлады. Сонымен арада көп уақыт өтпей бұл кәсіпті жандандыру ісі бойынша «Бизнестің жол картасы – 2025» бағдарламасына қатысып, өз жобамды ұсындым. Алғашында сенімсіздеу болғанмен, менің қолымнан бұл кәсіпті алып кету келетініне көз жеткізген соң мамандар жобамды қайтарымсыз грантқа ұсынды. Алла сәтін салып, өткен жылы 3 млн теңге грантқа қол жеткіздік. Оған арнайы шұбат өнімін құятын, сүтті сақтайтын және дайын өнімдерді қаптамалайтын құрылғы сатып алдық. Бүгінде біздің жоба бойынша 4 қызметкер жұмыс істейді. Жергілікті өнім болған соң сұраныс та бар, – дейді кәсіпкер Н.Жолмахан.</blockquote>Иә, мемлекет берген мүмкіндіктің арқасында күнкөрісін кәсіпке айналдырып, Аралдың ақ шұбатын сапалы өнімдер қатарына қосуды көздеген кәсіпкердің бұл бастамасына жерлестері де дән риза. Бастысы –сапа. Осыған баса мән беретін ерлі-зайыптылардың ендігі арманы – Сексеуіл кентінен таза, сапа сұранысына жауап беретін шұбат өндірісін кәсіпорын деңгейіне дейін көтеру. Жас кәсіпкер мемлекеттен қолдау ұдайы беріліп тұрса, бұл мақсаттың да орындаларына сенеді.

Сексеуілдік кәсіпкер мемлекеттік бағдарлама арқылы шұбат өндірісін қолға алған 

<a href="https://kyzylorda-news.kz/">Kyzylorda-news.kz.</a> «Дарын» республикалық ғылыми-практикалық орталығы ұйымдастыруымен өткен жалпы білім беретін пәндер бойынша ғылыми жобалар байқауында Қызылорда қаласындағы Зияткерлік мектеп оқушылары алтын және қоладан медаль тақты. &nbsp;19 секция бойынша өткізілген додаға &nbsp;718 жоба ұсынылды. Сырбойылық өрендер жаратылыстану-математикалық бағытта зерттеушілік жұмыстары мен бірегей өнертабыстарын ұсынды. Жүлделі бірінші орын иеленген 12-сынып оқушысы Жанар Сабихан &nbsp;(жетекшілері: Жеңісбек Жалмұрзаев пен Сәкен Сүлейменов) көлік кинетикалық энергиясын электр энергиясына түрлендіру арқылы қаланы жарықтандыру мәселесін қарастырды. &nbsp;Ал векторлық әдіс арқылы онлайн тақтаның қаламсап құралының жазу сапасын жетілдіруді ұсынған 10-сынып оқушысы Бекжан Бектұрған (жетекшісі: Нұрбол Уақбаев) үшінші орынмен марапатталды.11-сынып оқушысы Еңлік Мұратбек пен Назгүл Ыдырыс (жетекшісі: Әділжан Науан ) ойлап тапқан &nbsp;егін алқаптарының өнімділігін бақылау және өнім көлемін болжау жүйе егіншілердің жұмысын оңтайландырып, өнімділігін арттыруға мүмкіндік береді. Бұл жұмысты да әділқазылар алқасы жоғары бағалап, арнайы Грамотамен марапаттады.<img src="https://knadmin.beoblood.kz/uploads/Whats_App_Image_2023_04_10_at_15_27_49_2_af83bc0465.jpeg" alt="WhatsApp Image 2023-04-10 at 15.27.49 (2).jpeg"><img src="https://knadmin.beoblood.kz/uploads/Whats_App_Image_2023_04_10_at_15_27_49_1_8f553d684c.jpeg" alt="WhatsApp Image 2023-04-10 at 15.27.49 (1).jpeg">

Қызылордалық зияткерлер ғылым көкжиегін бағындыруда

<a href="https://kyzylorda-news.kz/ru/">Kyzylorda-news.kz</a>.&nbsp; Бұқаралық спортты дамыту мемлекет алдында тұрған басты мәселелердің бірі. Оған дәлел жыл сайынғы Қазақстан Халқына арнаған Жолдауында мемлекет басшысы Қасым-Жомарт Тоқаев осыған басымдық беріп отырады. Жалпы мемлекеттің де мәртебесін әлемдік аренада айшықтап көрсететін саланың бірі де, бірегейі спорт екендігі жасырын емес. Қазіргі заманда баланы спортқа бауылып, салауатты өмір салтын насихаттау да игі іс. Біздің арамызда да өз алдына футбол командасын құрып, өз беттерінше жарыстарға қатысып аудан атын жақсы жағынан шығарып жүрген әуесқой спортшылар бар. Солардың бірі – «Порт» футбол құрама командасы.&nbsp;«Порт» командасы 2015 жылы әуесқой футболшылардан құралған. Командаға Төребек Дәрмағамбетов жетекшілік етеді. Жалпы бұл футбол командасының мүделерінің спорттық киімдері мен сырт өңірлерге жарыстарға барғандағы жол ақысына да демеушілік жасап отырған Төребек. Команда мүшелері кәсіпқой спортшылар емес. Қоғамда белгілеп алған әрқайссының өз мамандығы бар. Әр саладағы қызметкер азаматтар. Жас айырмашылықтары да бар. Алды 35 жаста болса, кішілері 17 жаста. Бірақ оларды спортқа деген сүйіспеншілік осы топқа біріктірген.<blockquote>&nbsp;Командадағы жігіттер спортты жан жүрегімен сүйеді. Олар өз командасына шын жанашыр. «Прот» командасында осындай спортшылар жиналған. Біз осынша жылдар ішінде тауды жарып, тас қопарып тастадық деп айта алмаймыз. Бірақ команда мүшелері жетілді. Өздерін мойындатты. Мен оларды тәжірбие жинасын деп, қызылордалық әуесқойлар арасындағы футбол жарысына, көршілес Қазалы ауданына жиі апарып жүрдім. Тіпті соңғы екі жылда Қазалы ауданының қыстық, жаздық әуесқойлар футбол лигасына қатысып жүр, – дейді Т.Дәрмағамбетов.</blockquote>Бүгінгі әңгіме де осы турасында болмақ. Яғни, Қазалы ауданында дәстүрлі өтетін әуесқой футболшылар арасындағы қысқы және жазғы ала доп додасында «Порт» командасының жеткен жетістіктері бір шоғыр. Қазалылық футбол сүйер қауым «Портты» жақсы таниды. Тіпті ондағы әрбір ойыншы туралы ақпаратқа қанық. Көршілердің қошеметіне бөленіп, Порттың ойынын тамашалау үшін келетін көрермен тапқан.<blockquote>&nbsp;Әр аптаның жексенбі күні Қазалыға барып әуесқойлар арасындағы лигаға қатыстық. Көршілес ауданның футбол деңгейінің жоғары екендігін айтуымыз керек. Ойыншылар арасындағы мәдинет, командалардың қарсыластарына құрметпен қарауы, төрешіні құрметтеу жолға қойылған. Мойындау керек, ең алғаш қатысқанда біз өзіміздің осал екенімізді білдік. Ал келесі ойындарда жаттығу мен ізденісті молайттық. Бірақ спортшы үшін баппен бірге бақ та қатар шабу керек сияқты. Өткен жылғы чемпион команданы биыл жеңсек те, жеңіс тұғырына шыға алмағанымыз өкінішті. Бір қуантатыны бізге деген қазалылықтардың ыстық қошеметі зор. Ерекше ықыласпен шығарып салды. Осыдан артық жеңіс бар ма? - дейді команда капитаны Ерлан Досжанов.</blockquote>Команда чемпион болмаса да өткен жылғы жазғы, биылғы қысқы лигада «Порт» командасының мүшесі Рахымбек екі мәрте, ең көп гол салған спортшы ретінде танылып, «Сұрмерген» атанды. Осылайша Қазалының әуесқойлар лигасының тарихында қалды.&nbsp;<blockquote>&nbsp;Жетекшіміз Төребек Әділбекұлына алғыс айтамыз. Бізге демеуші болып, бар шығынымызды көтеріп, өзімізді танытуымызға, Арал ауданының атын шығаруымызға көмегін көрсетіп жүр. Енді басшылық тарапынан біздің жаттығуымызға, ойын ойнауымызға зал мәселесін қарасытырып берсе деген кішкене өтінішіміз бар, - деген капитан Е.Досжанов біздің ауданда да әуесқойлар лигасын дамытса деген ойын ортаға салды.&nbsp;</blockquote>Өскелең ұрпақтың салауатты өмір салтын ұстанып, спортты жанына серік еткені жөн-ақ. «Порт» командасынан да бөлек біздің ауданда да әуесқой спортшылар көп. Солардың мүмкіндігін шыңдауға қолдау көрсетілсе нұр үстіне нұр болар еді.

Қазақстан және Қызылорда облысының жаңалықтары