<a href="https://kyzylorda-news.kz/">Kyzylorda-news.kz.</a> Мемлекет басшысының бүгінгі Жолдауы қоғамның барлық әлеуметтік-экономикалық маңызды салаларын қамтыды. Жыл сайын Мемлекет басшысының Жолдауын асыға күтетініміз рас.&nbsp;Бастысы, айтылған мәселелер жоспарлы мерзімде жүзеге асса, онда ел үшін тиімділігін бермек. Президент жолдауы әділетті Қазақстан құру жолында жасалған тағы бір ірі қадам болды деп есептеймін. Президент Жолдауы – еліміздің жыл сайынғы даму стратегиясын айқындап беретін маңызды құжат. Мемлекет басшысының әр жылғы Жолдауында Үкімет алдына қойған міндеттер кезең-кезеңімен орындалып, өз нәтижелерін беріп келеді. Құжатта ең басты міндет – халықтың әл-ауқатын арттыру мақсатында екені айрықша айтылып, осы мақсатқа қол жеткізу үшін бірқатар міндеттер белгіленді. Осы ретте Президент Үкіметке «AMANAT» партиясымен бірлесіп, «Қарызсыз қоғам» жобасының ауқымын кеңейтуді тапсырды.Мемлекет басшысы қаржы жүйесіне төнетін сын-қатерлердің көбеюіне және азаматтардың шектен тыс қарызға батуына әкеп соқтыратын жағдайлардың алдын алып, халықтың қаржы сауатын арттыру маңызды екенін айтты. «AMANAT» партиясының «Қарызсыз қоғам» жобасын ерекше атап, жобаның игілігін бүкіл еліміз көруі қажет екенін баса айтты. Жолдаудың жаңаша бағыттағы Қазақстанды құруға оң нәтиже береріне біз де сенеміз және жүзеге асыруға атсалысатын боламыз.Ардақ Кәдір, Қазалы аудандық мәслихатының депутаты

Жолдау – ел дамуын айқындайтын құжат

Kyzylorda-news.kz. Бұл туралы ҚР Премьер-министрі Әлихан Смайыловтың төрағалығымен өткен Үкімет отырысында айтылды.Жиында биылғы қаңтар-қазан айларындағы әлеуметтік-экономикалық даму қорытындылары мен республикалық бюджеттің атқарылуы қаралды.Ұлттық экономика министрі Әлібек Қуантыровтың баяндауынша, өңдеу өнеркәсібіндегі өсу қарқыны бойынша Қызылорда облысы, Алматы қаласы, Қостанай облысы үздіктер қатарында.Премьер-министр еліміздің экономикасы қолайсыз жағдайларға бейімделе отырып, орнықты өсу жолын жалғастырғанын айтты. Жалпы барлық негізгі көрсеткіш бойынша Абай, Батыс Қазақстан, Жетісу, Қызылорда облыстарында және Алматы қаласында өсім бар. Үкімет отырысынан кейін облыс әкімі Нұрлыбек Нәлібаев арнайы мәжіліс өткізіп, &nbsp;он айдың негізгі қорытындыларына тоқталды.«2023 жылдың қаңтар-қазан айларында барлық макроэкономикалық көрсеткіштер бойынша өсім қалыптасты. Төмен тенденция көрсетіп келген өнеркәсіп өндірісі мен өңдеуші өнеркәсіп өндірісінің өткен айдан бері оң динамикасы байқалады. Аудандар мен Қызылорда қаласы бойынша макрокөрсеткіштердің оң қарқыны қамтамасыз етілген. Ендігі міндет – жыл қорытындысымен экономиканың өсім қарқынын қамтамасыз ету. Өнеркәсіп саласында аудандарда көрсеткіш артып, тек Қызылорда қаласында 8,7%-ға төмендеді. Көрсеткіштің төмендеу себебі бәрімізге мәлім, ол – облыс аумағындағы мұнай ұңғымаларының сулануы және сарқылуы салдарынан мұнай өндіру көлемінің азаюы. Қызылорда қаласының әкімдігіне өнеркәсіп көрсеткіштері бойынша ай сайынғы өсімді қамтамасыз ету шараларын күшейтуді тапсырамын», – деді аймақ басшысы.Мәжілісте бюджет қаржысының игерілмеу қаупі бар Қызылорда қаласы мен Шиелі ауданының әкімдері және бірқатар басқарма басшылары баяндама жасап, қабылданатын шаралар туралы айтты.Жиын қорытындысымен Қызылорда қаласы мен барлық аудандар әкімдері, облыстық бағдарлама әкімшілеріне жоспарланған қаражатты 100% игеру, қайтарылатын және қайта бағытталатын қаржылар бойынша тиісті министрліктермен 2 апта ішінде жұмыс жүргізу тапсырылды.

Қызылорда облысы - өңдеу өнеркәсібіндегі өсу қарқыны бойынша бірінші орында

<a href="https://kyzylorda-news.kz/">Kyzylorda-news.kz.</a> Нашақорлыққа және есірткі бизнесіне қарсы күрестің 2023-2025 жылдарға арналған кешенді жоспарын іске асыру мақсатында, Қызылорда облысының Есірткі қылмысына қарсы іс-қимыл басқармасы есірткіге қарсы анимациялық роликтер байқауын ұйымдастырды.&nbsp;Іс-шараның мақсаты - халықтың назарын салауатты өмір салтын ұстану қажеттілігіне аудару, бос уақытты тиымды пайдалану және жастардың шығармашылық әлеуетін дамыту.Балалар жаңа қосымшалардың мүмкіндіктерін пайдалана отырып, өз жұмыстарында есірткінің зияны, нашақорлыққа тарту тәсілдері, кепілгер жұмысы мен нашақорлықтың салдары туралы мультфильмдер жасаған.Байқауға жалпы орта білім беретін мектептердің жоғары сынып оқушылары мен оқу орындарының студенттері қатысты.Байқаудың бірінші кезеңін білім бөлімдері өткізді, үздіктері екінші турға жіберілді. Байқау финалына қатысу үшін 27 жұмыс келіп түсті.Құрамына полиция қызметкерлері, «Қызылорда еріктілері» қорының, «Жастар спорттық туризмі және туристік көпсайыс» жастар қоғамдық бірлестігінің өкілдері кірген сайыстық комиссия 20 жұмысты атап өтіп, оның 3-ін үздік деп таныды, олар: Арал ауданы N220 орта мектеп, N14 мектеп-лицей оқушылары Жеңісұлы Рамазан мен Қосанов Еркебұлан және Қызылорда қаласы Абай атындағы ДБА мектеп оқушысы Шахмардан Рамазан.&nbsp;Сайыста жеңіске жеткен жұмыстар бұқаралық ақпарат құралдарында орналастырылады және есірткіге қарсы іс-шараларды өткізу кезінде үгіт материалы ретінде пайдаланылады.<figure class="image"><img src="https://knadmin.beoblood.kz/uploads/Narkota_1_520304313a.jpg" alt="Наркота 1.jpg"></figure><figure class="image"><img src="https://knadmin.beoblood.kz/uploads/Narkota_2_7f7fc368c8.jpg" alt="Наркота 2.jpg"></figure>&nbsp;

Есірткіге қарсы анимациялық байқау ұйымдастырылды

<a href="https://kyzylorda-news.kz/">Kyzylorda-news.kz.</a> &nbsp;Биыл Қызылорда облысының құрылғанына 85 жыл болса, қасиетті мекен Қазалы ауданына – 95 жыл толып отыр. Осыған орай жыл басынан бері ауданымызда түрлі мәдени-көпшілік іс-шаралар ұйымдастырылып, қазалылықтар мерейтойды сән-салтанатпен атап өтті.Ал бірер күн бұрын аудан халқы 95 жылдық мерейтойды кең көлемде тойлап, мерейтойлық іс-шараларды қорытындылады.Бүгін аудан әкімдігінің мәжіліс залында ауданның 95 жылдық мерейтойын атап өтудегі қорытынды мәжіліс өтті.Мәжілісте аудан әкімі Мұхтар Оразбаев мерейтой аясында өткізілген ауқымды шараларды ұйымдастыруға атсалысқан барша азаматтарға шынайы ризашылығын жеткізіп, ауданның әлеуметтік-экономикалық дамуына сүбелі үлес қосқан бірқатар зиялы қауым өкілдері мен еңбек ардагерлерін мерекелік медалмен марапаттады.Мәжіліс соңында Қызылорда облысының «Құрметті азаматы», «РЗА» акционерлік қоғамының президенті Самұрат Имандосов сөз алып, жиылғандарды мерейтоймен құттықтап, жылы лебізін жеткізді.<figure class="image"><img src="https://knadmin.beoblood.kz/uploads/Kazaly_2_4261ae4261.jpg" alt="Казалы 2.jpg"></figure>

Қазалы ауданының 95 жылдық мерейтойы қорытындыланды

<a href="https://kyzylorda-news.kz/">Kyzylorda-news.kz.</a> Еліміздің Тәуелсіздік тұғыры беки түскеннен кейін ел экономикасында елеулі өзгерістер орын алды. 1993 жылдың 12 қарашасында &nbsp;«Қазақстан Респуб­ликасы­ның ұлттық ва­­лю­­тасын енгізу туралы» Заңына қол қою басталды. Араға үш күн салып, ел ішінде жаңа сауда-сат­тық жасау құралы ретінде теңге қол­да­нысқа енді. Осылайша, ұлттық валютаның қолданыста барына биыл 30 жыл толып отыр. Осы жөнінде Өңірлік коммуникациялар қызметінің баспасөз алаңында облыстық экономика және қаржы басқармасының басшысы Қамбарбек Мүбараков айтты.<blockquote>- Теңгенің қолданысқа енуі экономикалық және саяси тұрақтылыққа әкелген маңызды жетістік. Бұл елдің тәуелсіздігін, егемендігін нықтаған қадам болды. Биыл экономикалық дамудың макрокөрсеткіштері бойынша облыста оң динамика қалыптасып, республика көлемінде қаржы игеру бойынша 1-ші орынға тұрақтадық. Жақында облысымызға арнайы жұмыс сапарымен келген Мемлекет басшысы Қасым-Жомарт Тоқаев өңірдің әлеуметтік -экономикалық дамуына жоғары бағасын берді. Облыстың қаржы қазандығында 1993 жылы бар болғаны 135 миллион теңге, қаржыгерлердің біліктілігі мен еңбегінің нәтижесінде жыл өте еселеніп, биыл 609 миллиард теңгеге жетті. Облыстың даму бюджетіні көлемі өткен жылмен салыстырғанда 2,5 есе артты, - деді Қамбарбек Амангелдіұлы.</blockquote>

Қамбарбек  Мүбараков: Республика көлемінде қаржы игеру бойынша бірінші орынға тұрақтадық

<a href="https://kyzylorda-news.kz/">Kyzylorda-news.kz.</a> Биыл 15 қарашада Қазақстанның мемлекеттік егемендігінің маңызды атрибуттарының бірі –«Ұлттық валюта» теңгеге 30 жыл толады. Қазақстандық теңге осы 30 жыл ішінде өзінің өміршеңдігін көрсетті. &nbsp;30 жыл бұрын біздің Ұлттық валютамыз кеңестік рубльді алмастырды.Ұлттық валюта – бұл елдің заңмен белгіленген ақша бірлігі. Өзінің ұлттық валютасын енгізу Қазақстанның тәуелсіздігін нығайтуда және дербес дамуында маңызды рөл атқарады. Теңге елдің қаржылық Тәуелсіздігінің ажырамас символына айналды. Теңгенің тарихы ең алғаш қазақ даласында күміс монета XV-ғасырда Отырар қаласында «таньга» деген атаумен пайда болған. Ал Ұлттық валютамыздың тарихы 1992 жылдан бастау алады. 1992 жылдың 27 тамызы күні Қазақстаның Ұлттық банкі теңге купюрасының үлгілерін бекіткен болатын.Нұрсұлтан Әбішұлының жеке тапсырмасымен отандық суретшілер Тимур Сүлейменов, Қайролла Әбжәлелов, Меңдібай Алин және Ағымсалы Дүзелханов Англияда қазақ валютасының дизайнындағы портретін бекітті. Дизайнерлердің жаңа валюта кескінін әзірлеу жұмыстары Алматы қаласында ерекше құпия жағдайда жүргізілді. Бұл туралы дизайнерлерден басқа мемлекет басшылығындағы санаулы адамдар ғана білген. Осылайша, теңге алғаш рет Ұлыбританияда Harrison &amp; Sons фабрикасындабасылып шықты. Сондай-ақ, жаңа валютаның атауына қатысты да бірқатар ұсыныстар болған. Елбасы «Алтын» атауын ұсынды. Кейіннен жаңа ақшаны ХV ғасырда Отырар қаласында «таньга» атауымен басылып шыққан манетаға ұқсастырып «теңге» деп атау туралы шешім қабылданған.Алғашқы ақшаларды Лондоннан Қазақстанға жеткізу үшін 18 әуе сапары жасалған. Ал алғашқы қазақстандық монеталар Германияда жезден және никель күмістен жасалып шығарылды.Президентпен 1993 жылдың 12 қарашасы күні «Қазақстан Республикасында ұлттық валюта енгізу туралы» Жарлыққа қол қойылып, 15 қарашада ұлттық валютамыз айналымға енгізілді.Ескі ақшаны қазақстандық теңгеге айырбастау 1993 жылы 15 қарашада сағат таңғы 8.00-де басталып, 20 қарашада сағат 20.00-де аяқталды.Ұлттық Банк бастапқыда 1 теңгені сол кездегі 1000 рубльге бағалаған болатын. Дегенмен, еліміздің саяси, әлеуметтік мәселелері және мемлекетаралық қатынастар ескеріліп 1 теңге 500 сомға бекітілді. Теңге бірінші айналымға кірген күні 1 доллар 4,75 теңге болып бекітілді. Алғашқы валюталарымызда, ағартушы Әл-Фараби, күйшілер Сүйінбай Аронұлы, Құрманғазы Сағырбайұлы, ғалым Шоқан Уәлиханов, ақын Абай Құнанбаев, Әбілқайыр хан мен Абылай хан бейнелері бейнеленген.1994 жылы қағаз тиындардың орнына жезден жасалынған 2,5,10, 20 және 50 номиналды монеталар шықты. Ұлттық валюта банкнот және монета түрінде айналысқа енгізілді. Қазір банкнот - Ұлттық Банктің Алматы қаласындағы Банкнот фабрикасында, ал монета - Өскемендегі Монета сарайында шығарылады. Елбасының Жарлығымен 1997 жылдан бері 15 қараша төл валютамыздың күні әрі қаржыгерлер күні болып белгіленді.&nbsp;Ұлттық валюта кескіні 2006 жылы түбегейлі өзгертіліп, онда бұрынғы үлгіде болған даңқты тұлғалардың бейнелері алынып тасталып, жаңа үлгідегі банкноталар бірыңғай стильде орындалған.2006 жылы 15 қараша күні ұлттық валютамыздың жаңа дизайнмен әрленген 200, 500, 1000, 2000, 5000 және 10000 теңгелік банкноттары қолданысқа жіберілді. Дизайн мемлекеттік рәміздерді, еліміздің сәулет нысандары мен табиғи ландшафтарын бейнелей отырып, Қазақстанның осы заманғы бейнесін береді. Қолайлылық үшін номиналдарды сандық және жазбаша белгілеулер ірі қаріптермен басылған. Мәдениет пен ғылымның және саясаттың әр түрлі салаларындағы Қазақстанның ірі қайраткерлерінің портреттерін ұлттық ою-өрнекпен үйлестіріп шығару туралы шешім қабылданған. Ал артқы бетінде сәулет ескерткіштері мен Қазақстанның әсем көріністері орналасқан.Бұл серияның дизайны қарындаш, акварель және темпер көмегімен қолмен жасалған.&nbsp;2006 жылы теңгенің жаңа нышаны таңдалды - ₸ (коды - U + 20B8). 2006 жылдың қарашасында Ұлттық банкпентеңгенің символын жасауға бәйге жарияланды. 30 мыңнан астам сурет келіп түскен бұл бәйге 2007 жылдың 29-наурызы күні өз мәресіне жетті. Солардың арасынан Вадим Давиденко мен Санжар Әмірхановтардың жасаған жобасы ерекше деп танылған. Нашар көретін адамдар үшін банкноттарда әр жеке номиналға тән жоғары бедерлі арнаулы элементтер пайдаланылған. 2007 жылдың мамыр айында Тайландта өткен валюта конференциясында 10 мыңдық теңгеміз «Үздік жаңа банкнот» аталымы бойынша бірінші орынға ие болды.2011 жылдан бастап ұлттық валютаның төртінші буыны қазақстандықтардың қолына түсе бастады. "Самұрық" сериясына 500, 1000, 2000, 5000, 10000 және 20000 теңгелік банкноттар кіреді. Олардың алдыңғы жағында "Қазақ елі" монументі және ұшып тұрған көгершіндер бар. Артқы жағында суретшілер елорда панорамасын (биліктің бөліну принципін бейнелеуге арналған), Алматы панорамасын, Ертіс өзені мен Үстіртті орналастырған. Теңге 17 қорғаныс дәрежесіне ие: сутаңба, қауіпсіздік жіптері, мөлдір терезе, ультрафиолет қорғанысы, сериялық нөмірлер, сәйкес кескіндер.Сондықтан теңге әлемдегі ең қорғалған валюталардың қатарына кіреді.&nbsp;Қазақстандық ақша әлемдегі ең әдемі ақшалардың бірі болып табылады. Үш жыл қатарынан олар әлемнің үздіктері деп танылды: 2011, 2012 және 2013 жылдары (10 мың, 5 мың және 1000 теңгелік банкноттар). 2007 жылы Ұлттық Банктің 2006 жылғы үлгідегі банкноттарының жаңа сериясы Халықаралық валюта қауымдастығы (IACA) берген Жылдың үздік жаңа сериясы үшін жүлдені жеңіп алды. 2007 жылы Бангкокта "Optiks" элементі бар 10 000 теңге номиналы үшін "үздік жаңа банкнот"номинациясында бірінші орын берілген. Сондай-ақ, 2016 жылы High Security Printing Europe конференциясында номиналы 20 мың теңгелік банкнот та марапатқа ие болды. Ол 2015 жылдың ең үздік аймақтық банкнотасы деп танылды. Сол жылы Халықаралық валюта қауымдастығы (IACA) оны валюта саласындағы ең жақсы техникалық жетістігін айрықша атап өтті.&nbsp;Қасиетті, қастерлі Отанымыздың символы - төл теңгеміз, әлемдік қаржы нарығында – жоғарыдан көріне берсін.А.Иманкулов, Қызылорда облысы бойынша тексеру комиссиясының бас-инспекторы-мемлекеттік аудитордың ассистенті&nbsp; &nbsp;

15 қараша – Ұлттық валюта күні

<a href="https://kyzylorda-news.kz/">Kyzylorda-news.kz.</a> Қазақстандық синоптиктер 15 қараша, сәрсенбі күні елімізде күн райы қандай болатынын айтты."Қазгидромет" РМК ұсынған мәлімет бойынша, Қазақстанның басым бөлігінде антициклонның екпінімен күн жауын-шашынсыз болады.<blockquote>"Атмосфералық фронттардың өтуімен республиканың батысында және солтүстік-батысында жаңбыр, солтүстігінде жауын-шашын (жаңбыр, қар) жауады деп болжанды", – делінген хабарламада.</blockquote>Сондай-ақ синоптиктер республика бойынша тұман түсіп, жел күшейетінін айтты.

Сәрсенбіге арналған ауа райы болжамы

<a href="https://vera.kz/na-realizaciyu-proekt-auyl-amanaty-v-regione-vydeleno-20-mlrd-tenge/">ФОТО</a><a href="https://kyzylorda-news.kz/">Kyzylorda-news.kz.</a> «Ауыл аманаты» бағдарламасын жүзеге асыруға 2023 жылы республикалық бюджет қаражатынан 100 млрд теңге бөлініп, 17 мың шағын несие беруге жоспарланған. Бұл туралы Ауыл шаруашылығы министрлігі мәлімдеді.Бұл ауылда 18 мыңнан астам жаңа жұмыс орнын ашуға мүмкіндік береді. Бүгінде бөлінген қаражаттың барлығы қаржыландыру жоспарына сәйкес облыс әкімдіктеріне аударылды. Айта кетейік, қаражат ауыл шаруашылығы, қаржы министрліктері мен облыс әкімдіктері арасында жасалатын үшжақты несие шартына сәйкес аударылады.6 қарашадағы жағдай бойынша 88,4 млрд теңгенің 14 284 өтінімі қаралуда, 66,2 млрд теңгенің 10 878 өтінімі мақұлданды; 53,6 млрд теңгеге 8 761 шағын несие берілді. ШҚО-да (1,5 млрд теңге), Қостанай (1,6 млрд теңге) және Павлодар (1,5 млрд теңге) облыстарында қаражат толық игерілді.«Ауыл аманаты» бағдарламасын жүзеге асыру үшін 2024 жылы 2024-2026 жылдарға арналған республикалық бюджетті қалыптастыру аясында 2024 жылы – 100 млрд теңге; 2025 жылы – 50 млрд теңге; 2026 жылы – 50 млрд теңге қарастырылған.Бағдарламаны іске асыру тетігін жетілдіру үшін АШМ «Ауыл аманаты» шеңберінде кредит берудің негізгі шарттары мен тәртібін регламенттейтін қағидалар жобасын әзірледі. Жалпы негізгі шарттар қолданыстағы жағдайларға ұқсас болып қалды, алайда бірқатар өзгерістер бар. Біріншіден, бағдарламаға қатысушылардың нақты тізімі анықталды.Екіншіден, әрбір ауылдық округті несиелендірудің басым бағыттарын анықтау бойынша талаптар қарастырылған. Бұл ретте мал шаруашылығы бағыты бойынша бағдарламаға бөлінген қаражаттың 50% -ынан аспайтын лимит белгіленген.Үшіншіден, жобаларды іріктеудің негізгі өлшемдері анықталды. Бұл шара шағын несиелендіруге арналған жобаларды сапалы іріктеуге мүмкіндік береді және қаражаттың қайтарымдылығын арттырады.Жеңіл автокөлік сатып алуға шағын несие берілмейді; жақын туыстарының ауыл шаруашылығы жануарларын; ауыл халқының табысын арттыру жөніндегі жобаны масштабтау шеңберінде шағын несие беру қаражаты есебінен бұрын сатып алынған ауыл шаруашылығы жануарларын, сондай-ақ кейін жалға беру үшін ғимараттарды, үй-жайларды сатып алуға, тұрғын үйлерді салу немесе басқа да ғимараттарды салуға шағын несие берілмейді.Сондай-ақ, Ауыл шаруашылығы министрлігі облыс әкімдіктерінің несиелерді мақсатты пайдалану туралы есебін автоматтандыру және қарыз алушыға шағын несиелерді беру үшін АӨК-тегі экономикалық саясатты талдау орталығымен бірлесіп, бағдарлама бойынша шағын несиелеудің ақпараттық жүйесін құру жұмыстарын атқаруда.

«Ауыл аманаты»: Бөлінген қаржы 3 облыста толық игерілді

<a href="https://kyzylorda-news.kz/">Kyzylorda-news.kz.</a> Қазақстан Ұлттық Банкі Қазақстанның ұлттық валютасының 30 жылдығына орай 2023 жылғы 15 қарашадан бастап номиналы 10 000 теңгелік мерейтойлық банкнотаны айналымға шығарады, деп хабарлайды Zakon.kz.Банкнотада 19 қорғаныш элементі бар. Монета бейнеленген дизайнда негізгі голографиялық элемент – теңгенің "₸" белгісі қолданылған. Банкнотаның екі жағында да шексіз қозғалыстың символы – "Мёбиус лентасы" бар.Банкнотаның алдыңғы бетінде қазақы ою-өрнекпен дәстүрлі стильде безендірілген Қазақстан картасы аймақтарымен бейнеленген.Банкнотаның екінші бетінде картадағы Еуразия құрлығының жалпы контуры сызылған. Онда 5 мм магнитті қорғаныш жіп пен "₸" белгісі түріндегі Спарк элементі бар.Номиналы 10 000 теңгелік мерейтойлық банкнота өз құнына сай Қазақстанның бүкіл аумағында төлемнің барлық түрі бойынша қабылдануға жатады. Сонымен қатар банктік шотқа салуға, Қазақстанның барлық банкінде аударуға және ұсақталуға міндетті.

10 мың теңгелік мерейтойлық банкнота айналымға шықты

<a href="https://kyzylorda-news.kz/">Kyzylorda-news.kz.</a> «AMANAT» партиясы Қызылорда облыстық филиалы жанындағы Партиялық бақылау комиссиясының мүшелері өңір тұрғындарын қатты отынмен қамтамасыз етіп отырған кәсіпкерлердің жұмысымен танысып, көмір қорына, бағасына мониторинг жасады.Жалпы, облыс бойынша 41 өңірлік оператор және 11 көмір қоймасы бар. Мамандардың айтуынша алдағы қысқа 238 мың тонна көмір қажет, бүгінде осының біраз бөлігі жеткізілген. Партиялық бақылау комиссиясының өкілдері «Khas com» жеке кәсіпкерлігі қоймасына барды.&nbsp;Байқағанымыздай көмір тапшылығы жоқ. Қоймада 10 мың тоннадан астам «Шұбаркөл» көмірі тұр. 2023 жылға 75-80 мың тоннадай алынған. «Келер жылға тағы 75 мың тонна алуды жоспарлап отырмыз», - дейді «Khas com» жеке кәсіпкерлігінің иесі.<blockquote>«Биыл 80 мың тоннаға жуық көмір алдырдық. Тоннасын 18000 мың теңгеден сатып жатырмыз. Бұл уақытта коймада мұндай көмір болмайтын. Қазір халықтың басым бөлігі табиғи газға қосылғандықтан, алушылар да өткен жылдармен салыстырғанда аз. 6 қараша күні келген көмір бағасы бізге 18200 теңгеден түсті. Дегенмен біз әзірге бағаны өз қалпында ұстап отырмыз. Ендігі түскен көмір бағасы өзгеруі мүмкін», - деді Рустем Хасанов.</blockquote>Партиялық бақылау комиссия мүшелері бағаны тұрақты ұстау жөнінде ұсыныс айтып, қаты отынға тапшылық орын алмауын қатаң бақылауда ұстайтындықтарын жеткізді.&nbsp;<figure class="image"><img src="https://knadmin.beoblood.kz/uploads/402622210_739745708191068_8050439244601466529_n_2faa3c4cf0.jpg" alt="402622210_739745708191068_8050439244601466529_n.jpg"></figure>&nbsp;<figure class="image"><img src="https://knadmin.beoblood.kz/uploads/402634924_739745731524399_729829601943639217_n_e7e8bf0984.jpg" alt="402634924_739745731524399_729829601943639217_n.jpg"></figure>

Қызылорда: Алдағы қысқа 238 мың тонна көмір қажет

<a href="https://kyzylorda-news.kz/">Kyzylorda-news.kz.</a> Бүгін облыс әкімі Нұрлыбек Нәлібаевтың қатысуымен Байқоңыр қаласының кейбір мәселелері бойынша мәжіліс өтті.Аймақ басшысы Байқоңыр қаласының әлеуметтік-экономикалық дамуы, ондағы қоғамдық-саяси ахуал Мемлекет басшысының және Үкіметтің тікелей бақылауында екенін атап өтті.<blockquote>«Бүгінгі күні, қаладағы қоғамдық-саяси жағдайға тікелей әсер ететін және жедел әрі уақытылы шешуді талап ететін азаматтардың тыныс-тіршілігіне байланысты бірқатар жүйелі мәселелер бар. Өз кезегінде тұрғындар тарапынан көтерілген өзекті мәселелерді Үкіметаралық комиссия шешіп келеді. Менің тапсырмама сәйкес құқық қорғау органдары басшыларының қатысуымен кездесулер, азаматтарды жеке қабылдаулар өткізілуде. Қала жалға берілгенімен, мемлекеттік мүліктің барлығы Қазақстан меншігінде. Сол себепті, инженерлік-инфрақұрылым мәселесіне Үкімет ерекше көңіл бөлуде. Қазақстан тарапынан қала толықтай газға қосылған. Іргелес орналасқан Төретам кенті мен Ақай елді мекеніне жыл соңына дейін газ беріледі. Алдағы жылдары да жобаларды жүзеге асыру жоспарлануда. 2024 жылы Байқоңыр қаласында кәріз жүйелерін және су құбырларын қайта жаңғырту жобасы іске асырылады. Бұдан бөлек, электр және жылу жүйелері де тозығы жетіп, 75%-ы ескірген. Қаладағы жылу желілері мен электр жүйелерінің жағдайына зерттеу жүргізіп, қайта жаңғырту бойынша ұсыныстар енгізілуі тиіс. Сонымен қатар, қаладағы 351 көпқабатты үйдің ішкі инженерлік жүйелері де назардан тыс қалмау қажет», - деді Нұрлыбек Машбекұлы.</blockquote>Облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Ырзақұлұлы, Қармақшы ауданының әкімі Жандос Еркінбек, облыстық білім және денсаулық сақтау басқармаларының басшылары қала мәселелерін шешу бойынша қабылданған шаралар барысын баяндады.Жиын нәтижесімен Байқоңыр қаласының инженерлік инфрақұрылым желілерін реконструкциялау, тұрғын үй құрылысын жалғастыру және әлеуметтік нысандарды салу, қазақстандық мектепке дейінгі біліммен қамту мақсатында қаладағы екі балабақшаны іске қосу және медициналық ұйымдарды қажетті мамандар мен құрал-жабдықтармен қамтамасыз ету бойынша тапсырмалар берілді.Айта кетейік, қазіргі таңда Байқоңырда 57 мың адам тұрады. Оның 41 мың адамы немесе 71%-ы Қазақстан азаматтары.

Байқоңыр қаласының кейбір мәселелері бойынша мәжіліс өтті

<a href="https://kyzylorda-news.kz/">Kyzylorda-news.kz.</a> Қызылорда облысында мемлекеттік қызметкерлерді суреттері арқылы бопсалаған алаяқтар тобы анықталды. Шенеуніктердің бірі полицияға көмек сұрап жүгінді, деп хабарлайды <a href="https://kyn.kz/32382/yzylorda-oblysynda-12-sheneunik-zheli-ar-yly-demi-yzdar-a-zhala-ash-suretin-zhiberip-so-ynda-policiyadan-k-mek-s-rady">KYN.KZ</a>.Соттың мәліметінше, алаяқтар әлеуметтік желідегі аватарларына сұлу қыздардың суреттерін қойып, жалған парақшалар ашқан. Сонан соң сол қыздың атынан ер адамдармен әңгіме-дүкен құрған. Уақыт өте келе алаяқтар жалаңаш суреттер жіберіп, шенеуніктен де сурет жіберуін сұраған.Кейін бұл іске банданың басқа мүшелері қосылған, олардың міндеті ақша бопсалау болған. Олар шенеуніктердің суретін көпшілікке жария етеміз деп қорқытып, картасына ақша аударуды талап еткен.Қызылорда облысында 12 мемлекеттік қызметкер алаяқтардың құрбаны болды.Тергеуден кейін 11 жәбірленуші ақшасын қайтарып алғаны белгілі болды: олар азаматтық талап қоюдан бас тартты. Жалғыз Б есімді жәбірленуші кері қайтарылған 500 мың теңгені алмай, бопсалаушыларды сотқа беруге шешім қабылдады.Сот отырысында сотталушылардың кінәсі дәлелденді, алаяқтар кінәсін мойындады.Үш сотталушыға қатысты сот үкімі шығып, олар Қазақстан Республикасы Қылмыстық кодексінің 194-бабының 2-бөлігінің 2 және 3-тармақтарымен кінәлі деп танылды.Олардың әрқайсысына 3 жыл 6 ай мерзімге бас бостандығын шектеу, сондай-ақ үкімді орындау кезінде жылына 100 сағат мәжбүрлі жұмысқа тарту жазасы тағайындалды. Сотталушылардан 500 000 теңге көлеміндегі залал бірлесіп өндірілді. Үкім заңды күшіне енді.

Қазақстан және Қызылорда облысының жаңалықтары