<a href="https://kyzylorda-news.kz/">Kyzylorda-news.kz.</a> Қызылорда облысына қарасты Арал ауданының кәсіпкерлері «Бір ауыл – бір өнім жобасына» қатысуға ынталы. Бұл туралы Қызылорда облысы кәсіпкерлер палатасының директоры Пірмұхаммед Сыздықов пен облыстық Іскер әйелдер кеңесінің төрайымы Наталья Мишукованың ауданға сапары барысындағы кездесуде айтылды.Кездесу басталмас бұрын аралдық қыз-келіншектердің қолынан шыққан өнімдерден көрме көрсетілді. Көрмеге Сексеуілдің шұбаты, жылқы етінен жасалған шұжығы, Шөмішкөлдің жүннен жасалған тауарлары, Арал қаласы кәсіпкерлерінің ұлттық нақыштағы бұйымдары мен түйе жүнінен дайындаған көрпелері, түйе, жылқы, сиыр сүтінен әзірлеген өнімдері, түрлі шөптер қосылған сабындар мен кәде сыйлар қойылды. Шарада Палата басшысы «Атамекеннің» биыл бастаған «Мен кәсіпкер» жобасымен, оның аясында атқарылатын шаралармен таныстырып өтті. Сондай-ақ, ауыл тұрғындарына арналған «Ауыл аманаты» бағдарламасы мен жастарға арналған 2,5 пайыздық жеңілдетілген несиенің мүмкіндіктерімен бөлісті.Арал ауданында жұмыс істеп тұрған шағын және орта кәсіпкерлік субъектілерінің саны 6062.<blockquote>«Былтырғы кезеңмен салыстырғанда 50 пайызға өсім бар. Өткен жылдың қорытындысымен бизнесті жүргізу жеңілдігі бойынша 163 аудан мен 37 облыстық маңызы бар қаланың рейтингінде біздің аудан жақсы көрсеткіш көрсетті. Атап айтқанда 200 әкімшілік-аумақтық бірліктің арасында 76-орында. Бұл кәсіпкерлік саласындағы мемлекеттік бағдарламаларды жүзеге асырушы ұйымдардың бірлесе атқарған жұмысының нәтижесі», – деді аудандық кәсіпкерлік, өнеркәсіп және туризм бөлімінің басшысы Ренат Жанаев.</blockquote>Облыстық Іскер әйелдер кеңесінің төрайымы Наталья Мишукова «Мен кәсіпкердің» «Әйелдер кәсіпкерлігін дамыту орталығы» бағыты аясында жүзеге асырылатын «Бір ауыл – бір өнім» жобасы жөнінде жан-жақты ақпарат берді.<blockquote>«Биыл «Әйелдер кәсіпкерлігін дамыту орталығы» бағыты бойынша алдымызда ауқымды жұмыс тұр. Кәсіп жасауға ниеті бар белсенді қыз-келіншектерді оқытамыз, бағыт-бағдар береміз. Өнім шығарғанға дейін сүйемелдеп, қолдау көрсетеміз», – деді Наталья Мишукова.</blockquote>Кездесу соңында жас кәсіпкер Анар Жақан жақында ашқан «Дәстүр» сыйлықтар дүкенінен аралдық қыз-келіншектердің қолынан шыққан өнімдерге арнайы орын бөліп, жергілікті өнім өндірушілерге қолдау көрсететінін жеткізді.Атап өту керек, жыл басынан бері Арал ауданында жалпы құны 398,5 млн теңгені құрайтын 49 жобаға түрлі қаржы ұйымдары арқылы несие, 30 жобаға 41,4 млн теңге грант берілген. &nbsp;

Аралдық кәсіпкерлер «Бір ауыл – бір өнім» жобасына қатысуға ынталы

<a href="https://kyzylorda-news.kz/">Kyzylorda-news.kz.</a> Кездесуге Шиелі аудандық полиция бөлімінің бастығы Дәулет Беркімбаев, "KAPlogistics" «Семизбай – U» ЖШС директоры Алмас Майлыбаев, "Ленци Инвесть" зауытының директоры Лу Син Фын, "Гежуба Шиелі Цемент" зауытының өкілдері және тағы да басқа жүк тасымалына жауапты азаматтар қатысты.Кездесу барысында Шиелі ауданының әкімі Нұржан Ахатов жүк тасымалдаушы мекемелердің жүкті белгіленген мөлшерден артық тасымалдау деректері тыйылмай тұрғандығын айтты. Сонымен қатар бұл заң бұзушылықтарды дереу тоқтату керек екенін ескертті.Сондай-ақ, Нұржан Ахатов жүкті мөлшерінен бірнеше есе артық мөлшерде тасымалдаудың себебінен жолдардың жағдайы күн өткен сайын нашарлап, қарапайым тұрғындардың жеңіл көліктерімен емін-еркін қозғалуына кедергі келтіріп &nbsp;жатқандығын да тілге тиек етті.Мәселені шешу үшін осы жолды пайдаланып отырған &nbsp;бірнеше ірі кәсіпорын өкілдеріне жол жөндеу жұмыстарына демеушілік көрсету ұсынылды. Ал, жүкті мөлшерінен артық тасымалдаған жүк тасымалдаушыларына облыстық жолаушылар көлігі және автомобиль жолдары басқармасымен бірге рейдтік жұмыстар ұйымдастырып, айыппұл салу жолдары қарастырылмақ.

Нұржан Ахатов: Жүк тасымалы жүйелі болуы керек

<a href="https://kyzylorda-news.kz/">Kyzylorda-news.kz.</a> 2023 жылдың І тоқсаны бойынша Қызылорда қаласы аумағында 45 табиғи және техногендік сипаттағы төтенше жағдай тіркелген.&nbsp;Бұл туралы қала әкімдігінің баспасөз орталығында өткен брифингте Қызылорда қаласы Төтенше жағдайлар басқармасының бастығы Жасұлан Түйменов толық мәлімет беріп өтті.&nbsp;<blockquote>«Жыл көлемінде жүргізілген профилактикалық жұмыстарға қарамастан қала көлемінде 44 өрт оқиғасы орын алды. Өрттің басым көпшілігі, яғни 20 өрт оқиғасы тұрғын үй секторында, 19 өрт оқиғасы автокөлікте орын алған. Ал, улы газдан уланудың алдын алу мақсатында жылу беру маусымында тұрмысы төмен осал топ санатына жататын тұрғын үйлерге 469 дана көмір қышқыл газын анықтайтын «Газосигнализатор» құрылғысы орнатылды. Кез келген төтенше жағдайды болдырмау үшін қала тұрғындарын сақтық шараларын күшейтуге шақырамыз», – деді басқарма бастығы Жасұлан Қалдыбайұлы.</blockquote>Бұдан бөлек, қалада терезеден құлау дерегі азаймай тұр. Мәселен, биыл балалардың ата-анасының қарауынсыз қалуынан, қорғағыш торлардың дұрыс бекітілмеуінен балалардың терезеден құлау оқиғасының 1 фактісі тіркеліп, әр түрлі жарақатпен емдеу мекесіне жатқызылды.Сонымен қатар, суға шомылу маусымында су айдындарында жазатайым оқиғалар жиі орын алады. Бұл көбіне тұрғындардың тыйым салынған орындарда шомылуынан, су қоймаларының жанында алкоголь ішуінен және балаларды қараусыз қалдыруынан болады.Айта кету керек, төтенше жағдай қаупі орын алған жағдайда қала аумағында 25 дана «Баршаның назарына!» құлақтандыру сигналы орнатылған. Қазіргі таңда құрылғының жарамдылығы әр айдың бірінші онкүндігінде тексеріледі.

Қызылорда қалалық төтенше жағдайлар басқармасы қауіпсіздікті сақтауға шақырды

<a href="https://kyzylorda-news.kz/">Kyzylorda-news.kz.</a> Дана халқымыздың «Сөз жеткізеді, сөз жеткізе алмағанды саз жеткізеді» деген тәмсілі бекер айтылмаса керек. Иә, саз өнері қазақ халқы үшін қашан да биік. Әсіресе, сан ғасырлар өтсе де сыры мен сынын жоғалтпай, саф алтындай сақталып келген қазақтың асыл мұрасы – қобыз аспабының құны жоғары. Ал оны дәріптеу – ел рухын көтереді. Жуырда ұлттық өнерді дамыту, дәстүрлі өнерпаздардың шығармашылығын насихаттау және оларға жан-жақты қолдау көрсету мақсатында Бұдабай Қабылұлы атындағы мәдениет үйінде «Қобыз сарыны – Шиелі төрінде» атты облыстық қыл қобызшылар байқауы өтті.Ұлттық мұраның бәсін асқақтатар байқау Шиелі ауданының құрылғанына 95 жыл толуына орай, сондай-ақ «Ұлағатты ұрпақ» жобасы аясында дәулескер күйші, қобызшы Ықылас Дүкенұлының 180 жылдығына арналып ұйымдастырылды. Оған бірқатар сала мамандары мен аудан өнерпаздары қатысты. Сондай-ақ аталған байқауға Қазанғап атындағы Қызылорда музыкалық жоғары коледжіндегі қыл қобыз сыныбының оқытушысы Тоқтар Ағыраев, Қызылорда облыстық халық шығармашылығын дамыту және мәдени продюсерлік орталығының «Дәстүрлі өнер» бөлімінің меңгерушісі Майра Сәрсенбаева, және Нартай Бекежанов ауылдық мәдениет үйі жанындағы «Нартай сазы» халықтық фольклорлық ансамблінің жетекшісі Рысалды Махмұтәлиқызы қазылық етті. Ел рухын көтеретін қобызшылар байқауында 10-14 және 15-17 жас аралығындағы жас өнерпаздар екі көзең бойынша өзара додаға түсті.&nbsp;Қатысушылар алғашқы кезеңде бабалар қалдырған мәңгілік мұраны насихаттаса, екінші кезеңде өз қалаулары бойынша Қорқыт, Ықылас және тағы да басқа қазақ композиторларының шығармашылығынан күй орындады. Екі кезең бойынша бақ сынасқан қобызшылар бір-бірінен қалыс қалмай, сайыс алаңын қыздыра түсті. Жүзден жүйрік, мыңнан тұлпар деп танылғандар ел ықыласына бөленді. Бас жүлдені Шиелі ауданының намысын қорғаған Аяру Сұлтанбек пен Қызылорда қаласының абыройын асқақтатқан Динара Әбуова жеңіп алды. Бірінші орын Амангелді Бейбарыс, Айшолпан Амантай, Ақниет Бөлеген есімді өнерпаздарға бұйырды. Екінші орынды Шадияр Жақсығұлов пен Айша Мейрамбекқызы қанжығалады. Ал үшінші орынға Жансая Шерәлі, Перизат Мейірланқызы, және Нұрсая Қанибекова жайғасты. Байқау соңында барша жеңімпаздар мен қатысушыларға арнайы сыйлықтар мен алғыс хаттар берілді.

Шиеліде қобызшылар байқауы өтті

<a href="https://kyzylorda-news.kz/">Kyzylorda-news.kz.</a> Ауылды ажарландырудың амалын қарастырған осы жылдар аралығында мемлекет қол қусырып отырған жоқ. Біраз бағдарлама жасады. Қараша халық оның бәрін біле бермеуі де мүмкін. Ауылдың көсегесін көгертуді көксеген көптеген мемлекеттік бағдарламалар әзірленді. «Түк жоқ» деп, ауызды құр шөппен сүртуге мүлде келмейді. Тек оның тиімділігін толық сезінген әрі көрген ауыл аздау. Бар кілтипан да осында. Мәселен, бүгінде Шиелі ауданына қарасты 7 тірек, 22 ауылдық округ бар. Бұлар болашағы бұлыңғыр емес, керісінше, келешегі жарқын ауыл-аймақтар. Яғни, түндігінен түтіні түзу шыққан ауыл ретінде көрер жарығы һәм көркейер үміті бар алда.Осындай жақсылықтан үмітті елді мекендер үшін «Ауыл аманаты» жобасы қолға алынды. Аталған жобаға өтінім қабылдау маусым айына дейін жалғасады. Биыл бұл жобаны іске асыру үшін облысқа 3 млрд теңге қарастырылыпты. Шарттары айқын. Ең бастысы – кәсібімді ашсам деген жігер немесе бар бизнесімді дамытсам деген құлшыныс болса болғаны. Сонымен қатар шағын несиені алу үшін өтінім беруші жеке кәсіпкер болып тіркелуі керек. Мұнымен қоса кепілмен қамтамасыз етудің, салық органдарында тіркеудің болуы, басқа несиелер бойынша мерзімі өткен жарнаның, мемлекеттік кірістер органдарында берешектің болмауы талап етіледі. Бұдан бөлек, несие алушы зейнеткерлік жастан аспауы шарт. Жоба әкімшісі ретінде облыстық ауыл шаруашылығы және жер қатынастары басқармасы белгіленсе, сенімді өкіл ретінде «Байқоңыр» ӘКК«ҰҚ» бекітіліп отыр. Ал жоба «Өңірлік инвестиция орталығы» МҚҰ арқылы жүзеге асатын болады.«Ауыл аманаты» жобасы әлеуметтің табысын арттыруға, аграрлық бизнесті түлетуге, ауыл халқының тұрмыс сапасын жақсартуға бағытталған. Осы жоба аясында ауыл тұрғындары 2,5 процентпен несие ала алады. Сондай-ақ техниканы лизингке рәсімдеуге болады. Қарыз алу шарттары да өте тиімді. Себебі ондағы пайыздық мөлшерлеме әлдеқайда төмен. Несие мерзімі – 5 жыл, ал мал шаруашылығы және ауыл шаруашылығы кооперативтерін құру саласындағы жобалар бойынша 7 жылға дейін. Номиналды сыйақы мөлшерлемесі – 2,5 пайыз. Мұндай несиенің халыққа пайдалы болары анық. Мәселен, бүгінде бірде-бір коммерциялық банкте ауыл тұрғындарында мұндай шарттармен несие алу мүмкіндігі жоқ. Әлемдегі инфляцияны ескеретін болсақ, 2,5 пайыздық несие бұл – өте тиімді. Сондықтан да ауылда қандай да бір өндіріс ашып, оны дамыту үшін бұл – үлкен мүмкіндік.Айта кетейік, «Ауыл аманаты» арқылы сүт, ет өндірісі, құс және балық шаруашылығы секілді жобалар, өсімдік шаруашылығын, мал шаруашылығын дамыту, ауыл шаруашылығы кооперативтерін жабдықтау және басқа бағыттағы бизнес жобаларды қаржыландыру көзделіп отыр.&nbsp;Несие алушыда ауыл шаруашылығын жүргізу үшін жер телімі, қора және басқа да қажетті жағдайлардың болуы, ауылшаруашылық өндірістік кооперативіне мүшелікке кіру және жоба аясындағы өндірген өнімін өндірістік кооперативке өткізу басты талап. Тағы бір қоса кететін жайт, «Ауыл аманаты» аясында несие алған азаматтарға негізгі борыш пен сыйақыны өтеу бойынша 1,5-2 жыл жеңілдік кезеңі де қарастырылған.Таяуда «Арман» мәдениет үйінде аудан әкімінің орынбасары Ерсұлтан Апетовтің төрағалығымен жиын өтті. Оған аудандық жұмыспен қамту орталығының директоры Алмат Алдабергенов, мәслихат депутаттары, салалық бөлім қызметкерлері мен тұрғындар қатысты. Кездесу барысында тұрғындар тарапынан несие алу үшін қажетті кепілдік түрі, несие алуға мүмкіндік беретін кәсіптің түрлері мен жолдары туралы сауалдарын қойды. Жобаға аудан тұрғындарының да қызығушылығы зор болды. Олар ауылда өз кәсібін бастауға немесе осыған дейін болған шағын кәсіптерін дамыта алатынына дән риза. Мысалы, солардың бірі – Керделі ауылдық округінде тұратын көпбалалы ана Гүлназия Жүсіпова.<blockquote>– Шағын жылыжай шаруашылығым бар. Онда қияр, қызанақ және тағы басқа да көкөністер өсіреміз. Енді осыны одан әрі дамытуды қолға алмақпын. Жылқы өсіруге де ниеттімін. Арнайы бизнес-жоспар құрдым. Алайда қайда барып, кімнен не сұрау керектігін білмейсің. «Ауыл аманаты» жобасы арқылы кәсібімді әрі қарай дамыта аламын деп ойлаймын», – деп жобаға үлкен үміт артатынын жеткізді Г.Жүсіпова.</blockquote>Республикалық бюджеттен бағдарламаға биыл бөлінген қаржы 52,4 млрд теңге. Оған ел бойынша 11 мың микрокредит беру көзделіп отыр. Соның ішінде өңірге 3 млрд теңге қаржы бөлінді. Бағдарлама облыс орталығынан басқа елді мекендердің барлығын қамтитынын ескерсек, бұл аса қомақты қаржы емес. Сондықтан облыс әкімінің тапсырмасына сәйкес қаржыландыру көлемін ұлғайтуға өтінім берілуде. Бұл туралы Өңірлік коммуникациялар қызметінде өткен брифингте облыстық ауыл шаруашылығы және жер қатынастары басқармасы басшысы Талғат Дүйсебаев айтты.Басқарма басшысының сөзінше, микрокредит қаржысының мақсатты жұмсалуы қадағаланады. Сенім білдірілген өкіл ай сайын ауыл шаруашылығы мәселелері жөніндегі жергілікті атқарушы органға микрокредиттердің нысаналы пайдаланылуы туралы есеп береді.<blockquote>– Микрокредиттердің нысаналы пайдаланылуына үнемі мониторинг жасалады. Қарыз қаражаты мақсатты жұмсалмаған жағдайда айыппұлдар, қаржыны мерзімінен бұрын қайтару секілді шаралар қарастырылған, – деді Талғат Дүйсебаев.</blockquote>Не десек те, қоңыр тіршілік кешкен ауыл-аймақтар мемлекеттен берілетін күлшеден қағылмайды. Мұндай ауылдар Жаратқанның да, биліктің де назарынан тыс қалмақ емес.

Ауылды қорғау да, қолдау да қажет

<a href="https://kyzylorda-news.kz/">Kyzylorda-news.kz.</a> Бұл – Әділет&nbsp; Айтмағанбетов (суретте). Былтыр ғана оқу бітірді. Алматыдағы Қаныш Сәтбаев атындағы Қазақ ұлттық техникалық университетін тәмамдаған. Мамандығы жол саласына қатысты. «Автомобиль жолдарының құрылысы» бойынша бітірген кейіпкеріміз бүгінде жұмыс істейді. Дұрысы, Қызылорда облысындағы «Жол активтері сапасының ұлттық орталығы» филиалының зертханашысы.«Жол активтерінің ұлттық сапа орталығы» деп аталатын құзырлы мекеме төрт жыл бұрынғы Президент Қасым-Жомарт Тоқаевтың Жолдауынан соң құрылды. Біздің облыста бұның филиалы бар. 2019 жылдың наурызында Үкіметтің №131 қаулысымен ашылған мекеменің негізгі міндеті – республика аумағында салынып жатқан немесе жөнделіп, жаңартудан өткен автожолдардың сапасын сараптау. Мына жол қалай салынды, қалыңдығы, ұзындығы мен ені&nbsp; құжат бойынша сәйкес пе, асфальт құрамы, битум сапасы, бәрін-бәрін арнайы зертханада анықтап, қорытындысын қолыңа ұстата қояды.Әділет үш жыл бұрын осында тәжірибеден өткен. Бес ай бойы теориядан алған білімін практикада ұштастырыпты. Әрі арнайы келісім-шарт негізінде жалақы алып жүрді.<blockquote>Былтыр оқу бітірген соң осы орталыққа қайта келіп, тамыз бен желтоқсан айы аралығында тағы да жұмыс істедім. Жалақы төленіп тұрды. Ал биыл сәуір айынан бастап тұрақты жұмысқа тұрдым. Бұйырса, әлі де жолдағы құрылыс материалдарының сапасы мен кемшілігін анықтауда көп нәрсе үйренемін. Мұндағы білікті мамандар бар білгенін түсіндіріп отырады. Қазірдің өзінде асфальт құрамы, ондағы суды сіңіру пайызы, жолдың астыңғы қабатына төселетін материалдар сапасын анықтауда зерттеу жасап жүрмін. Алдағы уақытта мамандығым бойынша жол саласында жұмыс істегім келеді, – деп ағынан жарылды бізге жас маман.</blockquote>Ресми дерекке сүйенсек, республика бойынша бұған 10 мыңнан астам маман жетіспейді екен. Мектеп бітірушілердің көбі гуманитарлық бағыттағы мамандыққа әуес. Жол құрылысын меңгеруге құлшыныс танытатындар аз. Ал қазіргі жол саласында жүргендер көбі маман емес екенін ашық айтуымыз керек. Төселіп жатқан асфальт не басқа да материалдың жағдайы жіті зерттелмеген соң сапасы оңды бола ма?! Кеше салған жолдың бүгін тозатыныны тағы бір себеп осы. Дұрысы, жол салудан бөлек, оны күтіп ұстауды да білетін кадр керек-ақ.<blockquote>Мысалы, оқу орнында біздің топта 32 бала оқыды. Соның ішінде он шақты студент қана өз мамандығымен жұмыс істеп жүр. Қалғаны басқа салада. Жалпы, жол саласындағы жалақының аздығы да бұған әсер етеді деп ойлаймын. Екіншіден, қазіргі жастарды білесіз ғой, бірден басшы болғысы келеді, – деп күлді Әділет.</blockquote>Оның айтуынша, орталықтағы жұмысы өзіне ұнайды. Жаңа зертханалық құрал-жабдықтар келіп, жұмыс бұрынғыдан жеңілдене түскен. Сондай-ақ бұл салаға мол тәжірибе керек. Қазір Әділет облыс орталығындағы жолдарды түгел аралап, танысыпты. Инженерлермен бірге салынған жолдың сапасын білу мақсатында аудандарға да сапарға шығып жүр.Мемлекет басшысы 2025 жылға дейін елдегі жолдың 95 пайызы жақсы жағдайға жетуі тиіс деген пәрмен берді. Ал жыл сайын республикада шамамен 10 мың шақырым жергілікті жолдар жаңғыртудан өтеді. Бірақ, сапаға көңіл тола ма? Мерзімді баспасөз бен телеарнада әлеуметтік желідегі жазбаларда жол сапасына деген сын көп. Бұл жерде кадр тапшылығы анық көрініп тұр. Жоғарыда айтқан «Жол активтері сапасының ұлттық орталығы» бұл қиындықты жыл өткен сайын еңсеріп келеді. Облыстық филиалдағы зертхана меңгерушісі Мағжанның айтуынша, орталық басшылығы өзін жақсы жағынан көрсетіп, тәжірибеден өтуде талпынысы жоғары студенттерге қосымша жалақы төлеуге шешім қабылдаған.<blockquote>&nbsp;Бұл ынталандыру. Қазір біздің жол саласында маман тапшы екенін мойындауымыз керек. Сол себепті студенттерді арнайы бағдарлама шеңберінде зертханалық іс-тәжірибеге үйретіп, жол саласына жұмысқа тартудамыз. Біз бұған дейін де бірнеше студентті тәжірибеден өткіздік. Олар еліміздің әр түрлі қаласында жұмыс істеуде. Негізгі мақсат осы. Өзіңіз білесіз, жаз бойы бізде жұмыс қарбалас. Ал қыста қарап жатпаймыз. Мысалы, барлық мамандар болып облыстағы мектеп оқушыларымен кездесу өткізудеміз. Кәсіпорынның арнайы «Екі мың мектеп» атты бағдарламасы бар. Мақсатымыз – біздің мамандыққа деген қызығушылығын ояту. Жыл басынан бері облыс бойынша бірнеше мектепте кездесу өткізіп, оқушыларға кәсіби бағыт-бағдар берілді. Мойындау керек, жалғыз зертханаға ғана емес, жол салушылардың өзі қазір түрлі техникалық мамандыққа зәру, – дейді Мағжан Қасымхан.</blockquote>Оның айтуынша, нәтиже де көңіл қуантарлықтай. Осы кейінгі үш-төрт жылда салаға қызығушы жастарды саны артқан. Екінші бір қуаныш, Қызылорда қаласындағы Исатай Әбдікәрімов атындағы аграрлық-техникалық колледжінде биыл алғаш рет «автомобиль жолдары мен аэродромдар құрылысы және пайдалану» мамандығы ашылған еді. Қазір 25 студент оқиды. Мұндай шаралардан соң жол құрылысы саласына қызыққан жігітердің аз болса да қатары көбейіп келеді. Ал біздің кейіпкер – Әділеттің таңдауы көп жастарға үлгі десек қателеспеспіз. Өйткені, нағыз қат мамандыққа сұраныстың жоғары болатынын да ескеру керек.<figure class="image"><img src="https://knadmin.beoblood.kz/uploads/92ea3ea0_de4f_410b_921c_ff9c31d24d20_a0e21e5a09.jpg" alt="92ea3ea0-de4f-410b-921c-ff9c31d24d20.jpg"></figure>

Жергілікті өнімге сұраныс жоғары

<a href="https://kyzylorda-news.kz/">Kyzylorda-news.kz.</a> Қызылорда облыстық мәслихатының экология, өндіріс, шаруашылық және кәсіпкерлікті дамыту мәселелері жөніндегі тұрақты комиссия отырысы депутат Бауыржан Сандыбаевтың төрағалық етуімен өткізілді.&nbsp;Депутат Ж.Нұрымбетов, Д.Жұмбеков, Р.Ибраев, Е.Қалиев, Б.Мақашев, Қ.Нұрсейітов, А.Рахметов, Қ.Сақтағанов, Н.Сопбеков, О.Төлепов қатысқан отырыста Қызылорда облысының ауыл шаруашылығы және жер қатынастары басқармасы басшысы Т.Дүйсебаевтың есебі тыңдалды.&nbsp;Өз есебінде 2020-2022 жылдар аралығында республикалық және облыстық бюджеттерден барлығы 37,6 млрд қаржы бөлініп, ауыл шаруашылық, жер мәселелері бойынша атқарылған жұмыстарға тоқталып, жоспармен бөлісті.&nbsp;Осы сұраққа байланысты, депутат Орынбасар Төлепов шабындық жерді халыққа берудегі мәселені қозғады. Ауылдардағы, егістіктердегі ішкі су жолдарын тазалау мәселесін айтқан Депутат Жорабек Нұрымбетов суды мөлшермен пайдалану, егістікке берілген жердің сапасын бақылау және егістікті суару үшін су шаруашылығынан рұқсат алу керектігін де сөз етті.&nbsp;Депутат Бақдәулет Мақашев әр шаруашылықтағы ішкі су жолдарын тазалау үшін пайдаланылған шығындардың есебі жүргізіліп, қаржысы бөлінсе суға үнемділік болатындығын алға тартты.&nbsp;Сонымен қатар, депутат Ерлан Қалиев қазіргі таңда жанар жағар май және техниканың бағасы қымбаттағанымен жұмысшы еңбекақысының сол күйі қалғандығын мәселе етіп көтеріп, шаруашылықтарға ең алдымен осы мәселені шешу керектігін айтты.&nbsp;Күн тәртібіндегі «Әлеуметтік маңызы бар қатынастардың тізбесін айқындау туралы» Қызылорда облыстық мәслихатының 2016 жылғы 10 ақпандағы №352 шешіміне өзгеріс енгізу туралы мәселесі бойынша Қызылорда облысының жолаушылар көлігі және автомобиль жолдары басқармасының басшысы П.Шамұратов хабарлама жасап, ұсынған облыс бойынша халық көп шоғарлануына байланысты әлеуметтік маңызы бар қатынастар тізбесіне өзгеріс енгізу мәселесі депутаттар тарапынан қолдау тапты.&nbsp;Сондай-ақ, «Қызылорда облысында жылу маусымына дайындық және оны өткізу қағидаларын бекіту туралы» Қызылорда облыстық мәслихатының 2016 жылғы 19 мамырындағы №28 шешіміне өзгерістер енгізу туралы облыстық энергетика және тұрғын-үй коммуналдық шаруашылық басқармасының басшысы Р.Нұрмағанбетов хабарлама жасады. Ол сыртқа ауа +10 градустан төмен болған жағдайда жылуды қосу мәселесімен таныстырды. Халық игілігі үшін жасалатын жұмыстарға депутаттар қолдау білдірді.&nbsp;Комиссия отырысы соңында депутат Ерлан Қалиев Байқоңыр қаласындағы бірқатар мәселені қозғады. Ашып айтар болсақ, адам денсаулығына зиян келтіретін радиацияға байланысты жергілікті тұрғындарға көмек көрсету, 3 ай сайын тариф бағасы көтерілуі және қазақстандық кәсіпкерлерге Ресей Федерациясы заңының аясында жасалып отырған қиянаты ҚР қаржы министрлігіне ұсыныс ретінде жолдау қажеттілігін баса айтты.&nbsp;Осыған орай тұрақты комиссия депутаттары уақытша комиссия құрып, мәселені егжей-тегжей зерделеу керектігін бір ауыздан қолдады.&nbsp;

Тұрақты комиссия: Ауыл шаруашылығы саласы назарда

<a href="https://kyzylorda-news.kz/">Kyzylorda-news.kz.</a> Қазақ «Үлкеннің мыңына бергенше, баланың біріне бер» дейді. Неге? Өйткені, бала – алдымен, ізбасарың. Бергеніңді бағалайды. Айтқаныңды тыңдайды. Сүйкімді үнімен, былдырлаған тілімен жүректі жаулайды. Мейірім сыйлайды. Осыны ескерген дана халқымыз сәбиі дүниеге келген әр ата-анаға «ұзағынан сүйіндірсін» деп бата береді. Келешек елім, жерім дейтін жас ұрпақтың болуын қаласақ, балаларға жасынан жол көрсетіп, бағыт-бағдар беруге ұмтылатынымыз да сол. Сондықтан да, Мемлекет басшысы Қасым-Жомарт Тоқаевтың өткен жылды «Балалар жылы» деп жариялағаны бекер емес. Расында аталған жылда аудандағы бүлдіршіндерді қалай қуанта алдық?! Атқарылған жұмыстардың легі қандай болды? Бір сөзбен айтсақ, бар жақсымыз балаларға арналды ма?Құрметті оқырман, ашығын айтыңыз, «Балалар жылы» сіздің есіңізге нені салады? Жер-жерден балалар алаңы, ойын-сауық орталықтарының іргетасы қаланып, пайдалануға берілді дегенімізбен, мұны өзі аз секілді көрінеді. Одан бөлек, балалар күні құлыншақтарды қуанышқа кенелтіп, ауқымды шараның өткені бар. Сол тұста көптеген бүлдіршіннің жүзіне күлкі ұялаған еді.Еске салсақ, бұл күнді аудандық білім бөлімі жоғары деңгейде атап өтуді жөн санаған еді. Жүздеген балғындарды аудандық Оқушылар үйінің алаңына жинап, мерекелік көңіл-күй құшағындағы қуаныш иелеріне түрлі сыйлықтар дайындады. Ұйымдастырушылар шараға қатысушы балабақша бөбектеріне арнап жүзден астам тегін билет таратты. Бұл нақ сол уақытта жұмысын бастаған аттракциондар мен ойыншықтарды тегін пайдалануға мүмкіндік берді.Біле білсек, «Балалар жылы» аясында аудан орталығында «Pony» балалар ойын-сауық орталығы ашылғанды. Онда үлкен сырғанақтар, құрғақ бассейндер, балалар атракциондары бар. Сондай-ақ, айтулы күн немесе балалар мейрамы болған жағдайда 150 орынға арналған үлкен зал мен аниматорлары бар. Яғни, бүлдіршіндердің тиімді тынығуы үшін таптырмас орын.«Строй Модуль Астана» деген жауапкершілігі шектеулі серіктестік бар. Былтыр осы мекеме өз қаражаты есебінен Әйтеке би кентінен ойын алаңын салып берді. Мұнда да балалар үшін сырғанақ, әткеншек сияқты ойын жабдықтары мен әртүрлі спорт құрылғылары орнатылған. Алаң оқушылар үйінің ауласынан салынған. Ойын алаңдарын орнату жұмыстарын жергілікті жеке кәсіпкер Жасұлан Шамұратов мойнына алды.Айтпақшы, балалары жылында облыс бойынша 80 спорттық ойын алаңы берілген екен. Соның бірқатары ауданда ашылды. Сонау Сарбұлақ ауылындағы саябақтан бастап, Байқожа ауылындағы бір спорт алаңы, Әйтеке би кентінен екі спорт алаңы пайдалануға берілді. Одан бөлек, аудан орталығындағы балалар алаңын қоса аламыз. Яғни, мұнда жергілікті кәсіпкерлер төбе көрсетіп, бір ауыздан жұмыла кетті. Тартынбады. Таршылық танытпады. Табысынан жырып әкеліп, «болашақ осылардікі» деп үлес қосты.Айта кетейік, бұл былтырғы балғындар үшін жасалған игі шаралардың бірсыпырасы ғана. Одан өзге ауыз толтырып айтарлығы жетерлік.Ұлт ұстазы Ахмет Байтұрсыновтың: «Балам деген жұрт болмаса – жұртым дейтін бала қайдан шықсын» деген тамаша бір сөзі бар. Осыдан-ақ, қазақ халқының бала тәрбиесіне ерекше көңіл бөлгенін байқаймыз. Ал, өткен «Балалар жылындағы» бүлдіршіндердің қуанышы үшін жасалған шаруа аз болмады. Дегенмен, айтпағымыз, тек арнайы жылда ғана емес, жыл сайын құлыншақтардың қуанышқа кенелуі үшін тоқтаусыз игі істер жасай берудің ешқандай артығы жоқ.

Қазалыда балаларға арналған арнайы орындар жетерлік

<a href="https://kyzylorda-news.kz/">Kyzylorda-news.kz.</a> Синоптиктер Қазақстанда 22-24 сәуірде ауа райы қандай болатыны туралы болжам жасады.&nbsp;Болжам бойынша, алдағы тәуліктерде Қазақстанның басым бөлігінде ауа райына Қара теңіз аймағынан келетін циклон әсер етеді. Ол батыстан шығысқа қарай жылжып, жауын-шашын (негізінен жаңбыр түрінде) және тұман; оңтүстік облыстарда найзағай және құмды дауыл болады.&nbsp;&nbsp;

Демалыс күндері ауа райы қандай болады? 

<a href="https://kyzylorda-news.kz/">Kyzylorda-news.kz.</a> «Отан – отбасынан басталады» деген халық даналығы бекер айтылмаған. Отанға деген құрмет алдымен әркімнің өз отбасында қалыптасады. Әке, ана, бала ошақтың үш тағаны секілді, бірін-бірі толықтырып тұрады. Бақытты отбасын құру екі-ақ адамның қолынан келеді. Бірі – отағасы болса, екіншісі – отанасы. Ол үшін бұл екі тұлғаның болмысы бүтін болуы керек. Біз сөз еткелі отырған әулет осындай қағидаларды берік ұстанады.Тіршілігі теміржолмен біте қайнасып, темірдей тәртіпке бағынған Ерхановтар көпке үлгі. Бұл отбасының барлық мүшесі дерлік ел экономикасының күретамыры саналатын темір жол саласында еңбек етуде. Нағыз еңбек адамын осы әулеттен табасыз.Жақсылық Ерханов бүгінде сексеннің сеңгірінен асқан. 1955 жылдан бастап «Қазақстан темір жолы» АҚ-да еңбек жолын бастаған ол 1957 жылы Дина Ерхановамен шаңырақ көтереді. Отбасында 5 ұл, 3 қыз тәрбиелеп, балаларын құтты орнына қондырып, бүгінде 38 немере, 48 шөбере тәрбиелеп отырған бақытты әке.«Әке көрген оқ жонады, шеше көрген тон пішеді» дегендей, балаларына «менің жолымды қусаңдар, жаман болмайсыңдар, теміржол – күре тамыр ғой, осы салада еңбек еткендерің жөн секілді» деген ақылы бүгінде олардың теміржол саласында еңбек етуіне алып келді.Жақсылық аға Қорқыт бекетінің жол бойында ұзақ жыл еңбек етіп 1995 жылы зейнетке шығады. Зейнеттік демалысқа шықса да жұмыстан қол үзбей мал шаруашылығы мен егін жұмыстарымен айналысып, ұрпақтарын еңбекке баулып келеді.Теміржол бойы өзіндік өмірлік үрдіс пен реттілікке құрылған. Оның жартылай әскериленгендігі де осы талапқа саяды. Теміржол бойындағы үлкен көлемдегі жүк тасымалы, жолаушылар қатынасы бәрі де экономиканың нығаюына қызмет жасайды емес пе?! Сондықтан Жақсылық Ерханов осыбір жауапты қызметті абыроймен атқарды. Өзінен кейінгі немерелеріне де жауапкершілік артатын жүктің салмағына мән беруді талап етеді.«Атадан ұл туса игі, ата жолын қуса игі» дегендей, 5 ұлы мен 3 немересі әке салған сара жолды жалғастырып, теміржол саласында еңбек етіп келеді. Ерхановтар әулетінің ұзақ жылдар бойы теміржол саласында сіңірген еңбегі мен жеткен жетістіктері, қабілеттілігін, базалық дайындықтары ескеріле отырып жақында қоғамда Еңбек адамының мәртебесін арттыру және еңбек өнімділігін ынталандыру мақсатында облыстан «Үздік еңбек әулеті» номинациясы берілген болатын.<blockquote>«Жастайымыздан жұмысқа ерекше жігермен араласып, жаздың шыжыған ыстығында, қыстың сақылдаған сары аязды күнінде болат жолдың бойында аса жауапкершілікпен тынбай еңбек еттік. Қазіргі теміржол саласы заман ағымына қарай дамып келеді, тепловоздар ауысып, жұмысшылардың жұмысы шамалы да болса жеңілдеді. Бір тетікті түртіп қалсаң болғаны. Дегенмен де, қай кәсіптің болмасын жеңілі жоқ. Ендігі жерде балаларымыз болашағы жарқын елде бейбіт өмір сүруге жазсын. Еліміздегі әрбір шаңырақ үлкен де үлгілі отбасы болуына тілектеспіз», – дейді Жақсыбек аға.</blockquote>Отбасының тұңғышы Бақберген Ерханов 1978 жылдан бастап ПЧ-60 айналымында еңбек етеді. Саладағы үздіксіз еңбегі үшін құрмет грамоталар мен «Құрметті теміржолшы» атағын алған.Шымберген Ерханов аудандағы ПЧ-60 айналымында 1982 жылдан бастап жұмыс істеп келеді. Бүгінде жол бойы мекемесінің аға жол шебері. Еңбек жолында «ҚР Тәуелсіздігіне 30 жыл» медалін кеудесіне тақса, «Қазақстан темір жолы» АҚ-ның құрмет грамотасымен марапатталған. Ағаның ұлы Айбек Жақсылықов та осы саланың маманы. Бүгінде ол Жосалы жол бойы мекемесінде еңбек етеді.– Мен де әке жолын қуған ұрпақпын. Өзім де, балам да шойын жолда еңбек етеміз. Мұнда босаңсуға болмайды. Себебі адам тағдырынан қымбат жауапкершілік жоқ. Жол бойының майы қалай жұқса, наны да солай сіңімді болады екен. Сондықтан да балаларға қай істе де жауапкершілікпен адал еңбек еткенде ғана абыройлы отбасы боласыңдар деп ылғи айтып отырамын, – дейді ол.Әулеттің үшінші ұлы Бақберген Жақсылықұлы Қызылорда қаласында жол бойында еңбек етсе, оның ұлдары Нұрбек пен Нұрсұлтан ата кәсібін жалғап, теміржолдың тынымсыз тірлігімен айналысып жүр. Ал Бекберген мен шаңырақтағы кенже ұл Жақсыбек Қорқыт бекетінде жұмыс істейді.Теміржолшылардың тынымсыз тірлігі ел экономикасына қомақты үлесін қосуда деп қабылдаған дұрыс. Өйткені, айшылық алыс жерлерге аман-есен жетуде, жолаушының жолын қысқаруына оған қоса, жүк тасымалының қарқынды дамуында теміржолшылардың темірдей тәртібі менмұндалап тұр. Әулеттің әрбір мүшесі теміржол саласының бейнеті мен зейнетін көріп, берекелі ғұмыр кешуде.

Қармақшыда бір әулет теміржолшы мамандығын игерген

<a href="https://kyzylorda-news.kz/">Kyzylorda-news.kz.</a> Елімізде әлеуметтік сала бойынша көптеген шаруалар атқарылуда. Әлеуметтік сала – бұл халықтың тұрмыс-тіршілігінің, өмір сүру қағидаты мен әлеуетінің көрсеткіші. Осы ретте Қазақстан Республикасы Президенті Қасым-Жомарт Тоқаев «Жаңа Қазақстан: Жаңару мен жаңғыру жолы» атты халыққа жолдаған Жолдауында «...Маңызды шешімдер жұртшылықтың қатысуымен ашық қабылданады. Өйткені мемлекет әр азаматтың үніне құлақ асады. Адал еңбек, озық білім және үздік тәжірибе әрдайым жоғары бағаланады. Мен жаңа Қазақстанның осындай ел болғанын қалаймын...» деп айта келе тиісті ведомстволарға нақты тапсырмалар жүктеген болатын. Мемлекет басшысының берген тапсырмасына сәйкес бірқатар ілкімді жұмыстар тізбегі ауданымызда да атқарылып, жалғасын табуда. Оның ішінде Ұлттық жоба, мүмкіндігі шектеулілердің оңалту бағдарламалары, басқа да мәселелер бойынша Қармақшы аудандық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Ғалымжан Ақжігітовпен сұқбат жүргізген болатынбыз.&nbsp;– Ғалымжан Амангелдіұлы, сөзіңізді елімізде ең өзекті болып саналып отырған жұмыссыздық мәселесінің аудандағы ахуалынан бастасаңыз?– Өңірдегі жұмыссыздық пен жұмыспен қамтылу деңгейі туралы айтатын болсақ, өткен жылдың 6 айында 2091 адам жұмыссыз есебінен тіркеліп, олардың үлес салмағы 4,8 пайызды құрауда. Осы мерзім аралығында 555 адам (Қармақшы – 212 адам, Байқоңыр – 343 адам) тұрақты және уақытша жұмысқа орналастырылды. Биыл аудан бойынша 2533 жаңа жұмыс орнын ашу жоспарланса, оның бүгінгі таңда 1045 жаңа жұмыс орны ашылып, жылдық жоспар 41,2 пайызға орындалып отыр.– Кәсіпкерлікті дамыту – ел экономикасының тамырына қан жүгіртетін негізгі фактордың бірі десек қателеспейміз. Осы тұрғыда 2021-2025 жылдарға арналған кәсіпкерлікті дамыту жөніндегі Ұлттық жобаның іске асырылу барысы өңірде қалай жүріп жатыр?– Бағдарламаның І бағыты аясында қысқа мерзімді кәсіптік оқуға 80 адамды оқытуға облыстық бюджеттен қаржы бөлінген. ІІ бағыты бойынша жаңа бизнес идеяларды іске асыруға республикалық бюджеттен және Ұлттық қордан 400 АЕК бойынша 501 адамға 582 273 000 теңге қайтарымсыз грант қаралған, оның ішінде Қармақшы ауданына 370 адамға, Байқоңыр қаласы бойынша 131 адамға қаржы қарастырылған. Ал ІІІ бағыты аясында әлеуметтік жұмыс орындарына жоспар бойынша барлығы республикалық бюджеттен 75 адамға қаржы қаралды. Жастар тәжірибесіне барлығы 249 адамға қаражат қаралып, оның 124-і нақты жұмысқа жолданды. «Алғашқы жұмыс орны» жобасына 2 адам жіберілсе, «Ұрпақтар келісім-шарты» жобасына 4 адамға қаржы қаралды. «Күміс жас» жобасына 1 адам жолданды. «Онлайн – оқу курстарымен» жобасына оқытуға 62 адам жоспарланса, ол 158,1 пайыз болып орындалып, оқу курсын 98 талапкер бітіріп шықты. Байқоңыр қаласы бойынша «Алғашқы жұмыс орны» жобасына 10 адам жолданып, тиісті жұмыстар атқарылды. Біздегі жүзеге асырылып жатқан тағы бір жоба – «Ұрпақтар келісім-шарты». Бұл жоба аясында 5 адам жұмысқа жіберілсе, оның 1-еуі тұрақты жұмыспен қамтылды. «Күміс жас» жобасына 10 жұмыссызға қаражат қаралып отыр. Аудандағы тұрмысы төмен, аз қамтамасыз етілген отбасылар мен мұқтаж азаматтарды әлеуметтік қолдау бойынша да бірқатар жұмыстар жүргізілуде. Әлеуметтік көмектер үшін бүгінге 584 адамға 94 020 000 теңге төленді. Атап айтқанда оған туберкулезден емделудің сүйемелдеу сатысындағы науқастарға қосымша тамақтануға әлеуметтік көмекке, гемобластоздар мен апластикалық анемияны қосқанда гематологиялық аурулармен ауыратын, диспансерлік есепте тұрған балаларға дәрі-дәрмек алуға әлеуметтік көмекке, өмірлік қиын жағдайдың туындауына байланысты әлеуметтік көмекке, Ауғанстан аумағынан Кеңес әскерлерін шығару күніне орай біржолғы әлеуметтік көмекке, Жеңіс күніне орай 1941-1945 жылдар кезеңінде тылда 6 айдан кем емес жұмыс істеген азаматтарға, Тәжік-Ауған, Таулы Карабах қақтығыстары, Ирактағы халықаралық бітімгершілік операцияға бітімгерлер ретінде қатысқан, Вьетнам соғысы, ядролық сынақ полигонына қатысушы, 1986-1987 жылдары Чернобыль АЭС-індегі апаттың, азаматтық немесе әскери мақсаттағы объектiлердегi басқа да радиациялық апаттар мен авариялардың зардаптарын жоюға қатысқан, сонымен қоса ядролық сынақтар мен жаттығуларға тiкелей қатысқан азаматтар, тағысын тағы кіреді.– «Мүгедектерді жеке оңалту» бағдарламасы бойынша істеліп жатқан жұмыстарыңызды да бір қамтып өтсеңіз?– Бөлім арқылы айтылған уақыт мерзімінде 2091-ден астам мүгедек арнайы құрал-жабдықтармен қамтамасыз етіліп және арнайы қызметтер бойынша көмектер көрсетіліп келеді. Биылға міндетті гигиеналық құралдарға республикалық және жергілікті бюджеттен қаржы қаралып, міндетті гигиеналық құралдармен қамтамасыз ету үздіксіз жүргізілуде. Халықтың әлеуметтік осал топтарын қолдау мақсатында ерекше тәртіпті қолданумен мүгедектерді тасымалдау (Инватакси) қызметіне аудан бойынша 40 адамға және Байқоңыр қаласы, Төретам кенті, Ақай ауылы бойынша 80 адамға сапалы қызмет көрсетілді. Кемтар балаларды әлеуметтiк және медициналық-педагогикалық түзеу арқылы қолдау туралы ҚР Заңына сәйкес бөлімде үйде әлеуметтік қызмет көрсету бөлімшесі жұмыс атқаруда. Ауданда 28 күтім жөніндегі әлеуметтік қызметкерлердің қарамағында 130 үйде әлеуметтік қызметке мұқтаж қызмет алушылар қамтылып, қызмет алушы балаларға арнайы кестемен әлеуметтік қызметкерлер тарапынан сауықтыру жаттығулары мен өзін-өзі қамтамасыз ету, бос уақытын ұйымдастырып өткізу, консультативтік, медициналық және құқықтық көмек беру жұмыстары ұдайы жүргізіліп тұрады.– Халыққа көрсетіп отырған қызметтеріңіздің бірі – мемлекеттік атаулы әлеуметтік көмек жайында не айтар едіңіз?– «Азаматтарға арналған үкімет» мемлекеттік корпорациясы» коммер- циялық емес акционерлік қоғамы арқылы атаулы әлеуметтік көмек төлеу жөніндегі пилоттық жобасын Ақмола, Батыс Қазақстан, Қарағанды, Павлодар, Түркістан облыстарының, Алматы, Нұр-Сұлтан және Шымкент қалаларында іске асыру туралы» ҚР Еңбек және халықты әлеуметтік қорғау министрінің және ҚР Цифрлық даму, инновациялар және аэроғарыш өнеркәсібі министрінің бірлескен бұйрығына өзгерістер мен толықтыру енгізу туралы бұйрығына сәйкес «Азаматтарға арналған үкімет» мемлекеттік корпорациясы» коммерциялық емес акционерлік қоғамы арқылы атаулы әлеуметтік көмек төлеу жөніндегі пилоттық жобаны іске асыру кезіндегі мемлекеттік органдардың өзара іс-қимыл алгоритмінде, АӘК төлеуді уәкілетті орган атаулы әлеуметтік көмек төлеу жөніндегі уәкілетті ұйымдағы банк шоттарына аудару жолымен жүргізеді.Пилоттық жоба шеңберінде 2022 жылғы 1 сәуірден 2022 жылғы желтоқсанға дейін қабылданған өтініштер бойынша АӘК төлеу Мемлекеттік корпорация арқылы алушыларға жүзеге асырылады. Пилоттық жобаның қолдану кезеңінде Мемлекеттік корпорация қызметті қайтарымсыз негізде көрсетеді. Уәкілетті орган АӘК төлеуге қажеттілік сомасы туралы өтінім келіп түскен күннен бастап 2 жұмыс күні ішінде мемлекеттік корпорацияға есепті кезеңге АӘК төлеуге қажеттілік сомасы туралы өтінімде көзделген сома шегінде республикалық бюджет қаражаты есебінен 80 пайыз және жергілікті (облыстық) бюджет қаражаты есебінен 20 пайыз нысаналы трансферттердің арақатынасында ақша қаражатын аударады. Бұл ретте бюджет қаражаты төлемдерінің толық көлемі уәкілетті орган деңгейінде жүзеге асырылады.– Алда қандай жоспарларыңыз бар?– Мемлекет басшысы осы жылғы қазақстандықтарға арнаған Жолдауында «...Бір-бірімізді жат көрмей, жақын тартып, қоғамда нақты өзгерістерге деген сенімді орнықтырамыз. Жұртымыздың күш-жігеріне, дарыны мен еңбекқорлығына сүйенеміз. Әр азаматтың өз қабілетін іске асыруына барынша қолайлы жағдай жасаймыз. Біз осылайша ғана халқымыздың жасампаздық әлеуетін арттыра аламыз...» деген еді. Осы маңызды құжатта берілген тапсырмаларға сай алда халықтың әл-ауқатын көтеруде жыл аяғына дейін &nbsp;жаңа жұмыс орнын ұйымдастырып, аз қамтылған отбасыларды жұмыспен қамтуда «Бақытты отбасы» орталығын ашуды межелеп отырмыз. Сондай-ақ өңірдегі жұмыссыздардың санын азайтуда 2021-2025 жылдарға арналған кәсіпкерлікті дамыту жөніндегі Ұлттық жоба аясында жұмыссыз азаматтарды жобаға қатыстыру болып табылса, әлеуметтік төлемдерге қаралған қаржыларды толығымен және сапалы игеру жұмыстарын да әрі қарай жүйелі жүзеге асыра беретін боламыз.– Әңгімеңізге рақмет!

Қармақшыда 584 адамға әлеуметтік көмектер берілген

<a href="https://kyzylorda-news.kz/">Kyzylorda-news.kz.</a> Мектеп қабырғасында білім алып жүргенде, жасыратыны жоқ, он күндік демалыс пен жазда шығатын үш айлық каникулды асыға күтетінбіз. Себебі, әр мезгілдің өзіндік қызықтары бар еді. Көктемде ләңгі теуіп, асық ойнасақ, жаздыгүні іздеген адам кішкентайларды «мотор» деп атап кеткен «Жеңіс» паркі жанындағы су айдау бассейінен табатын. Күзде кенттен тысқары орналасқан «Водакачкаға» барып, балалар болып жидек теретін күндер тура кеше ғана болғандай көз алдымызда тұр. Қыстың қызығы өз алдына. Саусақ сіресіп, салқыннан бет дуылдағанша шана жетектеп, қар атысып-ақ он күн демалыстың қалай өтіп кеткенін байқамай қаламыз. Бірақ қазіргі балалардың серуені бөлек. Енді бір айдан соң Қазалы ауданындағы мектеп оқушылары ең ұзақ жазғы демалысқа шығады.Расын айту керек, 2000-шы жылдары ойын баласына қауіп қазіргіден әлдеқайда аз еді. Ата-ананы «баламды ит қуып, балтырын қанатпаса» деген қорқынышы ғана болды. Қазір ше? Бүгінде бала ұрлығы, жол көлік оқиғасы, кішкентайлардың үйден кетіп қалуы, педофилия: тізе берсек тереңдей береміз. Тіпті, топтық төбелесте бесіктен белі шықпаған балалардың төбе көрсетіп жүргені де жасырын емес. Мұның себебі, белгілі. Ересек адамдардың құндылықтан алшақтап бара жатқаны осындай жайттарға себеп болып отыр. Әсіресе, әлі бұғанасы қатаймаған жанға қастандық ойлайтындардың көбеюі жүрекке батады. Ата-аналардың жұмысбастылығы салдарынан қараусыз қалған құлыншақ та кімге қарап, бой түзейтіні, қандай ортаға тап болатыны белгісіз. Осы тұста отбасы институтының әлсірей бастағаны байқалады. Бұл жақсылықтың нышаны емес.<blockquote>«Ең алдымен отбасы құндылығының құлдырауы түрлі әлеуметтік қиындықтардың туындауына себеп болып отыр. Біздің жас кезімізде балаларға міндетті түрде бір адам баскөз болып, үйде отыратын. Мәселен, мен ұстаздық еткен жылдары бала тәрбиесімен, олардың мектептен тыс уақытта немен айналысатынын енем бақылауда ұстап отырды. Кейін мен зейнетке шыққаннан кейін, немерелерімнің бос уақытын тиімді ету, оларға баскөз болуды өз мойныма алдым. Қарттары жоқ туыстарымыздың үйінде әкесі нәпақа тапса, шешесі бала күтімімен айналысатын. Бұл біріншіден, құдай берген құлыншақтардың амандығына сеп десек, екіншіден, жаман ортағы түсіп кетуінің, ата-ана алдында жауапсыз болудың алдын алады», – дейді зейнеткер Ұлдай Мүсірепова.</blockquote>Демалыс күндері бала көп уақытын үйде өткізетіндіктен ата-ананың қоғам мен бала алдындағы жауапкершілігі де сыналатыны сөзсіз. Мәселен, біршама жыл бұрын аудан мектептерінің бірінде оқитын 9 сынып оқушысы жоғалып кеткені туралы мессенджерде хабар тарады. Ата-анасы құзырлы органға хабар бергеннен кейін көп уақыт өтпей, оқушы үйіне оралған. Алайда, дабыл қағушы баланың табылғаны жайында хабар бермей, жұртты дүрліктіріп қойды. Ересек адамның неге мұндай қадамға барғаны жайында әзірге ақпарат жоқ.<blockquote>«Оқушылардың белгісіз себептермен хабарсыз кетуі орын алып тұратыны рас. Қуанышымызға орай, көп ұзамай аман-есен табылып жатады. Бұған құзырлы органдармен бірлесе күш салатынымызды жақсы білесіздер. Көп жағдайда адамдар бала алдындағы ең бірінші жауапкершілік, оның ата-анасында екенін терең сезіне бермейді. Соған байланысты, күзгі демалыс қарсаңында ата-аналарға мектеп директорлары атынан ескертпе хат жолданды. Онда баланың мектептен тыс уақыттағы қауіпсіздігі мен амандығына өздері тікелей жауапты екені көрсетілген. Осылайша, көптеген қиындықтың алдын аламыз деген ойдамыз. Сондықтан, ата-аналар демалыс күндері баласының уақытын тиімді өткізудің жолын тауып, қауіп төндіруі мүмкін жерге бармауын қадағаласа, нұр үстіне нұр болар еді», – дейді аудандық білім бөлімінің бас маманы Қуаныш Ерімбетов.</blockquote>Әрине, жеткіншектердің мектепте жүргенде ұшырасқан сәтсіздіктеріне сынып жетекшісін, мектеп директорын кінәлі ете салу қазір өте оңай. Олардың белгілі бір деңгейде жауапкершілік арқалайтыны да рас. Алайда, бұзықтың тәртіпсіздікке баруы үйдегі ақыл-кеңестің дефицитінен болып жүргенін естен шығармағанымыз абзал. Баласына ешкім жамандық тілемейді. Ал, дұрыс тәрбие бермеу – жамандық атаулының алғашқы әрі кешірілмес қателігі екенін естен шығармаған жөн-ақ.

Қазақстан және Қызылорда облысының жаңалықтары