<a href="https://kyzylorda-news.kz/">Kyzylorda-news.kz.</a>&nbsp;Су – тіршілік нәрі. Мына жасыл әлемді сусыз бір сәт те елестету мүмкін емес. Бірақ осы тіршілік көзінің бағасына жетіп, қадірін біліп жүрміз бе? Қазақ «Судың да сұрауы бар» демеп пе еді? Біз қазір аяқ-суды айтпағанда ауыз судың өзіне салғырт қарап, жиі ысырап етіп жатамыз. Оның соңында қанша еңбек жатқанын білеміз бе?Айналаға көз тастасақ, Оңтүстік Африка жеріндегі құрғақшылықты есті жанның бәрі біледі. Бүгінде бейкүнә сәбилердің бір жұтым суға зар болып, шөлмектің түбін қағып тұрған суреттері әлеуметтік желіде кең таралуда. Соны көре тұрсақ та, суды үнемдеуге келгенде селқостық танытып жатамыз. Қара нәсілділер елін былай қойғанда, ауданда да ауыз су мәселесі жоқ емес. Мәселен, Ақтам, Қызылқайың елді мекенінің тұрғындары ауыз су мәселесін жиі айтып келеді. Сондықтан да ауданды ауыз сумен қамту жұмысының барысын білмекке өндірістік бөлімшеге байланысқа шықтық.<blockquote>«Жиделі топтық су құбыры», «Нұра топтық су құбыры» ШЖҚ РМК «Арал» СЖКБД филиалының өндірістік бөлімшесі болып табылады. 2006 жылдың шілде айынан бастап өндірістік бөлімше Шиелі ауданының тұрғындарына ауыз су тарату қызметін бастады. Бүгінгі күнде аудан бойынша сапалы ауыз сумен Шиелі кенті мен 19 елді мекен қамтылуда. Сонымен қатар Көкшоқы мөлтек ауданын ауыз сумен қамтамасыз ету және сарқынды суды алып кету қызметін де атқарамыз. 2018 жылдан бастап ауданға қарасты оқшау су көздерімен жабдықталған (ЛСВ) 7 елді мекен қызметімізге қосылды. Сондай-ақ 2023 жылға Жуантөбе және Лесхоз (Ызалы) елді мекендеріне су тұшытқыштар орнатуға қажетті 34 млн 456 мың теңгеге бюджеттік өтінім облыстық бюджеттен қаралуға тапсырылды. Жалпы Шиелі ауданы бойынша 88 процент ауыз сумен қамтамасыз етілген, – дейді.</blockquote>Ұмытпасақ, жалпы құны 1,2 млрд теңгені құрайтын Тақыркөл бас су қоймасынан Шиелі кентіне дейінгі 34 шақырымды құрайтын екінші су құбырын жүргізуге 45 млн теңге қаржы бөлінген болатын. Ал өткен жылы кент ішінде су құбырлары жүрмеген көшелерге, Бұланбай бауы елді мекенін ауыз сумен қамтуға және су қоймасының ұңғымасын қазу, су мұнарасын орнату, су қоймасы мен ішкі желілерін жүргізу жұмыстарына және Тұрсынбай датқа елді мекенінің ауыз су ұңғымасы, су мұнарасы, су қоймасы және ішкі желілердің құрылысын жүргізуге жоба сметалық құжатын әзірлеуге барлығы 16 млн 919 мың теңге қаржы бөлінген болатын. Аталған жобалар оң шешімін тапса, ауыз суды асыға күтіп отырған елді мекен тұрғындары тұщы суды тұтынатын болады.Енді ауыз судың төлеміне тоқталсақ. Биыл бір кубтық судың орташа бағасы 439,12 теңге көлемінде бекітілген. Субсидиялау қағидасының 13-тармағына сәйкес, жеке тұтынушы ауыз судың ақысын есептегіш құралмен тұтыну нормативі бойынша тәулігіне 140 литр мөлшерінде жеңілдетілген тарифпен төлейді.Мемлекет басшысы Қасым-Жомарт Тоқаевтың «Әділетті Мемлекет. Біртұтас ұлт. Берекелі қоғам» атты Қазақстан халқына Жолдауында ел экономикасын тұрақты дамытуға су тапшылығы қатты кедергі болып отырғанын айтып, сондықтан да суды тиімді пайдалануға баса назар аударуды тапсырғаны есімізде. Бұл тек егістік алқаптарына берілетін суды үнемдеу емес, өзіміз күнделікті тұтынып жүрген ауыз суға да қатысы бар. Себебі суды сарқылмас байлық көретініміз жасырын емес. Ысырап қылып төгіп шашқан судың сұрауының бары тағы бар.Тіпті қазіргі таңда жер шарындағы халық санының өсуі, көпсалалы өнеркәсіп орындарының көбеюі, тіршілік иелеріне қажеттілігі ауамен бірдей тұщы суға деген сұранысты ұлғайтып, әлемде оның тапшылығы сезіле бастады. Сонымен бірге тұщы су тапшылығына жер бетіндегі өзен, көлдердің ластануы салдарынан табиғи қордың азаюы тікелей әсерін тигізуде. Әлемдік денсаулық сақтау ұйымының мәліметінше, бүгінде 3 миллиардқа жуық адам сапасыз ауыз суды пайдаланады, дамушы мемлекеттердегі аурудың 80 проценті таза ауыз судың жеткіліксіздігінен. &nbsp;Таза ауыз су мәселесін әрбір мемлекет өздерінше шешуге тырысады. Мұнайға бай Сауд ¬Арабиясына таза су ұшақпен Жаңа Зеландиядан әкелінсе, Голландия мен Жапон еліне су Норвегиядан жеткізіледі. Гонконг құбыр арқылы суды Қытайдан тасымалдаса, Африкадағы кейбір тайпаларда әйелдер күні бойы құмды елеп, небәрі 1-2 литр лай суды жинауға мәжбүр.

Шиелінің 88 пайызы ауыз сумен қамтамасыз етілген

<a href="https://kyzylorda-news.kz/">Kyzylorda-news.kz.</a> Қызылорда қаласындағы Абылай хан атындағы №140 қазақ орта мектебінде дәстүрлі түрде өтетін 2022-2023 оқу жылында білім көкжиегін бағындырған талантты да дарынды шәкірттер, жалпы пәндер бойынша республикалық олимпиада, ғылыми жоба, өнер, спорттан шашасына шаң жұқтырмаған жеңімпаздарымызды және шығармашылықпен жұмыс жасап жүрген ұстаздарды марапаттауға арналған «Жұлдыздар шеруі» өтті. Салтанатты шараны мектеп директоры Айгуль Нажмадинқызы ашып, ұстаздарға, оқушыларға жылы лебіз, ыстық ықыласын білдірді.<blockquote>«Мектеп абыройын асқақтатып, намысын қорғаған барлық шәкірттеріміз бен ұстаздарымызға айтар алғысымыз шексіз. Әрдайым жеңіс тұғырынан көріне беріңіздер! Мектебіміздің &nbsp;абыройын асқақтатып, жеңіс туын желбірететін білімді шәкірттеріміз көбейе берсін», − деді мектеп директоры Айгуль Мусабаева.</blockquote>Үздіксіз ізденіс пен тынымсыз &nbsp;еңбек нәтижесінде жыл көлеміндегі үздік оқушылар бірнеше бағытта марапатталды. Соның ішінде Республикалық пәндік олимпиада, «Зерде» ғылыми жоба жеңімпаздары, облыстық «Дарын» ғылыми жоба байқауының жүлдегерлері, «Юниор» олимпиадасы мен түрлі өнер, көркем сөз жарыстарының үздіктері марапатталды.Жалпы пәндер бойынша олимпиада, ғылыми жоба, түрлі байқаулар мен өнер, спорт саласында жеңіске жеткен 100 ге тарта жүлдегер «Мектеп үздігі» медальдарымен марапатталып, ата-анасына мектеп басшысы атынан алғыс беріліп, кәсіподақ ұйымы тарапынан бағалы сыйлықтар табысталды.Сондай-ақ, шеруде «Үздік пән мұғалімі» номинациясымен орыс тілі мен әдебиеті пәні мұғалімі Балжан Ерлановна Мурзалиева, «Үздік жаңашыл педагог» &nbsp;қазақ тілі мен әдебиеті пәні мұғалімі Жулдызай Маралбековна Музарапшина, «Үздік шығармашыл ұстаз» география пәні мұғалімі Жазира Ахметова, «Үздік пән бірлестігі» Жаратылыстану бірлестігі мен «Үздік мектеп жанашырлары» атауына «Дене шынықтыру» бірлестігі лайықты деп танылды.Одан бөлек, 2022-2023 оқу жылының жаңалығы ең үздік оқушыларға &nbsp;«Қорқыт ғалымдары» стипендиясы тағайындалды. Нақтырақ айтқанда, облыстық «Мұқағали оқуларының» бас жүлде иегері, облыстық «Әбіш оқулары» ІІІ орын, қалалық «Әбіш оқулары» І орын және қалалық «Ілияс оқулары» ІІІ орын иегері Талшын Оспан мен облыстық «Дарын» ғылыми жобасының І орын және ІІ орын иегері, қалалық «Ғылым» ғылыми жоба байқауының ІІІ орын иегері Динара Базарбай стипения иеленді. Одан бөлек, облыстық «Мұқағали оқулары» сайысынан І орын, қазақ тілі мен әдебиеті олимпиадасынан ІІІ орын, &nbsp;«Ахмет Байтұрсынұлы - тіл тұғыры» атты мүшайрадан ІІІ орын иеленген Айару Көлбай мен «Ақберен» шығармашылық сайысынан ІІІ орын иеленген «Мектеп театры» мүшесі Шахсұлтан Есжанов стипендиат атанды.

Қызылордалық оқушылар «Жұлдыздар шеруінде» марапатталды

<a href="https://kyzylorda-news.kz/">Kyzylorda-news.kz.</a> Жиын барысында Халықаралық Аралды құтқару қорының Қазақстандағы Атқарушы дирекциясының директоры Болат Бекнияз, жоба менеджері Рустам Исаходжаев және өзге де мамандар тақырыпқа байланысты ой-пікірін білдірді.Арал теңізінің жағдайы әлемге аян. Экологиялық ахуал күрделі. Қазір өңірде шаңды және құмды дауыл жиі көтеріледі. Оның барлық тіршілік ырғағына, әсіресе, балық аулайтын және мал шаруашылығымен айналысатын халық еңбегіне кері әсерін көріп отырмыз.АҚШ халықаралық даму агенттігі (USAID) аймаққа қатысты жобаларын жүзеге асырып келеді. Бұл орайда халықаралық даму ұйымдарының өкілдері мен сала мамандары Арал өңіріне экспедициялар ұйымдастырды.Арал ауданының Қаратерең елді мекенінен 50 шақырым қашықтықта сексеуіл өсіру қолға алынып, сол арқылы экожүйені қалпына келтіруге бетбұрыс жасалды.<blockquote>Елімізде орман алқабының 60 пайызға жуығын сексеуіл құрайды. Бұл ағаштың басым бөлігі біздің облыс аумағында жатыр. Экологиялық жағдайға байланысты теңіз табанынан тұз бен шаң ауаға тарайды. Қазіргі таңда Аралды құтқару қоры USAID-пен бірге 500 гектарға сексеуіл егу жобасын қолға алды. Оның ішінде 150 гектары қолдан егілсе, қалған бөлігіне өзге жаңа технологиялар пайдаланылады. Негізінде сексеуіл құмды жерде жақсы өседі. Жергілікті мамандар қаншама жылдан бері тәжірибе жинады. Сексеуіл өсіруді жақсарту мақсатында дәнді арнайы пакеттерге салып егу әдісіне мән берілмек. Кәдімгі тәсіл бойынша оның өсу көрсеткіші 30 пайызды құраса, бұл әдіспен 60-80 пайызға артып отыр, – деді&nbsp; Халықаралық Аралды құтқару қорының Қазақстандағы Атқарушы дирекциясы директорының орынбасары Зәуреш Әлімбетова.&nbsp;</blockquote>Халықаралық қордың негізгі мақсаты – Арал теңізі алабының қазақстандық бөлігіндегі су шаруашылығы, әлеуметтік-экономикалық және экологиялық жағдайды жақсарту. Бұл бойынша өзекті мәселелерді шешуге және практикалық іс-шараларды үйлестіруге қолдау көрсетіледі.Кеше облыс әкімінің бірінші орынбасары Серік Қожаниязов екі күнге созылған конференцияны қорытындылап, жиынға келген барлық қатысушыларға ризашылығын білдірді. Сондай-ақ, жиын соңында Арал өңірінің қазақстандық бөлігі бойынша су шаруашылығы, экологиялық-әлеуметтік маңызды мәселелерді шешуге үлес қосқан бір топ азаматтар марапатталды.&nbsp;

 Арал теңізіне қатысты мәселелер қаралды

<a href="https://kyzylorda-news.kz/ru">Kyzylorda-news.kz.</a> Қызылорда облысы орталығында ғана орналасқан «Қамқорлық» оңалту орталығы енді Арал және Жаңақорған аудандарында ауданаралық орталық ретінде ашылатын болады. Бұл өз кезегінде 5 мыңға жуық ерекше балалардың қажетті оңалту шараларын толыққанды қабылдауына мүмкіндік болмақ. Бұл туралы Өңірлік коммуникациялар қызметінде өткен брифингте облыстық денсаулық сақтау басқармасы басшысының ана мен бала денсаулығын қорғау жөніндегі орынбасары Мая Мирзанова хабарлады.<blockquote>«Өңірде ерекше балаларға арналған «Қамқорлық» оңалту орталығы былтыр ашылған болатын. Бүгінгі күнге дейін аталмыш орталықта 2500-ге жуық бала ем алды. Ал оның 25,3 пайызы мүгедектігі бар балалар. Осы ретте аудандардағы ерекше балалардың толыққанды ем алуы үшін «Қамқорлық» орталығын бірнеше аудандандарда ашуды жоспарлап отырмыз. Бұдан бөлек, аймақ тұрғындарына &nbsp;жоғары сапалы медициналық қызмет көрсету мақсатында бірнеше нысандар ашылмақшы. Соның бірі – бұрын-соңды облыста болмаған көпбейінді қалалық балалар ауруханасы салынатын болады. Сондай-ақ, жас аналарға жоғары мамандандырылған &nbsp;медициналық көмектің қолжетімділігін арттыру үшін көпбейінді облыстық ауруханасының жанынан 70 төсектік босану бөлімшесі құрылады. Бұған қоса, халықаралық стандарттарға сәйкестендірілген 200 орындық перинаталдық орталық ашуды жоспарлаудамыз», - деді басқарма басшысының орынбасары Мая Миранбайқызы.&nbsp;</blockquote>Облыстық көп бейінді балалар ауруханасына жыл көлемінде 16 мыңға жуық бала ем қабылдаған. Бұл орталықта 13 клиникалық бөлімше мен 360 төсек-орындық стационар &nbsp;қамтамасыз етілген.&nbsp;<blockquote>«Көпбейінді облыстық балалар ауруханасы бір ауысымда 300 балаға дейін қабылдауға қауқарлы. Біздің орталықта шала туылған немесе туа бітті ақаулары бар нәрестелерді динамикалық бақылауға арналған катамнез кабинеті жұмыс істейді. Мұнда екі мыңға жуық бала тексерілді. Жалпы орталықта балалардың жақсы емделуіне жағдай жасау үшін 2020 жылы 60 төсектік реабилитация бөлімі мен былтыр «Қамқорлық» &nbsp;оңалту орталығы ашылды. Онда 1255 бала оңалту шараларын қабылдайтын болады», - деді облыстық көп бейінді балалар ауруханасының бас дәрігері Зоя Рахатқызы.</blockquote>

Қызылордада «Қамқорлық» орталығын бірнеше ауданнан ашу жоспарланған

<a href="https://kyzylorda-news.kz/">Kyzylorda-news.kz.</a>&nbsp;Шиелі аудандық қоғамдық даму бөлімінің қолдауымен ­«Жастар ресурстық орталығының» ұйымдастыруымен Б.Қабылұлы атындағы мәдениет үйінде мектеп оқушылары арасында маусымашар – 2023 лигасы өтті.Жанды жадыратқан бұл жолғы жайдарманның тақырыбы «Әдемі маусым» деп аталды. Сайысқа жалпы білім беретін мектептердің оқушы жастарынан құралған 10 команда қатысты.&nbsp;Шараның басты мақсаты – жастардың бойында мәдениеттілік, рухани адамгершілік қасиеттерін дамыту, дарынды жастарға қолдау көрсете отырып, көрерменді әдемі әзілімен баурап, қатарластарынан оқ бойы озық тұрған бір командаға облыс әкімінің кубогын табыстау болатын.&nbsp;Әзілді кешке аудандық қоғамдық даму бөлімінің басшысы Кенжехан Шахизатұлы, «Біз біргеміз» қайырымдылық қорының жетекшісі Жасұлан Рысбек, облыстык жайдарман ойындарынын редакторы Мейрамбек Нұртаза және жайдарманшылар Дастан Әбжалиев пен Мұхаммеджан Зарқұм қазылық етті.Белсенді, жалынды жастардың қызыққа толы ойындары нәтижиесінде «47 қырандары» командасы үздік деп танылып, облыстық ойынға жолдама алды. Шара соңында «Жайдарманға» қатысқан барлық командаға облыстық қоғамдық даму басқармасының басшысы Алмасбек Есмахановтың алғыс хаты табысталды.

Шиелілік жастар «Жайдарман» ойнады

<a href="https://kyzylorda-news.kz/">Kyzylorda-news.kz.</a> Алматыда ұлы ақын, ұстаз, қоғам қайраткері Мағжан Жұмабаевтың 130 жылдығына арналған «Алаштың сөнбес жұлдызы» республикалық шығармашылық байқауында Қызылорда облысы бойынша Әлеуметтік медициналық сақтандыру қоры филиалының қызметкерлері жүлделі орындарға ие болды.Жеңімпаздарды туыстары, достары және Әлеуметтік медициналық сақтандыру қоры мен Салидат Қайырбекова атындағы Ұлттық ғылыми денсаулық сақтауды дамыту орталығы филиалдарының ұжымдары құрметпен қарсы алды.Шығармашылық байқау ҚР тіл саясатын іске асырудың 2020-2025 жылдарға арналған мемлекеттік бағдарламасын жүзеге асыру аясында өткізілді. Ұйымдастырушы – Ұлттық фтизиопульмонология ғылыми орталығы.Шығармашылық байқауға еліміздің барлық өңірлерінен 60 медицина қызметкері қатысты. Марапатталғандар қатарында Әлеуметтік медициналық сақтандыру қорының Қызылорда облысы бойынша филиалының қызметкерлері де бар.«Мағжан Жұмабаевтың шығармашылығы» номинациясы бойынша 2-дәрежелі дипломмен медициналық көмектің сапасын бағалау және шарттық міндеттемелердің мониторингі бөлімінің бас сарапшысы Талғат Көшекбаев марапатталды. Талғат Дамирұлы байқауға Түркістан қаласында түсірілген бейнероликті ұсынды.<blockquote>«Түркістан киелі жерде қазақтың ұлы ақыны, қоғам қайраткері Мағжан Жұмабаевтың «Түркістан» өлеңін оқыдым. Бір ғасыр өтсе де, оның шығармашылығының шырағы ешқашан сөнбейді. Ақынның ең асылы – Отан, ана, ана тілі, махаббат және барша барлық тіршілікке ұқыпты қарау туралы алтын сөздері. Қолдау көрсеткен туыстарым мен әріптестеріме мың алғыс!», - деді Талғат Көшекбаев.</blockquote>ҚР Денсаулық сақтау министрлігінің Құрмет грамотасымен медициналық көмекті жоспарлау, орындалуын талдау және болжау бөлімінің бас сарапшысы Нұрболат Абатов марапатталды. Қор филиалының талантты қызметкері Алаш зияларына арнау өлеңін жазды.<blockquote>«Онлайн форматта бейнероликті жолдадым, онда Алаш зиялыларына арналған өз өлеңімді айттым. Қор филиалының директоры Бақыт Исмаханбетов үлкен көмек көрсетті. Бақыт Торғайбайұлы рухани құндылықтары жоғары тұлға, бізге үлгі. Байқауға жібермес бұрын басшымызға өлеңімді көрсеттім. Ол өз түзетулерін жасады. Ұжымға қолдау көрсетіп, жылы қарсы алғаны үшін рақмет!», - дейді Нұрболат Абатов.</blockquote>Айта кетейік, бұл Әлеуметтік медициналық сақтандыру қоры филиалының қызметкерлері жеңіске жеткен алғашқы шығармашылық байқау емес.Нұрболат Абатов «Елтаңба елдігімнің айғағы» облыстық жас ақындар мүшәйрасында, Қазалы ауданы ақындар мүшәйрасында жүлделі орындарға ие болған.Талғат Көшекбаев облыстық Абай оқуларында, «Мұқағали және муза» мәнерлеп оқу байқауында, Қызылорда қаласының 180 жылдық мерей тойында «Дарияның жағасында қала бар» атты ақындар мүшайрасында жүлделі орындарға ие болған.&nbsp;

МӘМС: Республикалық байқауда қор қызметкерлері жүлделі орындарға ие болды

<a href="https://kyzylorda-news.kz/">Kyzylorda-news.kz.</a> Бүгін Қызылорда облыстық қоғамдық даму басқармасы мен Қорқыт Ата атындағы Қызылорда университетінің ұйымдастыруымен Достық үйі ғимаратында «ХХ ғасырдың басындағы саяси қуғын – сүргін: зерттелуі және өзекті мәселелері» тақырыбындағы республикалық ғылыми-тәжірибелік конференциясы өтті.Конференцияны облыстық қоғамдық даму басқармасы басшысының орынбасары Артур Қамбаров ашып, жүргізді.<blockquote>«ХХ ғасырдың 20-50 жылдарындағы саяси қуғын-сүргін зобалаңы – халқымыздың тарихындағы қасіретті кезеңде орын алған саяси оқиғалар тек қазақ халқын ғана емес, миллиондаған кеңес азаматтарын құрбан етті. Бұл қасірет Сыр жұртшылығын да айналып өткен жоқ. Қолда бар мәліметтерге қарағанда, тоталитарлық жүйе жүргізген саясат салдарынан облыс бойынша 4038 отбасы қуғынға ұшырап, 1153 адам атылған екен. Қазақстанның өзінен 1992 жылы құрылған Парламенттік комиссияның қорытындысы бойынша, 1931-1933 жылдары ашаршылықтан қырылған қазақ халқының саны 2 млн 300 мың адам делінді. Этнос өкілдерінің саны 200 мың адамды құрапты», - деді Артур Қамбаров.</blockquote>Сонымен қатар, осындай үлкен тарихи оқиға тәуелсіздікке дейін жабық болып келгенін, тек тәуелсіздік алуымызбен ақтаңдақ тұстардың жауабын іздеуге кіріскенін айта келе, мемлекеттік деңгейде атқарылып жатқан жұмыстарға тоқталып өтті.Шараға онлайн байланыс арқылы Х.Досмұхамедов атындағы Атырау университетінің профессоры, тарих ғылымдарының докторы Бердіғожин Лесқали Базарғалиұлы, Маңғыстау облысы мемлекеттік архивінің бас сарапшысы, тарих ғылымдарының кандидаты Нұрмаханова Жанат Жанашқызы, Қорқыт Ата атындағы Қызылорда университетінің профессоры, филология ғылымдарының кандидаты Тұяқбаев Ғабит Әнешұлы және университеттің қауымдастырылған профессоры, PhD докторы Талғат Жолдасұлы, «Қызылорда облыстық мемлекеттік архиві» КММ директорының орынбасары Алтынбаева Жанат Олжабайқызы баяндама жасады.

Қызылордада республикалық ғылыми-тәжірибелік конференция өтті

<a href="https://kyzylorda-news.kz/">Kyzylorda-news.kz.</a>&nbsp;«Бала қуанса, әлем қуанады» деген ниетті алға тартқан Қызылорда қалалық полиция басқармасының қызметкерлері кезекті игі іс-шараны ұйымдастырып, ерекше балаларды қуанышқа бөледі.1 маусым - халықаралық балаларды қорғау күні мерекесіне орай, №5 көру қабілеті бұзылған балалардың арнайы «түзету» мектеп-интернаты коммуналдық мемлекеттік мекесінің ерекше балалары «Бала арманы» атты өздерінің тілектерін жазған болатын. Сол армандар кітапшасына спорттық киім, құрастырмалы ойыншық, балдық көйлектер, спорттық аяқ киім, қыстық күртеше және сөмке сынды қажетті құралдары мен ерекше қызығушылықтарын жазған болатын.Қызылорда қалалық полиция басқармасының қызметкерлері ерекше балалардың арман тілектерін орындап, балақайлардың жүзіне күлкі ұялатты. Іс-шара барысында сыйлықтарды үлестіріп, өздерінің полицей екендіктерін жеткізіп, әлемде ешбір бала жыламасын деп тілек білдірді.&nbsp;<blockquote>«Құрметті балақайлар келіп жеткен мерекелерің құтты болсын. Барлық армандарың орындалсын. Ең бастысы дендерің сау болып, ауырмаңдар! Біз сендердің тыныш ұйықтауларың үшін күні-түні қызмет етеміз! Қашанда қолдау, көмек көрсетуге дайынбыз», - деді кадр саясаты бөлімшесінің бастығы, полиция майоры Мақсат Садыбеков.</blockquote>Сондай-ақ мектеп-интернатының басшысы балаларды елеп-ескеріп келген полицейлерге ризашылықтарын айтты.&nbsp;<blockquote>«Сіздер, бүгін біздің балаларымызға айрықша мереке тарту еттіңіздер. Демалыссыз атқаратын жұмыстарыңыздың арасында балаларға уақыт тауып отырсыздар. Шынын айтсақ, балалармен қатар, өзімізде қуанып тұрмыз. Біздің қорғаушыларымыз, қаламыздың тыныштығын күзететін сіздерге үлкен рақмет», - деп атап өтті мектеп-интернат директоры Жамбыл Ахметов.</blockquote>Қызылордақалалық Полиция басқармасының азаматтардың әрбір талап-тілегін ескерусіз қалдырмауға тырысады.

Қызылордалық полицейлер ерекше балаларды қуантты

<a href="https://kyzylorda-news.kz/">Kyzylorda-news.kz.</a>&nbsp;Әскер – елдің басына күн туа қалған жағдайда жүгінер ең маңызды күші. Бүгінгі таңда бейбітшілік туы желбіреген мемлекеттердің де әскери күші жағынан бес қаруы сай, төрт құбыласы түгел. Әйткенмен әскер соғысты күтпейді, тыныштықты күзетіп, елдің есендігін тілейді. Қазақ «Ұланы бар елдің ұраны бір» деп жатады. Ұлан демекші, ер жеткен әр азаматтың борышы – әскери борышын өтеу.&nbsp;Бірақ қазір бұл жауапкершілікті борыш санамайтын жігіттердің қарасы көп. Қызылорданың өзінде 189 азамат әскерден жалтарып жүр. Қала әкімдігінде өткен жиында қорғаныс істері жөніндегі басқарма басшысы Бауыржан Асанов осындай мәлімет келтірді.&nbsp;Елге пана болады деген азаматтарымыз туған Отанға қалай қызмет ету керек екенін білмегені ме? Биыл көктемгі шақырулардан бой тасалап қашып жүр. Неге? Сылтаулары сан түрлі. Бірі – ауру, енді бірі – &nbsp;үйдің жалғызы, тағы бірі оқу оқып жатыр. Біздің қазақ дүниеге ұл келсе «азамат», «ел қорғайтын батыр» болады деп мақтанып, ер баланың рухын көтеріп отырған. Кешегі ел қорғаған батырлар, жердің бір сүйемін де жауға бермеген. Жерден айырылу елден айырылу деп пайымдаған халқымыз ер баланы қырандай қырағылыққа, өжеттікке, өрлікке тәрбиелеген. &nbsp;Бұл – өте дұрыс шешім. Менің ойымша, ер баланың бойына жақсы қасиеттер көбінде әке тәрбиесінен сіңеді. Асқар атты көршіме осы сұрақты қойғанмын. Себебі оның ұлдары әскерге барып, міндетін абыроймен атқарып келген еді.&nbsp;<blockquote>«Үлкен ұлым Жәдігер әскери қызметкер болуды армандады. Арманына қол жеткізу үшін Алматыға оқуға тапсырған. Бірақ бірнеше күн қатарынан тапсырған ауыр дене шынықтыру сынағына шыдамай, жолдастарын тыңдап, емтиханнан бас тартты. Қателік жасап тұрғанын түсіндіру үшін ұлыма психологиялық шабуыл жасауыма тура келді. Оған «мынадай кішкене қиындыққа шыдай алмасаң, ертеңгі күні өзіңді, отаныңды, бізді қалай қорғайсың?» деп қайрадым. Ертеңіне қатесін түсініп, емтиханды тапсырып, оқуға түсіп кетті. Жалпы ұл бала тәрбиесіне анасы араласқан жоқ. Өйткені ананың жүрегі – жұмсақ, аяушылық танытады. Әкенің міндеті – алдағы қиыншылықтарға төтеп бере алатын батыр да &nbsp;батыл ұрпақ тәрбиелеу. Ал мен әке ретінде өз міндетімді дұрыс атқардым деп ойлаймын», – дейді ол.&nbsp;</blockquote>Атам қазақ басынан өткен оқиғалардан сабақ алып адамның әр жаста қандай қасиетті игеру керек екенін даналықпен белгілеп, ат қойып, айдар таққан. Мысалы, &nbsp;жиырмадан отызға дейінгі жасты «жылқышы жасы» деп атап, бұл жастағы азаматтарға ел, жер танып, жылқының жиырма қасиетін біліп, жеті қараңғыда адаспай жол табатын, қауіп-қатерге жолыққанда ерлік көрсете алатын қасиеттерді бойына сіңіруді, батыл да батыр болу талабын қояды. Міне, ата-бабамыздың көрегендігінде шек жоқ. Даласы қандай кең болса, ойы соған сәйкес парасатты, әріден болжайтын жауынгер халық болған. Түйенің қомында, аттың жалында көшпенділікпен тұрмыс кешсе де ер баланы тәрбиелеуге аса жауапкершілікпен қараған. Айбынынан жаудың өзі аласарған батыр Бауыржан Момышұлының бір өзі бүкіл қазақ елінің рухын көтеріп тұр емес пе?! Момышұлының мірдің оғындай нысанаға дәл тигізер сөздері бүгінде халық арасында кең тарап, қанатты сөзге айналып кетті.&nbsp;«Ерлік &nbsp;– тайсалмас табандылық пен қайыспас қайсарлықтан шығады. Өршіл рухтан – өлмес ерлік туады. Ерлік – елдің қасиеті, жүректілік – жігіттің қасиеті» деп Бауыржан атамыз әр сөзінде ер-азаматты табанды болуға шақырады.&nbsp;<blockquote>«Иә, соңғы кезде әскери өмірде болып жатқан оқиғаларды естіп жүрміз. Дегенмен Отан деген бар қорқыныштан, үрейден жоғары тұруы керек. Отанды қорғау деген ол – анаңды, еліңді, жеріңді, халқыңды қорғау деген үлкен ұғым. Батыр бабаларымыз елді жау шауып жатқанда «жоқ, мен өліп қалам, шайқасқа бармаймын, елді қорғамаймын» деп бұғып, тығылып жата берсе, сонда біздің елімізді, жерімізді жау баяғыда басып алып, ел тағдыры таразыға түспей ме? Сонда егемендігімізді қалай аламыз, салт-дәстүрімізді, ежелден жеткен елдігімізді қалай қорғаймыз? Сол бабалардан жеткен аманатты келер ұрпаққа табыстау біздің қазіргі ұрпақтың парызы емес пе?», – дейді көршім Асқар.&nbsp;</blockquote>Оның үстіне қазіргі әскери міндет бұрынғыдай 3 жыл, 2 жыл емес, 1-ақ жыл. Онда да шетелде емес қазақ жерінде. &nbsp;Сол 1 жылда ата-анасы әскери бөлімге бір емес кейде бірнеше мәрте барып жатады. &nbsp;Сыныққа сылтау іздеп, денсаулығы жарамды бола тұра әскери борыштан жалтару – &nbsp;өте ұят нәрсе. Ата-ана да баланы қырағылыққа, қайсарлыққа баулу керек. Ата-бабаларымыз «Қырық жыл қырғын болса да, ажалды өлер» деген емес пе? Жарығы бар адам &nbsp;сөзсіз қан майданнан да оралған.Қалай десек те сарбаз боп сапқа тұру әр азаматтың ар-ожданына, намыс пен жігеріне байланысты. Осындайда бойына бес қаруын асынып, жауға шапқан өр рухты қазақтың батырлары еске түседі. Оның үстіне бейбіт елде, бейбіт әскерде болатынын да ұмытпауымыз керек.

Сарбаз боп сапқа тұру әр азаматтың міндеті

<a href="https://kyzylorda-news.kz/">Kyzylorda-news.kz.</a>&nbsp;31 мамыр – саяси қуғын-сүргінге ұшыраған және ашаршылық азабын тартқан &nbsp;жандарды аза тұту күніне орай Қорқыт ата атындағы Қызылорда мемлекеттік университетінің профессоры, тарих ғылымының кандидаты Айтжан Оразбақовпен сұхбаттасқан болатынбыз.– Тарихтан тін тартсақ, қазақ халқының тарихында ең қаралы кезең, сол – «жұмысшылыр табының диктатурасы» құрған 1917-1991 жылдар аралығындағы кенестік тоталитарлық режимнің билігінің тұсына келеді деп тарихшылар ой қозғайды. Осы бағытта сіздің пікіріңіз қандай?– Қазақтың тарихына көз салсаңыз, қай кезде де басынан қиындықтар өткені айна қатесіз. Ал шындығында кеңестік билік орнағаннан кейін қазақ даласында жағдай қиындады деп айтуға болады. Оның бәрі 1917 жылдың басында етек жайған репрессияның ықпалынан. Азамат соғысы жылдарында бір жағынан қазақ ауылдарын ақтар келіп тонап жатса, екінші жағынан қызылдар келіп тонады. Ал совет үкіметі орныққаннан кейін репрессия жаңа бір қозғалыс алды деуге болады. Репрессия құрбандарын ақтау комиссиясының жұмысына қатысып, өткен жылы біраз құжаттармен таныстық. Қарап отырсақ, 20 жылдары кеңес үкіметі толық күшіне еніп, өзінің репрессиялық қимылын бастаған екен. 1920, 1940,1950 жылдары Қазақстанның территориясында репрессиялық аппарат жұмыс істегенін де біліп отырмыз.&nbsp;– Нағыз аштық ел басшылығына Ф.Голощекинді тағайындаудан басталғаны рас па?– Қазақстандағы аштық Голощекин билікке келген кезден басталды деп айтуға болады. Өйткені ол октябрь революциясын орнатам деп асыра сілтеушілікке барды. Соның нәтижесінде қазақтар жоғарылатылған жоспарды орындаймыз деп малынан, егіннен айырылып, бәрі орталыққа кетті. Соның кесірінен халық жейтін тамағынан айырылды &nbsp;деуге болады. Соңғы кезде мынадай ой келіп жүр. «Қазақстандағы ашаршылық әдейі ұйымдастырылған емес пе?» &nbsp;деген. Бірақ кеңес үкіметіне әдейі аштық жасауға қолайсыз жағдай болды. &nbsp;Азаматтық соғыс кезінде 1920 жылдардағы үкімет қызметкерлерінің ішінде қазақстандықтармен бірге украиндықтар бой көрсетті. Бір ғана мысал, азамат соғысы жүріп жатқан кезде өздерінің ұлттық үкіметін құруға украиндықтар, қазақтар, Закавказия респуликалары талаптанып жатты.– Билік тарапынан әдейі жасалған 1925-33 жылдардағы ашаршылық науқаны, қазақ халқының санын &nbsp;2,2 милионға кемітіп, рухани дағдарысқа әкеліп, ұлттық сананы сансыратып, елдің сағын сындырды деген дерек бар. Осы дерекке қосыласыз ба?– Бұл дерекке қосылуға болады. Өйткені ашаршылықтан кейін, ашаршылық кезінде, аштықтан қашқан қазақтар көршілес Өзбекстан, Ресей, Қытай территориясына кетіп қалды. Сол кездерде қазақтың рухы бәсеңсіп қалды ма деген ой келіп отыр. Ал &nbsp;санына қарай қазақтың кему жайына &nbsp;ғалым Талас Омарбеков жақсы зерттеу жұмыстарын жүргізген. Соның еңбектерінен көруге болады.– Қазақтың алдыңғы қатарлы ойшыл азаматтары, зиялы қауым өкілдері, ақын-жазушылар, елдің бетке ұстар тұлғалары &nbsp;саяси қуғын-сүргіннің құрбаны болғанын тарих баяндап тұр. &nbsp;Десе де, сіздің тарихшы ретінде пікіріңізді білсек…– Революцияға дейін қазақтың интелегенциясы, бетке ұстарлары пайда болды. Олардың бірі Ресейде қызмет істесе, кейбірі Ресейдің оқу орындарын бітірген, көзі ашық, көкірегі ояу жандар болды. Тіпті олардың ішінде &nbsp;Думада, алаш партиясында қызмет істегендері де бар. Ал совет үкіметі орнағаннан кейін қазақ зиялыларының жаңа буыны көтеріліп келе жатты. Егін қалай көтеріліп, өркен жаяды, сол секілді интелегенция сапа жағынан нығайған болатын. 1930 жылдан бастап қазақтың бетке ұстар азаматтарын бел орақпен қырып салғандай жағдай болды. Сондықтан қазақ интелегенциясының 90 пайызын құртты деп айтуға негіз бар.– Қызылорда облысынан репрессияның құрбаны болып жапа шеккендер жайлы айта кетсеңіз?&nbsp;– Біздің аймақтан репрессия құрбаны болғандар саны жайлы толық айту мүмкін емес. Өйткені бұл бағытта жұмыстар әлі де жүргізіліп жатыр. Бұл туралы біз еңбек дайындап жатырмыз. XX ғасырдың 1920-1950 жылдарына дейін Сыр өңірінде репрессия болған азаматтар деген кітап дайындаудамыз. Бұл жерде біздің көрсеткіміз келіп отырғаны – әр жылы қаза болғандар туралы, олардың ұлтына, қызметіне, жынысына қарай бөлінісін бергіміз келеді. Репрессияға ұшырағандардың барлығы интелегенция деп айтуға болмайды. Көпшілігін жұмысшылар мен шаруалар құрайды. Біз бұл сұрағыңызға нақтырақ жауапты ғылыми жұмыс дайын болған кезде айтамыз.– Әлі ашылмаған ақиқаттар бар ма?&nbsp;– Әлі ашылмаған ақиқаттар көп. Бір материалды дайындап бітірдім-ау деген кезде тағы бір деректің шеті шыға келеді. Оны суыртпақтасаң, әрі қарай жалғаса береді. Бір ғана мысал, жақында архивтен материал таптық. 1930 жылдардың басында Арал станциясында концлагерь болған екен. Лагерьде 6 мыңнан астам адам азап шеккен. Бұл – зерттелмеген тың тақырып. Әлі зерттеуді қажет етеді. Сәті келген күні бұл тақырып та қозғалады деп ойлаймын.– Сұхбатыңызға рахмет!

Айтжан Оразбақов: Сыр өңірінде репрессия болған азаматтар деген кітап дайындаудамыз

<a href="https://kyzylorda-news.kz/">Kyzylorda-news.kz.</a>&nbsp; Синоптиктер 30 мамыр - 1 маусым аралығындағы ауа райы болжамын ұсынды.Қазгидромет мәліметінше, республиканың басым бөлігінде ауа райы атмосфералық фронталь учаскелермен анықталады, сондықтан найзағай ойнап, жаңбыр жауады, республиканың оңтүстігінде, оңтүстік-шығысында және шығысында бұршақ жаууы мүмкін. 30 мамырда Шығыс Қазақстанда, 1 маусымда Батыс Қазақстан мен Атырау облыстарында бұршақ жаууы мүмкін.Тек Қызылорда және Ұлытау облыстарында антициклонның екпінімен ауа райы жауын-шашынсыз болады. Сондай-ақ, республика бойынша жел күшейеді, республиканың оңтүстік-батысында және оңтүстігінде шаңды дауыл күтіледі.<blockquote>"Қазақстанда күндізгі негізгі температуралық фон: батыста және солтүстік-батыста 28-36 жылы, солтүстікте, оңтүстік-шығыста және орталықта 25-35 жылы, оңтүстікте 32-37 жылы, шығыста бірте-бірте жоғарылайды", - делінген хабарламада.</blockquote>&nbsp;

Алдағы күндері ауа райы қандай болады?  

<a href="https://kyzylorda-news.kz/">Kyzylorda-news.kz.</a> Қызылордада әзірге «Алтын сапа» сыйлығына 3 және «Қазақстанның үздік тауары» өңірлік көрме-байқауына 52 кәсіпкер қатысуға ниетті. Құжаттар 1 шілдеге дейін қабылданады.«Алтын сапа» мен «Қазақстанның үздік тауары» көрме-байқауына қатысушы кәсіпкерлердің біліктілігін көтеріп, бағыт-бағдар беру үшін Қызылорда облысының кәсіпкерлер палатасы семинар өткізді.Семинарға Кәсіпкерлер палатасының директоры Пірмұхаммед Сыздықов, Өңірлік кеңес төрағасы Ерлан Райымов, байқаудың сарапшылары мен кәсіпкерлер, байқаудың өткен жылдардағы жеңімпаздары қатысты, аудандағы кәсіпкерлер онлайн қосылды.Семинарда Кәсіпкерлер палатасының сарапшылары Малика Тютебаева мен Назым Мұрсал кәсіпкерлерге қос байқауға қатысу үшін қойылатын талаптар, өңірлік және республикалық байқаулардың ерекшелігі, жеңімпаздарға берілетін басымдықтар жайлы кең көлемде ақпарат берді.Сондай-ақ, Қазақстан Республикасы Президентінің «Алтын сапа» сыйлығын алуға арналған байқауы және «Қазақстанның үздік тауары» көрме-байқауын өткізу тәртібі мен критерийлері бойынша бағалау әдістемесін түсіндірді.«Ұлы дала елі» бірыңғай брендін пайдалану құқығын беруге арналған байқаудың былтырғы жеңімпазы «Асыл Дән LTD» ЖШС өкілі Ақнұр Дархан алған тәжірибесін бөлісті.<blockquote>«Былтыр «Қазақстанның үздік тауары» өңірлік көрме-байқауында жеңімпаз атанып, республикалық жарысқа қатыстық. Біз үшін керемет тәжірибе болды. Өзге өңірлердегі әріптестерімізбен танысып, әріптестік байланыс орнаттық. Дауыс беру жүйесі арқылы «Ұлы дала елі» брендінің жеңімпазы атандық. Бұнымен тоқтап қалғымыз келмейді. Биыл «Алтын сапа» сыйлығында бақ сынап көрмекпіз», – деді Ақнұр Дархан.</blockquote>Шара соңында семинарға қатысып, біліктілігін көтерген кәсіпкерлерге арнайы сертификаттар тапсырылды.Осыған дейінгі Қызылорда облысынан ҚР Президентінің «Алтын сапа» сыйлығының жеңімпаздары: «РЗА» АҚ (2014ж.), «Абзал және К» ТС (2017ж.), «Мағжан және К» ЖШС (2019ж.), «СКЗ-U» ЖШС (2019ж.), «Абай Дәулет» ЖШС (2021ж.), «Алтын Орда» ЖШС (2021ж.).«Қазақстанның үздік тауары» республикалық конкурсының жеңімпаздары: «РЗА» АҚ (2011ж.), «Абзал және К» ТС (2012ж.), «Қазбергенов» ЖК («Қазалы кәмпиті») (2015ж.), «Dalatex» ЖШС (2018ж.) болды.«Ұлы дала елі» бірыңғай брендін пайдалану құқығын беруге арналған байқау жеңімпазы «Асыл Дән LTD» ЖШС (2022 ж.).Айта кету керек, «Алтын сапа» сыйлығына кәсіпкерлер мына номинациялар бойынша қатысады:1. «Өндiрiстiк мақсаттағы үздiк кәсiпорын»; 2. «Халық тұтынатын тауарларды шығаратын үздiк кәсiпорын»; 3. «Қызметтер көрсететiн үздiк кәсiпорын»; 4. «Азық-түлік тауарларын және/немесе ауыл шаруашылығы өнімдерін шығаратын үздік кәсіпорын».Ал «Қазақстанның үздік тауары» өңірлік көрме-байқауына:1. «Өндірістік мақсаттағы үздік тауарлар»; 2. «Халыққа арналған үздік тауарлар»; 3. «Үздік азық-түлік тауарлары» номинациялары бойынша қатыса алады.Өңірлік көрме-байқаудың 9 жеңімпазы (әр номинацияда үш жеңімпаздан) республикалық байқауға қатысады.

Қазақстан және Қызылорда облысының жаңалықтары