«AMANAT» партиясының облыстық филиалының атқарушы хатшысы Ләйлә Төрешова, әйелдер қанаты өкілдерімен бірге партияның облыстық филиалы жанындағы Әйелдердің құқықтары мен мүмкіндіктерін кеңейту мәселелері жөніндегі кеңесшісі Алтынай Молжанова басшылық ететін «Анаға тағзым» орталығының ұйымдастыруымен өткен «Сreative caravan» облыстық креатив көрмесіне қатысты.Бұл көрме қазан айының басынан бері жүзеге асырып келеді. Жалағаш ауданынан бастау алған көшпелі керуен Сырдария, Шиелі, Жаңақорған аудандарында болып, 100-ге жуық кәсіпкер пайдалы дәрістер және шеберлік сағаттарымен қамтылған болатын.Партияның «Ұлттық мұра» жобасымен ұштасқан жоба мақсаты – ауылдық жердегі қолөнер шеберлерін оқыту әрі шабыттандыру, кәсібін дамыту бағытында тиісті сала мамандарының дәрісін ұйымдастырып, уақыт талабына сай әлеуметтік желіде жеке бренд қалыптастыруға үлес қосу.Креатив көрме «Анаға тағзым» орталығында жарасымды жалғасын тауып, қала кәсіпкерлері мен жеті аудан қолөнер шеберлерінің басын қосып, өзара тәжірибе алмасуға, көпшілікке өнімдерін жарнамалап, ерекше туынды авторларына құрмет көрсетуге бағытталды.Фото: Amanat Қызылорда облысы

«Сreative caravan» облыстық креатив көрмесі өтті

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимов кезектілік тәртібімен жазылған аудан тұрғындарын жеке қабылдады.Қабылдауға келген азаматтар өздерін толғандырған ұсыныс-пікірлері мен өтініштерін жеткізді. Аудан әкімі тұрғындармен ашық әңгімелесіп, олардың мәселелерін мұқият тыңдады. Сондай-ақ, көтерілген жайттарға заң талаптарына сәйкес түсіндіру жұмыстары жүргізіліп, жауапты сала басшыларына нақты тапсырмалар берілді.Айта кетейік, тұрғындар аудан әкімінің қабылдауына <a href="https://l.facebook.com/l.php?u=http%3A%2F%2Fegov.kz%2F%3Ffbclid%3DIwZXh0bgNhZW0CMTAAYnJpZBExZFUxYnY2eG1XUkk3cjhPWAEe8qpXVJzmHY5xtcwf2ZNB-5bRMfV8MFLg6kCZ5ZNcMCfTMQFyCrXuyQ14Or0_aem_dIBHTCcZZqFMNBrSG1OOug&amp;h=AT0-a_75XDuELgybVIneYq3nIiS-FqPUQqyPZQ8GKW4QFyZubFHbb625xJMvN1_C9o8XCkl-WVSgQgRIXMTB2MKiihS0s9V14-t1mZEP7B7Edx1NdPaJM4ku5-S-6H2pPM3jCWEHs61MMHNY&amp;__tn__=-UK-R&amp;c%5b0%5d=AT0l7rp6viQpVsviKrNYAOdV4PX9g4y9hQwipBSEIvHnEjewQQq3DjfpGT8DRF1pC0XGymEc8P_hA71COMEXBuDl25-vG-41yxFqKI9QF2XrChVC5LtcUiYsEzsbpOkqZ44EjxVupkWP6E1A4Sz1Lq0a-iC2AXRWy-1qVB4oOfPIzskyU6uFfNafWF7HdCX07mFC5VM37mjP3zNn_PwbDO6hr03HcoM">egov.kz</a> порталы, e-otinish бірыңғай базасы арқылы немесе әкімдікке келіп, жазбаша өтініш беру арқылы жазыла алады.Фото: Жалағаш ауданы әкімдігі

Аудан әкімі тұрғындарды жеке мәселелері бойынша қабылдады

<a href="https://kyzylorda-news.kz/">Kyzylorda-news.kz</a>&nbsp; Кеше Байқоңыр қаласының инженерлік инфрақұрылымын жаңғырту мақсатында жүзеге асырылып жатқан сумен жабдықтау және су бұру жүйелерін реконструкциялау жобасы бойынша алда атқарылатын жұмыстарды пысықтау үшін жұмыс кеңесі өтті.Кеңеске Қармақшы ауданы әкімінің орынбасары Самат Қыдырбекұлы, Қазақстан Республикасы Президентінің «Байқоңыр» кешеніндегі арнаулы өкілі қызметін қамтамасыз ету бөлімінің басшысы Жан Шайхысламұлы, Байқоңыр қаласы әкімшілігі басшысының орынбасары Сергей Павлович, сондай-ақ жауапты сала басшылары қатысты.Жиын барысында жобаның екінші кезеңі бойынша іске асырылатын жұмыстар мен оның жүзеге асу барысы талқыланды. Алдағы уақыттағы Байқоңыр қаласы аумағында іске асырылатын техникалық және инфрақұрылымдық шешімдер де нақтыланды.Айта кету керек, қазіргі таңда реконструкциялау жобасының екінші кезеңінің құрылыс жұмыстары басталуда. Бұл кезеңде негізгі инженерлік желілер жаңартылып, су жүйесінің сапасы жақсартылатын болады.Аталған жоба — қала мен аудан халқының тұрмыстық жағдайын жақсартуға, сондай-ақ инженерлік инфрақұрылымды заманауи талаптарға сай жетілдіруге бағытталған маңызды бастама болып табылады.Фото: Қармақшы ауданы

Сумен жабдықтау және су бұру жүйелерін жаңарту жобасы талқыланды

<a href="https://kyzylorda-news.kz/">Kyzylorda-news.kz</a> Облыстың бас офтальмологы, Қызылорда қаласының көп бейінді облыстық аурухананың офтальмолог дәрігері Өтепбергенов Бағжан Бағдатұлымен әңгімелесу сәтті түстін.&nbsp;- Өңірде көз ауруларын емдеу бағытында қандай тәсілдер қолданылуда?- Бірінші кезекте көзді диагностикадан өткізіп, көру қабілетін көзілдіріктің көмегімен сақтауға тырысамыз. Қажет жағдайда әртүрлі аппараттардың көмегімен консервативті ем жүргіземіз. Бізге пациенттер дәрігер жолдамасынсыз ақылы негізде жүгіне алады. Медициналық орталықта офтальмолог қабылдау жүргізетін консультация орталығы жұмыс істейді. МӘМС шеңберінде дәрігер жолдамасымен келіп, тегін тексеріле, ем қабылдай алады.- Қандай ауру түрлері жиі кездеседі және себептері қандай?- Көз аурулары арасында кең тарағаны — миопия мен алыстан нашар көру. Қазір көбі ұялы телефон, компьютер мен түрлі гаджеттерді пайдаланатындықтан жастар арасында мұндай аурулар жиі анықталады. Монитор алдында режим сақтамай ұзақ отыру — миопияның басты себебі. Миопияға шалдыққан жағдайда көзге салмақты азайтып, көзге арналған жаттығударды тұрақты түрде жасап тұру керек. Мұндай ем барысында дәрілік препараттар мен дәрумендер қолданылады. 21 жастан асқан пациенттерге лазерлі емдеу, бейнекомпьютерлі түзету (көздің оптикалық жүйесінің бұзылуын түзету) шаралары қолданылады.- 2026 жылы денсаулық сақтау жүйесі жаңа үлгіге — бірыңғай медициналық пакетке көшеді. МӘМС саласында жоспарланып отырған өзгерістерге қатысты сіздің көзқарасыңыз?- Барлық өзгеріс пациенттің мүддесі үшін жасалады. Халықты қамту аясын кеңейту, кіріс топтары арасындағы жүктемені теңестіру, мемлекет пен жергілікті билік органдарының қатысу үлесін арттыру, бұлар — адамның табысы мен жұмыспен қамтылғанына қарамастан уақытылы сапалы медициналық көмек алуына жол ашады.Осы жылдан бастап онкологиялық скринингті тегін медициналық пакетке қосқаны қуантады. Осы орайда дер кезінде профилактикалық тексеруден өтудің маңызы зор. Оның ішінде жасы 40-тан асқан ер адамдар мен әйелдер ерте сатысында глаукома бойынша тексеруден өте алады. Барлығына жылына бір рет көзін тексертуге кеңес беремін.- МӘМС жүйесін енгізгелі офтальмолог қызметі қаншалықты қолжетімді бола түсті? Тегін тексеріліп, емделуге мүмкіндік бар ма?- Мысал келтірейін. МӘМС жүйесін енгізгенге дейін интравитреалды екпе тек ақылы жүргізілетін. Бұл — көздің шыны тәріздес қабатына дәрілік препаратты тікелей ендіру. Бұл әдіс көптеген көз ауруын емдеу кезінде қолданылады. Оның ішінде диабетті ретинопатия, көз торының дегенерациясы, созылмалы аурулар және тағы басқа.Қазіргі күні МӘМС аясында бұл процедура тегін өтеді. Курс бір инъекциямен шектелмейді, бірнешеуін қамтиды, кейде 10-ға дейін барады. Бір инъекцияның бағасы — 168 мың теңге. Егер ақылы болса, 300 мың теңгеге дейін барады.<img src="https://knadmin.beoblood.kz/uploads/vrach_1_a96b90efaa.jpg" alt="врач 1.jpg">- Лазерлі түзетуден кейін көру қабілеті қайтадан төмендеуі мүмкін бе?- Егер пациент дәрігердің кеңесін тыңдап, қатаң орындап, уақытылы тамшы қабылдаса, қауіп төмен. Жоғарыда атап өткенімдей, біз лазерлі түзетуді жасы 21-ден асқандарға жасауға кеңес береміз. Үлкен кісілердің мұндай қадамға бармағаны дұрыс. Катаракта анықталған жағдайда пациенттің көз бұршағын ауыстырады. Сол кезде көру қабілеті 100%-ға жақсарады.- Көз — нәзік әрі сезімтал орган. Оның ауруын адам кез келген уақытта бастан өткеруі мүмкін. Сізге көбіне қандай көз жарақаттарымен жүгінеді?- Көз жарақаты көбіне құрылысшы, слесарь, дәнекерлеуші сияқты жұмысшы мамандардың техникалық қауіпсіздік талаптарын сақтамауынан пайда болады. Жұмыс барысында көзге ағаш, металл ұшқындары тиюі мүмкін, кейде химиялық, термиялық күйікке шалдығады. Пневматикалық қарудан атылған оқ, балық аулау кезінде қармақтың ілгегі көзіне тиіп, көмегімізге жүгінгендер болды. Біз пациенттің көру қабілетін сақтап қалу үшін бар күшімізді саламыз.- Биоқоспалар көру қабілетін жақсартуға көмектесе ме?- Биоқоспалар күнделікті тағамымызда дәрумендер мен микроэлементтер жеткілікті болмағандықтан көздің саулығын сақтауға көмектеседі. Сондықтан биоқоспа ішуге кеңес беремін. Дегенмен, әр пациентке бекітілген арнайы мөлшері болады. Дәрумендерді де дәрігер рецептімен қабылдау керек.- Әңгімеңізге рахмет!Сұхбаттасқан Айгүл Аханова

МӘМС көзді тегін емдеуге мүмкіндік береді?

<a href="https://kyzylorda-news.kz/">Kyzylorda-news.kz</a>&nbsp; Қармақшы ауданының әкімі Жандос Еркінбек азаматтардың жеке мәселелері мен өтініштері бойынша жеке қабылдау өткізді.Жеке қабылдауда тұрғындар үй және жол инфрақұрылымына қатысты мәселелерін айтса, енді бірі тұрақты жұмысқа орналастыру жөнінде талаптарын жеткізіп, мәселелерiнiң оң шешiмiн табуына ықпал жасауды сұрады.Тұрақты жұмыс сұрап келген азаматтарға сұраныс бойынша бос жұмыс орындары ұсынылды. Сондай-ақ, мамандығына сәйкес және қоғамдық жұмысқа орналасу бойынша жауапты бөлім басшыларына заң шеңберінде барлық мүмкіндіктерді қарастыруды тапсырды. Ал тұрғын үй қажеттілігімен келген адамдарға аудан тұрғындарын баспанамен қамту әр санат бойынша жүргізілетіндігі түсіндірілді.Аудан басшысы көтерілген әрбір мәселелерді сала мамандарымен бірге мұқият зерделеп, айтылған өтініштер мен ұсыныстар бойынша жауапты басшыларға нақты тапсырмалар жүктеді.

Қармақшы: Азаматтардың жеке өтініштері аудан әкімінің назарында

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаевтың қатысуымен «Қызылорданың астаналық &nbsp;кезеңі: тарих пен тағылым» атты республикалық ғылыми-тәжірибелік конференция өтті.Оған Парламент Сенаты мен Мәжілісінің депутаттары Наурызбай Байқадамов, Руслан Рүстемов, Қайрат Тастекеев, Мұрат Әбенов, Мархабат Жайымбетов, Мұрат Ергешбаев, Қазақстанның Еңбек Ері, физика-математика ғылымдарының докторы, профессор, академик, Ұлттық құрылтай мүшесі Асқар Жұмаділдаев, өнертанушы, Қазақстан Суретшілер, Кинематографистер одағының мүшесі Сәуле Қожықова, мемлекет және қоғам қайраткері Болатбек Қуандықов, Әл-Фараби атындағы Қазақ ұлттық университеті «Қазақстан тарихы» кафедрасының меңгерушісі, тарих ғылымдарының докторы, академик Берекет Кәрібаев, Қазақстанның еңбек сіңірген қайраткері, жазушы, драматург Сұлтанәлі Балғабаев, саяси ғылымдар докторы, профессор Әбдіжәлел Бәкір, Анкара Хаджи Байрам Вели университетінің профессоры, филология ғылымдарының докторы Хулия Касапоглу Ченгел, аталған университет докторанты Фулия Акман, жазушы, публицист, ғалым, тарих ғылымдарының кандидаты Бейбіт Қойшыбаев, Л.Н.Гумилев атындағы Еуразия ұлттық университетінің қауымдастырылған профессоры, филология ғылымдарының кандидаты Қайырбек Кемеңгер, Абай облысынан келген делегация және аймақтың зиялы қауым өкілдері, қала, аудан әкімдері, облыстық басқарма басшылары, саяси партия төрағалары мен Қорқыт Ата атындағы Қызылорда университетінің профессорлары қатысты.Аймақ басшысы Қызылорда қаласының ел астанасы болғанына, «Қазақ» атауының қайтарылғанына 100 жыл толу мерейтойымен құттықтап, өңір бүгінгі мерекеге толайым табыстармен, жарқын жетістіктермен жеткенін айтты.<blockquote>«Қасиетті Сыр өңірі – астаналар мекені, ұлт руханияты мен мәдениетінің алтын діңгегі. Ежелгі Сақ заманындағы Шірік Рабат, Оғыз мемлекетінің астанасы Жанкент, Ақ Орда мен Қазақ хандығының астанасы Сығанақ қаласы, Қазақ автономиялық кеңестік республикасының астанасы Қызылорда – соның айқын дәлелі.Тарихына үңілсең ғасырлардан сыр тартатын, бүгінін бағамдасаң келешегінің кемелдігін аңғартатын «Сыр – Алаштың анасы» деген даналық сөз баршамызға жақсы таныс. Қилы замандарда, зұлматқа толы күндерде, ақтабан шұбырынды кезеңінде, ел ішін ашаршылық жайлағанда бүкіл қазақ баласы көш-керуенінің басын Сырға бұрып, Сырды анасындай паналаған. Бұл өлкенің қазақ үшін орны да, жөні де бөлек.Өздеріңізге белгілі Бурабайда өткен Ұлттық құрылтайда Мемлекет басшымыз Қасым-Жомарт Кемелұлы: «Біздің мемлекеттігіміз мыңжылдықтардан бастау алады, оның тамыры тым тереңде жатқаны даусыз. Бірақ осыдан бір ғасыр бұрын ұлтымыздың өз атауының оралуы тарихи әділдік орнату жолындағы маңызды қадам болғанын ашық айтуымыз керек. Мұндай маңызды оқиғалар ел жадында сақталуға тиіс», – деген болатын.Президентіміздің Ұлттық құрылтайдың келесі V отырысын Қызылордада өткізу туралы шешімін барша сырбойылықтар зор қуанышпен қабылдап, ризашылық білдіруде.Астана болған Қызылорда мен бүгінгі жаңарған Қызылорда арадағы жүз жылда бірнеше тарихи кезеңнен өтті. Оның куәгерлері, ұлт мүддесі жолында аймағымыздың дамуына еселі еңбек сіңірген ардақты ағаларымыз ортамызда.Мереке қарсаңында Қызылорданың кейінгі 100 жылдық тарихына арналған кітап жарық көрді. Өңіріміздің кешегісі мен бүгінінен сыр шертетін деректі фильмдер түсіріліп, көрерменге ұсынылды. Негізгі мақсатымыз – жас ұрпаққа аға буынның жасампаз істерін үлгі-өнеге ету, архивтің алтын қорын толықтыру.Бүгінде Мемлекет басшымыздың бастамасымен Әділетті, Қуатты, Қауіпсіз әрі Таза Қазақстанды құру жолында Сыр халқы бекем бірліктің үлгісін танытып, еңбек етуде. Өңіріміздің негізгі макроэкономикалық көрсеткіштерінің өсімі қамтамасыз етілген, республикада алдыңғы қатардамыз. Биыл жалпы өңірлік өнім көлемі 3 трлн. теңгеден асады. Соңғы үш жылда өңір экономикасына 1 триллион 600 млрд. теңге инвестиция тартылды.Қаламыздың астана болған 100 жылдық мерейтойына сый ретінде әлеуметтік нысандар бой көтеріп, саябақтар мен аллеялар қайта жаңғыртылуда. Еліміздің болашағы балаларымыздың жан-жақты, сапалы білім алуына қолайлы жағдай жасап, жайлы орта қалыптастыруда жаңа жобалар мен тың бастамалар жүзеге асты.Мемлекет басшымыздың «Туған жерді бірге түлетейік!» бастамасын қолдаған кәсіпкер-меценаттар, қоғамдық қорлар Сыр өңірін көркейтуге өз үлестерін қосып келеді. Демеушілілер 55 млрд. теңгеден астам қаржыны жаңа жобаларға салды.Тарих тоғысында болашақтың негізі қаланған мекен – ару Қызылорданың келешегі кемел болғай! Конференция жұмысына сәттілік тілеймін!»,– деді Н.Нәлібаев.</blockquote>Жиында Ақмешіттің астана болған кезеңі, «Қазақ» атауының қайтарылуы, қала атының «Қызылорда» болып өзгеруі, басқа да маңызды тарихи шешімдер қабылдаудағы ұлт зиялыларының еңбегі және Қызылордада болған тарихи оқиғалар туралы Сәуле Қожықова, Наурызбай Байқадамов, Берекет Кәрібаев, Бейбіт Қойшыбаев, Хулия Касапоглу Ченгел, Қайырбек Кемеңгер, Болатбек Қуандықов баяндама жасады. Қорқыт Ата атындағы Қызылорда университетінің профессоры, филология ғылымдарының кандидаты Ғабит Тұяқбаев облыстық мемлекеттік архивте сақталған ұлт зиялыларының қолтаңбасы қалған құжаттар туралы айтты.Облыс әкімі барша сырбойылықтар атынан Алаш арысы, ағартушы-ғалым, жерлесіміз, «Қызылорда» атауын ұсынған Қоңырқожа Қожықовтың немересі Сәуле Құлахметқызына ата-баба дәстүріне сай шапан жауып, құрмет көрсетті.Фото: Қызылорда облысы әкімінің баспасөз қызметі

«Қызылорданың астаналық кезеңі: тарих пен тағылым» атты республикалық ғылыми-тәжірибелік конференция өтті

<a href="https://kyzylorda-news.kz/">Kyzylorda-news.kz</a> &nbsp;Мемлекет басшысы бейбіт күннің батырларына шынайы ризашылығын білдіріп, азаматтық қорғау саласының еліміз үшін стратегиялық маңызы ерекше екенін атап өтті.<blockquote>– Конституциямыздың алғашқы бабында «Адам және адамның өмірі – мемлекеттің ең қымбат қазынасы» екені анық көрсетілген. Азаматтық қорғау саласының әр қызметкері ел қауіпсіздігі және азаматтарымыздың амандығы үшін қажырлы еңбек етуде. Шын мәнінде, құтқарушы болу – кез келген төтенше жағдайға дайын тұру, ешқандай қауіп-қатерге қарамастан адам өміріне араша түсу деген сөз. Бұл – әрине, өте абыройлы іс, жауапты қызмет. Халқымыз өздеріңіз сияқты батыл, ержүрек және ең бастысы, нағыз отаншыл азаматтарды әрдайым мақтан тұтады. Сіздердің адал қызметтеріңіз – өскелең ұрпақ үшін өте жақсы үлгі-өнеге, – деді Қасым-Жомарт Тоқаев.</blockquote>Президент соңғы жылдары еліміз бастан өткерген табиғи апаттардың ең ауыр салмағы құтқарушыларға түскенін айтты.<blockquote>– Былтыр алапат су тасқыны кезінде сіздер жұртты қауіпсіз жерге көшіріп, апаттан аман алып қалдыңыздар. Қостанайда, Семейде және басқа да аймақтарда болған орман өртіне қарсы тұрып, тілсіз жаумен күрестіңіздер. Төтенше жағдай болған аймақтарға өзім де арнайы бардым. Ерлікке бергісіз нағыз еңбекті өз көзіммен көрдім. Сондықтан азаматтық қорғау саласы мамандарының кәсіби шеберлігі және табанды еңбегінің арқасында біз бір ел болып барлық қиындықты еңсердік деп толық сеніммен айтуға болады. Жалпы, құтқарушыларымыз соңғы 5 жылда 225 мыңға жуық адамның өмірін сақтап қалды. Сондай-ақ шетелдегі гуманитарлық миссияларға қатысып, кәсіби деңгейі жоғары озық маман екенін дәлелдеді. Сол арқылы еліміздің халықаралық беделін арттыруға атсалысты. Осы орайда бүгін мен еліміздегі барлық құтқарушыларға тағы да зор алғысымды айтамын, – деді Мемлекет басшысы.</blockquote>Қасым-Жомарт Тоқаев мемлекет азаматтық қорғау саласын күшейте түсуге баса мән беретінін айтты.<blockquote>– Осыдан бес жыл бұрын Төтенше жағдайлар министрлігі қайта құрылды, ал осы салаға республикалық бюджеттен бөлінетін қаржы екі жарым есе көбейді. Бір сөзбен, нақты және тиімді шаралар қабылдана бастады. Атап айтқанда, 1700-ден астам арнайы техника алынды. 42 өрт сөндіру депосы және құтқару станциясы салынды. Аудандық төтенше жағдай бөлімшелері заман талабына сай жаңғыртыла бастады. Құтқарушылардың әлеуметтік жағдайын жақсарту жұмысы да басты назарда. Соңғы екі жыл ішінде сала мамандарының еңбекақысы 77 пайызға өсті, енді оларға арнайы үстемеақы төленетін болды. Сондай-ақ тұрғын үй төлемдері мен әлеуметтік жеңілдіктер беріле бастады. Жалпы, бұл жұмыс міндетті түрде өз жалғасын табады. Осындай шаралардың арқасында азаматтық қорғау саласының кадрлық әлеуеті артып келеді, – деді Президент.</blockquote>Мемлекет басшысы жер жүзінде түрлі себептерге байланысты табиғи және техногендік апаттар көбейіп кеткеніне тоқталып, кәсіби тұрғыдан білікті, мықты мамандарды, яғни жаңа заман құтқарушыларын даярлауға ерекше назар аудару қажет екенін тілге тиек етті.<blockquote>– Осы мақсатпен Көкшетау техникалық институты Мәлік Ғабдуллин атындағы Азаматтық қорғау академиясы болып қайта құрылды. Құтқарушы еліміздегі ең беделді мамандықтың біріне айналуға тиіс. Мемлекеттік органдар құтқарушыларға қоғамда лайықты баға берілуі үшін барынша шара қабылдауға міндетті. Өте қиын, қауіпті, бір емес, бірнеше бағытта дайындықты қажет ететін осынау мамандықты насихаттауға бұқаралық ақпарат құралдары, өнер адамдары үлес қоса алады. Нағыз құтқарушылар әскери іс, экономика, құрылыс және басқа да көптеген саладағы арнайы білімді меңгерген. Олардың арасында спортшылар да аз емес, – деді Қасым-Жомарт Тоқаев.</blockquote>Президенттің пікірінше, Үкімет пен салалық министрлік төтенше жағдайларды уақтылы ескертудің және салдарын жоюдың тиімді жолдарын қарастыруға баса мән берген жөн.<blockquote>– Орталықтағы және жергілікті құтқару қызметтерінің іс-қимылы – біртұтас, нақты жүйеленген механизм. Басқару үдерісін автоматтандыруға, цифрландыруға, өзге де заманауи технологияларды, соның ішінде жасанды интеллектіні кеңінен енгізуге күш салу маңызды. Сонымен бірге министрлік қазірдің өзінде «Заң және тәртіп» идеологиясы аясында өнеркәсіп нысандарындағы қауіпсіздікті күшейтіп, өртке қарсы талаптар мен құрылыс нормаларын қатаңдату шараларын қабылдап жатыр. Азаматтарға, ең алдымен, балалар мен жастарға өрт, су тасқыны, жер сілкінісі кезіндегі қауіпсіздік ережелерін мұқият, түсінікті тілмен жеткізу қажет. Олар апат кезінде қалай әрекет ететінін білуге тиіс. Сонымен қатар күнделікті өмірде, тыныш уақытта қауіпсіздік шараларын ұдайы есте сақтағаны жөн. Көпшілікті табиғат аясында демалу, су айдынында шомылу, тауға шығу, ауа-райы жайсыз кезде және басқа да жағдайларда көлік жүргізу сияқты азаматтардың денсаулығы мен өміріне қатер төндіретін сәттерде жауапкершілік танытуға үндеу маңызды, – деді Мемлекет басшысы.</blockquote>Қасым-Жомарт Тоқаев тәртіп, жанашырлық, жәрдем беру секілді өмірлік маңызы бар қағидаларды қоғамда орнықтыру ісінде құтқарушылар өскелең ұрпаққа үлгі болуы керек деп санайды.<blockquote>– Оқу орындарына Төтенше жағдайлар министрлігі бөлімшелерінің бейресми қамқорлық көрсету тәжірибесін белсенді түрде енгізген дұрыс. Құтқарушылар қоғамда салауатты өмір салтын насихаттауға, балалар мен жастар арасында спортты дәріптеуге зор үлес қоса алады. Бұл – шын мәнінде стратегиялық маңызы бар мәселе. Себебі рухы мықты, салауатты ұрпақ тәрбиелеу – қазіргі жаһандық өзгерістер заманында ұлт сапасына тікелей әсер ететін жағдай. Осы бағытта Төтенше жағдайлар министрлігі спорт федерацияларымен өзара байланыс орнатып, белсенді жұмыс істегені жөн. Жалпы, бүгінгі таңда спорт федерациялары абырой-бедел жинайтын құрылымға айналып кетті. Көптеген федерацияны ірі бизнес өкілдері және мемлекеттік мекеме басшылары басқарып отыр. Бірақ ашығын айтуымыз керек, кәсіпкерлер осы қоғамдық маңызы бар іске өз қаржысын салуға құлықсыз, тек мемлекеттен бөлінетін қаражатқа қарап отырады. Мемлекеттік қызметшілер де осы жоғары қоғамдық лауазымдарды өзін «жарнамалау» құралы ретінде көреді, яғни спорттың мәнісіне терең бойламайды. Тіпті, спортшылардың жетістігін өздерінің жеке жеңісі деп санайтындар бар. Мұндай теріс, жағымсыз үдеріске тосқауыл қою керек. Осы мәселе бойынша жан-жақты талдау жүргізу қажет. Бұл жұмысты Президент Әкімшілігіне тапсырамын, – деді Президент.</blockquote>Мемлекет басшысының пайымдауынша, спорт және дене шынықтыруға қолдау көрсетуді құрметті қоғамдық миссия және үлкен азаматтық жауапкершілік ретінде қарастырған жөн.<blockquote>– Ел ішінде және шетелде атақ-абыройыңды асқақтату үшін федерация басқару дұрыс емес. Оған жол беруге болмайды. Сондықтан мемлекет кәсіпкерлерді, соның ішінде ірі бизнесмендерді қолдайды. Бірақ мемлекет пен қоғам да олардың осыған сай әрекет еткенін күтеді. Атап айтқанда, бұл спортты, мысалы футболды коммерцияландыру мәселесіне қатысты. Туризм және спорт министрлігі мен спорт федерацияларының арасында тең құқылы диалог өрбіп, міндеттері мен құзыреттері нақты айқындалған ынтымақтастық жолға қойылуға тиіс. Кәсіпкерлердің бастамаларын ынталандыру – мемлекеттік саясатымыздың негізгі басымдығы. Мен бұған ерекше мән беремін. Өткен аптада экономикалық ахуалға қатысты арнайы жиын өткіздім. Онда еліміздегі бизнесті дамыту мәселелері қарастырылды. Кеше Премьер-министрге берген тапсырмамда шағын және орта кәсіпкерлікті қолдау қажеттігіне тағы да баса назар аудардым. Қазір бірқатар спорт федерациясына бизнесмендердің, меценаттардың жаңа буыны келе бастады. Оларға спортты дамыту саласындағы жағдайды жақсарту міндеті жүктелді. Қазірдің өзінде жұмысқа жауапкершілікпен қарап, маңызды жеңіске қол жеткізуге бар ынтасымен ұмтылатындарын байқап отырмыз, – деді Қасым-Жомарт Тоқаев.</blockquote>Бұл ретте Президент ТЖМ қызметкерлері, құтқарушылар әрқашан және әр кезде ел қамын ойлап, азаматтардың қауіпсіздігін күзететінін атап өтті. Сондай-ақ азаматтық қорғау жүйесін жаңғыртудың кешенді жұмыстары жалғасып, құтқарушыларға жан-жақты қолдау көрсетілетінін жеткізді. Қазіргі жұмыс қарқынын төмендетуге болмайды. Өйткені азаматтардың өмірі мен тұрмысы осыған тікелей байланысты.<blockquote>– Өзгенің өмірін сақтау үшін өз басын қатерге тігу – нағыз ерлік. Қиындыққа тап болған жандар ең алдымен құтқарушылардан көмек күтеді. Бүгінде азаматтық қорғау саласының қызметкерлері өз міндетін мінсіз атқарып келеді. Олар сын сағатта жанқиярлық көрсетуге дайын тұрады. Тіпті, осы жолда құрбан болған ерлеріміз аз емес. Өткен отыз жылда 72 құтқарушы ерлікпен қаза тапты. Біз батырларымыздың есімін ешқашан ұмытпаймыз. Олар отаншыл және антқа адал болудың тамаша үлгісін көрсетті. Сондықтан өмірін құтқару ісіне арнаған ерлердің есімдерін тарихымызда мәңгі сақтау үшін тиісті іс-әрекеттерді дер кезінде қолдануымыз керек. Нағыз ерлік жасаған батыл азаматтарымыздың рухына тағзым ете отырып, олардың есімдерін ел ішінде ұлықтай беруіміз қажет. Халқымыз «Еңбек ерлікке жеткізер, ерлік елдікке жеткізер» деп айтқан. Түптеп келгенде, қайсар рухты құтқарушыларымыз Әділетті және Қауіпсіз Қазақстанды құруға мол үлес қосып жатыр, – деді Мемлекет басшысы.</blockquote>Салтанатты жиын соңында Президент қызметтік борышын атқару барысында көрсеткен ерлігі мен жанқиярлығы үшін бір топ азаматқа мемлекеттік наградалар тапсырды.Ақорда

Президент құтқарушыларды кәсіби мерекесімен құттықтады

<a href="https://kyzylorda-news.kz/">Kyzylorda-news.kz</a> Қызылорда қаласында Халыққа қызмет көрсету орталығында «Әділет кеңес береді» атты кең ауқымды акция өтті.Шараны «Азаматтарға арналған үкімет» мемлекеттік корпорациясының облыстық филиалы мен Қызылорда облыстық Әділет департаменті бірлесіп ұйымдастырды. Акция ХҚКО 20 жылдығына орай өткізілді.Акцияның негізгі мақсаты – тұрғындарға мемлекеттік қызметтер мен құқықтық мәселелер бойынша тегін кеңес беру, олардың құқықтық сауаттылығын арттыру және заң саласындағы өзекті сұрақтарына нақты жауап алуына мүмкіндік жасау. Шара барысында азаматтарға әділет органдарының мамандарымен қатар, нотариус және жеке сот орындаушылар палаталарының өкілдері де кеңес берді.«Біздің мақсатымыз – азаматтарға сапалы және қолжетімді құқықтық көмек көрсету. Аталмыш акциясы арқылы тұрғындар өздерін толғандырған сұрақтарға кәсіби мамандардан нақты жауап ала алады. Бұл халықтың құқықтық сауаттылығын арттырып қана қоймай, мемлекеттік қызметтердің ашықтығын қамтамасыз етеді. Мұндай шаралар қоғам мен мемлекеттік органдар арасындағы сенімді нығайтады», – деді облыстық филиал директоры Аида Абибуллаева.Акцияға қатысқан тұрғындар көрсетілген қызметтерге ризашылығын білдіріп, мұндай бастамалардың жиі ұйымдастырылуын қолдайтындарын айтты.

«Әділет кеңес береді» акциясы өткізілді

<a href="https://kyzylorda-news.kz/">Kyzylorda-news.kz</a> Қылмыстық істің ізін суытпай ашып, күдіктіні күмілжусіз табатын қызметтік иттердің маңызы зор. Ал, төбеттің тілін тауып, бабын жасайтын, айғақты дәл нұсқауға баулитын кинолог маманның еңбегі ұшан-теңіз. ҚАЖ департаментіне қарасты №68 мекемесінің режим және күзет бөлімінің бақылаушы-кинологы әділет кіші сержанты Нұрымжан Дүйсенбековтің сөзі де осыны қуаттайды.Ыммен-ақ ымыраға келетін кинолог пен қызметтік ит қауіпсіздікті сақтап, тыйым салынған заттардың мекеме аумағына өтуіне бөгет болады. Түрлі қылмыстың алдын алу мақсатында қос серіктес барын салады.Кинологтың бір күні таңғы жаттығудан басталып, із кесу, иіс тану, күзет учаскелерін бақылаумен жалғасады. Иттің ерекше күтімі мен тамақтануына, денсаулық жағдайына да жауап беретін осы маман.<blockquote>– Кинолог қызметі – атүсті қарауға болмайтын жұмыс. Қызметтік иттің психологиясын, мінезін, қимылын түсініп, бағыт-нұсқау береміз. Тиісінше, олар да төңірекке түгел көз жүгіртіп, әр дыбысқа елең етіп, күмән туғызса бірден белгі береді. Мұны сенімді қарым-қатынастың нәтижесі деп білемін. Бастысы қауіпсіздікке қалқан болғанымыз. Негізі қызметтік иттерді 7 айлығында да қолға үйрете бастаймыз. Мына “Рой” есімді иттің жасы 1-де. Арнайы жаттығуларға 1-1,5 сағаттай уақыт бөлеміз. Үйрету жұмыстары үзілмесе, кілтипанды табуда кідіріп қалмайтынымыз анық, - дейді режим және күзет бөлімінің бақылаушы-кинологы әділет кіші сержанты Нұрымжан Дүйсенбеков.</blockquote>Кинологтың кәсіби шеберлігі мен төбеттің түйсігі талай істің түйінін тарқататыны даусыз.

Кілтипанды табар кинолог қызметі

<a href="https://kyzylorda-news.kz/">Kyzylorda-news.kz</a> «AMANAT» партиясының 2023-2027 ж.ж. арналған «Халықпен бірге!» Сайлауалды бағдарламасының іске асырылу барысын қоғамдық негізде қадағалау саяси ұйымның Партиялық бақылау қызметіне жүктелген.Осыған орай партияның барлық аймақтық және аумақтық филиалдары жанындағы Партиялық бақылау комиссиялары бұл қызметті өзі жұмысының бір бағыты ретінде атқарып келеді.&nbsp; Осы ретте бүгін Сайлауалды бағдарламаның өңірлік Жол картасының нысандарында әрекет ететін аумақтардағы партиялық бақылау бекеттері жұмысын жетілдіру бойынша арнайы партиялық бақылау инспекторы Алтынбек Жарылқасынов аумақтық филиалдармен онлайн жиын өткізіп, тренинг ұйымдастырды.Атап өту керек, Сайлауалды бағдарламаны Қызылорда облысы бойынша іске асыру басталған кезеңнен бастап 84 нысанға партиялық бақылау бекеттері орнатылса, бүгінгі күнге &nbsp;77 нысан &nbsp;пайдалануға берілді. 7 нысан құрылысы партиялық бақылауда. Әрбір нысан халық игілігіне пайдалануға берілгенше партия бақылауында болып, апта сайын олардың құрылысына қарқынды түрде мониторингтер жасалуда.&nbsp;<img src="https://knadmin.beoblood.kz/uploads/FB_IMG_1760679083546_582198cecc.jpg" alt="FB_IMG_1760679083546.jpg">

Партиялық бақылау бекеттері қызметі бойынша тренинг өтті

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Қазақстан Республикасының VIII шақырылымындағы облыстық мәслихат төрағаларымен кездесті.Оған «Қазақстан мәслихаттары депутаттарының бірлестігі» РҚБ төрағасы Төлеубек Мұқашов, Қостанай, Жамбыл, Ақмола, Алматы, Жетісу, Ақтөбе, Абай, Ұлытау, Түркістан, Қарағанды, Батыс Қазақстан облыстық, Шымкент және Астана қалалық мәслихат төрағалары арнайы қатысты.Кездесуде аймақ басшысы жергілікті өкілді органмен бірлесіп атқарылған жұмыстарға тоқталып, ұлтымыздың «Қазақ» атауының қайтарылғанына, Қызылорда қаласының астана болғанына 100 жыл толу мерейтойына арнайы келген делегация мүшелеріне алғыс білдірді.<blockquote>«Президентіміз Қасым-Жомарт Кемелұлы барлық деңгейдегі мәслихат депутаттарының екінші республикалық форумында: «Жергілікті атқарушы билікке жаңа буын өкілдері көптеп келе бастады. Қазір олар ел басқару ісін үйреніп, тәжірибе жинауда. Оларға жан-жақты қолдау көрсету керек. Әсіресе, мәслихат депутаттары мен әкімдердің бірлесе жұмыс істегені жөн. Өйткені оларды мемлекеттің жергілікті жердегі қос тірегі деуге болады», – деп атап көрсетті. &nbsp;Конституциямызда айқындалғандай, жергілікті мемлекеттік басқаруды тиісті аумақтағы істің жай-күйіне жауапты жергілікті өкілді және атқарушы органдар жүргізеді. Тәуелсіздігіміздің алғашқы жылдарында облыстық мәслихат экономиканы әртараптандыру, оны жаңаша даму жолына түсіру, ел дамуының жаңа бағыттарын айқындауға белсенді атсалысты. Ең бастысы, өз сайлаушыларының ел болашағына деген сенімін арттырды. &nbsp;Саяси тұрақтылықты қамтамасыз етудежергілікті мәслихат қызметінің рөлі ерекше.Президентіміздің бастамасымен 2022 жылдан бері өткен бес ірі саяси науқанда жергілікті мәслихат депутаттары белсенді жұмыс жасағанын ерекше атап өтуіміз қажет», – деді Нұрлыбек Машбекұлы.</blockquote>Басқосуда мәслихат төрағаларына Қызылорда қаласының ел астанасы болғанына 100 жыл толуына орай шығарылған естелік сыйлықтар мен арнайы тартулар табысталды.Облыстық мәслихатпен бірлесіп атқарған жүйелі жұмыстың арқасында Қызылорда облысы әлеуметтік-экономикалық дамудың негізгі көрсеткіштері бойынша республикада алдыңғы қатардан көрініп келеді. Биыл облыс бюджеті 851,3 млрд теңгеге жетіп, 2022 жылдан бері 233 пайызға артты, оның 56 пайызы әлеуметтік салаға бағытталды. 2021 жылы даму бюджеті 47 млрд теңге болса, биыл 207 млрд теңгеге жетіп, 4,5 есе көбейді.Бұл қаражат халықтың өмір сүру сапасын жақсартуға, инфрақұрылымды дамытуға, өзекті мәселелерді шешуге бағытталды. 2022 жылдан бері 200-ге жуық әлеуметтік нысан салынып, пайдалануға берілді.&nbsp;<img src="https://knadmin.beoblood.kz/uploads/FB_IMG_1760677784464_ec74c6da89.jpg" alt="FB_IMG_1760677784464.jpg">

Облыс әкімі мәслихат төрағаларымен кездесті 

<a href="https://kyzylorda-news.kz/">Kyzylorda-news.kz</a>&nbsp; Трендтегі мамандықтардың түрленуі мен қалау-арман түлектердің таңдауын сан тарауға салып отыр. Осындай сәтте жас буынға бағыт-бағдар беру – үлкен жауапкершілік. ҚАЖ департаментіне қарасты №68 мекемесінің қызметкері арнайы шақыртумен С.Толыбеков атындағы №3 ақпараттық технологиялар мектеп-лицейіне “Таңдау уақыты” атты кәсіби кездесуге барды.Өз саласының үздіктері 10-11 сынып оқушыларына мамандық таңдаудың маңызын түсіндіріп, қажетті кеңес берді. Мекеменің жеке құраммен жұмыс жөніндегі аға инспекторы әділет капитаны Динара Шахи Қылмыстық-атқару жүйесінің қоғамдағы рөлі мен жауапкершілігі жөнінде әңгімелеп, қызметтің күрделі де құрметті миссиясына тоқталып, әрбір қызметкердің ел тыныштығы мен заң үстемдігін сақтаудағы еңбегі туралы мысалдар келтірді. Сондай-ақ, салмақты салаға бет бұрғысы келетін жас буын болса, қатарға қосып, қуанышпен қарсы алатындарын жеткізді.Жылы жүздесу барысында мектеп мұғалімі де сұранысқа ие мамандықтарды атап өтіп, дайындаған мәліметін ұсынды. Тіпті арнайы келген қонақтар мен оқушылар “Қызық екен” ойынына кезек беріп, жасырылған ұяшықтағы сұрақты таңдап, жауабын бірге іздеді. Бұл көңілді сергіткен сәт болды.Сонымен қатар, оқушылар да өз ойың бүгіп қалмай, сала мамандарына түрлі сұрақ қойып, еркін пікір алмасты. Мұның өзі жастардың беталысы жаман емес екенін байқатты.Кәсіби кездесу түлектердің болашақты бағамдауына септігін тигізді деп сенеміз.

Архив