<a href="https://kyzylorda-news.kz/">Kyzylorda-news.kz.</a>&nbsp; Бүгін Қызылорда қалалық полиция басқармасының жеке құрамның қатысуымен жедел кеңес өтті. Қызылорда облысы Полиция департаменті бастығының орынбасары Жұмағұлов Ілияс Байжұманұлы және Қызылорда қалалық полиция басқармасының бастығының міндетін атқарушысы Кордабаев Нұрлыбек Құрбаналиұлы төрағалығымен өткен жедел-қызметтік жұмыстың 2023 жылдың І жартыжылдығын қорытындыланып, алдағы кезеңге арналған негізгі міндеттер айқындалды.Жедел кеңесте сала басшылары Қазақстан Республикасының Президенті Қасым-Жомарт Тоқаев және ҚР ІІМ министрі Марат Ахметжановтың тапсырмаларының орындалу барысы және атқарылған жұмыс нәтижелері туралы есеп берді.Мәселен, жиында қаламыздың қоғамдық тәртіпті қамтамасыз етудің жай-күйі, азаматтардың құқығын қорғау бойынша атқарылған іс-шаралары кеңінен талқыланды.Ел Президенті Қасым-Жомарт Тоқаевтың Қазақстан халқына Жолдауын іске асыру, «халық үніне құлақ асатын мемлекет» тұжырымдамасы аясында полиция жұмысының ашықтығы мен айқындығын қамтамасыз ету - күн тәртібіндегі ең өзекті мәселе ретінде қаралды.&nbsp; Кадр саясаты, полицейлердің қызметтік-жауынгерлік дайындық деңгейін көтеру, жеке құрам арасындағы тәртіпті нығайту шаралары әңгімеге арқау болды.&nbsp;Кеңес соңында Басқарманың барлық қызметтері мен бөліністерінің басшыларына қаланың барлық аумағында, қаланың шет жағында орналасқан елді мекендерде құқықбұзушылықтардың алдын алу, орын алған қылмыстарды ізін суытпай ашу, қоғамдық тәртіпті барынша нығайту бойынша бірқатар міндеттер жүктелді.&nbsp;Сонымен қатар жедел – қызметтік жиында қаралған тағы бір өзекті мәселе жол қауіпсіздігін қамтамасыз етуді, қауіпсіздікті бақылауды күшейтуді, учаскелік полицейлердің өз аумақтарындағы құқық бұзушылықтар мен қылмыстардын алдын алу мақсатында профилактикалық жұмыстар жүргізуді, жол-пайдалану қызметтерінде бұзушылықтарды жоюды ұйымдастыруды, жол инфрақұрылымына жауапты мемлекеттік органдармен өзара іс-қимылды жандандыруды басқарма басшылығына тапсырды.

Қызылорда қалалық полиция басқармасының жартыжылдық жұмысы қорытындыланды

<a href="https://kyzylorda-news.kz/">Kyzylorda-news.kz.</a>&nbsp; Қорқыт Ата атындағы Қызылорда университеті Kyzylorda Hub бизнес-инкубаторының ұйымдастыруымен «IT, жасанды интеллект және киберқауіпсіздік бағытындағы стартаптарды инкубациялау» тақырыбында кездесу өтті.Мақсаты − SeoulTech ұлттық университетінің делегациясына бизнес-инкубатордың жұмысын таныстыру, Қызылорда қаласында ашылатын жасанды интеллект мектебінде бизнес-инкубациялау орталығының жұмысын үйлестіру.&nbsp; Жиынға Сеул ұлттық ғылым және технологиялар университеті информатика және инжиниринг кафедрасының профессоры, SeoulTech жаһандық кванттық жасанды интеллект қауіпсіздік орталығының директоры Джесу Ким, жобалық орталық директорының орынбасары Сонгон Ким және академиялық мәселелер бойынша Басқарма мүшесі – проректор Дана Мейрамқызы қатысты.&nbsp;Бизнес-инкубатор резидентері стартап жобаларын қонақтарға таныстыру мүмкіндігіне ие болды. Кездесу барысында Kyzylorda Hub жетекшісі Жанарыс Алтынбекұлы SeoulTech өкілдеріне жұмыс барысын таныстырып, алдағы инкубатордың алдағы жоспарларымен бөлісті.&nbsp; Кездесудің нәтижесінде СеулТех университетінің атынан бизнес-инкубатор замануи лаборатория және құрал-жабдықтармен қамтамасыз етіледі. Сонымен қатар білім алушыларға инкубациялық кезеңдер мен кәсіпкерлік курстарының оқытулары жүргізіледі. Студенттер жаңа коворкингте жұмыс жасап, жаңа жобаларын жүзеге асыратын болады.Айта кетейік, Сеул ұлттық ғылым және технологиялар &nbsp;университетінің делегациясы университетіміздің негізінде жасанды интеллект мектебінің бірінші кезеңін енгізуге іссапармен келді. &nbsp; &nbsp;<figure class="image"><img src="https://knadmin.beoblood.kz/uploads/IMG_2460_c36b5b03f6.JPG" alt="IMG_2460.JPG"></figure>

SeoulTech өкілдерімен кездесу өтті

<a href="https://kyzylorda-news.kz/">Kyzylorda-news.kz.</a> Қызылордада 12 қыз-келіншек «Мен кәсіпкер» жобасының «Әйелдер кәсіпкерлігін дамыту орталығы» бағыты аясында біліктілігін көтеріп жатыр.Жобаны Қызылорда облының кәсіпкерлер палатасы жүзеге асырып жатыр.«Әйелдер кәсіпкерлігін дамыту орталығы» бағыты аясында Кәсіпкерлер палатасының мамандары кеңес беріп, олардың қажеттіліктерін анықтады.Жобаға қатысушы қыз-келіншектердің сұранысына сәйкес маусымнан бастап арнайы бекітілген нақты салалар бойынша оқытып жатыр.<blockquote>«Жыл соңына дейін жүргізілетін оқытуда біз кәсіпкер кездесетін салалардың басым бөлігін қамтуға тырысып жатырмыз. Атап айтқанда, кәсіпті жүргізуге психологиялық дайындықтан бастап, қаржы сауаттылығы, маркетинг, сөйлеу шеберлігі, бухгалтерлік есеп, серіктеспен, мамандармен, кәсіпкерлік саласындағы заңнамалармен жұмыс жүргізуді үйретеміз», – дейді жобаның менторы Наталья Мишукова.</blockquote>Кезекті кездесуде «Әділдік жолы» республикалық қоғамдық бірлестігінің облыстық филиал басшысы Ләззат Бақтыбаева кәсібін енді бастап жатқан қыз-келіншектерді кәсіпкерлік саласын реттейтін нормативтік-құқықтық актілермен, заңдармен таныстырып шықты.<blockquote>«Бизнесті жүргізгенде кәсіпкер тұтынушылары мен өзге де ұйымдардың алдындағы міндеттерімен бірге өзінің құқын жақсы білуі тиіс. «Заңды білмеген жауапкершіліктен құтқармайтынын» ескере келе білікті заңгер кәсіпкерлік саласындағы маңызды нормативтік құжаттарды талдап, түсіндіріп берді», – дейді Наталья Мишукова.</blockquote>Жобаға қатысушы қыз-келіншектер ментормен жұмыстың нәтижесінде кәсібінде алғашқы нәтижелерге де қол жеткізе бастады. Олар сауда орындарымен келісіп, өнімдерін қоюға мүмкіндік алуда.&nbsp;&nbsp;

Қызылордалық кәсіпкер қыз-келіншектер менторлардан тәлім алып жатыр

<a href="https://kyzylorda-news.kz/">Kyzylorda-news.kz.</a>&nbsp; Үкімет отырысынан кейін облыс әкімі Нұрлыбек Нәлібаевтың төрағалығымен өткен мәжілісте күн тәртібінен тыс бірқатар қосымша мәселелер қаралды.Оның бірі – сумен қамтамасыз етуге қатысты мәселе. Аймақ басшысының тапсырмасына сәйкес бақша дақылдарын егу үшін облыс бойынша барлығы 3 мың 342 гектар жер арнайы дайындалды. Мамандар егілген көлемді қайта нақтылау кезінде су тапшылығы байқалған. Кейбір елді мекендерде егіншілер су жеткізе алмай, дизельді насоспен арықтан су алуда.Жергілікті халық қосымша жер дайындауды сұрап, егін егуге ынтасын білдіруде. Себебі биыл бақша дақылдары жоспарланған көлемнен артық егілген. Демек, бұл жұмыстар қарапайым шаруа адамының күнкөріс деңгейіне оң әсер еткен. Облыс әкімі алдағы уақытта жергілікті халықтың сұранысына сәйкес бақша дақылдарын егу үшін жерді жоспармен дайындап, тұрғындардың сұранысын толықтай қанағаттандыруды тапсырды.Қызылорда қаласы мен аудан әкімдеріне «Қазсушар» республикалық мемлекеттік кәсіпорны Қызылорда филиалымен бірлесіп, дақылдардың нақты су тұтыну нормасына сәйкес су беру кестесін шаруалармен келісе отырып, үйлестіру, су деңгейін көтеру бойынша тиісті жұмыстар жүргізу жүктелді.Соңғы уақыттағы кенеге байланысты эпидахуал, адам өліміне әкеп соқтырған жағдайлар қоғамда қызу талқылануда. Облыс әкімі мердігерлер жұмысындағы кемшіліктерді атап көрсетті.Алдағы күзгі залалсыздандыру жұмыстары өз деңгейінде жүргізілуі және оны ветеринария мамандары бақылауы керек. Мал қоралардың механикалық тазартылуы үнемі қадағалауда болуы тиіс. Аймақ басшысы жауапты басшыларға науқастарды ерте анықтауды, кененің көбеюіне не себеп болғанын зерттеуді, қолданыстағы заңдылықтарды басшылыққа ала отырып, үнемделген қаржы есебінен қосымша анықталған елді мекендерді шұғыл залалсыздандыруды, кенеден қорғану шараларын насихаттауды тапсырды.

Облыс әкімі кенеге қарсы залалсыздандыру жұмыстарының кемшіліктерін сынға алды

<a href="https://kyzylorda-news.kz/">Kyzylorda-news.kz.</a> Бүгінде ел экономикасының дамуына бағытталған басты қозғаушы факторлардың бір бағыты – кәсіпкерлік саласы екені жасырын емес. Елдің қазынасын толтырып қана қоймай жұмыссыздықпен күресті оңтайландыруда да осы саланың беріп отырған серпіні тым ерекше. Сондықтан мемлекеттің де назарынан тыс қалмай, ұдайы қолдауға ие болып келе жатқан кәсіпкерлердің табысты еңбегі еселі десек қателеспейміз. Әсіресе бұл ретте жастардың өз ісін бастап, оны жандандыру, ары қарай дамытуға деген жоспарлары, сол жоспарды жүзеге асырудағы шаралары көңіл қуантады. Олардың кәсіпкерлікке деген көзқарасы мен тың идеялары тек өздерін емес, өзгелерді де шабыттандырып, осы бағытта еңбек етуге үлкен көмек болып отыр.Расында тәуелсіздікке қол жеткізгелі бері кәсіпкерлік бағытындағы түрлі қиындықтарды бастан өткердік. Ол жасырын емес. Бастайтын істі толықтай зерделеп, жоспарлап алмай қолға алынғандықтан кәсіптің өміршеңдігі де ұзаққа созылмағанын көріп, біліп жүрдік. Ал бүгінде жүйелі жұмыс пен жетістікке жетуге бағытталған бағдардың нәтижесінде ауданымыздың өзінде бірнеше мыңдаған азамат кәсіппен айналып отыр. Мемлекет басшысы Қасым-Жомарт Тоқаев "2030 жылға қарай жұмыс күшінің үштен бір бөлігіне жуығы цифрлық дағдыларды меңгерген және ерекше қабілеттері бар жандар болады. Оларды тиімді пайдаланған жөн. Үкімет "Атамекен" Ұлттық кәсіпкерлер палатасымен бірлесе отырып, кадрларды әзірлеу үшін ұзақмерзімді бағыттарды айқындауға тиіс. Яғни алдағы 10-12 жылға арналған құзыреттер болжамын жасау қажет" деген болатын. Міне, кәсіпкерлер палатасының жұмысы қазірдің өзінде өз жемісін беріп отыр. Осындай бағытта барынша табысты еңбек етуді меңгерген Айгүл Шамшадинова өз жұмысын одан әрі дамытуға мүмкіндік алды. "Атамекен" Ұлттық кәсіпкерлер палатасының қолдауымен "Бастау-Бизнес" жобасы аясында сертификат алған кейіпкеріміз биыл бақша дақылдарын өсіру бағытындағы бизнес жоспары негізінде грантқа ие болған.&nbsp;Айгүл Әбілдақызы асыраушысынан айырылған көп балалы ана. Алланың берген 4 перзентін қатардан қалдырмай жетілдіру әрбір ұрпақ өсіріп отырған жанның асқақ арманы емес пе?! Міне, балаларының бақыты үшін еңбек етіп, белгілі бір жетістікке жетуді көздеген жанның бірі біздің бүгінгі кейіпкеріміз.&nbsp;<blockquote>&nbsp;"Талаптыға нұр жауар" деген терең тәмсіл бар. Мұндағы нұр дегеніміз Алланың мейірім мен шапағаты. Демек еңбек еткен жан майдай тер мен адал еңбегінің есесін көретінін осыдан-ақ білуге болады. Расында талаптанған, талпынған адам түбінде табысқа жететіні анық. Ол үшін тыңнан түрен салудың да қажеті жоқ. Тек қолдан келетін істі кәсіп етіп айналысу жеткілікті деп білемін. Мәселен бақша өсіру атадан келе жатқан кәсіп десек десем болады. Қыр-сырын бала кезден меңгерген істі осындай мүмкіндік туып тұрған жағдайда кәсіпке айналдыруға талап қылдым. Қолдауға ие болып, қазірде гранттың жемісін көріп, жұмысымды бастап кеттім, – дейді Айгүл Шамшадинова.</blockquote>Осы ретте кейіпкеріміз жергілікті атқарушы билікке де алғысын айтуды ұмытпады. Егін отырғызуға қажетті жер сұрап жазған өтінішін қанағаттандырған Сексеуіл кенті әкімшілігі де еңбек етемін деген жандарға әркез қолдау білдіруге әзір тұратындығын айта кетті.Қазірде 6000 түп Темірлан F1 қарбыз тұқымы егілген алқап қазірде көктеп, алқаптың ажары кіріп қалған. 40 күнде өнім беретін қарбыздың бұл тұқымының да дәмін татар күн алыс емес.

Аралдық кәсіпкер мемлекет қолдауымен егін егіп, кәсіп көзіне айналдырды

<a href="https://kyzylorda-news.kz/">Kyzylorda-news.kz.</a>&nbsp; Бүгін ҚР Премьер-министрі Әлихан Смайыловтың төрағалығымен өткен Үкіметтің селекторлық мәжілісінде 2023 жылғы қаңтар-маусым айларындағы әлеуметтік-экономикалық даму қорытындылары және республикалық бюджеттің атқарылуы, «Тарифті инвестицияға айырбастау» бағдарламасы, халықты жұмыспен қамтудың өңірлік карталарын жүзеге асыру барысы талқыланды.Үкімет отырысында облыс әкімі Нұрлыбек Нәлібаев сөз сөйлеп, 2023 жылдың қаңтар-маусым айларында бірқатар негізгі макрокөрсеткіштер бойынша өсім қалыптасқанын атап өтті.Өңірде ауыл шаруашылығының жалпы өнімі 1,8 пайызға (36,2 млрд теңге), инвестициялар тарту 23,1 пайызға (162,0 млрд теңге), құрылыс жұмыстары көлемі 54,9 пайызға (53,7 млрд теңге), көлік және қоймалау көлемі 5,9 пайызға (139,5 млрд теңге), пайдалануға берілген тұрғын үйлер көлемі 2,1 пайызға (318,7 мың шаршы метр) және сауда көлемі 3,2 пайызға (325,3 млрд теңге) артқан.Облыс әкімі есепті кезеңде өңдеу өнеркәсібінің көлемі 4,4 пайызға, оның ішінде химия өнеркәсібіндегі өндіріс көлемі 31,5 пайызға, тамақ өнеркәсібінде 11,1 пайызға, металлургия өнеркәсібінде 7,4 пайызға және жеңіл өнеркәсіпте 5,3 пайызға төмендегенін айтты. Өңдеу өнеркәсібінің өндіріс көлемін арттыру үшін өңірде Индустрияландыру бағдарламасы аясында құны 6,4 млрд теңге болатын 4 жобаны жүзеге асыру жоспарлануда.2023 жылдың 1 шілдесіне облыс бюджетінің шығындар жоспары 99,8 пайызға орындалды, оның ішінде республикалық бюджеттен бөлінген нысаналы трансферттер 99,0 пайызға игерілген.Облыс бойынша инженерлік инфрақұрылым жүйелерінің тозу деңгейі 33 пайыздан 68 пайызға дейінгі көрсеткішті құрайды. 2023 жылға табиғи монополиялар субъектілерінің желілерді жаңғыртуға арналған инвестициясының көлемі 10,2 млрд теңге. Оның ішінде: бюджет қаржысы – 8,9 млрд теңге, несие қаржысы – 878 млн теңге, кәсіпорындардың өз қаражаты – 448 млн теңге. Бұл қаржыға атқарылатын жұмыстар нәтижесінде инженерлік инфрақұрылым жүйелерінің тозу деңгейі 3 пайызға дейін төмендемек.Мемлекет басшысы мен Үкіметтің алға қойған міндеттерін орындау аясында облыста «Өңірлік жұмыспен қамту картасы» іске асырылуда. Бүгінде 24 мың 364 азамат жұмысқа орналастырылды, бұл жылдық меженің 55,5 пайызын құрады.«Жастардың кәсіпкерлік бастамасын» қолдау шеңберінде комиссия 252 адамға 1 млрд 153 млн теңгенің несие портфелін мақұлдады. Берілген несиелердің 61 пайызы (154) мал шаруашылығына, 36 пайызы (91) қызмет көрсету саласына, 3 пайызы (7) өндіріс ашуға бағытталды.Облыс әкімі жастардың кәсіпкерлік бастамаларына берілетін жеңілдетілген несие кеңінен қолдау тауып, сұраныс көлемі артқанын айтты. Қазірдің өзінде 257 орынға 313 адам сұраныс білдірген. Қаржының толық игерілуіне байланысты құжат қабылдау уақытша тоқтатылды. Еңбек және халықты әлеуметтік қорғау министрлігіне тағы да 200 адамға 1 млрд теңгеге қосымша бюджеттік өтінім жолданды.ҚР Үкіметі отырысынан кейін Премьер-министр берген тапсырмаларды пысықтау мақсатында облыс әкімі Нұрлыбек Нәлібаевтың төрағалығымен мәжіліс өтті. Мәжілісте аймақ басшысы Индустрия және инфрақұрылымдық даму министрі Марат Қарабаев бастаған қазақстандық делегация құрамында Қытай Халық Республикасына барған іссапарының қорытындылары туралы айтты.Іссапар аясында облыс басшысы бірнеше мұнай-газ, химия және әртүрлі өнеркәсіптік жабдықтарды шығаратын қытайлық компания басшыларымен кездесті. Нәтижесінде, тамыз айының 10-нан кейін «Джепетто» және «Қытай Ұлттық машина жасау корпорациясы» компаниясының және басқа да қытай компанияларының өкілдері Қызылорда облысына іссапармен келетін болды.Аймақ басшысы қытайлық инвесторлармен тиімді байланыс орнатып, инвестиция тарту арқылы жаңа өндіріс ашу үшін инвестицияны қажет ететін барлық саладағы жобаларды ұсынып, таныстыруды тапсырды. Жұмыс сапары нәтижелі болуы үшін қол қойылған меморандумдар мен келісімдер бұлжытпай орындалуы керек. Осыған орай қала, аудан әкімдері мен барлық басқарма басшыларына тиісті тапсырмалар берілді.&nbsp;Облыс әкімі 2023 жылдың қаңтар-маусым айларында негізгі макрокөрсеткіштер Қызылорда қаласында, Шиелі және Жаңақорған аудандарында төмендегенін атап өтіп, жағдайды тұрақтандыру үшін берілген тапсырмалардың орындалу барысы туралы сұрады. Аталған аудандар мен Қызылорда қаласы әкімдеріне жағдайды зерделеп, оны жақсартудың жедел жолдарын қарастыру жүктелді.Облыс бюджетінің игерілуі бойынша ең төменгі көрсеткіштер Қармақшы ауданы және Қызылорда қаласында қалыптасқан. Аймақ басшысы Қызылорда қаласы мен барлық аудандар әкімдеріне, бағдарлама әкімшілеріне ай сайын жоспарланған қаражатты 100 пайыз толығымен игеруді, ол үшін тауар жеткізушілер және мердігерлермен тиісті жұмыстар жүргізуді тапсырды.Тұрғындарды тұрақты және сапалы электр энергиясымен, ауыз сумен, жылумен қамту – басты міндеттің бірі. Сондықтан жауапты басшылар инженерлік желілерді жөндеуге және қайта жаңғыртуға бөлінген қаржылардың уақытылы игерілуін, нысандардың алдағы жылу беру маусымына дайын болуын қамтамасыз етуі тиіс. Ал табиғи монополияларды реттеу комитетінің аумақтық департаменті коммуналдық кәсіпорындардың тарифті өзгертуге ұсынған өтінімдерінің негізділігін тексеріп, мерзімінде нақты шешім қабылдауы керек.Халықты жұмыспен қамтудың өңірлік жол картасын іске асырудың бірқатар көрсеткіштерінде оң динамика байқалады. Осы бағыттағы жұмыстарды әрі қарай жалғастыру, қаржыны мақсатты игеру қажет. Облыс әкімі облыстық басқармалар, Қызылорда қаласы және аудан әкімдеріне жоспарланған 43 898 жұмыс орнының ашылуын 1 қыркүйекке дейін кемінде 75 пайызға жеткізуді тапсырды. Жастардың кәсіпкерлік бастамасына жеңілдетілген несие беру үшін қосымша 200 адамға 1 млрд теңгеге жобалар пулын әзірлеп, «Аграрлық несие корпорациясының» филиалына ұсыну керек.<figure class="image"><img src="https://knadmin.beoblood.kz/uploads/347562471_576293858025196_454225313505142383_n_aa5db2024c.jpg" alt="347562471_576293858025196_454225313505142383_n.jpg"></figure>&nbsp;<figure class="image"><img src="https://knadmin.beoblood.kz/uploads/347593390_576293728025209_378481381986821005_n_d6180f39fc.jpg" alt="347593390_576293728025209_378481381986821005_n.jpg"></figure>

Қызылорда облысында негізгі макрокөрсеткіштер бойынша өсім бар

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың баса назар аударып, жіті қадағалап отырған басым бағыттарының бірі – тұрғындарды газбен қамтамасыз ету. &nbsp;Осыған байланысты қазір ауданның негізгі макроэкономикалық көрсеткіштерінің орындалуы тұрақты бақылауда. Көгілдір отынмен қамтамасыз ету қарсаңында аудан орталығындағы көп адам үшін қидың қызуы мен көмірдің шоғына жылынатын уақыт келмеске кетті. Халыққа майдай жағатын көгілдір отын көптің көңілінен шығып отыр. Дейтұрғанмен, өлкемізде әлі де табиғи газдың иісі жетпеген елді мекендер бар екенін де айта кетуіміз керек. Қазіргі таңда аудан бойынша Шиелі кенті және Ы.Жақаев, Бидайкөл, Байсын, Н.Бекежанов, Ш.Қодаманов, Ақмая, Алғабас ауылдары толық көгілдір отынға қосылып, аудан халқының 68 пайызын құрап отыр.Ағымдағы жылы республикалық бюджеттен жалпы құны 2 млрд 875 млн. теңгені құрайтын (6 елді мекенде) Еңбекші, Жиделіарық, Алмалы, Ә.Тәжібаев, Досбол Датқа, Бестам ауылдарына газ құбырын және орамішілік газ тарату желілерінің құрылыс жұмыстарына 1 млрд 531 млн теңге бөлініп, құрылыс жұмыстары жүргізілуде. Сонымен қатар, «Ауыл-Ел бесігі» бағдарламасы аясында мектептердің қазандық ғимараттарын салуға барлығы 93,6 млн теңге бөлініп құрылыс жұмыстары басталды. Газдың келуі халықты пеш жағу тауқыметінен арылтып қана қоймасы анық. Экологиялық ахуалдың жақсаратынын айтпағанның өзінде, ол аймақ экономикасының қарқынды дамуына пәрмен берері сөзсіз. Әлбетте, мыңдаған шақырымнан құбыр тарту оңай болмасы анық. Өңірімізге бюджеттен бөлінетін қыруар қаржының арқасында келген газдың игілігінен құр қалмай, әр тұрғынның үйінде көгілдір отынның жанғаны екі жақты тиімді. Көгілдір отын – ел өміріне береке, табыс, шуақ алып келеді. Елдің әлеуметтік, экономикалық жағдайына да үлкен серпін береді.&nbsp;Су – тіршілік көзі&nbsp;Қазір аяқ суды айтпағанның өзінде ауыз судың да құны "қара алтынмен" бірдей болды.Әлеуметтік желіні ашып қалсаңыз болды, сусыз отқан қаншама мемлекет бар екенін естіп, ет жүрегін елжірейді. Себебі, денеңе нәр беретін тіршілік көзінсіз бір сәтте өмір сүру мүмкін емес. Алайда осы уақытқа дейін ауыз суды емін-еркін пайдалана алмай, тек мөлшермен тұтынып жүрген елді мекен тұрғындары да біздің ауданда болған. Ендігі кезекте бұл олқылықтың орны толмақ. Себебі ағымдағы жылы шалғайдағы ауылдарды ауыз сумен қамтамасыз ету мақсатында Қызылқайың, Қосүйеңкі ауылдарына 404,1 млн.теңге бөлінген. Әне-міне дегенше құрылыс жұмысы да басталып, алыс ауылдық округ тұрғындары да тәтті суды таусылып қалады-ау деген қорқынышсыз пайдаланатын болады. Бұдан бөлек 2023 жылға Шиелі кентіндегі Зекеев, Бөлтекейұлы көшелеріне ауыз су құбырлары құрылысына 73,9 млн. теңге, Жуантөбе, Лесхоз елді мекендеріне су тұшытқыштар орнатуға 34,5 млн. теңге, барлығы 108,4 млн. теңгеге облыстық энергетика басқармасына бюджеттік өтінім тапсырылған.Құрылысы қарқынды Шиелі&nbsp;Құрылыс сапасын дамыту, құрылыс өнеркәсібі өнімддерінің қауіпсіздігі мен сапасын арттыру бүгінгі өркениет заманындағы дамыған мемлекеттердңі экономикалық және саяси міндеттерінің басты бағыттарының бірі саналады. Жалпы алғанда, құрылыс кешені ел экономикасына, оның ішінде тұрғындардың әлеуетінің артуына ықпал етеді. Бүгінде ауданның қай түкпіріне барсаңыз да жаңадан салынып жатқан нысанды көресіз. Бұл деген сөз өңірдегі құрылыстың қарқын алғанын көрсетеді. Мәселен, «Ауыл-Ел бесігі» мемлекеттік бағдарламасы аясында құрылысы 2022 жылы басталған Шиелі кентіндегі дене шынықтыру-сауықтыру кешенінің өтпелі құрылысына жалпы 583,0 млн. теңге қаралған. (ҰҚ-528,2 млн.тг ОБ-55,2 млн.тг) 2023 жылға құрылысын аяқтауға облыстық бюджеттен 55,2 млн. теңге бөлініп, құрылыс жұмыстарының 94 пайызы орындалды.Сонымен қатар, Шиелі кенті Көкшоқы шағын ауданындағы спорт кешенінің ашық алаңын күрделі жөндеуге &nbsp;224,6 млн. теңге, аудандық бюджеттен қоса қаржыландыруға 11,9 млн. теңге бөлініп құрылыс жұмыстары жүргізілуде. (Маусым айында пайдалануға беру жоспарлануда). Шиелі кентіндегі жобалық құны 808 млн. теңге болатын 10/0,4кВ электр желілерін реконструкциялауға 100 млн. теңге қаржы бөлініп жұмыстары басталуда.Шиелі ауданындағы халықтың әлеуметтік жағынан әлсіз топтарына арналған 50 тұрғын үйді сатып алуға 528 млн. теңге қаралды. (РБ-480 млн. тг, АБ- 48 млн. тг.)&nbsp;Тұрғындарды баспанамен қамту мақсатында ауданымызда «Нұрлы жер» мемлекеттік тұрғын үй құрылысы бағдарламасы аясында 833,2 млн. теңге қаржы (ҰҚ-519.4, РБ-65.4, ОБ-135.4, ЖБ-113) бөлініп, Көкшоқы мөлтек ауданында 18 пәтерлі 4 тұрғын үй құрылысы жүруде. Ағымдағы жылдың тамыз айына 72 отбасына пәтер кілті табысталатын болады.Жол азабын жүрген білер&nbsp;Тоғыз жолдың торабында орналасқан ауданда 80 км республикалық, 98 км облыстық, 145,4 км аудандық барлығы 323,4 км автомобиль жолы бар. Қазіргі таңда аудан тұрғындары қиындық көрмес үшін жол жөндеу жұмыстары жүйелі қолға алынған. Шиелі кенті және елді мекендердегі көшелердің саны 401, ұзындығы 395,38 км құрайды. Оның 198,69 км асфальтты, 145,69 км-қиыршықтасты, 51 км-топырақты. Жақсы және қанағаттанарлық жағдайдағы жолдар 88 пайыз).Қазіргі таңда Ә.Тәжібаев ауылына кіре беріс орналасқан көпірді күрделі жөндеуге 305,3 млн теңге бөлініп, құрылыс жұмыстары аяқталды. (маусым айында пайдалануға беріледі). Сондай-ақ "Ауыл – ел бесігі" мемлекеттік бағдарламасы аясында &nbsp;Шиелі кенті және елді мекендердің 36 көшесін орташа жөндеуге 565,0 млн. теңге қаржы бөлінді.

Тірлігі төрге, өндірісі өрге озған өрісті өлке Шиелі

<a href="https://kyzylorda-news.kz/">Kyzylorda-news.kz.</a> Қазақстан Жазушылар және Журналистер одағының мүшесі, Шиелі ауданының «Құрметті азаматы», белгілі сатирик, жиырма жылдан аса облыстық «Сыр бойы» газетінің Шиелі, Жаңақорған аудандарындағы меншікті тілшісі болған, бүгінде «Шарайна-Сейхун» басылымының директор-редакторы Нұрмахан Елтай биыл жетпістің желкеніне жетіп отыр. Осыған орай аудандық орталық кітапханада тағылымға толы кездесу кеші өтті.Мерейлі кешке аудандық ардагерлер кеңесінің төрағасы Өркен Исмаил, ақсақалдар кеңесінің төрағасы Исабек Байкенжеев, аудандық «Өскен Өңір» газетінің бас редакторы Нұрболат Пірімбет, аудандық қоғамдық даму бөлімінің басшысы Кенжехан Есенбаев, аудандық мәдениет және спорт бөлімінің басшысы Аруна Өркенқызы, зиялы қауым өкілдері, жас жеткіншектермен бірге БАҚ өкілдері қатысты.Шара барысында аудан әкімінің орынбасары Алмат Алдабергенов сөз алып, жетпістің желкеніне шыққан Нұрмахан Елтайды мерейлі мерекесімен &nbsp;және «Шарайна-Сейхун» газетінің 10 жылдығымен құттықтап, дәстүрге сай сый-құрмет көрсетіп, қара домбыраны сыйға тартып:<blockquote>– Нұрмахан ағамызды өздеріңіз өте жақсы білесіздер. Аймаққа белгілі журналист, жазушы. Облыстық «Сыр бойы» газетінде талай жыл қызмет атқарып, газеттің сатиралық беттеріне редакторлық етті. «Қос тойың қабат болсын, екі дүниең абат болсын» деп ата-бабамыз айтпақшы, бүгінде ағамыз басқарып отырған «Шарайна-Сейхун» газетінің құрылғанына да 10 жыл толып, қос қуанышты қатар атап өткелі отырмыз. Газет осы жылдар ішінде Нұрмахан ағамыздың біліктілігінің арқасында белді басылымдармен иық тіресіп, өндірісі-өркенді, әлеуметтік-экономикалық дамудың қарқынды жолына түскен Шиелі ауданының жағымды жаңалықтарының жаршысына айналып, билік пен бұқара арасындағы алтын көпір ретінде көпшіліктің жүрегіне жол таба алды, – деді.</blockquote>Одан кейін сөз алған аудандық ардагерлер кеңесінің төрағасы Өркен Исмаилда өзінің ыстық лебіз тілегін білдіріп, жазушының өмірі жайлы сыр шертіп, ұйымдастырылыған игі шараға мұрындық болған аудан әкімдігіне алғысын жеткізіп:<blockquote>– Мен Нұрмаханды жақсы білемін. Өйткені, екеуміз әскер қатарында бірге болдық. Жалпы, Нұрмахан жайлы ауыз толтырып айтарлық әңгіме де, естелік те жетерлік. Шиелі ауданы бойынша жалғыз жазушылар одағының мүшесі болу да үлкен құрмет. Нұрекең осы бір абыройға өзінің білімі мен біліктілігінің және еңбекқорлығының арқасында осындай дәрежеге жетті. Шалқар шабытыңыз теңіздей шалқып, қаламыңыздың қарымы қайтпай, танымдық туындыларыңыз көптеп жарық көре берсін, – деді.</blockquote>Шарада аудандық орталық кітапхана қызметшісі Нұрмахан Елтайдың жарық көрген кітаптары мен шығарма-әңгімелерін таныстырса, Алғабас ауылдық округінің кітапхана қызметкері ән айтып, жиналған көрермендерің ыстық ықыласына бөленді. Сонымен қатар жас жеткіншектер Нұрмахан Елтайға «Бала күніңізде кітап құмар болдыңыз ба?», «Қазіргі уақытта жиі кітап оқисыз ба?», «Алдағы уақытта тағы кітап жазу ойыңызда бар ма?» деген түрлі сұрақтар қойды. Осы қойылған сауалдардың ішінде «Бала күніңізде болашақта қандай маман иесі» болғыңыз келді, деген сұраққа:<blockquote>– Бала кезімнен әскери адам болуды армандайтын едім. Осыған іштей дайындалып жүретінмін. Сол кездегі ұғыммен әскери болу – үлкен жауапкершілік жүктейтін құрметті мамандық болатын. Сол үрдіспен өзім қай салада да еңбек етсем де, тиянақтылық пен жауапкершілікті бірінші кезекке қоямын. Сондықтан мақала жазсам да, әдеби дүние тудырсам да шабыт іздемеймін, «өзім ойлап, қолға алынған шаруаны бітіруім керек» деген сеніммен қолыма қаламымды алсам, шабыт өзі келеді. Шаруашылықта комсомол-жастар бригадасының бригадирі кезімде аудандық газетте «Көкине» атты сатиралық беттің жүргізушісі болдым. Ауылдан жиырма шақырым жердегі егіс алқабынан атпен кештетіп келіп, үйде түнімен әзіл-сықақтарымды дайындап, таңертеңгі автобуспен жүз шақырым жол жүріп, аудандық газеттің редакциясына тапсырып кететінмін. Осылайша шығармашылықтан да, шаруашылықтан да қол үзген емеспін. Тағы айта кетерлігі екі мыңыншы жылдары «Хан алшы» атты аймақтық газет шығарған да кездерім болды. Қазіргі «Шарайна-Сейхун» газеті сол жобалардың жалғасы, – деп жауап қайтарды.</blockquote>Айта кетейік, Нұрмахан Елтай «Жайма базар», «Қатырамыз», «Сүйінші дайындаңыздар», «Үшінші тайм», «Ауылдың айтқыштары», «Сыпыра сыйлық», «Көкиненің көзі» атты кітаптарының авторы. Сонымен қатар сатиралық әңгімесімен қоғамдағы келеңсіз олқылықтарды астарлы әзілмен өрнектеген сын туындылары бар сатирик 1000-нан астам очерк пен мақаланың авторы. Қазақта «Көңілде жатқан кіріңді, оттай ыстық сөз шаяр» деп тегін айтпаса керек-ті. Қаламы қуатты қаламгер сықақ әңгіме жазғанда оқиғасы да шындық, әр сөзі сатираға құрылып маңызын арттыра түседі.

Қаламы қарымды қаламгер 70 жаста

<a href="https://kyzylorda-news.kz/">Kyzylorda-news.kz.</a> Аранды ауылдық округінің орталығы Қожабақы ауылы Қазалы ауданының орталығы Әйтеке би кентінен 45 шақырым, Сырдария өзенінің сол жағалауынан 15 шақырым қашықтықта орналасқан.&nbsp;Аранды ауылдық округіне екі орта мектеп: Қожабақы ауылында №25 мектеп, Аранды ауылында №97 мектеп; бір балалар бақшасы, бір аурухана, бір фельдшерлік пункт, бір Мәдениет үйі, бір клуб, екі кітапхана, бір пошта-байланыс бөлімшесі, бір тігін шеберханасы, «Агро-Өркен» жауапкершілігі шектеулі серіктестігі, тоғыз шаруа қожалығы және «Кішкене Ата» &nbsp;өндірістік кооперативі қамтылған.Қожабақы ауылынан сегіз шақырым жерде Аранды қырдың үстінде Орақ батыр &nbsp;белгісі, алты шақырым жерде Келімбет тамы кесенесі (Үшүйтам), он бес- отыз бес шақырым аралықтарын қамтитын жерде Шанжар, Күйік қала және Жаман көл, Ақшүнгүл, Қара көл, Өтеген шүңгүл, Тал шүңгүл, Қулы, Сатыбалды, Бердібек сияқты жер аттары бар. Олардың әр қайсысы бір-бір тарих.Аранды ауылдық кеңесі 1923 жылы құрылған бұрынғы №9 ауылдық кеңестің негізінде 1949 жылы құрылды. Ауылдық кеңесті басқарған азаматтар туралы нақты мәліметтер табылмады, білетін азаматтар қазіргі уақытта арамызда жоқ, дүниеден озған. Соғыстан кейінгі жылдары ауылдық кеңестің төрайымы Мәуе Еселбаева, одан кейінгі жылдарда төрағасы Емешов Темірбай болды. Аранды ауылдық кеңесіне Өркендеу, &nbsp;Бірлік, Қожабақы, Аранды елді мекендері қараған. 1976 жылы Өркендеу ауылы өз алдына ауылдық кеңес болып құрылса, ал 2005 жылдан бастап, Бірлік елді мекені өз алдына округ болып құрылды. Аранды ауылдық кеңесін 1963-1985 жылдары Емешов Темірбай, 1985-1994 жылдары Есетов Аманкелді; 1994 жылы Аранды ауылдық кеңесі Аранды ауылдық округі болып құрылды. 1994-1998 жылдары ауылдық округ әкімі болып, Жұмағамбет Рахманберген, 1998-1999 жылдар аралығында Ахмет Шаттық, 1999 жылдан-2013 жылға дейін ауылдық округ әкімі Аманов Толықбол, 2013 жылдан бастап, Қуанғали Қожахмет ауылдық округі әкімі қызметін &nbsp;атқарып келеді.&nbsp;Аранды ауылдық округінің қазіргі орталығы Қожабақы ауылы 1921 жылы Қожабақы артелі болып құрылған. Осы артелдің негізінде 1947 жылы М.Горький атындағы колхоз құрылған. 1949 жылы Фрунзе колхозы мен М.Горький атындағы колхоздары бірігіп орталығы М.Горький колхозы болып құрылды. Сол 1949 жылы «Социализм» және «Жантақты» колхоздары бірігіп А.А.Жданов атындағы колхоз болды. Ал 1958 жылы колхоздарды ірілендіру саясатына байланысты М. Горький және Жданов колхоздары бірігіп, орталығы А.А.Жданов атындағы колхоз болды.&nbsp;Ф.Энгельс атындағы кеңшар 1963 жылы ақпан айында Қаз ССР Министрлер кеңесінің қаулысымен Қазалы ауданының Жданов, Жанкент және Ф.Энгельс атындағы колхоздарының негізінде қаракөл қой совхозы болып құрылды. Кеңшарда екі қой, бір сиыр фермасы 350 гектар егіс көлемі болды. &nbsp;Кеңшарға бірінші директор болып аудандық кеңес атқару комитеті төрағасының орынбасары Нағашыбай Қожабаев тағайындалды. Бұл азамат директор болып, 1964 жылдың маусым айына дейін қызмет жасады.1964 жылдың шілде айында аудандық партия комитетінің инспекторы болып қызмет істейтін, мамандығы зоотехник, Есенәлі Құлахметов совхозға директор болып, 1968 жылдың желтоқсан айына дейін жұмыс атқарды. Бұл азамат қызмет жасаған кезде ауыл шаруашылық дақылдарының көлемі ұлғайып, 1000 гектарға дейін өсті. Кеңшар орталығы ұлғайып, клуб қысы-жазы кино көрсететін театр, 50 орындық асханасымен дүкен, 450 орындық орта мектеп, орталықта жұмысшы қызметкерлерге арнап, көптеген тұрғын үйлер салынды. &nbsp;1968 жылдың аяғында Ф.Энгельс атындағы &nbsp;совхоздан бөлініп, Өркендеу совхозы құрылды.&nbsp;Совхозды мамандандыру есебінен негізгі күріш, қосалқы шаруашылық есебінде ірі қара малы көрші &nbsp;совхоздардан &nbsp;алынды. Қой, жылқы, түйе малдары көрші Бозкөл, Қызылқұм совхоздарына берілді. Бұл кезеңде 1968 жылдың желтоқсан айынан 1976 жылдың мамыр айына дейін аудандық ауыл шаруашылығы басқармасында бас инженер-механик болып қызмет атқарған Жарылқасын Шарипов директор болып жұмыс істеді. Бұл азамат қызмет атқарған кезде егіс көлемі 2000 гектарға дейін ұлғайып, күріш өсіруде аудандағы ХХII- партсъезд совхозынан кейінгі күріш фабрикасы болып есептелді. Күріштен мол өнім алып, совхоз экономикасы өсіп, пайдалы шаруашылық болды. Совхоз жұмысшы қызметкерлерінің тұрмыс жағдайлары көтеріліп, 1972 жылға дейін ауылда 19 жеңіл автокөлік, 25 мотоцикл болды. 1970 жылы совхоз мемлекетке 65000 центнер күріш тапсырып, ауданда бірінші болып жоспарды асыра орындады. Осы көрсеткіші үшін совхоз директоры Жарылқасын Шарипов, күрішші Қуаңбай Рахметов, мал азығын дайындайтын бригадир Қаразым Есенаманов, жылқышы Ашықбаев Қуаныш «Еңбек қызыл ту» орденімен, Қанимағамбетов Ұзақ «Ленин» орденімен наградталды. Онан басқа бес адам әртүрлі орден-медалдармен марапатталды. Совхозға ауыр техникалар К-700 тракторлары, жаңа комбайндар алынды. Шаруашылық жоңышқа егісінен тұқым өндіріп аудан шаруашылықтарын жоңышқа тұқымдарымен қамтамасыз етуге қол жеткізді, бұл жұмысты агроном Нұрмахан Айтжанов басқарды. Совхозды 1976 жылдың мамыр айынан 1980 жылға дейін аудандағы ХХII- партсъезд совхозында директор болып қызмет атқарған Бүркіт Жөкелов басқарды.&nbsp;Совхозды 1980 жылдан Ермағамбет Жұбатқанов 1988 жылға дейін басқарды. Бұдан кейін совхозды 1988 жылдан 1991 жылға дейін директор болып Рахманберген Жұмағамбетов қызмет атқарды. Бұл кезде совхоз көлемінде ірі қара малды асылдандыру жұмыстары жүргізіліп, совхоз көлемінде үш &nbsp;стандартты коровник салынып, сүт, ет өндіру ұлғайды, ірі қарадан төл алудан сол кездегі &nbsp;бас зоотехник Толықбол Аманов 2 рет аудан, 1 рет облыс жеңімпазы болды. &nbsp;1991 жылдан-1995 жылдар арасында совхозда директор болып Оңдасын Жарасов қызмет атқарды. 1995 жылдан-1997 жылдың маусым айына дейін совхозда бас агроном болған Баймұрат Теміров директор болып қызмет істеді. 1997 жылдың маусым айында совхоз тарап, бес шаруа қожалығына бөлінді. Оларды «Асан» шаруа қожалығы (жетекшісі-Тұлғабек Әбдіров), &nbsp;«Шебер» шаруа қожалығы (жетекшісі- Муса Әлиев), &nbsp;«Қожабақы» шаруа қожалығы (жетекшісі- Баймұрат Теміров), &nbsp;«Аранды» шаруа қожалығы (жетекшісі- Әбілғазы Томаев), &nbsp;«Әділет» шаруа қожалығы (жетекшісі- Толықбол Аманов) басқарды. 1999 жылы бұл шаруа қожалықтары бірігіп, Акционерлік қоғам болып &nbsp;құрылып, оны Баймұрат Теміров, 2001 жылдан бастап Әнес Дидаров басқарды.&nbsp;2001 жылы Акционерлік қоғам тарап, «Агро-Өркен» жауапкершілігі шектеулі серіктестігі болып қайта құрылып, оның директоры болып Муса Әлиев, 2003 жылдың мамыр айынан бастап Нәби Әбдуов басқарса, 2009 жылдан бастап &nbsp;Мұса Әлиев басқарып келеді. 2009 жылы ауылға – «Агро-Өркен» жауапкершілігі шектеулі серіктестігіне аймаққа танымал азамат, жеке кәсіпкер Мерей Есхожаев демеуші- инвестор болып келді. Сол жылдан бастап, ауылдың әлеуметтік-экономикалық жағдайы қарқынды дами бастады. Серіктестік 2015 жылы 250 гектар жаңа жоңышқа, 353 гектар көне жоңышқа егіп, ал егілген 470 гектар күріштің әр гектарынан 45 центнерден өнім алды. &nbsp; 2016 жылы 600 гектар күріш, 238 гектар жаңа жоңышқа, 446 гектар көне жоңышқа барлығы 1284 гектар егіс егіліп, күтімге алынды. 5 ауыспалы егістікте 2341,7 гектар тегістелген жер егу кестесі (ротация) сақталына отырып, егілуде. Шаруашылықта 3 дана К-700, 3 дана Т-150, 8 дана МТЗ-80, 2 дана малютка-эксковатор тракторлары, 5 дана күріш комбайны, 1 дана «Магдон» күріш жаткасы және тағы басқа техникалар жұмыс істейді. 70 адам - ауыл тұрғыны жұмыспен қамтылған, науқан (жиын терім) кезеңінде жүзге дейін жергілікті жерден &nbsp;адам жұмысқа тартылады. «Агро-Өркен» ЖШС-і (ЖК М.Есхожаев, атқарушы директоры М.Алиев) ауылдағы әлеуметтік мекемелерге (балабақша, мектеп, мәдениет үйі, мешіт тағы басқа) және тұрмысы төмен отбасыларға үнемі демеушілік жасап келеді, мысалы орталықтағы «Ділімбет ишан» мешітіне жөндеу жұмыстары үшін 2015 жылы 500,0 мың теңге көлемінде тегін көмек берді. Биыл негізгі күріш дақылынан гектарына 43 центнерден алды.&nbsp;Қожабақы ауылдық ауруханасы 1966 жылы ашылды. Алғашқы бас дәрігер болып, 1966-1970 жылдары Мүбереков Тиыштық қызмет атқарды. &nbsp;Одан кейін 1970-1975 жылдары Шайыхов Сержан бас дәрігер &nbsp;қызметін атқарды. 1975-1979 жылдары &nbsp;Кәдірбаев &nbsp;Аманкелді, 1979-1983 &nbsp;жылдары &nbsp;Жолманов &nbsp;Дәулет &nbsp;бас дәрігерлері &nbsp;қызметтерін &nbsp;атқарды. &nbsp;Ал &nbsp;1984 жылдан &nbsp;2016 жылға дейін ҚР Денсаулық сақтау ісінің &nbsp;үздігі &nbsp;Махамбетияр &nbsp;Мирамхан &nbsp;Қожабақы &nbsp;ауылдық ауруханасының бас дәрігері; 2016 жылдың басынан бастап, білікті педиатр Алия Қартабаева &nbsp;дәрігерлік амбулатория меңгерушісі &nbsp;қызметін атқарып &nbsp;келеді. &nbsp;Осы ауылдық ауруханаға қарасты Аранды, Бірлік елді мекеніндерінде фельдшерлік пункттер жұмыс істейді. Аурухана бойынша 1 жоғары білімді дәрігер, 17 орта буынды мейіркештер халыққа қызмет жасайды. &nbsp;Қожабақы ауылдық мәдениет үйі алғаш 1921 жылы «Қызыл отау» болып құрылып, оны кейін өңірге танымал халық ақыны &nbsp;Байназар Өтепұлы басқарған. 1967 жылы ауылдық клуб болып ашылып, 1980 жылдан мәдениет үйі.&nbsp;Қожабақы ауылдық кітапханасы 1963 жылы ашылды. Алғашқыда кітап қоры 5800 дана, оқырмандар саны – 150 болды. Кітапханада 1963-1977 жылға дейін меңгеруші болып, Сарсенов Файзулла, 1977-1987 жылдар аралығында Сырлыбаева Әсемгүлдер жемісті жұмыс жасаса, ал Ілиясова Ләззат 1987 жылдан кітапханашы болып &nbsp;жұмыс істеп келеді. Осы жылдар ішінде оқырман мен кітапхана арасындағы байланыс жақсарды, кітап қоры – 11500 болса, оқырман саны – 750 адамға көбейіп, кітап берілімі – 14256 данаға өсті. Кітапханада өткізілетін мәдени көпшілік жұмыстардың түрлері көбейіп, түрлі іс-шаралар өткізіліп тұрады.Жастар ұйымының жетекшісі Тілуқабылов Нұрбол. Кеңес мүшелері және жастар ұйымы ауылдың ауызбіршілігін сақтауда, қоғамдық-саяси ахуалды тұрақты ұстауда табысты қызметтер атқарып келеді.Аранды ауылдық округіне Қожабақы және Аранды ауылдары қарайды. Жер көлемі-1838 гектар, тұрғын халық саны-2031 жан, отбасы саны-362. Оның ішінде Қожабақы ауылында-1548 жан, оның 751-сі әйел, кәмелетке толмаған бала-582 отбасы саны-284, &nbsp;Аранды ауылында-483 жан, оның 228 әйел, кәмелетке толмаған бала-194, отбасы саны-78.

Еңбекқор жандармен ерекшеленген Аранды

<a href="https://kyzylorda-news.kz/">Kyzylorda-news.kz.</a> Ұдайы өкпек желі соғып тұратын Қазалы халқы қай шаруаға да епті. Ештеңеден тайсалмастан кез келген істі тосырқамай ұршықша иіріп әкетеді. Кейбірі мемлекеттің қолдауымен кәсіп ашса, екіншілері аздан бастап өз күшімен кәсіпкерлікті дамытуда.&nbsp;Осындай әрбір еңбекке құштар жанның қызметі – тәуекелге бел буып жасалынатын экономикалық әрекет, тауарларды өндіру және сатудан, атқарылған жұмыстардан жүйелі пайда алуға бағытталған дербес кәсіптің қоғамға берері көп. Бірақ әр уақытта кәсіпкердің жұмсаған ақшасы өтелетініне, өндірілген тауар пайдамен сатылатындығына кепілдік болмайды. Осыған байланысты меншікті жартылай немесе толықтай жоғалту қаупі бар. Сондықтан қазалылықтар бар жиған-тергені мен басындағы баспанасын кепілге қойып, мемлекеттің демеуімен берілген несиені алуға тырысады.&nbsp;Ұзақ мерзімдік "Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған "Еңбек" мемлекеттік бағдарламасының үш бағыты бойынша бүгінгі күнге дейін біршама жұмыстар атқарылды. Бұл жобаның мақсаты айқын еді. Негізгі діттегені – халықты нәтижелі жұмыспен қамтуға жәрдемдесу және азаматтарды кәсіпкерлікке тарту болып табылады. Алғашқы бағыт бойынша қатысушыларды техникалық және кәсіптік біліммен және қысқа мерзімді кәсіптік даярлау курсымен 30 адам 3 айға оқумен қамтамасыз етілді. Солардың 23-і жұмысқа орналасса, 5-еуі қайтарымсыз грантпен кәсіп ашты.&nbsp;Жобаның келесі бағытында "Жаппай кәсіпкерлікті дамытуда" өткен жылы 85 өтініш берушіге қаражат беру көзделген. Бұл күні 121 адамға 455,5 миллион теңге қаржы берілді. Жаңа бизнес идеяларды жүзеге асыруға арналған мемлекеттік стартап алуға 661 қазалылыққа 583400 теңгеден ақша қаралды. Осы күні олар өтеусіз гранттың арқасында жеке істерін дөңгелетуде.&nbsp;Бағдарламаның үшінші бағытымен "Халықты жұмыспен қамтуға жәрдемдесу және еңбек ресурстарының ұтқырлығы арқылы еңбек нарығын дамыту" бойынша былтыр әлеуметтік жұмыс орнына 55 адам жіберілді. Осындай тиімді жобалардың игілігін көріп жүргендердің қатарында Ғабит Төремұратұлы да бар. Ол 5 жылдық мерзімге 2,7 миллион теңге "Ауылды қаржылай қолдау қорынан" алған болатын. Оған көпбалалы отбасы ретінде қор тарапынан жеңілдік қарастырылған. Соның ықпалымен қазір 4 процентпен мемлекеттен алған несиені уақытылы өтеп отыр. Қолға тиген қаражатқа Ғабит Қаражан ауласынан "Техникалық жөндеу орталығын" іске қосты. Қомақты ақшаға игілікті кәсібіне қажетті – автокөлікке арналған "Осциллограф" аппараты мен сканер жасайтын жабдыққа қол жеткізді. Қазір "Қаражан Ғабит" "ЖК" атауымен әртүрлі жағдайдағы көліктердің ақауын жөндейтін кәсібін қызу жүргізіп отыр. Кәсіпкердің сөзінше, күніге кем дегенде 3, кей кезде 5 көліктен құрастырады. Аса қымбат баға қоймай, шыққан шығын мен жұмыс көлеміне қарай пұлын да қоятын көрінеді.&nbsp;<blockquote>“Әркез қандай болмасын жұмыспен айналысқанымда шүкірлік айтудан жалыққан емеспін. Бала кезден ешқандай ауыр істен бас тартпайтынмын. Әке, аға-бауырларымның барлығы көлікті тізгіндеген нағыз мамандар. Солардың жанында жүріп мен де машина айдауға құмарттым. Бұл кезге дейін түрлі мекемеде көлік жүргізіп, маршрутта болдым, такси қызметімен айналысып, халықты діттеген жеріне тасыдым. Қай жерде еңбектенсем де, барлығы алғаусыз алғыстарын білдіретін. Осылайша, жеке кәсіппен айналысуға бел будым. Мемлекеттің қолдауына разымын. Сондықтан мұндай мүмкіндікті оңтайлы қолданған дұрыс деп санаймын”, – дейді іскер азамат.&nbsp;</blockquote>Еңбекқор жан "Бизнес бастау" оқу курсы бойынша білімін 1 айда жетілдіреді. Онда ол істі дамыту жолында әлеуметтік желіні қолдану әдісі мен салықты жүргізу және құжаттарды сауатты дайындау ақпаратына қанықты. Мұндай ілімнің арқасында алдағы уақытта 1 адамды жұмыспен қамтуды ойластырып жүр. Сонымен бірге, ісі оңға басып, Ғабиттің алтын қолына жүгінушілер қатары көбейгенде бұдан да үлкен орталық жасауды діттеп отыр.&nbsp;Бүгінде Ғабит жан жары Ақсәулемен бірге – Ақбота, Еркін, Аяжан, Әсемай, Айзере және Ерхан есімді ұл-қыз тәрбиелеп отыр.

Қазалы: Берекелі бағдарлама

Басты бағыт – экономиканы әртараптандыру

<a href="https://www.novosel-s.ru/kommunalka">ФОТО</a><a href="https://kyzylorda-news.kz/">Kyzylorda-news.kz.</a> Ұлттық экономика министрі Әлібек Қуантыров "Тарифті инвестицияларға айырбастау" бағдарламасын іске асыру аясында коммуналдық қызметтердің тарифі орта есеппен қаншаға өсетінін айтты, деп хабарлайды <a href="https://sputnik.kz/">Sputnik Қазақстан</a>.Оның айтуынша, 2023 жылдың екінші тоқсанында министрлік биыл 1 шілдеден бастап тарифтер мен инвестициялық бағдарламаларды өзгертуге 212 өтінімді қысқа мерзімде бекіткен.<blockquote>"Нәтижесінде тұтынушылар мен кәсіпорындар мүддесінің теңгерімін ескере отырып, коммуналдық қызметтер тарифтерінің өзгеруі қалыпты болып, орташа есеппен 10-30% құрайды. Бұл ретте халықтың осал топтары коммуналдық төлемдер үшін шығындардың бір бөлігіне өтемақы беру есебінен әкімдіктердің коммуналдық қызметтерге ақы төлеу жөніндегі көмегіне сене алады", - деп мәлімдеді Қуантыров үкімет отырысында.</blockquote>Ол жылумен жабдықтауда желілердің тозу деңгейі жоғары қызыл аймақтағы кәсіпорындар үшін инвестиция тарту басым тәртіппен жүзеге асырылатынын атап өтті. Жылумен жабдықтау саласында 27 кәсіпорын бойынша тозу деңгейі 65%-тен асады, оның ішінде 24 кәсіпорын үшін инвестициялық бағдарламалар бекітілді. Аталған салаға биыл 112 млрд теңге инвестициялау жоспарда бар.<blockquote>"Биыл желілердің тозуы 58%-тен 55%-ке дейін төмендеп, 2024 жылы қызыл аймақтан 6 кәсіпорын шығады деп жоспарланып отыр. Екі бөлмелі пәтер үшін жылу бойынша орташа есеп 1 620 теңгеге немесе 20%-ке артады", - деді министр.</blockquote>Электрмен жабдықтау саласында 19 кәсіпорынның тозу деңгейі 70%-тен асады. Соның ішінде 16 кәсіпорын үшін инвестициялық бағдарламалар бекітілді. Аталған салаға осы жылы 92 млрд теңге инвестициялау жоспарда бар.<blockquote>"Биыл желілердің тозуы 64%-тен 62%-ке дейін төмендейді деп күтілуде. Орташа квитанция 660 теңгеге немесе 20%-ке ұлғаяды", деді ұлттық экономика министрі.</blockquote>Ал сумен жабдықтау саласында 15 кәсіпорынның тозу деңгейі 70%-тен асады, оның ішінде инвестициялық бағдарламалар 13 кәсіпорын үшін бекітілген. Аталған салаға осы жылы 29,5 млрд теңге инвестицияланады.Министрдің айтуынша, биыл желілердің тозуы 63%-тен 58%-ке дейін төмендеп, 2024 жылы қызыл аймақтан 8 кәсіпорын шығады деп жоспарлануда. Орташа квитанция 200 теңгеге немесе 25%-ке өседі.Су бұру саласында 26 кәсіпорынның тозу деңгейі 70%-тен асады, оның ішінде 23 кәсіпорын үшін инвестициялық бағдарламалар бекітілді. Бұл салаға 2023 жылы 15,3 млрд теңге инвестицияланады.Нәтижесінде желілердің тозуы 74%-тен 71%-ке дейін төмендеп, 2024 жылы қызыл аймақтан 3 кәсіпорын шығады. Екі бөлмелі пәтер үшін орташа есеп 220 теңгеге немесе 30%-ке ұлғаяды.<blockquote>"Осылайша, барлық коммуналдық қызмет бойынша орташа есептің ұлғаюы шамамен 3-4 мың теңгені құрайды", - деді Қуантыров.</blockquote>

Қазақстан және Қызылорда облысының жаңалықтары