<a href="https://kyzylorda-news.kz/">Kyzylorda-news.kz.</a> Өткен аптада Жалағаш ауданындағы іргелі шаруашылықтардың бірі «AB AGRO ORDA» ЖШС шаруа қожалығының егін алқабында алғашқы дән себу рәсімі өтіп, егін егу науқаны басталды. Иә, көктем – диқандар үшін өте жауапты кезең. Алдағы егін науқанын күтіп, қыс бойы демалған шаруашылық диқаншылары көктемгі егіс науқанына білек түріп кірісіп кетті. Әсіресе тұқым себетін жігіттердің еңбекке деген құлшынысы ерекше, тұқым шашатын қажетті көліктерін күні бұрын майлап, сақадай сайлап қойыпты.«Ахметбаздағы» шаруашылық жылдағы дағдысынан жаңылмай, ауданымыз бен ауылымыздың ардагерлері мен ақсақалдарын, бас иман және шаруашылықтың еңбекші механизаторлары, шаруашылық құрылымдары басшыларын арнайы шақырып, қызу жұмысты бастамас бұрын дән себу лентасын қиды. Қариялар диқаншыларға алдағы науқанға сәттілік тілеп, «Ел ырыздығы мол болып, егін бітік шықсын» деп ақ батасын берді.&nbsp;<blockquote>«Еңбек өнімділігін арттырып, тұқым сапасын жақсарту мақсатында біршама еңбек етудеміз. Агарлық салада озық алыс-жақын шет мемлекеттермен тәжірибе алмастық. Әрине, дала жұмысы қашан да жеңіл шаруа болған емес. Өткен жылы өнім межеден төмен болмады, шүкір биыл да барлығы жақсы болады деген үміт бар. &nbsp;Бұл дақылдың тамыры толықтай суда тұрып пісетіні белгілі. Өздеріңіз білесіздер соңғы жылдары өңірде аяқ су мәселесі бар. Дегенмен бүгінде бұл мәселе шешілгенімен, босаңсуға да болмайды. Өткен жылдары егіс салған барлық шаруашылықтарға да оңай тиген жоқ. Бірақ аяқ су тапшы екен деп қол қусырып қарап отыруға тағы болмайды. Ісің өну үшін аз ұйықтап, көп жұмыс істеуге тура келеді. Бұл алқапта бір шаруашылықтың ғана емес, бүкіл халықтың несібесі бар. Сондықтан бүгін егіс басына күріш қауызындағы әрбір түйір дәннің шығуына тілекші болған халықты, соның ішінде елге бас болған баталы қарияларды шақырып отырмыз», – дейді шаруашылық төрағасы Қанат Ниетқұлов.</blockquote>Иә, көктемде шаруа да қолына құрал-сайманын алып, «көптің несібесі» деп тұқым себеді, жаз бойы баптайды. Демек, халықтың несібесі үшін деп жасалған іс қашанда берекелі болары хақ. «Көктемнің әр күні – жылға азық» дегенді еңбектің бейнетін түсінетін диқан қауымы айтса керек.Құрылғанына 3-4 жыл ғана болған шаруа қожалығы биыл да құрамында 60-70 жұмысшысы бар үлкен ұжымға айналған. Техникалық базасы жаңаланып, ауыл шаруашылығына қажетті техникалар алынып, сол арқылы жұмыс сапасын жақсартып, өнімділігін арттырған. Қанат Ниетқұ-ловтың айтуынша, биыл «Ақ Бостай» мен «Бостай» учаскелеріне 1000 гек-тарға жуық күріш, жоңышқа егілмек. Қажетті тыңайтқыштары да жеткілікті мөлшерде алынған. Былтыр еңбек ұжымы күріштің әр гектарынан 60-65 центнерден орташа өнім жиған. Ал диқандардың алды әр гектардан 80 центнерге жуық өнім алған.&nbsp;Шаруашылық бір жағынан ауданда бақша дақылдары бағасының шарықтамауына өз үлесін қосып отыр. Биыл шаруашылық кент іргесіндегі «Ақ бостайда» 15 гектар жер ашып, аудан тұрғындарының бақша салып, қыстық азығын қамдауына жағдай жасамақ. Сондай-ақ шаруашылық жұмыс¬шыларына арнайы «Жетіарал» маңынан 10 гектар бау-бақша өнімдерін егуге жер дайылдалған.&nbsp;«Жердің ырзығы халықтың несібесі» деп жоғары да айтып өткендей, шаруашылық құрылғалы шаруашылық құрылтайшысы Абай Боранқұлов еңбек озаттарына бірнеше жеңіл автокөлік кілтін сыйға тартқан. Сонымен бірге ауылдың, ауданның абыройын асқақтатып жүрген ауыл жастарын спорттық киімдермен қамтамасыз етіп келеді. Ақсу ауылдық «Асыл әжелер» ансамблін және ауыл ардагерлерін киелі Түркістан жеріне саяхаттауға және Жаңақорған, Көкшетау курорттық аймақтарына демалысқа жіберуге қаржылай демеушілік жасап отыр. Сондай-ақ биыл Ақсу ауылындағы №116 мектептің 3 оқушысына Жаңақорған ауданындағы «Талдысу» лагеріне жолдама табыстады.Иә, «Жақсының жақсылығын айт, нұры тасысын», демекші, жас та болса игі істің басы-қасында жүретін азаматтың бұған дейін де талай қайырлы амалына куә болып жүрміз. Қолдағы азын-аулақ қаражатпен іс бастап, бүгінде шаруасын ширатып отырған іскер азаматтың осыған дейін еліне қарайласқаны халықтың көз алдында. Өткенде аудандағы жағдайы төмен 100 отбасына тегін азық-түлік үлестірді. Іскер азамат бұл мақсатқа 2,5 млн теңге қаражат жұмсаған. Кешегі қасиетті Рамазан айында да жалпы өңір жамағатына аудан ордалығындағы «Иманқұл» мешітінде ауызашар беріп, мұсылман қауымның игі тілегін алды. Иә, елдің алғысын алған азамат ешқашан кем болмайды. Әрбір ойға келген жобасын қариялардың батасымен бастап, көрсеткен нәтижесін ха-лықтың алғысымен байланыстыратын осындай жас іскер азаматтар барда әрқашан береке болары сөзсіз.

«Ахметбазда» алғашқы дән себілді

Сырдарияда оқушыларға жазғы демалыс қалай ұйымдастырылады?

<a href="https://kyzylorda-news.kz/">Kyzylorda-news.kz.</a> Әрбір өлкенің халқына суықта пана, ыстықта сая болған, есімдері ел есінде сақталған біртуар перзенттері бар екені айтылады. біздің ауданда да жас ұрпақ біліп өсуге тиіс тұлғалар жеткілікті. Солардың бірі – сексеннің сеңгірінен асқан аббаз қанатбаев атамыз екенін біз мақтанышпен айтамыз.Жайдары жаз. Ел тұмшаланып, карантинге жабылған уақыт. Әдеттегіше журналистік зерттеуімізді бастап, мәлімет іздеп әлекпіз. Күннің ысуы мен жан-жақтан төнген індет қаупіне қарамастан ауыл аралап жүрміз. Мәліметке қаныға алмадық. Солай салымыз суға кеткенде бір күні әжемнің қалтафонына қоңырау түсті. Біз зерттеп жүрген Смат бақсының бүгінгі ұрпаққа насихатталғанын қалаған жанның бірі – оның баласындай болған Аббаз ата еді. «Есімде қалғанымен бөлісейін, бейітіне де барып қайтамыз» деген ниетін білдіріпті ол. Қуана таңғы асты ішпестен ағаның үйіне беттедім. 9 жасқа дейін қолында тұрған ол Смат ата жайында ойында қалған оқиғасымен бөлісті. Одан соң балаша жетектей біледі-ау деген кісілерге хабарласып, үй араладық. Бірақ, бірі білмесе, енді бірінің үйінде қара құлып тұрды. Менің мұңайғанымды білсе керек.– Еңсеңді түсірме, қазір көлік тауып, бейітіне барамыз, – деді ол. Жасы егде тартса да менімен зерттеудің алғы шебінде жүргеніне разы болдым. Ішімнен «ата, аман болыңыз» деп қайталап қоямын.Сағат тілі түскі 11.00-ді көрсетіп тұр. Түскі ас ішпестен ентіге келген атаны көрдім. Иіркөлге баруға көлік тауып, мені алып кетуге келіпті. Солай жолға шықтық. Артқа біраз жол тастаған соң Аббаз ата әлденені айтқысы келгендей басын изеді.– Анау жатқан жазық кезінде Жамбыл колхозы болған. Осы жерде тұрдық, Смат атаның да өмірінің бір бұрышы осында жалғасқан, – деді ол қолын сермей.– Мына жерде иә үйдің, иә адамның қарасы көрінбейді ғой? – дедім таңдана.– Қазір тып-типыл. Бірақ бұрын басқаша еді…Тағы үнсіздік.– Қорымның мына қапталына тоқта, – деген атаның бұйрығынан соң ретімізбен көліктен түстік.– Келмегеніме біраз болды. Осы маңайда секілді еді. Жүр іздеп көрейік, – деді Аббаз ата. Расымен, бейіт болған соң еркін жүру мүмкін емес. Шеңгел, сексеуіл. Одан қалды әр жерде төмпешік. Бергі жағынан іздеген бейітті таппаған соң арғы жағына өтуге тура келді. Жоқ. Атаның да ұнжырғасы түсіп кеткен. Амал не? Кері қайтуға тура келді. Сағат дегенің 13.30-дан асып кеткен. Ауық-ауық көлік терезесінен көз тастап қоямыз.– Түскі ас ішіп болған соң келіні Ағиланы ертіп өзіміз бейітке барып қайтармыз. Нақты туғаны мен қайтқан жылын қағазға түртіп, өзіңе табыстаймыз, айналайын, – деген Аббаз атаның сөзіне жүрегімнің елжірей кеткені рас.– О не дегеніңіз? Жаспыз ғой, қайда барсаңыздар да басы-қасында жүремін, ата, – дедім айтарға сөз таппай. Өзінің ауырыңқырап жүргені де байқалады. Жүріс-тұрысы да қиындау. Бірақ екінші мәрте ауылға қайта айналып келу үлкен кісіге оңай емес. Абдырап қалдым. Байқады ма, «Бастаған соң аяқтау керек. Жазылған соң толық жазылу қажет» деп қысқа қайырды. Осы сәтте үйге де жеткен едік. Бірер уақытқа ғана қоштасып, түскі ас ішуге кірістім. Бейіттегі оқиғаны ойға оралтып, тыныштықта отырғанымда телефон шыр етті.– Осы кезде дайын отыр. Саған бара жатырмыз, – дегенін ести сала орнымнан атып тұрдым. Себебі онсызда дайын едім. Араға 15 минут салмай даладан көліктің гүрілі естілді. Жүгіре барып есігін аша бергенім сол еді, ата мен апаның күлімдеп отырғанын көріп көңілім тағы көтеріле түсті.– Айнұр қыз жолды жаттап алған шығар, – деді олар әзілдей.Бейітті екінші барғанда таптық. Құран бағыштап қайта елге оралдық. Жол бойы жинаған ақпараттардан соң соңғы миссияның орындалғанына іштей қуандым. Бейітін таппай зерттеу қалай жазылмақ? Сол күнгі оқиғаның бәрін жиып алып түн батқаннан таң атқанға дейін көз майымды тауыса мақаланы жазып шықтым. Солай дайын тұрған «Осы жұрт Смат бақсыны біле ме екен?» тақырыбындағы журналистік зерттеу газеттің 62 нөмірінде жарыққа шығып, қалың оқырманға жол тартты. Енді ғана бойдағы ауыр жүк түсіп, біразға жеңілдегендей болдым. Журналистік тіршіліктегі алғаш зерттеуім оңай туындай салмады. Бірақ 5-6 ай аралықтағы күндерде өмірге керек азық алдым, рухани жаңғырдым, рухани жаңардым. Тілшінің міндетіне айналған насихаттау жұмысы осылайша өз мәресіне жетті. Ал сол мәреге жеткізуде қолпаштап, барынша көмек қолын созуға дайын тұрған, мақаланың жарыққа шығуына атсалысқан Аббаз атаны қалайша атап өтпейін? Оның бойындағы өжеттілік пен күрескерлік келбеті бейнесіне төгілген нұрдай еді.Аббаз Қанатбаев 1941 жылы Қармақшы ауданында қызметкер отбасында дүниеге келген. Еңбек жолын 1956 жылы Қазалы теміржол училищесін бітіргеннен кейін вагон жөндеуші, Жосалы механикалық зауытында машина құрастырушы, вагон қараушы болудан бастаған. 1962-1967 жылдары Мәскеудің көлік-инженерлік институтында оқып, одан инженер-электромеханик мамандығын алып шығады. 1967 жылдан 1980 жылға дейін Жосалы механикалық зауытында шебер, инженер, бас энергетик, бас инженер болып жемісті қызмет етеді. Одан кейін «Главриссовхозстройдың» Қызылордадағы тәжірибе-механикалық зауытында және «Ремстройдеталь» бірлестігінде бас инженер қызметтерін атқарған.Ал 1980-1987 жылдары облыстық халықтық бақылау комитетінде инспектор, 1987 жылы Жосалы механикалық зауытында директор болып жұмыс істейді. Одан соң «АНК – Дәулет» жеке кәсіпкерлігін ашып, бизнесін дөңгелетеді. «АНК – Дәулет» серіктестігі Жосалының қыр бетінен 200 гектар жер алып қиыршақ тас араласқан топырақты елеп, әртүрлі фракцияларға бөліп, жуып, кептіріп, арнайы қаптарға салып теміржол вагондарына тиеп жөнелтетін технология тізбегін құрды. Ағысы қатты өзендерге орнатылатын су реттегіш тоспалар құрылысы мен «Қазатомпром» өндірісінің қажетін өтеп, үлкен сұранысқа ие болуда. Бүгінде серіктестік 30 адамды жұмыспен қамтып отыр. Демеушілік, қайырымдылық істерімен де танымал, жыл сайынғы су тасқынына қарсы күрес кезінде аудан басшылығы осы серіктестіктің көмегіне жүгінеді. Бала күнінде талай теперіштерге тап болып, кезіккен қиындықтарға тапжылмастан күрескен жан – Қармақшы ауданының құрметті азаматы.Өндірісте ұзақ жыл жемісті еңбек еткен Аббаз Қанатбаев қазір елдің ардақты ақсақалы. Бүгінде ол зайыбы Нұрсұлу анамызбен шаңырағынан өрген ұрпақтарының қызық-қуаныштарына тоймай, мерейі артып отырғанына іштей тәуба етеді. Бүгінгі мақаламызға арқау болған Аббаз Қанатбаев секілді аталар қашан да тұлғалық тұрпаттың биігінде жүріп, кісілік келбеттің қандай болатынын көрсетіп келеді. Өскелең ұрпақ осындай азаматтарға қарап бой түзері анық.&nbsp;

Қармақшылық кәсіпкер құрған серіктестік 30 адамды жұмыспен қамтып отыр

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Асылбек Шаменовтың төрағалығымен кезекті аппарат мәжілісі өтіп, маңызды жиынның күн тәртібінде үш мәселе қаралды.&nbsp;Алғашқы мәселе – көктемгі дала жұмыстарына дайындық барысы. Биыл қала көлемінде көктемгі егіс жұмыстарын сапалы жүргізу міндеттері тұр. Бұл тұрғыда ауыл шаруашылығы және жер қатынастары бөлімі басшысының міндетін атқарушы Қойшыбай Жүсіпов баяндама жасап, осы жылы 9 мың гектардан астам жерге ауыл шаруашылығы дақылдарын егу жопарланғандығын айтты.&nbsp;«Оның ішінде негізгі дақыл күріш 3 610 гектар, дәнді дақыл 107 гектар, картоп дақылы 500 гектар, көкөніс дақылы 1 330 гектар, бақша дақылы 990 гектар, мал азықтық дақыл 2 499 гектарды құрайды», – деді Қойшыбай Жүсіпов. Өз кезегінде қала әкімі бөлім басшысының міндетін атқарушы Қойшыбай Жалғасұлына егін науқанына қажетті шараларды жоғары деңгейде жүргізілуін, су арналарын тазалау жұмыстарын, ауылшаруашылығы дақылдарын агротехникалық мерзімге сәйкес егілуін қамтамасыз етуді тапсырды.&nbsp;Жиында Қызылорда қаласының 2023 жылдың I тоқсанындағы әлеуметтік-экономикалық даму қорытындылары да талқыланды. Оған қатысты қалалық экономика және қаржы бөлімінің басшысы Гүлнар Баймаханова баяндады.&nbsp;Қалада жыл басынан бері өнеркәсіп өнімдерінің өндіріс көлемі 160 млрд. 870 млн теңгеге жеткен. Өңдеуші өнеркәсіп саласында 21 млрд. 268 млн теңгенің өнімі өндіріліп, өткен жылдың салыстырмалы кезеңімен 20,9 пайызға артқан. Бұл жалпы өнеркәсіп өнімінің 13,2 пайызы.«Сондай-ақ, ауыл шаруашылығы өнімдерінің жалпы өнімінің көлемі қаңтар – наурыз айларында 1 млрд. 127 млн. теңгені құрап, өнімнің нақты көлемінің индексі өткен жылдың салыстырмалы кезеңімен 104,6 пайызды құрады», – деді Гүлнар Баймаханова.Бұдан бөлек, жыл басынан бері негізгі капиталға салынған инвестиция көлемі 41 млрд. 483 млн теңге болып, өткен жылдың салыстырмалы кезеңімен 36,5 пайызға артқан. Облыстағы үлесі 51,6 пайыз. Ал, құрылыс жұмыстарының көлемі 10 млрд. 792 млн теңгеге жетіп, былтырғымен салыстырғанда 33,5 пайызға артты. Пайдалануға берілген тұрғын үйлердің жалпы ауданы 82 603 шаршы метрді құрап отыр.Қала әкімі Асылбек Шаменов жауапты сала басшыларына қаланың әлеуметтік-экономикалық дамуы бойынша барлық көрсеткіштерді 100 пайызға орындалуын қамтамасыз етіп, кент және ауылдық округтері бойынша IV деңгейлі бюджеттердің түсімдері мен жоспардың жүзеге асуын қадағалауды тапсырды.Мәжілісте қаралған тағы бір мәселе – Конго-Қырым геморрагиялық қызбасы бойынша атқарылып жатқан шаралар болды. Шаһар басшысы былтыр ПМК-29 саяжайында кене шағудан адам өлімі орын алғанын айтып, аса қауіпті инфекциялардың алдын алу бағытында тиісті шаралар қабылдау керегіне тоқталды. Ол бойынша атқарылып жатқан шаралар туралы қалалық санитарлық-эпидемиологиялық бақылау басқармасының басшысы Ерлан Ұзақбаев баяндама жасады. Сондай-ақ қала әкімі аппаратының жұмылдыру дайындығы, аумақтық қорғаныс және құқық қорғау органдарымен байланыс бөлімінің басшысы Ғалымжан Қайназаровтың қосымша хабарламасы тыңдалды.Қала әкімі мәселеге қатысты облыстық ветеринария басқармасы, қалалық санитарлық-эпидемиологиялық бақылау басқармасы, облыстық жұмылдыру және шұғыл жұмыстар орталығымен бірлесіп іс-шара жоспарын әзірлеуді тапсырды.

Қызылордада көктемгі дала жұмыстарына дайындық барысы пысықталды

<a href="https://kyzylorda-news.kz/">Kyzylorda-news.kz.</a>&nbsp;Биыл облыста 8048 оқушы мектеп бітіреді екен. Осыншама түлек алтын ұя мектебімен қоштасып, жүрегі алып-ұшып, үлкен өмірге қадам басқалы тұр. Дәл қазір ҰБТ-дан сүрінбей өтіп, таңдаған оқу орнына түскенін қалайтын ұстаздары мен ата-аналары баладан бетер уайымдап жүрген сәт.Себебі соңғы қоңыраудың соғылуына да көп уақыт қалған жоқ. Қас пен көздің арасында сәуір де сөреден ұзады, көзді ашып-жұмғаншамамыр да мәреге жақындай салады. Енді баласы біліммен бас қатырып жүргенде, ата-анасы тойхана іздеп, табан тоздырып сандалмайды. Өйткені биыл облыстық білім басқармасы мектеп бітіру кешін ұйымдастыруға тыйым салып отыр.Мұндай шешім биылғы оқу жылының мектеп бітіру кештерін ұйымшылдықпен өткізу, бітірушілердің өмірі мен денсаулығын қорғау, құқық бұзушылықты болдырмау және сыбайлас жемқорлық тәуекелдерін жою мақсатында шығарылса керек. 3 сәуір күні күшіне еніп, барлық білім беру ұйымдарына жолданып қойған. Сондай-ақ аталған бұйрық оқу жылын аяқтау шараларын ұйымдастыруға және мектепке жөндеу жұмыстарын жүргізуге оқушылар мен ата-аналардан, педагогтардан ақша жинауға қатаң түрде тыйым салады.<blockquote>«Барлық білім бөлімдерінің басшылары мен мектеп директорларына қатаң түрде ескертілді. Олар мектеп бітіру кештерін өткізу барысында бітірушілер мен қызметкерлердің өмірі мен денсаулығына қауіпсіз жағдай жасалуын қамтамасыз етуі қажет. Бітіру кештерін міндетті түрде мектеп қабырғасында және ауласында өткізу, шараға бітірушілердің мектеп формасымен қатысуын және барынша қарапайым түрде өткізілуін қамтамасыз ету жүктелді.Сонымен қатар үй мен ресторандарда, басқа да ойын-сауық орындарында мектеп бітіру кештерін өткізу және бітірушілердің автокөліктермен кортежге шығуына жол бермеу, бітірушілердің өмір қауіпсіздігі мен құқық бұзушылықты болдырмау және алдын алу бағытында медициналық, өрт қызметтері, ішкі істер органдарымен бірлесіп шаралар қабылдауды қолға аламыз. Бұдан бөлек мектеп бітіру кештерін ұйымдастыру үшін ана-аналардан ақша жинамауды, ата-аналар тарапынан мектеп әкімшілігі мен мұғалімдерге сыйлықтар берілуіне жол бермеуді және шараларды мектептің қолда бар мүмкіндігімен ұйымдастыру керектігі ескертілді. Мұнымен қоса табиғат аясына ¬серуендеуге, өзен, көлдерге, шағын су алаптарына суға түсуіне тыйым салу және төтенше жағдай бөлімдерімен бірлесіп кезекшілік ұйымдастыру, бітірушілер, ата-аналар және педагогтар арасында ақпараттық-түсіндірме жұмыстарын қамқоршылық кеңес мүшелерімен бірлесіп белсенді түрде жүргізу тапсырылды», – деді облыстық білім басқармасының мектепке дейінгі және орта білім бөлімінің бас маманы Қарлығаш Әнуарова.</blockquote>Байқап қарасақ, мектеп қабырғасында қоштасудан көп дүние жоқ-ау, сірә. «Әліппемен қоштасу, бастауышпен қоштасу, 9-сыныпты тәмамдау қоштасуы» деп кете береді. Мұны аңғарған ¬Ерлан Сағадиев Білім министрі лауазымын атқарып тұрған шақта бұл мәселені өзінше шешіп, отандық оқушылар «Әліппені» енді қайтып көрместей біржола қоштасты. Кейін қайта табысты. Бәлкім, «Әліппеден» басқа кітап, бала сауаттылығын арттырмайтынына көз жеткеннен болар. Хош, тақырып ауанынан ауытқымайын.«Бесіктегі баланың күлгенін көрген – бір мұрат, алдына түсіп ананың жүргенін көрген – бір мұрат» деген бар. Иә, мәпелеп өсірген баласының әрбір қадамы ата-ана үшін үлкен мерей. Мектеп бітіріп, аттестат алған албырт жастың алдында сыры мен сыны беймәлім өмір тұрады. Сол себепті үлкен өмірге қадам басар сәтте «тарыдай болып кіріп, таудай болып шыққан» аяулы ортаға деген қимастықтың болуы орынды. Дәл осындай сәтті тойлаудың да өз жөні бар. Алайда мектеп бітіру кешін соңғы кездері дарақылығы көп сән-салтанатқа айналдырып жібергені оқушылар арасындағы әлеуметтік теңсіздікке алып келді. Одан бөлек, қызылды-жасылды дүниеге қызыққан албырт жастың от басуына, өмірмен қоштасуына да сеп болған жайттар жоқ емес.Жасыруға келмес, асыра сілтеуге келгенде алдымызға жан салмаймыз. «Балаға шашқаның – далаға шашқаның емес» дейтіндер де табылар арамызда. Десе де, бір сыныпта байдың да, жарлының да баласы тәлім алатынын жадыдан шығармауымыз қажет. Осы тұста біз маман пікіріне де құлақ түруді жөн көріп, бала тәрбиесінің басы-қасында жүрген ұстаздарды әңгімеге тартқан болатынбыз. Тиісінше, пікір екіге жарылды.<blockquote>«Өкінішке қарай, біз мектеппен қоштасу салтанатының шынайы мәнін ұмытып бара жатқандаймыз. «Біреу тойып секіреді, біреу тоңып секіреді» демекші, тұрмыс жағдайы жақсы һәм нашар ата-аналардың балалары да бір сынып қабырғасында тәлім алып жатады. Баласының көптен қалғанын кім қаласын? Тапқан-таянғанын ұрпағына шашады. Сондықтан мектеп қабырғасында өткені орынды», - дейді №46 А.С.Пушкин атындағы мектеп-лицей директорының оқу-әдістемелік ісі жөніндегі орынбасары Әлия Нұрманова.</blockquote><blockquote>«Жер бетінде адам болса, пікір де сонша болмақ. Бірі даттаса, енді бірі қолдап жатады. Білетінім, бірнеше жылдан бері түлектер, ата-аналар мен ұстаздар мектеппен қоштасу кешін мейрамханада атап өтуге дағдыланған. Ол дәстүр әзірге бұзыла қоймас», - дейді №159 Еңбекші қазақ орта мектебінің орыс тілі пәні мұғалімі Рабиға Дүйсебек.&nbsp;</blockquote>Әлбетте, ата-ана баласының қатардан қалмауын қалайды. Міне, сондықтан тыйым болмай келді. Бала ата-анасының өзі үшін бәріне даяр екенін біледі. Ал қазіргі қабылданған заң талай жасқа тұсау салғаны анық.<blockquote>«Мектеп бітіру кеші есте қаларлықтай өткенін қалаймыз ғой. Алайда менің есімде тек партада отырып, сабақ оқыған сәттерім қалыпты. Ойлап қарасам, мектеп бітіру кеші қып-қызыл шығын екен. Ал ата-анамыз біз үшін бәрін істепті», - дейді І курс студенті Әсет Қаратаев.</blockquote>P.S. Рас, түлектердің мектеп бітіру сәті – мереке. Бүгінгі қазақ баланың әр аттаған қадамын тойлауды әдетке айналдырды. Алайда мұның бәрі өз орнымен болғаны құба-құп. &nbsp;

Биыл облыста 8048 оқушы мектеп бітіреді

<a href="https://kyzylorda-news.kz/">Kyzylorda-news.kz.</a>&nbsp;Әскерге барғандар мен бармағандар арасында сөз қозғала қалса, өзара талас-тартысқа түсіп қалып жататыны бәріне мәлім. Бірі – әскерге бармаған жігіт жігіт емес десе, ал екіншілері – жігіттік әскерге барумен өлшенбейді деген пікірде. Олай болса қоғамда жиі талқыға түсетін осы бір сұрақ аясында ой қозғап көрелік.Жалпы ер азамат үшін «Әскер – өмір мектебі» саналады. Десе де мұны көбі жоққа шығарғысы келеді. Мүмкін сылтау. Бәлкім жауапкершіліктен жалтару. Не десек те бүгінгі жастардың дені әскерге бармауды құп көреді. Әскерде борышын өтемеген жігіт емес дейтіндерге олардың жауабы да дайын. Қазір күш сынасатын емес, ақыл-ой жарыстыратын заман деп кесіп айтады. Солайы солай ғой. Бірақ қоғамға жүректі, елді қорғайтын азаматтар да керек емес пе?! Бәрі бірдей білімге бет бұрып, тек бір салаға қызмет етер болса, Отанды кім қорғамақ? Шындығында солай айтатындардың өзінен мемлекет мүддесін жоғары қоятындығына да күмәнданасың. Оған себеп те жоқ емес. Қазір жігіттердің көбі әскерге баруға моральдық, физикалық тұрғыда да дайын емес. Оны әрқайсысы әртүрлі себептермен байланыстырады. Иә, солай-ақ болсын. Бірақ олар әскери өмір тек жігітті тек физикалық тұрғыда емес,нағыз азамат етіп тәрбиелейтін орта екендігін қаперден шығармау да керек. Әскер – жауапкершіліктің жүгін арқалауды үйрететін орта емес пе еді?Кеңестік кезде борышын өтегендер мен қазіргі әскерде сап түзегендердің айырмашылығы жер мен көктей. Ол кездегілер нағыз жігіт пе дерсің?! Неге дейсіз бе? Себебі олар қиындықтан қашпайтын. Қазіргі кездегідей оларда да әскердегі әлімжеттік болмады емес, болды. Бірақ соған қарамастан сол қиыншылықтарға төтеп берді. Сол арқылы олар сыналды, шыңдалды. Қиындықтарға шыдап, өздерін алып шықты да. Ал қазіргілер ше?. Көпке топырақ шашудан аулақпыз, десе де бүгінгі жігіттердің көпшілігінің жігіттік намысы белден төмен. Қайрағанымыз емес. Бірақ бұл шындық. Иә, көбі бүгінде орын алып жатқан әлімжеттікті желеу етіп, содан қашатын да, қорқатын да шығар. Бірақ кеудесіне үрейді қондырып алған жігітті жігіт деуге бола ма? Жігіт өр рухты, жүректі болмаушы ма еді? Әскер сондай болуға септесер еді ғой. Жігіттің шымыр әрі ширақ болып, жіптей болуына, оның ішкі мәдениетін қалыптастыруына әскердің маңызы зор екендігін сол кеңестік дәуірде борышын өтеген азаматтың бірі Серік Айтбекұлы да растайды.<blockquote>"Әскерге барғандар мен бармағандар арасындағы тартысқа өзімде жиі түсіп қаламын. Қалай десек те, әскерде борышын өтеген және өтемеген жігіттердің арасындағы айырмашылық желдей есіп тұрады. Әскерде болғандар көбіне байыпты, ұстамды, шыдамды көрінеді. Өйткені олар темірдей тәртіптен өткен. Сөздің де қадірін біледі. Жауапкершілікті жүрегімен сезінеді. Ал бармағандарды жаңағы айтылғандарға мүлдем қарама-қайшы деп айтудан аулақпын. Десе де олардың бойынан балалық та, шалалық та жиі байқалады. Өзім соны жиі аңғарамын", – дейді кент тұрғыны.</blockquote>Жоғарыдағы пікірді қостамайтындар да жоқ емес. Солардың қатарында Айдын есімді жас та бар. Оның айуынша жігіттің жігіттігі әскерге барумен шектелмейді. Жігіттің өзіне деген сенімділігін әскерсіз-ақ қалыптастыруға болады-мыс.<blockquote>“Тек әскерде ғана тәрбие мен тәртіп болады деген қасаң пікірмен келіспеймін. Үйдегі тәрбиеде атаның ақылы, әкенің айбары, ағаның айтары болса, отбасында-ақ нағыз жігіт болып қалыптасасың. Адам өмірінде әскерден де бөлек қаншама орта болады емес пе?! Сол ортада өзіңді қалай ұстай білсең, соған сай өзіңді қалыптастыруға болады. Ал Отанды қорғауға келсек, ол әрбір азаматтың борышы. Міндеттелген борышты өтеуге дайынмын. Меніңше, санадан «әскерге барып, нағыз жігіт боласың» деген стереотипті жою керек. Әскерге тек Отан алдындағы борышты өтеуге дайын болу үшін бару керек деген ұранды жастардың санасына сіңірген дұрыс болады деп ойлаймын”, – дейді жас жігіт.</blockquote>Иә, бұл әңгіме аясындағы талас-тартыс бітпейтінге ұқсайды. Әр буынның бұл тақырып төңірегіндегі ойына шектеу қоя алмаймыз. Халық даналығында «Жігітті жылы сөз ширатпайды, қатты сын ширатады» деген сөз бар. Қанша жерден жоққа шығарсақ та, жігіттің жігіт болып қалыптасуында әскердің рөлі зор екендігін естен шығармайық.

Әскер – өмір мектебі

<a href="https://kyzylorda-news.kz/">Kyzylorda-news.kz.</a> Бүгін «7 мамыр – Отан қорғаушылар күніне» орай Жастар ресурстық орталығының ұйымдастыруымен «Отан айбаты» әскери-патриоттық жастар жиыны өтті. Жиынға Қазақстан Республикасы Қарулы Күштері ардагерлері қоғамдық бірлестігі Қызылорда облыстық филиалының төрағасы М.Ршауов, Қызылорда қаласыны қорғаныс істер жөніндегі департаментінің бастығы А.Чункунов және білім ордаларындағы АӘД пәні мұғалімдері мен «Жас Сарбаз» әскери-патриоттық қозғалысының тәрбиеленушілері қатысты.Жастар мен жасөпірімдер арасында әскери-патриоттық тәрбие беруді жетілдіру мақсатында «Жас сарбаз» балалар мен жасөспірімдер әскери-патриоттық қозғалысы Республикалық қоғамдық бірлестігі 2018 жылдың 14 қарашасында құрылып, Қазақстан Республикасының Әділет министрлігінде тіркелді. Қазіргі таңда өңірімізде 11 мыңға жуық жас сарбаз аталмыш бірлестік құрамында.Сонымен қатар, жақында жастар орталығында «Жас сарбаз» әскери-патриоттық қозғалысының базасы жасақталып, бірқатар әскери экспонаттар қойылды. Жиын барысында қатысушы қонақтар әскери-танымдық мұражайды аралап, алдағы жұмыстарға табыс тіледі.Іс-шара аясында өңірдегі әскери-патриоттық бағытты дамытуға өз үлесін қосып жүрген алғашқы әскери дайындық пәні мұғалімдері және «Жас Сарбаз» әскери-патриоттық қозғалысынің тәрбиеленушілері Қызылорда облыстық қоғамдық даму басқармасы басшысының және «Жас Сарбаз» әскери-патриоттық қозғылысы Республикалық қоғамдық бірлестігі төрағасының алғыс хаттарымен марапатталды.Жиынға арнайы қатысқан желі жұлдызы, патриоттық өлеңдерді нақышына келтіріп орындайтын Әбу Құдабаев атындағы №197 орта мектептің 3 «А» сынып оқушысы Нұрперзент Бақытбек бірқатар жалынды өлеңдерін оқып, көрермен қошеметіне бөленді. Жас патриотқа «Жас Сарбаз» әскери-патриоттық қозғылысы Республикалық қоғамдық бірлестігі төрағасының алғыс хаты мен естелік сыйлық табысталды.<figure class="image"><img src="https://knadmin.beoblood.kz/uploads/344760924_190426190544237_643626277689913546_n_deed6ba277.jpg" alt="344760924_190426190544237_643626277689913546_n.jpg"></figure>

Қызылордада әскери-патриоттық жастар жиыны өтті

<a href="https://kyzylorda-news.kz/">Kyzylorda-news.kz.</a> Өткен жылдың статистикалық есептері бойынша, Қызылорда қаласына қарасты Қызылжарма ауылдық округінде халық саны 8882-і адамды құраған. Оның ішінде экономикалық белсенді халық саны 6019 адам болса, өзін-өзі жұмыспен қамтығандар саны - 1092 адам. Ал ауылдық округтегі жұмыссыздық деңгейі 0,4 пайызды құраған. &nbsp;Ауылдағы Сақтапберген Әлжіков атындағы №144 орта мектеп 90 жылдық тарихы бар іргелі мектеп. Мектеп «100мектеп, 100 аурухана» бағдарламасы аясында 2009 жылы пайдалануға берілген. Бүгінгі күні білім ордасында 2712 оқушы 113 сынып комплектісінде білім алуда.2021-2022 оқу жылында пәндік олимпиаданың қалалық кезеңінен 39, облыстық кезеңінен 1 оқушы оза шықса, ғылыми жобалар байқауының қалалық кезеңінен 40, облыстық кезеңінен 15, республикалық шаралардан 7 оқушы жүлделі оралды. &nbsp; Бұдан бөлек, «INNO FEST Qyzylorda-2021» фестивалінде 2 топтың 6 оқушысы «Болашақ» Университеті ректорының грантын жеңіп алған.2021-2022 оқу жылында мектеп бітірушілерден «Алтын белгі» - 6 оқушы, «Үздік аттестат» - 5 оқушы иегері атанып, ҰБТ қорытындысымен грант көрсеткіші орташа 90 пайызды құрады.Қызылжарма ауылдық округіндегі «Сыр дидары» балабақшасы 2014 жылы пайдалануға берілген. Бүгінгі күні балабақшада 280 бала тәрбиеленуде. Балабақшада 75 қызметкер жұмыс істейді. Оның ішінде 35-і педагог қызметкер, 40-ы техникалық қызметкерлер.2022 жылдың 16 қарашада өткен «Үздік жоба-2022» атты қалалық сайыста балабақшаның мектепалды тобының тәрбиеленушісі ІІ орын, &nbsp;2022 жылдың 24 қарашасында балабақша педагогтері арасында өткізілген «Инновациялық ойындар жәрмеңкесі» атты сайыста балабақша педагогы ІІ орын иеленді.Бұдан бөлек, 2022 жылдың 18 жетоқсанда өткен І-Республикалық «KERUEN» байқауына «Сыр дидары» бөбекжай-бақшасының бүлдіршіндері қатысып, «Қазақша» би түрі бойынша бас жүлдені иеленген. Сонымен қатар, осы байқауда вокал номинациясы бойынша бөбекжай-бақшаның тәрбиеленушілері І дәрежелі және ІІІ дәрежелі дипломдармен марапатталған.Ауылдағы «Қызыжарма мәдениет үйі» 2013 жылдың қазан айында &nbsp;халық игілігіне пайдалануға берілген. Қазіргі уақытта мәдениет үйінде – 16 қызметкер жұмыс атқарады.Бүгінгі күні Қызылжарма мәдениет үйінде әртүрлі жастағы тұрғындарға арналған он үш үйірме қызмет етіп келеді. Мәдениет үйі жанындағы түрлі үйірмелерге қамтылған өнерпаздар саны 116 адамды құрайды.Алматы қаласында өткен «Өнерлі елдің өресі биік» атты VІІІ республикалық 50 жас пен 90 жас аралығындағы талантты жандарға арналған өнер байқауында «Қуаныш» &nbsp;әжелер ансамблі &nbsp;«Хормен ән айту» жанры бойынша &nbsp;І орын иемденді. Осы сайыста 50 жас пен 90 жас аралығындағы талантты жандарға арналған өнер байқауында «Ән салу» жанры бойынша Гүлжан Тәшенова ІІ орын, Бибіқадиша Рахымжанова ІІІ орын иеленді. Ал «Дәстүрлі ән» жанры бойынша &nbsp;Гүлжан Иманғалиева І орын, Бидаш Ермағанбетова жүлделі ІІ орын иегері атанды.Қызылжарма ауылдық округінде тіркелген кәсіпкерлік нысандар 446 бірлікті құрайды. Өткен жылмен салыстырғанда жаңадан 76 кәсіпкерлік субьектісіне көбейіп, 227 адам жұмыспен қамтылған.Жалпы 2022 жылдың 12 айында Қызылжарма ауылдық округі бойынша &nbsp;85 жоба &nbsp;қолдау тауып, барлық &nbsp;қаржы инситуттарынан 190 миллион теңге несие &nbsp;қаражат алып, қазіргі таңда жұмыстарын істеуде.Одан бөлек, Қызылжарма ауылдық округінде жеке кәсіпкер Жеңісбек Бердешов өз қаражаты есебінен жоба құны 25 миллион теңгені құрайтын «Green house» жылыжай кешенін 2022 жылы іске қосып, кәсібін жалғастыруда. Кәсіпкер бүгінгі күні 2 адамды тұрақты жұмыс орнымен қамтып отыр. Жылыжайдан маусымында күніне 140 келіге дейін өнім алып, қала және ауыл тұрғындарына ұсынып отыр.Қызылжарма ауылдық округіндегі тағы бір жеке кәсіпкер Сұлтанбек Сексенбаев өз қаражаты есебінен жалпы құны 230 миллион теңгені құрайтын, спорттың 4 секциясы болатын спорт кешенін салу жұмыстарын жүргізуде. Спорт кешені биылғы жылы пайдалануға беріледі деп жоспарлануда.Өткен жылы «Өңірлерді дамыту» бағдарламасы аясында ауылдық округтегі Сайлыбаев және №4А көшелеріне тас төсеу жұмыстары жүргізілген.Қалалық құрылыс бөлімі арқылы ауылдық округтің шет аймақтары болып саналатын Қызылжарма-1 және Қызылжарма-2 тұрғын ауданындағы 35 көшеге тас төсеу жұмыстары жүргізілуде. 2022 жылға 35 көшенің, 15 көшесіне &nbsp;мердігер мекеме «УАД» серіктестігі тарапынан тас төсеу жұмыстары жүргізілген. Қалған көшелер 2023 жылы жалғасын тауып, жұмыстар жүргізілуде.Сондай-ақ, Қалалық тұрғын үй шаруашылығы, жолаушылар көлігі және автомобиль жолдары бөлімі арқылы әл-Фараби көшесінен Қарауылтөбеге баратын ұзындығы 1,6 шақырым болатын «Қызылорда жолдары» мекемесімен асфальт төсеу жұмыстары жүргізіліп, пайдалануға берілді.«Қызылорда электр тарату тораптары компаниясы» акционерлік қоғамы арқылы шет аймақта орналасқан 12 көшеге 400-ге жуық электр бағаналары мен Қызылжарма-1 және Қызылжарма-2 тұрғын аудандарына 6 жинақтық трансформаторы орнатылып, қазіргі таңда электр желілерін (СИП) тарту жұмыстары жүргізіліп, пайдалануға берілген.Ауылдық округті аяқ сумен қамтамасыз ету мақсатында қалалық тұрғын-үй коммуналдық шаруашылығы, жолаушылар көлігі және автомобиль жолдары бөлімі арқылы 3 дана дренажды су бұрғылау ұңғымасы салынып пайдалануға берілді. Сонымен бірге ауылдық округтің ішкі көшелеріне 20 дана жол белгілері мен 3 дана жасанды жол кедергілері салынған. 2022 жылдың жаз айларында ауылдағы Досхожин көшесіне Қызылжарма кіреберіс аркасын орнату жұмыстары жүргізілді. &nbsp;&nbsp; Биылғы 2023 жылдың қараша айында «Қызылорда су жүйесі» мекемесі арқылы ауылдық округтегі Батырбаев 2А көпқабатты тұрғын үйге уақытша кәрізсу жүйесін орнату жұмыстары жүргізіліп, іске қосылған.

Қызылжарма ауылдық округінің дамуы қарқынды 

<a href="https://kyzylorda-news.kz/">Kyzylorda-news.kz.</a>&nbsp;Мейірбике Мөлдір Үртеова&nbsp;науқас баланы шипалы қолынан бөлек, мейірімді жүзімен емдейді. Бұл Қазалы көпбейінді орталық ауруханасында балалар бөлімінде пост мейіргері Мөлдір Үртеова туралы ата-аналар пікірі.«Баланың білегі ауырса, ананың жүрегі ауырады». Ұл-қызымыз науқастанып қалса, жанымызды қоярға жер таппай шыр-пыр болатынымыз анық. Алладан кейінгі сенеріміз де ақ халатты абзал жандар. Алдына барып, көмегіне зәру екенімізді жеткізгенде дереу іске кірісіп кететін балалар бөліміндегі дәрігерлердің де мейірбикелердің де еңбегі зор. Бүгін әріптестері арасында сыйлы, емделушілер үшін қолы алтын мейірбике Мөлдір Рысдәулетқызы туралы айтпақпыз. Ол Қызылорда облысы Жаңақорған ауданы Төменарық ауылында дүниеге келген. Отбасындағы төрт баланың екіншісі. Орта мектептен кейін Мөлдір Қызылорда медицина колледжін «Емдеу ісі» мамандығы бойынша үздік дипломмен бітіріп шықты. Жалпы тәжірибелі фельдшер біліктілігі берілді. Еңбек жолын Астана қаласындағы 5 қалалық емханада учаскелік мейірбике болып жұмыс бастады. 2012 жылы Қазалыға келін атанды. Бүінде жолдасы Ғалымжан Кәрібаевпен үш бала тәрбиелеп отыр.2013 жылы 2019 жылдар аралығында Қазалы көпбейінді орталық ауруханасында балалар бөлімінде пост мейіргері болып жұмыс жасады. 2019-2021жылдары Қызылорда медициналық жоғарғы колледжінде мейіргер ісінің қолданбалы бакалавры біліктілігін алдым. 2019-2020 жыл аралығында Қазалы көпбейінді орталық ауруханасында «Дені сау бала және патронаждық қызметте» аға мейіргер болып жұмыс атқарды. Үш жылдан бері Қазалы көпбейінді орталық ауруханасында балалар бөлімінде пост мейіргері.Мөлдір білімді әрі биязы мінезді. Сыпайы сөйлеп, кез келген жағдайда салмақтылық танытады. Өмірлік ұстанымы да мінезіне сай. «Ақырын жүріп, анық бас, еңбегің кетпес далаға», дейді ол. Сөзден көрі істің адамы біліктілігінің арқасында өз саласы бойынша бірнеше рет марапат төрінен көрінді. Жуырда ғана «Қызылорда облысы бойынша үздік аурухана мейіргері – 2023» байқауында бас жүлдені жеңіп алды. Алда астанада өтетін республикалық сайыста өзінің біліктілігі мен білімін сынамақ.Ел ішінде жүрген соң, жақсы-жаманды жаңалықтарды естіп, халықтың үніне құлақ сала жүреміз. Осындай бір басқосуда бейтаныс әйел адамның:<blockquote>“Өткенде қызым Інжу ауырып, аурухананың балалар бөліміне түстік. Дәрігер Болтай мен ұжым мүшелеріне риза болдым. Әрбірі өз жұмысына адал, жауапкершілікпен атқарады. Соның ішінде Мөлдір қызыма алғысым шексіз. Тиянақты, өз ісіне адал, білімді әрі мейірімді екен. Он күн ем алып, үйге шықтық. Шүкір, қазір жағдайымыз жақсы”, – деп ризашылық танытып отырғанын байқадым.&nbsp;</blockquote>Оны жанындағылар да қостай кетті. Таныса келе ақ тілегін арнап отырған ананың аты-жөні Бекзат Қуатбаева екенін білдім.Мейірімді мейіргер Мөлдірдің анадан алған алғысы, халықтан алған құрметі оның адал еңбегінің нәтижесі деп түсіндім. Әрбір ақ халатты жанның артынан осындай жүрекжарды лебіздер желдей есетін болса, нұр үстіне нұр болары сөзсіз.

Емі шипа, сөзі дәру мейірбике

<a href="https://kyzylorda-news.kz/">Kyzylorda-news.kz.</a>&nbsp;Адамзат ғұмырында ұмытылмайтын, ескірмейтін тарихи оқиғалар жетерлік. Соның қатарындағы Екінші дүниежүзілік соғыс тарих бедерінде мәңгі сақталды. Өйткені сұм соғыста Отан үшін от кешкен жауынгерлер адам айтса сенгісіз күндерді басынан өткерді. Сол ерлердің арқасында биыл Жеңіске 78 жыл толады. &nbsp;Ал бір емес, қос майданда болған адам бар десе, сенер ме едіңіз?Иә, қан майдандағы небір сұрапыл оқиғалардың басы-қасында жүрген осындай қазақ азаматтары да бар. Солардың бірі – Нұрман Қияқбаев. Оның алғашқы көрген майданы Фин соғысы еді.Ол 1913 жылы шаруа отбасында дүниеге келген. Нұрман анасының құрсағында болғанда әкесі дүниеден өтеді. Балалық шағы қиын-қыстау заманға тап келген ол ерте есейді. «Жығылғанға жұдырық» демекші, ес жиып, жігіттік жасқа жеткенде ажал анасынан да айырады. Тағдыр қанша тарынса да тәлкек болмаған Нұрман Қызылорда қаласындағы сол кездегі «Ақмешіт» педагогикалық училищесіне оқуға түсті. Дипломын қолына алған соң жолдамамен Жаңақорған ауданына барып, мұғалімдік қызмет етті. Бірақ оның өмірінің бұл кезеңі де ұзаққа созылмады. 1937 жылы Нұрман Қияқбаев әскер қатарына шақырылады. Борышын өтеп жүріп пулеметшілер курсын тәмамдаған жас жігіт 1939 жылы Фин соғысына аттанды. Майдандағы оқ пен оттың ортасынан аман қалған сарбаз енді ғана елге оралуға қамдана бергенде алдағы армандары мен үміттерін 1941 жылы басталған алапат соғыс бұзды. Екінші дүниежүзілік соғыстың өрті тұтанды. Епті деген ер жігіттердің бәрі майдан даласына аттанды. Отан үшін оқ пен оттың ортасында жүріп, жауға қарсы шықты. Сол сап түзеген жауынгерлер арасында Нұрман Қияқбаев та болды.Ол 1941 жылдың маусымы болатын. Сөйтіп елге қайтпастан Калининград қаласындағы майдан шебіне жіберілді. &nbsp;Фин соғысында небір жорық жолдарынан өткен, шайқас көргіп ысылған жауынгер немістермен соғыста пулеметшілер сапында батыл соғысып, ерліктің үлгісін көрсетеді. Майдан даласында бірнеше рет жарақат алып, бір саусағынан айырылады. Н.Қияқбаев 1945 жылы жеңісті Берлинде қарсы алып, сол жылдың желтоқсанында елге оралды. Майдан даласындағы көрсеткен ерлігі үшін «ІІ дәрежелі Отан соғысы» және үшінші дәрежелі «Даңқ» орденімен және «Германияны жеңгені үшін», «Кенигсбергті алғаны үшін» медальдарымен марапатталған.Елге келгеннен кейін Шиелі ауданындағы өндіріс орындарының біріне ағаш шебері болып жұмысқа орналасты. Сөйтіп жүріп 1946 жылы Сапаркүл Сейілханқызымен бас қосты. Екеуі 2 ұл, 5 қыз тәбиелеп өсірді. Нұрман Қияқбаев зейнетке шыққан соң да қарап жатпады. Өмірінің соңына дейін иығына кетпенін асып, егін екті. Жыл сайын 2 гектар алқапта өсіріп баптаған қауыны мен картобын совхоздарға өткізіп, шаруасын дөңгелетті. Соғыста болдым, зейнеткермін демеді. «Шалқайып елден сұрағанша, еңкейіп жерден сұра» деген тәмсілді ұғып, ата кәсіппен айналысты. Тек өмірінің соңғы бір жылында дерті дендеп, төсек тартып жатты. Ұл-қыздары соғыс жайлы сұрағанда «Жамандық &nbsp;жайлы айтпайды» дейді екен қария.Қан майданда Отан үшін от кешіп, ерлік көрсеткен, бейбіт өмірде ерен еңбек үлгісін танытқан майдангер 1991 жылы 78 жасында өмірден озды. Арда ұлдың жасаған ерлігі ұмытылмасы хақ. Екі майданның ері атанған, қандай қызмет атқарса да қырандай қалғымай еңбек еткен, адалдық пен парасаттылықтың биік үлгісі болған Нұрман Қияқбаевтың шежірелі өмір жолы &nbsp;– кейінгі буынға үлгі-өнеге.

Қос майданның жауынгері

<a href="https://kyzylorda-news.kz/">Kyzylorda-news.kz.</a> Биыл Қызылорда облысында 250-ден астам көше жөндеуден өтсе, ең үлкен жоба «Қызылорда-Жезқазған» трассасын қайта жаңғырту жұмыстары басталды. Жол саласында жұмыс ауқымы көп, бірақ білікті кадр қат. Осы орайда, Қорқыт ата университеті мен жергілікті «Жол активтерінің ұлттық сапа орталығы» әріптестік байланыс орнатып, болашақ жолшыларды даярламақ.Аймақтағы іргелі оқу орнында құрылыс мамандығы бойынша білім алып жатқан 70 студент жол зертханасына келді. Олар мамандармен бірге асфальт-бетон сынамаларын заманауи құрылғылар арқылы тексеріп, құрылыс материалдарының сапасын анықтады. Сондай-ақ, жастар жол жабындысына пайдаланатын қиыршық тас фракциясының құрамы қалай тексерілетінін көзбен көрді. Жалпы студенттер университет қабырғасында алған білімін тәжірбиемен ұштастырып, оны өндіріс барысында іске асырды. Зертхананың әлеуетін көріп, қызығушылығы артқан жастар болашақта жол саласында еңбек етуді көздейді.&nbsp;<blockquote>«Бүгін біз теориялық жағынан оқығанымызды зертханаға келіп тәжірибе жүзінде қалай жүзеге асырылатынын көрдік. Мұнда барлық қондырғы автоматтандырылған. Сынамаларды тексеруге барлық жағдай жасалған. Асфальттың сапасын лезде анықтауға мүмкіндік бар екен. Жалпы университетте алған білімімізді әрі қарай жетілдіре түстік. Өзіме зертхана ұнады. Оқу бітірген соң, жол саласында жұмыс істегім келеді», - дейді Қорқыт ата университетінің студенті Әміржан Матығұлов.</blockquote>Жалпы «Жол активтерінің ұлттық сапа орталығы» елімізде бірқатар игі бастамаларды қолға алған. Мәселен, жергілікті жолшылар үш жылдан бері аймақтағы мектеп оқушыларына кәсіби бағдар беріп келеді. Сондай-ақ, жол мамандығы бойынша білім алып жатқан студенттерге де орталықта мол мүмкіндік қарастырылған.&nbsp;<blockquote>«Біздің орталықтың бастамасыменелімізде бірқатар ауқымды жобалар жүзеге асырылуда.Әсіресе, жол саласына деген мектеп түлектерінің қызығушылығын ояту үшін биыл еліміздің 2 мыңнан астам мектебінде оқушыларға кәсіби бағдар беру көзделуде.Сондай-ақ, біздің орталықтан өндірістік тәжірибеден өтетін студенттерге жалақы төлеу мүмкіндігі қарастырылған. Мұндай қолдауды екінің бірі жасамайды. Сондықтан болашақ осы салада еңбек еткісі келетін жас мамандарға деген қамқорлықты осы кезден сезіндіріп жатырмыз. Жалпы жастар да қазір техникалық мамандықтарға бетбұрып келе жатқаны бізді қуантады», - дейді «Жол активтерінің ұлттық сапа орталығы» ҚОФ директоры Ерболат Көштаев&nbsp;</blockquote>Алдағы уақытта университет пен мемлекеттік кәсіпорын арасындағы әріптестік байланыс нығая бермек. Бірлескен жоба аясында келешекте жолшы мамандарының қатары арта түседі деген сенім бар.<img src="https://knadmin.beoblood.kz/uploads/Whats_App_Image_2023_05_02_at_14_59_04_46df8bac8b.jpeg" alt="WhatsApp Image 2023-05-02 at 14.59.04.jpeg">

Қызылордалық студенттер жол зертханасында білімін жетілдіреді

<a href="https://kyzylorda-news.kz/">Kyzylorda-news.kz.</a> Бүгінгі әңгімеміз эстрада әлемінің жұлдыздарына ән жазып, олардың халық арасында кең танылуына, қазіргі сөзбен айтсақ «хит» болуына біршама ықпал еткен сазгер жайында болмақ. Оның әндерін үлкен де, кіші де жатқа айтып жүр. Жұртшылық ерекше сүйіп тыңдап жүрген көптеген туындылардың әуенін талантты жас сазгер Өмірзақ Махамбет жазғанын бірі білсе, бірі білмейді. Сол себепті соңғы уақытта елге сазгерлік қырынан көрініп жүрген жас талантты халыққа таныстырып, өнерін насихаттауды жөн көрдік.– Өмірзақ, сөз басын туып-өскен ортаңнан бастасақ…– Мен 1998 жылы «көшесі көшпес баққа апаратын» шырайлы Шымкентте дүниеге келдім. Өзіңізде білетін шығарсыз, біздің өлкеде ән-жыр десе ішер асын жерге қоятын жандар көп. Шетінен дарынды. Қазіргі өнер әлемінде жүрген аға-апаларымыз бұл сөзіме дәлел бола алады. Білмеймін, соның әсері ме, әйтеуір бала кезімнен сырлы сазға құмар болып өстім. Республикалық, облыстық, байқауларға қатысып, оқ бойы озық шығатынмын. Талай рет жүлделі болдым. Ата-анам да өнерден құралақан емес. Әрқайсысының бала жұбатары бар. Әке-шешемнің берген тәлім-тәрбиесі, өскен ортамның өнерден алыс болмауы менің сазгерлікке келуіме үлкен ықпалын тигізді.– Бүгінде Алматыдасың. Немен айналысып жүрсің?– Өміріме өнерді серік еткесін жұмысым да осы музыкадан алыс емес. Мектеп бітіре сала атбасын Алматыға бұрдым. Қазір Т.Жүргенов атындағы Қазақ Ұлттық өнер академиясында оқып жүрмін.. Ән жазумен айналысамын. Әншілерге шығармаларымды ұсынып, жомарттығына қарай бұйырған қаламақымды аламын.– Сен әнін жазған біраз өлеңдер «хитке» айналды. Қай туынды сені танытып, қай туынды бағыңды ашты деп ойлайсың?– Шынына келсем, ел арасында кеңінен таныламын деп ойламаппын. Мен көбіне өзімнің үзеңгілес бауырым Рамазан Амантаймен шығармашылық байланыстамын. Ең алғаш әнім де сол жігіттің сөзіне жазылды. Соңғы 2 жылда екеуміз бірге 15-ке тарта ән жазыппыз. Оның ақындығына тәнтімін. Сөздері әсерлі, жүрекке жылы тиеді. Әрі ол да, мен де лирикалық өлеңдерге құштармыз. Осылайша ән мен сөз үйлесім тауып кеткесін біршама ән жарыққа шықты деп ойлаймын. Қазіргі таңда Төреғали Төреәлінің орындауында «1:0», «Қайда?», «Жан жарым-ау», «Түнгі вальс», «Махаббат», «Ауа-райы», Ернар Айдардың «Жанымның дәрігері», «Махаббатымсың», Қуандық Рахымның «Моншақ», «Проблема жоқ», «Неке жүзік», Әділет Жауғашардың «Жариялаймын жекпе-жек», «Саяхатшы қыз», Жолдасбек Абдихановтың «Біз екеуміз бір адамбыз», Дана Кентайдың «Керексіз бөтен адам», «Қоштасудың кафесі», Melomen тобының орындауында «Даусыңды сағындым» секілді т.б. өнер жұлдыздарының ән қоржынында екеуміз жазған әндер бар. Әр туындының өзіндік шығу тарихы болған соң, мына ән менің атымды шығарды немесе мынау сәл әлсіздеу шықты деп бөліп-жарып қарай алмаймын.– Өзің айтқандай, өнерге келгелі бұдан да өзге біршама танымал әннің әуенін жаздың. Танымал болар әуенді талай танисың?– Әннің ырғағы, өлеңнің негізгі ойы ол әннің өміршеңдігін не ұзаққа бармайтынын бірден аңғартады. Бүгінде бұл әндер хитпарадтардың алдыңғы шебінен көрініп, танымал болып жүр. Бірақ бұл жерде айта кететін тағы бір жайт, әннің «хит» атануына бірнеше фактор әсер етеді. Оның ішінде сөзін жазған ақынның нақышына келтіруі, орындайтын әншінің де еңбегі ерекше әсер ететінін айту керек. Қазіргі таңда әндерімнің басым бөлігін жас әншілер үлкен сахналарда айтып жүр.– Халқымыз “Жігітке жеті өнер де аз” дейді. Жалпы сазгерліктен өзге біз білмейтін тағы қандай қырларың бар?– Түйе мінген қазақтың бәрі төрт шумақ өлең шығара алады. Айналамда өзі аздап сөз жазатын, сазын да келтіретін ақын достарым көп. Кейде солар сияқты менің де бір шабыт келгенде өлең жазатыным бар. Көңіл қошым келгенде қойын дәптеріме түртіп қоямын. Алайда оны жариялаған емеспін. Сонымен қатар гитара, пианино, баян секілді бірнеше аспаптарда ойнаймын. Бірақ ән шығарғанда көбіне гитарамен сүйемелдегенді ұнатамын.– Сенің әндеріңде лирикалық бояу басым. Алдағы уақытта патриоттық әндер жазу ойыңда бар ма?– Әрине. Осыдан бір ай бұрын ғана өнердегі екі ағам келіп, ат төбеліндей қазақтың бір екенін, тұтастығын көпке паш ететін бір ән жазсақ деп ұсыныс айтты. Атын атап, түсін түстемей-ақ қояйын, сөзін жазған айтыскер ақын. Ақылдаса келе, осы күзде Отансүйгіштік, ұлт болмысы бағытында бір туынды көрерменге жол тартпақ. Жарыққа шыққан кезде бағасын берерсіздер. Егер халық жылы қабылдап жатса, келешекте бұл бағытта да тер төгуге қарсы емеспін.– Қазақстанда сазгерлердің көпшілігі әуелі әндерін «хитке» айналдырып алады да, араға біраз уақыт салып өздері де үлкен сахнаға шығып жатады. Өзіңнің эстрадада ән айтам деген ойың бар ма?– Шынымды айтсам, ол жағын мүлде ойланбаппын. Әрине, әу демейтін қазақ жоқ ғой. Бірақ мен тек сазгерлік жолымды жалғастырып, өзімді одан әрі дамытқым келеді. Қазір музыка әлемінде бағыттар көп. Әр жанрда ән жазып, Шәмші Қалдаяқов, Ескендір Хасанғалиев ағаларымыз сияқты танымал композиторлардың ізін басу – менің негізгі мақсатым. Алла қаласа, ниетімнің нәтижесін көрерсіздер деген ойдамын.– Қазір қазақ сахнасының төрінде «қойыртпақ» әндер шектен тыс көбейіп кетті. Осыдан кейін әннің де құндылығы жоғалып, тыңдарманның да талғамы түсіп кеткендей. Біздің өнерге дендеп кірген осы батыстық сарын жайында не айтасың?– Бүгінде қазақ эстрадасында орындалып жүрген көп ән батыстан келген дүниелермен араласып, біраз өзгеріске түсті. Жаңа бағыттар пайда болды. Ертеректегі Біржан сал, Ақан сері, Естай, бертін келе Шәмші сияқты ұлы тұлғалардан қалған киелі ән өнерінің бағыты бұрмаланып бара жатқаны жасырын емес. Қазіргі кезеңде төрт аяғы тең түскен қара өлең, қазақылықтың иісі шығып тұратын, бояуы қанық әндер тасада қалып жатыр. Оның себебі жеңіл әуендерге сұраныстың артуы десек болады. Әншілер де тойға арналған, билеуге ыңғайлы немесе тез танылатын, көп ойлануды қажет етпейтін әндерге жиі тапсырыс береді. Осыдан келіп ақын да, сазгер де көбіне сол сұранысқа қарай жұмыс істейді. Мұның барлығы уақыт өте келе түзеледі деп ойлаймын.– Соңғы сауал. Шыны керек, қазір ән айтатын әншілер танылып, олардың жұлдызын жаққан сазгерлер көп жағдайда тасада қалып жүр. Осы жағдайды түзеп, сазгерді де елге таныту үшін не істеу керек деп ойлайсыз?– Қазіргі әнші өзі – сазгер, өзі – ақын әрі орындаушы. Бұл – бүгінгі қазақ сахнасындағы өнер иелерінің көбінің болмысы деуге болады. Бұл жағдайды түзеу үшін ақын мен сазгерге ерекше мән беру керек. Оған қоса әншілер шығармашылық кеш барысында, жиындарда ән мен сөздің авторын насихаттай білуі қажет. Себебі әркім өз қазанында қайнағанда ғана өнер жанданады.– Сұхбаттасқаныңа рақмет! &nbsp;

Қазақстан және Қызылорда облысының жаңалықтары