<a href="https://kyzylorda-news.kz/">Kyzylorda-news.kz.</a>&nbsp; Сенат төрағасы Мәулен Әшімбаев сенат кулуарында даулы ток-шоуға байланысты пікір білдіріп, бағдарлама журналистері жазалана ма деген сұраққа жауап берді. Бұл туралы <a href="https://stan.kz/">Stan.kz</a> ақпарат агенттігі хабарлайды.&nbsp;<blockquote>"Бұл мәселеге Мәдениет және ақпарат министрі Аида Балаева өз бағасын берді. Өйткені министрлік осындай мемлекеттік арналармен жұмыс істеп отыр. Сондықтан тиісті баға берілді және бұл ток-шоу жабылды. Халықтың да пікірі ескерілді деп айтсақ орынды. Осы ток-шоуды дұрыс ұйымдастыра алмаған арнада&nbsp;жұмыс істейтін қызметкерлерге де баға берілген шығар. Әрі қарай мемлекеттік арналарда мұндай мәселе мен&nbsp;олқылықтар болмайды деп санаймыз", - деді сенат төрағасы.</blockquote>Тілшілер сенат спикерінен "Ток-шоу жабылды, бірақ қандай да бір жаза қолданылу керек пе?" деп сұрады.<blockquote>"Редакцияның, "Хабар" телеарнасының ішінде де бұл мәселеге байланысты тиісті сараптама, шешімдер болады деп ойлаймын. Өйткені бұл мәселені министрлік бақылауында ұстайды. “Бұл осымен бітті, журналистер, енді басқа жобамен айналысыңдар” деген шешім бола қоймайтын шығар. Өйткені агенттік&nbsp;басшылығы да, министрлік&nbsp;басшылығы да бұл мәселенің жауапкершілігін&nbsp;сезіп отыр. Сол себепті агенттік басшысы тарапынан тиіс&nbsp;шешім болады деп ойлаймын", - деді Мәулен Әшімбаев.</blockquote>Сонымен қатар тілшілер салық төлеушілер есебінен күн көріп отырған&nbsp;және осындай мазмұндағы бағдарламаларды&nbsp;дайындайтын мемлекеттік арналар қажет пе деп сұрады сенат спикерінен.“Қазір бұл тақырып біздің қоғам үшін өзекті және өткір екені түсінікті. Бірақ бір&nbsp;жағдайға бола&nbsp;барлық мемлекеттік арнаны&nbsp;кінәлау дұрыс емес шығар. Олар да өздерінің белгілі бір функциясын, яғни ақпараттандыру, елдегі жағдайды жариялау міндетін орындап жүр.&nbsp;<blockquote>Қалыпты елде әртүрлі бұқаралық ақпарат құралдары – мемлекеттік және мемлекеттік емес болуы керек. Қазақстан заңына сәйкес жұмыс істейтін блогерлер де қажет. Менің ойымша, тараптар өздері үшін қорытынды шығарды”, –&nbsp;деп атап өтті сенат басшысы.</blockquote>Айта кетейік,&nbsp;12 наурызда "Хабар" арнасының "Бірақ" отбасылық ток-шоуында тұрмыстық зорлық-зомбылық көрген әйелге арналған бағдарлама көрсетілді. Ток-шоу кезінде <a href="https://stan.kz/memlekettik-arna-zhurgizushileri-tikeley-efirde-tyrmist-396945/">жүргізушілер тұрмыстық зорлық-зомбылық көрген әйелді күйеуімен татуласуға мәжбүрледі</a>. Бұл&nbsp;жағдай ел арасында сынға ұшырап, дау тудырды. Кейінірек Мәдениет және ақпарат министрі Аида Балаева бағдарлама жабылғанын мәлімдеді.&nbsp;Фото: Сенат кулуары

"Бірақ" бағдарламасының журналистері жазалана ма - Сенат төрағасы жауап берді

<a href="https://kyzylorda-news.kz/">Kyzylorda-news.kz</a> Қызылорда облысында облыстық онкологиялық диспансердің жылжымалы медициналық кешені жұмыс істейді. Естеріңізге сала кетейік, өткен жылы «Қазақстан халқына» қоры облысқа онкологиялық ауруларды дер кезінде скринингтік тексеру мен профилактикалық тексеруден өткізуге арналған заманауи жылжымалы медициналық кешен сыйлаған болатын.Шиелі ауданындағы баспасөз туры барысында журналистер онкологиялық қызметтің алғашқы жылжымалы медициналық кешенінің жұмысымен танысты.Облыстың ірі аудандарының бірінде 78 мыңнан астам халық аудандық емханада тіркелген. Диспансерлік есепте 122 онкологиялық науқас болса, оның көбісі сүт безі қатерлі ісігіне шалдыққан.&nbsp;Өткен жылы Нұргүл Атабаеваға сүт безінде киста мен түйін бар деген диагноз қойған. Әйел емделді. Облыстық онкологиялық диспансер дәрігерлерінің үкімін тағатсыздана күтіп жүрді. Қуантарлығы, жаңа өскіндер жоқ.<blockquote>- Жылжымалы медициналық кешенде маммография және ультрадыбыстық зерттеу жүргізді. Онколог шешімін берді. Уақытылы анықтау және емдеудің арқасында патологиялар жоқ. Әр алты ай сайын тексеруден өтуді ұсынды. Міндетті әлеуметтік медициналық сақтандыру жүйесінің арқасында қымбат медициналық қызметтер қолжетімді, жылжымалы медициналық кешенінде тексерулерден өтуге болады. Бұл әсіресе қатерлі ісікке шалдыққан науқастар үшін маңызды», - дейді Нұргүл Атабаева.</blockquote>Жылжымалы медициналық кешен томосинтез функциясы бар сандық маммографиялық аппаратурамен, ультрадыбыстық жүйемен және жоғары зерттеу дәлдігі бар компьютерлік томографпен жабдықталған. Құрал Жапонияда жасалған. Бұл санаттағы медициналық жабдықтар Қазақстанда алғаш рет пайдалануға берілді.Қатерлі ісік өлім жазасы емес, дүрбелеңге себеп емес, дейді Шиелі ауданаралық ауруханасы бас дәрігерінің орынбасары Қазбек Шәукебаев. Бұл сіздің денсаулығыңызға жауапты көзқарасты арттыруға және қалпына келтіруге қадам жасауға ынталандыру.<blockquote>- Скрининг – ауруды ерте анықтау. Бұл тегін медициналық қызмет міндетті әлеуметтік медициналық сақтандыру жүйесіндегі сақтандыру мәртебесіне қарамастан барлық азаматтарға қолжетімді. Сондықтан уақтылы тексерулерден өту маңызды. Қатерлі ісік ерте сатысында анықталған науқастар саны көп. Онкологиялық науқастардың өмір сүру ұзақтығы артты. Әрине, бұған МӘМС жүйесі ықпал етіп, денсаулық сақтау саласының жұмысын құрылымдады, қаржыландыру көлемі артты. Мәселен, өткен жылы аудандық аурухана компьютерлік томографиялық аппарат сатып алды, - деп атап өтті Қазбек Шәукебаев.</blockquote>Биыл Шиелі ауданаралық ауруханасына Әлеуметтік медициналық сақтандыру қорынан 7,9 млрд теңгеге жуық қаражат бөлінді.<img src="https://knadmin.beoblood.kz/uploads/shieli_pmk_2_7e9f6a9391.jpg" alt="шиели пмк 2.jpg">

Шиелі: Ауыл тұрғындары қатерлі ісік скринингінен өтуде

<a href="https://kyzylorda-news.kz/">Kyzylorda-news.kz</a>&nbsp; Амал мерекесі күні облыс әкімі Нұрлыбек Нәлібаевтың қатысуымен Қызылорда қаласына қарасты Тасбөгет кентінде 134 отбасыға тұрғын үй кілтін табыстау рәсімі өтті. Аймақ басшысы жиналған жұртшылықты Амал мерекесімен және алдағы Ұлыстың ұлы күні – Наурыз мейрамымен құттықтады.<blockquote>«Мемлекет басшысы Қасым-Жомарт Кемелұлы «Халықтың басым көпшілігі үшін тұрғын үй – ең өзекті мәселе. Мемлекет шын мұқтаж адамдарға ғана жәрдем береді», – деп атап өткен болатын. Халықты баспанамен қамту еліміз үшін негізгі басымдықтың бірі десек, өңірде бұл бағытта тындырымды тірліктер атқарылуда. Өткен жылы аймақта 4 108 пәтерлік 300 тұрғын үйдің құрылысы жүргізілді, 2400-ге жуық пәтер табысталып, 11 мыңнан астам тұрғынның баспана мәселесі шешімін тапты. Халықтың тұрмыс жағдайының жақсаруы, жайлы өмір сүруінің кепілі болып саналатын баспанамен қамту жұмыстары биыл да қарқынды жүруде. Бюджет қаражаты есебінен 14,3 млрд. теңгеге 1890 пәтерлік 70 тұрғын үй салынады. Оның 16-сы жеті қабатты болады. Жыл басында Тасбөгет кентінде 38 отбасы баспаналы болса, бүгін міне, өздеріңіздің қатысуларыңызбен 134 отбасы қоныс тойын тойлайды. Бұл – мемлекеттің тұрғындарды қолдауының нақты көрінісі», – деді аймақ басшысы.</blockquote>Айта кетейік, көпқабатты тұрғын үйді «СК Данекер» ЖШС салды, баспана әлеуметтік жағынан осал отбасыларға берілді.Рәсімде көпбалалы ана Феруза Әбжанова қоныстой иелері атынан қуанышын жеткізіп, еңбек ардагері Төлеш Әлиев ақ батасын арнады. Өңірдің әлеуметтік-экономикалық дамуына үлес қосқан кент тұрғындары мен құрылысты сапалы салуға атсалысқан мердігер мекеме қызметкерлері марапатталды.Бүгінде Қызылорда қаласы мен елді мекендердің келбетіне көрік қосатын әлеуметтік нысандар құрылысы қарқын алған. Сол жағалаудан 300 орындық жатақханасы бар 400 орындық физика-математика мектеп-интернатының құрылысы жүргізілуде. Мемлекет басшысының бастамасымен қолға алынған «Жайлы мектеп» ұлттық жобасы аясында биыл 10 мектеп ел игілігіне табысталып, тағы 11-нің құрылысы басталды. Балалар мен жасөспірімдер шығармашылығын шыңдау мақсатында «Шығармашылық академиясы», Жаңақорған, Шиелі аудандарында «Оқушылар үйі» мен «Өнер мектептері» салынады. Өткен жылы «Отбасы орталығы» және «Анаға тағзым» орталығы өз қызметін бастады. Жақында 1000 орындық «Өнер орталығы» салтанатты түрде ашылса, сол жағалаудан жаңа өлкетану музейі бой көтереді.Қызылорда қаласында 36 млрд. 400 млн. теңгеге бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы басталды. Жаңа «Қан орталығы» Медицина қызметкерлері күні қарсаңында пайдалануға берілмек.Мемлекет басшысының бастамасымен қолға алынған «Ауылдық денсаулық сақтауды жаңғырту» ұлттық жобасы аясында өңірде жалпы құны 11 млрд. теңгені құрайтын 27 нысан салу көзделген. Өткен жылы елді мекендерде 15 дәрігерлік амбулатория, 1 медициналық бекет ел игілігіне табысталып, қазір 30 мыңнан астам халыққа қалтқысыз қызмет көрсетуде.Облыс орталығында халықаралық стандарттарға сәйкес «Орталық стадион» (20,9 млрд теңге) және жабық бассейні бар көпсалалы дене шынықтыру-сауықтыру кешені (6,8 млрд теңге) ел игілігіне табысталады. Жақын күндері заманауи үлгідегі автовокзал ғимараты пайдалануға беріледі.Инвесторлар қолдауымен 37 млрд. 600 млн. теңгенің жобалары іске асуда. Қорқыт ата әуежайының жаңа терминалы салынуда. Жоба құны – 20 млрд теңге, жаңа терминал осы жылы пайдалануға беріледі. «ҚазГерМұнай» компаниясының демеушілігімен 350 орындық заманауи үлгідегі «Оқушылар сарайының» құрылысы қарқын алды. «Саутс Ойл» компаниясы 650 орындық музыкалық колледж ғимаратының құрылысын бастады.Биыл 7 ауданда неке қию залы, кітапхана, музей, архив, жастар сарайы, ардагерлер мен аналар үйін біріктіретін, құны 11,5 млрд. теңгені құрайтын «Руханият» орталықтары салынуда. «Самұрық Қазына Траст» қорымен бірге «Үстел теннисі орталығының» құрылысы жүргізілуде.<img src="https://knadmin.beoblood.kz/uploads/134_kyzylordinskim_semyam_vruchili_klyuchi_ot_kvartir_2_3147b21b16.jpg" alt="134 кызылординским семьям вручили ключи от квартир 2.jpg"><img src="https://knadmin.beoblood.kz/uploads/134_kyzylordinskim_semyam_vruchili_klyuchi_ot_kvartir_1_925263cd6d.jpg" alt="134 кызылординским семьям вручили ключи от квартир 1.jpg">

Мереке күні қызылордалық 134 отбасы баспана қуанышына кенелді

<a href="https://kyzylorda-news.kz/">Kyzylorda-news.kz</a>&nbsp; Қызылордада өткен «Innofest Qyzylorda – 2023» облыстық инновациялық жобалар фестивалі жеңімпаздарының бірі – №285 мамандандырылған мектеп-лицей-интернатының 9 сынып оқушысы Жайылхан Бекзат Маратұлы. Ол «Цифрлық сабақ жоспары» жобасын әзірлеп, таныстырған болатын. «Біздің платформа болашақта Kundelik.kz-тен кейін екінші орында болады» дейді жетекшісі Дархан Совет бізбен әңгімесінде.<blockquote>«Анам – мұғалім. Сабақ жоспары әзірленіп, ол бекітіліп, қолданысқа енгізілемін дегенше қанша уақытын жұмсайды. Әрине, оған қосымша қағаз шығынын да айту керек. Бұл жоба арқылы мен екі нәрсені үнемдейтінін айттым. Біріншісі – уақыт, ол қазіргі сәтте бәрінен құнды. Екіншісі – қағаз, сия тәрізді түрлі шығындар. Иә, осы күні мұғалімдер көптеген кедергілерді бастан өткеруде. Қалған уақытын өзінің кәсіби біліктілігін арттыруға, балаларға сапалы білім беруге жұмсар еді», – дейді жеңімпаз Бекзат.</blockquote>Бекзат осы сайыста Қорқыт ата атындағы Қызылорда мемлекеттік универ-ситетінің білім грантын жеңіп алды. Аламанның бас бәйгесі де осы болатын. Бекзатпен бірге оның жетекшісі Дархан Совет те қуанды. Әрине, шәкірт жетістігі – ұстаз еңбегінің көрінісі.<blockquote>«Бар шаршағаныңды ұмытып, қуанатын кезеңің – жеңіске жеткен сәт. Мәселен, диқан егінді аман-есен жинап болғанда қалай қуанып, аптығын басса, біз де сол сезімде болдық. Бір айырмашылығы, біздің егін жинау науқаны толастамайды. Күзде бітті, болды деген жоқ. Мойындағы үлкен жауап-кершілік пен әріптестердің артқан сенімі қай кезде де алға жетелейді. Біздің білім ошағының ашылғанына да көп уақыт бола қойған жоқ. Бірақ соған қарамастан шәкірттерімізбен бірге бұл оқу орнына түсудің өзі жетістік екенін танытқымыз келді. Біздің мақсат білім грантын ұтып алумен шектелмейді. Алда талай аламанның көркін қыздырамыз, талай биікті бағындырамыз. Білім айдынында талай мықтының қанатын қатайтатын деңгейімізді танытамыз», – дейді техника ғылымдарының магистрі Дархан Жамалханұлы.</blockquote>Бекзат Маратұлы осындай мықты ұстаздардан білім алып, алда да өзінің шеберлігін шыңдай түсетініне сенімді. Тоқмейілсу адамды тежейтініне біледі.<blockquote>«Білімдінің күні – жарық» дейді халық даналығы. Әлемдегі қай мамандықты меңгеремін десеңіз де, алдымен білім керек. «Білімсіз күнің жоқ, оқусыз білім жоқ» деген ата-бабамыз да осы ерекше құндылықтың қадірін бағамдаса керек. Мен әкемді үлгі тұтамын, мақтан етемін. Әкем тәрізді азамат болғым келеді. Кісі ақысын жемейтін, тура жолдан тайқы¬майтын, мықтымын деп көкірек ұрмайтын қазақтың бір баласы болсам жеткілікті. Мамандыққа келсек, әлі тұрақты мақсат қойғаным жоқ, өйткені, кім болатынымды шешпедім. Мүмкін, ІТ саласының өкілі, бәлкім жеке кәсіпкер болармын. Қайткен күнде де тәуелсіз еліміздің тұғырын нықтап, әлем төріндегі даңқын асқақтататын азамат болсам жеткілікті. Ал бүгінгі жобама келсем, сәтін салса, қолданысқа еніп, ұстаздарыма тигізген пайдам болар еді», – дейді дарынды Бекзат.</blockquote>Cайыста бақ сынаған 600 баланың ішінен аламанның алдына шығып, биіктерді еңсерген Бекзаттың бұл жетістігі Сыр өрендерінің өресі биік екенін тағы бір байқатты. Бекзат тәрізді ондаған бала жүйрік атанып, жетістік желкенін керді. Мұндай жастардың қалыптасып келе жатқанын көру – біздің де басқа жазған бақ екені рас.&nbsp;Фото: Нұрболат Нұржаубай

Сыр дарыны пайдалы платформа әзірлемек

Білесіз бе, өңірдегі химия-биология бағытындағы Назарбаев зияткерлік мектебінің түлегі Майя Жалғасбаеваға бір емес, тоғыз бірдей оқу орны таласты.&nbsp;Еуропа төріндегі Германияның «Landshut Hochschule», «THWS», «Hochschule Coburg», «HSWT», «Hochschule München», «Hochschule München», «Deggendorf TH», «TH Ingolstadt» және «Westfälische Hochschule» жоғары оқу орны біздің қызға «Бізде оқы» деп ұсыныс білдірген. Білім биігіне қанатын қаққан Майяның таңдауы Ландсхута Қолданбалы ғылымдар университетіне түсіпті. Бүгінде ол аталған білім ордасында қазақ жастарының қаншалықты білімді, ынталы, талапшыл болатынын көрсетіп жүр. Сыр елі мақтан еткен перзентімен дидарласып, сұқбаттасудың сәті түсті.– Жерлесіміздің елдің мерейін үстем етіп, білімнің биік шыңдарын бағындырып жүруі – біз үшін үлкен қуаныш. Сіз үшін біз өзіңіздей қуаныштымыз. Биыл он жылдығын атап өтіп жатқан алтын ұяңыз, Назар­баев зиятк­ерлік мек­тебіне ыстық ықы­ласы­ңыз­ды көріп қуан­дық. Сізге бұл мек­теп не берді?<blockquote>– Ең алдымен, менің оқыған мектебім маған ең керемет базалық білім мен ары қарайғы дамуыма ең қажетті қасиеттерді сіңірді. Мектебім ақжарқын ұстаздарды сыйлады. Мұндай ұстаздардың сабағына қатысуға құлшынып тұрасың, ойландырған әрбір сауалыңның жауабын білетініңе сенімді әрі ол жерде жаныңа жылулық сыйлайтынын білесің. Осындай жайсаң жандардың берген білімімен қатар тәрбиесі де адамдық қасиеттің ауылына тұрақтайды. Тағы бір айта кетерлігі, мектебім әркез өзіңді алға жетелейтін ең керемет бәсекелестік ортаны сыйлады. Бұл орта мені бір орында тұрақтамауға, әрқашан алға жүруге ұмтылысымды арттыруға сеп болды. Ол орта мақсаттарыма жетеледі. &nbsp;Мектеп бізге болашақ мақсаттардың негізін қалап береді. Қоғамда өзіңнің орныңды ойып тұрып алуға тәрбиеледі. Мен өзімнің тұлғалық дамуымның алғышарттары осы мектепте, Назарбаев зияткерлік мектебінде қаланғанына қуаныштымын.</blockquote>–&nbsp;«Білімдінің күні – жарық» дейді дана халқымыз. Білім алу үшін не керек, қандай қабілет керек? Бұл бағытта орта маңызды ма?<blockquote>– «Кез келген жетістіктің артында 99% еңбек пен 1% талант тұрады» дегенді қолдаймын. Өмірлік ұстанымым десек те болады. Адам өзін белгілі бір салада шыңдау үшін еңбек пен тәртіп бірінші орында тұрады. Мақсатын белгілеп, оған жетер жолын жоспарлап алған әрбір адам шын мәнінде жетістікке жете алады. Адам баласының қалыптасуына ортасы маңызды рөл атқарады. «Егер сіз бес миллионермен аралассаңыз, алтыншысы сіз боласыз» деген бар. Сіздің ортаңызда өз уақыты мен мүмкіндігін, энергиясын ұтымды басқара білетін адамдар болса, сіз де өз мақсатыңызға жетер жолды айқындап, оған күш саласыз. Сондықтан сапалы білім алу үшін аспандағы айды алар құдырет керек емес. Бар болғаны ниетіңіз, дұрыс орта және тәртіп болса, жеткілікті.</blockquote>– Германияда алып жатқан біліміңізге қандай баға берер едіңіз? Қандай мүмкіндіктер бар? Біздің елдің олардан үйренері көп пе екен?<blockquote>– Осы жерде ерекше тоқталып өтетін бір нәрсе бар. Германияда оқуды таңдағанымның басты себебі практикалық түрде мамандану. Мен үшін бұл маңызды ерекшелік. Алған теориялық біліміңді тәжірибеде жүзеге асырып, өзіңді сынайсың. Оқып жүрген университеттің басты ұстанымы осында жатыр. Бұл көп нәрсені шешеді. Студенттердің өз мамандығы бойынша машықтануына, оқу бітірген соң қолына дипломын ұстап, бос қалмауына жасалған жағдай. Жұмысқа орналасқанда алдымда не күтіп тұрғанын білемін, жұмыс процесімен алдын ала таныс боламын. Бұл жұмыс берушінің де, жұмыскердің де мәселесін шешеді. Қазақстандық студенттерге осы нәрсе жетіспейді. Рас, елімізде теория мен тәжірибені ұштастырып, қолға алып жатырған оқу орындары бар. Бірақ тағылымдамадан өтушілерге жауапкершілікті тапсырмалар бермейді, аяққа оратылмас үшін жеңіл жұмыс беріп қойып, ісімен айналыса береді. Бұл ешқандай да құпия емес. Ал Германияда мүлдем басқаша. Өз ісінің хас шеберлері ізінен шәкірт тәрбиелеп, оларға бойындағы бар қабілеті мен өнерін үйреткісі келеді. Оны көріп тұрған студенттің ұмтылысы еселеп арта түседі. Бұл нәрсені біз немістерден үйренуіміз керек.</blockquote>– Біздің елде, өзіңіз оқыған білім ошағында бәсеке бар ма? Жалпы, білім алуда бәсеке қаншалықты керек?<blockquote>– Бәсеке алдыңғы орында тұрады. Иә, мен сондай адаммын. Бала кезден өнер мен ғылым бағытындағы көптеген байқауларда бақ сынадым. Өзімді жан-жақты қырымнан байқап көрдім. Міне, осы нәрсе бәсекеге қабілетті болуға, төтеп беруге, өзгеден оза жүруге тәрбиеледі. Әрине, бәсеке дегенді дұрыс жағынан түсінуге және оны қабылдауға үйрендім. Өйткені, оның екінші қыры бар. Одан қашық жүрген абзал. Көпшілік бәсеке мен бақталастықты ажырата алмай қалып жатады. Бұл жерде таза бәсекені айтып отырмын. Әрқашан алда болуым керек деп өз-өзіме мотивация сыйладым, әлі де солай келемін. Айналамдағы кез келген адамның жеңісі одан да күшті болуға итермеледі. Өзгелердің жеңісіне қуана аламын, қызғанбаймын, ал бәсекелестерің жауың емес, олар сенің жеңіс жолындағы сапарластарың. Осыны әркез ойда ұстау керек. Бәсекелестеріңсіз өз бойыңдағы мінді табу қиын, биікке өрлегенде артқа тартатын қандай қасиетің барын да оларсыз таба алмайсың. Сондықтан бәсеке дегенде де оның ең жақсысын таба білу керек.</blockquote>– Жетістікке жетуде сіздегі ұстаным қандай және сізге мотивация берген қандай күш?<blockquote>– Германияда білім алу ең биік мақсаттарымның бірі болды және бұл мақсатымның өмірімді өзгертіп жіберетініне сендім. Германияға оқуға түсу үшін неміс тілін С1 деңгейіне дейін үйренуім керек болатын. Айтарлықтай көп уақыт болған жоқ, сондықтан жағдайдың жеңіл емес екенін сезіндім. Өзімнің мүмкіндіктеріме сергек көзқараспен қарап, шыңдай түсуім керек болды. Әрбір минут, әрбір секунд, тықылдап жүрген сағат тілі мүмкіндіктер алаңымды тарылтып жатқандай еді. Үзіліс, қолым қалт еткен әрбір сәтте неміс тілін оқып, емтихан тапсырмаларының байқау сынамаларын тапсырдым. Күн санап білімімді арттыра түстім, неміс тілінен сөздік қорымды кеңейттім. Ойын-сауықты, қызықты кештерді ысырдым, бәрінен бас тартуыма тура келді. Есесіне тынымсыз ізденістің арқасында алған беттен қайтпайтын қайсарлығымның көмегімен емтиханнан өтіп, сертификат алдым, Германияның 9 жоғары оқу орнынан шақырту алдым.Ең бірінші адам өзінің мақсатына қаншалықты ынтық, қаншалықты құмар екенін сезіну керек. Сіз мақсатыңызға жету жолында қандай нәрседен бас тарта аласыз, қаншалықты жан-тәніңізбен беріле аласыз, осының бәрін сараптаңыз. Мақсатқа жетуде дұрыс шешім қабылдап, дұрыс таңдау жасай білу керек. Міне сонда ғана сіз мүмкін еместі шынайы өмірге алып келе аласыз.</blockquote>– Сіз үшін өмірде ең маңыздысы не? Бәрінен бұрын не нәрсені биік қояр едіңіз?<blockquote>– Бұл сұрақтың жауабы қарапайым. Мен үшін ең бастысы – отбасы. Мына ғаламда одан артық ешкім де, ешнәрсе де жоқ. Өзімнің бақыт әлемімді қалап, алтын ұяның іргетасын нықтасам деймін. Өмірімдегі ең басты құндылық – отбасы. Өзіңді қауіпсіз, бейқам сезінетін, ешкім ешқайда қуа алмайтын ең қымбат орта. Кеудеңді ең ғаламат сәттермен, бақытпен, шаттықпен, қуанышпен толтыратын, өзіңді дамытуға барынша көмектесетін, қуансаң қуанып, мұңайсаң мұңаятын, сенің өсуіңе бар күшін салатын ортаң – отбасың. Ол – сенің командаң. Болашақта өзіңнің мақтанышыңа айналуың керек ортаны қалыптастыру үшін ең алдымен өзіңді дайындауың керек. Бұл – ең үлкен жұмыс.</blockquote>– Оқуыңызды бітірген соң жоспар қандай? Сонда қаласыз ба, әлде елге келіп қызмет етесіз бе?<blockquote>– Шетелдік компанияларда жұмыс істеу арқылы тәжірибе жинау – зор мүмкіндік және &nbsp;бұл мүмкіндікті жіберіп алмауға тырысамын. Бірақ өмір бойы шетелде тұрақтап қалу тілегімдегі нәрсе емес. Әу бастан Қазақстан мен Германия арасындағы логистика саласындағы мүмкіндіктерді зерттедім. Оның болашағы зор екеніне көзім жетті. Осы саладағы қат мамандардың арасында елге қызмет етіп, өзімді осы саладан табатыныма сенімдімін. Осы жерде ерекшелеп айта кететін нәрсе: отбасымды, шаңырағым мен керегемді атамекенімде қалап, өзімнің туған жеріме туымды тігуім керек. Бұл – принципім. Болашақта өзімнің кіндік қаным тамған қасиетті қазақтың ортасында балаларымды туған тілге, Отанға, ұлтқа жанашыр етіп қалыптастырғым келеді. Олардың бойына ұлттық құндылықтарды сіңіргім келеді. Ал мұндай үлкен жұмысты бөгде елде жасаған дұрыс емес. Қазақ мұндайда «Өзге елде сұлтан болғанша, өз еліңде ұлтан бол» деп кесіп айтқан. Ал дүниетанымыңды кеңейтіп, көзқарасыңды байыту үшін төрткүл дүниені шарласаң да қылмыс емес. Ол – өзіңді дамыту.</blockquote>– Білім ошағына ақжолтай тілегіңізді білсек…<blockquote>– Түлеп ұшқан алтын ұям – Қызылорда қаласындағы химия-биология бағытындағы Назарбаев зияткерлік мектебіне жасаған зор мүмкіндіктер үшін алғыс айтқым келеді. Оқу орныма талантымен талайды тәнті етіп, білімнің биік шыңын бағындырар, білім ошағының беделін көтеріп, мәртебесін үстем етер болашағы зор шәкірттері көп болуын тілеймін. Білім ошағымыз, алтын ұямыз көркейе берсін, дами берсін, қарқыны арта берсін.</blockquote>– Уақыт тауып, сұқбат бергеніңіз үшін алғыс білдіреміз.&nbsp;

Тоғыз оқу орны таласқан қызылордалық түлек

<a href="https://kyzylorda-news.kz/">Kyzylorda-news.kz</a>&nbsp; Ақ халатты арындай таза ұстап, Гиппократ антына берік болып жүрген дәрігерлер&nbsp; қандай құрметке болса да ие.&nbsp;Жалағаштық жас дәрігер Жарқынбек Сыдықов аудан әкімінің үздік жастарға табыстайтын “Жалын” сыйлығын иеленді. “Бұл – маңдай тер мен табанды еңбектің, менің ғана емес, ұжымымның жемісі”, – дейді ол.Дәрігер үшін әрбір минут алтынмен пара-пар. Секундта адам тағдыры шешілуі мүмкін. Осы ретте хирург Жарқынбек Сыдықовпен қауырт тірлік арасында сөйлесудің сәті түсті. Отадан шығып, отаға кіретін білікті маман үшін кез-келген марапат пен мадақтан халықтың алғысы маңызды.<blockquote>“Медицинада жеті жыл білім алып, алған білім мен жиған тәжірибем арқылы 2009 жылдан бастап елге қызмет етіп, хирург-травматолог болып еңбек етудемін. Алдыма келген әрбір науқас маған өз бауырымдай. Талпына жүріп, халықтың тән жарасынан бөлек, жан жарасын таңып, мейірім көрсетіп, алғысын алудамын. Бұл – үлкен мәртебе”, – дейді ол.</blockquote>Аудан халқы Жарқынбектей жарқын жүзді дәрігерін ұлықтап, аудан әкімінің жастар сыйлығына ұсынған болатын. Әрине, бұл марапатты ұжымның жеңісі, еңбектің жемісі деп ұғатын абзал жан алда да халыққа тоқтаусыз қызмет ететінін жеткізуде. Кеуде сарайындағы осынау елге қызмет ету деген басты міндеттің үдесінен жауапкершілікпен шығып жүр.<blockquote>“Әрине, жауапкершілік деген медицинада, оның ішінде хирургияда бірінші орында тұру керек. Егемен елдің ертеңін, дені сау ұрпақ қалыптастырып, бүгінгі толқынға қызмет етудеміз. Адам өмірін құтқаруда секундтар маңызды рөлге ие. Қай жағдайда жауапкершілікпен қараймыз. Кез келген уақытта қызметке дайын болу – басты міндетіміз. Алда да халыққа қызмет тоқтап қалмайды. Ал марапатқа келсек, бұл – еңбекті елеу.&nbsp; Ұжымның еңбегін көре білу деп түсінемін”, – дейді ол.</blockquote>Иә, қашан да қызметті алдыңғы қатарға қойып, тынымсыз тірлік пен ізденіс үстінде жүретін Жарқынбектің ерік-жігері мықты. Қазақтың осындай марғасқа ұлдары халық қамын ойлап жүр. Кейде тұғырға талпынып, жасанды қамқорлығымен көпшілік алдында жүргендердің мерейі үстем болып жатады. Тіпті, көп жағдайда десек болады. Сондайда Жарқынбек сияқты адал, еңбекқор азаматтар лайық еді ғой деп қаласың. Міне, Жарқынбектің әр қадамы жарқын болашаққа бастап, халқын құтқарып жүр. Мерейің үстем&nbsp; болсын, дәрігер!Денсаулық – кез-келген адам үшін баға жетпес байлық! Адам өмірін ұзартуға септігін тигізіп, ажалдан арашалаушы дәрігер мамандығын халқымыз ежелден қастерлеп, құрметтеген. Себебі, әр адам дүние есігін ашқан сәттен бастап, оның денінің саулығы мен амандығына ақ халатты абзал жандар жауапты.Бүгінгі кейіпкеріміз де адам өміріне араша түсетін дәрігерлік мамандықты таңдау үлкен жауапкершілікті жүктегенін тілге тиек етті. Алдағы уақытта да қастерлі мамандықтың қадірін арттыруға күш салмақ.

Марапат мінберіндегі сырбойылық дәрігер

<a href="https://kyzylorda-news.kz/">Kyzylorda-news.kz</a> Жастардың оқу-білімге ұмтылысы – қоғам дамуындағы оң өзгеріс. Әсіресе жаратылыстану ғылымына қызығушылық танытып, тәжірибесін өндірісте кәдеге жаратып жүрген жастар жетерлік.&nbsp;Солардың қатарында жерлесіміз Рахымжан Тұрманов та бар. Ол органикалық химия бағытында біршама зерттеу жүргізіп, Сыр еліне халықаралық ғылыми үрдісті әкелуде. Бүгінде Қорқыт ата атындағы Қызылорда университетінде ұстаздық ететін жас ғалым шәкірттерге де жол сілтеп келеді.–&nbsp;Рахым­жан Ахметханұлы, органикалық химия несімен ерекше? Аталған бағытты аймақ өндірісімен қалай байланыстырар едіңіз?<blockquote>– Органикалық химия – күрделі сала. Үнемі білім жетілдіруге тура келеді. Осы мақсатпен Ресей Федерациясының Қазан қаласында магистратура және аспирантура бітірдім. Нәтижесінде химия ғылымдарының кандидаты ғылыми дәрежесін иелендім.Барлық зерттеу жұмысы өндіріс саласын ілгерілетеді. Мысалы, магистратурада өндіріске қажетті полимерді зерттедік. Нақтысы, термо­тұрақтандырғыш пен пласти­фикаторларды синтездеумен айналыстым. Бұл зерттеу материалдың сыртқы орта әсерінен, яғни ауа райы салдарынан тозбауын қамтамасыз ету үшін жасалды. Ал аспирантурада органикалық синтезге басымдық бердім. Сол арқылы дәрілік препараттарды дамытуға мүмкіндік туды.</blockquote>–&nbsp;Білім жетілдіру мақсатында Ресей Федерациясының Қазан қаласында оқыдыңыз.&nbsp;Екі елдің білім беру жүйесінде нендей айырмашылық бар деп ойлайсыз?<blockquote>– Қазақстандағы білім беру саласы жылдан-жылға дамуда.&nbsp;Әлемдік тәжірибелер мен жаңалықтар қолданысқа еніп, білім алушыларға барлық жағдай жасалған. Әсіресе жас ғалымдарға қолдау күшейді. Басымдық зерттеу, ғылыми орта қалыптыстыру бағытына бұрылды. Мысалы, ғалымдар Scopus базасымен жұмыс істеуді назарға алып, ғылыми мақала жариялау кең өріс алды. Бұл – әлемдік үрдіс әрі ғылымды дамыту жолы. Бірнеше жыл Ресейде білім алдым. Байқағаным, ол жақта дәстүрлі білім беру жүйесі сақталған. Ал бізде Болон жүйесі жолға қойылған. Яғни, кредиттік технология бойынша оқытылады. Аталған жүйе білім беру сапасына айтарлықтай әсер етеді деп ойламаймын. Барлығы студент ынтасы мен ұстаз білігіне байланысты.</blockquote>– Қарапайым адамға жаратылыстану ғылымдарындағы жаңалық түсініксіз.&nbsp;Әсіресе, химиядағы зерттеу мен формулаларды ұғатындар аз. Осы орайда күрделі ғылымды халық арасына танымал ету үшін қандай әдіс қолдар едіңіз?<blockquote>– Айнала химия ғажайыбына толы. Әлемді химиясыз елестету мүмкін емес. Мұны түсіну үшін ғылымға қызығушылық болу шарт секілді. Түрлі әдістің тиімділігі де осы шарт төңірегінде талқыланса керек. Десе де химияны танымал етудің басты әдісі мектептегі білімді жетілдіру. Себебі оқушы химия пәнімен алғаш танысқанда сүйіспеншілігі оянса әрі ғылыми іргетасы берік болса, бұл салаға бейжай қарамайтыны анық.</blockquote>– Университеттің инжинирингтік технологиялар кафедрасында аға оқытушы екенсіз. Шәкірттер қолға алған қай зерттеуді баса айтар едіңіз?<blockquote>– Университетте көптеген ғылыми зерттеу жүруде. Мұның барлығы ұстаздар ұжымы мен шәкірттер белсенділігінің арқасында орын алды. Қазіргі таңда түрлі синтез арқылы термотұрақтандырғыш алу, ароматты қосылыстар тотықтыру арқылы оттекті органикалық қосылыстар алу процесі қолға алынды. Бұдан бөлек көптеген жоба кезек күтіп тұр. Барлығы өндіріс пен қоғам өміріне пайда әкелетіні анық.</blockquote>–&nbsp;Ауқымды өндіріс орындарындағы химиялық қалдықты өңдеу, залалсыздардыру ісі көңіліңіздер шыға ма? Бұл орайда қандай мәселе бар деп ойлайсыз?<blockquote>– Әрине, өндіріс болсын, тұрмыстық қалдық болсын, өңдеуден өтуге тиіс деп санаймын. Бұл табиғатты қорғауға және экологиялық зардаптың алдын алуға көмектесері сөзсіз. Осы ретте өндірістегі химиялық қалдықтарды залалсыздандыру ісіне ерекше мән беру керек. Әсіресе, қоғам тарапынан өндірістердің экологиялық талаптын сақтауға қадағалау нәтиже беретініне сенемін.Мәселе де осы тұста туындауда. Қоғамда қоршаған орта мәселесіне үн қосатын белсенділер аз. Қоғамдық ұйымдар экологияға қатысты ғаламдық және мемлекет талабының сақталуын жіті қадағалау орынды. Экология зардабын ерекше сезінген аймақ үшін де аталған ұсыныс өзекті болары белгілі.</blockquote>–&nbsp;Әңгімеңізге рақмет!

Рахымжан Тұрманов: Елімізде білім алушыларға барлық жағдай жасалған

&nbsp;<a href="https://kyzylorda-news.kz/">Kyzylorda-news.kz</a> . Биылдан бастап Наурыз мерекесі жаңа форматта өткізіледі. Мемлекет басшысы Қасым–Жомарт Кемелұлы Тоқаев «Егемен Қазақстан» газетіне берген сұхбатында Наурыз мейрамының төл мағынасын байытып, оны барынша ерекшелеп, жаңаша атап өткен болатын.Осы ретте биылғы жылы еліміз бойынша Наурыз мейрамын тойлаудың жаңа тұжырымдамасы қабылданды.Мақсаты – мейрам туралы бұған дейін қалыптасқан түсінікті түбегейлі өзгерту емес, көне мерекенің бастапқы мәнін қайтарып, оның қыр-сырын толық ашу.Жаңа тұжырымдамаға сәйкес Қызылорда облысында 14 – 23 наурыз аралығында халықтық мерекені тойлауға арналған Наурызнама онкүндігі ұйымдастырылады.Бұл онкүндік төл мерекемізді тойлаудың жаңа дәстүрлерін қалыптастыруға, ең жақсы адами қасиеттерді – ашықтықты, шынайылықты, жауаптылықты, қайырымдылықты ашуға бағытталған.Аймақ бойынша арнайы іс-шаралар жоспары әзірленіп, әр күн белгілі бір тақырыпқа арналған.Осылайша әр күнге жоспарланған ауқымды шаралар «Наурыз» мерекесін өнегелі бастамалар арқылы жалпыхалықтық мейрамға айналдыруда, халқымыздың рухын көтеріп, елдігімізді нығайтуға септігін тигізеді.Наурыз мейрамына арналған барлық мәдени-көпшілік шаралар облыс көлемінде кеңінен ақпараттандырылатын болады.Өткізілетін шаралар туралы бұқаралық ақпарат құралдарынан бөлек әлеуметтік желідегі Қызылорда қаласы мен аудан әкімдіктерінің төменде көрсетілген сілтемелері арқылы біле аласыздар!1 Қызылорда қаласы <a href="https://www.facebook.com/politika.gor?__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-]K-R">https://www.facebook.com/politika.gor</a>2 Арал ауданы <a href="https://www.facebook.com/aralaudany?__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-]K-R">https://www.facebook.com/aralaudany</a>3 Қазалы ауданы <a href="https://www.facebook.com/kazaly.audany?__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-]K-R">https://www.facebook.com/kazaly.audany</a>4 Қармақшы ауданы <a href="https://www.facebook.com/qarmaqshy?__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-]K-R">https://www.facebook.com/qarmaqshy</a>5 Жалағаш ауданы <a href="https://www.facebook.com/zhalagashakimdik?__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-]K-R">https://www.facebook.com/zhalagashakimdik</a>6 Сырдария ауданы <a href="https://www.facebook.com/profile.php?id=100016587031775&amp;__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-UK-R">https://www.facebook.com/profile.php?id=100016587031775</a>7 Шиелі ауданы <a href="https://www.facebook.com/profile.php?id=100015614041457&amp;__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-UK-R">https://www.facebook.com/profile.php?id=100015614041457</a>8 Жаңақорған ауданы <a href="https://www.facebook.com/amin.aminkz?__cft__[0]=AZWs7pj97PytyPth5M-vsddsb_kc9iwWjeLCPAbbPswX_YaZ0S0k-nFYFTxTLwfYYfEcu1hLzvfbZdFLc5YXhg96G_33VGd6krW_deC4O4kqxzUo7ewgVX9St1yZtwdGO6scIOGm7KSuUtwI42F7llgLCdQWcoPK7YB-WRFqMoK0kWl5sXnMKqxy_bFmYCPOE28&amp;__tn__=-]K-R">https://www.facebook.com/amin.aminkz</a>

Қызылорда: Наурыз мейрамын тойлаудың жаңа тұжырымдамасы қабылданды

<a href="https://kyzylorda-news.kz/">Kyzylorda-news.kz.</a> Халықтың рухын, оның терең дәстүрін танытатын айбынды спорт түрлерінің бірі – қазақ күресі. Бүгінде бұл спорт түрінен ел арасында белдесулерлен бастап, үлкен турнирлерге дейін өткізіліп келеді. Ел мерейін үстем еткен, қазақ туын әлем аренасында желбіреткен бозкілем бәсекесі Сыр өңірінде де ұйымдастырылды.&nbsp;&nbsp;Осы жылдың&nbsp;10-11 наурызы аралығында&nbsp;Қызылорда қаласында&nbsp;Шекара&nbsp;қызметінің әскери қызметшілері арасында&nbsp;ҰҚК төрағасының орынбасары&nbsp;–&nbsp;Шекара қызметі директорының Кубогына қазақ күресінен&nbsp;Республикалық турнир өтіп, байрақты бәсекеде балуандар күш сынасты.Аталған спорт түрінен&nbsp;Шекара қызметінің тарихында алғаш рет өткен турнирге еліміздің әр өңірінен&nbsp;120 спортшыдан&nbsp;құралған&nbsp;17 команда қатысты.&nbsp;Жекпе-жек&nbsp;7 салмақ дәрежесінде&nbsp;өтіп,&nbsp;одан бөлек&nbsp;ауырсалмақтағы&nbsp;түйе палуандар&nbsp;белдесті.<blockquote>–&nbsp;Шекарашылар арасындағы республикалық сайысқа тыңғылықты дайындық жүргізілді. Жалпы еліміздің әр өңірінен келген қатысушыларды 8 наурызда қарсы&nbsp;алып, орналастырдық. Ал, 9 наурыздан бастап «Евразия» спорт кешенінде әскери қызметшілермен практикалық семинарлар, арнайы жаттығулар, салмақ өлшеу, жеребе тастау, жарысты ұйымдастыру тәртібін нақтылау сынды бірқатар шаралар ұйымдастырылды. 10 наурыз күні республикалық жарыстың негізгі бөлімі басталып, 11 наурызда жарыс қатысушылары финалда бақ сынасты. Сайыста топ жарып, жеңімпаз атанған шекарашылар&nbsp;марапатталды.&nbsp;Республикалық турнирде&nbsp;қатысушылар&nbsp;жоғары нәтиже көрсетіп, ұлттық ойын ұлықталды, - деді&nbsp;ҚР ҰҚК ШҚ Қызылорда облысы бойынша департаменті бастығының орынбасары полковник&nbsp;Серік&nbsp;Абусултанов.</blockquote>Қазақ күресі – жай ғана спорт түрі емес, ол бізге ата-баба даналығын, ұлттық мақтанышымызды жеткізетін нағыз өнер.Бұл спортта әрбір қозғалыс, әр техниканың өзіндік мәні мен символы бар. Ол тек дене күшін ғана емес, сонымен қатар қарсыласты сезіну, оның әрекетін алдын ала білу және тез әрекет етуді талап етеді. Күрес – нағыз батылдық пен төзімділіктің сынағы.Спортшылар&nbsp;бозкілемде жоғары&nbsp;дайындық деңгейін көрсетіп, жарыс нәтижесінде&nbsp;командалық&nbsp;есеп&nbsp;қорытындысы бойынша бірінші орынды&nbsp;ҚР ҰҚК Шекара қызметі&nbsp;Абай облысы бойынша департаментінің командасы иеленді. Екінші және үшінші орындарға&nbsp;Жамбыл және Батыс Қазақстан облыстарының&nbsp;командалары&nbsp;жайғасты.Алаңға шыққан әр балуан өз үмітін ғана емес, халқының үмітін де бойына сіңіреді. Ол ұрпақтан-ұрпаққа жалғасып келе жатқан көне дәстүрлер мен мәдениетті бейнелейді. Бұл күресте ұлттың ең терең құндылықтары – күш, батылдық, адалдық және құрмет жатыр.Қазақ күресінің әрбір турнирі осы тамаша спорт түрін бағалайтын және сүйетін әрбір адам үшін нағыз мерекеге айналады. Мұнда ең үздік спортшылар жиналып, өз жерін лайықты түрде таныстырады.Қазақ күресі –&nbsp;тарихымыздың, мәдениетіміздің, ұлттық қадір-қасиетіміздің бір бөлігі. Әрқашан ұлы халқымыздың бірлігі мен күш-қуатының белгісі болып қала беретін бозкілем бәсекесі әрбір қазақтың рухани ғана емес, физикалық қабілетін байытады. &nbsp;Сайыс жеңімпаздарына&nbsp;кубоктар, грамоталар мен медальдар табысталып, ауыр салмақтағы&nbsp;үздік түйе палуандарына&nbsp;арнайы чемпиондық белбеулер&nbsp;тағылды. Турнир Шекара қызметінің әскери қызметшілерін біріктіріп&nbsp;қана қоймай, олардың кәсібилігі мен шеберлігін баса көрсеткен жарқын спорттық оқиға болды.

Қызылордада республикалық "Шекара барысы" балуандар бәсекесі ұйымдастырылды

<a href="https://kyzylorda-news.kz/">Kyzylorda-news.kz</a>&nbsp; Құтқарушы – ең қауіпті мамандықтың бірі. Сондықтан оларды бейбіт күннің батыры десе де артық етпейді. Себебі қоғамдағы түрлі апаттық жағдай орын алған сәтте өз өмірін қауіпке тігіп, өзге адамның өмірін сақтауды борышы санайды. Жұмыс барысында ажалмен бетпе-бет келетін олар талай жанға қайта өмір сыйлады. Ерлікке толы еңбегінің арқасында елдің алғысына бөленіп, адал еңбек атқарып келе жатқан қиын да қызық мамандық иесі ТЖД дағдарыс жағдайларында басқару басқармасы бастығының міндетін атқарушы Исабек Досжан. Кейіпкеріміз 18 жыл дағдарыс жағдайында басқару басқармасында жедел кезекші ретінде қызмет атқарған азаматтық қорғау подполковнигі. Оның басты міндеті – соғылған қоңыраудағы мәліметті жылдам зерделеп жауап беру және көмек күткен азаматтарға құтқару жұмыстарын ұйымдастыру. Осынша жылдар бойы бір салада не себепті қызмет атқарғанын кейіпкеріміз әңгіме барысында айтып берді. – Бір салада ұзақ жыл жұмыс істеуімнің себебі – қиналғанға көмектескім келді, «өрт сөндіруші, құтқарушы, азаматтық қорғау органының маманы» деген мен үшін мәртебесі жоғары қызмет. Жұртқа мейірімің мен қайырымың, қызметің пайдалы болса, адамдардың алғысы мен батасы өміріңде өнегеге айналады, – дейді кейіпкеріміз. Одан бөлек қызмет барысындағы түрлі оқиғалармен бетпе-бет келетінін айтып қана қоймай, өзінің жадында қалған оқиғасымен бөлісті. – 2016 жылы маусым айында Қызылорда қаласындағы Ә.Бөкейхан көшесі №76 мекен – жайда орналасқан бұрынғы ұшқыштар жатақханасындағы бір бөлмеден өрт шығып, сол өртті адам шығынынсыз жоюға атсалыстық. Шамамен он шақты тұрғынды тілсіз жаудан құтқарып, отыздай адам қауіпсіз жерге эвакуацияланды. Әрине, мұның бәрін бір өзім атқардым деп айта алмаймын. Азаматтық қорғау саласының қызметі – жеке құрамның жауынгерлерімен бірге атқаратын қызмет. Сондықтан да ұжымның ауызбіршілігі аса маңызды. Төтенше жағдайдың алдын алу мен жоюда қызмет кезінде әрбір кәсіби маман өз жұмысының жауапкершілік жүгі мен елдің игілігіне қажеттілігін айқын сезінеді, – дейді Исабек Досжан Жылдар бойы дағдарыс жағдайында басқару басқармасында жедел кезекші қызметін атқарған кейіпкеріміздің еңбегі еленіп, 2013 жылы Төтенше жағдайлар министрлігінің ІІІ-дәрежелі «Өртке қарсы қызмет органдарындағы мінсіз қызмет» медалін алған. 2016 жылы «Төтенше жағдайлар комитетіне – 20 жыл» мерекелік медалін алса, 2017 жылы «Құтқару операцияларына белсенді қатысқаны үшін» төс белгісімен марапатталды. Ал 2018 жылы ІІ дәрежелі «Ішкі істер органдарындағы мінсіз қызметі» мен сол жылы «Өртке қарсы қызметіне – 100 жыл» мерекелік медалі берілген. 2020 жылы Қазақстан Республикасының «Азаматтық қорғау органдарына – 25 жыл» мерекелік медалі және ІІІ дәрежелі «Құтқарушы» төсбелгісін иеленді.

Құтқарушы – мәртебесі жоғары қызмет

<a href="https://kyzylorda-news.kz/">Kyzylorda-news.kz</a>&nbsp; Жуырда ғана Қызылорданың автобус паркі 70 автобуспен толықты. Бұл мекеменің техникасы өткен жылдан бері жаңаланып келеді. Ел ішінде «ескі автобустарын не істеп жатыр?» деген де сұрақ бар. Біз автобус паркінің басшысы Мақсат Жүсіпке жолығып, осы және басқа да сауалдарды қойдық.– Мақсат Өмірбекұлы, жаңадан үлкен сыйымдылықтағы автобустар келіп қаланың ғана емес, қалаға қарасты елді мекендердің ажарын кіргізіп жатқаны елді қуантқан еді.&nbsp;Қазір маршрутта қанша қоғамдық көлік қызмет көрсетуде?– Бұл сұраққа толық жауап берейін. Қызылорда қаласында жолаушылар тасымалын жақсарту мақсатында 2013 жылы «Қызылорда автобус паркі» ЖШС құрылып, Автобус парк теңгеріміне облыстық бюджет есебінен «Zhangtong LCK 6105HGC» маркалы 20 автобус алынған болатын. Содан соң 2015-2016 жылдары 92 «ZhongTong» маркалы автобус, 2017 жылы 10 «ПАЗ» маркалы автобусы, сол жылы облыс әкімдігі мен «Байқоңыр» әлеуметтік кәсіпкерлік корпорациясы» АҚ және Еуропалық қайта құру және даму банкі арасында үш жақты меморандум негізінде парк теңгеріміне «Zhоngtong LCK 6105 HGC» маркалы 92 автобус несиеге алынды. 2020 жылы автобус паркі 13 дана «ZhongTong» маркалы автобуспен толықтырылса, 2022 жылдын қарашасында облыс әкімі Нұрлыбек Нәлібаевтын тікелей қолдауымен серіктестікке «Өнеркәсіпті дамыту қоры» АҚ арқылы лизингке 150 жаңа автобус алынды.2022 жылы серіктестік 5 бағыт бойынша жолаушылар тасымалын жүзеге асырды. Ал 2023 жылы бұл көрсеткіш 19-ді құрауда. Олар: №1, №3, №10, №11, №12, №13, №14, №15, №16, №17, №18, №19, №20, №22, №25, №28, №29, №30, №31 және қосымша жүктелген «Ягодка», «ПМК-29» саяжайы бойынша қызмет көрсетуде. Аймақ басшысының қолдауымен қала ішілік бағыттар халыққа қолайлы қоғамдық көліктермен толығуда. Бүгінде 24 қала ішілік бағыт және қосымша 4 елді мекен тұрғындарына қызмет көрсетуде.&nbsp;Әлі де келетін автобустар бар ма? Келсе жаңа автобустар қай бағыттарға беріледі? Бұл қоғамдық көлікке қаражат қайдан бөлінді?– Жаңа автобустар алдымен серіктестіктің тапшылық бар бағытына беріледі. Жаңа автобустың бағыттар тізімін қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі рәсімдейді. Облыс орталығы тұрғындарымен қала қонақтарына сапалы қызмет көрсету мақсатында соңғы үлгідегі қоғамдық көліктер санын арттыру үшін өткен жылдың бірінші жартыжылдығында қосымша үлкен сыйымдылықтағы 150 автобус сатып алу үшін «Өнеркәсіпті дамыту қоры» АҚ арқылы лизингке жаңа автобустар алу жөніндегі ұсынысқа облыстық және қалалық мәслихат депутаттары қолдау көрсетіп отыр. Әуелде облыс әкімі Н.Нәлібаев алғашқы 50 автобустың кілтін ресми түрде табыстады. Қалған 100 автобус желтоқсан айына дейін жеткізілді. Серіктестіктің стратегиялық жоспарына қалаішілік жолаушылар тасымалының барлық бағытын қамту кіреді.– Үлкен сыйымдылықтағы 5-6 жыл болған «ескі автобустар» қандай мақсатта қолданылады?– Серіктестік теңгеріміндегі бұрын қолданыста болған үлкен сыйымдылықтағы 40 көлік күрделі жөндеу жұмысынан кейін қосымша бағытқа қосылып, қалаішілік жолаушы тасымалдау жұмысын жақсартуға өз үлесін қосуда. Біздің басты міндетіміз – жолаушылар қауіпсіздігін қамтамасыз ету. Бір сөзбен айтқанда ескі автобуспен де елге қызмет етіп жатырмыз.– Ескі автобустың өзіне қанша қаржы бөлініп алынды. Жаңадан келіп жатқан автобустар да 5-6 жылда бұзылып, жөндеуге жарамсыз болып қалмай ма?– Облыстық мәслихаттың шешімімен 2022 жылы қаладағы қоғамдық көлік базасын жанартуға 1 миллиард 400 миллион теңге облыстық бюджеттен жұмсалды. Өткен жылы келген автобустарға 1 миллиард 600 миллион теңге қаржы қаралды. Әр автобустың өзіндік жарамдылық мезгілі болады. Зауытқа әр автобусқа 1 жылдық жарамдылық береді. Жөндеу цехының мамандары бұзылған автобустың құжатын рәсімдеп зауытқа жолдайды. Зауыттың арнайы мамандары қажеттілігіне қарай автобусты жөндейді. Өзіңізге мәлім қала орталығындағы көшенін жағдайы жақсы, ал шет аймақта жол мәселесі қиындық туғызуда. Бұл өз кезегінде жарамдылық мерзімін қысқартуды қажет етеді.– Көлік жүргізушілерінің жалақысы өскенін де естідік. Алайда автобус айдайтын шоферлар жетіспей жатыр дегеннен де хабарымыз бар. Ол қаншалықты рас?– Қоғамдық көлік санының еселеп артуына байланысты серіктестіктің штаттық бірлігі 376-дан 464-ке дейін артып, оның ішінде 300 бірлікті автобус жүргізушілері құрайды. Айлық мөлшері 1 сағатқа – 1490 теңгені құрауда. Жұмыс жасау тәртібі 2 жұмыс күн, 2 демалыс күн. Дұрыс айтасыз. Серіктестікте жүргізушілер тапшылығы бар. Себебі жолаушыларды тасымалдауды қамтамасыз етуге қойылатын кәсіби талапқа сай жүргізуші аз. Қоғамдық көлікті тізгіндеуге 25 жасқа толған, кемінде 5 жыл жұмыс өтілі бар, «D» санатындағы жүргізуші қабылданады. Қазақстанда қоғамдық көлік жүргізушілерінің тапшылығын шешу үшін олардың мәртебесін дәрігерлер мен мұғалімдердікі сияқты көтеруді Қазақстанның автокөлік одағының басшысы ұсынған болатын. Бүгінде елімізде сегіз мыңға жуық қоғамдық көлік жүргізушісі тапшы. Біздің өңірде де жүргізуші тапшылығы байқалады. Сол үшін автобус жүргізушілерін ынталандыру мақсатында әр ай қорытындысымен жол жүру ережесін бұзбай, автобустың ішкі және сыртқы тазалығын жоғарғы деңгейде сақтаған жүргізушілерге түрлі мөлшерде ақшалай бонус берілуде.– Былтыр серіктестіктің құрылғанына 10 жыл толды. Мерекеге орай қандай шаралар қолға алынды? Мекеме қызметкерлеріне қандай қамқорлық жасалды?– 2023 жылы серіктестік жұмысына 10 жыл толды. Он жылдық межеде көптеген жұмыс атқарылды. Жоғарыда атап өткендер тек бірсыпырасы. Айтулы датаға орай былтыр жыл соңында жақсы қызметі үшін біршама автобус жүргізушісі «Үлгілі жүргізуші», «Елеулі үлесі үшін», «Креативті жүргізуші», «Шебер жүргізуші», «Жол қауіпсіздігі қозғалысының үздігі», «Таза автобус» және «Жыл жүргізушісі» аталымымен марапатталды. Қызметкерлердің құқығы мен мүддесін қорғау, жұмыс жағдайын жақсарту, әлеуметтік кепілдікті қамтамасыз ету мақсатында мекемеде кәсіподақ комитеті құрылған. Серіктестіктің кәсіподағы тарапынан бүгінгі күнге дейін қызметкерлерді ынталандыру мақсатында жаңа жылда, наурыз мерекесінде, республика күнінде, 8 наурызда және өзге де мерекелер салтанатты түрде ұйымдастырылады. Алдағы уақытта қызметкерлерді шипажайға және олардың балаларын тынығу лагеріне жіберу жұмысы қолға алынбақ.– Әңгімеңізге рахмет. Жұмыстарыңыз табысты болсын!&nbsp;

Мақсат ЖҮСІП: Қалаішілік жолаушылар тасымалының барлық бағытын қамту жоспарда бар

<a href="https://kyzylorda-news.kz/">Kyzylorda-news.kz</a> «Хабар» телеарнасында жарыққа шыққан&nbsp;«Бірақ...» ток-шоуы жұрт наразылығына тап болды. Бағдарламаның екінші шығарылымы діттеген мақсатына жетпеді. Мәдениет және ақпарат министрі Аида Балаева ток-шоу жұмысы тоқтатылатынын мәлімдеді, деп жазады&nbsp;<a href="https://egemen.kz/">Egemen.kz</a>.Министр бұл туралы әлеуметтік желідегі парақшасында жазды. Аида Балаеваның айтуынша, бағдарлама өзінің бастапқы миссиясын орындай алмаған, ал мемлекеттік телеарна мұндай олқылыққа жол бермеу керек еді.&nbsp;<blockquote>«Отбасылық құндылықтарды насихаттау, ана мен баланы қорғау жөніндегі қызметті үйлестіру, отбасылық-тұрмыстық зорлық-зомбылыққа қарсы іс-қимылды насихаттау - министрліктің басты міндеттерінің бірі. Өз кезегінде, 11 наурыздан бастап «Хабар» арнасында отбасындағы әлеуметтік мәселелерді көтеріп, оны шешуге бағытталған «Бірақ...» бағдарламасының шығарылымы ұйымдастырылды. Алайда, тікелей эфирде көрсетілген шығарылымда редакция бағдарламаның діттеген мақсатына жете алмай, кейіпкерді жаңылыстыру арқылы қоғамда түрлі пікірлер туындатты. Мемлекеттік идеологияны жүргізіп отырған мемлекеттік телеарна бұндай олқылыққа жол бермеуі тиіс еді. Ең алдымен, редакция барлық этикалық нормаларды сақтап, отбасылық-тұрмыстық зорлық-зомбылық пен арандатушылыққа жол бермеуге, кейіпкерлерді көпшілік алдында қорламау қажет еді. Сондықтан телеарна редакциясына бұл үлкен сабақ болады деп санаймыз. Аталған ток-шоу жабылады», деді министр.</blockquote>Фото: adyrna.kz

Қазақстан және Қызылорда облысының жаңалықтары