<a href="https://kyzylorda-news.kz/ru">Kyzylorda-news.kz.</a>&nbsp; Су шаруашылығы қызметкерлерінің кәсіби мерекесіне орай облыс әкімдігінде салтанатты шара өтті. Онда облыс әкімінің бірінші орынбасары Серік Қожаниязов сала ардагерлері мен мамандарын марапаттап, төл мерекемен құттықтады.<blockquote>– Баршаңызды су шаруашылығы қызметкерлері күнімен шын жүректен құттықтаймын. «Өзен жағалағанның өзегі талмас» деген халықпыз. Сыр елінің күнкөріс тіршілігі – су мен жердің тілін, ауа райының құбылысын жазбай танитын, ел құрметіне бөленген атақты мұраптар болған. Ауыл шаруашылығына бейімделген аймағымызда кезінде 200 мың гектардан астам жер тегістеліп, жүздеген канал мен су құрылыстары салынды. Күрішті, ырысты Қызылорда атануымызға ардагерлердің сіңірген еңбегі өлшеусіз. Бір кездері Одақтың тарауымен егін шаруашылығындағы жүйе бұзылып, бұл сала тоқырауға ұшыраған еді. Қазір қайта жанданды, салада зор серпіліс бар.Ауыл шаруашылығына ең бірінші керегі – су. Оның мақсатты пайдаланылуын реттеп, тиімділігін арттыруға су мамандарының қосар үлесі мол. Табиғаттағы су қорларын үнемді пайдаланып, сақтай білуіміз керек. Бұны өз ретімен, жүйесімен кәсіби мамандар ғана жүзеге асыра алады. Бүгінде күнкөрісі ауыл шаруашылығы өндірісіне, яғни суармалы суға тікелей байланысты сыр диқандарын сумен қамтамасыз етуде қиыншылықтар туындап отырғаны бәрімізге белгілі. Сушыларымыздың алдында тұрған міндет – суды тиімді пайдалану арқылы қолда бар егістікті қамтамасыз ету және Солтүстік Арал теңізін сақтап қалу. Сыр өңірі су шаруашылығының жағдайын жақсартуға ерекше назар аударылып, күріш танаптарын тегістеу, суды бөлу мен есепке алуды автоматтандыру, суару жүйелерін қайта жаңғырту мен модернизациялау шаралары қабылдануда. Күннің ыстық-суығына қарамай аянбай еңбек етіп жүрген сушыларымыздың еңбегіне құрмет көрсету – біз үшін үлкен абырой.Құрметті ардагерлер, сала қызметкерлері, Сыр өңірінің су шаруашылығы саласын дамыту жолындағы атқарып жатқан ерен еңбектеріңізге табыс, зор денсаулық, отбасыларыңызға амандық тілеймін, – деді С.Қожаниязов.</blockquote>Шарада сала ардагерлері Дәулетияр Баялимов және Айтбай Көшербаев саладағы өзекті мәселелер жайында сөз қозғап, әріптестерін мерекемен құттықтады. Бірқатар қызметкерлер мен ардагерлер Арал өңірі қазақстандық бөлігінің су шаруашылығы, экологиялық және әлеуметтік-экономикалық маңызды мәселелерін шешуге зор үлес қосқаны үшін халықаралық Аралды құтқару қоры атқару комитетінің төрағасы Султон Рахимзоданың алғыс хатымен, Қазақстан Республикасындағы атқарушы дирекциясының «Арал теңізін құтқаруға қосқан үлесі үшін» төсбелгісімен, ҚР экология және табиғи ресурстар министрлігі су ресурстары комитеті төрағасының және облыс әкімінің алғыс хаттарымен марапатталды.

Су шаруашылығы қызметкерлеріне кәсіби мереке қарсаңында құрмет көрсетілді

<a href="https://kyzylorda-news.kz/">Kyzylorda-news.kz.</a> Қытай Халық Республикасына жұмыс сапары аясында облыс әкімі Н.Нәлібаев «China Glass Holdings LTD.» компаниясының президенті Лю Гуо мырзамен кездесті.Кездесуде былтыр қазан айында Қызылорда облысында іске қосылған еліміздегі алғашқы шыны зауытының жұмысы талқыланды. Қуаттылығы 197,1 мың тонна шыны өндіретін кәсіпорын іске қосылғаннан бері 102 мың тонна шыны өндіріп, оны Қазақстанның барлық өңірлеріне және Ресей, Тәжікстан, Түрікменстан және Өзбекстанға жеткізуде. Шыны зауыты облыстағы құрылыс саласының дамуына тың серпін беріп, ішкі нарықтың 70% және алдағы уақытта Орталық Азия мен Кеден Одағы елдерінде 30% үлесін иеленеді деп күтілуде.«China Glass Holdings LTD.» компаниясының президентімен кездесуде облыс әкімі шыны зауыты айналасында шағын және орта кәсіпкерлік белдеуін құру бағытындағы жұмыстарды талқылады.Нәтижесінде, қытайлық тараппен бірлесіп, қуаттылығы жылына 5 млн. шаршы метр энергия үнемдейтін шыны өндірісі жобасын іске асыру бойынша екіжақты Меморандумға қол қойылды. Аймақ басшысы әлемдік нарықта жоғары сұранысқа ие заманауи өнім Қызылорда облысының экономикалық дамуына зор септігін тигізетіндігіне сенім білдірді. Одан бөлек, облыс әкімі шыны зауыты айналасында қосылған құны жоғары түрлі шыны бұйымдары өндірістерін, ультражұқа шыны, автокөлік айналары және т.б. жобаларды жүзеге асыруға барлық мүмкіндіктер бар екендігін жеткізді.Кездесу соңында аймақ басшысы әкімдік тарапынан өзара тиімді байланыстардың маңыздылығын растай отырып, одан әрі бірлесіп жұмыс жасауға, өнеркәсіптік ынтымақтастықты кеңейтуге ниет білдірдi.Еске салсақ, 6-8 шілде күндері Пекин қаласында ҚР Индустрия және инфрақұрылымдық даму министрі Марат Қарабаев бастаған қазақстандық делегация шетелдік инвестицияларды тарту және өзара сауда-экономикалық ынтымақтастықты дамыту мақсатында қытайлық компаниялармен екіжақты кездесулер өткізеді.

Аймақ басшысының Қытайдағы жұмыс сапары жалғасуда

<a href="https://kyzylorda-news.kz/">Kyzylorda-news.kz.</a> 6-8 шілде күндері Пекин қаласында ҚР Индустрия және инфрақұрылымдық даму министрі Марат Қарабаев бастаған қазақстандық делегация шетелдік инвестицияларды тарту және өзара сауда-экономикалық ынтымақтастықты дамыту мақсатында қытайлық компаниялармен екіжақты кездесулер өткізеді.Іссапардың алғашқы күні облыс әкімі Нұрлыбек Нәлібаев қытайлық «Gepetto» мұнай технологиялары корпорациясының Басқарма төрағасы Цзэн Бинь мырзамен кездесті. Кездесуде мұнай-газ саласындағы ынтымақтастық мәселелері талқыланды. «Gepetto» компаниясы — мұнай және газ өндіруді ұлғайту бойынша технологиялық ғылыми-зерттеулерді және сервистік қызметті жүзеге асыратын қытайлық ірі кәсіпорын. Компания 50-ге жуық патенттелген технологиялар мен ғылыми-техникалық зерттеулер саласында халықаралық жетістіктерге жеткен.Былтыр «Gepetto» компаниясының басшылығы облысқа іссапары аясында екіжақты кездесулер өткізіп, тиісті зерттеулер жүргізді. Нәтижесінде Қызылорда қаласында еншілес компания құрған болатын. Бүгінгі кездесу осы жұмыстардың жалғасы іспетті. Аймақ басшысы облыс аумағындағы мұнай кеніштерінің табиғи сарқылуына байланысты мұнай өңдіру көлемін арттыруда компанияның инновациялық технологиялары мен оң тәжірибесін ескере отырып, жергілікті мұнай компанияларымен бірлескен жұмыс жүргізуді ұсынды. Нәтижесінде өңірдегі мұнай кен орындарының тиімділігін ұлғайту және өнімділігін арттыру бағытында химиялық реагенттер өңдіру, арнайы мамандарды даярлайтын оқу бағдарламаларын құру және әлеуметтік жобалар бағытында бірлескен жұмыстарды жүзеге асыру мақұлданды.Кездесуде аймақ басшысы облыстың әлеуметтік-экономикалық дамуына оң әсер ететін маңызды жобаларға әкімдік тарапынан тиісті қолдау көрсетілетіндігін жеткіздi. Қытайлық тарап өзара әрiптестiк орнатуға мүдделі екенін растады.

Облыс әкімі Қытай Халық Республикасына жұмыс сапарымен барды

<a href="https://kyzylorda-news.kz/">Kyzylorda-news.kz.</a>&nbsp; Қазақ даласының төрінде жатқан Астананың елорда атанғанына биыл ширек ғасыр толып отыр. Бұл қат-қабат тарих қатпарында қас-қағым сәт секілді көрінетін шығар. Ал тәуелсіз еліміздің дамуында ерекше маңызды мәнге ие кезең ретінде бағаланады. Бүгінде Астана идея мен шындық тоғысқан, сәулеті мен дәулеті келіскен, жастық пен сұлулықтың символы атанған шырайлы шаһарға айналды. Еуразияның жүрегінде орналасқан бас қаламыз – еліміздің жаңа беттері, тәуелсіздіктің толғауы, азаттықтың айшығы. Қазақ даласындағы қалалар елордаға қарай бой түзеп келеді. Қысқа уақыт ішінде елордамыз әлемнің алдыңғы қатарлы астаналарының қатарына қосылып үлгерді. Осылайша азаттықтың шұғылалы шуағына шомылған алаш жұрты үшін Астана береке мен бірліктің бастауына айналды. Мемлекет басшысы Қасым-Жомарт Тоқаев елорданың дамуына, сәулеті мен дәулетінің артуына ерекше маңыз беріп келеді.Бозоқтан бүгінге дейінШежірелі жылдардың жылнамасына көз салып көрсек, елорданың дамуында ортағасырлық Бозоқ қаласының айрықша орны бар. Өткен күндердің куәсіндей болған шаһар қазіргі Астананың тап іргесінде жатыр, небәрі бес шақырым жерде орналасқан. Тарихшылар тарапынан ол жайында VIII-XVIII ғасырларда өмір сүргені айтылса, оған қоса қыпшақ даласының бас ордасына айналғаны жайында көптеген деректер кездеседі. Сондықтан ортағасырлық Бозоқ қаласын бүгінгі Астананың түпкі атасы деуге толық негіз бар. Жалпы, «бозоқ» сөзінің мағынасы көне түркі тілінде «тесіп өтетін жебе» дегенді білдіретін көрінеді.Ал 1830 жылы орыс әскерлері Ақмола бекінісінің негізін қалады. 1862 жылы қала мәртебесіне ие болған іргелі мекенге тұп-тура бір ғасырдан кейін Целиноград атауы берілді. Бұл кезеңде көршілес республикалардан тың игеру деген желеумен көптеген ұлт пен ұлыс қоныс аударған еді.Жиырмасыншы ғасырдың бастапқы кезеңінде халқымыздың ардақты перзентінің бірі Әлихан Бөкейханов «Қазақты автономия қылсақ, Қараөткел – алаштың ортасы, сонда университет салып, қазақтың ұл-қызын оқытсақ, «Қозы Көрпеш – Баян сұлуды» шығарған, Шоқан, Абай, Ахмет, Міржақыпты тапқан қазақтың кім екенін Еуропа сонда білер еді-ау» деген ойын білдірген екен. Қашан да халқымыз жақсының сөзін жарым ырысқа балайды емес пе? Алаш қайраткерлерінің жүрек түкпірінде жатқан сол бір асқақ арманы түбінде ақиқатқа айналып, Сарыарқа төсінде бас ордамыз тігілді.Астана тарихындағы айрықша оқиға елорданы Алматыдан Ақмолаға көшіру туралы шешім болатын. 1998 жылдың 6 мамырында жаңа елорданың атауы Астана болып өзгертілсе, сол жылы 10 шілдеде бас қаланың халықаралық деңгейде тұсаукесер шарасы өтті. ЮНЕСКО шешімімен елордамызға «Бейбітшілік қаласы» деген жоғары мәртебелі атақ берілді.Сол жылдары Астана қаласында 290 мыңдай адам тұрғаны белгілі. &nbsp; Биылғы статистикалық дерекке сүйенсек, елорда халқы 1,3 млн адамға жетіп отыр. Осылайша ширек ғасырдың ішінде шырайлы шаһарда тұрғындар саны 1 млн адамға артқан.Бас қаламыздың ерке Есілдің жағасында бой көтеруінің өзіндік сыры бар. Әлем астаналарының тарихына көз салып көрсек, басым бөлігі өзен жағасында орналасқанын аңғару қиын емес. Мәселен, Париж, Лондон десе көз алдымызға Сена мен Темза келсе, көршілес Ресейдің астанасы Мәскеу өзімен аттас өзеннің бойында орналасқан. Сондай-ақ, өз еліміздегі Қостанай Тобыл, Атырау Жайық, Қызылорда Сырдария, Павлодар Ертіс, Өскемен Үлбі, Талдықорған Қаратал өзендерінің бойында жатыр. Өзен қалаға өзгеше өрнек қосады. Мәртебесін арттыра түседі. Сондықтан Есіл өзені елорданың сәулеттік келбетіне сән қосып, астананың айрықша ажарына айналып отыр деуге болады.Сыр елінің тартуыБүгінде халықаралық аренада және елімізде «Астана» атауы танымал брендке айналды. 2009 жылы тұсауы кесілген «Астана» тәуелсіз Қазақстан тарихында футболдан Чемпиондар лигасы топтық кезеңінде бақ сынаған алғашқы команда ретінде ерекшеленді. Сондай-ақ, бұл ұжым Еуропа лигасы топтық кезеңіне үш мәрте қатысып, еліміздің атын қорғады. Ал «Astana Cycling Team» велоклубы дүниежүзілік дүбірлі додаларда Қазақстан беделін биікке көтеріп келеді. Елорданың қақ төрінде бой көтерген «Астана опера» театрынан көпшілік классикалық шығармаларды тамашалауға мүмкіндік алды.Ширек ғасырдың ішінде шырайлы шаһарға айналған Астанада көптеген ғимараттар бой көтерді. Олардың қатарында «Байтерек», Бейбітшілік пен келісім сарайы, «Хан Шатыр», «Қазақ елі» монументі секілді сәулетімен көз тартатын орындар бар.Бас қаланың көркейіп-жасануына Сыр өңірі жұртшылығының қосқан үлесі зор. 2008 жылы сырбойылықтар тарту еткен «Қорқыт-қобыз» сквері бүгінде қала ажарына өзіндік сән қосып тұр. Сәулетті кешен Ш.Уәлиханов пен Ж.Омаров көшелерінің қиылысында орналасқан. Композиция авторы – Жәркен Исмағұлов. Келешек ұрпақ үшін мән-маңызы бөлек скверді Сыр елі тарту еткені бірден байқалады.Ал елорданың 20 жылдық мерейтойына қызылордалықтар ашық аспан астындағы зымыран-ғарыш техникасы музейін тарту етті. Бас шаһардың төрінде «Союз», «Протон», «Зенит» зымыран тасығыштары мен «Боран» орбитааралық кемесінің макетінен құралған зымыран-ғарыш техникасы музейі орналасқан. Сәулетті экспозиция Тұран даңғылы бойында «ҚазҒарышСапары» АҚ Ұлттық ғарыш орталығы аумағында жайғасқан. Жалпы 1,4 гектар аумаққа салынған музей 20 жылдыққа тамаша тарту болды. Өйткені, «Байқоңыр» ғарыш айлағы – қазақ халқының ғана емес, бүкіл адамзаттың мақтанышына айналған тарихи кешен.Тәуелсіздік жылдары Қызылорда қаласында бой көтерген жаңа шағын аудан және ең үлкен даңғылға Астана атауы берілген. Қашаннан да ырымшыл халықпыз ғой. Жылт еткен жаңашыл жобалар мен байыпты бастамаларға елордаға қатысты атаулар беріледі. Ерке Есілдің сол жағалауынан бас қаланың жаңа бөлігі бой көтерсе, Қызылорданың да сол жағалауындағы әсем ғимараттар, сәнді үйлерге көзіміз үйренді.Сондай-ақ, Сыр бойында кеңінен тараған атауларды елорданың бет-бейнесінен табуға болады. Астананың басты көшелеріне Сығанақ, Ақмешіт секілді атаулар берілген. Олай боларлық жөні бар. Жаугершілік заманда қаншама халыққа пана болып, Қазақ хандығының басты ордасына айналған Сығанақ – Алаш баласының жадынан өшпейтін ұғым. Оған қоса көне түркі жұртының қалыптасуында айрықша орны бар Жанкент шаһарының да аты бас қаланың атауларынан ұмыт қалған жоқ. Қазақ деген атау қалпына келген Ақмешіт шаһары да халықтың жанына сондай жақын. Бағзы заманнан бері дүйім елге ырзық-несібесін сыйлап келе жатқан Сырдария жағалауы – қалың жұртшылықтың бауыр басқан киелі мекені. Тағы айта кетерлігі, бас қалада біздің өңірге тән Шиелі, Жосалы секілді атаулар бар. Елдің тыныштығы жолында ат үстінен түспеген Жалаңтөс баһадүр, түркі халқының ойшылы Қорқыт ата, белгілі ақын Қарасақал Ерімбет секілді тұлғалардың құрметіне қойылған көшелерді елордадан кездестіруге болады.Халық саны&nbsp;4 есеге арттыҚуанарлығы, Астана қаласының экономикалық белсенділігі күннен-күнге жанданып келеді. Шетел инвестициясын тарту жөнінен көшбасшылар қатарына енді. Жыл басындағы мәліметке сүйенсек, негізгі капиталға салынған инвестция көлемі 1,4 трлн теңгеге жеткен. Кейінгі 20 жылдан астам уақыттың ішінде қала аумағы үш есе ұлғайып, бой көтерген тұрғын үйлер саны 19 есеге, халық саны 4 есеге артқан. Осы уақыт аралығында республикалық және қалалық деңгейдегі денсаулық сақтау нысандары, 300-ден астам мектеп пен балабақша ел игілігіне айналды.Дерек бойынша республикадағы ішкі жалпы өнімнің 10 пайыздан астамын Астана экономикасы құрайды. Сондай-ақ, елдің негізгі капиталына салынған инвестицияның оннан бір бөлігі осы қалада қалыптасып отыр. Атап өтерлігі, қала экономикасының 59 пайызға жуығын шағын және орта кәсіпкерлік нысандары құрайды. Бас қаладағы шағын және орта кәсіпкерлік нысандарының саны 200 мыңға жуықтады.Мамандар 2030 жылға қарай елорда тұрғындарының саны 2 млнға жетеді деген болжам айтады. Ал 2050 жылға қарай ол 3 млн адамға жетеді деп есептелген. Осы орайда Астана бірнеше бағытта дамуға көңіл бөледі. Олардың арасында ең бастысы – адам капиталы болса, екіншісі – креативті экономика. Бұл орайда Мемлекет басшысының берген тапсырмасы бойынша елорда смарт қалаға айналуы тиіс.Астана еліміздің әкімшілік орталығы болуымен қатар азат елдің, қазақ халқының қайта түлеуіне негіз қалап келеді. Әлемдік өркениетке ұмтылған елордамыз қай жағынан да алдыңғы қатарда. Жаңа дәуірдің айшықты сәулет өнеріне жол ашқан елорда – талайлар таңдай қағатын шырайлы шаһар. Сондықтан Астананың айбыны асқақтайтын шағы алда деп ойлаймыз.&nbsp;&nbsp;&nbsp;

Сұлулықтың символы атанған шырайлы шаһарға – 25 жыл

<a href="https://kyzylorda-news.kz/">Kyzylorda-news.kz.</a>&nbsp; «Сұлу-ай» шығармашылық өнер &nbsp;және &nbsp;"Аслан" спорт орталығының қызметін жан-жақты үйлестіру мақсатында қос орталықтың құрылтайшысы Анар Қалдыбаеваның тікелей тапсырмасына сәйкес, зерделеу жұмыстары жүргізілді. Өз кезегінде бірқатар үйірмелерге білікті мамандар тартылып, үйірме оқушыларын сабаққа уақытылы қатысуы толықтай қамтамасыз етілді. Зерделеу жұмысы аясында Сырдария ауданына қарасты 8 елді мекендегі үйірме сабағы өткізілетін мәдениет ошақтарына бейнебақылау орнатылды.&nbsp;<blockquote>– Шын мәнінде, талап қойылған жерде жұмыстың нәтижелі болатындығын анық аңғара алдық. Орталық құрылған 2 жыл ішінде біршама өзгерістер орын алуда. Ұстаздар құрамы жаңарып, мемлекеттік бағдарламаның құрылымы өзгерді. Құжаттар жиынтығы толықтырылып, оқушыларымыз қол жеткізген жетістіктер таразыға &nbsp;салынып, жан-жақты сараланды. Ал балалардың қарым-қабілеті арқылы ұстаздардың жұмыс &nbsp;істеу деңгейі нақтыланды. Барлық үйірмелер өткізілетін бөлмеге көрнекілік бұйымдарын орналастыру бойынша жүйелі жұмыстар атқарылуда. Ата-анамен берік байланыс орнатылып, сабақ кестесі бөлменің қас бетіне заманауи үлгіде ілінген болатын. Бұл ретте, жаз мезгілінде ата-аналар түсіністік танытып, балаларды сабаққа уақытылы жіберсе деген тілегіміз бар, – дейді Анар Қалдыбаева.&nbsp;</blockquote>Айта кетейік, орталық басшысының қолдауымен Іңкәрдария ауылындағы "Домбыра" үйірмесінің мүшелері бірнеше домбырамен қамтамасыз етілді. &nbsp; &nbsp; &nbsp; &nbsp;

 Анар Қалдыбаева: Үйірме жұмысын ширату үшін қатаң талап қажет

<a href="https://kyzylorda-news.kz/">Kyzylorda-news.kz.</a> &nbsp; Ауыл – ел бесігі. Сырдария ауданына қарасты Іңкәрдария ауылдық округі бүгінде біршама дамудың даңғыл жолына түсіп келеді. Тәтті бақша өнімдерімен аудан мен облысқа танылған ауыл туралы сөз қозғайтын болсақ, сандарға назар аударамыз.Ауылдық округте барлығы 160 тұрғын үй бар. Тұрғындар саны 815-ті құрайды. &nbsp;Оның ішінде &nbsp;жұмысқа қабілеттілері – 358. Ауылдың экономикалық хал-ахуалын анықтау үшін ондағы қызметтің негізгі түрі мен жұмыссыздық деңгейін саралау қажет. Мысалы бюджеттік &nbsp;саладағы &nbsp; қызметкерлер мен жұмысшылар, &nbsp;мекемелер бойынша «Іңкәрдария уылдық округі әкімінің аппараты» КММ -11 адам, «№191 орта мектебі» КММ – 60 адам, «Іңкәрдария ауылдық клуб үйі» МКҚК – 98адам, №191 орта мектебі жанындағы «Еркетай» шағын орталық – 15 адам, Іңкәрдария ауылдық фельдшерлік акушерлік бекеті – 7адам, Кітапханашы – 1 адам, Ветеринарлық станция – 3 адам, Учаскелік полиция инспекторы – 1 адам, &nbsp;Почта меңгерушісі-1адам, Ауыз су &nbsp;бөлімшесінде &nbsp; -4адам, Шаруашылықтағы қызметкерлер және жұмысшылар саны – 3 адам жұмыс жасайды. Ауыл тұрғындарының орташа табысы – 60 000 теңгені құрайды.Мемлекет басшысы Қасым Жомарт Тоқаев өзінің Жолдауында еңбек адамын бағалау қажет екенін баса мән беріп айтып өткен еді. Сонымен қатар ауылшаруашылығын дамыту басты мәселе екеніне тоқталды. Ауылдық округтегі негізгі кәсіп көзі мал және егін шаруашылығы. Президент өз сөзінде «Ауыл шаруашылығын дамыту – негізгі проблеманың бірі. &nbsp;Осы саладағы ахуал мемлекетіміздің азық-түлік қауіпсіздігіне тікелей әсер етеді. Еліміздің ауыл шаруашылығы өнімдерінің көлемін және оның қосымша құнын арттыру қажет.Бұл – стратегиялық міндет. Қазір тек бидай мен мал сатып отыратын заман емес. Үкімет агроөнеркәсіп саласын субсидиялаудың ұзақ мерзімге арналған жаңа тәсілдерін әзірлеуге тиіс. Бюджет қаражатының қайтарымы болуы керек. Мемлекет қаржыны оңды-солды шашып, ысырап етуге жол бермейді. Субсидия бөлуге және оның жұмсалуына жүргізілетін бақылауды күшейту керек. Шаруалардың өзара ұжымдасуы ауыл шаруашылығын дамытуға жол ашып отыр. Біз осындай пилоттық жобаны жүзеге асырдық. Оған қатысқан ауыл шаруашылығы кооперативтерінің егіні екі есе артық өнім берген. Ал, мал басы шамамен 25 пайызға көбейген. Әр өңірдің ерекшелігін ескере отырып, оң тәжірибені бүкіл елге біртіндеп тарату қажет. Бұл салада озық технологиялар тапшы. Қазір ауыл шаруашылығына арналған жер туралы толыққанды ақпарат жоқ. Жердің құнары, су ресурсы мен суару жүйесі және оның жолдары жайлы мәліметтер жан-жақта шашырап жатыр. Цифрлық платформа осының бәрін &nbsp;бір жерге жинақтайды. Тұтастай алғанда, еліміздің агроөнеркәсіп кешені келесі жылдан бастап жаңа әрі тұрақты ереже бойынша жұмыс істеуі қажет. Игерілмей жатқан жерді қайтарып алу жөніндегі комиссияның қызметіне жеке тоқталғым келеді. Комиссия жұмысының аясында ауыл шаруашылығы мақсатындағы 2,9 миллион гектар жер мемлекетке қайтарылды. Жылдың соңына дейін кемінде 5 миллион гектар жерді қайтарып алу жоспарланып отыр. Игерілмей жатқан немесе заңсыз берілген жер көлемі 10 миллион гектарға жуықтайды. Үкімет пен әкімдіктер келесі жылдың соңына дейін осы жерлерге қатысты нақты шешім қабылдауға тиіс. Қазір жер мәселесін тексеруге жарияланған мораторий де күшін жойды. Бұл қадам жұмысқа оң ықпалын тигізеді деп ойлаймын» деп атап өткен еді.&nbsp;Мал шаруашылығы бойынша нақты сандарға тоқталып өтетін болсақ, мал &nbsp;басы &nbsp; бойынша жеке тұрғындарда МІҚ -755 бас, қой - 164 бас, ешкі 367 бас, жылқы - 454 бас, түйе -155 бас, құс -340 бас тіркелген. Ал шаруашылықтарда МІҚ - 632 бас, қой - 117 бас, ешкі 57 бас, жылқы - 505 бас, түйе - 23 бас тіркелген.&nbsp;Ал ауылдық округтегі барлық жер көлемі 47086 га, оның ішінде ауыл шарушылық жер көлемі 27772, жайылымдық 8739 га, егістік 873 га. Ауылдағы техника санына тоқталар болсақ, жекелерде –115, шаруашылықтарда – 1 техника бар. Округ бойынша барлық салықтар бойынша 1239,0 теңге, оның ішінде &nbsp; шаруашылықтар бойынша- 11000 теңге. Кәсіпкерлер саны ШҚ - 26, ЖК - 42, &nbsp; шаруа қожалықтар бойынша жылына 500 тонна күріш және 550 кг бал өнімін өндірді.&nbsp; Шаруашылықтар мен кәсіпкерлердің ауылға қосқан әлеуметтік көмегі - 1,1 млн теңге. Бұл – қайырымдылық көмек.Іңкәрдария ауылы 1964 жылы Іңкәрдария қаракөл қой совхозы деп аталса, 1993 жылы Іңкәрдария өндірістік кооперативі, 2000 жылы Іңкәрдария ауылдық округі болып аталған. Жалпы жер көлемі – 47086га болса,ауылшаруашылығы жер көлемі 27772 &nbsp;га , егістік 873 га, жайылымдық 8739 га жер бар.Ауылдық округте үш ЖШС, екі СПК бар. Сондай-ақ, 42 жеке кәсіпкер мен 26 шаруа қожалықтары ауылдың гүлденуіне өз үлестерін қосып келеді.Және әлеуметтік маңызы бар азық-түлік бағаларын тұрақтандыру бағытында жеке кәсіпкерлік субъектілерімен түсіндіру жұмыстары жүргізіліп, үш жақты меморандум жасалды. &nbsp;

Болашаққа өркен жайған Іңкәрдария

<a href="https://kyzylorda-news.kz/">Kyzylorda-news.kz.</a>&nbsp; Ел үшін туып, елге еңбегі сіңген ардақты азамат, есімі сырбойына белгілі кәсіпкер меценат, өмірінің соңына дейін қоғамға адал қызмет етіп, қажырлы еңбегімен ел-халықтың алғысын арқалаған Есенов Расул Әбутәліпұлы туралы өткен шақта ой қозғап, қалам тербейміз деп кім ойлаған... Сірә, бұл ауыр жағдай өмірдің өткінші екенін тереңірек аңғартса керек-ті. Бірақ көзден кетсе де көңілден кетпейтін азаматтың есімі бір емес, жүздеген, тіпті мыңдаған жүректе мәңгі сақталары анық. Мұндайда данышпан ақын Абай Құнанбайұлының «Өлді деуге бола ма айтыңдаршы, Өлмейтұғын артына із қалдырған» деген мағыналы сөзі еске түседі.Ең алдымен, «Расул Есенов кім еді?» деген сұраққа жауап іздеп кө-рейікші. Бұл сұраққа оны білетін, өмірде бір рет болса да кездесіп, сөйлескен, сапарлас болып, сұхбаттасқан адам «Ең алдымен Расул Есенов текті әулеттің түлегі еді» деп жауап берері анық. Иә, ол расында да өте қарапайым отбасында, тектілікті ту еткен берекелі шаңырақта өсіп, жетілді. Әкесі Әбутәліп ақсақал ұлағатты ұстаз әрі адал еңбектен бақыт тапқан кәсіпкер болса, анасы Бақыт апаны саналы ғұмырын халыққа қызмет көрсетуге арнаған жанашыр жан, қоғам белсендісі деп айтуға болады. Бүгінде үлкенге де, кішіге де сыйлы қос қарияның есімі ауданда құрметпен аталады. Еңсесін еңбекпен тіктеп, ұрпақтарына да адал жұмыс істеуді, тек алға ұмтылып, қоғамға қызмет етуді үлгі-өнеге еткен Әбутәліп аға мен Бақыт апа ел үшін туып, елге еңбегі сіңген ұлдары Расулдан ердің жасы елуге толарына небәрі тоғыз күн қалғанда айырылып қаламыз деп ешқашан ойламағаны анық. Мұны өте қиын жағдай, ауыр қаза десек болады. Алланың әміріне қолдан келер шара да жоқ.Күздің қоңыр салқыны ептеп сезіле бастаған қазан айының 17-і күні таңертеңгілік атпалдай азамат әдеттегідей арқыраған-жарқыраған қалпында облыс орталығына ем алуға өз аяғымен кетіп, тағдыр салған сынақтан отбасына табытпен оралғанда ауданда күңіренбеген адам қалмады. Ауданның бірінші басшысынан бастап арыстай азаматтан қапияда айырылып қалғанына сенер-сенбесін білмей, амалдың жоқтығынан қазаны естірту үшін жиналғанда Тереңөзектің аспанына қайғының қара бұлты үйірілді. Осы ретте, Расул Есеновпен әріптес, сыйлас, сапарлас, дос болған, жанашырлығын сезініп, қамқорлығын көрген азаматтар әлі күнге дейін дел-сал күй кешіп жүргенін де айтып өткеніміз жөн. Бұл ардақты азаматтың қоғамдағы өзіндік орны, мәртебелі төрі бар екенін анық аңғартса керек-ті. Халық даналығында «уақыт – сыншы» деген сөзбен «уақыт – емші» деген сөз бірге айтылады. Қанша жазып, қалай жоқтасақ та енді сынаптай сырғыған уақыт кері айналмайды. Өткен оралмайды. Сондықтан «Болған іске болаттай бол» деген орнықты ойға бекінгеніміз де дұрыс шығар. Біз өткен іске өкінгенімізбен қолдан келер қайран жоқ екенін ұғынып, бүгін ардақты азаматтың өңірге аян өмірбаяны мен жұртшылық жадындағы жақсы істері туралы қалам тербесек дейміз.Кейіпкерімізді танып-білу үшін сәл кейін¬ге шегініс жасайық. Еліміз егемендік алған тұста Расул Есенов 18 жастағы жалынды жас еді. Ол өз мамандығына сәйкес жұмыс таппаса да, ата-анаға қарап отыруды өзіне ар санады. Әртүрлі кәсіпті жасап жүріп, бизнес ашуды ойлады. Сөйтіп, тоқсаныншы жылдардың соңында «Углесбыт» серіктестігін құрды. Басында көмір сатумен айналысқан мекемеде бар-жоғы 2-3 адам жұмыс істейтін. Бірақ көмір тек жылу маусымында керек. Ал жаз бойы не істемек?! Осылайша, іскер азамат серіктестіктің жұмыс ауқымын кеңейтуді мақсат тұтты. Қыс бойы аудан тұрғындарын, мекемелерді көмірмен қамтыса, жаз бен көктемде құрылыс заттарын тасыды. Оған арнайы бағытталған дүкен де ашты. Қарағандыдан көмір, Өскеменнен цемент, Қостанайдан ағаш жеткізумен айналысты. Сөйтіп, отыздан астам адамды тұрақты жұмыспен қамтыды. Құлашын күннен-күнге кеңге жайып келе жатқан мекеме құрылыс салуды да қолға алды. «Қызылорда-Жалағаш» автожолы бойынан кентке қарасты жаңа шағын аудан бой көтерген тұс еді бұл. Мұнда мамандарға және аз қамтамасыз етілген отбасыларға арналып үйлер салынды. Мұнан бөлек, Қалжан ахун, Асқар Тоқмағамбетов ауылдарында «Тағзым» алаңдары қайта жаңғыртылып, күрделі жөндеуден өткізілді. Заманға бейімделген кәсіпкердің жетекшілігімен Қалжан ахун ауылдық округі әкімдігінің ғимараты мен «Петро Қазақстан Құмкөл Ресорсиз» АҚ үшін Құмкөл кенішінде шағын қалашық сапалы тұрғызылды. Бұл жылдар іскер азамат үшін өсу, өркендеу жылдары болды десек, артық айтқандық емес. Қанша қиындыққа тап болса да алға ұмтылуды мақсат еткен кәсіпкер 2007 жылы «Углесбыт+7» мекемесін ашты. Жанар-жағармай тасымалымен айналысатын мекеме әлі күнге кәсіпорындарды, шаруашылықтарды сұйық отынмен қамтамасыз етіп келеді.Сыр өңірінің шаруашылықтары суармалы егіспен айналысатындықтан су құрылғыларының немесе каналдардың таза, суды өткізу қабілетінің жоғары деңгейде болуы маңызды. Бұл жұмыстарды да «Углесбыт+7» серіктестігінің мамандары ұршықтай иіріп әкетті. Ауданнан тысқары елді мекендерде де каналдарды тазалап, диқандар ризашылығына бөленді. Қалжан ахун, Шаған ауылынан бөлек, Шиелі ауданына қарасты «Сұлутөбе» каналы да тазаланып, күріш атыздарына мол су іркіліссіз баратын болды.Кәсіптен нәсіп тапқан халық қалаулысын үнемі бір нәрсе мазалайтын. Ол жеріміздегі шексіз байлықты өзге емес, өз халқымыз пайдаланса, елдің игілігіне қызмет етсе деген пайым еді. Осы орайда, ол күріш ақ¬тайтын зауыт салып, жаңа жұмыс орындарын ашып, егілген күрішті ақтап, оны өзге облыстар мен көршілес мемлекеттерге экспорттауды қолға алды. Бұл бастамасы жемісті, нәтижелі болды. Бірінші зауыттың жұмыс ауқымын кеңейтіп, екінші зауытты іске қосуды да жоспарлады. Бәрі ауданның игілігі үшін, осы жердің азаматтарына жұмыс болсын деген ниеттен туындаған ойлардың нақты іске айналуы еді. Бірақ амал нешік, ардақты азамат алға қойған мақсаттарына толық жете алмады.Дана халқымыз «Қайырымдылық – қайырлы іс» дейді. Қайырымды, жомарт, қолы ашық жанды көпшілік абыройлы азамат ретінде мақтан тұтады. Сондай азаматтардың бірегейі облыстық мәслихат депутаты Расул Есенов болғанын Сыр өңірінің, оның ішінде Сырдария ауданының жұртшылығы жақсы біледі. Тындырымды тірлігімен көпшілік алғысына бөленген ол қоғаммен тығыз қарым-қатынас орнатып, қиын кезеңде ел жанынан табыла білді. Облыс, аудан көлемінде ұйымдастырылатын қайырымдылық іc-шараларына бел¬сенді қатысып, өз үлесін қосты. Мәселен, бұрнағы жылы аудан орталығында мешіт құрылысына қажетті материалдар алып берген еді. Жыл сайын Құрбан айт мерекесінде ірі қара малын сойып, әлеуметтік аз қамтамасыз етілген отбасы мүшелеріне үлестіретін. Сонымен бірге, халық қалаулысы ай сайын мұқтаж отбасыларға ұн, май, макарон өнімдерін, қант, шай секілді азық-түліктер тарататын. Жұртшылықты әбігерге салған пандемия кезінде облыстық, аудандық ауруханаға жасанды тыныс алу аппаратын, оттегі баллондарын алып берген болатын. Былтыр «Бөріт» қорымын кеңейтіп, қоршалап, әруақтар рухына ас беріп, ақ-сақалдардың ақ батасын алып еді. «Бұл менің қоғам алдындағы азаматтық парызым», – дейтін еді Расул Әбутәліпұлының өзі.Бүгін біз қырқын өткізсек те бақилық сапарға кеткеніне сенбей отырған іскер азаматпен жақында аға-іні ретінде жақынырақ сөйлесудің сәті туды. Қашан көрсеңіз де бір жұмыстың қамымен немесе біреудің мәселесін шешумен, өтінішін орындаумен ойға, қырға шапқылап жүретін азаматқа: «Аға, өзіңізге де, телефоныңызға тыным жоқ. Бір күн болса да жұмыстан демалсаңызшы» дедім. Ол ойланып қалды. «Расында да дем алғым келеді. Бірақ бәріне үлгеру керек» деп қысқа қайырды. Сосын әлдебір нөмірден келген «смс»-ті оқытты. Біреу еміне ақша сұрап, көмектесуін өтініпті. «Бұрын-соңды танымайтын адамға қалай жәрдемдесесіз? Қазір мұндай алаяқтар көп» деп едім, жаны жомарт азамат: «Мұқтаж отбасыларға көмектесуді – азаматтық парызым деп білемін. Алла Тағала олардың ризық-несібесін менің кәсібім арқылы жүргізіп қойғанын білемін. Сондықтан қолдан келсе, жоққа жәрдемдескенді жөн санаймын, – деп қомақты қаржыны еміне дауа іздеген жанның есепшотына аударып жіберді. Бұл оның көңілінің тазалығы, өзгені өзіңдей көріп, сенуі, бір сөзбен айтқанда жомарттығы еді. Ал ардақты азаматтың мұндай жомарттығын талай мәрте көзбен көрдік, көңілге түйдік. Сондықтан жұртқа жанашыр азамат өмірден өткен күні «Анамның еміне көмектесіп еді», «Баламның отасын жасатуға жәр¬дем сұрағанымда, бірден қажетті қаржыны беріп еді», «Үйіміз құлағалы тұрғанда үй салып беріп еді», «Үйде көміріміз болмаған кезде өтінішімізді орындап, тегін-ақ көмір беріп еді», «Шеттей бала-шағамен ішерге ас таппай отырғанымызда азық-түлік әкеліп беріп еді», «Жұмыс таппай жүргенімізде жұмысқа қабылдап, отбасымызды асырауға ықпал еткен еді» деп жоқтау айтқандарда есеп болмады. Түсінгенге, бұл ердің ел үшін туып, елдің қажетіне жарауы, бір сөзбен айтқанда елдің ағасы да, панасы да бола білгенінің айғағы.Расында да ардақты азаматқа сырдариялықтар арқа сүйеді. Қысыл-ғанда қамқорлығын сезінді, сая тапты. Жығылғанда маңдай тіреп барды. Ол ешқашан ешкімнің меселін қайтармады. Қоғамнан өзінің берекесін бөлек қарамады. Қолдан келсе, жоққа жәрдемдесті, мұқтажға көмектесті. Қолдан келмесе, жол сілтеп, бағыт көрсетті. Сол еңбегі мен адалдығы оны абыройдың биігіне көтерді. Үш рет аудандық мәслихаттың, екі рет облыстық мәслихаттың депутаты атанып, елдің сенімін арқалады. Мемлекеттік наградалармен, төсбелгілермен марапатталды. Есімі кітаптарға енді, еңбегі республикалық, облыстық, аудандық газеттерде дәріптелді. Бірнеше рет «Жомарт жүрек» аталымы бойынша «Алғыс хатқа» ие болды. Өзі туып-өскен, азамат болып қалыптасқан «Сырдария ауданының Құрметті азаматы» атанды. Өмірден өтерінің алдында ғана республикалық «Жыл меценаты» байқауының жеңімпазы болғаны жөнінде жақсы хабар келіп еді. Астана қаласында өтетін марапаттау рәсіміне қатысу үшін жомарт жан дайындалып та жүрген болатын. Бірақ ардақты азамат ол күнге жете алмады. Қазан айының 17-і күні аурухана қабырғасында қапияда келместің кемесіне мініп, бақилық сапарға аттанып кете барды. Бірақ Расул Әбутәліпұлының артында өшпес іс те, із де қалды. Игі іс, ізгі із ұмытылмайды. Асыл жары Гүлмира жеңгеміз, інісі Серікбол ағамыз, Фатима, Фархат, Рахат, Рахима есімді ұл-қыздары, Зере есімді келіні мен немерелері Фарух, Фуат бар кезде ұрпақтар өсіп жетіле береді, әкелерінің абыройлы жолын жалғайды деп сенеміз.Таулардың алыстаған сайын биіктей түсетіні секілді ер еңбегі ел-жұрт барда ескеріліп, көңілдерде, жүректерде жаңғыра береді. Біз бүгінгі естелігімізде «Жақсының жақсылығын айт, нұры тасысын» деген халық даналығы негізінде азаматтың үлгілі істерін өзгелерге өнеге етуді жөн санадық.&nbsp;&nbsp;

Ел үшін туып, елге еңбегі сіңген азамат

<a href="https://kyzylorda-news.kz/">Kyzylorda-news.kz.</a> Аймақ басшысы Нұрлыбек Нәлібаев Астана күнімен құттықтады.Құрметті жерлестер, ардақты ағайын! Сіздерді Астана күнімен құттықтаймын! Өткен ширек ғасырда бас қаламыз әлемдегі ең озық, қарыштап дамыған шаһарлар қатарына қосылды. Құрылу, қалыптасу, өркендеу сатысынан өтіп, еліміздің әкімшілік және іскерлік орталығына айналды. Барша қазақстандықтарды ортақ идеяға, рухани тұтастыққа біріктірді. Мемлекетіміздің тәуелсіздігінің символына және жаhандық табысына негіз болды. Сәулет өнерінің озық үлгілері бой көтерген, &nbsp;әлемдік деңгейдегі экономикалық, ғылыми-техникалық және әлеуметтік маңызы бар шаралар өткізілетін қала болып қалыптасты. Еуразия кеңістігіндегі мәдени және зияткерлік орталыққа, еліміздің орнықты дамуының басты қозғаушы күшіне айналды. Бүгінде Сарыарқа төсіндегі елордамыз кең байтақ қазақ даласының жүрегі іспетті. Қалалар мен аудан орталықтары, ауылдар Астанаға қарап бой түзейді. Бас қаланың тыныс-тіршілігі, өсіп-өркендеуі, ұлт мұраты жолындағы бастамалары бүкіл елдің назарында. &nbsp; Өткен жиырма бес жылда еліміздің әр түкпірінен мыңдаған отандастарымыз елорда тұрғыны болуға ұмтылғаны белгілі. Олардың қатарында сырбойылықтар да Астанамыздың өркендеуі мен гүлденуіне қомақты үлес қосып келеді. Бүгінгі мерекеде баршаңызға мықты денсаулық, жарқын жетістіктер мен құт-береке тілеймін. Елордамыздың еңсесі бүгінгіден де биіктеп, жарқырап-жайнай берсін!

Облыс әкімі Астана күнімен құттықтады

<a href="https://kyzylorda-news.kz/">Kyzylorda-news.kz.</a>&nbsp; Ақтөбе облысында президенттік сынамадан Қазақстан Республикасының чемпионаты өтті.&nbsp;Жарыс нәтижесі бойынша жерлесіміз ардагерлер арасында Сырдария ауданы, Қалжан Ахун тұрғыны Мұрат Бөдеев бірінші орынды жеңіп алды. Сыр елінің атын қорғап сайысқа қатысқан жерлесіміз Президенттік көпсайыстан облыс құрама командасының мүшесі екенін айта кеткеніміз орынды. Сондай-ақ Мұрат Бөдеев бала тәрбиелеу ісіне ден қойған ұстаз. Нақтырақ айтсақ, ол №126 орта мектепте алғашқы әскери дайындық пәніен сабақ береді. Өзі де өмірінде салауатты өмір салтын ұстануды құп көретін жерлесіміз әрдайым спортпен шұғылданып, денсаулығына бей-жай қарамайды. Оқушыларын да спортпен шұғылдануға үйретіп, алғашқы әскери дайындық барысын үйретіп жүрген жайы бар.Айта кетейік, Президенттік сынама – 1996 жылдан бастап Қазақстан Үкіметінің №774 қаулысымен Қазақстан халқының денсаулығын сақтау мен қорғау үшін күнделікті емірге енгізген дене тәрбиесінің нормативтері. Президенттік сынама бірнеше жас топтарына бөлінген. Одан жарыстар сол жас топтары бойынша жыл сайын өтіп тұрады.Ақтөбе қаласынан жүлдемен оралып, мерейі үстем болған жерлесімізді марапатымен шын жүректен құттықтаймыз. &nbsp;

Сырдариялық спортшы жүлдемен оралды

<a href="https://kyzylorda-news.kz/">Kyzylorda-news.kz.</a> Республикалық «Дарын» ғылыми-практикалық орталығы оқушылардың республикалық олимпиадасының қорытынды кезеңіне қатысушы мектептер арасында &nbsp;100 олимпиадалық мектеп рейтингісін жариялады.Нәтижесінде «Қазақстанның 100 үздік олимпиада мектебі» қатарына Сыр өңірінен 3 білім беру ұйымы енді. Олар – №9 және №10 дарынды балаларға арналған «Білім-инновация» лицей-интернаттары және Абай атындағы №138 орта мектеп.Рейтинг формула бойынша шығарылды, мұнда алтын медаль 3 ұпаймен, күміс медаль 2 және қола медаль 1 ұпаймен бағаланады.Айта кетейік, Қызылорда облысында 295 мемлекеттік және 24 жеке мектеп мектеп бар.

Қызылордадағы 3 мектеп үздіктер қатарында

<a href="https://kyzylorda-news.kz/">Kyzylorda-news.kz.</a> Адамзат баласының пайда болуынан бас¬тап әрі қарай өмір сүруіне, тіршілікке үйренуіне үлкен септігін тигізген ол – еңбек. Еңбектің жемісін көру үшін сол жолда кездескен қиындықпен қарбаласқа толған өмірді бағындыру керек. Еңбек – адамның өз өмірін қалыптастыру қарсаңында қабілеті және рухани күштерінің нәтижесінде өз игілігін пайдалана білуі. Тынбай еңбек еткеннің тұрмысы берекелі болады. Бүгінгі заманның талабы да осы. «Кәсібіне қарай – нәсібі» демекші, бүгінде өз мүмкіндіктеріне қарай кәсіп ашып, ісін дөңгелентіп отырғандар саны күннен-күнге артып келеді. Сол жандардың санатында Изатулла Файзуллаұлы да бар.Мұғалім де, инженер де болған Изатулла Файзуллаев 1997 жылы отбасын асырап отырған «Автобаз» жабылған соң күнкөрістің көзін іздей бастайды. Сонымен, жеке кәсіпті қолай көріп, балаларымен кірісіп кетеді. Яғни, техниканың ақауын тау¬ып, бұзылған машиналарды жөндей бастайды. Бәрі де кәсіптік шеберлікті шыңдауға, өзің еңбек ететін сала жұмысын бес саусақтай, сауатты білуге байланысты екендігі даусыз. Және сол біліктілікті үнемі жетілдіріп отыру керек. Бұл жағынан алғанда да біз әңгіме етіп отырған шебердің де жұмысына ешкім сын айта алмады. Өз ісінің шебері қай уақытта да өзінің біліктілігімен, іскерлігімен, еңбекке қабілеттілігімен, уақытқа бейімділігімен бағалана біледі емес пе? Изатулла да алмағайып кезеңінде көптің бірі болып, толқын соғып жағаға шығарған балықтың күйін кешпей, қарманды. Қарманды да балаларының нәсібін өзі жетік меңгерген кәсібінен таба білді.<blockquote>– Өмір деген ағын су секілді екен. Көзді ашып-жұмғанша 60 деген асқаралы жасты еңсеріп, жетпіске де жақындап қалдым. «Көп еңбек еткенге бақыт басын иеді» деген сөздің жаны бар. Өткенге шегініс жасасам, жеткен әр белесім өмірімнің бір бөлшегі іспеттес. Қызметтің үлкен-кішісі болмайды. Тек жауапкершілігің жоғары болуы керек. Мейлі ол мемлекеттің жұмысы болсын, мейлі жеке жұмыс болсын. Әр жұмысқа кіріскенде ар алдында тұрғандай болам, – дейді мақаламыздың кейіпкері әңгіме арасында. Иә, еңбекпен шыңдалған жан осылай дейді. Расында да бұл бақытын еңбектен тапқан адамның сөзі.</blockquote>Алғаш аяқ алысы өз күшімен бастаған кәсібінің аясын кеңейту үшін қаржылай қолдау да қажет болды. Мұның да реті табылып, «Даму» кәсіпкерлікті дамыту қорынан қаржылай көмек алып, жұмысын жүргізіп отырған ғимаратты жөндеуден өткізеді. Сонымен қатар, жұмысының негізгі құрал-саймандары болып табылатын, кемпи, машина көтеретін аппаратын, аргон дәнекерін алады. Қосымша көлік жуатын орын да ашады. Сұранысқа көп ие қызметтің түрі мұнда әсіресе, автоген мен дәнекерлеу екен. Бағаларын да тым шарықтатпай, тұтынушының жағдайына қарай белгілейтіндігі аян болды. Тіпті, кейбір қысылып жағдай айтатын жандардың мәселен, егістік басына баратын машиналардың жөндеу жұмыстарының ақысын қарызға да жүргізетіндігін жасырмады.<blockquote>– Мен ылғи Изатулла ағамның қызметін пайдаланам. Жұмысының сапасы да, бағасы да көңілге қонымды. Кейде үйден асығыста қалтаңдағы тиыныңды санамай шығып кететін кез болады. Немесе, техника болған соң жолда бұзылады. Сондай жағдайда сөзге келместен, техника тіліндегі олқылықтың орнын толтырып, жөндеп береді. Адамдардың алғысын алғаннан, қалтасындағы тиынды бірінші орынға қоятындарды кездестіруге болады. Ал бұл жерде керісінше, – деп ағынан жарылды аудан тұрғыны Ә.Әлімбет.</blockquote>Иә, халық болған соң түрлі жағдай да болады. Сол жағдайды түсіне білгендіктен де болар, шебердің алды бос болған күні жоқ. Күніне кем дегенде, 7-10 көлікке дейін «Ізет» сервистік орталығының қызметіне жүгінеді. Өзіне қолқабыс етіп, тірліктің көзін үйреніп жүрген мектепте оқитын немересі Ғабит Мұхитұлының да осы іске шыңдалып қалғандығын байқады. Білгенін үйретіп, баулудан жалықпаған қарт ұстаның ыждағаты мен жігеріне тәнті болдық.<blockquote>– Баланы бастан тәрбиелеу – ата-ананың парызы. Жақсылыққа жақын етіп, еңбекке үйрету міндеті. Менің немереммен жасты немесе қатар балалардың жерден иіліп ағаш алмайтынын көзім шалады кейде. Сондайда қарным ашады. Менен жұмыс сұрап келген жастарды еш ойланбастан жұмысқа да алдым. Бірақ, сәл уақыт істеп, келмей кетеді. Соған қарағанда, қиынсынады ғой деймін. Қиындықсыз қамал алу деген мүмкін емес қой, балам. Адамды адам етіп, қоғамда орнын белгілейтін еңбек екендігін жастардың санасына құйып өсіруіміз керек. Сонда ғана ол ертеңгі күні өз орнын адаспай табады. Ал, өз орнын тапқан адам қай жерге де қажет, – деді Изатулла Файзуллаұлы.</blockquote>Бүгінгі таңда еңбек жолдары, білімі мен біліктілігі жастарға үлгі боларлық Изатулла Файзуллаұлының отбасына біз де амандық, кәсібіне табыс тіледік.

Шиелі: Техникамен тілдескен жан

<a href="https://kyzylorda-news.kz/">Kyzylorda-news.kz.</a> Шырайлы Шиелі кенті соңғы жылдары бұрынғысынан да көркейіп, көгалданып келеді. Бірқатар маңызы бар істер атқарылып, жылдан-жылға күрмеуі шешілмеген түйіткілді мәселер де оң шешімін табуда. Жыл сайын игілікті істер атқарылып, халықтың әл-ауқаты біршама жақсарды деуге де негіз бар. Елді мекендердің ажары да айшықталып, ауылдар көркейе түсті. Жолдар мен жол тораптары жөндеуден өтті. Бұдан бөлек санитарлық тазарту, көркейту-көгалдандыру жұмыстары да өз деңгейінде атқарылып келеді. Аяқ су мәселесі де оң шешімін табуда.Жер бетінің қайсыбір дамушы елі болмасын әуелі ауыл шаруашылығы мен оны көркейту жұмыстарына ден қойып, сол салалардың тамырына қан жүгіртуге күш салады. Өйткені бұқара халық үшін өмір сүруге қолайлы орта қалыптастырмай дамудың даңғыл жолына түсу мүмкін емес. Бұл тұрғыда жас мемлекеттің бүгінге дейін жеткен жетістігі ұшан-теңіз. Осы мақсаттың ұшқынымен Шиелі ауданында да ауқымды жобалар атқарылып жатқанқанын айта кеткен жөн. Жыл өткен сайын кент ішінде де көңіл көншітерлік жұмыстар жасалып, әртүрлі салалар да алға өрлеп келеді.Санитарлық тазалық – саулық кепілі«Тазалық – табалдырықтан басталады» деген тәмсілді негізге алар болсақ, өңірдің де тазалығы – ең әуелі өзіміз тұратын жерден басталатынын ұғынамыз. Сол себептен кент ішінің көріктенуі – тазалыққа тікелей байланысты. Ал Шиелінің шырайы артып, айналаның гүлденуі бүгінде кент әкімдігінің тікелей назарында. Мәселен, биылдың өзінде кенттің тазалығы үшін бірқатар жұмыстар атқарылған. Атап айтар болсақ, санитарлық тазалық үшін мемлекеттік сатып алу жұмыстары жүргізілген. Нәтижесінде «Қарамурзаев» жеке кәсіпкер жеңімпаз атанған. Қазіргі таңда Шиелі кентінің санитарлық тазалық жұмыстарын қамтамасыз ету мақсатында жоғарыда аталған мердігер мекеме арқылы кент айналасы 14 учаскеге бөлініп, тұрғындардың тұрмыстық қалдықтары шығарылуда. Айта кетейік, бүгінде кент аумағында 43 жерде тұрмыстық қатты қалдықтарды жинақтауға арналған арнайы орындар бар. Ал сол 43 орынға қалдықтарды тастауға арналған 163 дана контейнер және сынап шамдар мен химиялық қуат беру көздерін жинақтауға арналған 27 дана контейнер қойылған. Сонымен бірге тұрмыстық қатты қалдықтарды тастауға арналған жер учаскесінің жалпы алаңы – 25 гектарды құрайтын «Сасқұм» полигоны жұмыс істеуде. Аталған компания кенттің тазалығын қамтамасыз ету мақсатында тындырымды тірліктер атқарып, өндірістік кәсіпорындар мен жеке тұрғын үйлердің қоқыстарын тазалауда. Оған қоса кенттің гүлденуі үшін кент аумағында тұрақты түрде сенбілік шаралары кең көлемде өткізіліп келеді. Бұр үрдіс жыл сайын өз жалғасын тауып күні бүгінге дейін дәстүрге айналған. Ал оған барлық мемлекеттік мекемелер мен кәсіпорындар жұмылдырылып атсалысуда.Көктеген мекен – көптеген көңілді қуантады«Ағаш ек, гүл ек, туған жерді түлет» деп дана халқымыз бекер айтпаса керек-ті. Көгалданып, көктеген мекеннің жанға жайлылық сыйлайтыны белгілі емес пе? Әрине, біздің өңір – құрғақшылықтың мекені. Десек те, оны көгалдандырып, жасыл желекке айналдыру өзіміздің қолымызда. Бұл өзекті тақырып – кент әкімдігінің де назарынан тыс қалған емес. Күн тәртібінде тұрған өткір тақырып бұрынғыға қарағанда айтарлықтай шешіле бастаған сыңайлы. Өткені қазірдің өзінде аудан айналасында көркейту-көгалдандыру жұмыстары жүргізіліп, кент іші гүлденуде. Мысалы, Шиелі кентінің көркейту-көгалдандырылу жағдайын қамтамасыз ету мақсатында, «Көкшоқы» мөлтек ауданында бірқатар жұмыстар атқарылған. Бұл жұмыстардың тиімді жүргізілуіне жеңімпаз мердігер «НҰР» ЖШС компаниясы жауапты. Ал кент орталық бөлігінің гүлденуіне жеңімпаз мердігер «RusLider Group» ЖШС мекемесі барын салуда. Иә, көгалдандыру жұмысы әуелі саябақтан бастау алатыны анық. Осы мақсатта қазіргі таңда «Ы.Жақаев» саябағын күтіп ұстау жұмыстары жүргізіліп жатыр. Саябақта дәл қазірдің өзінде жасыл желектерді күтіп ұстау, дәрілеу, суару жұмыстары атқарылып жатыр. Мұнымен қоса, кент айналасына топырақтық-климаттық жағдайында өсуге бейімделген 10 693 дана терек, 8 747 дана бұталы ағаштар отырғызылған. Сонымен қатар автожолдар бойында жасыл қорғаныш аймақтарын құру жағдайы бойынша И.Әбдікәрімов, Самара-Шымкент тас жолы, әл-Фараби, Ш.Бәкіров, Б.Тоқбаулин, Ы.Жақаев, С.Сейфуллин, А.Яссауи, Дәулеткерей, Д.Смайлов көшелері және аспалы көпір айналасы бойына жасыл желек құру мақсатында 8,5 км аумаққа көшет ағаштары отырғызылған.Жол жұмысы да мол«Жолдың жайын жүрген білер». Рас. Бұл тақырып – әлі күнге дейін өзектілігін жойған емес. Әлем елдерін былай қойғанда, еліміздің өзінде жол мәселесі – өзекті тақырыптардың бірі болып отыр. Жә, жә, алысқа ұзамай-ақ қоялық. Кент ішінде де көшенің жолы күні бүгінге дейін көптеген тұрғындардың дегбірін қашырғаны жасырын емес. Бірақ бірнеше жылдан бері кентіміз көркейіп қана қоймай, көптеген көшенің де сәні кірген. Тіпті, біршама жолдар күрделі және орташа жөндеуден өткен. Әрине, мұның барлығы кент әкімдігінің тікелей назарында. Қазірдің өзінде бірқатар көшенің арнайы жоба сметалық құжаттары әзірленіп, орташа жөндеу жұмыстарының жоспары әзірленуде. Атар айтар болсақ, әл-Фараби, Досбол Датқа, Дәулеткерей, А.Байтұрсынов, Ы.Жақаев, Абылайхан, Бұдабай, С.Сейфуллин, Шәкәрім көшелерінің күрделі жөндеу жұмыстарына жоба сметалық құжаттамасы жасақталып, мемлекеттік сараптаманың оң қорытындысынан өткен. Ал жобаның құны – 1 млрд 560 млн 217 мың теңгені құрап отыр. Аталған жұмысты өтпелі кезең тәртібімен 2023-2024 жылдар аралығында жөндеу көзделген. Ағымдағы жылы осы жұмыстарға жергілікті бюджеттен 300 млн теңге қаржы қаралған. Қазіргі таңда мемлекеттік сатып алу жұмыстары жүргізілуде. Сонымен қатар, теріскейдегі Қажымұқан, Панфилов, Жұмабаев, Ковтунов, Бөлтекейұлы, И.Құтпанұлы тұйығы, Ботабаев тұйығы, Шәкәрім тұйығы, Жұбанов, Ж.Молдағалиев, Самара-Шымкент пен Құрманғазы аралығы, Боранов көшесі, Қабанбай батыр, Бурабай, М.Сыздықов, Қалдыбаев, Шопашев, Аманкелді көшесінің бас жағы, Ш.Бәкіров тұйығы, Шұғыла мөлтек ауданындағы атауы жоқ көшелер және Ағыбай батыр тұйығы көшелерін орташа жөндеу жұмыстарынан өткізу жоспарланған. Бұл тізімге Шиелі кентінің орталық бөлігінде орналасқан Ш.Уәлиханов, Алтынбеков, Абай тұйығы, Жайлыбаев тұйығы, Желтоқсан тұйығы, Ә.Иманбеков, Ә.Молдағұлова тұйықтары мен соңы, Ы.Жақаев тұйықтары, Т.Тоқтаров тұйықтары, Отырар, Жерұйық, Қаратаевтан қашыртқы каналға дейінгі аралық, сонымен қатар, Ердешбаев, М.Мырзахметов, Омаров, Атауы жоқ көше (Аурухана маңындағы 2 көше), Ермағанбетовтен Ә.Исмайловқа дейінгі аралық, Өмірбеков тұйығы, Қ.Нұртазаев көшесінің соңы, Кәрімбаев тұйығы, Әби Едігеев, Ж.Базарбаев және жанындағы көшелер де кіреді. Мұнымен қоса Шиелі кенті, Арай мөлтек ауданы, Қ.Шәукебаев, Т.Молдраймов, А.Мизамбаев, Ә.Ырзахметов, Ә.Дүйсенбаев, Т.Қосаев, М.Сыздықов аяғы және атауы жоқ 3 көше де орташа жөндеуден өтпек.Абаттандыру – айрықша ажар бередіОсы тұста кенттегі атқарылып жатқан абаттандыру жұмыстарын да тілге тиек еткен жөн. Биыл Шиелі кенті, Самара-Шымкент тас жолы, А.Яссауи және Ш.Бәкіров көшелері бойына 4 дана жер асты ұңғымалы су насостарын орнату, сатып алу жұмыстары жүргізілген. Ал жеңімпаз болған «Айсұлтан-А» және «Изумруд» компаниясының жеке кәсіпкерлерімен келісім шарт жасалып, бүгінгі таңда жұмыстары толығымен аяқталған. Сондай-ақ Абылайхан көшесі мен айналмалы көпір аумағында орналасқан мұнаралы сағат тұғырларына жөндеу жұмыстары жүргізілген. Мұнымен қатар, Шиелі кенті, Т.Жүргенов, әл-Фараби, И.Панфилов, Қ.Шәкәрім және И.Әбдікәрімов көшелері бойында орналасқан футбол алаңдарына ағымдағы жөндеуге мемлекеттік сатып алу жұмыстары жүргізіліп, жұмыстардың дені аяқталуға жақын қалған. Ал жақын арада И.Әбдікәрімов көшесі бойындағы көпқабатты 18 пәтерлі тұрғын үй ауласына балалар ойын алаңын орнату, 18 пәтерлі тұрғын үй ауласына балалар ойын алаңын орнату жұмыстары басталмақ. Оған қоса И.Әбдікәрімов көшесі бойындағы көпқабатты 18 пәтерлі тұрғын үй және Иманжүсіп аллеясы ауласына асфальт төсеу жұмыстары да жүргізіліп жатыр. Иә, кент ішінде мұнан өзге де жасалып жатқан жұмыстар жетерлік. Жоғарыда айтылған тізімге А.Яссауи көшесіде орналасқан алаң, И.Әбдікәрімов көшесіндегі, сондай-ақ «Анаға тағзым» аллеясы, Шиелі кентінде орналасқан көшелер және де А.Яссауи көшесі бойында орналасқан кітапхана ғимаратымен Шиелі ауданы әкімдігінің ауласы да кіреді. Қазіргі таңда бұл аталған ғимараттардың да айналасында абаттандыру жұмыстары жүргізіліп жатыр.Аяқ су мәселесі алаңдатпасын…Аяқ су мәселесі – көпшілікті алаңдатары анық. Әсіресе, су тапшылығы – шаруа қожалықтары мен егіншілер үшін айтарлықтай проблема. Бірақ кез келген істің оң шешімі болады емес пе? Бүгінде Шиелі кенті аумағының өзінде «Сырдария» өзенінен 22 бекет арқылы келетін тұрғындарды аяқ сумен қамтамасыз етіп отырған «Базар» және «Байсары» арықтары бар. Сол каналдардың Қызылорда облыстық табиғи ресурстар және табиғат пайдалануды реттеу басқармасынынң теңгерімінде екені белгілі. Ал аталған каналдарға ерте көктем мезгілінде, мекемелерді және жергілікті тұрғындарды тарта отырып толықтай тазарту жұмыстары жүргізілген. Кент ішілік аяқ су арықтары тереңдетіген, сондай-ақ қордаланған қоқыстардан толық тазартылған. Қазіргі таңда аяқ су өз деңгейінде толық жеткізілуде. Демек, тұрғындардың бұған алаңдамауына болады. Қазіргі таңда Шиелі кенті, М.Шоқай, С.Сейфуллин, Досбол Датқа, Ж.Қонаев пен Жайлыбаев аралығы көшелеріне аяқ су арықтарына темір бетонды лоток орнату жұмыстары жоспарлануда.

Қазақстан және Қызылорда облысының жаңалықтары