<a href="https://kyzylorda-news.kz/ru">Kyzylorda-news.kz.</a>&nbsp;Қызылорда облысында күрделі жөндеуді қажет ететін 550 үй бар. Бұл туралы бүгін Өңірлік коммуникациялар қызметінің баспасөз алаңында облыстық энергетика және тұрғын үй-коммуналдық шаруашылық басқармасының басшысы Руслан Нұрмағанбетов мәлімдеді.Биылғы жылға республикалық бюджеттен 18 көппәтерлі тұрғын үйді жөндеуге 862,4 млн. теңге қаржы бөлінген. Қызылорда қаласында 12 үй, Қазалы 4 үй, Жаңақорған ауданы 2 үй. Сонымен қатар, 2024 жылға &nbsp;36 үйді жөндеуге 2,1 млрд. теңгеге тиісті министрлікке бюжеттік өтінім ұсынылған.<blockquote>«Қызылорда облысында сараптама қорытындысымен апатты деп танылған 54 көппәтерлі тұрғын үйлер бар. Жалғыз тұрғын жайы апатты деп танылған 532 отбасы тұрғын үй кезегінде тұр. Оның ішінде, Қызылорда қаласында 513, Сырдария ауданында 18, Жалағаш ауданында 1 отбасы бар. 2022-2023 жылдары облыстық бюджеттен қаржы бөлініп, осы санат бойынша тұрғын үй кезегінді тұрған азаматтарға 100 пәтер берілді», - дейді Руслан Нұрмағанбетов.</blockquote>Басқарма басшысы брифинг барысында тұрғынжай үшін төленетін төлемдер туралы да баяндады.&nbsp;<blockquote>«Мемлекет басшысының халықтың әлеуметтік жағынан осал топтарын қолжетімді жалға берілетін тұрғын үймен қамтамасыз ету жөніндегі тапсырмасына сәйкес жұмыстар жасалуда. Азаматтарға тұрғын үйдің жалдау ақысын төлеу бойынша қаржы операторы болып «Отбасы банк» тұрғын үй құрылыс жинақ банкі» АҚ-ы тағайындалды. Қәзіргі уақытта, «Отбасы банк»-мен 159 азамат келісім жасалды», - деді басқарма басшысы.&nbsp;</blockquote>Айта кетейік, 1 мамырдағы жағдай бойынша тұрғын үй алу кезегінде 36 271 азамат тұрған. Оның ішінде бір Ұлы Отан соғысының ардагері, 2252 жетім бала мен ата-анасының қамқорлығынсыз қалған бала, 6882 «Алтын алқа», «Күміс алқа», алқаларымен наградталған немесе бұрын «Батыр ана» атағын алған, сондай ақ 1 және 2 дәрежелі «Ана даңқы» орденімен наградталған көпбалалы ана, көпбалалы отбасы бар. Сонымен қатар 14 365 халықтың әлеуметтік жағынан әлсіз тобындағы азамат, 12 196 мемлекеттік қызметші, бюджеттік ұйымдардың қызметкері, әскери қызметші және мемлекеттік сайланбалы қызмет атқаратын азамат және 575 жалғыз тұрғын үйі Қазақстан Республикасының заңнамасында белгіленген тәртіппен авариялық жағдайда деп танылған азамат бар.&nbsp;

Руслан Нұрмағанбетов: Қызылордада тұрғын үй алу кезегінде 36 271 азамат тұр

<a href="https://kyzylorda-news.kz/ru">Kyzylorda-news.kz.</a>&nbsp; Қазақтың театр әлемінде бағы жанған Нұрмұхан Жантөрин, Асанәлі Әшімов, Ыдырыс Ноғайбаев, Құман Тастанбеков, Досхан Жолжақсынов сынды өнер майталмандары жасаған тамаша образдар бүгінге дейін көрермендерінің жүрек түкпірінде сақтаулы. Осындай тұғырлы тұлғалардың ізін жалғап, театр мәдениетіне үлес қосып жүрген жандар жетерлік. Солардың бірі – Н.Бекежанов атындағы облыстық қазақ академиялық музыкалық драма театрының артисі, Мәдениет саласының үздігі Ұғым Баймаханов.Оның есімі театрдың тұрақты көрермендеріне жақсы таныс. Кейіпкеріміз бүгінде Сыр сахнасының төрінен орын алып, биіктен көрініп келеді. Ол театр сахнасында түрлі жанрдағы образдарды жалпақ жұртқа танытты. Кейіпкердің болмысын барынша ашып, бүгінде сырлы өнердің майталманына айналды.Ұғым Санақұлы 1995 жылы Қорқыт ата атындағы Қызылорда мемлекеттік университетінің хореография мамандығына оқуға түсіп, 1999 жылы тәмамдаған. Айтуынша өнер әлеміне қадам басуына білім берген ұстаздары ықпал еткен. Ең алғаш университет табалдырығын аттаған сәттен ұстазы Алмас Қаржаубаевтан тәлім алып, хореография саласының қыр-сырын үйренген. Осылайша арманын мақсатқа, мақсатын шындыққа айналдыру үшін 1997 жылы университет қабырғасында оқып жүріп, «Сыр сұлуы» ән-би ансамблінің бишісі болды. Кейін Түркістан қаласындағы Қожа Ахмет Яссауи атындағы халықаралық қазақ-түрік университетінде актёр мамандығы бойынша білім алды. Оқуын тәмамдаған сәттен бастап, Н.Бекежанов атындағы облыстық қазақ академиялық музыкалық драма театрында қызмет етіп келеді.<blockquote>– Университетте оқып жүрген кезеңде Алмас Қаржаубаев, Татьяна Угай, Гүлбану Елубайқызы сияқты білікті оқытушылардан білім алдым. &nbsp;Кейін қазақ-түрік университетінің өнер бөліміне оқуға түсіп, драматург Сая Қасымбек және Қазақстанның халық артисі Райымбек Сейтметовтен актерге тән қырағылықты үйрендім. Одан соң Сыр еліндегі іргелі өнер ордасына келіп, көркемдік жетекшіміз Хұсейн Әмір-Темір ағамның батасын алдым. Бұл кісілердің бәрі мені өнер айдынына жетелеп, ыстығы мен суығына төзуді үйретті. Әрқайсысына айтар алғысым шексіз, – дейді ол.</blockquote>Айтуынша оның актерлік қабілетін жете танытқан А.Чеховтың «Шие бауындағы» Гаев рөлі болды. Арнайы актерлік мектепте оқымаса да, режиссердің бағыт-бағдарын бойына сіңіріп, Гаевтей күрделі рөлді тәп-тәуір алып шыққан. Сыр сахнасында Д.Исабековтің «Мұңлық-Зарлық» лиро-эпостық драмасындағы бас сақшы Шафхат, «Абай» пьесасындағы Оразбай, Тахауи Ахтановтың «Ант» пьесасында Әбілқайыр хан, С.Жүсіптің «Адам болып өтейін» спектакліндегі Дүйімқара – сан қырлы, түрлі мінезді кейіпкерлер. Р.Отарбаевтың «Мұстафа Шоқай» драмасындағы Розенбергті, Ж.Ерғалиевтің «Құлпытастың көз жасы» психологиялық драмасындағы Ержанды, О.Бодықовтың «Нартай» драмасында Ералинді ойнағанда адам тағдырына жазылған сәттерді шынайы бейнеледі. Д.Исабековтың «Ескі үйдегі екі кездесу» драмасында Айтөре, Р.Отарбаевтың «Двойник» комедиясында Бай, М.Ахундзаденің «Кетпейсің! Болды, кетпейсің!» музыкалық комедиясында сиқыршы, Иран-Ғайыптың «Қорқыттың көрі» драмасында билеуші Бек, Д.Рамазанның «Абылай ханның арманы» драмасында Қалдан серен, А.Володиннің «Кездесу мен қоштасу» драмасында Никулин секілді түрлі жанрдағы образдары көрермен көңіліне қонды.Талантты өнерпаздың театр сахнасында шыңдалып, шеберлігі ұшталуына өнер жолында бағыт-бағдар берген ұстаздарынан бөлек ұжымдас достарының да еңбегі зор.<blockquote>– Ұғым – өте еңбекқор, адамгершілігі мол азамат. Отбасында, ұжымдастарының арасында абыройы биік, сегіз қырлы, бір сырлы жан. Оның таланты театрда сомдаған әрбір рөлінен жарқырап көрініп тұрады. Ерекше қасиеті кез келген қойылымда серіктесіне көмек қолын созады. Әрбір қойылымға ерекше мән береді. Халықтың көңілінен шығу үшін көп еңбектенеді. Сол үшін де Сыр сахнасында өзіндік орнын қалыптастырып, көрерменін әркез таңғалдырудан жалықпайды, – дейді театр артисі Залипа Төлепова.</blockquote>Ұғым Баймаханов сахнадағы мол ізденісі мен шеберлігінің арқасында 2005 жылы Мәдениет, ақпарат және спорт министрлігінің Құрмет грамотасымен марапатталды. 2010 жылы театрда белгіленген Т.Айнақұлов атындағы ауыспалы жүлдені иеленді. 2016 жылы облыс әкімінің Алғыс хатын, 2017 жылы «Салалық мәдениет, спорт және ақпарат қызметкерлерінің кәсіптік одағының «Құрмет белгісімен» марапатталды. Ол талант иесі ғана емес ұл-қыз тәрбиелеп отырған ардақты әке. Әкенің айтқан әрбір ақылы балалары мен кейінгі ұрпағына үлгі. – Сахнада өз жауапкершілігіңе алған кейіпкеріңнің жан дүниесін ашып көрсету үшін көп еңбек керек, – дейді ол.Расында қай мамандықтың да шыңына шығу үшін еңбек керек. Ал көрерменді сендіре білу, кейіпкеріңе айналып, соның өмірін сүру – шын талантқа тән. &nbsp;

Ұғым Баймаханов: Кейіпкердің жан-дүниесін ашу үшін еңбек керек

<a href="https://kyzylorda-news.kz/ru">Kyzylorda-news.kz.</a>&nbsp; Қызылорда қалалық орталықтандырылған кітапханалар жүйесіне қарасты Абай ауылындағы №5 кітапхананың ұйымдастыруымен «Ұстаз жүрегі жырлайды» атты жергілікті ақын, ардагер-ұстаз Марал Оспанованың шығармашылық кеші өтті. Жыр кешіне республикаға белгілі ақын-сазгер, білім саласының ардагері Ділдахан Торғаева және қалалық білім саласы ардагерлер кеңесінің төрағасы М.Бәйімбетов бастаған ардагер-ұстаздар қатысты.Іс-шараның мақсаты – ауыл жастарының кітап оқуға деген ынтасын арттырып, ауылдағы өнегелі жандардың өмір жолын бүгінгі ұрпаққа &nbsp;үлгі ету.&nbsp;Жыр кешінде кітапхана меңгерушісі Күләйша Сынасапова жергілікті ақын, ардагер-ұстаз Марал Оспанованың өмір жолын қысқаша баяндады.&nbsp;<blockquote>Расында біздің Сыр өңірі шашасына шаң жұқтырмас ақын-жазушыларға өте бай. Оны бүгінгі ұрпаққа айтып жеткізе білу жастарға рухани күш сыйлары анық. Қала іргесіндегі Абай ауылынан шыққан арынды, адуынды, қазақтың арқалы ақыны Иранбек Оразбаев, Сырдың сырлы ақыны әрі сазгер – Ділдахан Торғаева бүгінгі алдаспан жырдың жүйріктері. Бір жағынан осы ауылының талантты түлектері екендігін жас ұрпақ білгені абзал, – деді.</blockquote>Ардагер-ұстаз Марал Оспанова Абай ауылындағы №138 Абай атындағы орта мектепте 40 жылға жуық шәкірттерге білім бере жүріп, ақындықты қатар өрбіткен жан. Ол 1995 жылы Абайдың 150 жылдығына арналған меретойда Ұлы ақынға арнап мұражай ашып, ҚР «Білім беру ісінің үздігі» төсбелгісінің иегері атанды. Ол жырларында туған жер келбеті мен сұлу табиғатты кеңінен арқау еткен. Жүректі тербетер сезім жырлары мен шымыр өлеңдері тыңдармандарын баурай түседі.&nbsp;Осы кеште мектеп оқушылары ақын жырларын оқып, өлең сөздеріне жазылған бірнеше әндерін ұстаздар мен шәкірттері тамылжыта шырқады. Әсіресе, ақынның сөзіне жазылған «Абай ауылым» әні ерекше толқыныспен орындалды.&nbsp;Іс-шара соңында елге белгілі ақын Ділдахан Торғаева кеш иесі Марал Оспановаға шығармашылық табыс тілеп, өзінің жақында шыққан «Өлеңмен өрдім өмірімді» атты жыр кітабын тарту етті. Мұнан соң Абай ауылдық мәдениет үйінің директоры Әйгерім Исабекова сөз алып, кеш қатысушыларына алғыс білдірді. Абай ауылындағы өткен жыр кеші көрерменге ерекше көңіл-күй сыйлады. &nbsp;

 «Ұстаз жүрегі жырлайды» атты шығармашылық кеш өтті

<a href="https://kyzylorda-news.kz/ru">Kyzylorda-news.kz.</a>&nbsp;Биыл Қызылорда облыс бойынша газдандыру деңгейін 72 пайызға жеткізу жоспарлануда. Тиісінше, осы жылы 11 елді мекеннің газдандыру жобасы толық аяқталып, 40 мыңға жуық халық көгілдір отынның игілігін көреді. Бұдан бөлек, өңірдегі жылу желілерін қайта жаңарту бойынша 8 жоба қарастырылып, «Ауыл ел бесігі» бағдарламасы аясында 10 әлеуметтік нысанның қазандықтары жөнделмекші. Бұл туралы Өңірлік коммуникациялар қызметінің ақпарат алаңында облыстық энергетика және тұрғын үй-коммуналдық шаруашылық басқармасының басшысы Руслан Нұрмағанбетов мәлімдеді.<blockquote>«Биыл облыста 26 газбен жабдықтау жобасы жүзеге асырылады. Бұл қаржыға былтыр басталған 6 жобаның жұмысы жалғасып, 20 жаңа жобаның құрылысы басталатын болады. Осылайша аймақтағы табиғи газбен қамтамасыз ету деңгейін 70 пайыздан 72 пайызға жеткізу жоспарлануда. Өздеріңізге мәлім, қаламызда құны 215 млрд.теңгені құрайтын қуаттылығы 240 мегаватты жаңа жылу электр орталығын салынады. Қазіргі таңда жаңа нысан аумағында жерді тегістеу, инженерлік-геодезиялық жұмыстар қарқынды жүргізілуде. Аймақты толық ауыз сумен қамтамасыз ету мәселесі де күн тәртібінен түскен емес. Бүгінде Қызылорда, Арал, Қазалы, Байқоңыр қалалары орталықтандырылған ауыз суға толық қосылған. Ал 230 елді мекеннің 98,1 пайызы таза ауыз сумен қамтылған. Қалған елді мекендерді таза сумен жабдықтау үшін «Қуатты өңірлер – ел дамуының драйвері» және «Ауыл ел бесігі» бағдарламаларымен 23 жоба қолға алынады. Қазіргі таңда құрылыс жұмыстары басталды. Бұдан бөлек, облыста күрделі жөндеуді қажет ететін 550 көпқабатты тұрғын үй бар. Биыл оның 18-не республикалық бюджеттен қаржы бөлініп, жөндеу жұмыстары жүргізіледі», - деді басқарма басшысы Руслан Аймырзаұлы.</blockquote>

«Ауыл ел бесігі»: Қызылордада 10 әлеуметтік нысанның қазандықтары жөнделеді

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласындағы Назарбаев Зияткерлік мектебі &nbsp;NIS-тің ауқымды челленджіне қосылды. Білім ордасы «100 күй тарихы» жобасы аясында оқу жылының соңында «Күй құдіреті» атты домбырадан ашық сабақ өткізіліп, оқушылар арасында ұлттық өнер дәріптелді. &nbsp;Өткен жылдан бері NIS бағдарламаcына домбыра сабағы негізгі пән ретінде енгізілді. 7-сынып оқушылары қазақтың ұлттық музыкалық аспабын меңгеріп, күмбірлеген күйлерді орындау техникасын үйреніп келеді. Бүгін жыл бойына жинаған тәжірибелерін жас өрендер ашық сабақ барысында шыңдады.&nbsp;Мектептің қосымша білім беру педагогі, белгілі сазгер &nbsp;Үкітай Ерниязов Құрманғазы Сағырбайұлының «Адай» күйін орындап, тарту техникасын түсіндірсе, домбыра үйірмесінің жетекшісі Жәнібек Тұрғанбай мен педагог-куратор Нұржан Бисенбаев аспаптық пьесаның &nbsp;шығу тарихы мен мәнін түсіндірді.&nbsp;<blockquote>— «Бұл күй адайлардың түрікмендермен шайқасы кезінде дүниеге келді. Қазақтар арасынан шыққан батыр аттардың құйрығына қойдың терісінен жасалған тулақты байлап, жерге сүйрегенде жердің шаңы шығып, оны көрген түрікмендер бізден көп әскер келе жатыр деп қашқан. Құрманғазы адай тайпасының тапқырлығына, батырлығына таң қалып, сол жерде «Адай» күйін шығарған екен. Адай күйін тыңдасаң жауға шапқан ержүрек батырлардың айқайы мен аттардың шапқан дүбірі естіледі.», – дейді жоба координаторы Нұржан Бисенбаев.&nbsp;</blockquote>Сабақ барысында оқушылар қазақ күйін әлемге таныту бойынша өз ойларымен бөлісті және викториналық ойында білімдерін арттырды.

Қызылордадағы NIS-те оқу жылын домбыра сабағы аяқтайды

<a href="https://kyzylorda-news.kz/">Kyzylorda-news.kz.</a> Бірнеше күннен бері ауданға қарасты ауылдарға ат басын бұрып, тұрғындармен кездесіп жүрген аудан әкімі Мұхтар Оразбаев бүгін Ақжона мен Алға ауылдық окургтеріне табан тіреді.&nbsp;Қазалы ауданында жыл басынан бері жасалған жүйелі жұмыстар аз емес. Ақжона халқымен кездескен тұста бұл жайында баяндап берген Мұхтар Әуесұлы, алдағы жоспарларды да тілге тиек етті.&nbsp;Шешімін тауып келе жатқан мәселелерге ризашылықтарын білдірген тұрғындар ұсыныс-пікірлерін де бүгіп қалмады. Мәселен, жайылымдық жер, аяқсу, жол жайы сөз етілді. Сонымен қатар ауыл сыртындағы көлдің мәселесі, төрт түліктерге екпе егу және кенелерге дезинфекция жасау сынды жайттар қозғалды. &nbsp;Жұртшылық тарапынан айтылған ұсыныстардың орынды екенін айтқан аудан басшысы сауалдар бойынша бірқатар сала басшыларына тиісті тапсырмалар берді.&nbsp;Мұнан соң Кеңес Одағының батыры Үрмәш Түктібаев атындағы ауылдың халқымен дидарласқан аудан әкімі Мұхтар Оразбаев ауданда шешімін тапқан жұмыстарды айтып, алдағы шаруаларды да ұмыт қалдырмады.&nbsp;Ауылда бой көтерген спорт кешеніне, асфальтталған көшелерге, басқа да қолға алынып жатқан жұмыстарға алғысын айтқан тұрғындар округтегі бірнеше көшеге түнгі жарықшам қажет екенін жасырмады. Сонымен қатар өзге де мәселелерді ортаға салды.&nbsp; Сауалдар бойынша аудан әкімі барлығын түсіндіріп берді.&nbsp;Аудан басшысы Алға ауылдық округіне сапары барысында асфальтталып жатқан көшелердің жұмысымен де танысты. Мердігер мекеме қызметкерлерімен кездесіп, құрылыстың сапалы болуын және уақытылы аяқталуын ескертті.Айта кетейік, аудан басшысы қос ауылдағы кездесуде жеке қабылдау өткізіп, тұрғындардың мәселелерін тыңдап, сауалдарға жауапты сала басшыларына тапсырма жүктеді.

Қазалы ауданының әкімі Ақжона мен Алға ауылдық округтерінде болды

<a href="https://kyzylorda-news.kz/ru">Kyzylorda-news.kz.</a> Қазалы жерінде аудандық орталық ауруханадан бөлек теміржол ауруханасы да күн-түн халыққа аянбай қызмет көрсетеді. Ғасырдан астам тарихы бар емдеу мекемесінің өңірдегі алар орны айрықша. Ақхалаттылар ордасының бүгінгі тыныс-тіршілігі туралы мекеме басшысы Құбыл Ршымбетовпен сұхбат жүргізуді жөн көрдік.– Құбыл Ршымбетұлы, аурухананың 120 жылдығына да аз қалыпты. Сондықтан алдымен өткенге көз жіберсек...– 1904 жылы Қазалы уезінде халыққа медициналық қызмет көрсету мақсатында амбулатория ашылды. Онда ең әуелі фельдшер және акушер жұмыс істеген. 1905 жылы Орынбор теміржол бөлімінің құрылуына байланысты теміржол ауруханасы ашылды. Осы жылы амбулатория 5 орындық болып қайта құрылады. Басында ауруларды фельдшер маманы ат арбамен аралап, медициналық қызмет көрсеткен. 1917 жылы теміржол ауруханасы 40 төсектік орынға көбейтіледі. Бұл сол кездің өзінде теміржол жұмысшыларының денсаулығына көп көңіл бөлінгенін көрсетеді.Ұлы Отан соғысы жылдарында теміржол ауруханасы госпитальға айналған. Түрлі жарақатпен түскен солдаттарды қабылдап, ем жасаған. Төсек саны 1970 жылы 220-ға дейін көбейтілді. 2000 жылдан бастап «Көліктік медицина қызметі» АҚ Қазалы филиалы теміржол ауруханасы, 2005 жылы қайта тіркеуден өтуіне байланысты «Көліктік медицина қызметі» АҚ Қазалы филиалы теміржол ауруханасы болды. 2017 жылдың 20 қыркүйегінде «Апаттар медицинасының теміржол госпитальдары» ЖШС филиалы «Қазалы теміржол ауруханасы» болып қайта құрылды. Қазіргі таңда «Қазалы теміржол ауруханасы» ЖШС болып аталады.– Сіздерде қызмет көрсету аясы шектеулі ме, әлде сырттан келгендерді де қабылдай бересіздер ме?– Біздің ұжым Қазалы, Арал, Қармақшы аудандарында тұратын теміржолшыларға, олардың отбасыларына, теміржол зейнеткерлерін көпсалалы мамандандырылған, алғашқы медико-санитарлық, консультациялық-диагностикалық медициналық көмек көрсетеді. Профилактикалық шаралар жүргізеді. Емделушілердің қолжетімді медициналық көмек алу құқығы қамтамасыз етілген. Жоспарлы емдеу кезінде ауруханаға жатқызбай, бас тарту жағдайлары жоқ. Науқастарды жатқызу «Портал бюросы» арқылы қабылданады, қалғаны күндізгі ауруханада емделеді.Аурухананың жаңа үлгiдегi ғимараты 1994 жылдан бастап жұмыс істеп келеді. Ондағы жер телiмiнiң ауданы – 5137,3 шаршы метрді құрайды. Үш қосалқы корпустағы дәрiхана, ас бөлiмі, кiр жуатын үй және басқалары санитарлық талаптарға сәйкес жабдықталған. Жоспарлы түрде 140 кереуетке есептелген. Филиал құрылымында консультациялық-диагностикалық қызмет көрсету үшін бір ауысымда 350 адамды қабылдауға арналған теміржол емханасы жұмыс істейді. Консультациялық-диагностикалық бөлімде 3 терапиялық, 4 педиатриялық, 6 жалпы тәжірибелік және 2 өндірістік дәрігер қызмет етеді. Емханаға қарасты жеті медициналық бекетте – 7 фельдшер және Сексеуіл, Төретам денсаулық пункттерінде – 2 линиялық дәрігер қызмет етеді.Мұнда ересектер мен балаларға амбулаториялық-емханалық, шұғыл алғашқы, ересектер мен балаларға көрсетілетін стационарды алмастыратын, мамандықтар бойынша консультациялық-диагностикалық және стационарлық медициналық көмектер көрсетіледі. Сондай-ақ, анестезиология және реаниматология, нефрология, жалпы терапия, хирургия, акушерлік және гинекология, невропатология, оториноларингология, эндокринология, педиатрия, жалпы дәрігерлік тәжірибе, кардиология, гастроэнтерология, дерматовенерология, стоматология, офтальмология, травматология және ортопедия, аллергология, пульмонология, онкология, рентгенология, гирудотерапия, нейрохирургия, медициналық реабилитология, дәстүрлі медицина, урология, трансфузиология, психиатрия, наркология, физиотерапия, емдік дене шынықтыру, массаж, эксперттік медициналық көмек жасалады.&nbsp;Сонымен бірге, ауруханада балалар мен ересек арасында нысаналы мақсаттағы топта «В», «С» гепатитке, әйелдер арасында жатыр обырына, колоноскоптық әдісімен ересектер арасында тік ішек, тоқ ішек обырына, ерлер арасында қуық безі, асқазан, өңеш және бауыр обырына, қан айналым жүйесі ауруларына, су қараңғылыққа, қант диабетіне тексеру жүргізіледі.– Тағы қандай қызметтерді жүзеге асырасыздар?– Аурухана құрамында бейінді бөлімшелер қызмет атқарады: хирургия бөлімінде 12, оның ішінде травматологиялық төсек, жоғары технологиялы медициналық көмек төсегі, гинекология бөлімінде 12 терапия бөлімінде 20, неврология бөлімінде 12, балалар бөлімінде 12, нейроинсульт бөлімінде 20, реанимация бөлімінде 8, ақылы қызмет бөлімінің керует саны 12, күндізгі стационарда 40, оның ішінде емханалық 15 төсек қойылған. Сонымен қатар, параклиникалық бөлімдер – клиника-диагностикалық, бактериологилық, биохимиялық, иммун-ферменттік зертхана, функционалдық диагностика жүргізу (рентгенологилық, рентгеноскопиялық зерттеулер, маммография, рентген, компьютерлік томография, «С-дуга» рентгенодиагностикалық аппарат, доплерография, барокамера, УДТ-диагностика, эхо-энцефалоскопиялық, фиброгастроскопиялық, эхоэнцефаллографиялық, доплерографиялық зерттеулер), физиотерапиялық бөлім емдік денешынықтыру, соққылы толқын терапиясы, үгу столы, мойын массажын жасау аппараты, парафин, емдік массаж, емдік тұзды және 10 түрлі дәрілік ванналар, кедр саунасы, су асты массажы, джакузи, мануалдық емдеу, Су-Джок емдеу, барокамера жұмыс істейді. Компьютерлік томография аппаратымен Арал, Қазалы және Қармақшы аудандарының халқына қызмет көрсетіледі. Айта кетсек, ауруханаға бекітілген стационарлық науқастар, мүгедектер, зейнеткерлер, жасөспірімдер, «Батыр ана» орденімен, «Алтын алқа», «Күміс алқа» белгілерімен марапатталған әйелдер және медициналық ұйымдардың жолдамасы бойынша пациенттер тегін өткізіледі.– Қазалы теміржол ауруханасының дамуына өзіндік қолтаңбасын қалдырған білікті мамандар жеткілікті. Соларды атап өтсеңіз…– Аурухананың даму тарихында көптеген бас дәрігерлер алмасты. Атап айтқанда, А.Заколодкин, Глушко, Е.Степанова, Б.Есмагамбетова, Ж.Қазмағамбетов, В.Лим, Қ.Сансызбаев аурухана ісінің ілгерілеуіне тер төгіп, халықтың ықыласына бөленді. Көп жылдар бойы медицина саласында еңбек етіп, зейнет демалысына шыққан дәрігерлер – А.Сейсенов, Г.Канатова, А.Жұбатов, А.Тлекешова, Қ.Сәрсенбаев, Қ.Каликов та өз ісінің мамандары болды. Ауруханада еңбек ететін тәжірибесі мол дәрігерлер – С.Артықбаев, Ж.Елеуов, М.Төребай, Е.Дәрібаев, С.Ахмет, Ш.Байбазарова, С.Төлегенов, Ш.Медетбаева, Б.Айжарықова, А.Кулбаева, Ж.Досбергенованың есімі теміржолшылар арасында ғана емес, бүкіл ауданға белгілі. Мекеменің есеп бөлімін жүргізетін бас есепші – К.Жақсылықова қаражаттың кіріс-шығысын орнымен реттейді. Ауруханада жалпы саны 410 маман, оның ішінде 66 дәрігер (6 жоғары санатты, 10 бірінші санатты, 2 екінші санатты, 202 (2 жоғары санатты, 38 бірінші санатты, 31 екінші санатты) орта медициналық қызметкер, 78 кіші медициналық қызметкер, 72 өзге қызметкерлер еңбек етеді.– Білуімізше, 2016 жылы нейроинсульттік бөлім ашылды. Бұның қазіргі аяқ алысы қалай?–2016 жылдың 15 ақпанынан Қызылорда облыстық денсаулық сақтау басқармасының бұйрығына сәйкес, аурухананың төсек қоры шеңберінде 24 төсектік нейроинсульттік орталық ашылды. Науқастарды дер кезінде қабылдап, жедел медициналық көмек көрсету үшін тиісті құрал-жабдықтар, құрылғылармен, дәрі-дәрмектермен, тасымалдауға арналған арбалар және лифтімен жарақталды. Үлкен және кіші операциялық залдар тәулік бойы нейрохирургиялық операциялар жасау үшін дайындалып, арнайы құралмен қамтамасыз етілген. Реанимациялық-анестезиологиялық бөлімше 9 төсекке кеңейтіліп, осы заманғы қондырғылармен қамтылып, нейрохирургиялық операциялардан кейінгі қосымша реанимациялық 4 төсектік палата ашылды.Сонымен қатар, аурухананың травматологиялық қызметі жоғары мамандандырылған медициналық көмек көрсетуге дайын және көрсетілген медициналық қызметті ақылы негізде жасауға толық мүмкіндігі бар. Бүгінгі таңда аурухананың материалдық-техникалық базасы жақсартылған, барлық бөлімдерге пластикалық терезелер орнатылып, жергілікті бу қазандығынан ыстық су келуі қамтамасыз етілді. Газбен жылытылады, ішкі су жүйесі пластикалық құбырларға ауыстырылды. Сондай-ақ, стационар ғимаратының сыртқы қабырғасы плиталармен көмкерілді.Тұрғындар денсаулығын жақсартуда мақсат еткен әріптестердің халыққа қызмет жолында мерейлі міндеттер үдесінен табыла береріне сенім мол.– Сұхбатыңызға рахмет!

Құбыл Ршымбетов: Халыққа жан-жақты консультациялық-диагностикалық медициналық көмек көрсетеміз

<a href="https://kyzylorda-news.kz/">Kyzylorda-news.kz.</a>&nbsp; Бұрнағы күні аудандық қоғамдық даму бөлімінің ұйымдастыруымен, «Еңбек даңқы» музейінде «31 мамыр – саяси қуғын-сүргін және ашаршылық құрбандарын» еске алу күніне орай саяси қуғын-сүргін құрбандарының ұрпақтарымен және нәубет жылдары Сыр өңіріне қоныс аударған этнос өкілдерінің ұрпақтарымен кездесу өткізілді. Іс-шараға аудан әкімінің орынбасары Талғат Нұртазаев, аудандық қоғамдық даму бөлімінің басшысы Бейбіт Смайлов, «Қызылорда облысының мемле¬кет¬тік архиві» КММ-нің «Сырдария аудандық архиві» филиалының басшысы Жәнібек Сейлов, аудандық тарихи-өлке¬тану музейінің директоры Салтанат Қуандықова, саяси қуғын-сүргін құрбандарын ақтау бойынша аудандық жұмысшы топ мүшелері, өзге этнос өкілдері, саяси қуғын-сүргін құрбандарының ұрпақтары, БАҚ өкілдері мен жастар қатысты.Іс-шарада аудандық орталық кітапхананың кітапханашысы Динара Пазылбекова «Тарихтан тағылым-өткенге тағзым» атты кітап көрмесі таныстырды. Сонымен бірге аудандық мұражай экскурсоводы Айжан Жұмабекова аудандық тарихи өлкетану музейінің «Жаралы жылдар жаңғыры» тақырыбындағы тарихи-құжаттық көрмесін тізбектеп жиналғандарға айтып берді. Ал аудандық мәдениет үйі өнерпаздарының &nbsp;«Алаш арыстары» атты театрландырылған қойылымы ұсыныды.Аталған іс-шара барысында сөз алған аудан әкімінің орынбасары Талғат Нұртазаев тарихи күннің маңыздылығына тоқталды.&nbsp;<blockquote>– &nbsp;ХХ ғасырда бірнеше қайталана орын алған репрессия жылдары және батыр халқымыздың басым бөлігінің жаны қиылған ашаршылық жылдарындағы ауыр да азапты күндер қазақ халқының тарихында қалғаны ел есінде. Әрбір күндер желісінде ата-бабымыздың бастан өткерген қиындықтары тізбектеліп жатыр. Шын мәнінде, Алаш қайраткерлерінің күрескерлігі, жанқиярлық табандылығы келер ұрпаққа үлгі-өнеге. Сонымен бірге талай жылдар бойы қуғын-сүргінге ұшыраған азаматтарды ақтау жұмыстары жүргізілуде. Осы күні саяси қуғын-сүргін құрбандарын ақтау бойынша аудандық жұмысшы топ мүшелері әрбір мәселенің тереңнен зерттеуде. Азаматтарымызды ақтауға күш салуда. Сол жылдары өзге ұлт өкілдері ауданымызға қоныс аударды, – деді аудан әкімінің орынбасары.&nbsp;</blockquote>Мұнан соң, саяси қуғын-сүргін құрбанының ұрпағы Айту Байдосов, Ссыр еліне қоныс аударған Кан Мила, аудандық жұмысшы топ мүшесі, Қазақстан Журналистер одағының мүшесі, өлкетанушы Жәнібек Маханбетов халқымыздың басына түскен нәубет-зобалаң халық жадынан ешқашан өшпейтіндігін, өткен тарихымызды ұмытпай, біздің болашағымыз үшін күрескен ата-баба рухына тағзым ету парызымыз екендігін айтып өтті.&nbsp;<blockquote>– Сол күндер, зұлматты жылдар қаншама жанның өмірін қиды. Біз аудандық жұмысшы топ мүшелері әрбір азаматтың өмірін мұқият зерделеуге көңіл бөлдік. Ұлт тарихында ойып тұрып орын алатын «31 мамыр – саяси қуғын-сүргін және ашаршылық құрбандарын еске алу күні» өз мән-мағынасын жоғалтпауы тиіс. Осы күні біздер өткен тарихымызға шолу жасап, Алаш қайраткерлерін еске аламыз. Олардың жазған еңбектеріне зер салсақ, сол күннің өзінде қазақты сауаттандыруға, ұлттық идеологияны жаңғырутуға күш салғандығын байқаймыз, – деді Жәнібек Маханбетов.&nbsp;</blockquote>Қаншама зобалаң жылдарды бастан кешкен қазағымның әрқайсысының айтқан зары, кешкен мұңы, жүріп өткен тар жолдары – бәрі-бәрі бүгінгі ұрпақтың құлағында, жүрегінде, мәңгі есінде! Ел тағдыры жолында жаны қиылған азаматтардың рухына тағзым ету, олардың еңбектері үшін алғыс білдіру тәуелсіз елдің кез-келген тұрғынының парызы!&nbsp;Аудан көлемінде «31 мамыр – саяси қуғын-сүргін және ашаршылық құрбандарын еске алу күні» кеңінен аталып өтілді. Мәселен, аудандық мәдениет үйінде 31 мамыр – Саяси қуғын сүргін және ашаршылық құрбандарын еске алуға арналған «Ызғарлы жылдар жаңғырығы...» атты еске алу іс-шарасы өткізілді.&nbsp;Танымдық іс-шара барысында жазықсыз жапа шеккен, елдің болашағы, ұрпақтың бақыты үшін күрескен асыл азаматтарды көпшілік бір минут үнсіздікпен еске алды. Сонымен қатар аудан өнерпаздары патриоттық әндер шырқады. Аудан жұртшылығы саяси қуғын-сүргін құрбандарын еске алды.&nbsp; &nbsp;

Сырдариялықтар саяси қуғын-сүргін құрбандарын еске алды

<a href="https://kyzylorda-news.kz/ru">Kyzylorda-news.kz.</a> Қазақтың ғасырлар бойы қалыптасқан тұрмысында ата-ананың ұрпаққа аманаты, баланың перзенттік парызы, олардың бір-біріне қатысты тәрбие үлгілері бар. Алайда қазір осы құндылықтардың өміршеңдігі жойылып бара жатқандай. Осыны назарға ала отырып, аудан әкімдігінде ­аудан әкімінің орынбасы Болат Ысмағұловтың төрағалығымен отбасылық-демографиялық саясат жөнінде аудандық комиссия отырысы өтті.Оған кент және ауыл әкімдері, комиссия мүшелері мен сала басшылары, ауылдық әйелдер кеңесінің төрайымдары мен БАҚ мүшелері қатысты.Комиссия отырысын аудан әкімінің орынбасары Б.Ысмағұлов ашып беріп, отбасылық құндылықтарды насихаттау, елдің келешегі – балалардың аман, салауатты, білімді болып өсуіне кепілдік беру мақсатында түрлі бағыттағы жұмыстары туралы баяндады. Содан соң білім саласы бойынша жастар арасындағы ертежүктілік, суицид мәселелері, ерлердің әйелдерге қатысты күтілетін өмір сүру ұзақтығындағы гендерлік алшақтық, ана мен бала өлімінің алдын алу бойынша атқарылған жұмыстары, Керделі ауылдық округіндегі әйелдер кеңесінің атқарылған жұмыстары, әлеуметтік көмек алушылар бойынша атқарылған жұмыстары айтылды.Күн тәртібіндегі мәселені алғаш болып баяндаған аудандық білім бөлімінің басшысы Жібек Баймұратова балалар мен жасөспірімдер арасындағы суицид пен ертежүктілік қоғамымыздың ең өзекті әлеуметтік проблемаларының бірі болып отырғанын атап өтті. Бұл өз кезегінде алдын алу шаралары кешенін қалыптастырудың жаңа тәсілдерін іздеуді, сондай-ақ уәкілетті органдардың балалар суицидінің алдын алуға, ертежүктілікке тосқауыл қоюға бағытталған іс-қимылдарындағы проблемалық аймақтарды анықтауды және шешуді талап етеді. Көптеген сарапшылардың пікірінше, суицидтің өсуіне психологтардың, тәуекел тобындағы ¬балалармен жұмыс жасайтын мамандардың біліктілігі мен дайындық деңгейінің жеткіліксіздігі ықпал етеді.Ал екінші мәселе бойынша аудандық көпбейінді орталық ауруханасы бас дәрігерінің ана мен бала денсаулығын қорғау жөніндегі орынбасары Гүлназира Сүлейменова отбасылық-гендерлік саясат саласындағы ағымдағы жағдай туралы баяндама жасады.<blockquote>«2023 жылдың 4 айының қорытындысы бойынша ауданда 78 167 мың адам тұрады. Бұл өткен жылға қарағанда 0,6 процентке төмендеген. Оның ішінде ерлер саны – 0,4 процентке, әйелдер ерлерге қарағанда – 0,8 процентке өскен. Гендерлік бөліністе аудан бойынша ерлерде күтілетін өмір сүру ұзақтығы – 64,1 жас, ал әйелдерде – 67,1 жас. Өмір сүру ұзақтығындағы айырмашылық – 3,4 жас», – деді Г.Сүлейменова.</blockquote>Рас, гендерлік тепе-теңдік әлі де болса қоғамда шешімін таппай отырған мәселе. Конституцияда әйелдер мен ерлердің тең құқықтары және еркіндіктері басты қағидат ретінде көрсетілген. ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның құрылуы еліміздегі гендерлік саясатты жүзеге асырудың маңызды бір қадамы болып саналады.Тиісінше, комиссия отырысында қатысушылар ана мен бала өлімінің деңгейі, отбасы институтын нығайту, ерлер мен әйелдердің мүмкіндіктерінің теңдігі, әйелдердің көшбасшылығын дамыту және басқа да көптеген өзекті мәселелерді талқыға салды.Басқосуда үшінші болып Керделі ауылдық округінің әйелдер кеңесінің төрайымы Разия Ысқаққызы сөз кезегін алды. Ол аталған елді мекенде әйелдер кеңесінің атқарған жұмыстарын, отбасы құндылығы турасында біраз ақпарат айтты. Отбасы тәрбиесіне бағытталған шараларды да тілге тиек етті.Күн тәртібінде тұрған төртінші мәселені яғни, әлеуметтік көмек алушылар бойынша атқарылған жұмыстарды «аудандық жұмыспен қамту, әлеуметтік бағдарламалар және АХАТ бөлімі» КММ басшысы Ағыбай Төлегенов сөз етіп, ¬жиынды қорытындылады.Комиссия мүшелері әр баяндамашы берген ақпаратты талқылап, көкейдегі ¬сауалдарын жодап, тиісті жұмыс істеуге шақырды.

«Отбасы – қоғамның алтын діңгегі»: Шиеліде комиссия отырыс өтті

<a href="https://kyzylorda-news.kz/">Kyzylorda-news.kz.</a> Биыл Қызылорда облысында кәсіпкерлердің саны 32,8 пайызға ұлғайды. Сәйкесінше, жұмыс істеп тұрған белсенді кәсіпкерлердің саны 39,2 пайызға артты. Бұл туралы Өңірлік коммуникациялар қызметінің ақпарат алаңында өткен баспасөз конференциясында облыстық кәсіпкерлік және өнеркәсіп басқармасы басшысының орынбасары Ринат Сұлтангереев мәлімдеді.<blockquote>«Шағын және орта кәсіп экономиканы дамытуда айрықша рөл атқарады. Бүгінде аймағымызда шағын және орта кәсіпкерлікте 121 мыңнан астам адам жұмыспен қамтылып, облыстың экономикалық белсенді халқының үштен бір бөлігін құрады. Осы жылы аталмыш кәсіпкерлікті 125 мың адамға жеткізу жоспарлануда. Бұл бастаманы іске асыруда Кәсіпкерлікті дамыту жөніндегі ұлттық жоба шеңбері дайындалып, 168 жоба субсидияланды. Сондай-ақ, «Қызылорда» өңірлік инвестициялық орталығы 273 жобаны қаржыландырды. Сонымен қатар өңіріміздегі өңдеу өнеркәсібі 1,9%–ға өсім көрсетті. Бұл ретте жиһаз өнеркәсібі мен жеңіл өнеркәсіп айрықша өсім көрсеткен. Биыл бірыңғай индустрияландыру картасы аясында 4 жоба іске қосылып, жергілікті тұрғындар 125 жаңа жұмыс орындарымен қамтылады. Аталмыш жобалар аймақ экономикасын дамытуда елеулі үлес қосарына сеніміміз мол. «Қармақшы құс» серіктестігінің қуаттылығы жылына 1500 тонна құс етін өндіруге қауқарлы құс фабрикасы іске қосылмақ. Ал, «Айғасар» серіктестігі жылына 36 мың тонна бие сүтін өңдесе, «Казах камел» зауыты 700 тонна түйе сүтінен құрғақ ұнтақ өндірмек. Сондай-ақ, «Арал кварц» зауыты 172,8 мың тонна құрғақ құрылыс қоспаларын өндіретін болады. Мұнан өзге шикізаттық емес экспорт көлемі 18,8%-ға өскен», - деді Ринат Қалдыбекұлы.</blockquote>Брифингте сала маманы биыл инвестиция саласы бойынша көрсеткіште оң динамика қалыптасқанын айтты. Яғни, былтырғы жылмен салыстырғанда өсім 42,1 пайызды құрады. Сондай-ақ, жеке инвестициялардың көлемі де жыл сайын артуда. Биылдың өзінде 70 млрд. теңгеге жеке инвестиция тартылып, өткен жылмен салыстырғанда 71 пайызға өскен.

Қызылорда облысында кәсіпкерлер саны артып келеді

<a href="https://kyzylorda-news.kz/">Kyzylorda-news.kz.</a> Қызылорда облыстық перинаталдық орталығы базасында пренатальды диагностиканың инвазивті әдістері жүргізіледі. Мамандар Қызылорда облысында тәжірибеге бірегей әдісті енгізіп қана қоймай, оны өңір тұрғындары үшін қолжетімді ете алды.Пренатальды диагностика – ұрықтың хромосомалық патологиясына күдік болған кезде пренатальды кариотиптеуді жүргізу үшін ұрық материалын (хорионбиопсия, амниоцентез, кордоцентез) алу мақсатында ультрадыбыстық бақылаумен жүргізілетін жатырішілік операция. Инвазивті зерттеу әдістері хромосомалық ауруларды, хромосомалық ауытқуларды, сондай-ақ моногендік ауруларды анықтау үшін ұрық материалын алу мақсатында генетик дәрігердің нұсқауы бойынша жүргізіледі.<blockquote>«ДДҰ мақұлдаған инвазивті диагностикаға жіберудің стандартты көрсеткіштері келесі талаптарды қамтиды — жүкті әйелдің жасы 37 жастан асқан болуы керек, жүктіліктің алғашқы апталарында кем дегенде 2 өздігінен түсік болуы, отбасында баланың Даун синдромы болуы, бірнеше туа біткен ақаулар, хромосомалық патологияның жоғары қаупі анықталған инвазивті емес сынақтардың нәтижелері және биохимиялық немесе ультрадыбыстық маркерлер. Мұндай диагностиканың мерзімі тоғызыншы апта мен жиырма бірінші апта аралығында жасалады», — дейді акушер-гинеколог Майра Әжібайқызы.</blockquote>Айта кетейік, инвазивті әдістер ұрықтың жасушалары мен тіндерін және провизорлық мүшелерді (хорион, плацента) алуға мүмкіндік береді. Материалды алу ультрадыбыстық бақылаумен трансабдоминальды түрде (іш қабырғасы арқылы) жүзеге асырылады

Қызылордадағы перинаталдық орталықта пренатальды диагностиканың инвазивті әдістері жүргізілуде

<a href="https://kyzylorda-news.kz/ru">Kyzylorda-news.kz.</a> Таяуда аудандық мәслихат хатшысының төрағасы Айтбай Жандарбеков аудандық партия филиалы жанындағы партиялық бақылау комиссиясының мүшелерімен бірге Көкшоқы мөлтек ауданындағы ашық алаңда (стадион) күрделі жөндеуден өтіп жатқан құрылыс жұмыстарын аралап қайтты.Оған қоғамдық кеңестің төрағасы Қаблеш Бекшеев, Насырбек Мырзабеков, партиялық бақылау комиссиясының мүшесі Ғани Есімов, «AMANAT» партиясы &nbsp;депутаттық фракциясының мүшелері Болат Сыздық, Нұргүл Шалекеева, Болат Сүлейменов, аудандық мәслихат депутаты Қанат Жүсіпов, аудандық мәдениет және спорт бөлімінің басшысы Аруна Әзімхан қатысты.Аралау барысында Насырбек Мырзабеков ашық алаңының күрделі жөндеу жұмыстарының баяу жүріп жатқанын тілге тиек етіп, басталған құрылыстың сапалы болуын айтып, жүргізіліп жатқан құрылыс жұмыстарына бірқатар ескертпелер жасады. Айта кетейік, Көкшоқы мөлтек ауданындағы ашық алаңының күрделі жөндеу жұмыстарына облыстық бюджеттен 224 630 000, аудандық бюджеттен 11 940 000 теңге қаржы қаралған. Бас мердігер компания «Корпорация – Алем құрылыс» ЖШС. Бас жобалаушы «Қызылорда Дос Строй Проект» ЖШС, Авторлық қадағалау «Темирлан Проект» ЖШС, Техникалық қадағалаушы «Қабылан эксперт» ЖШС.Күрделі жөндеуден өтіп жатқан нысан үстіміздегі жылдың маусым айында ел игілігіне пайдалануға беріледі деп көзделген. Одан кейін депутаттар Көкшоқы мөлтек ауданында жаңадан салынып жатқан 18 пәтерлік 4 тұрғын үйдің құрылыс нысанына бет алды.Депутаттар жаңадан салынған көпқабатты тұрғын үйді толық аралап, ендігі қалған жұмыстарына бақылау жұмыстарын жүргізіп, тұрғын үйді нақты қай уақытта пайдалануға берілетінін сұрады.&nbsp;<blockquote>«Шиелі кентіндегі 18 пәтерлік 4 тұрғын үйге 2020 жылдың мамыр айында құрылыс-монтаж жұмыстары басталғаны белгілі. Бас мердігері компания «Жабдықтау» ЖШС-і. Келісім-шарт сомасы – 709 737 410,59 теңге. Авторлық қадағалаушы «Сартөбе» ЖШС. Техникалық қадағалаушы «Крез-Сервис» ЖШС-і. Жоба бойынша әр тұрғын үйде 12 пәтер 2 бөлмелі, 6 пәтер 3 бөлмелі. Қарқын алған бұл құрылыстың баяулап, бәсеңдеп қалғаны құрылыс материалдарының қымбаттауына байланысты жобаға қайта түзету жұмыстары енгізіліп, жергілікті бюджеттен қосымша 113 миллион теңге көлемінде қаржы қаралып, қайтадан құрылыс жұмыстары жүргізілген. Көпті күттірген көпқабатты тұрғын үй тамыз айында пайдалануға беріледі деп жоспарлануда», – деді аудандық құрлыс-сәулет бөлімінің басшысы Дана Аман.</blockquote>Аралау соңында аудандық мәслихат хатшысы Айтбай Жандарбеков құрылыс сапасына жіті мән беріліп, бөлінген қаражаттың тиімді игерілуін және жұмысшылардың қауіпсіздік ережелерінің қатаң сақталуын, &nbsp;жалақының уақытылы берілуі қажет екенін айтты.

Архив