<a href="https://kyzylorda-news.kz/">Kyzylorda-news.kz.</a> Биылдан бастап кәсібі бар немесе кәсіп бастағысы келіп жүрген жастарға жылдық 2,5 процентпен микронесие берілетіндігін жаңалықтардан естіп, біліп жүрміз. Бірақ жастардың дені бұл жаңалықты естігенімен шағын несиенің берілу шарттарын жете біле бермейді. Осы орайда Қазалы аудандық жастар ресурстық орталығы сала мамандарымен бірлесе бағдарламаның тетігін түсіндіруді қолға алып, насихат жұмыстарын бастап кетті.Жастар ресурстық орталығы, аудандық жұмыспен қамту, сондай-ақ кәсіпкерлік палата мамандарының қатысуымен кенттегі бірнеше мектептің, аурухананың, өндірістік мекемелердің жастарымен кездесу ұйымдастырылып, 2,5 проценттік жеңілдетілген несиенің талаптары және берілу бағыттары бойынша түсіндірме жұмыстары үздіксіз жүргізілуде.<blockquote>«Мемлекет басшысы халыққа арнаған Жолдауында жастарды қолдау басты мақсатқа айналу керектігін айтқан еді. Біз соның аясында жұмыс жасап жатырмыз. Жастар мемлекет тарапынан беріліп жатқан мүмкіндікті тиімді пайдалану үшін насихат шараларын кең көлемде ұйымдастырудамыз. Себебі көпшілігі маңызды жобалардан қалыс қалып жатыр. Сондықтан біз мемлекеттік бағдарламалар мен бастамалар туралы ақпарат беріп, хабарлап отыру мақсат тұттық. Осы сынды және өзге де жүзеге асырылып жатқан жобалардың бар екендігін жастарға тұрақты түрде түсіндіре алсақ, олар кәсіпкерлікке бет бұрса, біздің миссиямыздың орындалғаны», – дейді орталық маманы Азамат Алпамыс.</blockquote><blockquote>«Мұндай жобалар жастарға керек-ақ. Көбісі кәсіпті неден, қалай бастарын білмейді. Ал осындай шағын несие жастардың бастамасы үшін үлкем көмек бола алады. Себебі проценттік мөлшері төмен. Бұл жаңа басталған кәсіп үшін тиімді болмақ. Сондықтан жастар берілген мүмкіндікті барынша пайдалануы керек деп ойлаймын»,– дейді Айжан есімді бойжеткен.</blockquote>Айта кетейік, 2,5 проценттік жеңілдетілген несие 2021-2025 жылдарға арналған кәсіпкерлікті дамыту жөніндегі ұлттық жоба шеңберінде жүзеге асырылуда. Жоба аясында кәсіпкерлікті бастағысы келететін немесе кәсіпкерлікпен айналысатын 21 мен 35 жасқа дейінгі жастарға шағын несие беру көзделген.

Қазалыда жеңілдетілген несие жайы жан-жақты түсіндірілді

<a href="https://kyzylorda-news.kz/ru">Kyzylorda-news.kz.</a> Елімізде жастарды жалпы қоғамдық үдерістерге қосу мақсатында ынталандыру жұмыстары іске асырылып, олардың өзін-өзі жүзеге асыруы үшін мемлекеттік деңгейде жағдай жасалуда. Аудан көлемінде өз жұмысын бастаған жастар еңбек бригадаларының құрылуы сөзімізді дәлелдей түседі.Мемлекет басшысы Қ.Тоқаев «Елімізде еңбекқор адам, кәсіби маман – ең сыйлы адам болуы тиіс» деп атап өткен еді. Расында да қай қоғамда, қай заманда болмасын, аяғы қимылдағанның аузы қимылдайтыны және бар.«Нағыз жаза – жұмысқа салу емес, нағыз жаза – жұмыссыз қалу шығар» дейді екен Қадір Мырзаәлі ақын. Еңбекпен есейген Сыр жастары да жан-жақты еңбекке араласып, ебін тауып, халыққа да пайдалы жұмыс жасауда. Қазіргі таңда белең алып тұрған жұмыссыздық мәселесін азайту мақсатында ауданға қарасты ауылдық округтерде арнайы жастар еңбек бригадалары құрылды. Аудан әкімінің қолдауымен бүгінде қызу еңбекке кіріскен жастар еңбектің нағыз ер етерін біледі.<blockquote>Қазіргі уақытта белең алып тұрған жастар арасындағы жұмыссыздық мәселесін шешу, жастарды еңбекке баулу және NEET санатындағы жастардың санын азайту мақсатында бірнеше ауылдық округтерден жастар бригадалары құрылды. Аудан әкімі Берік Сәрменбаевтың тапсырмасына сәйкес еңбекпен айналысуға ниетті жастарды қолдау басты мақсаттардың бірі болып отыр. Жастар бригадаларына мемлекеттен уақытша жер беріліп, су айдайтын насос құру, қоршалау, егін науқанына дайындық жұмыстарына қолдау көрсетілуде. Аталған жастар бригадаларында жұмыссыз жастар еңбекпен қамтылуда. Бригада мүшелері ауылдық округтерден алыс емес өңірлерде бақша дақылдарын яғни картоп, қауын, қарбыз және жүгері егуді жоспарлап отыр, – дейді жастармен жұмыс жүргізіп жүрген аудандық жастар ресурстық орталығының директоры Нұрман Абдрасилов.</blockquote>Еңбек бригадасы құрамында жұмыс жасауға ниетті ауыл жастары үшін егістік жерді егін егуге дайындау, су айдайтын насос беру, келісім арқылы жер беру және қоршау жұмыстары ауыл жастары үшін тегін жүргізіледі. Сондай-ақ жас еңбеккерлер тәжірибе жинақтау мақсатында Жаңақорған ауданы, Жайылма ауылдық округіне арнайы барып, ерте көктемде егін ша¬руашылығының қарқын алуы үшін біліктіліктерін арттырып қайтты. Өндірістің ең маңызды саласы саналатын ауыл шаруашылығын дамыту мақсатында атқарылып жатқан игі істерге аудан әкімдігі, аудандық ауыл шаруашылығы және жер қатынастары бөлімі мен шаруашылық құрылым-дары, ауылдық округ әкімдігі қолдау көрсетуде.Айта кетейік, қазіргі таңда аудан бойынша жеті ауылдық округте жастар еңбек бригадалары құрылып, онда 150 жас жұмыспен қамтылған. Бригада мүшелері қоғамдық өмірден де тыс қалдырылмайтын болады. Олар түрлі іс-шараларға тартылып, сонымен қатар өз өнімдерін облыстық, аудандық көрме-жәрмеңкелерде ұсынуына жағдай да жасалмақ. Бүгінгі таңда дала еңбеккерлеріне 40 гектар жер беріліп, 15 гектарға бақша дақылдары, қалған аумаққа картоп орналастырылуда.&nbsp;

Сырдарияда еңбек бригадасында 150 жас жұмыспен қамтылған

<a href="https://kyzylorda-news.kz/">Kyzylorda-news.kz.</a> Қазақстан Республикасының еңбек сіңірген жаттықтырушысы Әділбек Үргенішбайұлы Серікбаевты еске алуға арналған 2006-2007 жылы туылған жасөспірімдер арасында самбодан республикалық турнир өз мәресіне жетті.Республикалық турнирге 13 команда 150-ге спортшы қатысты, атап айтар болсақ Атырау облысы, Ақтөбе облысы, Шымкент қаласы, Жамбыл облысы, Түркістан облысы, Павлодар облысы, Тәжікстан, Қызылорда қаласы және Қызылорда облысының аудандырынан құралған спортшылар келіп қатысты.Спорттық іс-шараның негізгі мақсаты Қазақстан Республикасының еңбек сіңірген жаттықтырушысы Әділбек Серікбаевты еске алу, облыс көлесінде самбо күресін дамыту, салауатты өмір салтын насихаттау, спортшыларды достыққа, патриоттық сезімге тәрбиелеу болып табылады.Республикалық турнирге жерлестеріміз қатысып жеңіс төрінен көрінді. Атап айтар болсақ, турнир қорытындысымен:42 кг салмақ дәрежесінде:ІІІ орын – Әлманбет Ерсұлтан (Қармақшы ауданы)ІІІ орын – Сапабеков Шыңғыс (Байқоңыр қаласы)ІІ орын – Темірбекұлы Бағдәулет (Қызылорда қаласы)І орын – Тұрсынбек Бекжан (Қызылорда қаласы)46 кг салмақ дәрежесінде:ІІІ орын – Ібіраш Мағжан (Қармақшы ауданы)ІІІ орын – Сейтхан Мадияр (Қызылорда қаласы)ІІ орын – Жиенбаев Нұрислам (Қызылорда қаласы)І орын – Өмірбек Арман (Ақтау қаласы)49 кг салмақ дәрежесінде:ІІІ орын – Зайдуллай Сафарали (Тәжікстан)ІІІ орын – Азим Елдос (Жамбыл облысы)ІІ орын - Темірбекұлы Құдайберген (Қармақшы ауданы)І орын – Егімбай Әділет (Орал облысы)53 кг салмақ дәрежесінде:ІІІ орын – Аралбек Айдос (Қармақшы ауданы)ІІІ орын – Қанибеков Мирас (Қармақшы ауданы)ІІ орын – Құлжанов Бекзат (Жамбыл қаласы)І орын – Орысбайұлы Ғани (Ақтау облысы)58 кг салмақ дәрежесінде:ІІІ орын – Есембай Қосымбек (Ақтау облысы)ІІІ орын – Кодиров Бободжан (Тәжікстан)ІІ орын – Джингазаев Сержан (Ақтау облысы)І орын – Бауыржанұлы Шейхрахман (Қызылорда қаласы)64 кг салмақ дәрежесінде:ІІІ орын – Қылышбеков Нұрасыл (Байқоңыр қаласы)ІІІ орын – Пернебай Нұркелді (Жамбыл облысы)ІІ орын – Кеңес Нұрсұлтан (Қызылорда қаласы)І орын – Жасұлан Амандық (Орал облысы)71 кг салмақ дәрежесінде:ІІІ орын – Тұрақбаев Сұңғат (Ақтау облысы)ІІІ орын – Жұмақожа Мирас (Жаңақорған ауданы)ІІ орын – Өтеген Архат (Орал қаласы)І орын – Мұрат Ықылас (Ақтау облысы)79 кг салмақ дәрежесінде:ІІІ орын – Нуркабаев Ермек (Қостанай облысы)ІІІ орын – Куликенов Алихан (Қостанай облысы)ІІ орын – Ғалымжанұлы Ерасыл (Шымкент қаласы)І орын – Рохманов Шохангер (Тәжікстан)88 кг салмақ дәрежесінде:ІІІ орын – Әділбек Исламбек (Тасбөгет)ІІІ орын – Серікұлы Берік (Жаңақорған ауданы)ІІ орын – Сейдалыұлы Асылжан (Қармақшы ауданы)І орын – Ізбасар Алданазар (Қызылорда облысы)+88 кг салмақ дәрежесінде:ІІІ орын – Қозыбақов Адиль (Павлодар облысы)ІІІ орын – Дарханбеков Рахат (Қызылорда облысы)ІІ орын – Дәулетұлы Ерасыл (Шымкент қаласы)І орын – Сұлтан Бейбарыс (Қызылорда қаласы)

Қармақшыда самбодан өткен республикалық турнир аяқталды

<a href="https://kyzylorda-news.kz/">Kyzylorda-news.kz.</a> Спорт – денсаулық кепілі. Қашанда осы қағиданы ұстанған қазалылықтар спорттың қай саласында болмасын түрлі жарыстар өткізуді әдетке айналдырған. Қазақстан ғана емес әлемге аты таныс спортшылар туған өлкеде спортқа жаны құмар жастар өсіп келеді. Олардың бірі футболды таңдаса, енді бірі боксты жанына серік еткен. Ал бүгінгі ойын өрнеге тіптен бөлек. Қасиетті Қазалы жеріне облыстың түкпір-түкпірінен жиналған талапкерлер волейболдан бақ сынады.&nbsp;Қашақбай Пірімов ауылында Қазалы ауданының еңбек ардагері Нартай Кәдірұлын еске алуға арналған волейболдан облыстық ашық турнир басталды.Ең алдымен көпшілікке жарысқа қатысушы барлық командалар таныстырылды. Олардың қатарында Қызылорда қаласы, Жаңақорған, Шиелі, Сырдария, Арал, Қазалы аудандары және Құмжиек ауылы мен ардагерлер құрамалары бар. Турнирді аудан әкімі Мұхтар Оразбаев ашып, спортшыларға сәттілік тіледі.<blockquote>«Қазақ халқы қашанда елдік пен ерлікті ұлықтай білген. Ел мерейін көтерген ерлерін құрметтеген. Оның дәлелі ретінде кеше ауданда еңбек ардагері Нартай Кәдірұлының ұрпақтары марқұмның рухына құран бағыштап, ас берді. Ал бүгін Қ.Пірімов ауылында волейболдан ауқымды турнир бастау алуда. Нартай ағамыздың жаны жәннаттық болсын. Жарысқа қатысушыларға сәттілік тілеймін! Тек мықтылар жеңіске жетсін», – деді аудан басшысы.&nbsp;</blockquote>Мұнан соң қонақтар Нартай Кәдірұлын 1 минут үнсіздікпен еске алды. Артынша көпшілік Қызылорда қаласы мен Құмжиек командасының ойынын тамашалады.

Еңбек ардагерін еске алуға арналған волейболдан облыстық ашық турнир өтті

<a href="https://kyzylorda-news.kz/">Kyzylorda-news.kz.</a> Биылғы оқу жылына 88 мың грант бөлінді. Бұл туралы ҚР Ғылым және жоғары білім вице-министрі Қуаныш Ерғалиев мәлім етті, деп хабарлайды <a href="https://www.inform.kz/kz/ubt-biylga-bolingen-grant-sany-belgili-boldy_a4069995">ҚазАқпарат</a>.Атап айтқанда, биыл 18 мамырда осы жылдағы негізгі ҰБТ басталды және ол 5 шілдеге дейін жалғасады.<blockquote>«Жалпы, ҰБТ-ға 166 мың талапкер өтініш тапсырды. Биыл Мемлекет басшысы Қасым-Жомарт Кемелұлы Тоқаевтың берген тапсырмасын орындауды жалғастырамыз. Бұл ретте гранттың 60 пайызы инженерлік-техникалық мамандықтарды қамтиды. Сондай-ақ, тығыз орналасқан, жаңа құрылған және батыс аймақтарындағы жастар үшін де арнайы грант бөлінген. 2023 жылы өңірлік ЖОО-ларға бөлінетін педагогикалық квота саны артып, 6280 грант бөлінді. Ал «Серпін» бағдарламасы бойынша 3653 грант бөлінді», - деді Қуаныш Ерғалиев.</blockquote>Оның айтуынша, «Серпін» бағдарламасы аясында жұмыс арқылы өтеу мерзімі биыл қысқарды. Бұрын 3 жыл болса, қазір 2 жылды құрап отыр. Сондай-ақ, грантты жұмыс арқылы өтеу оқыған аймақта ғана емес, бағдарлама аясында қамтылған басқа аймақтарға да баруға болады.<blockquote>«Білім беру гранттарының жалпы саны 88 мыңды құрады. Оның ішінде бакалавриатта оқу үшін 73 мың грант, магистратураға – 13 мың, докторантураға 1890 грант бөлініп отыр. Биыл грантқа құжаттарды қабылдау және оның иегерлерінің тізімін жариялау күндеріне қатысты өзгеріс болмайды. Яғни, 13-20 шілде аралығында грантқа құжаттарды қабылдауды, ал грант иегерлерінің тізімін 10 тамызға дейін жариялауды жоспарлап отырмыз. Жоғары орындарына қабылдау 25 тамызға дейін жүзеге асырылады», - деді вице-министр.</blockquote>

ҰБТ: Биылға бөлінген грант саны белгілі болды

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаевтың «Жаңа Қазақстан жаңару мен жаңғыру жолы» атты Қазақстан халқына жолдауын кеңінен насихаттау, Тәуелсіздіктің қастерлі де, киелі ұғым екендігін, тәуелсіздіктің баянды болуы үшін ұлттық бірегейлік пен бірліктің маңыздылығын жастарға түсіндіру, тәуелсіздік жылдары өз мамандығының хас шебері атанып, еліміздің дамуына үлес қосып жүрген азаматтарды қоғамда кеңінен насихаттау, жастарға үлгі ету мақсатында «ҚР еңбек озаттарының алтын кітабы» атты республикалық патриоттық байқауы өтті.Екі кезеңнен тұратын байқауды Қазақстан Республикасы «Bilim-orkenieti» ұлттық инновациялық ғылыми-зерттеу орталығы ұйымдастырды. Оған Б.Қабылұлы атындағы мәдениет үйінің әдістемелік бөлім меңгерушісі Гүлшат Әбдімомынова қатысып, жеңімпаз атанған болатын. Марапаттау рәсіміне арнайы Астана қаласына барып қатысқан Гүлшат Шайзадақызы I дәрежелі дипломмен және ҚР Еңбек озаттарының алтын төсбелгісі, &nbsp;алтын кітабы, куәлік және құрмет грамотасымен марапатталды. Айта кетейік Г.Әбдімомынова бұған дейін «Бейбітшілік Әлемі» халықаралық қазақ шығармашылық бірлестігінің «Мәдениет майталманы» медалі және «Шиелі ауданына – 90 жыл» мерекелік медалімен, Қазақстандық салалық мәдениет, спорт, туризм және ақпарат қызметкерлері кәсіподағының «Еңбек даңқы» төсбелгісімен марапатталып, облыстық мәдениет басқармасының «Жарқын болашақ – бүгінгі білікті маман» атты үздіктерді насихаттайтын кітапқа енген. Одан бөлек көптеген республикалық, облыстық байқаулардың жүлдегері.Мәдениет қызметкерлері мерекесі қарсаңында мерейі үстем болған жерлесімізді марапатымен құттықтаймыз!

Мереке қарсаңындағы марапат

<a href="https://kyzylorda-news.kz/">Kyzylorda-news.kz.</a> Биыл қаладағы 26 көпқабатты тұрғын үйдің қасбеті заманауи панельдермен қапталады. Бүгінде бұл бағытта тиісті жұмыстар жүргізілуде.&nbsp;Игілікті бастаманы жергілікті кәсіпкерлер туған жерге тарту ретінде қолға алған. Олардың демеушілігімен жалпы ауданы 40 мың шаршы метр соңғы үлгідегі құрылыс материалдары қолданылмақ. Бұл өз кезегінде көпқабатты үйлерді жыл сайын әктеу, сырлаудан тыйып, қолайсыз ауа райынан қорғауға жақсы мүмкіндік. Сондай-ақ қала сәулетіне де ерекше көрік қосады.&nbsp;Осы орайда облыс әкімі кәсіпкерлермен кездесуде құрылыс жұмысынығ материалдың сапалы болуын қатаң тапсырған болатын. Сондай-ақ оларға алғысын білдірген еді.<blockquote>«Мемлекет басшысы Қасым-Жомарт Кемелұлы туған жеріне жанашырлықпен қарайтын кәсіпкерлерді патриотизм мен әлеуметтік жауапкершіліктің үлгісін көрсетіп, ел экономикасын дамытуға үлес қосуға шақырған болатын. Бұл жұмыстарға жергілікті кәсіпкерлер, Сыр топырағынан түлеген меценаттар белсенді араласуда. Олар қайырымдылық шараларына, атамекенін көркейтуге бар күш-жігерін салуда», – деді Нұрлыбек Машбекұлы.</blockquote>Бүгінде &nbsp;облыс әкімінің бастамасымен қаладағы 26 көпқабатты тұрғын үйдің қасбеті жаңғыртылуда. Оның ішінде Абай даңғылындағы №46, №54 және №62 үйлер, Сырдария шағын ауданындағы №1 және №2 тұрғын үйлердің сыртқы қасбетін әрлеу жұмыстары басталған. Сонымен қатар &nbsp;заманауи панельдермен қаптау жұмыстары Абай даңғылындағы №37, 39, 41, 43, 44, &nbsp;62 үй мен Мұратбаев көшесіндегі №17 үй, Сырдария шағын ауданындағы №1 және №2 тұрғын үйлерде жүргізілуде. Жаңғырту жұмыстары шілде айына дейін аяқталады деп күтілуде.

Қызылордада көпқабатты үйлер жаңа кейіпке енуде

<a href="https://kyzylorda-news.kz/">Kyzylorda-news.kz.</a> Қазалы ауданына қарасты Өркендеу ауылдық округінде «Ауылым – ақбоз мекенім» атты ауыл күніне арналған салтанатты шара өтті.Ауыл тұрғындарының қуанышымен бөлісуге арнайы келген аудан әкімі Мұхтар Оразбаев бірлігі бекем, тірлігі тиянақты &nbsp;ауыл жұртын мерекемен құттықтады.&nbsp;<blockquote>«Туған жер – адам баласының кіндік қаны тамған, жанына, жүрегіне жақын, қимас сезімге бөлейтін алтын ұясы. Ауылына елең етіп, мойын бұрмайтын адам кемде-кем. Жанкент ауылы - Түркі елдеріне ортақ тұлға Қорқыт бабамызбен әлемге «Екінші ұстаз» атанған Әбу Насыр Әл-Фараби бабамыз мекендеген киелі өлке. Мұндағы халықтың бірлігі бекем, тірлігі тиянақты. Баршаңызды бүгінгі ауыл күнімен шын жүректен құттықтаймын», - деген аудан басшысы ауылдың өсіп-өркендеуіне сүбелі үлес қосып жүрген бірқатар азаматтарды аудан әкімінің Алғыс хатымен марапаттады.&nbsp;</blockquote>Мұнан соң ардагерлер Өткелбай Жолмырзаев, Есенкелді Мәлиұлы және Аманжол Қалыбайұлы сөз алды. Сол секілді Жанкент ауылының қамқоршы қызы Сәрсенгүл Әлімжанқызы да жылы лебізін білдірді.&nbsp;Мерекелік бағдарлама аясында ауыл тұрғындары әртүрлі спорттық жарыстарды тамашалады. Мұнда жастар батпан көтеру, бағанаға өрмелеу, арқан тарту, ләңгі тебу, қой көтеру, қол күрес және грек-рим күресі бойынша өзара күш сынасты. Мерекелік шарада аудан және ауыл өнерпаздары өнер көрсетіп, жиналғандарға ерекше көңіл-күй сыйлады.Айта кетейік, кешкілік ауылда облыс және аудан өнерпаздарының қатысуымен концерт ұйымдастырылатын болады.

Қазалы: Жанкентте ауыл күні аталып өтті

<a href="https://kyzylorda-news.kz/">Kyzylorda-news.kz.</a> Ерекше білім беруді қажет ететін сыныптар арасында ұйымдастырылған апталық аясында бастауыш сынып мұғалімдері Күлзада Бегімбаева мен Сәулеш Күзенбаеваның жетекшілігімен түзету сыныбының тәрбиеленушілері «Жыл басы» ертегісін сахналады. Қойылым барысында балалар түрлі жануарлардың киімін киіп, солардың образында өнер көрсетті.Сондай-ақ өздері сомдаған ертегі кейіпкерлерінің мінез-құлқын жеткізуге барынша күш салып, болмысын ашып көрсетуге тырысты. Балалар өздерінің ерекшелігіне қарамастан өздеріне артылған жауапкершілікті сезініп, ертегінің мазмұнынын толыққанды түсініп, көпшілікке ұсына алды. Ал қойылымды тамашалаған мұғалімдер мен ата-аналар балалардың шығармашылығына ризашылықтарын білдірді. Шәкірттерді жан-жақты болуға баулып жүрген ұстаздардың еңбегіне ата-аналар алғыс білдіріп, ұл-қыздарының өнеріне тәнті болды.&nbsp;Одан соң, балалардың танымдық қабілетін арттыруды көздеген жеке және топтық жұмыстар жүргізілді. Онда балалар «Көңілді би», «Жануарлар терісін тап», «Жануарлар қайда өмір сүреді?» сынды тапсырмаларды орындады. Апталық соңында шараға қатысып, ерекше белсенділік танытқан оқушылар арнайы «Алғыс» хатпен марапатталып, сыйлыққа ие болды.

Қазалыдағы «Жүз жасаған бәйтерек» апталығы өтті

<a href="https://kyzylorda-news.kz/">Kyzylorda-news.kz.</a> Жыл артқан сайын театрға келіп, рухани азық іздеп, демалып қайтушылар саны артып келеді. Әрине, бұл өнер саласының ұжымына деген көрермен құрметі. Жалпы театрда екі көрініс бар. Бірі сахнадағы әртістердің көрінісі, екіншісі – сахна сыртындағы көрініс. Иә, ол жақта да бір топ адамның еңбегі бар. Соның ішінде костюмер мамандығының маңызы ерекше.&nbsp;Аты айтып тұрғандай, бұл маман иесі театрдағы бар костюмге жауапты. Осындай жауапты жұмысты Нартай Бекежанов атындағы Қызылорда облыстық қазақ академиялық музыкалық драма театрында Нұрсұлу Алиева костюм цехының меңгерушісі болып, бірталай жылдан бері атқарып келеді. Кейіпкеріміз 1962 жылы Қосшыңырау ауылында дүниеге келді. Былтыр алпыс жасқа толды. Көктемнің шуақты күнінде бізге кейіпкерімізбен сұхбаттасудың сәті түсті. Костюмерлердің театрдағы еңбегі зор– Нұрсұлу Боранқұлқызы, театр әлемінде костюмер мамандығының маңызы зор. Қазіргі күні театр қорында қанша киім үлгісі бар? Жалпы әңгімемізді осы мамандықтың қыр-сырынан бастасақ... &nbsp;– Негізі осы салада қызмет атқарып жүргеніме 11 жылдан асты. Қызығы мен шыжығы қатар жүретін жұмысым өзіме қатты ұнайды. Біздің театрда киім үлгісі өте көп. Оның нақты санын айту мүмкін емес. Кез келген киімнің кімге тиесілі екенін астарындағы жазуға қарамай-ақ жазбай танып, жатқа айтып бере аламыз. &nbsp; &nbsp;Расында, киім – сахнаның үлкен құрамдас бір бөлігі. Дизайнер алдын ала үлгісін жасап, арнайы тігілген костюмді киіп шыққан әртіс сахнада адам танымастай өзгеріп шыға келеді. Сол сәттен бастап ол сахнаны сән мен салтанатқа бөлеп, көрермен көзайымына айналады. Әр киім спектакль бойынша бөлек-бөлек жиналады. Әртіс образды жоғары деңгейде алып шығу үшін &nbsp;ол үлкен рөл атқарады.&nbsp;Сондықтан костюмерлердің театрдағы еңбегі зор. Жуып, тазалап әртістің сахнаға шыққанынша тыным таппаймыз. Қойылым тамашалауға келген жүздеген көрермен алдында ойнайтын өнер адамы үшін ең бастысы – киімінің қонымдылығы мен ыңғайлылығы. Сахнада қандай қимыл жасаса да киімі өте ыңғайлы болуы шарт. Әрбіріне өз өлшеміне сәйкес бірдей болып тігіледі. Киімдер ауысып кетпес үшін нөмірленіп, әртістердің есімдері жазылып қойылады. Ал ұзақ жылдан келе жатқан дүниелер әбден ескіріп, жыртыла бастаса, онда толығымен жаңаланады.Күлуге де уақыт жоқ– Биыл зейнеткерлік демалысқа шығасыз. Осы уақыт аралығында жұмыс барысында кездескен қызықты оқиғамен бөліссеңіз... Мәселен, спектакль кезінде сахнада әртістердің киімі аяқ астынан жыртылып немесе сөгіліп кететіндей жағдайлар кездескен болар?&nbsp;– Иә, ондай қызықты әрі тығырықтан шығып кететін жағдайлар болып тұрады. Әртіс кейде сахнада ойнап жүріп секірмек болғанда немесе оқыс қимылдан киімі жыртылып кетеді. Бұрын мұндай кезде сахна сыртында ине-жібімізді ұстап біз де дайын тұратынбыз. Қазір жастар ұқыпты, мұқият болғандықтан мұндай оқиғалар сирек кездесіп жүр.&nbsp;Кейде спектакль ортасында оларға киім ауыстыруға тура келеді. Екі көмекшіммен санаулы секунд ішінде тез-тез ауыстырып жібереміз. Осындайда қызық оқиғалар көп болып жатады. Күлуге уақыт жоқ, кейіннен еске алып, әбден күлеміз.Дәл қазір есіме түсіп тұрғаны Д.Урбанның «Барлық тышқандар ірімшікті жақсы көреді» атты балалар қойылымында сиқыршы мысық рөліндегі актеріміз спектакль кезінде абайсызда тышқанның құйрығын жұлып алған сәті болған. Ондай сәтте өзімізбен бірге үнемі ине мен жібімізді ұстап, дайын жүреміз. Негізі біздің осылай сақадай сай болып дайын жүретініміз, бұл әр қойылым сайын қалыптасқан үрдіс.&nbsp;Содан не керек, әлгі жерде жылдам қимылдап, тышқанның құйрығын тігіп жібердік. Осы сияқты қызықты әрі тез тығырықтан шығып кететін жайттар жиі кездесіп тұрады. Негізі ине жібіміз қолымызда жүреді. Өйткені аяқ астынан болатын жағдайға дайын тұру қажет. Кейде өзімізді сарбаздар секілді сезініп кететін сәт те кездеседі, – &nbsp;дейді кейіпкеріміз бір күліп.– Театрға деген махаббатыңыз бөлек шығар, сірә?&nbsp;– Әрине, театр деген бөлек әлем ғой. Осы салада қызмет атқарғалы театрға деген махаббатым арта түсті. Елімізге еңбегі сіңген өнер иелерімен жұмыс істегеннің өзі қандай тамаша. Шыны керек, театр адамды тәрбиелейтін өнер ордасы болғандықтан осы салада қызмет атқару мен үшін &nbsp;абырой және үлкен жауапкершілікті талап етеді. Сондай-ақ өзімнен кейінгі келе жатқан жас толқыннан осындай жауапкершілікті көргім келеді.– Өзіңізге рухани демалысты қалай сыйлайсыз? Әлде спектакль тамашалағанды ұнатасыз ба?&nbsp;– Дұрыс айтасыз, спектакль тамашалаған ұнайды. Бірақ біздің жұмыс сахнаның сыртында болғандықтан көбіне арнайы отырып тамашалай алмаймыз. Дегенмен жұмыс атқара &nbsp;жүріп көріп те, қызметімізді жасап та үлгереміз. Соның өзі маған рухани демалыспен тең. Негізі адам өз ісін жақсы көріп атқарса, ол шаршамайды, қайта демалып, ой бөлінеді. Жаңа әрі жақсы ойлар пайда болады.Әдемі әже болғым келеді– Отбасыңыз жайлы айтып өтсеңіз... Үйіңізде сізден басқа өнер саласында жүрген жандар бар ма?&nbsp;– Отбасыма келер болсақ, Алланың берген екі қыз, бір ұлы бар. Жұбайым осыдан 9 жыл бұрын дүниеден өтті. Балаларымның барлығы отбасылы. Үйде өзімнен бөлек кіші қызым Балтай осы театрда ақпарат бөлімінің меңгерушісі қызметін атқарады. Үлкен қызым Жазира медбике болып жұмыс істейді, ұлым Руслан жедел жәрдем станциясында жүргізуші болып, жұмысын абыроймен атқарып жүр.&nbsp;Аллаға шүкір, әзірге 12 немересі бар бақытты әжемін. Ұлым Руслан, келінім Гаухар және тәтті немерелеріммен бір шаңырақ астында бақытты өмір сүрудеміз. Әзірге деп отырғаным, алдағы уақытта да немерелер қосылып, шөбере сүйсем деген арманым бар.&nbsp;– Зейнетке шыққаннан кейінгі жоспарларыңыз қандай?&nbsp;– Әзірге ешқандай нақты жоспар жоқ. Бірақ бір білерім, немерелерге қарап отыратын шығармын. Бәрі уақыт еншісінде. Жалпы әрбір адам баласы өмірге келген соң әдемі қартая білуі керек. Ел қатарлы еңбек етіп болған соң оның зейнетін көріп, ұрпағыңның алдында ақжаулық анадан әзиз әжеге жетудің өзі үлкен абырой.&nbsp;Қазіргі күні балаларым мен немерелерімнің ортасында әдемі әже болып отырғаннан асқан бақыт жоқ шығар, сірә? Құдайға сансыз шүкір етемін.&nbsp;Қысқа сұраққа нақты жауап:– Соңғы оқыған кітабыңыз?&nbsp;– Мұхтар Әуезовтің «Абай жолы» романын оқыдым. Бірақ оған да біраз уақыт болды.– Адам бойындағы ұнайтын және ұнамайтын қасиеттер? &nbsp;– Қарапайымдылық пен адамгершілікті жоғары бағалаймын. Ал өтірік пен екіжүзділікті жек көремін.&nbsp;– Өмірде нені бағалайсыз?&nbsp;– Мен үшін өмірде сыйластықтан артық сый жоқ.– Сіз үшін өмірдің мәні неде?&nbsp;– Өмірдің мәні – ұрпақта.&nbsp;– Сұхбатыңызға рақмет!

Нұрсұлу Алиева: Театр бөлек әлем

<a href="https://kyzylorda-news.kz/">Kyzylorda-news.kz.</a> Қазақ халқы ежелден «Отан – отбасынан басталады» деген мақалды бала санасына құйған. Оның өзіндік себебі де жоқ емес. Шаңырақтағы шаттықты сезініп өскен перзент ержетіп отау құрғанда ата-анасының жолымен жүретіні анық. Халқымыз отбасы құндылығын сақтап, жұбымен жарасым табуға, ұл-қызына тәлімді тәрбие беруге, ағайын-туғанның арасында сыйластықтың орнауына ерекше мән берген. Өнегелі отбасында өсіп-өніп, өзі де шаңырақ көтергенде өзгеге үлгі болып отырған отбасының бірі – Есниязовтар әулеті.Жас та болса айтары бар, алға қойған мақсаты айқын шаңырақтың иесі Азамат Қалмұратұлы. 2017 жылы Қалдыгүл Мировамен шаңырақ көтеріп, бүгінде 2 ұл тәрбиелеуде. Жоғары білімді жастар ел болашағы үшін еңбек етуді мақсат еткен. Азамат Байқоңыр қаласындағы «Байконурэнергода» қызмет етсе, жары Қалдыгүл – мұғалім. Төретам кентіндегі №269 орта мектебінде қазақ тілі мен әдебиеті пәнінен сабақ береді.<blockquote>«Ата-анамыздың жолын жалғап, біз де үлкен бір әулеттің іргесін қаласақ па дейміз. Өсіріп отырған перзенттерімізді ештеңеден тарықтырмай, үлгілі азамат, тәрбиелі буын болып өсуіне ықпал жасап, еліміздің көркеюіне, ауданның көріктенуіне үлес қосқымыз келеді. Алдағы уақытта мал шаруашылығын дамытып, кәсіптің көкжиегін кеңейту де ойда бар. Алға қойған мақсат та, жоспар да көп», – дейді Азамат Қалмұратұлы.</blockquote>Бір шаңырақ астында 6 жыл өмір сүрген жұбайлардан отбасындағы ұстанатын басты ережелерін сұрадық. Бұл уақыт біреуге көп, біреуге аз. Жас болса да, жауапкершілік арқалай білетін азамат, сұрағымызға тосылмастан жауап берді.<blockquote>«Отбасының берік болуы – сыйластықта. Балаларымыздың алдында ұрыс-жанжал көрсетпейміз. Себебі ата-анамыздан біз де оны көрген жоқпыз. Сол қағиданы берік ұстап, ұрпағымызды ұрыссыз тәрбиелеуге күш салудамыз. Себебі, алма өз жемісінен ұзаққа түспейді ғой. Олардың бізден көргенін көңілге түйіп, үлкен өмірге қанат қағары анық. Сыйластық пен сенім болса, отбасының керегесі кең, іргесі берік болады деген ойдамын», – дейді ол.</blockquote>Жалпы, қазақ отбасында әкенің орны бөлек. Әсіресе, қазіргі балалар үшін әке – қол жетпес асқар тау ғана емес, қиналғанда қол ұшын беретін, ақылымен жол көрсетіп, жетістіктері үшін арқасынан қағып, арманына қанат бітіретін жақын жанашыры болуы керек.<blockquote>«Отбасында бала тәрбиелеудегі тәжірибемді жиі қолданамын. Ал, жұмыстың түйткілдерін есіктің сыртында қалдыруға тырысамыз. Жұмыстан тыс уақытымыз өзімізге, перзенттерімізге арналуы керек. Отбасында қандай шешім қабылдайтын болсақ та барлығымыз кеңесіп, бірлесе шешеміз. Көп жағдайда үлкендердің шешімін құптаймыз. Жалпы, бала тәрбиелеудің құпиясы біреу ғана. Оларды мына қоғамның бір мүшесі ретінде бағалап, тыңдай білу керек», – дейді отанасы Қалдыгүл.</blockquote>Жас отбасы арманы мен үмітін еліміздің болашағымен байланыстырады. Олар Қазақстанның лайықты азаматын тәрбиелеу мен қоғамға пайдалы болуды мерейлі міндетіміз деп санайды.<blockquote>«Бұл отбасыға келін болғаныма 7 жылға жуық уақыт болды. Алғашқыда ата-енем, қайынсіңлілеріммен бірге тұрдық. Қазір жұмысымызға байланысты Байқоңырда тұрып жатырмыз. Алайда әр аптадағы демалысымызды қара шаңырақта өткіземіз. Қайынатам бұрын әскери қызметкер болған. Қазіргі таңда ата-енем еңбегінің зейнетін көріп отырған үлгілі жандар. Келіндік өмірге келер болсам, ата-енемнің, қайын аға-әпкелерімнің алғысын алып жүрген, отбасыдағы жалғыз келінмін. Менің өмірлік ұстанымым – үлкенді сыйлау. Өз ата-анама деген құрметім қандай болса, ата-енеме де құрметім дәл солай. Қолымнан келгенше қазақтың салтын ұстанып, қазақ келіні деген атқа лайық болуға тырысып келемін. Ең бастысы –Алланың, екінші жолдасымның ризашылығын алу. Отағасы да мені жары, балаларының анасы ретінде құрметтейді, сыйлайды. Ортамызда жақсы сыйластық бар. Аллаға шүкір. Қандай өтініш айтсамда сөзімді жерге тастамай, әрдайым жанымнан табылып орындауға тырысады. Аяулы жарын, балаларының анасын сыйлаған ер азаматтың ұрпағы да бұйырса Алла қосқан қосағын дәл осындай үлгіде сыйлайды деген сенімдемін. Себебі отағасы өз балаларына әке болудың әдемі үлгісін, жар сыйлаудың өнегесін көрсетіп жүр», – дейді үлгілі келін.&nbsp;</blockquote>Отбасылық байқаулардан қалыс қалмайтын жас жанұя заманға сай әлеуметтік желіде де белсенді. Тик-ток бағдарламасының белсенді қолданушысы. Отбасылық түрлі видеоларды түсіріп, көптің ықыласына бөленіп жүрген жайы бар. Мәселен, жақында «Біз бақытты отбасы: есірткіге қарсымыз» атты облыстық байқауға қатысып, жүлделі ІІ орынды иеленген. Сонымен қатар «Бақытты отбасы» деген номинацияны да жеңіп алған. Байқаудың &nbsp;басты шарты есірткіге жоламау жөнінде бейнебаян түсіру болса, бұл отбасы бейнебаян түсіріп қана қоймаған, оған қажетті әннің сөзін жазып, отбасылық флешмоб билеп, ерекше етіп ұсынған. Тағы бір қызығы, ата-анасы секілді балалар да түрлі видео түсіруге икемді.&nbsp;Әнді де салып, биді де билеп, оны әдемі етіп көрерменге ұсына алатын өнерлі отбасының отанасы да кентте өткізілген келіндер байқауынан жүлделі ІІ орынды иемденген.&nbsp;<blockquote>«Түрлі отбасылық байқауларға қатысуымыздың басты себебі – отбасы ұйымшылдығын балаларымызға көрсету, оларды бірлікке баулу. Ұлдарымыз – біздің мақтанышымыз, ата-әжесінің қуанышы. Олар мейірімді, ақылды, өнерлі және көпшіл болып өсіп келеді. «Ұяда не көрсең, ұшқанда соны ілесің» деген сөз бар ғой. Отбасында еңбекке төселіп, жақсылық пен жамандықты ажырата білген бала өмірдің шиыр да шытырман жолында адаспайды. Отбасының шуағын өздерімен бірге алып жүретін болады», – дейді олар.</blockquote>Шаңырағы биік, босағасы берік Есниязовтар отбасы таң атса, бірі – қызметіне, бірі – оқуына барса, кеш бата үйіне асығады. Себебі бұл шаңырақта бір-біріне деген құрмет, сыйластық пен сүйіспеншілік есіп тұрады. Берекелі отбасы бақыттың кілті – бірлікте, сыйластықта деп біледі. Бұл отбасының өзгелерден өнегесін арттырып тұратыны да осы ерекшелігі болса керек.

Байқоңырлық бірлігі жарасқан жас отбасы

<a href="https://kyzylorda-news.kz/">Kyzylorda-news.kz.</a> 26 мамыр сағат 10.00-де Қызылорда облысы кәсіпкерлер палатасының алаңында «Алтын сапа» сыйлығы мен «Қазақстанның үздік тауары» өңірлік көрме-байқауына қатысуға ниетті кәсіпкерлерге арналған оқыту семинары өтеді.Семинарда спикерлер кәсіпкерлерге қос байқауға қатысу үшін қойылатын талаптар, өңірлік және республикалық байқаулардың ерекшелігі, жеңімпаздарға берілетін басымдықтар т.б.жөнінде кең көлемде ақпарат береді.Сондай-ақ Қазақстан Республикасы Президентінің «Алтын сапа» сыйлығын алуға арналған байқауы және «Қазақстанның үздік тауары» көрме-байқауын өткізу тәртібі мен критерийлері бойынша бағалау әдістемесі түсіндіріледі.Айта кету керек, бүгінге дейін өңірден «Алтын сапа» сыйлығына 3, «Қазақстанның үздік тауары» өңірлік көрме-байқауына 46 кәсіпкер өтінім берді. Өтінімдер әлі де қабылданып жатыр. Сұрақтар болса Қызылорда облысы кәсіпкерлер палатасына 8 /7242/ 40-09-81 байланыс нөмірі арқылы хабарласуға болады.Кәсіпкерлер палатасының мекенжайы: Қызылорда қаласы, Қорқыт ата 123, «Бизнеске арналған үкімет» ғимаратының 3-қабаты.

Қазақстан және Қызылорда облысының жаңалықтары