<a href="https://kyzylorda-news.kz/">Kyzylorda-news.kz.</a>&nbsp; Уақытында бозкілем үстінде ойнақтаған кішкентай спортшының болашағынан бапкері зор үміт күтетін еді. Бала күнінен қарсылас шақ келтірмей даралана білген қарымы мықты спортшы Сабыр Жұртшыбаевтың есімі жерлестерінің есінде. Осыдан бірнеше жыл бұрын келместің кемесіне мінген қазақ күресінің сайыпқыран спортшысын еске алуға арналған шағын футболдан екі жыл қатарынан аудандық турнир өткізіліп келеді. Бұл жолы да, аудандық мәдениет және спорт бөлімінің қолдауымен, Сабыр Жұртшыбаевтың достары мен жеке бапкері Жасұлан Каусовтың бастасымен шағын футболдан аудандық турнир өз жалауын көтерді. Жарысқа аудандық мәслихат депутаты Ақтөре Ибрагимұлы, аудандық мұсылмандар мешітінің бас имамы Айбек Мәдиев, достары мен ағайын-туыстары қатысты.&nbsp;Негізінен, әрбір футболсүйер жанкүйер бүгінгі жарыстан ерекше ойын күткені рас. Орталық алаңға жиналған қауымның деле¬бесін қоздырған жарыста 5 топ өзара бақ сынады. Ең алдымен, ҚР мемлекеттік Гимні орындалды. Сонымен қатар аудандық мұсылмандар мешітінің бас имамы Айбек Мәдиев Сабыр Жұртшыбаевтың рухына арнап Құран бағыштады.&nbsp;Турнирдің ашылу салтанатында Сабыр Бахытұлының апасы Ақ¬марал Жұртшыбаева інісі жөніне естелігін көпшілікпен бөлісті.&nbsp;<blockquote>– Менің бауырым қазақ күресімен кішкентайынан айналысқан. Спортқа деген қызығушылығы басым болатын. Мектеп қабырғасында жүргенде байрақты бәсекелерден орын алып, отбасымызды қуантып жүретін. Күн сайын оның өжеттілігін, қайсарлығын, батылдығын еске аламыз. Өткен жылы бастау алған турнир биыл жалғасын тапқанына қуаныштымыз. Бауырымның достары ізгілігі мол істерімен көпке үлгі болуда. Қай кезде де, олардың құрметіне ерекше ризашылығымызды білдіреміз, – деді Ақмарал Жұртшыбаева.&nbsp;</blockquote>Өз кезегінде аяқдоп шеберлері &nbsp;айналым жүйесі бойынша сынға түсті. &nbsp;Айта кетейік, аудандық өрт сөндіру бөлімі, Сырдария ауданы &nbsp;бойынша «Қазақ күресі» федерациясынан қос топ, «Құрдастар» және «Жамағат» тобының арасынан үздіктер анықталды. Негізінен, аудандық турнирдің жеңім¬пазы деген атаққа аудандық өрт сөндіру бөлімінің спортшылары лайықты болды. Ал ІІ және ІІІ орынды қазақ күресінің қос тобы қанжығаларына байлады. Бұл ретте, &nbsp;«Үздік сұрмерген» номинациясын Айсерік Смайлов, «Үздік қақпашы» номинациясын Талғат Сағындықов, «Үздік қорғаушы» номинациясын &nbsp;Қайыржан Наушаев, «Үздік шабуылшы» номинациясын Ернар Оспан иеленді.&nbsp;<blockquote>– Біз Сабыр досымызбен 11 жыл бойы білімнің қарашаңырағы – №35 Иса Тоқтыбаев атындағы мектеп-лицейде білім алған болатынбыз. Әркез досымыздың қол жеткізген жетістіктерін мақтан тұта аламыз. Бүгін мән-мағынасы жоғары іс-шараның куәгері атандық. &nbsp;Досымыз ҚР спорт шеберлігіне үміткер ретінде талай бозкілемде &nbsp;шыңдалды. Қапияда көз жазып қалған досымыздың есімін ардақтау – біздің міндетіміз. Әрине, Сабырдың артынан ерген ұлы Мирасқа әрқашан қолдау көрсетуге дайынбыз, – деді достарының атынан сөз сөйлеген Нұрсұлтан Жақсымбетов.&nbsp;</blockquote>Айта кетерлігі, демеушілер есебінен аудандық турнир жеңімпазы мен жүлдегерлеріне қаржылай сыйлық, диплом, арнайы футболка табысталды. Аудандық турнирге жиналған жұртшылыққа арнап Сабырдың достары арнайы ас-ауқат дайындады.<blockquote>– Қазақ халқының тарихында ер-азамат¬тардың бейнесі ержүрек, батыл, батыр, қаһар¬ман ұғымдарымен қатар айтылатыны белгілі. Біз білетін Сабыр сондай намысшыл, еңбек¬қор, қайсар азамат еді. Ол оқушы кезінен бас¬тап спортты жанына серік етті. Өсе келе қазақша күрестен облыстық, республикалық жарыстарға қатысып, жеңімпаз атанды. Спортшы¬ жас әркез қасиетті Сырдария ауданының намысын қорғап жүргенін мақтаныш ететін. Орта мектепті бі¬тіргеннен кейін Алматы қаласындағы Қазақ спорт және туризм академиясында білім алып, жаттықтырушылық қызметті өзі туып-өскен ау¬данда бастады. Аға буынның, жас¬тардың зор құрметіне ие болды. Сабырдың қай ортада да өзіндік орны, мәртебелі төрі болатын. Жасындай жарқ етіп, қысқа ғұмырында биік белестерді бағындыра білген азаматтың дүниеден ерте озғаны өкінішті. Бірақ Сабырды білетін, оның көзін көрген, сыйлас, сырлас азаматтар бар кезде оның аты өшпейді деп сенеміз. Біз аудан әкімдігіне, аудандық мәдениет және спорт бөліміне тиісті ұсы¬ныстар енгізіп, С.Жұртшыбаевты еске алуға ар¬налған турнирді дәстүрлі түрде өткізуге жұмыс жасайтын боламыз, – деді аудандық мәслихат депутаты, «АМАNАТ» партиясының Сырдария аудандық филиалының «Жастар рухы» жастар қанатының жетекшісі Ақтөре Ибрагимұлы.</blockquote>

Сырдарияда Сабыр Жұртшыбаевты еске алуға арналған аудандық турнир өткізілді

<a href="https://kyzylorda-news.kz/">Kyzylorda-news.kz.</a> 14-17 шілде аралығында Астана қаласында өткен Белбеу күресінен ересектер арасындағы әлем чемпионатында жерлесіміз Жаңақорған ауданы, Түгіскен ауылындағы №8 ОРМБЖ спорт мектебінің спортшысы, Өзгент ауылынан шыққан балуан Алдаберген Айберген Ұлттық құрама сапында 90 келі салмақта &nbsp;3 орын иеленді. Жаттықтырушылары: Абдусаттар Садықов, Аслан Нұрқожаев.

Әлем чемпионатынан қола жүлдені иеленді

<a href="https://kyzylorda-news.kz/">Kyzylorda-news.kz.</a>&nbsp;Соңғы 3 жылда ұлттық спорт түрлерімен жүйелі түрде айналысатын қазақстандықтардың саны 35% өскен. Егер 2020 жылы 432 мың адам ұлттық спорт түрлерімен айналысса, 2022 жылдың соңында бұл сан 584 мың адамға жетіпті.<a href="https://www.inform.kz/kz/elimizde-ulttyk-sportpen-aynalysatyndar-sany-birden-35-artty_a4090384">ҚазАқпарат&nbsp;</a> таратқан мәлімет бойынша, ең үлкен көрсеткіш Түркістан облысында тіркелді - 28 мың адам. Өңірде барлығы 110 мыңнан астам адам ұлттық спорт түрлерімен айналысады.Бірден бірнеше облыста спортшылар саны 10 мыңға өсті.Бұл - Қостанай (13 мыңнан 23 мыңға дейін), Қызылорда (20 мыңнан 30 мыңға дейін), Павлодар (17 мыңнан 27 мыңға дейін), Солтүстік Қазақстан (8 мыңнан 18 мыңға дейін) облыстары және Шымкент қаласы (10 мыңнан 20 мыңға дейін).Ұлттық спортпен айналысатындар саны бойынша көшбасшылар үштігіне Жамбыл (40 мың адам) және Алматы (39 мың) облыстары кіреді.Қазақстан ұлттық құрамасында спортшылар саны бойынша Түркістан (74 адам), Жамбыл (52 адам) облыстары және Астана қаласы (43 адам) көш бастап тұр.<blockquote>«Ұлттық спорт түрлері танымалдылығының артуы — Мәдениет және спорт министрлігінің ұлттық спортты дамыту бағытындағы жүйелі жұмысының нәтижесі. Әрине, бұл ірі халықаралық турнирлерді өткізу ғана емес. Мысалы, қажет инфрақұрылым құрылысы жүріп жатыр, елімізде 16,5 мыңнан астам жаңа үйірме ашылды, қолданыстағы жарыстардың форматы өзгеріп жатыр» дейді Мәдениет және спорт вице-министрі Сәрсен Құранбек.</blockquote>

Елде ұлттық спортпен айналысатындар саны бірден 35 пайызға артты

<a href="https://kyzylorda-news.kz/">Kyzylorda-news.kz.</a>&nbsp; Елімізде велоспорт жақсы дамыған. Десе де қыздар арасында әзірге жоғары биіктен көріне қойған спортшы жоқ. Кейінгі жылдары сол олқылықтың орны тола бастаған секілді. Әлемдік жарыста топ жарған Махаббат Үмітжанова жақында Таиланд тас жолында өткен Азия чемпионатында мәре сызығын бірінші болып қиды. Бұл – ел спортындағы елеулі жаңалық.Негізі ол Солтүстік Қазақстан облысы велоспорт мектебінде тәлім алған. Алғаш рет велоспорт үйірмесі есігін 13 жасында ашқан еді. Шал ақын ауданының орталығы Сергеев қаласындағы №1 мектеп-интернатында 4-6 сынып аралығында оқыды. Одан кейін Петропавл қаласындағы спорттағы дарынды балаларға арналған мамандандырылған мектеп-интернатында білімін жалғастырды. Оған велоспорттың әліппесін жергілікті бапкер Виктор Потапов үйретті. Содан бері шәкіртіне ақыл-кеңесін айтып, түрлі бәсекеде топ жаруына зор үлесін қосып келеді.<blockquote>– Әдетте, көпшілік велоспортты қыз баласына қиын спорт түрі деп санайды. Бұл сөзді жоққа шығара алмаймыз. Рас, алғашқыда велосипедті игеріп кету ешкімге оңайға соға қоймайды. Уақыт өте келе қиындықтың барлығын жеңе аласың. Оны өзімнің жеке спорттық жолымнан көруге болады. Велоспорт әліппесін үйреніп, қыр-сырына қаныққаннан кейін алдыма үлкен мақсат қойдым. Қазірге дейін бағындырған белестерім – соның айқын куәсі. Әрбір жарысқа қатысарда өзімді қайрап шығамын. Еліміздің абыройын биіктетсем деймін. Сол мақсатыма жеткен сәтте иығымнан жүк түскендей сезінемін, – дейді ол бізбен әңгімесінде.</blockquote>Асқақ арман адамды алға жетелейді. Ол 2012 жылы Талдықорған қаласындағы велоспорттан олимпиадаға дайындық орталығына түсті. Ал 2014 жылы «Astana BePink» клубының құрамына кірді, 2016 жылы «Astana Women Team» клубы сапына ауысты. Онда белгілі велошабандоз Зульфия Забирова менеджер қызметін атқаратын еді. Бұл үлкен спортқа қадам басқан қазақ қызының өміріндегі елеулі сәттердің біріне айналды.Махаббат 2016 жылы тректен ел біріншілігінде чемпион атанды. Ал шосседегі жарыста алғашқы орындардан көрінді. Қазақстандық бапкерлер велошабандоздың дайындығын жоғары бағалап, көптеген халықаралық бәсекеге жол ашылды. Нәтижесінде Азия чемпионатында бірнеше мәрте жүлдегер атанды. Азия ойындарында бақ сынады. Ел біріншілігінде талай мәрте топ жарды. Халықаралық дәрежедегі спорт шебері атағына ие болды.<blockquote>– Қазір құрлықтық додада жеңімпаз атану оңайға соқпайды. Көптеген елдерде қыздар арасындағы велоспорт дамып кетті. Тас жол үстіндегі тартыста Қытай, Жапония, Вьетнам, Таиланд, Оңтүстік Корея, Өзбекстан спортшылары жарыс көрігін қыздырады. Биылғы Азия чемпионатында да дәл сондай бәсеке болды. Қаншама шақырымға созылған жарыста олардың алдына түсіп кету оңайға соққан жоқ. Еліміздің абыройын қорғап барғаннан кейін біз үшін шегінерге жер жоқ. Намысқа тырысып, алға қарай ұмтыла түстім. Қарсыластарым да бас жүлдеге барынша таласты. Бұл бәріміз үшін де қызықты бәсеке ретінде ерекшеленді. Мәре сызығын бірінші болып қиған сәтте ерекше көңіл-күйге бөлендім. Қаншама жылғы еңбектің, дайындықтың, өтеуі қайтты, – дейді спортшы.</blockquote>Әлемдік деңгейде велоспорт бәсекелері өте қызықты өтеді. Ерлер арасында ұзақ жылдан бері ұйымдастырылатын көпкүндіктер жанкүйер қауымының қызыға тамашалайтын сайыстарына айналды. Мұндай жарыстар әйелдер велоспортында да бар. Оған да кілең мықты велошабандоздар жиналады. Жазғы олимпиада ойындары күнтізбесінде қыздар да жүлделерді сарапқа салуға мүмкіндік алды.<blockquote>– Айта кетерлігі, әлемдік мамандар Қазақстанды велоспорт жоғары дамыған елдердің бірі деп санайды. Сондықтан жүлдеге үміткерлер қатарына қосады. Бұл – біз үшін үлкен жауапкершілік. Қателікке бой алдыруға болмайды. Жоғары нәтижеге қол жеткізуге барынша күш саласың. Осындай бәсекенің арқасында әріптестеріммен бірге үлкен тәжірибе жинақтадық. Бізді алда беделді бәсекелер күтіп тұр. Олардың арасында 2024 жылғы Париж олимпиадасының шоқтығы биік. Мұндай айтулы аламанға әрбір спортшы қатысып, бақ сынауды қалайды. Оған лайықты деңгейде дайындық жасайды. Олимпиадаға қатысу үшін алдымен іріктеу кезеңінен іркілмей өтуің керек. Алдағы мақсатымыз – жанкүйерлерді жоғары жетістігімізбен қуанту, – дейді ол.</blockquote>Махаббаттың өмірлік жолдасы Мәди Әзен де – белгілі велошабандоз. Қызылорда велоспортынан тәлім алған ол халықаралық және еліміздегі көптеген жарыстарда толайым табысқа кенелді.<blockquote>– Сыр велоспортының беделі биік. Бұл өңірден талай мықты спортшылар шықты. Олардың қатарында трек түрінен Әлем чемпионы Марат Сатыбалдиевті ерекшелеп айтамыз. Сондай-ақ, жастар арасында әлемдік деңгейде топ жарған Сергей Капустинмен де жерлестері мақтанады. Қазіргі күні де келешегінен үлкен үміт күттіретін жастар шоғыры өсіп келеді, – дейді ол.</blockquote>Азия чемпионатында алтын алғаннан кейін велошабандоз ел біріншілігінде топтық жарыста жеңіс тұғырына көтерілді. Бәсеке барысында спортшылар 105 шақырымдық тартысқа түсті. Мәреге 20 шақырым қалған сәттен бастап Махаббат Павлодар облысынан келген Рината Сұлтанова екеуі жұлдыздай жүйткіп, өзге қарсыластарынан оқ бойы озық шықты. Шешуші сәтте сыр бермей қарсыласын қапы қалдырып кетті. Велошабандоз алдағы жарыстарға қатысу үшін жоғары дайындыққа көңіл бөліп отыр. Әрбір еселі еңбектің қайтарымы болатыны белгілі.

Велошабандоз Махаббат

<a href="https://kyzylorda-news.kz/">Kyzylorda-news.kz.</a>&nbsp; Мемлекет басшысы Қасым-Жомарт Тоқаев бұқаралық спортты дамытуға арналған кешенді бағдарлама қабылдау керектігін айта отырып: "Ұлт денсаулығын бекемдеу мәселесі де өте өзекті. Барлық жас санаты арасында бұқаралық спорт түрлерін насихаттай беру керек. Балалар үшін спорттық инфрақұрылымның барынша қолжетімді болуын қамтамасыз ету керек. Бұқаралық спортты дамыту – пирамидаға айналуы қажет. Оның басына чемпиондар шықса, оның негізінде біз сау әрі саналы ұрпақты, мықты ұлтты қалыптастырамыз" деген болатын.Бүгінде осы бағыттағы ауқымды жұмыстар еліміздің әр аумағында жүзеге асып, соның нәтижесіне қол жеткізіп отыр. Соның ішінде ауданда да салуатты өмір салтын ұстануға бейім, спортты жанына серік еткен жастардың қарасы өте көп. Олар қазірдің өзінде спорттың қай түрінен болмасын жеңіске жетіп, ауданның абыройын асқақтатып келеді.Аралдық өрендердің мерейі өскен спорттық жарыстың бірі жақында көршілес Қырғызстан Республикасы Ыстықкөл ауданында өтті. Жасөспірімдер арасындағы Азия чемпионатында шахматтың Рапид түрінен қаладағы №62 мектеп-лицейдің 6 сынып оқушысы Ақылжан Мейіржанұлы айды аспанға шығарды десек болады. Өзбекстан, Индия, Ветнам сияқты Азияның 11 елінен қатысқан шахматшылар арасынан өзінің шеберлігі мен біліктілігін анық көрсете білген Ақылжан Азия біріншілігінің күміс жүлдесін иеленіп қайтты.Бұл жерлесіміздің жалғыз жеңісі емес. Осыған дейін талай биікті бағындырған мақтанышымыз наурыз айында жасөспірімдер арасындағы ел чемпионатында жеңімпаз атанса, Грузияның Батуми қаласындағы шахмат турнирінде әлемнің түкпір-түкпірінен жиналған шақпақ тақташылар арасында үздік ондыққа кірген болатын.Жерлесіміз жеңісті жолдан таймай, ауданның, елдің абыройын асқақтата берсін дейміз.Жергілікті споршылардың жетістігі мұнымен ғана шектеліп қалмақ емес. Өткен аптада Арал жұртшылығын қуанышқа бөлеген тағы бір спорт жаңалығы Шымкент қаласы, Қазығұрт ауданынан келіп кетті. Қай уақытта да жекпе-жектен жауырыны жер иіскемей келе жатқан жеңімпаз жерлестеріміздің жеңісті жолын жалғаған жастар "6 шілде – Астана күні" қарсаңында Қазығұрттағы жасөспірімдер мен юниорлар арасындағы ҚР чемпионатынан екі бірдей жүлдемен оралды. Нақтырақ тоқталар болсақ 67 кг салмақ дәрежесінде сынға түскен Серікбай Бақытжан қола жүлде иегері атанса, 45 кг салмақ дәрежесінде бақ сынаған Ернұр Әбжәмиев қарсылас шыдатпай алтыннан алқа тақты.<figure class="image"><img src="https://knadmin.beoblood.kz/uploads/4cdcdf2b_8e8c_4c16_9b19_ae1a08638563_affae03a7e.jpg" alt="4cdcdf2b-8e8c-4c16-9b19-ae1a08638563.jpg"></figure>

Аралдық жас спортшылардың мерейі тасыды

<a href="https://kyzylorda-news.kz/">Kyzylorda-news.kz.</a> Бүгінде сапалы ұлт қалыптастыру үшін азаматтарды спортпен шұғылдануға баулу – аса маңызды міндеттің бірі. Бұл ретте бұқаралық спортты дамыту деңгейін көтеру өзекті. Сондықтан оны дамыту бағытында ауқымды жұмыстар атқарылуы тиіс.Сәрсенбіде аудандағы «AMANAT» партиясы филиалының ұйымдастырумен бұқаралық спортты насихаттау мақсатында және «Ардагерлерді ардақтайық» жобасы аясында бастауыш партия ұйымдары арасында спорт түрлерінен сайыс өтті. Іс-шараның ашылу салтанаты орталық стадионда болып, оған аудандық мәслихат төрағасы Әділ Қошалақов, аудандық ардагерлер кеңесінің төрағасы Асқар Мереков, партияның ардагері Гүлжауһар Раева және ауданның бір топ зиялы қауым өкілдері қатысты.Жиынды ашу үшін аудандық партия филиалының төрағасы, аудандағы футбол федерациясының президенті Әділ Үсенұлы сөз сөйлеп, сайысқа қатысушыларға сәттілік тіледі.– «AMANAT» партиясы бұқаралық спортты дамыту үшін өрісті жоспарлар жасақтауда. Себебі партияның көздегені – ұлттың саулығы, халықтың амандығы. Ал халықтың денсаулығы мығым болуы үшін бұқаралық спортты дамыту аса маңызды. Ауданымызда он сегіз бастауыш партия ұйымдары болса, солардың басын біріктіріп шағын футбол, үстел теннисі және шахматтан бастапқы сайысты өткізіп отырмыз. Алдағы уақытта мұндай іс-шара дәстүрлі болмақ. Қыс айында да мемлекеттің қолдауымен, партияның ұсынысымен ауданда салынып іске қосылған спорт кешенінде түрлі жарыстар ұйымдастырылатын болады деп сенім білдіремін. Жарысқа қатысушыларға сәттілік тілей отырып, спортта жеңістеріңіз көп болсын, – деді ол. Алдымен орталық стадионда футболдан 14 команда кездесу өткізді. Футбол десе ішкен асын жерге қоятын спортшылар ойынның көркін қыздырып, жеңіс жолында аянып қалмады. Ал аудандағы денешынықтыру-сауықтыру кешенінде үстел теннисінен 9 команда бақ сынасса, «Ардагерлерді ардақтайық» жобасы аясында ауданның белсенді ардагерлері шахматтан өзара жарысты. Логикалық ойлау қабілетінің дамуына зор ықпал ететін шахмат ойынында ардагерлер шыдамдылық танытып, есеппен жүріп отырды.Нәтижесінде шахматтан жүлделі ІІІ орынды – Оңалбай Бодыбаев алса, ІІ орынға – Әділ Ертаев жайғасты. Ал І орынды – 90 жастағы ардагер Әбдібек Лақбаев иеленді.Үстел теннисі бойынша ІІІ орынды – ІІІ Интернационал БПҰ, ІІ орынды – Қараөзек БПҰ, І орынды – Аудандық емхана БПҰ жеңіп алды.Ал шағын футболдан жүлделі ІІІ орынға – «Жасталап» БПҰ командасы жайғасса, ІІ орынды – «Жаңажол» БПҰ командасы, І орынды – «Томанов» БПҰ командасы иеленіп, жеңіске жетті. Барлық марапат иелеріне партияның атынан Алғыс хаттар мен қаржылай сыйлықтар табысталды.

Қармақшы: «Ардагерлерді ардақтайық» жобасы аясында спорт түрлерінен сайыс өтті

<a href="https://kyzylorda-news.kz/">Kyzylorda-news.kz.</a> Футбол – әлемдегі ең танымал спорт түрлерінің бірі. Футбол мачтарын мыңдаған жанкүйер стадиондарда, ал миллиондаған адам теледидар экрандарынан тамашалайды. Танымал футболшылардың есімдері көпшілікке белгілі.Осы орайда Сырдария ауданында да аяқдоп шеберлерінің сайысы жиі ұйымдастырылып келеді. Споршылар өз кезегінде ойынға белсене қатысып, саламатты өмір салтын сақтауға атсалысып келеді.Жақында футзалдан Сырдария аудандық әуесқойлар футбол лигасы өтеді. Жарысқа Жалағаш ауданы құрама командалары және Сырдария ауданынан жасақталған командалар қатысады.Осы орайда 11 шілде күні Сырдария аудандық ішкі саясат бөлімінің мәжіліс залында мандаттық комиссия отырысы өтті. онда сайыстың ұйымдастырылу барысы, қатысатын командалар нақтыланып, талқыланды.Жарысқа барлығы сегіз команда қатысады. Олар Арафат &nbsp;және Адия командалары Жалағаш ауданынан, Қызылдихан командасы, Регион 11 командасы, Қыран командасы, Эверест командасы, Хансұлтан командасы және Сәкен Сейфуллин құрама командалары.Сайыс 15 шілде күні басталады. Осы күні сағат 17.00-де тұрғындар аудандағы орталық стадионға келіп, сүйікті командаларына жанкүйер бола алады.

Сырдария ауданында әуесқойлар футбол лигасы басталады

<a href="https://kyzylorda-news.kz/ru">Kyzylorda-news.kz.</a> Александр Бубликтің Уимблдонның төртінші айналымындағы қарсыласы белгілі болды.Қазақстандық теннисші әлемнің 7-ракеткасы, ресейлік Андрей Рублевпен ширек финалға шығу үшін таласады.Қос спортшы бір-бірін жасөспірім кезінен жақсы біледі. Осыған дейін олар бес рет кездесіп, соның үшеуінде А.Рублев, екеуінде А.Бублик жеңген.Қазақстандық спортшы жуырда Галле (Германия) ATP 500 турнирінің финалында ресейлікті 6:3, 3:6, 6:3 есебімен ұтқан еді.А.Рублев Уимблдон жарысының үшінші айналымында рейтингте 123-орында тұрған бельгиялық Давид Гоффенді үш сағаттан астам уақытқа созылған матчта 6:3, 6:7 (6:8), 7:6 (7:5), 6:1 есебімен жолдан тайдырды.А.Бублик пен А.Рублев 9 шілде күні ширек финал жолдамасын сарапқа салады.Александр Бублик төртінші айналымға шыққаны үшін 207 мың фунт стерлинг (118 млн-дай теңге) табыс тапты.Сенбі күні Қазақстанның әйелдер арасындағы бірінші, әлемнің 3-ракеткасы Елена Рыбакина үшінші айналымда рейтингте 89-сатыдағы ұлыбританиялық Кэти Бултермен ойнайды. Мұнда жергілікті жанкүйерлер арасында корт иесінің барын салары сөзсіз.

Уимблдон: Александр Бубликтің келесі қарсыласы белгілі болды

<a href="https://kyzylorda-news.kz/">Kyzylorda-news.kz.</a>&nbsp; Ақтөбе облысында президенттік сынамадан Қазақстан Республикасының чемпионаты өтті.&nbsp;Жарыс нәтижесі бойынша жерлесіміз ардагерлер арасында Сырдария ауданы, Қалжан Ахун тұрғыны Мұрат Бөдеев бірінші орынды жеңіп алды. Сыр елінің атын қорғап сайысқа қатысқан жерлесіміз Президенттік көпсайыстан облыс құрама командасының мүшесі екенін айта кеткеніміз орынды. Сондай-ақ Мұрат Бөдеев бала тәрбиелеу ісіне ден қойған ұстаз. Нақтырақ айтсақ, ол №126 орта мектепте алғашқы әскери дайындық пәніен сабақ береді. Өзі де өмірінде салауатты өмір салтын ұстануды құп көретін жерлесіміз әрдайым спортпен шұғылданып, денсаулығына бей-жай қарамайды. Оқушыларын да спортпен шұғылдануға үйретіп, алғашқы әскери дайындық барысын үйретіп жүрген жайы бар.Айта кетейік, Президенттік сынама – 1996 жылдан бастап Қазақстан Үкіметінің №774 қаулысымен Қазақстан халқының денсаулығын сақтау мен қорғау үшін күнделікті емірге енгізген дене тәрбиесінің нормативтері. Президенттік сынама бірнеше жас топтарына бөлінген. Одан жарыстар сол жас топтары бойынша жыл сайын өтіп тұрады.Ақтөбе қаласынан жүлдемен оралып, мерейі үстем болған жерлесімізді марапатымен шын жүректен құттықтаймыз. &nbsp;

Сырдариялық спортшы жүлдемен оралды

<a href="https://kyzylorda-news.kz/">Kyzylorda-news.kz.</a>&nbsp; Бүгін Сырдария ауданына қарасты орталық стадионда аудандық мәдениет және спорт бөлімі мен спорт клубтың ұйымдастыруымен Астана күні мерекесіне орай стритболдан аудан тұрғындары арасында біріншілік өткізілген болатын. Негізінен, аталған жарыста 6 команда, 40-ға жуық спортшы қатысты.&nbsp;Аудандық біріншілік барысында стритбол спортының үздіктері анықталды. Елорда күні мерекесі аясында жастар жаңадан салынған стритбол алаңында қызықты ойын өрнегін көрсетті. Өз кезегінде 6 команда бір-бірімен кездесіп, өзара ұпай бөлісті. Ойынның &nbsp;әділ өтуін жарыстың бас төрешесі Мұхтар Әбжаппаров бақылады. Жарыс қорытындысында жүлделі І орынды «Golden state» командасы, ІІ орынды «Волейболшылар» командасы, ІІІ орынды Шаған ауылынан келген &nbsp;команда ойыншылары жеңіп алды.&nbsp;<blockquote>– Стритболдан жарысқа түскен командалар жақсы дайындықпен келгені байқалды. Барлық ойын барысы бас төрешінің нұсқауымен жүзеге асты. &nbsp;Шын мәнінде, еліміз бойынша тойланып жатқан Астана күні мерекесі көпшілікке ерекше көңіл сыйлады. Аудандық спорт клубы тарапынан бірнеше жарыс ұйымдастырылып, тұрғындардың бұқаралық спортпен айналысуына жағдай жасалады. Өз кезегінде бүгінгі жарыста жеңімпаз атанған жүлдегерлерді құттықтаймыз, – аудандық спорт клубтың директоры Диас Әлжанов.&nbsp;</blockquote>Бұл ретте, спортшы жастарға арнайы диплом мен бағалы сыйлық тапсырылды.&nbsp; &nbsp;&nbsp;&nbsp;&nbsp;

Сырдариялық спортшылар стритболдан жарысқа түсті

<a href="https://kyzylorda-news.kz/">Kyzylorda-news.kz.</a> Футбол миллиондаған жанкүйердің сүйікті ойыны. Сондықтан жер жүзінде теңбіл доп өнері жақсы дамыған. Қазақ футболының деңгейі де өсіп келеді. Соның дәлелі ұлттық құраманың соңғы жетістіктері. Сондай-ақ клубтар арасындағы тартыстарда футболшыларымыз шебер ойын көрсетіп жүр. Әсіресе жастардың ынтасы қуантады. Мәселен жерлесіміз Әділет Сәдібековтың есімін мақтанышпен айта аламыз.&nbsp;Әділетті Қазалының қалың жұрты жақсы тани қоймасы анық. Ол білім ордасына барғанша туған топырақта атасы Сәдібек пен әжесі Ханшайымның қолында болады. Кейін ата-анасының жұмыс бабымен Ақтөбе облысына қоныс тепкен. Артынша Алматы қаласына көшуге тура келеді. Міне, жарқын болашаққа деген айқын жол осы сәттен бастау алады.2002 жылдың 26 мамырында дүниеге келген Қазалының қара домалақ баласы қазір алматылық «Қайрат» футбол командасының қорғаушысы. Әкесі Нұркен Өтегенов Алматы қаласындағы «Метропроект» мекемесінің бас инженері болып қызмет етеді. Ал анасы Роза Құралбаева ҚазақҰлттық Аграрлық университетінің аға оқытушысы. Одан бөлек 9 сыныпта оқитын Рахат математика пәнінен талай олимпиадаларда топ жарып жүрген көрінеді. Әрі суға жүзумен және үлкен тенниспен де айналысады екен. Ал кіші інісі Данияр 4 сыныпта білім алуда.Сәдібек ақсақалмен тілдескенімізде, Әділеттің тұңғыш немересі екенін айтып, бала күнінен допқа деген қызығушылығының бар екенін сөз етті.<blockquote>«Немеремнің алды болған соң есімін өзім қойдым. Ол бала күннен допқа әуес болды. Таңнан аулада доп қуалап, кештің қалай батқанын білмейтін. Жасынан допқа деген құмарлығы оны осы күнге жетеледі. Қазір «Қайрат» командасының әр ойынын жібермей қараймын. Әділетімді көрген сайын бала күндегі шаң-шаң болып далада доп қуып жүрген сәттері жиі есіме түседі. Тағы бір қуанышты жаңалықпен бөлісейін. Немерем жақында ғана, тіпті 20 күн болған жоқ, «Қазақстан» ұлттық құрамасының сапында доп тебуге мүмкіндік алды. Шақырту келіп, 2 жыл келісімшарт жасасты. Сәтін салса, жуырда болатын Беларусь құрамасына қарсы ойында жасыл алаңнан көреміз деген үмітіміз бар», – деді қария.</blockquote>Әңгіме арасында ақсақалдың өзіменде жақын танысып үлгердік. Айтуынша, ертеректе Қазалы қаласындағы ауруханада дәрігер болып жұмыс жасаған. 38 жыл бойы бір орыннан тапжылай науқастардың дертімен күрескен. Ал өмірлік серігі Ханшайым Ғ.Мұратбаев атындағы №17 мектептің орыс тілі пәнінің мұғалімі болуға 40 жылға жуық уақытын арнаған.Әділеттің бала күннен футболға ашылған қызығушылығы кейін мектеп қабырғасында да жалғасты. Алматы қаласына көшіп барған соң, 8 жасынан бастап «Құлагер» шағын ауданында орналасқан «ФШМ» командасына футбол секциясына алынды. Бірінші бапкері Ағаділдә Хасенов ынта-жігері байқалып тұрған баланы қыран құстай баптап, топқа салады. Тәуір ойынымен көзге түскен кейіпкеріміз бірнеше жыл бойы қала біріншілігінде команда капитаны болып, «Қайрат» командасы селекционерлерінің көзіне түседі. Сөйтіп, 13 жасында «Қайрат» командасының шақыртуымен Тимур Сегізбаев атындағы футбол академиясына қабылданады.Академия жас өреннің екінші тынысын ашты десек артық айтқандық емес. Себебі мұнда жүріп, Еуропаның біраз қалаларында доп тепті, халықаралық турнирлерге барды. Ала допты ұршықша иіріп, дарынымен көзге түскен ол біршама жетістіктерге қол жеткізді. Тоқталсақ, Е.Пехлеваниди атындағы Халықаралық турнирінде І орын, «ValenciaCup» халықаралық турнирінде ІІ орын, «Еуразия кубогі» бірінші клубтық турнирінде ІІ орын, «KhimkiCup» халықаралық турнирінде ІІІ орын, әр жылдары жастар арасындағы Қазақстан біріншілігінде І-ІІ орын, Виктор Катков атындағы республикалық турнирінде І орын иеленді. Ал бұл оның футбол әлеміндегі ауыз толтырып айтарлықтай жетістіктері.Әділет осы аралықта жүріп экономикалық институтта білім алып та үлгерді.2020 жылы 1 лигада «Қайрат-Жастар» командасының футболшысы ретінде доп тепті. Сол жылы жастар арасындағы Чемпиондар лигасында өнер көрсетті. Сонымен қатар өткен жылы «Қайрат-Мәскеу» командасының футболшысы ретінде Ресейдің 2 лигасында өнер көрсетті. Бұл бұрыштамадан қақпа маңына желдей жеткен ала допқа бірінші жетіп, қақпашыдан айласын асырып жүрген кезі. Көрші елдің жасыл алаңында ол 11 кездесуге қатысты. Бірақ көрші елдегі мансап ұзаққа созылмады. Себебі, Ресейдің сыртқы шиеленісі мен команданың қаржылық дағдарысы ұжымның тарауына алып келді. Осы тұста команданың бас бапкері Кирилл Кекер Қазақстанға келіп, «Қайрат» командасының тізгінін қолына алды. Бас бапкер мәскеулік командадан жай келмей, әдемі ойын өрнегін көрсеткен бірнеше шәкіртін бірге ерте келді. Соның бірі – Әділет.Жас таланттың еңбекқорлығы, алаңды көре алуы, қорғаныстағы қабілеті команда басшыларын тәнті етсе керек, «Қайрат» Әділетпен бірден екіжылдық келісім-шартқа отырды. Елге оралған кейіпкеріміз команданың қосалықы құрамына емес, негізгі құрамына ілікті. Бүгінде ел чемпионаты мен Еуропа лигасында ойынға негізгі құрамда шығып жүр.<blockquote>«Менің Әділетті танығаныма біраз болды. Ол сабырлы, тұйық, бірақ спортқа бейім жігіт. Сенім білдіріп, негізгі құрамға алуыма оның ойындағы шеберлігі мен мінезі әсер етті. Бойы да ұзын. Қорғаныста тіптен керемет ойнайды. Ол «Қайраттың» негізгі құрамына ауыспай тұрып, қорғаушы болып келді. Оның ойын мәнерін жақсы білемін. Қазір оны жартылай қорғаушы ретінде де ойынға қосып жүрмін. Аяқалысы жаман емес. Биылғы маусымда баспен 2 гол соқты», – деді «Қайрат» футбол клубының жаттықтырушысы К.Кекер.</blockquote>Жанкүйерлер жүрегінен орын алған жас ойыншыны бүгінде футболсүйер қауым жақсы біледі. Әкесі Нұркен Өтегенов осы күнді көп күткен.<blockquote>«Арманым футболшы болу еді. Алайда, тағдыр мені басқа арнаға бұрды. Бірақ балам мен жетпегенге жетсе деп армандайтынмын. 2000 жылдары Ақтөбеде жұмыс істедім. Келіншегімнің жүкті кезі. Екеуміз «Ақтөбе» стадионына келіп, ойын көреміз. Сонда стадионда отырып, балам футболшы болады дейтінмін. Кейін келіншегім босанды. Әділет ес білгеннен бастап футболмен айналысуына жағдай жасадым. Содан өмірі осы саламен байланысып кетті. Қазір жетістіктеріне қарап марқайып отырамын», – дейді әкесі.</blockquote>Жастайынан аулада доп тепкен әрбір баланың арманы – елдің намысын арқалап ұлттық құрама сапында өнер көрсету, көптің қошеметіне бөлену. Әлемнің алпауыт командаларымен текетіресіп, стадиондағы аураны сезіну. Ал мұндай шыңға тек аянбай еңбек еткен жандар ғана жетеді. Иә, Әділет сонау есік алдында таңнан кешке дейін доп қуып жүргенде осы күнді армандағаны анық. Алдына айқын мақсат қойды. Көздегеніне жетті. Бірақ, алар асу әлі алда. Ал біз ауданнан шыққан аяқдопшының дүбірлі додаларда топ жаруына тілектеспіз.

«Қайрат» сапындағы қазалылық

<a href="https://kyzylorda-news.kz/">Kyzylorda-news.kz.</a> Қазалы қаласындағы №18 Қазалы ауданының балалар-жасөспірімдер спорт мектебіндегі балалар биылғы жылдың ақпан айынан бастап спорттың жаңа түрімен айналыса бастады. Грэпплинг деп аталатын спорт түріне жеткіншектердің қызығушылығы жоғары. Бүгінде аталған спортқа шәкірттерді екі жаттықтырушы баулиды.<blockquote>«Бұл Қазақстанға соңғы 15 жылдықта енген спорт. Қызылорда облысында 10 жылға жуық уақыттан бері бар. Ал біздің ауданда биыл ғана ашылды. Соған қарамастан біршама жетістіктеріміз бар. Тараз қаласында жасөспірімдер арасында өткен ҚР чемпионатында Үміт Ысқақ екінші орын иеленді. Осы сайыста Арайлым Бикпаева үшінші орын алды. Грэпплинг-гиден жасөспірімдер арасында ҚР чемпионатында Үміт Ысқақ пен Ринат Оразбек үшінші орынға лайықты болды. Бұйырса желтоқсан айында Үміт Әлем чемпионатында бақ сынайды», – дейді грэпплинг бөлімшесінің жаттықтырушысы Жансая Мұрат.</blockquote>Өрендерді шымырлық пен шыдамдылыққа шыңдап жүрген Жансая Ерланқызы өзі де 5 сыныптан бастап спорт әлеміне енген. Ол дзюдо, самбо, қазақ күресі және грэпплингтен спорт шебері. ҚР чемпионатының жеңімпазы. Азияның және Әлем кубогынан қола жүлдегері. ТМД елдерінің жеңімпазы. Оның мақсаты – күрестің осы түрін ауданда кеңінен дамытып, жеңімпаздар даярлау. Біз барғанда спорт залда бірнеше ұл-қыз жаттығу жасап жатты. Олардың барлығының бойынан спортқа деген құлшынысты анық көруге болады. Бір-бірімен тетелес оқушылар түрлі әдіс-тәсілдерді пайдаланып, озық шығуға тырысуда.<blockquote>«Маған грэпплинг қатты ұнайды. Бұнда қазақша күрестің де, дзюдоның да тәсілдері кездеседі. Бастысы – шапшаңдық қажет. Бұндай спорт түрінің біздің қалада ашылғаны мен үшін үлкен қуаныш. Біраз жарысқа барып та үлгердік. Болашақта керемет нәтижелер көрсетемін деген сенімдемін», – дейді Оңтүстік Батыры республикалық турнирінің бірінші орын жеңімпазы Ринат Оразбек.</blockquote><blockquote>«Аптасына төрт рет өтетін сабаққа қазіргі таңда 28 бала қатысуда. Балалар жаңа спорт түріне тез бейімделіп кетті. Жаттықтырушылар Жұлдызбек Қалмаш және Жансая Мұрат грэпплингтің қыр-сырын үйретуде. Спортты жанына серік еткен бала жаман болмайды. Біріншіден ол өз-өзін қорғай біледі, денсаулығына пайдалы және елінің, жерінің атын шығарып, атағын аспандатады. Қазір ата-аналардың да түсінігі өзгерді. Көпшілігі ұл-қызын спортқа баулуда. Елдің ертеңі осы балғындар», – дейді №18 Қазалы ауданының балалар-жасөспірімдер спорт мектебінің директоры Нұрболат Әбиев.</blockquote>Жалпы бұл мектепте грек-рим, дзюдо, футбол, бокс, волейбол, ауыр атлетика, грэпплинг, тоғызқұмалақ, қазақ күресі бөлімшелері бар. Жалпы 58 топта 758 оқушы оқуда. Оларға 23 жаттықтырушы дәріс береді. Мектепте бокс, ауыр атлетика, қазақ күресі бөлімшелеріне арналған спорт залы, жасанды кіші және үлкен жасанды футбол алаңы, 400 метрлік жүгіру жолы мен трибуналы стадионы бар.Ауладағы жасыл алаң балалардан бос қалған емес. Бүгінде футбол бөлімшесінің қатысушылары ойынның көркін қыздыруда екен. Екі топқа бөлініп алып, допты ұршықша иіріп жатқан жасөспірімдердің футболға деген ынтасы жоғары.2005 жылдан бері жұмыс істеп келе жатқан футбол бөлімшесінің жетістігі жетерлік. Мектеп құрамасы түрлі сайыстардың жеңімпазы. Жаттықтырушылар Біржан Медетбаев, Жарбол Өтеген, Сәкен Қарымсақ дайындаған аяқ допшылардың аяқалысы жаман емес. Облыс біріншілігінде үшінші орын иеленген Наурыз Сырғаш, Әмір Өтеубай, Әділет Ысқақ, Айдос Жақсылықов, Бақдәулет Қаржаубай, Рабат Нұршат, Әлім Өтеубай, Ержан Ерлепесов Біржан жаттықтырушы баптаған жүйріктер. Ал Жарболдың жеткіншектері Елдос Жанқат Тараз қаласында футболдан өткен ҚР чемпионатының үшінші орын иегері атанса, Дидар Алуадин, Аян Орманов, Данияр Еркін, Дидар Асылбек, Рамазан Сайфулла, Ерсұлтан Мұрат, Дәулет Ерғазы, Ерсұлтан Жетпісбайұлы, Нұрмұқасан Жанқуат, Мирас Берікжан Қызылорда облысы біріншілігінде үшінші орынды жеңіп алды. Сәкен Қарымсақ жаттықтырған Айдын Әнуарбекұлы, Ернұр Зикуллаев және Алихан Сыдық облыс біріншілігінде үшінші орынды қанжығалады.<blockquote>«Спорт – денсаулық кепілі. Таңертең 9-да келгеннен балалар алаңда жүгіреді, жаттығу жасайды, ойнайды және өздеріне дос табады. Олар жаман әдеттен аулақ болады. Түрлі жарыстарға қатысып, жер көреді. Кеше ғана аудан ортылығы Әйтеке би кентінде жарысқа қатысып, үшінші орын алып келдік. Шәкірттердің жеңіске деген құлшынысы ерекше. Барлығы да болашағы зор балалар», – дейді жаттықтырушы Біржан Медетов.</blockquote>

Қазақстан және Қызылорда облысының жаңалықтары: Спорт