<a href="https://kyzylorda-news.kz/">Kyzylorda-news.kz</a> 15 сәуірден бастап республика аумағында тұрмыстық және құрылыс қалдықтарын қоқысқа белгіленбеген жерлерде қалдырып кету, сұйық қалдықтарды заңсыз төгу деректеріне жол бермеу бойынша арнайы акция өткізіліп жатыр, деп хабарлайды El.kzақпарат агенттігі Polisia.kz-ке сілтеме жасап.&nbsp;Акция басталғалы бері полицейлер 127 заңсыз қоқыс орнын анықтады. Олардың 32-сі елді мекендерден шалғай жерлерде орналасқан. Жалпы 19 274 әкімшілік құқық бұзушылық тіркелді, оның ішінде 5 488 факті ортақ пайдалану орындарын ластаумен, 13 786 дерек абаттандыру ережелерін бұзумен байланысты.Бұл ретте ІІМ азаматтарды табиғатты аялауға, қоршаған ортаны ластамауға, экологиялық заңнаманы сақтауға шақырып отыр.&nbsp;Фото: Нұрболат Нұржаубай

Полицейлер 127 заңсыз қоқыс орнын анықтады

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев Қазақстан халқының бірлігі күніне орай облыстық Қазақстан халқы ассамблеясы жанындағы құрылым мүшелерімен, этномәдени бірлестіктердің жетекшілерімен бірге Бірлік аллеясындағы тал егу шарасына қатысты. Қазақстан халықтарының бірлігі күні – Қазақстанда жыл сайын тойланатын мереке. Мереке 1996 жылдан бастап тойланады. 1995 жылдың 18 қазанында Қазақстан президенті жарлығы бойынша 1 мамыр – Қазақстан халықтарының бірлігі күні деп жарияланды. Айта кетейік, бүгінде облыстық ассамблея жанында 11 этномәдени бірлестік бар. Қорқыт Ата атындағы Қызылорда университетінде «Қазақстан халқы ассамблеясы» орталығы жұмыс істейді. Өңірдегі ұлтаралық татулық пен қоғамдық келісімді сақтау, облыстық ассамблеяның қызметін жандандыру және оның қоғамдық-саяси рөлі мен маңызын арттыру бағытында тиісті жұмыстар атқарылуда. Еске салсақ, қазір республика бойынша «Таза Қазақстан» акциясы өтуде. Акция аясында әр аптаға «Таза өлке», «Киелі мекен», «Жасыл аймақ», «Өнегелі ұрпақ», «Мөлдір бұлақ» &nbsp;тақырыптық атаулары берілген.&nbsp; Сыр өңірінде «Таза Қазақстан – таза аймақ» науқаны аясында 5 кезең бойынша көгалдандыру, тазалық шаралары ұйымдастырылуда.

Қызылордада бірлік күніне орай тал егілді

<a href="https://kyzylorda-news.kz/">Kyzylorda-news.kz</a> Қазақстандық белгілі футболшы, жаттықтырушы Бақтияр Байсейітов 2022 жылдан бері халықаралық іздеуде жүр. Бұл туралы Tengrinews.kz ақпарына сүйенген <a href="http://rast.kz/">rast.kz</a> хабарлайды.Бұрынғы футболшы және жаттықтырушы Бақтияр Байсейітовке Түркістан облысындағы «Қаратау» уран кенішін жаңғырту кезінде ақша жымқырды деген күдік таңылды. Оған осы күдік бойынша 2022 жылы халықаралық іздеу жарияланған.Бұған дейін сыбайлас жемқорлыққа қарсы қызмет «Қаратау» ЖШС бұрынғы басшылығына («Қазатомөнеркәсіп» ҰАК АҚ еншілес ұйымы), «Iri building» ЖШС мердігерлік ұйымының директорына, сондай-ақ авторлық және техникалық қадағалау өкілдеріне қатысты тергеуді аяқтағанын хабарлаған болатын. Оның қорытындысы бойынша мердігерге 2019-2021 жылдары Түркістан облысы Созақ ауданындағы «Қаратау» кенішінде уран өңдеу кәсіпорнын жаңғырту жобасын іске асыру шеңберінде құрылыс-монтаждау жұмыстарына бөлінген 862 миллион теңгені жымқырды деген күдік таңылды.Антикор мәліметінше, «Iri building» ЖШС Қайрат Сатыбалдыұлыға жақындығы бар Бақтияр Байсейітовтің бақылауындағы компания болып шықты.Бақтияр Байсейітов 2022 жылдан бері Қылмыстық кодекстің 189-бабы 4-бөлігі 2-тармағы – «Сеніп тапсырылған бөтеннің мүлкін иемдену немесе жымқыру» бойынша халықаралық іздеуде болған. Сондай-ақ, Антикор оның қайда екені туралы ақпарат үшін сыйақы жариялаған.Айта кетейік, Бақтияр Даниярұлы Байсейітов 1952 жылы 27 тамызда Оңтүстік Қазақстан (қазіргі Түркістан) облысының Сарыағаш ауданындағы «Қапланбек» совхозында туған. Орта мектепті «Мамаевка» ауылында бітірген. Бала жасынан футболмен шұғылданған. Ол 1970 жылы Шымкенттің «Металлург» командасы құрамына қабылданды.&nbsp; Ал 1980-1982, 1984-1985 жылдары КСРО чемпионатының екінші лигасында Шымкенттің «Мелоратор» командасы сапында 98 ойын өткізіп, 52 гол соқты. Футболшылық мансабын аяқтағасын, 1990 жылы Мәскеудегі жаттықтырушылар мектебін бітіріп келді. Бірқатар жылдар Шымкенттің «Ордабасы», Алматының «Қайрат» командаларын жаттықтырды. Қазақстан құрамасын басқарды.Еске сала кетейік, Бақтияр Байсейітов – бұрынғы президенттің баласы, яғни інісінің ұлы Қайрат Сатыбалдының төрт әйелінің бірінің әкесі, яки қайын атасы. Оның уран кәсіпшілігіне араласып жүргені де Қайраттың арқасы болса керек. Сондықтан қазақстандық сайттардың бәрі Бақтияр Байсейітовті «Қайрат Сатыбалдының туысы» деп атап жазып жатыр. Шын мәнінде олар бір-бірімен ешқандай да туыс емес, мұны қазақ жекжат дейді бар болғаны. Қазақ&nbsp;«туыс» деп тек рулас, соның ішінде де аталас&nbsp; ағайынын ғана айтады.

Белгілі футболшы, жаттықтырушы Бақтияр Байсейітов іздестіріліп жатыр

<a href="https://kyzylorda-news.kz/">Kyzylorda-news.kz</a> Қазақтың кеңпейілділігін, дарқандығын білдіретін небір салт-дәстүрлер бар. Бүгінгі таңда оның бірі кеңінен қолданылса, кейбірі ұмытылып бара жатқаны шындық. «Көршімен жақсы болсаң, жұтқан ауаң да кең болады», «Көршіні құдай қосады», «Алыстағы ағайыннан, жаныңдағы көршің артық», «Таспен қоршама, көршімен қорша». Иә, бұл мақалдар өзін айналасындағы көршісімен бай санайтын қазақ өміріндегі көршінің алар орнын айқындап тұр. Біз бұл сөздерді бекерден бекер айтып отырған жоқпыз. Бүгінгі біз қаузайтын тақырып та көршілердің арасын жақындататын жоралғы тұрғысында өрбімек. Яғни, уақыттың ағымымен күнделікті тіршілікте ұмыт болып бара жатқан дәстүрлердің бірі – ерулік беру туралы тарқатамыз.Кез келген отбасы қоныс аударар сәтте болашақ көршілерінің қандай болатынын ойлайды. Әрі барған ортасы жылы қабылдап, тез тіл табысуды армандайды. Іргелес қонған шаңырақтың үйренісе алмай тосырқайтынын біліп, дана халқымыз ерулік беруді ойлап тапқан. Салт бойынша көшіп келген үйдің орналасуына қолғабыс беріп, одан соң кезектесіп қоныстанушыларды бала-шағасымен дәм татуға шақырады. Бұл қазақ халқының аралас-құралас, яғни жақын, бір-бірімізге бас-көз болайық деген ниетінен туған.&nbsp;Өкінішке қарай, дәстүрдің бұл түрі еліміздің қалалық аймақтарында ұмытылып барады. Тіпті «Көршіңіз кім?» деген сұраққа тосырқап қарайтындары да кездеседі. Алайда, сіз қыдырып немесе іс-сапарға кеткенде, көршіңіз үйіңізді ұры-қарадан сақтап, көзінің қырын салып жүрсе, өзіңіздің де көңіліңіз тыныш болмай ма? Әрі келген қонағыңызды да біркісідей күтеді. Арамызда ешкімге тісжармаған сырын көршісімен бөлісетіндер де бар. Сондықтан әңгімемізге арқау болған еруліктің маңыздылығы айтпаса да түсінікті шығар.&nbsp;Ертеректе жаңа көшіп келген көршіге тиісінше құрмет көрсетілмесе, би-шешендерге шағымданатын болған екен. Ата дәстүрді сыйламағаны үшін тіпті айыппұл да төлеген. Ата-бабамыз көршісінің қандай ұлт екеніне қарамай, ерулік беріп, жатсынбай қарсы алған. Яғни, олардың жерімізге тез сіңіп кетуіне жағдай жасаған. Осының әсерінен елімізде өзбек, орыс, шешен, кәріс т.б. ұлт өкілдері қоныстап қалып, өз Отандарына оралуға асықпаған. Бұл күнде өз елдеріне қоныс аударғандары қазақтың қонақжайлылығын ризашылықпен сөз етеді екен.&nbsp;Мәселен, 2000 жылы Германияға көшкен Нелли Обендерфер Шиелі ауданының тұрғыны еді. Ол отбасымен 1940 жылы небәрі 2 жасында Украинадан Шиелі ауданы, Алғабас ауылына қоныс аударып келген. Кішкентайынан Шиелі топырағында өскен Нелли 1955 жылы украин ұлытының азаматы Томасқа тұрмысқа шығып, 1995 жылға дейін Жаңатұрмыс ауылында тұрады. Дүниеге 10 бала әкелген батыр ана. Қазақша еркін сөйлейтін Нелли Обендерфер 25 жыл Байсын ауылындағы №207 Жаңатұрмыс орта мектебінде тазалықшы болып жұмыс істейді.&nbsp;Шиеліден сонау Германияға отбасымен көшіп барғанымен, елеңдеп елге қарайлап отыратын Нелли Обендерфер сол жақта өмірден өтті. Бірақ дүниеден өтер алдында қызы Марина Фрайға Шиеліге соңғы сәлемін жеткізуді аманаттайды.&nbsp;<blockquote>– Анам тек қазақша сөйлейтін. Бізге де қазақша тәлім-тәрбие берді. Салт-дәстүрді үйретті. Бауырмал, тату-тәтті болыңдар деп қазақ балаларын үлгі етті. Германияға көшіп барғанымызбен Шиеліні аңсап, сағынып отыратын. Жаңатұрмыстағы көршілеріміз Дүкенбай аға мен Разия апа, Жақсылық аға мен Рахима апа, Аманбай аға мен Рабиға апаны жиі айтып, «мен бұл дүниеден кетсем, менің соңғы сәлемімді соларға жеткіз» деп айтып кетті, – деді М.Фрай.&nbsp;</blockquote>Осылайша, ана аманатына адалдығын білдірген Марина Германиядан Шиелі аудандық «Өскен өңір» газеті редакциясына хабарласты.&nbsp;Елден кеткеніне 24 жыл өтсе де, қазақ тілін ұмытпай, қазақша сөйлеп, оған құрметін көрсеткен Маринаның бұл ісі әрине, анасының тәлім-тәрбиесінен екені мәлім. Қазақ мектебінде 25 жыл, Шиелі жерінде 60 жыл ғұмырын өткерген Нелли Обендерфер өзі жетпесе де, киелі жерге сөзін жеткізді. Қимастық сезімін, елге деген сағынышын білдірді. Кең құшағын ашып, бауырмалдық танытқан қазақ халқына алғысын айтты.

Шиеліге Германиядан келген хат

<a href="https://kyzylorda-news.kz/">Kyzylorda-news.kz</a> Қазақтай ұлттың айналасына түрлі этнос өкілдері ұйысып отырған киелі мекеннің бірі – Шиелі. Ықылым заманда ата-бабасы ту тіккен туған жерден қиындықпен ұзап, қоныс аударған олардың қайқайсысына да қазақ халқы жылы құшағын айқара ашты. Кеңестік жүйе қыспағымен қазақ даласын паналаған бөтен жұрт осында тұрақтап қалды, өсті-өнді. Достық пен ынтымақ бар жерде, береке мен ырыс болары айдан анық. «Бірлік болмай, тірлік болмас» дейді бабалар сөзі. Расында, берекені көздеген ел мерекелі тірлік жасаудан еш жалықпаған.Міне, елдің қарыштап дамуына да, ең алдымен, ұлтаралық саясаттағы тұрақтылыққа негізделген қағидаттың ықпалы зор. Бір сөзбен айтқанда, мемлекеттің экономикалық өсуі, әлеуметтік ілгерілеуі, қоғам бірлігі ұйысқан және сақталған жағдайда ғана жүзеге асады. Ал ұлттар арасындағы бірлікті қамтамасыз ету – демократиялық, зайырлы, құқықтық және әлеуметтік мемлекет құрудың маңызды шарты.&nbsp;Қазақтың байтақ даласы – бүгінде 130-дан астам ұлт өкілінің ортақ Отаны. Қазіргі таңда Қызылорда облысы көлемінде 96 пайыз қазақ, 4 пайызға жуық өзге ұлт өкілі тұрады. Яғни, облыста 30 мыңның үстінде өзге этнос өкілі өмір сүріп жатыр. Ал Шиелі ауданында 3 067 өзге ұлт өкілі ғұмыр кешуде. Атап айтқанда, орыстар – 1 650, кәрістер – 718, шешендер – 34, татарлар – 35, өзбектер – 520, украиндер – 20, әзірбайжандар – 11, немістер – 22, қырғыздар – 2, беларустар – 50, ұйғырлар – 3, қырғыздар – 2, чуваштар – 1, қытайлар – 1, тағы басқа ұлттар мен ұлыс өкілдері ауданның тұрғылықты тұрғынына айналған.&nbsp;Сондай-ақ Шиелі ауданы көлеміндегі 8 мекеме мен ірі кәсіпорындарда 412 этнос өкілі жұмыс істейді. Атап айтсақ, білім бөлімінде 29 қызметкер мен 164 оқушы, «Волковгеология» АҚ филиалы №23 геологиялық барлау экспедициясында 98, «РУ-6» ЖШСде 64, Шиелі индустриалды-аграрлық колледжінде 32 студент, «КАР – Logistics» ЖШС Иіркөл филиалында 8, «Шиелі аудандық көпбейінді орталық ауруханасы» ШЖҚ КМК-де 2, «Арман» мәдениет үйінде 1 қызметкер еңбек етеді.&nbsp;Саралап қарасақ, өңірде өмір сүретін ұлттардың ең көбі – орыстар мен кәрістер. Олар Шиелі кенті, Ақмая, Бәйгеқұм, Бәйтерек ауылдық округтерінде мекендейді. Ауданда тұратын этнос өкілдері өте ұйымшыл. Олар өңірдегі атомөнеркәсіп, білім беру, денсаулық сақтау, спорт салаларында, ірі кәсіпорындарда, еңбек ұжымдарында қызмет атқарып, қоғамдық-саяси, мәдени-көпшілік өмірге белсене араласады.&nbsp;Қоғамдық келісім мен саяи тұрақтылық – біздің басты байлығымыз. Бұл жетістіктерді бағалау, оны сақтау жолында аянбай еңбек ету – әрбір Қазақстан азаматынының міндеті дер едік. Келісім бар жерде, бірлік бар. Ал бірлік болса, биік мақсаттарға жететініміз анық.

Шиеліде 14 ұлттың өкілі тұрады

<a href="https://kyzylorda-news.kz/">Kyzylorda-news.kz</a> Талайға жайлы қоныс болған Шиелі ауданында Сұлутөбе деген елді мекеннің бар. Тұрмысы түзу, тірлігі мығым, ынтымағы жарасқан бұл жер бүгінде өңірдегі іргелі ауылдардың қатарында. Сұлутөбенің қасиетті қара топырағы – талай перзентін төсінде әлдилеп, қазақы қаймағын жоғалтпаған құтты қоныс. Алаштың алып тұлғасы, көрнекті қоғам қайраткері Мұстафа Шоқай да кіндігін осы топырақта кескен еді. Қазір берекесі мен мерекесі жарасқан алақандай ауыл уақытпен бірге өсіп-өніп келеді.&nbsp;Тұрағы темір жол торабымен байланысқан, батысы Сырдария өзенінен басталып, шығысы Сарысудың жоғары жағындағы Жезқазған облысымен шектелетін Сұлутөбе ауылдық округінің бүгінгі келбеті келісті. Кезіндегі «Сұлутөбе» деген биік құмның атымен аталған станция бүгінде 589 түтін, 3 000 тұрғыны бар елді мекенге айналған. Ауылдың жалпы жер көлемі – 653 891 гектар. Оның ішінде жайылымдық жер – 70 718 гектарды, ал егістік жер – 72 440 гектарды құрайды. Жайылым табиғатының тылсым сырларын меңгерген ауыл тұрғындары тіршілігін егінмен, мал шаруашылығымен байланыстырып, кәсібінен нәпақасын тауып отыр. Жұртшылық арнайы шаруашылық техникаларымен қамтамасыз етілген. Шаруаға бейім еңбек адамдары ілкімді ісін ілгерілетуге асығады. Соның нәтижесінде мал басы да артып келеді. Ауылдық округ бойынша мал басы 16 848-ге жетті. Қазір ауылда 46 шаруа қожалығы, 32 кәсіпкер жұмыс істейді. Бұл халық тұрмысының күннен күнге жақсаруына сеп болуда.&nbsp;Ауылдық округке Сұлутөбе, 1 Мамыр және Жаназар батыр ауылдары қарайды. Елді мекеннің бүгінгі тұрмысы қалыпты. Бұнда білім алушылар үшін 3 қазақ орта мектебі, 1 спорт мектебінің филиалы, 3 балабақша, 2 аурухана, 1 мәдениет үйі және 19 мың кітап қоры бар кітапхана жұмыс істейді. Ауылдағы 24 көшенің 19-ы асфальтталған, 13-і жарықтандырылған.Алдағы уақытта көшелерге орташа жөндеу жұмыстарын жүргізіп, толығымен жарықтандыру жоспарланып отыр. Мұнда ауыз су мәселесі толық шешілген. Барлық тұрғын үй тартылған 51,8 шақырымдық су жүйесі арқылы тәулік бойы ауыз сумен қамтамасыз етілуде.&nbsp;Қазіргі таңда ауыл көлемінде талай толымды тірліктер атқарылуда. Бүгінде бұнда «Ардагерлер кеңесі», «Әйелдер кеңесі» ұйымдары жүйелі жұмыс істейді. Олар елді мекеннің қоғамдық-әлеуметтік өміріндегі күрделі мәселелерді талқылап, жас отбасыларға ақыл-кеңес беріп, ауыл жастарын спортқа, түрлі маңызды шараларға белсенді араласуға шақырып, қамқорлық танытып отырады. Бұдан бөлек мәдениет үйінде түрлі тақырыптағы шаралар, мерекелік кештер, жастар арасындағы бағдарламалар өткізіліп, ауыл кітапханасында кітап көрмелері ұйымдастырылады.&nbsp;Ауыл тазалығы – күн тәртібіндегі негізгі тақырыптардың бірі. Сұлутөбенің бүгінгі ажарына ажар қосылған. Күн жылып, көктем туғалы тұрғындар мекеннің тазалығына аса мән беруде. Бұл жөнінде:&nbsp;<blockquote>– Көктемгі көркейту-көгалдандыру жұмыстарына байланысты ауылда 500 түп ағаш отырғызылып, саябақ пен скверлердегі ағаштар ақталып, тазалық жұмыстары жүргізілді. Көктемгі, күзгі тазалық айлығында сенбіліктер ұйымдастырылып, ауылдық округтегі барлық мекемелер өз аулаларын көркейтуге атсалысты, – деді ауыл әкімі Кәждәнбек Өгізбайұлы.&nbsp;</blockquote>Тұрғындардың 1 770-і жұмыспен қамтылған, ал жұмыссыздар саны – 64. Елді мекенде өз ісін ұршыққа иіріп отырған жандардың саны біршама. Әсіресе, кең өріс алған ауылшаруашылығы ісін өркендету – биылғы жоспардағы жұмыстардың бірі. Ауыл әкімі кіші шаруашылықтарды біріктіріп, халықтың әл-ауқатын көтеруге қызмет етуді көздейді.&nbsp;Айта кетейік, бұнда атқарылуға тиіс көптеген мәселелер де бар. Мәселен, Сұлутөбе ауылдық округіне инвестиция тарту арқылы жылыжайлар салу, елді мекендерді көркейту жоспарланып отыр. Сондай-ақ спорттық сауықтыру кешені, монша секілді ғимараттардың бой көтеруіне де жағдай жасалуда.&nbsp;Тұрмысы қалыпты, табиғаты тамаша мекеннің бедері осындай. Ауылдың бүгінгі тынымсыз тірлігі берекелі бірлігімен келгені анық.

Сұлутөбеде 46 шаруа қожалық, 36 кәсіпкер бар

&nbsp;<a href="https://kyzylorda-news.kz/">Kyzylorda-news.kz.</a>&nbsp; «AMANAT» партиясының «Кедергісіз келешек» жобасы аясында инклюзиялық қоғамды дамыту және насихаттауға бағытталған «Тең мүмкіндіктер» атты инклюзиялық спорт фестивалінің облыстық іріктеу кезеңі өтті.Спорттық шара бұған дейін Қызылорда қаласы мен барлық аудандарда ұйымдастырылып, білім беру ұйымдарынан 125 командаға топтасқан 375 бала бақ сынаған болатын. Бүгінгі облыстық фестивальге аумақтық кезеңдерден жеңімпаз болып танылған 32 команда қатысты.Фестивалдің ашылу рәсімінде барша қатысушыларды құттықтап, оларға сәттілік тілеген партияның облыстық филиалының Атқарушы хатшысы Ләйлә Төрешова спорттық шараның негізгі мақсаты – ерекше қажеттіліктері бар балалар мен олардың құрдастары арасындағы достық байланысты нығайту, әлеуметтік белсенділігін, сенім мен өзара сыйластықтарын арттыру екенін атап өтіп, облыстық кезеңнің жеңімпаздары республикалық кезеңде Сыр елінің намысын қорғайтынын жеткізді. Сондай-ақ, сайыстың сапалы өтуіне қолдау жасаған облыстық қоғамдық даму басқармасының «Қоғамдық келісім» мекемесіне, сондай-ақ Қызылорда қаласы мен аудандар әкімдері, облыстық білім, спорт және туризм, денсаулық сақтау басқармалары басшыларына партияның облыстық филиалы атынан ризашылығын білдірді.Жалпы сайыс ережесіне сай командалар кіші және ересек яғни, 6-8 және 3-5 сыныпта оқитын оқушылардан жасақталды. Олар «Біз жеңімпаз боламыз!» және «Жеңіл атлетика» деп аталатын 2 кезең бойынша жүгіру, секіру, эстафета сынды түрлі спорт түрлерінен бақ сынасты. Жеңіске ұмтылған жеткіншектерге жетекшілері мен жанкүйерлері ерекше қолдау көрсетті.3 сағатқа созылған сайыста оқ бойы озық шыққан командалар жеңіс тұғырынан көрді. Жарыс қорытындысымен «Біз жеңімпаз боламыз!» кезеңінде ересек топтардан I орынды Арал ауданы, II орын -Қызылорда қаласы, III орынды Шиелі ауданы командасы иеленсе, кіші топтар арасынан I орын Шиелі, II орын Арал және III орын Қазалы ауданының командаларына бұйырды.Ал «Жеңіл атлетика» сайсында ересек топтар арасында I орынды Сырдария, II орын Арал және III орынды Шиелі ауданынан келген балалар қанжығаласа, кіші топтар арасынан I орынды Арал ауданы, II орын Қазалы және III орынды Қызылорда қаласының командасы иеленді.Жеңімпаздарды партияның облыстық филиалының Атқарушы хатшысы Ләйлә Төрешова және сайысқа қолдау көрсеткен басқарма өкілдері құттықтап, арнайы дайындалған дипломдар және сыйлықтармен марапаттады. Сонымен қатар өзге де қатысушыларға белсенді қатысқаны үшін арнайы дипломдар, сыйлықтар табысталды.

«Тең мүмкіндіктер» спорттық фестивалі өтті

<a href="https://kyzylorda-news.kz/">Kyzylorda-news.kz</a> 1 мамырда елімізде күн суытып, қар жауады. Бұл туралы «Қазгидромет» РМК-ға сілтеме жасай отырып El.kzақпарат агенттігі хабарлайды.Қостанай облысының оңтүстігінде, шығысында найзағай күтіледі. Батыстан, оңтүстік-батыстан жел соғады, түнде облыстың оңтүстігінде 15-20 м/с, күндіз облыстың басым бөлігінде 15-20 м/с, облыстың батысында, солтүстігінде кей уақыттарда 23 м/с күтіледі.Жетісу облысының таулы аудандарында қатты жаңбыр, найзағай, бұршақ, дауыл күтіледі. Батыстан жел соғады, облыстың солтүстік бөлігінде, таулы аудандарында екпіні 17-22, Алакөл көлдері аудандарында 23-28 м/с.&nbsp;Атырау облысының оңтүстігінде, шығысында солтүстік-шығыстан жел соғады, түнде екпіні 15-20 м/с. 1 мамырда облыстың оңтүстігінде, шығысында жоғары өрт қаупі сақталады.&nbsp;Қарағанды облысында солтүстіктен, солтүстік-батыстан соғатын жел батысқа ауысады, екпіні 15-20, облыстың оңтүстігінде, шығысында кей уақыттарда 23 м/с. 1 мамыр күні облыстың оңтүстігінде жоғары өрт қаупі сақталады.&nbsp;Астанада түнде және таңертең тұман күтіледі. Солтүстік-батыстан соғатын жел оңтүстік-батысқа ауысады, түнде екпіні 15-20 м/с.Қызылорда облысында жел солтүстіктен, солтүстік-шығыстан соғады, түнде облыстың басым бөлігінде, күндіз орталығында күші 15-20 м/с күтіледі. 1-2 мамырда облыстың орталығында, оңтүстігінде, батысында жоғары өрт қаупі сақталады.&nbsp;Павлодар облысының батысында, оңтүстігінде солтүстік-шығыстан жел соғады, екпіні 15-20 м/с күтіледі.Маңғыстау облысының солтүстігінде найзағай күтіледі. Облыстың солтүстігінде, орталығында шаңды дауыл күтіледі. Солтүстік-шығыстан жел соғады, облыстың солтүстігінде, орталығында 15-20 м/с күтіледі. Облыс бойынша жоғары өрт қаупі сақталады.&nbsp;Ақмола облысының батысында, солтүстігінде, шығысында тұман күтіледі. Солтүстік-батыстан соғатын жел оңтүстік-батысқа ауысады, түнде облыстың батысында, оңтүстігінде, шығысында, күндіз облыстың батысында, солтүстігінде екпіні 15-20 м/с күтіледі.&nbsp;Шығыс Қазақстан облысының батысында, оңтүстігінде найзағай, бұршақ күтіледі. Оңтүстік-шығыстан соғатын жел солтүстік-батысқа ауысады, облыстың батысында, солтүстігінде, оңтүстігінде 15-20, күндіз екпіні 25 м/с.&nbsp;Солтүстік Қазақстан облысында жаңбыр, облыстың солтүстігінде, батысында найзағай күтіледі. Солтүстік-батыстан жел соғады, түнде облыстың оңтүстігінде, батысында екпіні 15-20 м/с, күндіз күші 15-20 м/с, облыстың солтүстігінде, батысында, онтүстігінде екпіні 23-28 м/с.&nbsp;Абай облысының шығысында, оңтүстігінде найзағай, бұршақ күтіледі. Оңтүстік-шығыстан соғатын жел солтүстік-батысқа ауысады, облыстың солтүстігінде, оңтүстігінде, орталығында 15-20, күндіз екпіні 23-28 м/с. Абай облысының оңтүстігінде жоғары өрт қаупі сақталады.&nbsp;Түркістан облысының тауларында найзағай, дауыл күтіледі. Таңертең және күндіз облыстың солтүстігінде шаңды дауыл. Оңтүстік-батыстан солтүстік-шығысқа ауысатын жел соғады, облыстың солтүстігінде, батысында, таулы және тау бөктерлі аудандарында 15-20, күндіз екпіні 23 м/с. Облыстың солтүстігінде жоғары өрт қауіпі сақталады.Шымкентте күндіз оңтүстік-батыстан солтүстік-шығысқа ауысатын жел соғады, екпіні 15-20 м/с.&nbsp;Батыс Қазақстан облысының солтүстігінде, шығысында, орталықта найзағай күтіледі. Жел батыстан солтүстік-батыстан ауысып соғады, күндіз облыстың солтүстігінде, шығысында, орталықта екпіні 15-20 м/с.&nbsp;Алматы облысының оңтүстігінде, таулы аудандарында қатты жаңбыр күтіледі. Облыстың оңтүстігінде, таулы аудандарында найзағай, бұршақ, дауыл күтіледі. Батыстан жел соғады, облыстың солтүстігінде, оңтүстігінде, таулы аудандарында екпіні 15-20, күндіз кей уақытта 24-29 м/с.Алматыда күндіз кей уақытта найзағай, дауыл күтіледі. Батыстан жел соғады, найзағай кезінде екпіні 15-20 м/с.&nbsp;Фото: Нұрболат Нұржаубай

Қар, жел: 1 мамырға арналған ауа райы болжамы

<a href="https://kyzylorda-news.kz/">Kyzylorda-news.kz</a> Мемлекет басшысы Қасым-Жомарт Тоқаевтың Қазақстан халқының бірлігі күнімен құттықтады, деп хабарлайды El.kz ақпарат агенттігі Ақорданың баспасөз қызметіне сілтеме жасап.&nbsp; Қазақстан халқының бірлігі күні құтты болсын! Бұл – татулық пен тыныштықтың, тұрақтылық пен бейбітшіліктің символы саналатын мерейлі мереке. Қазақ жерін мекен еткен сан алуан этностың мәдениеті, діні мен дәстүрі өзара үндесіп, бірегей өркениетке айналды. Бүгінде еліміздің барша азаматтары біртұтас ұлт болып Әділетті Қазақстанды құрып жатыр. Ырысты ынтымақтың арқасында халқымыздың қуаты арта түседі. Сондықтан біз бірлігімізді нығайтуға бар күш-жігерімізді жұмылдыруымыз керек. Бұл – әрбір азаматтың мәртебелі міндеті әрі перзенттік парызы. Ел бірлігі, әсіресе, қиын-қыстау сәттерде сыналады. Биыл біз бұрын-соңды болмаған «алапат тасқынмен» бірлесе күресіп жатырмыз. Әр азаматтың бір-біріне тілеулeстігі арқылы бүкіл ұлттың тұтастығын таныта білдік. Қазақстан халқы тарихтың күрделі кезеңінде жұрт болып жұмылып, табысқа жете алатынын тағы да дәлелдеді. Халқымыз жасампаздық пен жаңашылдық, еңбекқорлық пен білімпаздық, жанашырлық пен жауапкершілік сияқты асыл қасиеттерінің арқасында өсіп-өркендей береді деп сенемін. Баршаңызға зор денсаулық, толағай табыс тілеймін! Әр шаңыраққа құт-береке дарысын!", - деп жазылған Президент құттықтауында.&nbsp;

Мемлекет басшысы Қазақстан халқының бірлігі күнімен құттықтады

<a href="https://kyzylorda-news.kz/">Kyzylorda-news.kz</a> Шежірелі өлкеге сәуір айының берер сыйы толастар емес. Бірде күн көзі жылт етіп, жанды жадыратса, енді бірде алай-дүлей күй кешіп, ақ жауынын төгіп алады. Не керек, көктем шыққалы құбылмалы ауа райына да бой үйреніп қалды. Дегенмен, ерте көктемнен сайманын сайлап, егіс даласына еніп кететін диқандар қауымының тіршілігін тізгіндеп қалады, кейде. Бірақ барлық нәрсені жақсылыққа балайтын шиеліліктер көктемгі жауын-шашынды көктің бітік шығуына жорып отыр. Тіпті сенбі күні егіс даласындағы дала дүбірін бастады.Ақ күріштің атасы, дала академигі, екі мәрте Социалистік Еңбек Ері Ыбырай Жақаевтың елінде, «Алтын дән Шиелі» шаруа қожалығының егіс алқабында «Дала күні – 2024» семинары өтіп, алғашқы дән себілді. Жиылған қауым ең әуелі әлемдік рекордты орнатып, Сыр халқының мерейін тасытқан даңғайыр диқан Ы.Жақаевтың рухына тағзым етіп, Құран бағыштады. Шиелі ауданының әкімі Нұржан Ахатов «Бүгін өздеріңізбен қасиетті құт қонған, қыдыр дарыған ауданның, аймақтың мәртебесін бүкіл дүние жүзіне танытқан дала академигі, Екі мәрте Социалистік Еңбек Ері Ыбырай Жақаевтың рекорд орнатқан киелі ЖерАнаның алтын алқабында жиналып отырмыз. 41 Социалистік Еңбек Ерінің отаны болған Шиелінің шаруасы шатқаяқтамау үшін диқандар таңмен таласа жұмыс істейді. Қазірде егіс көлемі мен алынатын өнімді былтырғы жылдың көрсеткішінен де арттыру мақсатында көктемгі егін егу науқанына сақадай сай тұр», – деп бастады сөзінің әлқиссасын.&nbsp;Әрмен қарай аудан басшысы ардагерлермен бірге егіс алқабына дән сеуіп, ел қамбасының астыққа толуына, шаруа еңбегінің нәтижелі болуына тілектестік білдірді. Жиылған қауым ауыл шаруашылығы техникаларының, тыңайтқыштар мен су үнемдеу технологияларының көрмесімен танысты.&nbsp;Аудан басшылығына келген Нұржан Ахатов аз уақыттың ішінде ойлы-қырлы жолдарды жөндеп үлгерді. Сан саланың тамырына қайта қан жүгіртіп, өңірдің өркендеуіне біршама өзгерістер алып келді. Әсіресе, Шиелі халқының негізгі ауыл шаруашылық саласында ауыс-түйіс бар. Себебі, Сырдың суы құмға сіңгендей деңгейі төмендеп, күріш дақылының көлемін кемітіп барады. Өткен жылғы судың тапшылығын ескерген аудан әкімі биылғы егіс науқанында күріштен бөлек дәнді-дақылдар мен көкөністердің көлемін арттыруды жоспарлап отыр.&nbsp;Мәселен, биыл 30 мың 109 гектарға ауыл шаруашылығы дақылдарын егу межеленіп отыр. Ал «Дала күні» семинары өткізіліп жатқан «Алтын Дән Шиелі» шаруа қожалығы биыл 2 мың 640 гектар жерге егін егуде. Қазіргі таңда, аудан бойынша 581 дана арнайы ауыл шаруашылығы техникалары көктемгі егін егу науқанына қатысуда. Аталған техникалар межеленген егіс көлемін белгіленген мерзімде егіп, аяқтауға толық жетеді. Ал жанар-жағармай мәселесіне келсек, көктемгі дала жұмыстарына 1 815 тонна арзандатылған дизель отыны бөлінді.&nbsp;Көктем келісімен дала төсін еңбек дүбірі кернеп, диқандар үшін қауырт науқанның басталатыны белгілі. Несібесін жерден жинайтын шаруалар қауымының бел жазбай еңбек ететіні де осы кез. Осындай науқан қазір ауданда да қызу жүріп жатыр. Әр ауылдық округте көктемгі егіс жұмыстары басталып, егіс дақылдарын жоспарға сай орналастыруды мықтап қолға алуда. Диқанның белі бүгіліп, далада еңбек дүбірі естіледі. Алқапқа алғашқы дән де егілді. Тұқым себу жұмыстары жалғаса түскен. Таңмен таласа тұрған диқангер қауымның бар жігері дән егіп, мол ырыс жиюға деген ұғымға тоқайласқан. Әрине, дала еңбеккерлері талмай еңбек етсе қандай межеге де қол жеткізуге болатыны анық. Шиелілік шаруалар да тынымсыз еңбектің арқасында табыстың тайқазанын тасатады деген сенім бар.

Шиелі ауданында дән себілді

<a href="https://kyzylorda-news.kz/">Kyzylorda-news.kz</a> Жасыратын несі бар, Шиелі ауданында қызылшамен сырқаттану бойынша эпидемиологиялық жағдай дабыл қағарлықтай. Биылғы жылдың бастапқы 3 айында қызылшаның 80 жағдайы тіркелсе, оның ішінде 73,7 %-ы 14 жасқа дейінгі балалар. Ал 1 жасқа дейінгі ауырған бала саны – 22, яғни, 27,5 пайызы қызылшамен жоспарлы егу жасына жетпегендер. Тіркелген 80 жағдайдың 65 пайызы кент орталығынан анықталса, оның 35 пайызы елдімекен тұрғындарынан тіркелген. Сала мамандары вирусты жұқтырғандардың көбі уақыты жеткенде екпелерге қарсылық білдіріп, егуге қамтылмағандар екенін айтуда.Шиелі аудандық санитарлық-эпидемиялогиялық бақылау басқармасының басшысы Гүлзада Әйтекеева:&nbsp;<blockquote>- Қызылша – өте жылдам таралатын вирусты жұқпалы аурулардың бірі. Бұрын қызылшамен ауырмаған немесе егілмеген адам науқастармен байланысқа түссе, ауырып қалу мүмкіндігі өте жоғары. Инфекция ауа жолы арқылы беріледі. Қызылшаның қоздырғышы – вирус. Сыртқы ортада тұрақсыз: ол бөлме температурасында 5-6 сағат ішінде өледі. Инфекцияның жалғыз көзі – науқас адам. Вирустың таралуы түшкіру, жөтелу, сілекей тамшыларымен сөйлесу арқылы жүреді. Инфекциямен күресудің ең күшті, қолжетімді және тиімді, сенімді әдісі вакцинация болып табылады. Ұлттық профилактикалық егу күнтізбесіне сәйкес, балалар қызылшаға қарсы алғашқы егуді 12 айда, ревакцинацияны 6 жаста алады. Қызылшаға қарсы вакциналар 20 жылдан астам уақытқа созылатын сенімді иммунитетті қалыптастырады. Мына жайтты ескерген жөн, жоспарлы екпеден бас тарту тек өзіңіздің ғана емес, басқа да адамдардың өміріне қауіп төндіреді, – дейді.</blockquote>Бұл аурудың инкубациялық кезеңі жұқтырғаннан кейін бірінші белгілері пайда болғанға дейін, яғни 7 күннен 14 күнге дейін созылады. Есте сақтайтын ең маңызды жайт ауру бөртпе шығудан басталмайды, ол суық тию белгілерімен басталады. Дене қызуының 38-40 градусқа көтерілуі, әлсіздік, тәбеттің болмауы, құрғақ жөтел, мұрынның бітуі. Кейініректе конъюнктивиттің пайда болуы. Шамамен бірінші белгілердің шыққанынан 24 күннен кейін беттің шырышты қабығының ұсақ ақ дақтар пайда болады. Аурудың 3-5 күні ашық түсті бір-біріне өзара ұқсап кететін дақтар пайда болады. Ең алдымен олар құлақтың артында және маңдайда, содан кейін тез арада бет, мойын, дене және аяқ-қолға таралады. Ұсақ қызғылт дақтар тез арада үлкейіп, формасын өзгертіп, бір-біріне қосылып кетеді. Қабыну балаларда 5 жасқа дейін, ал 20 жастан асқандарда жиі дамиды. Ең көп тараған түрі ортаңғы құлақтың қабынуы, соқырлық, бронхтық пневмония, мойын лимфоузолдарының қабынуы, ларингит, энцефалит. Қызылшаның дамуын байқаған сәтте кешіктірмей дәрігерге қаралу керек. Асқынбай тұрғандағы қызылшаның белгілерін емдеу үшін төсекте жату режимі, суды көп ішу, қызуын түсіретін, тұмау және тамақ ауруын, қақырықты түсіретін препараттар мен витаминдерді қабылдау.&nbsp;Иә, қазіргі уақытта кез келген кеселге бейжай қарауға болмайды. Әсіресе жұқпалы дертке салғырт қарау өміріңізге үлкен қауіп төндіреді.Фото: pexels.com

Шиеліде қызылшамен тұрақты күрес жүргізілуде

&nbsp;<a href="https://kyzylorda-news.kz/">Kyzylorda-news.kz.</a>&nbsp; Бүгінде аймағымызда Ұлы Отан соғысының қатысушылары мен оларға теңестірілген 3 843 ардагер бар. Оның ішінде Ұлы Отан соғысына қатысқан 4 ардагерге биыл 2,5 млн теңгеден біржолғы жәрдемақы төленетін болады. Бұл туралы Өңірлік коммуникациялар қызметінің ақпарат алаңында облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев хабарлады.<blockquote>– Ұлы Отан соғысына Сыр өңірінен 70 мыңнан астам азамат аттанып, олардың көпшілігі сол майданда ерлікпен қаза тапты. Ал, аман-есен елге оралған соғыс ардагерлері өкінішке орай жылдан жылға азаюда. Сондықтан ол кісілерді қадірлеу, барынша құрметтеу – біздің басты парызымыз. Жалпы, жыл сайын мереке қарсаңында облыс әкімінің қолдауымен ардагарлерімізге барынша әлеуметтік қолдаулар көрсетіліп келеді. Атап айтқанда, Ұлы Отан соғысына қатысқан 4 ардагерге - 2 510 560 теңгеден біржолғы жәрдемақы төленетін болады. Сонымен қатар, Ұлы Отан соғысы жылдарында тылдағы жанқиярлық еңбегі және мінсіз әскери қызметі үшін арнайы медальдармен марапатталған ардагерлерге 221,5 мың (60 АЕК) теңгеден беріледі. Ал, Ұлы Отан соғысында ерлікпен қаза тапқан жауынгерлердің жұбайларына және қайтыс болған мүгедек ардагерлердің жұбайларына – 147,6 мың (40 АЕК) теңгеден төленеді. Сондай-ақ, тылда кемінде алты ай жұмыс істеген 1 990 азаматқа - 147,6 мың (40 АЕК) теңгеден беріледі. Бұдан бөлек, Жеңіс күні қарсаңында Чернобыль, Семей, Ауғанстанда болған ұрыстарда ерлік көрсеткен азаматтарға біржолғы әлеуметтік көмекпен қамтылатын болады, –деді Ғабит Жұмабекұлы. &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp; &nbsp;&nbsp;</blockquote>Фото:&nbsp;Қызылорда облысының Өңірлік коммуникациялар қызметі

Қазақстан және Қызылорда облысының жаңалықтары