<a href="https://kyzylorda-news.kz/">Kyzylorda-news.kz</a> &nbsp;Бү­гінде Сырдария ауданында білімді, талантты, талапты жеткіншектер жетерлік. Осы ретте, елу жылдан аса тарихы бар «Өнер» мектебінің өнерлі жеткіншектерінің жеткен жетістіктері бір төбе. Өлмес мұ­ра, өш­пес қазына са­на­латын қа­зақ халқының музы­ка өнерін жоғары қоя біл­ген жас таланттар аудан мерейін үстем ету­­де. Жеті нотаны жетік меңгерген жас балғындар Бекарыс Оразалы, Аяна Туранова, Асылай Ағыбай кәсіби тұрғыдан музыка саласына дағдылануда.Киелі сахнада күмбірлете күй орындап, ауданның мақтанышына айналған Бекарыс Оразалы 7 жасынан бастап «Өнер» мек­тебіне қабылданған. Тарихы тереңнен сыр шертетін №36 Ә.Тәжібаев атындағы мектеп-лицейдің 3 сынып оқушысы сабағымен қатар өнерін бірге алып жүрген озат оқушы. Өнерімен көпшілікке танымал бола бастаған жас күйші Құрманғазы мен Тәттімбет тей күйші болуды армандайды. Талантты өнерпаздың жетекшісі өз ісінің маманы Талғат Сәдуақас шәкіртінің болашағынан зор үміт күтеді.<blockquote>– Бекарыс берілген тапсырмаға ұқыптылықпен, зор жауапкершілікпен, бар құлшынысымен кіріседі. Талабы таудай Бекарыс 9 жаста болса да күрделі, қиын күйлер мен шығармаларды орындайды. Құдыретті өнердің қасиетін ұғынған шәкіртім келешекте қазақ елінің атын әлемге танытатын керемет өнер иесі, домбырашы болатынына сенемін, – дейді жетекшісі Талғат Садуақас.</blockquote>Жас өнерпаз аудандық, облыстық, республикалық байқауларда топ жарып жүр. Атап айтқанда, ХIV халықаралық "Самға әуен" балалар байқауынан І орын, республикалық «Ұлы дала ұландары» байқауында бас жүлде, республикалық «Ақберен» байқауынан І орын иеленді. Мұнан бөлек халықаралық «Бозторғай» фестивалінің облыстық кезеңінің дипломанты атанды.Скрипка мен фортепианоның тілін қатар меңгерген Аяна Туранова – №36 Ә.Тәжібаев атындағы мектеп-лицейдің 5 сынып оқушысы. Таланты мен қабілетін ұштастыра білген Аянаның мақсаты айқын, арманы асқақ. Талай жарыстан жүлделі орынмен оралған жас өнерпазға скрипкадан Роза Арғынбаева, фортепианодан Салима Усманова сабақ береді.<blockquote>– Аяна өте талантты, табиғатынан алғыр. Қандай шығарма болсада тез игеріп, әркез ізденіс үстінде жүреді. Екі аспапты да жоғары деңгейде меңгеруде. Қатысқан байқауларынан жүлделі орын алып келеді. Байқоңыр қаласында өткен ІІ облыстық «Күй табиғаты» байқауында І дәрежелі лауреат атанса, республикалық «Ақберен» байқауынан І орын, республикалық «JasSTAR» балалар, жасөспірімдер және жастар фестиваль-конкурсында І дәрежелі дипломымен марапатталды. Фортепианодан да көптеген байқауларға қатысып, өз өнерін көрсетіп жүр. Қазақ сахнасында өнерімен талайдың жүрегінен орын алатын өнер адамы болатынына сенемін, – дейді білікті ұстаз Роза Арғынбаева.</blockquote>Талантымен талай көрерменің көңілінен орын алған Асылай Ағыбай Шара Нұрадинованың шәкірті. Асылайдың өнерге деген қызығушылығын байқаған ата-анасы «Өнер» мектебіне 7 жасынан бастап берді. Алғаш қабылданған сәтінен бастап қабілетімен ерекшеленді. Талантты жас өнерпаз көнеден келе жатқан қазақ халқының музыкалық аспабы – қобызды жетік меңгеруде.<blockquote>– Асылай Ағыбай №35 Иса Тоқтыбаев атындағы мектеп-лицейдің 3 сынып оқушысы. Мектептегі іс-шараларға белсенді қатысады, сыныбының білімді, алғыр оқушысы. Біліммен қатар өнерді қатар алып жүрген, болашағынан зор үміт күттіретін шәкіртімнің бірі, өте талантты. Үйреткен шығармаларды тез қабылдап алады. 2022 жылы қобыз сыныбына қабылданғаннан бастап аудандық, облыстық, республикалық байқаулардан жоғарғы орындардан көрінуде. Байқоңыр қаласында өткен ІІ облыстық «Күй табиғаты» байқауында ІІ дәрежелі лауреат атанды. Республикалық «Ақ шағала» байқауынан І орын, республикалық «Ақберен» байқауынан І орын иеленді. Сонымен қатар, «Асыл моншақ» қобызшылар ансамблінің мүшесі. Қобызшылар ансамблі республикалық «Алтын қазына шығармашылық» байқауына қатысып, бас жүлде алды. Асылай қазіргі таңда қазақ, шетел композиторларының шығармаларын орындап жүр, – дейді шәкіртінің қабілетін шыңдай білген ұстазы Шара Нұрадинова.</blockquote>«Өнерге әркімнің-ақ бар таласы» дегендей, осындай талантты, өнерлі өнерпаздардың қатары көбейген сайын өнердің өрісі кеңейе түседі.

Сырдариялық өнерпаздар республикалық байқауларда өнер көрсетуде

<a href="https://kyzylorda-news.kz/">Kyzylorda-news.kz</a> Жаңғыру мен жаңаруға бет алған қоғамда мемлекеттік қызметке деген сұраныс талабы жыл сайын күшейіп келеді. Бұл ретте Президент бастамасымен кәсіби мемлекеттік аппарат құру және мемлекеттік қызмет аясын кеңейту жұмыстары өз деңгейінде жүргізіліп, тиімділігін таныта бастады. Әрбір қызметті оңтайлы әрі қолжетімді ету бағытында мемлекеттік қызметшілер табанды еңбек етуде. ҚР Мемлекеттік қызмет істері агенттігі облыс бойынша департаментінің мемлекеттік қызметтер көрсету&nbsp;басқармасының басшысы&nbsp;Нұржан Сүлейменов осылай дейді.Мемлекет тарапынан көрсетілетін қызметтер уақыт ағымына сай трансформация кезеңін өткеріп келеді. Себебі сан алуан қызмет қоғам өмірінің ажырамас бөлігіне айналды. Мәселен, туу туралы куәлікті алудан бастап азаматтың қайтыс болғаны туралы анықтаманы беру көрсетілетін қызметтің ауқымды екенін айғақтай түседі.«Мемлекеттік көрсетілетін қызметтер туралы» заңға сәйкес кез келген тұлға &nbsp;қызмет алуға және қызметті берушінің шешімдеріне, әрекеттеріне (әрекетсіздігіне) белгіленген тәртіппен шағымдануға құқығы бар.Бұл ретте департамент тарапынан азаматтардың құқықтары мен заңды мүдделерінің қорғалуына ерекше басымдық беріледі.<blockquote>−Мемлекеттік қызмет істері агенттігінің облыс бойынша департаменті облыс көлемінде мемлекеттік қызметтер көрсету сапасын бағалау және бақылау жөніндегі уәкілетті орган болып саналғандықтан, халыққа сапалы, қолайлы жағдай жасау, қызмет көрсету процестерін жетілдіру және қызмет алушылардың бұзылған құқықтарын қалпына келтіру бойынша жұмысты жүйелі түрде атқарып келеді.</blockquote>Биыл департаментке мемлекеттік қызмет көрсету мәселелері бойынша азаматтардың 30-ға жуық арыз-шағымы келіп түсті. Шағымдардың 90%-ы жер қатынастары және әлеуметтік қамсыздандыру салаларында көрсетілетін мемлекеттік қызметтерге қатысты өрбіді. Арыздар қорытындысы бойынша 3 азаматтың шағымында көрсетілген дәлелдер расталып, құқықтары қайта қалпына келтірілді. Мәселен, сәуір айында Қызылорда қаласының тұрғыны департаментке жер учаскесінің жалдау мерзімін ұзарту бойынша мемлекеттік қызмет көрсетуден бас тарту фактісіне қатысты шағым түсірген, − дейді ол.Аталған іс бойынша департамент Қызылорда қаласы әкімі аппаратына, қалалық ауыл шаруашылығы және жер қатынастары бөліміне тексеру жүргізіп, нәтижесінде Қызылорда қаласы әкімі аппараты мемлекеттік қызмет көрсетуден негізсіз бас тартқанын анықтады.Енгізілген ұсыным негізінде бұзушылықтарға жол бергені үшін Қызылорда қаласы әкімі аппаратының жауапты маманының тәртіптік жауапкершілігі қаралып, қала тұрғынының өтініші қанағаттандырылып, бұзылған құқықтары қалпына келтірілді. Өз кезегінде, шағымданушыға ғимарат құрылысы және оған қызмет көрсету үшін жер учаскесіне уақытша өтеулі жер пайдалану (жалдау) құқығы жаңа мерзімге табысталды.Атап өту керек, мемлекеттік қызметтерді сапалы әрі мерзімінде көрсету нәтижесі, қызмет алушылардың құқықтары мен заңды мүдделерінің сақталуы – мемлекеттік аппараттың тиімділігін бағалаудың негізгі шарты.Қоғаммен ашық қарым-қатынас орнату және шағымдарды дереу анықтау мақсатында биыл барлық өңірде мемлекеттік қызметтерді алу саласындағы мәселелерді жедел шешуге және қызмет алушылардың құқықтары мен заңды мүдделерінің бұзылуына жол бермеу үшін QR-кодтары көрсетілген Telegram арнасы іске қосылды.Жаңа арна арқылы азаматтар қандай да бір қызметті алу кезінде туындаған проблемалары бойынша шағымдарын ашық жолдай алады. Осылайша, қызмет алушылардың құқықтарын қорғау аясында департамент мемлекеттік көрсетілетін қызметтердің сапасын тиісті бақылауға жол ашады.Біз әрдайым мемлекет мүддесіне сай мемлекеттік қызметтерді көрсету барысындағы жеке және заңды тұлғалардың құқықтарының сақталуына ерекше басымдық береміз. Алдағы уақытта да бұл мәселелер департаменттің жіті бақылауында болады.Фото: tengrinews.kz

Басты міндет − жүйелі жұмыс, сапалы қызмет көрсету 

<a href="https://kyzylorda-news.kz/">Kyzylorda-news.kz</a> Пифагор ілімінен бас­тау алатын, мыңдаған жыл тарихы бар математика саласында сан түрлі теория бір ғылымның түпқазығы саналады. Нақты ғылымға негізделген аталған пән адам өмірінде ешқашан өзектілігін жойған емес. Есеп-қисаптан тұратын күрделі ілімді игерген жетікөлдік Айнаш Пайзекеева талай үздіктің бағын ашқан десек, қателеспейміз. Арманы асқақ оқушының болашағына ерекше әсер ететін ұстаз тағылымы өмірлік азық екені даусыз.Балаға формула жаттатып, теориялық білімді практикалық тұрғыдан меңгертетін аяулы жан әрбір сабаққа дайындықпен келеді. Себебі сыныптағы барлық оқушыны бір мезетте есеп-қисапқа баулу оған асқан жауапкершілік жүктейді. Шын мәнінде, тәжірибесі толысқан ұстаз 1986-1991 жыл аралығында Н.В.Гоголь атындағы педагогикалық институтының математика және физика пәнінің мұғалімі мамандығы бойынша тәмамдаған. Расында, 32 жылдық еңбек өтілі бар Айнаш Қалдыбекқызы дарынды балалардың жол бастаушысы саналады.<blockquote>– Үнемі шәкірттеріме білімді ұрпақ қана биікке шығатынын айтудан жалықпаймын. Қашанда білек сүріңдіре алмағанды, білім сүріндіретінін ұмытпаған абзал. Ұстаз болудан жалықпаған адам сүйікті ісінен еш уақытта ажырамайды. Өзім ауыл мектебінде қызмет ете жүріп, аға буынның тәлімін ала білдім. Алғаш оқу бітірген сәттен сүйікті мамандығымның үздігі атануға бекіндім. Іздене жүріп, үйрендім, шәкіртіме бар білгенімді игерте білдім. Математика пәні бұрмалауға жол бермейді. Сондықтан «Математика – ғылымдар патшасы» деп бекер айтылмаса керек-ті, – дейді тәжірибесі мол жан.</blockquote>Бағасы құнды зат қай кезде де тот баспайтын секілді ұстаздың өмірден түйгені ешқашан сарқылмайды. Шындығында Айнаш Пайзекееваның бірнеше ғылыми еңбегі арнайы жинаққа енген. Сонымен қатар оның шәкірттері талай жарыста шашасына шан жұқтырмаған білімпаз қатарынан көрінген. «Кенгуру», «Ақ бота», жалпы білім беретін пәндер бойынша республикалық олимпиаданың бірнеше кезеңінде, ерекше білім беруге қажеттіліктері бар балалар арасындағы «Менің қолымнан бәрі келеді» тақырыбындағы облыстық олимпиадада оқушылары даралана алған.Жері ырысты бола білген, Сыр салысымен аты шыққан Шиелі ауданының тумасы Айнаш Пайзекеева әркез қайсарлық пен тегеурінділік танытып, өткен жылдары іргелі білім ошағынан 4 «Алтын белгі» иегері шығуына себепкер атанған. Отбасында 3 ұл, 2 қыз тәрбиелеген ұлағатты ұстаз бала санымен зейнет демалысына шыққан. Десек те, ақ жүректі ана сүйікті ісіне барынша адалдық танытып келеді.<blockquote>– Аядай ғана ауылда білім сапасын арттыруға бар ғұмырымызды арнай білген едік. Педагогикалық жұмыс өтілімде 4 сыныптың жетекшісі атандым. Жалпы, мектепте жаратылыстану-математика бірлестігінде 11 мұғалім жұмыс жасаймыз. Бір-бірімізбен тәжірибе алмасып, көптеген семинар алаңында бас қосамыз. Ұжымның мерейін тасыту мақсатында халық баласына сапалы білім беруге қашанда ынталымыз. Биыл бір оқушым «Алтын белгі» иегері атануда. Бұл мен үшін – зор мәртебе. Әрдайым бала бағбаны бола жүріп, еңбегіміздің жемісін көру – керемет сезім, – деді аяулы жан.</blockquote>Әрине, үздіктердің үздігі бола білген аяулы ұстаз әлі талай дарынды шәкірттердің бағын еселей бермек. Өз кезегінде биыл «Алтын белгіге» үміткер атанған бітіруші түлек Айым Мұрат ұстазына өз алғысын жеткізді.<blockquote>– Менің аяулы ұстазым Айнаш апай математика пәнінен баулыды. Есеп-қисапты шығаруды үйретіп, күрделі формулалардың шешімін табуға көмектесті. Біз ұстазымыздың еңбегін жоғары бағалаймыз. Бұған дейін талай шәкіртке бағыт-бағдар берген ұстазымның үмітін ақтауға барымызды саламыз. Бірер күннен кейін ҰБТ-дан жоғары балл алып, жақсы нәтижеге қол жеткізгіміз келеді, – дейді бітіруші түлек.</blockquote>

Айнаш Пайзекеева: Математика пәні бұрмалауға жол бермейді

<a href="https://kyzylorda-news.kz/">Kyzylorda-news.kz</a>&nbsp; Қоғам қайшылықтарға толы. Сондықтан қазір адам құқығының бұзылуы ешкімді таңғалдырмайды. Оның ішінде балалар және жасөспірімдер құқығын қорғаудың қаншалықты маңызды екені айтпасақ та түсінікті болар. Бұл орайда балалардың қауіпсіздігін сақтай отырып, олардың тиісті әлеуметтік көмек алу құқығын қамтамасыз ету – кезек күттірмейтін жауапты жұмыстардың бірі екені даусыз.Өзімізге келсек, өңірдегі 764 ата-ана қамқорлығынсыз қалған баланың 681-і отбасы тәрбиесінде болса, 83-і интернаттық мекемелерде лайықты жағдаймен қамтылған. Бастапқы есепке алынған осы санаттағы балалардың 80 пайызы бүгінде отбасына орналастырылған.Балалар құқығын қорғаудың тағы бір мүмкіндігі «Тұрғын үй қатынастары туралы» ҚР Заңына сәйкес жүзеге асырылып келеді. Айталық, бүгінде әлеуметтік жағынан әлсіз топқа жататын, ата-ана қамқорлығынсыз қалған балалардың 20 пайызы &nbsp;тұрғын үймен қамтылып отыр. &nbsp;Өткен &nbsp;жылы осы санаттағы 100 бала баспаналы болған еді.<blockquote>– Өңірде ерекше білім беруді қажет ететін 7494 бала есепте тұрады. Оларды арнайы біліммен қамту үшін психологиялық-медициналық-педагогикалық консультация (ПМПК), психологиялық-педагогикалық түзеу кабинеті, оңалту орталығы, арнайы мектеп-интернат, аутизм орталығы сияқты 23 білім беру ұйымы жұмыс істейді. Биылғы оқу жылында психологиялық-педагогикалық қолдаумен 6298 бала қамтылды. Сонымен қатар, білім беру ұйымдарында балалардың инклюзивті білім алуына жағдай жасалған. &nbsp;Бұған сәйкес өңірде қабылданған Жол картасы аясында &nbsp;162 балабақша, 170 мектепте &nbsp;инклюзивтік қолдау кабинеттері, 8 мектепте ресурстық орталықтар ашылып, арнайы мамандар бөлінді. &nbsp;2025 жылға дейін қосымша 14 инклюзивтік кабинет &nbsp;ашу жоспарланып отыр, – дейді облыстағы бала құқықтары жөніндегі &nbsp;уәкіл М.Бисенова.</blockquote>Бүгінде Қызылордадағы 2 колледжде ерекше білім беруге қажеттілігі бар студенттерге инклюзивтік қолдау кабинеттері ашылып, қызмет көрсете бастады. Сонымен қатар өткен жылы М.Мәметова атындағы жоғары педагогикалық колледжінде инклюзивтік ресурстық кабинет ашылып, &nbsp; арнайы мамандар оқытылуда. Әлеуметтік осал топтағы балаларды қолдау мақсатында өткен оқу жылында 80 мыңнан астам бала қаржылай көмек алды. Сондай-ақ бүгінде барлық мектепте бастауыш сынып оқушылары 100 пайыз тегін тамақтанады.Балалардың қауіпсіздігін қамтамасыз ету үшін 644 білім беру ұйымына заман талабына сай бейнебақылау жүйесі орнатылды. Облыс орталығындағы бала саны 700-ден асатын білім беру ұйымдары турникет, лицензияланған күзетпен қамтамасыз етілген.Кәмелетке толмағандар арасындағы қылмыс пен құқық бұзу, &nbsp;суицид, зорлық-зомбылық, буллинг, кибербуллингтің алдын алу мақсатында &nbsp;қабылданған жоспарға сай тоқсан сайын бірыңғай сабақтар өткізудің бағдарламасы әзірленді.Зорлық-зомбылық қаупінде тұрған немесе оған ұшыраған балаларды анықтау, оларды психологиялық қолдау бағытында «Бақытты және қауіпсіз балалық шақ» жобасы жүзеге асырылуда. Бұл ретте 478 тұрмысы төмен, әлеуметтік аз қамтылған отбасынан шыққан баланың әрқайсысына жеке талдау жасалып, өмірдің қиын жағдайында қалған отбасылар сүйемелдеуге алынған. Сонымен қатар, мектепшілік есепке алынған 530 балаға мекен-жайлық әлеуметтік-психологиялық көмек берілді. Айта кетейік, психологиялық қолдау тобына алынған 688 балаға мектеп психологі, денсаулық сақтау саласының мамандары жәрдемдеседі. Бұдан бөлек, &nbsp;күрделі жағдайларды қарау және шешу бойынша облыстық білім басқармасы жанынан өңірлік психологиялық-педагогикалық консилиум құрылды.Зорлық-зомбылық, буллингке ұшыраған және өмірдің қиын жағдайына тап болған балаларға қолдау көрсету жұмыстарын күшейту мақсатында облыс әкімінің қолдауымен &nbsp;облыстық психологиялық қолдау орталығы ашылды. Психологтарға әдістемелік көмек көрсете отырып, орын алған олқылықтарды оңалтуға, қиындықтардың алдын алуға басымдық береді. Соның бір көрінісі, жасөспірімдер арасында құқықбұзушылықтың алдын алуға бағытталған «Менің бауырым» еріктілер жобасы басталды. Бұл жоба бірінші кезекте қала ішінде орналасқан 43 мектепте жүзеге асырылуда. Алдағы оқу жылынан бастап барлық аудандар қамтылады. Бұдан бөлек, «Біртұтас тәрбие бағдарламасы», «Сыр лигасы» жобасы жүзеге асырылуда.Облыста 62 қосымша білім беру ұйымы, мектеп жанынан ашылған қосымша спорттық секциялар мен үйірмелер бар. Соның нәтижесінде, бүгінде жалпы білім алушылардың 86 пайызы &nbsp;қосымша біліммен &nbsp;қамтылған.Балалардың құқықтарын қамтамасыз ету мақсатында облыстық білім басқармасында тұрақты 3 жұмысшы топ құрылған. Аталған топтар балалардың ыстық тамақпен қамтылуын, суицид және зорлық-зомбылықтың алдын алу, мүмкіндігі шектеулі балалардың білім алуы сияқты мәселелерді үйлестіреді.Балалар құқығын қорғау, олардың қауіпсіздігін қамтамасыз ету мәселесі күн тәртібінен түспейді. Мәселен, облыс әкімінің қатысуымен білім саласы бойынша ұйымдастырылған кеңейтілген мәжілісте көптеген күрделі мәселенің себеп-салдарына талдау жасалып, соған сәйкес балалардың қауіпсіздігін қамтамасыз етуге бағытталған жаңа жоспар түзіліп, қосымша &nbsp;міндеттер қабылданды.&nbsp;

Бала қауіпсіздігі – өзекті мәселе

Арал ауданында денсаулық саласы қарқынды дамып келеді 

<a href="https://kyzylorda-news.kz/">Kyzylorda-news.kz</a> Берекелі отбасының мызғымас тірегі, баға жетпес байлығы, мәні де сәні, ұрпағының жалғасы бала екені даусыз. «Адам өміріндегі ең үлкен қуаныш бала сүю» деген екен батыр бабамыз Бауыржан Момышұлы. Шындығында, әрбір жан үшін отбасын құрып, өзінің ұрпағын сүю – үлкен бақыт.Жаңадан отбасын құрған жас отбасының ең асыға күтетіні былдырлаған сәби дауысы. Жастар отбасылы болған соң, ағайын-туыс пен жора-жолдас «тоғыз ай тоғыз күннен соң шілдехана-бесік тойға келейік» деп тілекші болып жатады. Иә, мұндай ізгі ниеттің айтылғаны орынды шығар. Дегенмен қазіргі таңда бір перзентке зар болып, сәбилі бола алмай жүрген отбасылар қаншама. Бұл соңғы кезде үлкен мәселеге айналып барады. Тіпті бұның соңы отбасылардың екі жаққа кетіп, ажырасуына себеп болуда.ҚР денсаулық сақтау министрлігінің мәліметі бойынша Қазақстанда 20 мыңға жуық отбасы перзент сүйе алмай жүр екен. Дәрігер мамандардың айтуынша, жас жұбайлардың бірінде белсіздік болса, бірінде бедеулік, ал кейбірінде суық тию сияқты, жатырдың қабынуы және тағы да басқа өзіндік бірқатар себептері анықталған дейді. Елімізде соңғы уақытта белсіздік пен бедеулік ауруы көбейіп, белең алуда. Қуанышқа орай бүгінгі медицинаның өздігінен босана алмайтын жандарға көмектесе алатындай қауқары бар. Бұл әрине қуантарлық жағдай. Көбісі бедеулік диагнозы қойылса, мүлдем балалы бола алмайды деп ойлап жатады. Ақ халатты абзал жандардың айтуынша бұл қате әрі жансақ түсінік. Бүгінгі таңда оны емдеудің түрлі әдіс-тәсілдері бар көрінеді. Ал оған үлкен шыдамдылық пен сабырлық қажет. Себебі, тексерілудің өзі шамамен 2-3 айға созылуы мүмкін.Бедеулікті бұрындары тек әйелдерден ғана еститін едік, ал қазір бұл ерлер қауымының арасында өте жиі кездесіп жүр. Бір өкініштісі, қазақ отбасында мұндай тақырыптағы мәселені көбінде әйел адамға ысырып қоятыны барлығына белгілі. Қазіргі уақытта мамандарды әсіресе ерлердің денсаулығы алаңдатуда. Сол себепті бұл диагноз әйелдер мен ерлерде бірдей қатар жүретін ұмытған жөн. Акушер-гинеколог мамандарының тәжірибесінде әрбір алтыншы отбасына бала сүю бақыты бұйырмай, ЭКО-ға жүгінуге мәжбүр екенін айтып, және олардың саны артып келеді деп дабыл қағуда. Эко – бұл қарапайым тілмен айтқанда жасанды ұрықтандыру. Дәлірек айтқанда, экстракорпоральды ұрықтандыру – әйелдің денесінен тыс, яғни жасанды жағдайда жұмыртқаны ұрықтандыруға мүмкіндік беретін көмекші репродуктивті технология. Жұмыртқа жасушасы әйелдің денесінен алынып, «құтыда» жасанды ұрықтандырылады. Алынған эмбрион бірнеше күн бойы инкубатор жағдайында ұсталады, содан кейін одан әрі даму үшін жатыр қуысына ауыстырылады.<blockquote>– Қазіргі таңда Қазақстанда орта есеппен алғанда 15 пайызға жуық отбасы бала сүюді аңсап жүр. Жаңа технология көмегімен балалы болу бақытына қол жеткізіп жатқандар да аз емес. Мемлекет тарапынан осындай отбасыларды қолдау мақсатында «Аңсаған сәби» арнайы бағдарламасы аясында тегін квота қарастырылған. Менің ойымша сәбилі бола алмай жүрген отбасыларға бұл үлкен қуаныш, таптырмас мүмкіндіктің бірі. Тұрмыстық жағдайы төмен, шама-шарқы жетпейтін қаншама отбасы бар. «Аңсаған сәби» бағдарламасы бір перзентке зар болып жүрген талай жандардың үміт отын жақты. Негізінен елімізде жасанды ұрықтандыру 1996 жылдан бері қолданыста. Сол уақыттан бері 25 мыңнан аса сәби өмірге келді. Аталған медициналық емнен тегін өту мүмкіндігі 14 жылдан бері қолжетімді болып келеді. Елімізде соңғы екі жылда экстракорпоральды ұрықтану арқылы 10 мың бала өмірге келіп, қаншама отбасының шаңырағы шаттыққа кенелді. Сырдария ауданы бойынша мұндай диагнозбен тіркелген жандар жоқ емес. Қазіргі таңда осы мәселемен қарқынды &nbsp;жұмыс жасаудамыз. Өтініш білдірген отбасыларды тегін квотаға алдымен тексеріп, содан кейін ғана тіркейміз. Онан соң анализ нәтижесі бойынша талапқа келсе тегін квотаға тіркейміз. Кезегі келген кезде бірден хабарлап, жолдама береміз. Сол бойынша клиникамен хабарласып, өз тарапымыздан көмегіміз бен қолдауымызды көрсетеміз, – дейді Сырдария аудандық емханасының бас акушер-гинекологы Нейла Темірханқызы.</blockquote>Ел Президенті Қасым-Жомарт Кемелұлы Тоқаев 2021 жылдан бастап «Аңсаған сәби» арнайы бағдарламасын іске қосуды тапсырған болатын. Осы орайда экстракорпоральды ұрықтандыруға бөлінетін квотаның саны 7 мыңға дейін артқан. Мыңдаған отбасы осы бағдарламаның игілігін көріп, сәби сүю бақытын сезініп отыр. Елімізде «Аңсаған сәби» арнайы бағдарламасы аясында бірқатар игі істер жалғасын табуда. Бұл бағдарлама бедеулік диагнозы қойылған азаматтарға арналады. Аталған бағдарламаға қатысудың бірқатар талаптары мен шарттары қарастырылған. Бағдарламаға қатысу үшін ең алдымен Қазақстан азаматы болуы тиіс және денсаулық сақтау министрлігі белгілеген медициналық талаптарға сәйкес келуі қажет. Одан бөлек 18 бен 49 жас аралығындағы жандар қатыса алады. ЭКО-ға жолдама алу үшін ең бірінші тұрғылықты тіркелген мекен-жай бойынша емханаға бару міндетті. Сол жерде жолдама алуға өтініш берушіні бедеулігі бар диспансерлік пациенттердің электрондық тізіміне қосады. Онан соң бірқатар тексерістен өтіп, 12 айдың ішінде емхана бейінді маманның қорытындысы негізінде пациенттің құжаттарын жоғары технологиялық медициналық қызметтер жөніндегі жергілікті комиссияға жібереді. Комиссия оң шешім шығарған жағдайда әйелді «Емдеуге жатқызу бюросы» порталына тіркеп, емшараға дайындық жұмыстары басталады. Пациент экстракорпоральды ұрықтандыру клиникасын өзі таңдай алады. «Аңсаған сәби» бағдарламасы бойынша экстракорпоральды ұрықтандыру процедурасы жылына тек бір рет қана тегін жасалады.2021 жылдың соңында «Аңсаған сәби» бағдарламасының алғашқы сәбиі дүниеге келген болатын. Сәби сүю Дана есімді кейіпкеріміз үшін қол жетпес арман еді. Дегенмен армандар орындалатынына оның көзі жеткендей. Тоғыз жыл балалы болуды аңсап, бір сәтке үмітін үзбеген ол үмітінің ақталып, оң нәтиже бергеніне әлі күнге сене алар емес және бәріне шүкіршілік етеді.<blockquote>– 9 жылдан бері күткен қуанышымыз –осы. Сезімді айтып жеткізу мүмкін емес. Осы «Аңсаған сәби» бағдарламасын қабылдаған Президентімізге рахметімізді айтамыз. Барлық аңсаған аналарға осындай бағдарламалар арқылы көбірек квота бөлініп, ана бақытын барлығы сезінсе екен деп тілеймін, – дейді Дана Өмірбекова.</blockquote>ЭКО әдісін жасатудың бағасы шамамен 1 миллион теңгеге дейін барады. Ал жекеменшік клиникаларда ЭКО-ның бағасы 1 миллион теңгеден басталады. Бірақ оның нәтижелі болу болмауына ешқандай кепілдік берілмейді. Тегін квота жүктілікке кедергі келтіретін қандай да бір ауыр ауруы бар адамдарға берілмейді.Тегін квотаны тек ерлі-зайыпты отбасылар ғана емес, сонымен қоса заңды некеге тұрмаған әйелдер де алуға толық құқығы бар. Жоғарыда айтып өткеніміздей жасанды ұрықтандырудың тегін квотасы жылына тек 1 рет қана беріледі, және жүктілік сәтті болмаған жағдайда қайта кезекке тұруға болады.Жасанды ұрықтандырудың пайдасы мен зияны, артықшылығы мен кемшілігі туралы көптеген пікір бар. Бірі бұл әдіспен жүкті болғандар қатерлі ісік ауруына шалдығуы мүмкін десе, ал екіншісі мұндай жолмен дүниеге келген балаларда кейіннен қиындықтар туындайды деседі. Дегенмен жасанды ұрықтандырудың оң немесе теріс жақтары әлі толық зерттелмеген, алайда назар аударатын өзіндік ерекшеліктері бар. Егер де бедеулікті емдеу әрекеттері нәтижесіз болса, онда ЭКО әдісіне жүгінген жөн дейді мамандар. Эконың кемшіліктері тек әйелдің жалпы жағдайында және артық салмақ қосуында. Бірақ бұл мәселелер уақытша және оның шешімі де бар. Балалы болудың жанында бұл салыстыруға да келмейтіндей мәселе екені сөзсіз.<blockquote>– Қазіргі кезде көп қыз-келіншектер дұрыс күтінбейді, денсаулығына салғырт қарайды. Көптеген зиянды тағамдар мен түрлі химиялық сусындарды тұтынады. Оның құрамы мен жасалу әдісіне мән бермейді де. Одан бөлек суық күндері өте жұқа киініп, аяққа және тағы да басқа маңызды мүшелеріне суық тигізіп алады. Тағы бір айта кететін жайт, көп жастардың жыныстық сауаттылығы өте төмен. Оның себебі ата-ана тарапынан балаға бұл жөнінде толыққанды ақпарат берілмейді. Бұл жөнінде тек отбасында ғана емес, мектеп қабырғасында да айтылуы тиіс. Жыныстық сауаттылықтың болмауынан қазіргі қаншама жас қыздар инфекциялық ауру жұқтырып, ерте жүктілік және түсік тастаудың құрбаны болып отыр. Сонымен қоса соңғы кезде денсаулығына айтарлықтай кері әсерін тигізетін көбінесе шылым, электронды вейб және сол сияқты зиянды заттарды пайдаланып жүрген қыздарды көреміз. Сол себепті бұл жағдайға бей-жай қарамай, үлкен жауапкершілікпен қарау керек деп кеңес беремін, – дейді білікті маман.</blockquote>Бүгінгі медицинаның дамуы адамзатқа үлкен мүмкіндік беріп отыр. Соның ішінде жасанды ұрықтандыру арқылы қаншама отбасыға өлшеусіз бақыт сыйлады. Жаңа технология заманында адамның жатырына қолдан бала салу ғылымдағы ең үлкен жетістік екені даусыз. Игілікті істің жаршысы, қаншама отбасына бақыт сыйлаған ақ халатты абзал жандардың еңбегі ерен. «Балалы үй – базар, баласыз үй – қу мазар» деп дана халқымыз текке айтпаса керек. Әр шаңырақты нұрға бөлеп, екі жанның ортасындағы махаббат пен сүйіспеншіліктің бекем болуына бірден бір себепкер – бала.&nbsp;Сондықтан «Адамның бір қызығы бала деген...» деп бекер айтылмаған.Фото: Н.НұржаубайА.Қайратқызы

Биыл "Аңсаған сәби" бағдарламасы аясында 270 квота бөлінді

<a href="https://kyzylorda-news.kz/">Kyzylorda-news.kz</a> Қазіргі кезең бой емес, ой жарыстырғанды, жай ғана сөз емес, жасалған қадамды талап етеді. Заман талабына сай дарыны мен қарымы қатар ұштасқан жас таланттар аз емес. Облыстағы дарынды балаларды анықтау, қолдау, оқыту және дамытуға жағдай жасауды басты мақсат еткен «Дарын» облыстық қосымша білім беру орталығының үздіксіз қызмет етіп келе жатқанына биыл 17 жыл болыпты.Президент Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» тақырыбындағы Жолдауында көрсетілген «Ғылым саласын дамыту үшін бізге тың көзқарас пен жаңа тәсілдер керек. Халықаралық тәжірибеге арқа сүйеуіміз қажет. «Жас ғалым» жобасы аясында зерттеу жүргізу үшін 1000 грант бөлуді тапсырамын. Бізге елімізді ғылыми-технологиялық тұрғыдан дамыту жөніндегі арнаулы бағдарламалық құжат қажет. Оның басты міндеті ұлттық деңгейдегі нақты мәселелерді шешуге ғылымның әлеуетін пайдалану болмақ» деп ғылым саласына бет бұруға бағыт көрсетті. Орталық тарапынан да Президент Жолдауын басшылыққа ала отырып, дарынды балаларды қолдауға, дамытуға және кәсiби қалыптасуына сапалы жағдайлар жасалып келеді. Айта кетейік, биылғы оқу жылында облыстық «Дарын» орталығы 297 жалпы білім беру ұйымындағы 169475 оқушымен басты 3 бағыт бойынша жұмыс атқаруда.<blockquote>– «Ақпараттандыру және баспа қызметі» бөлімі білім саласын цифрландыру мәселелерімен айналысады. Оның ішінде облыстағы барлық білім беру ұйымдарының ұлттық білім беру деректер қорын толтыруын, электронды оқыту жүйесін сүйемелдеу, «SmartCity» тұжырымдамасын, «Кundelik.kz», «BilimLand», «Darуnonlinе», «College.sitcen.kz», «Jumys.sitcen.kz» және «Цифрлы Қазақстан» бағдарламаларын қамтиды. «Дарынды балалармен жұмыстарды ұйымдастыру» бөлімі облыстық, республикалық, халықаралық олимпиадалар, ғылыми жоба конкурстары, әртүрлі деңгейдегі олимпиадалар мен конкурстарға қатысуына ықпал жасайды. Жүзден жүйрік шыққан оқушылар жыл сайын облыс әкімінің қабылдауында болып, «Сыр дарыны» медалімен марапатталады. Жүлдегер атанған дарынды балалар жоғары оқу орнының грант иегерлері атанып, аймақ мәртебесін асқақтатуда. «Қосымша білім беру» бөлімі «Тәрбие және білім» кіші бағдарламасы шеңберінде 4 базалық бағытта &nbsp;республикалық, облыстық &nbsp;деңгейде өткізілетін шараларды, сонымен қатар ерекше білім қажеттіліктері бар балаларға арналған олимпиадалар мен түрлі іс-шараларды және студент жастардың арасында дебаттық қозғалысты ұйымдастырады.Мәселен, өткен оқу жылында халықаралық олимпиадалар мен ғылыми жобаларға 25 оқушы қатысып, 16 оқушы жүлдегер атанды. №10 дарынды балаларға арналған облыстық «Білім-инновация» лицей-интернатының 11 сынып оқушысы Қалдан Жанай Ақтөбе қаласындағы А.Жұбанов атындағы &nbsp;жоғары оқу орнының білім грантына ие болды. Ауыл балаларына арналған IQANAT олимпиадасының республикалық кезеңіне 51 оқушы жолдама алды, – дейді орталық директоры Баян Ниязова.</blockquote>Айта кетейік, биыл орталық жанынан «Дарынды балалар ұйымы» &nbsp;құрылды. Ұйымның құрамына түрлі байқаулардың 76 жеңімпазы қабылданып, облыстық «Достық керуені» фестивалі ұйымдастырылды. Фестиваль республикадағы үздік ауылдардың бірі де бірегейі – Сырдария ауданындағы Н.Ілиясов ауылынан бастау алып, әрі қарай жас таланттар Қорқыт бабамыздың кесенесіне барып, музеймен танысты. Сонымен бірге, облысымызда «Жауқазын жүрек» І облыстық жас өрендердің шығармашылығын дамытуға арналған 5-11 сынып оқушылар аралығындағы &nbsp;көшпелі әдеби алаң алғаш рет ұйымдастырылып отыр.<blockquote>– Халықаралық балаларды қорғау күні қарсаңында елордаға өз жетістіктерімен ерекшеленген балалар, балалар қозғалысының көшбасшылары және түрлі жағдайларда адам өмірін арашалап қалған батыр балалар жиналып, Оқу-ағарту министрінің Алғыс хатымен марапатталды. олардың қатарында Нұрислам Сақтаған, Бекнұр Жолдасбаев есімді екі дарынды оқушымыз да бар. Сонымен қатар 1-2 маусым күні Еркежан Әскербекова, Салтанат Абдуалиева, Амелия Пак есімді оқушылар да мерекелік шараларға қатыспақ дейді Баян Бақытжанқызы.</blockquote>Басшының айтуынша, алдағы уақытта республикалық «Дарын» орталығы облыстық бірлескен кеңес өткізуді, БИЛ жұмысын үлгі ретінде көрсетуді, олимпиадалар мен ғылыми жобаларға дайындауды, «Сыр дарыны» оқу-жаттығу жиынын ұйымдастыруды жоспарлауда.Дина Бөкебай

Білімді жасқа жол ашқан орталық

<a href="https://kyzylorda-news.kz/">Kyzylorda-news.kz</a> Облыс орталығында салынып жатқан «Қызылорда Арена» стадионы – аймақ футболының еңсесінің биік болуына кепіл ауқымды жоба. Сыр спорты үшін маңызды нысанның іргетасын қалау рәсімінде облыс әкімі Нұрлыбек Нәлібаев Тәуелсіздік жылдары елімізде заманауи екі стадион ғана салынғанын айтқан болатын.<blockquote>– Яғни «Астана арена» мен «Түркістан арена» ғана салынған. Қызылордадағы Ғани Мұратбаев атындағы орталық стадионның салынғанына 60 жылға жуықтады. Стадион УЕФА талаптарына сәйкес келмейді. Сондықтан біздің сүйікті командамыз «Қайсардың» жанкүйерлерінің ұсынысымен жаңа стадион салуға шешім қабылдадық. Баршамызға құтты болғай! – деді аймақ басшысы.</blockquote>Шынында да, еліміздегі көптеген футбол клубтарының стадиондары ескі, әбден тозығы жеткен. Тіпті көбі 4-5 жыл сайын қайта күрделі жөндеуден өткізіліп жатады. Оған өзге мемлекеттердің жаңа стадион салатын қаржысына шамалас ақша жұмсалады. Сол сомаға неге облыс орталықтарына халықаралық стандартқа сай келетін стадиондар салып алмасқа?! Бұл аймақ жанкүйерлерінің де көптен көкейінде жүрген өзекті мәселе болатын.Ал облыс басшысы айтқан екі стадионның бірі – 30 мың жанкүйер сыятын «Астана Арена», екіншісі – Түркістандағы 7 мың орындық «Түркістан Арена». Тіпті ел бойынша ұлттық құрама ойынын өткізуге лайық 2-3 стадион бар. Негізінен ойындар «Астана Арена» мен Алматының орталық стадионында өтеді. Қалған стадиондар ФИФА мен УЕФА талаптарының төменгі деңгейіне де сай келмейді.Бұл ретте құны 20 млрд теңгелік жаңа стадион халықаралық талаптарға сай болмақ. Айталық, УЕФА ареналар үшін төрт санатты белгілеген. Оған сәйкес, 4- санатқа жету үшін, яғни ескі классификация бойынша 4 және 5 жұлдызды стадионға үлкен құрылым қажет. Нысан үлкен және егжей-тегжейлі тізімге сәйкес келуі керек. 2010 жылы УЕФА бекіткен ережеге сәйкес, 4-санат ең жоғары саналады. Мұндай стадиондар ең жоғары деңгейдегі матчтарды қабылдай алады. Сол жағалаудан салынып жатқан стадион осы УЕФА классификациясы бойынша 3- санатқа ие.Көпбейінді нысан тұтас кешен ретінде қызмет көрсететін болады. Оған қоса, арена футболшылардың жаттығу залымен шектелмейді. Аумағы 7,5 гектар жерді алып жатқан стадионның жалпы ауданы 24,3 мың шаршы метр. Нысан 9 спорт залымен – аумағы 553 шаршы метр бокс залы, 342 шаршы метр күрес, 213 шаршы метр жаттығу залы, 134 шаршы метр ауыр атлетика залы, 213 шаршы метр футболшылардың жаттығу залы, 244 213 шаршы метр йога, 1 мың 213 шаршы метрден астам гимнастика-акробатика, 151 213 шаршы метр сауықтыру-денешынықтыру залдарымен қамтылады. Жаңа стадион Сыр спортына жаңа мүмкіндіктер мен жаңа жеңістер сыйлайтынына сенім мол.Жалпы, өңірдің спорт саласында жағымды жаңалықтар мен жарқын жетістіктер жетерлік. Облыстық денешынықтыру, спорт және туризм басқармасы мәліметінше, өңірде спорттық инфракұрылымды дамыту, халықтың денешынықтыру және спортпен айналысуға деген сұранысын қанағаттандыру бағытында ауқымды жұмыс атқарылуда. Былтыр 13 спорт кешенінің құрылысы жүргізіліп, қазіргі таңда оның 9-ы қолданысқа берілген. Биыл да жаңадан 11 нысан салынып, пайдалануға беріледі.Сонымен қатар, былтыр Сырдария өзенінің сол жағалауынан халықаралық талапқа сай жүзу бассейні бар көпбейінді денешынықтыру-сауықтыру кешенінің, үстел теннисі орталығының іргетасы қаланды.Облыс спортшылары биыл ҚР чемпионаттары мен кубоктарынан 254, Әлем және Азия чемпионаттары мен кубоктарынан 54 медаль иеленді. ҚР ұлттық құрама командасына 690 облыс спортшылары енді. Сондай-ақ биылғы басты спорттық дода – Олимпиада және Паралимпиада ойындарына қазіргі таңда аймағымыздың спортшылары 4 жолдама иеленген.Биболат Сәтжанфото: aladop.kz

 Жаңа стадион – Сыр спортына серпін бермек

<a href="https://kyzylorda-news.kz/">Kyzylorda-news.kz</a> Сырдария ауданында балаларға арналған арнайы орталық ашылған болатын.&nbsp;Осы ретте «Салауатты Сырдария» қоғамдық қорының «Оңалту» орталығы тірек-қимыл аппараты бұзылған және психоневрологиялық патологиясы бар мүгедек балаларға арналып, күндізгі стационар ретінде жұмыс жасауда. Жақында Сырдария аудандық қоғамдық кеңесінің мүшелері аталған орталықтың жұмысымен танысқан болатын.«Оңалту» орталығы 10 балаға лайық­тандырылған. Бүгінде аудан бойынша бірнеше бала қамтылып, кәсіби мамандардың бақылауына алынған. Орталықтың таныстырылымы барысында аудандық жұмыспен қамту және әлеуметтік бағдарламалар бөлімінің басшысы Мақсұт Қаратаев, халықаралық «Қазақ тілі қоғамы» қоғамдық бірлес­тігінің аудандық филиал төрағасы Шаһарбек Нұрсейіт, қоғамдық кеңес төрағасы Маратбек Еспенбетов, ардагерлер кеңесінің төрағасы Мұса Келдібаев, мәслихат депутаты Алмас Есназар, ардагерлер Сансызбай Сәдуақасов, Гүлбар Әбілова, Кенжебек Мұстафаев орталық жұмысына жоғары баға берді.<blockquote>– Мемлекеттік бағдарлама аясында аудан орталығында мү­гедектігі бар балаларға «Оңалту» орталығы ашылғанына қуаныш­тымыз. Жаңашылдыққа ұмтылып жүретін іскер азамат Қайрат Сүлейменов тың бастаманы қолға алуда. Баланың денсаулық жағдайын тікелей бақылайтын мамандар өз міндетіне жауапкершілікпен қарайтынына сенеміз. Әр ата-ана баласының оңалып кеткенін қалайды. Мұндай орталық бізге аса қажет, – деді Маратбек Еспенбетов.</blockquote>Негізінен, орталықта күні бойы балалар ем-шара қабылдап, денсаулығын күтуге мүмкіндік алады. Күндізгі стацио­нардың артықшылығы – үйден оқыты­латын балалар осында жан-жақты білім ала алады. Өз кезегінде ұстаздар оқу­шыны оқытуға орталыққа келеді.<blockquote>– Біздің орталықта әлеуметтік маман, медбике, аспазшы жұмыс істейді. Ұлдар мен қыздардың тынығу, асхана, ем-шара, демалыс бөлмесі жасақталған. Бірер күнде бейнебақылау орнатылып, ата-ананың смартфонына қосылатын болады. Сонда ата-ана баласының күнделікті жағдайымен телефон арқылы танысып отырады. Кішкентай бүлдіршіндер үшін түрлі бағытта іс-шара ұйымдастырылады. Уақытылы массаж жасалып, диеталық тағам дайындалады. Сонымен қатар кәсіби мамандар шақырылып, курс өткізіледі, – деді орталық меңгерушісі Бағдаш Сағындық.</blockquote>Орталық тарапынан жасалып жат­қан әрбір қызмет бойынша зерделеу жүр­гізіліп, ардагерлер өз ұсыныстарын ортаға салды.

Сырдарияда «Оңалту» орталығы жұмысын бастады

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаев спорт мекемелерінің қызметкерлері арасындағы волейболдан облыстық жарыстың ашылуына қатысты.Аудан басшысы Мемлекеттік рәміздер күні қарсаңында ұйымдастырылып отырған іс-шараның мән-маңызына тоқталды.<blockquote>– Мемлекет басшысы Қасым-Жомарт Кемелұлы Тоқаев әр облыста және ірі аудан орталықтарында саламатты өмір салтын қалыптастыру үшін арнайы спорт орталықтарын ашу қажет деді. Қазақстан Президентінің бұл тапсырмасы Үкімет басшысы және облыс әкімі Нұрлыбек Машбекұлы Нәлібаевтың қолдауымен Сыр елінде қарқынды жүргізілуде. Қызылорда қаласында құны 2,7 млрд. теңге болатын үстел теннисі орталығының құрылысы жүруде. Сырдарияның сол жағалауынан 6,8 млрд. теңгеге халықаралық стандарттарға сай, жабық бассейні бар көпсалалы дене шынықтыру-сауықтыру кешенінің құрылысы басталды, 10 мың орындық жаңа стадионның іргетасы қаланды. Былтыр облыста 7 дене шынықтыру-сауықтыру кешені ел игілігіне табысталды, биыл аудандарда 15 кешенді қолданысқа беру жоспарлануда. Сырдария ауданында спортты дамытуға үлкен қолдау жасалып, мәдени-спорттық шаралар көптеп ұйымдастырылуда. Осындай қолдаулардың нәтижесінде спортшыларымыз биіктерді бағындыруда. Бүгінде сырдариялық спортшыларымыз Азия біріншілігі мен Қазақстан чемпионаттарынан 29 медаль жеңіп алып, аудан мерейін үстем етті, – деді Берік Әбдіғаппарұлы.</blockquote>Жарыстың ашылуында облыстық дене шынықтыру, спорт және туризм бөлімінің басшысы Жанмұрат Сейілов те сөз сөйлеп, қатысушыларға сәттілік тіледі.Бүгінде ауданда тұрғындардың 39 пайызы тұрақты спортпен шұғылданады. Өткен жылы аудан орталығында спорт клубы күрделі жөндеуден өткізілсе, демеушілер есебінен балаларға арналған спорттық ойын алаңдары салынды. Орталық стадион күрделі жөндеуден өткізіліп, стритбол алаңы пайдалануға берілді. Аудан орталығында «Мансұр», «Сырдария спорттық-зияткерлік орталығы», «Аслан» және «Ясин» спорт клубтары мемлекеттік спорттық тапсырысты іске асыру бойынша жұмыс жасайды. Биыл Бесарық ауылында жаңа спорт кешені пайдалануға берілетін болады.Айта кетейік, облыстық жарысқа аймақтан 11 команда, 130-ға жуық спортшы қатысуда.

Волейболдан облыстық жарыс өтті

<a href="https://kyzylorda-news.kz/">Kyzylorda-news.kz</a> Жақында Сырдария аудандық қоғамдық даму бөлімінің тапсырысымен, ‘’Иман-2013’’ қоғамдық қорының ұйымдастыруымен «Сырдария ауданы көлемінде діни экстремизм мен терроризмнің алдын алу қызметін ұйымдастыру» әлеуметтік жоба аясында аудандық ресми тіркелген діни бірлестіктер арасында қазақтың ұлттық спорт түрлері қазақ күресі, арқан тарту, қол күрес, гір тасын көтеруден спартакиада ұйымдастырылды.Спартакиаданың ашылу салтанатында Сырдария аудандық қоғамдық даму бөлімінің теолог маманы М.Сейілханов және Сырдария аудандық спорт клубының оқу ісі жөніндегі орынбасары И.Әкімжанов арнайы қатысты.Спорттық іс-шараның ашылуында қоғамдық даму бөлімінің теолог маманы М.Сейілханов сөз сөйлеп, іс-шараның мәні мен маңызы туралы айтты.Тартысты өткен жарысқа 10 командадан 100 ден аса спортшылар қатысты.Жарыс соңында Сырдария аудандық қоғамдық даму бөлімінің теолог маманы М.Сейілханов және Сырдария аудандық спорт клубының директоры Д.Әлжанов жеңіс тұғырынан көрінген командаларға диплом мен қаржылай сыйлықтарын табыстады.Атап айтқанда Іңкәрдария ауылы 100 000 теңге, Нағи Ілиясов ауылы, 70 000 теңге, Шіркейлі ауылы 50 000 теңге ие болды. Ал қалған командаларға 15 000 теңгеден табысталды.

Сырдарияда спартакиада ұйымдастырылды

<a href="https://kyzylorda-news.kz/">Kyzylorda-news.kz</a> Бос уақытты тиімді пайдалану, сондай – ақ отбасылық құндылықтарды, отбасылық тәрбие мен салауатты өмір салтын насихаттау және отбасы институтына қоғамның назарын аудару, халықтың белсенді және салауатты өмір салтын жүргізуге ынтасын дамытуға негізделген профилактикалық жұмысты жетілдіру мақсатында Қызылорда облысы ПД Есірткі қылмысына қарсы іс-қимыл басқармасы «Берік отбасы – есірткіден алыс!» ұранымен отбасылық байқау ұйымдастырды.Қатысушылар нашақорлыққа қарсы үндеу жасап, өз отбасыларының атынан дұрыс жол таңдау керектігін ашты. Содан кейін отбасылық флешмоб көрсетіліп, бірге есірткіге қарсы ән шырқады.Олар бейне ұсынымдар әзірлеп, мессенджерлер арқылы облыс өңірлеріндегі сайыстық комиссияларға жіберді, содан кейін байқаудың үздік жұмыстары сайыстың екінші кезегіне қатысты.Финалдық байқауға 12 отбасы қатысты. Байқауға қатысушылар өз ойларын шығармашылықпен жеткізе білді, түрлі ақпаратты пайдаланды, нашақорлық мәселесі бойынша өз ой-пікірлерімен бөлісті. Танымал әндердің әуеніне, сөз жазып, есірткіге қарсы әндер орындады.Байқау комиссиясының шешіміне сәйкес қатысушылар жинаған ұпайларына сәйкес аймақтық және облыстық жеңімпаздар және номинация жеңімпазы болып бөлінді.Үздік деп танылған отбасылар: Арал ауданынан Әмірхановтар отбасы – 1 орын, «Атамекен» балалар ауылынан «Ақжайық» және «Байқоңыр» отбасылары 2 және 3 орындарға ие болды.Номинациялар бойынша «Атамекен» балалар ауылының отбасылары: «Көңілді отбасы» – «Байқоңыр» отбасы, «Үлгілі отбасы» – «Сарыарқа» отбасы, «Белсенді отбасы» – «Мадияр» отбасылары жеңімпаз атанды.Қатысушы отбасылар жеке үлгісімен бос уақытты отбасы шеңберінде қалай тиімді өткізуге болатынын көрсетті.Байқаудың барлық қатысушылары сыйлықтармен және дипломдармен марапатталады.<img src="https://knadmin.beoblood.kz/uploads/esirtki1_1024x767_2f8de53727.jpg" alt="esirtki1-1024x767.jpg">Фото: Есірткі басқармасы

Қазақстан және Қызылорда облысының жаңалықтары