<a href="https://kyzylorda-news.kz/">Kyzylorda-news.kz</a>&nbsp; Павлодар облысы Кемеңгер ауылында жерде ұйықтап жатқан 6 бала мен ата-анасының жай күйі тұрғындардың жағасын ұстатты. Жергілікті халық балалардың жылап жатқан дауысын естіп, айдаладан тауып алған көрінісі видеоға түсіп қалған. Бұл туралы <a href="https://stan.kz/bari-menin-balalarim-pavlodar-manindagi-ormannan-uy-zha-399863/">Stan.kz </a>ақпарат агенттігі хабарлайды.Кадрда әйелдің отбасы Павлодарда үй жалдап тұрғанын, үй иесі оны сатып жібергенін және олар Красноармейка, қазіргі Кемеңгер ауылына келгенін айтқан.Отбасын тапқан тұрғын олардың ауылдан бірнеше шақырым жерде тұрғылықтағын байқаған. Ал орман ішіне қалай жеткендерін сұрағанда, әйел балалармен серуендеуге шыққан көрінеді."Шынымды айтайын, бәрі менің балаларым. Біз олармен әлі серуендеуіміз керек. Біз қазір тұрып, ары қарай жүреміз", –&nbsp;деп түсіндірді әйел.&nbsp;Сөз арасында анасы балаларының біреуінің аутизммен ауыратынын айтып қалды."Бізді ешкім естімесін деп әдейі кетіп жатырмыз", –&nbsp;деп түсіндірді әкесі.Бейнежазбаны түсірген ер адам балалардың бірінің бетіне неліктен қан кеткенін сұрағанда әйел абдырап, анық емес жауап бере алмады."Біз серуендеп жүрдік, сосын балалар ұйықтап қалды. Күн ысып кеткендіктен бетін күйдіріп алды. Біз енді жолға шығып, Красноармейкаға ораламыз. &nbsp;Балам бутерброд жегісі келгендіктен аялдауды жөн көрдік", –&nbsp;деді әйел.Белгілі болғандай, балалардың ең кішісі 1 жаста, үлкені 8 жаста. Анасы мен балалары ауруханаға жеткізілді. Кемеңгер кентінің әкімдігінің мәліметінше, жергілікті тұрғындар орман ішінен көпбалалы отбасын тапты. Павлодар облыстық полиция департаментінің баспасөз қызметі ақпаратты растады."2016-2023 жылдары туылған алты баланы тәрбиелеп отырған шетелдік азаматтардың отбасы анықталды. Балалар мемлекеттік органдарда тіркелмеген: олардың туу туралы куәлігі жоқ, денсаулық сақтау және білім беру мекемелеріне бекітілмеген",&nbsp;–&nbsp;деді Павлодар облысы ішкі істер департаменті көші-қон қызметінің басшысы Дәулет Ысқақов.Полицейдің айтуынша, балалар мен олардың анасы Павлодар облысы балалар ауруханасына жатқызылған."Қазір біз балаларға туу туралы куәлік пен ЖСН алуға, сондай-ақ елімізде уақытша тұруға рұқсат алуға көмектесеміз", –&nbsp;деді Ысқақов.Денсаулық сақтау басқармасының мәліметінше, балалардың жағдайы тұрақты, олар тамақтанбаған, бірақ дәрігерлердің бақылауын қажет етеді. Полицейлердің балалардың ата-анасы көрші елдердің азаматтары екенін атап өтті. Енді олардың бала-шағасымен Қазақстанға қашан келгені, қанша уақыттан бері келгені анықталып жатыр.&nbsp;Фото видеокадрдан алынған

"Бәрі менің балаларым": Павлодар маңындағы орманнан үй-жайы жоқ алты балалы отбасы табылды

<a href="https://kyzylorda-news.kz/">Kyzylorda-news.kz</a>&nbsp; Мемлекет басшысы Қасым-Жомарт Тоқаевтың Отан қорғаушы күнімен құттықтады.Қадрлі отандастар!Сіздерді Отан қорғаушы күнімен құттықтаймын!Еліміздегі бейбітшілік пен тыныштықты сақтап, қастерлі құндылықтарды орнықтыра түсу үшін бұл мерекенің маңызы зор.Әскери борышты өтеу Отанға деген шынайы сүйіспеншіліктің жарқын көрінісі екені анық. Халыққа қалтқысыз қызмет ету – әрбір адал азаматтың перзенттік парызы.Қазақстан ұлттық мүддені қорғауға, аумақтық тұтастықты сақтауға және тұрақтылықты қамтамасыз етуге баса мән береді. Айбынды армиямыз егемендігіміздің кепілі, мемлекеттілігіміздің мызғымас тірегі саналады.Біз әскеріміздің әлеуетін оқу-жаттығу жиындарында ғана емес, нақты міндеттерді жүзеге асыру барысында да көріп жүрміз. Алапат тасқын ел-жұртқа қауіп төндіргенде, сарбаздарымыз алдыңғы шептен табылды. Олар өздеріне жүктелген міндетті мінсіз атқарып, отаншылдықтың озық үлгісін көрсетті.Еліміздің қорғаныс қабілетін күшейту және әскери қызметкерлерді қолдау қашанда мемлекеттік саясаттың басым бағыты болып қала береді.Қарулы Күштеріміздің мерейі үстем болсын!Баршаңызға зор денсаулық, бақ-береке тілеймін!Фото: Ақорда

Мемлекет басшысы Қасым-Жомарт Тоқаевтың Отан қорғаушы күнімен құттықтауы

<a href="https://kyzylorda-news.kz/">Kyzylorda-news.kz</a>&nbsp; Облыс әкімі Отан қорғаушылар күнімен құттықтады.Құрметті жерлестер!Баршаңызды 7 мамыр – Отан қорғаушылар күнімен шын жүректен құттықтаймын.Қастерлі отанымызға қалтқысыз қызмет ету және оны қорғау – әрбір азаматтың қасиетті борышы. Біз бұл күні Қарулы Күштеріміздің ардагерлеріне, еліміздің егемендігі мен ұлттық мүддесін қорғап тұрған, антына адал әскери қызметшілерге құрмет көрсетеміз.Мемлекет басшысы Қасым-Жомарт Кемелұлы Тоқаев «Мемлекет туған жері үшін аянбай еңбек етіп, әскери қызметке бүкіл ғұмырын арнаған отансүйгіш перзенттерін жан-жақты қолдауға айрықша мән береді. Біздің міндетіміз – жаңа геосаяси ахуалға сай еліміздің қорғаныс қабілетін одан әрі нығайта түсу» деген болатын.Бүгінде Жоғарғы Бас қолбасшының тікелей бастамасымен Қарулы Күштеріміз айбынды армияға айналды. Отан қорғаушылар күнінде бейбіт елдің тыныштығын әуеде, құрлықта, теңізде қорғайтын әскери қызметшілерге риясыз алғысымды білдіремін. Әскери борышты өтеу азаматтың бірінші кезектегі парызы екенін түсінетін жас буын өсіп-жетіліп келеді. Оларға арманы асқақ, рухы өр ерлердің жолын берсін!Еліміздің мәртебесі биік, көк байрағымыз көгімізде желбірей берсін! Қазақстанның жұлдызы жоғары, жолы нұрлы болсын! Елдің іргесі берік, бірлігі мығым болсын!

Облыс әкімі Отан қорғаушылар күнімен құттықтады 

<a href="https://kyzylorda-news.kz/">Kyzylorda-news.kz</a>&nbsp; Облыс әкiмiнiң қолдауымен, Қазақстан Республикасының Стамбул қаласындағы бас консулы Аманқұл Нуриддиннiң үйлестіруімен осы жылдың 15-27 сәуірі аралығында сырбойылық 10 реаниматолог, 5 кардиолог дәрігер "Memorial Sisli hastanesi" клиникасында 2 апталық тағылымдамадан өтті. Бұл туралы Қызылорда облысы әкімінің баспасөз қызметі хабарлады.&nbsp;Аталған клиника пациенттерге көрсететін медициналық қызметінің ауқымы және сапасы жөнінен Стамбулдағы ең озық мекемелердің бірі деп есептеледі. Деректерге қарағанда, әлемнің 90-нан астам елінің азаматтары осы клиникада емделеді екен. Қызылордалық дәрігерлер бiлiктiлiк арттыру курсын аяқтап, сертификат алды. Мамандар жинаған тәжірибесін тұрғындарға медициналық қызмет көрсету барысында қолданбақ.Айта кетейік, өңірде денсаулық сақтау саласының инфрақұрылымын нығайтуда, маман тапшылығы мәселесін шешуде ауқымды жұмыстар атқарылуда. Алыс-жақын шетелдерде біліктілігін арттырған дәрігерлер инновациялық емдеу тәсілдерін облыс медицинасына енгізуде. Алдағы уақытта жетекші клиника дәрігерлерінің шеберлік кластарын ұйымдастыру арқылы да мамандар шеберлігін шыңдау жоспарда бар.Фото: Қызылорда облысы әкімінің баспасөз қызметі

Қызылордалық дәрігерлер Түркияда тағылымдамадан өтті

<a href="https://kyzylorda-news.kz/">Kyzylorda-news.kz</a> Шекара күзету – елдің тұтастығын, халықтың амандығын, ел болашағының жарқын болуының кепілі. Шекарашы сарбаздар күні-түні көз ілместен ел тыныштығын күзетіп, үлкен жауапкершілікті арқалайды. Жаңбырлы, боранды күндері де елдің айбынды азаматтары уақытпен санаспай қызмет етеді.Дәл қазір шиелілік Диас Бауыржан Ақтау қаласында Қазақстан Республикасы Әскери-теңіз күштері қатарында қызмет етеді. "Бұл жаққа келмес бұрын өзімді мықтап дайындадым. Дене даярлығымды шыңдап, өз ісіме жауап беруді үйрендім. Мен «Ант» деген сөзді шын жүректен ұғынып, әскери міндетімді бар жан-тәніммен орындаймын" дейді Диас.&nbsp;Оның теңізге шығуды асығып күтетіні бар. Себебі теңіздің өзі бір құдірет, бірақ ол түйсіксіз жаратылыс. Тебіреніп торықпайды. Оған тек тамсанып қарайды. Ал кейіпкерімізге осындай құбылыстар ерекше ұнайды екен.Әскери сала – ең маңызды салалардың бірі. Әскерилер дегенде алдыңызға кімдер елестейді? Сөзсіз, арнайы киім киген, қатаң тәртіпті ұстанатын жандар елестейтіні анық. Ал соның ішінде көпшілік біле бермейтін қиын да қызықты ҚР Қарулы Күштерінің ішіндегі әскери-теңіз күштерінің қызметі айрықша.&nbsp;<blockquote>– Бастапқыда жас матростың бастапқы мектебінен сәтті өттім. Бұл салаға келуіме ата-анам себепші болды. Әкем мен анам ағам екеуімізді Отансүйгіштікке тәрбиелеп өсірген. Бауырымда Қазақстанның Қарулы Күштерінде жұмыс істейді. Әкеммен әңгіме өрбіткен кезімде ол үнемі маған: «Сен жігітсің. Ұлтыңның мықты қорғанысың. Сондықтан Отанды қорғау – сенің азаматтық борышың. Әрбір жас ел алдындағы міндетін өтеп, Отанына адал қызмет етуі керек»&nbsp;деп айтады. Әрине, бұл сөз менің әрбір ісіме рухани күш береді, – дейді шекарашы Диас.</blockquote>Сіздерге қызықты дерек болсын. Әскери-теңіз күштерінің негізгі мақсаттарыммен таныстырайық. Әуелі, Каспий теңізінің қазақстандық секторында Қазақстан Республикасының мемлекеттік шекарасын, аумақтық тұтастығын, егемендігі мен экономикалық мүдделерін қорғаса, Агрессордың шапқыншылығына лайықты тойтарыс беру, қарулы қақтығыстарды оқшаулау және алдын алуға атсалысады. Сондай-ақ порттық аймақты, мұнай табу нысандары орналастырылған жасанды аралдар және платформаларды қоса алғанда сулы аудандарды қорғау және күзетумен айналысады. Суасты-диверсияға қарсы қорғаныс жүргізіп, құрлықтағы әскерлердің қимылын теңізден қамтамасыз етіп, теңіз десантын түсіруге жағдай жасап, әскерлер мен материалдық құралдарды тасымалдап, теңіз миналарын орналастырады.Иә, бұл салада біз күн-түн демей қызмет атқаратын жігіттерге алғаусыз алғыс айтуға болады.&nbsp;<blockquote>– Жақында кеменің К-2 дара жүзу тапсырмасын орындау барысында қойылған тапсырмаларды орындадық. «Жайық» гидрографиялық кемесінің электромеханикалық жауынгерлік бөлімінің команда технигі ретінде игі шаралардың куәсі болып жүрмін. Сонымен әскери-теңіз күштерінде қызмет ету мен үшін – үлкен жауапкершілік. Бала күнімнен арманым осы болатын. Міне, бүгін сол арманыма қол жеткіздім, – дейді Диас.</blockquote>

Шиелілік шекарашы сарбаз

<a href="https://kyzylorda-news.kz/">Kyzylorda-news.kz</a> Өскелең ұрпақ санасына қоршаған ортаға деген жанашырлықты дарыту қай заманда да, кезек күттірмейтін мәселе екені белгілі. Экологиялық білім беру және табиғатты қорғау бағытында теориялық, практикалық, зерттеушілік дағдылары бар экологиялық сауатты тұлғаны қалыптастыру мақсатында жақында «Өрімтал» бөбекжай балабақшасында «Жасыл әлем – балабақша» атты аудандық семинардың ашылуы өтті.Оған Қазалы аудандық білім бөлімінің басшысы Әділхан Жөлекешов, білім бөлімінің қызметкерлері мен балабақша меңгерушілері қатысты. Қазалының бас ұстазы семинардың ашылу салтанатында қоршаған ортаны қорғау түсінігін ерте жастан қалыптастырудың артықшылықтарын тоқталып өтті. Оның айтуынша, жоба аясында көрсетілген жұмыстар өмірде жиі қолданылып, өзектілігін жетілдіре түссек, бөбектердің танымдық-зияткерлік, коммуникативтік, шығармашылық әлеуметтік дағдылары қалыптасып, командамен жұмыс істеу, креативтілік, зерттеушілік қабілеттері дамиды.Семинар барысында «Толағай» ұлттық-спорттық үйірмесі, «Туған өлке табиғаты» аясында Өлкетану стендісі, «Теңіз әлемінің құпиясы», «Мамандықтар қалашағы» ойын алаңы, «Декоративті гүлдер бағы», «Ісмер» қалдық заттар мұражайының жұмысы таныстырылды.Бұдан бөлек, жиында «Ғарыш әлемі» ойын бөлмесінің лентасы қиылып, «Эколаб» зертханасынан шыққан жасыл өнімдер, «Шаңырақ» ұлттық-эстетикалық клубының тіршілігі көпшілікке көрсетілді. Келушілер әзірленген дүниелерді тамашалап, сапалы жұмысқа таңданыстарын білдіріп, оң баға берді.

Жасыл әлем – «Өрімтал» балабақшасында

<a href="https://kyzylorda-news.kz/">Kyzylorda-news.kz</a> Еліміздегі агроөнеркәсіп кешенінің маңызды бір саласы – балық шаруашылығы. Балық етінің адамзат баласына пайдасы көл-көсір екенін медицина мамандары да үздіксіз айтуда. Бір адам норма бойынша жылына 14 келі балық етін тұтынуы қажет екен. Өйткені балықтың құрамында 20 түрлі амин қышқылы бар. Оның сегізі адам өмірі үшін өте қажетті зат болып табылады.Балықтың бір жағынан байлық екенін жеке кәсіпкерлерден-ақ аңғарып жүрміз. Қарапайым саудагерлердің өзі бір-екі келі балық сатып, қалтасын бір-ақ күнде қампайтып алады. Себебі кез келген жерде балыққа деген сұраныс жоғары. Содан болса керек, балық бағасы аспандап тұрса да, ойланбастан алатындар бар. Алайда ауланған олжаны өңдейтін кәсіпорындардың жоқтығы, заңсыз балық аулаушылардың азаймай отырғаны тағы басқа себептер салдарынан экспорт түгілі өзіміздің нарық та балықпен толық қамтамасыз етілмей тұр.&nbsp;Жалпы қазақ елінің қандай шаруаны болсын дөңгелетіп алып кететіні жасырын емес. Егін шаруашылығы дейсіз бе, мал шаруашылығы дейсіз бе, дала қосында жүріп, күн-түн демей тер төккен жандар жетерлік. Әсіресе, өткен ғасырда мұндай жұмыстардың едәуір жақсы болғанын байқаймыз. Тіпті балық шаруашылығы да өткен ғасырдың тоқсаныншы жылдарына дейінгі кезеңде қарқынды дамыған. Мәселен, 1991 жылы елімізде балық аулау мен балық өнімдері өндірісінің жалпы көлемі 80 мың тоннадан асқан. Оның ішінде тоғандық балық аулау 10 мың тоннаға жуықтаған. Барлық облыста балық зауыттары мен балық комбинаттары, басқа да кәсіпорындар тиімді жұмыс істегені де кейбір деректерде айтылады. Оның үстіне Кеңес одағындағы республикалардың үшеуінде ғана Балық шаруашылығы министрлігі болса, соның бірі біздің елімізде еді. Өкінішке қарай, еліміз нарықтық жүйеге бет түзеген кезеңде балық шаруашылығы құлдырауға ұшырады. Мемлекет бұл саланы дамытуға бағытталған іс-шараларды тек 2000 жылдардың бас кезінен бастап қолға алды. Жоғарыда айтқанымыздай, балық тұтынудың жылдық нормасы бір адамға шаққанда 14 келі болса, 2000 жылдары бұл көрсеткіш 4 келіге дейін түсіп кеткен. Бұл қазақстандықтардың балық етіне деген сұранысының төмендегенін білдіре ме? Әрине, жоқ. Күллі әлем теңіз өнімдеріне оның ішінде балық етіне аса қызығушылық танытып отырғанда, «Өзен жағалағанның өзегі талмас» деп тәмсілдеген қазақтың балықтан бас тартуы ақылға қонымсыз. Демек көрсеткіштің көңіл көншітпейтіндігі балық шаруашылығының ішкі қажеттіліктің өзін өтеуге қауқарсыз екенін білдіреді.Мамандардың айтуынша, су астындағы байлықты сақтап қалудың бірден бір жолы – шабақтарды құтқару. Жалпы Шиелі ауданында тауарлы балық өндіруге қолайлы иесі бар 30 көл, иесіз – 9, нақтырақ айтсақ 39 көл бар. Ауыл шаруашылық бөлімінің берген мәліметіне сүйенсек, бүгінгі таңда Керделі ауылдық округіне қарасты «Сүйіндік» шаруа қожалығы «Вейс», «Амур» инкубатор аппаратымен балық шабақтарын көбейту үстінде. Сонымен қатар балық өсіру кәсібімен айналысатын Бақытжан Анафияев үй ауласынан жасанды шағын көл жасап балық өсіруде. Жасанды шағын көлде қазіргі таңда 10-нан аса балық түрлері кездеседі. Атап айтсақ, Амур, Бекре, Сазан, Толстолоб, Карась, Карп, Судак және т.б. түрлері бар. Шиелі ауданында үй жағдайында Африкалық лақа балығын өсіріп жатқан ЖК «Жаннұр» басшысы Мұрат Халиев те балық шаруашылығын дамыту үшін 2500 мың (шт) балық шабақтарын өсіруді қолға алған. Бұл әрине аудандағы балық шаруашылығының ілгеруіне септігін тигізері сөзсіз. Әрі су маржанын кәсіп көзіне айналдырам деушілерге мемлекет тарапынан көрсетілетін қолдау да жоқ емес. Бастысы кәсіпкерлер мемлекеттің қолдауымен дөңгелетіп отырған ісін ақпараттандыру арқылы халыққа көрсете білсе құба-құп емес пе? Сонда қандай кәсіп бастарын білмей жүрген азаматтар да ауданның әлеуетін арттыру жолында тиімді бизнес жоспар құрар ма еді...&nbsp;Шежірелі өлкедегі ахуалды ауыл шаруашылық бөлімінің басшысы Мұрат Әшірбековтен сұраған болатынбыз.&nbsp;<blockquote>– 2020 жылдың 30 қазанында Қызылорда облысы әкімдігінің №127 қаулысымен «Балық шаруашылығын дамытудың 2021-2030 жылдарға арналған өңірлік бағдарламасы» бекітілген болатын. Өңірлік бағдарламасының іс-шаралар жоспарына сәйкес Шиелі ауданы бойынша 17 көл тауарлы балық шаруашлығына толығымен өтті. Сонымен қатар ісшара жоспарының 32-тармағын орындау мақсатында аудандық тұрғын үй коммуналдық шаруашылығы, жолаушылар көлігі және автомобиль жолдары бөлімімен тиісті жұмыстар атқарылуда. Атап айтсақ, «Қырыққұмалақ», «Ошақты», «Қараой», «Қарақуыс», «Қарақұм», «Домалақ», «Сасықкөл», «Таушұқырой», «Ахметкөл», «Әсеткөл», «Тарша», «Тауық», «Сарыкөл», «Сарыкөл 2», «Жамайка», «Үлкен Барша» көлдеріне электр көздерін қай жерлерден алу мәселелері және электр желісінің бағаналарының ара қашықтары есептеліп, бюджеттік өтінім берілетін болады, – дейді ол.&nbsp;</blockquote>Егін мен мал шаруашылығында есе жібермеген шиеліліктер осыдан бірнеше жыл бұрын «Шиеліде балық зауыты іске қосылады» деп бөркін аспанға лақтыра қуанған еді. Бірақ тәжтажал індеті өршіп, бірталай жоспар желге ұшқандай ізімқайым жоқ болды. Ендігі жерде сол олқылықтардың орын толтыру үшін тынбай жұмыс істеу керек секілді...

Шиеліде тауарлы балық өндіруге қолайлы 39 көл бар

Ұстаз – ұлық емес, ұлы қызмет. Қазіргі таңда Сырдария ауданына қарасты Шаған ауылындағы №37 мектеп-лицейдің мұғалімдерінің баптап қосқан әрбір жүйрігі іргелі алтын ұяның абыройын асқақтатып, білім мен ғылым бәйгесінде олжамен оралуда. Бүгінде білімнің биік шыңдарын бағындырып келе жатқан орыс тілі мен әдебиеті пәні мұғалімі Татьяна Казка мен озат оқушы Ескендір Жақсыбек биік белесті бағындыруда.«Ұстазы жақсының – ұстамы жақсы» де¬мекші, оқушының мықты болуы – мұғалімнің айтқан сөзінде ғана емес, көрсеткен үлгісінде.Негізінен, тәжірибелі ұстаздың шәкірттерімен бірге осыған дейін қол жеткізген жетістігі жетерлік. Мәселен, ұлағатты ұстаз жақында өткізілген білім бәсекесінде даралана білді.– Оқушының білім мен белсенділігін бір арнаға тоғыстырып, ұшар шыңға жетелеу қиын әрі қызықты жұмыс. Жауапкершілігі жоғары осынау жұмыстың нәтижесі бір жылда емес, қаншама уақыт ішінде белгілі болады. Сондай шәкірттерімнің бірі – Ескендір Жақсыбек. Өзінің оқуға, білімге құштарлығы, ізденісі арқылы көптеген олимпиадалардан жүлделі орындар алуда. Ескендір жалпы білім беретін пәндер бойынша республикалық ғылыми жобада орыс тілі пәнінен аудандық, облыстық кезеңнен І орын алып, республикаға жолдама алған болатын. «Молодежный сленг» атты орыс тілінде сөздік шығарып республика бойынша арнайы сертификатқа ие болды. Сонымен қатар пәндік және ауылдық олимпиаданың облыстық кезеңінде ІІ орын алды, – дейді Татьяна Казка.Расында, орасан жетістік ұстаздың бала қабілетін байқап, одан әрі жетілдірген еңселі еңбегінің арқасында жүзеге асуда.– Саналы ғұмырын ұстаздық қызметке арнап келе жатқан Татьяна Казка оқушының бойындағы ерекшеліктерді ескере отырып, олардың қызығушылықтарын оятып, өз бетінше жұмыс жасай білуге, дағдыланған маман. Қазіргі заман талабына сай жаңа технологиялық әдістерді енгізу және жетілдіру мақсатын өз тәжірибесінде жүзеге асырып келеді. Шәкірттері мектепшілік, аудандық, облыстық сайыста, олимпиадада жақсы нәтиже көрсетіп, табысқа жетуде. Мектептегі қоғамдық жұмысқа белсене араласатын мұғалімнің ұйымдастырушылық қабілеті жоғары. Ұстаздық қызметті бәрінен жоғары қоятын ардақты жанның білім беру саласындағы еңбегі елеусіз қалған емес. Марапаттарының ішінде Орта Азия мемлекеттерінің ғылыми-педагогикалық қауымдастығынан арнайы диплом, аудандық білім бөлімі мен кәсіподақ комитетінен «Құрмет грамотасы», облыстық білім бас¬қармасының басшысының «Құрмет гра¬мотасымен» марапатталған. Өзінің ақжарқын мінезімен дараланатын аяулы ұстаз әріпстестері мен шәкірттерінің арасында зор беделге ие, – дейді мектеп-лицей директоры Қалихан Омаров.Кез келген ұстаз үшін әрбір оқушының орны бөлек. Баланың өмірден өз жолын тапқанын, болашаққа нық сеніммен қадам басқанын қалайтын ардақты ұстаз шәкіртімен білім сынақтарында топ жара бермек.

Ұстаздан шәкірт озар

<a href="https://kyzylorda-news.kz/">Kyzylorda-news.kz</a>&nbsp; Жақында Қазалы аудандық мәдениет және тілдерді дамыту бөлімінің қолдауымен Ү.Түктібаев ауылдық клубының ұйымдастыруымен Соғыс және Еңбек ардагері Халық ақыны Әбдіразақ Қаналиевті еске алуға арналған облыстық студенттермен оқушылар арасында айтыс өтті.Айтысты ұйымдастыруға ұйытқы болған халық ақынының ұрпақтары демеушілік жасады. Ауылдық клуб фойесінде ұйымдастырылған халық ақыны Әбдіразақ Қаналиевке арналған "Өлең-жырдың жүйрігі" атты кітап көрмесі көрермендерге таныстырылды.Шара басы майдангердің соғыс жылдарында елге жазған өлеңдері мен өріліп, қойылым көрсетіліп, майдангердің көзін көрген ел ағаларымен ағайын-туыстарының халық ақынына деген естеліктері айтылып, Қазалы аудандық мәдениет және тілдерді дамыту бөлімінің басшысы Болат Жолтаев Қазалы ауданының әкімі Мейрамбек Шермағанбеттің құттықтау хатын Қаналиевтер отбасына табыстады.Айтысты тізгіндеген ақын Ермекбай Ағырай, майдангер ақынның еңбек жолына тоқталып, шараның мазмұнын ашар жас айтыскерлерді таныстырды. Ақындар Т.Дүңкиев, Ғалия Орынбасарова және Қ.Мұқашов әділқазы құрамында болды.Облыстық айтысқа 12 талапкер қатысып бақтарын сынады. Алғашқы болып сахна төрінде Жаңақорғандық М.Абдуллаевпен жерлес жас ақын А.Жақсыкелді айтыс шымылдырырығын шырайлы өлеңдерімен ашса, Қызылордалық Б.Әбілдаевпен Майдакөлдік Б.Серіковтің ағамен іні арасындағы ұтқыр әзілдері көпшілікті тәнті етті. Жалағаштық М.Қартбаймен Қызылордалық С.Жаппасбай нағыз қызбен жігіттің айтысын көрсетіп, көпшіліктің көзайымына айналды. Сырдариямен Қармақшы ауданынан шыққан Н.Мансұровпен Б.Смайылұлының айтысы көрерменнің көңілін толымды етіп қошеметке бөленді. Шиелілік Е.Кенжеш, қарсыласы майдакөлдік Ө.Есебаймен айтысып, түрлі мақамдардың иірімін көрсете білді. Айтыстың соңғы жұптары аралдық жас ақын Ж.Серіков, Сырдариялық Б.Айтбаевпен жұптасып, қарсыластың сұрағына жауапты сәттерін көрсете білді.Алты жұп сахна көркін қыздырып, екінші кезеңде Құлмамбетше жырлап, оза шапқандар жүлде төрінен орын алды.Бас жүлде Майдакөл ауылы Б.Серіковке бұйырса, бірінші орын Қызылорда қаласы С.Жаппасбайдың қанжығасына байланды. Екінші орын Жалағаш ауданы М.Қартбайдың еншісінде кетті. Ал, А.Жақсыкелді, Е.Кенжеш және Н.Мансұровтар үштікке табан тіреді. Қалған жас талапкерлерге ынталандыру үлестерілді.

Қазалыда облыстық жастар айтысы өтті

<a href="https://kyzylorda-news.kz/">Kyzylorda-news.kz</a> «Әлің барда еңбек ет, еңкейгенде емерсің» деген. Бірді екі етіп, қолда бар құрал-жабдығымен күн көріп отырған кәсіп иелерін көргенде, ішің жылиды. Жасыратыны жоқ, қазіргідей заманда етікшілік кәсібіне менсінбеушілік көзқарас танытатынымыз рас. Екі қолға бір күрек таба алмай отырып, етікші болудан арланатындар бар. Бүгінгі кейіпкеріміз көпшілік қырын қарайтын кәсіп түрі болса да, күнделікті нәпақасын біз бен тебеннің арқасында айырып отыр.Қазір біздің қоғам шабамын деген адамға ат берген, жанамын дегеннің жүрегіне от берген дәуір. Яғни, екі қолға бір күрек тауып, іспен айналысуға мүмкіндік мол. Ал етікші болу – еріккеннің емес, тіпті, екінің бірінің қолынан келе бермейтін кәсіп түрі. Ата-бабаларымыз «Ерінбеген етікші болады» деген тәмсілді бекер айтпаса керек. Бүгін үйден керемет көңіл-күймен жұмысқа бет алдым. Бірінші бағытым орталық базар болатын. Әлеуметтік желіге қарасам бүгін етікшілер күні екен. Базар іші ығы-жығы адам. Бәрі жеке басының қамын күйіттеп жүргендер. Қызу тіршілік арасынан етікшіге көзім түсті. Күнделікті ісіне кіріскен еңбек адамымен жақын барып таныстық. Кейіпкеріміз өзін "Жолы болғыш адаммын" дейді. Таң мен таласа тұрып, балға мен бізді жолдас еткен етікшінің есім-сойы – Нұрлыбек Бейсекеев. Шиелі ауданының тұрғыны Нұрлыбек осы кәсіпті игеріп, отбасын азын аулақ нәпақасымен асырап, күнкөрістің қамын жасап, отбасының жоғын бүтіндеп жатқанына биыл 22-ші жыл екен. Кейіпкеріміз басында қиын болғанын, кейіннен қолы жаттығып, қызығушылығы оянғанын айтты. Ол тұтынушылардың көңілін жықпай етіктерін ойындағыдай етіп, сәнін де, сапасын да келтіріп, тігіп беремін дейді. Соңғы бірнеше жылда Нұрлыбектің тұрақты тұтынушылары көбейіп, тапсырысы арта бастаған. «Еңкейіп жұмыс жасасаң, шалқайып демаласың» дейді ол. Осылайша кәсібін бастаған азаматтың тірлігі алға басып, осы күні танымал кәсіп иесіне айналып келеді.&nbsp;<blockquote>– Қытайдың бір рет киіп, екінші рет тігуге жарамсыз болып қалатын аяқ киімдерін маған көп алып келеді. Шырайын шығарып тігіп, жамап, жапсырып беремін. Тапсырысты уақытында бітіріп беруге тырысамын. Аспандағы бағаны да қоймаймын. Халықтың қалтасына тиімді, қолжетімді бағада қызмет көрсетеміз. Қазіргі кезеңде өзімнің ескі тігін машинаммен жұмыс істеудемін. Көн, шеге, желім сынды қажетті заттарды өзге қаладан, арнайы дүкендерден өзім сатып алып келемін. «Шебер шебер емес, құрал шебер» дегендей, жабдықтарымды жаңартқым келеді. Әттең, бағасы қымбаттау болып тұрғаны. Ондай мүмкіндікке ие болсам, мәсі де тіге берер едім. Шеберхананы кеңейтіп, бөлмелерін көбейтсем деген алда мақсатым да бар, – дейді шебер.&nbsp;</blockquote>Қазіргі таңда Қытай тауарлары базарда қаптап тұрғанына көңіл налиды. Көздің жауын алатын сатылымда тұрған етіктердің ішінде өте жақсы дегендерінің өзі бір жылға жетпей табаны бөлініп немесе тігісінен кетіп жатады. Алмайын десеңіз қалтаға қонымды бағаны айтады. Әзірге киіміміздің бүтіндігі мен аяғымыздың жылулығын шығыстағы көршімізге сеніп тапсыра тұруға тура келеді. Әлемде 10 млрд жұп аяқ киім өндіріледі деп есептесек, соның 6 млрд-ы Қытайдан шығады екен. Қытайдан шыққан кейбір аяқ киімдердің құрамы денсаулыққа өте зиянды, бір жағынан аяққа қонымды келмейді. Бірақ сұранысқа ие болып тұрады. Көбінесе аяқ киімдер әдемі көріну үшін тігушілер терінің астына паралон салады екен. Сол себепті материал ауа өткізбейтін болғандықтан, буын ауруын тудырады. Қазақстанға аяқ киім шығаратын тауарлардың 75 проценті Қытайдан тасымалданады. Қазіргі таңда елімізде былғары өңдеу саласында 32 кәсіпорын жұмыс істесе, солардың 5-еуі аяқ киім өндіреді. Біздің елімізде жүн өндіру өндірісі де кенже қалғаны жасырын емес. Мысалыға, қой жүнін керек қылмай қоқысқа тастап немесе өртеп жіберетін болдық. Себеп не? Өйткені қабылдайтын арнайы орындар жоқ. Елден жүн өңдейтін кәсіпорын ашылса, шашылып жатқан жүндер кәдеге жарар еді. Отандық мамандар жүннің таза табиғи өнім екенін оны жылу үшін ғана емес, емдік мақсатқа да пайдалануға болатынын айтып дабыл қағуда. Жүннің талшықтары массаждық эффект береді. Оны жалаңаш аяққа кисе, қан айналымын жақсартатын қасиеті бар. Өзіміздің елде жүн қосып табиғи таза былғары мен теріден аяқ киімдер жасап шығарылса, сапалы әрі денсаулыққа пайдалы болар еді.&nbsp;

Шиелі: Ескірмейтін кәсіпті нәсіп еткен

<a href="https://kyzylorda-news.kz/">Kyzylorda-news.kz</a> "Адамзаттың табиғатсыз күні жоқ, мұны айтуға табиғаттың тілі жоқ" деген мектеп оқулықтарында жиі кездесетін бұл тіркестің күн жылынып, жер жібігенде көбірек ойға оралатыны белгілі.&nbsp;Оның үстіне қазіргі таңда керемет нәтижеге жетелеп отырған «Жасыл мектеп» жобасы құтхана мектептегі экологиялық тіршіліктің күре тамырына қан жүгірткендей. Жуырда Жанқожа батыр атындағы №70 орта мектепте осыған байланысты «Экология және біз» атты аудандық семинар өтті.Ұлттық құндылықтар арқылы балаларға экологиялық мәдениетті дәріптеуді көздейтін жиынға Қазалы аудандық білім бөлімінің басшысы Әділхан Жөлекешов, мектеп басшылары мен ұстаздар қатысты. Олар ең алдымен, «Жасыл мемлекет жасыл мектептен басталады» деген кіріспе тақырыппен аулада атқарылған жұмыстармен танысты. Бұл сәтте мектеп жанынан құрылған «Бастау» домбырашылар оркестрі күй күмбірі арқылы меймандарға айрықша әсер сыйлап отырды. Оқушылар мен ұстаздардың қиял биігінде пайда болған қолөнер туындыларымен көпшілік танысып болған соң, қазақтың киелі шаңырағы астындағы басқосуға асықты.Онда оқушылар «Күріштің ғажайып сырларын» көпке мәлім етіп, «BIOSABIN-70» сабынын жасау жолдарын түсіндірді. Бұдан бөлек, ата-аналарды педагогикалық қолдау орталығының қарекеті көрсетіліп, «Экология әлеміндегі психология құпиялары» терапиялық жаттығулар, «Арал тағдыры» театрлық қойылымы көрермен назарына ұсынылды.

«Экология және біз» атты аудандық семинар өтті

<a href="https://kyzylorda-news.kz/">Kyzylorda-news.kz</a> Екінші дүниежүзілік соғыс халқымыз үшін ең қасіретті кезең болып тарихта қалды. Қазақстаннан майданға аттанған 1,3 миллион ұл-қыздың тең жартысы қайтып келмеді. Сұм соғыс қайғы жұттырмаған бірде-бір отбасы болмады. Көздің жасы, жүректің қанымен келген жеңіске бүгін міне 79 жыл толып отыр. Жылдар жылжып, сол сұрапыл кезеңнен алыстаған сайын, бейбіт күн сыйлаған батыр бабаларымызға деген құрметіміздің еселене түсері анық. Зымыраған уақытпен бірге аңызға айналып бара жатқан соғыстың ақиқатын айтатын ардагерлеріміздің бүгін көзі болса да өздері жоқ. Қан майданға қатысып, бар ауыртпалығын жанымен сезініп, мойнымен көтерген Абдіхалық Жанысбаев ел азаматы.Ол 1916 жылы Төменарық ауылдық кеңесінде дүниеге келген. Мектепте төрт жылдық білім алады. Екпінді колхозында бала кезінен арба айдап, шөп жинау мен астық тасуға жәрдем етіп, еңбекке ерте араласады. Сунақата каналын қолмен қазып, 1941 жылы Ұлы отан соғысына «Жаман бала» ауылынан аттанған. 1942 жылы 22 желтоқсанда Сталинградты қорғағаны үшін арнайы медалімен марапатталған. 1944 жылы наурыз айында «Қызыл жұлдыз» орденімен және «Ерлігі үшін медалімен» марапатталады. Ұлы отан соғысын толық аяқтап, 1945 жылы колхозға келіп жұмысшы болып еңбек еткен. Ұлы отан соғысының жауынгері бейбіт өмірдің еңбек майталманы болған. Абдіхалық 1977 жылы «Еңбек ардагері» медалімен марапатталып, 1976 жылы зейнетке шыққан. Балалары мен немерелерінің ортасында берекелі өмір сүріп, 2000 жылы өмірден озды. Ол кісіден тараған перзенттер бүгінде қоғамның әр саласында еңбек етуде. Еліміздің осындай даңқты ұлдары мен қыздарының өшпес ерліктері ешқашан ұмытылмайды.&nbsp;Уақыт алға жылжыған сайын бұл ерліктің шоқтығы биіктеп, қадір-қасиеті артып, тағылымы мен мәні мейлінше тереңдей түсетіні белгілі. Ұлы Жеңіс бізге миллиондаған солдаттардың төгілген қанымен, шыққан жанымен келді. Жеңіс туын желбіреткен майдангерлеріміздің жауынгерлік ерліктері мен бейбіт еңбектегі өнегелі істері жас ұрпақ тәрбиесіне, халқымыздың ынтымағына қызмет ете беретіні сөзсіз. Жанысбаев Абдіхалық атамыздың өзі болмаса да өмірі өнеге, ұрпақтары өнегесін жалғастырып келеді.<blockquote>– Әкем көзі тірісінде бізге майдан даласында от кешкен күндерінен көп естеліктер айтып отыратын. Өзі пулемётші болған. “Орыстың оқушы балалары пулеметті сүйреп көмектесетін, бомба түсіп, жан жағымыз астан-кестең болып жатқанда ана балдардың “мама, мама” деп жылаған дауыстары әлі құлағымда тұрады” дейтін. Майдан даласында екі рет қол-аяғынан жарақаттанған. Сталинград түбіндегі шайқаста қоршауда қалып санаулы ғана солдат қалған уақытта, дер кезінде көмек келіп аман шыққандарына шүкіршілік қылумен отыратын. “Соғыста орыстардың жас балаларына дейін қатысып өздері көп қиыншылық көрді. Негізі немістер біздің жақтың қатты суығына шыдас бере алмады. Сосын орман-тоғайдың көптігі де біздер жаққа көп пайдасын тигізді дейтін, – деп әсерлі естеліктерімен бөлісті Әбдіхалық атаның қызы Әзия Қыстаубаева апамыз.</blockquote>&nbsp;Жеңісті жақындата түскен әрбір күні ұмытылмайды. Өйткені, ерлік шежіресі ұрпаққа ұлағат, ертеңгі күнге үлгі боларлық сабақ. Ол кісілердің ерлігі мәңгі жадымызда сақталады. &nbsp;<figure class="image image_resized" style="width:58.61%;"><img src="https://knadmin.beoblood.kz/uploads/3b7353b3_d11e_48bc_b760_b27374cc794d_d44cadf043.jpg" alt="3b7353b3-d11e-48bc-b760-b27374cc794d.jpg"></figure>

Қазақстан және Қызылорда облысының жаңалықтары