<a href="https://kyzylorda-news.kz/">Kyzylorda-news.kz</a> &nbsp;Қызылордалық археологтар Еуропа ғалымдарымен бірлесіп көне Жанкент қалашығынан табылған жәдігерлерді зерттеуде.&nbsp;Орта ғасырға жататын шаһардан тұрмыстық дүниелерден бөлек көптеген жануарлардың сүйегі табылған.Сыр өңіріне арнайы келген Англияның Оксфорд университетінің археологы Эшли Харуда «Ұлы Жібек» жолының бойында көшпенді халықтың қалыптасуы мен урбанизациясы» тақырыбында ғылыми жобаға атсалысуда. Ағылшындық ғалымды Орта ғасырда адамдардың өмір сүру дәстүрінен бөлек, қолда ұстаған жануарлар дүниесі қызықтырып отыр. Жалпы Жанкентте мал шаруашылығынан бөлек, аңшылық, балық аулау кәсіптері жақсы дамығанын зерттеу жұмыстары көрсетіп отыр.<blockquote>– Қорқыт ата университетінің шақыртуымен Қызылорда облысына келдім. Жергілікті археологтар көне Жанкент шаһарынан түйе, сиыр, жылқы мен қойдың көп сүйегін тапқан. Бұл – сол кездің өзінде мал шаруашылығынық жақсы дамығандығына дәлел бола алады. Сондай-ақ балықтың сүйектері табылып отыр. Тағы да айта кететін қызықты дерек, оғыздар үйінде мысыққа дейін ұстаған. Алдағы уақытта осы табылған көне жәдігерлер арқасында терең талдау жұмыстарын жүргізіп, қортынды шығаратын боламыз, – дейді Оксфорд университетінің археолог-палезоологы Эшли Харуда.</blockquote>&nbsp;Қорлан САРЫ Фото:inbusiness.kz

Қызылордадан көне жәдігерлер табылды

<a href="https://kyzylorda-news.kz/">Kyzylorda-news.kz</a> &nbsp;«ORDA» жоғары колледжінде бірнеше басқармалардың бірлескен қадамдық жоспарына сәйкес кәмелеттік жасқа толмағандар арасындағы әкімшілік құқық бұзушылықтардың алдын алу бойынша сала мамандарының қатысуымен құқықтық түсіндірме жұмысы жүргізілді.Құқық бұзушылық – бұл қоғамға қарсы әрекет. Қоғамның алдында тұрған басты міндеттердің бірі – балалар мен жасөспірімдер арасындағы құқық бұзушылықтың алдын-алу, кәмелетке толмағандар арасындағы қылмыстың өсуіне жол бермеу. Бұл мәселе қазіргі кезде өзекті мәселелердің біріне айналып отыр. Жас ұрпаққа құқықтық тәрбие беру арқылы оларды дұрыс жолмен жүруді үйретеміз. Жасөспірімдердің арасында құқық бұзушылықтың алдын алу мақсатында құқықтық сауаттылық пен құқықтық мәдениетті арттыру өте манызды. Құқықтық сауаттылықты арттыру құқықтық тәрбиемен келеді.Құқықтық мәселелерді сөз ету, оны тыңдаушысына жеткізіп бере білу аса қиын өнер. Жасөспірімдердің арасындағы құқықбұзушылықтың алдын алу және оны болдырмау жұмыстарының негізінде тек қана білімді болумен шектеліп қоймай, сонымен бірге тәжірибелі, көпті көрген, адамдардың жүрегіне барар кілтті таба білер тәрбиеші болу да&nbsp;маңызды болып табылады.<img src="https://knadmin.beoblood.kz/uploads/Zhastar_t_rtibi_basty_nazarda_2_13e90503e6.jpg" alt="Жастар тәртібі басты назарда 2.jpg">Түсіндірме жұмысына Қызылорда облысының кәмелетке толмағандардың істері жөніндегі мамандандырылған ауданаралық сотының судьясы - Зәбира Абылайкызы, Бас маман - сот отырысының хатшысы - Нұрғалиев Асқар Қосылбайұлы, Директордың оқу-тәрбие жумыстары женіндегі орынбасары - Абдибаттаева Гүлнар Мәуленқызы және колледж студенттері қатысты.Бүгінгі қоғамның алдында тұрған басты міндеттердің бірі — жасөспірімдер арасындағы құқық бұзушылықтың алдын-алу, кәмелетке толмағандар арасындағы қылмыстың өсуіне жол бермеу. Қылмыстың алдын&nbsp; алудың бірден-бір жолы – оқушылардың мектептен тыс уақытта қосымша біліммен қамтылуын дұрыс ұйымдастыру.Шара барысында Зәбира Абылайқызы қала көлемінде кәмелетке толмағандар арасында жалпы орын алып отырған құқық бұзушылықтарға тоқтала кетіп, кәмелетке толмағандар 14 жастан бастап қылмыстық жауапкершілікке, ал 16 жастан бастап әкімшілік құқықбұзушылық бойынша жауапкершілікке тартылатынын ескертіп, қылмыс түрлерін саралап, оның жауапкершілігі жайлы түсіндіріп өтті.<img src="https://knadmin.beoblood.kz/uploads/Zhastar_t_rtibi_basty_nazarda_1_83d8f4e3f0.jpg" alt="Жастар тәртібі басты назарда 1.jpg">Асқар Қосылбайұлы жасөспірімдер арасындағы құқықбұзушылық түрлеріне сипаттама беріп, деректер келтірді. Қылмыс жасалған жағдайда әрбір азамат заңда көрсетiлген ереже бойынша жауапкершiлiкке тартылатынын, Қазақстанда заң бойынша кәмелетке толмаған жасөспірімдерге түнгі сағат 22.00-ден кейін компьютерлік клубтарда отыруға және түнгі сағат 23.00-ден кейін көшеде ата-анасыз жүруге тыйым салынғанын айтып өтті.&nbsp;Құқықтық білім беру арқылы жасөспірім құқықтың не екенін ұғынады және оның санасы қалыптасып, дамиды. Өскелең ұрпақтың дұрыс тәрбие алып, қоғамдағы құқықтарын пайдалана біліп, қатыгездіксіз өмірлерінің сақталуы жолында аянбай еңбек ету – біздің басты парыз.&nbsp;Сондықтан да жаһандану үрдісі басым болып, батыстық өркениетке еніп келе жатқан қазіргі кезеңге жас жеткіншектерді жаңа заман талабына сай озық ұлттық дәстүр рухы негізінде тәрбиелеп, игі нәтижелерге жету жолында аянбай еңбек етуді басты назарда ұстаған абзал.&nbsp;Жасөспірімдерді патриотизмге тәрбиелеп қана қою жеткіліксіз. Ол үшін ұлттық идеологияны күшейтіп, халқымыздың ғасырлар бойы жинақтаған асыл мұрасын, дархан пейілін, ұлтжандығын қайсарлығын насихаттап көрсете білуіміз керек. Сонда ғана жоғарыда айтылғандар жүзеге асып, өз Отанын сүйетін, абыройын асқақтата алатын шын мәніндегі жанашыр жалынды жастарды тәрбиелеуге мүмкіндік туады.&nbsp;Қорлан САРЫ Фото:aqmeshit-zhastary.kz

Жастар тәртібі басты назарда

<a href="https://kyzylorda-news.kz/">Kyzylorda-news.kz</a> Мидың, жұлынның қатерлі ісігін жою отасы Қызылорда облысында да сәтті жүзеге асырылуда. Оған белгілі нейрохирург, жоғары санатты дәрігер, ҚР денсаулық сақтау ісінің үздігі, облыстық көпбейінді аурухананың нейрохирургия бөлімінің меңгерушісі Шынжырбай Оразмаханұлы зор үлес қосып келеді. «Нейрохирургтар күрделі оталарды қалай жасап, әрбір пациенттің өмірі үшін қалай күресіп жүр?» деген сауалға дәрігермен сұхбат барысында жауап іздедік.- Нейрохирургиялық бөлімнің жұмыс күні қалай өтеді?- Біздің бөлім 25 орынға лайықталған. Жыл сайын мыңдаған адам емделеді. Оның шамамен 600-іне ота жасалады. Атап айтқанда, мидың, жұлынның қатерлі ісігін жою бойынша микрохирургиялық және тағы басқа хирургиялық араласулар. Күрделі ота жасау қажет болған жағдайда біздің мамандар аудандарға шығады. Егер пациент жол жүруге жараса, оны санавиациямен облыстық медициналық орталыққа алдырамыз. Биыл Қызылорда облысы бойынша нейрохирургиялық оталар жасау үшін міндетті әлеуметтік медициналық сақтандыру қорынан 178 млн. теңге бөлінді.Астанадағы Ұлттық нейрохирургия орталығымен, ҚР Президенті іс басқармасы Медициналық орталығы ауруханасымен, Қарағанды қаласындағы облыстық медицина орталығымен, Алматыдағы №7 қалалық клиникалық ауруханамен тығыз байланыстамыз. Абай Пірманұлы, Қанат Набдинов, Әнуар Қосбармақов секілді мамандарымыз аталған медициналық ұйымдарда біліктіліктерін жетілдіруде. Ондағы әріптестерімен бірге күрделі оталар жасауға қатысып жүр.- Ауыл тұрғындарына көбіне ота жергілікті ауруханаларда жасалатын шығар?- Әрине. Мысалы, Қазалы көпсалалы орталық аудандық ауруханасында аниограф аппараты бар. Мамандар соның көмегімен тамырдың патологиялық бөлігін анықтап, хирургиялық араласу мүмкіндігін және оның көлемін бағалай алады. Одан бөлек Арал, Қазалы, Қармақшы, Шиелі, Жаңақорған аудандық ауруханаларында компьютерлік томографтар бар. Егер бұрын сүйек-ми жарақатының диагностикасын рентген аппаратымен жүргізсе, қазіргі күні жүйке тіні құрылымындағы болар-болмас өзгерістің өзін компьютерлік томографтың көмегімен анықтауға болады.Жоғары технологиялы медициналық құрал-жабдықпен қамтамасыз ету міндетті әлеуметтік медициналық сақтандыру аясында қаржыландыру көлемінің өсуіне байланысты мүмкін болғанын айтуға тиіспіз.Автордың ескертпесі: 2019 жылы Қызылорда облысында медициналық көмекті қаржыландыру көлемі 45,9 млрд теңгені, 2024 жылы – 11,9 млрд теңгені құрады. Жалпы 2,5 есе өсті. Жоғары технологиялық медициналық көмекті қаржыландыру үш есеге, яғни 206,2 млн. теңгеден 675,3 млн. теңгеге дейін өсті.- Адамның миы – өте ғажайып жаратылыс. Онымен жұмыс істеу де оңай емес. Ота жасау кезінде не нәрсеге мән бересіз?- Нейрохирургия – медицинаның ең қиын бағыттарының бірі. Адамның миымен, жүйкесімен, жіңішке тамырларымен жұмыс істейсің. Бір-екі милиметрге қиыс кетсең, науқас сал болып қалуы мүмкін. Отаның сәтті шығуы үшін бар күшімізді саламыз. Пациент отадан кейін ойлай, сөйлей, жүре және өмірге қуана білуі керек.- Пациенттерде мидағы ісіктер қаншалықты жиі анықталады?- Жылына орта есеппен мидағы қатерлі ісікті алып тастау үшін 100-ге жуық ота жасаймыз. Жақында, мысалы, 38 жастағы әйелге осындай ем-шара жүргізілді. Өзі сүт бездерінің ісігімен диспансерлік есепте тұрады. Алғашында мидың қатерлі ісігінің белгілері байқалмаған. Басы қатты ауырғасын ғана облыстық ауруханаға жеткізілді. Отадан кейін пациенттің жағдайы тұрақтанды.- Израиль немесе Германияда осындай оталарды жасату үшін қаржы жинау науқаны туралы естігенде осыны өзімізде МӘМС аясында тегін жасауға болатыны туралы ой келмей ме?- МӘМС тұрғындар үшін тиімді. Неге? Мысалы, Израильде мидың қатерлі ісігін алып тастауға 30 мың доллар керек. Ал бұл ота Қазақстанда 5 млн. теңге тұрады. Израильде омыртқа жотасының ісігіне ота жасату күрделілігіне қарамастан 25-30 мың доллардан кем емес. Біздің елде – 2,5 млн. теңге. МӘМС аясында сақтандырылған пациенттерге мұндай ота, лабороториялық, диагностикалық зерттеу тегін жүргізіледі.- Инсульт жасарып барады, неге?- Бұрын инсультқа негізінен 60 жастан асқан кісілер ұшыраса, қазір 30-40 жас аралығындағы адамдардың өзін мазалайды. Ол көбіне тұқым қуалайды. Егер ата-анасының бірінде жоғары артериалды қан қысымы, қант диабеті болса, балаларында да осы жағдайлар қайталанады. Сондықтан тұрақты түрде скринингтен, профилактикалық тескерістен өтіп тұру керек.- Инсульттің алғашқы белгілері қандай?- Олар – бастың қатты ауыруы, құсу, көру қабілетінің, жүрістің нашарлауы, дененің бір жақ бөлігінің жансыздануы. «Алтын сағат» деген ұғым бар. Алғашқы белгілерін байқаған бойда жедел сапалы медициналық көмек көрсету қажет. Пациентті тромбоэкстрациядан (тамырдан тромбты механикалық үзу) немесе ангиографиядан өткізу керек. Бұл инсульттің асқынуына жол бермей, мүгедек болып қалу қаупін азайтады.Тағы айтатын нәрсе, пациенттің туыстары мен жақындарына кез келген жағдайға дайын болуды ескерту керек. Өйткені науқастың жанынан әрдайым сол кісілер табылатын болғасын аталған аурудың асқынбауына көмектесе алады.- Әңгімеңізге рахмет!&nbsp;

Қызылордада ең қымбат ота МӘМС аясында тегін жасалуда 

<a href="https://kyzylorda-news.kz/">Kyzylorda-news.kz</a>&nbsp;Сыр өңірінде тіршілігі су торабымен біте қайнасқан, темірдей тәртіпке бағынған Бәшеновтер әулеті Қармақшы ауданы Ақтөбе ауылының тұрғындарына жақсы таныс. Тамыры тереңге тартып, құт қонған бұл әулеттің әр мүшесі ел экономикасының дамуына аянбай еңбек етіп, елеулі үлес қосып келеді. Ұрпақтан-ұрпаққа жалғасып, өнегемен өріліп келе жатқан отбасының су шаруашылығы саласындағы жалпы еңбек өтілі – 140 жыл.Әулеттің бұл салаға келуі, ең үлкен атасы Бәшеннен бастау алады. Ол кезде қоныстары Таң кеңшарының тұсындағы №420 бекетте болса керек. Ашаршылық уақыттан соң арнаның бойында балық аулап күн көрген атамыз судың жайын жақсы меңгеріп алады. Кейін Ақтөбе ауылына қоныс аударып, осында тұрақтайды. Мектепті бітірген баласы Қазақбай еңбекке араласып, ауылда трактор айдайды. Он тоғыз жастағы ұлының бұлай жүргенін құп көрмеген әкесі оған «Балам «өзен жағалағанның өзегі талмас» деген, мен су жолында жүріп, жаман болғаным жоқ. Сенде осы салаға бет бұрсаң жақсы болар еді» деп ақылын айтады. Әкенің қалауын қабылдаған Қазақбай ағамызды жездесі Тоғжан Қызылорда қаласындағы политехникумның «Су шаруашылығы» мамандығына оқуға түсіреді. Кейін оқуын бітірген соң 1966 жылы аудандағы су шаруашылығы мекемесінің сол кездегі Ақжар, Чапаев, Энгельс, ІІІ Интернационал ауылының учаскелік бөлімшесіне жұмысқа орналасады. Осы салада тұрақтаған ол, су реттеушіден бөлім басшысы қызметіне дейін көтеріледі. Атаулы салада 44 жыл еңбек етіп, зейнетке шығады. Ғибратты ғұмыр иесі Қазақбай ағамыздың ұлдары өз ізін жалғап, елдің алғысын алатын салаға қызмет етуді таңдаған. Ең қызығы күйеубаласы Байдаш Бодықов пен немересі Айбек Қазақбаев су шаруашылығы саласының мамандары.Үлкен баласы Марат Башенов бүгінгі таңда «Наурызбай» бөлімшесінің басшысы. Осы салада қызмет етіп жүргеніне 35 жылдан асқан.<blockquote>– Еңбек жолым 1984 жылы басталды. Ол кезде мектеп бітірген кезім. Әкемнің қасында жүріп осы салаға қызыға бастадым. Кейін әскерге екі жылға кетіп, қайтып келген соң бірден қаладағы политехникумға оқуға тапсырып, су шаруашылығына қайта жұмысқа тұрдым. Менде осы қызметтен қол үзбей келемін. Келіншегім Гүлмира да бұл мамандықтан алыс емес. Бұрын гидротехник болған. Қазір ұлымыз да атасының жолын жалғап жүр, – дейді ол ағынан жарылып.</blockquote>Сушылар династиясының тағы бір мүшесі Қанат Башенов те су шаруашылығы саласы бойынша еңбек етіп келеді. Еңбек жолын аудандық бөлімде су өлшеуші болып бастаған ол, қазіргі таңда жер асты суын тексеру учаскесінің бас маманы қызметін атқаруда. Ал Самат, Алмат, Жомарт өз саласының майталмандары. Алмат Қазақбайұлы «Қурайлы» бөлімшесінің басшысы. Осыған қарап бір әулеттің бір мамандыққа деген адалдығын, сүйіспеншілігін аңғартады.Қазақбай Башенов өзі еңбек еткен жылдарда ел алғысына бөлене білді. Кейінгі жастарға және өз туған балаларына қамқор әке, ақылшы ұстаз болды. Сол еңбегінің арқасында «Еңбек үздігі» медалі және қазақтың «Алтын кітабына» есімі енгізілді. Өмірден өткенге дейін ел ісіне араласып, ауыл ардагерлері кеңесінің төрағасы болды. Әке жолын жалғауда өмірден өз орындарын тапқан балалары бүгінде әкелеріне айтар алғысы шексіз.

 Мерейлі отбасы: Бәшеновтер әулеті ел экономикасының дамуына аянбай еңбек етуде

<a href="https://kyzylorda-news.kz/">Kyzylorda-news.kz</a> Қызылорда қаласының М.Ералиева атындағы мәдениет үйінде «Заңды тұлғалар бірлестігі салауатты өмір салтын қалыптастыру мамандарының ассоцациясы» мекемесімен бірлесіп, «Адал адам» мәдени-тәрбие орталығының «Сұхбат ТІМЕ» жобасы аясында Кеңес әскерлерінің Ауғанстан жерінен шығарылғанына 35 жыл толуына орай ауған соғысына қатысқан ардагерлерімен кездесу кеші өтті.Кездесу кешіне облыстық «Қызылорда-Невада-Семей» қоғамдық бірлестігінің төрағасы, облыстық ардагерлер кеңесінің төрағасы Әбіш Сәбит Ыдырысұлы, Қызылорда облысының «Ауғанстандағы соғыстың мүгедектері мен ардагерлерінің одағы» қоғамдық бірлестігінің төрағасы Ақтаев Алмат Пернебайұлы, Ардагерлер одағының «Тәжік-Ауған шекарасында жауынгерлік қимылдарына және әскери қақтығыстарына қатысушылардың» Қызылорда облыстық қоғамдық бірлестігінің төрағасы Марат Орынбайұлы ,Қалалық «Чернобыль» қоғамдық бірлестігінің төрағасы Шахатов Жұмабек Алиханұлы, «Германиядағы кеңес әскерінің тобы мен Варшава келісім шарты әскерінің тобы» Қызылорда облыстық қоғамдық бірлестігі филиалы директоры Шүренов Алтынсары &nbsp;қатысты.Шара барысында «Тәжік –Ауған шекарасында жауынгерлік қимылдарына және әскери қақтығыстарына қатысушылардың» Қызылорда облыстық қоғамдық бірлестігінің төрағасы Марат Орынбайұлы, Қызылорда облысының «Ауғанстандағы соғыстың мүгедектері мен ардагерлерінің одағы» қоғамдық бірлестігінің төрағасы Ақтаев Алмат Пернебайұлы сөз сөйлеп, бейбіт өмір үшін соғыста қаза тапқан батырларды еске алып, бір сәт үнсіздік жарияланды.Кездесу кешінде патриоттық әндер шырқалып, кеш қонақтарына концерттік бағдарламаны тамашалады.

Қызылордада ауған соғысының ардагерлерімен кездесу өтті

<a href="https://kyzylorda-news.kz/ru">Kyzylorda-news.kz</a> 2024 жылғы 23 мамырда ҚР Қаржы нарығын реттеу және дамыту агенттігінің Fingramota.kz жобасы XIV Орталық Азия корпоративтік медиа – 2024 байқауында «Үздік сыртқы Digital-медиа» номинациясын жеңіп алды.Бұл – Fingramota.kz жобасына еліміздің PR және маркетинг саласының үздік мамандары берген жоғары баға.<figure class="image"><img src="https://knadmin.beoblood.kz/uploads/Fingramota_kz_9c6e499109.jpeg" alt="Fingramota.kz.jpeg"></figure>Бұған дейін, ағымдағы жылғы қаңтарда Fingramota.kz «PR room» кәсіби қоғамдастығы ұйымдастырған PR-мамандар арасындағы байқаудағы ең ауқымды жобасы номинациясын алған болатын.Fingramota.kz интернет-порталы ҚР Қаржы нарығын реттеу және дамыту агенттігінің халықтың қаржылық сауаттылығын арттыру бойынша жүргізіп отырған жұмысының негізгі құралы болып табылатынын атап өтеміз.Fingramota.kz – бұл ақпараттық-түсіндіру сипатындағы эксклюзивті танымдық материалдар, қаржылық жаңалықтар, оқыту роликтері, түрлі-түсті ақпараттық графика бар, қаржылық сауаттылық бойынша басқа да ақпарат беретін бірегей алаң. Ақпарат берудің алуандылығы және оның күрделілік деңгейі бойынша жаңадан бастаушыдан бастап жетілдірілгенге дейінгі градациясы әр оқырманға өзекті контент табуға мүмкіндік береді.Интернет-порталда халықтың барлық нысаналы топтары (балалар, жастар, ересектер, зейнеткерлер, мүгедектігі бар адамдар) үшін қаржы секторының негізгі тақырыптары бойынша 8 негізгі бөлім берілген.&nbsp;Бұдан басқа, қосымша айдарлар жұмыс істейді: «Мультимедиада» ақпараттық графика, бейнероликтер және қаржылық сауаттылық бойынша хабарлар, «Балалар қосымшалары» бөлімінде – оқушылар мен студенттерге арналған танымдық арнайы жолақтар, «Қаржылық инклюзия» бөлімінде – Агенттіктің қаржы ұйымдарында кедергісіз орта құру бойынша жүргізіп жатқан жұмысы туралы маңызды ақпарат және басқа да айдарлар бар. Сайттың басты бетінде республикалық маңызы бар үш қалада: Алматы, Алматы және Шымкент қалаларында және еліміздің 17 өңірінде ерекше қажеттіліктері бар клиенттерге арналған бөлімшелері бар банктер бөлімшелерінің Қолжетімділік картасы орналастырылған.<figure class="image"><img src="https://knadmin.beoblood.kz/uploads/Fingramota_kz_2_29f347f930.jpeg" alt="Fingramota.kz 2.jpeg"></figure>Fingramota.kz интернет-порталында жедел кері байланысты қамтамасыз ету үшін «Онлайн-консультант» сервисі жұмыс істейді, оның көмегімен қаржы реттеушісінің қызметі бойынша өзіңізді қызықтыратын сұрақтарды қоюға болады.Fingramota.kz қаржылық сауаттылық жөніндегі жоба ғана емес, бұл – өмір салты, оның сапасы алынған қаржылық білімді және өз ақшамызға деген көзқарасымызды жақсарта алады.<blockquote> Біз сіздермен тығыз байланыс орнатуға әрқашан дайынбыз, егер сіздердің интернет-порталымызда көргіңіз келетін тақырыптар бойынша ұсыныстарыңыз болса, оларды:- Fingramota@finreg.kz электрондық поштасына;- «1459» нөмірі бойынша Агенттіктің call-орталығына;- App Store-да https://apps.apple.com/kz/app/fingramota-online/id1134502211, &nbsp;Play Market-те https://play.google.com/store/apps/details?id=kz.nationalbank.appeals сілтемелері арқылы жүктеуге болатын «Fingramota Online» мобильдік қосымшасы арқылы жіберуге болады.Мобильдік қосымшаның веб-нұсқасы да қолжетімді: http://online.fingramota.kz/ru. &nbsp;</blockquote>Фото: Fingramota.kz

Fingramota.kz интернет-порталы Қазақстандағы үздік сыртқы Digital-медиа деп танылды 

Бала қауіпсіздігі – өзекті мәселе

<a href="https://kyzylorda-news.kz/">Kyzylorda-news.kz</a>&nbsp; Мұғалім – мамандық болса, ұстаздық адам бойындағы абзал қасиет. Ұстаз мәртебесінің артуы ең алдымен ұстаз деген есімге қаншалықты лайық болуына байланысты. Бүгінгі жаңа дәуірдің, жаңарған білімнің мұғалімге қояр талабының жүгі ауыр, олар үлгі боларлық бар жақсылық атаулының ең биігінен көрінуі тиіс. «Жақсы адам – Алланың нұры» дейді. Жақсылық атаулыны ішкі жан дүниесімен қабылдап, өз бойындағы сезімді, берік қалыптасқан көзқарасты оқушы бойына дарыта білетін, өз бойындағы жасампаздық пен шығармашылық, өз-өзіне сенімділік пен сабырлылық, табандылық пен төзімдік сияқты мінез-құлық ерекшеліктерімен, сондай-ақ өзгелерге қолдау көрсете білетін, жылы жүрегімен жақсылық сәулесін шашып, мейірім шуағын төгіп тұратын ұстаздар ортамызда жетерлік. Өмір аңсаған мамандығынан басқа арнаға бұрса да, жүрек түкпіріндегі мамандыққа деген адалдықты сақтаған қармақшылық Зинакүл Жалғасбаеваның ұстаздыққа бұрылуы кездейсоқтық емес.Зинакүл Шамшатқызы Қармақшы ауданына қарасты Ақжар ауылының тумасы. Еңбек жолы комсомол комитетінің хатшылығынан басталып, 1974 жылы &nbsp;коммунистік &nbsp;партия қатарына қабылданады. Одан соң «Айдын» комсомол жастар &nbsp;күріш &nbsp;егіс бригадасын &nbsp;құрып, әр гектардан 66 центнерден өнім &nbsp;жинап &nbsp;рекорд &nbsp;жаңартады. &nbsp;Мұнан соң аудандық және облыстық &nbsp;советтің депутаты, &nbsp;облыстық комсомол комитетінің пленум мүшесі болып сайланып, 1976 жылы аудандық партия&nbsp;комитетінің бірінші хатшысының шешімімен Ақжар кеңшарының &nbsp; 2 егіс бригадасының бригадирі болып &nbsp;қызметін ауыстырды. Сол кезеңде бригадада &nbsp;жұмысы жақсы бағаланып, Қазақстан Комсомол Комитетінің 14 съезіне делегат болып сайланды, сол &nbsp;съезде ауылшаруашылық &nbsp;министрінің медалімен және Құрмет грамотасымен марапатталды.Тағдырдың бұйрығымен жосалылық Әбдісадық Қожахметовпен отау құрып, 1980 жылы аудандық ауылшаруашылық&nbsp;басқармасында юрист-консульт қызметін атқарады. Осыдан кейін ғана өзінің &nbsp;негізгі мамандығы биология пәнінің мұғалімі ретінде жұмыс істеу бақыты бұйырып, 1982 жылы аудандағы &nbsp;№14 кәсіптік-техникалық &nbsp;училищесіне&nbsp;өз мамандығы бойынша жұмысқа&nbsp;тұрды. Ұстаздық қызметімен қатар 1985-1989 жылдар училищеде бастауыш партия ұйымның &nbsp;хатшылығы жұмысын қоса атқарады.<blockquote>­­– Бүгінде ойлап отырсам, мұғалімдік еңбекке кездейсоқ келген жоқ екенмін. Біздің мектеп қабырғасында оқып жүрген кездегі білімге құштарлығымыз бір шөліркеген жанның сусынға ұмтылысындай еді. Мұғалімнің айтқанын екі етпейтін едік. «Шәкірт болып көрмеген – ұстаз болып жарытпас» дегендей, мектеп қабырғасында оқып жүрген кезде-ақ өзіммен құрдас, не болмаса өзімнен сәл-ақ кіші көрші ауылдың балаларын жинап алып, өзімнің сүйікті ісіме – мұғалім болуға кірісемін. Мектепте өз мұғалімім нені үйретті, қалай сөйледі, мен де соны балаларға үйретіп, жақсы мұғалім болуға тырысатын едім. Осылайша өзім қатарлы оқушыларға сабақ үйретуден ұзақты күн жалықпаушы едім. Осылайша ұстаз болуды бар жан-тәніммен армандадым. Кейін мен сол арманыма жеттім, – дейді ардақты ұстаз.</blockquote>Кейіннен, яғни 1994 жылы аудандағы №105 мектепке &nbsp;қызмет&nbsp;ауыстырған ол мектепте де өзінің адалдығымен еселі еңбегін көрсете білді. Қандай жұмыс тапсырылса да тиянақты, жауапкершілікпен қарайтындықтан, атқарған ісі жемісті, еңбегі елеулі болатын. Мектепте дайындаған оқушылары республикалық, облыстық, аудандық &nbsp;ғылыми жобалардан жоғарыы орындарға ие болып, грант иегері атанды. Жоғары санатты мұғалім атанып, &nbsp;Қорқыт ата университетінен, облыстық департаменттен,&nbsp;облыс, аудан әкімінен, аудандық білім бөлімінен алғыс, &nbsp;құрмет грамоталарымен марапатталған.Арманына қол жеткізген ардақты ұстаз Зинакүл Шамшатқызы саналы ғұмырында елге қызмет ете жүріп, 4 перзент тәрбиелеген. Бақытын еңбектен таба білген жан отбасылық өмірде де бақытты. Адал жар, ардақты ана. Сүйікті әже. Бүгінде үбірлі-шүбірлі отбасының ортасында 9 немере өсіріп отыр. Ұл-қыздарына тәлімді тәрбие берген ақылшы ұстаздың өмір жолы, қызметіне деген адалдығы көпке үлгі боларлық. Адалдықтан айнымаған ардақты ұстаздың жолын бүгінде қызы Жадыра жалғаған. Ол кентіміздегі №121 мектептің білікті ұстаздары қатарында.Мұғалім болуды арман еткен, бүгінгі таңда еңбегімен ел арасында, шәкірт махаббатына бөленген тәжірибелі маман, ардагер ұстаз, білікті биология пәнінің мұғалімі Зинакүл Жалғасбаева саналы ұрпақ тәрбиелеуде аянбай тер төккен жан. Ардақты ұстаздың есімі ­жақсы ұстаздың үлгісі ретінде шәкірт жүрегінде әрдайым сақталмақ.&nbsp;

Зинакүл Жалғасбаева: Жақсы адам ғана жақсы ұстаз бола алады

<a href="https://kyzylorda-news.kz/">Kyzylorda-news.kz</a>&nbsp; Көпшіліктің сүйікті әншісі Мәдина Сәдуақасова Ақтөбе қаласындағы концерт кезінде тыңдарманына құны 2 млн теңге тұратын сақинасын сыйлады, деп хабарлайды <a href="https://malim.kz/article/culture/madina-saduaqasova-tyndarmanyna-2-mln-tenge-turatyn-saqinasyn-syilady-22204?fbclid=IwZXh0bgNhZW0CMTEAAR0As0xtyuZUgT1oxNAoTX-mzNMsc-BhmvDLofM4d_oEoKQzqapkEho51dU_aem_AbXi0EihFX4x8s0D1ipVDTgsM_xEjAWahSpOwctwS_jpEj1KR7WJ-M1KAZDFR5KNRQ9XYUiHqQqPc6vliL6P_WDr">Malim.kz.</a>Өнер иесі сахнада ән шырқағаннан кейін тыңдармандарына сақинаны лақтырған. Жүзікті қағып алған ару да әнші болып шыққан.Әнші Мадина Сәдуақасова Instagram парақшасында сақинасының жаңа иегері туралы айтты.Сақинаны қағып алған жас қыз әнші болып шықты, - деген жазба қалдырды өнер иесі.Фото: www.nur.kz

Мәдина Сәдуақасова тыңдарманына 2 млн теңге тұратын сақинасын сыйлады

<a href="https://kyzylorda-news.kz/">Kyzylorda-news.kz</a>&nbsp;Жауапкершілігі мол полиция қызметкерінің бір күндігін «погонды журналист» болып, тәртіп сақшыларының көпшілік білмейтін қиын да күрделі жұмысы туралы сөз етсек. Қоғам тыныштығының күзетшісі болып, күн-түні қым-қуыт тіршілікте аянбай еңбек етіп жүрген патрульдік полиция қызметкерлерінің еңбегі өлшеусіз екені белгілі. Ал біз Қармақшы аудандық полиция бөлімінің әкімшілік полиция бөлімшесінің қызметімен таныстық. Таңғы 8.30-да әдеттегідей облыстық полиция департаментімен аудио селектр арқылы бүгінгі күнге арналған тапсырмалар тиянақталып, жұмыс жоспары нақтыланды. Одан соң бөлімше бастығы жеке құрамды жинап, облыстан, ауданнан берілген тапсырмаларды айта келе, күнделікті жоспарға сәйкес жұмысқа кірісіп кетті. Жалпы құқық қорғау саласының біршама мәліметі жариялауға жатпайды. Сондықтан да жиналыс барысында қызметкерлер құпиялылық санатына жататын біршама іс бойынша да өз жұмысына жүктемелерін алды.Ең бірінші әкімшілік полиция бөлімшесінің әкімшілік практика тобының инспекторы, полиция капитаны Қайрат Борановтың жұмыс бөлмесіне келдік. Қайрат Мейрамбекұлына тұрғындар жол-көлік оқиғалары бойынша түрлі сұрақпен барады. Мәселен, жол-көлік оқиғаларына байланысты құжаттарды сотқа дайындау, қоғамдық қауіпсіздік бойынша әкімшілік хаттамалар рәсімдеу, олардың заңдылығын қарап, бақылау, айыппұл өндіру секілді мәселелер осы жерде шешіледі. Бізге жұмыс жайын баяндап отырғанда кенттің бір тұрғыны рұқсат сұрап, жұмыс бөлмесіне енді. Келгендегі мәселесі – анықтама алу. Өзінің құжатын ұсынып, қажетті анықтамасын алды. Одан соң, келесі тұрғын сақтандыру мерзімінің өтіп кетуіне байланысты кеңес сұрау үшін жүгінді. Жұмыс сарыны біртекті көрінгенімен тұрғындардың талап-тілегі, өтініші әрқилы. Осылардың барлығына заң аясында қызмет көрсету -білікті маманның шеберлігін танытса керек.Ал жол техникалық инспекторы, полиция аға лейтенанты Нұрлан Әбенов ауданға қарасты жол жүрісін реттейтін көшедегі белгілердің стандартқа сәйкестігіне жауап береді. Жаяу жүргіншілерге арналған белгілер де үнемі бақылауда. Күнделікті көшеде жүргенімізде ондай белгілерді кездестіргенімізбен, оның уақытылы ауыстырылуы, мезгіл-мезгілімен сырлануы, жаңартылуы туралы ойға да алмайды екенбіз. Ал олардың осындай көпке білінбейтін жұмыстары техникалық инспектордың жауапкершілігінде екен. Нұрлан Рысбайұлы жоспарға сай барлық аумақты жылына екі рет аралау жүргізіп, соған сай қажетті жұмыстарға ұсыныс береді.Бөлімшенің үшінші қызметкері – полиция капитаны Сабыр Жетесов. Ол азаматтық және қызметтік қару айналымын бақылау тобының инспекторы. Заңды тіркелген қару иелері мен қызметтік қару жөніндегі мәселелер осы маманның жүктемесіне кіреді. Қару сақтаудың заңдылығы, мерзімінің өтіп кетпеуін қадағалау секілді міндеттерді атқарады. Қаруға байланысты көкейінде жүрген сұрақтарына жауап табу үшін келген тұрғын да маманнан заң аясында кеңес алды.<blockquote>– ¬Әкімшілік полиция бөлімшесінің басты жұмысы – халыққа заң аясында қызмет көрсету. Үш қызметкер болғанымен жұмыс көлемі ауқымды. Ал аудандық полиция бөліміне қосымша күш қажет болғанда біз әрдайым сапта тұруға дайынбыз. Тапсырылған жұмысты тиянақты орындау, сондай-ақ алдымызға келген азаматтарға қолдан келгенше көмек қолын созу біздің міндетіміз. Қай салада болсын – адалдық басты орында. Қызметіңе деген жауапкершілік сені алға жетелейді. Ал жауапкершілікпен жасалған жұмыс нәтижелі болмақ, – &nbsp;дейді бөлімше бастығы.</blockquote>Полиция қызметкерлерімен бірге бірнеше сағат қана жұмыс барысымен танысқанда тәртіп сақшыларына деген көзқарасым түбегейлі өзгерді. Бұрындары сыртынан тон пішіп, қызметтік форма кигеннің бәрі учаскелік полиция екен деп топшылайтынбыз. Алайда, тәртіп сақшыларының ортасында, олардың жұмыс тіршілігін көрген кезде ғана қоғамның тәртібі, тыныштығы үшін түн ұйқысы төрт бөлінсе де, ант берген адал қызметті абыроймен орындап жүргенін ұғындық. Әр бөлімнің қызметкерлерімен танысып, әңгімелескен кезде «қандай ақкөңіл, кішіпейіл жан» деп таңғалған кездер де болды. Себебі күн сайын түрлі оқиға, түрлі жағдай, әрқилы адам, сан қилы мінез. Сондықтан да халықпен жұмыс істеуде шыдамдылық пен сабырлылық, кішіпейілділік керек-ақ.&nbsp;Қызметі көпке көрінбесе де, халыққа көп қызметі бар әкімшілік полиция бөлімшесінің жұмысымен таныстық. Әдемі форма мен ай күмбезді пагонның да жүгі ауыр екенін түсіндік. &nbsp;Жауапкершілігі жоғары бұл қызметке антына адал, өз міндетін абыроймен атқарып, еңбек ете білген тәртіп сақшылары әбден лайықты. &nbsp;Бөлімшедегі бір күннен түйгеніміз осы. &nbsp;

Қармақшыдағы қарбаласқа толы қызметтің бір күні

<a href="https://kyzylorda-news.kz/">Kyzylorda-news.kz</a>&nbsp; «Ұстаздық еткен жалықпас, үйретуден балаға» деп Абай Құнанбайұлы айтқандай, қандай мамандық иесі болсын, солардың барлығын аялы алақанына салып, дұрыс жолды таңдауды үйрететін – ұстаз. Сондай-ақ дана халқымыз «Мұғалім мамандығы – барлық мамандықтың анасы» дейді. Әрбір бүлдіршінді білім әлеміне қанат қақтырып, ғылым әлеміне жол ашатын да ұлағатты ұстаздың ерен еңбегі. Осы орайда ел мүддесін бәрінен биік қоятын, өзінен кейінгіге ізетін аямайтын, ұрпағына ұлылық ұялата білген ардагерлердің орны ерекше. Өзінің саналы ғұмырын ұстаздық жолға арнаған, ұлағатты, білімді, еңбекқор, ардагер ұстаздың бірі – Назымкүл Бүркітбаева.Ел аузындағы мақтаулы ұстазбен жүздесу үшін ардагердің шаңырағына арнайы бардық. Жадырай қарсы алған Назым апай даналық дәптерін парақтап отыр екен. Оған өзі оқыған газет, кітап-журналдан тәлімді сөз бен өнегелі ойды тізбектей беріпті. Маржандай тізілген әріптерге қарап сүйсіндік. «Жазғандарымды арасында осылай оқып шығатыным бар. Бұл деген біле-білгенге үлкен құндылық қой. Аудандық басылымнан деп хабарласқандарыңда, бүгінгі ұрпақ арасынан іздеушіміз бар екен ғой деп бір марқайып қалдым» деп, &nbsp;ә дегеннен ризашылығын білдіріп те үлгерді.&nbsp;Өмірі ұстаздық қызметпен өрілген ардақты ұстаз биыл 85 жасын тойламақшы. Жаз мезгілі болғандықтан айналасында немере-шөберелері де жиналып қалыпты. «Бұлар Алланың сыйы ғой. Осыдан артық бізге қандай бақыт керек?!» дейді өзі.&nbsp;Назымкүл Бүркітбаева 1937 жылы Ақжар ауылында дүниеге келген. Ондағы №28 мектепті тәмамдаған соң, Қызылорда қаласындағы Мәншүк Мәметова атындағы педагогикалық училищеге оқуға түседі. Оны 1956 жылы ойдағыдай тәмамдап, бастауыш сынып мұғалімі деген мамандыққа ие болады. Сол жылы «ХХХ жылдық Қазақстан» ұжымшарындағы Чкалов атындағы жетіжылдық мектепке бастауыш сынып мұғалімі болып қызметке орналасады. 1957 жылы жетіжылдық мектеп қысқартылып, бастауыш мектеп болып қалған кезде осы мектептің меңгерушісі болып 1959 жылдың тамыз айына дейін қызмет атқарған. 1959 жылы бастауыш мектеп Ақжар кеңшары орталығындағы №28 орта мектепке қосылғаннан бастап осы мектепте 1965 жылға дейін бастауыш сыныптарға сабақ береді.Мектептің қоғамдық жұмыстарына, ауылдың саяси өміріне белсене араласқан. Бастауыш сыныптың үздік мұғалімдері қатарынан көрініп, 1959 жылы сәуір айында Алматыда өткен халық ағарту қызметкерлерінің республикалық кеңесіне аудан атынан делегат болып қатысады. 60 жылдан асса да осы кезде түскен сурет апайдың үйінде әлі сақтаулы екен. «Бұл суреттің мен үшін орны бөлек. Жас маман ретіндегі үлкен жетістігімнің бірі еді бұл» деп суреттегі тұлғалармен таныстырды.&nbsp;Көкірегінде сәулесі бар әр адам «Зымыраған заманның ағымына ілесіп, жүйткіген уақыт көшінен қалып қоймай, бойымдағы барымды, көкейге жиған нәрімді елдің игілігіне жұмсасам» деп талпынары хақ. Біздің бүгінгі кейіпкеріміз де ұстаздық қызметпен қатар аудандық комсомол комитетінің мүшесі, ауылдық кеңестің депутаты да болған.&nbsp;– Біз қызмет еткен уақыт мүлде бөлек еді. Мектепке жақындағаннан бастап оқушылар алдымнан жүгіріп шығып сөмкемді көтеруге таласатын. Бір сөмке қайсыбіріне жетсін, әйтеуір көтерген болады. Негізінде мұғалім білімді, таза болуы керек. Өзінің оқытқан балаларын сүюі керек. Ата-аналарымен тығыз байланыс жасауы тиіс. Ол уақыттарда ата-аналар үйге бізді іздеп келетін. Мектепке де жиі бас сұғатын. Балаларының сабақтарына қатысып, тәртібін қадағалайтын. Мұғалімдер оқушылардың үйін аралап, жағдайын көзбен көретін. Көмек қажет отбасыларды ойға алып, мүмкіндік болғанда киімнің тізіміне қосып жіберетінбіз. Ал қазір өзіміз де жиналыс деп шақырмаса, мектепке бара қоймаймыз. Тағы бір ерекшелігі, сол кездегі замандастарыммен әлі араласамыз. Біздің достығымызға көпшілік &nbsp;қызығушылық танытып, үлгі тұтатын. Арамыздан біршамасы алыстаса да алпыс жылға таяу достығымыз үзілмей қуаныш-қайғымызды бірге бөлісіп келеміз, – дейді өткен күндерін ойға алған ардагер ұстаз.Назымкүл апай 1965 жылы отбасы жағдайымен аудан орталығына көшіп келгеннен бастап №105 орта мектебіне жұмысқа тұрып, осы мектепте 1993 жылы зейнет демалысына шыққанша үздіксіз қызмет атқарады. Мұнда да білікті, тәжірибелі, еңбекқор ұстаз ретінде қызметтестері арасында абыройға бөленген. Ұстаз алдынан алғаш «әліппені» ашып, әріп танып, тәлім-тәрбие алған көптеген шәкірттері ауыл, аудан, облыс, тіпті республика төңірегінде түрлі мамандық иелері атанып, ел игілігі жолында елеулі еңбек етіп жүр. Көшеде көрсе тоқтай қалып сәлем беретін, алыста жүрсе арнайы іздеп келетін шәкірттері де баршылық. 20,30,40 жылдықтарын тойлауға жиналған түлектердің де алғаш бас сұғатын шаңырағы – осы Назымкүл апайдың үйі. Алғаш қолға қалам ұстатқан ұстазын кім ұмыта қойсын. Мектеп деген әлеммен таныстырған алғашқы ұстаздың орны бөлек қой. Сондықтан да мұндай құрмет пен ізеттің болуы да заңдылық. Ұстаз еңбегінің жемісі міне осылар арқылы көзге түседі.Ұстаздық қызметпен қатар отбасылық өмірде бақыт тапқан өнегелі жан жолдасы Жаңаберген Сәденов аға екеуі 6 бала тәрбиелеп өсіріп, жоғары білім беріп, өмірде өз жолдарын табуына қамқорлық жасаған. Үш қызы ата-ана жолын жалғап, ұстаздықты өміріне серік етіпті. Тәлімді тәрбие алған перзенттерінің алды бүгінде немере сүйіп отыр. Шөберенің қолынан су ішіп, олардың былдырын бақытына балаған әжей – нағыз өнегеліктің үлгісі. Аз ғана уақыт әңгімелессек те аузынан «айналайыны» түспеген ақ жаулықты әжейдің өмір жолы жастар үшін үлгі-өнеге болуға тұрарлық. Себебі ол – тіршіліктің тынысын, уақыттың жүрісін сезіндіретін, білім әлемінің сырын білетін, өзінің алдынан өткен шәкірттерінің жырын жүрекке түйген үлкен тағылым иесі.&nbsp;<blockquote>– Біздің үйде әліге дейін дастарқан басында артық әңгіме айтылмайды. Өзгенің өмірі жайлы сөз қозғалмайды. Әкелері де артық сөзді ұнатпайтын. Балалардың да бойына осы мінезі сіңген. Бұл қарапайым нәрсе болып көрінгенімен, мұнда үлкен мән бар. Өнегенің барлығы үстел үстінен басталады. Күн ұзақ оқуда, жұмыста жүрген отбасы мүшелерінің басы ас ішкенде бірігеді. Осы жерде есті сөз айтылса, ол естен кетпесі анық. Сол секілді ас үстінде қажетсіз нәрсені айту да әдетке айналып кетеді. Ата-ананың үлгісін әлбетте бала қайталайды. Сондықтан да бала тәрбиелі болуы үшін ата-ана өзін-өзі үнемі тәрбиелеп отыруы қажет. Аллаға шүкір, балаларымыз бізді жерге қаратпады. Керісінше өзгелер «Осы балалар секілді болыңдар» деп үлгі етеді. Оған бір жағынан қуанып, екінші жағынан тәубе етемін. Баланың жақсы болуы – Жаратушыдан берілген үлкен сый емес пе? Оларға жастайынан ағайын-туыстың кім екенін, оларға деген құрметті үйреттік. Балаларымызға дауыс көтеріп сөйлемедік, төмпештеп ұрған да жоқпыз. Бар-білген біліміміз бен жиған тәрбиемізді бойларына сіңіруге тырыстық. Кейде олар менен «сізге не сыйлық алайық?» деп сұрайды. Маған сендердің аман-сау болғандарың үлкен сыйлық деймін. Расымен де маған ұрпағымның амандығы қымбат, – дейді ардагер ұстаз.&nbsp;</blockquote>Назымкүл Бүркітбаева ауданның білім саласының дамуына қомақты үлес қосқаны үшін құрмет грамоталарымен, алғыс хаттармен марапатталды. Ұлы Отан соғысындағы «Жеңістің 65 жылдығы», &nbsp;«Жеңістің 70 жылдығы» «Жеңістің 75 жылдығы» &nbsp;медалі, «Текей батырдың 350 жылдығы», «Қармақшы ауданының 90 жылдығы» медальдарын тағынған.«Дүниеде көп адамды бақытқа кеңелткен адам – бақытты» деген ұлағатты сөз бар. Қаншама шәкірттердің қолына бақыт, білім кілтін ұстатқан ұстаз Назымкүл Бүркітбаева – бақытты жан, ардақты ана, аяулы әже, ұлағатты ардагер ұстаз. Жан-жағы ұрпағымен жайқалып отырған Назымкүл апамызға денсаулық тілеп, әлі де қоғамға пайдасын тигізіп, ұрпақтарға үлгі бола берсін деген ниетпен құт қонған шаңырақтан аттандық. &nbsp;

Саналы ғұмырын ұстаздық жолға арнаған ардагер ұстаз

<a href="https://kyzylorda-news.kz/">Kyzylorda-news.kz</a> Қала әкімі Серік Қожаниязовтың төрағалығымен кадрлық өзгерістерге байланысты актив отырысы өтті. Онда шаһар басшысы қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі мен құрылыс бөлімінің басшыларын таныстырды.Бірыңғай конкурстық комиссияның қорытындысы негізінде қала әкімінің өкімімен Әбсұлтанов Мұрат Байғабылұлы қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы қызметіне тағайындалды.Мұрат Байғабылұлы 1986 жылы Қызылорда облысы, Қазалы ауданында дүниеге келген. 2008 жылы М. Тынышбаев атындағы Қазақ көлік және коммуникациялар академиясында «Көлік, көлік техникасы және технологиясы», 2014 жылы «Ақмешіт» гуманитарлық-техникалық институтында «Экономика» мамандығы бойынша білім алған.Еңбек жолын Қазалы аудандық №5 кәсіптік лицейдің мұғалімі болып бастаған. 2013-2023 жылдар аралығында Сырдария аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің бас маманы, басшының орынбасары, басшысы, Қазалы аудандық құрылыс, сәулет және қала құрылысы бөлімінің басшысы болды.2023 жылдан бастап Қазалы ауданы, Әйтеке би кентінің әкімі қызметін атқарып келді.Ал, бұған дейін қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы болған Файзуллаев Жеңісбек Исламұлы қала әкімінің өкімімен қалалық құрылыс бөлімінің басшысы қызметіне тағайындалды.Жеңісбек Исламұлы 1992 жылы Қызылорда қаласында дүниеге келген. Жоғары білімді. Қорқыт ата атындағы Қызылорда мемлекеттік университетін 2014 жылы «құрылыс» мамандығы бойынша тәмамдаған.Еңбек жолын 2012 жылы Қызылорда қалалық құрылыс бөлімінде маман ретінде бастаған.2015-2022 жылдары Қызылорда облысының құрылыс, сәулет және қала құрылысы басқармасында бас маман, 2022 жылы Сырдария аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы, 2022 жылдың қараша айынан бастап осы кезге дейін қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы қызметтерін атқарды.Фото: қала әкімдігі

Қазақстан және Қызылорда облысының жаңалықтары