<a href="https://kyzylorda-news.kz/ru">Kyzylorda-news.kz.</a> Елімізде «Жайлы мектеп» жобасының алғашқы жеңімпаздары белгілі болды. Қызылорда облысынан әзірге үш мектептің құрылысын салуға жеңімпаздар анықталды. Олар: «Алтын Айдарлы» ЖШС, «Аман-Құрылыс» ЖШС, «СМП-Қызылорда» ЖШС. Аталған құрылыс компаниялары 300, 600, 900 орындық мектептердің құрылысын жүргізеді.2025 жылға дейін елімізде 401 мектеп салынбақ. Оған республикалық бюджеттен 2,6 трлн теңге қаралған. Бұл жөнінде Қызылорда облысы кәсіпкерлер палатасының жанындағы Өнеркәсіп кеңесінің кезекті отырысында облыстық білім басқармасының бөлім басшысы Бақыт Дүйсенов айтты.<blockquote>«Алдағы 3 жылда біздің облыста 15100 орынға арналған заманауи 21 мектеп салынады деп жоспарланып отыр. Жобаның жалпы құны 100 млрд теңге. Қызылорда қаласында 8, Арал ауданында 4, Қазалыда 2, Қармақшыда 2, Жалағашта 1, Сырдарияда 1, Шиеліде 1 және Жаңақорған ауданында 2 мектеп бой көтереді. Биыл 10 мектептің құрылысы басталады. Барлығының жері рәсімделді. Сметалық құжаттары дайын», – деді Бақыт Дүйсенов.</blockquote>Облыстық білім басқармасының өкілі салынатын мектептердің ерекшелігі бастауыш және жоғары сынып оқушыларының мектеп ғимаратының жекелеген блоктарында оқитынында екенін айтты. Сондай-ақ бейнебақылау, дыбыстық дабыл секілді қауіпсіздікке арналған құрылғылар &nbsp;орнатылады, заманауи физика, химия, биология, робототехника кабинеттері болады. Сонымен қатар оқушыларға ыңғайлы болуы үшін трансформер-парталар қойылып, әр қабатта тынығу алаңдары қарастырылмақ.Отырыста кеңес мүшесі, «NP Consulting» ЖШС директоры Ғалым Прекешов құрылыс жұмыстарына қажет материалдар жергілікті өндірушілерден алынса деген ұсынысын білдірді.<blockquote>«Мектеп құрылысын салу барысында пайдаланылатын қанша құрылыс материалдары бар. Құрылыс кезінде жергілікті өндірушілердің өнімдеріне басымдық беріле ме? Берілсе ол жұмыс қалай ұйымдастырылады?», – деді Ғалым Прекешов.</blockquote>Кәсіпкердің сауалына «Samruk-Kazyna Construction» АҚ-ның аймақтағы өкілі Ерік Қонақбаев оның барлығы облыстық комиссия арқылы анықталатынын жеткізді.Кәсіпкерлер жауапты мемлекеттік орган және «Samruk-Kazyna Construction» өкілдерінен жергілікті өнімдерге, кәсіпкерлерге қойылатын талаптарды да сұрады.Кеңес отырысының қорытындысымен облыс әкімдігі жанындағы комиссияға ұсыныс жолданатын болды. Онда мектеп құрылысына қажет құрал-жабдықтар мен материалдарды таңдау барысында жергілікті өнім өндірушілерге басымдық беру механизмін арнайы құжатқа енгізу сұралады.Қызылордалық құрылысшылар аталған жобаға қатысты барлық мәселемен Кәсіпкерлер палатасының сарапшысы Айгерім Рахымжановаға хабарласа алады. Байланыс нөмірлері: +7 775 124 1740, +7 /7242/ 40-09-81 (ішкі 4316).

Жайлы мектеп: Қызылорда облысынан үш жеңімпаз анықталды

<a href="https://kyzylorda-news.kz/ru">Kyzylorda-news.kz.</a> Қызылордалық «Қайсар» оныншы турда Алматыда «Қайратты» 3:0 есебімен ұтты. Жанкүйерлерін ерекше қуантты. Нәтижесінде біріншіліктегі азулы команданың бірінен жеңісті жұлып алып, турнир кестесіндегі жағдайын жақсартты. Осылайша көш басында келе жатқан үздіктерді өкшелей түсті. Демек, «Қайсардың» осы қарқыны сақталса, жүлделі орындарға таласуға әбден болады.Алматылық клуб әрине, осал қарсылас емес. Команда негізінен өз түлектерінен құралған. Арасында тәжірибелі ойыншылар бар. Биыл біріншілікте тәп-тәуір ойын өрнегін көрсетіп келеді. Қазірге дейін бес мәрте жеңіске жетсе, үш мәрте тең түсіп, бір мәрте жеңілістің ащы дәмін татты. Ал кейінгі бес ойында үш рет жеңіп, екі тең нәтижеге қанағат білдірді. Сонан да қызылордалық жанкүйерлер үшін «Алматыдағы кездесу қалай болар екен?» деген ой көкейде тұрған еді.Мына бір дерекке көз сала кеткеніміз артық емес. Осы кезге дейін екі команда 64 мәрте кездессе, соның 36-ы «Қайраттың» басымдығымен аяқталған. Ал 13 кездесуде «Қайсар» жеңсе, 15-де тең нәтиже тіркелген.Сондай-ақ, бұған дейін жерлестеріміз осы қарсыласын оңтүстік астанада 2006 жылдың 25 қазанында 3:2 есебімен жеңген екен. Содан бері 16 жылдан астам уақыттағы 15 кездесудің 11-де алматылық ұжымның мерейі үстем болып, қалғанында тең түскен.Өткен жексенбіде болған ойында «Қайсар» футболшылары алғашқы минуттан алға ұмтылды. Нәтижесінде 10-минутта қызылордалық команда қорғаушысы Жоао Педро қақпаны дәл көздеді. Енді алаң иелері таразы басын теңестіруге ұмтылды. Ойлаған мақсатына жете алған жоқ. Есесіне өз айып алаңында 24, 45-минутта тәртіп бұзды. Төрешілер белгілеген пенальтиден «Қайсардың» жартылай қорғаушысы Дмитрий Бородин мүлт кеткен жоқ.Екінші кезеңде алматылық клуб гол соғуға тырысты. Оған қызылордалық футболшылар лайықты төтеп бере білді. Осылайша «Қайсар» қарсыласын тізе бүктіріп, үш ұпай&nbsp;&nbsp; олжалап қайтты. Турнир кестесінде 16 ұпаймен жетінші орынға жайғасты. Үшінші орында тұрған «Қызылжардан» небәрі алты ұпайға қалып тұр. Алдағы ойындарда жеңіске жетсе, оны қуып жетуі әбден мүмкін.Енді бірінші айналымның аяқталуына небәрі үш ойын қалды. Оның екеуін өз алаңында өткізеді. Алдымен 28 мамырда «Ақтөбені», 4 маусымда «Мақтаралды» қабылдаса, 24 маусымда сырт алаңда «Оқжетпеспен» күш сынасады.«Қайратпен» кездесуден кейін «Қайсардың» бас бапкері Виктор Кумыков «Жоспар бойынша ұпай алу негізгі міндетіміз болды. Екі команда да алаңда жақсы ойын көрсетті. «Қайсар» ойыншылары негізінен жасанды алаңда доп тебуге бейімделген. Сондықтан табиғи көгалда біршама қиындық туындайтыны рас. Дегенмен ол көп кедергісін келтірген жоқ. Әрине, көпшілік күтпеген есеп тіркелді. Футбол болғандықтан мұндай сәттер орын алып тұрады» деді.Оныншы турға шолу жасаған республикалық сайттың бірінде қызылордалық клубтың сәтті ойын көрсеткені айтылған. Бұл орайда қызылордалық қорғаушылардың сауатты ойын көрсете білгенін атап өту керек.

«Қайсар» «Қайраттан» басым түсті

Сыр еліндегі «Сәби үйі»:  Бала асырап алудың жолы қандай? 

<a href="https://kyzylorda-news.kz/ru">Kyzylorda-news.kz.</a>&nbsp; Бүгінгі уақытта шығармашылыққа жаны құмар жастар жетерлік. Ондай жастарға &nbsp;шығармашылық қабілетін шыңдау мақсатында мемлекет тарапынан да біршама қолдау көрсетіліп жүргені де белгілі. Осы тұста таяуда «Бояулар құпиясы» жас суретшілердің республикалық байқауының облыстық кезеңінде «Таланттар палитрасы» номинациясының «Авангард және эксперименттік кескіндеме» бағыты бойынша қатысқан №220 мектептің 11 сынып оқушысы Айтолқын Жайшылық жүлделі І орын иеленді.<blockquote>Балалық шағымда нағашы атамның ауылына жаз сайын қызық көріп баратынмын. Жұрт секілді құмға аунап, асыр салып ойнау үшін ғана емес, сондай-ақ атамның жаңа туындыларымен танысып, қолөнерге, сурет өнеріне деген қызығушылығымды арттыру мақсатында баратынмын. Бойымдағы талант, сурет салуға деген құлшыныс нағашы жақтан тарады десем артық айтпағаным болар. Бастауыш сыныпты бітіріп, 5-сыныпқа қадам басқан уақыттан бастап қарандашпен портреттік жанрда суреттер салып, жас суретші ретінде кішігірім конкурстар мен мектепішілік іс-шараларға қатысып, шыңдалуды жөн көрдім. Әрине, тез арада жүлдегерлер қатарынан көріне қойғаным жоқ, сүрінген сәттер де болды. Бертін келе, Мариямкүл апайымның жетекшілігімен қатысқан сайыстардан жүлдесіз қайтпай, одан әрі аталған салаға деген құлшыныс артып, мотивация алдым. Сол үшін бейнелеу пәнінің мұғалімі Нарегеева Мариямкүл ұстазыма шын жүректен алғысымды білдіремін. Бойымдағы потенциалды байқап, әрқашан жетелеген осы кісі. Уақыт өте келе суретшілікке тек қана әуесқой көзқараста ғана емес профессионалды түрде қарауды құп көрдім. Еуропадан шыққан әйгілі суретші, мүсіншілердің еңбектерімен танысып, символизм жөнінде іздене бастадым. 10-сынып оқып жүрген сәтте ұстазымнан ерекше ұсыныс түсті. Облыстық байқауда Авангард жанрында сурет салу бақыты бұйырды. Дарын өнер мектебінің ұйымдастыруымен өткен шарада жүлделі бірінші орынды иелендім. Аталған жанрда еңбегім еленгеннен соң әрі қарай пост модернистік бағытты зерттеуді жөн көрдім. Әлемнің ең бай әрі құпия суретшісі атанған испаниялық Пабло Пикассоның туындыларымен танысып, Ван Гог секілді картинаны табиғатпен байланыстыра отырып салып, философиялық тұрғыда дүниетанымымды кеңейтуді алдыма мақсат тұттым,– дейді жас жеңімпаз.</blockquote>Сонымен бірге Айтолқын Жайшылық еліміздің сурет өнерінің дамуына үлес қосқысы келетіндігін жеткізіп, өз шығармашылығын әрі қарай дамытқысы келетіндігін де айтты. Сондай-ақ орын алып жатқан түрлі мәселелерді де өз өнері арқылы бейнелегісі келетіндігін тілге тиек етті.<blockquote>Еліміздің бірден-бір ауқымды мәселелерінің бірі арт индустрияның бір қалыпта қалуы, креативтік идеялардың жетіспеушілігі. Алдағы уақытта аталған проблеманы шешу үшін барымды салсам ба деймін. Арт саласында қызмет атқарып, тек қана қылқаламмен ғана емес, заманауи бағытта графикалық дизайнмен айналысқым келеді. Елімізде орын алып жатқан әйел теңсіздігі, консервативтік көзқарастың белең алуы сынды тақыраптарды символикалық түрде өнер саласымен байланыстыра отырып жеткізсем бе деген ниеттемін,–деді Айтолқын алдағы жоспарларымен бөлісе отырып.</blockquote>Ертеден келе жатқан сурет өнері өз құндылығы мен қоғамға қажеттілігін жоғалтқан емес. Ал шығармашылықты сүйетін Айтолқындай жастар бар кезде сурет өнері әрі қарай да дами берері анық.

Аралдық жас суретші республикалық байқауға жолдама алды

<a href="https://kyzylorda-news.kz/">Kyzylorda-news.kz.</a>&nbsp; &nbsp;Бүгін облыс әкімінің міндетін атқарушы Серік Қожаниязовтың төрағалығымен өткен мәжілісте Қызылорда облысында «Үлгілі елді мекен» жобасын өткізу және ұйымдастыру барысы, 1 наурыздан бері облыс көлемінде жүзеге асып жатқан жобалар талқыланды.<blockquote>«Өздеріңізге белгілі, Мемлекет басшысы Қасым-Жомарт Кемелұлы биылғы 19 сәуірде өткен еліміздің әлеуметтік-экономикалық даму мәселелері жөніндегі кеңейтілген кеңесте «Әлеуметтік, инженерлік инфрақұрылымды дамыту және жолдарды жөндеу арқылы ауылдың тұрмыс сапасын жақсарту – әкімдердің басты міндеті. Ауыл тұрғындары таза сумен және тұрақты электр қуатымен толық қамтамасыз етілуге тиіс» деген болатын. Ауылдық аумақтарды дамыту және тиімділігін арттыру, сондай-ақ ауылдық жерлерде өмір сүру сапасын жақсарту бағытында қолға алынған жұмыстарды сапалы жүзеге асыруымыз керек», - деді Серік Салауатұлы.</blockquote>Президент тапсырмасын іске асыру, облыс әкімінің бастамасымен елді мекендерді тазалыққа және көркейту-көгалдандыруға ынталандыру мақсатында «Үлгілі елді мекен» конкурсы жарияланып, ережесі бекітілді.Облыстық табиғи ресурстар және табиғат пайдалануды реттеу басқармасының басшысы Марат Құрманбаев конкурсқа дайындық барысын баяндады. Конкурс ережесіне сәйкес 1 маусымға дейін бірінші кезең аяқталып, облыстық сарапшылық комиссия қарауына ұсынылуы тиіс. Дегенмен, қазіргі таңда қала, аудан әкімдіктерінің ұсынған құжаттары талапқа сай келмейтіні анықталды. Осыған байланысты, қала және аудан әкімдеріне көрсетілген ескертпелер мен кемшіліктерді жойып, облыстық табиғи ресурстар және табиғат пайдалануды реттеу басқармасына қайта ұсыну тапсырылды.Күн тәртібіндегі екінші мәселе бойынша облыстық мемлекеттік сатып алу басқармасының басшысы Бауыржан Шәменов пен қала, аудан әкімдері атқарылған жұмыстарды баяндады.Жиын қорытындысымен қала және аудан әкімдеріне, тиісті басқарма басшыларына жүзеге асырылып жатқан жобалардың сапасына аса мән беру міндеті жүктелді. Сонымен қатар жобалардың мерзімінде пайдалануға берілуін қамтамасыз ету керек. Облыстық мемлекеттік сатып алу басқармасы конкурстарды уақытылы жариялау үшін тиісті техникалық ерекшеліктерді сапалы әзірлеп, мемлекеттік сатып алу жоспарларына сәйкес өтінімдерді мерзімінде ұсынуы тиіс. Оған қоса мердігер мекемелердің жұмысын қатаң қадағалау тапсырылды.<figure class="image"><img src="https://knadmin.beoblood.kz/uploads/348848510_906369923770517_1364462375690528193_n_4fb03375b6.jpg" alt="348848510_906369923770517_1364462375690528193_n.jpg"></figure>&nbsp;<figure class="image"><img src="https://knadmin.beoblood.kz/uploads/348825552_260681653142366_8925610054726083364_n_a9075ca6c9.jpg" alt="348825552_260681653142366_8925610054726083364_n.jpg"></figure>

Қызылордада «Үлгілі елді мекен» жобасын өткізу барысы талқыланды

<a href="https://kyzylorda-news.kz/">Kyzylorda-news.kz.</a> Бүгінде талантын шыңдап, табыстың көзін тауып отырған жандар бар. Олар өздерінің бойына дарыған ерекше қабілетінің арқасында ерекше кәсіп түрін дамытып, жұртшылық талғамынан шығатын, халық тұрмысына қажетті бұйымдар жасайды. Қызылжар ауылының тұрғыны Әсет Нағашыбаев – ағаш шебері, ол өзінің ағаштардан түрлі бұйымдар жасайтын ерекше қабілетінің арқасында бүгінгі күні мол табысқа кенеліп отырған кәсіпкер.Қарапайым ауыл баласы Әсет өз бойындағы шығармашылық қабілетін шыңдады. Нағашыларынан бойға дарыған қасиетін одан әрі дамытуды мақсат еткен ол «ағаштарды көркемдеп өңдеу» мамандығы бойынша жоғары оқу орнын тәмамдаған. Ағаш өңдеудің барлық методикасын меңгерген ол ауылға келген соң жұмыссыз қалам деп әсте алаңдамады.<blockquote>&nbsp;Ел іші тегіс таныс. Ең бірінші ауылдастарым менің үйге қажетті ағаштан жасаған түрлі заттарымды көріп, қызығушылық танытып, тапсырыс бере бастады. Алғашында қалай болар екен деп жүрексінгенім рас. Дегенмен өзгенің сенімі мен талғамынан шығу оңай емес. Бастапқы тапсырыстарым ойдағыдай шыға бастаған соң, тапсырыс берушілер де көбейді. Стол, нан тақтай, өзге де ас үй қажетін өтейтін бұйымдар жасап бастады, – деген Әсет кәсіпкерлікке қалай келгені туралы айтып берді.</blockquote>Жұмыстары жүйелі жүре бастаған соң, енді жаңа туынды жасауға бекінеді. Сөйтіп жиналмалы стол жасауды қолға алады. Бұған қоса Әсеттің ағаш бетіне шеге мен жіпті пайдалана отырып, түрлі өрнек салатын қабілеті тағы бар. Аудан көлемінде таныла бастаған ол өзінің осы талантын кәсібіне айналдырады. Бірде Қызылорда облыстық жастар саясаты мəселелері басқармасының əлеуметтік жобасы аясында 2020 жыл кəсіпкерлік саланы дамыту мен бизнес əлеуетті арттыру мақсатында жастарға арналған "Kyzylorda Business Hub" облыстық Start Up жобалар байқауы өтетіні туралы естиді. Әсет көп ойланбастан &nbsp;4 кезеңнен тұратын байқауға қатысуды жөн деп табады. Алғашқы аймақтық кезеңдерде үздік шыққан талантты жас жиналмалы ас столдарын жасау жобасымен 250 мың теңгелік грантты жеңіп алды.<blockquote>&nbsp;Жобаға қатысу арқылы көптеген талантты жігіттермен таныстым. Өзіме үлкен мотивация болды. Жаңа тынысым ашылды деп айтсам да болады. Алдағы уақытта осы кәсібімді одан әрі дамытып, үлкен цех ашуды жоспарлап отырмын,– деді.</blockquote>Әсет &nbsp;– еңбекқор жігіт. Жалқаулыққа жаны қас ол өзінің қатарластарына үлгі. Аудан орталығынан шалғай ауылда болса да кәсібін дөңгелетіп, табыс тауып отыр. Ол шын еңбектенемін деген адамға қазір жұмыс көп дейді. Және мемлекет тарпынан да қолдау жоғары екендігін айтады.<blockquote>&nbsp;Бізге өзіміздің қиялымызды дамытып, ойымызды жүзеге асыруға мемлекет тарапынан мол мүмкіндіктер жасалып отыр. Тек соны тиімді пайдалана алсақ болғаны. Қазір әлеуметтік желінің үлкен күшке айналған шағында кәсіппен айналысу тіпті оңай бола түсті. Ешқайда бармай-ақ, &nbsp;үйде отырып заттарыңды желі арқылы сатуға да болады,– дейді ол.</blockquote>Шынымен де ел арасынан небір жаңа кәсіп түрлері мен тың жобалар шығуда. Мұның бәрі ізденімпаз жастардың еңбегінің жемісі. Әсет те өзінің талантымен ұштасқан кәсібінің көкжиегін кеңітіп, үлкен белестерді бағындыруды мақсат еткен жан екендігін танытты.

Қайтарымсыз гранттың қайырын көрген кәсіпкер         

<a href="https://kyzylorda-news.kz/">Kyzylorda-news.kz.</a> Қала іргесіндегі Тасбөгет кентінде де атқарылып жатқан жұмыстар аз емес. &nbsp;Былтыр басталған жұмыстар биыл оң нәтижемен жалғасын тауып отыр. &nbsp;Өткен жылы Тасбөгет кенті әкімінің аппаратына «Инвестиция тартуда нәтижелі көрсеткіштерге қол жеткізгені үшін» аталымы табысталған болатын.&nbsp;Тасбөгет кентінің әкімі Семсер Сыздықовтың айтуынша, кенттің дамуына ірі кәсіпкерлер де өздерінің қомақты &nbsp;үлесін қосуда. Жыл басынан бері, кент тайқазанына кәсіпкерлер тарапынан 2,6 миллиард теңгеден астам инвестиция құйылған. Бүгінде 100 миллион теңге қаражатқа саябақ жанынан биометриялық зертхана салынуда, &nbsp;300 миллион теңгеге кенттегі Е.Бозғұлов көшесінің бойынан жаңа сауда кешені салынып жатыр. Ғимаратта шағын маркет, монша, көлік жуу орталығы, дәріхана және шаштараз орналаспақ. Демек жаңа жұмыс көздері пайда болып, тұрғындар жұмыспен қамтылып, жергілікті халықтың әлеуметтік жағдайының көтерілуіне де өзіндік септігін тигізеді.&nbsp;<blockquote>«Фирма «МТО-Центр» ЖШС жалпы құны 1 млрд. теңгеге жуық қаржыға 5 қабатты 53 пәтерлі тұрғын үй құрылысын жүргізуде. Құрылыс жұмыстары 2023 жылы аяқталады деп күтілуде. &nbsp;Мұның өзі баспанасы жоқ кент тұрғындары үшін ақжолтай қуаныш болып отыр. Былтырғы жылы кәсіпкерлердің демеушілігімен бірнеше нысан құрылысы &nbsp;жүргізіліп, соның нәтижесінде 344 миллион теңгенің жұмыстары атқарылған болатын», – дейді кент әкімі Семсер Зұлфықарұлы.&nbsp;</blockquote>Мәселен, орталық саябақ жанынан шамамен 200 миллион теңгеге көлемі 1000 шаршы метрді құрайтын «Құддыс Ишан» мешітінің жаңа ғимараты &nbsp;салынуда. Кент аумағынан жаңадан салынатын денешынықтыру-сауықтыру кешенінің құрылысына да облыстық бюджеттен 542,1 миллион теңге қаражат бөлініп, құрылыс жұмыстары жалғасуда. Бұл спорт кешенін келер жылы пайдалануға беру жоспарлануда.

Тасбөгетке кәсіпкерлер қолдауы зор

&nbsp;<a href="https://kyzylorda-news.kz/">Kyzylorda-news.kz.</a>&nbsp; Облыс тұрғындарының денсаулығын жақсарту және сапалы медициналық қызмет көрсету деңгейін жоғарылату мақсатында өңірде 18 аурухана мен 26 амбулаториялық емхана жұмыс істейді. Ал ауыл тұрғындарын қажетті медициналық қызметтермен қамтамасыз ету мақсатында аудан орталықтарында 9 аурухана мен аудандық емхана, 100 дәрігерлік амбулатория, 24 фельдшерлік акушерлік мекеме, 97 медициналық бекет қызмет көрсетеді. Бұдан бөлек, аса ауыр жағдайдағы науқастарға берілетін тегін медициналық жолдама саны да жыл сайын артып келеді. Бұл квота автоматтандырылған түрде тағайындалып, әрі қарай азаматтарды емдеуге дейінгі бақылауды жіберген медициналық ұйым жүзеге асырады. Бұл туралы Өңірлік коммуникациялар қызметінде өткен брифингте облыстық денсаулық сақтау басқармасы басшысының орынбасары Жангелді Шайымбетов мәлімдеді.<blockquote>«Егер науқас шұғыл көмекті қажет ететін болса дәрігерге дейінгі тексеруден өтіп, қажет болған жағдайда стационарлық емге жедел түрде жіберіледі. Ал науқас белгілі бір шағымдармен немесе созылмалы аурулардың асқыну жағдайында аймақтық дәрігерге жүгінетін болса лезде диагностикалық және емдеу әдістерінің клиникалық хаттамаларына сәйкес, медициналық жолдама тағайындалады. Керек жағдайда тар буынды мамандар кеңесіне жолданып, олардың ұсыныстарымен ем-дом қабылданады. Ал егер емделушінің тексеріс қорытындыларынан нәтиже болмаған жағдайда аймақтық дәрігер науқастың диагнозын нақтылау мақсатында республиклық деңгейдегі стационарларға жолдайды. Науқасты жоспарлы емдеуге жатқызу үшін өзі қалаған денсаулық сақтау ұйымы туралы ескеріледі. Жалпы емделуші жолдама арқылы тегін медициналық көмектің алдында 10 күн бұрын толық тексерістен өткізіледі», - деді басқарма басышысының орынбасары Жангелді Шайымбетов.</blockquote>Брифинг барасында облыстық және қалалық көп бейінді аурухананың дәрігер мамандары аталмыш ұйымның атқарған жалпы жұмыстарына тоқталып өтті.<blockquote>«Көп бейінді облыстық аурухана аймақ тұрғындарына жоғары мамандандырылған медициналық көмек көрсетеді. Біздің ауруханада 525 тәуліктік төсек-орынмен қамтылған. Сондай-ақ, орталықта 200-ден астам білікті мамандар жедел түрде жеткізілген науқастарға сапалы медициналық қызмет көрсетуде. Біздің мекемеде жалпы хирургия, урология, терапия, кардиология, нейрохирургия және т.б бөлімдер жұмыс істейді. Бұдан бөлек, біздің дәрігер мамандар өз білімдерін жетілдіріп отыруы үшін алыс-жақын шет елдерге барып, біліктілігін жоғарлатып отырады. Қазіргі таңда біз заманауи медицналық әдіс-тәсілдер арқылы омыртқа жотасына ота жасауды жоспарлап отырмыз», - деді көпбейінді облыстық аурухананың бас дәрігері Нұридин Амитов.</blockquote>Көп бейінді қалалық аурухана 4 мыңнан астам тұрғынды жедел және жоспарлы көмек көрсетуге қауқарлы. Оның ішінде 205 тәуліктік стационар және көп функцияналды 30 төсек-орын қамтылған.&nbsp;<blockquote>«Бұдан бөлек, 24 ақылы бөлім бар. Қазіргі таңда ауруханамызда кордиалогия, терапия, гинекология, және т.б бөлімдер қала тұрғындарына қызмет етеді. Сондай-ақ, біздің орталықта хирургиялық күрделі оталар жасалып, жоғары сапалы медициналық көмектер көрсетіліп келеді. Алдағы уақытта орталығымызда лор бөлімшесін ашуды жоспарлап отырмыз»,- деді көпбейінді қалалық аурухана бас дәрігерінің орынбасары Қадырбек Алипов. &nbsp;</blockquote>

Тегін медициналық жолдама автоматты түрде тағайындалады

<a href="https://kyzylorda-news.kz/">Kyzylorda-news.kz.</a> Бүгінде есімдері тарихтың қойнауында қалған Қызылорда облысының 10 ғасыр адамының бірі атанған ақын Әбділда Тәжібаев, қазақтың Белинскийі атанған сыншы Мұхамеджан Қаратаев, Жазушылар Одағының ат арбасын айдап жүріп-ақ әлем әдебиетінің жауһарына айналған «Мың бір түнді» қазақшаға аударған Қалмақан Әбдіқадыров, қарымды қаламгер ­Мырзабек Дүйсенов ағаларымыз өздерінің есімдерін қазақ әдебиетінде қалдырған, мақтан тұтар тамаша жерлестеріміз. Сол кісілердің ізін ала өткен ғасырдың алпысыншы жылдары қазақ әдебиетінің ортасына именбей кірген Оразбек Сәрсенбаев ағамыз еді.Оразбек ағаның әкесі Сәрсенбай ақсақал өмір бойы диқаншылықпен айналысқан кісі. Ұлы Отан соғысынан кейінгі жылдары Шиелінің даңқын бүкіл қазақ еліне танытқан әрине оның бейнеткеш, еңбекқор халқы болса, одан кейінгі орында сол халықтың қолымен өсірген ақ күрішімен піскен кезде иісі жұпардай аңқып тұратын, жесең тәттілігі тіліңді ойып жіберетін баспалдысы мен сары торламасы еді. Сәрсенбай ақсақал өмір бойы кезінде Шиелінің мақтанышына айналған қауын еккен диқандардың көшбасшысы бола білді. Дүниеде диқан еңбегіндей жаңқиярлық, диқан ырысындай адал ырзық жоқ. Диқан бабымен қимылдап, дақылдың өсу дәуірін жан дүниесімен сезіп, біліп, күтіп, баптап ¬отырады. Өсіп келе жатқан жас дақылдың тілін білу тек диқанның диқанына ғана бұйырған қасиет. Ыбырай Жақаев жөнінде әріптестерінің бірі «Мен ол кісінің күрішпен сөйлесіп тұрғанын байқадым» деген екен.Осы қасиет Сәрсенбай ақсақалдың бойында да бар-ды. Олай дейтінім бала кезімнен Сәрсенбай ақсақалдың егіншілігі ¬туралы әкемнен, ауылдың үлкен кісілерінен талай естігенмін. Сәрсенбай ақсақал тек қауын өсірумен ғана айналысып қоймай, оның ұзақ мерзімге сақталатын жаңа сорттарын шығарып отырумен үнемі айналысып, қауынның бірнеше сорттарын шығарды. Бүгінде бір ғылыми институт бірнеше жыл айналысатын жұмысты Сәрсенбай ақсақалдың бір өзі атқара білді. Бұл ол кісінің керемет диқан екеніне дәлел бола алады. Қазақ «Тектілік те тегінен» деп жатады. Оразбек ағаның өмірлік ұстанымы, жазушылық стиліндегі асықпай анығын айтатыны, кейіпкерінің жан дүниесін аша отырып сол арқылы оқырманға ой ¬салуы, сайып келгенде ыждағаттылығы әкесі Сәрсенбайдың диқангершілігіндегі тиянақтылығынан дарыған деп есептеймін.Оразбек ағаның әдебиеттегі биік беделі, әріптестерінің ол кісіні ерекше жақсы көруі де осы қасиеттерінен деп ойлаймын. Бала кезімнен Оразбек ағаны естіп өстім. Әке-шешесін де, бауырларын да ¬жақсы білемін. Олар өнерге бір табан жақын жандар болып өсті.&nbsp;Қызметке араласа бастағаннан Оразбек аға жөнінде көбірек біліп, ұстанымына қанық бола бастадым. Бір қарағанда көп сөйлемейтін томаға тұйық болып көрінгенімен, ашылып сөйлескенде ол кісіден білімді, ол кісіден терең,ол кісіден сөзшең адам жоқ шығар деп ойлайсың. Оның оқығаны да, көңілге тоқығаны да, айтары да көп болатыны сондықтан.2008 жылдың 12 ақпан күні облыс әкімі Мұхтар Құл-Мұхаммед Шиелі ауданына Нұрлыбек Мәшбекұлын әкім етіп отырғызайын деп келді. Мен ол кісілерді әкімшіліктің алдынан күтіп алып, ішке кіріп әңгімелесіп тұрдық. Жоғарыда депутаттар күтіп отырған. Бірақ облыс әкімі жоғарыға шығуға асықпады. Сәлден соң әкімгершілікке Оразбек аға келді. Қыс мезгілі. Ағаның үстіндегі төгіле тігілген сары тоны өзіне ерекше өң беріп жарасып тұрды. Облыс әкімі Оразбек ағамен бар ықыласымен амандасып, жағдайын сұрап болған соң, «Ореке аға сіз биыл жетпіс жасқа келіп жатырсыз. Қазақ әдебиетіне жарты ғасырдай еңбегіңіз сіңді. Сіздің қаламгерлігіңізді мен жақсы білемін. Адамгершілік қасиеттеріңізді де құрметтеймін. Сізді іздеген себебім жетпіске келген тойыңызды атап өтіп берейін, егер рұқсат етсеңіз» деді. Оразбек аға сәл ойланып тұрды да «Мұхтар інім саған рақмет,мен өмірі туған күнімді атап өткен адам емеспін. Сондықтан да оның қажеті жоқ» деді. ¬Облыс әкімі Оразбек ағадан бұндай жауапты күтпеген болуы керек тосылыңқырап барып «Ореке онда кітаптарыңызды шығарып берейін» деді. «Оны өзіңіз біліңіз» деді. «Ореке аға онда келістік, байланыста боламыз, Шиеліге келіп жатқан себебім ауданға әкім етіп отырғызуға Нұрлыбек Мәшбекұлын алып келдім» деді. Оразбек аға Нұрлыбек Мәшбекұлын жаңа жұмысымен құттықтай отырып, Шиелі деген жақсы ¬аудан, бұл ауданды басқарған талай кісілер республикаға танымал болды. Алла саған солардың жолын берсін деп тілек айтты. Осы әңгімелердің басы-қасында болғаннан соң, осындайда адам болады екен-ау деп Оразбек ағаға таңқалдым. Бұл оның мақтангершілікке, беделге, байлыққа еш қызықпайтындығынан деп есептеймін.Бұндай қасиеті бар адам қазақта көп те емес-ау. Оразбек ағаның ұлылығы да осы қасиеттерінен шығар, сірә.Әр кезде Оразбек ауылға келіпті деп естіп қалатынмын. Әдетте бір танымал кісі келсе ауданның шала бүлініп қалатын әдеті бар. Бірақ Орекеңнің бірде-бір рет мен келе жатырмын яки қайтып бара жатырмын дегенін естіген емеспін. Тек келерінде Жағыпар Зермұхамедов аға күтіп алып, сол кісі қайтарында шығарып салады екен.Қалған уақытта «Аққұмшықтағы» әкесінің үйінде жатып, шығармашылықпен айналысады. Оразбек ағаның кейіпкерлерінің барлығы дерлік қарапайым еңбек адамдарының болуы да сол шығарманың «Аққұмшықта» жазылғанынан шығар деп ойлаймын. Өз бақытын туған жердің төсінде кетпен шауып-ақ табуға болатынын Ыбырай ақсақал дәлелдесе, өз жаһұтын туған жерден іздеп табуға болатынын осы Оразбек аға дәлелдей білді. «Ауылым – алтын бесігім» деген осы шығар.Бірде Алматыға Нәби досымның баласының үйлену тойына бардым.Тойға Оразбек аға да келді. Көптен бері көріспеген ағамен шүйіркелесіп қалдық.Елдің жағдайын сұрап жатыр. «Өткен жыл аудан үшін абыройлы болған екен, күзде өткен «Алтын күз» мерекесіне шақырып еді, сырқаттанып бара алмадым, Нұрлыбек ініме сәлем айт, сырттарыңнан жетістіктеріне қуанып жатырмын» деп, ауылға деген сағынышын білдірді. Келген соң аудан әкіміне Оразбек ағаның сәлемін жеткіздім. Нұрлыбек Мәшбекұлы хатшы қызға Алматыдағы Оразбек ағаны қостырды. Сәлден соң телефонның арғы жағынан Оразбек ағаның дауысы шықты. Амандасып, жағдай сұрасып болған соң, аудан әкімі «Сізді аудан халқы сағынып жүр, уақыт тауып жерлестеріңізбен бір жүздесіп қайтсаңызшы» деді. Оразбек ағаның жан дүниесіне аудан халқы сізді сағынып жүр деген сөз қатты әсер еткен болу керек, сәл тоқтаңқырап барып, «Жарайды баратын уақытты өзім айтайын» деді. Мен де аудан әкімінің сол сөзді ¬тауып айтқанына іштей риза болдым. Межелеген күні аудан жұртшылығы Оразбек ағамен кездесті, ол кісінің мәні терең, мағынасы мол, әсерлі әңгімесін тыңдап, бір сусындап қалды. Туған жерін ешкім де еш уақытта ұмытпайды. Оны жырақта жүрсе де есіне алып жүреді. Оразбек аға әлемдегі ең көрікті жердің бірі Алматыда тұрғанымен Шиеліні сағынумен, Шиелінің адамдарын жазумен өтті. Шиелі ол кісі үшін өмірбақи «Жиде гүлдеген» кездегідей даланың жұпар иісі аңқып тұратын секілді көрінеді де тұрады. Бұл ағаның Шиеліге деген сағынышынан туған сезімдер секілді. Өмір бойы әңгімесіне береке-бірлікті, ырзық-несібені, ар-ұжданды, обал-сауапты арқау еткен, қазақ жазушыларының арасында алғашқылардың бірі болып имандылықты насихаттауға бетбұрыс жасаған да осы Оразбек аға.Жазушыларға берілетін мемлекеттік сыйлықтың иегері Оразбек аға биыл 85 жасқа толып отыр. Ол бүгінде арамызда болмағанымен аудан жұртшылығының ол кісіге деген сағынышы әлі басыла қойған жоқ. Өйткені арамызда ол кісінің көзі тірі замандастары, іні-қарындастары, кітабын оқып жүрген оқырмандары Құдайға шүкір, жеткілікті. «Ақын-жазушысын ардақтаған ел – азбайды» деп жатады халқымыз. Алла жазса алдағы күзде, Шиелінің даласы Оразбек ағаның сары тонындай түске еніп жатқан кезде, аудан егін-тегінін жинап, «Алтын күз» мерекесімен қатар ағаның ¬мерейтойы да аталып өтіп жатса, өте жарасымды іс болар еді. Қалың көпшіліктің де Оразбек ағаның өскен жері «Аққұмшықтағы» салынып жатқан жаңа мектептің аты ағаның есімімен аталса деген тілегі бар.

Шиелі таланттарға кенде болған емес

<a href="https://kyzylorda-news.kz/">Kyzylorda-news.kz.</a> Қызылорда облысы, Сырдария ауданына қарасты Н.Ілиясов ауылдық округінде дзюдодан республикалық турнир өтті. Аталған жарысқа 11 облыстан 334 спортшы және 27 команда қатысты. Бұл туралы Өңірлік коммуникациялар қызметінің ақпараттық алаңында өткен брифингте облыстық мәдениет және спорт басқармасы басшысының орынбасары &nbsp;Асылжан Жаманқұл мәлімдеді.&nbsp;<blockquote>«Қазақстанда дзюдо 1973 жылдан бастап дами бастады. Дзюдо ең алдымен, жауынгерлік өнердің лақтыру стилі. Оны бөліп көрсететін басты ерекшеліктердің бірі - оларға қарсы қарсыластың күшін қолдану тәжірибесі. Осындай тәжірибелерді жинақтаған спортшы жастар елімізде өте көп. Көпшілікке үлгі етіп, батылдығын айқындау мақсатында біраз жарыстар да өтіп жатыр. Соның бірі «Абзал және К» ЖШС-нің ұйымдастыруымен өткен дзюдодан республикалық турнирі. 19-21 мамыр аралығында болған турнир өте жоғары дәрежеде өтті»,-деді Асылжан Зұлфқарұлы.&nbsp;</blockquote>Жарысқа жалпы 4 миллионға жуық қаражат жұмсалған.<blockquote>«Турнирге қатысушыларға барлық жағдай жасалды. Нақтырақ айтқанда, транспорт және жатын орны, 3 мезгіл тамағы қарастырылды. Айта кететін жайт, жарысқа жалпы 4 миллионға жуық қаражат жұмсалды. Жыл сайын өз деңгейінде өтіп жатқан бұл жарыс ауыл халқы үшін маңызды шаралардың бірі. Осындай мүмкіндікке қолдау көрсетіп отырған «Абзал және К» мекемесінің рөлі зор. Ауылымызда күріш алқаптарының дамып жатқанын ескерсек, &nbsp;басқа өңірлерден келген қатысушылар денсаулыққа пайдалы, сапалы күріш тек шет елде ғана емес өз өңірімізде өндірілетіндігі жөнінде біраз ақпаратпен таныс болды. Сондықтан бұл жарыс спорт саласына баулып қана қоймай, ауыл шаруашылығын және &nbsp;туризмді дамытуға үлкен үлес қосқаны хақ , - деді "Абзал және К" ЖШС-і директорының орынбасары Айгүл Қосмұратова.&nbsp;</blockquote>Бұл жарысты алдағы уақытта халықаралық деңгейде ұйымдастыру көзделген.<blockquote>«Турнирге арнайы халықаралық, ұлттық төрешілер шақыртылды. Себебі, шын мықтыны әділ түрде айқындау негізгі мақсаттың бірі. Жеңімпаздарға ақшалай сыйлықтар және ҚР спорт шеберіне үміткер атағы берілді. Биыл он екінші рет өткізілген турнирді алдағы уақытта халықаралық деңгейге дейін көтеру жоспарда бар», - деді Н.Ілиясов ауылының спорт кешенінің меңгерушісі Бағлан Мығымбаев.</blockquote>

Қызылордада дзюдодан республикалық турнир өтті

<a href="https://kyzylorda-news.kz/">Kyzylorda-news.kz.</a> Жастарға қолдау көрсету мемлекетіміздің басты міндеттерінің бірі. Биыл республикада отбасылық цифрлық картасы іске қосылды. Бүгінде осы бағдарлама аясында облыста ауқымды жұмыстар атқарылуда. Сәйкесінше, жастар арасындағы жұмыссыздық деңгейі 3,4 пайызға төмендеді. Бұл бағдарламаның оң динамика қалыптастырғанының айқын көрінісі. Бұл жөнінде Өңірлік коммуникациялар қызметінің ақпарат алаңында өткен брифингте облыстық «Жастар ресурстық орталығы» КММ директоры Талғат Тлес хабарлады.&nbsp;<blockquote>«Жастарды кәсіпке баулу, оларды жұмыспен қамтамасыз етудің нақты шаралары қабылданды. Жастарды бизнеске тартуда мемлекет тарапынан қайтарымсыз гранттар, жеңілдетілген 2,5 пайызбен несие қарастырылып келеді. Бұл жастарға деген үлкен мүмкіндік. Жастар арасындағы жұмыссыздық деңгейін төмендету, кәсіпкерлікті дамыту, жастар арасындағы сұранысқа ие мамандықтарды қажеттілікті қамтамасыз етуде мүмкіндіктер керуені, кеңес беру, мәдени көпшілік шаралар өткізіліп келеді. Сондай-ақ бос жұмыс орны жәрмеңкелері ұйымдастырылып, 303 жас жұмыспен қамтылды», - деді Талғат Оспанұлы.</blockquote>Жастар - мемлекеттің болашағы. Жастар жылы аясында еңбек бригадалары құрылып, бүгінде өз жұмыстарын бастаған болатын.<blockquote>«Бұл бригадаларды құрудың басты мақсаты - аудандағы жастардың жұмыссыздық деңгейін төмендету. Бүгінде аудан әкімінің қолдауымен Сырдария ауданына қарасты кенттер мен ауылдық округтерле жастар бригадалары құрылды. Аталмыш бригада қатарында жұмыссыз, NЕЕТ санатындағы және пробация есебінде тұратын жастар жұмыс жасауда. Осы уақытта басталған егін науқанына бригада құрамындағы жастарды тарту қарастырылып отыр. Сонымен қатар жастарды Жаңақорған ауданы, Жайылма ауылдық округіне тәжірибе алмасуға жіберіп, егін егу тәсілдері үйретілді. Қазіргі таңда мемлекет тарапынан берген егіндік жерлерде дайындық барыстары жүргізіліп, бақша егу жоспарлануда. Сондай-ақ, Шіркейлі ауылдық округінде құрылыс материалдарын шығаратын "Шіркейлі" жастар бригадалары жұмыс жасайды. Нәтижелі жұмыс жасаған еңбек жастары жыл соңында лайықты марапатқа ие болады. Атқарылып жатқан жұмыстар алдағы уақытта да өз жалғасын табады», - деді Сырдария аудандық жастар ресурстық орталығының директоры Нұрман Абдрасилов.</blockquote>

Қызылордада жастар арасында жұмыссыздық деңгейі 3,4 пайызға төмендеді

<a href="https://kyzylorda-news.kz/">Kyzylorda-news.kz.</a> Үкімет қаулысына сәйкес, Құрбан айттың бірінші күні – демалыс. Қазақстан халқы 28 маусым, сәрсенбіде демалады.Маусым айында бес күндік жұмыс аптасы үшін барлығы тоғыз демалыс күні бар.

Қазақстан және Қызылорда облысының жаңалықтары