<a href="https://kyzylorda-news.kz/">Kyzylorda-news.kz</a> 7 мамыр – Отан қорғаушылар күніне орай Арал ауданы әкімі Аманжол Оңғарбаев өңірдегі әуе қорғанысының бөлімшесі №10216-Ж бөлімінде болып, әскери қызметкерлерді және ауданымыздың «Айбын», «Жас ұлан» құрамаларын мерекемен құттықтады.Арал ауданы басшысы жиналған қауымға ізгі лебізін арнап, бұл күннің тарихи маңыздылығына тоқталып өтті.<blockquote>–Біз – тұтас тарихы, қаһармандық дәстүрі қалыптасқан жұртпыз. Қашанда Отан үшін оққа кеудесін тосқан алдыңғы буынның ерлігін дәріптеу, бүгінгі мамыражай әрі бейбіт өмірді ұрпаққа аманат ету біздің перзенттік парызымыз. Қазір тәуелсіз еліміздегі айбынды әскерлеріміз жауынгер ұрпақтың ерлік дәстүрін лайықты жалғастыруда. Тәулік бойы жауынгерлік кезекшілікпен әуе желісіндегі азаматтық, әскери рейстерді міз бақпай күзетудегі қырағы қызметтеріңізді әрдайым жоғары бағалаймыз. Сіздер еңбек жолын Отанды қорғауға арнап, өз міндеттеріңізді мінсіз орындап, антқа адал қызмет атқарып келесіздер. Бүгінгі мерейлі сәтте осындағы сарбаздарымыз бен сардарларымызға алғысымды білдіремін,– деді Аманжол Сақыпұлы.&nbsp;</blockquote>Мерекелік салтанат одан әрі №10216-Ж әскери бөлімінің қызметкерлері және Арал ауданының «Айбын», «Жас ұлан» құрамаларын құттықтау рәсіміне жалғасты.

Ұранды елдің – ұрпағы қайсар

&nbsp;<a href="https://kyzylorda-news.kz/">Kyzylorda-news.kz</a> Бүгінде Қызылорда қаласындағы көптеген білім ошақтары заманға сай білім беру үдесінен шығу жолында тынымсыз еңбек етуде. Сыр еліндегі осындай озық ізденісті кәдеге асыра білген білім ұясының бірі – Иван Панфилов атындағы №5 мектеп-лицейі.«Білекті бірді жығады, &nbsp;білімді мыңды жығады» &nbsp;деп дана халқымыз айтқандай, білім – жеңілмейтін қару, қараңғы түнде адастырмас жарық жұлдыз. Мемлекет басшысы Қасым-Жомарт Тоқаев &nbsp;«Лайықты азамат – өз білімін Отанымыздың игілігі үшін жұмсайтын адам. Алдымызда тұрған құбылмалы заманда жаста¬рымыз еңбекқор болмаса, ешқандай бәсекеге түсе алмайтынын терең түсінуі керек, жаңа ұрпақты еңбексүйгіштік идеялары мен құндылықтары негізінде тәрбиелеу керек» деген болатын.Шаһар орталығында орналасқан киелі шаңырақтың өңір тарихында алар орны ерекше. Осы аралықта берекелі білім ұясынан қаншама дарын түлеп ұшып, көптеген ілкімді жобалар жалғасын тапты.Мектеп-лицей 50 жылдың бедерінде зиялы қауымның табан тірер нысанына айналып, білім мен тәрбиені қатар ұштаған шәкірттер ұстаз абыройын асырғаны анық. №5 мектеп-лицей 2023-2024 оқу жылы қорытындысымен пәндік олимпиада нәтижесі бойынша қала мектептері арасында 2-орынға лайық деп танылып, зор жетістікке қол жеткізіп отыр.Бұл білім ордасы оқушылардың толық қалыптасуына жағдай жасайтын әлеуметтік орта қалыптастырып отырғанын мақтанышпен айтуға болады. «Үш-ақ нәрсе адамның қасиеті: ыстық қайрат, нұрлы ақыл, жылы жүрек»&nbsp;деп Абай атамыз айтқандай, жүректің жылуы, ар-намыс, қайрат-жігер деген сезімдері бар рухтың мекеніне айналған білім ордасынан білім мен тәрбие алып жатқан өскелең ұрпақ өмірден өз орындарын тауып, қоғамда белсенді еңбек етуде.<blockquote>– Бүгінде білім беру саласы жыл санап жаңарған мазмұн, жаңа технология көмегімен алға қадам жасауда. Талабы мен талғамы өскен қоғам мектеп қабырғасында баланың теориялық білімімен қатар, практикалық білігінің де қалыптасқанын көздейді. Оған қоса, оқулықтан ғана үйретіп, ауызша талдаумен шектелетін әдістеме заманауи білім беру ісінде ескіргені қашан. Осыған орай Қазақстан мектептерінде &nbsp;технологиялық игілік пен ғылыми жаңалықты алдымен мектеп оқушысына жәрдем есебінде пайдалануға күш салуда. IT құрылғылар, робот пен пәндік кабинетте жаңашылдық сезіліп, білімді жастың қатары өсіп отыр. Шаһар орталығында орналасқан киелі шаңырақтың өңір тарихында алар орны ерекше. Осы аралықта берекелі білім ұясынан қаншама дарын түлеп ұшып, көптеген ілкімді жобалар жалғасын тапты, – дейді мектеп директоры Рита Мұқашова.</blockquote>2022-2023 оқу жылында Роза Садық математика пәнінен&nbsp;«Зерде» жалпы білім беретін пәндер бойынша ғылыми жобаның республикалық кезеңінің Гран-при иегері атанды. Жетекшісі Ғабиден Қайдаулов, математика пәні мұғалімі. Арыслан Нұрланұлы география пәнінен «Дарын» жалпы білім беретін пәндер бойынша олимпиаданың республикалық кезеңінің 2-орын иегері атанды. Жетекшісі Күлзада Садыкова – география пәні мұғалімі. Ангелина Белоусова &nbsp;«Дарын» жалпы білім беретін пәндер бойынша ғылыми жобалар байқауының орыс тілі мен әдебиеті пәнінен республикалық кезеңінің 3-орын иегері. Жетекшісі Роза Күзембаева – орыс тілі пәні мұғалімі.Сонымен қатар ұлттық мектеп лигасы бес асық ойынынан&nbsp;облыстық іріктеу жарысында 7-8 мектеп оқушылары 2-орын иеленсе, 7 «б» сынып оқушысы Көркем Кемел «үздік ойыншы» номинациясымен марапатталса, «Алтын қазына» қолөнер шеберлері байқауының қалалық кезеңінде 2-орын иеленді. «Eco green Iab» жасыл бөлмесі биыл іске қосылды. Жоба аясында оқушылардың бас қосып, өздерін еркін, жайлы сезінуіне мүмкіндік жасау үшін арнайы кабинет жабдықталуда. Кабинетте жұмсақ пуффиктер, үстел, су диспенсері, тәттілер, бөлме гүлдері, буккросинг бұрышы, теледидар, караоке болады. Бөлмені жабдықтауда да жиһаздың түсінің, дизайнының оқушыға тек жағымды көңіл-күй сыйлауын психологтардың зерттеуіне сүйеніп ұйымдастырылуда.Білім мекемесінің ұстаздары да абырой төрінен көрінуде. Мектеп мұғалімі Ғабиден Қайдауылов Оқу-ағарту министрінің Құрмет грамотасын иеленсе, Роза Күзембаева «үздік педагог атанып, 875,100 теңгенің сертификатын алды. 2022-2023 оқу жылында И. Панфилов атындағы №5 мектеп-лицейінің орыс тілі мен әдебиеті пәні мұғалімі «Білім беру ісінің құрметті қызметкері» төсбелгісімен марапатталды.Мектеп басшысы мектеп ұжымының алға қойған мақсаттарымен де таныстырды.Жекелеген пәндерден балалардың қабілетін, бейімділігін айқындап, олимпиада резервін дарынды оқушылармен толықтыру, дарынды және ерекше қабілетті балалардың ізденуіне жағдай жасау сол арқылы білім сапасын арттыру. Дарынды оқушының ғылыми ізденіс жұмысымен көбірек айналысуына жетекшілік ету, жағдай жасау, жекелеген оқушылармен мемлекеттік стандарт деңгейінен жоғары деңгейдегі тапсырма мен материалды көбірек қамту арқылы қатысушы емес жеңімпаз санын арттыру. Әдістемелік пән бірлестіктегі барлық мұғалімдердің &nbsp;толық қамтылып, олимпиада, ғылыми жоба, байқауларға қатысуына ықпал ету, қолдау көрсету басты жоспарымыз, – деді мектеп директоры.

Жарты ғасыр абыройлы еңбек еткен білім ұясы

<a href="https://kyzylorda-news.kz/">Kyzylorda-news.kz</a> &nbsp;12 мамыр – халықаралық мейірбикелер күні. Мейірбике – адам жанына араша түсіп, денсаулық түзеу ісінде дәрігерлерден кем қызмет қылмайтын жауапты мамандық иелері. Қызылорда қаласындағы денсаулық сақтау саласында ұзақ жыл еңбек етіп, бүгінде ел алғысын арқалаған жанның бірі – Күлмарам Күншығарова. Ол 42 жыл мейірбике болып еңбек етіп, дертіне шипа іздеген тұрғындардың жанына сөзімен де ісімен де дауа бола білген маман. Кейіпкеріміз Күлмарам Жалғасқызы 1964 жылы Қызылорда қаласында дүниеге келген. Мейірбике болу оның өзінің жан қалауы, жүрек таңдауы болды. Бүгінде өз саласын меңгерген білікті маман. Атқарып жүрген жұмысына үлкен жауапкершілікпен қарайтын ол науқастың денсаулығын арттыруға сүбелі үлес қосқан, құрметке бөленген жан десек артық айтқандық емес. Білікті, жан-жақты, қашан да айналасындағылардың көңілін тауып, жылы шырайлы мейірбике алдына келген науқастан көмегін еш аяған емес. Мұны әріптестері де, науқастарда жиі айтады. Күлмарам Жалғасқызы 1982 жылы Қызылорда медицина колледжін мейірбике ісі мамандығы бойынша бітіріп шыққан. Ол алғашқы еңбек жолын 1982 жылы облыстық туберкулезге қарсы күрес диспансерінің өкпеден тыс туберкулез бөлімшесінің мейіргері болып бастаған. 1987-1990 жыл аралығында осы бөлімшенің аға мейіргері қызметін атқарған. Ал 2008-2010 жыл аралығында № 1 өкпе терапия бөлімшесінде аға мейіргер жұмысын атқарған. Ол өз ісінің маманы, жұмыс орнында науқастарға гипс салу, орап-таңу жолдарын аса пысықтықпен меңгерген тәжірибесі мол мейіргер. Ата-анасының жолын қуып медицина саласын таңдаған оның осы салада үздіксіз жұмыс атқарғанына 42 жыл болған. Бүгінде облыстық фтизиопульмонология орталығының №-2 бөлімшесінің мейіргері Күлмарам Күншығарова мамандыққа деген адалдығы мен адамгершілігінің арқасында ел алғысына арқалаған мейірбике.А.Әлім

Ел мерейін асырған мейірбике

<a href="https://kyzylorda-news.kz/">Kyzylorda-news.kz</a> Әлеуметтік саладағы ең маңызды бағыттың бірі – денсаулық сақтау қызметі екені анық. Асқан жауапкершілікті талап ететін бұл саланы жетілдіруді мақсат тұтқан еліміз соңғы жылдары медицина ісіне аса мән беріп келеді. Нәтижесінде, аталған бағытта түрлі өзгерістер орын алып, ауқымды шаралар ұйымдастырылды. Бүгінде бұл бағытта қол жеткізген жетістіктер аз емес. Жыл сайын өңірдегі денсаулық сақтау ұйымдарының саны артуда. Бұл Шиелі ауданы тұрғындарының қажетті медициналық көмекпен қамтылуына мұрындық болып отыр.Жуықта ҚР Денсаулық сақтау министрі Ақмарал Әлназарова Шиелі ауданына арнайы жұмыс сапарымен келіп, өңірдің медициналық жағдайымен танысты. Сапар барысында ауданаралық аурухананың жай-күйіне қанығып, жауапты сала мамандарымен, дәрігерлермен пікірлесті. Сондай-ақ аудан медицинасына қажетті құралдар сатып алу жоспарымен танысып, тұрғындар денсаулығының жақсара түсуіне министрлік тарапынан барлық жағдай&nbsp;жасалатынын атап өтті.&nbsp;<blockquote>– Жалпы соңғы үш жылда денсаулық сақтау саласына қатысты халықтан келіп түсетін арыз-шағымдар еселеп артқан. Сол себепті осы арыз-шағымдарға тиісті сараптама жасалып, себептері анықталды. Нәтижесінде, халықтан келетін арыз-шағымның басым көпшілігі – емханалардың қызметіне қатысты болып отыр. Бұдан бөлек, жолдама алудағы қиындықтар, медициналық көмекпен қамтылудағы тексерістердің ұзақтығы тағы бар. Аталған мәселелерді кезең-кезеңімен шешуге жұмыс атқарудамыз. Қазіргі таңда денсаулық сақтау саласындағы бірқатар заңдарға өзгеріс енгізу басталып кетті, – деді Ақмарал Шәріпбайқызы.</blockquote>Денсаулық сақтау министрінің сөзінше, бүгінде медицина саласында көрсетілетін қызметтер мен МӘМС жүйесін жүйелендіру аясы жүзеге асырылып жатыр. Осыған байланысты министрлік облыстардағы медицина саласының әлеуетін арттыруды және Ұлттық бағдарламалардың тиімділігін жүзеге асыруды оңтайландыруда.Сонымен қатар аталған саладағы ең өзекті мәселенің бірі – мамандар&nbsp; жетіспеушілігі. Ақмарал Әлназарова бүгінгі таңда Қызылорда облысының өзінде 150-ден астам дәрігер маман жетіспейтінін атап өтті. Осыған сәйкес, медициналық оқу орындарының ректорларымен бірлесіп, облыс әкімдігі және облыстық денсаулық сақтау басқармаларының қолдауы арқасында білім алып жатқан студенттер өңірлерге келіп жұмыс істеуге мол мүмкіндік алуда.Іс-сапар барысында Денсаулық сақтау министрі Шиелі іргесіндегі Талаптан ауылдық округіне бағыт алып, жаңадан бой көтерген дәрігерлік амбулаторияның жұмыс барысымен танысып, тұрғындармен тілдесті. Мұнда ол аталған салада қордаланған мәселелерді атап өтіп, оларды шешу үшін тиісті жұмыстар жүргізіліп жатқанына тоқталды.&nbsp;Айта кетейік, қазіргі таңда Президенттің,&nbsp;Үкіметтің Сыр өңірін ерекше қолдауының арқасында аймақта нәтижелі жұмыстар жүргізілуде. Облыс әкімінің мәлімдеуінше, өткен жылы республикалық және жергілікті бюджеттен 52,1 млрд теңге қаралып, 23 медициналық нысан салынды. Оның &nbsp;17-нің құрылысы аяқталды. Биыл бюджеттен 5,5 млрд теңге қаржы бөлініп,&nbsp; 5&nbsp; нысанның құрылысы жүргізілуде, оның 2-і пайдалануға берілді.&nbsp;Өңірдегі денсаулық сақтау саласының бүгінгі бюджеті 130 млрд теңгеден асқан.&nbsp;Мемлекет басшысының бастамасымен қолға алынған «Ауылдық денсаулық сақтауды жаңғырту» ұлттық жобасы аясында&nbsp;біздің ауданда да бірнеше дәрігерлік амбулаторияның құрылысы қарқын алып, бүгінде ел игілігіне пайдалануға берілді. Алдағы уақытта ауданның&nbsp;5 елді мекенінде осындай медициналық ғимараттардың құрылысы басталады. Сонымен қатар кенттегі ауданаралық, көпбейінді ауруханалар жанындағы қосымша нысанның құрылысы жүргізілмек.Шежірелі өлкеде бой көтерген дәрігерлік амбулаториялар заманға сай жабдықталып, жаңа үлгіде халыққа қалтқысыз қызмет етіп жатыр. Қазіргі таңда кең әрі жаңа ауруханада шиеліліктер де сапалы медициналық көмек алуда. Бұл тұрғындардың көптен бері көкейінде жүрген мәселенің шешімін табуына сеп болды. Бас дәрігердің былтырғы мәліметіне сүйенсек, ауданда барлығы 1&nbsp;121 медицина қызметкері жұмыс атқарады.&nbsp;Халыққа 203 дәрігер, 918 орта буынды қызметкер, 15 психолог пен 36 әлеуметтік қызметкер көмек көрсетуде.&nbsp;Аймақ басшысы Нұрлыбек Машбекұлы өз сөзінде:<blockquote>– Адамның басты байлығы – денсаулығы болғандықтан, елімізде, аймақта бұл саланың негізгі көрсеткіштерін, яғни ұлт саулығын жақсартудың барлық мүмкіндігі қарастырылуда. Медицина мамандарының біліктілігін арттыру, ауруханаларды заманауи құрал-жабдықтармен жарақтандыру назардан тыс қалмайды. Мемлекет басшысы Қасым-Жомарт Кемелұлы қоғам тұрақты дамуы үшін азаматтардың денсаулығы мықты болуы керек екенін үнемі айтып келеді. Медициналық қызметтің қолжетімділігін қамтамасыз ету, денсаулық сақтау инфрақұрылымын одан әрі жаңғырту үшін кешенді шаралар қабылдануда, – деген болатын.</blockquote>Кең көлемде атқарылып жатқан осынау жұмыстар өңірдің ілгерілеуіне жағдай жасап, тұрғындардың талапқа сай медициналық көмек алу мүмкіндігін молайтып отыр. Денсаулық сақтау саласы үшін халыққа сапалы қызмет көрсету – басты міндет. Бұл тұрғыда жұмыстардың тиімділігі мен қолжетімділігін қамтамасыз ету аса маңызды. Себебі медицинасы дамыған елдің болашағы да жарқын болары анық.

Денсаулық министрі Шиеліге келді

<a href="https://kyzylorda-news.kz/">Kyzylorda-news.kz</a> Ел қашанда ерлерге арқа сүйейді. Жігітті еліңе қорған, жұртыңа тірек бол деп тәрбиелейді. Отан қорғаушы күні қарсаңында облыстық қорғаныс істері жөніндегі департаментінің тәрбие-идеологиялық және әскери-патриоттық жұмыстар басқармасының бастығы – департамент бастығының орынбасары Алмат Жақыповпен әңгімелескен едік.&nbsp;– Алеке, Отан алдындағы борышын өтеу – әр азаматтың міндеті екені анық. Бірақ жастардың біразы әскерге баруға құлықсыз. «Шабытпен барып, табытпен келіп жатыр» деген тіркес жаттанды болып кетті. Шынында солай ма? Жастарды неге отаншыл деп айту қиын?– Отанды сүю отбасынан басталады. Ата-ана баланы «тыныш жүр, қара басыңды ойла» деп тәрбиелесе, ол баланың отаншыл болуы екіталай. Баяғы әкелер баласын молда оқуына бергенде «еті – сенікі, сүйегі – менікі» дейді екен. Қазір осы тәрбие бар ма, қазіргі балалар мұғалім қатты сөйлесе де, үйіне жылап айтып барады. Артынан әке-шешесі кеспелтегін алып келіп тұрады. Бұл қылық бала психологиясын бұзады, айналып келгенде әскерден жалтарудың артында осындай біржақты тәрбие жатыр. Әрине, әскер қатарында әртүрлі жайт кездеседі, бірақ ол әскерде ғана ма, қарапайым өмірде де кездейсоқ бақытсыздықтар бар. Оқыс оқиғалар тек әскер қатарында орын алып жатқандай көрінеді. Әлеуметтік желі қолданушылары үш-төрт жыл бұрын өтіп кеткен жағдайлардың бейнежазбасын қайталап сала береді. Сөйтіп әскер жайлы көпшілікке теріс әсер таратады. Осыдан екі жыл бұрын Қазалыдан Мәтіғұл деген жас жігіт әскер қатарына шақырылды. Ол өзі мал бағудан басқа ештеңе көрмеген, ой көкжиегі алысқа жетпейтін бала болған. Осыны кейбіреулер «әскерге ақыл-есі кем азаматты алып жатыр» деп, қоғамды алатайдай бүлдіргісі келді. Бейнежазбаға түсіріп жариялады. Біз соны ескеріп, министрліктің келісімін алып, баланы әскери міндетін жергілікті жерде өтеуге қалдырдық. Сол бала әскерде жүріп ширығып, шынығып, сымдай тартылып шықты. Өз арасында үлгілі сарбаз атанды. Тіпті ол келісім-шарт бойынша әскери қызметте қалғысы келді. Алайда ауылындағылар алып кетті.– Қызық жағдай екен. Ал енді сондай негізсіз ақпараттарды жоққа шығару үшін өз тараптарыңыздан қандай жұмыстар жүргізіледі?– Қызылорда қаласындағы «Жастар орталығында» «Жас сарбаз» республикалық қоғамдық бірлестігі жұмыс істейді. Жас сарбаздар Жеңіс мерекесінде, салтанатты шерулерде сап түзеп, өздерінің болашақ ел қорғаны екенін сезінеді. Олардың арасында әскери-патриоттық әңгімелер айтылып, отаншылдық насихатталады. Мектептердің жоғары сыныптарында «Ерлік сабақтары» өткізіледі. Біз Ауған соғысы, тәжік-ауған соғысы, Таулы Карабақ соғысы ардагерлерімен, Германияда борышын өтеген кеңес әскерлері тобы мүшелерімен кездесулер ұйымдастырамыз. Бұл кездесулер жастарды отаншылдыққа тәрбиелеп, ерлік сезімге баулиды. Әскерге шақыру маусымдарында болашақ сарбаздар медициналық тексеруден өтіп, команда тағайындалғанша жиын пунктінде екі-үш тәулік жатады. Осы кезде оларға елін, жерін қорғаған ұлт батырлары, халық қаһармандары туралы фильмдер көрсетіледі. Сонан соң әскерге шығарып салу рәсімдері жасалады. Ондай шаралар қаладағы «Тағзым» алаңында, батырлар ескерткіші жанында, басқа да арнайы орындарда салтанатты түрде өткізіледі. Әскерден оралған сарбаздарды қарсы алу рәсімін де ұмытқан емеспіз. Өйткені, жерлес азаматтардың қай күні, қай жерден келетіні бізге белгілі. Жақында әскери теңіз флоты қатарында борышын өтеген бес-алты жерлесімізді Қызылорда теміржол вокзалынан қарсы алуды ұйымдастырдық. Бауырлары мен достарының гүл шоқтарымен күтіп алып, құшақтасып табысқан сәттері соншалықты әсерлі. Осы бір көріністің өзі жастарға әскер сапында болудың құрметін көрсетеді. Әскери оқу орындарында білім алып жатқан азаматтарымыз да бар. Олардың демалысқа келетін сәтін пайдаланып, өздері оқыған мектепке алып барамыз. Сол кезде жасөспірімдер кеше ғана мектеп бітірген түлектің батыр тұлғалы азамат болғанын көріп, сөзін тыңдап, әскери-әлеуметтік жағдайына көз жеткізіп, солардай болсам деп құштарланады.– Әскери-әлеуметтік жағдай туралы айтып қалдыңыз. Осыны нақтылап өтсек…– Екі жыл бұрын Білім министрлігі мен Қорғаныс министрлігі жастардың әскери қызметке ынтасын арттыру мақсатында арнайы жобаны іске асырды. Мерзімді әскери қызметін аяқтаған әрбір азамат екі жыл ішінде ҰБТ тапсырмай-ақ, әңгімелесу арқылы ақылы негізде жоғары оқу орнына түсе алады. Ал әскери міндетін өтеу барысында жақсы нәтиже көрсеткендер ЖОО есебінен тегін білім алады. Мұндай қадамға еліміздің 40-тан астам оқу орны ниет білдіріп отыр. Бұған анық көз жеткізу үшін Қорғаныс министрлігінің ресми сайтын қарау керек. Әскери қызметтегі жастарға жасалған әлеуметтік жағдай тіпті жақсы. Егер әскери қызметші пәтер жалдап тұратын болса, оның пәтерақысымен жұмыс орны арқылы есептесу мүмкіндігі бар. Ал ипотекаға үй алса, ол мемлекет есебінен төленеді.– Биыл сарбаздар сапына қанша азамат қосылды? Әскерге өзі сұранып кететіндер бар ма?– ҚР Қарулы күштері қатарына жөнелту осы жылдың 26 наурыз бен 15 мамыр аралығында жүргізілді. Әскер қатарына алу үшін 850 адамға тапсырыс болған еді. Соның ішінде Ұлттық шекара қызметіне түскен тапсырыс 100 пайыз орындалды. Қалған тапсырыстардың аясында шақырылғандардың денсаулығына байланысты, Қорғаныс істері жөніндегі басқарма мен бөлімдер тарапынан әскерге шақырушылардың келуіне орай орын алған проблемалар да бар. Ол орындар алдағы кезеңде толығады деп есептейміз. Ендігі жөнелту жұмыстары 22 мамыр мен 30 маусым аралығында өтеді. Бағана әңгіме қылған теріс бұрушылардың сөзі соншалықты жол байлап жатқан жоқ. Ешкім де ақиқатты алақанмен бүркей алмайды. Әскерге өздері сұранатындар жетеді. Жақында қызылордалық егіз &nbsp;бала – Әлкеновтер әскерге өз сұраулары бойынша аттанды. Мұндай мысал көп. Бір ғана нәрсені баса айтуға болады. Бүгінде әкесі соғыста болған адамдардың өзі сирек. Олар – Отан қорғаудың қандай қымбат борыш екенін жанымен түсінген ұрпақ. Қазір облыс көлемінде Отан соғысының 4 қана &nbsp;ардагері қалыпты. Жастарға олардың ерлік сөзін тыңдату мүмкіндігі аз. Сондықтан ата-аналар балаларына Отанның қасиетін, туған жердің қадірін үнемі айтып отыруы тиіс. Ата-ана сөзі – бала үшін бұлжымас ақиқат. Сондықтан отбасылық тәрбие тіні мықты болса екен деймін.– Алеке, әскери қызметте жүрсіз. Жастардың тәрбиешісісіз. Киімі таза, жүрісі нық, тұлғасы түзу әскери адам көлденең көзді қызықтырмай қоймайды. «Мен де осындай болсам» дейтін жастарға өзіңізді жақынырақ таныстыра кетсек… Оларға тілегіңіз бар ма?– Мен мектеп бітірген соң Қызылорда мемлекеттік университетінен алғашқы әскери дайындық және денешынықтыру пәнінің мұғалімі мамандығын алып шықтым. 2005 жылға дейін мектептерде мамандығым бойынша жұмыс істедім. Мұнан соң ҚР Қорғаныс министрінің бұйрығы негізінде Алматы облысының қазіргі Қонаев қаласында орналасқан десанттық шабуылдаушы әскерлеріне қарасты әскери бөлімде зениттік-зымырандық взвод командирі болып қызмет еттім. Бүгінде Қызылордада осы қызметімді атқарып отырмын. Әскери шенім – подполковник. Төрт перзенттің әкесімін. Жастарға айтарым, біздің осындай байтақ жеріміз бен рухани құндылықтарымызды аманаттап қалдырған аталарымыз жауға шапқанда сіздер секілді жас болған. Мысалы, Ақан Сатаевтың «Жаужүрек мың бала» фильмін көрген шығарсыздар. Өмірде бақытты, қуатты болу үшін ең бірінші жаныңды байыту керек. Білімге бүгіліп, еңбекке еңкейсең, өз еліңді сүйсең, саған басқа қажеттілік өзі келе бастайды. Осыны түсінсең болды.Әңгімеңіз үшін рақмет. Елге жасаған қызметіңіз еселеніп қайтсын, абыройлы болыңыз! Дүйсенбек АЯШҰЛЫ &nbsp;

Туған жерге қызмет ету – азаматтық борыш

<a href="https://kyzylorda-news.kz/">Kyzylorda-news.kz</a> Қазір кәсіп бастаймын десе, кез келген жанға мемлекеттен қолдау бар. Оған түрлі бағытта жұмыс істеп жатқан кәсіпкерлер қатары дәлел. Әсіресе нәзік жандылар. Отбасы мен түздің шаруасын қатар ширатып, қай саланың болсын шылбырын қаққан қаракөздердің қатары күн санап артып келе жатқанын байқау қиын емес. Әркім өзінің ебіне қарай еңбек етіп, көрпесіне қарай көсіліп жатыр. Тек қызметін асыра пайдаланып, жалған атағымен жұрттың жолын кесіп жүргендерден сақтасын. Қысқасы, қарекет қылсаң бейнетіңе сай берекет бар. Осыны ұғатын кез жетті. Бір ғана мысал. Арал ауданында «Атамекен» кәсіпкерлер палатасы арқылы кәсіпке деген ынтасы бар талай жан бүгінде өз өзін жұмыспен қамтыды. Жұртқа жұмыс беріп жатқан жандар қаншама?! Бара қалсаңыз қажетіңізге сай көмек алып, сол мекеме арқылы жүзеге асып жатқан түрлі бағдарламаларға қанығасыз. Кәсіпкер болам, қолымнан келеді десеңіз, мархабат!Бір кездері шаруашылықтан хабары бар, жан-жағы мал баққан жұрттың ортасында тұрмыс кешкен Нұргүл Әшімбаева да кәсіпкер боламын деп ойламаса керек-ті. Алайда қазіргі күнкөріс қамы Нұргүлді осындай шешімге алып келді. Оңай емес,әрине. Десе де өзінің нәзік жанды екеніне қарамастан Нұргүл шаруашылықтың осы түрін таңдады. Нақтысы, жылқы бағатын Нұргүл Жұбандыққызы 2021 BASTAU-мен кәсіп бастауға бел буған жандар қатарынан. Ол 2021 жылы «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасы» шеңберінде «Бастау-бизнес» оқу жобасын сәтті аяқтады. Өткен жылдың аяғы 2022 жылдың қарсаңында өз жобасын қолға алып, атап айтқанда, жылқы шаруашылығын іске асыруға бел шешті. Осы мақсатта «Атамекен-Кызылорда» МҚҰ-нан 2 млн 700 мың теңге көлемінде несие алып, жылқы шаруашылығын жүргізуде. Өзі Аққұм ауылдық округі Шижаға ауылының тұрғыны. Шаруашылықтың барысы жайында білмек болып кейіпкеріміздің өзімен хабарластық.<blockquote>– Біз осы Шижағаның басындамыз. Өткен 2022 жылы кәсіпкерлік мақсатта оқып, ойға алған кәсіпке қол жеткіздім. Бұл жерде маған көп қолдау көрсеткен ауыл әкімшілігіне және палатаның қыз-жігіттеріне рақмет. Көп жерде құжаттамалық жұмыстар жағынан көмек берді. Бағыт-бағдар сілтеді. Нәтижесінде өткен жылдың соңында жылқы алу үшін қомақты қаржыға қол жеткіздім. Ол ақшаға 5 бас жылқы сатып алдым. Алайда бәрі біз ойлағандай бола бермейді ғой. Қырсыққанда, былтырғы қуаңшылықтың салдары біз секілді шаруаларға соққы болып тұр. Қазірдің өзінде төл береді деп күтіп отырған үш бастай жылқы іш тастап кетті. Қалғандарынан да үміт шамалы. Жылқы деген жануар бір жұқарса оңалуы қиын екен. Қазір солардың күтімі үшін жем-шөпті үзбеуге тура келеді. Біз секілді шаруаларға осындай жағдайда жем-шөп есебінен қолдау болса дейміз. Субсидия мәселесі де біз үшін шаруасы көп жұмыс болып тұр. Басты мақсат – алдымыздағы мал басы санын осы қыстан аман алып шығу, – дейді Н.Әшімбаева.</blockquote>Иә, мал баққанға бітеді. Ал сол малды бағудың бейнеті бес батпан екенін білетін боларсыз. Сондай істі тіксінбей таңдаған Нұргүл бүгінде жұбайы Сәкен екеуі мал қораны кезек-кезек қарап жүр. Балалары да жәрдемші. Бірде шөп, бірдем жем салу бұл жандардың күнделікті ісіне айналған. Былтырғы қуаңшылық, биылғы қар көп өтпей-ақ малды қолға тұрғызды. Өйткені көбісінде қысқа түсер қоң жоқ. Оны Сәкен мен Нұргүл жақсы біледі. Десе де ауыл шарушылығының бұл саласын дамыту жолында кәсіпкерлерге қолдау көрсетіп отырған орталықтарға Нұргүл Әшімбаева секілді шаруалардың алғысы зор. Бұл жолдағы еңбекқор жанға біз де мол табыс, кәсіптеріне береке тілейміз.Фото: Нұрболат Нұржаубай

Нұргүл Әшімбаева: Кәсіпкерлік мақсатта оқып, ойға алған кәсіпке қол жеткіздім

<a href="https://kyzylorda-news.kz/">Kyzylorda-news.kz</a> Қызылорда қалалық орталықтандырылған кітапханалар жүйесіне қарасты №18 кітапхананың ұйымдастыруымен №271 мектеп оқушылары мен Жалаңтөс Баһадүр Сейітқұлұлы атындағы облыстық мамандандырылған мектеп-интернат-колледж оқушыларының қатысуымен әскери қайраткер, Кеңес Одағының батыры, Халық қаһарманы Сағадат Нұрмағамбетовтың туғанына 100 жылдығына орай "Өресі биік өр тұлға" атты елтану сағаты өткізілді.Шара барысында батырдың өмірбаяны мен ерліктері, қазақ халқына сіңірген еңбегі және жазып қалдырған естеліктері туралы жастарға мол ақпарат берілді. Жас оқырмандарымыз өз кезегінде Отан, туған ел, Жеңіс тақырыбында өлеңдер айтып, күй тартып елтану сағатын патриоттық көңіл-күйде өткізді.Әскери қайраткер, Кеңес Одағының батыры, Халық қаһарманы Сағадат Қожахметұлы Нұрмағанбетов 1924 жылы, 25 мамырда Ақмола облысы, Ақкөл ауданы, Еңбек ауылында дүниеге келген.Әке-шешесінен ерте айырылған бала Сағадаттың жетімдік тағдыры тым ерте басталады. Ата-ана орнын жалғыз арқа сүйер ағасы Сағит басты.Сағадат ағасы Сағитты ерекше жақсы көретін, аға сөзін байыппен тыңдайтын. Ағасы өте білімді болған.Оқуға ынталы кішкентай Сағадат, елді аштық жайлаған - 1933 жылы Алексеевка селосындағы орыс мектебіне барды. Білімді жақсы игерген зеректігінің арқасында Сағадат туған ауылына қызмет етіп, еңбекке ерте араласады. Далалық бригаданың есепшісі болды.1941 жылы Ұлы Отан соғысы басталғанда ағасы Сағит соғысқа аттанады. Ағасы соғыста қаза болып,1942 жылы өзі сұранып Сағадат та әскерге алынып, Ұлы Отан соғысына қатысқан.1945 жылы 27 ақпанда Кеңес Одағының батыры атағы берілді. Қаһарман қазақ ұлы Сағадат Нұрмағамбетов соғысты Берлинде аяқтап, жеңіспен оралды. Еліміз тәуелсіздік алған жылдары Қазақстан республикасының Қорғаныс министрі болып қызмет атқарды.2013 жылдың 24 қыркүйегінде 90 жасқа қараған шағында дүниеден озды. Отан үшін от кешкен өресі биік өр тұлға Сағадат Нұрмағамбетовтың жарқын бейнесі ел есінде мәңгі сақталады.Шараны ұйымдастырудағы басты мақсат – жастарды, оқушыларды отансүйгіштікке баулу, ұландарымызға үлгілі тарихи тұлғаларымызды насихаттау.

Қызылордада оқушыларға батыр ерлігі насихатталды

<a href="https://kyzylorda-news.kz/">Kyzylorda-news.kz</a> &nbsp;Бақтияр Әбутәліпов талай шәкіртті үлкен өмірге қанат қақтырып, ауыл балаларына білім нәрін дарыта білген ардақты ұстаз. Әрқашан білікті педагогтың ағартушылық саладағы жасаған еңбегі өлшеусіз. Сырдария ауданына қарасты Шаған ауылындағы іргелі білім ошағында еңбек ететін ардақты азамат талай марғасқа жандардың тағылымын алып, халық баласын тәрбиелеуде. Жаны ізгі педагогты шәкірттері әрқашан құрмет тұтады.Біздің кейіпкеріміз үнемі ақжарқын мінезімен айналасына сыйлы екенін жақсы білеміз.&nbsp;Негізінен, ұстаздың ағартушылық қызметтегі өзіндік орнының қалып­тасуына екі тұлғаның бала оқытудағы қажыр-қайраты әсер еткен. Талай мәрте білімдіге дүние жарық екенін сезіне білген ел ағасы ұстаздарының ықпалы зор екенін тілге тиек етті.<blockquote>– Ұстаз болу үшін алдымен адамға жол нұсқаушының бағыты, беретін тәлім-тәрбиесі үлкен әсер етеді. Менің ұстаздық жолды таңдауыма себеп болған бір-екі мысалды келтіргім келеді. Мен, 1990 жылға дейін спортпен айналыстым. Осы спортпен айналысуыма мектеп қабырғасында оқып жүргенімде марқұм Сақтапберген Ахметов ағайымның ықпалы зор болды. Ардақты аға Ақжарма ауылында еңбек пәнінен сабақ берген еді. Еңбекке тәрбиелей жүріп шәкірттерін спортқа үйретті. Соның ішінде күрестің самбо түрінен машықтандырды. Сақтапберген ағайдың арқасында беріге дейін спортпен шұғылдандым. Институт қабырғасында, Отан алдындағы борышымды өтеп жүргенде де, самбодан жарысқа қатысып, жүлделі орындарға ие болдым. Самбодан кандидаттық қорғадым. Сонымен қатар мектепте оқып жүргенімде Жақсылық Әбілдаев ағайым математикадан сабақ берді. Ол кісі сабақ берген кезінде бес қоймайтұғын. Неге бес қоймайсыз деген кезімізде: «Беске мен өзімде білмеймін» деп айтатын. Міне сол кісінің еңбегінің арқасында физика-математика факультетіне түстім. Осы жандардың табандылығы, білім мен біліктілігі арқасында ұлағатты ұстаз болып әлі күнге дейін еңбектің нанын жеп жүрміз, – деді ардақты ұстаз.</blockquote>Өзінің білім саласында табанды еңбек ету жолындағы ерекше талапқа бағына білгені ұйымдастырушылық қабілетін көпшілікке айшықтай түседі. Күрделі саладағы жемісті жолы Бақтияр Әбутәліповтің тәжірибесін жыл өткен сайын толықтырып отырады.<blockquote>– Ағартушылық қызметте қажырлы еңбек ете білгеніме дән ризамын. Маман тапшылығы орын алған кезде өзіміз жұмыс көзін талғамай, білім ошағының кез келген ісіне араласа алған едік. Әрине, ұстаздар қауымы мен әріптестермен бірлесіп, ауыл мектебінің жұмысын жолға қоя білдік. Қарапайымдылық қасиет арқылы көпшіліктің алғысына бөленіп, жұмысымызға ыждағаттылық таныта алдық. Әрбір адам өзіне жүктелген міндетті лайықты түрде атқара білсе, абыройы биігінде болары сөзсіз, – дейді ардақты ұстаз.</blockquote>Бақтияр Аяғанұлының педагогика саласындағы еңбек жолы 1989 жылы Шаған ауылындағы білім ошағында басталған. Ол – 1999-2002 жылдары аудандық білім бөлімін басқарса, 2009-2014 жылдары Шіркейлі ауылындағы №129 Ә.Жәмішов атындағы мектептің жұмысын үйлестірді. Ал 2014-2017 жылдары Шаған ауылындағы №37 мектеп-лицейге жетекшілік етті. Бүгінде осы білім ошағында ұстаздық ретінде қажыр-қайратын танытуда.<blockquote>– Бәкеңмен бірнеше жыл бойы табанды қызмет етіп келеміз. Оның байсалды мінезі, қарым-қабілеті ерекше. Үнемі үлкенді де, жасты да құрмет тұтып, әрбір істе ақылдасып отырады. Физика-математика пәніне сабақ бере жүріп, балаларды үлкен өмірге дайындайды. Олардан ақыл-кеңесін аямайды. Бақтияр – достыққа берік адам. Ол – тас қора қорған соқпайтын, оны дос-жорасы қоршап жүретін кеңпейіл азамат. Жан-жақты, сегіз қырлы қасиетімен танылған аяулы әріптес. Осы ұжымда өнімді еңбек етіп, жалпы білім беретін мектептен мектеп-лицей деңгейіне көтерілуіне тікелей үлес қосқан басшы саналады. Білімнің шамшырағы атанған ардақты азаматтың жұмысына зор табыс тілеймін, – деді әріптесі Мағрипа Есжанова.</blockquote>Әр жылдары жоғарғы марапат­тарға қол жеткізген ардақты ұстаз келесі жылы зейнеттік демалысқа шығатыны мәлім.&nbsp;Сондықтан білім саласының майталманының деніне саулық, отбасына амандық тілейміз!

Жүздеген шәкірт түлеткен ұстаз

<a href="https://kyzylorda-news.kz/">Kyzylorda-news.kz</a> Мектептің табалдырығын имене аттаған жас жеткіншектің өмірінде бастауыш сынып мұғалімінің алатын орны ерекше. Сондай жанның бірі, бүгінде еңбек өтілінің 40 жылын педагогикаға арнаған аяулы ұстаз – Марина Жансейтова. Алғашқы ұстаз әріп танытып қана қоймай, баланың бойындағы қабілетін ашып, болашағына бағыт-бағдар беретін бағбанға айналады.Білім мен тәрбиенің негізі – бас­тауыш сыныпта қалыптасатыны анық.&nbsp;Талай шәкірттің өмірден өз орнын табуына аянбай еңбек еткен ардақты ұстаз әрбір шәкірттің жүрегінен ерекше орын алған жан.Ұстаз атты ұлы есімді жоғары қоятын білікті маман аудан орталығынан кейінгі ең үлкен елді мекен Шаған ауылындағы №37 мектеп-лицейдің бастауыш сынып мұғалімі. Ардақты ұстаз 1963 жылы Қызылорда қаласында дүниеге келіп, ауылда әжесінің тәрбиесінде болған. Ауылдағы мектептен білім алып, білімге құштар болған жан Қызылорда қаласындағы Н.Гоголь атындағы педагогикалық инс­титутта қазақ мектептеріндегі орыс тілі пәнінің мұғалімі мамандығын меңгеріп шығады. Институтты тәмәмдаған соң №37 мектеп-лицейде 1986 жылы алғашқы еңбек жолын бастайды.<blockquote>– Бала кезімнен ұстаз болуды армандайтынмын. «Арман – адамға қанат бітіреді» демекші, бүгінде сол арманның арқасында шәкірттерімнің «Алғашқы ұстазым» деген ұлы есімге ие болып келе жатырмын. Бала өмірінің алғашқы баспалдағын аттаған сәтте қалай білім мен тәрбие берілсе, одан арғы кезеңде өзін тұлға ретінде қалыптастырады. Дана халқымыздың «Жас бала жаңа өркен жайған жасыл ағаш тәрізді» демекші оқушыларға әркез барлық білгенімді үйретіп, күш-жігерімді жұмсауға тырысамын. Алғашқы тұрмыс құрған жылдары шәкірттеріме тыңғылықты көңіл бөле алмай қалдым деп қынжылатынмын. 40 жылдық еңбек жолында қиындығы мен қызығы қатар жүретін ұстаздық қызметте үнемі іздену, өзіңді жетілдіру, білім алу керектігін ұғындым, – дейді білікті ұстаз Марина Жансейтова.</blockquote>Қай кезде де әрбір сабағын бір біріне ұқсатпай өткізу үшін ізденіп, жеке тұлғаның дамуына жол ашуға бағыт-бағдар беруді мақсат еткен ұстаздың жеткен жетістіктері бір төбе. Атап айтар болсақ, «Білім шыңы» төсбелгісімен, Білім және ғылым қызметкерлері кәсіподағының облыстық комитетінің екі мәрте «Құрмет грамотасымен», аудандық білім бөлімінің «Дипломымен» марапатталды. Сонымен қатар бастауыш сыныптарға арналған олимпиадаға дарынды шәкірт дайындағаны үшін алғыс хат иеленсе, «Білім шыңы – білікті ұстаз еңбегі» атты кітапқа есімі енді.Ұстаздың еңбегінің жемісі – шәкірттерінің жеткен жетістігі. Осы орайда Марина Болатқызының оқушылары талай бәйгеден жеңімпаз атанып келе жатқанын айтқан орынды. Мәселен, «Ақбота», «Кенгуру» республикалық интеллектуалдық марафонында А.Берікқызы, Ә.Сәрсенбай мен А.Нұртасқызы ІІ орын, Т.Мұратов, С.Ринатұлы мен А.Әділ ІІІ орын, «Ұлы дала өнертапқыштыққа алғашқы қадам» ғылыми жобасында Ә.Ақан ІІІ орын, «Мың бала» республикалық олимпиадасының «Абай оқулары» конкурсынан А.Әділ бас жүлде, А.Орынбасар ІІІ орын, «Зерде» республикалық зерттеу жобалары аудандық кезең бойынша А.Нұртасқызы мен Ә.Сәрсенбай ІІІ орын алды. «Бозторғай» шығармашылығы байқауында Ә.Сәрсенбай І орын, О.Жаңабай ІІ орын иеленіп, Ташкентке жолдама алды.Бүгінде 7 мәрте бастауыштан түлек ұшырған, жүздеген оқушының жүрегінен орын алған ұлағатты ұстаз бір әулеттің отанасы, шаңырағының берекесі. Отағасы Жұмақожа Жансейтовпен 37 жыл өмірдің қиындығы мен қызықшылығын бірге көріп келе жатқан берекелі шаңырақ иелері. Аяулы ұстаз жұбайымен 3 ұл, 1 қыз тәрбиелеп өсірді, қазіргі таңда 2 немеренің сүйікті әжесі. Өсіп-өнген әулеттің балалары бүгінде өз алдына бір-бір саланың мамандары, кенже қызы студент.

Бала жанының бағбаны

<a href="https://kyzylorda-news.kz/">Kyzylorda-news.kz</a> &nbsp; Білімнің қайнар көзі мектепте қалыптасатыны рас.&nbsp;Мектеп – білім бесігі. Білім ошақтарының білімді ұстаз­дарының талапты оқушылардың түлеп ұшуына сіңірген еңбегі ұшан теңіз.&nbsp;Осы ретте, білімнің қара шаңырағы, сан ғасырлық тарихы бар&nbsp;Сырдария ауданына қарасты&nbsp;Шаған ауылындағы №37 мектеп-лицейдің жыл көлемінде атқарылған жұмыстары, тыныс-тіршілігі мен жетістіктері туралы мектеп-лицейдің директоры Қалихан Омаровпен сұхбаттасқан болатынбыз.– Қалихан Бердіханұлы, сөздің ең ұлысы – тарих демекші, Сіз басқарып отырған білім ошағының тарихы тереңде жатқанын білеміз. Осы ретте, алғашқы сұрақты мектеп тарихына бағыттасақ.– Иә, сан ғасырлық тарихы бар мектеп – 1927 жылы «Жәдігер» 4 сыныпты бастауыш мектебі болып іргесі қаланды. Білім ордасы 1934-1935 оқу жылында жеті жылдық болып қайта құрылды. 1951 жылы Ермағанбет Жүсіпов басшылық етіп, осы кісінің кезінде мектеп үйі салынып «ВЛКСМ-ның XXX жылдығы» аты берілді. Кейіннен 2015 жылы А.Атақаев көшесінде орналасқан жаңа ғимараттың іргетасы қаланып, №37 мектеп-лицейі 3 қабатты типтік жобада, 900 орындық болып салынды. Білім мекемесіне қарасты Сырдария ауданы әкімдігінің 2016 жылғы 28 қарашадағы №371 қаулысына сәйкес, білім ошағына №37 мектеп-лицей мемлекеттік мекемесінің статусы берілді. Содан соң, Қызылорда облысы әкімдігінің 2021 жылы 5 қаңтардағы №176 қаулысына сәйкес, Қызылорда облысының білім басқармасының Сырдария ауданы бо­йынша білім бөлімінің «№37 мектеп-лицейі коммуналдық мемлекеттік мекемесі болып қайта аталды. Тоқсан жеті жыл ішінде Қазақ ССР халық ағарту ісінің үздігі, еңбек ардагері, ҚР Білім беру ісінің үздігі болған ұстаз ардагерлері шәкірттерге білім берді.– Білім ошағының бүгінгі тыныс-тіршілігі қалай?– Қазіргі таңда мектепте барлығы 975 оқушы бар. Оның ішінде 1-11 сыныптарда 892 және даярлық сыныпта 83 бала бар. Оқушылардың үлгерім сапасына келетін болсақ, оқу озаты – 211. 1-4 сыныптың оқушылары және әлеуметтік аз қамтылған отбасынан шыққан 450 бала бір мезгіл ыстық тамақпен қамтылған.Мектептің материалдық базасы жаңа модифи­кациялық биология, химия, физика кабинет­терімен жасақталған. Сонымен қатар тарих, орыс тілі мен әдебиеті, математика кабинеті, қазақ тілі және қазақ әдебиеті, ағылшын тілі, мультимедия кабинеті, робототехника, информатика, алғашқы әскери дайындық, бас­тауыш сынып оқу сыныптары пәндік оқу бағдарламасы бойынша жаңа технологиямен жабдықталып, практикалық оқу жүйелі түрде жүргізі­луде. Бала­ларға жан-жақты бі­лім беру үшін 5 зертхана жұмыс жасайды.Ер балаларға ар­налған оқу шеберханада станоктармен, ал қыз балаларға арналған шеберханада тігін машинасы, үтік үстелімен жабдықталған. Мектебіміз бойынша 17 спорттық үйірме бар. Жалпы, Шаған ауылдық өнер мектебі мен облыстық балалар мен жасөспірімдерге арнал­ған спорт мекте­біндегі үйірмелерге 543 оқушы қатысады.– Мұғалім қастерлі мамандық иесі екені сөзсіз. Сіз басқаратын мектеп мұғалімдерінің қандай жетістігі бар?Мектепте жалпы 162 мұғалім қызмет етеді. Педагог-зерттеуші – 21, педагог-сарапшы – 62, педагог-модератор – 53. Бүгінде ұжымда тәжірибесі толысқан мұғалімдермен қатар, жас ұстаздар білім береді. 10 пән бірлестігі құрылған. Пәндік апталықтар, семинарлар өткізу, мұғалімдердің тәжірибе алмасуы дәстүрлі түрде жүзеге асырылады. Ұжымның ауызбіршілігі, біліктілігі арқасында мектебіміз биіктерден көрініп келе жатыр. Бұл дегеніміз – білім мен тәрбиені бір арнаға тоғыстырып, оқушыларға сапалы білім беруде аянбай еңбек етіп келе жатқан ұстаздың жемісі. Мәселен, бастауыш сынып мұғалімі Роза Сейтасқарова «ҚР Білім беру ісінің құрметті қызметкері» төсбелгімен, физика пәнінің мұғалімі Ләйлә Мамрайемова ҚР Білім және ғылым министрлігінің «Құрмет грамотасымен» марапатталды. Ләйлә Мамрайе­мова­ның жетекшілік еткен оқушысы Нұр­болат Баянбайұлы ауыл балаларына арналған жалпы білім беретін пәндер бойынша олимпиадада физика пәнінен аудан­дық, облыстық кезеңдерден І орын алып, республикалық кезең қатысушысы болды. Сонымен қатар Роза Сейтасқарованың оқу­шысы Мұхаммед Қайратұлы «Алтын сақа» олим­пиадасының облыстық кезеңінен І орын алды.– Оқушылардың жеткен жетістігі және пәндік олимпиадаларға қатысу деңгейі қандай?– Оқушылардың жақсы нәтиже­сі көп. Жалпы білім беретін пәндер бойын­ша республикалық ғылыми жобалар конкурсы­ның математика бағытының облыс­тық кезеңі бойынша 10 сынып оқушысы Нұрдана Сейдалы ІІІ орын, орыс тілі мен әде­биеті бағытының облыстық кезеңінде 9 сынып оқушысы Ескендір Жақсыбек І орын алып келді. Ал, «Зерде» республикалық ғылыми жобалар конкурсының ағылшын тілі бағытының облыстық кезеңінен 7 сынып оқушысы Талшын Сәдуақасова ІІІ орынды иеленді. Сонымен қатар «Инофест – 2023» байқауында Алтыншаш Арыстанбек пен Инабат Аймағанбетова ІІ орын, «Хакатон – 2023» байқауында 6 сынып оқушысы Инабат Аймағанбетова мен 7 сынып оқушысы Ерсұлтан Жанболатұлы жүлделі ІІ орынға қол жеткізді. Биыл 66 оқушы 11 сыныпты бітіреді. Үш оқушымыз «Алтын белгіге», он екі оқушымыз «Үздік аттестатқа» үміткер. Оқушылар ақылы түрде қаңтар және наурыз айларында ҰБТ-ға қатысып, орташа балл 78 балл құрады.– Сұхбатыңызға рақмет.

Мектеп – білім айдынындағы үлкен кеме

<a href="https://kyzylorda-news.kz/">Kyzylorda-news.kz</a> Түнеукүні «Дүниежүзілік еңбекті қорғау күніне» орай Шиелі аудандық білім қызметкерлері кәсіподақ комитеті мен Шиелі аудандық Жастар ресурстық орталығының ұйымдастыруымен, шежірелі өлкенің білім саласы жастарына арналған шара өткен болатын.Тағылымы мол шара ең әуелі Шиелі аудандық мәслихат депутаттары Мұрат Өскенбайұлы, Қанат Жаңабатырұлы, Нұргүл Тәңірбергенқызы және Шиелі аудандық қоғамдық даму бөлімінің басшысы Кенжехан Шахизатұлымен «Еркін пікір» диалог алаңында кездесуден бастау алды. Кездесу барысында халық қалаулылары жастармен жүргізіліп жатқан жұмыстар жайлы баяндап, өмірлік тәжірибелерімен бөлісті.Әрмен қарай диалог алаңы «Таза Қазақстан» акциясы аясына, орталық ауласына гүлдер отырғызып, үлес қосумен жалғасын тапты. Содан соң табиғат аясында тимбилдинг өтті. Бағдарламасы түрлі ойындардан тұрған тимбилдинг тартысты, әрі қызықты өтті. Дәл осындай белсенді жас ұстаздарға арналған шаралар жалғасын таба бермек.Қоса кеткен жөн, аудандағы жастар басы тоғысатын орталық 2017 жылдан бастап жүйелі жұмыс істеп келеді. Бүгінде Шиелідегі жастар ресурстық орталығына Ержан Әбдешов басшылық етеді.Жалпы Шиелі ауданында 14-35 жас аралығында – 25 442 жасты құраса, оның ішінде кент жастары – 11 836, ауыл жастары –13 606. Жастар аудан халқының 30,2 пайызын құрап отыр.<blockquote>– Аудандық Жастар ресурстық орталығының ұйымдастыруымен биылғы 9 айдың қорытындысы бойынша әртүрлі бағытта 104 шара ұйымдастырылған. Қазіргі уақытта әртүрлі бағыттар бойынша жастарға жан-жақты кеңес беру, сонымен қоса волонтерлік жұмыстарды қалыптастырамыз. Жастардың бос уақыттарын тиімді өткізу бойынша да әртүрлі іс-шаралар тұрақты түрде ұйымдастырылып келеді. Ендігі мақсатымыз – аудан жастарын еңбекке баулып, патриотыққа тәрбиелеу. Сондай-ақ жас отбасыларға өнегелі отбасыларды дәріптеп, сыйластықты қалыптастыруға бағытталған шаралар жүргізіліп отырады, – дейді орталық директоры.</blockquote>Елдің ертеңіне айналып, жауапкершіліктің ауыр жүгін арқалаған жастар Шиелі ауданында да назардан тыс қалған емес. Әсіресе, жас кәсіпкерлерді қолдау мақсатында бірнеше шара ұйымдастырылды. Атап өтер болсақ, Шиелі ауданы бойынша тіркелген кәсіпкерлер саны – 7071 құрап отыр. Оның ішінде жас кәсіпкерлер 14 пен 35 жас аралығында – 1800.

Шиелі жастары белсенді

<a href="https://kyzylorda-news.kz/">Kyzylorda-news.kz</a> Ұлттық өнерді насихаттап, өнер жолында өзіндік орны бар Сарыбаевтар халықтық отбасылық ансамбілінің құрылғанына – 42 жыл болды. Шаған ауылында құрылған ансамбльге көркемдік жетекшілік ететін Өмірбек Сарыбаев саналы ғұмырын аудан мәдениетін дамытуға арнаған майталман маман. Мәдениет саласының ардагері атанған Өмірбек Айтбайұлы өмірінің 44 жылын өнерге арнаса, 26 жыл бойы &nbsp;Шаған ауылдық әуез мектебіне басшылық жасады. Өнер иесі отбасылық ансамбльдің белді мүшесі. Талай өнерпаздарды түлетіп қанаттырған білікті басшы.Әкесі Ұлы Отан соғысының ардагері Айтбай Сарыбаев пен анасы Алтынай Әлімбаева 8 ер баланы дүниеге әкелген. Алтын құрсақты ананың домбыра тартып, ән айтатын қасиеті болғанын бүгінде ел-жұрт жақсы біледі.Бірлігі жарасқан Айтбай Сарыбаевтың балаларының барлығы өнерге жақын болып өсті. Олардың бойына дарыған талант ананың ақ сүтімен берліген деседі. Үлкендерінен бастап түрлі ұлттық аспапта ойнауды меңгеріп, олардың басын киелі өнер біріктірді. Әрқайсысы түрлі сала маманы атанса да, қандағы қасиет өнерді ұлықтауға жетеледі. Сегіз баланың араларында кәсіби музыка маманы Өмірбек Айтбайұлы пен Кенжебек Айтбайұлы.Ансамбльдің тарихы туралы ардақты азамат Өмірбек Айтбайұлы былай деп әңгімелейді:<blockquote>– Ансамбльдің тарихы 1982 жылы басталды деп айтуға толық негіз бар. Яғни сол жылы ауданда мәдениет саласын басқарған Қайрақбай Нұрабаев Жаңақорғанда өтетін отбасылық ансамбльдің байқауы өтетінін айтып, біздің өнерлі отбасымыздан ансамбль құруымызға қолдау білдіріп, сол байқауға өзі апарды. Ансамбльге ең үлкен екі ағамыз Үмітбек пен Өтеген қатыспады. Ансамбльдің ең үлкен мүшесі, марқұм, есімі елге белгілі дәрігер болған Қожагелді ағамыз еді. 8 ұлдың 6-ы ансамбльдің құрамында болды. Қожагелді ағамыз примада, Болатбек барабанда, Алтынбек домбырада, мен өзім баянда, Әмірбек бас домбырада, Кенжебек шаңқобыз, сазсырнайда ойнады. Құрамында 17 мүшесі бар отбасылық ансамбіліміздің әншілері жұбайым Гүлнар мен Кенжебектің келіншегі Ләззат дуэтпен ән айтты. Ең алғаш байқауға шыққанымызда тұңғышымыз Әсел дүниеге келіп, қырқынан да шықпаған еді. Концертте сәтті өнер көрсетіп, бірінші орын алып келдік. Сол жылдан бастап, жыл сайын байқауларға қатысып, отбасылық ансамбльдің есеп беру концертін беретін болдық.</blockquote>Ел тарихында ақ күрішімен белгілі Шағанды енді жұрт әуелеген ән мен күмбірлеген күйін шерткен Сарыбаевтар отбасылық ансамбілінің өнерімен тани бастады. Қанда бар қасиеттің арқасында әулеттің әрбір мүшесі өнерге жақын болды. Ән мен жыр қонған әулетте барлығы дерлік ұлттық аспаптың құлағында ойнады. Жыл сайын шығармашылықтары шыңдалып, өнер байқауларынан қалыс қалмады. 1987 жылы облыста өткен байқауда топ жарып, Алматы қаласында өтетін отбасылық ансамбльдердің байқауына жолдама алды. Тыңғылықы дайындық пен бай репертуардың арқасында рес­публикалық байқаудан дара шықты. Бұл сапар жайында да керемет естелігімен бөліскен өнер иесі Өмірбек Айтбайұлы:<blockquote>– Алматыға жеткенімізде респуб­ликалық сарайға бізді арнайы іздеп Мардан Байділдаев келді. Ол кісі өнер мен білімнің ордасындай болған Алматы қаласындағы М.О.Әуезов атындағы Әдебиет және өнер институтында жарты ғасырдай еңбек еткенін білеміз. Өнер десе ішкен асын жерге қоятын ақын "жерлестерім келді" деп құрметі мен қошеметін аямады. Өнерімізге жоғары баға бергендердің қатарында халық әртісі Роза Рымбаева да болды. Қанша күн бірге жүріп, біздің жетістігімізге бірге қуанды, – деді.</blockquote>Отбасылық ансамбль облыстан шыққан ең үздік ұжым ретінде 1989 жылы Целиноград қаласында өткен байқауға қатысып, Украинаның Зеленщук қаласында өтетін бүкілодақтық байқауға жолдама алады. Байқауда ансамбльдің күміс көмей әншілері украина халқының әнін шырқап, қазақтың халық әндерін де орындайды. Қазылар алқасының, өнер сүйер қауымның қошеметіне бөленген өнерпаздар байқаудың бірінші орын жүлдегері және дипломанты атанады.Шығармашылық ұжым 1991 жылы халықтық атақ алады. Бұл атақты алу оңай емес екені белгілі. Шағанға республикалық Ұлттық-ғылыми орта­лықтың директоры Сәбит Досаев келіп, қазылар алқасының төрағасы ретінде 1 сағатқа созылған ансамбльдің концертіне баға береді. Табысты өткен концертте атақ сәтті қорғалып, осы жылы халықтық атаққа ие болады.«Өнер жолы – ұлы жол» демекші, Сарыбаевтар халықтық отбасылық ан­самб­льдің орны ауданның мәде­ниет саласында ерекше. Аға мен інінің, абысын мен келіннің, әпке мен сіңлінің сыйластығына сызат түспе­ген өнерпаздардың өне­рін аудан жұрт­шылығы да жоғары бағалайды.Төл өнерді киелі сахнаға алып шығуды қасиетті парыз деп білетін отбасылық ансамбль соңғы жылдары есеп беру концертін бере алмады. Оған себеп те жоқ емес. Бірінен соң бірі Қожабек, Болатбек, Алтынбек ағалары өмірден өтті. Қазір ансамбльде ол кісілердің өнерін ұрпақтары жалғастыруда. Болатбек ағаның ұлы Бақытжан бірнеше аспапта ойнайтын талантымен қоса әншілік қабілетімен де танылды. Бақытжан қазір Хабар арнасында қызметте. Өмірбек ағаның қызы Әсел, Жалағаш ауданында дәрігер, ансамбльдің мүшесі ретінде өнер көрсетуден ажыраған емес. Ансамбльдің ең кіші мүшесі 10 жастағы Нұрасыл Өмірбек ағаның немересі, домбыра тартады. Сонымен қатар өнерлі отбасының мүшелері Орынбек, Әбдіқадыр, Ақниет, Талғат, Қанат ансамбльдің белді мүшелері. Қазір ансамбльдің құрамында 12 өнерпаз ел мәдениетінің дамуына, өнердің асқақтауына қызмет етіп келеді.<blockquote>– Өміріміз өнердің ортасында өтіп келеді. Жыл сайын ауылда "Әніменен сезімдерді тербеткен" тақырыбымен есеп беру концертін өткіземіз. Халық алдында өнерімізді көрсетіп, қошеметке бөленеміз. Ұлттық аспаптардың құдіретімен ұлттық өнерді насихаттап жүргенімізге қуаныштымыз. Мұны Алланың берген сыйы деп білеміз. Өнер – адамды шабыттандырады, керемет көңіл күй сыйлайды. Ағаларымыз келместің кемесіне мініп кетіп, көңіліміз құлазып қалды. Дегенмен көрермендерімізбен қайта қауышатын күн алыс емес дегім келеді, – дейді мәдениет майталманы Өмірбек Сарыбаев.</blockquote>Қырық екі жылдан бері өнердің тайқазанында қайнап, халықтық музы­каның құдіретін насихаттап жүрген өнер майталманы Өмірбек Сарыбаевтың еңбегі лайықты бағаланды. 1987 жылы ҚР Білім саласының үздігі төсбелгісін алды. 2020 жылы Қазақстан Республикасының Құрметті азаматы атағымен және Сырдария ауданына 90 жыл мерекелік медалімен марапатталды. Өмірбек Сарыбаев 7-8 әннің авторы атанды. Кенжебек Сарыбаев орындайтын «Ағалар», «Әкеме» әніне әуен жазды, өлеңін шағандық фельдшер Досбол Әбуов жазғанын бірі білсе, бірі білмес. Белгілі әнші Динара Жәкешева орындап жүрген «Анама» әні де танымалдыққа ие болды. Бұл әннің авторы да Өмірбек аға екенін біз қуана жеткіземіз.Шаған ауылы мен Сырдария ауданының атын республикаға танытып жүрген өнерпаз отбасына шығармашылық табыс тілейміз.Бибісара ЖАНӘЛІ

Қазақстан және Қызылорда облысының жаңалықтары